Śrīpurapārśvanāthastotra

Śrīpurapārśvanāthastotra Bare text of Soni's 2023 edition Published within the Digital Corpus of Vidyānandin's Works at www.dipal.org/dcv under a Creative Commons Attribution-NonCommercial-ShareAlike 4.0 International License October 10, 2026 Śrīpātrakesarī Stotra, tathā Śrīpurapārśvanātha Stotra. Ed. Jinadās Pārśvanāth Phaḍkule. Sholapur: Shridhar Printing Press 1921. Transliteration of the text of the stotras in Phaḍkule's edition by Jayandra Soni in the file "Patrakesari Stotra.odt" conveyed to Himal Trikha Jayanadra Soni, March 11, 2023. Plain text: dcv/Śrīpurapārśvanāthastotra/ŚPSt-JS-t

This resource for the text of the Śrīpurapārśvanāthastotra (ŚPSt) is published alongside other digital resources for the work. The resource at hand, ŚPSt-JS‑b, is a resource for the specific text of the edition by Soni (JS) in 2023. The resource renders the bare text (b) only. J. Soni and H. Trikha created this resource driven by their research interests, without any public funding. Trikha is grateful to Jayandra Soni for the permisssion to include his capture of J. Phaḍkules text.

yaḥ śrīpādaṃ taveśa śrayati sapadi saḥ śrīpuraṃ saṃśrayeta svāmin pārśvaprabho tvat pravacanavacanoddīpradīpaprabhāvaiḥ labdhvā mārgaṃ nirastākhilavipadamato yatyadhīśaiḥ sudhībhiḥ vaṃdyaḥ stutyo mahāṃstavaṃ vibhur asi jagatām eka evāptanāthaḥ anyenāptā virodhāc chrutir api na tataḥ ko 'py ayaṃ vety ayuktiḥ samyaṅnirṇītibādhāpramitivirahataḥ kaścid evāsti vaṃdyaḥ nāśaṃ doṣāvṛtī yatkvacid api bhajato dṛṣṭahāniprakarṣāt niḥśeṣaṃ hemni yadvanmalam iti bhavato niṣkalaṃkatvasiddhiḥ sūṣkmādyarthaḥ samakṣo 'numitiviṣayataḥ kasyācid vānalādiḥ sa tvaṃ nirdhūtakarmakṣitidharanivaho dṛṣṭaniḥśeṣatvaḥ nyāyābādhyāgamo 'rhann asi khalu bhavataḥ sā hy anekāṃtadṛṣṭiḥ pratyakṣādyair abādhyā bhavati na niyataikāṃtayuktiḥ prabhāḍhyā tāvat pratyakṣam eva prathayati tadanekāṃtavādaprasiddhiṃ yadvā skandasya varṇādyavakaranicittaikātmanaḥ syātpratītiḥ aṃtaścittasya saukhyadyanumatacidasaṃkīrṇabhāvasya dṛṣṭeḥ sāmānyaṃ vā viśeṣo yadi na hi ghaṭate 'nyonya viśleṣyavṛtyā tadanekāṃtātmakaṃ yatsadanunayavaśaṃ sarvam arthakriyākṛt pramitipravyāptarūpaṃ sphuṭanijaviṣayākārasaṃvittivadvā api vā siddhaṃ trikālatrayasamayagatānaṃtaparyāyapuṣyat pariṇāme tatpratītātmani hṛtaniyataikāṃtike 'dhyakṣasiddheḥ syāt tādātmyam upāśritair adhigatānantair bhaviṣyad bhavad bhūtaiḥ sakramayaugapadyavidhibhir yatparyayair vā guṇaiḥ saṃkīrṇaṃ āgamadadravad dravati vā droṣyaty atho dravyam ity etad dharmaṇi dharmatā tadapreṣv evaṃ bhavet prakriyā naśyaty utpitsu tāvad bhavati naśanavatsthāsnu saṃpadyate vā sthāsyaty utpatsyate sā sthitir asakṛd alaṃ naṃkṣyati sthāsyatīttham naṃkṣyaty utpatsyate tannaśanaṃ api tathotpatsyate sthāsyate yan naṃkṣyaty utpattir evaṃ trividham iti bhavet tatvam arhantaveṣṭam tadatadrūpāḥ padārthāḥ svaparavvidhidiśāpekṣya sarvasya sarvā karaṇāt kṣīrādyavāptiṃ vidadhadiha ghaṭādyastu naite paṭādyāḥ na ca paurastyaḥ sa paścād bhavati na ca purā nirvyapekṣasvabhāvaḥ tadanekākāram ekaṃ sadasadabhimataṃ tādṛg etan na tādṛk syādvādesaptabhaṃgīnayajuṣi vidhinirdhāraṇābhyāṃ hi vastv ārūḍhaṃ satvetarātmakramaniyamadiśā lakṣyate 'rthakriyākṛt svarṇāder vā kathaṃcit sata iha bhavati syātsvarūpāntarāptiḥ prāyaḥ pūrvottarākṛtyapagamajananadravyayuktaṃ hi vastu syād asti svacatuṣṭayād itarataḥ syān nāsty apekṣākramāt tatsyād asti ca nāsti ceti yugapat sā syād avaktavyatā tadvatsyāt pṛthag asti nāsti yugapat syād asti nāsty āhite vaktavye guṇamukhyabhāvaniyataḥ syāt saptabhaṅgī vidhiḥ syādvādaḥ svaparāvatāraviṣayeṇoddīptasatvetarādy ākārād yadanaṃtadharmanilayasyoccaiḥ sato dharmiṇaḥ samyaṅnyāyabalāt samarthavadanaṃ yaḥ saptabhaṃgīnayā pekṣaḥ praśnavaśād vidhītarakṛter ekatra nirbādhataḥ samyaṅnyāyamatodayena sunayais tasyaikadeśair atho nikṣepaiś ca tadarpaṇārpaṇaparair vyaktīkṛtaprābhavaḥ niḥśepāvaraṇakṣaṇakṣaṇabhavat sarvārthasaṃpadvibhā bhājā nātha jina tvayādhyavasitaḥ sa tvaṃ samāśrīyase jīvaḥ karmāṇi bhāvaḥ śubham aśubham atas tatphale puṇyapāpe saukhyaṃ duḥkham tathādṛksvadhigamacaritānyāgamaḥ śabdavārdhau heyādheyau prameyaḥ pramitir adhikṛtaḥ kāladeśādimokṣaḥ sarvaṃ sidhyai tavaiva prabhavati bhagavan śāsane 'to bhajāmaḥ devaḥ śrīpurapārśvanātha bhuvanādhīśārcyapādāmbhuja pradhvastākhilakarmajāta vipulajñāna prabhābhāsura śreyomārganidarśane hi bhavatā nānyo vināsti kṣamaḥ tasmād vandyapadas tavam eva mahatāṃ niḥśeṣatattvārthavit devaḥ śrīmānaśeṣatridaśaparivṛḍhaprārcyapādāravindo bāhyāntarvigrahādiprabhavadatiśayo dharmatīrthasya nāthaḥ ity etad vāstti māyāviṣu suravibhuṣu khyātabuddhādikeṣu deśādyāveśavatsu pratihataviṣayānyonyavaitārthavākṣu tvad anye 'dhyakṣādipratihatavacoyuktiviṣayā viluptābhā lokavyapalapanasambandhamanasaḥ bhajante nāptatvaṃ tadiha viditā vaṃcanakṛtiḥ visaṃvādas teṣāṃ prabhavati tadarthāparigateḥ nātyakṣe jaiminir vā śrutisamayabalaḥ samyagarthāvibodhāt naitādṛkṣasya doṣāvaraṇavigamanābhāvato 'tiīndriyārthe jñānaṃ śrutyā sadarthāvagatir atha tataḥ satyatetyeṣa doṣo na prāmāṇyaṃ svato 'syāḥ kila ghaṭavadacaitanyataḥ siddham etat āptoktaṃ cet pramāṇaṃ vyapanayatu tadarthāvadānān na sāptā nukteḥ syādvaktṛdoṣo yadi tadapagamān naivam ity apratītiḥ kvaivaṃ siddhyed vibhāgo 'byupagamavigamaiḥ pauruṣeyatm anyat vā susthaṃ naiva kartṛsmaraṇavilayanān neti nāptatvam anyat sukhaduḥkhādivicitrabhāvaniyater naikasvabhāveśvaraḥ prabhavo naiva bhāvo na kāraṇalavāt kāryasya nānākṛtiḥ yavabījāṃkuravattathā 'pariṇater nārthakriyāsambhavaḥ svabhavāvasthitadeśakālikrabhidābhājāṃ sa kartā katham icchā vā niyatetarā na labhate saṃbaṃdham īśena tat karmaprābhavataḥ sukhādivibhavaḥ paryāptam etena hi bhettā karmamahībhṛtāṃ sakalavinnānādisiddhas tato yat kāṇā dahatākṣapādagāditaṃ tat syāt kathaṃ śreyase satsarvaṃ kṣaṇikaṃ yad icchati pṛthakkālakṣaṇānāṃ yataḥ kāryaṃ kāraṇam ity ataś ciratarātīteṣu vā vāsanāḥ tac ca kva kṣitikartṛbhoktṛracanā samyaktvaṃsajñādikaṃ jalpansiddhipadaṃ viśuddhadhiṣaṇaḥ śauddhodaniḥ syāt kutaḥ yad ayaṃ sarvatra sarvaṃ prakṛtir avikṛtiḥ saptataḥ syād vikārāḥ mahadādyāḥ ṣoḍaśoccairgaṇa iti puruṣas tadvikṛtyaprayuktaḥ svayam anyo na prabhūtikramam akhilakālābaṃdhahīnasya jantoḥ vilapanmuktiḥ kutaḥ syāt sa capalakapilo dhīmatāṃ deyabhāvaḥ pratibhāse pratibhāsatārthaviṣayā dṛśyaṃ prapaṃce sati pratibiṃbādi tathā sad eva na hi niḥparyāyavastusthitiḥ nanu kasyādigatiṃ ruṇāddhi bhuvane siddhāṃ kriyākāraka prakṛtivyujjhitasādhyasādhanagatir brahmā kathaṃ bhāsata yad ekaṃ vādhyakṣe mitir iti ca nirvāṃcyam akhilam tathā tatvaṃ copaplutam iti vicāraṃ na sahate pramāṇād anyasmāt prathitavacanād yuktibhajanāt vinā naitat siddhir vidhiniyamayor arthaniyateḥ bhāvo bhāvād abhāvaḥ samayaniyamataḥ sadvivartād asadvā grāhyokter dvaitam udyadguṇaguṇivivṛteroghato dvaitabuddhiḥ nityaṃ pūrvāparāntāt kṣaṇikam anuvṛter aikyam anyatvavṛtteḥ nānātvaṃ vṛttidoṣān na bhavati bhagavan syādanekāntasiddhiḥ eṣoccair vā tava śivapadāv āptiniḥśreṇibhūtā dhīmad dhyeyā jayati janatānaṃdasaṃdānadhīrā asmād dhātṛprabhṛtivacanākarṇanāj jātakampā śeṣaprāṇipraṇayanavidhau jāyate yā śaraṇyā vidadhadatiśayam amitam atimunināthamānyamananyabhāṅ namitasuraravibhuvanaparagurutīrthakṛtvasanāmayat udayapathagatatadanuvismṛtir aśeṣatatva vibhāsinī jayati jina jina vijitamanasija bhāratī tava bhāsurā jaya jaya jagatīnataśrīpada śrīpurīnilaya niyatabhāsyatāruṇyakāruṇyapuṇyākara paramapuruṣa pārśvanāthādhināthāsanāthāhaṃsā vinatavara damābhirakṣājarakṣādyarakṣākṣaya śaraṇyaṃ nāthārhan bhava bhava bhavāraṇyavigati cyutānām asmākaṃ niravakarakāruṇyanilaya yato 'gaṇyāt puṇyāc cirataram apekṣyaṃ tava padam pariprāptā bhaktyā vayam acalalakṣmīgṛham idam ebhiḥ śrīpurapārśvanāthavilasanmahātmyapuṣyatsudhā kūpāro hi nidarśitaḥ pravisaradvāṅmārgacāturyataḥ tasmāt stotram idaṃ suratnam iva yadyatnād gṛhitaṃ mayā vidyānaṃdamahodayāya niyataṃ dhīmadbhir āsevyatām

iti śrīmadamarakīrtiyatīśvarapriyaśiṣyavidyānandisvāmiviracitaṃ śrīpurapārśvanāthastotraṃ samāptam