DCV – Tattvārthaślokavārttika

Vidyānandin's Tattvārthaślokavārttika with AlaṅkāraCreation of the digital textresourceH. TrikhaPublished within the Digital Corpus of Vidyānandin's Works at www.dipal.org/dcv  under a Creative Commons Attribution-NonCommercial-ShareAlike 4.0 International LicenseJanuary 09, 2025Print edition: Vidyānandisvāmi-viracitaṃ Tattvārthaślokavārtikaṃ Manoharlālnyāyaśāstriṇā sampāditaṃ saṃśodhitaṃ ca. (Saraswati Oriental Research Sanskrit Series 16). Bombay 1918.Digital text resource: /home/deploy/dipal/public/dcv-site/root-resources/TASVA/TASVA, October 09, 2024The file at hand, "TASV-ML-b", is a transformation of the file "TASVA", an TEI P5 ODD-resource for 1) the digitized print edition and for 2) a digital edition of the Tattvārthaślokavārttikālaṅkāra and the Tattvārthaślokavārttika. Main steps in the preparation: Diplomatic capture of the 1918 print edition by SwiftTechnologies, Mumbai,Dez. 2012 – Jan. 2013Transliteration with H. Lasic' programme „dev2trans“, September 2013 Segmentation of syntactical units in the translitertation, S. Pajor 2014Standardization of tags in order to prepare a plain text file, silent acceptance of Payor's corrections with regard to changes of spacing, characters and suggested avagrahas, H. Trikha 2016Application of the conventions of the Text Encoding Initiative by V. Angermeier, January 2020, and H. Trikha March 2022 Excluded in plain text: type=note-block-container, type=note-block-page-foot, reftype=no-foot, notetype=inline-commentnoteana=not-accepted, Non-accepted notes are indicted with brackets in full text. All such remarks are removed in plain-text. Accepted notes (ana="accepted", e.g., type="text-addition"), are indicated in full text with css-induced round-brackets. In plain text such brackets are not induced, the text-addtion therefore appear as part of the attestations' text. śrīparamātmane namaḥ śrīmadvidyānaṃdisvāmiviracitaṃ tattvārthaślokavārtikam  prathamo 'dhyāyaḥ  śrīvardhamānam ādhyāya ghātisaṃghātaghātanam  vidyāspadaṃ pravakṣyāmi tattvārthaślokavārtikam    prabuddhāśeṣatattvārthe sākṣāt prakṣīṇakalmaṣe  siddhe munīndrasaṃstutye mokṣamārgasya netari    satyāṃ tatpratipitsāyām upayogātmakātmanaḥ  śreyasā yokṣyamāṇasya pravṛttaṃ sūtram ādimam    naikāṃtākṛtrimāmnāyamūlatve sya pramāṇatā  tadvyākhyātur asarvajñe rāgitve vipralaṃbhanāt    nāpy asatyāṃ bubhutsāyām ātmano 'cetanātmanaḥ  khasyeva muktimārgopadeśāyogyatvaniścayāt    saṃpradāyāvyavacchedāvirodhād adhunā nṛṇām  sadgotrādyupadeśo tra yadvattadvadvicārataḥ    pramāṇam āgamaḥ sūtram āptamūlatvasiddhitaḥ  laiṃgikaṃ vāvinābhāviliṃgāt sādhyasya nirṇayāt    tatra nāsty eva sarvajño jñāpakānupalaṃbhanāt  vyomāṃbhojavad ity etat tamas tam avijṛṃbhitam    sūkṣmādyarthopadeśo hi tatsākṣātkartṛpūrvakaḥ  paropadeśaliṃgākṣānapekṣāvitathatvataḥ    sūkṣmādyartho pi vādhyakṣaḥ kasyacit sakalaḥ sphuṭam  śrutajñānādhigamyatvān nadīdvīpādīdeśavat    na hetoḥ sarvathaikāṃtair anekāṃtaḥ kathaṃcana  śrutajñānādhigamyatvāt teṣāṃ dṛṣṭeṣṭabādhanāt    sthānatrayāvisaṃvādiśrutajñānaṃ hi vakṣyate  tenādhigamyamānatvaṃ siddhaṃ sarvatra vastuni    tato 'siddhaṃ parasyātra jñāpakānupalaṃbhanam  no bhāvasādhanāyālaṃ sarvatattvārthavedinaḥ    svasaṃbaṃdhi yadīdaṃ syād vyabhicāripayonidheḥ  aṃbhaḥ kuṃbhādisaṃkhyānaiḥ sadbhir ajñāyamānakaiḥ    sarvasaṃbaṃdhi tadboddhuṃ kiṃcid bodhair na śakyate  sarvaboddhāsti cet kaścit tadboddhā kiṃ niṣidhyate    sarvasaṃbaṃdhisarvajñajñāpakānupalaṃbhanam  na cakṣurādibhir vedyam atyakṣatvād adṛṣṭavat    nānumānādaliṃgatvāt kārthāpattyupamāgatiḥ  sarvasyānanyathābhāvasādṛśyānupapattitaḥ    sarvapramātṛsaṃbaṃdhi pratyakṣādinivāraṇāt  kevalāgamagamyaṃ ca kathaṃ mīmāṃsakasya tat    kāryerthe codanājñānaṃ pramāṇaṃ yasya saṃmatam  tasya svarūpasattāyāṃ tannaivātiprasaṃgataḥ    tadjñāpakopalaṃbhasyābhāvo 'bhāvapramāṇataḥ  sādhyate cen na tasyāpi sarvatrāpy apravṛttitaḥ    gṛhītvā vastusadbhāvaṃ smṛtvā tatpratiyoginam  mānasaṃ nāstitājñānaṃ yeṣām akṣānapekṣayā    teṣām aśeṣanṛjñāte smṛte tadjñāpake kṣaṇe  jāyate nāstitājñānaṃ mānasaṃ tatra nānyathā    na vāśeṣanarajñānaṃ sakṛt sākṣād upeyate  na kramād anyasaṃtānapratyakṣatvānabhīṣṭitaḥ    anekāṃte hi vijñānam ekāṃtānupalaṃbhanam  tadvidhis tanniṣedhaś ca mato naivānyathāmatiḥ    naivaṃ sarvasya sarvajñajñāpakānupadarśanam  siddhaṃ taddarśanāropo yena tatra niṣidhyate    āsan saṃti bhaviṣyaṃti boddhāro viśvadṛśvanaḥ  madanye pīti nirṇītir yathā sarvajñavādinaḥ    kiṃcij jñasyāpi tadvan me tenaiveti viniścayaḥ  ity ayuktam aśeṣajñasādhanopāyasaṃbhavāt    yathāham anumānādeḥ sarvajñaṃ vedmi tattvataḥ  tathānye pi narāḥ saṃtas tadboddhāro niraṃkuśāḥ    yathā mama na tadjñapter upalaṃbho sti jātucit  tathā sarvanṛṇām ity ajñānasyaiva viceṣṭitam    hetor naratvakāyādimattvāder vyabhicārataḥ  syādvādinaiva viśvajñam anumānena jānatā    jñāpakānupalaṃbho sti tan na tatpratiṣedhataḥ  kārakānupalaṃbhas tu pratighātīṣyate 'grataḥ    kalmaṣaprakṣayaś cāsya viśvatattvāt pratīyate  tam aṃtareṇa tadbhāvānupapattiprasiddhitaḥ    jāyate tadvidhaṃ jñānaṃ sve sati pratibaṃdhari  spaṣṭasvārthāvabhāsitvān nirdoṣanayanādivat    kṣīyate kvacid āmūlaṃ jñānasya pratibaṃdhakam  samagrakṣayahetutvāl locane timirādivat    moho jñānadṛgāvṛttyaṃtarāyāḥ pratibaṃdhakāḥ  kevalasya hi vakṣyaṃte tadbhāve tadanudbhavāt    teṣāṃ prakṣayahetū ca pūrṇau saṃvaranirjare  te tapotiśayāt sādhoḥ kasyacid bhavato dhruvam    tapo hy anāgatāghaughapravartananirodhanam  tajjanmahetusaṃghātapratipakṣayato yathā    bhaviṣyatkālakūṭādivikāraughanirodhanam  maṃtradhyānavidhānādi sphuṭaṃ loke pratīyate    nṛṇām apy aghasaṃbaṃdho rāgadveṣādihetukaḥ  duḥkhādiphalahetutvād atibhuktiviṣādivat    tadvirodhivirāgādirūpaṃ tapa ihocyate  tadasiddhāv atajjanmakāraṇapratipakṣatā    tadā duḥkhaphalaṃ karmasaṃcitaṃ pratihanyate  kāyakleśādirūpeṇa tapasā tatsajātinā    svādhyāyādisvabhāvena parapraśamamūrtinā  baddhaṃ sātādikṛtkarma śakrādisukhajātinā    tato niḥśeṣatattvārthavedī prakṣīṇakalmaṣaḥ  śreyomārgasya netāsti sa saṃstutyas tadarthibhiḥ    tasya darśanaśuddhyādibhāvanopāttamūrtinā  puṇyatīrthakaratvena nāmnā saṃpāditaśriyaḥ    sthitasya ca ciraṃ svāyur viśeṣavaśavartinaḥ  śreyomārgopadeśitvaṃ kathaṃcin na virudhyate    jñānamātrāt tu yo nāma muktim abhyeti kaścana  tasya tan na tataḥ pūrvam ajñatvāt pāmarādivat    nāpi paścād avasthānābhāvād vāgvṛttyayogataḥ  ākāśasyeva muktasya kvopadeśapravartanam    saṃskārasyākṣayāt tasya yady avasthānam iṣyate  tatkṣaye kāraṇaṃ vācyaṃ tattvajñānāt paraṃ tvayā    saṃskārasyāyurākhyasya parikṣayanibaṃdhanam  dharmam eva samādhiḥ syād iti kecit pracakṣate    vijñānāt so pi yady anyaḥ pratijñāvyāhatis tadā  sa cāritraviśeṣo hi mukter mārgaḥ sthito bhavet    jñānam eva sthirībhūtaṃ samādhir iti cen matam  tasya pradhānadharmatve nivṛttis tatkṣayād yadi    tadā so pi kuto jñānād uktadoṣānuṣaṃgataḥ  samādhyaṃtarataś cen na tulyaparyanuyogataḥ    tasya puṃsaḥ svarūpatve prāg eva syāt parikṣayaḥ  saṃskārasyāsya nityatvān na kadācid asaṃbhavaḥ    āvirbhāvatirobhāvāv api nātmasvabhāvagau  pariṇāmo hi tasya syāt tathā prakṛtivac ca tau    tataḥ syādvādināṃ siddhaṃ mataṃ naikāṃtavādinām  bahiraṃtaś ca vastūnāṃ pariṇāmavyavasthiteḥ    mithyārthābhiniveśena mithyājñānena varjitam  yat puṃrūpam udāsīnaṃ tac ced dhyānaṃ mataṃ tava    haṃta ratnatrayaṃ kiṃ na tataḥ param iheṣyate  yato na tannimittatvaṃ mukter āsthīyate tvayā    yady ajñānasvabhāvaḥ syāt kapilo nopadeśakṛt  suṣuptavatpradhānaṃ vācetanatvād ghaṭādivat    jñānasaṃsargato py eṣa naiva jñānasvabhāvakaḥ  vyoma tadvadviśeṣasya sarvathānupapattitaḥ    etenaiveśvaraḥ śreyaḥpathaprakhyāpane 'prabhuḥ  vyākhyāto 'cetano hy eṣa jñānād arthāṃtaratvataḥ    vijñānasamavāyāc cec cetano 'yam upeyate  tatsaṃsargāt kathaṃ na jñaḥ kapilo pi prasiddhyati    pradhānāśrayi vijñānaṃ na puṃso jñatvasādhanam  yadi bhinnaṃ kathaṃ puṃsas tat tatheṣṭaṃ jaḍātmabhiḥ    jñānāśrayatvato vedhā nityaṃ jño yadi kathyate  tad eva kiṃkṛtaṃ tasya tato bhede pi tattvataḥ    samavāyo hi sarvatra na viśeṣakṛdekakaḥ  kathaṃ khādīni saṃtyajya puṃsi jñānaṃ niyojayet    viśiṣṭaḥ samavāyo 'yam īśvarajñānayor yadi  tadā nānātvam etasya prāptaṃ saṃyogavattakam    anāśrayaḥ kathaṃ cāyam āśrayair yujyate ṃjasā  tadviśeṣaṇatā yena samavāyasya gamyate    viśeṣaṇatve caitasya vicitrasamavāyinām  viśeṣaṇatve nānātvaprāptir daṃḍakaṭādivat    tato 'rthasyaiva paryāyaḥ samavāyo guṇādivat  tādātmyapariṇāmena kathaṃcid avabhāsanāt    tadīśvarasya vijñānasamavāyena yā jñatā  sā kathaṃcit tadātmatvapariṇāmena nānyathā    tathānekāṃtavādasya prasiddhiḥ kena vāryate  pramāṇabādhanādbhinnasamavāyasya tadvataḥ    sugato pi na mārgasya praṇetā vyavatiṣṭhate  tṛṣṇāvidyāvinirmuktes tatsamākhyātakhaṅgivat    jagaddhitaiṣitāsakter buddho yady avatiṣṭhate  tathaivātmahitaiṣitvabalāt khaṅgīha tiṣṭhatu    tathāgatopakāryasya jagato 'naṃtatā yadi  sarvadāvasthitau hetur mataḥ sugatasaṃtateḥ    khaṅgino py upakāryasya svasaṃtānasya kiṃ punaḥ  na syād anaṃtatā yena tanniranvayanirvṛtiḥ    svacittaśamanāt tasya saṃtāno nottaratra cet  nātmānaṃ śamayiṣyāmīty abhyāsasya vidhānataḥ    na cāṃtyacittaniṣpattau tatsamāptir vibhāvyate  tatrāpi śamayiṣyāmīty eṣyacittavyapekṣaṇāt    ciṃtāṃtarasamāraṃbhi nāṃtyaṃ cittam anāsravam  sahakārivihīnatvāt tādṛgdīpaśikhā yathā    ity ayuktam anaikāṃtād buddhacittena tādṛśā  hitaiṣitvaṃnimittasya sadbhāvo pi samo dvayoḥ    caramatvaviśeṣas tu netarasya prasiddhyati  tato 'naṃtaranirvāṇasiddhyabhāvāt pramāṇataḥ    mā bhūt tacchāṃtanirvāṇaṃ sugato stu pramātmakaḥ  śāsteti cen na tasyāpi vākpravṛttivirodhataḥ    viśiṣṭabhāvanodbhūtapuṇyātiśayato dhruvam  vivakṣām aṃtareṇāpi vāgvṛttiḥ sugatasya cet    siddhaṃ paramataṃ tasya sānvayatve jinatvataḥ  pratikṣaṇavināśitve sarvathārthakriyākṣatiḥ    saṃtānasyāpy avastutvād anyathātmā tathocyatām  kathaṃcid dravyatādātmyād vināśas tasya saṃbhavāt    pūrvakālavivakṣāto naṣṭāyā api tattvataḥ  sugatasya pravartaṃte vāca ity apare viduḥ    teṣāṃ savāsanaṃ naṣṭaṃ kalpanājālam arthakṛt  kathaṃ na yuktimadhyās te śuddhasyātiprasaṃgataḥ    sānnidhyamātratas tasya ciṃtāratnopamasya cet  kuṭyādibhyo pi vācaḥ syur vineyajanasaṃmatāḥ    kim evam īśvarasyāpi sāṃnidhyāj jagad udbhavat  niṣidhyate tadā caiva prāṇināṃ bhogabhūtaye    sarvathānupakāritvān nityasyeśasya tan na cet  sugatasyopakāritvaṃ deśānāsu kim asti te    tadbhāvabhāvitā mātrā tasya tā iti cen matam  piśācādes tathaivaitāḥ kiṃ na syur aviśeṣataḥ    tasyādṛśyasya taddhetubhāvaniścityasaṃbhave  sugataḥ kiṃ nu dṛśyas te yenāsau tannibaṃdhanam    tato nāśvāsa evaitaddeśanāstu parīkṣayā  satāṃ pravartamānām iti kaiścit subhāṣitam    citrādyadvaitavāde ca dūre sanmārgadeśanā  pratyakṣādivirodhaś ca bhedasyaiva prasiddhitaḥ    na nirodho na cotpattir na baddho na ca mocakaḥ  na baṃdho sti na vai muktir ity eṣā paramārthatā    na brahmavādināṃ siddhā vijñānādvaitavat svayam  nityasarvagataikātmāprasiddheḥ parato pi vā    tataḥ pramāṇānvitamokṣamārgapraṇāyakaḥ sarvavidastadoṣaḥ  syādvādabhāg eva nuter ihārhaḥ so 'rhan pare nehitahīnamārgāḥ    svasaṃvedanataḥ siddhaḥ sadātmā bādhavarjitāt  tasya kṣmādivivartātmany ātmany anupapattitaḥ    svasaṃvedanam apy asya bahiḥkaraṇavarjanāt  ahaṃkārāspadaṃ spaṣṭam abādham anubhūyate    tadvilope na vai kiṃcit kasyacid vyavatiṣṭhate  svasaṃvedanamūlatvāt sveṣṭatattvavyavasthiteḥ    saṃvedanāṃtareṇaiva viditād vedanād yadi  sveṣṭāsiddhir upeyeta tadā syād anavasthitiḥ    prācyaṃ hi vedanaṃ tāvan nārthaṃ vedayate dhruvam  yāvan nānyena bodhena vuddhyaṃ so py evam eva tu    nārthasya darśanaṃ siddhyet pratyakṣaṃ suramaṃtriṇaḥ  tathā sati kṛtaś ca syān matāṃtarasamāśrayaḥ    vibhinnalakṣaṇatvāc ca bhedaś caitanyadehayoḥ  tattvāṃtaratayā toyatejovad iti mīyate    bhinnapramāṇavedyatvād ity apy etena varṇitam  sādhitaṃ bahir aṃtaś ca pratyakṣasya vibhedataḥ    kṣityādisamudāyārthāḥ śarīreṃdriyagocarāḥ  tebhyaś caitanyam ity etan na parīkṣākṣameritam    vyaṃjakā na hi te tāvac cito nityatvaśaktitaḥ  kṣityāditattvavad jñātuḥ kāryatvasyāpy aniṣṭitaḥ    kuṃbhādibhir anekāṃto na syād eva kathaṃcana  teṣāṃ mataṃ gurutvena parair iṣṭaḥ pratītitaḥ    nāpi te kārakā vitter bhavaṃti sahakāriṇaḥ  svopādānavihīnāyās tasyās tebhyo 'prasūtitaḥ    nopādānād vinā śabdo vidyudādeḥ pravartate  kāryatvāt kuṃbhavad yady adṛṣṭakalpanam atra te    kva kāṣṭhāṃtargatād agner agnyaṃtarasamudbhavaḥ  tasyāviśeṣato yena tattvasaṃkhyā na hīyate    sūkṣmo bhūtaviśeṣaś ced upādānaṃ cito matam  sa evātmāstu cijjātisamanvitavapur yadi    tadvijātiḥ kathaṃ nāma cidupādānakāraṇam  bhavatas tejaso ṃbhovat tathaivādṛṣṭakalpanā    sattvādinā samānatvāc cidupādānakalpane  kṣmādīnām api tat kena nivāryeta parasparam    yena naikaṃ bhavet tattvaṃ kriyākārakaghāti te  pṛthivyāder aśeṣasya tatraivānupraveśataḥ    tasmād dravyāṃtarāpoḍhasvabhāvānvayi kathyatām  upādānaṃ vikāryasya tattvabhedo 'nyathā kutaḥ    sūkṣmo bhūtaviśeṣaś ca varṇādiparivarjitaḥ  svasaṃvedanavedyo yam anumeyo thavā yadi    sarvathā paṃcamaṃ bhūtam anātmajñasya siddhyati  sa eva paralokīti paralokakṣatiḥ katham    śarīrādaya evāsya yady upādānahetavaḥ  tadā tadbhāvabhāvitvaṃ vijñānasya prasajyate    vyatīte pīṃdriye 'rthe ca vikalpajñānasaṃbhavāt  na taddhetutvam etasya tasmin saty apy asaṃbhavāt    kāyaś cet kāraṇaṃ yasya pariṇāmaviśeṣataḥ  sadyo mṛtatanuḥ kasmāt tathā nāsthīyate munā    vāyuviśleṣatas tasya vaikalyāc cen nibaṃdhanam  caitanyam iti saṃprāptaṃ tasya sadbhāvabhāvataḥ    sāmagrījanikā naikaṃ kāraṇaṃ kiṃcid īkṣyate  vijñāne piṣṭatoyādir madaśaktāv iveti cet    saṃyukte sati kiṃ na syāt kṣmādibhūtacatuṣṭaye  caitanyasya samudbhūtiḥ sāmagyrā api bhāvataḥ    tadviśiṣṭavivartasyāpāyāc cet sa ka iṣyate  bhūtavyaktyaṃtarāsaṃgaḥ piṭhirādāv apīkṣyate    kālaparyuṣitatvaṃ cet piṣṭādivad upeyate  tat kiṃ tatra na saṃbhāvyaṃ yena nātiprasajyate    bhūtāni katicit kiṃcit kartuṃ śaktāni kenacit  pariṇāmaviśeṣeṇa dṛṣṭānīti mataṃ yadi    tadā dehīṃdriyādīni cidviśiṣṭāni kānicit  cidvivartasamudbhūtau saṃtu śaktāni sarvadā    tathā sati na dṛṣṭasya hānir nādṛṣṭakalpanā  madhyāvasthāvadādau ca ciddehādeś cidudbhavāt    tataś ca cidupādānāc cetaneti viniścayāt  na śarīrādayas tasyāḥ saṃty upādānahetavaḥ    etena dehacaitanyabhedasādhanam iṣṭakṛt  kāryakāraṇabhāvenety etad dhvastaṃ nibuddhyatām    dehasya ca guṇatvena buddher yā siddhasādhyatā  bhede sādhye tayoḥ sāpi na sādhvī tadasiddhitaḥ    na vigrahaguṇo bodhas tatrānadhyavasāyataḥ  sparśādivat svayaṃ tadvad anyasyāpi tathā gateḥ    tadguṇatve hi bodhasya mṛtadehe pi vedanam  bhavettvagādivadbāhyakaraṇajñānato na kim    sūkṣmatvān na kvacid bāhyakaraṇajñānagocaraḥ  paramāṇuvadevāyaṃ bodha ity apy asaṃgatam    jīvatkāye pi tatsiddher avyavasthānuṣaṃgataḥ  svasaṃvedanatas tāvad bodhasiddhau na tadguṇaḥ    jīvatkāyaguṇo py eṣa yady asādhāraṇo mataḥ  prāṇādiyogavan na syāt tadāniṃdriyagocaraḥ    sādhāraṇaguṇatve tu tasya pratyekam udbhavaḥ  pṛthivyādiṣu kiṃ na syāt sparśasāmānyavat sadā    ahaṃ sukhīti saṃvittau sukhayogo na vigrahe  bahiḥkaraṇavedyatvaprasaṃgān neṃdriyeṣv api    kartṛsthasyaiva saṃvitteḥ sukhayogasya tattvataḥ  pūrvottaravidāṃ vyāpī cidvivartas tadāśrayaḥ    syād guṇī cet sa evātmā śarīrādivilakṣaṇaḥ  kartānubhavitā smartānusaṃdhātā ca niścitaḥ    dravyato nādiparyaṃtaḥ sattvāt kṣityāditattvavat  sa syān na vyabhicāro sya hetor nāśinyasaṃbhavāt    kuṃbhādayo hi paryaṃtā api naikāṃtanaśvarāḥ  śāśvatadravyatādātmyāt kathaṃcid iti no matam    yathā cānādiparyaṃtatadviparyayarūpatā  ghaṭāder ātmano py evam iṣṭā sety aviruddhatā    sarvathaikāṃtarūpeṇa sattvasya vyāptyasiddhitaḥ  bahir aṃtar anekāṃtaṃ tad vyāpnoti tathekṣaṇāt    vṛhaspatimatasthityā vyabhicāro ghaṭādibhiḥ  na yukto tas taducchittiprasiddheḥ paramārthataḥ    sādhyasādhanavaikalyaṃ dṛṣṭāṃte pi na vīkṣyate  nityānityātmatāsiddhiḥ pṛthivyāder adoṣataḥ    ekasaṃtānagāś cittaparyāyās tattvato nvitāḥ  pratyabhijñāyamānatvāt mṛtparyāyā yathedṛśāḥ    sādṛśyāt pratyabhijñānaṃ nānāsaṃtānabhāvinām  bhedānām iva tatrāpīty adṛṣṭaparikalpanam    tad evedam iti jñānād ekatvasya prasiddhitaḥ  sarvasyāpy askhaladrūpāt pratyakṣād bhedasiddhivat    yathā bhedasya saṃvittiḥ saṃvādanam abādhitā  tathaikatvasya nirṇītiḥ pūrvottaravivartayoḥ    vartamānārthavijñānaṃ na pūrvāparagocaram  yogyatāniyamāt siddhaṃ pratyakṣaṃ vyāvahārikam    yathā tathaiva saṃjñānam ekatvaviṣayaṃ matam  na vartamānaparyāyamātragocaram īkṣyate    yathaiva vartamānārthagrāhakatve pi saṃvidaḥ  sarvasāṃpratikārthānāṃ vedakatvaṃ na buddhyate    tathaivānāgatātītaparyāyaikatvavedikā  vittir nānādiparyaṃtaparyāyaikatvagocarā    kramato 'naṃtaparyāyāneko vyāpnoti nā sakṛt  yathā nānāvidhākārāṃś citrajñānam anaṃśakam    yady aneko pi vijñānākāro 'śakyavivecanaḥ  syād ekaḥ puruṣo 'naṃtaparyāyo pi tathā na kim    yathaikavedanākārā na śakyā vedanāṃtaram  netuṃ tathāpi paryāyā jātucitpuruṣāṃtaram    bhinnakālatayā vittir yadi teṣāṃ vivecanam  bhinnadeśatayā vittir jñānākāreṣu kiṃ na tat    pītākārādisaṃvittiḥ pratyekaṃ citravedanā  na ced anekasaṃtānapītādijñānavanmatam    saha nīlādivijñānaṃ kathaṃ citram upeyate  yugapadbhāvirūpādijñānapaṃcakavattvayā    citrādvaitāśrayāc citraṃ tad apy astitv ati cen na vai  citram advaitam ity etadaviruddhaṃ vibhāvyate    tasya jātyaṃtaratvena virodhābhāvabhāṣaṇe  tathaivātmā saparyāyair anaṃtair avirodhabhāk    bhrāṃteyaṃ citratā jñāne niraṃśe 'nādivāsanā  sāmarthyād avabhāseta svapnātijñānavad yadi    tadā bhrāṃtetarākāram ekaṃ jñānaṃ prasiddhyati  bhrāṃtākārasya vā sattve cittaṃ sadasadātmakam    tac ca prabādhate 'vaśyaṃ virodhaṃ puṃsi paryayaiḥ  akramaiḥ kramavadbhiś ca pratītatvāviśeṣataḥ    niḥśeṣakalpanātītaṃ saṃcinmātraṃ mataṃ yadi  tathaivāṃtarbahirvastu samastaṃ tattvato stu naḥ    samastāḥ kalpanā hīmā mithyādarśananirmitāḥ  spaṣṭaṃ jātyaṃtare vastuny aprabādhaṃ cakāsati    anekāṃte hy apoddhārabuddhayo nekadharmagāḥ  kutaścit saṃpravartaṃte 'nyonyāpekṣāḥ sunītayaḥ    paropagatasaṃvittir anaṃśa nāvabhāsate  brahmavarttena tanmātraṃ na pratiṣṭhāmi yarti naḥ    nānākārasya naikasminn adhyāso sti virodhataḥ  tato na sat tad ity etat suspaṣṭaṃ rājaceṣṭitam    saṃvedanāviśeṣe pi dvayoḥ sarvatra sarvadā  kasyacid dhi tiraskāre na prekṣāpūrvakāritā    tasmād abādhitā saṃvitsukhaduḥkhādiparyayaiḥ  samākrāṃte nare nū na tatsādhanapaṭayasī    nīlavāsanayā nīlavijñānaṃ janyate yathā  tathaiva pratyabhijñeyaṃ pūrvatadvāsanodbhavā    tadvāsanā ca tatpūrvavāsanābalabhāvinī  sāpi tadvad iti jñānavādinaḥ saṃpracakṣate    teṣām apy ātmano lope saṃtānāṃtaravāsanā  samudbhūtā kuto na syāt saṃjñābhedāviśeṣataḥ    saṃtānaikatvasaṃsiddhir niyamāt sa kuto mataḥ  pratyāsatter na saṃtānabhede py asyāḥ samīkṣaṇāt    vyabhicāravinirmuktā kāryakāraṇabhāvataḥ  pūrvottarakṣaṇānāṃ hi saṃtānaniyamo mataḥ    sa ca buddhetarajñānakṣaṇānām api vidyate  nānyathā sugatasya syāt sarvajñatvaṃ kathaṃcana    svasaṃvedanam evāsya sarvajñatvaṃ yadīṣyate  saṃvedanādvayāsthānād gatā saṃtānasaṃkathā    kathaṃ cāvyabhicāreṇa kāryakāraṇarūpatā  keṣāṃcid eva yujyeta kṣaṇānāṃ bhedavādinaḥ    kālānaṃtaryamātrāc cet sarvārthānāṃ prasajyate  deśānaṃtaryato py eṣā kena skaṃdheṣu paṃcasu    bhāvāḥ saṃti viśeṣāc cet samānākāracetasām  vibhinnasaṃtatīnāṃ vai kiṃ neyaṃ saṃpratīyate    ekadravyasvabhāvatvāt kathaṃcit pūrvaparyayaḥ  upādānam upādeyaś cottaro niyamāt tataḥ    ekasaṃtānavartitvāt tathā niyamakalpane  pūrvāparavidor vyaktam anyonyāśrayaṇaṃ bhavet    kāryakāraṇabhāvasya niyamād ekasaṃtatiḥ  tatas tanniyamaś ca syān nānyāto vidyate gatiḥ    tasmāt svāvṛttiviśleṣaviśeṣavaśavartinaḥ  puṃsaḥ pravartate svārthaikatvajñānam iti sthitam    saṃtānavāsanābhedaniyamas tu kva labhyate  nairātmyavādibhir na syād yenātmadravyanirṇayaḥ    siddho py ātmopayogātmā yadi na syāt tadā kutaḥ  śreyomārgaprajijñāsā khasyevācetanatvataḥ    caitanyayogatas yasya cetanatvaṃ yadīryate  khādīnām api kiṃ na syāttadyogasyāviśeṣataḥ    mayi jñānam apīhedaṃ pratyayānumito nari  jñānasya samavāyo sti na khādiṣv ity ayuktikam    khādayo pi hi kiṃ naiva pratīyus tāvake mate  jñānam asmāsv iti kvātmā jaḍas tebhyo viśeṣabhāk    pratītiḥ śaraṇaṃ tatra kenāpy āśrīyate yadi  tadā puṃsaś cidātmatvaṃ prasiddham avigānataḥ    jñātāham iti nirrṇīteḥ kathaṃcic cetanātmatām  aṃtareṇa vyavasthānāsaṃbhavāt kalaśādivat    jñānavān aham ity eṣa pratyayo pi na yujyate  sarvathaiva jaḍasyāsya puṃso bhimanane tathā    jñānaṃ viśeṣaṇaṃ pūrvaṃ gṛhītvātmānam eva ca  viśeṣyaṃ jāyate buddhir jñānavān aham ity asau    tadgṛhītiḥ svato nāsti rahitasya svasaṃvidā  parataś cānavasthānād iti tatpratyayaḥ kutaḥ    nanv ahaṃpratyayotpattir ātmajñaptir nigadyate  jñānam etad iti jñānotpattis tadjñaptir eva ca    jñānavān aham ity eṣa pratyayas tāvatoditā  tadjñānāvedane py evaṃ nānavastheti kecana    te pi nūnam anātmajñā jñāpyajñāpakatāvidaḥ  sarvaṃ hi jñāpakaṃ jñātaṃ svayam anyasya vedakam    kiṃ cāhaṃpratyayasyāsya puruṣo gocaro yadi  tadā kartā sa eva syāt kathaṃ nānyasya saṃbhavaḥ    svasminn eva pramotpattiḥ svapramātṛtvam ātmanaḥ  prameyatvam api svasya pramitiś ceyam āgatā    tathā caikasya nānātvaṃ viruddham api siddhyati  na catasro vidhās teṣāṃ pramātrādiprarūpaṇāt    pramiteḥ samavāyitvam ātmanaḥ kartṛtā yadi  tadā nāsya prameyatvaṃ tannimittatvahānitaḥ    pramāṇasahakārī hi prameyo rthaḥ pramāṃ prati  nimittakāraṇaṃ prokto nātmaivaṃ svapramāṃ prati    narāṃtaraprameyatvam anenāsya nivāritam  kasyāpi svaprameyatve nyapramātṛtvakalpanāt    bādhyā kenānavasthā syāt svapramātṛtvakalpane  yathoktāśeṣadoṣānuṣaṃgaḥ kena nivāryate    svasaṃvedye nare nāyaṃ doṣo 'nekāṃtavādinām  nānāśaktyātmanas tasya kartṛtvādyavirodhataḥ    paricchedakaśaktyā hi pramātātmā pratīyate  prameyaś ca paricchedyaśaktyākāṃkṣākṣayāt sthitiḥ    kartṛrūpatayā vitter aparokṣaḥ svayaṃ pumān  apratyakṣaś ca karmatvenāpratīter itītare    teṣām apy ātmakartṛtvaparicchedyatvasaṃbhave  kathaṃ tadātmakasyāsya paricchedyatvaninhavaḥ    tato bhede narasyāsya nāparokṣatvanirṇayaḥ  na hi viṃdhyaparicchedye himādrar eparokṣatā    bhedābhedātmakatve tu kartṛtvasya narāt katham  na syāt tasya paricchedye nuḥ paricchedyatā sataḥ    pratyakṣatvaṃ tato ṃśena siddhaṃ nihnutaye katham  śrotriyaiḥ sarvathā cātmaparokṣatvoktadūṣaṇam    bhinnasya karaṇajñānāt phalajñānāc ca dehinaḥ  svayaṃ saṃviditātmatvaṃ kathaṃ vā pratipedire    yadi hetuphalajñānād abhedas tasya kīrtyate  parokṣetararūpatvaṃ tadā kena niṣidhyate    parokṣāt karaṇajñānād abhinnasya parokṣatā  pratyakṣāc ca phalajñānāt pratyakṣatvaṃ hi yujyate    tathaivobhayarūpatve tasyaitaddoṣaduṣṭatā  syādvādāśrayaṇaṃ cāstu kathaṃcid avirodhataḥ    pratyakṣe rthaparicchede svārthākārāv abhāsini  kim anyat karaṇajñānaṃ niṣphalaṃ kalpyate 'munā    tasyāpi ca parokṣatve pratyakṣo rtho na siddhyati  tato jñānāvasāyaḥ syāt kuto 'syāsiddhavedanāt    kathaṃ cātmā svasaṃvedyaḥ saṃvittir nopagamyate  yenopayogarūpo yaṃ sarveṣāṃ nāvigānataḥ    kathaṃcid upayogātmā pumān adhyakṣa eva naḥ  pratikṣaṇavivartādirūpeṇāsya parokṣatā    svarūpaṃ cetanā puṃsaḥ sadaudāsīnyavartinaḥ  pradhānasyaiva vijñānaṃ vivarta iti cāpare    teṣām adhyakṣato bādhā jñānasyātmani vedanāt  bhrāṃtiś cen nātmanas tena śūnyasyānavadhāraṇāt    audāsīnyādayo dharmāḥ puṃsaḥ saṃsargajā iti  yuktaṃ sāṃkhyapaśor vaktuṃ dhyādisaṃsargavādinaḥ    sadātmānavabodhādisvabhāvaś cetanatvataḥ  suṣuptāvasthavan nāyaṃ hetur vyāpyātmavādinaḥ    jīvo hy acetanaḥ kāye jīvatvād bāhyadeśavat  vaktum evaṃ samartho nyaḥ kiṃ na syāj jaḍajīvavāk    śarīrād bahir apy eṣa cetanātmā naratvataḥ  kāyadeśavad ity etatpratītyā vinivāryate    tathā hi bāhyadeśe pi puṃsaḥ saṃvedanaṃ na kim  kāyadeśavad eva syād viśeṣasyāpy asaṃbhavāt    kāyād bahirabhivyakter abhāvāt tadavedane  puṃso vyaktetarākārabhedād bhedaḥ kathaṃ na te    suṣuptasyāpi vijñānasvabhāvatvaṃ vibhāvyate  prabuddhasya sukhaprāptismṛtyādeḥ svapnadarśivat    yathā caitanyasaṃsiddhiḥ suṣuptāv api dehinaḥ  prāṇādidarśanāt tadvadbodhādiḥ kiṃ na siddhyati    jāgrataḥ sati caitanye yathā prāṇādivṛttayaḥ  tathaiva sati vijñāne dṛṣṭās tā bādhavarjitāḥ    prāṇādayo nivartaṃte yathā caitanyavarjite  vīraṇādau tathā jñānaśūnye pīti viniścayaḥ    sukhabuddhyādayo dharmāś cetanārahitā ime  bhaṃguratvādito vidyutpradīpādivad ity asat    hetor ātmopabhogenānekāṃtāt paramārthataḥ  so py anityo yataḥ siddhaḥ kādācit katvayogataḥ    kādācitkaḥ parāpekṣyasadbhāvād vibhramādivat  buddhyadhyavasitārthasya śabdāder upalaṃbhataḥ    parāpekṣyaḥ prasiddho yam ātmano nubhavo ṃjasā  parānapekṣitāyāṃ tu puṃdṛṣṭeḥ sarvadarśitā    sarvasya sarvadā puṃsaḥ siddhyupāyas tathā vṛthā  tato dṛgbodhayor ātmasvabhāvatvaṃ prasiddhyatu    kathaṃcin naśvaratvasyāvirodhān naryapīkṣaṇāt  tathaivārthakriyāsiddher anyathā vastutākṣateḥ    saṃsāravyādhividhvaṃsaḥ kvaci jjīve bhaviṣyati  tannidānaparidhvaṃsasiddher jvaravināśavat    tatparidhvaṃsanenātaḥ śreyasā yokṣyamāṇatā  puṃsaḥ syādvādināṃ siddhā naikāṃte tadvirodhataḥ    kālādilabdhyupetasya tasya śreyaḥpathe bṛhat  pāpāpāyāc ca jijñāsā saṃpravarteta rogivat    tadvān eva yathoktātmā pratipādyo mahātmanām  iti yuktaṃ munīṃdrāṇām ādisūtrapravartanam    nanu nirvāṇajijñāsā yuktā pūrvaṃ tadarthinaḥ  parijñāte bhyupeye rthe tanmārgo jñātum iṣyate    tan na prāyaḥ parikṣīṇakalmaṣasyāsya dhīmataḥ  svātmopalabdhirūpe smin mokṣe saṃpratipattitaḥ    pravādikalpanābhedād vivādo yo pi saṃbhavī  sa puṃrūpe tadādhārapadārthe vā na nirvṛtau    ye pi sarvātmanā mukter apahnavakṛto janāḥ  teṣāṃ nātrādhikāro sti śreyomārgāvabodhane    parokṣam api nirvāṇam āgamāt saṃpratīyate  nirbādhād bhāvisūryādigrahaṇākārabhedavat    śārīramānasāsātapravṛttir vinivartate  kvacit tatkāraṇābhāvād ghaṭīyaṃtrapravṛttivat    na kuṃbhakāracakrādibhrāṃtyānaikāṃtasaṃbhavaḥ  tatkāraṇasya vegasya bhāve tasyāḥ samudbhavāt    ato numānato py asti mokṣasāmānyasādhanam  sārvajñādiviśeṣas tu tatra pūrvaṃ prasādhitaḥ    evaṃ sādhīyasī sādhoḥ prāg evāsann anirvṛteḥ  nivāṇopāyajijñāsā tatsūtrasya pravartikā    praṇidhānaviśeṣotthadvaividhyaṃ rūpam ātmanaḥ yathāsthitārthaśraddhānaṃ samyagdarśanam uddiśet    svārthākāraparicchedo niścito bādhavarjitaḥ sadā sarvatra sarvasya samyagjñānam anekadhā    bhavahetuprahāṇāya bahirabhyantarakriyā vinivṛttiḥ paraṃ samyakcāritraṃ jñānino matam    niḥśeṣakarmanirmokṣaḥ svātmalābho 'bhidhīyate mokṣo jīvasya nābhāvo na guṇābhāvamātrakam    svābhipretapradeśāpter upāyo nirupadravaḥ sadbhiḥ praśasyate mārgaḥ kumārgo nyo vagamyate    tatra bhedavivakṣāyāṃ svavivartavivartinoḥ darśanaṃ jñānam ity eṣaḥ śabdaḥ karaṇasādhanaḥ    puṃso vivartamānasya śraddhānajñānakarmaṇā svayaṃ tacchaktibhedasya sāvidhyena pravartanāt    karaṇatvaṃ na bādhyeta vanher dahanakarmaṇā svayaṃ vivartamānasya dāhaśaktiviśeṣavat    nanv evam ātmano jñānaśaktau jñānadhvanir yadi tadārthagrahaṇaṃ naiva karaṇatvaṃ prapadyate    śaktiḥ kārye hi bhāvānāṃ sānnidhyaṃ sahakāriṇaḥ sā bhinnā tadvato tyaṃtaṃ kāryataś ceti kaścana    tasyārthagrahaṇe śaktir ātmanaḥ kathyate katham bhedādarthāṃtarasyeva saṃbaṃdhāt so pi kas tayoḥ    saṃyogo dravyarūpāyāḥ śakter ātmani manyate guṇakarmasvabhāvāyāḥ samavāyaś ca yady asau    tadāpy arthāṃtaratve sya saṃbaṃdhasya kathaṃ nijāt saṃbaṃdhino vadhāryeta tatsaṃbaṃdhasvabhāvatā    saṃbaṃdhāṃtarataḥ sā ced anavasthā mahīyasī gatvā sudūram apy aikyaṃ vācyaṃ saṃbaṃdhatadvatoḥ    tathā sati na sā śaktis tadvato tyaṃtabhedinī saṃbaṃdhābhinnasaṃbaṃdhirūpatvāt tatsvarūpavat    saṃyogo yutasiddhānāṃ padārthānāṃ yadīṣyate samavāyas tadā prāptaḥ saṃyogas tāvake mate    yutasiddhir hi bhāvānāṃ vibhinnāśrayavṛttitā dadhikuṃḍādivat sā ca samānā samavāyiṣu    tadvadvṛttir guṇādīnāṃ svāśrayeṣu ca tadvatām yutasiddhir yadā na syāt tadānyatrāpi sā katham    laukiko deśabhedaś ced yutasiddhiḥ parasparam prāptā rūparasādīnām ekatrāyutasiddhatā    vibhūnāṃ ca samastānāṃ samavāyas tathā na kim kathaṃcid arthatādātmyān nāviṣvagbhavanaṃ param    tad evābādhitajñānam ārūḍhaṃ śaktitadvatoḥ sarvathā bhedam āhaṃti pratidravyam anekadhā    tato rthagrahaṇākārā śaktir jñānam ihātmanaḥ karaṇatvena nirdiṣṭā na viruddhā kathaṃcana    ātmā cārthagrahākārapariṇāmaḥ svayaṃ prabhuḥ jñānam ity abhisaṃdhānakartṛsādhanatā matā    tasyodāsīnarūpatvavivakṣāyāṃ nirucyate bhāvasādhanatā jñānaśabdādīnām abādhitā    tathā cāritraśabdo pi jñeyaḥ karmānusādhanaḥ kārakāṇāṃ vivakṣātaḥ pravṛtter ekavastuni    vivakṣā ca pradhānatvād vāsturūpasya kasyacit tadā tadanyarūpasyāvivakṣā guṇabhāvataḥ    bhāvasya vāsato nāsti vivakṣā cetarāpi vā pradhānetaratāpāyād gaganāṃbhoruhādivat    sarvathaiva sato nena tadabhāvo niveditaḥ ekarūpasya bhāvasya rūpadvayavirodhataḥ    vivakṣā cāvivakṣā ca viśeṣye naṃtadharmiṇi sato viśeṣaṇasyātra nāsataḥ sarvathoditā    svābhipretārthasaṃprāptihetor atra pradhānatā bhāvasya viparītasya niścīyetāpradhānatā    naivātaḥ kalpanāmātravaśato sau pravartitā vastusāmarthyasaṃbhūtanutvād arthadṛṣṭivat    niraṃśasya ca tattvasya sarvathānupapattitaḥ naikasya bādhyate 'nekakārakatvaṃ kathaṃcana    pūrvaṃ darśanaśabdasya prayogo 'bhyārhitatvataḥ alpākṣarād api jñānaśabdād dvaṃdvo tra saṃmataḥ    jñānasamyaktvahetutvād abhyarho darśanasya hi tadabhāve tadudbhūter abhāvād dūrabhavyavat    viśiṣṭajñānataḥ pūrvabhāvāc cāsyāstu pūrvavāk tathaiva jñānaśabdasya cāritrāt prāk pravartanam    pratyekaṃ samyag ity etatpadaṃ parisamāpyate darśanādiṣu niḥśeṣaviparyāsanivṛttaye    tatsamyagdarśanādīni mokṣamārgo viśeṣataḥ sūtrakāramatārūḍho na tu sāmānyataḥ sthitaḥ    kālāder api taddhetusāmānyasyāvirodhataḥ sarvakāryajanau tasya vyāpārād anyathāsthiteḥ    pūrvāvadhāraṇaṃ tena kāryaṃ nānyāvadhāraṇam yathaiva tāni mokṣasya mārgas tadvad dhi saṃvadaḥ    pūrvāvadhāraṇe pyatra tapo mokṣasya kāraṇam na syād iti na maṃtavyaṃ tasya caryātmakatvataḥ    nanu ratnatrayasyaiva mokṣahetutvasūcane kiṃ vārhataḥ kṣaṇād ūrdhvaṃ muktiṃ saṃpādayen na tat    sahakāriviśeṣasyāpekṣaṇīyasya bhāvinaḥ tadaivāsattvato neti sphuṭaṃ kecit pracakṣate    sa tu śaktiviśeṣaḥ syāj jīvasyāghātikarmaṇām nāmādīnāṃ trayāṇāṃ hi nirjarākṛd dhi niścitaḥ    kṣāyikatvān na sāpekṣam arhad ratnatrayaṃ yadi kin na kṣīṇakaṣāyasya dṛkcāritre tathā mate    kevalāpekṣiṇī te hi yathā tadvac ca tattrayam sahakārivyapekṣaṃ syāt kṣāyikatve napekṣitā    na ca tena virudhyeta traividhyaṃ mokṣavartmanaḥ viśiṣṭakālayuktasya tattrayasyaiva śaktitaḥ    tenāyogijinasyāṃtyakṣaṇavarti prakīrtitam ratnatrayam aśeṣāghavighātakaraṇaṃ dhruvam    tato nānyo sti mokṣasya sākṣān mārgo viśeṣataḥ pūrvāvadhāraṇaṃ yena na vyavasthām iyarti naḥ    jñānād evāśarīratvasiddhir ity avadhāraṇam sahakāriviśeṣasyāpekṣayāstv iti kecana    teṣāṃ phalopabhogena prakṣayaḥ karmaṇāṃ mataḥ sahakāriviśeṣo sya nāsau cāritrataḥ pṛthak    bhoktuḥ phalopabhogo hi yathākālaṃ yadīṣyate tadā karmakṣayaḥ kvātaḥ kalpakoṭiśatair api    viśiṣṭopakramād eva mataś cet so pi tattvataḥ samādhir eva saṃbhāvyaś cāritrātmeti no matam    samyagjñānaṃ viśiṣṭaṃ cet samādhiḥ sā viśiṣṭatā tasya karmaphaladhvaṃsaśaktir nāmāṃtaraṃ nanu    mithyābhimānanirmuktir jñānasyeṣṭaṃ hi darśanam jñānatvaṃ cārthavijñāptiś caryātvaṃ karmahaṃtṛtā    śaktitrayātmakād eva samyagjñānād adehatā siddhā ratnatrayād eva teṣāṃ nāmāṃtaroditāt    etena jñānavairāgyān muktiprāptyavadhāraṇam na syādvādavighātāyety uktaṃ boddhavyam aṃjasā    na cātra sarvathaikatvaṃ jñānadarśanayos tathā kathaṃcid bhedasaṃsiddhir lakṣaṇādiviśeṣataḥ    tata eva na cāritraṃ jñānaṃ tādātmyam ṛcchati paryāyārthapradhānatvavivakṣāto muner iha    dravyārthasya pradhānatvavivakṣāyāṃ tu tattvataḥ bhaved ātmaiva saṃsāro mokṣas taddhetur eva ca    tathā ca sūtrakārasya kva tadbhedopadeśanā dravyārthasyāpy aśuddhasyāvāṃtarābhedasaṃśrayāt    kālābhedād abhinnatvaṃ tayor ekāṃtato yadi tadaikakṣaṇavṛttīnām arthānāṃ bhinnatā kutaḥ    deśābhedād abhedaś cet kālākāśādibhinnatā sāmānādhikaraṇyāc cet tata evāstu bhinnatā    sāmānādhikaraṇyasya kathaṃcid bhidayā vinā nīlatotpalatādīnāṃ jātu kvacid adarśanāt    mithyāśraddhānavijñānacaryāvicchittilakṣaṇam kāryaṃ bhinnaṃ dṛgādīnāṃ naikāṃtābhidi saṃbhavi    dṛṅmohavigamajñānāvaraṇadhvaṃsavṛttamuṭ saṃkṣayātmakahetoś ca bhedas tadbhidi siddhyati    teṣāṃ pūrvasya lābhe pi bhājyatvād uttarasya ca naikāṃtenaikatā yuktā harṣāmarṣādibhedavat    tattvaśraddhānalābhe hi viśiṣṭaṃ śrutam āpyate nāvaśyaṃ nāpi tallābhe yathākhyātam amohakam    nanv evam uttarasyāpi lābhe pūrvasya bhājyatā prāptā tato na teṣāṃ syāt saha nirvāṇahetutā    tatropādīyasaṃbhūter ūpādānāstitā gateḥ kaṭādikāryasaṃbhūtes tadupādānasattvavat    upādeyaṃ hi cāritraṃ pūrvajñānasya vīkṣate tadbhāvabhāvitādṛṣṭes tadvajjñānadṛśo matam    nanūpādeyasaṃbhūtir upādānopamardanāt dṛṣṭeti nottarodbhūtau pūrvasyāstitvasaṃgatiḥ    satyaṃ kathaṃcid iṣṭatvāt prāṅāśasyottarodbhave sarvathā tu na tannāśaḥ kāryotpattivirodhataḥ    jñānotpattau hi saddṛṣṭis tadviśiṣṭo pajāyate pūrvāviśiṣṭarūpeṇa naśyatīti suniścitam    cāritrotpattikāle ca pūrvadṛgjñānayoś cyutiḥ caryāviśiṣṭayor bhūtis tatsakṛttrayasaṃbhavaḥ    nanv atra kṣāyikī dṛṣṭir jñānotpattau na naśyati tadaparyaṃtatāhāner ity asiddhāṃtavidvacaḥ    siddhānte kṣāyikatvena tadaparyantatoktitaḥ sarvathā tadavidhvaṃse kauṭasthyasya prasaṅgataḥ    tathotpādavyayadhrauvyayuktaṃ sad iti hīyate pratikṣaṇamato bhāvaḥ kṣāyiko pi trilakṣaṇaḥ    pūrvottarakṣaṇopādhisvabhāvakṣayajanmanoḥ kṣāyikatvenāvasthāne sa yathaiva trilakṣaṇaḥ    tathā hetvantaronmuktayuktarūpeṇa vicyutau jātau ca kṣāyikatvena sthitau kimu na tādṛśaḥ    kāraṇaṃ yadi saddṛṣṭiḥ sadbodhasya tadā na kim tadanantaram utpādaḥ kevalasyeti kecana    tadasattatpratidvaṃdvikarmābhāve tatheṣṭitaḥ kāraṇaṃ hi svakāryasyāpratibaṃdhiprabhāvakam    sadbodhapūrvakatve pi cāritrasya samudbhavaḥ prāg eva kevalān na syād ity etac ca na yuktimat    samucchinnakriyasyāto dhyānasyāvinivartinaḥ sākṣātsaṃsāravicchedasamarthasya prasūtitaḥ    yathaivāpūrṇacāritram apūrṇajñānahetukam tathā tat kin na saṃpūrṇaṃ pūrṇajñānanibaṃdhanam    prāg eva kṣāyikaṃ pūrṇaṃ kṣāyikatvena kevalāt na tv aghātipratidhvaṃsikaraṇopetarūpataḥ    tadrūpāvaraṇaṃ karma navamaṃ na prasajyate cāritramohanīyasya kṣayād eva tadudbhavāt    kṣīṇamohasya kiṃ na syād evaṃ tad iti cen na vai tadā kālaviśeṣasya tādṛśo 'sambhavitvataḥ    tathā kevalabodhasya sahāyasyāpy asaṃbhavāt svasāmagrayā vinā kāryaṃ na hi jātucid īkṣyate    kṣīṇe pi mohanīyākhye karmaṇi prathamakṣaṇe yathā kṣīṇakaṣāyasya śaktir antyakṣaṇe matā    jñānāvṛtyādikarmāṇi haṃtuṃ tadvadayoginaḥ paryaṃtakṣaṇa eva syāc chepakarmakṣaye 'py asau    kālāpekṣitayā vṛttam asamarthaṃ yadīṣyate dvyādisiddhakṣaṇotpāde tadantyaṃ tādṛg ity asat    prācyasiddhakṣaṇotpādāpekṣayā mokṣavartmani vicāraprastuter evaṃ kāryakāraṇatāsthiteḥ    tato mohakṣayopetaḥ pumān udbhūtakevalaḥ viśiṣṭakāraṇaṃ sākṣādaśarīratvahetunā    ratnatritayarūpeṇāyogakevalino ṃtime kṣaṇe vivartate hy etad abādhyaṃ niścitān nayāt    vyavahāranayāśrityā tv etat prāg eva kāraṇam mokṣasyeti vivādena paryāptaṃ tattvavedinām    saṃsārakāraṇatritvāsiddher nirvāṇakāraṇe tritvaṃ naivopapadyetety acodyaṃ nyāyadarśinaḥ    ādyasūtrasya sāmarthyād bhavahetos trayātmanaḥ sūcitasya pramāṇena bādhanānavatārataḥ    maulo hetur bhavasyeṣṭo yeṣāṃ tāvad viparyayaḥ teṣām udbhūtabodhasya ghaṭate na bhavasthitiḥ    saṃsāre tiṣṭhatas tasya yadi kaścid viparyayaḥ saṃbhāvyate tadā kin na doṣādis tannibaṃdhanaḥ    tathā sati kuto jñānī vītadoṣaḥ pumān paraḥ tattvopadeśasaṃtānahetuḥ syād bhavadādiṣu    vitathāgraharāgādiprādurbhāvanaśaktibhṛt maulo viparyayo nāṃtya iti kecit prapedire    teṣāṃ prasiddha evāyaṃ bhavahetus trayātmakaḥ śaktitrayātmatāpāye bhavahetutvahānitaḥ    tato mithyāgrahāvṛttaśaktiyukto viparyayaḥ mithyārthagrahaṇākāro mithyātvādibhidoditaḥ    tathā viparyayajñānāsaṃyamātmā vibudhyatām bhavahetur atattvārthaśraddhāśaktis trayātmakaḥ    mithyādṛgādihetuḥ syāt saṃsāras tadapakṣaye kṣīyamāṇatvato vātavikārādijarogavat    tadvipakṣasya nirvāṇakāraṇasya trayātmatā prasiddhaivam ato yuktā sūtrakāropadeśanā    baṃdhapratyayapāṃcadhyasūtraṃ na ca virudhyate pramādāditrayasyāṃtarbhāvāt sāmānyato 'yame    viśeṣataḥ punas tasyācāritrāṃtaḥpraveśane pramattasaṃyatādīnām aṣṭānāṃ syād asaṃyamaḥ    tathā ca sati siddhāṃtavyāghātaḥ saṃyatatvataḥ mohadvādaśakadhvaṃsāt teṣām ayam ahānitaḥ    nanv evaṃ paṃcadhā baṃdhahetau sati viśeṣataḥ prāpto nirvāṇamārgo pi tāvaddhā tannivartakaḥ    tad etadanukūlaṃ naḥ sāmarthyāt samupāgatam baṃdhapratyayasūtrasya pāṃcadhyaṃ mokṣavartmanaḥ    samyagbodhasya saddṛṣṭāv aṃtarbhāvāt tv adarśane mithyājñānavad evāsya bhede ṣoḍho bhayaṃ matam    tatra mithyādṛśo baṃdhaḥ samyagdṛṣṭyā nivartyate kucāritrād viratyaiva pramādād apramādataḥ    kaṣāyād akaṣāyeṇa yogāc cāyogataḥ kramāt tenāyogaguṇān mukteḥ pūrvaṃ siddhā jinasthitiḥ    sāmagrī yāvatī yasya janikā saṃpratīyate tāvatī nātivartyaiva mokṣasyāpīti kecana    eteṣām apy anekāṃtāśrayaṇe śreyasī matiḥ nānyathā sarvathaikāṃte baṃdhahetvādyayogataḥ    nityatvaikāṃtapakṣe hi pariṇāmanivṛttitaḥ nātmā baṃdhādihetuḥ syāt kṣaṇaprakṣayicittavat    na cātmano guṇo bhinnas tadasaṃbaṃdhataḥ sadā tatsaṃbaṃdhe kadācit tu tasya naikāṃtanityatā    guṇāsaṃbaṃdharūpeṇa nāśād guṇayutātmanā prādurbhāvāc cidāditvasthānāt tryātmatvasiddhitaḥ    yad vinaśyati tadrūpaṃ prādurbhavati tatra yat tad evānityamātmā tu tadbhinno nitya ity api    na yuktaṃ naśvarotpitsurūpādhikaraṇātmanā kādācitkatvatas tasya nityatvaikāṃtahānitaḥ    nānādharmāśrayatvasya gauṇatvād ātmanaḥ sadā sthāsnuteti na sādhīyaḥ satyāsatyātmatābhidaḥ    asatyātmakatāsattve sattve satyātmatātmanaḥ siddhaṃ sadasadātmatvam anyathā vastutākṣatiḥ    kṣaṇakṣaye pi naivāsti kāryakāraṇatāṃjasā kasyacit kvacid atyaṃtāvyāpārād acalātmavat    anvayavyatirekādyo yasya dṛṣṭo nuvartakaḥ sa taddhetur iti nyāyas tadekāṃte na saṃbhavī    tatra hetāv asaty eva kāryotpāde nvayaḥ kutaḥ vyatirekaś ca saṃvṛttyā tau cet kiṃ pāramārthikam    tathā sati na baṃdhādihetusiddhiḥ kathaṃcana satyānekāṃtavādena vinā kvacid iti sthitam    satyam advayam evedaṃ svasaṃvedanam ity asat tadvyavasthāpakābhāvāt puruṣādvaitatattvavat    na ca svataḥ sthitis tasya grāhyagrāhakatekṣaṇāt sarvadā nāpi tadbhrāṃtiḥ satyasaṃvittyasaṃbhavāt    yathaivārāmavibhrāṃtau puruṣādvaitasatyatā tatsatyatve ca taddhāṃtir ity anyonyasamāśrayaḥ    tathā vedyādivibhrāṃtau vedakādvaitasatyatā tatsatyatve ca tadbhrāṃtir ity anyonyasamāśrayaḥ    vivādagocaro vedyādyākāro bhrāṃtabhāsajaḥ atha svapnādiparyāyākāravad yadi vṛttayaḥ    vibhrāṃtyā bhedam āpanno vicchedo vibhramātmakaḥ vicchedatvād yathā svapnaviccheda iti siddhyatu    nityaṃ sarvagataṃ brahma nirākāram anaṃśakam kāladeśādivicchedabhrāṃtatve 'kalayaddvayam    nityādirūpasaṃvitter abhāvāt tadasaṃbhave paramārthātmatāvitter abhāvād etad apy asat    na nityaṃ nāpy anityatvaṃ sarvagatvam asarvagam naikaṃ nānekam athavā svasaṃvedanam eva tat    samastaṃ tadvaco nyasya tan nādvaitaṃ kathaṃcana sveṣṭetaravyavasthānapratikṣepāprasiddhitaḥ    nanv anādir avidyeyaṃ sveṣṭetaravibhāgakṛt satyetareva duḥpārā tāmāśritya parīkṣaṇā    sarvasya tattvanirṇīteḥ pūrvaṃ kiṃ cānyathā sthitiḥ eṣa pralāpa evāsya śūnyopaplavavādivat    kiṃcin nirṇītam āśritya vicāro nyatra vartate sarvavipratipattau hi kvacin nāsti vicāraṇā    tatreṣṭaṃ yasya nirṇītaṃ pramāṇaṃ tasya vastutaḥ tadaṃtareṇa nirṇītes tatrāyogād aniṣṭavat    tatsvasaṃvedanaṃ tāvad yady upeyeta kenacit saṃvādakatvatas tdvadakṣaliṃgādivedanam    pramāṇān niścitād eva sarvatrāstu parīkṣaṇam sveṣṭetaravibhāgāya vidyā vidyopagāminām    yasyāpīṣṭaṃ na nirṇītaṃ kvāpi tasya na saṃśayaḥ tadabhāve na yujyaṃte paraparyanuyuktayaḥ    om iti bruvataḥ siddhaṃ sarvaṃ sarvasya vāṃchitam kvacit paryanuyogasyāsaṃbhavāt tannirākulam    śūnyopaplavavāde pi nānekāṃtād vinā sthitiḥ svayaṃ kvacid aśūnyasya svīkṛter anupaplute    śūnyatāyāṃ hi śūnyatvaṃ jātucin nopagamyate tathopaplavanaṃ tattvopaplave pītaratra tat    grāhyagrāhakataitena bādhyabādhakatāpi vā kāryakāraṇatādir vā nāsty eveti nirākṛtam    grāhyagrāhakaśūnyatvaṃ grāhyaṃ tadgrāhakasya cet grāhyagrāhakabhāvaḥ syād anyathā tadaśūnyatā    bādhyabādhakabhāvo pi bādhyate yadi kenacit bādhyabādhakabhāvo sti no cet kasya nirākṛtiḥ    kāryāpāye na vastutvaṃ saṃvinmātrasya yujyate kāraṇasyātyaye tasya sarvadā sarvathā sthitiḥ    vācyavācakatāpāyo vācyaś cet tadvyavasthitiḥ parāvabodhanopāyaḥ ko nāma syād ihānyathā    saṃvṛttyā svapnavat sarvaṃ siddham ity ativismṛtam niḥśepārthakriyāhetoḥ saṃvṛter vastutāptitaḥ    yad evārthakriyākāri tad eva paramārthasat sāṃvṛtaṃ rūpam anyat tu saṃvinmātram avastu sat    saṃvṛtaṃ cet kva nāmārthakriyākāri ca tanmatam hataṃ siddhaṃ kathaṃ sarvaṃ saṃvṛttyā svapnavat tava    svapnasiddhaṃ hi no siddham asvapnaḥ ko 'paro nyathā saṃtoṣakṛn na vai svapna saṃtoṣaṃ na prakalpate    vastuny api na saṃtoṣo dveṣāt tad iti kasyacit avastuny api rāgāt syād ity asvapno stv abādhitaḥ    bādhyamānaḥ punaḥ svapno nānyathā tadbhidekṣyate svataḥ kvacid abādhyatvaniścayaḥ parato pi vā    kāraṇadvyasamārthyāt saṃbhavann anubhūyate parasparāśrayaṃ tatrānavasthāṃ ca pratikṣipet    tato na niścitānmānād vinā tattvaparīkṣaṇam jñāne yenādvaye śūnye nyatra vā tat pratanyate    pramāṇāsaṃbhavād yatra vastumātram asaṃbhavi mithyaikāṃteṣu kā tatra baṃdhahetvādisaṃkathā    syādvādināmato yuktaṃ yasya yāvat pratīyate kāraṇaṃ tasya tāvat syād iti vaktum asaṃśayam    samyakśabde praśaṃsārthe dṛśāvālocanasthitau na samyagdarśanaṃ labhyam iṣṭam ity āha lakṣaṇam    sūtrakāro 'tra tattvārthaśraddhānam iti darśanam dhātvanekārthavṛttitvād dṛśeḥ śraddhārthatāgateḥ    arthagrahaṇato narthaddhānaṃ vinivāritam kalpitārthavyavacchedo rthasya tattvaviśeṣaṇāt    lakṣaṇasya tato nātivyāptir dṛgmohavarjitam puṃrūpaṃ tad iti dhvastā tasyāvyāptir api sphuṭam    yat tvenāvasthito bhāvas tattvenaivāryamāṇakaḥ tattvārthaḥ sakalo nyas tu mithyārtha iti gamyate    mohārekaviṣaryāsavicchedāt tatra darśanam samyag ity abhidhānāt tu jñānam apy evam īritam    sāmarthyādādisūtre tanniruktyā lakṣitaṃ yataḥ cāritravat tato noktaṃ jñānāder lakṣaṇaṃ pṛthak    yathā pāvakaśabdasyoccāraṇāt saṃpratīyate tadarthalakṣaṇaṃ tadvajjñānacāritraśabdanāt    jñānādilakṣaṇaṃ tasya siddher yatnāṃtaraṃ vṛthā śabdārthāvyabhicāreṇa na pṛthaglakṣaṇaṃ kvacit    icchā śraddhānam ity eke tad ayuktam amohinaḥ śraddhānavirahāśakter jñānacāritrahānitaḥ    nirdeśālpabahutvādiciṃtanasyāvirodhataḥ śraddhāne jīvarūpe smin na doṣaḥ kaścid īkṣyate    sarāge vītarāge ca tasya saṃbhavato ṃjasā praśamāder abhivyaktiḥ śuddhimātrāc ca cetasaḥ    pradhānasya vivarto 'yaṃ śraddhānākhya itītare tad asat puṃsi samyaktvabhāvāsaṃgāt tato pare    pradhānasyaiva samyaktvāc caitanyaṃ samyag iṣyate buddhyadhyavasitārthasya puṃsā saṃcetanād yadi    tadāhaṃkārasamyaktvāt buddheḥ samyaktvam aśrute ahaṃkārāspadārthasya tathāpy adhyavasānataḥ    manaḥsamyaktvataḥ samyagahaṃkāras tathā na kim manaḥsaṃkalpitārtheṣu tatpravṛttiprakalpanāt    tathaiveṃdriyasamyaktvān manaḥ samyagupeyatām iṃdriyālocitārtheṣu manaḥsaṃkalpanodayāt    iṃdriyāṇi ca samyañci bhavaṃtu paratas tava svābhivyaṃjakasamyaktvādibhiḥ samyaktvataḥ kimu    arthasvavyaṃjakādhīnaṃ mukhyaṃ samyaktvam iṣyate iṃdriyādiṣu tadvat syāt puṃsi tatparamārthataḥ    na ca pradhānadharmatvaṃ śraddhānasya cidātmanaḥ caitanyasyaiva saṃsiddhyed anyathā syād viparyayaḥ    na śraddhatte pradhānaṃ vā jaḍatvāt kalaśādivat pratītyāśrayaṇe tvātmā śraddhātās tu nirākulam    na samyagdarśanaṃ nityaṃ nāpi tannityahetukam nāhetukam iti prāha dvidhā tajjanmakāraṇam  tena nānāditā tasya sarvadotpattir eva vā nityaṃ tatsatvasaṃbaddhāt prasajyetāviśeṣataḥ    nisargād iti nirdeśo hetāvadhigamād iti tacchabdena parāmṛṣṭaṃ samyagdarśanamātrakam    vinā paropadeśena tattvārthapratibhāsanam nisargo dhigamas tena kṛtaṃ tad iti niścayaḥ    tato nāpratibhāte rthe śraddhānam anuṣajyate nāpi sarvasya tasyeha pratyayo dhigamo bhavet    aṃtardarśanamohasya bhavyasyopaśame sati tatkṣayopaśame vāpi kṣaye vā darśanodbhavaḥ    bahiḥ kāraṇāsākalye py asyotpatter apīkṣaṇāt kadācid anyathā tasyānupapatter iti sphuṭam    pāpāpāyād bhavaty eṣa viparītagrahakṣayaḥ puṃso dharmaviśeṣād vety anye saṃpratipedire    dṛgmohas tu kvacij jātu kasyacin nuḥ praśāmyati pratipakṣyaviśeṣasya saṃpattes timirādivat    kṣayopaśamam āyāti kṣayaṃ vā tata eva saḥ tadvad eveti tattvārthaśraddhānaṃ syāt svahetutaḥ    pratipakṣaviśeṣo pi dṛṅmohasyāsti kaścana jīvavyāmohahetutvād unmattakarasādivat    sa ca dravyaṃ bhavet kṣetraṃ kālo bhāvo pi vāṃginām mohahetusapatnatvād viṣādipratipakṣavat    tatsaṃpatsaṃbhavo yeṣāṃ te pratyāsann amuktayaḥ bhavyās tataḥ pareṣāṃ tu tatsaṃpattir na jātucit    samyagdarśanaśakter hi bhedābhāve pi dehinām saṃbhavetarato bhedas tadvyakteḥ kanakāśmavat    kiṃ tattvaṃ nāma yenāryamāṇas tattvārtha iṣyate ity aśeṣavivādānāṃ nirāsāyāha sūtrakṛt  sapta jīvādayas tattvaṃ na prakṛtyādayo 'pare śraddhānaviṣayā jñeyā mumukṣor niyamād iha    tathā cānaṃtaparyāyaṃ dravyam ekaṃ na sūcitam tattvaṃ samāsato nāpi tadanaṃtaṃ prapaṃcataḥ    madhyamoktyāpi taddvyādibhedena bahudhā sthitam nātaḥ saptavidhā tattvād vineyāpekṣitāt param    mokṣas tāvad vineyena śraddhātavyas tadarthinā baṃdhaś ca nānyathā tasya tadarthitvaṃ ghaṭāmaṭet    āsravo pi ca baṃdhasya hetuḥ śraddhīyate na cet kvāhetukasya baṃdhasya kṣayo mokṣaḥ prasiddhyati    baṃdhahetunirodhaś ca saṃvaro nirjarā kṣayaḥ pūrvopāttasya baṃdhasya mokṣahetus tadāśrayaḥ    jīvo 'jīvaś ca baṃdhaś ca dviṣṭhatvāt tatkṣayasya ca śraddheyo nānyadāphalyād iti sūtrakṛtāṃ matam    puṇyapāpapadārthau tu baṃdhāsravavikalpagau śraddhātavyau na bhedena saptabhyo tiprasaṃgataḥ    baṃdho mokṣas tayor hetū jīvājīvau tadāśrayau nanu sūtre ṣaḍ evaite vācyāḥ sārvatvavādinā    satyaṃ kiṃ tv āśrayasyaiva baṃdhahetutvasaṃvide mithyādṛgādibhedasya vaco yuktaṃ parisphuṭam    mokṣasaṃpādike cokte samyak saṃvaranirjare ratnatrayādṛte nyasya mokṣahetutvahānaye    tenānāgatabaṃdhasya hetudhvaṃsād vimucyate saṃcitasya kṣayād veti mithyāvādo nirākṛtaḥ    saṃcitasya svayaṃ nāśād eṣyadbaṃdhasya rodhakaḥ ekaḥ kaścid anuṣṭheya ity eke tadasaṃgatam    nirhetukasya nāśasya sarvathānupapattitaḥ kāryotpādavad anyatra visrasā pariṇāmataḥ    yataś cānāgatāghaughanirodhaḥ kriyate 'munā tata eva kṣayaḥ pūrvapāpaudhasyehetukaḥ    sann apy asau bhavaty eva mokṣahetuḥ sa saṃvaraḥ tayor anyatarasyāpi vaikalye muktyayogataḥ    etena saṃcitāśeṣakarmanāśe vimucyate bhaviṣyatkarmasaṃrodhāpāye pīti nirākṛtam    evaṃ prayojanāpekṣāviśeṣād āsravādayaḥ nirdiśyaṃte munīśena jīvājīvātmakā api    jīvādīnām iha jñeyaṃ lakṣaṇaṃ vakṣyamāṇakam tatpadānāṃ niruktiś ca yathārthānatilaṃghanāt    kramo hetuviśeṣāt syād dvaṃdvavṛttāv iti sthiteḥ jīvaḥ pūrvaṃ vinirdiṣṭas tadarthatvād vacovidheḥ    tadupagrahahetutvād ajīvas tadanaṃtaram tadāśrayatvatas tasmād āsravaḥ parataḥ sthitaḥ    baṃdhaś cāsravakāryatvāt tadanaṃtaram īritaḥ tatpratidhvaṃsahetutvād ajīvas tadanaṃtaram    saṃvare sati saṃbhūter nirjarāyās tataḥ sthitiḥ tasyāṃ mokṣa iti proktas tadanaṃtaram eva saḥ    tasya bhāvo bhavet tattvaṃ sāmānyād ekam eva tat tatsamānāśrayatvena jīvādīnāṃ bahutvavāk    bhāvasya tadvato bhedāt kathaṃcin na virudhyate vyaktīnāṃ ca bahutvasya khyāpanārthatvataḥ sadā    jīvatvaṃ tattvam ityādi pratyekam upavarṇyate tatas tenāryamāṇo 'yaṃ tattvārthaḥ sakalo mataḥ    jīva evātra tattvārtha iti kecit pracakṣate tadayuktam ajīvasyābhāve tatsiddhyayogataḥ    parārthā jīvasiddhir hi teṣāṃ syādvacanātmikā ajīvo vacanaṃ tasya nānyathānyena vedanam    na jīvā bahavaḥ saṃti pratipādyapratipādakāḥ bhrāṃter anyatra māyādidṛṣṭajīvavad ity asat    advayasyāpi jīvasya vibhrāṃtatvānuṣaṃgataḥ eko 'ham iti saṃvitteḥ svapnādau bhramadarśanāt    vyabhicāravinirmukteḥ saṃvinmātrasya sarvadā na bhrāṃtateti cet siddhā nānāsaṃtānasaṃvidaḥ    yathaiva mama saṃvittimātraṃ satyaṃ vyavasthitam svasaṃvedanasaṃvādāt tathānyeṣām asaṃśayam    anye tvatto na saṃtīti svasya nirṇītyabhāvataḥ nānye matto pi saṃtīti vacane sarvaśūnyatā    tasyāpy anyair asaṃvitter viśeṣābhāvato nyathā siddhaṃ tad eva nānātvaṃ puṃsāṃ satyasamāśrayam    ātmānaṃ saṃvidaṃty anye na veti yadi saṃśayaḥ tadā na puruṣādvaitanirṇayo jātu kasyacit    āhur vidhātṛpratyakṣaṃ na niṣeddhṛvipaścitaḥ na nānātvāgamas tena pratyakṣeṇa virudhyate    tenāniṣedhate 'nyasyābhāvābhāvāt kathaṃcana saṃśītigocaratvād vānyasyābhāvāviniścayāt    yathaiva ca mamādhyakṣaṃ vidhātṛ na niṣedhṛ vā pratyakṣatvāt tathānyeṣām anyathaitattathā kutaḥ    vidhātr ahaṃ sadaivānyaniṣeddhṛ na bhavāmy aham svayaṃ pratyakṣam ity evaṃ vetti cen na niṣeddhṛkam    saṃti satyāstato nānā jīvāḥ sādhyakṣasiddhayaḥ pratipādyāḥ pareṣāṃ te kadācit pratipādakāḥ    parārthaṃ nirṇayopāyo vacanaṃ cāsti tattvataḥ tac ca jīvātmakaṃ neti tadvad anyac ca kiṃ na naḥ    bāhyeṃdriyaparicchedyaḥ śabdo nātmā yathaiva hi tathā kāryādir artho pi tadajīvo sti vastutaḥ    yo pi brūte pṛthivyādir ajīvo dhyakṣaniścitaḥ tattvārtha iti tasyāpi prāyaśo dattam uttaram    na kāyādikriyārūpo jīvasyāsty āsravaḥ sadā niḥkriyatvād yathā vyomna ity asat tadasiddhitaḥ    kriyāvān puruṣo sarvagatadravyatvato yathā pṛthivyādiḥ svasaṃvedyaṃ sādhanaṃ siddham eva naḥ    baṃdhaḥ puṃdharmatāṃ dhatte dviṣṭhatvān na pradhānake kevale 'saṃbhavāt tasya dharmo sau nāvadhāryate    saṃvaro jīvadharmaḥ syāt kartṛstho nirjarāpi ca mokṣaś ca karmadharmo pi karmastho baṃdhavanmataḥ    dharmidharmātmakaṃ tattvaṃ saptabhedam itīritam śraddheyaṃ jñeyam ādheyaṃ mumukṣor niyamād iha    na ca tattvāṃtarābhāvas tattvam aṣṭamam āsajet saptatattvāstitārūpo hy eṣo 'nyasyāpratītitaḥ    tattvaṃ sataś ca sadbhāvo 'sato 'sadbhāva ity api vastuny eva dvidhā vṛttir vyavahārasya vakṣyate    yathā hi sati sattvena vedanaṃ siddham aṃjasā tathā sadaṃtare siddham asattvena pravedanam    asadrūpapratītir hi nāvastuviṣayā kvacit bhāvāṃśaviṣayatvāt syāt sitatvādipratītivat    bhāvāṃśo satsadābhāvaviśeṣaṇatayekṣaṇāt sarvathābhāvanirmuktasyādṛṣṭeḥ pāṭalādivat    pramāṇādaya eva syuḥ padārthāḥ ṣoḍaśeti tu bruvāṇānāṃ na sarvasya saṃgraho vyavatiṣṭhate    tatrānadhyavasāyasya viparyāsasya vā gateḥ nāsyāpramāṇarūpasya pramāṇagrahaṇād gatiḥ    saṃśītivatprameyāṃtarbhāve tattvadvayaṃ bhavet saṃśayādeḥ pṛthagbhāve pṛthagbhāvo sya kiṃ tataḥ    pramāṇavidhisāmarthyād apramāṇagatau yadi tatrānadhyavasāyāder aṃtarbhāvo virudhyate    saṃśayasva tadātraiva nāṃtarbhāvaḥ kim iṣyate pramāṇabhāvarūpatvāviśeṣāt tasya sarvathā    pramāṇavṛttihetutvāt saṃśayaś cet pṛthakkṛtaḥ tata eva vidhīyeta jijñāsādis tathā na kim    abhāvasyāvinābhāvasaṃbaṃdhāder asaṃgrahāt pramāṇādipadārthānām upadeśo na doṣajit    dravyādiṣaṭpadārthānām upadeśo pi tādṛśaḥ sarvārthasaṃgrahābhāvād anāptopajñam ity ataḥ    sūtre vadhāraṇābhāvāc cheṣārthasyānirākṛtau tattvenaikena paryāptam upadiṣṭena dhīmatām    nanv evaṃ saptatattvārthavacanenāpy asaṃgrahāt ratnatrayasya tadbādhye py ayuktam itītare    tadasattasya jīvādisvabhāvatvena nirṇayāt tathā puṇyāsravatvena saṃvaratvena vā sthiteḥ    jīvājīvaprabhedānām anaṃtatve pi nānyatā prasiddhyaty āsravādibhya ity avyāptyādyasaṃbhavaḥ    saṃjñākarmānapekṣyaiva nimittāṃtaram iṣṭitaḥ nāmānekavidhaṃ lokavyavahārāya sūtritam    nāmno vaktur abhiprāyo nimittaṃ kathitaṃ samam tasmād anyat tu jātyādinimittāṃtaram iṣyate    jātidvāreṇa śabdo hi yo dravyādiṣu vartate jātihetuḥ sa vijñeyo gauraś ca iti śabdavat    jātāv eva tu yat saṃjñākarma tan nāma manyate tasyām aparajātyādinimittānām abhāvataḥ    guṇe karmaṇi vā nāma saṃjñā karma tatheṣyate guṇakarmāṃtarābhāvāj jāter apy anapekṣaṇāt    guṇaprādhānyato vṛtto dravye guṇanimittakaḥ śuklaḥ pāṭala ityādiśabdavat saṃpratīyate    karmaprādhānyatas tatra karmahetur nibudhyate carati plavate yadvat kaścid ity atiniścitam    dravyāṃtaramukhe tu syāt pravṛtto dravyahetukaḥ śabdas taddvividhas tajjñair nirākulam udāhṛtaḥ    saṃyogidravyaśabdaḥ syāt kuṃḍalītyādiśabdavat samavāyidravyaśabdo viṣāṇītyādir āsthitaḥ    kuṃḍalītyādayaḥ śabdā yadi saṃyogahetavaḥ viṣāṇītyādayaḥ kiṃ na samavāyanibaṃdhanāḥ    tathā sati na śabdānāṃ vācyā jātiguṇakriyāḥ dravyavatsamavāyena svasaṃbaṃdhiṣu vartanāt    yathā jātyādayo dravye samavāyabalāt sthitāḥ śabdānāṃ viṣayas tadvat dravyaṃ tatrāstu kiṃcana    saṃyogabalataś caivaṃ vartamānaṃ tatheṣyatām dravyamātre tu saṃjñānaṃ nāmeti sphuṭam īkṣyate    tena paṃcatayī vṛttiḥ śabdānām upavarṇitā śāstrakārair na bādhyeta nyāyasāmarthyasaṃgatā    jātiḥ sarvasya śabdasya padārtho nitya ity asan vyaktisaṃpratyayābhāvaprasaṃgād dhvanitaḥ sadā    śabdena lakṣitā jātir vyaktīr lakṣayati svakāḥ saṃbaṃdhād ity api vyaktam aśabdārthajñatehitam    tathā hy anumiter artho vyaktir jātiḥ punar dhvaneḥ kvānyathākṣārthatābādhā śabdārthasyāpi sidhyatu    akṣeṇānugataḥ śabdo jātiṃ pratyāpayed iha saṃbaṃdhāt sāpi niḥśeṣā svavyaktīr iti tannayaḥ    yady aspaṣṭāvabhāsitvāc chabdārthaḥ kaścaneṣyate liṃgārtho pi tadā prāptaḥ śabdārtho nānyathā sthitiḥ    yatra śabdāt pratītiḥ syāt so rthaḥ śabdasya cen nanu vyakteḥ śabdārthatā na syād evaṃ liṃgāt pratītitaḥ    śabdapratītayā jātyā na ca vyaktiḥ svarūpataḥ pratyetuṃ śakyate tasyāḥ sāmānyākārato gateḥ    vyaktisāmānyato vyaktipratītāv anavasthiteḥ kva viśeṣe pravṛttiḥ syāt pāraṃparyeṇa śabdataḥ    dravyam eva padārtho stu nityam ity apy asaṃgatam tatrānaṃtyena saṃketakriyāyukter ananvayāt    vāṃchitārthapravṛttyādivyavahārasya hānitaḥ śabdasyākṣādisāmarthyād eva tatra pravṛttitaḥ    vyaktāvekatra śabdena nirṇītāyāṃ kathaṃcana tadviśeṣaṇabhūtāyā jāteḥ saṃpratyayaḥ svataḥ    guḍaśabdād yathā jñāne guḍe mādhuryanirṇayaḥ svataḥ pratīyate loke prokto niṃbe ca tiktatā    pratītayā punar jātyā viśiṣṭāṃ vyaktim īhitām yāṃ yāṃ paśyati tatrāyaṃ pravartetārthasiddhaye    tathā ca sakalaḥ śābdavyavahāraḥ pratiddhyati pratīter bādhaśūnyatvād ity eke saṃpracakṣate    tad apy asaṃgataṃ jātipratīter vṛttisaṃbhave śabdenājanyamānāyāḥ śabdavṛttivirodhataḥ    pāraṃparyeṇa cec chabdāt sā vṛttiḥ karaṇān na kim tato na śabdato vṛttir eṣāṃ syāj jātivādivat    etena taddvayasyaiva padārthatvaṃ nivāritam pakṣe dvayoktadoṣasyāśakteḥ syādvādavidviṣām    lohitākṛtim ācaṣṭe yathokto lohitadhvaniḥ lohitākṛtyadhiṣṭhāne vibhāgāl lohite guṇe    tadāveśāt tathā tatra pratyayasya samudbhavāt dravye ca samavāyena prasūyeta tadāśraye    guṇe samāsṛtatvena samavāyāt tadākṛteḥ saṃyuktasamavete ca dravye nyatropapādayet    lohitapratyayaṃ raktavastradvayavṛte pi ca tathā gaur iti śabde pi kathayaty ākṛtiṃ svataḥ    gotvarūpāt tadāveśāt tadadhiṣṭhāna eva tu tadāśraye ca gopiṃḍe gobuddhiṃ kurute ṃjasā    evaṃ pacati śabdo dhiśrayaṇādikriyāgataiḥ sāmānyaiḥ samam ekārthasamavetaṃ prabodhayet    vyāpakaṃ pacisāmānyam adhiśrityādikarmaṇām yathā bhramaṇasāmānyaṃ bhramatīti dhvanirjane    tathā ḍitthādiśabdāś ca pūrvāparaviśeṣagam yadṛcchatvādisāmānyaṃ tasyaiva pratibodhakāḥ    ity evam ākṛtiṃ śabdasyārthaṃ ye nāma menire tenātiśerate jātivādinaṃ proktanītitaḥ    jātir ākṛtir ity arthabhedābhāvāt kathaṃcana guṇatve tv ākṛter vyaktivāda evāsthito bhavet    yadi gaur ity ayaṃ śabdo vidhatte nyavivartanam vidadhīta tadā gotvaṃ tan nānyāpohagocaraḥ    agonivṛttim apy anyanivṛttimukhato yadi gośabdaḥ kathayen nūnam anavasthā prasajyate    vaktur icchāṃ vidhatte sau bahirarthaṃ na jātucit śabdo nyāpohakṛt sarvaḥ yasya vāṃdhyavijṛṃbhitam    anyāpohe pratīte ca kathamarthe pravartanam śabdāt siddhyej janasyāsya sarvathātiprasaṃgataḥ    ekatvāropamātreṇa yadi dṛśyavikalpayoḥ pravṛttiḥ kasyacid dṛśye vikalpe py astv abhedataḥ    naikatvādhyavasāyo pi dṛśyaṃ spṛśati jātucit vikalpyasyānyathā siddhyed dṛśyasparśitvam aṃjasā    vikalpyadṛśyasāmānyaikatvenādhyavasīyate yadi dṛśyaviśeṣe syāt kathaṃ vṛttistadarthinām    tasya ced dṛśyasāmānyaikatvāropāt kva vartanam saugatasya bhaved arthe navasthāpyanuṣaṃgataḥ    jātivyaktyātmakaṃ vastu tato stu jñānagocaraḥ prasiddhaṃ bahiraṃtaś ca śābdavyavahṛtīkṣaṇāt    tatra syādvādinaḥ prāhuḥ kṛtvāyoddhārakalpanām jāteḥ pradhānabhāvena kāṃścic chabdān prabodhakān    vyakteḥ prakhyāpakāṃś cānyān guṇadravyakriyātmanaḥ lokasaṃvyavahārārtham aparān pāribhāṣikān    tenecchāmātrataṃtraṃ yatsaṃjñākarma tad iṣyate nāmācāryair na jātyādinimittāpannavigraham    vastunaḥ kṛtasaṃjñasya pratiṣṭhā sthāpanā matā sadbhāvetarabhedena dvidhā tattvādhiropataḥ    sādarānugrahākāṃkṣāhetutvāt pratibhidyate nāmnas tasya tathābhāvābhāvād atrāvivādataḥ    nanv anāhitanāmno pi kasyacid darśaneṃjasā punas tatsadṛśe citrakarmādau dṛśyate svataḥ    so 'yam ity avasāyasya prādurbhāvaḥ kathaṃcana sthāpanā sā ca tasyeti kṛtasaṃjñasya sā kutaḥ    naitat san nāma sāmānyasadbhāvāt tatra tattvataḥ kvānyathā so yam ityādivyavahāraḥ pravartatām    siddhaṃ bhāvam apekṣyaiva sthāpanāyāḥ pravṛttitaḥ tadapekṣāṃ vinā nāma bhāvād bhinnaṃ tataḥ sthitam    yat svato bhimukhaṃ vastu bhaviṣyatparyayaṃ prati taddravyaṃ dvividhaṃ jñeyam āgametarabhedataḥ    ātmā tatprabhṛtajñāyī yo nāmānupayuktadhīḥ so trāgamaḥ samāmnātaḥ syād dravyaṃ lakṣaṇānvayāt    no āgamaḥ punas tredhā jñaśarīrādibhedataḥ trikālagocaraṃ jñātuḥ śarīraṃ tatra ca tridhā    bhāvi no āgamadravyam eṣyat paryāyam eva tat tathā tadvyatiriktaṃ ca karmano karmabhedabhṛt    jñānāvṛttyādibhedena karmānekavidhaṃ matam no karma ca śarīratvapariṇāmanirutsukam    pudgaladravyamāhāraprabhṛtyupacayātmakam vijñātavyaṃ prapaṃcena yathāgamam abādhitam    anvayapratyayāt siddhaṃ sarvathā bādhavarjitāt taddravyaṃ bahiraṃtaś ca mukhyaṃ gauṇaṃ tato 'param    sāṃprato vastuparyāyo bhāvo dvedhā sa pūrvavat āgamaḥ prābhṛtajñāyī pumāṃs tatropayuktadhīḥ    no āgamaḥ punar bhāvo vastu tatparyayātmakam dravyād arthāṃtaraṃ bhedapratyayād dhvastabādhanāt    nāmoktaṃ sthāpanā dravyaṃ dravyārthikanayārpaṇāt paryāyārthārpaṇād bhāvas tair nyāsaḥ samyagīritaḥ    teṣāṃ darśanajīvādipadārthānāmaśeṣataḥ iti saṃpratipattavyaṃ tacchabdagrahaṇād iha    nanv anaṃtaḥ padārthānāṃ nikṣepo vācya ity asan nāmādiṣv eva tasyāṃtarbhāvāt saṃkṣeparūpataḥ    dravyaparyāyato vācyo nyāsa ity apy asaṃgatam atisaṃkṣepatas tasyāniṣṭer atrānyathāstu saḥ    nanu nyāsaḥ padārthānāṃ yadi syān nyasyamānatā tadā tebhyo na bhinnaḥ syād abhedād dharmadharmiṇoḥ    bhede nāmāditas tasya paro nyāsaḥ prakalpyatām tathā ca satyavasthānaṃ kva syāt tasyeti kecana    tadayuktam anekāṃtavādinām anupadravāt sarvathaikāṃtavādasya proktanītyā nivāraṇāt    dravyārthikanayāt tāvad abhede nyāsatadvatoḥ nyāso nyāsavadarthānām iti gauṇī vacogatiḥ    paryāyārthanayād bhede tayor mukhyaiva sā matā nyāsasyāpi ca nāmādinyāseṣṭer nānavasthitiḥ    bhedaprabhedarūpeṇānaṃtatvāt sarvavastunaḥ sadbhir vicāryamāṇasya pramāṇān nānyathā gatiḥ    nanu nāmādayaḥ ke nye nyasyamānārtharūpataḥ yair nyāso stu padārthānām iti ke py anuyuṃjate    tebhyo pi bhedarūpeṇa kathaṃcid avasāyataḥ nāmādīnāṃ padārthebhyaḥ prāyaśo dattam uttaram    nāmeṃdrādiḥ pṛthaktāvadbhāveṃdrādeḥ pratīyate sthāpaneṃdrādir apy evaṃ dravyeṃdrādiś ca tattvataḥ    tadbhedaś ca padārthebhyaḥ kathaṃcid dhaṭarūpavat sthāpyasthāpakabhāvāder anyathānupapattitaḥ    ekatrārthe virodhaś cen nāmādīnāṃ sahocyate naikatvāsiddhito rthasya bahiraṃtaś ca sarvathā    nāmāder avibhinnaś ced virodho na virodhakaḥ nāmādyātmavad anyaś cet kaḥ kasyās tu virodhakaḥ    bhinnābhinno virodhaś cet kiṃ na nāmādayas tathā kutaścit tadvataḥ saṃti kathaṃcid bhidabhidbhṛtaḥ    ekasya bhāvato 'kṣīṇakāraṇasya sadudbhave kṣayo virodhakas tasya so rtho yady abhidhīyate    tadā nāmādayo na syuḥ parasparavirodhakāḥ sakṛtsaṃbhavino rtheṣu jīvādiṣu viniścitāḥ    sūtre nāmādinikṣiptatattvārthādhigamasthitaḥ kārtsnyato deśato vāpi sa pramāṇanayair iha    pramāṇaṃ ca nayāś ceti dvaṃdve pūrvanipātanam kṛtaṃ pramāṇaśabdasyābhyarhitatvena bahvacaḥ    pramāṇaṃ sakalādeśi nayādabhyarhitaṃ matam vikalādeśinas tasya vācako pi tathocyate    svārthaniścāyakatvena pramāṇaṃ naya ity asat svārthaikadeśanirṇītilakṣaṇo hi nayaḥ smṛtaḥ    nāyaṃ vastu na cāvastu vastvaṃśaḥ kathyate yataḥ nāsamudraḥ samudro vā samudrāṃśo yathocyate    tanmātrasya samudratve śeṣāṃśasyāsamudratā samudrabahutvaṃ vā syāt tac cet kās tu samudravit    nāṃśebhyo rthāṃtaraṃ kaścit tattvato ṃśīty ayuktikam tasyaikaś ca sthaviṣṭhasya sphuṭaṃ dṛṣṭes tadaṃśavat    kalpanāropito ṃśī cet sa na syāt kalpanāṃtare tasya nārthakriyāśaktir na spaṣṭajñānavedyatā    bhrāṃtir iṃdriyajeyaṃ cet sthaviṣṭākāradarśinī kvābhrāṃtam iṃdriyajñānaṃ pratyakṣam iti siddhyatu    pratyāsanneṣv ayukteṣu paramāṇuṣu cen na te kadācit kasyacid buddhigocarāḥ paramātmavat    svasaṃvedanam evaikaṃ pratyakṣaṃ yadi tattvataḥ siddhir aṃśāṃśirūpasya cetanasya tato na kim    vijñānapracayo py eṣa bhrāṃtaś cet kim avibhramam svasaṃvedanam adhyakṣaṃ jñānāṇor apravedanāt    nānyonubhāvyo buddhyāsti tasyā nānubhavoparaḥ grāhyagrāhakavaidhuryāt svayaṃ sā na prakāśate    yan na prakāśasāmānyaṃ sarvatrānugamātmakam tatprakāśaviśeṣāṇām abhāve kena vedyate    nātra saṃvedanaṃ kiṃcid anaṃśaṃ bahirarthavat pratyakṣaṃ bahiraṃtaś ca sāṃśasyaikasya vedanāt    svāṃśeṣu nāṃśino vṛttau vikalpopāttadūṣaṇam sarvathārthāṃtaratvasyābhāvād aṃśāṃśinor iha    tādātmyapariṇāmasya tayoḥ siddheḥ kathaṃcana pratyakṣato numānāc ca na pratītiviruddhatā    yathāṃśini pravṛttasya jñānasyeṣṭā pramāṇatā tathāṃśeṣv api kiṃ na syād iti mānātmako nayaḥ    tan nāṃśiny api niḥśeṣadharmāṇāṃ guṇatāgatau dravyārthikanayasyaiva vyāpārān mukhyarūpataḥ    dharmidharmasamūhasya prādhānyārpaṇayā vidaḥ pramāṇatvena nirṇīteḥ pramāṇād aparo nayaḥ    nāpramāṇaṃ pramāṇaṃ vā nayo jñānātmako mataḥ syāt pramāṇaikadeśas tu sarvathāpy avirodhataḥ    pramāṇena gṛhītasya vastuno ṃśevigānataḥ saṃpratyayanimittatvāt pramāṇāc cen nayociṃtaḥ    nāśeṣavastunirṇīteḥ pramāṇād eva kasyacit tādṛk sāmarthyaśūnyatvāt sannayasyāpi sarvadā    mater avadhito vāpi manaḥparyayato pi vā jñātasyārthasya nāṃśe sti nayānāṃ vartanaṃ nanu    niḥśeṣadeśakālārthāgocaratvaviniścayāt tasyeti bhāṣitaṃ kaiścid yuktam eva tatheṣṭitaḥ    trikālagocarāśeṣapadārthāṃśeṣu vṛttitaḥ kevalajñānamūlatvam api teṣāṃ na yujyate    parokṣākāratāvṛtteḥ spaṣṭatvāt kevalasya tu śrutamūlā nayāḥ siddhā vakṣyamāṇāḥ pramāṇavat    pramāṇena nayaiś cāpi svārthākāraviniścayaḥ pratyeyo 'dhigamas tajjñais tatphalaṃ syād abhedabhṛt    teneha sūtrakārasya vacanaṃ karaṇaṃ kṛtaḥ sūtre yadghaṭanāṃ yāti tatpramāṇanayair iti    sārūpyasya pramāṇasya svabhāvo dhigamaḥ phalam tadbhedaḥ kalpanāmātrād iti kecit prapedire    tan na yuktaṃ niraṃśāyāḥ saṃvitter dvayarūpatāṃ pratikalpayatāṃ hetuviśeṣāsaṃbhavitvataḥ    vinā hetuviśeṣeṇa nānyavyāvṛttimātrataḥ kalpito rtho rthasaṃsiddhyai sarvathātiprasaṃgataḥ    pratikarmavyavasthānasyānyathānupapattitaḥ sākārasya ca bodhasya pramāṇatvāpavarṇanam    kṣaṇakṣayādirūpasya vyavasthāpakatā na kim tena tasya svarūpatvād viśeṣāṃtarahānitaḥ    pramāṇaṃ yogyatāmātrāt svarūpam adhigacchati yathā tathārtham ity astu pratītyanatilaṃghanāt    svarūpepi ca sārūpyān nādhigatyupavarṇanam yuktaṃ tasya dviniṣṭhatvāt kalpitasyāpy asaṃbhavāt    kalpane vānavasthānāt kutaḥ saṃvittisaṃbhavaḥ svārthena ghaṭayatyenāṃ pramāṇe svāvṛtikṣayāt    nāyaṃ doṣas tato naiva sārūpyasya pramāṇatā nābhinno dhigamas tasmād ekāṃteneti niścayaḥ    bhinna eveti cāyuktaṃ svayam ajñānatāptitaḥ pramāṇasya ghaṭasyaiva paratvāt svārthaniścayāt    cakṣurādi pramāṇaṃ ced acetanam apīṣyate na sādhakatamatvasyābhāvāt tasyācitaḥ sadā    citas tu bhāvane trādeḥ pramāṇatvaṃ na vāryate tatsādhakatamatvasya kathaṃcid upapattitaḥ    hānādivedanaṃ bhinnaṃ phalam iṣṭaṃ pramāṇataḥ tadabhinnaṃ punaḥ svārthājñānavyāvartanaṃ samam    syādvādāśrayaṇe yuktam etad apy anyathā na tu hānādivedanasyāpi pramāṇādibhidekṣaṇāt    yenaivārtho mayā jñātas tenaiva tyajyate dhunā gṛhye to pekṣate ceti tadaikyaṃ kena neṣyate    bhedaikāṃte punar na syāt pramāṇaphalatā gatiḥ saṃtānāṃtaravatsveṣṭe py ekatrātmani saṃvidoḥ    paryāyārthārpaṇād bhedo dravyārthād abhidās tu naḥ pramāṇaphalayoḥ sākṣād asākṣād api tattvataḥ    tatpramāṇān nayāc ca syāt tattvasyādhigamo paraḥ sa svārthaś ca parārthaś ca jñānaśabdātmakāt tataḥ    jñānaṃ matyādibhedena vakṣyamāṇaṃ prapaṃcataḥ śabdas tu saptadhā vṛtto jñeyo vidhiniṣedhagaḥ    tatra praśnavaśāt kaścid vidhau śabdaḥ pravartate syād asty evākhilaṃ yadvatsvarūpādicatuṣṭayāt    syān nāstyeva viparyāsād iti kaścin niṣedhane syād dvaitam eva taddvaitād ity astitvaniṣedhayoḥ    krameṇa yaugapadyād vā syād avaktavyam eva tat syād asty avācyam eveti yathocitanayārpaṇāt    syān nāsty avācyam eveti tata eva nigadyate syād dvayāvācyam eveti saptabhaṃgyavirodhataḥ    vākyevadhāraṇaṃ tāvad aniṣṭārthanivṛttaye kartavyam anyathānuktasamatvāt tasya kutracit    sarvathā tatprayoge pi sattvādiprāptivicchide syātkāraḥ saṃprayujyetānekāṃtadyotakatvataḥ    syāc chābdād apy anekāṃtasāmānyasvāvabodhane śabdāṃtaraprayogo tra viśeṣapratipattaye    so prayukto pi vā tajjñaiḥ sarvatrārthāt pratīyate yathaivakāro yogādivyavacchedaprayojanaḥ    nirdeśādyaiś ca kartavyo dhigamaḥ kāṃścana prati ity āha sūtram ācāryaḥ pratipādyānurodhataḥ    yat kim ity anuyoge rthasvarūpapratipādanam kārsntyato deśato vāpi sa nirdeśo vidāṃ mataḥ    kasya cety anuyoge satyādhipatyanivedanaṃ svāmitvaṃ sādhanaṃ kenety anuyoge tathā vacaḥ    kveti paryanuyoge tu vaco dhikaraṇaṃ viduḥ kiyac ciram iti praśne pratyuttaravacaḥ sthitiḥ    katidhedam iti praśne vacanaṃ tattvavedinām vidhānaṃ kīrtitaṃ śabdaṃ tat tv 'ajñānaṃ ca gamyatām    tair arthādhigamo bhedāt syāt pramāṇanayātmabhiḥ adhigamyasvabhāvair vā vastunaḥ karmasādhanaḥ    bhāvā yena nirūpyaṃte tadrūpaṃ nāsti tattvataḥ tatsvarūpavaco mithyety ayuktaṃ niḥpramāṇakam    yat tad ekam anekaṃ ca rūpaṃ teṣāṃ pratīyate pratyakṣato numānāc cābādhitād āgamād api    niḥśeṣadharmanairātmyaṃ svarūpaṃ vastuno yadi tadā na niḥsvarūpatvam anyathā dharmayuktatā    na kaścit kasyacit svāmī saṃbaṃdhābhāvato ṃjasā pārataṃtryavihīnatvāt siddhasyety apare viduḥ    tathā syādvādasaṃbaṃdho bhāvānāṃ paramārthataḥ svātaṃtryāt kiṃ na deśādiniyamodbhūtir īkṣyate    dravyataḥ kṣetrataḥ kālabhāvābhyāṃ kasyacit svataḥ pratyāsannakṛtaḥ siddhaḥ saṃbaṃdhaḥ kenacit sphuṭaḥ    na kiṃcit kenacid vastu sādhyate san na cāpy asat tato na sādhanaṃ nāmety anye te py asaduktayaḥ    mokṣādisādhanābhyāsābhāvāsaktes tadarthinām tatrāvidyāvilāseṣṭau kva muktiḥ pāramārthikī    saṃvic cet saṃvid evety adoṣaḥ sā yady asādhanā nityā syād anyathā siddhaṃ sādhanaṃ paramārthataḥ    nityasarvagateṣv iṣṭau tasyāḥ saṃvittyasaṃbhavāt kva vyavasthāpanānaṃśakṣaṇikajñānatattvavat    ādhārādheyabhāvasya padārthānām ayogataḥ tattvato vidyate nādhikaraṇaṃ kiṃcid ity asat    sphuṭaṃ dravyaguṇādīnām ādhārādheyatāgateḥ prasiddhibādhitatvena tadabhāvasya sarvathā    nānavasthāprasaṃgo tra vyomnaḥ svāśrayatāsthiteḥ sarvalokāśrayasyāṃtavihīnasya samaṃtataḥ    vyomavatsarvabhāvānāṃ svapratiṣṭhānuṣaṃjanaṃ kartuṃ naikāṃtato yuktaṃ sarvagatvānuṣaṃgavat    asthiratvāt padārthānāṃ sthitir naivāsti tāttvikī kṣaṇādūrdhvam itīcchaṃti kecit tad api durghaṭam    niranvayakṣayaikāṃte saṃtānādyanavasthiteḥ puṇyapāpādyanuṣṭhānābhāvāsakter nirūpaṇāt    yathā caikakṣaṇasthāyī bhāvo hetoḥ samudbhavet tathānekakṣaṇasthāyī kin na loke pratīyate    kṣaṇamātrasthitiḥ siddhaivarjusūtranayād iha dravyārthikanayād eva siddhā kālāṃtarasthitiḥ    viśvam ekaṃ sadākārāviśeṣād ity asaṃbhavi vidhānaṃ vāstavaṃ vastuny evaṃ kecit pralāpinaḥ    sadākārāviśeṣasya nānārthānām apahnave saṃbhavābhāvataḥ siddhe vidhānasyaiva tattvataḥ    tad evaṃ mānataḥ siddhair nirdeśādibhir aṃjasā yuktaṃ jīvādiṣūkteṣu nirūpaṇam asaṃśayam    yathāgamam udāhāryā nirdeṣṭavyādayo budhaiḥ niścayavyavahārābhyāṃ nayābhyāṃ mānato pi vā    sadādibhiḥ prapaṃcena tattvārthādhigamaṃ muniḥ saṃdidarśayiṣuḥ prāha sūtraṃ śiṣyānurodhataḥ    nāstitvaikāṃtavicchittyai tāvat prāk ca prarūpaṇam sāmānyato viśeṣāt tu jīvādyastitvabhidvide    sanmātrāpahnave saṃvitsattvābhāvān na sādhanam sveṣṭasya dūṣaṇaṃ vāsti nāniṣṭasya kathaṃcana    grāhyagrāhakabhāvādiśūnyaṃ saṃvittimātrakam na svataḥ siddhamārekābhāvāpatter aśeṣataḥ    parato grahaṇe tasya grāhyagrāhakatāsthitiḥ paropagamataḥ sā cet svataḥ sāpi na sidhyati    kutaścid grāhakāt siddhaḥ parābhyupagamo yadi grāhyagrāhakabhāvaḥ syāt tattvato nānyathā sthitiḥ    grāhyagrāhakabhāvotaḥ siddhas sveṣṭasya sādhanāt sarvathaivānyathā tasyānupapattir viniścayāt    bādhyabādhakabhāvasyāpy abādhe niṣṭasādhanaṃ svānyopagamataḥ siddhyen nety asāv api tāttvikam    kāryakāraṇabhāvasyābhāve saṃvidakāraṇā satī nityānyathā vyomāraviṃdādivadapramā    sarvathaivāphalatvāc ca tasyāḥ sidhyen na vastutā saphalatve punaḥ siddhā kāryakāraṇatāṃjasā    vācyavācakatāpy evamiṣṭāniṣṭātmanoḥ svayam sādhanād dūṣaṇāc cāpi vāgbhiḥ siddhānyathā na tat    tatsatprarūpaṇaṃ yuktam ādāv eva vipaścitām kvānyathā paradharmāṇāṃ nirūpaṇam anākulam    nirdeśavacanād etadbhinnaṃ dravyādigocarāt sanmātraviṣayīkurvadarthānastitvasādhanam    gatyādimārgaṇāsthānaiḥ prapaṃcena nirūpaṇam mithyādṛṣṭyādivikhyātaguṇasthānātmakātmanaḥ    saṃkhyā saṃkhyāvato bhinnā na kācid iti kecana saṃkhyāsaṃpratyayas teṣāṃ nirālaṃbaḥ prasajyate    vāsanāmātrahetuś cet sā mithyākalpanātmikā vastu sāpekṣikatvena sthaviṣṭhatvādidharmavat    na cāpekṣikatā vyāptā nīrūpatvena gamyate vastu satsv api nīlādirūpeṣv asyāḥ prasidvitaḥ    sā caikatvādisaṃkhyeyaṃ sarveṣv artheṣu vāstavī vidyamānāpi nirṇītiṃ kuryād dhetoḥ kutaścana    pratikṣaṇavināśādi bahiraṃtaryathāsthiteḥ svāvṛttyapāyavaicitryād bodhavaicitryaniṣṭhiteḥ    yatraikatvaṃ kathaṃ tatra dvitvāder api saṃbhavaḥ parasparavirodhāc cet tayor naivaṃ pratītitaḥ    vastuny ekatra dṛṣṭasya parasparavirodhinaḥ vṛttidharmakalāpasya nopālaṃbhāya kalpate    syādvādavidviṣām eva virodhapratipādanāt yathaikatvaṃ padārthasya tathā dvitvādi vāṃchatām    yenaikatvaṃ svarūpeṇa tena dvitvādi kathyate naivānaṃtātmano 'rthasyety astu kveyaṃ viruddhatā    sarvathaivāsatāṃ nāsti virodhaḥ kūrmaromavat satām api yathā dṛṣṭasveṣṭatattvaviśeṣavat    sarvaṃ sarvātmakaṃ siddhyed evam ity atisākulam sarvakāryodbhave sattvasyārthasyedṛkṣaśaktitaḥ    vyaktyātmanānubhāvasya sarvātmatvaṃ na yujyate sāṃkaryapratyayāpatter avyavasthānuṣaṃgataḥ    tato nirbādhanād eva pratyayāt tattvaniṣṭhitau saṃkhyāsaṃpratyayāt satyā tāttvikīti vyavasthitam    sā naiva tattvato yeṣāṃ teṣāṃ dravyam asaṃkhyakam saṃkhyāto tyantabhinnatvād guṇakarmādivan na kim    samavāyavaśād evaṃ vyapadeśo na yujyate tasyaikarūpatābhīṣṭe niyamākāraṇatvataḥ    samavāyo na saṃkhyādi tadvatāṃ ghaṭane prabhuḥ niraṃśatvādyathaivaikaḥ paramāṇuḥ sakṛt tava    yugapan na viśeṣyaṃte tenaiva samavāyinaḥ bhinnadeśādavṛttitvād anyathātiprasaṃgataḥ    na khādibhir anekāṃtas teṣāṃ sāṃśatvaniścayāt niraṃśatve pramābhāvād vyāpitvasya virodhataḥ    viśeṣaṇaviśeṣyatvaṃ saṃbaṃdhaḥ samavāyibhiḥ samavāyasya siddhyeta dvau vaḥ pratiniyāmakaḥ    sann apy ayaṃ tatas tāvan nābhinnaḥ svamatakṣateḥ bhinnaś cet sa svasaṃbaṃdhisaṃbaṃdho nyo sya kalpanāt    so pi tadbhinnarūpaś ced anavasthopavarṇitā tādātmyapariṇāmasya samavāyasya tu sthitiḥ    gaṇanāmātrarūpeyaṃ saṃkhyoktātaḥ kathaṃcana bhinnā vidhānato bhedagaṇanālakṣaṇādiha    nivāsalakṣaṇaṃ kṣetraṃ padārthānāṃ na vāstavam svasvabhāvavyavasthānād ity eke tadapeśalam    rājñaḥ sati kurukṣetre tannivāsasya darśanāt tasminn asati cādṛṣṭe vāstavasyāprabādhanāt    pramāṇagocarasyāsya nāvastutvaṃ svatattvavat nānumāgocarasyāpi vastutvaṃ na vyavasthitam    sāmīpyādiparityāgād vyāpakasya parigrahāt śarīre jīva ity adhikaraṇaṃ kṣetram anyathā    trikālaviṣayārthopaśleṣaṇaṃ sparśanaṃ matam kṣetrād anyatvabhāgvartamānārthaśleṣalakṣaṇāt    dravyato 'nādiparyaṃte siddhe vastuny abādhite sparśanasya pratikṣepas trikālasya na yujyate    sthitim atsu padārtheṣu yo vadhiṃ darśayaty asau kālaḥ pracakṣyate mukhyas tadanyaḥ svasthiteḥ paraḥ    na kriyāmātrakaṃ kālo vyavahāraprayojanaḥ mukhyakālādṛte siddhyed vartanālakṣaṇāt kvacit    paratvam aparatvaṃ ca samadignatayoḥ satoḥ samānaguṇayoḥ siddhaṃ tādṛkkālanibaṃdhanaṃ    parāparādikālasya tattvahetvaṃtarān na hi yato 'navasthitis tatrāpy anyahetuprakalpanāt    svatas tattvatathātve ca sarvārthānāṃ na tad bhavet vyāpyasiddher manīṣādir amūrtatvādidharmavat    yathāpratītibhāvānāṃ svabhāvasya vyavasthitau kāle parāparāditvaṃ svato stv anyatra tatkṛtam    kvānyathā vyavatiṣṭhaṃte dharmādharmanabhāṃsy api gatyādihetutāpatter jīvapudgalayoḥ svataḥ    śarīravāṅmanaḥprāṇāpānādīn api pudgalāḥ prāṇinām upakuryur na svatas teṣāṃ hi dehinaḥ    jīvā vā cetanā na syuḥ kāyāḥ saṃtu svakās tathā niṃbādir madhur astikto guḍādiḥ kālavidviṣām    ekatrārhe hi dṛṣṭasya svabhāvasya kutaścana kalpanā tadvijātīye sveṣṭatattvavidhātinī    tasmāj jīvādibhāvānāṃ svato vṛttimatāṃ sadā kālaḥ sādhāraṇo hetur vartanālakṣaṇaḥ svataḥ    svahetor jāyamānasya kutaścid vinivartate punaḥ prasūtitaḥ pūrvaṃ viraho ṃtaram iṣyate    kāla eva sa ced iṣṭaṃ viśiṣṭatvān na bhedataḥ sūcanaṃ tasya sūtre smin kathaṃcin na virudhyate    atraupaśamikādīnāṃ bhāvānāṃ pratipattaye bhāvo nāmādisūtrokto py uktas tattvānuyuktaye    ete lpe bahavaś caite 'mībhyo 'rthātiviviktaye kathyate lpabahutvaṃ tatsaṃkhyāto bhinnasaṃkhyayā    pratyekaṃ saṃkhyayā pūrvaṃ niścitārthe pi piṃḍataḥ kathyate lpabahutvaṃ yat tat tataḥ kiṃ na bhidyate    iti prapaṃcataḥ sarvabhāvādhigatihetavaḥ sadādayo nuyogāḥ syuste syādvādanayātmakāḥ    sattvena niścitā bhāvā gamyaṃte saṃkhyayā budhaiḥ saṃkhyātaḥ kṣetrato jñeyāḥ sparśanena ca kālataḥ    tathāṃtarāc ca bhāvebhyo jñeyaṃ te lpabahutvataḥ kramād iti tathaiteṣāṃ nirdeśo vyavatiṣṭhate    praśnakramavaśād vāpi vineyānām asaṃśayam nopālaṃbham avāpnoti pratyuttaravacaḥkramaḥ    sāmānyenādhigamyaṃte viśeṣeṇa ca te yathā jīvādayas tathā jñeyā vyāsenānyatra kīrtitāḥ    atha svabhedaniṣṭhasya jñānasyeha prasiddhaye prāha pravādimithyābhiniveśavinivṛttaye    jñānaṃ saṃlakṣitaṃ tāvad ādisūtre niruktitaḥ matyādīny atra tadbhedāl lakṣaṇīyāni tattvataḥ    matyāvaraṇavicchedaviśeṣān manyate yathā mananaṃ manyate yāvat svārthe matir asau matā    śrutāvaraṇaviśleṣaviśeṣāc chravaṇaṃ śrutam śṛṇoti svārtham iti vā śrūyate smeti vāgamaḥ    avadhyāvṛtividhvaṃsaviśeṣād avadhīyate yena svārtho vadhānaṃ vā so vadhir niyataḥ sthitiḥ    yan manaḥparyayāvāraparikṣayaviśeṣataḥ manaḥ paryeti yo pi vā    sa manaḥparyayo jñeyo manonnārthā manogatāḥ pareṣāṃ svamano vāpi tadālaṃbanamātrakam    kṣāyopaśamikajñānāsahāyaṃ kevalaṃ matam yadartham arthino mārgaṃ kevaṃte vā tad iṣyate    matyādīnāṃ niruktyaiva lakṣaṇaṃ sūcitaṃ pṛthak tatprakāśakasūtrāṇām abhāvād uttaratra hi    yathādisūtre jñānasya cāritrasya ca lakṣaṇam nirukter vyabhicāre hi lakṣaṇāṃtarasūcanam    svatattvālpākṣaratvābhyāṃ viṣayālpatvato pi ca mater ādau vaco yuktaṃ śrutāt tasya taduttaram    matisaṃpūrvataḥ sāhacaryāt matyā kathaṃcana pratyakṣatritayasyādāv avadhiḥ pratipādyate    sarvastokaviśuddhitvāt tucchatvāc cāvadhidhvaneḥ tataḥ paraṃ punarvācyaṃ manaḥparyayavedanam    viśuddhataratāyogāt tasya sarvāvadher api aṃte kevalam ākhyātaṃ prakarṣātiśayasthiteḥ    tasya nirvṛttyavasthāyām api sadbhāvaniścayāt  jñānaśabdasya saṃbaṃdhaḥ pratyekaṃ bhujivanmataḥ samūho jñānam ity asyāniṣṭārthasya nivṛttaye    matyādīny eva saṃjñānam iti pūrvāvadhāraṇāt matyajñānādiṣu dhvastasamyagjñānatvam ūhyate    saṃjñānam eva tānīti parasmād avadhāraṇāt teṣām ajñānatāpāstā mithyātvodayasaṃsṛtā    matimātragrahād atra smṛtyāder jñānatā gatiḥ tenākṣamatir evaikā jñānam ity apasāritam    sānumā sopamānā ca sārthāpattyādikety api saṃvādakatvatas tasyāḥ saṃjñānatvāvirodhataḥ    śrutasyājñānatām icchaṃs tadvācaiva nirākṛtaḥ svārthe kṣamativattasya saṃviditvena nirṇayāt    jighraty atīṃdriyajñānam avadhyādivaco balāt pratyākhyātasunirṇītabādhakatvena tadgateḥ    siddhe hi kevalajñāne sarvārtheṣu sphuṭātmani kārtsnyena rūpiṣu jñāneṣv avadhiḥ kena bādhyate    paricittāgateṣv artheṣv evaṃ saṃbhāvyate na kim manaḥparyayavijñānaṃ kasyacit prasphuṭākṛtiḥ    svalpajñānaṃ samārabhya prakṛṣṭajñānam aṃtimam kṛtvā tanmadhyato jñānatāratamyaṃ na hanyate    na matiśrutayor aikyaṃ sāhacaryāt sahasthiteḥ viśeṣābhāvato nāpi tato nānātvasiddhitaḥ    sāhacaryam asiddhaṃ ca sarvadā tatsahasthitiḥ naitayor aviśeṣaś ca paryāyārthanayārpaṇāt    kāryakāraṇabhāvāt syāt tayor ekatvam ity api viruddhaṃ sādhanaṃ tasya kathaṃcid bhedasādhanāt    gocarābhedataś cen na sarvathā tadasiddhitaḥ śrutasyāsarvaparyāyadravyagrāhitvavācy api    kevalajñānavat sarvatattvārthagrāhitāsthiteḥ mates tathātvaśūnyatvād anyathā svamatakṣateḥ    iṃdriyāniṃdriyāyattavṛttitvam api sādhanam na sādhīyo prasiddhatvāc chrutasyākṣānapekṣaṇāt    nāniṃdriyanimittatvād īhanaśrutayor iha tādātmyaṃ bahuveditvāc chrutasyehāvyapekṣayā    avagrahagrahītasya vastuno bhedam īhate vyaktamīhā śrutaṃ tv arthān parokṣān vividhān api    śabdaṃ śrutvā tadarthānām avadhāraṇam iṣyate yaiḥ śrutaṃ tair na labhyeta netrādimatijaṃ śrutam    tasmān matiḥ śrutād bhinnā bhinnalakṣaṇayogataḥ avadhyādivadarthādibhedāc ceti suniścitam    sarvajñānam anadhyakṣaṃ pratyakṣo rthaḥ parisphuṭaḥ iti kecid anātmajñāḥ pramāṇavyāhataṃ viduḥ    pratyakṣam ātmani jñānam aparatrānumānikam pratyātmavedyam āhaṃti tatparokṣatvakalpanām    vijñānasya parokṣatve pratyakṣo rthaḥ svataḥ katham sarvadā sarvathā sarvaḥ sarvasya na tathā bhavet    tataḥ paraṃ ca vijñānaṃ kimartham upakalpyate kādācitkatvasiddhyartham arthajñapter na sā parā    vijñānād ity anadhyakṣāt kuto vijñāyate paraiḥ liṃgāc cet tatparicchittir api liṃgāṃtarād iti    kvāvasthānam anenaiva tatrārthāpattir āhatā avijñātasya sarvasya jñāpakatvavirodhataḥ    jñātāhaṃ bahirarthasya sukhādeś ceti nirṇayāt svasaṃvedyatvataḥ puṃso na doṣa iti cen matam    svasaṃvedyāṃtarād anyadvijñānaṃ kiṃ kariṣyate karaṇena vinā kartuḥ karmaṇi vyāvṛtir na cet    svasaṃvittikriyā na syāt svataḥ puṃso rthavittivat yadi svātmā svasaṃvittāv ātmanaḥ karaṇaṃ matam    svārthavittau tadevāstu tato jñānaṃ sa eva naḥ  karmatvenāparicchittir apratyakṣaṃ yadīṣyate jñānaṃ tadā paro na syād adhyakṣas tata eva te    tathāstv iti mataṃ dhvastaprāyaṃ na punar asya te svavijñānaṃ tato dhyakṣam ātmavad avatiṣṭhate    pratyakṣaṃ svaphalajñānaṃ karaṇaṃ jñānam anyathā iti prābhākarī dṛṣṭiḥ sveṣṭavyāghātakāriṇī    karmatvena paricchitter abhāvo hy ātmano yathā phalajñānasya tadvac cet kutas tasya samakṣatā    tatkarmatvaparicchittau phalajñānāṃtaraṃ bhavet tatrāpy eva mato na syād avasthānaṃ kvacit sadā    phalatvena phalajñāne pratīte cet samakṣatā karaṇatvena tadjñāne kartṛtvenātmanīṣyatām    tathā ca na parokṣatvam ātmano na parokṣatā karaṇātmani vijñāne phalajñānatvavedinaḥ    jñānaṃ jñānāṃtarād vedyaṃ svātmajñaptivirodhataḥ prameyatvād yathā kuṃbha ity apy aślīlabhāṣitam    jñānāṃtaraṃ yadā jñānād anyasmāt tena vidyate tadānavasthitiprāpter anyathā hy aviniścayāt    arthajñānasya vijñānaṃ nājñātam avabodhakam jñāpakatvād yathā liṃgaṃ liṃgino nānyathā sthitiḥ    pradhānapariṇāmatvāt sarvaṃ jñānam acetanam sukhakṣmādivad ity ekapratīter apalāpinaḥ    cetanātmatayā vitter ātmavat sarvadā dhiyaḥ pradhānapariṇāmatvāsiddheś ceti nirūpaṇāt    tatsvārthavyavasāyātmajñānaṃ cetanam aṃjasā samyag ity adhikārāc ca saṃmatyādikabhedabhṛt    svarūpasaṃkhyayoḥ kecit pramāṇasya vivādinaḥ tat pratyāha samāsena vidadhat tadviniścayam    tad eva jñānam āstheyaṃ pramāṇaṃ neṃdriyādikam pramāṇe eva tad jñānaṃ vaikatryādipramāṇavit    nanu pramīyate yena pramāṇaṃ taditīraṇam pramāṇalakṣaṇasya syādiṃdriyādeḥ pramāṇatā    tatsādhakatamatvasyāviśeṣāt tāvatā sthitiḥ prāmāṇyasyānyathā jñānaṃ pramāṇaṃ sakalaṃ na kim    tatredaṃ ciṃtyate tāvad iṃdriyaṃ kimu bhautikam cetanaṃ vā prameyasya paricchittau pravartate    na tāvad bhautikaṃ tasyācetanatvād ghaṭādivat mṛtadravyeṃdriyasyāpi tatra vṛttiprasaṃgataḥ    pramātrādhiṣṭhitaṃ tac cet tatra varteta nānyathā kiṃ na svāpādyavasthāyāṃ tadadhiṣṭhānasiddhitaḥ    ātmā prayatnavāṃs tasyādhiṣṭhānān nāprayatnakaḥ svāpādāv iti cet ko yaṃ prayatno nāma dehinaḥ    prameye pramitāvābhimukhyaṃ caitad acetanam yady akiṃcitkaraṃ tatra paṭavat kim apekṣate    cetanaṃ caitad evāstu bhāveṃdriyam abādhitam yat sādhakatamaṃ vittau pramāṇaṃ svārthayor iha    etenaivottaraḥ pakṣaḥ ciṃtitaḥ saṃpratīyate tato nācetanaṃ kiṃcit pramāṇam iti saṃsthitam    arthagrahaṇayogyatvam ātmanaś cet anātmakam sannikarṣaḥ pramāṇaṃ naḥ kathaṃcit kena vāryate    tathāpariṇato hy ātmā pramiṇoti svayaṃ svabhuḥ yadā tadāpi yujyeta pramāṇaṃ kartṛsādhanam    pramātā bhinna evātmapramāṇād yasya darśane tasyānyātmā pramātā syāt kin na bhedāviśeṣataḥ    pramāṇaṃ yatra saṃbaṃddhaṃ sa pramāteti cen na kim kāyaḥ saṃbaddhasadbhāvāt tasya tena kathaṃcana    pramāṇaphalasaṃbaṃdho pramātaitena dūṣitaḥ saṃyuktasamavāyasya siddheḥ pramitikāyayoḥ    jñānātmakapramāṇena pramityā cātmanaḥ paraḥ samavāyo na yujyeta tādātmyapariṇāmataḥ    tato nātyaṃtiko bhedaḥ pramātuḥ svapramāṇataḥ svāsaṃnirṇītarūpāyāḥ pramiteś ca phalātmanaḥ    tathā ca yuktimatproktaṃ pramāṇaṃ bhāvasādhanam sato pi śaktibhedasya paryāyārthād anāśrayāt    syāt pramātā pramāṇaṃ syāt pramitiḥ svaprameyavat ekāṃtābhedabhedau tu pramātrādigatau kva naḥ    ekasyānekarūpatve virodho pi na yujyate mecakajñānavatprāyaściṃtitaṃ caitadaṃjasā    saṃyogādi punar yena sannikarṣo 'bhidhīyate tatsādhakatamatvasya bhāvāt tasyāpramāṇatā    satīṃdriyārthayos tāvat saṃyogenopajāyate svārthapramitir ekāṃtavyabhicārasya darśanāt    kṣitidravyeṇa saṃyogo nayanāder yathaiva hi tasya vyomādināpyasti na ca tajjñānakāraṇam    saṃyuktasamavāyaś ca śabdena saha cakṣuṣaḥ śabdajñānam akurvāṇo rūpaciccakṣur eva kim    saṃyuktasamavetārthasamavāyo py abhāvayan śabdatvasya na netreṇa buddhiṃ rūpatvavitkaraḥ    śrotrasyādyena śabdena samavāyaś ca tadvidam akurvan na tv aśabdasya jñānaṃ kuryāt kathaṃ tu vaḥ    tasyaivādim aśabdeṣu śabdatvena samaṃ bhaveta samavetasamavāyaṃ sadvijñānam anādivat    aṃtyaśabdeṣu śabdatve jñānam ekāṃtataḥ katham vidadhīta viśeṣasyābhāve yaugasya darśane    tathāgatasya saṃyuktaviśeṣaṇatayā dṛśā jñānenādhīyamāne pi samavāyādivit kutaḥ    yogyatāṃ kāṃcid āsādya saṃyogādir ayaṃ yadi kṣityādivit tad eva syāt tadā naivāstu saṃmatā    svātmā svāvṛtivicchedaviśeṣasahitaḥ kvacit saṃvidaṃ janayann iṣṭaḥ pramāṇam avigānataḥ    śaktiriṃdriyam ity etad anenaiva nirūpitaṃ yogyatāvyatirekeṇa sarvathā tadasaṃbhavāt    pramāṇaṃ yena sārūpyaṃ kathyate 'dhigatiḥ phalam sannikarṣaḥ kutas tasya na pramāṇatvasaṃmataḥ    sannikarṣe yathā saty apy arthādhigatiśūnyatā sārūpye pi tathā seṣṭā kṣaṇabhaṃgādiṣu svayam    svasaṃvidapramāṇatvaṃ sārūpyeṇa vinā yadi kiṃ nārthavedanasyeṣṭaṃ pāraṃparyasya varjanāt    sārūpyakalpane tatrāpy anavasthoditā na kim pramāṇaṃ jñānam evāstu tato nānyad iti sthitam    mithyājñānaṃ pramāṇaṃ na samyag ity adhikārataḥ yathā yatrāvisaṃvādas tathā tatra pramāṇatā    svārthe matiśrutajñānaṃ pramāṇaṃ deśataḥ sthitaṃ avadhyādi tu kārtsnyena kevalaṃ sarvavastuṣu    anupaplutadṛṣṭīnāṃ caṃdrādiparivedanam tatsaṃkhyādiṣu saṃvādi na pratyāsannatādiṣu    tathā grahoparāgādimātre śrutam avādhitam nāṃgulidvitayādau tanmānabhede 'nyathā sthite    nanūpaplutavijñānaṃ pramāṇaṃ kiṃ na deśataḥ svapnādāv iti nāniṣṭaṃ tathaiva pratibhāsanāt    pramāṇavyavahāras tu bhūyaḥ saṃvādam āśritaḥ gaṃdhadravyādivadbhūyo visaṃvādaṃ tadanyathā    yeṣām ekāṃtato jñānaṃ pramāṇam itarac ca na teṣāṃ viplutavijñānapramāṇetaratā kutaḥ    svarūpe sarvavijñānapramāṇatve matakṣatiḥ bahirvikalpavijñānapramāṇatve pramāṃtaram    na caikatra pramāṇatvāpramāṇatve virodhinī pratyakṣatvaparokṣatve yathaikatrāpi saṃvidi    svasaṃvinmātratodhyakṣā yathā buddhis tathā yadi vedyākāravinirmuktā tadā sarvasya buddhatā    tayā yathā parokṣatvaṃ hṛtsaṃvitter ato pi cet buddhāder api jāyeta jāḍyaṃ mānavivarjitam    yaiva buddheḥ svayaṃ vittir vedyākāravimuktatā saivety adhyakṣataiveṣṭā tasyāṃ kimaparokṣatā    sarveṣām api vijñānaṃ svavedyātmani vedakam nānyavedyātmanīti syād viruddhākāram aṃjasā    svavyāpārasamāsakto nyavyāpāranirutsukaḥ sarvo bhāvaḥ svayaṃ vakti syādvādanyāyaniṣṭhatām    caṃdre caṃdratvavijñānam anyatsaṃkhyāpravedanam pratyāsannatvavic cānyatvekādyākāravin na cet    haṃta mecakavijñānaṃ tathā sarvajñatā kutaḥ prasiddhyed īśvarasyeti nānākāraikavitsthitiḥ    eka eveśvarajñānasyākāraḥ sarvavedakaḥ tādṛśo yadi saṃbhāvyaḥ kiṃ brahmaivaṃ na te matam    taccetanetarākārakaraṃbitavapuḥ svayam bhāvaikam eva sarvasya saṃvittibhavanaṃ param    yady ekasya viruddhyeta nānākārāvabhāsitā tadā nānārthabodho pi naikākāro vatiṣṭhate    nānā jñānāni neśasya kalpanīyāni dhīmatā kramāt sarvajñatāhāner anyathā nanu saṃdhitaḥ    tasmād ekam anekātmaviruddham api tattvataḥ siddhaṃ vijñānam anyac ca vastusāmarthyataḥ svayam    pramāṇam avisaṃvādi jñānām ity upavarṇyate kaiścit tatrāvisaṃvādo yady ākāṃkṣānivartanam    tadā svapnādivijñānaṃ pramāṇam anuṣajyate tataḥ kasyacid artheṣu paritoṣasya bhāvataḥ    arthakriyā sthitiḥ proktā vimuktiḥ sā na tatracet śābdādāv iva tadbhāvo stv abhiprāyanivedanāt    prāmāṇyaṃ vyavahāreṇa śāstraṃ mohanivartanam tato paryanuyojyāś cet tatraite vyavahāriṇaḥ    śāstreṇa kriyatāṃ teṣāṃ kathaṃ mohanivartanam tadaniṣṭau tu śāstrāṇāṃ pratītir vyāhatā na kim  a  yuktyā yan na ghaṭāmeti dṛṣṭvāpi śraddadhe na tat iti bruvan pramāṇatvaṃ yuktyā śraddhātum arhati    tathāsati pramāṇasya lakṣaṇaṃ nāvatiṣṭhate parihartum ativyāpter aśakyatvāt kathaṃcana    kṣaṇakṣayādibodhe vimuktyabhāvāc ca dūṣyate pratyekṣe pi kim avyāptyā taduktaṃ naiva lakṣaṇam    kṣaṇikeṣu vibhinneṣu paramāṇuṣu sarvataḥ saṃbhavo py avimokṣasya na pratyakṣānumānayoḥ    ajñātārthaprakāśaś cel lakṣaṇaṃ paramārthataḥ gṛhītagrahaṇān na syād anumānasya mānatā    pratyakṣeṇa gṛhīte pi kṣaṇikatvādivastuni samāropavyavacchedāt prāmāṇyaṃ laiṃgikasya cet    smṛtyādivedanasyātaḥ pramāṇatvam apīṣyatām mānadvaividhyavidhvaṃsanibaṃdhanam abādhitam    mukhyaṃ prāmāṇyam adhyakṣe 'numāne vyāvahārikam iti bruvan na bauddhaḥ syāt pramāṇe lakṣaṇadvayam    tatrāpūrvārthavijñānaṃ niścitaṃ bādhavarjitam pramāṇam iti yo py āha so py etena nirākṛtaḥ    gṛhītagrahaṇābhedād anumānādi saṃvidaḥ pratyabhijñānanirṇītanityaśabdādivastuṣu    pratyakṣaṃ pratyabhijñā ced grahītagrahaṇaṃ bhavet tato nyac cet tathāpy evaṃ pramāṇāṃtaratā ca te    pratyakṣeṇāgrahīte rthe pratyabhijñā pravartate pūrvottaravivartaikagrāhāc cen nākṣajatvataḥ    pūrvottaravivartākṣajñānābhyāṃ so pajanyate tanmātram iti cet kve yaṃ tadbhinnaikatvavedinī    vivartābhyām abhedaś ced ekatvasya kathaṃcana tadgrāhiṇyāḥ kathaṃ na syāt pūrvārthatvaṃ smṛter iva    tattvārthavyavasāyātmajñānaṃ mānam itīyatā lakṣaṇena gatārthatvād vyartham anyam anyadviśeṣaṇam    gṛhītam agṛhītaṃ vā svārthaṃ yadi vyavasyati tan na loke na śāstreṣu vijahāti pramāṇatām    bādhavarjitatāpy eṣā nāparā svārthaniścayāt sa ca prabādhyate ceti vyāghātān mugdhabhāṣitam    bādhakodayataḥ pūrvaṃ vartate svārthaniścayaḥ tasyodaye tu bādhyetety etad apy avicāritam    apramāṇād api jñānāt pravṛtter anuṣaṃgataḥ bādhakodbhūtitaḥ pūrvaṃ pramāṇaṃ viphalaṃ tataḥ    bādhakābhāvavijñānāt pramāṇatvasya niścaye pravṛttyaṃge tad eva syāt pratipattuḥ pravartakam    tasyāpi ca pramāṇatvaṃ bādhakābhāvavedanāt parasmād ity avasthānaṃ ka nāmaivaṃ labhemahi    bādhakābhāvabodhasya svārthanirṇītir eva cet bādhakāṃtaraśūnyatvanirṇītiḥ prathame tra sā    saṃpratyayo yathā yatra tathā tatrāstv itīraṇe bādhakābhāvavijñānaparityāgaḥ samāgataḥ    yac cārthavedane bādhābhāvajñānaṃ tad eva naḥ syād arthasādhanaṃ bādhasadbhāvajñānam anyathā    tatra deśāṃtaradīni vāpekṣya yadi jāyate tadā suniścitaṃ bādhābhāvajñānaṃ na cānyathā    aduṣṭakāraṇārabdham ity etac ca viśeṣaṇam pramāṇasya na sāphalyaṃ prayātyavyabhicārataḥ    duṣṭakāraṇajanyasya svārthanirṇītyasaṃbhavāt sarvasya vedanasyotthaṃ tata evānumānataḥ    svārthaniścāyakatvenāduṣṭakāraṇajanyatā tathā ca tattvam ity etatparasparasamāśritam    yadi kāraṇadoṣasyābhāvajñānaṃ ca gamyate jñānasyāduṣṭahetūtthā tadā syād anavasthitiḥ    hetudoṣavihīnatvajñānasyāpi pramāṇatā svahetudoṣaśūnyatvajñānāt tasyāpi sā tataḥ    gatvā sudūram ekasya tadabhāve pi mānatā yadīṣṭā tadvad eva syād ādyajñānasya sā na kim    svataḥ sarvapramāṇānāṃ prāmāṇyam iti kecana yataḥ svato 'satī śaktiḥ kartuṃ nānyena śakyate    teṣāṃ svato pramāṇatvam ajñānānāṃ bhaven na kim tata eva viśeṣasyābhāvāt sarvatra sarvathā    yathārthabodhakatvena pramāṇatvaṃ vyavasthitam arthānyathātvahetūtthadoṣajñānād apohyate    tathā mithyāvabhāsitvād apramāṇatvam āditaḥ arthayāthātmyahetūtthaguṇajñānād apohyate    yady athārthānyathābhāvābhāvajñānaṃ nigadyate arthayāthātmyavijñānam apramāṇatvabādhakam    tathaivāstv arthayāthātmyābhāvajñānaṃ svataḥ satām arthānyathātvavijñānaṃ pramāṇatvāpavādakam    vijñānakāreṇa doṣābhāvaḥ prajñāyate guṇaḥ yathā tathā guṇābhāvo doṣaḥ kiṃ nātra manyate    yathā ca jātamātrasyāduṣṭā netrādayaḥ svataḥ jātyaṃdhādes tathā duṣṭāḥ śiṣṭais te kiṃ na lakṣitāḥ    dhūmādayo yathāgnyādīn vinā na syuḥ svabhāvataḥ dhūmābhāsādayas tadvat tair vinā saṃty abādhitāḥ    yathā śabdāḥ svatas tattvapratyāyanaparās tathā śabdābhāsās tathā mithyāpadārthapratipādakāḥ    duṣṭe vaktari śabdasya doṣas tat saṃpratīyate guṇo guṇavatīti syād vaktradhīnam idaṃ dvayam    yathā vaktṛguṇair doṣaḥ śabdānāṃ vinivartyate tathā guṇo pi taddoṣair iti spṛṣṭam abhīkṣyate    yathā ca vakrabhāvena na syur doṣās tadāśrayāḥ tadvad eva guṇā na syur meghadhvānādivaddhruvam    tataś ca codanābuddhir na pramāṇaṃ na vā pramā āptānāptopadeśotthabuddhes tattvaprasiddhitaḥ    evaṃ samatvasaṃsiddhau pramāṇatvetaratvayoḥ svata eva dvayaṃ siddhaṃ sarvajñāneṣv itītare    tannānabhyāsakāle pi tathā bhāvānuṣaṃgataḥ na ca pratīyate tādṛk paratas tattvanirṇayāt    dvayaṃ parata eveti kecit tad api sākulam svabhyastaviṣaye tasya parāpekṣānabhīkṣaṇāt    tatra pravṛttisāmarthyāt pramāṇatvaṃ pratīyate pramāṇasyārthavattvaṃ cen nānavasthānuṣaṃgataḥ    pramāṇena pratīte rthe yat tad deśopasarpaṇam sā pravṛttiḥ phalasyāptis tasyāḥ sāmarthyam iṣyate    prasūtir vā sajātīyavijñānasya yadā tadā phalaprāptir api jñātā sāmarthyaṃ nānyathā sthitiḥ    tadvijñānasya cānyasmāt pravṛttibalato yadi tadānavasthitis tāvat kenātra pratihanyate    svatas tadbalato jñānaṃ pramāṇaṃ cet tathā na kim prathamaṃ kathyate jñānaṃ pradveṣo nirnibaṃdhanam    etenaiva sajātīyajñānotpattau niveditā anavasthānyatas tasya pramāṇatvavyavasthiteḥ    na ca sāmarthyavijñāne prāmāṇyānavadhāraṇe tannibaṃdhanam ādyasya jñānasyaitat prasiddhyati    jñātaprāmāṇyato mānāt pravṛttau kena vāryate parasparāśrayo doṣo vṛttiprāmāṇyasaṃvidoḥ    avijñātapramāṇatvāt pravṛttiś cedvṛthā bhavet prāmāṇyavedanaṃ vṛtteḥ kṣaure nakṣatrapṛṣṭivat    arthasaṃśayato vṛttir anenaiva nivāritā anarthasaṃśayād vāpi nivṛttir viduṣām iva    paralokaprasiddhyartham anuṣṭhānaṃ pramāṇataḥ siddhaṃ tasya bahukleśavittatyāgātmakatvataḥ    iti bruvan mahāyātrāvivāhādiṣu vartanam saṃdehād abhimanyena jāḍyād eva mahātamāt    tasmāt prekṣāvatāṃ yuktā pramāṇād eva niścitāt sarvapravṛttir anyeṣāṃ saṃśayāder api kvacit    prekṣāvatā punar jñeyā kadācit kasyacit kvacit aprekṣakāritāpy evam anyatrāśeṣavedinaḥ    tatrābhyāsāt pramāṇatvaṃ niścitaḥ svata eva naḥ anabhyāse tu parata ity āhuḥ kecid aṃjasā    tac ca syādvādinām eva svārthaniścayanāt sthitam na tu svaniścayonmuktaniḥśeṣajñānavādinām    svataḥ pramāṇatā yasya tasyaiva parataḥ katham tadaivaikatra naivātaḥ syādvādo sti virodhataḥ    naitatsādhu pramāṇasyānekarūpatvaniścayāt prameyasya ca nirbhāgatattvavādas tu bādhyate    tatra yat parato jñānam anabhyāse pramāṇatām yāti svataḥ svarūpe tat tām iti kvaikarūpatā    svārthayor api yasya syād anabhyāsāt pramāṇatā pratikṣaṇavivartādau tasyāpi parato na kim    syādvādo na viruddho taḥ syāt pramāṇaprameyayoḥ svadravyādivaśād vāpi tasya sarvatra niścayaḥ    nanv asiddhaṃ pramāṇaṃ kiṃ svarūpeṇa nirūpyate śaśaśṛṃgavad ity eke tad apy unmattabhāṣitam    sveṣṭāniṣṭārthayor jñātur vidhānapratiṣedhayoḥ siddhiḥ pramāṇasaṃsiddhyabhāve sti na hi kasyacit    nanu pramāṇasaṃsiddhiḥ pramāṇāṃtarato yadi tadānavasthitir no cet pramāṇānveṣaṇaṃ vṛthā    ādyapramāṇataḥ syāc cet pramāṇāṃtarasādhanam tataś cādyapramāṇasya siddher anyonyasaṃśrayaḥ    prasiddhenāprasiddhasya vidhānam iti nottaram prasiddhasyāvyavasthānāt pramāṇavirahe kvacit    parānurodhamātreṇa prasiddho rtho yadīṣyate pramāṇasādhanas tadvatpramāṇaṃ kiṃ na sādhanam    parābhyupagamaḥ kena siddhyatīty api ca dvayoḥ samaḥ paryanuyogaḥ syāt samādhānaṃ ca nādhikam    tatpramāṇaprameyādivyavahāraḥ pravartate sarvasyāpy avicāreṇa svapnādivad itītare    teṣāṃ saṃvittimātraṃ syād anyad vā tattvam aṃjasā siddhaṃ svato yathā tadvatpramāṇam apare viduḥ    yathā svātaṃtryam abhyastaviṣaye 'sya pratīyate prameyasya tathā neti na pramānveṣaṇaṃ vṛthā    parato pi pramāṇatvenabhyastaviṣaye kvacit nānāvasthānuṣajyeta tata eva vyavasthiteḥ    dṛṣṭādṛṣṭanimittānāṃ vaicitryād iha dehinām jāyate kvacid abhyāso 'nabhyāso vā kathaṃcana    tatprasiddhena mānena svato siddhasya sādhanam prameyasya yathā tadvatpramāṇasyeti dhīdhanāḥ    evaṃ vicārato mānasvarūpe tu vyavasthite tatsaṃkhyānaprasiddhyarthaṃ sūtre dvitvasya sūcanāt    pramāṇam ekam eveti kecit tāvat kudṛṣṭayaḥ pratyakṣamukhyam anyasmād arthanirṇītyasaṃbhavāt    teṣāṃ tatkiṃ svataḥ siddhaṃ pratyakṣāṃtarayo pi vā svasya sarvasya cety etad bhavet paryanuyojanam    svasyaiva cet svataḥ siddhaṃ naṣṭaṃ gurvādikīrtanam tadavyaktapramāṇatvasiddhyabhāvāt kathaṃcana    pratyakṣāṃtarato vāpyasiddhau syād anavasthitiḥ kvacit svato 'nyato veti syādvādāśrayaṇaṃ param    sarvasyāpi svato dhyakṣapramāṇam iti cen matiḥ kenāvagamyatām etadadhyakṣād yogividviṣām    pramāṇāṃtarato jñāne naikamānavyavasthitiḥ apramāṇād gatāv eva pratyakṣaṃ kimu poṣyate    pratyakṣam anumānaṃ ca pramāṇe iti kecana teṣām api kuto vyāptiḥ siddhyen mānāṃtarād vinā    pratyakṣānupalaṃbhābhyāṃ na tāvat tatprasādhanam tayoḥ sannihitārthatvāt trikālāgocaratvataḥ    kāraṇānupalaṃbhāc cet kāryakāraṇatānumā vyāpakānupalaṃbhāc ca vyāpyavyāpakatānumā    tadvyāptisiddhir apy anyānumānād iti na sthitiḥ parasparam api vyāptisiddhāv anyonyam āśrayaḥ    yogipratyakṣato vyāptisiddhir ity api durghaṭam sarvatrānumitijñānābhāvāt sakalayoginaḥ    parārthānumitau tasya vyāpāro pi na yujyate ayoginaḥ svayaṃ vyāptim ajānānaḥ janān prati    yogino pi prati vyarthaḥ svasvārthānumitāv iva samāropaviśeṣasyābhāvāt sarvatra yoginām    etenaiva hatādeśayogipratyakṣato gatiḥ saṃbaṃdhasyāsphuṭaṃ dṛṣṭety anumānaṃ nirarthakam    tasyāviśadarūpatve pratyakṣatvaṃ virudhyate pramāṇāṃtaratāyāṃ tu dve pramāṇe na tiṣṭhataḥ    na cāpramāṇato jñānād yukto vyāptiviniścayaḥ pratyakṣādiprameyasyāpy evaṃ nirṇītasaṃgataḥ    pratyakṣaṃ mānasaṃ yeṣāṃ saṃbaṃdhaṃ liṃgaliṃginoḥ vyāptyā jānāti te py arthe tīṃdriye kimu kurvate    yatrākṣāṇi pravartaṃte mānasaṃ tatra vartate no nyatrākṣādivaidhuryaprasaṃgāt sarvadehinām    saṃbaṃdho tīṃdriyārtheṣu niścīyetānumānataḥ tadvyāptiś cānumānenānyena yāvat pravartate    pratyakṣaniścitavyāptir anumāno navasthitiḥ nivartyate tathānyonyasaṃśrayaśceti kecana    teṣāṃ tanmānasaṃ jñānaṃ spaṣṭaṃ na pratibhāsate aspaṣṭaṃ ca kathaṃ nāma pratyakṣam anumānavat    tarkaś caivaṃ pramāṇaṃ syāt smṛtisaṃjñā ca kiṃ na vaḥ mānasatvāvisaṃvādāviśeṣān nānumān yathā    tarkāder mānase dhyakṣe yadi liṃgānapekṣiṇaḥ syād aṃtarbhavanaṃ siddhis tato dhyakṣānumānayoḥ    tadā mateḥ pramāṇatvaṃ nāmāṃtaravṛtto stu naḥ tadvad evāvisaṃvādāc chrutasyeti pramātrayam    nākṣaliṃgavibhinnāyāḥ sāmagryā vacanātmanaḥ samudbhūtasya bodhasya mānāṃtaratayā sthiteḥ    yatreṃdriyamanodhyakṣaṃ yogipratyakṣam eva vā laiṃgikaṃ vā śrutaṃ tatra vṛtter mānāṃtaraṃ bhavet    pratyakṣād anumānasya mā bhūt tarhi vibhinnatā tadarthe vartamānatvāt sāmagrībhitsamā śrutiḥ    śabdaliṃgākṣasāmagrībhedād yeṣāṃ pramātr ayaṃ teṣām aśabdaliṃgākṣajanmajñānaṃ pramāṃtaram    yogipratyakṣam apy akṣasāmagrījanitaṃ na hi sarvārthāgocaratvasya prasaṃgād asmadādivat    pratyakṣaṃ viśadaṃ jñānaṃ yogītarajaneṣu cet smaraṇāder avaiśadyād apratyakṣatvam āgatam    liṃgaśabdānapekṣatvād anumāgamatā ca na saṃvādān nāpramāṇatvam iti saṃkhyā pratiṣṭhitā    etenaiva catuḥpaṃcaṣaṭpramāṇābhidhāyināṃ sveṣṭasaṃkhyākṣatir jñeyā smṛtyādes tadvibhedataḥ    tadvakṣyamāṇakān sūtradvayasāmarthyataḥ sthitaḥ dvitvasaṃkhyāviśeṣo trākalaṃkair abhyadhāyi yaḥ    pratyakṣaṃ viśadaṃ jñānaṃ tridhā śrutam aviṣṇutam parokṣaṃ pratyabhijñādī pramāṇe iti saṃgrahaḥ    tridhā pratyakṣam ity etatsūtravyāhatam īkṣyate pratyakṣātīṃdriyatvasya niyamād ity apeśalam    atyakṣasya svasaṃvittiḥ pratyakṣasyāvirodhataḥ vaiśadyāṃśasya sadbhāvāt vyavahāraprasiddhitaḥ    pratyakṣam ekam evoktaṃ mukhyaṃ pūrṇetarātmakam akṣam ātmānam āśritya vartamānam atīṃdriyam    parāptahatayākhyātaṃ parokṣaṃ tu matiśrutam śabdārthaśrayaṇād evaṃ na doṣaḥ kaścid īkṣyate    ādye parokṣam ity āha sūtrapāṭhakramād iha jñeyādyatā matir mukhyā śrutasya guṇabhāvataḥ    buddhau tiryagavasthānān mukhyaṃ vādyatvam etayoḥ avadhyāditrayāpekṣaṃ kathaṃcin na virudhyate    parokṣam iti nirdeśo jñānam ity anuvartanāt tato matiśrute jñānaṃ parokṣam iti nirṇayaḥ    dvayor ekena nāyuktā samānāśrayatā yathā godau grāma iti prāyaḥ prayogasyopalakṣaṇāt    pramāṇe iti vā dvitve pratijñāte pramāṇayoḥ pramāṇam iti varteta parokṣam iti saṃgatau    jñānānuvartanāt tatra nājñānasya parokṣatā pramāṇasyānuvṛtter na parokṣasyāpramāṇatā    akṣebhyo hi parāvṛttaṃ parokṣaṃ śrutam iṣyate yathā tathā smṛtiḥ saṃjñā ciṃtā cābhinibodhikam    avagrahādivijñānam akṣād ātmā vidhānataḥ parāvṛttatayāmnātaṃ pratyakṣam api deśataḥ    aspaṣṭaṃ vedanaṃ kecid arthānālaṃbanaṃ viduḥ manorājyādi vijñānaṃ yathaivety eva durghaṭam    spaṣṭasyāpy avabodhasya nirālaṃbanatāptitaḥ yathā caṃdradvayajñānasyeti kvārthasya niṣṭhitaḥ    anālaṃbanatā vyāptir na spaṣṭatvasya te yathā aspaṣṭatvasya tadviddhi laiṃgikasyārthavattvataḥ    tasyānarthāśrayatve rthe syāt pravartakatā kutaḥ saṃbaṃdhāc cen na tasyāpi tathātve nupapattitaḥ    liṃgaliṃgidhiyor evaṃ pāraṃparyeṇa vastuni pratibaṃdhāt tadābhāsaśūnyayor apy avaṃcanam    maṇiprabhāmaṇijñāne pramāṇatvaprasaṃgataḥ pāraṃparyān maṇau tasya pratibaṃdhāviśeṣataḥ    tac cānumānam iṣṭaṃ cen na dṛṣṭāṃtaḥ prasiddhyati pramāṇatvavyavasthāne numānasyārthalabdhitaḥ    maṇipradīpaprabhayor maṇibuddhyābhidhāvataḥ mithyājñānaviśeṣe pi viśeṣo rthakriyāṃ prati    yathā tathā yathārthatve py anumānaṃ tadobhayoḥ nārthakriyānurodhena pramāṇatvaṃ vyavasthitam    dṛṣṭaṃ yad eva tatprāptam ity ekatvāvirodhataḥ pratyakṣaṃ kasyacit tac cen na syād dhāṃtaṃ virodhataḥ    apramāṇatvapakṣe pi tasya dṛṣṭāṃtatā kṣatiḥ pramāṇāṃtaratāyāṃ tu saṃkhyā na vyavatiṣṭhate    tataḥ sālaṃbanaṃ siddham anumānaṃ pramātvataḥ pratyakṣavadviparyāso vānyathā syād durātmanām    arthasyāsaṃbhave bhāvāt pratyakṣe pi pramāṇatām tadavyāptaṃ pramāṇatvam arthavattvena manyatām    prāpyārthāpekṣayeṣṭaṃ cet tathādhyakṣe pi te stu tat tathā vādhyakṣam apy arthānālaṃbanam upasthitam    anumānam avastv eva sāmānyam avalaṃbate prāpayaty artham ity etat sacetānāpya mokṣate    tasmād vastv eva sāmānyaviśeṣātmakam aṃjasā viṣayīkurute dhyakṣaṃ yathā tadvac ca laiṃgikam    smṛtyādiśrutaparyaṃtam aspaṣṭam api tattvataḥ svārthālaṃbanam ity arthaśūnyaṃ tannibham eva naḥ    mipratyakṣam anyad ity āha parokṣād uditāt paraṃ avadhyāditrayaṃ jñānaṃ pramāṇaṃ cānuvṛttitaḥ    jñānagrahaṇasaṃbaṃdhāt kevalāvadhidarśane vyudasyete pramāṇābhisaṃbaṃdhād apramāṇatā    samyag ity adhikārāc ca vibhaṃgajñānavarjanaṃ pratyakṣam iti śabdāc ca parāpekṣān nivartanam    pratyakṣalakṣaṇaṃ prāhuḥ spaṣṭaṃ sākāram aṃjasā dravyaparyāyasāmānyaviśeṣārthātmavedanam    sūtrakārā iti jñeyam ākalaṃkāvabodhane pradhānaguṇabhāvena lakṣaṇasyābhidhānataḥ    lakṣaṇaṃ samam etāvān viśeṣo 'śeṣagocaraṃ akramaṃ karaṇātītam akalaṃkaṃ mahīyasām    etac cāsti sunirṇītāsaṃbhavadbādhakatvataḥ svasaṃvittivad ity ukta vyāsato nyatra gamyatām    pratyakṣaṃ kalpanāpoḍham abhrāṃtam iti kecana teṣām aspaṣṭarūpā syāt pratītiḥ kalpanāthavā    svārthavyavasitir nānyā gatir asti vicārataḥ abhilāpavatī vittis tadyogyā vāpi sā yataḥ    tatrādyakalpanāpoḍhe pratyakṣe siddhasādhanam spaṣṭe tasminn avaiśadyavyavacchedasya sādhanāt    aspaṣṭapratibhāsāyāḥ pratīter anapohane pratyakṣasyānumānāder bhedaḥ kenāvabudhyate    svārthavyavasitis tu syāt kalpanā yadi saṃmatā tadā lakṣaṇam etat syād asaṃbhāvy eva sarvathā    saṃhṛtya sarvataś cittaṃ stimitenāṃtarātmanā sthito pi cakṣuṣā rūpaṃ svaṃ ca spaṣṭaṃ vyavasyati    punar vikalpayan kiṃcid āsīn me svārthaniścayaḥ īdṛg ity eva budhyena prāgiṃdriyagatāv api    tato nyathāsmṛtir na syāt kṣaṇikatvādivat punaḥ abhyāsādiviśeṣas tu nānyaḥ svārthaviniścayāt    tadakalpakam arthasya sāmarthyena samudbhavāt arthakṣaṇavad ity eke na viruddhasyaiva sādhanam    jātyādyātmakabhāvasya sāmarthyena samudbhavāt savikalpakam eva syāt pratyakṣaṃ sphuṭam aṃjasā    yathāvabhāsato kalpāt pratyakṣāt prabhavann api tatpṛṣṭhato vikalpaḥ syāt tathāthākṣāc ca sa sphuṭaḥ    na ca jātyādirūpatvam arthasyāsiddham aṃjasā nirbādhabodhavidhvastasamastāreki tattvataḥ    saṃketasmaraṇopāyā dṛṣṭasaṃkalpanātmikā naiṣā vyavasitiḥ spaṣṭā tato yuktākṣajanmani    svato hi vyavasāyātmapratyakṣaṃ sakalaṃ matam abhidhānādyapekṣāyām anyonyāśrayaṇāt tayoḥ    svābhidhānaviśeṣasya niścayo yady apekṣate svābhilāṣāṃtaraṃ nūnam anavasthā tadā na kim    gatvā sudūram apy evam abhidhānasya niścaye svābhilāpānapekṣasya kimu nārthasya niścayaḥ    abhidhānaviśeṣaś cet svasminn arthe ca niścayam kurvan dṛṣṭaḥ svaśaktyaiva liṃgādyarthe pi tādṛśaḥ    śābdasya niścayo rthasya śabdāpekṣo stv abādhitaḥ liṃgajanmākṣajanmā ca tadapekṣo bhidhīyate    tataḥ pratyakṣam āstheyaṃ mukhyaṃ vā deśato pi vā syān nirvikalpakaṃ siddhaṃ yuktyā syāt savikalpakaṃ    sarvathā nirvikalpatve svārthavyavasitiḥ kutaḥ sarvathā savikalpatve tasya syāc chabdakalpanā    savitarkavicārā hi paṃca vijñānadhātavaḥ nirūpaṇānusmaraṇavikalpenāvikalpakāḥ    ity evaṃ svayam iṣṭatvān naikāṃtenāvikalpakaṃ pratyakṣaṃ yuktam āsthātuṃ parasyāpi virodhataḥ    vidhūtakalpanājālaṃ yogipratyakṣam eva cet sarvathā lakṣaṇāvyāptidoṣaḥ kenāsya vāryate    laukikī kalpanāpoḍhā yato dhyakṣaṃ tad eva cet śāstrīyā sāsti tatreti naikāṃtenāvikalpakam    tadapāye ca buddhasya na syād dharmopadeśanā kuṭyāder yā na sā tasyety etatpūrvaṃ viniścitaṃ    ye pi cātmamano kṣārthasannikarṣodbhavaṃ viduḥ pratyakṣaṃ neśvarādhyakṣaṃ saṃgrahas taiḥ kṛto bhavet    neśvarasyākṣajajñānaṃ sarvārthaviṣayatvataḥ nākṣaiḥ sarvārthasaṃbaṃdhaḥ sahaikasyāsti sarvathā    yogajāj jñāyate yat tu jñānaṃ dharmaviśeṣataḥ na saṃnikarṣajaṃ tasmād iti na vyāpi lakṣaṇaṃ    sautrādivṛttir adhyakṣam ity apy etena ciṃtitaṃ tasyā vicāryamāṇāyā virodhaś ca pramāṇataḥ    puṃsaḥ satsaṃprayoge yad iṃdriyāṇāṃ prajāyate tad eva vedanaṃ yuktaṃ pratyakṣam iti kecana    tatsvārthavyavasāyātmavidhā pratyakṣam aṃjasā jñānaṃ viśadam anyat tu parokṣam iti saṃgrahaḥ    matyādiṣv avabodheṣu smṛtyādīnām asaṃgrahaḥ ity āśaṃkyāha matyādisūtraṃ matyātmanāṃ vide    matir eva smṛtiḥ saṃjñā ciṃtā vābhinibodhakam nārthāṃtaraṃ matijñānāvṛticchedaprasūtitaḥ    iti śabdāt prakārārthād buddhir medhā ca gṛhyate prajñā ca pratibhābhāvaḥ saṃbhavopamitī tathā    kathaṃcid vyapadeśādibhede py etadabhinnatā na virodham adhiṣṭhātum īṣṭe prātītikatvataḥ    buddhir mateḥ prakāraḥ syād arthagrahaṇaśaktikā medhā smṛteḥ tathā śabdasmṛtiśaktir manasvinām    ūhāpohātmikā prajñā ciṃtāyāḥ pratibhopamā sādṛśyopādhike bhāve sādṛśye tadviśeṣaṇe    pravartamānā keṣāṃcid dṛṣṭā sādṛśyasaṃvidaḥ saṃjñāyāḥ saṃbhavādy astu laiṃgikasya tathāgateḥ    pratyekam iti śabdasya tataḥ saṃgatir iṣyate samāptau ceti śabdo yaṃ sūtre smin na virudhyate    smṛteḥ pramāṇatāpāye saṃjñāyā na pramāṇatā tadapramāṇatāyāṃ tu ciṃtā na vyavatiṣṭhate    tadapratiṣṭhitau kvātra mānaṃ nāma pravartate tadapravartane dhyakṣaprāmāṇyaṃ nāvatiṣṭhate    tataḥ pramāṇaśūnyatvāt prameyasyāpi śūnyatā sāpi mānād vinā neti kim apy astīti sākulam    tasmāt pravartakatvena pramāṇatve tra kasyacit smṛtyādīnāṃ pramāṇatvaṃ yuktam uktaṃ ca kaiścana    akṣajñānair anusmṛtya pratyabhijñāya ciṃtayet ābhimukhyena tadbhedān viniścitya pravartate    akṣajñānair viniścitya sarva eva pravartate iti bruvan svacittādau pravartata iti smṛteḥ    gṛhītagrahaṇāt tatra na smṛteś cet pramāṇatā dhārāvāhyakṣavijñānasyaivaṃ labhyeta kena sā    viśiṣṭasyopayogasyābhāve sāpi na cen matā tadabhāve smaraṇe py akṣajñānavanmānatāstu naḥ    smṛtyā svārthaṃ paricchidya pravṛttau na ca bādhyate yena prekṣāvatāṃ tasyāḥ pravṛttir vinivāryate    smṛtimūlābhilāṣāder vyavahāraḥ pravartakaḥ na pramāṇaṃ yathā tadvadakṣadhīmūlikā smṛtiḥ    ity ācakṣaṇiko nāmānumāmaṃsta pṛthakpramā pratyakṣaṃ taddhi tanmūlam iti cārvākatāgatiḥ    svārthaprakāśakatvena pramāṇam anumā yadi smṛtir astu tathā nābhilāṣādis tadabhāvataḥ    samāropavyavacchedas samaḥ smṛtyanumānataḥ svārthe pramāṇatā tena naikatrāpi nivāryate    smṛtir na laiṃgikaṃ liṃgajñānābhāve pi bhāvataḥ saṃbaṃdhasmṛtivan na syād anavasthānam anyathā    parāparānumānānāṃ kalpanasya prasaṃgataḥ vivakṣitānumānasyāpy anumānāṃtarāj janau    nāpramāṇātmano smṛtyā saṃbaṃdhaḥ siddham ṛcchati pramāṇānarthakatvasya prasaṃgāt sarvavastuni    smṛtis tad iti vijñānam arthātīte bhavet katham syād arthavad iti sveṣṭaṃ yāti bauddhasya lakṣyate    pratyakṣam arthavan na syād atīte rthe samudbhavat tasya smṛtivad evaṃ hi tadvad eva ca laiṃgikam    nārthāj janmopapadyeta pratyakṣasya smṛter iva tadvat sa eva tadbhāvād anyathā na kṣaṇakṣayaḥ    arthākāratvato dhyakṣaṃ yadarthasya prabodhakaṃ tata eva smṛtiḥ kiṃ na svārthasya pratibodhakā    aspaṣṭatvena cen nānumāne py evaṃ prasaṃgataḥ prāpyārthenārthavattā ced anumānāyāḥ smṛter na kim    manasā janyamānatvāt saṃskārasahakāriṇā sarvatrārthānapekṣeṇa smṛtir nārthavatī yadi    tadā saṃskāra eva syāt pravṛttis tannibaṃdhanā tatrāsaṃbhavato rthe ced vyaktam īśvaraceṣṭitam    pratyakṣaṃ mānasaṃ jñānaṃ smṛter yasyāḥ prajāyate sā hi pramāṇasāmagrīvartinī syāt pravartikā    pramāṇatvād yathā liṃgiliṃgasaṃbaṃdhasaṃsmṛtiḥ liṃgijñānaphalety āha sāmagrīmānavādinaḥ    tad apy asaṃgataṃ liṃgijñānasyaiva prasaṃgataḥ pratyakṣatvakṣater liṃgatatphalāyāḥ smṛter iva    pratyakṣavatsmṛteḥ sākṣātphale svārthaviniścaye kiṃ sādhakatamatvena prāmāṇyaṃ nopagamyate    pāraṃparyeṇa hānādijñānaṃ ca phalam īkṣyate tasyās tadanusmṛtyaṃtaryāthārthyavṛttito rthinaḥ    pratyabhijñāya ca svārthaṃ vartamāno yato rthabhāk mataṃ tatpratyabhijñānaṃ pramāṇaṃ paramanyathā    tadvidhaikatvasādṛśyagocaratvena niścitaṃ saṃkīrṇavyatikīrṇatvavyatirekeṇa tattvataḥ    tena tu na punar jātamadanāṃkuragocaraṃ sādṛśyapratyabhijñānaṃ pramāṇaṃ naikatātmani    ekatvagocaraṃ na syād ekatve mānam aṃjasā sādṛśye yathā tasmiṃs tādṛśe yam iti grahaḥ    tad ity atītavijñānaṃ dṛśyamānena naikatāṃ vetti nedam iti jñānam atīteneti kecana    tatsiddhasādhanaṃ jñānadvitayaṃ hy etad iṣyate mānadṛṣṭe rthaparyāye dṛśyamāne ca bhedataḥ    dravyeṇa tadbalodbhūtajñānam ekatvasādhanam dṛṣṭekṣyamāṇaparyāyavyāpiny anyat tato matam    kṣayopaśamatas tac ca niyataṃ syāt kutaścana anādiparyayavyāpi dravyasaṃvittito sti naḥ    tayā yāvat svatīteṣu paryāyeṣv asti saṃsmṛtiḥ kena tadvyāpini dravye pratyabhijñāsya vāryate    bālako haṃ ya evāsaṃ sa eva ca kumārakaḥ yuvāno madhyamo vṛddho 'dhunāsmīti pratītitaḥ    smṛtiḥ kin nānubhūteṣu svayaṃ bhedeṣv aśeṣataḥ pratyabhijñānahetuḥ syād iti codyaṃ na yuktimat    tādṛkṣayogyatāhāneḥ tadbhāve tv asti sāṃgināṃ vyabhicārī hi tan nānyo hetuḥ sarvaḥ samīkṣyate    malāvṛtamaṇer vyaktir yathānekavidhekṣyate karmāvṛtātmanas tadvadyogyatā vividhā na kim    nanv astv ekatvasādṛśyapratītir nārthagocarā saṃvādābhāvato vyomakeśapāśapratītivat    tatra yo nāma saṃvādaḥ pramāṇāṃtarasaṃgamaḥ so dhyakṣe pi na saṃbhāvya iti te kva pramāṇatā    pratyakṣaviṣaye tāvan nānumānasya saṃgatiḥ tasya svalakṣaṇe vṛttyabhāvād ālaṃbanātmani    tatrādhyakṣāṃtarasyāpi na vṛttiḥ kṣaṇabhaṃgini tathaiva siddhasaṃvādasyānavasthā tathā na kim    prāpya svalakṣaṇe vṛttir yathādhyakṣānumānayoḥ pratyakṣasya tathā kiṃ na saṃjñayā saṃpratīyate    tayālaṃbitam anyac cet prāptam anyatsvalakṣaṇaṃ pratyakṣeṇānumānena kiṃ tad eva bhavanmate    gṛhītaprāptayor evādhyāropāc cet tad eva tat samānaṃ pratyabhijñāyāṃ sarve paśyaṃtu saddhiyaḥ    pratyabhijñānamānatve pramāṇaṃ nānyathety api tatra yuktānumānasyotthānābhāvaprasaṃgataḥ    tatra liṃge tad evedam iti jñānaṃ nibaṃdhanam laiṃgikasyānumānaṃ ced anavasthā prasajyate    liṃgapratyavamarśeṇa vinā nāsty eva laiṃgikam vibhinnaḥ so numānāc cet pramāṇāṃtaram āgatam    saṃvādo bādhavaidhuryaniścayaś cet sa vidyate sarvatra pratyabhijñāne pratyakṣādāv ivāṃjasā    pratyakṣaṃ bādhakaṃ tāvan na saṃjñānasya jātucit tadbhinnagocaratvena paralokamater iva    yatra pravartate jñānaṃ svayaṃ tatraiva sādhakam bādhakaṃ vā parasya syān nānyatrātiprasaṃgataḥ    adṛśyānupalabdhiś ca bādhikā tasya na pramā dṛśyā dṛṣṭis tu sarvatrāsiddhā tadgocare sadā    yat sat tat sarvaṃ kṣaṇikaṃ sarvathaiva vilakṣaṇaṃ tato 'nyatra pratīghātāt sattvasyārthakriyākṣateḥ    arthakriyākṣatis tatra kramavṛttivirodhataḥ tadvirodhas tato naṃśaḥ syān nāpekṣāvighātataḥ    itīyaṃ vyāpakā dṛṣṭir nityatvaṃ haṃti vastunaḥ sādṛśyaṃ ca tataḥ saṃjñā bādhikety api durghaṭam    kṣaṇapradhvaṃsinaḥ saṃtaḥ sarvathaiva vilakṣaṇāḥ iti vyāpter asiddhatvād viprakṛṣṭārthaśaṃkinām    nityānāṃ viprakṛṣṭānām abhāve bhāvaniścayāt kutaścid vyāptisaṃsiddhir āśrayeta yadā tadā    nedaṃ nairātmakaṃ jīvaccharīram iti sādhayet prāṇādimattvato syaivaṃ vyatirekaprasiddhitaḥ    kṣaṇike pi viruddhyete bhāvenaṃśe kramākramau svārthakriyā ca sattvaṃ ca tato nekāṃtavṛtti tat    nihaṃti sarvathaikāṃtaṃ sādhayet pariṇāminaṃ bhavet tatra na bhāve tatpratyabhijñā kathaṃcana    nityaikāṃte na sā tāvat paurvāparyaviyogataḥ nāśaikāṃte pi caikatvasādṛśyāghaṭanāt tathā    nityānityātmake tv arthe kathaṃcid upalakṣyate jātyaṃtare virudhyeta pratyabhijñā na sarvathā    nīlasaṃvedanasyārthe nīle siddhe pramāṇatā tatra tasyāṃ ca siddhāyāṃ nīlo rthas tena siddhyati    ity anyonyāśritaṃ nāsti yathābhyāsabalāt kvacit svataḥ prāmāṇyasaṃsiddher adhyasvārthasaṃvidaḥ    tadekatvasya saṃsiddhau pratyabhijñā tadāśrayā pramāṇaṃ tatpramāṇatve tayā vastvekatā gatiḥ    ityanyonyāśritir na syāt svataḥ prāmāṇyasiddhitaḥ svabhyāsāt pratyabhijñāyās tato nyatrānumānataḥ    pratyabhijñāṃtarād ādyapratyabhijñārthasādhane yān avasthā samā sāpi pratyakṣārthaprasādhane    pratyakṣāṃtarataḥ siddhā svataḥ sā cen nivartate pratyabhijñāṃtarād etat tathābhūtān nivartatām    sādṛśyapratyabhijñānam etenaiva vicāritam pramāṇaṃ svārthasaṃvādād apramāṇaṃ tato nyathā    bhedābhedavikalpābhyāṃ sādṛśyaṃ yena dūṣyate vaisādṛśyaṃ kutas tasya padārthānāṃ prasidhyatu    samānākāratā spaṣṭā pratyakṣaṃ pratibhāsate vartamāneṣu bhāveṣu yathā bhinnasvabhāvatā    tadavidyābalād iṣṭā kalpanaikatvabhāsinī sādṛśyabhāsinī ceti vāgavidyodayād dhruvam    saṃbaṃdhaṃ vyāptito rthānāṃ viniścitya pravartate yena tarkaḥ sa saṃvādāt pramāṇaṃ tatra gamyate    saṃbaṃdho vastu sannarthakriyākāritvayogataḥ sveṣṭārthatattvavat tatra ciṃtā syād arthabhāsinī    yeyaṃ saṃbaṃdhitārthānāṃ saṃbaṃdhavaśavartinī saiveṣṭārthakriyā tajjñaiḥ saṃbaṃdhasya svadhīr api    viśiṣṭārthān parityajya nānyā saṃbaṃdhitāsti cet tadabhāve kuto rthānāṃ pratitiṣṭhed viśiṣṭatā    svakāraṇavaśād eṣā teṣāṃ cet saiva saṃmatā saṃbaṃdhiteti bhidyeta nāma nārthaḥ kathaṃcana    tattarkasyāvisaṃvādo numā saṃvādanād api visaṃvāde hi tarkasya jātu tan nopapadyate    tarkasaṃvādasaṃdehe niḥśaṃkānumitiḥ kva te tadabhāve na cādhyakṣaṃ tato neṣṭavyavasthitiḥ    tasmāt pramāṇam icchadbhir anumeyaṃ svasaṃbalāt ciṃtā ceti vivādena paryāptaṃ bahunātra naḥ    gṛhītagrahaṇāt tarko 'pramāṇam iti cen na vai tasyāpūrvārthaveditvād upayogaviśeṣataḥ    pratyakṣānupalaṃbhābhyāṃ saṃbaṃdho deśato gataḥ sādhyasādhanayos tarkāt sāmastyeneti ciṃtitam    pramāṃtarāgṛhītārthaprakāśitvaṃ prapaṃcataḥ prāmāṇyaṃ ca gṛhītārthagrāhitve pi kathaṃcana    liṃgajñānād vinā nāsti liṃgijñānam itīṣyati yathā tasya tadāyattavṛttitā na tadarthitā    pratyakṣānupalaṃbhāder vinānudbhūtitas tathā tarkasya tajjñatā jātu na tadgocarataḥ smṛtā    samāropavyavacchedāt svārthe tarkasya mānatā laiṃgikajñānavan naiva virodham anudhāvati    pravṛttaś ca samāropaḥ sādhyasādhanayoḥ kvacit saṃbaṃdhe tarkato mātur vyavacchedyeta kasyacit    saṃvādako prasiddhārthasādhanas tadvyavasthitaḥ samāropachid ūho tra mānaṃ matinibaṃdhanaḥ    nanūhasyāpi saṃbaṃdhe svārthe nādhyakṣato gatiḥ sādhyasādhanasaṃbaṃdhe yathā nāpy anumānataḥ    tasyohāṃtarataḥ siddhau kvānavasthānivāraṇaṃ tatsaṃbaṃdhasya cāsiddhau nohaḥ syād iti kecana    tan na pratyakṣavat tasya yogyatābalataḥ sthiteḥ svārthaprakāśakatvasya kvānyathādhyakṣaniṣṭhitiḥ    grāhyagrāhakabhāvo vā saṃbaṃdho nyo pi kaścana svārthe na gṛhyate kena pratyakṣasyeti ciṃtyatām    sa tac cet tādṛśākārā pratītiḥ svātmaniṣṭhitā nāsau ghaṭo yam ity evam ākārāyāḥ pratītitaḥ    pratyakṣāṃtarataś cen nāpy anavasthānuṣaṃgataḥ tatsaṃbaṃdhasya cānyena pratyakṣeṇa viniścayāt    nānumānena tasyāpi pratyakṣāyattatā sthiteḥ anavasthāprasaṃgasya tadavasthatvatastarām    svasaṃvedanataḥ siddhe svārthasaṃvedanasya cet saṃbaṃdho kṣadhiyaḥ svārthe siddhe kaścid atīṃdriyaḥ    kṣayopaśamasaṃjñeyaṃ yogyatātra samānatā saiva tarkasya saṃbaṃdhajñānasaṃvittitaḥ svataḥ    pramāṇaviṣayasyāyaṃ sādhako na punaḥ svayaṃ pramāṇaṃ tarka ity etat kasyacid vyāhataṃ matam    pramāṇaviṣaye śuddhiḥ kathaṃ nāmāpramāṇataḥ prameyāṃtarato mithyājñānāc caitatprasaṃgataḥ    yathā saṃśayitārtheṣu pramāṇānāṃ pravartanaṃ nirṇayāya tathā loke tarkiteṣv iti cen matam    saṃśayaḥ sādhakaḥ prāptaḥ pramāṇārthasya te tathā nāpramāṇatvatas tarkaḥ pramāṇam anumanyatām    sa cet saṃśayajātīyaḥ saṃśayāt pṛthagāsthitaḥ kathaṃ padārthasaṃkhyānaṃ nānyathāstv iti tv aśnute    tasmāt pramāṇakartavyakāriṇo veditātmanaḥ sattarkasyāpramāṇatvam avitarkya pracakṣyate    samyak tarkaḥ pramāṇaṃ syāt tathānugrāhakatvataḥ pramāṇasya yathādhyakṣam anumānādi cāśnute    anugrāhakatā vyāptā pramāṇatvena lakṣyate pratyakṣādau tathābhāse nāgamānugrahakṣateḥ    yasminn arthaṃ pravṛttaṃ hi pramāṇaṃ kiṃcid āditaḥ tatra pravṛttiranyasya yānugrāhakatātra sā    pūrvanirṇītadārḍhyasya vidhānād abhidhīyate uttareṇa tu tadyuktam apramāṇena jātucit    tatas tarkaḥ pramāṇaṃ naḥ syāt sādhakatamatvataḥ svārthaniścayane sākṣād asākṣāc cānyamānavat    sādhanāt sādhyavijñānam anumānaṃ vidur budhāḥ pradhānaguṇabhāvena vidhānapratiṣedhayoḥ    anyathānupapattyekalakṣaṇaṃ tatra sādhanaṃ sādhyaṃ śakyam abhipretam aprasiddham udāhṛtam    tatsādhyābhimukho bodho niyataḥ sādhane tu yaḥ kṛto niṃdriyayuktenābhinibodhaḥ sa lakṣitaḥ    niścitaṃ pakṣadharmatvaṃ vipakṣe sattvam eva ca sapakṣa eva janmatvaṃ tattrayaṃ hetulakṣaṇam    kecid āhur na tadyuktaṃ hetvābhāse pi saṃbhavāt asādhāraṇatāpāyāl lakṣaṇatvavirodhataḥ    vaktṛtvādāv asārvajñasādhane trayam īkṣyate na hetutvaṃ vinā sādhyābhāvāsaṃbhūṣṇutāṃ yataḥ    sarvajñatvena vaktṛtvaṃ viruddhaṃ na viniścitaṃ tato na tasya hetutvam ity ācakṣaṇakaḥ svayam    tadekalakṣaṇaṃ hetor lakṣayaty eva tattvataḥ sādhyābhāvavirodho hi hetor nānyas tato mataḥ    tadiṣṭau tu trayeṇāpi pakṣadharmādinātra kiṃ tadabhāve pi hetutvasiddheḥ kvacid asaṃśayam    pakṣadharmatvaśūnyo yaṃ hetuḥ syād ekalakṣaṇaḥ udeṣyacchakaṭaṃ vyoma kṛttikodayavattvataḥ    iti prayogataḥ pakṣadharmatām eṣyate yadi tadā dhūmo gnimān eṣa dhūmatvād iti gadyatām    tataḥ svabhāvahetuḥ syāt sarvo liṃgas trivān na te yadi lokānurodhena bhinnāḥ saṃbaṃdhabhedataḥ    viṣayasya ca bhedena kāryādyanupalabdhayaḥ kiṃ na tādātmyatajjanmasaṃbaṃdhābhyāṃ vilakṣaṇāt    anyathānupapannatvād dhetuḥ syāt kṛttikodayaḥ  nānyathānupapannatvaṃ tābhyāṃ vyāptaṃ nikṣepaṇāt saṃyogyādiṣu liṃgeṣu tasya tattvaparīkṣakaiḥ    arvāgbhāgo 'vinābhāvī parabhāgena kasyacit so pi tena tathā siddhaḥ saṃyogī hetur īdṛśaḥ    sāsnādimān ayaṃ gotvād gaur vā sāsnādimattvataḥ ity anyonyāśrayībhāvaḥ samavāyiṣu dṛśyate    caṃdrodayo 'vinābhāvī payonidhivivardhanaiḥ tāni tena vināpy etatsaṃbaṃdhadvitayād iha    saṃyoginā vinā vahniḥ svena dhūmena dṛśyate gavā vinā viṣāṇādiḥ samavāyīti cen matiḥ    kāraṇena vinā svena tasmād avyāpakena ca vṛkṣatvena kṣate kiṃ na cūtatvādir anekaśaḥ    tato yathāvinābhūte saṃyogādir na lakṣyate vyāpako vyabhicāratvāt tādātmyāt tat tathā na kim    deśakālādyapekṣaś ced bhasmāder vahnisādhanaḥ cūtatvādir viśiṣṭātmā vṛkṣatvajñāpako mataḥ    saṃyogādiviśiṣṭas tanniścitaḥ sādhyasādhanaḥ viśiṣṭatā tu sarvasya sānyathānupapannatā    yogyatākhyaś ca saṃbaṃdhaḥ sarvasaṃbaṃdhabhedagaḥ syād ekas tadvaśāl liṃgam ekam evoktalakṣaṇam    viśeṣato pi saṃbaṃdhadvayasyaivāvyavasthiteḥ saṃbaṃdhaṣaṭkavan nāto liṃgeyattā vyavasthiteḥ    tadviśeṣavivakṣāyām api saṃkhyāvatiṣṭhate na liṃgasya parair iṣṭā viśeṣāṇāṃ bahutvataḥ    yathaivāstitvanāstitve bhidyete guṇamukhyataḥ tathobhayaṃ krameṇeṣṭam akrameṇa tv abādhyatā    avaktavyottarā śeṣās trayo bhaṃgāś ca tattvataḥ sapta caivaṃ sthite ca syus tadvaśāḥ saptahetavaḥ    virodhān nobhayātmādir arthaś cen na tathekṣaṇāt anyathaivāvyavasthānāt pratyakṣādivirodhataḥ    nirākṛtaniṣedho hi vidhiḥ sarvātmadoṣabhāk nirvidhiś ca niṣedhaḥ syāt sarvathā svavyathākaraḥ    nānādivāsanodbhūtavikalpapariniṣṭhitaḥ bhāvābhāvobhayādyarthaṃ spaṣṭaṃ jñāne vabhāsanāt    bhāvābhāvātmako nārthaḥ pratyakṣeṇa yadīkṣitaḥ kathaṃ tato vikalpaḥ syād bhāvābhāvāvabodhanaḥ    nīladarśanataḥ pītavikalpo hi na te mataḥ bhrāṃter anyatra tattvasya vyavasthitimad īpsitaḥ    tadvāsanāprabodhāc ced bhāvābhāvavikalpanā nīlādivāsanodbodhāt tadvikalpavad iṣyate    bhāvābhāvekṣaṇaṃ siddhaṃ vāsanodbodhakāraṇaṃ nīlādivāsanodbodhahetutaddṛṣṭivat tataḥ    yatraiva janayed enāṃ tatraivāsya pramāṇatā kvānyathā syād anāśvāsādvikalpasya samudbhave    tasmāt pratītim āśritya hetuṃ gamakam icchatā pakṣadharmatvaśūnyo stu gamakaḥ kṛttikodayaḥ    palvalodakanairmalyaṃ tadāgastyudaye sa ca tatra hetuḥ sunirṇītaḥ pūrvaṃ śaradi sanmataḥ    caṃdrādau jalacaṃdrādi so pi tatra tathāvidhaḥ chāyādipādapādau ca so pi tatra kadācana    parṇako yaṃ svasaddhetur balādāheti dūrage kāryakāraṇabhāvasyābhāve pi sahabhāvitā    pitror brāhmaṇatā putrabrāhmaṇye pakṣadharmakaḥ siddho hetur ato nāyaṃ pakṣadharmatvalakṣaṇaḥ    sādhyaḥ pakṣas tu naḥ siddhas taddharmo hetur ity api tādṛkṣapakṣadharmatvasādhanābhāva eva vai    niḥśeṣaṃ sātmakaṃ jīvaccharīraṃ pariṇāminā puṃsā prāṇādimattvasya tv anyathānupapattitaḥ    sapakṣasattvaśūnyasya hetor asya samarthanāt nūnaṃ niścīyate sadbhir nānvayo hetulakṣaṇam    na cādarśanamātreṇa vyatirekaḥ prasādhyate yena saṃśayahetutvaṃ rāgādau vaktṛtādivat    ātmābhāvo hi bhasmādau tatkāryasyāsamīkṣaṇāt siddhaḥ prāṇādyabhāvaś ca vyatirekaviniścayaḥ    vākkriyākārabhedāder atyaṃtābhāvaniścitaḥ nivṛttir niścitā tajjñaiḥ ciṃtā vyāvṛttisādhanī    sarvakāryāsamarthasya cetanasya nivartanaṃ tataś cet kena sādhyeta kūṭasthasya niṣedhanam    kṣaṇikatvena na vyāptaṃ sattvam evaṃ prasiddhyati saṃdigdhavyatirekāc ca tato siddhiḥ kṣaṇakṣaye    cetanācetanārthānāṃ vibhāgaś ca na siddhyati cittasaṃtānanānātvaṃ nijasaṃtāna eva vā    na vedyavedakākāraviveko taḥ svasaṃvidaḥ sarvakāryeṣv aśaktasya sa tv asaṃbhavabhāṣaṇe    pariṇāminam ātmānam aṃtareṇa kramākramau na syātāṃ tadabhāve ca na prāṇādikriyā kvacit    tatraikāṃtātmanā jīvaccharīraṃ sātmakaṃ bhavet niṣkalasya sahānekadeśadehāstihānitaḥ    anekāṃtātmakaṃ sarvaṃ sattvād ityādi sādhanaṃ samyaganvayaśūnyatve py avinābhāvaśaktitaḥ    nityānityātmakaḥ śabdaḥ śrāvaṇatvāt kathaṃcana śabdatvād vānyathābhāvābhāvād ityādihetavaḥ    hetor anvayavaidhurye vyatireko na cen na vai tena tasya vinaiveṣṭeḥ sarvānityatvasādhane    sādhye saty eva sadbhāvaniścayaḥ sādhanasya yaḥ so nvayaś cet tathaivopapattiḥ sveṣṭā paro 'phalaḥ    tadviruddhe vipakṣe ca tadanyatraiva hetavaḥ asaty aniścitāsattvāḥ sākalyān neṣṭasādhanāḥ    sādhyābhāve vipakṣe tu yo sattvasyaiva niścayaḥ so vinābhāva evāstu heto rūpāt tathāha ca    anyathānupapannatvaṃ yatra tatra trayeṇa kim nānyathānupapannatvaṃ yatra tatra trayeṇa kim    taddhetos triṣu rūpeṣu nirṇayo yena varṇitaḥ asiddhaviparītārthavyabhicārivipakṣataḥ    tena kṛtaṃ tu nirṇītaṃ hetor lakṣaṇam aṃjasā hetvābhāsāvyavacchedi tad vadet katham anyathā    rūpatrayasya sadbhāvāt tatra tadvacanaṃ yadi niścitatvasvarūpasya caturthasya vaco na kim    triṣu rūpeṣu ced rūpaṃ niścitatvaṃ na sādhane nājñātā siddhatā heto rūpaṃ syāt tadviparyayaḥ    pakṣadharmatvarūpaṃ syāj jñātatve hetvabhedinaḥ hetor ajñānateṣṭā cen niścitatvaṃ tathā na kim    hetvābhāse pi tadbhāvāt sādhāraṇatayā na cet dharmāṃtaram ivārūpaṃ hetoḥ sad api saṃmatam    haṃtāsādhāraṇaṃ siddhaṃ sādhanasyaikalakṣaṇaṃ tattvataḥ pāvakasyaiva soṣṇatvaṃ tadvidāṃ matam    etena paṃcarūpatvaṃ hetor dhvastaṃ nibudhyate sattvādiṣv agnijanyatve sādhye dhūmasya kenacit    anvayo lohalekhyatve pārthivatveśanes tathā tatputratvādiṣu śyāmarupatve kvacid īpsate    adṛṣṭimātrasādhyaś ca vyatirekaḥ samīkṣyate vaktṛtvādiṣu buddhādeḥ kiṃcijjñatvasya sādhane    sādhyābhāve tv abhāvasya niścayo yaḥ pramāṇataḥ vyatirekaḥ sa sākalyād avinābhāva eva naḥ    abādhitārthatā ca syān nānyā tasmād asaṃśayā na vā satpratipakṣatvaṃ tadabhāve nabhīkṣaṇāt    yāvac ca sādhanād arthaḥ svayaṃ na pratiniścitaḥ tāvan na bādhanābhāvas tat syāc chakyaviniścayaḥ    tadbādhābhāvanirṇītiḥ siddhā cet sādhanena kim yathaiva hetor veśasya bādhāsadbhāvaniścaye    trirūpahetuniṣṭhānavādinaiva nirākṛte hetoḥ paṃcasvabhāvatve taddhvaṃse yatanena kim    pūrvaṃ prasajyamānatvāt pūrvapakṣas tato paraḥ śeṣaḥ supakṣa eveṣṭas tadyogo yasya dṛśyate    pūrvavaccheṣavat proktaṃ kevalāsv api sādhanam sādhyābhāve bhavat tac ca trirūpān na viśiṣyate    yasya vaidharmyadṛṣṭāṃtādhāraḥ kaścana vidyate tasyaiva vyatireko sti nānyasyeti na yuktimat    tato vaidharmyadṛṣṭāṃteneṣṭo vaśyam ihāśrayaḥ tadabhāve py abhāvasyāvirodhād dhetutadvatoḥ    kevalavyatirekīṣṭam anumānaṃ na pūrvavat tathā sāmānyato dṛṣṭaṃ gamakatvaṃ na tasya vaḥ    tadviruddhe vipakṣasyāsattve vyavasite pi hi tadabhāve tv anirṇīte kuto niḥsaṃśayātmatā    yo viruddho tra sādhyena tasyābhāvaḥ sa eva cet tato nivartamānaś ca hetuḥ syādvādināṃ matam    anvayavyatirekī ca hetur yas tena varṇitaḥ pūrvānumānasūtreṇa so py etena nirākṛtaḥ    kāryāditrayavat tasmād etenāpi trayeṇa kim bhedānāṃ lakṣaṇānāṃ ca vītāditritayena ca    kāraṇāt kāryavijñānaṃ kāryāt kāraṇavedanam akāryakāraṇāc cāpi dṛṣṭāt sāmānyato gatiḥ    tādṛśī tritayeṇāpi niyatena prayojanam kim ekalakṣaṇādhyāsād anyasyāpy anivāraṇāt    yac cābhūtam abhūtasya bhūtaṃ bhūtasya sādhanam tathābhūtam abhūt tasyābhūtaṃ bhūtasya ceṣṭyate    nānyathānupapannatvābhāve tad api saṃgatam tadbhāve tu kim etena niyamenāphalena vaḥ    sarvahetuviśeṣāṇāṃ saṃgraho bhāsate yathā tathā tadbhedaniyame dvibhedo hetur iṣyatām    saṃkṣepād upalaṃbhaś cānupalaṃbhaś ca vastunaḥ pareṣāṃ tatprabhedatvāt tatrāṃtarbhāvasiddhitaḥ    nanūpalabhyamānatvam upalaṃbho yadīṣyate tadā svabhāvahetuḥ sadvyavahāraprasādhane    athopalabhyate yena sa tathā kāryasādhanaḥ samāno nupalaṃbhe pi vicāro yaṃ kathaṃ na te    yathā cānupalaṃbhena niṣedho rthasya sādhyate tathā kāryasvabhāvābhyām iti yuktā na tadbhidā    niṣedhahetur evaika ity ayuktaṃ vidher api siddher anupalaṃbhenānyavyavacchidvidhir yataḥ    yasmād anupalaṃbhotrānupalabhyatvam iṣyate tathopalabhyamānatvam upalaṃbhaḥ svarūpataḥ    bhinnāv etau na tu svārthābhedād iti niyamyate bhāvābhāvātmakaikārthagocaratvāviśeṣataḥ    tat tatraivopalaṃbhaḥ syāt siddhaḥ kāryādibhedataḥ kāryopalabdhir agnyādau dhūmādiḥ suvidhānataḥ    kāraṇasyopalabdhiḥ syād viśiṣṭajaladonnateḥ vṛṣṭau viśiṣṭatā tasyāś ciṃtyā chāyāviśeṣataḥ    kāraṇānupalaṃbhe pi yathā kārye viśiṣṭatā bodhyābhyāsāt tathā kāryānupalaṃbhe pi kāraṇe    samarthaṃ kāraṇaṃ tena nāṃtyakṣaṇagataṃ matam tadbodhe yena vaiyarthyam anumānasya gadyate    na cānukūlatāmātraṃ kāraṇasya viśiṣṭatā yenāsya pratibaṃdhādisaṃbhavād vyabhicāritā    vaikalyapratibaṃdhābhyām anāsādya svabhāvatām viśiṣṭatātra vijñātuṃ śakyā chāyādibhedataḥ    tadvilope khilakhyātavyavahāravilopanam tṛptyādikāryasiddhyartham āhārādipravṛttitaḥ    hetunā yaḥ samagreṇa kāryotpādo numīyate arthāṃtarānapekṣatvāt sa svabhāva itīraṇe    kāryotpādanayogyatve kārye vā śaktakāraṇam svabhāvahetur ity āryairvicārya prathame mataḥ    svakārye bhinnarūpaikasvabhāvaṃ kāraṇaṃ vadet kāryasyāpi svabhāvatvaprasaṃgād aviśeṣataḥ    samagrakāraṇaṃ kāryasvabhāvo na tu tasya tat ko nyo brūyād iti dhvastaprajñānair ātmavādinaḥ    yat svakāryāvinābhāvi kāraṇaṃ kāryam eva tat kāryaṃ tu kāraṇaṃ bhāvīty etadunmattabhāṣitam    parasparāvinābhāvāt kayāścit hetutattvavyavasthaivam anyonyāśrayaṇāj janaiḥ    rātryādidāyakādṛṣṭaviśeṣasyānumāpakam pāṇicakrādi tatkāryaṃ kathaṃ vo bhāvikāraṇam    tatparīkṣakalokānāṃ prasiddham anumanyatām kāraṇaṃ kāryavaddhetur avinābhāvasaṃgatam    kāryakāraṇanirmuktavastudṛṣṭir vivakṣyate tatsvabhāvopalabdhiś ca niścitāḥ    kathaṃcit sādhyatādātmyapariṇāmamitasya yā svabhāvasyopalabdhiḥ syāt sāvinābhāvalakṣaṇā    utpādāditrayākrāṃtaṃ samastaṃ sattvato yathā guṇaparyayavaddravyaṃ dravyatvād iti cocyate    yathārthasya svabhāvopalaṃbhaḥ savyavasāyakaḥ stasyānumānena kiṃ tvayānyat prasādhyate    samāropavyavacchedas tenety api na yuktimat niścite rthe samāropāsaṃbhavād iti kecana    tadasadvastuno nekasvabhāvasya viniścite sattvādāv api sādhyātmaniścayān niyamān nṛṇām    niścitāniścitātmatvaṃ na caikasya virudhyate citratājñānavan nānāsvabhāvaikārthasādhanāt    tata eva na pakṣasya pramāṇena virodhanaṃ nāpi vṛttir vipakṣas te hetor ekāṃtataś cyuteḥ    utpādavyayanirmuktaṃ na vastu kharaśṛṃgavat nāpi dhrauvyaparityaktaṃ tryātmakaṃ svārthatattvataḥ    sahabhāvi guṇātmatvābhāve dravyasya tattvataḥ kramotpitsu svaparyāyābhāvatve ca na kasyacit    nākrameṇa krameṇāpi kāryakāritvasaṃgatiḥ tadabhāve kutas tasya dravyatvaṃ vyomapuṣpavat    evaṃ hetur ayaṃ śaktaḥ sādhyaṃ sādhayituṃ dhruvaṃ sattvavan niyamād eva lakṣaṇasya viniścayāt    sādhyād anyopalabdhis tu dvividhāpy avasīyate viruddhasyāviruddhasya dṛṣṭes tena vikalpanāt    pratiṣedhe viruddhopalabdhir arthasya tad yathā nāsty eva sarvathaikāṃto nekāṃtasyopalaṃbhataḥ    yāvat kaścin niṣedho tra sa sarvo nupalaṃbhavān yat tad eṣa viruddhopalaṃbhos tv anupalaṃbhanam    ity ayuktaṃ tathābhūtaśruter anupalaṃbhanaṃ tanmūlatvāt tathābhāve pratyakṣam anumāstu te    tathaivānupalaṃbhena virodhe sādhite kvacit syāt svabhāvaviruddhopalabdhivṛttis tathaiva vā    liṃge pratyakṣataḥ siddhe sādhyadharmiṇi vā kvacit liṃgijñānaṃ pravarteta nānyathātiprasaṃgataḥ    gauṇaś ced vyapadeśo yaṃ kāraṇasya phales tu naḥ pradhānabhāvatas tasya tatrābhiprāyavartanāt    vyāpakārthaviruddhopalabdhir atra niveditā yathā na sannikarṣādiḥ pramāṇaṃ parasaṃmatam    ajñānatvād ativyāpter jñānatvena miter iha vyāpakavyāpakadviṣṭopalabdhir veyam iṣyate    syāt sādhakatamatvena svārthajñaptau pramāṇatā vyāptā yā ca tadavyāptaṃ jñānātmatvena sādhyate    vyāpakadviṣṭhakāyopalabdhiḥ kāryopalabdhigā śrutiprādhānyataḥ siddhā pāraṃparyād viruddhavat    yathā nātmā vibhuḥ kāye tatsukhādyupalabdhitaḥ vibhutvaṃ sarvabhūtārthasaṃbaṃdhitvena vastutaḥ    vyāptaṃ tena virodhīdaṃ kāyasaṃbaṃdhamātrakaṃ kāya eva sukhādīnāṃ tatkāryāṇāṃ vibodhanam    nanu pradeśavṛttīnāṃ teṣāṃ saṃvādanaṃ kathaṃ śarīramātrasaṃbaṃdham ātmano bhāvayet sadā    yato niḥśeṣamūrtārthasaṃbaṃdhavinivartanāt vibhutvābhāvasiddhiḥ syād iti kecit pracakṣyate    tad ayuktaṃ manīṣāyāḥ sākalyenātmanaḥ sthiteḥ tacchūnyasyātmatāhānes tādātmyasya prasādhanāt    viruddhakāryasaṃsiddhir nāstyekāṃte 'napekṣiṇya ne kāṃte rthakriyādṛṣṭer ity evam avagamyate    kāraṇārthaviruddhānupalabdhir jñāyate yathā nāsti mithyācaritraṃ me samyagvijñān avedanāt    tad dhi mithyācaritrasya kāraṇaṃ vinivartayet mithyājñānanivṛttis tu tasya tadvinivartikā    kāraṇadviṣṭhakāryopalabdhir yāthātmyavākkṛtaḥ tasya tenāvinābhāvāt pāraṃparyeṇa tattvataḥ    kāraṇavyāpakadviṣṭopalabdhir nāsti nirvṛtiḥ sāṃkhyāder jñānamātropagamād iti yathekṣyate    nirvṛteḥ kāraṇaṃ vyāptaṃ dṛṣṭyāditritayātmanā tadviruddhaṃ tu vijñānamātraṃ sāṃkhyādisammatam    kāraṇavyāpakadviṣṭhakāryadṛṣṭis tu tadvacaḥ samyagvivecitaṃ sādhyāvinābhāvi pratīyate    draṣṭā sahacaradviṣṭhopalabdhis tad yathā mayi nāsti matyādyavijñānaṃ tattvaśraddhānasiddhitaḥ    sahacāriniṣedhena mithyāśraddhānam īkṣitam tan nihaṃty eva tadghātitattvaśraddhānam aṃjasā    tadabhāve ca matyādyavijñānaṃ vinivartate matijñānādibhāvena tadāsya pariṇāmataḥ    tathā sahacaradviṣṭhakāryasiddhir niveditā praśamādivinirṇītes tan nāsmāsv iti sādhane    tasmin sahacaravyāpi viruddhasyopalaṃbhanam saddarśanatvanirṇīter iti tajjñair udāhṛtam    tad etatsahacaravyāpi dviṣṭhakāryopalaṃbhanam pramāṇādipratiṣṭhānasiddher iti nibudhyatām    sahacārinimittena viruddhasyopalaṃbhanaṃ tan nāsty asmāsu dṛgmohaḥ pratipakṣopalaṃbhataḥ    ity evaṃ tadviruddhopalabdhibhedāḥ pratītigāḥ yathāyogam udāhāryāḥ svayaṃ tattvaparīkṣakaiḥ    sādhyārthena viruddhasya kāryakāraṇabhedinaḥ upalabdhis tridhāmnātā prāksahottaracāriṇaḥ    tatra pūrvacarasyopalabdhiḥ siddhāṃtavedinām yathodeṣyati nakṣatraṃ śakaṭaṃ kṛttikodayāt    pūrvacāritaniḥśeṣaṃ kāraṇaṃ niyamād api kāryātmalābhahetūnāṃ kāraṇatvaprasiddhitaḥ    na rohiṇyudayas tu syād amuṣmin kṛttikodayāt tadanaṃtarasaṃdhitvābhāvāt kālāṃtarekṣaṇāt    viśiṣṭakālam āsādya kṛttikāḥ kurvate yadi śakaṭaṃ bharaṇiḥ kiṃ na tat karoti tathaiva ca    vyavadhānād ahetutve tasyās tatra kva vāsanā smṛtihetur vibhāvyeta tatta evety avartinam    kāraṇaṃ bharaṇis tatra kṛttikāsahakāriṇī yadi kālāṃtarāpekṣā tathā syād aśvinī na kim    pitāmahaḥ pitā kiṃ na tathaiva prapitāmahaḥ sarvo vānādisaṃtānaḥ sūnoḥ pūrvatvayogataḥ    svarūpalābhahetoś cet pitṛtvaṃ netarasya tu prāk śakaṭasya mā bhūvan kṛttikāhetavas tathā    pūrvapūrvacarādīnām upalabdhiḥ pradarśitā pūrvācāryopalaṃbhena tato nārthāṃtaraṃ matam    sahacāryupalabdhiḥ syāt kāyaścaitanyavān ayam viśiṣṭasparśasaṃsiddher iti kaiścid udāhṛtam    kārya hetur ayaṃ sveṣṭaḥ samānasamayatvataḥ svātaṃtryeṇa vyavasthānād vāmadakṣiṇaśṛṃgavat    ekasāmagryadhīnatvāt tayoḥ syāt sahabhāvitā kvānyathā niyamas tasyās tato nyeṣām itīti cet    naikadravyātmatattvena vinā tasyā virodhataḥ sāmagryekā hi taddravyaṃ rasarūpādiṣu sphuṭam    na ca tasyānumāsādyamānād rasaviśeṣataḥ samānasamayasyaiva rūpāder anumānataḥ    kāryeṇa kāraṇasyānumānaṃ yenedam ucyate kāraṇenāpi rūpādes tato dravyeṇa nānumā    samānakāraṇatvaṃ tu sāmagryekā yadīṣyate payorasāt sarojanmarūpasyānumitir na kim    yathaiva hi payoparūpād rasasahāyakāt tathā sarodbhave pīti syāt samānanimittatā    pratyāsatter abhāvāc cet sādhyasādhanatānayoḥ naṣṭaikadravyatādātmyāt pratyāsattiḥ parā ca sā    nanv arthāṃtarabhūtānām ahetuphalanāśritām sahacāritvam arthānāṃ kuto niyatam īkṣyase    kāryakāraṇabhāvās te kasmād iti samaṃ na kim tathā saṃpratyayāt tulyaṃ samādhānam apīdṛśaṃ    svakāraṇāt tathāgniś cej jāto dhūmasya kārakaḥ caitanyasahakāryas tu sparśo ṃge tadadṛṣṭataḥ    dṛṣṭād dhetor vinā ye rthā niyamāt sahacāriṇaḥ adṛṣṭakaraṇaṃ teṣāṃ kiṃcid ity anumīyate    dravyato 'nādirūpāṇāṃ svabhāvo stu na tādṛśaḥ sādhyasādhanataivaiṣāṃ tatkṛtānyonyam ity asat    ye cārvākparabhāgādyā niyamena parasparāḥ sahabhāvam itās teṣāṃ hetur etena varṇitaḥ    tato tītaikakālānāṃ gatiḥ kiṃkāryaliṃgajā niyamād anyathā dṛṣṭiḥ sahacāryād asiddhitaḥ    tathottaracarasyopalabdhis tajjñair udāhṛtā udagādbharaṇirāgneyadarśanān nabhasīti sā    sarvam uttaracārīha kāryam ity anirākṛteḥ nānā prāṇigaṇādṛṣṭāt sātetaraphalād vinā    pūrvottaracarāṇi syur bhāni kramabhuvaḥ sadā nānyonyaṃ hetutā teṣāṃ kāryābādhā tato matā    sādhyasādhanatā na syād avinābhāvayogataḥ  pakṣadharmas tadaṃśena vyāpto hetus tridhaiva saḥ avinābhāvaniyamād iti vācyaṃ na dhīmatā    pakṣadharmātyaye yuktāḥ sahacāryādayo yataḥ satyaṃ ca hetavo nāto hetvābhāsās tathāpare    tridhaiva vāvinābhāvāniyamād dhetur āsthitaḥ kāryādir nānya ity eṣā vyākhyaitena nirākṛtā    niṣedhe nupalabdhiḥ syāt phalahetudvayātmanā hetusādhyāvinābhāvaniyamasya viniścayāt    tatra kāryāprasiddhiḥ syān nāsti cin mṛtavigrahe vākkriyākārabhedānām asiddher iti niścitā    kāraṇānupalabdhis tu nārthitācaraṇaṃ śubham samyagbodhopalaṃbhasyābhāvād iti vibhāvyate    ahetuphalarūpasya vastuno nupalaṃbhanam dvedhā niṣedhya tādātmyetarasyādṛṣṭikalpanāt    tatrābhinnātmanoḥ siddhir dvividhā saṃpratīyate svabhāvānupalabdhiś ca vyāpakādṛṣṭir eva ca    ādyā yathā na me duḥkhaṃ vipādānupalaṃbhataḥ vyāpakānupalabdhis tu vṛkṣādṛṣṭer na śiṃśapā    kāryakāraṇabhinnasyānupalabdhir na budhyatām sahacāriṇa evātra pratiṣedhena vastunā    mayi nāsti matijñānaṃ saddṛṣṭyanupalabdhitaḥ rūpādayo na jīvādau sparśāsiddher itīyatām    kāraṇavyāpakadṛṣṭipramukhāś cāsya dṛṣṭayaḥ tatrāṃtarbhāvam āyāṃti pāraṃparyād anekadhā    prāṇādayo na saṃty eva bhasmādiṣu kadācana jīvatvāsiddhito hetuvyāpakādṛṣṭir īdṛśī    kvacid ātmani saṃsāraprasūtir nāsti kārtsnyataḥ sarvakarmodayābhāvād iti vā samudāhṛtā    taddhetuhetvadṛṣṭiḥ syān mithyātvādyaprasiddhitaḥ tannivṛttau hi taddhetukarmābhāvāt kva saṃsṛtiḥ    tatkāryavyāpakāsiddhir yathā nāsti niranvayaṃ tattvaṃ kramākramābhāvād anvayaikāṃtatattvavat    tatkāryavyāpakasyāpi padārthānupalaṃbhanaṃ pariṇāmaviśeṣasyābhāvād iti vibhāvyatām    kāraṇavyāpakā dṛṣṭiḥ sāṃkhyāder nāsti nirvṛtiḥ saddṛṣṭyāditrayāsiddher iyaṃ punar udāhṛtā    kāraṇavyāpakā vyāptiḥ svabhāvānupalaṃbhanaṃ tatraiva pariṇāmasyāsiddher iti yathocyate    pariṇāmanivṛttau hi tad vyāptaṃ vinivartate saddṛṣṭyāditrayaṃ mārgaṃ vyāpakaṃ pūrvavatparam    sahacāriphalā dṛṣṭir matyajñānādi nāsti me nāstikyādhyavasānāder abhāvād iti darśitā    nāstikyapariṇāmo hi phalaṃ mithyādṛśaḥ sphuṭam sahacāritayā matyajñānādivadvipaścitām    sahacārinimittasyānupalabdhir udāhṛtā dṛṣṭimohodayāsiddher iti vyaktaṃ tathaiva hi    sahabhūvyāpakā dṛṣṭir nāsti vedakadarśanaiḥ sahabhāvi matijñānaṃ tattvaśraddhānahānitaḥ    sahabhūvyāpi hetvādyadṛṣṭayo py avirodhataḥ pratyetavyāḥ prapaṃcena lokaśāstranidarśanaiḥ    upalabdhyanupalabdhibhyām ity evaṃ sarvahetavaḥ saṃgṛhyaṃte na kāryāditritayena kathaṃcana    nāpi pūrvavadādīnāṃ tritayo na niṣedhane sādhye tasyāsamarthatvād dvidhā caiva prayuktitaḥ    pūrvavatkāraṇāt kārye numānam anumanyate śeṣavatkāraṇe kāryād vijñānaṃ niyatasthiteḥ    kāryakāraṇanirmuktād arthāt sādhye tathāvidhe bhavet sāmānyato dṛṣṭam iti vyākhyānasaṃbhave    vidhau tadupalaṃbhaḥ syur niṣedhe nupalabdhayaḥ tataś ca ṣaḍvidho hetuḥ saṃkṣepāt kena vāryate    kevalānvayasaṃyogī vītabhūtādibhedataḥ vinirṇītāvinābhāvahetunām atra saṃgrahāt    anyathānupapattyekalakṣaṇaṃ sādhanaṃ tataḥ sūktaṃ sādhyaṃ vinā sadbhiḥ śakyatvādiviśeṣaṇaṃ    śakyaṃ sādhayituṃ sādhyam ity anena nirākṛtaḥ pratyakṣādipramāṇena pakṣa ity etadāsthitam    tenānuṣṇo gnir ity eṣa pakṣaḥ pratyakṣabādhitaḥ dhūmo nagnija evāyam iti laiṃgikabādhitaḥ    pretyāsukhaprado dharma ity āgamanirākṛtaḥ nṛkapālaṃ śucīti syāl lokarūḍhiprabādhitaḥ    pakṣābhāsaḥ svavāgvādhyaḥ sadā maunavratīti yaḥ sa sarvo pi prayoktavyo naiva tattvaparīkṣakaiḥ    śabdakṣaṇakṣayaikāṃtaḥ sattvād ity atra kecana dṛṣṭāṃtābhāvato śakyaḥ pakṣa ity abhyamaṃsata    teṣāṃ sarvam anekāṃtam iti pakṣo virudhyate tata evobhayoḥ siddho dṛṣṭāṃto na hi kutracit    pramāṇabādhitatvena sādhyābhāsatvabhāṣaṇe sarvas tatheṣṭa eveha sarvathaikāṃtasaṃgaraḥ    tathā sādhyam abhipretam ity anena nivāryate anuktasya svayaṃ sādhyābhāvābhāvaḥ paroditaḥ    yathā hy ukto bhavet pakṣas tathānukto 'pi vāditaḥ prastāvādibalāt siddhaḥ sāmarthyād ukta eva cet    svāgamokto 'pi kiṃ na syād eva pakṣaḥ kathaṃcana tathānukto 'pi cokto vā sādhyaḥ sveṣṭo 'stu tāttvikaḥ    nāniṣṭo 'tiprasaṃgasya parihartum aśaktitaḥ nanu necchati vādīha sādhyaṃ sādhayituṃ svayam    prasiddhasyānyasaṃvittikāraṇāpekṣyavartanāt prativādy api tasyaitannirākṛtiparatvataḥ    satyā nobhayasiddhāntavedinaḥ pakṣapātinaḥ ity ayuktam avaktavyam abhipretaviśeṣaṇam    jijñāsitaviśeṣatvam ivānye saṃpracakṣate tadasadvādineṣṭasya sādhyatvāpratighātitaḥ    svārthānumāsu pakṣasya tanniścayavivekataḥ parārtheṣv anumāneṣu paro bodhayituṃ svayam    kiṃ neṣṭasyeha sādhyatvaṃ viśeṣānabhidhānataḥ iṣṭaḥ sādhayituṃ sādhyaḥ svaparapratipattaye    iti vyākhyānato yuktam abhipretaviśeṣaṇaṃ aprasiddhaṃ tathā sādhyam ity anenābhidhīyate    tasyārekā viparyāsā vyutpattiviṣayātmatā tasya tadvyavacchedatvātsiddhir arthasya tattvataḥ    tato na yujyate vaktuṃ vyasto hetor apāśrayaḥ saṃśayo hy anumānena yathā vicchidyate tathā    avyutpattiviparyāsāv anyathā nirṇayaḥ kathaṃ avyutpannaviparyastau nācāryam upasarpataḥ    kauced eva yathā tadvatsaṃśayātmāpi kaś ca naḥ nāvaśyaṃ nirṇayākāṃkṣā saṃdigdhasyāpy anarthinaḥ    saṃdehamātrakāsthānāt svārthasiddhau pravartanāt yathāpravartamānasya saṃdigdhasya pravartanam    vidhīyate numānena tathā kiṃ na niṣidhyate avyutpannaviparyas tamanaso py apravartanam    parānugrahavṛttīnām upekṣānupapattitaḥ avineyiṣu mādhyasthyaṃ na caivaṃ pratihanyate    rāgadveṣavihīnatvaṃ nirguṇeṣu hi teṣu naḥ svayaṃ mādhyasthyam ālaṃbya guṇadoṣopadeśanā    kāryā tebhyo pi dhīmadbhis tadvineyatvasiddhaye avyutpannaviparyastā pratipādyatvaniścaye    pratipādyaḥ kathaṃ nāma duṣṭojñaḥ svasuto janaiḥ laukikasyāprabodhyatve katham astu parīkṣakaḥ    prabodhyas tasya yatnena kramatas tattvasaṃbhavāt pratipādyas tatas tredhā pakṣas tatpratipattaye    saṃdigdhādiḥ prayoktavyo 'prasiddha iti kīrtanāt suprasiddhaś ca vikṣiptaḥ pakṣo 'kiṃcitkaratvataḥ    tatra pravartamānasya sādhanasya svarūpavat samārope tu pakṣatvaṃ sādhane pi na vāryate    svarupeṇaiva nirdiśyas tathā sati bhavaty asau jijñāsitaviśeṣas tu dharmī yaiḥ pakṣa iṣyate    teṣāṃ saṃti pramāṇāni sveṣṭasādhanataḥ kathaṃ dharmiṇy asiddharūpe pi hetur gamaka iṣyate    anyathānupapannatvaṃ siddhaṃ sadbhir asaṃśayaṃ dharmisaṃtānasādhyāś cet sarve bhāvāḥ kṣaṇakṣayāḥ    iti pakṣo na yujyeta hetos taddharmatāpi ca pratyakṣeṇāprasiddhatvād dharmiṇām iha kārtsnyataḥ    anumānena tatsiddhau dharmisattāprasādhanaṃ paraprasiddhitas teṣāṃ dharmitvaṃ hetudharmavat    dhruvaṃ teṣāṃ svataṃtrasya sādhanasya niṣedhakaṃ prasaṃgasādhanaṃ vecchet tatra dharmigrahaḥ kutaḥ    iti dharmisaṇyasiddhe pi sādhanaṃ matam eva ca vyāpyavyāpakabhāve hi siddhe sādhanasādhyayoḥ    prasaṃgasādhanaṃ proktaṃ tatpradarśanamātrakaṃ atha niḥśeṣaśūnyatvavādinaṃ prati tārkikaiḥ    virodhodbhāvanaṃ sveṣṭe vidhīyeteti saṃmataṃ tadapramāṇakaṃ tāvad akiṃcitkaram īkṣyate    sapramāṇakatā tasya kva pramāṇāprasādhane nanv iṣṭasādhanāt saṃti pramāṇānīti bhāṣaṇe    samaḥ paryanuyogoyaṃ pramāśūnyatvavādinaḥ tadiṣṭasādhanaṃ tāvadapramāṇamasādhanam    svasādhyena pramāṇaṃ tu na prasiddhaṃ dvayor api tadasaṃgatam iṣṭasya saṃvinmātrasya sādhanam    svayaṃ prakāśanaṃ dhvastavyabhicāraṃ hi susthitaṃ svasaṃvedanam adhyakṣaṃ vādino mānam aṃjasā    tato 'nyeṣāṃ pramāṇānām astitvasya vyavasthitiḥ nanv iṣṭasādhanaṃ dharmipramāṇair aparair yutam    tadiṣṭasādhanatvasyetarathānupapattitaḥ evaṃ prayogataḥ siddhiḥ pramāṇānām anākulam    tatsattā naiva sādhyā syāt sarvatreti pare viduḥ yato bhayaṃ tad evaiṣāṃ svayam agre vyavasthitam    hetor ananvayatvasya prasaṃjanam asaṃśayaṃ sattāyāṃ hi prasādhyāyāṃ viśeṣasyaiva sādhanāt    yathānanvayatādoṣas tathātrāpy anidarśanāt hetor ananvayasyāpi gamakatvopavarṇane    sattā sādhyās tu mānānām iti dharmī na saṃgaraḥ dharmidharmasamūho 'tra pakṣa ity apasāritam    eteneti sthitaḥ sādhyaḥ pakṣo vidhvastabādhakaḥ vyāptikāle mataḥ sādhyaḥ pakṣo yeṣāṃ nirākulaḥ    so nyathaiva kathaṃ teṣāṃ lakṣaṇavyavahārayoḥ vyāptiḥ sādhyena nirṇītā hetoḥ sārdhyaṃ prasādhyate    tad evaṃ vyavahāre pīty anavadyaṃ na cānyathā dharmiṇo py aprasiddhasya sādhyatvāpratighātitaḥ    asti dharmiṇi dharmasya ceti nobhayapakṣatā tady atra sādhanādbodho niyamād abhijāyate    sa tasya viṣayaḥ sādhyo nānyaḥ pakṣo stu jātucit  iṃdriyāṇīṃdriyārthābhimukho bodho na tu smṛtaḥ niyato kṣamanobhyāṃ yaḥ kevalo na tu liṃgajaḥ    satyaṃ svārthānumānaṃ tu vinā yac chabdayojanāt tanmānāṃtaratāṃ māgād iti vyākhyāyate tathā    siddhaḥ sādhyāvinābhāvo hy arthāpatteḥ prabhāvakaḥ saṃbhavādeś ca yo hetuḥ so pi liṃgān na bhidyate    dṛṣṭāṃtanirapekṣatvaṃ liṃgasyāpi neveditam tan na mānāṃtaraṃ liṃgād arthāpattyādivedanam    matijñānaviśeṣāṇām upalakṣaṇatā sthitaṃ tena sarvaṃ matijñānaṃ siddham ābhinibodhikam    tasya bāhyanimittopadarśanāyedam ucyate tad ityādivacaḥ sūtrakāreṇānyamatacchide    tacchabdena parāmarśo narthāṃtaram iti dhvaneḥ vācyasyaikasya matyādiprakārasyāviśeṣataḥ    nimittaṃ kārakaṃ yasya tattathoktaṃ vibhāgataḥ vākyasyāsya viśeṣād vā pāraṃparyasya cāśritau    vākyabhedāśraye yuktam avadhāraṇam uttaraṃ tadabhede punaḥ pūrvama nyathā vyabhicāritā    dhvastaṃ tatrārthajanyatvam uttarād avadhāraṇāt matyajñānaśrutādīni nirastāni tu pūrvataḥ    svajanyajñānasaṃvedyo rthaḥ prameyatvato nanu yathāniṃdriyam ity eke tadasadvyabhicārataḥ    niḥśeṣavartamānārtho na svajanyena sarvavit saṃvedanena saṃvedyaḥ samānakṣaṇavartinā    svārthajanyam idaṃ jñānaṃ satyajñānatvato nyathā viparyāsādivat tasya satyatvānupapattitaḥ    ity apy aśeṣavidbodhair anaikāṃtikam īritaṃ sādhanaṃ na tato jñānam arthajanyam iti sthitam    ālokenāpi janyatvenālaṃbanatayā bhidaḥ kiṃ tv iṃdriyabalādhānamātratvenānumanyate    tathārthajanyatāpīṣṭā kālākāśāditattvavat sālaṃbanatayā tv artho janakaḥ pratiṣidhyate    tato nākāraṇaṃ vitter viṣayo stīti durghaṭam yaṃ rūpasyāpravedyatvāpatteḥ kāraṇatāṃ vinā    asvasaṃvedyavijñānavādī pūrvaṃ nirākṛtaḥ parokṣajñānavādī cety alaṃ saṃkathayānayā    matijñānasya nirṇītaprakārasyaikaśo vidi bhidām avagrahety ādisūtramāhāviparyayam    akṣārthayogajād vastumātragrahaṇalakṣaṇāt jātaṃ yad vastubhedasya grahaṇaṃ tad avagrahaḥ    tadnṛhītārthasāmānye yadviśeṣasya kāṃkṣaṇam niścayābhimukhaṃ sehā saṃśīter bhinnalakṣaṇā    tasyaiva nirṇayo vāyaḥ smṛtihetuḥ sā dhāraṇā iti pūrvoditaṃ sarvaṃ matijñānaṃ caturvidham    sāmānādhikaraṇyaṃ tu tad evāvagrahādayaḥ tad iti prāksūtratacchabdasaṃbaṃdhād iha yujyate    tatra yad vastumātrasya grahaṇaṃ pāramārthikam dvidhā tredhā kvacij jñānaṃ tad ity ekaṃ na cāparam    tan na sādhvakṣajasyārthabhedajñānasya tattvataḥ  nanu sanmātrakaṃ vastu vyabhicāravimuktitaḥ na bhedo vyabhicāritvāt tatra jñānaṃ na tāttvikam    ity ayuktaṃ sadāśeṣaviśeṣavidhurātmanaḥ sattvasyānubhavābhāvād bhedamātrakavastuvat    dṛṣṭer abheda bhedātmavastuny avyabhicārataḥ pāramārthikatā yuktā nānyathā tadasaṃbhavāt    jātyādikalpanonmuktaṃ vastumātraṃ svalakṣaṇam tajjñānam akṣajaṃ nānyad ity apy etena dūṣitam    kiṃcid ity avabhāsy atra vastumātram apoddhṛtaṃ tadgrāhi darśanaṃ jñeyam avagrahanibaṃdhanam    anekāṃtātmake bhāve prasiddhe pi hi bhāvataḥ puṃsaḥ svayogyatāpekṣaṃ grahaṇaṃ kvacid aṃśataḥ    tenārthamātranirbhāsād darśanād bhinnam iṣyate jñānam arthaviśeṣātmābhāsi vittvena tatsamam    kṛto bhedo nayāt sattāmātrajñāt saṃgrahāt param naramātrāc ca netrādidarśanaṃ vakṣyate grataḥ    nanv avagrahavijñānaṃ darśanāj jāyate yadi tasyeṃdriyamanojatvaṃ tadā kiṃ na virudhyate    pāraṃparyeṇa tajjatvāt tasyehādividām iva ko virodhaḥ kramād vākṣamanojanyatvaniścayāt    iṃdriyāniṃdriyābhyāṃ hi yas tv ālocanam ātmanaḥ svayaṃ pratīyate yadvat tathaivāvagrahādayaḥ    varṇasaṃsthādisāmānyaṃ yatra jñāne vabhāsate tan no viśeṣaṇajñānam avagrahaparābhidham    viśeṣaniścayo vā ya ity etad upapadyate jñānenehābhilāṣātmā saṃskārātmā na dhāraṇā    iti kecit prabhāṣaṃte tac ca na vyavatiṣṭhate viśeṣavedanasyeha dṛḍhasyehātvasūcanāt    tato dṛḍhatarāvāyajñānād dṛḍhatam asya ca dhāraṇatvapratijñānāt smṛtihetor viśeṣataḥ    ajñānātmakatāyāṃ tu saṃskārasyeha tasya vā jñānopādānatā na syād rūpāder iva sāsti ca    sukhādinā na cātrāsti vyabhicāraḥ kathaṃcana tasya jñānātmakatvena svasaṃvedanasiddhitaḥ    sarveṣāṃ jīvabhāvānāṃ jīvātmatvārpaṇān nayāt saṃvedanātmatāsiddher nāmasiddhān na saṃbhavaḥ    tata eva pradhānasya dharmā nāvagrahādayaḥ ālocanādināmānaḥ svasaṃvittivirodhataḥ    nanu dūre yathaiteṣāṃ kramaśo rthe pravartanaṃ saṃvedyate tathāsanne kin na saṃviditātmanām    viśeṣaṇaviśeṣyādijñānānāṃ samam īdṛśaṃ vedyaṃ tatra samādhānaṃ yat tad atrāpi yujyate    tathaivālocanādīnāṃ dṛgādīnāṃ ca budhyate saṃbaṃdhasmaraṇādīnām anumānopakāriṇām    atyaṃtābhyāsato hy āśu vṛtter anupalakṣaṇam kramaśo vedanānāṃ syāt sarveṣām avigānataḥ    dravyaparyāyasāmānyaviṣayo vagraho kṣajaḥ tasyāparavikalpenāniṣedhyatvāt sphuṭatvataḥ    saṃvādakatvato mānaṃ svārthavyavasiteḥ phalaṃ sākṣādvyavahitaṃ tu syād īhā hānādidhīr api    nirvikalpakayā dṛṣṭyā gṛhīte rthe svalakṣaṇe tadānyāpohasāmānyagocaro vagrahaḥ sphuṭaḥ    sahabhāvo vikalpo pi nirvikalpakayā dṛśā parikalpanayā vāto niṣedhya iti kecana    tadasatsvārthasaṃvitter avikalpatvadūṣaṇāt sadā sa vyavasāyākṣajñānasyānubhavāt svayam    manasor yugapadvṛttiḥ savikalpāvikalpayoḥ mohād aikyaṃ vyavasyaṃtīty asatpṛthag apīkṣaṇāt    laiṃgikādivikalpasyāspaṣṭātmatvopalaṃbhanāt yuktā nākṣavikalpānām aspaṣṭātmakatoditā    anyathā taimirasyākṣajñānasya bhrāṃtatekṣaṇāt sarvākṣasaṃvido bhrāṃtyā kin nohyaṃte vikalpakaiḥ    sahabhāvo pi godṛṣṭituraṃgam avikalpayoḥ kin naikatvaṃ vyavasyaṃti sveṣṭadṛṣṭivikalpavat    pratyāsattiviśeṣasyābhāvāc cet so tra ko paraḥ tādātmyād ekasāmagryadhīnatvasyāviśeṣataḥ    tādṛśī vāsanā kācid ekatvavyavasāyakṛt sahabhāvāviśeṣe pi kayościd dṛgvikalpayoḥ    sābhīṣṭā yogyatāsmākaṃ kṣayopaśamalakṣaṇā spaṣṭatve kṣavikalpasya hetur nānyasya jātucit    tannirṇayātmakaḥ siddho vagraho vastugocaraḥ spaṣṭābho kṣabalodbhūto 'spaṣṭo vyaṃjanagocaraḥ    nehāniṃdriyajaivākṣavyāpārāpekṣaṇā sphuṭā svākṣavyāpṛtyabhāve syāḥ prabhavābhāvanirṇayāt    nāpīyaṃ mānasaṃ jñānam akṣavitsamanaṃtaraṃ niścayātmakam anyad vā spaṣṭābhaṃ tata eva naḥ    tasya pratyakṣarūpasya pramāṇena prasiddhitaḥ svasaṃvedanato nyasya kalpanaṃ kimu niṣphalam    mānasasmaraṇasyākṣajñānād utpattyasaṃbhavāt vijātīyāt prakalpyeta yadi tat tasya janma te    tadākṣavedanaṃ na syāt samanaṃtarakāraṇam manodhyakṣasya tasyaiva vailakṣaṇyāviśeṣataḥ    pratyakṣatvena vaiśadyavastugocaratātmanā sajātīyaṃ manodhyakṣam akṣajñānena cen matam    smaraṇaṃ saṃvidātmatvasaṃtānaikyena vas tathā kin na siddhyed yatas tasya tatropādānakārakam    anyathā na manodhyakṣaṃ smaraṇena salakṣaṇaṃ asyopādānatāpāyād ity anarthakakalpanam    smaraṇākṣavidor bhinnau saṃtānau ced anarthakam manodhyakṣaṃ vināpy asmāt smaraṇotpattisaṃbhavāt    akṣajñānaṃ hi pūrvasmād akṣajñānānyathodiyāt smṛtiḥ smṛtes tathānādikāryakāraṇatedṛśī    saṃtānaikye tayor akṣajñānāt smṛtisamudbhavaḥ pūrvaṃ tadvāsanā yuktād akṣajñānaṃ ca kevalāt    saha smṛtyakṣavijñāne tataḥ syātāṃ kadācana saugatānām iti vyarthaṃ manodhyakṣaprakalpanaṃ    syādvādināṃ punar jñānāvṛtticchedaviśeṣataḥ samānetaravijñānasaṃtāno na virudhyate    pratyakṣaṃ mānasaṃ svārthaniścayātmakam asti cet spaṣṭābham akṣavijñānaṃ kimarthakyād upeyate    akṣasaṃvedanābhāve tasyotpattau virodhataḥ sarveṣām aṃdhatādīnāṃ kṛtaṃ tatkalpanaṃ yadi    tadākṣāniṃdriyotpādyaṃ svārthaniścayanātmakaṃ rūpādivedanaṃ yuktam ekaṃ khyāpayituṃ satām    kramād avagrahehātmadravyaparyāyagocaraṃ jīvasyāvṛttivicchedaviśeṣakramahetukam    tatsamakṣetaravyaktiśaktyekārthavad ekadā na viruddhaṃ vicitrābhajñānavad vā pratītitaḥ    avagrahagṛhītārthabhedam ākāṃkṣato kṣajaḥ spaṣṭo vāyas tadāvārakṣayopaśamato tra tu    saṃśayo vā viparyāsas tadabhāve kutaścana tenehāto vibhinno sau saṃśītibhrāṃtihetutaḥ    viparītasvabhāvatvāt saṃśayādyanibaṃdhanaṃ avāyaṃ hi prabhāṣaṃte kecid dṛḍhataratvataḥ    akṣajñānatayā tvaikyam īhayāvagraheṇa ca yātyavāyaḥ kramāt puṃsastathātvena vivartanāt    vicchedābhāvataḥ spaṣṭapratibhāsasya dhāraṇā paryaṃtasyopayuktākṣanarasyānubhavāt svayam    avāyasya pramāṇatvaṃ dhāraṇāyāś ca neṣyate samīhayehite svārthe gṛhītagrahaṇād iti    tadānumāpramāṇatvaṃ vyāpriyāt tata eva te ity uktaṃ smaraṇādīnāṃ prāmāṇyapratipādane    keṣāṃ punar ime vagrahādayaḥ karmaṇām iti prāha saṃpratipattyarthaṃ bahv ityādiprabhedataḥ    bahvādyavagrahādīnāṃ parasparam asaṃśayam pratyekam abhisaṃbaṃdhaḥ kāryo na samudāyataḥ    bahoḥ saṃkhyāviśeṣasyāvagraho vipulasya vā kṣayopaśamato nuḥ syād īhāvāyo tha dhāraṇā    itarasyābahor ekadvitvākhyasyālpakasya vā setaragrahaṇād evaṃ pratyetavyam aśeṣataḥ    vyaktijātyāśritatvena tayor bahuvidhasya ca bhedaḥ parasparaṃ tadvaddho dhyastaditarasya ca    kṣiprasyācirakālasyādhruvasya calitātmanaḥ svabhāvaikyaṃ na maṃtavyaṃ tathā taditarasya ca    niḥśeṣapudgalodgatyabhāvād bhavati niḥsṛtaḥ stokapudgalaniṣkrāṃter anuktas tv ābhisaṃhitaḥ    niṣkrāṃto niḥsṛtaḥ kārtsnyād uktaḥ saṃdarśito mataḥ iti tadbhedanirṇīter ayuktaikatvacodanā    tatra pradhānabhāvena bahvādīnāṃ nivedanaṃ prakṛṣṭāvṛttiviśleṣaviśeṣāt nuḥ samudbhavāt    tadviśeṣaṇabhāvena kathaṃ cātrālpayogyatāṃ samāsṛtya samudbhūter itareṣāṃ vidhīyate    bahujñānasamabhyarcyaṃ viśeṣaviṣayatvataḥ sphuṭaṃ bahuvidhajñānāj jātibhedāv abhāsinaḥ    tatkṣiprajñānasāmānyāt tac cāniḥsṛtavedanāt tadanuktagamāt so pi dhruvajñānāt kutaścana    vijānāti na vijñānaṃ bahūn bahuvidhān api padārthān iti keṣāṃcin mataṃ pratyakṣabādhitam    pratyakṣāṇi bahūny eva teṣv ajñānāni cet katham tadbadbodhaikanirbhāsaiḥ śataiś cen nāprabādhanāt    tadbodhabahutāvittir bādhikātreti cen mataṃ sā yady ekena bodhena tadartheṣv anumanyatām    bahubhir vedanair anyajñānavedyais tu sā yadi tadavasthā tadā praśno navasthā na mahīyasī    svato bahvarthanirbhāsijñānānāṃ bahutā gatiḥ nānyonyam anusaṃdhānābhāvāt pratyātmavartinām    tatpṛṣṭhajo vikalpaś ced anusaṃdhānakṛn mataḥ so pi nānekavijñānaviṣayastāvake mate    evaṃ bahutvasaṃkhyāyām ekasyāvedanaṃ nanu saṃkhyeyeṣu bahuṣv ity ayuktaṃ kecit prapedire    bahutvena viśiṣṭeṣu saṃkhyeyeṣu pravartitaḥ bahujñānasya tadbhedaikāṃtābhāvāc ca yuktitaḥ    kathaṃ ca mecakajñānaṃ pratyarthavaśavartini jñāne sarvatra yujyeta pareṣāṃ nagarādiṣu    yathā nīlaṃ tathā citraṃ rūpam ekaṃ paṭādiṣu citrajñānaṃ pravarteta tatrety api virudhyate    citrasaṃvyavahārasyābhāvād ekatra jātucit nānārtheṣv iṃdranīlādīrūpeṣu vyavahāriṇām    ekasyānekarūpasya citratvena vyavasthiteḥ maṇyāder iva nānyasya sarvathātiprasaṃgataḥ    citraṃ rūpam iti jñānam eva na pratihanyate rūpe py anekarūpatvapratītes tadviśeṣataḥ    guṇo nekasvabhāvaḥ syād dravyavan na guṇāśrayaḥ iti rūpaguṇe nekasvabhāve citraśemuṣī    nanv anekasvabhāvatvāt sarvasyārthasya tattvataḥ na citravyavahāraḥ syāj jainānāṃ kvacid ity asat    siddhe jātyaṃtare citre tato poddhṛtya bhāṣate jano hy ekam idaṃ nānā vety arthitvaviśeṣataḥ    yogijñānavad iṣṭaṃ tadbahvādyarthāv abhāsanam jñānam ekaṃ sahasrāṃśuprakāśajñānam eva cet    tadevāvagrahādyākhyaṃ prāpnuvat kimu vāryate na ca smṛtisahāyena kāraṇenopajanyate    bahvādyavagrahādīdaṃ vedanaṃ śabdabodhavat yenāvabhāsanād bhinnaṃ grahaṇaṃ tatra neṣyate    bahau bahuvidhe cārthe setare 'vagrahādikam smaraṇaṃ pratyabhijñānaṃ ciṃtā vābhinibodhanam    dhāraṇāviṣaye tatra na viruddhaṃ pratītitaḥ pravṛtter anyathā jātu tanmūlāyā virodhataḥ    kṣaṇasthāyitayārthasya niḥśeṣasya prasiddhitaḥ kṣiprāvagraha eveti kecit tadaparīkṣitam    sthāsnūtpitsuvināśitvasamākrāṃtasya vastunaḥ samarthayiṣyamāṇasya bahutobahuto grataḥ    kauṭasthāt pūrvabhāvānāṃ parasyābhyupagacchataḥ akṣiprāvagrahaikāṃto py etenaiva nirākṛtaḥ    prāpyakārīṃdriyair yukto nisṛtānuktavastunaḥ nāvagrahādir ity eke prāpyakārīṇi tāni vā    tan nānisṛtabhāvasyānuktasyāpi ca kaiścana sūkṣmair aṃśaiḥ pariprāptasyākṣais tair avabodhanāt    nisṛtoktam athaivaṃ syāt tasyety api na śaṃkyate sarvāprāptima vekṣyaivānisṛtānuktatāsthiteḥ    dhruvasya setarasyātrāvagrahāder na bādhyate nityānityātmake bhāve siddhiḥ syādvādino ṃjasā    nanu bahvādayo dharmāḥ setarāḥ kasya dharmiṇaḥ te 'vagrahādayo yeṣām ity arthasyeti sūtritam    yo vyakto dravyaparyāyātmārthaḥ so trābhisaṃhitaḥ avyaktasyottare sūtre vyaṃjanasyopavarṇanāt    kevalo nārthaparyāyaḥ sūrer iṣṭo virodhataḥ tasya bahvādiparyāyaviśiṣṭatvena saṃvidaḥ    tata eva na niḥśeṣaparyāyebhyaḥ parāṅmukham dravyam artho na cānyonyānapekṣya taddvayaṃ bhavet    evam arthasya dharmāṇāṃ bahvādītarabhedinām avagrahādayaḥ siddhaṃ tanmatijñānam īritam    niyamārtham idaṃ sūtraṃ vyaṃjanetyādi darśitam siddhe hi vidhir ārabhyo niyamāya manīṣibhiḥ    avyaktam atra śabdādijātaṃ vyaṃjanam iṣyate tasyāvagraha eveti niyamo dhyakṣavadgataḥ    īhādayaḥ punas tasya na syuḥ spaṣṭārthagocarāḥ niyameneti sāmarthyād uktam atra pratīyate    nanv arthāvagraho yadvadakṣataḥ spaṣṭagocaraḥ tadvat kiṃ nābhimanyeta vyaṃjanāvagraho py asau    kṣayopaśamabhedasya tādṛśo 'saṃbhavād iha aspaṣṭātmakasāmānyaviṣayatvavyavasthitam    adhyakṣatvaṃ na hi vyāptaṃ spaṣṭatvena viśeṣataḥ daviṣṭhapādapādhyakṣajñānasyāspaṣṭatekṣaṇāt    viśeṣaviṣayatvaṃ ca divā tāmasapakṣiṇāṃ tigmarocir mayūkheṣu bhṛṃgapādāv abhāsanāt    jñānasya spaṣṭatā lokanimittety api dūṣitam etena sthāpitākarī    saivāspaṣṭatvahetuḥ syād vyaṃjanāvagrahasya naḥ gaṃdhādidravyaparyāyagrāhiṇo py akṣajanmanaḥ    netyādy āha niṣedhārtham aniṣṭasya prasaṃginaḥ cakṣurmanonimittasya vyaṃjanāvagrahasya tat    vyaṃjanāvagraho naiva cakṣuṣāniṃdriyeṇa ca aprāpyakāriṇā tena spaṣṭāvagrahahetunā    prāpyakārīṃdriyaś cārthe prāptibhedād dhi kutracit tadyogyatāṃ viśeṣāṃ vā spaṣṭāvagrahakāraṇam    yathā navaśarāv ādau dvitrādyās toyaviṃdavaḥ avyaktāmārdratāṃ kṣiptāḥ kurvaṃti prāpyakāriṇaḥ    paunaḥ punyena vikṣiptā vyaktāṃ tām eva kurvate tatprāptibhedatas tadvadiṃdriyāṇy apy avagraham    aprāptikāriṇī cakṣurmanasī kurutaḥ punaḥ vyaktām arthaparicchittim aprāpter aviśeṣataḥ    yathāyaskāṃtapāṣāṇaḥ śalyākṛṣṭiṃ svaśaktitaḥ karoty aprāptikārīti vyaktim eva śarīrataḥ    cakṣuḥ prāptapar icched akāraṇaṃ rūpavyaktitaḥ sparśanādivad ity eke tan na pakṣasya bādhanāt    bāhyaṃ cakṣur yadā tāvat kṛṣṇatārādi dṛśyatām prāptaṃ pratyakṣato bādhāt tasyārthāprāptivedinaḥ    śaktirūpam adṛśyaṃ ced anumānena bādhanam āgamena sunirṇītāsaṃbhavadbādhakena ca    tatrāprāptiparicchedi cakṣuḥ spaṣṭānavagrahāt anyathā tadasaṃbhūter ghrāṇāder iva sarvathā    cakṣuṣā śaktirūpeṇa tārakāgatam aṃjanaṃ na spṛṣṭam iti taddhetor asiddhatvam ihocyate    śaktiḥ śaktim ato nyatra tiṣṭhatārthena yujyate tatrasthena tu naiveti ko nyo brūyāj jaḍātmanaḥ    pakṣāvyāpakatā hetor manasya prāpyakāriṇi virahād iti maṃtavyaṃ nāsyāpekṣatvayogyataḥ    manaso prāpyakāritvaṃ nāprasiddhaṃ pravādinām kvānyathātītadūrādipadārthagrahaṇaṃ tataḥ    kācādyaṃtaritārthānāṃ grahāc cāprāptakāritā cakṣuṣaḥ prāpyakāritve manasaḥ sparśanādivat    vibhajya sphaṭikādīṃś cet kathaṃcic cakṣuraṃśavaḥ prāpnuvaṃs tūlarāśyādīn naśvarān neti cādbhutam    sāmarthyaṃ pāradīyasya yathā yasyānubhedane nālāṃbūbhānodbhede manāg api samīkṣyate    kācādibhedane śaktis tathā nayanarociṣāṃ saṃbhāvyā tūlarāśyādibhidāyāṃ neti kecana    tadaprātītikaṃ so yaṃ kācādir iti niścayāt vināśavyavahārasya tatrābhāvāc ca kasyacit    samānasanniveśasya tasyotpatter anāśitāṃ jano manyeta nirlūnakeśāder veti cen matam    na kvacit pratyābhijñānam ekatvasya prasādhakaṃ siddhyed iti kṣaṇadhvaṃsi jagadāpātam aṃjasā    ātmādyekatvasiddhiś cet pratyabhijñānato dṛḍhāt dārḍhyāt tatra kuto bādhābhāvāc cet prakṛte sabhaṃ    kācādyaṃtaritānarthān paśyataś ca niraṃtaraṃ tatra bhedasya niṣṭhānān nābhinnasya karagrahaḥ    vināśānaṃtarotpattau punarnāśe punarbhavet kuto niraṃtaraṃ tena chāditārthasya darśanam    sparśanena ca nirbhedaśarīrasya mahoṃginām sāṃtareṇānubhūyaṃte tasya sparśanadarśane    prāptasyāṃtaritārthena vibhinnasya parīkṣaṇāt nārthasya darśanaṃ siddhyed anumā ca tathaiva vā    nanv atyaṃtaparokṣatve satyārthasyānumāgateḥ vijñānasyoparaktatve tena vijñāyate katham    tayā śaśvadadṛśyena vedhasā nirmitaṃ jagat kathaṃ niściyate kāryaviśeṣāc cet parair api    pratyakṣeṇāprabādhena bahirarthasya darśanam jñānasyāṃtaḥ prasiddhaṃ cen nānyathā parikalpyate    kācādyaṃtaritārthe pi samānam idam uttaraṃ kācāder bhinnadeśasya tasyāvādhaṃ viniścayāt    yathā mukhaṃ nirīkṣaṃte darpaṇe pratibiṃbitam svadehe saṃspṛśaṃtīti bādhā siddhātra dhīmatām    tathā na sphaṭikāṃbho nupaṭalāvṛttavastuni svadeśāditayā tasya tadā paścāc ca darśanāt    na cekṣaṃte smadādīnāṃ sphuraṃtaś cakṣuraṃśavaḥ sāṃdhakārani śīthiny āmanyānvabhibhavād api    yady anudbhūtarūpās te śakyaṃte nekṣituṃ janaiḥ tadā pramāṃtaraṃ vācyaṃ tatsadbhāvāvabodhakam    raśmivallocanaṃ sarvaṃ taijasatvāt pradīpavat iti siddhaṃ na netrasya jyotiṣkatvaṃ prasādhayet    taijasaṃ nayanaṃ satsu sannikṛṣṭarasādiṣu rūpasya vyaṃjakatvāc cet pradīpādivad īryate    hetor dinaniśānāthamayūkhair vyarbhicāritā taijasaṃ nihite caṃdrakāṃtaraṃ tatkṣitau bhavāḥ    tejonusūtritā jñeyā gā mūloṣṇavatī prabhā nānyā makaratādīnāṃ pārthivatvaprasiddhitaḥ    rūpābhivyaṃjane cākṣṇāṃ nāśe kvāpekṣaṇaṃ bhavet taijasatvāt pradīpāder iva sarvasya dehinaḥ    yathaikasya pradīpasya suspaṣṭārthaprakāśane maṃdatvād asamarthasya dvitīyāder apekṣaṇam    tathākṣṇor na viruddhyeta sūryālokādyapekṣaṇaṃ svakāryo hi svajātīyaṃ sahakāri pratīkṣyate    tadasallocanasyārthaprakāśitvāviniścayāt kathaṃcid api dīpādinirapekṣasya pradīpavat    aṃdhakārāvabhāso sti vinālokena cen na vai prasiddhasteṃdhakāro sti jñānābhāvāt parorthakṛt    pareṣṭyāstīti cet tasyāḥ siddhaṃ cakṣurataijasaṃ pramāṇatve nyathā nāṃdhakāraḥ siddhyet tatas tava    ataijasāṃjanāpekṣi cakṣū rūpaṃ vyanakti yaṃ nātaḥ samānajātīyasahakāri niyamyate    kim uṣṇasparśavijñānaṃ taijasekṣṇi na jāyate tasyānudbhūtatāyāṃ tu rūpānudbhūtatā kutaḥ    tejodravyaṃ hy anudbhūtasparśam udbhūtarūpabhṛt dṛṣṭaṃ yathā pradīpasya prabhābhāraḥ samaṃtataḥ    tathānudbhūtarūpaṃ tadudbhūtasparśam īkṣitam yathoṣṇodakasaṃyuktaṃ paramudbhūtataddvayam    nānubhūtadvayaṃ tejo dṛṣṭaṃ cakṣur yatas tathā adṛṣṭavaśatas tac cet sarvam akṣaṃ tathā na kim    suvarṇaghaṭavat tatsyādityasiddhaṃ nidarśanaṃ pramāṇabalatas tasya taijasatvāprasiddhitaḥ    noṣṇavīryatvatas tasya taijasatvaṃ prasiddhyati vyabhicārān marīcādidravyeṇa taijasena vaḥ    tato nāsiddhatā hetoḥ siddhasādhyasya budhyate cakṣuṣatvādito dhvānenitatyatvasya yathaiva hi    saṃto pi raśmayo netre manasādhiṣṭhitā yadi vijñānahetavo rtheṣu prāpteṣv eveti manyate    manaso ṇutvataś cakṣurmayūkheṣv anadhiṣṭhiteḥ bhinnadeśeṣu bhūyastvaparamāṇuvadekaśaḥ    mahīyaso mahīdhrasya paricchittir na yujyate krameṇādhiṣṭhitau tasya tadaṃśeṣv eva saṃvidaḥ    niraṃśo vayavī śailo mahīyān api rociṣā nayanena paricchedyo manasādhiṣṭhitena cet    na syān mecakavijñānaṃ nānāvayavagocaram taddeśiṣaviṣayaṃ cāsya manohīnair dṛgaṃśubhiḥ    śailacaṃdramasoś cāpi pratyāsannadaviṣṭhayoḥ saha jñānena yujyate prasiddham api saddhiyām    kālena yāvatā śailaṃ prayāṃti nayanāṃśavaḥ kecic caṃdramasaṃ cānye tāvataiveti yujyate    tayoś ca kramato jñānaṃ yadi syāt te manodvayaṃ nānyathaikasya manasas tadadhiṣṭhityasaṃbhavāt    vikīrṇānekanetrāṃśurāśer aprāpyakāriṇaḥ manasodhiṣṭhitau kāryasyaikadeśe pi tiṣṭhataḥ    sahākṣapaṃcakasyaitat kiṃ nādhiṣṭhāyakaṃ mataṃ yato na kramato bhīṣṭaṃ rūpādijñānapaṃcakam    tathā ca yugapajjñānānutpatter aprasiddhitaḥ sādhye manasi liṃgatvaṃ na syād iti manaḥ kutaḥ    manonadhiṣṭhitāś cakṣūraśmayo yadi kurvate svārthajñānaṃ tad apy etaddūṣaṇaṃ duratikramam    tato kṣiraśmayo bhittvā kācādīn arthabhāsinaḥ teṣām abhāvato bhāve py uktadoṣānuṣaṃgataḥ    kācādyaṃtaritārthānāṃ grahaṇaṃ cakṣuṣaḥ sthitam aprāpyakāritāliṃgaṃ parapakṣasya bādhakam    spṛṣṭaṃ śabdaṃ śṛṇoty akṣam aspṛṣṭaṃ rūpam īkṣyate spṛṣṭaṃ baddhaṃ ca jānāti sparśaṃ gaṃdhaṃ rasaṃ tathā    ity āgamaś ca tasyāsti bādhako bādhavarjitaḥ cakṣuṣo prāpyakāritvasādhanaḥ śuddhadhīmataḥ    manobuddhiprakṛṣṭārthagrāhakatvānuṣaṃjanaṃ netrasyāprāpyakāritve bādhakaṃ yena gīyate    tasya prāptānugaṃdhādigrahaṇasya prasaṃjanam prāṇādeḥ prāpyakāritve bādhakaṃ kena bādhyate    sūkṣme mahita ca prāpter aviśeṣe pi yogyatā gṛhītuṃ cen mahaddravyaṃ dṛśyaṃ tasya na cāparam    tarhy aprāpter abhede pi cakṣuṣaḥ śaktir īdṛśī yathā kiṃcid dhi dūrārtham avidikkaṃ prapaśyati    samaṃ cādṛṣṭavaicitryaṃ jñānavaicitryakāraṇaṃ syādvādināṃ pareṣāṃ cety alaṃ vādena tatra naḥ    pratyakṣeṇānumānena svāgamena ca bādhitaḥ pakṣaḥ prāptiparicchedakāri cakṣur iti sthitaḥ    kālātyayāpadiṣṭaś ca heturbāhyeṃdriyatvataḥ ity aprāptārthakāritve ghrāṇāder iva vāṃchite    etena bhautikatvādi sādhanaṃ tatra vāritaṃ pratyetavyaṃ pramāṇena pakṣabādhasya nirṇayāt    ayaskāṃtādināṃ loham aprāpyākarṣatā svayaṃ anaikāṃtikatā hetor bhautikārthasya bādhyate    kāyāṃtargatalohasya bahirdeśasya vakṣyate nāyaskāṃtādinā prāptis tatkarair voktakarmaṇi    yathā kastūrikādravye viyukte pi paṭāditaḥ tatra saugaṃdhyataḥ prāptis tadgaṃdhāṇubhir iṣyate    ayaskāṃtāṇubhiḥ kaiścit tathā lohe pi seṣyatāṃ vibhakte pi tatas tatrākṛṣṭyāder dṛṣṭitas tadā    ity ayuktam ayaskāṃtam aprāptaṃ prati darśanāt lohākṛṣṭeḥ pariprāptās tadaṃśās tu na jātucit    yathā kastūrikādyarthaṃ gaṃdhādiparamāṇavaḥ svādhiṣṭhānābhimukhyena tā nayaṃti paṭādigāḥ    tathāyaskāṃtapāṣāṇaṃ sūkṣmabhāgāś ca lohagāḥ ity āyātam ito prāptāyaskāṃto lohakarmakṛt    prāptā harītakī śaktā kartuṃ malavirecanaṃ malaṃ na punar ānetuṃ harītakyaṃtaraṃ prati    ākarṣaṇaprayatnena vinānanakṛtānilaḥ padmanālādigo ṃbhāṃsi nākarṣati mukhaṃ prati    sūryāṃśavo nayaṃty aṃbhaḥ prāpya tatsūryamaṃḍalaṃ citrabhānutviṣo nāstam iti svecchopakalpitam    tathaiva kāraṇatvasya manasā vyabhicāritā maṃtreṇa ca bhujaṃgādyuccāṭakādikareṇa vā    śabdātmano hi maṃtrasya prāptir na bhujagādinā manāg āvartamānasya dūrasthena pratīyate    tad evaṃ cakṣuṣaḥ prāpyakāritve nāsti sādhanaṃ manasaś ca tatas tābhyāṃ vyaṃjanāvagrahaḥ kutaḥ    dūre śabdaṃ śṛṇomīti vyavahārasya darśanāt śrotram aprāpyakārīti kecid āhus tad apy asat    dūre jighrāmy ahaṃ gaṃdham iti vyavahṛtīkṣaṇāt ghrāṇasyāprāpyakāritvaprasaktir iṣṭahānitaḥ    gaṃdhādhiṣṭhānabhūtasya dravyaprāptasya kasyacit dūratvena tathā vṛttau vyavahāro tra cen nṛṇām    samaṃ śabde samādhānam iti yat kiṃcanedṛśaṃ codyaṃ mīmāṃsakādīnām aprātītikavādinām    kuṭyādivyavadhāne pi śabdasya śravaṇād yadi śrotrām aprāpyakārīṣṭaṃ tathā ghrāṇaṃ tatheṣyatāṃ    dravyāṃtaritagaṃdhasya ghrātasūkṣmasya tasya cet ghrāṇaprāptasya saṃvittiḥ śrotraprāptasya no dhvaneḥ    yathā gaṃdhāṇavaḥ kecic chaktāḥ kuṭyādibhedane sūkṣmās tathaiva naḥ siddhāḥ pramāṇadhvanipudgalāḥ    tatrārekotkaraḥ sarvo gaṃdhadravye samasthitaḥ samādhiś ceti na vyāsenāsmābhir abhidhīyate    kiṃ nimittaṃ śrutajñānaṃ kiṃ bhedaṃ kiṃ prabhedakam parokṣam iti nirṇetuṃ śrutam ityādi sūtritam    śrute nekārthatāsiddhe jñānam ity anuvartanāt śravaṇaṃ hi śrutajñānaṃ na punaḥ śabdamātrakam    tac copacārato grāhyaṃ śrutaśabdaprayogataḥ śabdabhedaprabhedoktaḥ svayaṃ tatkāraṇatvataḥ    samyag ity adhikārāt tu śrutābhāsanivartanam tasyāprāmāṇyavicchedaḥ pramāṇapadavṛttitaḥ    parokṣāviṣkṛtes tasya pratyakṣatvanirākriyā nāvadhyādinimittatvaṃ matipūrvam iti śruteḥ    pūrvaṃ śabdaprayogasya vyavadhāne pi darśanāt na sākṣānmatipūrvasya śrutasyeṣṭasya bādhanam    na ca kevalapūrvatvāt sarvajñavacanātmanaḥ śrutasya matipūrvatvaniyamo tra virudhyate    jñānātmanas tathābhāvaprokte gaṇabhṛtām api matiprakarṣapūrvatvād arhatproktārthasaṃvidaḥ    matisāmānyanirdeśān na śrotramatipūrvakaṃ śrutaṃ niyamyate 'śeṣamatipūrvasya vīkṣaṇāt    śrutvā śabdaṃ yathā tasmāt tadarthaṃ lakṣayed ayaṃ tathopalabhya rūpādīn arthaṃ tan nāṃtarīyakam    na smṛtyādi matijñānaṃ śrutam evaṃ prasajyate matipūrvatvaniyamāt tasyāsya tu matitvataḥ    śrutajñānāvṛticchedaviśeṣāpekṣaṇasya ca smṛtyādiṣv aṃtaraṃgasyābhāvān na śrutatāsthitiḥ    matipūrvaṃ tato jñeyaṃ śrutam aspaṣṭatarkaṇam na tu sarvamativyāptiprasaṃgād iṣṭabādhanāt    dvibhedam aṃgabāhyatvād aṃgarūpatvataḥ śrutam anekabhedam atraikaṃ kālikotkālikādikam    dvādaśāvastham aṃgātmatadācārādibhedataḥ pratyekaṃ bhedaśabdasya saṃbaṃdhād iti vākyabhit    mukhyā jñānātmakā bhedaprabhedās tasya sūtritāḥ śabdātmakāḥ punar gauṇāḥ śrutasyeti vibhidyate    śabdajñānasya sarve pi matipūrvatvam ādṛtāḥ vādinaḥ śrotravijñānābhāve tasya samudbhavāt    śabdātmakaṃ punar yeṣāṃ śrutam ajñānapūrvakaṃ nityaṃ teṣāṃ pramāṇena virodho bahucoditaḥ    pratyakṣabādhanaṃ tāvad agnim īle purohitaṃ ity evam ādiśabdasya jñānapūrvatvavedanāt    tadvyakteḥ jñānapūrvatvaṃ svayaṃ saṃvedyate na tu śabdasyeti na sādhīyo vyakteḥ śabdātmakatvataḥ    śabdādyarthāṃtaraṃ vyaktiḥ śabdasya katham ucyate saṃbaṃdhāc ceti saṃbaṃdhaḥ svabhāva iti saikatā    śabdavyakterabhinnaikasaṃbaṃdhātmatvato na kim saṃbaṃdhasyāpi tadbhede navasthā kena vāryate    bhinnābhinnātmakatve tu saṃbaṃdhasya tatas tava śabdasya buddhipūrvatvaṃ vyakter iva kathaṃcana    vyaktir varṇasya saṃskāraḥ śrotrasyāthobhayasya vā tadbuddhitāvṛtticchedaḥ sāpy etenaiva dūṣitā    viśeṣādhānam apy asya nābhivyaktir vibhāvyate nityasyātiśayotpattivirodhāt svātmanāśavat    kalaśāder abhivyaktir dīpādeḥ pariṇāminaḥ prasiddheti na sarvatra doṣoyam anuṣajyate    nityasya vyāpino vyaktiḥ sākalyena yadīṣyate kiṃ na sarvatra sarvasya sarvadā tadviniścayaḥ    svādṛṣṭavaśataḥ puṃsāṃ śābdajñānavicitratā vyakte pi kārtsnyataḥ śabde bhāve sarvātmake na kim    deśatas tadabhivyaktau sāṃśatā na virudhyate vyaṃjake yat tu śabdanām abhinne sakalaśrutiḥ    tasya kvacid abhivyaktau vyāpāre deśabhāk svataḥ nānārūpe tu nānātvaṃ kutas tasyāvagamyatām    svābhipretābhilāpasya śruter anyonyasaṃśrayaḥ siddhe vyaṃjakanānātve viśiṣṭavacasaḥ śrutiḥ    prasiddhāyāṃ punas tasyāṃ tatprasiddhir hi te mate yadi pratyakṣasiddheyaṃ viśiṣṭavacasaḥ śrutiḥ    śemuṣīpūrvatāsiddhir vācā kiṃ nānumanyate nanu jñānanimittatvaṃ vācām uccāraṇasya naḥ    siddhaṃ nāpūrvarūpeṇa prādurbhāvaḥ kadācana kartur asmaraṇaṃ tāsāṃ tādṛśīnāṃ viśeṣataḥ    puruṣārthopayogatvabhājām api mahātmanāṃ naivaṃ sarvanṛṇāṃ kartuḥ smṛter apratisiddhitaḥ    tatkāraṇaṃ hi kāṇādāḥ smaraṃti caturānanaṃ jaināḥ kālāsuraṃ bauddhāḥ svāṣṭakāt sakalāḥ sadā    sarve svasaṃpradāyasyāvicchedenāvigānataḥ nānākartṛsmṛter nāsti tāsāṃ kartety asaṃgataṃ    bahukartṛkatāsiddheḥ khaṃḍaśas tādṛganyavat kartur asmaraṇaṃ hetur yājñikānāṃ yadīṣyate    tadā svagṛhamānyā syād vedasyāpauruṣeyatā jagato 'kartṛtāpy evaṃ pareṣām iti cen na vai    kartuḥ smaraṇahetus tatsiddhau taiś ca prayujyate mahattvaṃ tu na vedasya prativādyāgamāt sthitam    yenāśakyakriyatvasya sādhanaṃ tat tava smṛteḥ puruṣārthopayogitvaṃ vivādādhyāsitaṃ kathaṃ    viśeṣaṇatayā hetoḥ prayoktuṃ yujyate satāṃ vedādhyayanavācyatvaṃ vedādhyayanapūrvatām    na vedādhyayane śaktaṃ prājñāpayitum anyavat yathā hiraṇyagarbhaḥ so 'dhyetā vedasya sādhyate    yugādau prathamas tadvadbuddhādiḥ svāgamasya ca sākṣātkṛtyāgamasyārthavaktā kartāgamasya cet    agnir ity agnir ityādir vaktā kartā tu tādṛśaḥ parābhyupagamāt kartā sa ced vede pitāmahaḥ    tata eva na dhātāstu na vā kaścit samatvataḥ nānādhītasya vedasyādhyetāsty adhyāpakād vinā    na so sti brahmaṇo trādāv iti nādhyetṛtā gatiḥ svarge dhītān svayaṃ vedānanusmṛty eha saṃbhavī    brahmādhyetā pareṣāṃ bādhyāpakaś ced yathā yathaṃ sarve pi kavayaḥ saṃtu tathādhyetāra eva ca    ity akṛtrimatā sarvaśāstrāṇāṃ samupāgatā svayaṃ janmāṃtarādhītam adhīyāmahi saṃprati    iti saṃvedanābhāvāt teṣām adhyetṛtā na cet pūrvānubhūtapānādes tadaharjātadārakāḥ    smartāraḥ katham evaṃ syus tathā saṃvedanād vinā smṛtiliṃgaviśeṣāc cet teṣāṃ tatra prasādhyate    kavīnāṃ kiṃ na kāvyeṣu pūrvādhīteṣu sānvayā yadi vyutpattivarṇeṣu padeṣv artheṣv anekadhā    vākyeṣu ceha kurvaṃtaḥ kavayaḥ kāvyam īkṣitāḥ kiṃ na prajāpatir vedān kurvann evaṃ satīkṣitaḥ    kaścit parīkṣakair lokaiḥ sadbhis taddeśakālagaiḥ tathā ca śrūyate sāpi girā sāmāni rugnirāṭ    ṛcaḥ kṛtā iti kveyaṃ vedasyāpauruṣeyatā pratyabhijñāyamānatvaṃ nityaikāṃtaṃ na sādhayet    paurvāparyavihīne rthe tadayogād virodhataḥ pūrvadṛṣṭasya paścād yā dṛśyamānasya caikatām    vetti sā pratyabhijñeti prāyaśo viniveditam dṛṣṭatvadṛśyamānatve rūpe pūrvāpare na cet    bhāvasya pratyabhijñānaṃ syāt tad atrāśv aśṛṃgavat tadā nityātmakaḥ śabdaḥ pratyabhijñānato yathā    devadattādir ity astu viruddho hetur īritaḥ darśanasya parārthatvād ity api paradarśitaḥ    viruddho hetur ity evaṃ śabdaikatvaprasādhane tato 'kṛtakatā siddher abhāvān nayaśaktitaḥ    vedasya prathamo dhyetā karteti matipūrvataḥ padavākyātmakatvāc ca bhāratādivad anyathā    tadayogād virudhyeta saṃgirau ca mahānasaḥ sarveṣāṃ hi viśeṣāṇāṃ kriyā śakyā vacottare    vedavākyeṣu dṛśyānām anyeṣāṃ ceti hetutā yuktānyathā na dhūmāder agnyādiṣu bhaved asau    tataḥ sarvānumānānām ucchedas te duruttaraḥ pramāṇaṃ na punar vedavacaso kṛtrimatvataḥ    sādhyate ced bhaved arthavād asyāpi pramāṇatā aduṣṭahetujanyatvaṃ tadvatprāmāṇyasādhane    hetvābhāsanam ity uktam apūrvārthatvam apyadaḥ bādhavarjitatā hetus tatra cel laiṃgikādivat    kim akṛtrimatā tasya poṣyate kāraṇaṃ vinā puṃso doṣāśrayatvena pauruṣeyasya duṣṭatā    śakyate tajjasaṃvitter ato bādhanaśaṃkanaṃ niḥsaṃśayaṃ punar bādhavarjitatvaṃ prasiddhyati    kartṛhīnavaco vitter ity akṛtrimatārthakṛt pareṣām āgamasyeṣṭaṃ guṇavadvaktṛkatvataḥ    sādhīyasīti yo vakti so pi mīmāṃsakaḥ kathaṃ samatvād akṣaliṃgādeḥ kasyacid duṣṭatā dṛśaḥ    śabdajñānavadāśaṃkāpattes tajjanmasaṃvidaḥ mithyājñānanimittasya yady akṣādes tadā na tāḥ    tādṛśaḥ kiṃ na vākyasya śrutyābhāsatvam iṣyate guṇavadvaktṛkatvaṃ tu parair iṣṭaṃ yad āgame    tatsādhanāṃtaraṃ tasya prāmāṇye kāṃścana prati sunirbādhatvahetor vā samarthanaparaṃ bhavet    tan no ca pauruṣeyatvaṃ bhavatas tatra tādṛśaṃ maṃtrārthavādaniṣṭhasya pauruṣeyasya bādhanāt    vedasyāpi payodādidhvaner naiṣphalyadarśanāt satyaṃ śrutaṃ sunirṇītāsaṃbhavadbādhakatvataḥ    pratyakṣādivad ity etatsamyak prāmāṇyasādhanaṃ kadācit syād apramāṇaṃ śuktau rajatabodhavat    nāpekṣaṃ saṃbhavadbādhaṃ deśakālanarāṃtaraṃ sveṣṭajñānavad ity asya nānaikāṃtikatā sthitiḥ    na ca hetur asiddho yam avyaktārthavacovidaḥ pratyakṣabādhanābhāvād anekāṃte kadācana    anumeye numānena bādhavaidhuryanirṇayāt tṛtīyasthānasaṃkrāṃte tv āgamāvayavena ca    parāgame pramāṇatvaṃ naivaṃ saṃbhāvyate sadā dṛṣṭeṣṭabādhanāt sarvaśūnyatvāgamabodhavat    bhāvādyekāṃtavācānāṃ sthitaṃ dṛṣṭeṣṭabādhanaṃ sāmaṃtabhadrato nyāyād iti nātra prapaṃcitam    kariṣyate ca tadvatsa yathāvasaram agrataḥ yuktyā sarvatra tattvārthe paramāgamagocaram    proktabhedaprabhedaṃ tacchrutam eva hi taddṛḍhaṃ prāmāṇyam ātmasāt kuryād iti naściṃtayātra kim    atra pracakṣate kecic chrutaṃ śabdānuyojanāt tatpūrvaniyamādyuktaṃ nānyatheṣṭavirodhataḥ    śabdānuyojanād eva śrutaṃ hi yadi kathyate tadā śrotramatijñānaṃ na syān nānyamatau bhavam    yady apekṣavacas teṣāṃ śrutaṃ sāṃvyavahārikaṃ sveṣṭasya bādhanaṃ na syād iti saṃpratipadyate    na so sti pratyayo loko yaḥ śabdānugamādṛte ity ekāṃtaṃ nirākartuṃ tathoktaṃ tair iheti vā    jñānam ādyaṃ smṛtiḥ saṃjñā ciṃtā cābhinibodhikaṃ prāgnāmasaṃsṛtaṃ śeṣaṃ śrutaṃ śabdānuyojanāt    vāgrūpatā tato na syād yoktā pratyavamarśinī matijñānaṃ prakāśeta sadā tad dhi tayā vinā    vaikharīṃ madhyamāṃ vācaṃ vinākṣajñānam ātmanaḥ svasaṃvedanam iṣṭaṃ no nyonyāśrayaṇam anyathā    paśyaṃtyā nu vinā naitadvyavasāyātmavedanam yuktaṃ na cātra saṃbhāvyaḥ prokto nyonyasamāśrayaḥ    vyāpinyā sūkṣmayā vācā vyāptaṃ sarvaṃ ca vedanaṃ tayā vinā hi paśyaṃtī vikalpātmā kutaḥ punaḥ    madhyamā tadabhāve kva nirbījā vaikharī ravāt tataḥ sā śāśvatī sarvavedaneṣu prakāśate    iti ye pi samādadhyus te py anālocitoktayaḥ śabdabrahmaṇi nirbhāge tathā vaktum aśaktitaḥ    na hy avasthā ca śrotrasya satyādvaitaprasaṃgataḥ na ca tāsām avidyātvaṃ tattvāsiddhau prasiddhyati    brahmaṇo na vyavasthānam akṣajñānāt kutaścana svapnādāv iva mithyātvāt tasya sākalyataḥ svayam    nānumānāt tato rthānāṃ pratīter durlabhatvataḥ paraprasiddhir apy asya prasiddhā nāpramāṇikā    svataḥ saṃvedanāt siddhiḥ kṣaṇikānaṃśavittivat na parabrahmaṇo nāpi sā yuktā sādhanād vinā    āgamād eva tatsiddhau bhedasiddhis tathā na kim nirbādhād eva cettavyaṃ va pramāṇāṃtarādṛte    tadāgamasya niścetuṃ śakyaṃ jātu parīkṣakaiḥ na cāgamas tato bhinnaḥ samasti paramārthataḥ    tadvivartas tv avidyātmā tasya prajñāpakaḥ kathaṃ na cāviniścite tattve phenabudbudavadbhidā    māyeyaṃ bata duḥpārā vipaścid iti paśyati yenāvidyā vinirṇītā vidyāṃ gamayati dhruvam    bhrāṃter bījāvinābhāvād anumātraivam āgatā tato naiva paraṃ brahmāsty anādinidhanātmakam    vivartetārthabhāvena prakriyā jagato yataḥ  syādvādināṃ punarvāco dravyabhāvavikalpataḥ dvaividhyaṃ dravyavāgdvedhā dravyaparyāyabhedataḥ    śrotragrāhyātra paryāyarūpā sā vaikharī matā madhyamā ca parais tasyāḥ kṛtaṃ nāmāṃtaraṃ tathā    dravyarūpā punar bhāṣāvargaṇāḥ pudgalāḥ sthitāḥ pratyayān manasā nāpi sarvapratyayagāminī    bhāvavāgvyaktirūpātra vikalpātmanibaṃdhanaṃ dravyavācobhidhā tasyāḥ paśyaṃtīty anirākṛtāḥ    vāgvijñānāvṛtticchedaviśeṣopahitātmanaḥ vaktuḥ śaktiḥ punaḥ sūkṣmā bhāvavāg abhidhīyatām    tayā vinā pravartaṃte na vācaḥ kasyacit kvacit sarvajñasyāpy anaṃtāyā jñānaśaktes tadudbhavaḥ    iti cidrūpasāmānyāt sarvātmavyāpinī nanu viśeṣātmatayety uktā matiḥ prāṅ nāmayojanāt    śabdānuyojanād eva śrutam evaṃ na bādhyate jñānaśabdād vinā tasya śaktirūpād asaṃbhavāt    labdhyakṣarasya vijñānaṃ nityoddhāṭanavigrahaṃ śrutājñāne pi hi proktaṃ tatra sarvajaghanyake    sparśaneṃdriyamātrotthe matyajñānanimittakaṃ tato kṣarādivijñānaṃ śrute sarvatra saṃmatam    nākalaṃkavacobādhā saṃbhavaty atra jātucit tādṛśaḥ saṃpradāyasyāvicchedādyuktyanugrahāt    kṛtābhideśavācyābhiḥ saṃskārasya kvacit punaḥ saṃvitprasiddhasādharmyāt tathā vācakayojitā    prakāśitopamā kaiścit sā śrutān na vibhidyate śabdānuyojanāt tasyāḥ prasiddhāgamavittivat    pramāṇāntaratāyān tu pramāṇaniyamaḥ kutaḥ saṃkhyā saṃvedanādīnāṃ pramāṇāṃtaratāsthitau    pratyakṣaṃ dvyādivijñānam uttarādharyavedinaṃ sthaviṣṭhorudaviṣṭhālpalaghvāsannādivic ca cet    nopadeśam apekṣeta jātu rūpādivittivat paropadeśanirmuktaṃ pratyakṣaṃ hi satāṃ mataṃ    tatsaṃjñāsaṃjñisambandhapratipattir apekṣate paropadeśam adhyakṣaṃ saṃkhyādiviṣayaṃ yadi    tatropamānataḥ saitat pramāṇāntaram astu vaḥ nopamānārthatā tasyās tadvākyena vinodbhavāt    āgamatvaṃ punaḥ siddham upamānaṃ śrutaṃ yathā siṃhāsane sthito rājetyādiśabdotthavedanaṃ    uttarapratipattyākhyā pratibhā ca śrutaṃ matā nābhyāsajā susaṃvittiḥ kūṭadrumādigocarā     so 'yaṃ kūṭa iti prācyaudīcyadṛṣṭe kṣamāṇayoḥ sādṛśye pratyabhijñeyaṃ matir eva hi niścitā    śabdānuyojanāt tv eṣā śrutam astv akṣavittivat saṃbhavābhāvasaṃvittir arthāpattis tathānumā    nānāsaṃsṛṣṭarūpā hi matir eṣā prakīrtitā nātaḥ kaścid virodho 'sti syādvādāmṛtabhogināṃ    iti śruṃta sarvamunīśaviśrutaṃ sahoktam atyātra parokṣam īritaṃ  pramāṇam unmūlitadurmatotkaraṃ parīkṣakāś cetasi dhārayantu tam    bhavapratyaya ityādisūtram āhāvadher bahiḥ kāraṇaṃ kathayann ekaṃ svāmibhedavyapekṣayā    nāmāyurudayāpekṣo nuḥ paryāyo bhavaḥ smṛtaḥ sa bahiḥpratyayo yasya sa bhavapratyayo 'vadhiḥ    ye 'grato 'tra pravakṣyante prāṇino devanārakāḥ teṣām evāyam ity arthān nānyeṣāṃ bhavakāraṇaḥ    bhavapratyaya eveti niyamān na guṇodbhavaḥ saṃyamādiguṇābhāvād devanārakadehinām    nāvadhijñānavṛtkarmakṣayopaśamahetutā vyavacchedyā prasajyetāpratiyogitvanirṇayāt    bāhyau hi pratyayāv atrākhyātau bhavaguṇau tayoḥ pratiyogitvam ity ekaniyamād anyavicchide    pratyayasyāntarasyātas tatkṣayopaśamātmanaḥ pratyagbhedo 'vadher yukto bhavābhede 'pi cāṅginām    guṇahetuḥ sa keṣāṃ syāt kiyadbheda itīritum prāha sūtraṃ kṣayetyādi saṃkṣepād iṣṭasaṃvide    kṣayahetur ity ākhyātaḥ kṣayaḥ kṣāyikasaṃyamaḥ saṃyatasya guṇaḥ pūrvaṃ samabhyarhitavigrahaḥ    tathā cāritramohasyopaśamād udbhavann ayam kathyetopaśamo hetor upacāras tv ayaṃ phale    kṣayopaśamato jātaḥ kṣayopaśama ucyate saṃyamāsaṃyamo 'pīti vākyabhedād vivicyate    kṣāyopaśama ity antaraṃgo hetur nigadyate yadi veti pratīty arthaṃ mukhyaśabdāprakīrtanam    teneha prācyavijñāne vakṣyamāṇe ca bhedini kṣayopaśamahetutvāt sūtritaṃ saṃpratīyate    śeṣā manuṣyatiryañco vakṣyamāṇāḥ prapaṃcataḥ te yataḥ pratipattavyā gatināmābhidhāśrayāḥ    syāt teṣām avadhir bāhyaguṇahetur itīraṇāt bhavahetur na me 'stīti sāmarthyād avadhāryate    teṣām eveti nirṇīter devanārakavicchidā kṣayopaśamahetuḥ sann ity ukte nāviśeṣataḥ    ṣaḍvikalpaḥ samastānāṃ bhedānām upasaṃgrahāt paramāgamasiddhānāṃ yuktyā sambhāvitātmanām    viśuddhyanugamāt puṃso 'nugāmī deśato 'vadhiḥ paramāvadhir apy uktaḥ sarvāvadhir apīdṛśaḥ    viśuddhyananvayādeśo 'nanugāmī ca kasyacit tadbhavāpekṣayā prācyaḥ śeṣo 'nyabhavavīkṣayā    varddhamāno 'vadhiḥ kaścid viśuddhe vṛddhitaḥ sa tu deśāvadhir ihāmnātaḥ paramāvadhir eva ca    hīyamāno 'vadhiḥ śuddhe hīyamānatvato mataḥ saddeśāvadhir evātra hāne sadbhāvasiddhitaḥ    avasthito 'vadhiḥ śuddher avasthānān niyamyate sarvo ṅgināṃ virodhasyāthabhāvān nānavasthiteḥ    viśuddher anavasthānāt sambhaved anavasthitaḥ sa deśāvadhir evaiko 'nyatra tat pratighātataḥ    proktaḥ sapratipāto vā'pratipātas tathā'vadheḥ so 'ntarbhāvam amīṣv eva prayātīti na sūtritaḥ    manaḥparyayavijñānabhedakāraṇasiddhaye prāharjv ityādikaṃ sūtraṃ svarūpasya viniścayāt    nirvartitaśarīrādikṛtasyārthasya vedanāt ṛjvī nirvartitā tredhā praguṇā ca prakīrtitā    anirvartitakāyādikṛtārthasya ca vedikā vipulā kuṭilā ṣoḍhā cakrarjutrayagocarā    etayor matiśabdena vṛttir anyapadārthikā kaiścid uktā sa cānyo 'rtho manaḥparyaya ity asan    dvitraprasaṃgatas tatra pravaktuṃ dhīdhano janaḥ na manaḥparyayo yukto manaḥparyaya ity alam    yadātv anyau padārthau stastadviśeṣau balād gatau sāmānyatas tadeko 'yam iti yuktaṃ tathā vacaḥ    sāmānādhikaraṇyaṃ ca na sāmānyaviśeṣayoḥ prabādhyate tadātmatvāt kathaṃcit saṃpratītitaḥ    svapadārthā ca vṛttiḥ syād aviruddhā tathā sati viśiṣṭe hi matijñāne manaḥparyaya iṣyate    parato 'yam apekṣasyātmanaḥ svasya parasya vā manaḥparyaya ity asmin pakṣe bāhyanimittavat    na matijñānatāpattis tasyaivaṃ manasaḥ svayaṃ nirvarttakatvavaidhuryād apekṣāmātratāsthiteḥ    kṣayopaśamam ābibhradātmā mukhyaṃ hi kāraṇaṃ tatpratyakṣasya nirvṛttau parahetuparāṅmukhaḥ    manoliṅgajatāpatter na ca tasyānumānataḥ pratyakṣalakṣaṇasyaiva nirbādhasya vyavasthiteḥ    yadā paramanaḥprāptaḥ padārtho mana ucyate tātsthyāt tācchabdyasaṃsiddher maṃcakrośanavat tadā    tasya paryayaṇaṃ yasmāt tad vā yena parīyate sa manaḥparyayo jñeya ity uktes tatsvarūpavit    manaḥparyayayor uktabhedayoḥ svavacobalāt viśeṣahetusaṃvittau viśuddhītyādisūtritam    ātmaprasattir atroktā viśuddhir nijarūpataḥ pracyutya saṃbhavaś cāsyāpratipātaḥ pratīyate    tābhyāṃ viśeṣamāṇatvaṃ viśeṣaḥ karmasādhanaḥ tacchabdena parāmarśo manaḥparyaya bhedayoḥ    nanūttaratra tadbhedasthitābhyāṃ sa viśiṣyate viśuddhyapratipātābhyāṃ pūrvas tu na kathaṃcana    ity ayuktaṃ viśeṣasya dviṣṭhatvena prasiddhitaḥ viśiṣyate yato yasya viśeṣaḥ so 'tra hīkṣate    kuto 'vadher viśeṣaḥ syān manaḥparyayasaṃvidaḥ ity ākhyātuṃ viśuddhyādisūtram āha yathāgamaṃ    bhūyaḥ sūkṣmārthaparyāyavinmanaḥparyayo 'vadheḥ prabhūtadravyaviṣayād api śuddhyā viśeṣyate    kṣetrato 'vadhir evātaḥ paramakṣetratām itaḥ svāminā tv avadheḥ saḥ syād viśiṣṭaḥ saṃyataprabhuḥ    viṣayeṇa ca niḥśeṣarūparūpyarthagocaraḥ rūpyarthagocarād eva tasmād etac ca vakṣyate    evaṃ matyādibodhānāṃ sabhedānāṃ nirūpaṇam kṛtaṃ na kevalasyātra bhedasyāprastutatvataḥ    vakṣyamāṇatvataś cāsya ghātikṣayajam ātmanaḥ svarūpasya niruktyaiva jñānaṃ sūtre prarūpaṇāt    athādyajñānayor arthavivādavinivṛttaye matītyādi vacaḥ samyak sūtrayan sūtram āha saḥ    matiśrute samākhyāte nibandho niyamaḥ sthitaḥ dravyāṇi vakṣyamāṇāni paryāyāś ca prapaṃcataḥ    pūrvasūtroditaś cātra varttate viṣayadhvaniḥ kevalo 'rthād viśuddhyādisahayogaṃ śrayann api    dravyeṣv iti padenāsya sāmānādhikaraṇyataḥ tadvibhaktyantatāpatter viṣayeṣv iti budhyate    viṣayeṣu nibandho 'stīty ukte nirviṣayena te matiśrute iti jñeyaṃ na vā niyatagocare    paryāyamātrage naite dravyeṣv iti viśeṣaṇāt dravyage eva te 'sarvaparyāye dravyagocare    eteṣv asarvaparyāyeṣv ity ukter iṣṭanirṇayāt tathāniṣṭau tu sarvasya pratītivyāhatīraṇāt    matyādipratyayo naiva bāhyārthālambanaṃ sadā pratyayatvād yathā svapnajñānam ity apare viduḥ    tadasatsarvaśūnyatvāpatter bāhyārthavittivat svānyasaṃtānasaṃvitter abhāvāt tadabhedataḥ    na caivaṃ sambhaved iṣṭam advayaṃ jñānam uttamam tato 'nyasya nirākarttum aśaktes tena sarvathā    svato na tasya saṃvittir asya na syān nirākṛtiḥ kim anyasya svasaṃvittir anyasya syān nirākṛtiḥ    svayaṃ saṃvedyamānasya katham anyair nirākṛtiḥ paraiḥ saṃvedyamānasya bhavatāṃ sā kathaṃ matā    na sādhyasādhanatvādir na ca satyetarasthitiḥ te svasiddhir apīty etattattvaṃ sugatabhāvitam    akṣajñānaṃ bahirvastu veti na smaraṇādikaṃ ity uktaṃ tu pramāṇena bāhyārthasyāsya sādhanāt    śrutenārthaṃ paricchidya varttamāno na bādhyate akṣajenaiva tat tasya bāhyārthālaṃbanā sthitiḥ    anekāntātmakaṃ vastu saṃprakāśayati śrutaṃ sadbodhatvād yathākṣotthabodha ity upapattimat    nayena vyabhicāraś cen na tasya guṇabhāvataḥ svagocarārthadharmāṇy adharmārthaprakāśanāt    śrutasyāvastuveditve parapratyāyanaṃ kutaḥ saṃvṛteś ced vṛthaivaiṣā paramārthasya niściteḥ    sarvaparyāyam uktāni na syur dravyāṇi jātucit sadviyuktāś ca paryāyāḥ śaśaśrṛṃgoccatādivat    nāśeṣaparyayākrāntatanūni ca cakāsati dravyāṇi prakṛtajñāne tathā yogyatvahānitaḥ    jñānasyārthaparicchittau kāraṇaṃ nānyad īkṣyate yogyatāyās tadutpattiḥ sārūpy ādiṣu satsv api    pratyakṣasyāvadheḥ keṣu viṣayeṣu nibandhanam iti nirṇītaye prāha rūpiṣv ityādikaṃ vacaḥ    rūpaṃ pudgalasāmānyaguṇas tenopalakṣyate sparśādir iti tadyogāt rūpiṇīti viniścayaḥ    teṣv eva niyamo 'sarvaparyāyeṣv avadheḥ sphuṭam dravyeṣu viṣayeṣv evam anuvṛttir vidhīyate    svaśaktivaśato 'sarvaparyāyeṣv eva varttanam tasya nānāgatātītānantaparyāyayogiṣu    pudgaleṣu tathākāśādiṣv amūrteṣu jātucit iti yuktaṃ sunirṇītāsambhavadbādhakatvataḥ    kvaḥ manaḥparyayasyārthe nibandha iti darśayat tad ityādy āha satsūtram iṣṭasaṃgrahasiddhaye    paramāvadhinirṇīte viṣaye 'nantabhāgatām nīte sarvāvadher jñeyo bhāgaḥ sūkṣmo 'pi sarvataḥ    etasyānantabhāge syād viṣaye sarvaparyaye vyavastharjumater anyamanaḥsthe praguṇe dhruvam    amuṣyānantabhāgeṣu paramaṃ saukṣmyamāgate syān manaḥparyayasyaivaṃ nibandho viṣaye khile    kṣāyopaśamikaṃ jñānaṃ prakarṣaṃ paramaṃ vrajet sūkṣme prakarṣamāṇatvād arthe tad idam īritam    kṣetradravyeṣu bhūyeṣu yathā ca vividhasthitiḥ spaṣṭā yā paramā tadvadasya svārthe yathodite    yathā cendriyajajñānaṃ viṣayeṣv atiśāyanāt sveṣu prakarṣam āpannaṃ tadvidbhir viniveditam    matipūrvaṃ śrutaṃ yadvadaspaṣṭaṃ sarvavastuṣu sthitaṃ prakṛṣyamāṇatvāt paryaṃtaṃ prāpya tattvataḥ    manaḥparyayavijñānaṃ tathā praspaṣṭabhāsanaṃ vikalādhyakṣaparyantaṃ tathā samyakparīkṣitaṃ    prakṛṣyamāṇatā tv akṣajñānādeḥ saṃpratīyate iti nāsiddhatā hetor na cāsya vyabhicāritā    sādhye saty eva sadbhāvād anyathānupapattitaḥ sveṣṭahetuvad ity astu tataḥ sādhyaviniścayaḥ    dṛṣṭeṣṭabādhanaṃ tasyāpahnave sarvavādināṃ sarvathaikāntavādeṣu tadvāde 'pīti nirṇayaḥ    kevalaṃ sakalajñeyavyāpi spaṣṭaṃ prasādhitam pratyakṣam akramaṃ tasya nibandho viṣayeṣv iha    bodhyo dravyeṣu sarveṣu paryāyeṣu ca tattvataḥ prakṣīṇāvaraṇasyaiva tadāvirbhāvaniścayāt    ātmadravyaṃ jña eveṣṭaḥ sarvajñaḥ paramaḥ pumān kaiścit tadvyatiriktārthābhāvād ity apasāritaṃ    dravyeṣv iti bahutvasya nirdeśāt tatprasiddhitaḥ varttamāne 'stu paryāye jñānī sarvajña ity api    paryāyeṣv iti nirdeśād avayavasya pratītitaḥ sarvathābhedatattvasya yatheti pratipādanāt    tasmād anuṣṭheyagataṃ jñānam asya vicāryatāṃ kīṭasaṃjñāparijñānaṃ tasya nātropayujyate    ity etac ca vyavacchinnaṃ sarvaśabdaprayogataḥ tadekasyāpy avijñāne kvākṣūṇāṃ śiṣyasādhanaṃ    heyopādeyatattvasya sābhyupāyasya vedakaṃ sarvajñatāmitaṃ niṣṭaṃ tajjñānaṃ sarvagocaram    upekṣaṇīyatattvasya heyādibhir asaṃgrahāt na jñānaṃ na punas teṣāṃ na jñāne 'pīti kecana    tadasadvītarāgāṇām upekṣatvena niścayāt sarvārthānāṃ kṛtārthatvāt teṣāṃ kvacid avṛttitaḥ    vineyāpekṣayā heyam upādeyaṃ ca kiṃcana sopāyaṃ yadi te 'py āhus tadopekṣyaṃ na vidyate    niḥśeṣaṃ saṃparaṃ tāvad upeyaṃ sammataṃ satām heyaṃ janmajarāmṛtyukīrṇaṃ saṃsaraṇaṃ sadā    anayoḥ kāraṇaṃ tat syād yad anyat tan na vidyate pāraṃparyeṇa sākṣāc ca vastūpekṣaṃ tataḥ kimu    dveṣo hānam upādānaṃ rāgas taddvayavarjanaṃ khyātopekṣeti heyādyā bhāvās tadviṣayād ime    iti mohābhibhūtānāṃ vyavasthā parikalpyate heyatvādivyavasthānāsambhavāt kutracit tava    hātuṃ yogyaṃ mumukṣūṇāṃ heyatattvaṃ vyavasthitaṃ upādātuṃ punaryogyam upādeyam itīyate    upekṣantu punaḥ sarvam upādeyasya kāraṇam sarvopekṣāsvabhāvatvāc cāritrasya mahātmanaḥ    tattvaśraddhānasaṃjñānagocaratvaṃ yathā dadhat tadbhāvyamānam āmnātam amogham aghaghātibhiḥ    mithyādṛgbodhacāritragocaratvena bhāvitam sarvaṃ heyasya tattvasya saṃsārasyaiva kāraṇaṃ    tadavaśyaṃ parijñeyaṃ tattvārtham anuśāsatā vineyān iti boddhavyaṃ dharmmavatsakalaṃ jagat    dharmād anyatparijñānaṃ viprakṛṣṭam aśeṣataḥ yena tasya kathaṃ nāma dharmajñatvaniṣedhanam    sarvānatīṃdriyān vetti sākṣāddharmamatīndriyam pramāteti vadannyāyam atikrāmati kevalaṃ    jñānaṃ prakarṣamāyāti paramaṃ kvacidātmani tāratamyādhirūḍhatvād ākāśe parimāṇavat    atra yady akṣavijñānaṃ tasya sādhyaṃ prabhāṣyate siddhasādhanam etat syāt parasyāpy evam iṣṭitaḥ    liṅgāgamādivijñānaṃ jñānasāmānyam eva vā tathā sādhyaṃ vadaṃs tena doṣaṃ pariharet katham    akramaṃ karaṇātītaṃ yadi jñānaṃ parisphuṭam dharmīṣyeta tadā pakṣasyāprasiddhaviśeṣyatā    svarūpāsiddhatā hetor āśrayāsiddhatāpi ca tan naitatsādhanaṃ samyag iti kecit pravādinaḥ    atra pracakṣmahe jñānasāmānyaṃ dharmi nāparam sarvārthagocaratvena prakarṣaṃ paramaṃ vrajet    iti sādhyam anicchantaṃ bhūtādiviṣayaṃ paraṃ codanājñānam anyad vā vādinaṃ prati nāstikam    na siddhasādhyataivaṃ syān nāprasiddhaviśeṣyatā pakṣasya nāpi doṣo    tac ca sarvārthavijñānaṃ punaḥ sāvaraṇaṃ mataṃ adṛṣṭatvād yathā cakṣus timirādibhir āvṛtaṃ    jñānasyāvaraṇaṃ yāti prakṣayaṃ paramaṃ kvacit prakṛṣyamāṇahānitvād dhemādau śyāmikādivat    tato 'nāvaraṇaṃ spaṣṭaṃ viprakṛṣṭārthagocaraṃ siddham akramavijñānaṃ sakalaṃkamahīyasām    tataḥ sātiśayā dṛṣṭāḥ prajñāmedhādibhir narāḥ bhūtādyaśeṣavijñānabhājaś cec codanābalāt    kin na kṣīṇāvṛtiḥ sūkṣmānarthān draṣṭuṃ kṣamaḥ sphuṭaṃ maṃdajñānānatikrāman nātiśete parān narān    laṅghanādikadṛṣṭāntaḥ svabhāvān na vilaṃghane nāvirbhāve svabhāvasya pratiṣedhaḥ kutaścana    svābhāvikī gatir na syāt prakṣīṇāśeṣakarmaṇaḥ kṣaṇād ūrddhvaṃ jagaccūḍāmaṇau vyomni mahīyasi    vīryāntarāyavicchedaviśeṣavaśatoparā bahudhā kena vāryeta niyataṃ vyomalaṅghanāt    tataḥ samantataś cakṣurindriyādyanapekṣiṇaḥ niḥśeṣadravyaparyāyaviṣayaṃ kevalaṃ sthitaṃ    ekatrātmani vijñānam ekam evaikadeti ye manyante tān prati prāha yugapaj jñānasambhavam    prācyam ekaṃ matijñānaṃ śrutibhedānapekṣayā pradhānaṃ kevalaṃ vā syād ekatra yugapan nari    dvedhā matiśrute syātāṃ te cāvadhiyute kvacit manaḥparyayajñāne vā trīṇi yena yute tathā    ācaturbhya iti vyāptavādo vacanataḥ punaḥ paṃcaikatra na vidyante jñānāny etāni jātucit    bhājyāni pravibhāgena sthāpyānīti nibuddhyatāṃ ekādīny ekadaikatrānupayogāni nānyathā    kṣāyopaśamikaṃ jñānaṃ sopayogaṃ kramād iti nārthasya vyāhatiḥ kācit kramajñānābhidhāyinaḥ    mopayogau saha syātām ity āryāḥ khyāpayanti ye darśanajñānarūpau tau na tu jñānātmakāv iti    jñānānāṃ sahabhāvāya teṣām etad viruddhyate kramabhāvi ca yaj jñānam iti yuktaṃ tato na tat    śabdasaṃsṛṣṭavijñānāpekṣayā vacanaṃ tathā yasmād uktaṃ tad evāryaiḥ syādvādanayasaṃsthitam    iti vyācakṣate ye tu teṣāṃ matyādivedanaṃ pramāṇaṃ tatra neṣṭaṃ syāt tataḥ sūtrasya bādhanam    caśabdāsaṃgrahāt tasya tadvirodho na cet katham tasya krameṇa janmeti labhyate vacanād vinā    bahvādyavagrahādīnām upadeśāt sahodbhavaḥ jñānānām iti cen naivaṃ sūtrārthānavabodhataḥ    bahuṣv artheṣu tatraiko vagrahādir itīṣyate tathā ca na bahūni syuḥ sahajñānāni jātucit    śaktyarpaṇāt tu tadbhāvaḥ saheti na virudhyate kathaṃcid akramodbhūtiḥ syādvādanyāyavedinām    śaṣkulībhakṣaṇādau tu rasādijñānapaṃcakam sakṛd eva tathā tatra pratīter iti yo vadet    tasya tatsmṛtayaḥ kin na saha syur aviśeṣataḥ tatra tādṛkṣasaṃvitteḥ kadācit kasyacit kvacit    sarvasya sarvadātve tadrasādijñānapaṃcakam sahopajāyate naiva smṛtivattatkramekṣaṇāt    kramajanma kvacid dṛṣṭvā smṛtīnām anumīyate sarvatra kramabhāvitvaṃ yady anyatrāpi tatsamaṃ    paṃcabhir vyavadhānaṃ tu śaṣkulībhakṣaṇādiṣu rasādivedaneṣu syād yathā tadvatsmṛtiṣv api    laghuvṛtter na vicchedaḥ smṛtīnām upalakṣyate yathā tathaiva rūpādijñānānām iti manyatām    asaṃkhyātaiḥ kṣaṇaiḥ padmapatradvitayabhedanam vicchinnaṃ sakṛd ābhāti yeṣāṃ bhrānteḥ kutaścana    paṃcaṣaiḥ samayais teṣāṃ kin na rūpādivedanam vicchinnam api bhātīhāvicchinnam iva vibhramāt    vyavasāyātmakaṃ cakṣurjñānaṃ gavi yadā tadā mataṅgajavikalpo 'pīty anayoḥ sakṛdudbhavaḥ    jñānodayasakṛjjanmaniṣedhe hanti cen na vai tayor api sahaivopayuktayor asti vedanam    yadopayujyate hy ātmā mataṅgajavikalpane tadā locanavijñānaṃ gavi mandopayogahṛt    tathā tatropayuktasya mataṅgajavikalpane pratīyanti svayaṃ sanno bhāvayanto viśeṣataḥ    samopayuktatā tatra kasyacit pratibhāti yā sāśu saṃcaraṇād dhānter gokuñjaravikalpavat    nanv aśvakalpanākāle godṛṣṭeḥ savikalpatām katham evaṃ prasādhyeta kvacit syādvādavedibhiḥ    saṃskārasmṛtihetur yā godṛṣṭiḥ savikalpikā sānyathā kṣaṇabhaṃgādi dṛṣṭivan na tathā bhavet    ity āśrayopayogāyāḥ savikalpatvasādhanaṃ netrālocanamātrasya nāpramāṇātmanaḥ sadā    godarśanopayogena sahabhāvaḥ kathaṃ na tu tadvijñāne 'sya yogasya nārthavyāghātakṛt tadā    ity acodyaṃ dṛśas tatrānupayuktatvasiddhitaḥ puṃso vikalpavijñānaṃ pratyevaṃ praṇidhānataḥ    sopayogaṃ punaś cakṣurdarśanaṃ prathamaṃ tataḥ cakṣurjñānaṃ śrutaṃ tasmāt tatrārthe 'nyatra ca kramāt    prādurbhavat karoty āśu vṛtyā saha janau dhiyaṃ yathā dṛgjñānayor nṛṇām iti siddhāntaniścayaḥ    atha jñānāpi paṃcāni vyākhyātāni prapaṃcataḥ kiṃ samyag eva mithyā vā sarvāṇy api kadācana    kānicid vā tathā puṃsā mithyāśaṃkānivṛttaye sveṣṭapakṣapakṣasiddhyarthaṃ matītyādy āha saṃprati    matyādayaḥ samākhyātāsta evety avadhāraṇāt saṃgṛhyete kadācin na manaḥparyāyakevale    niyamena tayoḥ samyagbhāvanirṇayataḥ sadā mithyātvakāraṇābhāvād viśuddhātmani sambhavāt    dṛṣṭicāritramohasya kṣaye vopaśame 'pi vā manaḥparyayavijñānaṃ bhavanmithyā na yujyate    sarvaghātikṣaye 'tyantaṃ kevalaṃ prabhavat katham mithyā saṃmbhāvyate jātu viśuddhiṃ paramaṃ dadhat    matiśrutāvadhijñānatrayaṃ tu syāt kadācana mithyeti te ca nirdiṣṭā viparyaya ihāṅginām    sa ca sāmānyato mithyājñānam atropavarṇyate saṃśayādivikalpānāṃ trayāṇāṃ saṃgṛhīyate    samuccinoti casteṣāṃ samyaktvaṃ vyāvahārikam mukhyaṃ ca tadanuktau tu teṣāṃ mithyātvam eva hi    te viparyaya eveti sūtre cen nāvadhāryate caśabdam antareṇāpi sadā samyaktvam attvataḥ    mithyājñānaviśeṣaḥ syād āsminpakṣe viparyayam saṃśayājñānabhedasya caśabdena samuccayaḥ    tatra tridhāpi mithyātvaṃ matijñāne pratīyate śrute ca dvividhaṃ bodhyam avadhau saṃśayād vinā    tasyendriyamanohetusamudbhūtiniyāmataḥ indriyānindriyājanyasvabhāvaś cāvadhiḥ smṛtaḥ    mithyātvaṃ triṣu bodheṣu dṛṣṭimohodayād bhaved teṣāṃ sāmānyatas tena sahabhāvāvirodhataḥ    yadā matyādayaḥ puṃsas tadā na syād viparyayaḥ sa yadā te tadā na syur ity etena nirākṛtam    viśeṣāpekṣayā hy eṣāṃ na viparyayarūpatā matyajñānādisaṃjñeṣu teṣu tasyāḥ prasiddhitaḥ    mithyātvodayasadbhāve tadviparyayarūpatā na yuktāgryādisaṃpāte jātyahemno yatheti cet    nāśrayasyānyathābhāvasamyakparidṛḍhe sati pariṇāme tadādheyasyānyathā bhāvadarśanāt    yathā sarajasālāmbūphalasya kaṭu kin na tat kṣiptasya payaso dṛṣṭaḥ kaṭubhāvas tathāvidhaḥ    tathātmano 'pi mithyātvapariṇāme satīṣyate matyādisaṃvidāṃ tādṛṅbhithyātvaṃ kasyacit sadā    na cedaṃ pariṇāmitvam ātmano na prasādhitam sarvasyāpariṇāmitve sattvasyaiva virodhataḥ    yato viparyayo na syāt pariṇāmaḥ kadācana matyādivedanākārapariṇāmanivṛttitaḥ    samānorthaparicchedaḥ sadduṣṭyarthaparicchidā kuto vijñāyate tredhā mithyādṛṣṭer viparyayaḥ    ity atra jñāpakaṃ hetuṃ sadṛṣṭāntaṃ pradarśayat sad ityādy āha saṃkṣepād viśeṣapratipattaye    nātrotpādavyayadhrauvyayuktaṃ sad iti vakṣyati tato 'nyad asad ity etatsāmarthyād avasīyate    aviśeṣas tayoḥ sadbhir aviveko vidhīyate sāṃkaryato hi tadvittis tathā vaiyatikaryyataḥ    pratipattir abhiprāyamātraṃ yad anibandhanaṃ sā yadṛkṣā tayā vittir upalabdhiḥ kathaṃcana    matyādayo 'tra varttante te viparyaya ity api hetor yathoditād atra sādhyate sadasattvayoḥ    svarṇe svarṇam iti jñānam asvarṇe svarṇam ity api svarṇe vāsvarṇam ity evam unmattasya kadācana    viparyayo yathā loke tad yadṛcchopalabdhitaḥ viśeṣābhāvatas tadvanmithyādṛṣṭer ghaṭādiṣu    sahacāryo vinirdiṣṭaḥ sahajaś ca viparyayaḥ prācyas tatra śrutājñānaṃ mithyāsamayasādhitam    matyajñānaṃ vibhaṅgaś ca sahajaḥ saṃpratīyate paropadeśanirmukteḥ śrutājñānaṃ ca kiṃcana    sati svarūpato 'śeṣe śūnyavādo viparyayaḥ grāhyagrāhakabhāvādau saṃvidadvaitavarṇanam    citrādvaitapravādaś ca puṃśabdādvaitavarṇanam bāhyartheṣu ca bhinneṣu vijñānāṃḍaprakalpanaṃ    bahir antaś ca vastūnāṃ sādṛśye vaisadṛśyavāk vaisadṛśye ca sādṛśyaikāntavādāvalambanam    dravye paryāyamātrasya paryāye dravyakalpanā taddvayātmani tadbhedavādo vācyatvavāg api    utpādavyayavādaś ca dhrauvye tadavalambanam janmapradhvaṃsayor evaṃ prativastu prabuddhyatām    pararūpāditośeṣe vastuny asati sarvathā sattvavādaḥ samāmnātaḥ parāhāryo viparyayaḥ    satyasattvaviparyāsād vaiparītyena kīrtitāt pratīyamānakaḥ sarvo 'sati sattvaviparyayaḥ    sati triviprakṛṣṭārthe saṃśayaḥ śrutigocare keṣāṃcid dṛśyamāne 'pi tattvopaplavavādinām    tathānadhyavasāyo 'pi keṣāṃcit sarvavedini tattve sarvatra vāggocarāhāryo 'vagamyatām    bahvādyavagrahādyeṣu catvāriṃśatsu vittiṣu kutaścin matibhedeṣu sahajaḥ syād viparyayaḥ    smṛtāv ananubhūtārthe smṛtisādharmyasādhanaḥ saṃjñāyām ekatājñānaṃ sādṛśyaḥ śrotradarśitaḥ    tathaikatve 'pi sādṛśyavijñānaṃ kasyacid bhavet sa visaṃvādataḥ siddhaś ciṃtāyāṃ liṅgaliṅginoḥ    hetvābhāsabalājñānaṃ liṅgini jñānam ucyate svārthānumāviparyāso bahudhā taddhiyāṃ mataḥ    hetvābhāsas tu sāmānyād ekaḥ sādhyāprasādhanaḥ yathā hetuḥ svasādhyenāvinābhāvī niveditaḥ    trividho 'sāvasiddhādibhedāt kaścid viniścitaḥ svarūpāśrayasaṃdigdhajñātāsiddhaś caturvidhaḥ    tatra svarūpato 'siddho vādinaḥ śūnyasādhane sarvo hetur yathā brahmatattvopaplavasādhane    sattvādiḥ sarvathā sādhye śabdabhaṃguratādike syādvādinaḥ kathaṃcin na sarvathaikāntavādinaḥ    śabdād vinaśvarād dhetusādhye cā'kṛtakādayaḥ hetavo 'siddhatāṃ yānti bauddhādeḥ prativādinaḥ    jainasya sarvathaikāntadhūmavattvādayo 'gniṣu sādhyeṣu hetavo 'siddhā parvatādau tathāgnitaḥ    śabdādau cākṣuṣatvādir ubhayāsiddha iṣyate niḥśeṣo 'pi yathā śūnyabrahmādvaitapravādinoḥ    samarthanavihīnaḥ syād asiddhaḥ prativādinaḥ hetor yasyāśrayo na syāt āśrayāsiddha eva saḥ    svasādhyenāvinābhāvābhāvād agamako mataḥ pratyakṣādeḥ pramāṇādeḥ saṃvāditvādayo yathā    śūnyopaplavaśabdādyadvaitavādāvalambināṃ saṃdehaviṣayaḥ sarvaḥ saṃdigdhāsiddha ucyate    tathāgamapramāṇatve rudroktatvādir āsthitaḥ sann apy ajñāyamāno 'trājñātāsiddho vibhāvyate    saugatāder yathā sarvaḥ sattvādisveṣṭasādhane na nirvikalpakādhyakṣād asti hetor viniścayaḥ    tatpṛṣṭhajād vikalpāc ca vastugocarataḥ kva saḥ anumānāntarād dhetuniścayo cānavasthitiḥ    parāparānumānānāṃ pūrvapūrvatravṛttitaḥ jñānaṃ jñānāntarādhyakṣaṃ vadato nena darśitaḥ    sarvo heturavijñāto 'navasthānāviśeṣataḥ arthāpattiparicchedyaṃ parokṣaṃ jñānam ādṛtāḥ    sarvaṃ ye te 'py anenoktā svājñātāsiddhahetavaḥ pratyakṣaṃ tu phalajñānam ātmānaṃ vā svasaṃvidam    prāṅbhayokaraṇājñānaṃ vyarthaṃ teṣāṃ niveditaṃ pradhānapariṇāmatvād acetanam itīritam    jñānaṃ yais te kathaṃ na syur ajñātāsiddhahetavaḥ pratijñārthaikadeśas tu svarūpāsiddha eva naḥ    śabdo nāsau vināśitvād ityādi sādhyasannibhaḥ yas sādhyaviparītārtho vyabhicārī suniścitaḥ   sa viruddho 'vaboddhavyas tathaiveṣṭavighātakṛt sattvādiḥ kṣaṇikatvādau yathā syādvādavidviṣāṃ    anekāntātmakatvasya niyamāt tena sādhanāt parārthyaṃ cakṣurādīnāṃ saṃhantavyaṃ prasādhayet    parasya pariṇāmitvaṃ tathetīṣṭavighātakṛt anusyūtamanīṣādisāmānyādini sādhayet    teṣāṃ dravyavivarttatvam evam iṣṭavighātakṛt viruddhān na ca bhinno 'sau svayam iṣṭād viparyaye    sāmarthyasyāviśeṣeṇa bhedavādiprasaṃgataḥ vivādādhyāsitaṃ dhīmaddhetukaṃ kṛtakatvataḥ    yathā śakaṭam ityādi viruddho tena darśitaḥ yathā hi buddhimatpūrvaṃ jagad etat prasādhayet    tathā buddhimato hetor anekatvaśarīritām svaśarīrasya karttātmā nāśarīro 'sti sarvathā    kārmaṇena śarīreṇānādisambandhasiddhitaḥ yataḥ sādhye śarīre sve dhīmato vyabhicāratā    jagatkarttuḥ prapadyeta tena hetoḥ kutārkikaḥ bodhyo 'naikāntiko hetuḥ sambhavān nānyathā tathā    saṃśītiṃ vidhivatsarvaḥ sādhāraṇatayā sthitaḥ śabdatvaśrāvaṇatvādi śabdādau pariṇāmini    sādhyahetus tato vṛtteḥ pakṣa eva suniścitaḥ saṃśītyāliṅgitāṅgas tu yaḥ sapakṣavipakṣayoḥ    pakṣe sa vartamānaḥ syād anaikāntikalakṣaṇaḥ tena sādhāraṇo nānyo hetvābhāsas tato 'sti naḥ    tasyānaikāntike samyagghetau vāntargatiḥ sthitiḥ prameyatvādir etena sarvasmin pariṇāmini    sādhye vastuni nirṇīto vyākhyātaḥ pratipadyatāṃ pakṣatritayahānis tu yasyānaikāntiko mataḥ    kevalavyatirekādis tasyānaikāntikaḥ kathaṃ vyaktātmanāṃ hi bhedānāṃ pariṇāmādisādhanam    ekaṃ kāraṇapūrvatve kevalavyatirekinaḥ kāraṇatrayapūrvatvāt kāryeṇānanvayāgateḥ    puruṣair vyabhicārīṣṭaṃ pradhānapuruṣair api vinā sapakṣasattvena gamakaṃ yasya sādhanam    anyathānupapannatvāt tasya sādhāraṇo mataḥ sādhye ca tadabhāve ca varttamāno viniścitaḥ    saṃśītyākrāntadeho vā hetuḥ kārtsnyaikadeśataḥ tatra kārtsnyena nirṇītas tāvatsādhyavipakṣayoḥ    yathā dravyaṃ nabhaḥ sattvād ityādiḥ kaścid īritaḥ viśvavedīśvaraḥ sarvajagatkartṛtvasiddhitaḥ    iti saṃśrayatas tatrāvinābhāvasya saṃśayāt sati hy aśeṣaveditve saṃdigdhā viśvakartṛtā    tadabhāve ca tan nāyaṃ gamako nyāyavedinām nityo rtho nirmūrttatvād iti syād ekadeśataḥ    sthitas tayor vinirdiṣṭaparo 'pīdṛk tadā tu kaḥ yatrārthe sādhayed ekaṃ dharmaṃ hetur vivakṣitam    tatrānyas tadviruddhaṃ ced viruddhyā vyabhicāry asau iti kecit tadaprāptam anekāntasya yuktitaḥ    samyagghetutvanirṇīter nityānityatvahetuvat sarvathaikāntavāde tu hetvābhāso 'yam iṣyate    sarvagatve parasmiṃśca jāteḥ khyāpitahetuvat sa ca sapratipakṣo 'tra kaścid uktaḥ paraiḥ punaḥ    anaikāntika eveti tato nāsya vibhinnatā sveṣṭadharmavihīnatve hetunānyena sādhyate    sādhyābhāve prayuktasya hetor nābhāvaniścayaḥ dharmiṇīti svayaṃ sādhyāsādhyayor vṛttisaṃśrayāt    nānaikāntikatā bādhyā tasya tallakṣaṇānvayāt yaḥ svapakṣasapakṣānyataravādaḥ svanādiṣu    nityatve bhaṃguratve vā proktaḥ prakaraṇe samaḥ so 'py anaikāntikān nānya ity anenaiva kīrtitam    svasādhye sati sambhūtiḥ saṃśayā saviśeṣataḥ kālātyayāpadiṣṭo 'pi sādhyamānena bādhite    yaḥ prayujyeta hetuḥ syāt sa no naikāntiko 'paraḥ sādhyābhāve pravṛtto hi pramāṇaiḥ kutracit svayam    sādhye hetur na nirṇīto vipakṣavinivarttanaḥ vipakṣe bādhake vṛtte samīcīno yathocyate    sādhyake sati kin na syāt tadā hāsas tathaiva saḥ sādhyābhāve pravṛttena kiṃ pramāṇena bādhyate    hetuḥ kiṃ vā tad etenety atra saṃśītisambhavaḥ sādhyasyābhāva evāyaṃ pravṛtta iti niścaye    viruddho hetur udbhāvyo 'tītakālo na cāparaḥ pramāṇabādhanaṃ nāma doṣaḥ pakṣasya vastutaḥ    kva tasya hetubhis trāṇo 'nutpannena tapohataḥ siddhe sādhye pravṛtto 'trākiṃcitkara itīritaḥ    kaiścid dhetur na saṃciṃtyaḥ syādvādanayaśālibhiḥ gṛhītagrahaṇāt tasyāpramāṇatvaṃ yadīṣyate    smṛtyāder apramāṇatvaṃ smṛtyādeś cet kathaṃ tu taiḥ siddhe rthe vartamānasya hetoḥ saṃvāditā na te    prayojanaviśeṣasya sadbhāvān mānatā yadi tadālpajñānavijñānaṃ hetoḥ kiṃ na prayojanam    pramāṇasaṃplavas tv evaṃ svayam iṣṭo virudhyate siddhe kutaścanārthe nyapramāṇasyāphalatvataḥ    mānenaikena siddhe rthe pramāṇāṃtaravartane yān avasthocyate sāpi nākāṃkṣākṣayataḥ sthiteḥ    sarāgapratipattṝṇāṃ svādṛṣṭatvamataḥ kvacit syād ākāṃkṣākṣayaḥ kāladeśādeḥ svanimittataḥ    vītarāgāḥ punaḥ svārthān vedanair aparāparaiḥ parikṣetraṃ pravartaṃte sadopekṣāparāyaṇā    pramāṇasaṃplave caivam adoṣe pratyupasthite gṛhītagrahaṇāt kva syāt kevalasyāpramāṇatā    tataḥ sarvapramāṇānām apūrvārthatvasannaye syād akiṃcitkaro hetvābhāso naivānyathārpaṇāt    tatrāpi kevalajñānaṃ nāpramāṇaṃ prasahyate sādyaparyavasānasya tasyāpūrvārthatā sthiteḥ    prādurbhūtikṣaṇād ūrdhvaṃ pariṇāmitvavicyutiḥ kevalasyaikarūpitvād iti codyaṃ na yuktimat    parāpareṇa kālena saṃbaṃdhāt pariṇāmi ca jñātṛtvenaikam eva hi    evaṃ vyākhyānaniḥśeṣahetvābhāsasamudbhavaṃ jñānaṃ svārthānumābhāsaṃ mithyādṛṣṭer viparyayaḥ    niyogo bhāvanaikāṃtād dhātvartho vidhir eva ca yatrārūḍhādivyartho ṝnyāpoho vā vacaso yadā    kaiścin manyeta tajjñānaṃ śrutābhaṃ vedanaṃ tadā tathā vākyārthanirṇīter vidhātuṃ duḥśakatvataḥ    pratyayārtho niyogaś ca yataḥ śuddhaṃ pratīyate kāryarūpaś ca tenātra śuddhaṃ kāryam asau yataḥ    viśeṣaṇaṃ tu yat tasya kiṃcid anyatpratīyate pratyayārtho na tadyuktaḥ dhātvarthaḥ svargakāmavat    prerakatvaṃ tu yat tasya viśeṣaṇam iheṣyate tasyāpratyayavācyatvāt śuddhe kārye niyogatā    preraṇaiva niyogo tra śuddhā sarvatra gamyate nāprerito yataḥ kaścin niyuktaṃ svaṃ prabudhyate    mamedaṃ kāryam ity evaṃ jñānaṃ pūrvaṃ yadā bhavet svasiddhyai prerakaṃ tat syād anyathā tan na siddhyati    preryate puruṣo naiva kāryeṇeha vinā kvacit tataś cet preraṇā proktā niyogaḥ kāryasaṃgatā    preraṇāviṣayaḥ kāryaṃ na tu tatprerakaṃ svataḥ vyāpāras tu pramāṇasya prameya upacaryate    preraṇā hi vinā kāryaṃ prerikā naiva kasyacit kāryapreraṇayor yogo niyogas tena sammataḥ    parasparāvinābhūtaṃ dvayam etat pratīyate niyogaḥ samudāyo smāt kāryapreraṇayor mataḥ    siddham ekaṃ yato brahmagatam āmnāyataḥ sadā siddhatvena ca tatkāryaṃ prerakaṃ kuta eva tat    kāmī yatraiva yaḥ kaścin niyoge sati tatra saḥ viṣayārūḍham ātmānaṃ manyamānaḥ pravartate    mamedaṃ bhogyam ity evaṃ bhogyarūpaṃ pratīyate mamatvena ca vijñānaṃ bhoktary eva vyavasthitam    svāmitvenābhimāno hi bhoktur yatra bhaved ayaṃ bhogyaṃ tad eva vijñeyaṃ tad evaṃ svaṃ nirucyate    sādhyarūpatayā yena mamedam iti gamyate tatprasādhyena rūpeṇa bhogyaṃ svaṃ vyapadiśyate    siddharūpaṃ hi yad bhogyaṃ na niyogaḥ sa tāvatā sādhyatveneha bhogyasya prerakatvān niyogatā    mamedaṃ kāryam ity evaṃ manyate puruṣaḥ sadā puṃsaḥ kāryaviśiṣṭatvaṃ niyogaḥ syād abādhitaḥ    kāryasya siddhau jātāyāṃ tad yuktaḥ puruṣaḥ sadā bhavet sādhita ity evaṃ pumān vākyārtha ucyate    pramāṇaṃ kiṃ niyogaḥ syāt prameyam athavā punaḥ ubhayena vihīno vā dvayarūpo thavā punaḥ    śabdavyāpārarūpo vā vyāpāraḥ puruṣasya vā dvayavyāpārarūpo vā dvayāvyāpāra eva vā    bhavaṃ pratītya yo jāto guṇaṃ vā prāṇinām iha deśāvadhiḥ sa vijñeyo dṛṣṭimohād viparyayaḥ  a  satsaṃyamaviśeṣottho na jātu paramāvadhiḥ sarvāvadhir api vyasto manaḥparyayabodhavat    iti pramāṇātmavibodhasaṃvidhau viparyayajñānam anekadhoditam  vipakṣavikṣepamukhena nirṇayaḥ subodharūpeṇa vidhātum udyataḥ    nirdeśyādhigamopāyaṃ pramāṇam adhunā nayān nayair adhigametyādi prāha saṃkṣepato khilān    sāmānyādeśatas tāvad eka eva nayaḥ sthitaḥ syādvādapravibhaktārthaviśeṣavyaṃjanātmakaḥ    saṃkṣepād dvau viśeṣeṇa dravyaparyāyagocarau dravyārtho vyavahārāṃtaḥ paryāyārthas tato paraḥ    vistareṇeti saptaite vijñeyā naigamādayaḥ tathātivistareṇaitadbhedāḥ saṃkhyātavigrahāḥ    nayo nayau nayāś ceti vākyabhedena yojitāḥ naigamādaya ity evaṃ sarvasaṃkhyābhisūcanāt    nayānāṃ lakṣaṇaṃ lakṣyaṃ tatsāmānyaviśeṣataḥ nīyate gamyate yena śrutārthāṃśo nayo hi saḥ    tadaṃśau dravyaparyāyalakṣaṇau sādhyapakṣiṇau nīyete tu yakābhyāṃ tau nayāv iti viniścitau    guṇaḥ paryāya evātra sahabhāvī vibhāvitaḥ iti tadgocaro nānyas tṛtīyo sti guṇārthikaḥ    pramāṇagocarārthāṃśā nīyaṃte yair anekadhā te nayā iti vyākhyātā jātā mūlanayadvayāt    dravyaparyāyasāmānyaviśeṣaparibodhikāḥ na mūlaṃ naigamādīnāṃ nayāś catvāra eva tat    sāmānyasya pṛthaktvena dravyād anupapattitaḥ sādṛśyapariṇāmasya tathā vyaṃjanaparyayāt    vaisadṛśyavivartasya viśeṣasya ca paryaye aṃtarbhāvād vibhāvyeta dvau tanmūlaṃ nayāv iti    nāmādayo pi catvāras tanmūlaṃ nety ato gataṃ dravyakṣetrādayaś caiṣāṃ dravyaparyāyagatvataḥ    bhāvānvitā na paṃcaite skaṃdhā vā parikīrtitāḥ rūpādayo ta eveha te pi hi dravyaparyayau    tathā dravyaguṇādīnāṃ ṣoḍhātvaṃ na vyavasthitaṃ ṣaṭ syur mūlanayā yena dravyaparyāyagrāhite    ye pramāṇādayo bhāvā pradhānādaya eva vā te naigamādibhedānām arthā nāparanītayaḥ    tatra saṃkalpamātrasya grāhako naigamo nayaḥ sopādhir ity aśuddhasya dravyārthasyābhidhānataḥ    saṃkalpo nigamas tatra bhavo yaṃ tatprayojanaḥ tathā prasthādisaṃkalpaḥ tadabhiprāya iṣyate    nanv ayaṃ bhāvinīṃ saṃjñāṃ samāśrityopacaryate aprasthādiṣu tadbhāvas taṃḍuleṣv odanādivat    ity asadbahirartheṣu tathānadhyavasānataḥ svavedyamānasaṃkalpe saty evāsya pravṛttitaḥ    yad vā naikaṃ gamo yotra sa satāṃ naigamo mataḥ dharmayor dharmiṇo vāpi vivakṣā dharmadharmiṇoḥ    pramāṇātmaka evāyam ubhayagrāhakatvataḥ ity ayuktaṃ iha jñapteḥ pradhānaguṇabhāvataḥ    prādhānye nobhayātmānam arthaṃ gṛhṇaddvivedanam pramāṇaṃ nānyad ity etatprapaṃcena niveditam    saṃgrahe vyavahāre vā nāṃtarbhāvaḥ samīkṣyate naigamasya tayor ekavastvaṃśapravaṇatvataḥ    narjusūtrādiṣu proktahetavo veti ṣaṇnayāḥ saṃgrahādaya eveha na vācyāḥ praparīkṣakaiḥ    saptaite niyataṃ yuktā naigamasya nayatvataḥ tasya tribhedavyākhyānāt kaiścid uktā nayā nava    tatra paryāyagas tredhā naigamo dravyago dvidhā dravyaparyāyagaḥ proktaś caturbhedo dhruvaṃ dhruvaiḥ    arthaparyāyayos tāvad guṇamukhyasvabhāvataḥ kvacid vastuny abhiprāyaḥ pratipattuḥ prajāyate    yathā pratikṣaṇaṃ dhvaṃsi sukhasaṃviccharīriṇaḥ iti sattārthaparyāyo viśeṣaṇatayā guṇaḥ    saṃvedanārthaparyāyo viśeṣyatvena mukhyatām pratigacchann abhipreto nānyathaivaṃ vacogatiḥ    sarvathā sukhasaṃvittyor nānātve bhimatiḥ punaḥ svāśrayā cārthaparyāyanaigamābho pratītitaḥ    kaścid vyaṃjanaparyāyo viṣayīkurute ṃjasā guṇapradhānabhāvena dharmiṇy ekatra naigamaḥ    saccaitanyaṃ narīty evaṃ sattvasya guṇabhāvataḥ pradhānabhāvataś cāpi caitanyasyābhisiddhitaḥ    tayor atyaṃtabhedoktir anyonyaṃ svāśrayād api jñeyo vyaṃjanaparyāyanaigamābho virodhataḥ    arthavyaṃjanaparyāyau gocarīkurute paraḥ dhārmike sukhajīvitvam ity evam anurodhataḥ    bhinne tu sukhajīvatve yo bhimanyeta sarvathā so rthavyaṃjanaparyāyanaigamābhāsa eva naḥ    śuddhadravyam aśuddhaṃ ca tathābhipraiti yo nayaḥ sa tu naigama eveha saṃgrahavyavahārajaḥ    saddravyaṃ sakalaṃ vastu tathānvayaviniścayāt ity evam avagaṃtavyas tadbhedoktis tu durnayaḥ    yastu paryāyavaddravyaṃ guṇavad veti nirṇayaḥ vyavahāranayāj jātaḥ so 'śuddhadravyanaigamaḥ    tadbhedaikāṃtavādas tu tadābhāso numanyate tathokter bahir aṃtaś ca pratyakṣādivirodhataḥ    śuddhadravyārthaparyāyanaigamo sti paro yathā satsukhaṃ kṣaṇikaṃ śuddhaṃ saṃsāre sminn itīraṇam    sattvaṃ sukhārthaparyāyād bhinnam eveti saṃmatiḥ durnītiḥ syāt sabādhatvād iti nītivido viduḥ    kṣaṇam ekaṃ sukhī jīvo viṣayīti viniścayaḥ vinirdiṣṭo rthaparyāyāśuddhadravyaganaigamaḥ    sukhajīvabhidoktis tu sarvathā mānabādhitā durnītir eva boddhavyā śuddhabodhair asaṃśayāt    gocarīkurute śuddhadravyavyaṃjanaparyayau naigamo nyo yathā saccitsāmānyam iti nirṇayaḥ    vidyate cāparośuddhadravyabyaṃjanaparyayau arthīkaroti yaḥ so tra nāguṇīti nigadyate    bhidābhidābhir atyaṃtaṃ pratīter apalāpataḥ pūrvavannaigamābhāsau pratyetavyau tayor api    navadhā naigamasyaivaṃ khyāteḥ paṃcadaśoditāḥ nayāḥ pratītim ārūḍhāḥ saṃgrahādinayaiḥ saha    ekatvena viśeṣāṇāṃ grahaṇaṃ saṃgraho nayaḥ sajāter avirodhena dṛṣṭeṣṭābhyāṃ kathaṃcana    samekībhāvasamyaktve vartamāno hi gṛhyate niruktyā lakṣaṇaṃ tasya tathā sati vibhāvyate    śuddhadravyam abhipraiti sanmātraṃ saṃgrahaḥ paraḥ sa cāśeṣaviśeṣeṣu sadaudāsīnyabhāg iha    nirākṛtaviśeṣas tu sattādvaitaparāyaṇaḥ tadābhāsaḥ samākhyātaḥ sadbhir dṛṣṭeṣṭabādhanāt    abhinnaṃ vyaktibhedebhyaḥ sarvathā bahudhānakaṃ mahāsāmānyam ity uktiḥ keṣāṃcid durnayas tathā    śabdabrahmeti cānyeṣāṃ puruṣādvaitam ity api saṃvedanād vayaṃ ceti prāyaśo nyatra darśitam    dravyatvaṃ sakaladravyavyāpy abhipraiti cāparaḥ paryāyatvaṃ ca niḥśeṣaparyāyavyāpisaṃgrahaḥ    tathaivāvāṃtarān bhedān saṃgṛhyaikatvato bahuḥ vartate yaṃ nayaḥ samyak pratipakṣānirākṛteḥ    svavyaktyātmam anaikāṃtas tadābhāso py anekadhā pratītibādhito bodhyo niḥśeṣo py anayā diśā    saṃgraheṇa gṛhītānām arthānāṃ vidhipūrvakaḥ yo vahāro vibhāgaḥ syād vyavahāro nayaḥ smṛtaḥ    sa cānekaprakāraḥ syād uttaraḥ parasaṃgrahāt yat sat tad dravyaparyāyāv iti prāgṛjusūtrataḥ    kalpanāropitadravyaparyāyapravibhāgabhāk pramāṇabādhito nyas tu tadābhāso 'vasīyatām    ṛjusūtraṃ kṣaṇadhvaṃsi vastu sat sūtrayed ṛju prādhānyena guṇībhāvād dravyasyānarpaṇāt sataḥ    nirākaroti yad dravyaṃ bahir aṃtaś ca sarvathā sa tadābho 'bhimaṃtavyaḥ pratīter apalāpataḥ    kāryakāraṇatā ceti grāhyagrāhakatāpi vā vācyavācakatā ceti kvārthasādhanadūṣaṇaṃ    lokasaṃvṛttisatyaṃ ca satyaṃ ca paramārthataḥ kvaivaṃ siddhyed yadāśritya buddhānāṃ dharmadeśanā    sāmānādhikaraṇyaṃ kva viśeṣaṇaviśeṣyatā sādhyasādhanabhāvo vā kvādhārādheyatāpi ca    saṃyogo viprayogo vā kriyākāraṇasaṃsthitiḥ sādṛśyaṃ vaisadṛśyaṃ vā svasaṃtānetarasthitiḥ    samudāyaḥ kva ca pretyabhāvādi dravyanihnave baṃdhamokṣavyavasthā vā sarvatheṣṭā'prasiddhitaḥ    kālādibhedato rthasya bhedaṃ yaḥ pratipādayet so tra śabdanayaḥ śabdapradhānatvād udāhṛtaḥ    viśvadṛśvāsya janitā sūnur ity ekam ādṛtāḥ padārthaṃ kālabhede pi vyavahārānurodhataḥ    karoti kriyate puṣyastārakā yoṃbha ity api kārakavyaktisaṃkhyānāṃ bhede pi ca pare janāḥ    ehi manye rathenetyādikasādhanabhidy api saṃtiṣṭhetāvatiṣṭhetetyādyupagrahabhedane    tan na śreyaḥ parīkṣāyām iti śabdaḥ prakāśayet kālādibhedane py arthābhedane tiprasaṃgataḥ    tathā kālādinānātvakalpanaṃ niḥprayojanam siddhaṃ kālādinaikena kāryasyeṣṭasya tattvataḥ    kālādyanyatamasyaiva kalpanaṃ tair vidhīyatāṃ yeṣāṃ kālādibhede pi padārthaikatvaniścayaḥ    śabdaḥ kālādibhir bhinnābhinnārthapratipādakaḥ kālādibhinnaśabdatvāt tādṛksiddhānyaśabdavat    paryāyaśabdabhedena bhinnārthasyādhirohaṇāt nayaḥ samabhirūḍhaḥ syāt pūrvavac cāsya niścayaḥ    iṃdraḥ puraṃdaraḥ śakra ityādyā bhinnagocarāḥ śabdā vibhinnaśabdatvād vājivāraṇaśabdavat    tatkriyāpariṇām orthas tathaiveti viniścayāt evaṃbhūtena nīyeta kriyāṃtaraparāṅmukhaḥ    yo yaṃ kriyārtham ācaṣṭe nāsāv anyatkriyaṃ dhvaniḥ paṭhatītyādiśabdānāṃ pāṭhādyarthatvasaṃjanāt    ito nyonyam apekṣāyāṃ saṃtaḥ śabdād ayo nayāḥ nirapekṣāḥ punas te syus tadābhāsāvirodhataḥ    tatrarjusūtraparyaṃtāś catvāro rthanayā matāḥ trayaḥ śabdanayāḥ śeṣāḥ śabdavācyārthagocarāḥ    pūrvapūrvo nayo bhūmaviṣayaḥ kāraṇātmakaḥ paraḥ paraḥ punaḥ sūkṣmagocaro hetumān iha    sanmātraviṣayatvena saṃgrahasya na yujyate mahāviṣayatābhāvābhāvārthān naigamān nayāt    yathā hi sati saṃkalpas tathaivāsati vedyate tatra pravartamānasya naigamasya mahārthatā    saṃgrahād vyavahāro pi sadviśeṣāvabodhakaḥ na bhūmaviṣayo śeṣasatsamūhopadarśitaḥ    narjusūtraprabhūtārtho vartamānārthagocaraḥ kālatritayavṛttyarthagocarād vyavahārataḥ    kālādibhedato py artham abhinnam upagacchataḥ narjusūtrān mahārtho tra śabdas tadviparītavat    śabdāt paryāyabhedenābhinnam artham abhīpsinaḥ na syāt samabhirūḍho pi mahārthas tadviparyayaḥ    kriyābhede pi cābhinnam artham abhyupagacchataḥ naivaṃbhūtaḥ prabhūtārtho nayaḥ samabhirūḍhataḥ    naigamāprātikūlyena na saṃgrahaḥ pravartate tābhyāṃ vācyam ihābhīṣṭā saptabhaṃgīvibhāgataḥ    naigamavyavahārābhyāṃ viruddhābhyāṃ tathaiva sā sā naigamarjusūtrābhyāṃ tādṛgbhyām avigānataḥ    sā śabdān nigamād anyād yuktāt samabhirūḍhataḥ saivaṃbhūtāc ca sā jñeyā vidhānapratiṣedhagā    saṃgrahādeś ca śeṣeṇa pratipakṣeṇa gamyatām tathaiva vyāpinī saptabhaṃgī nayavidāṃ matā    viśeṣair uttaraiḥ sarvair nayānām uditātmanām parasparaviruddhārthair dvaṃdvavṛtter yathāyatham    pratyeyā pratiparyāyam aviruddhā tathaiva sā pramāṇasaptabhaṃgī ca tāṃ vinā nābhivāggatiḥ    sarve śabdanayās tena parārthapratipādane svārthaprakāśane mātur ime jñānanayāḥ sthitāḥ    vai nīyamānavastvaṃśāḥ kathyaṃte 'rthanayāś ca te traividhyaṃ vyavatiṣṭhaṃte pradhānaguṇabhāvataḥ    yatra pravartate svārthe niyamād uttaro nayaḥ pūrvapūrvo nayas tatra vartamāno na vāryate    sahasraṃ ca śatī yadvat tasyāṃ paṃcaśatī matā pūrvasaṃkhyottaratvābhyāṃ saṃkhyāyām avirodhataḥ    pūrvatra nottarā saṃkhyā yathāyātānuvartyate tathottaranayaḥ pūrvanayārthasakale sadā    nayārtheṣu pramāṇasya vṛttiḥ sakaladeśinaḥ bhaven na tu pramāṇārthe nayānām akhileṣu sā    saṃkṣepeṇa nayās tāvadvyākhyātās tatra sūcitāḥ tadviśeṣāḥ prapaṃcena saṃciṃtyā nayacakrataḥ    tattvārthādhigamabhedaḥ  tattvārthādhigamas tāvat pramāṇanayato mataḥ sarvaḥ svarthaḥ parārtho vā sitaḥ    parārthādhigamas tatrānudbhavadrāgagocaraḥ jigīṣugocaraś ceti dvidhā śuddhadhiyo viduḥ    satyavāgbhir vidhātavyaḥ prathamas tattvavedibhiḥ yathā kathaṃcid ity eṣa caturaṃgo na saṃmataḥ    pravakrājñāpyamānasya prasabhajñānapekṣayā tattvārthādhigamaṃ kartuṃ samartho    viśrutaḥ svayaṃ prabhuḥ tādṛśānyabhasāmītā bhāve pi pratibodhakaḥ    sābhimānajanārabhyaś caturaṃgo niveditaḥ tajjñair anyatamāpāye py arthāparisamāptitaḥ    jigīṣadbhyāṃ vinā tāvan na vivādaḥ pravartate tābhyām eva jayo nyonyaṃ vidhātuṃ na ca śakyate    vādino sparddhayā vṛddhir abhimānaḥ pravṛddhitaḥ siddhe vātrākalaṃkasya mahato nyāyavedinaḥ    svaprajāparipākādiprayojaneti kecana teṣām api vinā mānād dvayor yadi sa saṃmataḥ    tayor anyatamasya syād abhimānaḥ kadācana tannivṛttyartham eveṣṭaṃ sabhyāpekṣaṇam atra cet    rājāpekṣaṇam apy astu tathaiva caturaṃgatā vādasya bhāvinīm iṣṭām apekṣāṃ vijigīṣatām    sabhyair anumataṃ tattvajñānaṃ dṛḍhataraṃ bhavet iti te vītarāgābhyām apekṣā tata eva cet    tac cen maheśvarasyāpi svaśiṣyapratipādane sabhyāpekṣaṇam apy astu vyākhyāne ca bhavādṛśāṃ    svayaṃ maheśvaraḥ sabhyo madhyasthas tattvavittvataḥ pravaktā ca vineyānāṃ tattvakhyāpanato yadi    tadānyo pi pravaktaivaṃ bhaved iti vṛthā tava prāśnikāpekṣaṇaṃ vā    yathā caikaḥ pravaktā ca madhyasthobhyupagamyate tathā sabhāpatiḥ kiṃ na pratipādyaḥ sa eva te    maryād ātikramābhāvahetutvād bodhyaśaktitaḥ prasiddhaprabhavā tādṛgvineyajanavaddhruvam    svayaṃ buddhaḥ pravaktā syāt bodhyasaṃdigdhadhīr iha tayoḥ kathaṃ sahaikatra sadbhāva iti cākulaṃ    prāśnikatvapravaktṛtvasadbhāvasyāpi hānitaḥ svapakṣarāgaudāsīnavirodhasyānivāraṇāt    pūrvaṃ vaktā budhaḥ paścāt sabhyo na vyāhato yadi tadā prabodhako bodhyas tathaiva na virudhyate    vaktṛvākyānuvaktādi svasya syāt pratipādakaḥ tadarthaṃ budhyamānas tu pratipādyo na manyatām    tathaikāṃgo pi vādaḥ syāc caturaṃgo viśeṣataḥ pṛthak sabhyādibhedānām anapekṣāc ca sarvadā    yathā vādyādayo loke dṛśyaṃte te nyabhedinaḥ tathā nyāyavidām iṣṭā vyavahāreṣu te yadi    tadabhāvāt svayaṃ vaktuḥ sabhyā bhinnā bhavaṃtu te sabhāpatiś ca tadbodhyajanavaṃtaś ca neṣyate    jigīṣāvirahāt tasya tattvaṃ bodhayato janān na sabhyādipratīkṣāsti yadi vāde kva sā bhavet    tato vādo jigīṣāyāṃ vādinoḥ saṃpravartate sabhyāpekṣaṇato jalpavitaṃḍāvad iti sphuṭaṃ    tadapekṣā ca tatrāsti jayetaravidhānataḥ tadvad evānyathā tatra sā na syād aviśeṣataḥ    siddho jigīṣato vādaś caturaṃgas tathā sati svābhipretavyavasthānāl lokaprakhyātavādavat    maryādātikramaṃ leke yathā haṃti mahīpatiḥ tathā śāstre py ahaṃkāragras tayor vādinoḥ kvacit    vādinor vādanaṃ vādaḥ samarthe hi sabhāpatau samarthayoḥ samartheṣu prāśnikeṣu pravartate    sāmarthyaṃ punar īśasya śaktitrayam udāhṛtam yena svamaṃḍalasyājñā vidheyatvaṃ prasiddhyati    maṃtraśaktyā prabhus tāvat svalokān samayān api dharmanyāyena saṃrakṣed viplavāt sādhusāt sudhīḥ    prabhusāmarthyato vāpi durlaṃghyātmabalair api svotsāhaśaktito vāpi daṃḍaṃ nītividāṃvaraḥ    rāgadveṣavihīnatvaṃ vādini prativādini nyāye 'nyāye ca tadvattvaṃ sāmarthyaṃ prāśnikeṣv adaḥ    siddhāṃtadvayaveditvaṃ proktārthagrahaṇatvatā pratibhādiguṇatvaṃ ca tattvanirṇayakāritā    jayetaravyavasthāyām anyathānadhikāratā sabhyānām ātmanaḥ patyur yaśo dharmaṃ ca vāṃchataḥ    kumāranaṃdinaś cāhur vādanyāyavicakṣaṇāḥ rājaprāśnikasāmarthyam evaṃbhūtam asaṃśayam    ekataḥ kārayet sabhyān vādinām ekataḥ prabhuḥ paścād abhyarṇakān vīkṣya pramāṇaguṇadoṣayoḥ    laukikārthavicāreṣu na tathā prāśnikā yathā śāstrīyārthavicāreṣu vā tajjñāḥ prāśnikā yathā    satyasādhanasāmarthyasaṃprakāśanapāṭavaḥ vādyajeyo vijetā no sadonmādena kevalam   iti samarthasādhanākhyānaṃ sāmarthyaṃ vādino mataṃ sā tv avaśyaṃ ca sāmarthyād anyathānupapannatā    saddoṣodbhāvanaṃ vāpi sāmarthyaṃ prativādinaḥ dūṣaṇasya ca sāmarthyaṃ pratipakṣavighātitā    sā pakṣāṃtarasiddhir vā sādhanāśaktitāpi vā hetor viruddhatā yadvadabhāsāṃtaratāpi ca    ity ābhimānikaḥ proktas tāttvikaḥ prātibho pi vā samarthāvacanaṃ vādaś caturaṃgo jigīṣatoḥ    dviprakāraṃ jagau jalpaṃ tattvaprātibhagocaram triṣaṣṭer vādināṃ jetā śrīdatto jalpanirṇaye    tatreha tāttvike vāde 'kalaṃkaiḥ kathito jayaḥ svapakṣasiddhir ekasya nigraho nyasya vādinaḥ    svapakṣasiddhiparyaṃtā śāstrīyārthavicāraṇā vastvāśrayatvato yadvallaukikārthe vicāraṇā    jijñāsitaviśeṣo tra dharmī pakṣo na yujyate tasyāsaṃbhavadoṣeṇa bādhitatvāt khapuṣpavat    kvacit sādhyaviśeṣaṃ hi na vādī pratipitsate svayaṃ viniścitārthasya parabodhāya vṛttitaḥ    pravṛttivādī tasyaiva pratikṣepāya vartanāt jijñāsitena sabhyāś ca siddhāṃtadvayavedinaḥ    svārthānumāne vādye ca jijñāsiteti cen mataṃ vāde tasyādhikāraḥ syāt parapratyayanādṛte    jijñāpayitātmeha dharmī pakṣo yadīṣyate lakṣaṇadvayam āyātaṃ pakṣasya graṃthaghātine    tathānuṣṇo gnir ityādiḥ pratyakṣādinirākṛtaḥ svapakṣaṃ syād ativyāpi nedaṃ pakṣasya lakṣaṇaṃ    liṃgāt sādhayituṃ śakyo viśeṣo yasya dharmiṇaḥ sa eva pakṣa iti cet vṛthā dharmaviśeṣavāk    liṃgaṃ yenāvinābhāvi so rthaḥ sādhyo vadhāryate na ca dharmī tathābhūtaḥ sarvatrānanvayātmakaḥ    na dharmī kevalaḥ sādhyo na dharmaḥ siddhyasaṃbhavāt samudāyas tu sādhyeta yadi saṃvyavahāribhiḥ    tadā tatsamudāyasya svāśrayeṇa vinā sadā saṃbhavābhāvataḥ so pi tadviśiṣṭaḥ prasādhyatām    tadviśeṣo pi so nyena svāśrayeṇeti na kvacit sādhyavyavasthitir mūḍhacetasām ātmavidviṣām    vināpi tena liṃgasya bhāvāt tasya na sādhyatā tato napekṣatety etad anukūlaṃ samācaret    dharmiṇāpi vinā bhāvāt kvacil liṃgasya pakṣatā tasya mā bhūt tataḥ siddhaḥ pakṣaḥ sādhanagocaraḥ    sabhyapratyāyanaṃ tasya siddhiḥ syādvādino thavā prativādina ity eṣa nigraho nyatarasya tu    asādhanāṃgavacanam adoṣodbhāvanaṃ dvayoḥ nigrahasthānam anyat tan na yuktam iti kecana    svapakṣaṃ sādhayan tatra tayor eko jayed yadi tūṣṇībhūtaṃ bruvāṇaṃ vā yat kiṃcit tat samaṃjasam    tatsādhanavacaḥ pakṣo mataḥ sādhanavādinaḥ saddūṣaṇābhidhānaṃ tu svapakṣaḥ prativādinaḥ    ity ayuktaṃ dvayor ekaviṣayatvānavasthiteḥ svapakṣapratipakṣatvāsaṃbhavād bhinnapakṣavat    vastuny ekatra vartete tayoḥ sādhanadūṣaṇe tena tadvacasor yuktā svapakṣetaratā yadi    tadā vāstavapakṣaḥ syāt sādhyamānaṃ kathaṃcana dūṣyamāṇaṃ ca niḥśaṃkaṃ tadvādiprativādinoḥ    pakṣasiddhyavinābhāvi sādhanāvacanaṃ tataḥ nigraho vādinaḥ siddhaḥ svapakṣe prativādini    viruddhasādhanodbhāvī prativādītaraṃ jayet tathā svapakṣasaṃsiddher vidhānaṃ tena tattvataḥ    sveṣṭārthasiddhir aṃgasya tryaṃśahetor abhāṣaṇaṃ tasyāsamarthanaṃ cāpi vādino nigraho yathā    paṃcāvayavaliṃgasyābhāṣaṇaṃ na tathaiva kim tasyāsamarthanaṃ cāpi sarvathāpy aviśeṣataḥ    sāmarthyād gamyamānasya nigamasya vaco yathā pakṣadharmopasaṃhāravacanaṃ ca tathā phalam    tasyāsiddhatvavicchittiḥ phalaṃ hetor yathā tathā nigamasya pratijñānādyekārthatvopadarśanam    pratijñāto rthasiddhau syād dhetvādivacanaṃ vṛthā nānyathā sādhanāṃgatvaṃ tasyā iti yathaiva tat    tattvārthaniścaye hetor dṛṣṭāṃto 'narthako na kim  satye ca sādhane prokte vādinā prativādinaḥ doṣānutsādhane na syān nakāro vitathe pi vā    prācye pakṣe kalaṃkoktir dvitīye lokabādhitā dvayor hi pakṣasaṃsiddhyabhāve kasya vinigrahaḥ    atrānye prāhur iṣṭaṃ nas tathā nigrahaṇaṃ dvayoḥ tattvajñānoktisāmarthyaśūnyatvasyāviśeṣataḥ    yathopāttāparijñānaṃ sādhanābhāsavādinaḥ tathā saddūṣaṇājñānaṃ doṣānudbhāvinaḥ samaṃ    jānato pi sabhātīte hanyato vā kutaścana doṣānudbhāvanaṃ yadvatsādhanābhāsavāk tathā    doṣānudbhāvane tu syādvādinā prativādite parasya nigrahas tena nirākaraṇataḥ sphuṭam    anyonyaśaktinirghātāpekṣayā hi jayetaraḥ vyavasthā vādinoḥ siddhāḥ nānyathātiprasaṃgataḥ    ity etaddurvidagdhatve ceṣṭitaṃ prakaṭaṃ na tu vādinaḥ kīrtikāri syād evaṃ mādhyasthahānitaḥ    doṣānudbhāvanākhyānād yathā paranirākṛtiḥ tathaiva vādinaḥ svasya dṛṣṭavān kā tiraskṛtiḥ    doṃṣānudbhāvanād ekaṃ na kurvaṃti sabhāsadaḥ sādhanānuktito nānyam ity aho te 'tisajjanāḥ    pakṣasiddhivihīnatvād ekasyātra parājaye parasyāpi na kiṃ na syāj jayo py anyatarasya tu    tathā caikasya yugapat syātāṃ jayaparājayau pakṣasiddhītarātmatvāt tayoḥ sarvatra lokavat    tadekasya pareṇeha nirākaraṇam eva naḥ parājayo vicāreṣu pakṣāsiddhis tu sā kva nuḥ    parājayapratiṣṭhānam apekṣya pratiyogināṃ loke hi dṛśyate yādṛk siddhaṃ śāstre pi tādṛśam    siddhyabhāvaḥ punardṛṣṭaḥ saty api pratiyogini sādhanābhāvataḥ śūnye saty api ca sa jātucit    tannirākṛtisāmarthyaśūnye vādam akurvati parājayas tatas tasya prāpta ity apare viduḥ    tatredaṃ ciṃtyate tāvat tannirākaraṇaṃ kimu nirmukhīkaraṇaṃ kiṃ vā vāgbhis tattattvadūṣaṇam    nātrādikalpanā yuktā parānugrāhiṇāṃ satāṃ nirmukhīkaraṇāvṛtter bodhisattvādivat kvacit    dvitīyakalpanāyāṃ tu pakṣasiddhiḥ parājayaḥ sarvasya vacanais tattvadūṣaṇe pratiyoginām    siddhyabhāvas tu yoginām asati pratiyogini sādhanābhāvas tatra kathaṃ vāde parājayaḥ    yadaiva vādinoḥ pakṣaḥ pratipakṣaparigrahaḥ rājanvati sadekasya pakṣāsiddhas tathaiva hi    sā tatra vādino samyak sādhanokter vibhāvyate tūṣṇībhāvāc ca nānyatra nānyadety akalaṃkavāk    tūṣṇībhāvo thavā doṣānāśaktiḥ satyasādhane vādinokte parasyeṣṭā pakṣasiddhir na cānyathā    kasyacit tattvasaṃsiddhyapratikṣepo nirākṛtaḥ kīrtiḥ parājayo vaśyamakīrtikṛd iti sthitam    asādhanāṃgavacanam adoṣodbhāvanaṃ dvayoḥ na yuktaṃ nigrahasthānaṃ saṃdhāhānyādivat tataḥ    pratidṛṣṭāṃtadharmasya yānujñā nyāyadarśane svadṛṣṭāṃte matā saiva pratijñāhānir aiśvaraiḥ    sādhyadharmaviruddhena dharmeṇa pratyavasthite anyadṛṣṭāṃtadharmā m evānujānataḥ    pratijñāhānir ity eva bhāṣyākārāgraho na vā prakārāṃtaro py asya syāt saṃbhavāc citravibhramāt    vinaśvarasvabhāvo yaṃ śabda aiṃdriyakatvataḥ yathā ghaṭa iti prokte paraḥ pratyavatiṣṭhate    dṛṣṭam aiṃdriyakaṃ nityaṃ sāmānyaṃ tadvad astu naḥ śabdo pīti svaliṃgasya jñānāt te nāpy asaṃmataṃ    kāmaṃ ghaṭo pi nityo stu sāmānyaṃ yadi śāśvataṃ ity evaṃ bhāṣyamāṇena pratijñotpadyate katham    dṛṣṭāṃtasya parityāgāt svahetoḥ prakṛtakṣateḥ nigamāṃtasya pakṣasya tyāgād iti mataṃ yadi    tadā dṛṣṭāṃtahāniḥ syāt sākṣād iyam anākulā sādhyadharmaparityāgād dṛṣṭāṃte sveṣṭasādhane    pāraṃparyeṇa tu tyāgo hetūpanayayor api udāharaṇahānau hi nānayor asti sādhutā    nigamasya parityāgaḥ pakṣavādo pi vā svayaṃ tathā ca na pratijñātahānir eveti saṃgatam    pakṣatyāgāt pratijñāyās tyāgas tasya tadāsṛteḥ pakṣatyāge pi dṛṣṭāṃtatyāgād iti yadīṣyate    hetvādityāgato pi syāt pratijñātyajanaṃ tadā tataḥ pakṣaparityāgāviśeṣān niyamaḥ kutaḥ    pratijñāhānisūtrasya vyākhyāṃ vārtikakṛt punaḥ karoty evaṃ virodhena nyāyabhāṣyakṛtaḥ sphuṭam    dṛṣṭaś cāṃte sthitaś cāyam iti dṛṣṭāṃta ucyate svadṛṣṭāṃtaḥ svapakṣaḥ syāt pratipakṣaḥ punar mataḥ    pratidṛṣṭāṃta eveti taddharmam anujānataḥ svapakṣe syāt pratijñānam iti nyāyāvirodhataḥ    sāmānyam aiṃdriyaṃ nityaṃ yadi śabdo pi tādṛśaḥ nityo 'stv iti bruvāṇasyānityatvatyāganiścayāt    ity etac ca na yuktaṃ syād udyotakarajādyakṛt pratijñāhānir itthaṃ tu yatas tenāvadhāryate    sā hetvādiparityāgāt pratipakṣaprasādhanā prāyaḥ pratīyate vāde maṃdabodhasya vādinaḥ    kutaścid ākulābhāvād anyato vā nimittataḥ tathā tadvāci sūtrārtho niyamān na vyavasthitaḥ    yas tv āhaiṃdriyakatvasya vyabhicārād vinaśvare śabdasādhyena hetutvaṃ sāmānyeneti so py adhīḥ    siddhasādhanatas teṣāṃ saṃdhāhāneś ca bhedataḥ sādhanaṃ vyabhicāritvāt tadanaṃtarataḥ kutaḥ    sāsty eva hi pratijñānahānir doṣaḥ kutaścana kasyacin nigrahasthānaṃ tanmātrāt tu na yujyate    yeṣāṃ prayogayogyāsti pratijñānam itīraṇe teṣāṃ taddhānir apy astu nigraho vā prasādhane    pareṇa sādhite svārthe nānyatheti hi niścitaṃ svapakṣasiddhir evātra jaya ity abhidhānataḥ    gamyamānā pratijñā na yeṣāṃ teṣāṃ ca tatkṣatiḥ gamyamānaiva doṣaḥ syād iti sarvaṃ samaṃjasam    pratiṣedhe pratijñātārthasya dharmavikalpataḥ yo sau tadarthanirdeśas tatpratijñāṃtaraṃ kila    ghaṭo 'sarvagato yadvat tathā śabdo py asarvagaḥ tadvad evāstu nityo yam iti dharmavikalpanāt    sāmānyenaiṃdriyatvasya sarvagatvopadarśitaṃ vyabhicāre pi pūrvasyāḥ pratijñāyāḥ prasiddhaye    śabdo 'sarvagatas tāvad iti sattvāṃtaraṃ kṛtam tac ca tatsādhanāśaktam iti bhāṣyena nigrahaḥ    nātredaṃ yujyate pūrvapratijñāyāḥ prasādhane prayuktāyāṃ parasyās tadbhāvahānena hetuvat    tadasarvagatatvena prayuktād aiṃdriyatvataḥ śabdānityatvamāhāyam iti hetvaṃtaraṃ bhavet    na pratijñāṃtaraṃ tasya kvacid apy aprayogataḥ prajñāvatāṃ jaḍānāṃ tu nādhikāro vicāraṇe    viruddhādiprayogas tu prājñānām api saṃbhavāt kutaścid viśramāt tatrety āhur anye tad apy asat    pratijñātārthasiddhyarthaṃ pratijñāyāḥ samīkṣaṇāt bhrāṃtaiḥ prayujyamānāyāḥ vicāre siddhahetuvat    prājñeti vibhramād brūyād vāde 'siddhādisādhanam svapakṣasiddhir yena syāt sattvam ity atidurghaṭam    tato nenaiva mārgeṇa pratijñāṃtarasaṃbhavaḥ ity etad eva nirmuktis tad dhi nānānimittakaṃ    pratijñāhānitaś cāsya bhedaḥ katham upeyate pakṣatyāgāviśeṣe pi yogair iti ca vismayaḥ    pratidṛṣṭāṃtadharmasya svadṛṣṭāṃte bhyanujñayā yathā pakṣaparityāgas tathā saṃdhāṃtarād api    svapakṣasiddhaye yadvatsaṃdhāṃtaram udāhṛtaṃ bhrāṃtyā tadvac ca śabdo pi nityo stv iti na kiṃ punaḥ    śabdānityatvasiddhyarthaṃ nityaḥ śabda itīraṇaṃ svasthasya vāhataṃ yadvat tathā sarvagaśabdavāk    pratijñāyā virodho yo hetunā saṃpratīyate sa pratijñāvirodhaḥ syād ity etac ca na yuktimat    pratijñāyāḥ pratijñātve hetunā hi nirākṛte pratijñāhānir eveyaṃ prakārāṃtarato bhavet    dravyaṃ bhinnaṃ guṇāt svasmād iti pakṣe bhibhāṣite rūpādyarthāṃtaratvenānupalabdher itīryate    yena hetur hatas tenāsaṃdehaṃ bhedasaṃgaraḥ tadabhedasya nirṇītes tatra teneti budhyatām    hetor viruddhatā vā syād doṣo yaṃ sarvasaṃmataḥ pratijñādoṣatā tv asya nānyathā vyavatiṣṭhate    pratijñā ca svayaṃ yatra virodham adhigacchati nāstyātmetyādivat tatra pratijñāvidhir eva naḥ    hetuḥ pratijñayā yatra bādhyate hetuduṣṭatā tatra siddhānyathā saṃdhāvirodho tiprasajyate    sarvaṃ pṛthak samudāyaḥ bhāvaśabdaprayogataḥ ity atra siddhayā bhedasaṃdhayā yadi bādhyate    hetus tatra prasiddhena hetunā sāpi bādhyatāṃ pratijñāvat parasyāpi hetusiddher abhedataḥ    bhāvaśabdaḥ samūhaṃ hi yasyaikaṃ vakti vāstavaṃ tasya sarvaṃ pṛthaktattvam iti saṃdhādhihanyate    viruddhasādhanād vāyaṃ viruddho hetur āgataḥ samūhāvāstave hetudoṣo naiko pi pūrvakaḥ    sarvathā bhedino nānārtheṣu śabdaprayogataḥ prakalpitasamūheṣv ity evaṃ hetvarthaniścayāt    tathā sati virodho yaṃ taddhetoḥ saṃdhayā sthitaḥ saṃdhāhānis tu siddhe yaṃ hetunā tatprabādhanāt    dṛṣṭāṃtasya ca yo nāma virodhaḥ saṃdhayoditaḥ sādhanasya ca dṛṣṭāṃtapramukhair mānabodhanam    pratijñādiṣu tasyāpi na pratijñāvirodhatā sūtrārūḍhatayoktasya bhāṃḍālekhyanayoktivat    pratijñānena dṛṣṭāṃtabādhane sati gamyate tatpratijñāvirodhaḥ syād vistattvād iti cen matam    haṃta hetuvirodho pi kiṃ naiṣo bhīṣṭa eva te dṛṣṭāṃtādivirodho pi hetur etena varṇitaḥ    nigrahasthānasaṃkhyānavighātakṛd ayaṃ tataḥ yathoktanigrahasthāneṣv aṃtarbhāvāvirodhataḥ    pratyakṣādipramāṇena pratijñābādhanaṃ punaḥ pratijñāhānir āyātā prakārāṃtarataḥ sphuṭam    nidarśanādibādhā ca nigrahāṃtaram eva te pratijñānaśrutes tatrābhāvāt tadbādhanātyayāt    mokṣādinā svasiddhena yānaikāṃtikacodanā parapakṣaviruddhaṃ syādut taraṃ tad ihety api    na pratijñāvirodhe ṃtarbhāvameti kathaṃcana svayaṃ tu sādhite samyaggotvādau doṣa eva saḥ    nirākṛtau pareṇāsyānaikāṃtikasamānatā hetor eva bhavet tāvat saṃdhādoṣas tu neṣyate    hetāv aiṃdriyakatve tu nijapakṣānapekṣiṇi sa prasiddhasya gotvāder iti tattvavirodhataḥ    syād virodha itīdaṃ ca tadvad eva na bhidyate anaikāṃtikatādoṣāt tadabhāvāviśeṣataḥ    vādītarapratānena gotvena vyabhicāratā hetor yathā caikatarasiddhenāsādhanena kim    pramāṇenāprasiddhau tu tasya saiva tadā bhavat sarveṣām api tenāyaṃ vibhāgo jaḍakalpitaḥ    pratijñāvacanenaiva nigṛhītasya vādinaḥ na pratijñāvirodhasya nigrahatvam itītare    teṣām anekadoṣasya sādhanasyābhibhāṣaṇe pareṇaikasya doṣasya kathanaṃ nigraho yathā    tathānyasyātra tenaiva kathanaṃ tasya nigrahaḥ kiṃ neṣṭo vādinor evaṃ yugapannigrahas tava    sādhanāvayavasyāpi kasyacid vacane sakṛt jayo stu vādino nyasyāvacane ca parājayaḥ    pratipakṣāvinābhāvidoṣasyodbhāvane yadi vādini nyatkṛte nyasya kathaṃ nāsya vinigrahaḥ    tadā sādhyāvinābhāvi sādhanāvayaveraṇe tasyaiva śaktyubhayākāre nyasya vāk ca parājayaḥ    viruddhodbhāvanaṃ hetoḥ pratipakṣaprasādhanaṃ yathā tathā vinābhāvihetūktiḥ svārthasādhanā    sādhanāvayavo nekaḥ prayoktavyo yathāparaḥ tathā doṣo pi kiṃ na syād udbhāvyas tatra tattvataḥ    tasmāt prayujyamānasya gamyamānasya vā svayaṃ saṃgarasya vyavasthānakathāvicchedamātrakṛt    pratijñārthāpanayanaṃ pakṣasya pratiṣedhane na pratijñānasaṃnyāsaḥ pratijñāhānitaḥ pṛthak    eka eva mahān nityo yaṃ śabdaḥ ity anīyata pratijñārthaḥ kilānena pūrvavatpakṣadūṣaṇe    hetor aiṃdriyakatvasya vyabhicārapradarśanāt tathā cāpanayo hāniḥ saṃdhāyā iti nārthabhit    pratijñāhānir evaitaiḥ prakārair yadi kathyate prakārāṃtarato pīyaṃ tadā kiṃ na prakathyate    tannimittaprakārāṇāṃ niyamābhāvataḥ kva nu yathoktā niyatis teṣāṃ nasopajñaṃ vacas tataḥ    pakṣasya pratiṣedhe hi tūṣṇīṃbhāvo dharekṣaṇaṃ vyomekṣaṇaṃ digālokaḥ khātkṛtaṃ capalāyitam    hastāsphālanam ākaṃpaḥ prasvedādy apy anekadhā nigrahāṃtaram asyāstu tatpratijñāṃtarādivat    aviśeṣodite hetau pratiṣiddhe pravādinā viśeṣam icchataḥ proktaṃ hetvaṃtaram apīha yat    tad evam eva saṃbhāvyaṃ nānyatheti na niścayaḥ parasminn api hetau syād ukte hetvaṃtaraṃ yathā    yathā ca prakṛte hetau doṣavaty api darśite parasya vacanaṃ hetor hetvaṃtaram udāhṛtam    tathā nidarśanādau ca dṛṣṭāṃtādyaṃtaraṃ na kim nigrahasthānam āstheyaṃ vyavasthāpyātiniścitam    yadi hetvaṃtareṇaiva nigṛhītasya vādinaḥ dṛṣṭāṃtādyaṃtaraṃ tat syāt kathāyāṃ vinivartanāt    tadānaikāṃtikatvādihetudoṣeṇa nirjite mā bhūd dhetvaṃtaraṃ tasya tata evāviśeṣataḥ    yathā codbhāvite doṣe hetor yad vā viśeṣaṇaṃ brūyāt kaścit tathā dṛṣṭāṃtāder api jigīṣayā    pratisaṃbaṃdhaśūnyānām arthānām abhibhāṣaṇam yat punaḥ prakṛtād arthād arthāṃtarasamāśritam    kvacit kiṃcid api nyasya hetuṃ tacchabdasādhane padādivyākṛtiṃ kuryād yathānekaprakārataḥ    tatrāpi sādhane nukte prokte rthāṃtaravāk katham nigraho dūṣaṇe vāpi lokanād viniyamyate    asamarthe tu tan na syāt kasyacit pakṣasādhane nigrahārthāṃtaraṃ vāde nānyatheti viniścayaḥ    varṇakramasya nirdeśo yathā tadvannirarthakaṃ kathaṃ yathā jabajhabhetyādeḥ pratyāhārasya kutracit    tatsarvathārthaśūnyatvāt kiṃ sādhya upayogataḥ kiṃ vānādivikalpo trāsaṃbhavād eva tādṛśaḥ    varṇakramādiśabdasyāpy arthavattvāt kathaṃcana tadvicāre kvacic ca matkāryeṇārthena yogataḥ    dvitīyakalpanāyāṃ tu sarvam eva nirarthakam nigrahasthānam uktaṃ syāt siddhavan nopayogivat    tasmān nedaṃ pṛthagyuktaṃ kakṣādihitakādivat kathāvicchedamātraṃ tu bhavet pakṣāṃtaroktivat    pariṣatprativādibhyāṃ trir uktamapi vādinā avijñātam avijñātārthaṃ tad uktaṃ jaḍātmabhiḥ    yadā maṃdamatī tāvat pariṣatprativādinau tadā satyagiropete nigrahasthānam āpayet    yadā tu tau mahāprājñau tadā gūḍhābhidhānataḥ drutoccārādito vā syāt tayor anavabodhanam    prāgvikalpe kathaṃ yuktaṃ tasya nigrahaṇaṃ satām yatra vākyaprayoge pi vaktus tadanuṣaṃgataḥ    yatra vākyaṃ svayaṃ vādī vyācaṣṭe nyair aniścitam yathā tathaiva vyācaṣṭaṃ gūḍhopanyāsam ātmanaḥ    adhyākhyāne tu tasyās tu jayābhāvo na nigrahaḥ parasya pakṣasaṃsiddhyabhāvād etāvatā dhruvam    drutoccārāditas tv etāḥ kathaṃcid avagacchataḥ siddhāṃtadvayatattvajñais tato nājñānasaṃbhavaḥ    vaktuḥ pralāpamātre tu tayor anavabodhanam nāvijñātārtham etat syād varṇānuktam avādavat    pratisaṃbaṃdhahīnānāṃ śabdānām abhibhāṣaṇaṃ paurvāparyeṇa yogasya tatrābhāvād apārthakam    dāḍimāni daśetyādiśabdavat parikīrtanam te nirarthakato bhinnaṃ na yuktyā vyavatiṣṭhate    nairarthakyaṃ hi varṇānāṃ yathā tadvatpadātiṣu nābhidyetānyathā vākyaṃ nairarthakyaṃ tato param    saṃdhādyavayavān nyāyād viparyāsena bhāṣaṇam aprāptakālam ākhyātaṃ tac cāyuktaṃ manīṣiṇām    padānāṃ kramaniyamaṃ vinārthāvyavasāyataḥ devadattādivākyeṣu śāstre py evaṃ vinirṇayāt    yathāpaśabdataḥ śabdapratyayād arthaniścayaḥ śabdād eva tathā svādivyutkramān na kramasya vit    tato vākyārthanirṇītiḥ pāraṃparyeṇa jāyate viparyāsāt tu naiveti kecid āhus tad apy asat    vyutkramād arthanirṇītir apaśabdād ivety api vaktuṃ śaktes tathā dṛṣṭeḥ sarvathāpy aviśeṣataḥ    śabdād vyākhyānavaiyarthyam evaṃ cet tattvavādinām nāpaśabdeṣv api prāyo vyākhyānasyopalakṣaṇāt    tathā ca saṃskṛtāc chabdāt satyād dharmas tathānyataḥ syād asatyaṃ yadā dharmaḥ kva niyamaḥ puṇyapāpayoḥ    vṛddhiprasiddhitas tv eṣa vyavahāraḥ pravartate saṃskṛtair iti sarvāpi śabdair bhāṣāsvanair iva    tato rthāniścayo yena padena kramaśaḥ sthitaḥ tadvyatikramaṇād doṣo nairarthakyaṃ na cāparam    hīnam anyatamenāpi vākyaṃ svāvayavena yat tannyūnam ity asatsvārthe pratītes tādṛśād api    yathācāryāpratītiḥ syāt tannirarthakam eva te nigrahāṃtaratoktis tu tatra śraddhānusāriṇām    hetūdāharaṇābhyāṃ yad vākyaṃ syād adhikaṃ paraiḥ proktaṃ tadadhikaṃ nāma tac ca nyūnena varṇitam    tattvāparyavasānāyāṃ kathāyāṃ tattvanirṇayaḥ yadā syād ādhikād eva tadā kā nāma duṣṭatā    svārthike ke dhike sarvaṃ nāsti vākyābhibhāṣaṇe tatprasaṃgāt tato rthasyāniścayāt tannirarthakam    punarvacanam arthasya śabdasya ca niveditam punarutkaṃ vicāre nyatrānuvādāt parīkṣakaiḥ    tatrāyam eva manyaṃte punaruktaṃ vacorthataḥ śabdasāmye pi bhedasyāsaṃbhavād ity udāhṛtam    guṇasamuditaṃ doṣāpetaṃ praṇiṃdati nidati dhanavati parikrītaṃ yaṃtraṃ pranṛtyati nṛtyati    satyapratyāyanaṃ yāvat tāvad vācyam ato budhaiḥ sveṣṭārthavācibhiḥ śabdais taiś cānyair vā nirākulam    tadapratyāyi śabdasya vacanaṃ tu nirarthakam sakṛduktaṃ punar veti tāttvikaḥ saṃpracakṣate    sakṛdvāde punar vādo nuvādo rthaviśeṣataḥ punaruktaṃ yathā neṣṭaṃ kvacit tadvad ihāpi tat    arthād āpadyamānasya yac chabdena punarvacaḥ punaruktaṃ bhataṃ yasya tasya sveṣṭoktibādhanam    nirvādinoditasyāpi vijñātasyāpi saṃsadā apratyuccāraṇaṃ prāha parasyānanubhāṣaṇam    yan nāṃtarīyakā siddhiḥ sādhyasya tadabhāṣaṇaṃ parasya kathyate kaiścit sarvathānanubhāṣaṇaṃ    prāgupanyasya niḥśeṣaṃ paropanyastam aṃjasā pratyekaṃ dūṣaṇāvācye punar uccāryate yadi    tad eva syāt tadā tasya punaruktam asaṃśayam noccāryate yadā tv etat tadā doṣaḥ kva gadyate    tasmād yad dūṣyate yat tatkarmatvādi paroditam tad uccāraṇam eveṣṭam anyoccāro nirarthakaḥ    uktaṃ dūṣayatāvaśyaṃ darśanīyo tra gocaraḥ anyathā dūṣaṇāvṛtteḥ sarvoccāras tu nety api    kasyacid vacanaṃ neṣṭanigrahasthānasādhanaṃ tasyāpratibhayaivoktair uttarāpratipattitaḥ    pratyuccārāsamarthatvaṃ kathyate 'nanubhāṣaṇaṃ tasminn uccārite py anyapakṣavikṣiptyavedanam    khyāpyate pratibhānyasyety etayor naikatāsthitiḥ sākṣāt saṃlakṣyate lokaiḥ kīrter anyatra durgateḥ    ajñānaṃ ca kilājñānaṃ vijñātasyāpi saṃsadā parasya nigrahasthānaṃ tatsamānaṃ pratīyate    sarveṣu hi pratijñānahānyādiṣu na vādinoḥ ajñānād aparaṃ kiṃcin nigrahasthānam āṃjasam    teṣām etatprabhedatve bahunigrahaṇaṃ na kim arthājñānādibhedānāṃ bahu vātrāvadhāraṇāt    uttarāpratipattir yā parair apratibhāsatā sāpy etena prativyūḍhā bhedenājñānataḥ sphuṭam    yaḥ punar nigrahaprāpte py anigraha upeyate kasyacit paryanuyojyopekṣaṇaṃ tad api kṛtam    svayaṃ pratibhayā hi cet tadaṃtarbhāvanirṇayaḥ sabhyair udbhāvanīyatvāt tasya bhedo mahānaho    vāde py udbhāvayan naitan na hi kenāpi dhāryate svaṃ kaupīnaṃ na kopīha vivṛṇotīti cākulam    uttarāpratipattir hi parasyodbhāvayansvayaṃ sādhanasya sadoṣatvam āvirbhāvayati dhruvam    saṃbhavaty uttaraṃ yatra tatra tasyānudīraṇam yuktaṃ nigrahaṇaṃ nānyatheti nānyavidāṃ matam    nirdeṣasādhanoktau tu tūṣṇīṃbhāvād vinigrahaḥ pralāpamātrato veti pakṣasiddheḥ sa āgataḥ    svapakṣe doṣam upayan parapakṣe prasaṃjayan matānujñām avāpnoti nigṛhītiṃ na yuktitaḥ    dvayor evaṃ sadoṣatvaṃ tāttvikaiḥ sthāpyate yataḥ pakṣasiddhinirodhasya samānatvena nirṇayāt    anaikāṃtikataivaivaṃ samudbhāvyeti kecana hetor avacane tac ca nopapattimad īkṣyate    tathottarāpratītiḥ syād ity apy āgrahamātrakaṃ sarvasyājñānamātratvāpatter doṣasya vādinoḥ    saṃkṣepato nyathā kvāyaṃ niyamaḥ sarvavādinām hetvābhāsottarāvittī kīrteḥ syātāṃ yataḥ sthiteḥ    nanu cājñānamātre pi nigraheti prasajyate sarvajñānasya sarveṣāṃ sādṛśyānām asaṃbhavāt    satyam etadabhipretavastusiddhaprayoginoḥ jñānasya yadi nābhāvo doṣo nyasyārthasādhane    satsv apakṣaprasiddhaiva nigrāhyo nya iti sthitam samāsato navadyatvād anyathā tadayogataḥ    taskaratvaṃ naratvāder iti hetur yadocyate tadānaikāṃtikatvoktitvam apīti na vāryate    vācoyuktiprakārāṇāṃ loke vaicitryadarśanāt nopālaṃbhas tathoktau syād vipakṣe hetudarśanam    doṣahetum abhigamya svapakṣe parapakṣatām doṣam udbhāvya paścāttve svapakṣaṃ sādhayej jayī    yadā tv anigrahasthāne nigrahasthānam ucyate tadā niranuyojyānuyogākhyo nigraho mataḥ    so py apratibhayoktaḥ syād evam uttaravikṛteḥ tatprakārapṛthagbhāve kim etaiḥ svalpabhāṣitaiḥ    sabhāṃ prāptasya tasya syātkāryavyāsaṃgataḥ kathā vicchedas tasya nirdiṣṭo vikṣepo nāma nigrahaḥ    so pi nāpratibhāto sti bhinnaḥ kaścana pūrvavat tad evaṃ bhedataḥ sūtraṃ nākṣapādasya kīrtikṛt    svayaṃ niyatasiddhāṃto niyamena vinā yadā kathāṃ prasaṃjayet tasyāpasiddhāṃtas tathoditaḥ    so py ayuktaḥ svapakṣasyāsādhane nena tattvataḥ asādhanāṃgavacanād doṣodbhāvanamātravat    tatrābhyupetya śabdādīn nityān eva punaḥ svayam tān anityān bruvāṇasya pūrvasiddhāṃtabādhanam    tathaiva śūnyam āsthāya tasya saṃvidamātrataḥ pūrvasyottarato bādhā siddhāṃtasyānyathā kva tat    pradhānaṃ caivam āsṛtya tadvikāraprarūpaṇam tādṛg evānyathā hetus tatra na syāt samanvayaḥ    brahmādyādvaitam apy evam upetyāgamavarṇanaṃ kurvannāmnāyanirdiṣṭaṃ bādhyo nyo py anayā diśā    svayaṃ pravartamānāc ca sarvathaikāṃtavādinaḥ anekāṃtāvinābhūtavyahāreṣu tādṛśāḥ    hetvābhāsāś ca yogoktāḥ paṃca pūrvam udāhṛtāḥ saptadhānyauḥ samākhyātāṃ nigrahādhikatāṃ gataiḥ    hetvābhāsatrayaṃ te pi samarthaṃ nātivartituṃ anyathānupapannatvavaikalyaṃ tac ca naikakam    yathaikalakṣaṇo hetuḥ samarthaḥ sādhyasādhane tathā tadvikalāśakto hetvābhāso numanyatām    yo hy asiddhatayā sādhyaṃ vyabhicāritayāpi vā viruddhatvena vā hetuḥ sādhayen na sa tannibhaḥ    yo rthāropopapattyā syād vidhāto vacanasya tat chalaṃ sāmānyataḥ śakyaṃ nodāhartuṃ kathaṃcana    vibhāgenoditasyāsyodāhṛtiḥ sa tridhā mataḥ vāksāmānyopacāreṣu chalānām upavarṇanāt    tatrāviśeṣadiṣṭe rthe vaktur ākūtato nyathā kalpanārthāṃtarasyeṣṭaṃ vākchalaṃ chalavādibhiḥ    ādyau vai devadatto yaṃ vartate navakaṃbalaḥ ity ukte pratyavasthānaṃ kuto sya nava kaṃbalāḥ    yasmād dārḍhyatvasaṃsiddhir bhaved iti yadā paraḥ pratibrūyāt tadā vāci chalaṃ tenopapāditam    navakaṃbalaśabde hi vṛttyā prokte viśeṣataḥ navo 'sya kaṃbalo jīrṇo naivety ākūtam āṃjasam    vaktuḥ saṃbhāvyate tasmād anyasyārthasya kalpanā navāsya kaṃbalā nāṣṭāv ity asyāsaṃbhavātmanaḥ    pratyavasthātur anyāyavāditām ānayed bhuvaṃ saṃtastattvaparīkṣāyāṃ kathaṃ syuś chalavādinaḥ    etenāpi nigṛhyeta jigīṣur yadi dhīdhanaiḥ yatra vākyaṃ tadanyārthaṃ vyācakṣāṇo nigṛhyatām    tatra svayam abhipretam arthaṃ sthāpayituṃ na yaiḥ yo 'sāmarthyo 'paraiḥ śaktaiḥ svābhipretārthasādhane    yo rthasaṃbhavann arthaḥ pramāṇair upapadyate vākye sa eva yukto stu nāparo tiprasaṃgataḥ    yatra pakṣe vivādena pravṛttir vādinor abhūt tatsiddhyaivāsya dhikkāro nyasya patre sthitena cet    kvaivaṃ parājayaḥ siddhe chalamātreṇa te mate saṃdhāhānyādidoṣaiś ca dātrādātroḥ sapatrakam    yatra saṃbhavato rthasya na sāmānyasya yogataḥ asadbhūtapadārthasya kalpanā kriyate balāt    tatsāmānyachalaṃ prāhuḥ sāmānyavinibaṃdhanaṃ vidyācaraṇasaṃpattir brāhmaṇe saṃbhaved iti    kenāpy ukte yathaivaṃ sā vrātye pi brāhmaṇena kim brāhmaṇatvasya sadbhāvād bhaved ity api bhāṣaṇam    tad etan na chalaṃ yuktaṃ sapakṣetaradarśanāt talliṃgasyānyathā tasya vyabhicāro khilo stu tat    kvacid eti tathātyeti vidyācaraṇasaṃpadaṃ brāhmaṇatvam iti khyātam iti sāmānyam atra cet    tathaivāsparśavattvādi śabdaṃ nityatvasādhane kiṃ na syād iti sāmānyaṃ sarvathāpy aviśeṣaḥ    tan na tasyeti nityatvam asyeti ca sukhādivat tenānaikāṃtikaṃ yuktaṃ sapakṣetaravṛttitaḥ    vidyācaraṇasaṃpattir viṣayasya praśaṃsanaṃ brāhmaṇasya yathā śāligocarakṣetravarṇanam    yasyeṣṭaṃ prakṛte vākye tasya brāhmaṇadharmiṇi praśastatve svayaṃ sādhye brāhmaṇatvena hetunā    kenānaikāṃtiko hetur udbhāvyo na prasahyate kṣetre kṣetratvavacchāliyogyatvasya prasādhane    dharmādhyāropanirdeśe satyārthapratiṣedhanam upacārachalaṃ maṃcāḥ krośaṃtītyādigocaram    maṃcāḥ krośaṃti gāyaṃtītyādiśabdaprayojanam āropya sthānināṃ dharmaṃ sthāneṣu kriyate janaiḥ    gauṇaṃ śabdārtham āsṛtya sāmānyādiṣu sattvavat tatra mukhyābhidhānārthe pratiṣedhaś chalaṃ sthitam    na cedaṃ vākchalaṃ yuktaṃ kiṃcit sādharmyamātrataḥ svarūpabhedasaṃsiddher anyathātiprasaṃgataḥ    kalpanārthāṃtarasyoktā vākchalasya hi lakṣaṇaṃ sadbhūtārthaniṣedhastūpacārachalalakṣaṇam    tad etasmin prayukte syān nigraho yadi kasyacit tadā yogo nigṛhyeta pratiṣedhāt pramādikam    mukhyarūpatayā śūnyavādinaṃ prati sarvathā tena saṃvyavahāreṇa pramāder upavarṇanāt    sarvathā śūnyatā vāde pramāṇāder virudhyate tato nāyaṃ satāṃ yukta ity aśūnyatvasādhanāt    yogena nigrahaḥ prāpyaḥ svopacāracchale pi cet siddhaḥ svapakṣasiddhyaiva parasyāyam asaṃśayam    svasādhyād avinābhāvalakṣaṇe sādhane sthite jananaṃ yat prasaṃgasya sā jātiḥ kaiścid īritā    prasaṃgaḥ pratyavasthānaṃ sādharmyeṇetareṇa vā vaidharmyokte 'nyathokte ca sādhane syād yathākramam    udāharaṇasādharmyāt sādhyasyārthasya sādhanaṃ hetus tasmin prayukte nyo yadā pratyavatiṣṭhate    udāharaṇavaidharmyāt tatra vyāptim akhaṃḍayat tadāsau jātivādī syād dūṣaṇābhāsavāk tataḥ    yathodāhṛtivaidharmyāt sādhyasyārthasya sādhanaṃ hetus tasmin prayukte pi parasya pratyavasthitiḥ    sādharmyeṇeha dṛṣṭāṃte dūṣaṇābhāsavādinaḥ jāyamānā bhavej jātir ity anvarthe pravakṣyate    sarvasattvavidharmatvapratyavasthāvikalpataḥ kalpyaṃ jātibahutvaṃ syād vyāsato 'naṃtaśaḥ satām    yathā viparyayajñānājñānanigrahabhedataḥ bahutvaṃ nigrahasthānasyoktaṃ pūrvaṃ suvistaram    tatra hy apratibhājñānānanubhāṣaṇaparyanu yojyopekṣaṇavikṣepā labhaṃte pratipattitām    śeṣā vipratipattitvaṃ prāpnuvaṃti samāsataḥ tadvibhinnasvabhāvasya nigrahasthānam īkṣaṇāt    prayukte sthāpanāhetau jātayaḥ pratiṣedhikāḥ caturviṃśatir atroktās tāḥ sādharmyasamādayaḥ    yatrāviśiṣyamāṇena hetunā pratyavasthitiḥ sādharmyeṇa samā jātiḥ sā sādharmyasamā matā    nirvaktavyās tathā śeṣās tā vaidharmyasamādayaḥ lakṣaṇaṃ punar etāsāṃ yathoktam abhibhāṣyate    sādharmyeṇopasaṃhāre taddharmarūpa viparyayāt yas tatra dūṣaṇabhāsaḥ sa sādharmyasamo mataḥ    yathā kriyābhṛdātmāyaṃ kriyāhetuguṇāśrayāt ya īdṛśaḥ sa īdṛkṣo yathā loṣṭhas tathā ca saḥ    tasmāt kriyābhṛd ity evam upasaṃhārabhāṣaṇe kaścid āhākriyo jīvo vibhudravyatvato yathā    vyoma tathā na vijñāto viśeṣasya prasādhakaḥ hetuḥ pakṣadvayo py asti tato yaṃ doṣasannibhaḥ    sādhyasādhanayor vyāpter vicchedasyāsamarthanāt tatsamarthanataṃtrasya dveṣatvenopavarṇanāt    tatraiva pratyavasthānaṃ vaidharmyeṇopadarśyate yaḥ kriyāvān sa dṛṣṭo tra kriyāhetuguṇāśrayaḥ    yathā loṣṭho na vātmaivaṃ tasmān niṣkriya eva saḥ pūrvavaddūṣaṇābhāso vaidharmyasama īkṣyatām    vaidharmyeṇopasaṃhāre sādhyadharmaviparyayāt vaidharmyeṇetareṇāpi pratyavasthānam iṣyate    yā vaidharmyasamā jātir idaṃ tasyā nidarśanam naro niṣkriya evāyaṃ vibhutvāt sakriyaḥ punaḥ    vibhutvarahitaṃ dṛṣṭaṃ loṣṭhādi na tathā naraḥ tasmān niṣkriya ity ukte pratyavasthā vidhīyate    vaidharmyeṇaiva sā tāvat kaiścin nigrahabhīrubhiḥ karmabaṃdhakriyāhetur guṇādīnāṃ samīkṣitaṃ    naivamātmā tato nāyaṃ niṣkriyaḥ saṃpratīyate sādharmyeṇāpi tatraivaṃ pratyavasthānam ucyate    kriyāvān eva loṣṭhādiḥ kriyāhetuguṇāśrayaḥ tṛṣṇātādṛktvajīvo pi tasmāt sakriya eva saḥ    iti sādharmyavaidharmyasamayo dūṣaṇodbhavāt sadharmatvavidharmatvamātrāt sādhyāprasiddhitaḥ    sādhyadṛṣṭāṃtayor dharmavikalpād dvayasādhyatā sadbhāvāc ca matā jātir utkarṣeṇāpakarṣataḥ    varṇyāvarṇyavikalpaiś ca sādhyena ca samāḥ pṛthak tasyāḥ pratīyatām etallakṣaṇaṃ sannidarśanam    dṛṣṭāṃtadharmaṃ sādhyārthe samāsaṃjayataḥ smṛtā tatrotkarṣasamā yadvatkriyāvajjīvasādhane    kriyāhetuguṇāsaṃgī yady ātmā loṣṭhavat tadā tadvad eva bhaved eṣa sparśavān anyathā na saḥ    sādhyadharmiṇi dharmasyābhāvaṃ dṛṣṭāṃtato vadan apakarṣasamāṃ vakti jātiṃ tatraiva sādhane    loṣṭhaḥ kriyāśrayo dṛṣṭo vibhuḥ kāmaṃ tathāstu nā tadviparyayapakṣe vā vācyo hetur viśeṣakṛt    khyāpanīyo mato varṇyaḥ syād avarṇyo viparyayāt tatsamā sādhyadṛṣṭāṃtadharmayor atra sādhane    viparyāsanato jātir vijñeyā tadvilakṣaṇā bhinnalakṣaṇatāyogāt kathaṃcit pūrvajātivat    sādhyadharmavikalpaṃ tu dharmāṃtaravikalpataḥ prasaṃjayata iṣyeta vikalpena samā budhaiḥ    kriyāhetuguṇopetaṃ kiṃcid guru samīkṣyate paraṃ laghu yathā loṣṭho vāyuś ceti kriyāśrayaṃ    kiṃcit tad eva yujyeta yathā loṣṭhādi niṣkriyaṃ kiṃcin na syād yathātmeti viśeṣo vā nivedatām    hetvādikāṃgasāmarthyayogī dharmo vadhāryate sādhyas tam eva dṛṣṭāṃte prasaṃjayati yo naraḥ    tasya sādhyasamā jātir udbhāvyā tattvavittakaiḥ yathā loṣṭhas tathā cātmā yathātmāyaṃ tathā na kim    loṣṭhaḥ syāt sakriyaś cātmā sādhyo loṣṭho 'pi tādṛśaḥ sādhyo stu neti cel loṣṭho yathātmāpi tathā kathaṃ    dūṣaṇābhāsatā tv atra dṛṣṭāṃtādisamarthanā yukte sādhanadharme pi pratiṣedham alabdhitaḥ    sādhyadṛṣṭāṃtayor dharmavikalpād upavarṇitāt vaidharmyaṃ gavi sādṛśye gavayena yathā sthite    sādhyātideśamātreṇa dṛṣṭāṃtasyopapattitaḥ sādhyatvāsaṃbhavāc coktaṃ dṛṣṭāṃtasya na dūṣaṇaṃ    prāptyā yat pratyavasthānaṃ jātiḥ prāptisamaiva sā aprāptyā punar aprāptisamā satsādhaneraṇe    yathāyaṃ sādhayed dhetuḥ sādhyaprāptyān yathāpi vā prāptyā ced yugapadbhāvāt sādhyasādhanadharmayoḥ    prāptayoḥ katham ekasya hetutānyasya sādhyatā yukteti pratyavasthānaṃ prāptyā tāvad udāhṛtam    aprāpya sādhayet sādhyaṃ hetuś cet sarvasādhanaḥ so stu dīpo hi nāprāptapadārthasya prakāśakaḥ    ity aprāptyāvaboddhavyaṃ pratyavasthānidarśanam tāv etau dūṣaṇābhāsau niṣedhasyaivam anvayāt    prāptasyāpi daṃḍādeḥ kuṃbhasādhakatekṣyate tathābhicāram aṃtrasya prāptasyāsātakāritā    vaktavyaṃ sādhanasyāpi sādhanaṃ vādineti tu prasaṃgavacanaṃ jātiḥ prasaṃgasamatāṃ gatā    kriyāhetuguṇopetaḥ kriyāvāṃlloṣṭha iṣyate kuto hetor vinā tena kasyacin na vyavasthitiḥ    evaṃ hi pratyavasthānaṃ na yuktaṃ nyāyavādināṃ vādinor yatra vā sāmyaṃ tasya dṛṣṭāṃtatāsthitiḥ    yathā rūpaṃ didṛkṣūṇāṃ dīpādīnāṃ pratīyate svayaṃ prakāśamānaṃ tu dīpaṃ dīpāṃtarāgrahāt    tathā sādhyaprasiddhyarthaṃ dṛṣṭāṃtagrahaṇaṃ mataṃ prajñātātmani dṛṣṭāṃte tv aphalaṃ sādhanāṃtaram    pratidṛṣṭāṃtarūpeṇa pratyavasthānam iṣyate pratidṛṣṭāṃtatulyeti jātis tatraiva sādhanā    kriyāhetuguṇopetaṃ dṛṣṭam ākāśam akriyaṃ kriyāhetur guṇo vyomni saṃyogo vāyunā sa ca    saṃskārāpekṣaṇo yadvatsaṃyogas tena pādape sa cāyaṃ dūṣaṇābhāsasādhanāpratibaṃdhakaḥ    sādhakaḥ pratidṛṣṭāṃto dṛṣṭāṃto pi hi hetunā tena tadvacanābhāvāt sadṛṣṭāṃto stu hetukaḥ    kāraṇābhāvataḥ pūrvam utpatteḥ pratyavasthitiḥ yānutpattyā parasyoktā sānutpattisamā bhavet    śabdo vinaśvarāt saivam upapanno bhavatv ataḥ kadaṃbādivad ity ukte sādhane prāha kaścana    prāgutpatter anutpanne śabde nityatvakāraṇaṃ prayatnānaṃtarotthatvaṃ nāstīty eṣo 'vinaśvaraḥ    śāśvatasya ca śabdasya notpattiḥ syāt prayatnataḥ pratyavasthety anutpattyā jātir nyāyātilaṃghanāt    utpannasyaiva śabdasya tathābhāvaprasiddhitaḥ prāgutpatter na śabdo stīty upālaṃbhaḥ kimāśrayaḥ    sata eva tu śabdasya prayatnānaṃtarotthatā kāraṇaṃ naśvaratve sti tanniṣedhas tataḥ katham    sāmānye ghaṭayos tulya aiṃdriyatve vyavasthite nityānityatvasādharmyāt saṃśayena samā matā    tatraiva sādhane prokte saṃśayena svayaṃ paraḥ pratyavasthānam ādhatte paśyan sadbhūtadūṣaṇam    prayatnānaṃtarotthe pi śabde sādharmyam aiṃdriye sāmānyenāsti nityena ghaṭena ca vināśinā    tādṛśeneti saṃdeho nityānityatvadharmayoḥ sa cāyukto viśeṣeṇa śabdānityatvasiddhitaḥ    yathā puṃsi vinirṇīte śiraḥsaṃyamanādinā puruṣasthāṇusādharmyād dharmatvān nāsti saṃśayaḥ    tathā prayatnajatvenānitye śabde viniścite ghaṭasāmānyasādharmyād aiṃdriyatvān na saṃśayaḥ    saṃdehety aṃtasaṃdehaḥ sādharmyasyāvināśataḥ puṃsitvādigatasyeti nirṇayaḥ kvāspadaṃ vrajet    athānityena nityena sādharmyād ubhayena yā prakriyāyāḥ prasiddhiḥ syāt tataḥ prakaraṇe samā    tatrānityena sādharmyān niḥprayatnodbhavatvataḥ śabdasyānityatāṃ kaścit sādhayed aparaḥ punaḥ    tasya nityena gotvādisāmānyena hi nityatā tataḥ pakṣe vipakṣe ca samānā prakriyā sthitā    prakriyāṃtanivṛttyā ca pratyavasthānam īdṛśaṃ vipakṣe prakriyāsiddhau na yuktaṃ tadvirodhataḥ    pratipakṣopapattau hi pratiṣedho na yujyate pratiṣedhopapattau ca pratipakṣakṛtir dhruvam    tattvāvadhāraṇe caitatsiddhaṃ prakaraṇaṃ bhavet tadabhāvena tatsiddhir yeneyaṃ pratyavasthitiḥ    traikālyānupapattes tu hetoḥ sādhyārthasādhane syād ahetusamā jātiḥ prayukte sādhane kvacit    pūrvaṃ vā sādhanaṃ sādhyād uttaraṃ vā sahāpi vā pūrvaṃ tāvad asaty arthe kasya sādhanam iṣyate    paścāc cet kiṃ na tatsādhyaṃ sādhane 'sati kathyatāṃ yugapadvāci citsādhyasādhanatvaṃ na yujyate    svataṃtrayos tathābhāvāsiddher vindhyahimādrivat tathā cāhetunā hetur na kathaṃcid viśiṣyate    ity ahetusamatvena pratyavasthāpya yuktitā hetoḥ pratyakṣataḥ siddheḥ kārakasya ghaṭādiṣu    kāryeṣu kuṃbhakārasya tannivṛttes tato grahāt jñāpakasya ca dhūmāder agryādau jñaptikāriṇaḥ    svajñeye parasaṃtāne vāgāder api niścayāt traikālyānupapatteś ca pratiṣedhe kvacit tathā    prayatnānaṃtarotthatvād dhetoḥ pakṣe prasādhite pratipakṣaprasiddhyartham arthāpattyā vidhīyate    yā pratyavasthitiḥ sātra matā jātividāṃvaraiḥ arthāpattiḥ samaivoktā sādhanāprativedinī    yadi prayatnajatvena śabdasyānityatābhavat tadārthāpattito nityasādharmyād astu nityatā    yathaivāsparśanatvāder nitye dṛṣṭā tathā dhvanau ity atra vidyamānatvāt samādhānasya tattvataḥ    śabdo nāstīti pakṣe hetor asaṃśayam eṣa nāstīti pakṣasya hānir arthāt pratīyate    yayā ca pratyavasthānam arthāpattyā vidhīyate nānaikāṃtikatā dṛṣṭā samatvād ubhayor api    grā dyanasya pātaḥ syād ity ukter thān na siddhyati dravyātmanāmasaṃpātābhāvo 'rthāpattito yathā    tasyāḥ sādhyāvinābhāvaśūnyatvaṃ tadvad eva hi śabdānityatvasaṃsiddhau nārthānityatvasādhanaṃ    kvacid ekasya dharmasya ghaṭanād urarīkṛte aviśeṣo tra sadbhāvāghaṭanāt sarvavastunaḥ    aviśeṣaḥ prasaṃgaḥ syād aviśeṣasamā sphuṭaṃ jātir evaṃvidhaṃ nyāyaprāptadoṣāsamīkṣaṇāt    prayatnānaṃtarīyatvadharmasyaikasya saṃbhavāt aviśeṣe hy anityatve siddhe pi ghaṭaśabdayoḥ    na sarvasyāviśeṣaḥ syāt sattvadharmopapattitaḥ dharmāṃtarasya sadbhāvanimittasya nirīkṣaṇāt    prayatnānaṃtarīyatve nimittasya ca darśanāt na samo yam upanyāsaḥ pratibhātīti mucyatām    sarvārtheṣv aviśeṣasya prasaṃgāt pratyavasthitiḥ  kāraṇasyopapatteḥ syād ubhayoḥ pakṣayor api upapattisamā jātiḥ prayukte satyasādhane    kāraṇaṃ yady anityatve prayatnotthatvam ity ayaṃ śabdo 'nityas tadā tasya nityatve 'sparśanāsti tat    tato nityo py asāv astu na nityaḥ katham anyathā  ity eṣa hi napuṃsko tra pratiṣedhaḥ kathaṃcana kāraṇasyābhyanujñādi yādṛśaṃ bruvatā svayaṃ    śabdānityatvasiddhiś copapatter avigānataḥ vyāghātas tu dvayos tulyaḥ sapakṣapratipakṣayoḥ    sādhanād iti naivāsau tayor ekasya sādhakaḥ evaṃ hy eṣa na yukto tra pratiṣedhaḥ kathaṃ mayi    sādhyadharmanimittasyābhāve py uktasya yat punaḥ sādhyadharmopalabdhyā syāt pratyavasthānamātrakam    sopalabdhisamā jātir yathā śvāsādibhaṃgaje śabde sty anityatā yatnajatvābhāve py asāv iti    kāraṇāṃtarato py atra sādhyadharmasya siddhitaḥ na yuktaḥ pratiṣedho 'yaṃ kāraṇāniyamoktitaḥ    niṣedhyānupalabdheś cānupalabdheḥ prasādhane abhāvasya viparyāsād upapattiḥ prakīrtitā    prastutārthavighātāyānupalabdhisamānaghaiḥ  yathā na vidyamānasya śabdasya prāgudīraṇāt aśrutiḥ syāt tadāvṛttyā vā dṛṣṭer iti bhāṣite    kaścid āvaraṇādīnām adṛṣṭer apy adṛṣṭitaḥ śivaṃ mā bhūt tataḥ śabde satye vā śravaṇāt tadā    vṛtyā svabhāvasaṃsiddher abhāvād iti jalpati   tadasaṃbaṃdham evāsyānupalabdheḥ svayaṃ sadā nupalabdhisvabhāvo nopalabdhiviṣayatvataḥ    naivopalabdhyabhāvenābhāvo yasmāt prasiddhyati viparītopapattiś ca nāspadaṃ pratipadyate    śabdasyāvaraṇādīni prāguccāraṇato na vai sarvatropalabhe haṃta ity ābālam anākulam    tataś cāvaraṇādīnām adṛṣṭer apy adṛṣṭitaḥ siddhyaty abhāva ity eṣa nopālaṃbhaḥ pramānvitaḥ    kṛtakatvādinā sāmyaṃ ghaṭena yadi sādhayet śabdasyānityatāṃ sarvaṃ vastu nityaṃ tadā na kim    anityena ghaṭenāsya sādharmyaṃ gamayet svayaṃ sattvena sāmyamātrasya viśeṣāprativedanāt    ity anityena yā nāma pratyavasthā vidhīyate sātrānityasamā jātir vijñeyā nyāyabādhanāt    niṣedhasya tathoktasyāsiddhiprāpteḥ samatvataḥ pakṣeṇāsiddhim āptenety aśeṣam asamaṃjasaṃ    pakṣasya hi niṣedhasya pratipakṣo bhilapyate niṣedho dhīdhanair atra tasyaiva vinivartakaḥ    pratijñānādiyogas tu tayoḥ sādharmyam iṣyate sarvatrāsaṃbhavāt tena vinā pakṣavipakṣayoḥ    tato siddhir yathā pakṣe vipakṣe pi tathāstu sā no ced anityatā śabde ghaṭavan nākhilārthagā    dṛṣṭāṃte pi ca yo dharmaḥ sādhyasādhanabhāvataḥ prajñāyate sa evātra hetur ukto rthasādhanaḥ    tasya kenacid arthena samānatvāt sadharmatā kenacit tu viśeṣāt syād vaidharmyam iti niścayaḥ    hetur viśiṣṭasādharmyaṃ na tu sādharmyamātrakaṃ sādhyasādhanasāmarthyabhāgayaṃ na ca sarvagaḥ    sattvena ca sadharmatvāt sarvasyānityateraṇe doṣaḥ pūrvodito vācyaḥ sāviśeṣaḥ samāśrayaḥ    anityaḥ śabda ity ukte nityatvapratyavasthitiḥ jātir nityasamā vaktur ajñānāt saṃpravartate    śabdāśrayam anityatvaṃ nityaṃ vānityam eva vā nitye śabdo pi nityaṃ syāt tadādhāro 'nyathā kva tat    tatrānitye py ayaṃ doṣaḥ syād anityatvavicyutau nityaṃ śabdasya sadbhāvād ity etad dhi na saṃgatam    anityatvapratijñāne tanniṣedhavirodhataḥ svayaṃ tadapratijñāne py eṣa tasya nirāśrayaḥ    sarvadā kim anityatvam iti praśno py asaṃbhavī prādurbhūtasya bhāvasya nirodhiś ca tad iṣyate    nāśrayāśrayibhāvo pi vyāghātād anayoḥ sadā nityānityatvayor ekavastunīṣṭau virodhataḥ    tato nānityatā śabde nityatvapratyavasthitiḥ paraiḥ śakyā nirākartuṃ vācālair jayalolupaiḥ    prayatnānekakāryatvāj jātiḥ kāryasamoditā triprayatnodbhavatvena śabdānityatvasādhane    prayatnānaṃtaraṃ tāvad ātmalābhaḥ samīkṣitaḥ kuṃbhādīnāṃ tathāvyaktir vyavadhāne py apohanāt    tadbuddhilakṣaṇāt pūrvaṃ satām evety anityatā prayatnānaṃtaraṃ bhāvān na śabdasyāviśeṣataḥ    tatrottaram idaṃ śabdaḥ prayatnānaṃtarodbhavaḥ prāgadṛṣṭinimittasyābhāve py anupalabdhitaḥ    satyābhāvād abhūtvāsya bhāvo janmaiva gamyate nābhivyaktiḥ sataḥ pūrvaṃ vyavadhānāvyapohanāt    anaikāṃtikatā hetor evaṃ ced upapadyate pratiṣedhe pi sā tulyā tato 'sādhaka eva saḥ    vidhāv iva niṣedhe pi samā hi vyabhicāritā viśeṣasyoktitaś cāyaṃ hetor doṣo nivāritaḥ    evaṃ bhedena nirdiṣṭā jñātayo diṣṭa ye caturviṃśatir anyānaṃtā bodhyās tathā budhaiḥ    naitābhirnigraho vāde satyasādhanavādinaḥ sādhanābhaṃ bruvāṇas tu tata eva nigṛhyate    nigrahāya prakalpyaṃte tv etā jalpavitaṃḍayoḥ jigīṣayā pravṛttānām iti yaugāḥ pracakṣate    tatredaṃ durghaṭaṃ tāvajjāteḥ sāmānyalakṣaṇaṃ sādharmyeṇetareṇāpi pratyavasthānam īritam    sādhanābhaprayoge pi tajjātitvaprasaṃgataḥ dūṣaṇābhāsarūpasya jātitvena prakīrtane    astu mithyottaraṃ jātir akalaṃkoktalakṣaṇā  sāṃkaryāt pratyavasthānaṃ yathānekāṃtasādhane yathā vaiyadhikaryeṇa virodhenānavasthayā    bhinnācāratayā tābhyāṃ doṣābhyāṃ saṃśayena ca apratītyā tayā bhāvenānyathā vā yathecchayā    vastutas tādṛśair doṣaiḥ sādhanāpratighātataḥ siddhaṃ mithyottaratvaṃ no niravadyaṃ hi lakṣaṇam    paroktaṃ punar avyāptiprokteṣv eteṣv asaṃbhavāt tato na nigrahasthānaṃ yuktam etad iti sthitam    tathā ca tāttviko vādaḥ sveṣṭasiddhyavasānabhāk pakṣe patatvayuktyaiva niyamānupapattitaḥ    yas tūktaḥ prātibho vādaḥ saṃprātibhaparīkṣaṇaḥ  nigrahas tatra vijñeyaḥ svapratijñāvyatikramaḥ    yathā padyaṃ mayā vācyam āgrastutaviniścayāt  sālaṃkāraṃ tathā gadyam askhaladrūpam ity api    paṃcāvayavavākyaṃ vā trirūpaṃ vānyathāpi vā  nirdoṣam iti vā saṃdhāsthalabhedaṃ tam ūhyate    tathā saṃgarahānyādinigrahasthānato py asau  chaloktyā jātivācyatvāt tathā saṃdhāvyatikramāt    yathā dyūtaviśeṣādau svapratijñākṣater jayaḥ  loke tathaiva śāstreṣu vāde prātibhagocare    dviprakāraṃ tato jalpāt tattvaprātibhagocarāt  nānyabhedapratiṣṭhānaṃ prakriyāmātraghoṣaṇāt    so 'yaṃ jigīṣubodhāya vādanyāyaḥ satāṃ mataṃ  prakartavyo bruvāṇena nayavākyair yathoditaiḥ    samuddiṣṭo mārgas trivapur abhavatvasya niyamā d vinirdiṣṭā dṛṣṭir nikhilavidhinā jñānam amalam  pramāṇaṃ saṃkṣepād vividhanayasaṃpac ca muninā sugṛhyādye 'dhyāye 'dhigamanapathaḥ svānyaviṣayaḥ    prathamo 'dhyāyaḥ samāptaḥ atha dvitīyo 'dhyāyaḥ  samyagdṛggocaro jīvas tasyaupaśamikādayaḥ  svaṃ tattvaṃ paṃca bhāvāḥ syuḥ saptasūtryā nirūpitāḥ    anudbhūtasvasāmarthyaṃ vṛttitopaśamo mataḥ karmaṇāṃ puṃsi toyādāv adhaḥprāpitapaṅkavat    teṣām ātyaṃtikī hāniḥ kṣayas tadubhayātmakaḥ kṣayopaśama udgītaḥ kṣīṇākṣīṇabalatvataḥ    udayaḥ phalakāritvaṃ dravyādipratyayadvayāt dravyātmalābhahetuḥ syāt pariṇāmo napekṣiṇaḥ    etatprayojanā bhāvāḥ sarvaupaśamikādayaḥ ity aupaśamikādīnāṃ śabdānām upavarṇitā    niruktir arthasāmarthyād jñātum avyabhicāriṇī tato nyatrāpravṛttatvāt jñānacāritraśabdavat    prāgaupaśamikasyoktir bhavyasyānādisaṃsṛtau vartamānasya samyaktvagrahaṇe tasya saṃbhavāt    stokatvāt sarvabhāvebhyaḥ stokakālatvato pi vā śeṣebhyaḥ kṣāyikādibhyaḥ kathaṃcit tad virudhyate    tatas tu kṣāyikasyoktir asaṃkhyeyaguṇatvataḥ bhavyajīvasvabhāvatvakhyāpanārthatvato pi ca    kṣāyopaśamikasyāto yā saṃkhyeyaguṇatvataḥ yuktāsti taddvayātmatvād bhavyetarasamatvataḥ    uktir audayikasyātas tena jīvāv abodhataḥ pāriṇāmikabhāvasya tato ṃte sarvanṛsthiteḥ    na caiṣāṃ dvandvanirdeśaḥ sarveṣāṃ sūriṇā kṛtaḥ kṣāyopaśamikasyaiva miśrasya pratipattaye    nānarthakaś caśabdau tau madhye sūtrasya lakṣyate nāpy aṃte dvyādisaṃyogajanmabhāvopasaṃgrahāt    kṣāyopaśamikaṃ cāṃte noktaṃ madhye tra yujyate graṃthasya gauravābhāvād anyathā tatprasaṃgataḥ    niravadyamataḥ sūtraṃ bhāvapaṃcakalakṣaṇam prakhyāpayati niḥśeṣadurārekāvivekataḥ    dvyādīnāṃ bhedaśabdena vṛttir anyapadārthikā dvaṃdvabhājāṃ bhaved atra svābhipretārthasiddhitaḥ    pratyekaṃ bhedaśabdasya samāptir bhujivanmatā yathākramam iti khyāte py akramasya nirākriyā    puṃsi samyaktvacāritramohasyopaśamaḥ kvacit śāṃtaprasattisaṃsiddher yathā paṃkasya vāriṇi    yau yat kāluṣyahetuḥ syāt sa kutaścit praśāmyati tatra toye yathā paṃkaḥ katakādinimittataḥ    na cābhavyādikāluṣyahetunā vyabhicāritā kutaścit kāraṇāt tasya praśamaḥ sādhyate yataḥ    na ca tatpraśame kiṃcid abhavyasyāsti kāraṇaṃ tadbhāve tasya bhavyatvaprasaṃgād avipakṣatā    svayaṃ saṃvidyamānā vā samyaktvādiprasannatā siddhātra sādhayaty eva tanmohasyopaśāṃtatām    ātyaṃtikaḥ kṣayo jñānadarśanāvaraṇasya ca sāṃtarāyaprapaṃcasyānaṃtaśuddhiprasiddhitaḥ    śuddhiḥ prakarṣam āyāti paramaṃ kvacid ātmani prakṛṣyamāṇavṛddhitvāt kanakādiviśuddhivat    śuddhir jñānādikasyātra jīvasyāsty atiśāyinī bhavyasya bādhakābhāvād ity asiddhātra sādhanā    nānaikāṃtikam apy etat tad astu dvyā vibhāvyate tasyā api kvacit siddheḥ prakarṣasya parasya ca    prāksādhitātra sarvajñajñānavṛddhiḥ pramāṇataḥ darśanasya viśuddhir vā tata evāvinābhuvaḥ    kṣīṇākṣīṇātmanāṃ ghātikarmaṇām avasīyate śuddhāśuddhātmatāsiddhir anyathānupapattitaḥ    tato matyādivijñānacatuṣṭayam iha smṛtaṃ śuddhāśuddhātmakaṃ liṃgaṃ tadāvaraṇakarmaṇām    kṣayopaśamasadbhāve matyajñānādi ca trayaṃ darśanatritayaṃ cāpi nijāvaraṇakarmaṇāṃ    labdhayaḥ paṃca tādṛśyaḥ svāṃtarāyasya karmaṇaḥ samyaktvaṃ dṛṣṭimohasya vṛttaṃ vṛttam uhas tathā    saṃyamāsaṃyamo pīti ghātikṣīṇopaśāṃtatā siddhā tadbhavabhāvānāṃ tathā bhāvaṃ prasādhayet    anyathābhāvahetūnāṃ keṣāṃcid udayaḥ sthitaḥ kāluṣyavittitas tadvadgatināmādayas tu te    gatināmodayād eva gatir audayikī matā tadviśeṣodayāt saiva caturdhā tu viśiṣyate    tayopalakṣitāghātikarmodayanibaṃdhanaṃ sukhādyaudayikaṃ sarvam etenaivopavarṇitam    tathā krodhādibhedasya kaṣāyasyodayān nṛṇām caturbhedaḥ kaṣāyaḥ syād anyathābhāvasādhanaḥ    liṃgaṃ vedodayāt tredhā hāsyādyudayato pi ca hāsyādis tena jīvasya muninā prativarṇitaḥ    dṛṣṭimohodayāt puṃso mithyādarśanam iṣyate dṛgāvaraṇasāmānyodayāc cādarśanaṃ tathā    sāsādanaṃ ca samyaktvaṃ yadānaṃtānubaṃdhinaḥ kaṣāyasyodayāj jātaṃ tad apy etena varṇitam    samyagmithyātvam ekeṣāṃ tatkarmodayajanmakaṃ matam audayikaṃ kaiścit kṣāyopaśamikaṃ smṛtam    jñānāvaraṇasāmānyasyodayād upavarṇitaṃ jīvasyājñānasāmānyam anyathānupapattitaḥ    vṛttimohodayāt puṃso 'saṃyatatvaṃ pracakṣyate karmamātrodayād evāsiddhatvaṃ praṇigamyate    kaṣāyodayato yogapravṛttir upadarśitā leśyā jīvasya kṛṣṇādiḥ paḍbhedā bhāvato nadhaiḥ    anādipariṇāmo sti tatropādhiparāṅmukhaḥ sopādhipariṇāmānām anyathātattvahānitaḥ    etatsamudbhavā bhāvā dvyādibhedā yathākramam jīvasyaivopapadyaṃte citsvabhāvasamanvayāt    kṣāyikā nava bhāvāḥ syuḥ puruṣasyaiva tattvataḥ kṣāyikatvād yathā tasya siddhatvam iti niścayaḥ    kṛtsnakarmakṣayāt tāvat siddhatvaṃ kṣāyikaṃ mataṃ sarveṣām ātmarūpaṃ cety aprasiddhaṃ na sādhanam    dvāv aupaśamikau bhāvau jīvasya bhavato dhruvaṃ mokṣahetutvataḥ karmakṣayajanmadṛgādivat    kṣāyopaśamikā dṛṣṭijñānacāritralakṣaṇāḥ bhāvāḥ puṃso 'ta eva syur anyathānupapattitaḥ    pradhānādyātmakā hy eṣā samyagdṛṣṭyādibhāvanā na puṃso mokṣahetuḥ syāt sarvathātiprasaṃgataḥ    kṣāyopaśamikāḥ śeṣā bhāvāḥ puṃvanmatā bhṛtaḥ kṣāyopaśamikatvāt syuḥ samyagdṛgbodhavṛttavat    jīvasyaudayikāḥ sarve bhāvā gatyādayaḥ smṛtāḥ jīve saty eva sadbhāvād asaty anupapattitaḥ    karmodaye ca tasyaiva tathā pariṇamatvataḥ teṣāṃ tatpariṇāmatvaṃ kathaṃcin na virudhyate    bhavyābhavyatvayor jīvasvabhāvatvaṃ vibhāvyate pāriṇāmikatāyogāc cetanatvavivartavat    cetanatvasvabhāvatvam ātmano 'siddham ity asat svopayogasvabhāvatvasiddheḥ prāgabhidhānataḥ    nanv aupaśamikādīnāṃ tyāgaś cen nirvṛtātmanaḥ niḥsvabhāvatvam āsaktaṃ nairātmyaṃ sarvathā tataḥ    tadatyāge tu mokṣasyābhāvaḥ syād ātmanaḥ sadā tato na tatsvabhāvatvaṃ jīvasyety apare viduḥ    tadasaṃgatam ādeśavacanād eva dehinaḥ teṣāṃ tadrūpatābhīṣṭer atyāgāc ca kathaṃcana    citsvabhāvatayā tāvan naiṣāṃ tyāgaḥ kathaṃcana kṣāyopaśamikatvopaśamikatvena tatkṣaye    teṣām audayikatvena naiva syān niḥsvabhāvatā mokṣābhāvo 'pi cāpuṃsaḥ kṣāyikādyavināśataḥ    na caupaśamikādīnāṃ nāśāj jīvāsvabhāvatā pratikṣaṇavivartānāṃ tatsvabhāvatvahānitaḥ    kūṭasthātmakatāpatteḥ sarvathārthakriyākṣateḥ vastutvahānito jīvatattvābhāvaprasaṃgataḥ    tathā ca nāśino bhāvāḥ svabhāvā nātmanas tathā anātmano 'pi te na syur iti tadvastutā kutaḥ    evaṃ niḥśeṣatattvānām abhāvaḥ kena vāryate nāstibhāvasvabhāvatvābhāvaḥ sādhanavādinām    tataḥ syādvādināṃ siddhaḥ śāśvato 'śāśvato 'pi ca svabhāvaḥ sarvavastūnām iti nustatsvabhāvatā    tatra kṣayodbhavo bhāvaḥ kṣayopaśamajaś ca yaḥ tadvyaktivyāpi sāmānyam upayogo sya lakṣaṇaṃ    sa dvividho ṣṭacaturbhedaḥ ity ukteḥ sūriṇā svayam śeṣabhāvatrayātmatvasyaitallakṣyatvasiddhitaḥ    evaṃ sūtradvayenoktaṃ lakṣaṇaṃ lakṣayen naraṃ kāyād bhedena saṃśleṣam āpannād api tattvataḥ    lakṣyāḥ saṃsāriṇo jīvā muktāś ca bahavo nyathā tadekatvapravādaḥ syāt sa ca dṛṣṭeṣṭabādhitaḥ    samanaskāmanaskās te matāḥ saṃsāriṇo dvidhā tadvedanasya kāryasya siddher iṣṭaviśeṣataḥ    trasās te sthāvarāś cāpi tadanyataranihnave jīvatattvaprabhedānāṃ vyavasthānāprasiddhitaḥ    jīvāḥ pṛthvīmukhās tatra sthāvarāḥ paramāgamāt sunirbādhāt praboddhavyā yuktyā ekeṃdriyā hi te    trasāḥ punaḥ samākhyātāḥ prasiddhā dvīṃdriyādayaḥ ity evaṃ paṃcabhiḥ sūtraiḥ sarvasaṃsārisaṃgraha    paṃceṃdriyāṇi jīvasya manaso niṃdriyatvataḥ buddhyahaṃkārayor ātmarūpayos tatphalatvataḥ    vāgādīnām ato bhedāsiddher dhīsādhanatvataḥ sparśādijñānakāryāṇām evaṃvidhavinirṇayāt    dvividhāny eva nirvṛttisvabhāvāny anuminvate siddhopakaraṇātmāni taccyutau tadvidacyuteḥ    bhāveṃdriyāṇi labdhyātmopayogātmāni jānate svārthasaṃvidi yogyatvād vyāpṛtatvāc ca saṃvidaḥ    sparśanādīni tāny āhuḥ kartuḥ sāṃnidhyavṛttitaḥ kriyāyāṃ karaṇānīha karmavaicitryatas tathā    itīṃdriyāṇi bhedena vyākhyātāni matāṃtaraṃ vyavacicchitsubhiḥ paṃcasūtryā yuktyāgamānvitaiḥ    sparśādayas tadarthāḥ syur dravyaparyāyatārhataḥ dravyaikāṃte kriyāyāḥ syāt sarvathā kūrmaromavat    tathaiva paryayaikāṃte bhedaikāṃte 'nayor api anekāṃtātmanā teṣāṃ nirbādham upalabdhitaḥ    sāmarthyād gamyamānasyāniṃdriyasyeha sūtritaḥ śrutam arthaḥ śrutajñānagamyaṃ vastu tad ucyate    manomātranimittatvāt śrutajñānasya kārtsnyataḥ sparśanādīṃdriyajñeyas tadartho hi niyamyate    iti sūtradvayenākṣamanorthānāṃ prarūpaṇaṃ kṛtaṃ tajjanmavijñānanirālaṃbanatāchide    vanaspatyaṃtajīvānām ekaṃ sparśanam iṃdriyaṃ tajjajñānanimittāyāḥ pravṛtter upalaṃbhanāt    tathā kṛmiprakārāṇāṃ rasanenādhikaṃ mataṃ vṛddhe pipīlikādīnāṃ te ghrāṇena nirūpyate    cakṣuṣā tāni vṛddhāni bhramarādiśarīriṇāṃ śrotreṇānu manuṣyādijīvānāṃ tāni niścayāt    tattaddhetukavijñānamūlānām upalabdhitaḥ viṣayeṣu pravṛttīnāṃ svasminn iva vipaścitām    saṃjñināṃ samanaskatvaṃ saṃjñāyāḥ pratipattitaḥ sā hi śikṣākriyālāpagrahaṇaṃ munibhir matā    nānādibhavasaṃbhūtaviṣayānubhavodbhavā sāmānyadhāraṇāhārasaṃjñādīnāmadhīr api    kṣayopaśamabhedena yukto jīvo numanyate sadbhir bhāvamanas tāvat kaiścit saṃjñāviśeṣataḥ    tatsaddravyamanoyuktam ātmanaḥ karaṇatvataḥ svārthopalaṃbhane bhāvasparśanādivad atra naḥ    ātmapudgalaparyāyavyatiriktaṃ mano na tu dravyam asti parair uktaṃ pramāṇābhāvatas tathā    iti sūtratrayeṇākṣamanasāṃ svāminiścayaḥ saṃjñyasaṃjñivibhāgaś ca sāmarthyād vihito ṃjasā    iti svatattvādi viśeṣarūpato niveditaṃ tu vyavahārato nayāt  tad eva sāmānyam avāṃtaroditāt svasaṃgrahāt taddvitayapramāṇataḥ    gatau tu vigrahārthāyāṃ karmayogo mato nyathā tena saṃbaṃdhavaidhuryād vyomavannirvṛtātmavat    gatimattvaṃ punas tasya kriyāhetuguṇatvataḥ loṣṭhavaddhetudharmo sti tatra kāryakriyekṣaṇāt    sarvagatvād gatiḥ puṃsaḥ svavan nāstīti ye viduḥ teṣāṃ hetur asiddho sya kāyamātratvavedanāt    vibhuḥ pumān amūrtatve sati nityatvataḥ svavat ityādi hetavo py evaṃ pratyakṣahatagocarāḥ    hetur īśvarabodhena vyabhicārī ca kīrtitaḥ tasyāmūrtatvanityatvasiddher avibhutā matā    anityo bhavabodhaś cen na syāt tasya pramāṇatā gṛhītagrahaṇān no cet smṛtyādeḥ śāstrabādhitā    siddhā gatir anuśreṇi dehinaḥ paramāgamāt lokāṃtaraṃ pratijñeyaṃ pudgalasya ca nānyathā    poḍhā prakramayukto yam ātmeti vacanaṃ pumān saṃpradāyāt sunirṇītāsaṃbhavadbādhakatvataḥ    gatir muktasya jīvasyāvigrahā vakratāṃ prati nimittābhāvatas tasya svabhāvenordhvagatvataḥ    saṃsāriṇaḥ punar vakrībhāvayuktā ca sā matā caturbhyaḥ samayebhyaḥ prāk paratas tadasaṃbhavāt    niṣkuṭakṣetrasaṃsiddhes trivakragatisaṃbhavaḥ ekadvivakrayā gatyā kvacid utpattyayogataḥ    yeṣāṃ ca caturasraḥ syāl loko vṛtto pi vā mataḥ niṣkuṭatvavinirmuktas teṣāṃ sā na trivakratā    avigrahā gatis tatra proktaikasamayākhilā prāptiḥ samayamātreṇa lokāgrasya tanor api    ekaṃ samayam ātmā dvau trīn vā nāhārayaty ayaṃ śarīratrayaparyāptiprāyogyān pudgalān idam    caturthe samaye vaśyam āhārasya prasiddhitaḥ ṛjvām iva gatau prācye puṃsaḥ saṃsāracāriṇaḥ    dvitīye pāṇimuktāyāṃ lāṃgalikā tṛtīyake yathā tadvattrivakrāyāṃ caturthe vigrahaḥ grahaḥ    kṣaṇikaṃ niṣkriyaṃ cittaṃ svaśarīrapradeśataḥ bhinnaṃ cittāṃtaraṃ naiva prārabheta savigrahaṃ    sarvakāraṇaśūnye hi deśe kāryasya janmani kāle vā na kvacij jñātum asya janma na siddhyati    kūṭastho pi pumān naiva jahāti prācyavigrahaṃ na gṛhṇāty uttaraṃ kāyam anityatvaprasaṃgataḥ    pariṇāmī yathā kālo gatimānāharatyataḥ svopāttakarmasṛṣṭeṣṭadeśādīn pudgalāntaraṃ    iti vigrahasaṃprāptyai gatir jīvasya yujyate ṣaḍbhiḥ sūtraiḥ sunirṇītā nirbādhaṃ jainadarśane    saṃmūrchanādayo janma puṃso bhedena saṃgrahāt sato pi janmabhedasya parasyāṃtargater iha    tasyāpi yonayaḥ saṃti sacittādyā yathoditāḥ svāvāreṇa vinā janma kriyāyā jātvanīkṣaṇāt    tadvaicitryaṃ punaḥ karmavaicitryāt tad vihanyate kāryavaicitryasiddhes tu karmavaicitryanirṇayaḥ    yukto jarāyujādīnām eva garbho vadhāraṇāt devanārakaśeṣāṇāṃ garbhābhāvavibhāvanāt    syād devanārakāṇām upapādo niyatas tathā tasyābhāvāt tato nyeṣāṃ teṣāṃ janmāṃtaracyuteḥ    nirdiṣṭebhyas tu śeṣāṇāṃ yuktaṃ saṃmūrchanaṃ sadā garbhopapādayos tatra pratītyanupapattitaḥ    tathā saṃsvedajādīnām api saṃmūrchanaṃ mataṃ janmeti nāparo janmaprakāro sūtrito sti naḥ    ity evaṃ paṃcabhiḥ sūtraiḥ sūtritaṃ janma janmināṃ bhedaprabhedataś ciṃtyaṃ yuktyāgamasamāśrayaṃ    svayonau janma jīvasya śarīrotpattir iṣyate tenātraudārikādīni śarīrāṇi pracakṣate    siddham audārikaṃ tiryaṅmānuṣāṇām anekadhā śarīraṃ tatra tannāmakarmavaicitryato bṛhat    saṃbhāvyāni tato nyāni bādhakābhāvanirṇayāt paramāgamasiddhāni yuktito pi ca kārmaṇaṃ    kṣetrāvagāhanāpekṣāṃ kṛtvā sūkṣmaṃ paraṃ paraṃ taijasāt prāgasaṃkhyeyaguṇaṃ jñeyaṃ pradeśataḥ    tathānaṃtaguṇe jñeye pare taijasakārmaṇe  pradeśato lpatātāratamyaṃ kāyeṣu ye viduḥ sūkṣmatātāratamyasya sādhanaṃ te kutārkikāḥ    tasya kārpāsapiṃḍenānekāṃtāt triṣv ilātmanāṃ pradeśabahutātāratamyavatsthaulyabaṃdhane    karmaiva kārmaṇaṃ tatra śarīraṃ nṛguṇatvataḥ ity asaddravyarūpeṇa tasya paudgalikatvataḥ    karma pudgalaparyāyo jīvasya pratipadyate pārataṃtryanimittatvāt kārāgārādibaṃdhavat    svapnopabhogasiddhyarthaṃ kāyaṃ svapnāṃtikaṃ tu ye prāhus teṣāṃ nivāryaṃte bhogyāḥ svapnāṃtikāḥ katham    bhogyavāsanayā bhogyābhāsaṃ cet svapnavedināṃ śarīravāsanāmātrāc charīrābhāsanaṃ na kim    svābhāvikaṃ punar gātraṃ śuddhaṃ jñānaṃ vadaṃti ye kutas teṣāṃ vibhāgaḥ syāt taccharīraśarīriṇoḥ    kārmaṇāṃtargataṃ yuktaṃ śarīraṃ cātivāhikam nairmāṇikaṃ tu yat teṣāṃ tan no vaikriyikaṃ mataṃ    pārthivādiśarīrāṇi ye to bhinnāni menire pratīter apalāpena manyatāṃ te khavārijam    sarvasyānādisaṃbaṃdhe cokte taijasakārmaṇe śarīrāṃtarasaṃbaṃdhasyānyathānupapattitaḥ    tadādīni śarīrāṇi bhājyāny ekatra dehini sakṛt saṃty ācaturbhyo na paṃcānāṃ tatra saṃbhavaḥ    aṃtyaṃ nirupabhogatvāc cheṣebhyo bhidyate vapuḥ śabdādyanubhavo hy asmād upabhogo na jāyate    ādyaṃ tu sopabhogābhyāṃ parābhyāṃ bhinnam ucyate garbhasaṃmūrchanād dhetor jāyamānatvato bhidā    aupapādikatāsiddher bhinnam audārikād idaṃ tāvad vaikriyikaṃ devanārakāṇām udīritam    kiṃcid audārikatve pi labdhipratyayatā gateḥ tataḥ pṛthak kathaṃcit syād etatkarmasamudbhavaṃ    tathā taijasam apy atra labdhipratyayam īyatāṃ sādhāraṇaṃ tu sarveṣāṃ dehināṃ kāryabhedataḥ    āhārakaṃ śarīraṃ tu śubhaṃ kāryakṛtatvataḥ viśuddhikāraṇatvāc ca viśuddhaṃ bhinnam anyataḥ    avyāghātisvarūpatvāt pramattādhipatitvataḥ phalahetusvarūpādhipatibhedena niścitam    caturdaśabhir ity evaṃ sūtrair uktaṃ prapaṃcataḥ śarīraṃ tīrthikopetaśarīravinivṛttaye    nārakā dehinas tatra proktāḥ saṃmūrchinaś ca ye napuṃsakāni te nityaṃ na devā jātucit tathā    strīpuṃsasukhasaṃprāptihetuhīnatvataḥ purā napuṃsakatvaduḥkhāptihetvabhāvād yathākramaṃ    trivedāḥ prāṇinaḥ śepās tebhyas tādṛk suhetutaḥ iti sūtratrayeṇoktaṃ liṃgabhedena dehinām    atraupapādikādīnāṃ nāpavartyaṃ kadācana somāttamāyurīdṛkṣādṛṣṭasāmarthyasaṃgateḥ    sāmarthyatas tato nyeṣām apavartyaṃ viṣādibhiḥ siddhaṃ cikitsitādīnām anyathā niṣphalatvataḥ    tadanyataradṛṣṭatvāc charīritvādihetubhiḥ sarveṣām apavartyaṃ tannāpavartyam itīrayan    prabādhyate pramāṇena sveṣṭabhedāprasiddhitaḥ sarvajñādivirodhāc ca mānameyāvyavasthiteḥ    iha sati bahiraṃge kāraṇe ke 'pi mṛtyor na mṛtim anubhavaṃti svāyuṣo hānyabhāve  jvalitahutabhugaṃtaḥpātināṃ paṃcatāpi pratiniyatatanur no jīvitasyāpi dṛṣṭeḥ    oṃ tṛtīyo 'dhyāyaḥ    ghanāṃbupavanākāśapratiṣṭhāḥ saptabhūmayaḥ ratnaprabhādayo 'dhodhaḥ saṃbhāvyā bādhakacyuteḥ    svātmapratiṣṭham ākāśaṃ vibhudravyatvato nyathā ghaṭāder iva naivopapadyeta vibhutāsya sā    tanuvātaḥ punar vyomapratiṣṭhaḥ pratipadyate tanuvātaviśeṣatvān meghadhāraṇavāyuvat    taddhṛtaś cāṃbuvātaḥ syād dhanātmārthasya dhārakaḥ aṃbuvātatvato vārddher vīcīvāyuviśeṣavat    ghanānilaṃ pratiṣṭhānahetuḥ kūrmaḥ sa eṣa naḥ na kūrmādir anādhāro dṛṣṭakūrmādivat sadā    tannivāsajanādṛṣṭaviśeṣe vasato yadi kūrmādir āśrayaḥ kiṃ na vāyudṛṣṭāṃtasārataḥ    nordhvādhobhramaṇaṃ bhūmer ghaṭate golakātmanaḥ sadā tathaiva tadbhrāṃtihetor anupapattitaḥ    dṛśyamānasamudrādijalasthitivirodhataḥ gole bhrāmyati pāṣāṇagolavat kva viśeṣavāk    gurvarthasyābhimukhyena bhūmeḥ sarvasya pātataḥ tatsthitiś cet pratīyeta nādhastāt pātadṛṣṭitaḥ    bhūbhramāgamasatyatve 'bhūbhramāgamasatyatā kiṃ na syāt sarvathā jyotirjñānasiddher abhedataḥ    dvayoḥ satyatvam iṣṭaṃ cet kvāviruddhārthatā tayoḥ pravaktror āptatā naivaṃ sugateśvarayor iva    sarvadādhaḥ patanty etāḥ bhūmayo maruto 'sthiteḥ īraṇātmatvato dṛṣṭaprabhaṃjanavad ity asat    maruto dhārakasyāpi darśanāt toyadādiṣu sarvadā dhārakatvasyānāditvāt tatra na kṣatiḥ    nāparyaṃtā dharādho pi siddhā saṃsthānabhedataḥ dharavatsvam aparyaṃtaṃ siddhaṃ saṃsthānavan na hi    nādho dho gativaicitryaṃ viruddhaṃ prāṇinām iha tādṛk pāpasya vaicitryāt tannimittasya tattvataḥ    tataḥ sapteti saṃkhyānaṃ bhūmīnāṃ na viruddhyate saṃkhyāṃtaraṃ ca saṃkṣepavistarādivaśān mataṃ    triṃśallakṣādisaṃkhyā ca narakāṇāṃ susūtritā ratnaprabhādiṣūktāsu prāṇyadṛṣṭaviśeṣataḥ    iti sūtradvayenādholokāvāsaviniścayaḥ śreyān sarvavidāyātasyāmnāyasyāvilopataḥ    tiryaṃco 'śubhaleśyādyās tebhyo pyatiśayena ye prāṇino 'śubhaleśyādyāḥ kecit te tatra nārakāḥ    saṃkleśatāratamyenāśubhatātāratamyatā siddhyed aśubhaleśyāditāratamyam aśeṣataḥ    tathā tair nārakair duḥkhaṃ parasparam udīryate raudradhyānāt samudbhūteḥ kudher meṣādibhir yathā    nimittahetavas tv ete 'nyonyaṃ duḥkhasamudbhave bahiraṃgās tathābhūte sati svakṛtakarmaṇi    saṃkliṣṭair asurair duḥkhaṃ nārakāṇām udīryate meṣādīnāṃ yathā tādṛkrūpais tisṛṣu bhūmiṣu    parāsu gamanābhāvāt teṣāṃ tadvāsidehināṃ duḥkhotpattau nimittatvam asurāṇāṃ na vidyate    evaṃ sūtratrayonnītasvabhāvā nārakāṃginaḥ svakarmavaśataḥ saṃti pramāṇanayagocarāḥ    narakeṣūditaikādisāgaropamasammitaḥ sthitir asty atra sattvānāṃ sadbhāvāt tādṛgāyuṣaḥ    saṃkṣepādiparā tv agre vakṣyamāṇā tu madhyamā sāmarthyād bahudhā proktā nirṇetavyā yathākramaṃ    saptādho bhūmayo yasmān madhyaloko balād gataḥ tan na dvīpasamudrāḥ syuḥ sūtradvitayavarṇitā    tanmadhye merunābhiḥ syāj jaṃbūdvīpo yathoditaḥ sūtreṇaikena niḥśeṣakumatānāṃ vyapohanāt    kṣetrāṇi bharatādīni sapta tatrāpareṇa tu sūtreṇoktāni tatsaṃkhyāṃ haṃtuṃ tīrthakakalpitām    pūrvāparāyatās tatra parvatās tadvibhājinaḥ ṣaṭpradhānāḥ pareṇaite proktā himavadādayaḥ    padmādayo hradās teṣām upari pratipāditāḥ sūtreṇaikena vijñeyā yathāgamam asaṃśayam    saṃkhyayāyām aviṣkaṃbhāvagāhagatayā hradaḥ sūtradvayena nirdiṣṭaḥ prathamaḥ sarvavedibhiḥ    tanmadhye yojanaṃ proktaṃ puṣkaraṃ dviguṇās tataḥ hradāś ca puṣkarāṇīti sūtradvitayato ṃjasā    devyaḥ śrīmukhāḥ khyātāḥ sūtreṇaikena sūcanāt ṣaḍ eva tannivāsinyastā sasāmānikādayaḥ    atha gaṃgādayaḥ proktāḥ saritaḥ kṣetramadhyagāḥ pūrvāparasamudrāṃtaḥpraveśinyo yathāgamaṃ    varṣavarṣadharābādhyaviṣkaṃbhakathanaṃ kṛtaṃ sūtratrayeṇa bhūmīnāṃ sthitibhedodayena tu    tatkṣetravāsināṃ nṝṇāṃ sāyuṣaḥ sthitir īritā sūtratrayeṇa viṣkaṃbho bharatasyaikasūtrataḥ    jaṃbūdvīpagavarṣādiviṣkaṃbhādir aśeṣataḥ sadā dvirdhātakīkhaṃḍe puṣkarārdhe ca bhīyate    prāṅmānuṣottarādyasmān manuṣyāḥ parataś ca na āryāmlecchāś ca te jñeyās tādṛkkarmabalodbhavāḥ    prāptarddhītarabhedena tatrāryā dvividhāḥ smṛtāḥ sadguṇair aryamāṇatvād guṇavadbhiś ca mānavaiḥ    tatra prāptarddhayaḥ saptavidhardhim adhisaṃsṛtāḥ buddhyādisaptadhā nānā viśeṣās tadviśeṣataḥ    saṃbhāvyaṃte ca te hetuviśeṣavaśavartinaḥ kecit prakṛṣyamāṇātmaviśeṣatvāt pramāṇavat    asaṃprāptardhayaḥ kṣetrādyāryā bahuvidhāḥ sthitāḥ kṣetrādyapekṣayā teṣāṃ tathā nirṇītiyogataḥ    tathā taddvīpajā mlecchāḥ pare syuḥ karmabhūmijāḥ ādyāḥ ṣaṇṇavatiḥ khyātā vārdhidvayataṭadvayoḥ    bhogabhūmyāyurutsedhavṛttayor bhogabhūmibhiḥ samapraṇidhayaḥ karmabhūmivatkarmabhūmibhiḥ    karmabhūmibhavā mlecchāḥ prasiddhā yavanādayaḥ syuḥ pare ca tadācārapālanād bahudhā janāḥ    saṃpradāyāvyavacchedād āryamlecchavyavasthitiḥ saṃtānena viniśceyā tadvidbhir vyavahāribhiḥ    svayaṃ saṃvedyamānā ca guṇadoṣanibaṃdhanā kathaṃcid anumeyā ca tatkāryasya viniścayāt    nityasarvagatāmūrtasvabhāvā sarvathā tu yā jātir brāhmaṇyacāṃḍālyaprabhṛtiḥ kaiścid īryate    sā na siddhā pramāṇena bādhyamānā kadācana   siddhaṃ sādṛśyasāmānyaṃ samānā iti tadgrahāt kutaścit sadṛśeṣv eva manuṣyeṣu gavādivat    sārdhadvidvīpaviṣkaṃbhaprabhṛti pratipāditaṃ samanuṣyaṃ catuṣṭyā ca sūtrāṇām iti gamyate    bharatādyā videhāṃtāḥ prakhyātāḥ karmabhūmayaḥ devottarakurūṃs tyaktvā tāḥ śeṣā bhogabhūmayaḥ    sāmarthyād avasīyaṃte sūtre sminn āgatā api samudradvitayaṃ yadvat pūrvasūtroktaśaktitaḥ    parāvare vinirdiṣṭe manuṣyāṇām iha sthitī tripalyopamasaṃkhyāṃtarmuhūrtagaṇane balāt    madhyamā sthitir eteṣāṃ vividhā viniveditā svopāttāyur viśeṣāṇāṃ bhāvāt sūtre tra tādṛśāṃ    te tiryagyonijānāṃ ca saṃkṣepārtham ihodite sthitī prakaraṇābhāve py eṣāṃ sūtreṇa sūribhiḥ    sārdhadvīpadvaye kṣetravibhāgādinirūpaṇaṃ adhyāye sminn asaṃkhyeyeṣv api dvīpeṣu yat kṛtaṃ    manuṣyalokasaṃkhyā yā jijñāsaviṣayā muneḥ tena nirṇīyate sadbhir anyatra tadabhāvataḥ    na ca dvīpasamudrādiviśeṣāṇāṃ prarūpaṇaṃ niḥprayojanam āśaṃkyaṃ manuṣyādhāraniścayāt    nānākṣetravipākīni karmāṇy utpattihetavaḥ saṃty eva tadviśeṣeṣu pudgalādivipākavat    tadaprarūpaṇe jīvatattvaṃ na syāt prarūpitaṃ viśeṣeṇeti tajjñānaśraddhāne na prasiddhyataḥ    tannibaṃdhanam akṣuṇṇaṃ cāritraṃ ca tathā kva nu muktimārgopadeśo no śeṣatattvaviśeṣavāk    nanu dvīpādayo dhīmaddhetukāḥ saṃtu sūtritāḥ sanniveśaviśeṣatvasiddher ghaṭavad ity asat    hetor īśvaradehenānekāṃtād iti kecana tatrāpare tu manyaṃte nirdeheśvaravādinaḥ    nimittakāraṇaṃ teṣāṃ neśvaras tatra siddhyati nirdehatvād yathā muktaḥ puruṣaḥ sammataḥ svayaṃ    nityajñānatvato hetur īśvaro jagatām iti na yuktam anvayāsattvād vyatirekāprasiddhitaḥ    bodho na vedhaso nityo bodhatvād anyabodhavat iti hetor asiddhatvān na vedhāḥ kāraṇaṃ bhuvaḥ    kālāder aśarīrasya kāryotpattinimittatā siddheti vyabhicāritvaṃ nirdehatvasya cen mataṃ    na tasya puruṣatvena viśiṣṭasya prayogataḥ kālāder aśarīratveśvaratvāvyabhicārataḥ    jagatāṃ neśvaro hetur ajñatvād anyajaṃtuvat na jñosāvaśarīratvān muktavat so nyathā sa vit    sadehabuddhimaddhetur dṛṣṭāṃto pi ghaṭaḥ kathaṃ nirdehabuddhimaddhetau sādhye jagati yujyate    dhīmaddhetutvasāmānyaṃ sādhyaṃ cen nirviśeṣakaṃ nānādhīmannimittatvasiddheḥ syāt siddhasādhanaṃ    nānātvapariṇāmākhyabhāvakarmanimittakaṃ siddhaṃ hīdaṃ jagat tasya tadbhogyatvaprasiddhitaḥ    saśarīrakulālādiḥ kurvan dṛṣṭo ghaṭādikaṃ svayam ātmā punar deham aśarīro pi viśrutaḥ    sadehetarasāmānyasvabhāvo jagadīśvaraḥ karotīti nu sādhyeta yadā doṣas tadā kva saḥ    ity eke tadasaṃbaṃdhaṃ svaśarīrāṇi kurvatā śarīrāṃtarasaṃbaṃdhātmanāṃ syān nānyathā kriyā    parāparaśarīrāṇāṃ kalpanān nānavasthitiḥ te samānādisaṃbaṃdhāt kāryakāraṇabhāvataḥ    sā yady adṛṣṭasadbhāvān matā tasya tu siddhyatu pūrvaṃ karmaśarīreṇa saṃbaṃdhaḥ paravigrahāt    śarīram ātmano 'dṛṣṭaṃ pudgalātmakam īritaṃ sarvathātmaguṇatve sya pārataṃtryānimittatā    kṣityādimūrtayaḥ saṃti maheśasya tadudbhave sa eva hetur ityādi vyabhicāro na ced bhavet    tathānye pi kimātmānaḥ svamūrtyutpattihetavaḥ svayaṃ na syur itīśasya kva siddhyet sarvahetutā    kurvan kṣityādimūrtīṃś ca svamūrtiṃ tatprayogataḥ mūrtyaṃtarāṇi kurvīta yadi vānādibhir yataḥ    gatvā sudūram apy evaṃ yadi mūrtī na kāścana kuryāt tābhis tadā hetor anaikāṃtikatā na kiṃ    anādimūrtibhis tasya saṃbaṃdha iti cen mataṃ kiṃkṛtānāditā tāsāṃ sanniveśaviśiṣṭatā    na vā tābhir maheśena kṛtābhir vyabhicāratā sādhanasya kṛtābhir vā tena tām anavasthitiṃ    kevalaṃ mukham astīti yat kiṃcid abhidhīyate mithyottarāṇām ānaṃtyāt prekṣāvattā nu tatra kā    buddhimaddhetukaṃ yādṛgdṛṣṭaṃ dravyagrahādiṣu saṃniveśaviśiṣṭatvaṃ tādṛgjagati nekṣyate    iti hetor asiddhatvaṃ kaiścid uktaṃ na yujyate tathā sarveṣṭahetūnām asiddhatvaprasaṃgataḥ    kṛtadhījanakaṃ tad dhi nākriyādarśino yathā kvacit tathā na dhūmādir agnyādijñānakāraṇaṃ    vahnyādibuddhikāritvaṃ svayaṃ siddhasya siddhatā dhūmādeḥ sādhanasyaitatsiddhau vanhyādidhīr iti    yathānyonyāśrayas tadvatprakṛte pi hi sādhane kṛtadhījanakatve sya siddhatāyāṃ kṛtatvadhīḥ    tato naikāṃtiko hetur eṣa vācyaḥ parīkṣakaiḥ kāryatvārthakriyākṛtvapramukhonena varṇitaḥ    sthāvarādibhir apy asya vyabhicāro nuvarṇyate kaiścit pakṣīkṛtais teṣām adhīmaddhetutāsthitaiḥ    dṛṣṭakṣityādihetūnām anvayavyatirekataḥ dṛśyate sthāvarādīnāṃ sarvagatvena vedhasaḥ    na deśe vyatireko sti kṣitāvasya sadā sthiteḥ sarvagasyānvayas tv eko na tajjanyaṃ tv asādhanaḥ    naśvaratvād adṛṣṭasyāsarvagatvāc ca siddhyati vyatirekas tatra tasya sthāvarādinimittatā    kālādiparyayasyāpi nityatvādyaprasiddhitaḥ sarvathā kāryaniṣpattau hetutvaṃ na virudhyate    maheśvarasisṛkṣāyā jagajjanmeti kecana tasyāḥ śāśvatatāpāyād avibhutvād adṛṣṭavat    tadayuktaṃ maheśasya sisṛkṣāṃtarato vinā sisṛkṣotpādane hetos tathaiva vyabhicārataḥ    sisṛkṣāṃtaratas tasyāḥ prasūtāv anavasthiteḥ sthāvarādisamudbhūtir na syāt kalpaśatair api    tadbhoktṛprāṇyadṛṣṭasya sāmarthyāt sā bhavasya cet prasūtiḥ sthāvarādīnāṃ tasmād anvayanān na kiṃ    svātaṃtryeṇa tadudbhūtau sarvadoparam acyuteḥ sarvatra sarvakāryāṇāṃ janma kena nivāryate    vyākhyātātreśvareṇaiva nityā sādhyātirekiṇī kvacid vyavasthitānyatra na syād anvayabhāg api    evamīśasya hetutvābhāvasiddhiṃ pracakṣate vyāpakānupalaṃbhena sthāvarādisamudbhave    pakṣasyaivānumānena bādhodbhāvyeti cāpare pakṣīkṛtair ayuktatvād vyabhicārasya sādhane    sarvathā yadi kāryatvaṃ hetuḥ syādvādināṃ tayā na siddho dravyarūpeṇa sarvasyākāryatā sthiteḥ    kathaṃcit tu viruddhaḥ syād dhīmattve tu jagatsvayaṃ kathaṃcit sādhayann iṣṭaviparītaṃ viśeṣataḥ    nākrośaṃtaḥ palāyaṃte viruddhā hetavaḥ svataḥ sarvage buddhimaddhetau sādhye nyair jagatām iha    dravyaṃ guṇaḥ kriyānaṃtaviśeṣo śāśvato nanu vivādādhyāsito dhīmān hetuḥ sādhyasthito yadā    kāryatvaṃ na tathā sveṣṭaviparītaṃ prasādhayet nāpy asiddhaṃ bhavet tatra sarvathāpi vivakṣitaṃ    ity eke tadasaṃprāptaṃ bhedaikāṃtāprasiddhitaḥ kāryakāraṇayor aikyapratipatteḥ kathaṃcana    naikāṃtabhedabhṛtsiddho nityād api guṇād guṇī dravyasyānādiparyaṃtapariṇāmāt tathā sthiteḥ    vivādādhyāsitātmāni karaṇādīni kenacit kartrādhiṣṭhitavṛttīni karaṇāditvato yathā    vāsyādīni ca tatkartṛsāmānye siddhasādhanaṃ sādhye kartṛviśeṣe tu sādhyaśūnyaṃ nidarśanam    tatsāmānyaviśeṣasya sādhyatvāc ced adūṣaṇaṃ so pi siddhākhilavyaktivyāpī kaścit prasiddhyati    deśakālaviśeṣāvacchinnāgnivyaktiniṣṭhitaṃ sādhyate hy agnisāmānyaṃ dhūmān nāsiddhabhedagaṃ    siddhe kartari niḥśeṣakārakāṇāṃ prayoktari hetuḥsāmarthyataḥ siddhaḥ sa ced iṣṭo maheśvaraḥ    naivaṃ prayoktur ekasya kārakāṇām asiddhitaḥ nānā prayoktṛkatvasya kvacid dṛṣṭer asaṃśayaṃ    iti kriyānumānānāṃ mālā naivāmalā bhuvaṃ kartary ekatra saṃsādhye numityā pakṣabādhanāt    viśvataś cakṣur ityāder āgamād api neśvaraḥ siddhyet tasyānumānenānugrahābhāvatas tataḥ    loko 'kṛtrima ity etadvacanaṃ satyatāṃ gataṃ bādhakasya pramāṇasya sarvathā vinivāraṇāt    viśiṣṭasanniveśaṃ ca dhīmatā na kṛtaṃ jagat dṛṣṭakṛtrim akūṭādivilakṣaṇatayekṣaṇāt    samudrākarasaṃbhūtamaṇim uktāphalādivat iti hetuvacaḥ śakter api loko 'kṛtaḥsthitaḥ    nānyathānupapannatvam asyāsiddhaṃ kathaṃcana kṛtrimārthavibhinnasyākṛtrimatvaprasiddhitaḥ    nāsiddhir maṇimuktādau kṛtrimetarato kṛte kṛtrimatvaṃ na saṃbhāvyaṃ jagatskaṃdhasya tādṛśaḥ    iti kathitaviśeṣo madhyalokasya samyak sakalanayamayena jyotiṣā sanniveśaḥ  pravacanabhavasūtrair janyamānena sadbhiḥ katham api parivedyo bhāvayadbhiḥ prapaṃcāt    atha caturtho 'dhyāyaḥ    devāś caturṇikāyā ity etat sūtraṃ yad abravīt nārakāṇām ivādhāram anuktaṃ devasaṃvide    sūtrakāras tad eteṣāṃ lokatrayanivāsināṃ sāmarthyād ūrdhvalokasya saṃsthānaṃ vaktum aihata    triṣv ādyeṣu nikāyeṣu devāḥ sūtreṇa sūcitāḥ saṃti pītāṃtaleśyās te nānyathā bādhitatvataḥ    caturṣv api nikāyeṣu te daśādivikalpakāḥ kalpopapannaparyaṃtā iti sūtre niyāmataḥ    iṃdrādayo daśaiteṣām ekaśaḥ pratisūtritāḥ puṇyakarmaviśeṣāṇāṃ taddhetūnāṃ tathā sthiteḥ    tatrāpi vyaṃtarā varjyā jyotiṣkāś copavarṇitāḥ trāyastriṃśais tathā lokapālais taddhetvasaṃbhavāt    dvīṃdrāḥ nikāyayor devāḥ pūrvayor iti niścayāt tatraikasya prabhor bhāvo neti te stokapuṇyakāḥ    devāḥ kāyapravīcārā ā aiśānāditīraṇāt caturṣv api nikāyeṣu sukhabhedasya sūcanaṃ    te sparśādipravīcārāḥ śeṣās tebhyo yathāgamaṃ jñeyāḥ kāmodayāḥ pāpatāratamyaviśeṣataḥ    tebhyas tu pare kāmavedanāyāḥ parikṣayāt sukhaprakarṣasaṃprāpteḥ pravīcāreṇa varjitāḥ    saṃbhāvyaṃte ca te sarve tāratamyasya darśanāt narāṇām iha keṣāṃcit kāmāpāpasya tādṛśaḥ    ity evaṃ navabhiḥ sūtraiḥ nikāyādyaṃtarasya yā kalpanā saṃśayaś cātra keṣāṃcit tannirākṛtiḥ    daśāsurādayas tatra proktā bhavanavāsinaḥ adholokagateṣv eṣāṃ bhavaneṣu nivāsataḥ    aṣṭabhedā vinirdiṣṭā vyaṃtarāḥ kinnarādayaḥ vividhānyaṃtarāṇy eṣām adhomadhyamalokayoḥ    jyotiṣkāḥ paṃcadhā dṛṣṭāḥ sūryādyā jyotir āśritāḥ nāmakarmavaśāt tādṛk saṃjñā sāmānyabhedataḥ    sāmānyato 'numeyāś ca chadmasthānāṃ viśeṣataḥ paramāgamasaṃgamyā iti nādṛṣṭakalpanā    niruktyā vāsabhedasya pūrvavadgatyabhāvataḥ te nṛloka iti proktam āvāsapratipattaye    asmāt samāddharābhāgād ūrdhvaṃ teṣāṃ prakāśitāḥ āvāsāḥ kramaśaḥ sarvajyotiṣāṃ viśvavedibhiḥ    yojanānāṃ śatāny aṣṭau hīnāni daśayojanaiḥ utpatya tārakās tāvac caraṃty adha iti śrutiḥ    tataḥ sūryā daśotpatya yojanāni mahāprabhāḥ tataś caṃdramasośītiṃ bhāni trīṇi tatas trayaḥ    trīṇi trīṇi budhāḥ śukrā guravaś copari kramāt catvāro ṃgārakās tadvac catvāri ca śanaiś carāḥ    caraṃti tādṛśādṛṣṭaviśeṣavaśavartinaḥ svabhāvād vā tathānādinidhanād dravyarūpataḥ    eṣa eva nabho bhāgo jyotiḥsaṃghātagocaraḥ bahalaḥ sadaśakaṃ sarvo yojanānāṃ śataṃ smṛtaḥ    sa ghanodadhiparyaṃto nṛloke 'nyatra vā sthitaḥ siddhas tiryagasaṃkhyātadvīpāṃbhodhipramāṇakaḥ    sarvābhyaṃtaracārīṣṭaḥ tatrābhijidatho bahiḥ sarvebhyo gaditaṃ mūlaṃ bharaṇyo dhas tathoditāḥ    sarveṣām upari svātir iti saṃkṣepataḥ kṛtā vyavasthā jyotiṣāṃ ciṃtyā pramāṇanayavedibhiḥ    merupradakṣiṇā nityagatayas tv iti nivedanāt naivāpradakṣiṇā teṣāṃ kādācit kīṣyate na ca    gatyabhāvo pi cāniṣṭaṃ yathā bhūbhramavādinaḥ bhuvo bhramaṇanirṇītivirahasyopapattitaḥ    ūrdhvādhobhramaṇaṃ sarvajyotiṣāṃ dhruvatārakāḥ muktvā bhūgolakād evaṃ prāhur bhūbhramavādinaḥ    tad apy apāstam ācāryair nṛloka iti sūcanāt tatraiva bhramaṇaṃ yasmān nordhvādhobhramaṇe sati    samarātraṃdivāvṛddhir hānir doṣāc ca yujyate chāyāgrahoparāgādir yathā jyotirgatis tathā    khakhaṃḍabhedataḥ siddhā bāhyābhyaṃtaram adhyataḥ tathābhiyogyadevānāṃ gatibhedāt svabhāvataḥ    jyotiḥ śāstramato yuktaṃ naitatsyādvādavidviṣāṃ saṃvādakam anekāṃte sati tasya pratiṣṭhite    ye jyotiṣkāḥ smṛtā devās tatkṛto vyavahārataḥ kṛtaḥ kālavibhāgo yaṃ samayādir na mukhyataḥ    tadvibhāgāt tathā mukhyo nāvibhāgaḥ prasiddhyati vibhāgarahite hetau vibhāgo na phale kvacit    bahirmanuṣyalokāṃte vasthitā iti sūtrataḥ tatrāsan nāvyavacchedaḥ prādakṣiṇyamati kṣatiḥ    evaṃ sūtracatuṣṭayāj jyotiṣāmaraciṃtanaṃ nivāsādiviśeṣeṇa yuktaṃ bādhavivarjanāt    vaimānikā vimāneṣu nivāsād upavarṇitāḥ dvidhā kalpopapannāś ca kalpātītāś ca te matāḥ    uparyupari taddhāma nādhastiryak ca tatsthitiḥ yathā bhavanavāsyādidevānām iti nirṇayaḥ    saudharmaiśānayor devā jyotiṣāmupari sthitāḥ noparyuparibhāvasya tenāvyāpakatā bhavet    saudharmetyādisūtre ca dvaṃdvavṛttir vibhāvyate saudharmādivimānānām uparyupari nānyathā    ānataprāṇatadvaṃdvamāraṇācyutayor iti sūcanād aṃtaśaḥ sā ca kalpeṣv evaikaśas tataḥ    graiveyakeṣu navasu navasvanudiśeṣv iyaṃ tato nuttarasaṃjñānāṃ paṃcānāṃ seṣyate rthataḥ    saptabhis te tathā jñeyāḥ sthityādibhir asaṃśayaṃ teṣām iha manuṣyādau tāratamyasya darśanāt    uparyupari te hīnā gatyādibhir asaṃbhavāt tatkāraṇaprakarṣasya pariṇāmaviśeṣataḥ    sthityādibhis tathādhikyasyānyathānupapattitaḥ noparyuparibhāvasya teṣāṃ saṃketisaṃgatiḥ    leśyāḥ pītādayas teṣāṃ sūtravākyaprabhedataḥ pratyetavyāḥ prapaṃcena yathāgamam asaṃśayaṃ    leśyā nirdeśataḥ sādhyā kṛṣṇetyādisvarūpataḥ varṇato bhramarādīnāṃ chāyāṃ bibhrati bāhyataḥ    anaṃtabhedamāsāṃ syād varṇāṃtaram api sphuṭaṃ ekadvitrikasaṃkhyādikṛṣṇādiguṇayogataḥ    tathāṃtaḥpariṇāmena sādhyajīvasya tattvataḥ sa cāsaṃkhyātalokātmapradeśaparimāṇakaḥ    tatkaṣāyodayasthāneṣv iyatsūtkṛṣṭam adhyama jaghanyātmakarūpeṣu kleśahānyā nivartanāt    kṛṣṇādayo 'śubhās tisro vivartaṃte śarīriṇaḥ jaghanyamadhyamotkṛṣṭeṣv aṃśāṃśeṣu vivṛddhitaḥ    viśuddher uttarās tisraḥ śubhā evaṃ viparyayāt viśuddhihānyā saṃkleśavṛddhyā caiva śubhetarāḥ    ekaikā cāpy asaṃkhyeyalokātmā vyavasāyabhṛt leśyāviśeṣato jñeyāḥ kaṣāyodayabhedataḥ    tathā saṃkramataḥ sādhyā leśyāḥ kleśaviśuddhijāt kliśyamānasya kṛṣṇāyāṃ na leśyāṃtarasaṃkramaḥ    tasyām eva tu ṣaṭsthānapatitena vivardhate hīyate ca pumān eṣa saṃkrameṇa nijakramāt    kṛṣṇā prāthamikakleśasthānād dhi parivardhate saṃkhyeyād apy asaṃkhyeyabhāgataḥ svanimittataḥ    saṃkhyeyādiguṇād vāpi nānyatheti viniścayaḥ leśyāṃtarasya kṛṣṇāto 'śubhasyānyasya bādhanāt    tatkṛṣṇaleśyataḥ sthānāddhīyamāno vihīyate kṛṣṇāyām eva nānyasyāṃ leśyāyāṃ hetvabhāvataḥ    sādyanaṃtādibhāgād vā saṃkhyātādiguṇāt tathā hīyate nānyathā sthānaṣaṭkasaṃkramato subhṛt    yadānaṃtaguṇā hāniḥ kṛṣṇāyāḥ saṃkramas tadā nīlāyā uttamasthāne talleśyāṃtarasaṃkramaḥ    evaṃ viśuddhivṛddhau syāc chuklaleśyasya saṃkramaḥ śuklāyām eva nānyatra leśyā evāvasānataḥ    tathā viśuddhihānyāṃ syāt talleśyāṃtarasaṃkramaḥ anaṃtaguṇahānyaiva nānyahānyā kadācana    madhye leśyācatuṣkasya śuddhisaṃkleśayor nṛṇāṃ hānau vṛddhau ca vijñeyas teṣāṃ svaparasaṃkramaḥ    tathaiva karmato leśyāḥ sādhyāḥ ṣaḍ api bhedataḥ phalalakṣaṇadṛṣṭāṃtasāmarthyāt tattvavedibhiḥ    ādyā tu skaṃdhabhedecchā viṭapacchedaśemupī parā ca śākhāchedīcchād anuśākhachidaiṣaṇā    piṃḍikāchedanecchā na svayaṃ patitamātraka phalāditsā ca kṛṣṇādileśyānāṃ bhakṣaṇecchayā    tathā lakṣaṇato leśyāḥ sādhyāḥ siddhāḥ pramāṇataḥ parān anubhayādiḥ syāt kṛṣṇāyās tatra lakṣaṇaḥ    alasyādis tu nīlāyā mātsaryādiḥ punaḥ sphuṭaṃ kāpotyā dṛḍhamaitryādiḥ pītāyāḥ satyavāditā    prabhṛti padmaleśyāyāḥ śuklāyāḥ praśamādikaṃ gatyā leśyās tathā jñeyāḥ prāṇināṃ bahubhedayā    pratyaṃśakaṃ samākhyātāḥ ṣaṅviṃśatir ihāṃśakāḥ tatrāṣṭau madhyamās tāvad āyuṣo baṃdhahetavaḥ    ārṣopadeśataḥ siddhāḥ śeṣās tu gatihetavaḥ puṇyapāpaviśeṣāṇām upacāratayā hi te    bhavāyurgatibhedānāṃ kāraṇaṃ nāmabhedavat śuklotkṛṣṭāṃśakād ātmā bhavet sarvārthasiddhigaḥ    kṛṣṇotkṛṣṭāṃśakāt tu syād apratiṣṭhānagāmy asau śeṣāṃśakavaśān nānāgatibhāg avagamyatām    yathāgamaṃ prapaṃcena vidyānaṃdamahodayā svāmitvena tathā sādhyā leśyā sādhanato pi ca    saṃkhyātaḥ kṣetrataś cāpi sparśanāt kālato ṃtarāt bhāvāc cālpabahutvāc ca pūrvasūtroktanītitaḥ    kalpāḥ prāg eva te bodhyā graiveyakavimānataḥ tadādayas tu sāmarthyāt kalpātītāḥ pratītitaḥ    tatra laukāṃtikā devā brahmalokālayā iti sūcanāt kalpavāsitvaṃ teṣāṃ niyatam ucyate    te nvarthasaṃjñatāṃ prāptā bhedāḥ sārasvatādayaḥ tenaikacaramās tadvacchakrādyāś copalakṣitāḥ    tathā dvicaramāḥ proktā vijayādiṣu yato 'marāḥ tato nyatra niyāmo sti na manuṣyabhaveṣv iha    ity ekādaśabhiḥ sūtrair vaimānikanirūpaṇaṃ yuktyāgamavaśādāttaṃ tannikāyacatuṣṭayam    sarvalokāśrayāḥ siddhās tiryaṃco py arthato ṃginaḥ saṃtaupapādike bhyaste manuṣyebhyo pi cāpare    iti saṃkṣepatastiryagyonijānāṃ viniścayaḥ kṛto tra sūtrakāreṇa lakṣaṇāvāsabhedataḥ    sthitir ity ādisūtreṇa yoktā bhavanavāsināṃ viśeṣeṇa sthitir yā ca tadanaṃtarakīrtitā    sūtraiś caturbhir abhyāsādyathāgamaviśeṣataḥ parā vaimānikānāṃ ca sottaratrāvaroktitaḥ    palyopamam atiriktam avarāsthitim abravīt saudharmaiśānayoḥ sahe sūtre rthāt saṃpratīyate    sānatkumāramāheṃdraprabhṛtīnām anaṃtare yathā tathā dvitīyādipṛthivīṣu niveditā    daśavarṣasahastrāṇi prathamāyām udīritā bhavaneṣu ca sā proktā vyaṃtarāṇāṃ ca tāvatī    pareṣām adhikaṃ jñeyaṃ palyopamam avasthitiḥ jyotiṣkāṇāṃ ca tadvattadaṣṭabhāgo 'paroditā    sāmarthyān madhyamā bodhyā sarveṣāṃ sthitir āyuṣaḥ prāṇināṃ sā ca saṃbhāvyā karmavaicitryasiddhitaḥ    nanu yadvadghaṭādīnāṃ vicitrā sthitir iṣyate karmānapekṣiṇāṃ tadvaddehinām iti ye viduḥ    te 'nabhijñā ghaṭādīnām api tadbhoktṛkarmabhiḥ sthiter niṣpādanādṛṣṭakāraṇavyabhicārataḥ    sūkṣmo bhūtaviśeṣaś ced vyābhicāreṇa varjitaḥ taddhetur vividhaṃ karma tan na siddhaṃ tathākhyayā    tataḥ saṃsāriṇo jīvāḥ svatattvādibhir īritāḥ nānaikātmatayā saṃto nānyathārthakriyākṣateḥ    janmāstitvaṃ nivṛttiṃ ca kramād vṛddhim apakṣayaṃ vināśaṃ ca prapadyaṃte vikāraṃ ṣaṅvidhaṃ hi te    bibhrate stitvam evaite śaśvadekātmakatvataḥ nānyaṃ vikāram ity eke tan na janmādidṛṣṭitaḥ    janmādayaḥ pradhānasya vikārāḥ pariṇāminaḥ tatsaṃsargāt pratīyaṃte bhrāṃte puṃsīti cen na vai    teṣāṃ bhāvavikāratvād ātmany apy avirodhataḥ janmādirahitasyāsyāpratīte bhrāṃtyasiddhitaḥ    vikārī puruṣaḥ sattvād bahudhānakavat tava sarvathārthakriyāhāner anyathā sattvahānitaḥ    jāyaṃte te vinaśyaṃti saṃti ca kṣaṇamātrakaṃ pumāṃso na vivartaṃte vṛddhyapakṣayagāś ca na    iti kecit pradhvastās te py etenaivāvigānataḥ vivartādyātmatāpāye sattvasyānupapattitaḥ    tataḥ svatattvādiviśeṣaciṃtanaṃ ghaṭeta jīvasya nayapramāṇataḥ  kramādyanekāṃtatayā vyavasthiter ihoditanyāyabalena tattvataḥ     oṃ atha pañcamo 'dhyāyaḥ    athājīvavibhāgādivivādavinivṛttaye ajīvetyādisūtrasya pravṛttir upapadyate    ajīvanād ajīvāḥ syur iti sāmānyalakṣaṇaṃ kāyāḥ pradeśabāhulyād iti kālād viśiṣṭatā    dharmādiśabdato bodhyo vibhāgo bhedalakṣaṇaḥ tena naikaṃ pradhānādirūpatā nāpy anaṃśatā    niḥśeṣāṇām ajīvānām iti siddhaṃ pratītitaḥ vipakṣe bādhasadbhāvād dṛṣṭeneṣṭena ca svayam    tadguṇādisvabhāvatvaṃ dravyāṇītīha sūtrataḥ dravyalakṣaṇasadbhāvāt pratyākhyātam aveyate    dharmādharmau matau dravye guṇitvāt pudgalādivat tathākāśamato naiṣāṃ guṇābhāvasvabhāvatā    na hetor āśrayāsiddhis teṣām agre prasādhanāt nāpi svarūpato siddhir mahattvādiguṇasthiteḥ    kalpitāś cittasaṃtānā jīvā iti nirasyate jīvāś cetīha sūtreṇa dravyāṇīty anuvṛttitaḥ    kṣmādibhūtacatuṣkāc ca dravyāṃtaratayā gatiḥ nanu dehaguṇatvādir iti dehāt pare narāḥ    dravyārthikanayāt tāni nityāny evānvitatvataḥ avasthitāni sāṃkaryasyānyonyaṃ śaśvadasthiteḥ    tato dravyāṃtarasyāpi dravyaṣaṭkād abhāvataḥ tatparyāyānavasthānān nityatve punararthataḥ    arūpāṇīti sāmānyād āha na tv apavādataḥ rūpitvavacanād agre pudgalānāṃ viśeṣataḥ    arūpitvāpavādo 'yaṃ rūpiṇaḥ pudgalā iti rūpaṃ mūrtir iha jñeyā na svabhāve khilārthabhāk    rūpādipariṇāmasya mūrtitvenābhidhānataḥ sparśādimattvam eteṣām upalakṣyeta tattvataḥ    ekasaṃkhyāviśiṣṭānīty ekadravyāṇi sūcayan anekadravyatāṃ haṃti dharmādīnām asaṃśayam    ā ākāśād iti khyātiḥ pudgalānāṃ nṛṇām api kālāṇūnām anekatvaviśiṣṭadravyatāṃ viduḥ    ekadravyam ayaṃ dharmaḥ syād adharmaś ca tattvataḥ mahattve satyamūrtatvāt khavattatsiddhivādinām    nānādravyam asau nānāpradeśatvād dharādivat ity ayuktam anekāṃtād ākāśenaikatā hṛtā    tasya nānāpradeśatvasādhanād agrato nayāt niraṃśasya sa tatsarvamūrtadravyair asaṃgataḥ    niṣkriyāṇi ca tānīti parispaṃdavimuktitaḥ sūtritaṃ trijagadvyāpirūpāṇāṃ spaṃdahānitaḥ    sāmarthyāt sakriyau jīvapudgalāv iti niścayaḥ jīvasya niṣkriyatve hi na kriyāhetutā tanau    prayatnādiguṇas tadvān na hetur iti cen na vai guṇo sti tadvato bhinnaḥ sarvatheti niveditam    kriyāhetuguṇatvād vā loṣṭhavatsakriyaḥ pumān dharmadravyeṇa ced asya vyabhicāraḥ paraśrutau    na tasya preraṇāhetuguṇayogitvahānitaḥ nimittamātrahetutvāt svayaṃ gativivartinām    kālo 'sarvagatatvena kriyāvan nānuṣajyate sarvadā jagadekaikadeśasthatvāt pṛthak pṛthak    nanv evaṃ na kriyatve pi dharmādīnāṃ vyavasthiteḥ na syuḥ svayam abhipretā janmasthānavyayakriyāḥ    tathotpādavyayadhrauvyayuktaṃ sad iti lakṣaṇaṃ tatra na syāt tato naiṣāṃ dravyatvaṃ vastutāpi ca    ity apāstaṃ parispaṃdakriyāyāḥ pratiṣedhanāt utpādādikriyāsiddher anyathā sattvahānitaḥ    parispaṃdakriyāmūlā nacotpādādayaḥ kriyāḥ sarvatra guṇabhedānām utpādādivirodhataḥ    svaparapratyayau janmavyayau yadi guṇādiṣu sthitiś ca kiṃ na dharmādidravyeṣv evam upeyate    gatisthityavagāhānāṃ paratra na nibaṃdhanaṃ dharmādīni kriyāśūnyasvabhāvatvāt khapuṣpavat    kriyāvattvaprasaṃgo vā teṣāṃ vāyudharāṃbuvat ity acodyaṃ balādhānamātratvād gamanādiṣu    dharmādīnāṃ svaśaktyaiva gatyādipariṇāmināṃ yatheṃdriyaṃ balādhānamātraṃ viṣayasaṃnidhau    puṃsaḥ svayaṃ samarthasya tatra siddher na cānyathā tatraiva dravyasāmarthyān niṣkriyāṇām api svayaṃ    dharmādīnāṃ paratrāstu kriyākāraṇam āptatā nacaivam ātmanaḥ kāyakriyāhetutvam āpatet    sarvathā niṣkriyasyāpi svayaṃ mānavirodhataḥ ātmā hi prerako hetur iṣṭaḥ kāyādikarmaṇi    tṛṇādikarmaṇīvāstu pavanādiś ca sakriyaḥ vīryāṃtarāyavijñānāvaraṇacchedabhedataḥ    sakriyasyaiva jīvasya tato ṃge karmahetutā haste karmātmasaṃyogaprapannābhyām upeyate    yais te pi ca pratikṣiptās tayos tacchaktyayogataḥ niṣkriyo hi yathātmaiṣāṃ kriyāvadvaisadṛśyataḥ    kālādivattathaivātmasaṃyogaḥ saprayatnakaḥ guṇaḥ syāt tasya tadvac ca niṣkriyatvādideśataḥ    guṇāḥ karmāṇi caitena vyākhyātānīti sūcanāt na tāvad ātmasaṃyogaḥ kevalaḥ karmakāraṇaṃ    niḥprayatnasya hastādau kriyāhetutvahānitaḥ naikasya tatprayatnasya kriyāhetutvam īkṣyate    śarīrāyogino nyasya tataḥ karmaprasaṃgataḥ sahitāv ātmasaṃyogaprapannau kurutaḥ kriyāḥ    hastādāv ity asaṃbhāvyamanayoḥ sahadṛṣṭivat adṛṣṭāpekṣiṇau tau ced akurvāṇau kriyāṃ nari    hastādau kurutaḥ karma naivaṃ kvacid adṛṣṭataḥ uṣṇāpekṣo yathā vanhisaṃyogaḥ kalaśādiṣu    rūpādīn pākajān vartate vahnau svāśraye tathā nṛsaṃyogādir anyatra kriyām ārabhate na tu    svādhāre nari tasyetthaṃ sāmarthyād iti cen na vai vaiṣamyād asmadiṣṭasya siddheḥ sādhyasamatvataḥ    pratītibādhanāc caitadviparītaprasiddhitaḥ sādhye kriyānimittatve dṛṣṭāṃto hy akriyāśrayaḥ    syād eṣa viṣamas tāvad agnisaṃyoga uṣṇabhṛt yathā ca svāśraye kurvan vikāraṃ kalaśādiṣu    karoti vanhisaṃyogaḥ puṃso yogas tathā tanau ity asmadiṣṭasaṃsiddhiḥ kriyāpariṇatasya nuḥ    kāye kriyānimittatvasiddheḥ saṃyogini sphuṭaṃ saṃyogārthāṃtaraṃ vanheḥ kuṭādeś ca tadāśritaḥ    samavāyāt tato bhinnapratītyā bādhyate na kiṃ ghaṭādiṣv āmarūpādīn vināśayati sa svayaṃ    pākajān janayaty etat pratipadyeta kaḥ sudhīḥ na caiṣā pākajotpattiprakriyā vyavatiṣṭhate    vanheḥ pākajarupādipariṇāmāḥ kuṭādiṣu svahetubhedataḥ sarvaḥ pariṇāmaḥ pratīyate    pūrvākāraparityāgād uttarākāralabdhitaḥ kuṭe pākajarūpādiparityāgena jāyate    vanheḥ pākajarūpādis tathā dṛṣṭer abādhanāt nauṣṇyāpekṣas tato vanhisaṃyogo tra nidarśanaṃ    nuḥ kriyāhetutāsiddhau viparītaprasiddhitaḥ anuṣṇāśītarūpaś cāprerako nupaghātakaḥ    kuṭeḥ prāptaḥ kathaṃ rūpādyucchedotpādakāraṇaṃ gurutvaṃ niṣkriyaṃ loṣṭhe vartamānaṃ tṛṇādiṣu    kriyāhetur yathā tadvatprayatnādis tathekṣaṇāt ye tv āhus te pi vidhvastāḥ pratyetavyā diśānayā    svāśraye vikriyāhetau tato nyatra hi vikriyā dravyasyaiva kriyāhetupariṇāmāt punaḥ punaḥ    kriyākāritvam anyatra pratītyā naiva bādhyate puruṣas tadguṇo vāpi na kriyākāraṇaṃ tanau    niṣkriyatvād yathā vyomety uktir yātmani bādhakaṃ nānaikāṃtikatā dharmadravyeṇāsya kathaṃcana    tasyāḥ prerakatāsiddheḥ kriyāyā vigrahādiṣu evaṃ sakriyatāsiddhāv ātmano nirvṛtāv api    sakriyatvaṃ prasaktaṃ ced iṣṭam ūrdhvagatitvataḥ yādṛśī saśarīrasya kriyā muktasya tādṛśī    na yuktā tasya muktatvavirodhāt karmasaṃgateḥ kriyānekaprakārā hi pudgalānām ivātmanāṃ    svaparapratyayāyattabhedā na vyatikīryate sānyaiva sadvato yeṣāṃ teṣāṃ taddvayaśūnyatā    kriyākriyāvator bhedenāpratīteḥ kadācana kriyākriyāśrayau bhinnau vibhinnapratyayatvataḥ    sahyaviṃdhyavad ity etadvibhedaikāṃtasādhanaṃ dharmigrāhipramāṇena hetor bādhananirṇayāt    kathaṃcid bhinnayos tena tayor grahaṇataḥ sphuṭaṃ vibhinnapratyayatvaṃ ca sarvathā yadi gadyate    tata eva tadā tasya siddhatvaṃ prativādinaḥ kathaṃcit tu na tatsiddhaṃ vādinām ity asādhanaṃ    viruddhaṃ vā bhaved iṣṭaviparītaprasādhanāt sādhyasādhanavaikalyaṃ dṛṣṭāṃtasyāpi dṛśyatām    sattvenābhinnayor eva pratīteḥ sahyaviṃdhyayoḥ viruddhadharmatādhyāsād ityāder apy ahetutā    proktaitena prapattavyā sarvathāpy aviśeṣataḥ kriyākriyāvato nanyānanyadeśatvataḥ kriyā    tatsvarūpavad ity eke tad apy ajñānaceṣṭitaṃ laukikānany adeśatvaṃ hetuś cedvyabhicāratā    vātātapādibhis tasyānanyadeśair vibhedibhiḥ śāstrīyān anyadeśatvaṃ manyate sādhanaṃ yadi    na siddham anyadeśatvapratīte rūpayos tayoḥ tadvaddeśā kriyā tadvatsvakīyāśrayadeśakaḥ    pratīyate yadānanyadeśatvaṃ katham etayoḥ sarvathānanyadeśatvam asiddhaṃ prativādinaḥ    kathaṃcid vādinas tatsyādviruddhaṃ ceṣṭahānikṛt dharmigrāhipramāṇena bādhā pakṣasya pūrvavat    sādhanasya ca vijñeyā tair evātītakālatā niṣkriyāḥ sarvathā sarve bhāvāḥ syuḥ kṣaṇikatvataḥ    paryāyārthatayā labdhiṃ pratikṣaṇavivartavat ity āhur ye na te svasthāḥ sādhanasyāprasiddhitaḥ    na hi pratyakṣataḥ siddhaṃ kṣaṇikatvaṃ niranvayaṃ sādharmyasya tataḥ siddher bahir aṃtaś ca vastunaḥ    idānīṃtanatā dṛṣṭir na kṣaṇakṣayiṇaḥ kvacit kālāṃtarasthiter eva tathātvapratipattitaḥ    nānumānāc ca tatsiddhaṃ taddhetor anabhīkṣaṇāt sattvādi sattvahetuś cen na tatrāgamakatvataḥ    viruddhāditayā tasya purastād upavarṇanāt prapaṃcena punar neha tadvicāraḥ pratanyate    kathaṃcin niṣkriyatve na sādhye syāt siddhasādhanaṃ tanniścayanayādeśāt prasiddhaṃ sarvavastuṣu    vyavahāranayāt teṣāṃ sakriyatvaprasiddhitaḥ bhūtir yeṣāṃ kriyā saive py ayuktaṃ sānvayatvataḥ    nityatvāt sarvabhāvānāṃ niṣkriyatvaṃ tu sarvathā yair uktaṃ te py anenaiva hetunā dūṣitā hṛtāḥ    sarvathā tanmatadhvaṃsāt pramāṇābhāvataḥ kvacit kathaṃcin nityatāhetur yadi tasya viruddhatā    kathaṃcin niṣkriyatvasya sādhanāt kṣaṇikādivat tataḥ syur niṣkriyāḥ sarve bhāvāḥ syāt sakriyāsaha    virodhādiprasaṃgaś cen na dṛṣṭe tadayogataḥ caitraikajñānavat sveṣṭatattvavad vā pravādinām    sveṣṭaṃ tattvam aniṣṭātmaśūnyaṃ sad iti ye viduḥ sadasadrūpam ekaṃ te nirākuryuḥ kathaṃ punaḥ    niṣkriyetaratābhāve bahiraṃtaḥ kathaṃcana pratīter bādhaśūnyāyāḥ sarvathāpy aviśeṣataḥ    pratideśaṃ jagadvyomavyāptayogyatvasiddhitaḥ dharmādharmaikajīvānām asaṃkhyeyapradeśatā    lokākāśavad eva syāc cāsaṃkhyeyapradeśābhṛt tadādhyeyasya lokasya sāvadhitvaprasādhanāt    anaṃtadeśatāpāyāt prasaṃkhyātum aśaktitaḥ na tatrānaṃtasaṃkhyātapradeśatvavibhāvanā    ekajīvavacaḥśakter nāsaṃkhyeyapradeśatā nānātmanām anaṃtādipradeśatvasya saṃbhavāt    sapradeśā ime sarve mūrtimaddravyasaṃgamāt sakṛdevānyathā tasyāyogād ekāṇuvat tataḥ    jīvasya sarvataddravyasaṃgamo na virudhyate lokapūraṇasaṃsiddheḥ sadā tadyogyatāsthiteḥ    anaṃtās tu pradeśāḥ syur ākāśasya samaṃtataḥ lokatrayād bahiḥ prāṃtābhāvāt tasyānyathāgateḥ    jagataḥ sāvadhes tāvadbhāvo bahiravasthitiḥ saṃtānātmā na yujyeta sarvathārthakriyākṣamaḥ    na guṇaḥ kasyacit tatra dravyasyānabhyupāyataḥ tadāśrayasya karmāder api naivaṃ vibhāvyate    dravyaṃ tu pariśeṣāt syāt tannabho naḥ pratiṣṭitaṃ prasaktapratiṣedhe hi pariśiṣṭavyavasthitiḥ    āgamajñānasaṃvedyam anumānaṃ viniścitaṃ sarvajñair vā paricchedyam apy anaṃtapramāṇabhāk    yad vijñānaparicchedyaṃ tatsāṃtam iti yo bravīt tasya vedo bhavādir vā nānaṃtyaṃ pratipadyate    saṃkhyeyāḥ syur asaṃkhyeyās tathānaṃtāś ca tattvataḥ pradeśāḥ skaṃdhasaṃsiddheḥ pudgalānām anekadhā    nāṇor iti niṣedhasya vacanān nāpradeśatā prasiddhaivaikadeśatvāt tasyāṇutvaṃ na cānyathā    aṣṭapradeśarūpāṇuvādo 'nena nivāritaḥ tatrāpi paramaskaṃdhavidabhāvaprasaṃgataḥ    yathāṇur aṇubhir nānādikkaiḥ saṃbaṃdham ādadhat deśato vayavī tadvatpradeśo nyaiḥ pradeśataḥ    sarvātmanā ca tais tasyāpi saṃbaṃdhe ṇumātrakaḥ piṃḍaḥ syād anyathopāttadoṣābhāvaḥ samo na kim    vidyādajīvakāyānāṃ dravyatvādisvabhāvatāṃ evaṃ prādhānyataḥ proktāṃ samāsāt sunayānvitām    lokākāśe vagāhaḥ syāt sarveṣām avagāhināṃ bāhyato saṃbhavāt tasmāl lokatvasyānuṣaṃgataḥ    lokākāśasya nānyasminn avagāhaḥ kvacin mataḥ ākāśasya vibhutvena svapratiṣṭatvasiddhitaḥ    dharmādharmau matau kṛtsnalokākāśāvagāhinau gacchattiṣṭhatpadārthānāṃ sarveṣām upakārataḥ    tasyaivaikapradeśe sti yathaikasyāvagāhanaṃ paramāṇos tathānekāṇuskaṃdhānāṃ ca saukṣmyataḥ    tathā caikapradeśādis teṣāṃ prativibhidyatāṃ so vagāho yathāyogyaṃ pudgalānām aśeṣataḥ    na jīvānām asaṃkhyeyabhāgādiṣv avagāhanaṃ viruddhaṃ tatpradeśānāṃ saṃhārāt pravisarpataḥ    pradīpavad iti jñeyā vyavahāranayāśrayā ādhārādheyatārthānāṃ niścayāt tadayogataḥ    sakṛtsarvapadārthānāṃ gacchatāṃ gatyupagrahaḥ dharmasya copakāraḥ syāt tiṣṭhatāṃ sthityupagrahaḥ    tathaiva syād adharmasyānumeyāv iti tau tataḥ tādṛkkāryaviśeṣasya kāraṇāvyabhicārataḥ    upakāro vagāhaḥ syāt sarveṣām avagāhināṃ ākāśasya sakṛn nānyasyety etad anumīyate    śarīravargaṇādīnāṃ pudgalānāṃ sa saṃmataḥ śarīrāvayava ity etais teṣām anumitir bhavet    sukhādyupagrahāś copakāro jīvavipākinām sātavedyādikarmātmapudgalānām ito numā    jīvānām upakāraḥ syāt parasparam upagrahaḥ saṃtānāṃtaravadbhājāṃ vyāpārādir ato numā    aṃtanīṃtaikasamayaḥ svasattānubhavo bhidā yaḥ pratidravyaparyāyaṃ vartanā seha kīrtyate    yasmāt karmaṇi bhāve ca ṇyaṃtādvarteḥ striyāṃ yuci vartanety anudātte tācchīlyādau vā yucīṣyate    dharmādīnāṃ hi vastūnām ekasminn avibhāgini samaye vartamānānāṃ svaparyāyaiḥ kathaṃcana    utpādavyayadhrauvyavikalpair bahudhā svayaṃ prayujyamānatānyena vartanā karma bhāvyate    prayojanaṃ tu bhāvaḥ syāt sa cāsau tatprayojakaḥ kāla ity eṣa nirṇīto vartanālakṣaṇo ṃjasā    pratyakṣato 'prasiddhāpi vartanāsmādṛśāṃ tathā vyāvahārikakāryasya darśanād anumīyate    tathā taṃdulavikledalakṣaṇasya prasiddhitaḥ pākasyodanaparyāyanām abhājaḥ pratikṣaṇaṃ    sūkṣmataṃdulapāko stīty anumānaṃ pravartate pākasyaivānyatheṣṭasya sarvathānupapattitaḥ    tathaiva svātmasadbhāvānubhūtau sarvavastunaḥ pratikṣaṇaṃ bahirhetuḥ sādhāraṇa iti dhruvam    prasiddhadravyaparyāyavṛttau bāhyasya darśanāt nimittasyānyathābhāvābhāvān niścīyate budhaiḥ    ādityādigatis tāvan na taddhetur vibhāvyate tasyāpi svātmasattānubhūtau hetuvyapekṣaṇāt    nacaivam anavasthā syāt kālasyānyāvyapekṣaṇāt svavṛttau tatsvabhāvatvāt svayaṃ vṛtteḥ prasiddhitaḥ    tathaiva sarvabhāvānāṃ svayaṃ vṛttir na yujyate dṛṣṭeṣṭabādhanāt sarvādīnām iti viciṃtitaṃ    na dṛśyamānataivātra yujyate vartamānatā vartamānasya kālasyābhāve tasyāḥ svataḥ sthiteḥ    pratyakṣāsaṃbhavāśakter anumānādyayogataḥ sarvapramāṇaninhutyā sarvaśūnyatvaśaktitaḥ    svasaṃvidadvayaṃ tattvam icchataḥ sāṃprataṃ kathaṃ siddhyen na vartamāno sya kālaḥ sūkṣmaḥ svayaṃprabhuḥ    tato na bhāvitā drakṣyamāṇatā nāpy atītatā dṛṣṭatā bhāvyatītasya kālasyānyaprasiddhitaḥ    gataṃ na gamyate tāvad āgataṃ naiva gamyate gatāgatavinirmuktaṃ gamyamānaṃ na gamyate    ity evaṃ vartamānasya kālasyābhāvabhāṣaṇaṃ svavāgviruddham ābhāti tanniṣedhe samatvataḥ    niṣiddhamaniṣiddhaṃ vā taddvayonmuktam eva vā niṣidhyate na hi kvaivaṃ niṣedho vidhir eva vā    kva vābhyupagamaḥ siddhyet pratijñāhānisaṃgataḥ tasya svayaṃ pratijñānād vartamānasya tattvataḥ    tathaiva ca svayaṃ kiṃcit parair abhyupagamyate tathaiva gamyate kiṃ na kriyate vedyate pi ca    saṃvedanādvayaṃ tāvadviditaṃ naiva vedyate na cāviditam ātmāditattvaṃ vā nāpi taddvayaṃ    iti svasaṃvidādīnām abhāvaḥ kena vāryate vartamānasya kālasyāpanhave svātmavidviṣāṃ    na saṃvitsaṃvid eveti svataḥ samavatiṣṭhate brahma brahmaiva vetyādi yathā bhedāprasiddhitaḥ    tatsvasaṃvedanasyāpi saṃtānam anugacchataḥ pareṇa hetunā bhāvyaṃ svayaṃ vṛttyātmanāṃ na saḥ    vartanaivaṃ prasiddhā syāt pariṇāmādivat svayaṃ tataḥ siddhāṃtasūtroktāḥ sarve mī vartanādayaḥ    kālasyopagrahāḥ proktā ye punar vartanādayaḥ syāt ta evopakārotas tasyānumitir iṣyate    manuṣyanāmakarmāyuṣor udayāt pratipadyate kalalādiśarīrāṃgopāṃgaparyāyarūpatām    sa jīvatvamanuṣyatvapramukhair anvayair yathā vyavasthitaḥ svakīyeṣu pariṇāmeṣv aśeṣataḥ    kalalādibhiḥ punaḥ pūrvair bhāvaiḥ kramavivartibhiḥ vyatiriktaiḥ paratrāsau na vyavasthita īkṣyate    tathā vanaspatir jīvaḥ svanāmāyurviśeṣataḥ vanaspatitvajīvatvapramukhair anvayaiḥ sthitaḥ    svaśarīravivarteṣu bījādiṣu paraṃ na tu pūrvapūrveṇa bhāvena tu sthitaḥ kramabhāvinaḥ    yathā manuṣyanāmāyuḥkarmodayaviśeṣataḥ jāto bālo manuṣyātmā stanyādyāhāram āharan    sūryātapādisāpekṣaḥ kāyāgnivalam ādadhan vīryāṃtarāya vicchedaviśeṣavihitodbhavaṃ    vivardhate nijāhārarasādipariṇāmataḥ nirmāṇanāmakarmopaṣṭaṃbhād abhyaṃtarād api    tathā vanaspatir jīvaḥ svāyur nāmodaye sati jīvāśrayo ṃkuro jāto bhaumādirasam āharan    taptāya spiṃḍavatto yaṃ svīkurvann eva vardhate ātmānurūpanirmāṇanāmakarmodayād dhruvam    parispaṃdātmako dravyaparyāyaḥ saṃpratīyate kriyā deśāṃtaraprāptihetur gatyādibhedabhṛt    prayogavisrasotpādād dvedhā saṃkṣepatas tu sā prayogajā punar nānotkṣepaṇādiprabhedataḥ    visrasotpattikā tejo vātāṃbhaḥprabhṛtiṣv iyaṃ sarvāpy adṛṣṭavaicitryāt prāṇināṃ phalabhāgināṃ    kriyā kṣaṇakṣayaikāṃte padārthānāṃ na yujyate bhūtirūpāpi vastutvahāner ekāṃtanityavat    kramākramaprasiddhes tu pariṇāmini vastuni pratītipadam āpannā pramāṇena na bādhyate    lokākāśaprabhedeṣu kṛtsneṣv ekaikavṛttitaḥ pratipradeśam anyonyam abaddhāḥ paramāṇavaḥ    mukhyopacārabhedais te 'vayavaiḥ parivarjitāḥ niraṃśā niṣkriyā yasmād avasthānāt svadeśavat    amūrtās tadvad eveṣṭāḥ sparśādir ahitatvataḥ kālākhyā mukhyato ye stikāyebhyo nye prakāśitāḥ    vyavahārātmakaḥ kālaḥ pariṇāmādilakṣaṇaḥ kālavartanayā labdhakālākhyas tu tato 'paraḥ    kutaścit paricchinno 'nyaparicchedanakāraṇaṃ prasthādivatprapattavyo nyonyāpekṣaprabhedabhṛt    tatas traividhyasiddhiś ca tasya bhūtādibhedataḥ kathaṃcin nāviruddhā syāt vyavahārānurodhataḥ    yathā pratitaru prāptaprāpnuvatprāpsyad ucyate tarupaṃktiṃ kramād aśvaprasṛtyanusaran mataṃ    tathāvasthitakālāṇuś ca jīvādyanusaṃgamāt bhūtaṃ syād vartamānaṃ ca bhaviṣyaccāpy apekṣayā    bhūtādivyavahārotaḥ kālaḥ syād upacārataḥ paramārthātmani mukhyas tu sa syāt sāṃvyavahārike    evaṃ pratikṣaṇādityagatipracayabhedataḥ samayāvalikocchvāsaprāṇastokalavātmakaḥ    nālikādeś ca vikhyāte kālo nekavidhaḥ satāṃ mukhyakālāvinābhūtāṃ kālākhyāṃ pratipadyate    parāparacirakṣiprakramākramadhiyām api hetuḥ sa eva sarvatra vastuto guṇataḥ smṛtaḥ    kriyaiva kāla ity etad anenaivāpasāritaṃ vartanānumitaḥ kālaḥ siddho hi paramārthataḥ    dharmādivargavatkāryaviśeṣavyavasāyataḥ bādhakābhāvataś cāpi sarvathā tatra tattvataḥ    evaṃ sarvānumeyārthā pratipattir na bādhyate sūtrasāmarthyato jātā pratyakṣārthapratītivat    nirastaniḥśeṣavipakṣasādhanair ajīvabhāvā nikhilāḥ prasādhitāḥ  prapaṃcato yair iha nītiśālibhir jayaṃti te viśvavipaścitaṃmatāḥ    atha sparśādim aṃtaḥ syuḥ pudgalā iti sūcanāt kṣityādijātibhedānāṃ prakalpananirākṛtiḥ    nābhāvo 'nyatamasyāpi sparśādīnām adṛṣṭitaḥ tasyānumānasiddhatvāt svābhipretārthatattvavat    proktā śabdādibhaṃtas tu pudgalāḥ skaṃdhabhedataḥ tathā pramāṇasadbhāvād anyathātadabhāvataḥ    na śabdaḥ khaguṇo bāhyakaraṇajñānagocaraḥ siddho gaṃdhādivan naiva so mūrtadravyam apy ataḥ    na sphoṭātmāpi tasyaiva svabhāvasyāpratītitaḥ śabdātmanas sadā nānāsvabhāvasyāvabhāsanāt    aṃtaḥprakāśarūpas tu śabde sphoṭo pare dhvaneḥ yathārthagatihetuḥ syāt tathā gaṃdhādito paraḥ    gaṃdharūparasasparśaḥ sphoṭaḥ kiṃ nopagamyate tatrākṣepasamādhānasamatvāt sarvathārthataḥ    baṃdho viśiṣṭasaṃyogo vyomātmādiṣv asaṃbhavī pudgalaskaṃdhaparyāyaḥ saktutoyādibaṃdhavat    tathaivāvāṃtaraṃ saukṣmyaṃ paramāṇuṣv asaṃbhavi sthaulyādivat prapattavyam anyathānupapattitaḥ    aṇavaḥ pudgalāḥ kecit skaṃdhāś ceti nivedanāt aṇvekāṃtaḥ pratikṣiptaḥ skaṃdhaikāṃtaś ca tattvataḥ    utpadyaṃte ṇavaḥ skaṃdhāḥ paryāyatvāviśeṣataḥ bhedāt saṃghātato bhedasaṃghābhyāṃ vāpi kecana    iti sūtre bahutvasya nirdeśād vākyabhidgateḥ niścīyate nyathā dṛṣṭavirodhasyānuṣaṃgataḥ    skaṃdhasyāraṃbhakā yadvadaṇavas tadvad eva hi skaṃdho ṇūnāṃ bhidāraṃbhaniyamasyānabhīkṣaṇāt    bhedād aṇur iti proktaṃ niyamasyopapattaye pūrvasūtrāt tato ṇūnām utpāde vidite pi ca    vibhāgaḥ paramāṇūnāṃ skaṃdhabhedān na vāṇavaḥ nityatvād upajāyaṃte marutpathavad ity asat    saṃyogaḥ paramāṇūnāṃ saṃghātād upajāyate na skaṃdhas tadvad eveti vaktuṃ śakteḥ parair api    vivādādhyāsitaḥ skaṃdho jāyate sūkṣmato nyataḥ skaṃdhatvāt paṭavat proktaṃ yair evaṃ te vadaṃtv idaṃ    vivādagocarāḥ sūkṣmā jāyaṃte skaṃdhabhedataḥ sūkṣmatvād dṛṣṭavastrādikhaṃḍavadbhrāṃtyabhāvataḥ    ghanakarpāsapiṃḍena sūkṣmeṇa vyabhicāritā hetor iti na vaktavyam anyasyāpi samatvataḥ    ślithāvayavakarpāsapiṃḍasaṃghātato yathā ghanāvayavakarpāsapiṃḍaḥ samupajāyate    tathā sthaviṣṭapiṃḍebhyo 'niṣṭo nibiḍapiṃḍakaḥ pratītigocaro stu sa yathāsūtropapāditaḥ    cākṣuṣo vayavī kaścid bhedāt saṃghātato dvayāt utpadyate tato nāsya saṃghātād eva janmanaḥ    saddravyalakṣaṇaṃ śuddham aśuddhaṃ saviśeṣaṇaṃ proktaṃ sāmānyato yasmāt tato dravyaṃ yathoditaṃ    tatrotpādavyayadhrauvyayuktaṃ sad iti sūcanāt guṇasattvaṃ bhaven naiva dravyalakṣaṇam aṃjasā    yathotpādādayaḥ saṃtaḥ parotpādādibhir vinā tathā vastu na cet kenānavasthādi nivāryate    ity asat sarvathā teṣāṃ vastuno sadasiddhitaḥ lakṣyalakṣaṇabhāvaḥ syāt sarvathaikyānabhīṣṭitaḥ    tadbhāvenāvyayaṃ nityaṃ tathā pratyavamarśataḥ taddhrauvyaṃ vastuno rūpaṃ yuktam arthakriyākriyaḥ    sāmarthyāt savyayaṃ rūpam utpādavyayasaṃjñakaṃ sūtresmin sūcitaṃ tasyāpāye vastutvahānitaḥ    nityaṃ rūpaṃ virudhyeta netareṇaikavastuni arpitetyādisūtreṇa prāhaivaṃ nayabhedavat    dravyārthād arpitaṃ rūpaṃ paryāyārthād anarpitaṃ nityaṃ vācyam anityaṃ tu viparyāsāt prasiddhyati    pramāṇārpaṇatas tat syād vastu jātyaṃtaraṃ tataḥ tatra nobhayadoṣādiprasaṃgo nubhavāspade    skaṃdho baṃdhāt sa cāsty eṣāṃ snigdharūkṣatvayogataḥ pudgalānām iti dhvastā sūtre smiṃs tadabhāvatā    snigdhāḥ snigdhais tathā rūkṣā rūkṣaiḥ snigdhāś ca pudgalāḥ baṃdhaṃ yathāsate skaṃdhasiddher bādhakahānitaḥ    naikadeśena kārtsnyena baṃdhasyāghaṭanāt tataḥ kāryakāraṇamādhyasthyakṣaṇavattadvibhāvanāt    pūrvāparavidāṃ baṃdhas tathābhāvāt paro bhavet nānāṇubhāvataḥ sāṃśādaṇor baṃdho 'paro sti kim    niraṃśatvaṃ na cāṇūnāṃ madhyaṃ prāptasya nāvataḥ tathā te saṃvidor madhyaṃ prāptāyāḥ saṃvidaḥ sphuṭam    saṃvidadvaitatattvasyāsiddhau baṃdho na kevalaṃ sa syāt kiṃtu svasaṃtānādyabhāvāt sarvaśūnyatā    tatsaṃvinmātrasaṃsiddhau saṃtānas te prasiddhyati tadvadbaṃdhaḥ sthito rthānāṃ pariṇāmo viśeṣataḥ    na jaghanyaguṇānāṃ syād baṃdha ity upadeśataḥ pudgalānām abaṃdhasya prasiddher api saṃgrahaḥ    ajaghanyaguṇānāṃ tatprasaktāv aviśeṣataḥ guṇasāmye samānānāṃ na baṃdha iti cābravīt    dvyadhikādiguṇānāṃ tu baṃdho stīti nivedayat sarvāpavādanirmuktaviṣayasyāha saṃbhavam    baṃdhedhikau guṇau yasmād anyeṣāṃ pāriṇāmikau dṛṣṭau saktujalādīnāṃ nānyathety atra yuktivāk    guṇaparyayavaddravyam ity āha vyavahārataḥ satparyāyasya dharmāder dravyatvapratipattaye    guṇavaddravyam ity uktaṃ sahānekāṃtasiddhaye tathā paryāyavaddravyaṃ kramānekāṃtavittaye    kālaś ca dravyam ity āha proktalakṣaṇayogataḥ tasyād ravyatvavijñānanivṛttyarthaṃ samāsataḥ    niḥśeṣadravyasaṃyogavibhāgādiguṇāśrayaḥ kālaḥ sāmānyataḥ siddhaḥ sūkṣmatvādyāśrayobhidhā    kramavṛttipadārthānāṃ vṛttikāraṇatādayaḥ paryāyāḥ saṃti kālasya guṇaparyāyavānataḥ    so naṃtasamayaḥ prokto bhāvato vyavahārataḥ dravyato jagadākāśapradeśaparimāṇakaḥ    lokād bahirabhāve syāl lokākāśasya vartanaṃ tasyaikadravyatāsiddher yuktaṃ kālopapāditaṃ    dravyāśrayā iti khyāteḥ sūtre sminn avasīyate guṇāśrayā guṇatvād yā na guṇāḥ paramārthataḥ    nirguṇā iti nirdeśāt kāryadravyasya vāryate guṇabhāvaḥ paradravyāśrayiṇo pīti nirṇayaḥ    tadbhāvaḥ pariṇāmo tra paryāyaḥ prativarṇitaḥ guṇāc ca sahabhuvo bhinnaḥ kramavān dravyalakṣaṇam    paryāya eva ca dvedhā sahakramavivartitaḥ śuddhāśuddhatvabhedena yathādravyaṃ dvidhoditaṃ    tena naiva prasajyeta nayadvaividhyabādhanaṃ saṃkṣepato nyathā tryādinayasaṃkhyā na vāryate    atha ṣaṣṭho 'dhyāyaḥ    athāsravaṃ vinirdeṣṭukāmaḥ prāgātmano ṃjasā kāyavāṅmanasāṃ karma yogo stīty āha karmaṇām    kāyādivargaṇālaṃbapradeśaspaṃdanaṃ hi yat yuktaṃ kāyādikarmāsya sakriyatvaprasiddhitaḥ    sa āsrava iha proktaḥ karmāgamanakāraṇaṃ puṃso trānupraveśena mithyātvāder aśeṣataḥ    śubhaḥ puṇyasya vijñeyo 'śubhaḥ pāpasya sūtritaḥ saṃkṣepād dviprakāro pi pratyekaṃ sa dvidhāsravaḥ    śubhāśubhaphalānāṃ tu pudgalānāṃ samāgamaḥ viśuddhetarakāyādihetus tattvāt svadṛṣṭavat    dvaividhyāt tatphalaṃ caivam āsravo dvividhaḥ smṛtaḥ kāyādir akhilo yogaḥ so 'saṃkhyeyo viśeṣataḥ    jñānāvaraṇavīryāṃtarāyayoḥ karmaṇor iha kṣayopaśamato 'naṃtabhedayoḥ sparddhakātmanoḥ    prādurbhāvād anaṃtaḥ syād yogo 'naṃtanimittakaḥ anaṃtakarmahetutvād anaṃtātmāsravatvataḥ    asaṃkhyeyo tha saṃkhyātādhyavasāyātmako 'ṅgināṃ saṃkhyātaś ca yathāyogaṃ saṃkṣepād dvividho 'py ayaṃ    sa sāṃparāyikasya syāt sakaṣāyasya dehinaḥ īryāpathasya ca prokto 'kaṣāyasyeha sūtrataḥ    kaṣaṇād ātmanāṃ ghātāt kaṣāyaḥ kugatipradaḥ krodhādiḥ saha tenātmā sakaṣāyaḥ pravartanāt    kaṣāyarahitas tu syād akaṣāyaḥ praśāṃtitaḥ kaṣāyasya kṣayād veti pratipattavyam āgamāt    samaṃtataḥ parābhūtiḥ saṃparāyaḥ parābhavaḥ jīvasya karmabhiḥ proktas tadarthaṃ sāṃparāyikaṃ    karma mithyādṛgādīnām ārdracarmaṇi reṇuvat kaṣāyapicchile jīve sthitim āpnuvad ucyate    īryā yogagatiḥ saivaṃ yathā yasya tad ucyate karmeryāpatham asyāstu śuṣkakuṭyeśmavac ciraṃ    yogamātranimittaṃ tu puṃsyāsravad api sthitiḥ na prayāty anubhāgaṃ vā kaṣāyān sattvataḥ sadā    kaṣāyahetukaṃ puṃsaḥ pārataṃtryaṃ samaṃtataḥ sattvāṃtarānapekṣīha padmam adhyagabhṛṃgavat    kaṣāyavinivṛttau tu pārataṃtryaṃ nivartyate yatheha kasyacic chāṃtakaṣāyāvasthitikṣaṇe    sāṃparāyikam atroktaṃ pūrvaṃ tasyeṃdriyādayaḥ bhedāḥ paṃcādisaṃkhyāḥ syuḥ pariṇāmaviśeṣataḥ    tatra caityaśrutācāryapūjās tavādilakṣaṇā samyaktvavardhanī jñeyā vidbhiḥ samyaktvasatkriyā    kucaityādipratiṣṭhādir yā mithyātvapravardhanī sā mithyātvakriyā bodhyā mithyātvodayasaṃsṛtā    kāyādibhiḥ pareṣāṃ yad gamanādipravartanaṃ sadasatkāryasiddhyarthaṃ sā prayogakriyā matā    na kāyavāṅmanoyogān no nivartayituṃ kṣamāḥ pudgalās tadupādānaṃ svahetudvayato nyathā    saṃyatasya sataḥ puṃso 'saṃyamaṃ prati yad bhavet ābhimukhyaṃ samādānakriyā sā vṛttaghātinī    īryāpathakriyā tatra proktā tatkarmahetukā iti paṃcakriyās tāvacchubhāśubhaphalāḥ smṛtāḥ    krodhāveśāt pradoṣo yaḥ sāṃtaprādoṣikī kriyā tatkāryatvāt sahetutvāt krodhād anyā hy anīdṛśāt    praduṣṭasyodyamo haṃtuṃ gaditā kāyikī kriyā hiṃsopakaraṇādānaṃ tathādhikaraṇakriyā    duḥkhotpādanataṃtratvaṃ syāt kriyā pāritāpikī kriyā sā tāvatā bhinnā prathamā tatphalatvataḥ     kaṣāyāc ceti paṃcaitāḥ prapattavyāḥ kriyāḥ parāḥ    rāgārdrasya pramattasya surūpālokanāśayaḥ syād darśanakriyā sparśe spṛṣṭadhīḥ sparśanakriyā    ete ceṃdriyato bhinne parispaṃdātmike mate jñānātmanaḥ kaṣāyāc ca tatphalatvāt tathāvratāt    apūrvaprāṇighātārthopakaraṇapravartanaṃ kriyā prātyayikī jñeyā hiṃsāhetus tathā parā    stryādisaṃpātideśe ṃtarmalotsargaḥ pramādinaḥ śaktasya yaḥ kriyeṣṭeha sā samaṃtānupātikī    adṛṣṭe yo pramṛṣṭe ca sthāne nyāso yater api kāyādeḥ sā tv anābhogakriyā saitāś ca paṃca tāḥ    paranirvartyakāryasya svayaṃ karaṇam atra yat sā svahastakriyāvadyapradhānā dhīmatāṃ matā    pāpapravṛttāv anyeṣām abhyanujñānam ātmanā syān nisargakriyālasyādakṛtir vā sukarmaṇāṃ    parācaritasāvadyaprakāśanam iha sphuṭaṃ vidāraṇakriyā tv anyā syād anyatra viśuddhitaḥ    āvaśyakādiṣu khyātām arhadājñām upāsituṃ aśaktasyānyathākhyānād ājñāvyāpādikī kriyā    śāṭhyālasya vaśād arhatproktācāravidhau tu yaḥ anādaraḥ sa eva syād anākāṃkṣakriyā vidāṃ    etāḥ paṃca kriyāḥ proktāḥ parās tattvārthavedibhiḥ kaṣāyahetukā bhinnāḥ kaṣāyebhyaḥ kathaṃcana    ched anādikriyāsaktacittatvaṃ svasya yad bhavet pareṇa tatkṛtau harṣaḥ sehāraṃbhakriyā matā    parigrahāvināśārthā syāt pārigrahikī kriyā durvaktṛkavaco jñānādau sā māyādikriyā parā    mithyādikāraṇāviṣṭadṛṣṭīkaraṇam atra yat praśaṃsādibhir uktānyā sā mithyādarśanakriyā    vṛttamohodayāt puṃsām anivṛttiḥ kukarmaṇaḥ apratyākhyā kriyety etāḥ paṃca paṃca kriyāḥ smṛtāḥ    tīvratvādiviśeṣebhyas teṣāṃ pratyekam īritaḥ baṃdhaḥ kaṣāyahetubhyo viśeṣo vyāsataḥ punaḥ    na yuktaḥ sūtritaś citraḥ karmabaṃdhānurūpataḥ tac ca karma nṛṇāṃ tasmād iti hetuphalasthitiḥ    tatrādhikaraṇaṃ jīvājīvā yasya viśeṣataḥ sāṃparāyikabhedānāṃ viśeṣaḥ pratisūtritaḥ    jīvājīvādhikaraṇaṃ proktam ādyaṃ hi bhidyate saṃraṃbhādibhir ākhyātair viśeṣais tribhir ekaśaḥ    yogais tannavadhā bhinnaṃ saptaviṃśatisaṃkhyakaṃ kṛtādibhiḥ punaś caitad bhaved aṣṭottaraṃ śataṃ    kaṣāyair bhidyamānātmacaturbhir iti saṃgrahaḥ kaṣāyasthānabhedānāṃ sarveṣāṃ paramāgame    tato dhikaraṇaṃ proktaṃ paraṃ nirvartanādayaḥ dvyādibhedās tad asya syād ajīvātmakam eva hi    jīvājīvān samāśritya kaṣāyānugrahānvitān āsravā bahudhā bhinnāḥ syur nṛṇām iṃdriyādayaḥ    bādhakābhāvanirṇītes tathā sarvatra sarvadā sarveṣāṃ sveṣṭanāt siddhās tīvratvādiviśiṣṭavat    evaṃ bhūmā karmaṇām āsravo yaṃ sāmānyena khyāpitaḥ sāṃparāyī  tatsāmarthyād anyam īryāpathasya prāhurdhvastāśeṣadoṣāśrayasya    viśeṣeṇa punar jñānadṛṣṭyāvaraṇayor matāḥ tatpradoṣādayaḥ puṃsām āsravās te nubhāgagāḥ    yatpradoṣādayo ye te tadāvaraṇapudgalāt naro nayaṃti bībhatsupradoṣādyā yathā karān    duḥkhādīni yathoktāni svaparobhayagāni tu āsrāvayaṃti sarvasyāpy asātaphalapudgalān    tajjātīyātmasaṃkleśaviśeṣatvād yathānale praveśādividhāyīni svasaṃvedyāni kānicit    bhūtavratyanukaṃpādi sātakāraṇapudgalān jīvasya ḍhaukayaty evaṃ viśuddhyaṃgatvato yathā    pathyauṣadhāvabodhādiḥ prasiddhaḥ kasyacid dvayoḥ sadasadvedyakarmāṇi tādṛśān pudgalānayaṃ    kevalyādiṣu yo varṇavādaḥ syād āśaye nṛṇāṃ sa syād darśanamohasya tattvāśraddhānakāriṇaḥ    āsravo yo hi yatra syād yad ācāre yadā sthitau yat praṇetari cāvarṇavādaḥ śraddhānaghāty asau    śrotriyasya yathā madye tadādhārādikeṣu ca pratīto sau tathā tattve tato darśanamohakṛt    tathā cāritramohasya kaṣāyodayato nṛṇāṃ syāt tīvrapariṇāmo yaḥ sa samāgamakāraṇaṃ    yaḥ kaṣāyodayāt tīvraḥ pariṇāmaḥ sa ḍhaukayet cāritravātinaṃ bhāvaṃ kāmodreko yathā yateḥ    kasyacit tādṛśasyāyaṃ vivādāpannavigrahaḥ tasmāt tatheti nirbādham anumānaṃ pravartate    narakasyāyuṣo bhīṣṭaṃ bahvāraṃbhatvam āsravaḥ bhūyaḥ parigrahatvaṃ ca raudradhyānātiśāyi yat    niṃdyaṃ dhāma nṛṇāṃ tāvat pāpādhānanibaṃdhanam siddhaṃ cāṃḍālakādīnāṃ dhenughātavidhāyinām    tatprakarṣāt punaḥ siddhyed dhīnadhāmaprakṛṣṭatā tasya prakarṣaparyaṃtā tatprakarṣavyavasthitiḥ    pāpānuṣṭhā kvacid ghātiparyaṃtatāratamyataḥ pariṇāmādivattatto raudradhyānam apaścimaṃ    tasyāpakarṣato hīnagater apy apakṛṣṭatā siddheti bahudhā bhinnaṃ nārakāyur upeyate    māyā tairyagyonasyety āyuṣaḥ kāraṇaṃ matā ārtadhyānād vinā nātra svābhyupāyavirodhataḥ    apakṛṣṭaṃ hi yat pāpadhyānamārtaṃ tadīritaṃ niṃdyaṃ dhāma tathaivāprakṛṣṭaṃ tairyaggatis tataḥ    prasiddham āyuṣo naikapradhānatvaṃ pramāṇataḥ tairyagyonasya siddhāṃte dṛṣṭeṣṭābhyām abādhitaṃ    mānuṣasyāyuṣo jñeyam alpāraṃbhatvam āsravaḥ miśradhyānānvitam alpaparigrahatayā saha    dharmamātreṇa saṃmiśraṃ mānuṣīṃ kurute gatiṃ sātāsātātmatanmiśraphalasaṃvartikā hi sā    dharmādhikyāt sukhādhikyaṃ pāpādhikyāt punar nṛṇāṃ duḥkhādhikyam iti proktā bahudhā mānuṣī gatiḥ   svabhāvamārdavaṃ ceti hetvaṃtarasamuccayaḥ mānuṣasyāyuṣas tad dhi miśradhyānopapādikaṃ    niḥśīlavratatvaṃ ca sarveṣām āyuṣām iha tatra sarvasya saṃbhūter dhyānasyāsubhṛtāṃ śritau    tasyaikasyāpi daivasyāyuṣaḥ saṃpratipattaye dharmadhyānānvitatvena nānyathātiprasaṃgataḥ    samyaktvaṃ ceti taddhetusamuccayavacobalāt tasyaikasyāpi daivāyuḥkāraṇatvaviniścayaḥ    sarvāpavādakaṃ sūtraṃ kecid vyācakṣate sati samyaktve nyāyuṣāṃ hetor viphalasya prasiddhitaḥ    tatrāpracyutasamyaktvā jāyaṃte devanārakāḥ manuṣyeṣv iti naivedaṃ tadbādhakam itītare    tanniḥśīlavratatvasya na bādhakam idaṃ viduḥ syād aśeṣāyuṣāṃ hetubhāvasiddheḥ kutaścana    pṛthaksūtrasya nirdeśād dhetur vaimānikāyuṣaḥ samyaktvam iti vijñeyaṃ saṃyamāsaṃyamādivat    samyagdṛṣṭer anaṃtānubaṃdhikrodhādyabhāvataḥ jīveṣv ajīvatā śraddhāpāyān mithyātvahānitaḥ    hiṃsāyās tatsvabhāvāyā nivṛtteḥ śuddhivṛttitaḥ prakṛṣṭasyāyuṣo daivasyāsravo na virudhyate    nāmnośubhasya hetuḥ syād yogānāṃ vakratā tathā visaṃvādanam anyasya saṃkleśād ātmabhedataḥ    tatas tadviparītaṃ yat kiṃcit tatkāraṇaṃ viduḥ nāmnaḥ śubhasya śuddhātmaviśeṣatvāvasāyataḥ    jinoddiṣṭeti nairgraṃthyamokṣavartmany aśaṃkanaṃ anākāṃkṣaṇam apy atrāmutra caitatphalāptaye    vicikitsāny adṛṣṭīnāṃ praśaṃsāsaṃstavacyutiḥ mauḍhyādirahitatvaṃ ca viśuddhiḥ sā dṛśo matā    saṃjñānādiṣu tadvatsu vādarotthānapekṣayā kaṣāyavinivṛttir vā vinayair munisaṃmataiḥ    saṃpannatā samākhyātā mumukṣūṇām aśeṣataḥ saddṛṣṭyādiguṇasthānavartināṃ svānurūpataḥ    saccāritravikalpeṣu vrataśīleṣv aśeṣataḥ niravadyānuvṛttir yān aticāraḥ sa teṣu vai    saṃjñānabhāvanāyāṃ tu yā nityam upayuktatā jñānopayoga evāsau tadābhīkṣṇaṃ prasiddhitaḥ    saṃsārād bhīrutābhīkṣṇaṃ saṃvegaḥ saddhiyāṃ mataḥ na tu mithyādṛśāṃ teṣāṃ saṃsārasyāprasiddhitaḥ    śaktitas tyāga udgītaḥ prītyā svasyātisarjanaṃ nātmapīḍākaraṃ nāpi saṃpady anatisarjanaṃ    anigūhitavīryasya samyagmārgāvirodhataḥ kāyakleśaḥ samākhyātaṃ viśuddhaṃ śaktitas tapaḥ    bhāṃḍāgārāgnisaṃśāṃtisamaṃ munigaṇasya yat tapaḥsaṃrakṣaṇaṃ sādhusamādhiḥ sa udīritaḥ    guṇiduḥkhanipāte tu niravadyavidhānataḥ tasyāpaharaṇaṃ proktaṃ vaiyāvṛtyam aniṃditaṃ    arhatsv ācāryavaryeṣu bahuśrutayatiṣv api jaine pravacane cāpi bhaktiḥ pratyupavarṇitā    bhāvaśuddhyā nutā śaśvadanurāgaparair alaṃ viparyāsitacittasyāpy anyathābhāvahānitaḥ    āvaśyakakriyāṇāṃ tu yathākālaṃ pravartanā āvaśyakāparihāṇiḥ ṣaṇṇām api yathāgamaṃ    mārgaprabhāvanā jñānatapor hatpūjanādibhiḥ dharmaprakāśanaṃ śuddhabauddhānāṃ paramārthataḥ    vatsalatvaṃ punar vatse dhenuvatsaṃ prakīrtitaṃ jaine pravacane samyakchraddhānajñānavatsv api    dṛgviśuddhyādayo nāmnas tīrthakṛttvasya hetavaḥ samastā vyastarūpā vā dṛgviśuddhyā samanvitāḥ    sarvātiśāyi tatpuṇyaṃ trailokyādhipatitvakṛt pravṛttyātiśayādīnāṃ nirvartakam apīśituḥ    paraniṃdādayo nīcair gotrasyāsravaṇaṃ mataṃ teṣāṃ tadanurūpatvād anyathānupapattitaḥ    uttarasyāsravaḥ siddhaḥ sāmarthyāt tadviparyayaḥ nīcair vṛttir anutsekas tathaivāmalavigraha    sarvasyāpy aṃtarāyasyāsravaḥ syāt prāṇinām iha vighnasya karaṇāt tasya tathāyogyatvaniścayāt    pravartamānadānādipratiṣedhasya bhāvanā āsrāvikāṃtarāyasya dṛṣṭatadbhāvanā yathā    iti pratyekam ākhyātaḥ karmaṇām āsravaḥ śubhaḥ puṇyānām aśubhaḥ pāparūpāṇāṃ śuddhyaśuddhitaḥ    yādṛśāḥ svapariṇāmaviśeṣā yasya hetuvaśato 'subhṛtaḥ syuḥ  tādṛśāny upapataṃti tam agre svānubhāgakarakarmarajāṃsi    oṃ atha saptamo 'dhyāyaḥ    atha puṇyāsravaḥ proktaḥ prāgvrataṃ viratiś ca tat hiṃsādibhya iti dhvastaṃ guṇebhyo viratirvratam    deśato ṇuvrataṃ ceha sarvatas tu mahadvrataṃ deśasarvaviśuddhātmabhedāt saṃjñānino mataṃ    tatsthairyārthaṃ vidhātavyā bhāvanāḥ paṃca paṃca tu tadasthairye yatīnāṃ hi saṃbhāvyo nottaro guṇaḥ    syātāṃ me vāṅmanoguptī prathamavrataśuddhaye tatheryādānanikṣepasamitī vīkṣyabhojanaḥ    krodhalobhabhayaṃ hāsyaṃ pratyākhyānamṛtodbhavaṃ tattvānukūlam ābhāṣe dvitīyavrataśuddhaye    śūnyaṃ mocitam āvāsam adhitiṣṭhāmi śuddhidaṃ paroparodhaṃ muṃcāmi bhaikṣyaśuddhiṃ karomy ahaṃ    sadharmabhiḥ samaṃ śaśvadavisaṃvādam ādriye asteyātikramadhvaṃsahetutadvratavṛddhaye    strīṇāṃ rāgakathāṃ jahyāṃ manohāryaṃgavīkṣaṇaṃ pūrvaratasmṛtiṃ vṛṣyam iṣṭaṃ rasam asaṃśayam    tathā śarīrasaṃskāraṃ raticeto bhivṛddhikaṃ caturthavratarakṣārthaṃ satataṃ yatamānasaḥ    sarvākṣaviṣayeṣv iṣṭāniṣṭopasthiteṣv iha rāgadveṣau tyajāmy evaṃ paṃcamavrataśuddhaye    pratyekam iti paṃcānāṃ vratānāṃ bhāvanā matāḥ paṃca paṃca sadā saṃtu niḥśreyasaphalapradāḥ    bhāvyaṃ niḥśreyasaṃ bhāvyo bhāvako bhāvanā punaḥ tadupāya iti tryaṃśapūrṇāḥ syādvādināṃ giraḥ    hiṃsanādiṣv ihāpāyadarśanaṃ bhāvanā yathā mayāmutra tathāvadyadarśanaṃ pravidhīyate    bhāvanā dehināṃ tatra kartavyā duḥkham eva vā duḥkhātmakabhavodbhūtihetutvād avrataṃ hi tat    maitryādayo viśuddhyaṃgāḥ sattvādiṣu yathāgamaṃ bhāvanāḥ saṃbhavaṃty aṃtarnaikāṃtāśrayaṇe tu tāḥ    maitrī sattveṣu kartavyā yathā tadvadguṇādhike kliśyamāne 'vineye ca sattvarūpāviśeṣataḥ    kāruṇyaṃ ca samasteṣu saṃsārakleśabhāgiṣu mādhyasthyaṃ vītarāgāṇāṃ na kvacid vinidhīyate    bhavyatvaṃ guṇam ālokya pramodākhiladehiṣu kartavya iti tatrāyaṃ vibhāgo mukhyarūpataḥ    jagatkāyasvabhāvau vā bhāvane bhāvitātmanāṃ saṃvegāya viraktyarthaṃ tattvatas tatprabodhataḥ    bhāvanā kalpanāmātraṃ yeṣām arthānapekṣayā teṣāṃ nārthas tato 'niṣṭakalpanāta ivepsitam    anaṃtānaṃtatattvasya kaścid artheṣu bhāvyate sann eveti yathārthaiva bhāvanā no vyavasthitā    hiṃsātra prāṇināṃ prāṇavyaparopaṇam udīritā pramattayogato nāto muneḥ saṃyatanātmanaḥ    apraśastam asadbodham abhidhānaṃ yad asya tat pramattasyānṛtaṃ nānyasyety āhuḥ saty avādinaḥ    tena svaparasaṃtāpakāraṇaṃ yad vacoṃgināṃ yathādṛṣṭārtham apy atra tad asatyaṃ vibhāvyate    mithyārtham api hiṃsādiniṣedha vacanaṃ mataṃ satyaṃ tatsatsu sādhutvād ahiṃsāvrataśuddhidam    pramattayogato yat syād adattādānam ātmanaḥ steyaṃ tatsūtritaṃ dānādānayogyārthagocaram    tena sāmānyato 'dattam ādadānasya sanmuneḥ sarinnirjharaṇādyaṃbhaḥ śuṣkagomayakhaṃḍakam    bhasmādi vā svayaṃ muktaṃ picchālābūphalādikaṃ prāsuktaṃ na bhavet steyaṃ pramattatvasya hānitaḥ    tathā maithunam abrahma pramattasyaiva tatpunaḥ pramādarahitānāṃ hi jātucittadasaṃbhavaḥ    yasya hiṃsānṛtādīni tasya saṃti parasparaṃ avinābhāvavadbhāvād eṣām iti ca durbudhāḥ    tato hiṃsāvrataṃ yasya yasya sarvavratakṣatiḥ tad eva paṃcadhā bhinnaṃ kāṃścit prati mahāvraṃta    mūrchā parigrahaḥ so pi nāpramattasya yujyate tayā vinā na vastrādigrahaṇaṃ kasyacit tataḥ    niḥśalyo tra vratī jñeyaḥ śalyāni trīṇi tattvataḥ mithyātvādīnī sadbhāve vratāśayaviparyayaḥ    so py agāryanagāraś ca bhāvāgārasya bhāvataḥ abhāvāc ceti pāṃthāder nānagāratvasaṃbhavaḥ    tatra cāṇuvratogārī sāmarthyāt syān mahāvrataḥ anagāra iti jñeyam atra sūtrāṃtarād vinā    digdeśānarthadaṃḍebhyo viratir yā viśuddhikṛt sāmāyikaṃ tridhā śuddhaṃ trikālaṃ yad udāhṛtaṃ    yaḥ proṣadhopavāsaś ca yathāvidhi niveditaḥ parimāṇaṃ ca yat svasyopabhogaparibhogayoḥ    āhārabheṣajāvāsapustavastrādigocaraḥ saṃvibhāgo vrataṃ yat syād yogyāyātithaye svayaṃ    tatsaṃpannaś ca niśceyo 'gārīti dvādaśoditāḥ dīkṣābhedā gṛhasthasya te samyaktvapuraḥsarā    samyakkāyakaṣāyāṇāṃ tvakṣā sallekhanātra tāṃ joṣitā sevitā prītyā sa vratī māraṇāṃtikīṃ    mṛtyukāraṇasaṃpātakālam āsthitya sadvrataṃ rakṣituṃ śakyabhāvena nānyathety apramattagaṃ    pṛthaksūtrasya sāmarthyāc ca sāgārānagārayoḥ sallekhanasya seveti pratipattavyam aṃjasā    nānānivṛttipariṇāmaviśeṣasiddher ekasya nurbahuvidhavratam arthabhedāt  yuktaṃ kramākramavivartibhidātmakasya nānyasya jātu nayabādhitavigrahasya    samyagdṛṣṭer atīcārāḥ paṃca śaṃkādayaḥ smṛtāḥ teṣu satsu hi tattvārthaśraddhānaṃ na viśuddhyati    paṃca paṃca vrateṣv evaṃ śīleṣu ca yathākramaṃ vakṣyaṃte taḥ paraṃ śeṣe iti sūtre tidiśyatām    tatrāhiṃsāvratasyātīcārā baṃdhādayaḥ śrutāḥ teṣāṃ krodhādijanmatvāt krodhādes tanmalatvataḥ    tathā mithyopadeśādyā dvitīyasya vratasya te teṣām anṛtamūlatvāt tadvat tena virodhataḥ    proktāḥ stenaprayogādyāḥ paṃcāsteyavratasya te steyahetutvatas teṣaṃ bhāve tanmalinatvataḥ    caturthasya vratasyānyavivāhakaraṇādayaḥ paṃcaite tikramā brahmavidhātakaraṇakṣamāḥ    kṣetravāstvādiṣūpāttapramāṇātikramāḥ svayaṃ paṃca saṃtoṣanirghātahetavo ṃtyavratasya te    ūrdhvatikramaṇādyāḥ syuḥ śīlasyādyasya paṃca te tadviratyupaghātitvāt teṣāṃ tad dhi malatvataḥ    dvitīyasya tu śīlasya te paṃcānayanādayaḥ svadeśavirater bādhā taiḥ saṃkleśavidhānataḥ    kaṃdarpādyās tṛtīyasya śīlasyehopasūtritāḥ teṣām anarthadaṃḍebhyo virater bādhakatvataḥ    yogaduḥpraṇidhānādyāś caturthasya vyatikramāḥ śīlasya tadvighātitvāt teṣāṃ tanmalatāsthiteḥ    apratyavekṣitetyādyās tatroktāḥ paṃcamasya te śīlasyātikramāḥ paṃca tadvighātasya hetavaḥ    tathā taccittasaṃbaṃdhāhārādyāḥ paṃca sūtritāḥ te tra ṣaṣṭhasya śīlasya tadvirodhanahetavaḥ    smṛtāḥ sacittanikṣepapramukhās te vyatikramāḥ saptamasyeha śīlasya tadvighātavidhāyinaḥ    vijñeyā jīvitāśaṃsāpramukhāḥ paṃca tattvataḥ proktasallekhanāyās te viśuddhikṣatihetavaḥ    svaṃ dhanaṃ syāt parityāgo tisargas tasya nu sphuṭaḥ taddānam iti nirdeśo tiprasaṃganivṛttaye    anugrahārtham ity etadviśeṣaṇam udīritaṃ tena svamāṃsadānādi niṣiddhaṃ paramāpakṛt    tadviśeṣaḥ prapaṃcena syād vidhyādiviśeṣataḥ dātuḥ śuddhiviśeṣāya samyagbodhasya viśrutaḥ    vidhyādīnāṃ viśeṣaḥ syāt svakāraṇaviśeṣataḥ tatkāraṇaṃ punar bāhyamāṃtaraṃ cāpy anekadhā    pātraparigrahādibhyo vidhibhyas tāvad āsravaḥ dātuḥ puṇyasya saṃkleśarahitebhyo tiśāyinaḥ    kiṃcit saṃkleśayuktebhyo madhyamasyopavarṇitaḥ bṛhatsaṃkleśayuktebhyaḥ svalpasyeti vibhidyate    nikṛṣṭamadhyamotkṛṣṭaviśuddhibhyo viparyayaḥ tebhyaḥ syād iti saṃkṣepād uktaṃ sūribhiraṃjasā    guṇavṛddhikaraṃ dravyaṃ pātre 'pātre samarpitaṃ doṣavṛddhikaraṃ pāpakāri miśraṃ tu miśrakṛt    dātā guṇānvitaḥ śuddhaḥ paraṃ puṇyam avāpnuyāt doṣānvitas tv aśuddhātmā paraṃ pāpam upaiti saḥ    guṇadoṣānvitaḥ śuddhāśuddhabhāve samaśnute bahudhā madhyamaṃ puṇyaṃ pāpaṃ ceti viniścayaḥ    dattam annaṃ supātrāya svalpam apy urupuṇyakṛt madhyamāya tu pātrāya puṇyaṃ madhyamam ānayet    kaniṣṭhāya punaḥ svalpam apātrāyāphalaṃ viduḥ pāpāpāpaṃ phalaṃ ceti sūrayaḥ saṃpracakṣate    apātrebhyo dattaṃ bhavati saphalaṃ kiṃcid aparaṃ na pātrebhyo vittaṃ pracuram uditaṃ jātucid iha  adattaṃ pātrebhyo janayati śubhaṃ bhūri gahanaṃ jano 'yaṃ syādvādaṃ katham iva niruktaṃ prabhavati    atha aṣṭamo'dhyāyaḥ    atha baṃdhe 'bhidhātavye 'bhidhīyaṃte sya hetavaḥ nirhetukatvakūṭasthākāraṇatvanivṛttaye    syur baṃdhahetavaḥ puṃsaḥ svamithyādarśanādayaḥ tasya tadbhāvabhāvitvād anyathā tadasiddhitaḥ    tadviparyayato mokṣahetavaḥ paṃca sūtritāḥ sāmarthyād atra nāto sti virodhaḥ sarvathā girām    pudgalānāṃ nurādānaṃ vaṃdho dravyātmakaḥ smṛtaḥ yogyānāṃ karmaṇaḥ sveṣṭāniṣṭanirvartanātmanaḥ    pudgalāḥ karmaṇo yogyāḥ kecin mūrtārthayogataḥ pacyamānatvataḥ śālibījādivad itīritaṃ    tān ādatte svayaṃ jīvaḥ sakaṣāyatvataḥ sa tu yo nādatte prasiddho hi kaṣāyarahitaḥ paraḥ    sakaṣāyaḥ sakarmatvajīvaḥ syāt pūrvato nyataḥ kaṣāyebhyaḥ sakarmeti nānyathā bhavabhāgayaṃ    jīvaḥ saṃbaṃdha iti vā sakaṣāyatvato nyathā tasya muktātmavattattvānupapatteḥ prasiddhitaḥ    sakaṣāyatvam adhyakṣāt svasaṃvedanataḥ svayaṃ kopavān aham ity evaṃ rūpāt siddhaṃ hi dehināṃ    pradhānaṃ sakaṣāyaṃ tu syān naivācetanatvataḥ kuṃbhādivat tato nedaṃ saṃbaṃdham iti nirṇayaḥ    karmaṇaḥ sakaṣāyatvaṃ jīvasyeti na śāśvataṃ sahetukasya kauṭasthyavirodhāt kuṭakādivat    tato nu muktyabhāvo nu kutaścit karmaṇaḥ kṣaye sakaṣāyatvavidhvaṃsāvidhvaṃsakṛtasiddhitaḥ    jīvo hi karmaṇo yogyān ādatte pudgalān svayaṃ sakaṣāyas tataḥ pūrvaṃ śuddhasya tadasaṃbhavāt    taddravyakarmabhir baṃdhaḥ pudgalātmabhir ātmanaḥ siddho nātmaguṇair evaṃ kaṣāyair bhāvakarmabhiḥ    anyathā sakaṣāyatvapratyayasya virodhataḥ saṃsāriṇāṃ śarīrādisaṃbaṃdhasyaiva hānitaḥ    tasya baṃdhasya vidhayaḥ prakṛtyādyāḥ susūtritāḥ tathāvidhatvasaṃsiddher baṃdhavyānāṃ kathaṃcana    sthityādiparyayonmuktaiḥ karmayogyair hi pudgalaiḥ prakṛtyāvasthitair baṃdhaḥ prathamo tra vivakṣitaḥ    pratipradeśam etair nu mato baṃdhaḥ pradeśataḥ sthityādiparyayākrāṃtaiḥ sa sthityādiviśeṣitaḥ    karmaprakṛtayas tatra syur jñānāvaraṇādayaḥ tādṛkkāryaviśeṣānumeyāḥ karaṇaśaktivat    te ca paṃcādibhedāḥ syur yathākramam itīraṇāt kāryaprabhedataḥ sādhyāḥ sadbhiḥ prakṛtayoparāḥ    matyādīnāṃ hi paṃcānāṃ jñānānāṃ paṃca veditaṃ karmāvaraṇam anyasya hetor bhāve py abhāvataḥ    caturṇāṃ cakṣurādīnāṃ darśanānāṃ caturvidhaṃ nidrādayaś ca paṃceti nava prakṛtayosya tāḥ    dvedhā tu sadasadvedye sātetarakṛtād ime prakṛtī vedanīyasya nānyathā tadvyavasthitiḥ    darśanetyādisūtreṇa mohanīyasya karmaṇaḥ aṣṭāviṃśatir ākhyātās tāvad vā kāryadarśanāt    nārakādīni catvāri cāyūṃṣi bhavabhedataḥ siddhāni tadabhāve sya prāṇināmavyavasthiteḥ    dvicatvāriṃśadākhyātā gatināmādayas tathā nāmnaḥ prakṛtibhedās te numīyaṃte svakāryataḥ    prādhānyaṃ sarvanāmabhyaḥ śatebhyaḥ śuddhijanmanaḥ bodhyaṃ tīrthakaratvasya bhavāṃte phaladāyinaḥ    uccair nīcaiś ca gotraṃ syād dvibhedaṃ dehinām iha tathā saṃśabdanasyānyahetuhīnasya siddhitaḥ    dānādīnāṃ tu paṃcānām aṃtarāyāḥ prasūtritāḥ paṃca dānādivighnasya tatkāryasya viśeṣataḥ    evaṃ prakṛtibhir baṃdhaḥ karmabhir viniveditaḥ ādyaḥ prakṛtibaṃdho tra jīvasyānekadhā sthitaḥ    yavatām anubhavo stu phalānāṃ dṛṣṭahetughaṭanāc ca janānāṃ  tāvatīha gaṇanā prakṛtīs tāḥ karmaṇām anuminotu mahātmā    āditas tisṛṇāṃ karmaprakṛtīnāṃ parā sthitiḥ aṃtarāyasya ca proktā tatphalasya prakarṣataḥ    sāgaropamakoṭīnāṃ koṭyas triṃśat tadanyathā tadabhāve pramāṇasyābhāvāt sā kena bādhyate    saptatir mohanīyasya viṃśatir nāmagotrayoḥ iti sūtradvayaṃ bādhavarjam etena varṇitam    tathāyuṣas trayastriṃśatsāgaropamasaṃkhyayā paramasthitinirṇītir iti sākalyataḥ smṛtā    adhunā vedanīyasya muhūrtā dvādaśa sthitiḥ sāmarthyān madhyamā madhye 'nekadhā saṃpratīyate    sā nāmagotrayor aṣṭau muhūrtā iti vartanāt yām ādayo vyavacchinnāḥ kāmaṃ madhye stu madhyamā    śeṣāṇāṃ karmaṇām aṃtarmuhūrtā ceti kārtsnyataḥ jaghanyam adhyamotkṛṣṭā sthitiryā pratipāditā    tayā viśeṣitair baṃdhaḥ karmabhiḥ svayam āhṛtaiḥ sthitibaṃdho vaboddhavyastatprādhānyavivakṣayā    sthityā kevalayā baṃdhas tadvacchūnyair na yujyate tadvadāśritayā tv asti bhūmibhūdharayor iva    sthitiśūnyāni karmāṇi niranvayavināśataḥ pradīpādivad ity etatsthiteḥ siddhāni dhāryate    vipāko nubhavo jñeyaḥ pudgalādimukhena tu karmaṇāṃ phalaniṣpattau sāmarthyāyogato nyathā    sāmarthyān nāmabhedena jñāyetānvarthanāmatā nurjñānāvaraṇādīnāṃ karmaṇām anyathā smṛteḥ    tathā cānubhavaprāptair ātmanaḥ karmabhir bhavet eṣo nubhavabaṃdho syānyāsravasya viśeṣataḥ    tataś ca nirjarety etatsaṃkṣepārtham ihoditaṃ nirjarāprastuter agre py etadbhedaprasiddhaye    yathākālaṃ vipākena nirjarā karmaṇām iyaṃ vakṣyamāṇā punar jīvasyopakramanibaṃdhanā    prāganuktā samuccāryā caśabdenātra sā punaḥ tapasā nirjarā ceti niyamo na nirucyate    phalaṃ dattvā nivartaṃte dravyakarmāṇi dehinaḥ tenāhṛtatvataḥ svādyādyāhāradravyavatsvayaṃ    bhāvakarmāṇi naśyaṃti tannivṛttyaviśeṣataḥ tatkāryatvād yathāgnyādināśe dhūmādivṛttayaḥ    tataḥ phalopabhoge pi karmaṇāṃ na kṣayo nṛṇāṃ pādapādivad ity etadvaco pāstaṃ kunītikaṃ    pārataṃtryam akurvāṇāḥ puṃso ye karmapudgalāḥ karmatvena viśiṣṭās te saṃto py atrāṃbarādivat    nāmānvarthaṃ padākhyātaṃ pratyayās tasya hetavaḥ pradeśāḥ karmaṇo 'naṃtānaṃtamānaviśeṣitāḥ    skaṃdhātmanā virudhyaṃte na pramāṇena tattvataḥ skaṃdhābhāve kṣavijñānābhāvāt sarvā gṛhāgate    sarveṣv ātmapradeśeṣu na kiyatsucid eva te tatphalasya tathā vitte nīre kṣīrapradeśavat    sūkṣmaśabdena ca yogyasvabhāvagrahaṇāya te pudgalāḥ pratipādyaṃte sthūlānāṃ tadasaṃbhavāt    ekakṣetrāvagāhābhidhānaṃ kṣetrāṃtarasya tat nivṛttyarthaṃ sthitāḥ syāt tu kriyāṃtaranivṛttaye    atyaṃtaniviḍāvasthāvagāho rthāt pratīyate tena te vasthitās tatra gomaye dhūmarāśivat    bhūyaḥ pradeśam ekatra pradeśe dravyam īkṣyate paramāṇau yathā kṣmābhṛt kulaṃ naiveti kecana    teṣām alpapradeśasthair ghanaiḥ karpāsapiṃḍakaiḥ anyaikāṃtikatā hetor bhūyodeśair asaṃśayam    yogaḥ pūrvoditastasya viśeṣāt kāraṇāt tathā sthitās te tra vinā hetor niyatāvasthitikṣateḥ    sarveṣv asarveṣv ete kvacid eva bhaven na tu sarvato vacanād eva pratipattavyam aṃjasā    iti pradeśair yo baṃdhaḥ karmaskaṃdhādibhir mataḥ sa nuḥ pradeśabaṃdhaḥ syād eṣa baṃdho vilakṣaṇaḥ    so yaṃ kāraṇabhedena kāryabhedena cāsthitaḥ svabhāvasya ca bhedena karmabaṃdhaś caturvidhaḥ    baddhaspṛṣṭādibhedenāvasthitādibhidāpi ca dravyādibhedato nāmādiprabhedena vā tathā    vinā prakṛtibaṃdhān na syur jñānāvaraṇādayaḥ kāryabhedāt svayaṃ siddhāḥ sthitibaṃdhād vinā sthirāḥ    na cānubhavabaṃdhena vinānubhavanaṃ nṛṇāṃ pradeśabaṃdhataḥ kṛtsnair naikair na vyāpyavṛttaye    evaṃ kāryaviśeṣebhyo viśeṣo baṃdhaniṣṭhitaḥ pratyeyo nekadhā yukter āgamāc ca tathāvidhāt    puṇyāsravoktisāmarthyāt puṇyabaṃdho 'vagamyate sadvedyādīni catvāri tatpuṇyam iha sūtritaṃ    yasyodayāt sukhaṃ tat syāt sadvedyaṃ dehināṃ tathā śubham āyus tridhā yasya phalaṃ śubhabhavatrayaṃ    saptatriṃśadvikalpaṃ tu śubhaṃ nāma tathā phalaṃ uccair gotraṃ śubhaṃ prāhuḥ śubhasaṃśabdanārthakam    iti kāryānumeyaṃ taddvicatvāriṃśadātmani pāpāsravoktisāmarthyāt pāpabaṃdho vyavasthitaḥ    duḥkhādibhyo 'śubhebhyas tatphalebhyas tv anumīyate hetubhyo dṛśyamānebhyas tajjanmād vyabhicārataḥ    evaṃ saṃkṣepataḥ karmabaṃdho dvedhāvatiṣṭhate puṇyapāpātiriktasya tasyātyaṃtam asaṃbhavāt    puṇyaṃ puṇyānubaṃdhīṣṭaṃ pāpaṃ pāpānubaṃdhi ca kiṃcit pāpānubaṃdhi syāt kiṃcit puṇyānubaṃdhi ca    yathārtho rthānubaṃdhī syān nyāyācaraṇapūrvakaḥ tathānartho pi cāṃbhodhisamuttārādir arthakṛt    anyāyācaraṇāyātas tadvadartho py anarthakṛt anartho pīti nirṇītam udāharaṇam aṃjasā    avasīyati prathamakam uta saṃpadāṃ padaṃ samanubhavaṃti vaṃdyapādāḥ  tadanu ca vipadaṃ garīyasīṃ dadhati parām api niṃdyavṛttitāṃ    yad iha tad ihamuttarainaso nijasukṛtasya phalaṃ vadaṃti tajjñāḥ  tadaparam api cādimainasaḥ sukṛtaparasya viparyayeṇa vṛtteḥ    atha navamo 'dhyāyaḥ    athāsravanirodhaḥ syāt saṃvaro 'pūrvakarmaṇāṃ kāraṇasya nirodhe hi baṃdhakāryasya nodayaḥ    āsravaḥ kāraṇaṃ baṃdhe siddhas tadbhāvabhāvataḥ tannirodhe virudhyeta nātmā saṃvṛtarūpabhṛt    saṃvaraḥ pūrvabaṃdhasya nirodha iti bhāṣitaṃ na yuktam āsrave saty apy etadbādhānuṣaṃgataḥ    sa cāsravanirodhaḥ syād guptyādibhir udīritaiḥ tatkāraṇavipakṣatvāt teṣām iti viniścayaḥ    tapasā nirjarā ca syāt saṃvaraś ceti sūtritaṃ saṃcitāpūrvākarmāptivipakṣatvena tasya nu    yogānāṃ nigrahaḥ samyagguptis tredhā tayottamaḥ saṃvaro baṃdhahetūnāṃ pratipakṣasvabhāvayā    ayogaḥ kevalī sarvaṃ saṃvaraṃ pratipadyate dravyato bhāvataś ceti paraṃ śreyaḥ samaśnute    samyakprabhṛtayaḥ paṃceryādyāḥ samitayaḥ smṛtāḥ asaṃyamabhavasyābhirāsravasya nirodhanaṃ    tadvipakṣatvatas tāsām iti deśena saṃvaraḥ samitau vartamānānāṃ saṃyatānāṃ yathāyathaṃ    dṛṣṭakāryānapekṣāṇi kṣamādīny uttamāni tu syād dharmaḥ samitibhyo 'nyaḥkrodhādipratipakṣataḥ    tannimittāsravadhvaṃsī yathāyogaṃ sa deśataḥ saṃvarasya bhaved dhetur asaṃyatadṛgādiṣu    anuprekṣāḥ prakīrtyaṃte nityatvādyanuciṃtanaṃ dvādaśātrānanuprekṣāvipakṣatvān munīśvaraiḥ    anityatvādayo dharmāḥ saṃty ātmādiṣu tāttvikāḥ tathā sādhanasadbhāvāḥ sarveṣāṃ śeṣatattvavat    tato nuciṃtanaṃ teṣāṃ nāsatāṃ kalpitātmanāṃ nāpy anarthakam iṣṭasya saṃvarasya prasiddhitaḥ    mārgācyavanahetutvaṃ parīṣahajayasya sat parīṣahājaye mārgacyavanasya pratītitaḥ    nirjarākāraṇatvaṃ ca tapaḥsiddhiparatvataḥ tadabhāve tapolopān nirjarā kvātiśaktitaḥ    pariṣoḍhavyatāṃ prāptās tasmād ete parīṣahāḥ parīṣahajayotthānām āsravāṇāṃ virodhataḥ    te ca kṣudādayaḥ proktā dvāviṃśatir asaṃśayaṃ pariṣahyatayā teṣāṃ tattvasiddhir viśuddhaye    syuḥ sūkṣmasāṃparāye ca caturdaśa parīṣahāḥ chadmasthavītarāge ca tato nyeṣām asaṃbhavāt    chadmasthavītarāge hi mohābhāvān na tatkṛtāḥ aṣṭau pariṣahāḥ saṃti tathāto nye caturdaśa    te sūkṣmasāṃparāye pi tathā kiṃcitkaratvataḥ sato pi mohanīyasya sūkṣmasyeti pratīyate    vedanīyanimittās te mā bhūvaṃs tata eva cet vyaktirūpā na saṃty eva śaktirūpeṇa tatra te    mohanīyasahāyasya vedanīyasya tatphalaṃ kevalasyāpi tadbhāve tiprasaṃgo hi dustyajaḥ    ekādaśa jine saṃti śaktitas te parīṣahāḥ vyaktito neti sāmarthyād vyākhyānadvayam iṣyate    leśyaikadeśayogasya sadbhāvād upacaryate yathā leśyā jine tadvadvedanīyasya tattvataḥ    ghātihatyupacaryaṃte sattāmātrāt parīṣahāḥ chadmasthavītarāgasya yatheti pariniścitaṃ    na kṣudāder abhivyaktis tatra taddhetubhāvataḥ yogaśūnye jine yadvadanyathātiprasaṃgataḥ    naikaṃ hetuḥ kṣudādīnāṃ vyaktau cedaṃ pratīyate tasya mohodayād vyakter asadvedyodaye pi ca    kṣāmodaratvasaṃpattau mohāpāye na sekṣyate satyāhārābhilāpe pi nāsadvedyodayādṛte    na bhojanopayogasyāsattvenāpy anudīraṇā asātāvedanīyasya na cāhārekṣaṇād vinā    kṣud ity aśeṣasāmagrījanyābhivyajyate kathaṃ tadvaikalye sayogasya pipāsāder ayogataḥ    kṣudādivedanodbhūtau nārhato 'naṃtaśarmatā nirāhārasya cāśaktau sthātuṃ nānaṃtaśaktitā    nityopayuktabodhasya na ca saṃjñāsti bhojane pāne ceti kṣudādīnāṃ nābhivyaktir jinādhipe    bādaraḥ sāṃparāyo sti yeṣāṃ sarve parīṣahāḥ saṃti teṣāṃ nimittasya sākalyād vyaktirūpataḥ    jñānāvaraṇaniṣpādye prajñājñāne parīṣahau prajñāvalepanirvṛtter jñānāvaraṇato nyataḥ    adarśanam ihārthānām aśraddhānaṃ hi tad bhavet sati darśanamohe 'sya na jñānāt prāgadarśanaṃ    aṃtarāyo tra lābhasya tadyogyorthād viśeṣataḥ kāraṇasya viśeṣād dhi viśeṣaḥ kāryagaḥ sthitaḥ    nāgnyādyāḥ sapta cāritramohe sati parīṣahāḥ sāmānyato viśeṣāc ca tadviśeṣeṣu terthataḥ    jñānāvaraṇamohāṃtarāyasaṃbhūtayo matāḥ ity ekādaśa te teṣām abhāve tat kvacit sadā    śeṣāḥ syur vedanīye te samagrasahakāriṇi iti sarvatra vijñeyam asādhāraṇakāraṇaṃ    sakṛdekādayo bhājyāḥ kvacid ekān na viṃśatiḥ viṃśatyāder asaṃbhūter virodhād anyathāpi vā    ity ukter niyamābhāvaḥ siddhas teṣāṃ samudbhave sahakārivihīnatvaproktahetor aśaktitaḥ    sāmāyikādi cāritraṃ sūtritaṃ paṃcadhā tataḥ saṃvaraḥ karmaṇāṃ jñeyo cāritrāpekṣajanmanāṃ    dharmāṃtarbhūtam apy etatsaṃyamagrahaṇād iha punar uktaṃ pradhānatvakhyātaye nirvṛtiṃ prati    ṣoḍhā bāhyaṃ vinirdiṣṭaṃ tapotrānaśanādi yat saṃvaras tena ca jñeyo hy atapohetukarmaṇāṃ    prāyaścittādiṣaḍbhedaṃ tapaḥ saṃvarakāraṇaṃ syād uttaraṃ svasaṃvedyam iti spaṣṭamanogataṃ    proktā navādayo bhedāḥ prāgdhyānāt te yathākramaṃ prāyaścittādibhedānāṃ tapaso bhyaṃtarasya hi    ālocanādayo bhedāḥ prāyaścittasya te nava yathāgamam iha jñeyā niravadyapravṛttaye    jñānādayo tra catvāro vinayāḥ pratipāditāḥ kathaṃcit tadabhedasya siddhaye paramārthataḥ    jñānādibhāvanā samyagjñānādivinayo hi naḥ tasyāṃtaraṃgatā na syād anyathāny eva vedanāt    ācāryaprabhṛtīnāṃ yad daśānāṃ viniveditaṃ vaiyāvṛttyaṃ bhaved etad anvarthapratipattaye    svādhyāyaḥ paṃcadhā prokto vācanādiprabhedataḥ aṃtaraṃgaśrutajñānabhāvanātmatvatas tu saḥ    syād bāhyābhyaṃtaropadhyor vyutsargo dhikṛto dvidhā vratadharmātmako dānaprāyaścittātmako 'paraḥ    kathaṃcit tyāgatāṃ prāpto py eko nirdiśyate nṛṇāṃ śaktibhedavyapekṣāyāṃ phaleṣv eko py anekadhā    bāhyābhyaṃtaratopadhyor anupāttetaratvataḥ jīvena tatra kāyādyor vedyāvedyor nṛṇāṃ matā    uttametyādisūtreṇa dhyānaṃ dhyātābhidhīyate dhyeyaṃ ca dhyānakālaś ca sāmarthyāt tatparikriyā    nābhāvo śeṣacittānāṃ tucchaḥ pramitisaṃgataḥ sthirajñānātmakaś cittānirodho notra saṃgataḥ    draṣṭā hy ātmājñānavāṃs tu na kuṃbhādy asti kasyacit dharmameghasamādhiś cen na draṣṭā jñānavān yataḥ    saṃprajñātas tu yo yogo vṛttisārūpyamātrakaṃ saṃjñānātmaka eveti na vivādo sti tāvatā    anekatrāpradhāne vā viṣaye kalpite pi vā mā bhūc ciṃtānirodho yam ity ekāgre sa saṃsmṛtaḥ    ekāgreṇeti vā nānāmukhatvena nivṛttaye kvacic ciṃtānirodhasyādhyānatvena prabhādivat    proktaṃ saṃhananaṃ yasya bhaved uttamam iṣyate tasya dhyānaṃ paraṃ muktikāraṇaṃ netarasya tat    aṃtarmuhūrtato nordhvasaṃbhavas tasya dehināṃ ā aṃtarmuhūrtād ity uktaṃ kālāṃtaracchide    ārtādīni tad eva syuś catvāri pratibhedataḥ dhyānānyekāgrasāmānyaciṃtāṃtaranirodhataḥ    mokṣahetū pare dhyāne pūrve saṃsārakāraṇe iti sāmarthyataḥ siddhaṃ vimohatvetaratvataḥ    ārtaṃ caturvidhaṃ tatra saṃkleśāṃgatayoditaṃ ārtam ityādisūtreṇa prathamaṃ dveṣahetukam    viparītaṃ manojñasyetyādisūtreṇa niścitaṃ dvitīyam anuyogottham ārtadhyānam asatphalaṃ    asadvedyodayopāttadveṣakāraṇām īritaṃ tṛtīyaṃ vedanāyāś cety uktaṃ sūtreṇa tattvataḥ    nidānaṃ ceti vākyena tīvramohanibaṃdhanaṃ caturthaṃ dhyānam ity ārtaṃ caturvidham udāhṛtaṃ    nīlāṃ leśyāṃ samāsṛtya kāpotīṃ vā samudbhavet tadajñānāt kuto py ātmapariṇāmāt tathāvidhāt    pāpaprayoganiḥśeṣadoṣādhiṣṭhānam ākulaṃ bhogaprasaṃganānātmasaṃkalpāsaṃgakāraṇaṃ    dharmāśayaparityāgi kaṣāyāśayavardhanaṃ vipākakaṭu tiryakṣu samudbhavanibaṃdhanaṃ    tat syād aviratādīnāṃ trayāṇāṃ tannimittataḥ nāpramattādiṣu kṣīṇatannimitteṣu jātucit    hiṃsādibhyo titīvramohodayebhyaḥ prajāyate raudraṃ dhyānaṃ smṛtaiḥ paunaḥpunyaṃ durgatikāraṇaṃ    tat syād aviratasyoccair deśasaṃyamino pi ca yathāyogaṃ nimittānāṃ śeṣaṃ sadbhāvasiddhitaḥ    tataś caturvidhaṃ raudraṃ dhyānaṃ samupajāyate puṃsotikṛṣṇaleśyasyāviratasyaiva tatparaṃ    tathā kāpotaleśyasya viratāviratasya ca pramādānām adhiṣṭhānaṃ viratasya na jātucit    ājñādivicayāyoktaṃ dharmyaṃ dhyānaṃ caturvidhaṃ ārtaraudraparityaktaiḥ kāryaṃ ciṃtāsvabhāvakaṃ    tatrājñā dvividhā hetuvādetaravikalpataḥ sarvajñasya vineyāṃtaḥkaraṇāyattavṛttitaḥ    asanmārgād apāyaḥ syād anapāyaḥ svamārgataḥ sa evopāya ity eṣa tato bhedena noditaḥ    vipāko nubhavaḥ pūrvaṃ kṛtānāṃ karmaṇāṃ svayaṃ jīvādyāśrayabhedena caturtho dhīmatāṃ mataḥ    lokaḥ saṃsthānabhedād vā svabhāvād vā niveditaḥ tadādhāro jano vāpi mānabhedo pi vā kvacit    vicayas tatra mīmāṃsā pramāṇanayataḥ sthitaḥ tasmiṃś ciṃtāprabaṃdho nuściṃtāṃtaranirodhataḥ    yuktaṃ dhyānaṃ tadādhyāyam aikāgryeṇa pravṛttitaḥ dhyātuś ciṃtāprabaṃdhasya dharmyaṃ pāpavyapāyataḥ    sākalyena vinirdiṣṭaṃ tatpramattāpramattayoḥ aṃtaraṃgatapobhedarūpaṃ saṃghatayoḥ sphuṭaṃ    saṃyatāsaṃyatasyaikadeśenāsaṃyatasya tu yogyatāmātrataḥ kaiścid yair durdhyānaṃ pracakṣate    mattvā catvāri śuklāni procyamānāni sūriṇā ādye pūrvavidaḥ śukle dharmyaṃ cety abhidhīyate    śreṇyādhirohiṇaḥ śukle dharmyaṃ pūrvasya tasya hi apūrvakaraṇādīnāṃ śuklāraṃbhakatāsthiteḥ    pare kevalinaḥ śukle saṃyogasyetarasya ca yathāyogaṃ smṛte tajjñaiḥ prakṛṣṭe śuddhibhedataḥ    pṛthaktvetyādisūtreṇānvarthanāmāni tāny api śuklāni kathitāny uktasvāmibhedāni lakṣaṇaiḥ    tatra prācyaṃ triyogasyaikaikayogasya tatparaṃ tṛtīyaṃ kāyayogasyāyogasya ca turīyakaṃ    yogamārgaṇayā teṣāṃ sadbhāvaniyamaḥ smṛtaḥ evaṃ trītyādisūtreṇa vivādavinivṛttaye    ekāśraye pratiprāptaśrutajñānāśrayatvataḥ savitarke śrute tattvāt savīcāre ca saṃkramāt    arthavyaṃjanayogeṣu sāmānyenopavartite pūrve śukle triyogaikayogasaṃyatasaṃśrayāt    avīcāraṃ dvitīyaṃ tatsaṃkrāṃter asamudbhavāt ekayogasya taddhyātur iti prāhāpavādataḥ    savitarkaṃ savīcāraṃ pṛthaktvena tataḥ sthitaṃ prācyaṃ śuklaṃ tu savitarkavīcārabalād iha    tathā'vitarkavīcāre pare śukle nivedite kāyayogādhināthatvād ayogādhipatitvataḥ    vitarkaḥ śrutam aspaṣṭatarkaṇaṃ na punar mateḥ bhedaś ciṃtākhya ity etatsūtrāraṃbhād abhīpsitaṃ    arthavyaṃjanayogeṣu saṃkrāṃtiś cetasas tu yā sa vīcāro na mīmāṃsā carergatyarthaniṣṭhataḥ    evaṃ niruktito rthasyāvyabhicāritvadarśanāt proktaṃ vitarkavīcāralakṣaṇaṃ sutrataḥ svayaṃ    kṛtaguptyādyanuṣṭhāno yatirvīryātiśāyanaḥ arthavyaṃjanayogeṣu saṃkrāṃtau pṛthagudyataḥ    tadopaśamanān mohaprakṛtīḥ kṣapayann api yathā paricayaṃ dhyāyet kvacid vastuni sakriyaḥ    savitarkaṃ savīcāraṃ pṛthaktvevādimaṃ muniḥ dhyānaṃ prakramate dhyātuṃ pūrvadehī nirākulaḥ    sa evāmūlato mohakṣapaṇāgūrṇamānasaḥ prāpyānaṃtaguṇāṃ śuddhiṃ niruṃdhan baṃdhamātmanaḥ    jñānāvṛtisahāyānāṃ prakṛtīnām aśeṣataḥ hāsayankṣapayaṃś cāsāṃ sthitibaṃdhaṃ samaṃtataḥ    śrutajñānopayuktātmā vītavīcāramānasaḥ kṣīṇamoho 'prakaṃpātmā prāptakṣāyikasaṃyamaḥ    dhyātvaikatvavitarkākhyaṃ dhyānaṃ ghātyaghaghasmaraṃ dadhānaḥ paramāṃ śuddhiṃ duravāpyāmato nyataḥ    tato nirdagdhaniḥśeṣaghātikarmeṃdhanaḥ prabhuḥ kevalī sadṛśāghātikarmasthitir aśeṣataḥ    saṃtyajya vāṅmanoyogaṃ kāyayogaṃ ca bādaraṃ sūkṣmaṃ tu taṃ samāśritya maṃdaspaṃdodayas tvaraṃ    dhyānaṃ sūkṣmakriyaṃ naṣṭapratipātaṃ tṛtīyakaṃ dhyāyed yogī yathāyogaṃ kṛtvā karaṇasaṃtatiṃ    tataḥ svayaṃ samucchinnapradeśaspaṃdanaṃ sthiraḥ dhvastaniḥśeṣayogebhyo dhyānaṃ dhyātāṃtasaṃvaraḥ    saṃpūrṇanirjaraś cāṃtye kṣaṇe kṣīṇabhavasthitiḥ mukhyaṃ siddhatvam adhyāste prasiddhāṣṭaguṇodayaṃ    saṃkleśāṃgatayaikatra ciṃtā ciṃtāṃtaracyutā pāpaṃ dhyānaṃ yathā proktaṃ vyavahāranayāśrayāt    viśuddhyaṃgatayā caivaṃ dharmyaṃ śuklaṃ ca kiṃcana samanaskasya tādṛkṣaṃ nāmanaskasya mukhyataḥ    udbhūtakevalasyāsya sakṛtsarvārthavedinaḥ aikāgryabhāvataḥ kecid upacārād vadaṃti tat    ciṃtānirodhasadbhāvo dhyānāt so pi nibaṃdhanaṃ tatra dhyānopacārasya yoge leśyopacāravat    sarvaciṃtānirodhas tu yo mukhyo niścitān nayāt so sti kevalinaḥ sthairyam ekāgraṃ ca paraṃ sadā    mukhyaṃ dhyānam atas tasya sākṣān nirvāṇakāraṇaṃ chadmadṛśyopacārāt syāt tadanyāstitvakāraṇāt    yathaikavastuni sthairyaṃ jñānasyaikāgryam iṣyate tathā viśvapadārtheṣu sakṛt tat kena vāryate    mohānudrekato jñātur yathā vyākṣepasaṃkṣayaḥ mohino sti tathā vītamohasyāsau sadā na kim    yathaikatra pradhānerthe vṛttir vā tasya mohinaḥ tathā kevalinaḥ kiṃ na dravye 'naṃtavivartake    iti niścayato dhyānaṃ pratipedhyaṃ na dhīmatā pradhānaṃ viśvatattvārthavedināṃ prasphuṭātmanāṃ    sayogakevalī dhyānī yadi dharmopadeśanā kathaṃ tataḥ pravartetety eke tatrābhidhīyate    aṃtarmuhūrtakālaṃ vā dhyānasyānekavatsaraṃ naikāgryaṃ kevalidhyānaṃ prasiddhaṃ tattvadeśinām    tata eva ca te siddhāḥ kṛtakṛtyā jinādhipāḥ stūyaṃte siddhasādharmyāt sadehatve pi dhīdhanaiḥ    ayogitvasapnudbhūteḥ pūrvam aṃtarmuhūrtamā tṛtīyaṃ dhyānam ākhyātaṃ vākpravṛttyā vivarjitaṃ    vākkāyavṛttisadbhāve yathā dhyānī na mādṛśaḥ tathārhann iti tasyāstūpacārād dhyānadeśanā    kvacic ciṃtā dhyānaṃ niyataviṣayaṃ puṃsi kathitaṃ kvacit tasyāḥ kārtsnyād vilayanam idaṃ sarvaviṣayaṃ  kvacit kiṃcin mukhyaṃ guṇam api vadaṃti pratinayaṃ tataś ciṃtyaṃ sadbhiḥ paramagahanaṃ jinapatimataṃ    samyagdṛṣṭyādayaḥ saṃty asaṃkhyeguṇanirjarāḥ kramād atra tathā śuddher asaṃkhyeyaguṇatvataḥ    pulākādyā matāḥ paṃca nirgraṃthā vyavahārataḥ niścayāc cāpi nairgraṃthyasāmānyasyāvirodhataḥ    vastrādigraṃthasaṃpannās tato nye neti gamyate bāhyagraṃthasya sadbhāve hy aṃtargraṃtho na naśyati    ye vastrādigrahe py āhurnirgraṃthatvaṃ yathoditaṃ mūrcchānudbhūtitas teṣāṃ stryādyādāne pi kiṃ na tat    viṣayagrahaṇaṃ kāryaṃ mūrchā syāt tasya kāraṇaṃ na ca kāraṇavidhvaṃse jātu kāryasya saṃbhavaḥ    viṣayaḥ kāraṇaṃ mūrchā tatkāryam iti yo vadet tasya mūrchodayo 'sattve viṣayasya na siddhyati    tasmān mohodayān mūrchā svārthe tasya grahas tataḥ sa yasyāsti svayaṃ tasya na nairgraṃthyaṃ kadācana    oṃ atha daśamo 'dhyāyaḥ    tathaupaśamikādīnāṃ bhavyatvasya ca saṃkṣayāt mokṣa ity āha tadbhāve saṃsāritvaprasiddhitaḥ    na tv aupaśamike bhāve kṣāyopaśamike pi ca bhāve traudayike puṃso 'bhāvo stu kṣāyike kathaṃ    siddhiḥ savyapadeśasya cāritrāder abhāvataḥ kṣāyikasya na saty asmin kṛtakṛtyatvanirvṛtiḥ    na cāritrādir asyāsti siddhānāṃ mokṣasaṃkṣayāt siddhā eva tu siddhās te guṇasthānavimuktataḥ    mokṣaḥ kevalasamyaktvajñānadarśanasaṃkṣayāt siddhatvasaṃkṣayān neti tv anyatretyādinābravīt    etaiḥ saha virodhasyābhāvān mokṣasya sarvathā svayaṃ savyapadeśaiś ca vyapadeśas tathāstv ataḥ    siddhatvaṃ kevalādibhyo viśiṣṭaṃ teṣu satsv api karmodayanimittasyāsiddhatvasya kvacid gateḥ    svātmāṃtarbahiraṃgakalmaṣatativyāsaktinirmuktatā jīvasyeti vadaṃti śuddhadhiṣaṇā yuktyāgamānveṣiṇaḥ  prāptis tasya tu nirvṛtiḥ paratarā nābhāvamātraṃ na vā viśleṣo guṇato nyathā sthitir api vyāhanyamānatvataḥ    tacchābdād gṛhyate mokṣaḥ sūtresmin nānyasaṃgrahaḥ sāmarthyād iti tasyaivānaṃtaraṃ tadanaṃtaraṃ    gacchatīti vacaḥśakter muktideśe sthiticchidā ūrdhvam ity abhidhānāt tu digaṃtaragaticyutiḥ    pūrvetyādyena vācyena proktaṃ hetucatuṣṭayaṃ sādhyena vyāptam unneyam anyathānupapattitaḥ    āviddhetyādinā dṛṣṭaṃ saddṛṣṭāṃtacatuṣṭayaṃ bahirvyāptir apīṣṭeha sādhanatvaprasiddhaye    ūrdhvaṃ gacchati muktātmā tathā pūrvaprayogataḥ yathāviddhaṃ kulālasya cakram ity atra sādhanaṃ    nāsiddhaṃ moktukāmasya lokāgragamanaṃ prati praṇidhānaviśeṣasya sadbhāvād bhūriśaḥ sphuṭaṃ    na cānaikāṃtikaṃ tatsyād viruddhaṃ vā vipakṣataḥ vyāvṛtteḥ sarvathā neṣṭavidhātakṛd idaṃ tataḥ    asaṃgatvād yathālābūphalaṃ nirgatalepanaṃ baṃdhacchedādyathair aṃḍabījam ity apy ato gataṃ    ūrdhvavrajyāsvabhāvatvād agner jvālā yatheti ca dṛṣṭāṃte pi na sarvatra sādhyasādhanaśūnyatā    ukto dharmāstikāyo tra gatyupagrahakāraṇaṃ tasyābhāvān na lokāgrāt parato gatir ātmanaḥ    evaṃ niḥśeṣamithyābhimāno muktau nivartate yuktyāgamabalāt tasyāḥ svarūpaṃ prati nirṇayāt    siddhāḥ kṣetrādibhir bhedaiḥ sādhyāḥ sūtropapādibhiḥ sāmānyato viśeṣāc ca bhāvābhede pi sannayaiḥ    kṣetraṃ svātmapradeśāḥ syuḥ siddhyatāṃ niścayān nayāt vyavahāranayād vyoma sakalāḥ karmabhūmayaḥ    manuṣyabhūmir apy atra haraṇāpekṣayā matā hṛtvā pareṇa nītānāṃ siddheḥ sūtrānivāraṇāt    teṣām ekakṣaṇaḥ kālaḥ pratyutpannanayātmanaḥ bhūtaprajñāpanād eva syāt sāmānyaviśeṣataḥ    utsarpiṇy avasarpiṇyor jātāḥ siddhyaṃti kecana caturthakāle paryaṃtabhāge kāle tṛtīyake    sarvadā haraṇāpekṣā kṣetrāpekṣā hi kālabhṛt sarvakṣetreṣu tatsiddhau na viruddhā kathaṃcana    siddhiḥ siddhigatau puṃsāṃ syān manuṣyagatāv api avedatvena sā vedatritayād vāsti bhāvataḥ    pulliṃgenaiva tu sākṣāddravyato nyā tathāgama vyāghātādyuktibādhāc ca stryādinirvāṇavādināṃ    sākṣānnirgraṃthaliṃgena pāraṃparyāttato nyataḥ sākṣātsagraṃthaliṃgena siddhau nirgraṃthatā vṛthā    sati tīrthakare siddhir asaty api ca kasyacit bhaved avyapadeśena caritreṇa viniścayāt    tathaivaikacatuḥpaṃcavikalpena prakalpate paropadeśaśūnyatvāt siddhau pratyekabuddhatā    paropadeśataḥ siddho bodhitaḥ pratipāditaḥ jñānenaikena vā siddhir dvābhyāṃ tribhir apīṣyate    caturbhiḥ svāmimukhyasyāpekṣāyāṃ nānyathā punaḥ avagāhanam utkṛṣṭaṃ sapādaśatapaṃcakaṃ    cāpānāmardhasaṃyuktam aratnitrayam apy atha madhyamaṃ bahudhā siddhis triprakāre 'vagāhane    svapradeśe nabho vyāpilakṣaṇe saṃpravartate anaṃtaraṃ jaghanyena dvau kṣaṇau siddhyatāṃ nṛṇāṃ    utkarṣeṇa punas tat syād eteṣāṃ samayāṣṭakaṃ aṃtaraṃ samayo sty eko jaghanyena prakarṣataḥ    ṣaṇmāsāḥ siddhyatāṃ nānā madhyamaṃ prati gamyatāṃ ekasmin samaye siddhyed eko jīvo jaghanyataḥ    aṣṭottaraśataṃ jīvāḥ prakarṣeṇeti viśrutaṃ nālpena bahavaḥ siddhāḥ siddhakṣetravyapekṣayā    vyavahāravyapekṣāyāṃ teṣām alpabahutvavit tatrālpe haraṇāt siddhā janmasiddhasamūhataḥ    janmasiddhāḥ punas tebhyaḥ saṃkhyeyaguṇatābhṛtaḥ karmabhogadharā vārdhidvīpordhvās tirobhuvāḥ    siddhānām ūrdhvasiddhāḥ syuḥ sarvebhyo lpe pare nyathā yuḥ saṃkhyeyaguṇās tebhyo dhas tiryagbhir vṛtāḥ kramāt    samudre sarvataḥ stokā dvīpe saṃkhyeyasaṃguṇāḥ lavaṇode samastebhyaḥ stokāḥ siddhā viśeṣataḥ    kālode sāgare jaṃbūdvīpe ca parinirvṛtāḥ dhātakīkhaṃḍasaddvīpe puṣkaradvīpa eva ca    te saṃkhyeyaguṇāḥ proktāḥ kramaśo bahavo nyathā pratyetavyāḥ samāsena yathāgamam aśeṣataḥ    eka eva tu siddhātmā sarvatheti yake viduḥ teṣāṃ nānātmanāṃ siddhimārgānuṣṭhā vṛthā bhavet    kṣetrādyapekṣayā coktāṃ saṃsāry ekatvam aṃjasā ekātmavādinā caivaṃ tatra vāco 'pramāṇatā    niḥśeṣakumatadhvāṃtavidhvaṃsanapaṭīyasī mokṣanītir ato jainī bhānudīptir ivojjvalā    evaṃ jīvāditattvārthāḥ prapaṃcya samudīritāḥ samyagdarśanavijñānagocarāś caraṇāśrayāḥ    tataḥ sādhīyasī mokṣamārgavyākhyā prapaṃcataḥ sarvatattvārthavidyeyaṃ pramāṇanayaśaktitaḥ    jīyāt sajjanatāśrayaḥ śivasudhādhārāvadhānaprabhu r dhvastadhvāṃtatatiḥ samunnatagatis tīvrapratāpānvitaḥ  prorjajyotir ivāvagāhanakṛtānaṃtasthitir mānataḥ sanmārgas tritayātmako 'khilamalaprajvālanaprakṣamaḥ    tattvārthaślokavārtikaṃ samāptam