Vidyānandin's Yuktyanuśāsanaṭīkā

Creation of the digital textresource H. Trikha 
Published within the Digital Corpus of Vidyānandin's Works at www.dipal.org/dcv October 30, 2021 

Sources:
Print edition: Samantabhadra-praṇītaṃ Yuktyanuśāsanam. Vidyānanda-viracitayā ṭīkayā samanvitam Indralālaiḥ Śrīlālaiś ca sampāditaṃ saṃśodhitaṃ ca. (Māṇikacandra Digambara Jaina Granthamālā 15). Bombay 1919. 
Digital text resource:  dcv/text/resources/YAT ,  February 18, 2022 

YA 1a		kīrtyā mahatyā bhuvi varddhamānaṃ
YA 1b		tvāṃ varddhamānaṃ stutigocaratvaṃ | 
YA 1c		ninīṣavaḥ smo vayam adya vīraṃ
YA 1d		viśīrṇadoṣāśayapāśabandhaṃ || 1 || 
YA 2a		yāthātmyam ullaṅghya guṇodayākhyā
YA 2b		loke stutir bhūriguṇodadhes te | 
YA 2c		aṇiṣṭham apy aṃśam aśaknuvanto
YA 2d		vaktuṃ jina tvāṃ kim iva stuyāma || 2 || 
YA 3a		tathāpi vaiyātyam upetya bhaktyā
YA 3b		stotā'smi te śaktyanurūpavākyaḥ | 
YA 3c		iṣṭe prameye 'pi yathāsvaśakti
YA 3d		kin notsahante puruṣāḥ kriyābhiḥ || 3 || 
YA 4a		tvaṃ śuddhiśaktyor udayasya kāṣṭhāṃ
YA 4b		tulāvyatītāṃ jina ! śāntirūpām | 
YA 4c		avāpitha vrahmapathasya netā
YA 4d		mahān itīyat prativaktum īśāḥ || 4 || 
YA 5a		kālaḥ kalir vā kaluṣāśayo vā
YA 5b		śrotuḥ pravaktur vacanāśayo vā | 
YA 5c		tvacchāsanaikādhipatitvalakṣmī-
YA 5d		prabhutvaśakter apavādahetuḥ || 5 || 
YA 6a		dayādamatyāgasamādhiniṣṭhaṃ
YA 6b		nayapramāṇaprakṛtāṃjasārtham | 
YA 6c		adhṛṣyamanyair akhilaiḥ pravādai-
YA 6d		r jina ! tvadīyaṃ matam advitīyam || 6 || 
YA 7a		abhedabhedātmakam arthatattvaṃ
YA 7b		tava svataṃtrānyatarat khapuṣpam | 
YA 7c		avṛttimattvāt samavāyavṛtteḥ
YA 7d		saṃsargahāneḥ sakalārthahāniḥ || 7 || 
YA 8a		bhāveṣu nityeṣu vikārahāne-
YA 8b		r na kārakavyāpṛtakāryayuktiḥ | 
YA 8c		na baṃdhabhogau na ca tadvimokṣaḥ, 
YA 8d		samaṃtadoṣaṃ matam anyadīyaṃ || 8 || 
YA 9a		ahetukatvaṃ prathitaḥ svabhāva-
YA 9b		s tasmin kriyākārakavibhramaḥ syāt | 
YA 9c		ābālasiddher vividhārthasiddhi-
YA 9d		r vādāntaraṃ kiṃ tad asūyatāṃ te || 9 || 
YA 10a		yeṣām avaktavyam ihātmatattvaṃ
YA 10b		dehād ananyatvapṛthaktvakḷpteḥ | 
YA 10c		teṣāṃ jñatatve 'navadhāryatattve
YA 10d		kā baṃdhamokṣasthitir aprameye || 10 || 
YA 11a		hetur na dṛṣṭo 'tra na cāpy adṛṣṭo
YA 11b		yo 'yaṃ pravādaḥ kṣaṇikātmavādaḥ | 
YA 11c		na dhvastam anyatra bhave dvītīye
YA 11d		saṃtānabhinne na hi vāsanā'sti || 11 || 
YA 12a		tathā na tatkāraṇakāryabhāvā
YA 12b		niranvayāḥ kena samānarūpāḥ | 
YA 12c		asat khapuṣpaṃ na hi hetvapekṣaṃ
YA 12d		dṛṣṭaṃ na sidhyaty ubhayor asiddham || 12 || 
YA 13a		naivāsti hetuḥ kṣaṇikātmavāde
YA 13b		na sann asan vā vibhavād akasmāt | 
YA 13c		nāśodayaikakṣaṇatā ca dṛṣṭā
YA 13d		saṃtānābhinnakṣaṇayor abhāvāt || 13 || 
YA 14a		kṛtapraṇāśākṛtakarmabhogau
YA 14b		syātām asaṃcetitakarmma ca syāt | 
YA 14c		ākasmike 'rthe pralayasvabhāvo
YA 14d		mārgo na yukto badhakaś ca na syāt || 14 || 
YA 15a		na bandhamokṣau kṣaṇikaikasaṃsthau
YA 15b		na saṃvṛtiḥ sā'pi mṛṣāsvabhāvā | 
YA 15c		mukhyādṛte gauṇavidhir na dṛṣṭo
YA 15d		vibhrāntadṛṣṭis tava dṛṣṭito 'nyā || 15 || 
YA 16a		pratikṣaṇaṃ bhaṃgiṣu tatpṛthaktvā-
YA 16b		n na mātṛghātī svapatiḥ svajāyā | 
YA 16c		dattagraho nādhigatasmṛtir na
YA 16d		na ktvārthasatyaṃ na kulaṃ na jātiḥ || 16 || 
YA 17a		na śāstṛśiṣyādividhivyavasthā
YA 17b		vikalpabuddhir vitathā'khilā cet | 
YA 17c		atattvatattvādivikalpamohe
YA 17d		nimajjatāṃ vītavikalpadhīḥ kā || 17 || 
YA 18a		anarthikā sādhanasādhyadhīś ce-
YA 18b		d vijñānamātrasya na hetusiddhiḥ | 
YA 18c		athārthavattvaṃ vyabhicāradoṣo
YA 18d		na yogigamyaṃ paravādisiddham || 18 || 
YA 19a		tattvaṃ viśuddhaṃ sakalair vikalpai-
YA 19b		r viśvābhilāpāspadatām atītam | 
YA 19c		na svasya vedyaṃ na ca tan nigadyaṃ
YA 19d		suṣuptyavasthaṃ bhavaduktibāhyam || 19 || 
YA 20a		mūkātmasaṃvedyavad ātmavedyaṃ, 
YA 20b		tanmliṣṭabhāṣāpratim apralāpam | 
YA 20c		anaṃgasaṃjñaṃ tadavedyam anyaiḥ
YA 20d		syāt, tvaddviṣāṃ vācyam avācyatattvam || 20 || 
YA 21a		aśāsadañjāṃsi vacāṃsi śāstā, 
YA 21b		śiṣyāś ca śiṣṭā vacanairna te taiḥ | 
YA 21c		aho idaṃ durgatamaṃ tamo 'nyat
YA 21d		tvayā vinā śrāyasamārya kiṃ tat || 21 || 
YA 22a		pratyakṣabuddhiḥ kramate na yatra
YA 22b		talliṃgagamyaṃ na tadarthaliṃgam | 
YA 22c		vāco na vā tadviṣayeṇa yogaḥ
YA 22d		kā tadgatiḥ kaṣṭam aśṛṇvatāṃ te || 22 || 
YA 23a		rāgādyavidyānaladīpanaṃ ca
YA 23b		vimokṣavidyāmṛtaśāsanaṃ ca | 
YA 23c		na bhidyate saṃvṛtivādivākyaṃ
YA 23d		bhavatpratīpaṃ paramārthaśūnyam || 23 || 
YA 24a		vidyāprasūtyai kila śīlyamānā, 
YA 24b		bhavaty avidyā guruṇopadiṣṭā | 
YA 24c		aho tvadīyoktyanabhijñamoho, 
YA 24d		yajjanmane yat tadajanmane tat || 24 || 
YA 25a		abhāvamātraṃ paramārthavṛtteḥ
YA 25b		sā saṃvṛtiḥ sarvaviśeṣaśūnyā | 
YA 25c		tasyā viśeṣau kila baṃdhamokṣau
YA 25d		hetvātmaneti tvadanāthavākyam || 25 || 
YA 26a		vyatītasāmānyaviśeṣabhāvā-
YA 26b		d viśvābhilāpārthavikalpaśūnyam | 
YA 26c		khapuṣpavatsyād asad eva tattvaṃ
YA 26d		prabuddhatattvādbhavataḥ pareṣām || 26 || 
YA 27a		atatsvabhāve 'py anayor upāyād
YA 27b		gatir bhavet tau vacanīyagamyau | 
YA 27c		sambandhinau cen na virodhi dṛṣṭaṃ
YA 27d		vācyaṃ yathārthaṃ na ca dūṣaṇaṃ tat || 27 || 
YA 28a		upeyatattvānabhilāpyatāva-
YA 28b		d upāyatattvānabhilāpyatā syāt | 
YA 28c		aśeṣatattvānabhilāpyatāyāṃ
YA 28d		dviṣāṃ bhavadyuktyabhilāpyatāyāḥ || 28 || 
YA 29a		avācyam ity atra ca vācyabhāvā-
YA 29b		d avācyam evety ayathāpratijñam | 
YA 29c		svarūpataś cet pararūpavāci
YA 29d		svarūpavācīti vaco viruddham || 29 || 
YA 30a		satyānṛtaṃ vā'py anṛtānṛtaṃ vā'-
YA 30b		py astīha kiṃ vastvatiśāyanena | 
YA 30c		yuktaṃ pratidvaṃdvyanubaṃdhimiśraṃ
YA 30d		na vastu tādṛk tvadṛte jinedṛk || 30 || 
YA 31a		sahakramād vā viṣayālpabhūri
YA 31b		bhede 'nṛtaṃ bhedi na cātmabhedāt | 
YA 31c		ātmāntaraṃ syād bhiduraṃ samaṃ ca
YA 31d		syāc cānṛtāt mānabhilāpyatā ca || 31 || 
YA 32a		na sac ca nāsac ca na dṛṣṭam eka-
YA 32b		m ātmāntaraṃ sarvaniṣedhagamyam | 
YA 32c		dṛṣṭaṃ vimiśraṃ tadupādhibhedā-
YA 32d		t svapne 'pi naitattvadṛṣeḥ pareṣām || 32 || 
YA 33a		pratyakṣanirdeśavad apy asiddha
YA 33b		m akalpakaṃ jñāpayituṃ hy aśakyam | 
YA 33c		vinā ca siddher na ca lakṣaṇārtho
YA 33d		na tāvakadveṣiṇi vīra ! satyam || 33 || 
YA 34a		kālāntarasthe kṣaṇike dhruve vā'-
YA 34b		pṛthakpṛthaktvāvacanīyatāyām | 
YA 34c		vikārahāner na ca karttṛkārye
YA 34d		vṛthā śramo 'yaṃ jina ! vidviṣāṃ te || 34 || 
YA 35a		madyāṃgavad bhūtasamāgame jñaḥ
YA 35b		śaktyantaravyaktir adaivasṛṣṭiḥ | 
YA 35c		ity ātmaśiśnodarapuṣṭituṣṭai-
YA 35d		r nirhrībhayair hā ! mṛdavaḥ pralabdhāḥ || 35 || 
YA 36a		dṛṣṭe 'viśiṣṭe jananādihetau
YA 36b		viśiṣṭatā kā pratisattvam eṣām | 
YA 36c		svabhāvataḥ kiṃ na parasya siddhi-
YA 36d		r atāvakānām api hā prapātaḥ || 36 || 
YA 37a		svacchandavṛtterjagataḥ svabhāvā-
YA 37b		d uccair anācārapatheṣv adoṣam | 
YA 37c		nirghuṣya dīkṣāsamam uktimānā-
YA 37d		s tvaddṛṣṭivāhyā vata vibhramaṃti || 37 || 
YA 38a		pravṛttiraktaiḥ śamatuṣṭiriktai-
YA 38b		r upetya hiṃsā'bhyudayāṅganiṣṭhā | 
YA 38c		pravṛttitaḥ śāṃtir api prarūḍhaṃ
YA 38d		tamaḥ pareṣāṃ tava suprabhātam || 38 || 
YA 39a		śīrṣopahārādibhir ātmaduḥkhai-
YA 39b		r devān kilārādhya sukhābhigṛddhāḥ | 
YA 39c		siddhyanti doṣāpacayānapekṣā
YA 39d		yuktaṃ ca teṣāṃ tvam ṛṣir na yeṣām || 39 || 
YA 40a		sāmānyaniṣṭhā vividhā viśeṣāḥ
YA 40b		padaṃ viśeṣāṃtarapakṣapāti | 
YA 40c		antarviśeṣāntaravṛttito 'nya-
YA 40d		t samānabhāvaṃ nayate viśeṣam || 40 || 
YA 41a		yad eva kāropahitaṃ padaṃ ta-
YA 41b		d asvārthataḥ svārtham avacchinatti | 
YA 41c		paryāyasāmānyaviśeṣasarvaṃ, 
YA 41d		padārthahāniś ca virodhivat syāt || 41 || 
YA 42a		anuktatulyaṃ yad anevakāraṃ
YA 42b		vyāvṛttyabhāvān niyamadvaye 'pi | 
YA 42c		paryāyabhāve 'nyatarāprayoga-
YA 42d		s tat sarvam anyacyutam ātmahīnam || 42 || 
YA 44a		virodhi cābhedyaviśeṣabhāvāt 
YA 44b		taddyotanaḥ syād guṇato nipātaḥ | 
YA 44c		vipādyasandhiś ca tathāṃgabhāvā-
YA 44d		d avācyatā śrāyasalopahetuḥ || 44 || 
YA 45a		tathā pratijñāśayato prayogaḥ
YA 45b		sāmarthyato vā pratiṣedhayuktiḥ | 
YA 45c		iti tvadīyā jinanāga ! dṛṣṭiḥ
YA 45d		parāpradhṛṣyā paradharṣiṇī ca || 45 || 
YA 46a		vidhir niṣedho 'nabhilāpyatā ca
YA 46b		trirekaśāstridviśa eka eva | 
YA 46c		trayo vikalpās tava saptadhāmī
YA 46d		syācchabdaneyāḥ sakale 'rthabhede || 46 || 
YA 47a		syād ity api syād guṇamukhyakalpai-
YA 47b		kānto yathopādhiviśeṣavīkṣyaḥ | 
YA 47c		tattvaṃ tv anekāṃtam aśeṣarūpaṃ
YA 47d		dvidhā bhavārthavyavahāravattvāt || 47 || 
YA 48a		na dravyaparyāyapṛthagvyavasthā-
YA 48b		dvaiyātmyam ekārpaṇayā viruddham | 
YA 48c		dharmaś ca dharmī ca mithas tridhemau-
YA 48d		na sarvathā te 'bhimatau viruddhau || 48 || 
YA 49a		dṛṣṭāgamābhyām aviruddham artha-
YA 49b		prarūpaṇaṃ yuktyanuśāsanaṃ te | 
YA 49c		pratikṣaṇaṃ sthityudayavyayātma-
YA 49d		tattvavyavasthaṃ sad ihārtharūpam || 49 || 
YA 50a		nānātmatām aprajahat tad eka-
YA 50b		m ekātmatām aprajahac ca nānā | 
YA 50c		aṃgāṃgibhāvāt tava vastu tad yat
YA 50d		krameṇa vāg vācyam anaṃtarūpam || 50 || 
YA 51a		mitho 'napekṣāḥ puruṣārthahetu-
YA 51b		r nāṃśā na cāṃśī pṛthag asti tebhyaḥ | 
YA 51c		parasparekṣāḥ puruṣārthahetu-
YA 51d		r dṛṣṭā nayās tadvad asi kriyāyām || 51 || 
YA 52a		ekāntadharmābhiniveśamūlā
YA 52b		rāgādayo 'haṃkṛtijā janānām | 
YA 52c		ekāntahānāc ca sa yat tad eva
YA 52d		svābhāvikatvāc ca samaṃ manaste || 52 || 
YA 53a		pramucyate ca pratipakṣadūṣī
YA 53b		jina ! tvadīyaiḥ paṭusiṃhanādaiḥ | 
YA 53c		ekasya nānātmatayājñavṛtte-
YA 53d		s tau baṃdhamokṣau svamatādavāhyau || 53 || 
YA 54a		ātmāntarābhāvasamānatā na
YA 54b		vāgāspadaṃ svāśrayabhedahīnā | 
YA 54c		bhāvasya sāmānyaviśeṣavattvā-
YA 54d		d aikye tayor anyatarannirātma || 54 || 
YA 55a		ameyam aśliṣṭam ameyam eva
YA 55b		bhede 'pi, tadvṛttyapavṛttibhāvāt | 
YA 55c		vṛttiś ca kṛtsnāṃśavikalpato na, 
YA 55d		mānaṃ ca nānantasamāśrayasya || 55 || 
YA 56a		nānāsadekātmasamāśrayaṃ ce-
YA 56b		d anyatvam adviṣṭhamanātmanoḥ kva | 
YA 56c		vikalpaśūnyatvam avastunaś ce-
YA 56d		t tasminn ameye kva khalu pramāṇam || 56 || 
YA 57a		vyāvṛttihīnānvayato na siddhye-
YA 57b		d viparyaye 'py advitaye 'pi sādhyam | 
YA 57c		atadvyudāsābhiniveśavādaḥ
YA 57d		parābhyupetārthavirodhavādaḥ || 57 || 
YA 58a		anātmanānātmagater ayuktiḥ,  || 58a || 
YA 58b		vastunyayukter yadi pakṣasiddhiḥ | 
YA 58bc		avastvayukteḥ pratipakṣasiddhiḥ,  || 58bc || 
YA 58d		na ca svayaṃ sādhanariktasiddhiḥ || 58 ||  || 58d || 
YA 59a		niśāyitas taiḥ paraśuḥ paraghnaḥ
YA 59b		svamūrdhni nirbhedabhayānabhijñaiḥ | 
YA 59c		vaitaṇḍikair yaiḥ kusṛtiḥ praṇītā
YA 59d		mune ! bhavacchāsanadṛkpramūḍhaiḥ || 59 || 
YA 60a		bhavatyabhāvo 'pi ca vastudharmo
YA 60b		bhāvāntaraṃ bhāvavad arhatas te | 
YA 60c		pramīyate ca vyapadiśyate ca
YA 60d		vastuvyavasthāṃgam ameyam anyat || 60 || 
YA 61a		viśeṣasāmānyaviṣaktabheda-
YA 61b		vidhivyavacchedavidhāyi vākyam | 
YA 61c		abhedabuddher aviśiṣṭatā syād
YA 61d		vyavṛttibuddheś ca viśiṣṭatā te || 61 || 
YA 62a		sarvāntavat tadguṇamukhyakalpaṃ
YA 62b		sarvāntaśūnyaṃ ca mithonapekṣam | 
YA 62c		sarvāpadām antakaraṃ nirantaṃ
YA 62d		sarvodayaṃ tīrtham idaṃ tavaiva || 62 || 
YA 63a		kāmaṃ dviṣann apy upapatticakṣuḥ
YA 63b		samīkṣatāṃ te samadṛṣṭir iṣṭam | 
YA 63c		tvayi dhruvaṃ khaṃḍitamānaśṛṃgo
YA 63d		bhavaty abhadro 'pi samantabhadraḥ || 63 || 
YA 64a		na rāgān naḥ stotraṃ bhavati bhavapāśacchidi munau
YA 64b		na cānyeṣu dveṣād apaguṇakathābhyāsakhalatā | 
YA 64c		kimu nyāyānyāyaprakṛtaguṇadoṣajñamanasā
YA 64d		hitānveṣopāyas tava guṇakathāsaṃgagaditaḥ || 64 || 
YA 65a		iti stutyaḥ stutyais tridaśamunimukhyaiḥ praṇihitaiḥ
YA 65b		stutaḥ śaktyā śreyaḥpadam adhigatas tvaṃ jina mayā | 
YA 65c		mahāvīro vīro duritaparasenābhivijaye
YA 65d		vidheyā me bhaktiḥ pathi bhavata evāpratinidhau || 65 ||