śrīparamātmane namaḥ śrīmadvidyānaṃdisvāmiviracitaṃ tattvārthaślokavārtikam prathamo 'dhyāyaḥ
śrīvardhamānam ādhyāya ghātisaṃghātaghātanam vidyāspadaṃ pravakṣyāmi tattvārthaślokavārtikam [ ] prabuddhāśeṣatattvārthe sākṣāt prakṣīṇakalmaṣe siddhe munīndrasaṃstutye mokṣamārgasya netari [ ] satyāṃ tatpratipitsāyām upayogātmakātmanaḥ śreyasā yokṣyamāṇasya pravṛttaṃ sūtram ādimam [ ] naikāṃtākṛtrimāmnāyamūlatve sya pramāṇatā tadvyākhyātur asarvajñe rāgitve vipralaṃbhanāt [ ] nāpy asatyāṃ bubhutsāyām ātmano 'cetanātmanaḥ khasyeva muktimārgopadeśāyogyatvaniścayāt [ ] saṃpradāyāvyavacchedāvirodhād adhunā nṛṇām sadgotrādyupadeśo tra yadvattadvadvicārataḥ [ ] pramāṇam āgamaḥ sūtram āptamūlatvasiddhitaḥ laiṃgikaṃ vāvinābhāviliṃgāt sādhyasya nirṇayāt [ ] tatra nāsty eva sarvajño jñāpakānupalaṃbhanāt vyomāṃbhojavad ity etat tamas tam avijṛṃbhitam [ ] sūkṣmādyarthopadeśo hi tatsākṣātkartṛpūrvakaḥ paropadeśaliṃgākṣānapekṣāvitathatvataḥ [ ] sūkṣmādyartho pi vādhyakṣaḥ kasyacit sakalaḥ sphuṭam śrutajñānādhigamyatvān nadīdvīpādīdeśavat [ ] na hetoḥ sarvathaikāṃtair anekāṃtaḥ kathaṃcana śrutajñānādhigamyatvāt teṣāṃ dṛṣṭeṣṭabādhanāt [ ] sthānatrayāvisaṃvādiśrutajñānaṃ hi vakṣyate tenādhigamyamānatvaṃ siddhaṃ sarvatra vastuni [ ] tato 'siddhaṃ parasyātra jñāpakānupalaṃbhanam no bhāvasādhanāyālaṃ sarvatattvārthavedinaḥ [ ] svasaṃbaṃdhi yadīdaṃ syād vyabhicāripayonidheḥ aṃbhaḥ kuṃbhādisaṃkhyānaiḥ sadbhir ajñāyamānakaiḥ [ ] sarvasaṃbaṃdhi tadboddhuṃ kiṃcid bodhair na śakyate sarvaboddhāsti cet kaścit tadboddhā kiṃ niṣidhyate [ ] sarvasaṃbaṃdhisarvajñajñāpakānupalaṃbhanam na cakṣurādibhir vedyam atyakṣatvād adṛṣṭavat [ ] nānumānādaliṃgatvāt kārthāpattyupamāgatiḥ sarvasyānanyathābhāvasādṛśyānupapattitaḥ [ ] sarvapramātṛsaṃbaṃdhi pratyakṣādinivāraṇāt kevalāgamagamyaṃ ca kathaṃ mīmāṃsakasya tat [ ] kāryerthe codanājñānaṃ pramāṇaṃ yasya saṃmatam tasya svarūpasattāyāṃ tannaivātiprasaṃgataḥ [ ] tadjñāpakopalaṃbhasyābhāvo 'bhāvapramāṇataḥ sādhyate cen na tasyāpi sarvatrāpy apravṛttitaḥ [ ] gṛhītvā vastusadbhāvaṃ smṛtvā tatpratiyoginam mānasaṃ nāstitājñānaṃ yeṣām akṣānapekṣayā [ ] teṣām aśeṣanṛjñāte smṛte tadjñāpake kṣaṇe jāyate nāstitājñānaṃ mānasaṃ tatra nānyathā [ ] na vāśeṣanarajñānaṃ sakṛt sākṣād upeyate na kramād anyasaṃtānapratyakṣatvānabhīṣṭitaḥ [ ] anekāṃte hi vijñānam ekāṃtānupalaṃbhanam tadvidhis tanniṣedhaś ca mato naivānyathāmatiḥ [ ] naivaṃ sarvasya sarvajñajñāpakānupadarśanam siddhaṃ taddarśanāropo yena tatra niṣidhyate [ ] āsan saṃti bhaviṣyaṃti boddhāro viśvadṛśvanaḥ madanye pīti nirṇītir yathā sarvajñavādinaḥ [ ] kiṃcij jñasyāpi tadvan me tenaiveti viniścayaḥ ity ayuktam aśeṣajñasādhanopāyasaṃbhavāt [ ] yathāham anumānādeḥ sarvajñaṃ vedmi tattvataḥ tathānye pi narāḥ saṃtas tadboddhāro niraṃkuśāḥ [ ] yathā mama na tadjñapter upalaṃbho sti jātucit tathā sarvanṛṇām ity ajñānasyaiva viceṣṭitam [ ] hetor naratvakāyādimattvāder vyabhicārataḥ syādvādinaiva viśvajñam anumānena jānatā [ ] jñāpakānupalaṃbho sti tan na tatpratiṣedhataḥ kārakānupalaṃbhas tu pratighātīṣyate 'grataḥ [ ] kalmaṣaprakṣayaś cāsya viśvatattvāt pratīyate tam aṃtareṇa tadbhāvānupapattiprasiddhitaḥ [ ] jāyate tadvidhaṃ jñānaṃ sve sati pratibaṃdhari spaṣṭasvārthāvabhāsitvān nirdoṣanayanādivat [ ] kṣīyate kvacid āmūlaṃ jñānasya pratibaṃdhakam samagrakṣayahetutvāl locane timirādivat [ ] moho jñānadṛgāvṛttyaṃtarāyāḥ pratibaṃdhakāḥ kevalasya hi vakṣyaṃte tadbhāve tadanudbhavāt [ ] teṣāṃ prakṣayahetū ca pūrṇau saṃvaranirjare te tapotiśayāt sādhoḥ kasyacid bhavato dhruvam [ ] tapo hy anāgatāghaughapravartananirodhanam tajjanmahetusaṃghātapratipakṣayato yathā [ ] bhaviṣyatkālakūṭādivikāraughanirodhanam maṃtradhyānavidhānādi sphuṭaṃ loke pratīyate [ ] nṛṇām apy aghasaṃbaṃdho rāgadveṣādihetukaḥ duḥkhādiphalahetutvād atibhuktiviṣādivat [ ] tadvirodhivirāgādirūpaṃ tapa ihocyate tadasiddhāv atajjanmakāraṇapratipakṣatā [ ] tadā duḥkhaphalaṃ karmasaṃcitaṃ pratihanyate kāyakleśādirūpeṇa tapasā tatsajātinā [ ] svādhyāyādisvabhāvena parapraśamamūrtinā baddhaṃ sātādikṛtkarma śakrādisukhajātinā [ ] tato niḥśeṣatattvārthavedī prakṣīṇakalmaṣaḥ śreyomārgasya netāsti sa saṃstutyas tadarthibhiḥ [ ] tasya darśanaśuddhyādibhāvanopāttamūrtinā puṇyatīrthakaratvena nāmnā saṃpāditaśriyaḥ [ ] sthitasya ca ciraṃ svāyur viśeṣavaśavartinaḥ śreyomārgopadeśitvaṃ kathaṃcin na virudhyate [ ] jñānamātrāt tu yo nāma muktim abhyeti kaścana tasya tan na tataḥ pūrvam ajñatvāt pāmarādivat [ ] nāpi paścād avasthānābhāvād vāgvṛttyayogataḥ ākāśasyeva muktasya kvopadeśapravartanam [ ] saṃskārasyākṣayāt tasya yady avasthānam iṣyate tatkṣaye kāraṇaṃ vācyaṃ tattvajñānāt paraṃ tvayā [ ] saṃskārasyāyurākhyasya parikṣayanibaṃdhanam dharmam eva samādhiḥ syād iti kecit pracakṣate [ ] vijñānāt so pi yady anyaḥ pratijñāvyāhatis tadā sa cāritraviśeṣo hi mukter mārgaḥ sthito bhavet [ ] jñānam eva sthirībhūtaṃ samādhir iti cen matam tasya pradhānadharmatve nivṛttis tatkṣayād yadi [ ] tadā so pi kuto jñānād uktadoṣānuṣaṃgataḥ samādhyaṃtarataś cen na tulyaparyanuyogataḥ [ ] tasya puṃsaḥ svarūpatve prāg eva syāt parikṣayaḥ saṃskārasyāsya nityatvān na kadācid asaṃbhavaḥ [ ] āvirbhāvatirobhāvāv api nātmasvabhāvagau pariṇāmo hi tasya syāt tathā prakṛtivac ca tau [ ] tataḥ syādvādināṃ siddhaṃ mataṃ naikāṃtavādinām bahiraṃtaś ca vastūnāṃ pariṇāmavyavasthiteḥ [ ] mithyārthābhiniveśena mithyājñānena varjitam yat puṃrūpam udāsīnaṃ tac ced dhyānaṃ mataṃ tava [ ] haṃta ratnatrayaṃ kiṃ na tataḥ param iheṣyate yato na tannimittatvaṃ mukter āsthīyate tvayā [ ] yady ajñānasvabhāvaḥ syāt kapilo nopadeśakṛt suṣuptavatpradhānaṃ vācetanatvād ghaṭādivat [ ] jñānasaṃsargato py eṣa naiva jñānasvabhāvakaḥ vyoma tadvadviśeṣasya sarvathānupapattitaḥ [ ] etenaiveśvaraḥ śreyaḥpathaprakhyāpane 'prabhuḥ vyākhyāto 'cetano hy eṣa jñānād arthāṃtaratvataḥ [ ] vijñānasamavāyāc cec cetano 'yam upeyate tatsaṃsargāt kathaṃ na jñaḥ kapilo pi prasiddhyati [ ] pradhānāśrayi vijñānaṃ na puṃso jñatvasādhanam yadi bhinnaṃ kathaṃ puṃsas tat tatheṣṭaṃ jaḍātmabhiḥ [ ] jñānāśrayatvato vedhā nityaṃ jño yadi kathyate tad eva kiṃkṛtaṃ tasya tato bhede pi tattvataḥ [ ] samavāyo hi sarvatra na viśeṣakṛdekakaḥ kathaṃ khādīni saṃtyajya puṃsi jñānaṃ niyojayet [ ] viśiṣṭaḥ samavāyo 'yam īśvarajñānayor yadi tadā nānātvam etasya prāptaṃ saṃyogavattakam [ ] anāśrayaḥ kathaṃ cāyam āśrayair yujyate ṃjasā tadviśeṣaṇatā yena samavāyasya gamyate [ ] viśeṣaṇatve caitasya vicitrasamavāyinām viśeṣaṇatve nānātvaprāptir daṃḍakaṭādivat [ ] tato 'rthasyaiva paryāyaḥ samavāyo guṇādivat tādātmyapariṇāmena kathaṃcid avabhāsanāt [ ] tadīśvarasya vijñānasamavāyena yā jñatā sā kathaṃcit tadātmatvapariṇāmena nānyathā [ ] tathānekāṃtavādasya prasiddhiḥ kena vāryate pramāṇabādhanādbhinnasamavāyasya tadvataḥ [ ] sugato pi na mārgasya praṇetā vyavatiṣṭhate tṛṣṇāvidyāvinirmuktes tatsamākhyātakhaṅgivat [ ] jagaddhitaiṣitāsakter buddho yady avatiṣṭhate tathaivātmahitaiṣitvabalāt khaṅgīha tiṣṭhatu [ ] tathāgatopakāryasya jagato 'naṃtatā yadi sarvadāvasthitau hetur mataḥ sugatasaṃtateḥ [ ] khaṅgino py upakāryasya svasaṃtānasya kiṃ punaḥ na syād anaṃtatā yena tanniranvayanirvṛtiḥ [ ] svacittaśamanāt tasya saṃtāno nottaratra cet nātmānaṃ śamayiṣyāmīty abhyāsasya vidhānataḥ [ ] na cāṃtyacittaniṣpattau tatsamāptir vibhāvyate tatrāpi śamayiṣyāmīty eṣyacittavyapekṣaṇāt [ ] ciṃtāṃtarasamāraṃbhi nāṃtyaṃ cittam anāsravam sahakārivihīnatvāt tādṛgdīpaśikhā yathā [ ] ity ayuktam anaikāṃtād buddhacittena tādṛśā hitaiṣitvaṃnimittasya sadbhāvo pi samo dvayoḥ [ ] caramatvaviśeṣas tu netarasya prasiddhyati tato 'naṃtaranirvāṇasiddhyabhāvāt pramāṇataḥ [ ] mā bhūt tacchāṃtanirvāṇaṃ sugato stu pramātmakaḥ śāsteti cen na tasyāpi vākpravṛttivirodhataḥ [ ] viśiṣṭabhāvanodbhūtapuṇyātiśayato dhruvam vivakṣām aṃtareṇāpi vāgvṛttiḥ sugatasya cet [ ] siddhaṃ paramataṃ tasya sānvayatve jinatvataḥ pratikṣaṇavināśitve sarvathārthakriyākṣatiḥ [ ] saṃtānasyāpy avastutvād anyathātmā tathocyatām kathaṃcid dravyatādātmyād vināśas tasya saṃbhavāt [ ] pūrvakālavivakṣāto naṣṭāyā api tattvataḥ sugatasya pravartaṃte vāca ity apare viduḥ [ ] teṣāṃ savāsanaṃ naṣṭaṃ kalpanājālam arthakṛt kathaṃ na yuktimadhyās te śuddhasyātiprasaṃgataḥ [ ] sānnidhyamātratas tasya ciṃtāratnopamasya cet kuṭyādibhyo pi vācaḥ syur vineyajanasaṃmatāḥ [ ] kim evam īśvarasyāpi sāṃnidhyāj jagad udbhavat niṣidhyate tadā caiva prāṇināṃ bhogabhūtaye [ ] sarvathānupakāritvān nityasyeśasya tan na cet sugatasyopakāritvaṃ deśānāsu kim asti te [ ] tadbhāvabhāvitā mātrā tasya tā iti cen matam piśācādes tathaivaitāḥ kiṃ na syur aviśeṣataḥ [ ] tasyādṛśyasya taddhetubhāvaniścityasaṃbhave sugataḥ kiṃ nu dṛśyas te yenāsau tannibaṃdhanam [ ] tato nāśvāsa evaitaddeśanāstu parīkṣayā satāṃ pravartamānām iti kaiścit subhāṣitam [ ] citrādyadvaitavāde ca dūre sanmārgadeśanā pratyakṣādivirodhaś ca bhedasyaiva prasiddhitaḥ [ ] na nirodho na cotpattir na baddho na ca mocakaḥ na baṃdho sti na vai muktir ity eṣā paramārthatā [ ] na brahmavādināṃ siddhā vijñānādvaitavat svayam nityasarvagataikātmāprasiddheḥ parato pi vā [ ] tataḥ pramāṇānvitamokṣamārgapraṇāyakaḥ sarvavidastadoṣaḥ syādvādabhāg eva nuter ihārhaḥ so 'rhan pare nehitahīnamārgāḥ [ ] svasaṃvedanataḥ siddhaḥ sadātmā bādhavarjitāt tasya kṣmādivivartātmany ātmany anupapattitaḥ [ ] svasaṃvedanam apy asya bahiḥkaraṇavarjanāt ahaṃkārāspadaṃ spaṣṭam abādham anubhūyate [ ] tadvilope na vai kiṃcit kasyacid vyavatiṣṭhate svasaṃvedanamūlatvāt sveṣṭatattvavyavasthiteḥ [ ] saṃvedanāṃtareṇaiva viditād vedanād yadi sveṣṭāsiddhir upeyeta tadā syād anavasthitiḥ [ ] prācyaṃ hi vedanaṃ tāvan nārthaṃ vedayate dhruvam yāvan nānyena bodhena vuddhyaṃ so py evam eva tu [ ] nārthasya darśanaṃ siddhyet pratyakṣaṃ suramaṃtriṇaḥ tathā sati kṛtaś ca syān matāṃtarasamāśrayaḥ [ ] vibhinnalakṣaṇatvāc ca bhedaś caitanyadehayoḥ tattvāṃtaratayā toyatejovad iti mīyate [ ] bhinnapramāṇavedyatvād ity apy etena varṇitam sādhitaṃ bahir aṃtaś ca pratyakṣasya vibhedataḥ [ ] kṣityādisamudāyārthāḥ śarīreṃdriyagocarāḥ tebhyaś caitanyam ity etan na parīkṣākṣameritam [ ] vyaṃjakā na hi te tāvac cito nityatvaśaktitaḥ kṣityāditattvavad jñātuḥ kāryatvasyāpy aniṣṭitaḥ [ ] kuṃbhādibhir anekāṃto na syād eva kathaṃcana teṣāṃ mataṃ gurutvena parair iṣṭaḥ pratītitaḥ [ ] nāpi te kārakā vitter bhavaṃti sahakāriṇaḥ svopādānavihīnāyās tasyās tebhyo 'prasūtitaḥ [ ] nopādānād vinā śabdo vidyudādeḥ pravartate kāryatvāt kuṃbhavad yady adṛṣṭakalpanam atra te [ ] kva kāṣṭhāṃtargatād agner agnyaṃtarasamudbhavaḥ tasyāviśeṣato yena tattvasaṃkhyā na hīyate [ ] sūkṣmo bhūtaviśeṣaś ced upādānaṃ cito matam sa evātmāstu cijjātisamanvitavapur yadi [ ] tadvijātiḥ kathaṃ nāma cidupādānakāraṇam bhavatas tejaso ṃbhovat tathaivādṛṣṭakalpanā [ ] sattvādinā samānatvāc cidupādānakalpane kṣmādīnām api tat kena nivāryeta parasparam [ ] yena naikaṃ bhavet tattvaṃ kriyākārakaghāti te pṛthivyāder aśeṣasya tatraivānupraveśataḥ [ ] tasmād dravyāṃtarāpoḍhasvabhāvānvayi kathyatām upādānaṃ vikāryasya tattvabhedo 'nyathā kutaḥ [ ] sūkṣmo bhūtaviśeṣaś ca varṇādiparivarjitaḥ svasaṃvedanavedyo yam anumeyo thavā yadi [ ] sarvathā paṃcamaṃ bhūtam anātmajñasya siddhyati sa eva paralokīti paralokakṣatiḥ katham [ ] śarīrādaya evāsya yady upādānahetavaḥ tadā tadbhāvabhāvitvaṃ vijñānasya prasajyate [ ] vyatīte pīṃdriye 'rthe ca vikalpajñānasaṃbhavāt na taddhetutvam etasya tasmin saty apy asaṃbhavāt [ ] kāyaś cet kāraṇaṃ yasya pariṇāmaviśeṣataḥ sadyo mṛtatanuḥ kasmāt tathā nāsthīyate munā [ ] vāyuviśleṣatas tasya vaikalyāc cen nibaṃdhanam caitanyam iti saṃprāptaṃ tasya sadbhāvabhāvataḥ [ ] sāmagrījanikā naikaṃ kāraṇaṃ kiṃcid īkṣyate vijñāne piṣṭatoyādir madaśaktāv iveti cet [ ] saṃyukte sati kiṃ na syāt kṣmādibhūtacatuṣṭaye caitanyasya samudbhūtiḥ sāmagyrā api bhāvataḥ [ ] tadviśiṣṭavivartasyāpāyāc cet sa ka iṣyate bhūtavyaktyaṃtarāsaṃgaḥ piṭhirādāv apīkṣyate [ ] kālaparyuṣitatvaṃ cet piṣṭādivad upeyate tat kiṃ tatra na saṃbhāvyaṃ yena nātiprasajyate [ ] bhūtāni katicit kiṃcit kartuṃ śaktāni kenacit pariṇāmaviśeṣeṇa dṛṣṭānīti mataṃ yadi [ ] tadā dehīṃdriyādīni cidviśiṣṭāni kānicit cidvivartasamudbhūtau saṃtu śaktāni sarvadā [ ] tathā sati na dṛṣṭasya hānir nādṛṣṭakalpanā madhyāvasthāvadādau ca ciddehādeś cidudbhavāt [ ] tataś ca cidupādānāc cetaneti viniścayāt na śarīrādayas tasyāḥ saṃty upādānahetavaḥ [ ] etena dehacaitanyabhedasādhanam iṣṭakṛt kāryakāraṇabhāvenety etad dhvastaṃ nibuddhyatām [ ] dehasya ca guṇatvena buddher yā siddhasādhyatā bhede sādhye tayoḥ sāpi na sādhvī tadasiddhitaḥ [ ] na vigrahaguṇo bodhas tatrānadhyavasāyataḥ sparśādivat svayaṃ tadvad anyasyāpi tathā gateḥ [ ] tadguṇatve hi bodhasya mṛtadehe pi vedanam bhavettvagādivadbāhyakaraṇajñānato na kim [ ] sūkṣmatvān na kvacid bāhyakaraṇajñānagocaraḥ paramāṇuvadevāyaṃ bodha ity apy asaṃgatam [ ] jīvatkāye pi tatsiddher avyavasthānuṣaṃgataḥ svasaṃvedanatas tāvad bodhasiddhau na tadguṇaḥ [ ] jīvatkāyaguṇo py eṣa yady asādhāraṇo mataḥ prāṇādiyogavan na syāt tadāniṃdriyagocaraḥ [ ] sādhāraṇaguṇatve tu tasya pratyekam udbhavaḥ pṛthivyādiṣu kiṃ na syāt sparśasāmānyavat sadā [ ] ahaṃ sukhīti saṃvittau sukhayogo na vigrahe bahiḥkaraṇavedyatvaprasaṃgān neṃdriyeṣv api [ ] kartṛsthasyaiva saṃvitteḥ sukhayogasya tattvataḥ pūrvottaravidāṃ vyāpī cidvivartas tadāśrayaḥ [ ] syād guṇī cet sa evātmā śarīrādivilakṣaṇaḥ kartānubhavitā smartānusaṃdhātā ca niścitaḥ [ ] dravyato nādiparyaṃtaḥ sattvāt kṣityāditattvavat sa syān na vyabhicāro sya hetor nāśinyasaṃbhavāt [ ] kuṃbhādayo hi paryaṃtā api naikāṃtanaśvarāḥ śāśvatadravyatādātmyāt kathaṃcid iti no matam [ ] yathā cānādiparyaṃtatadviparyayarūpatā ghaṭāder ātmano py evam iṣṭā sety aviruddhatā [ ] sarvathaikāṃtarūpeṇa sattvasya vyāptyasiddhitaḥ bahir aṃtar anekāṃtaṃ tad vyāpnoti tathekṣaṇāt [ ] vṛhaspatimatasthityā vyabhicāro ghaṭādibhiḥ na yukto tas taducchittiprasiddheḥ paramārthataḥ [ ] sādhyasādhanavaikalyaṃ dṛṣṭāṃte pi na vīkṣyate nityānityātmatāsiddhiḥ pṛthivyāder adoṣataḥ [ ] ekasaṃtānagāś cittaparyāyās tattvato nvitāḥ pratyabhijñāyamānatvāt mṛtparyāyā yathedṛśāḥ [ ] sādṛśyāt pratyabhijñānaṃ nānāsaṃtānabhāvinām bhedānām iva tatrāpīty adṛṣṭaparikalpanam [ ] tad evedam iti jñānād ekatvasya prasiddhitaḥ sarvasyāpy askhaladrūpāt pratyakṣād bhedasiddhivat [ ] yathā bhedasya saṃvittiḥ saṃvādanam abādhitā tathaikatvasya nirṇītiḥ pūrvottaravivartayoḥ [ ] vartamānārthavijñānaṃ na pūrvāparagocaram yogyatāniyamāt siddhaṃ pratyakṣaṃ vyāvahārikam [ ] yathā tathaiva saṃjñānam ekatvaviṣayaṃ matam na vartamānaparyāyamātragocaram īkṣyate [ ] yathaiva vartamānārthagrāhakatve pi saṃvidaḥ sarvasāṃpratikārthānāṃ vedakatvaṃ na buddhyate [ ] tathaivānāgatātītaparyāyaikatvavedikā vittir nānādiparyaṃtaparyāyaikatvagocarā [ ] kramato 'naṃtaparyāyāneko vyāpnoti nā sakṛt yathā nānāvidhākārāṃś citrajñānam anaṃśakam [ ] yady aneko pi vijñānākāro 'śakyavivecanaḥ syād ekaḥ puruṣo 'naṃtaparyāyo pi tathā na kim [ ] yathaikavedanākārā na śakyā vedanāṃtaram netuṃ tathāpi paryāyā jātucitpuruṣāṃtaram [ ] bhinnakālatayā vittir yadi teṣāṃ vivecanam bhinnadeśatayā vittir jñānākāreṣu kiṃ na tat [ ] pītākārādisaṃvittiḥ pratyekaṃ citravedanā na ced anekasaṃtānapītādijñānavanmatam [ ] saha nīlādivijñānaṃ kathaṃ citram upeyate yugapadbhāvirūpādijñānapaṃcakavattvayā [ ] citrādvaitāśrayāc citraṃ tad apy astitv ati cen na vai citram advaitam ity etadaviruddhaṃ vibhāvyate [ ] tasya jātyaṃtaratvena virodhābhāvabhāṣaṇe tathaivātmā saparyāyair anaṃtair avirodhabhāk [ ] bhrāṃteyaṃ citratā jñāne niraṃśe 'nādivāsanā sāmarthyād avabhāseta svapnātijñānavad yadi [ ] tadā bhrāṃtetarākāram ekaṃ jñānaṃ prasiddhyati bhrāṃtākārasya vā sattve cittaṃ sadasadātmakam [ ] tac ca prabādhate 'vaśyaṃ virodhaṃ puṃsi paryayaiḥ akramaiḥ kramavadbhiś ca pratītatvāviśeṣataḥ [ ] niḥśeṣakalpanātītaṃ saṃcinmātraṃ mataṃ yadi tathaivāṃtarbahirvastu samastaṃ tattvato stu naḥ [ ] samastāḥ kalpanā hīmā mithyādarśananirmitāḥ spaṣṭaṃ jātyaṃtare vastuny aprabādhaṃ cakāsati [ ] anekāṃte hy apoddhārabuddhayo nekadharmagāḥ kutaścit saṃpravartaṃte 'nyonyāpekṣāḥ sunītayaḥ [ ] paropagatasaṃvittir anaṃśa nāvabhāsate brahmavarttena tanmātraṃ na pratiṣṭhāmi yarti naḥ [ ] nānākārasya naikasminn adhyāso sti virodhataḥ tato na sat tad ity etat suspaṣṭaṃ rājaceṣṭitam [ ] saṃvedanāviśeṣe pi dvayoḥ sarvatra sarvadā kasyacid dhi tiraskāre na prekṣāpūrvakāritā [ ] tasmād abādhitā saṃvitsukhaduḥkhādiparyayaiḥ samākrāṃte nare nū na tatsādhanapaṭayasī [ ] nīlavāsanayā nīlavijñānaṃ janyate yathā tathaiva pratyabhijñeyaṃ pūrvatadvāsanodbhavā [ ] tadvāsanā ca tatpūrvavāsanābalabhāvinī sāpi tadvad iti jñānavādinaḥ saṃpracakṣate [ ] teṣām apy ātmano lope saṃtānāṃtaravāsanā samudbhūtā kuto na syāt saṃjñābhedāviśeṣataḥ [ ] saṃtānaikatvasaṃsiddhir niyamāt sa kuto mataḥ pratyāsatter na saṃtānabhede py asyāḥ samīkṣaṇāt [ ] vyabhicāravinirmuktā kāryakāraṇabhāvataḥ pūrvottarakṣaṇānāṃ hi saṃtānaniyamo mataḥ [ ] sa ca buddhetarajñānakṣaṇānām api vidyate nānyathā sugatasya syāt sarvajñatvaṃ kathaṃcana [ ] svasaṃvedanam evāsya sarvajñatvaṃ yadīṣyate saṃvedanādvayāsthānād gatā saṃtānasaṃkathā [ ] kathaṃ cāvyabhicāreṇa kāryakāraṇarūpatā keṣāṃcid eva yujyeta kṣaṇānāṃ bhedavādinaḥ [ ] kālānaṃtaryamātrāc cet sarvārthānāṃ prasajyate deśānaṃtaryato py eṣā kena skaṃdheṣu paṃcasu [ ] bhāvāḥ saṃti viśeṣāc cet samānākāracetasām vibhinnasaṃtatīnāṃ vai kiṃ neyaṃ saṃpratīyate [ ] ekadravyasvabhāvatvāt kathaṃcit pūrvaparyayaḥ upādānam upādeyaś cottaro niyamāt tataḥ [ ] ekasaṃtānavartitvāt tathā niyamakalpane pūrvāparavidor vyaktam anyonyāśrayaṇaṃ bhavet [ ] kāryakāraṇabhāvasya niyamād ekasaṃtatiḥ tatas tanniyamaś ca syān nānyāto vidyate gatiḥ [ ] tasmāt svāvṛttiviśleṣaviśeṣavaśavartinaḥ puṃsaḥ pravartate svārthaikatvajñānam iti sthitam [ ] saṃtānavāsanābhedaniyamas tu kva labhyate nairātmyavādibhir na syād yenātmadravyanirṇayaḥ [ ] siddho py ātmopayogātmā yadi na syāt tadā kutaḥ śreyomārgaprajijñāsā khasyevācetanatvataḥ [ ] caitanyayogatas yasya cetanatvaṃ yadīryate khādīnām api kiṃ na syāttadyogasyāviśeṣataḥ [ ] mayi jñānam apīhedaṃ pratyayānumito nari jñānasya samavāyo sti na khādiṣv ity ayuktikam [ ] khādayo pi hi kiṃ naiva pratīyus tāvake mate jñānam asmāsv iti kvātmā jaḍas tebhyo viśeṣabhāk [ ] pratītiḥ śaraṇaṃ tatra kenāpy āśrīyate yadi tadā puṃsaś cidātmatvaṃ prasiddham avigānataḥ [ ] jñātāham iti nirrṇīteḥ kathaṃcic cetanātmatām aṃtareṇa vyavasthānāsaṃbhavāt kalaśādivat [ ] jñānavān aham ity eṣa pratyayo pi na yujyate sarvathaiva jaḍasyāsya puṃso bhimanane tathā [ ] jñānaṃ viśeṣaṇaṃ pūrvaṃ gṛhītvātmānam eva ca viśeṣyaṃ jāyate buddhir jñānavān aham ity asau [ ] tadgṛhītiḥ svato nāsti rahitasya svasaṃvidā parataś cānavasthānād iti tatpratyayaḥ kutaḥ [ ] [ ] jñānavān aham ity eṣa pratyayas tāvatoditā tadjñānāvedane py evaṃ nānavastheti kecana [ ] te pi nūnam anātmajñā jñāpyajñāpakatāvidaḥ sarvaṃ hi jñāpakaṃ jñātaṃ svayam anyasya vedakam [ ] kiṃ cāhaṃpratyayasyāsya puruṣo gocaro yadi tadā kartā sa eva syāt kathaṃ nānyasya saṃbhavaḥ [ ] svasminn eva pramotpattiḥ svapramātṛtvam ātmanaḥ prameyatvam api svasya pramitiś ceyam āgatā [ ] tathā caikasya nānātvaṃ viruddham api siddhyati na catasro vidhās teṣāṃ pramātrādiprarūpaṇāt [ ] pramiteḥ samavāyitvam ātmanaḥ kartṛtā yadi tadā nāsya prameyatvaṃ tannimittatvahānitaḥ [ ] pramāṇasahakārī hi prameyo rthaḥ pramāṃ prati nimittakāraṇaṃ prokto nātmaivaṃ svapramāṃ prati [ ] narāṃtaraprameyatvam anenāsya nivāritam kasyāpi svaprameyatve nyapramātṛtvakalpanāt [ ] bādhyā kenānavasthā syāt svapramātṛtvakalpane yathoktāśeṣadoṣānuṣaṃgaḥ kena nivāryate [ ] svasaṃvedye nare nāyaṃ doṣo 'nekāṃtavādinām nānāśaktyātmanas tasya kartṛtvādyavirodhataḥ [ ] paricchedakaśaktyā hi pramātātmā pratīyate prameyaś ca paricchedyaśaktyākāṃkṣākṣayāt sthitiḥ [ ] kartṛrūpatayā vitter aparokṣaḥ svayaṃ pumān apratyakṣaś ca karmatvenāpratīter itītare [ ] teṣām apy ātmakartṛtvaparicchedyatvasaṃbhave kathaṃ tadātmakasyāsya paricchedyatvaninhavaḥ [ ] tato bhede narasyāsya nāparokṣatvanirṇayaḥ na hi viṃdhyaparicchedye himādrar eparokṣatā [ ] bhedābhedātmakatve tu kartṛtvasya narāt katham na syāt tasya paricchedye nuḥ paricchedyatā sataḥ [ ] pratyakṣatvaṃ tato ṃśena siddhaṃ nihnutaye katham śrotriyaiḥ sarvathā cātmaparokṣatvoktadūṣaṇam [ ] bhinnasya karaṇajñānāt phalajñānāc ca dehinaḥ svayaṃ saṃviditātmatvaṃ kathaṃ vā pratipedire [ ] yadi hetuphalajñānād abhedas tasya kīrtyate parokṣetararūpatvaṃ tadā kena niṣidhyate [ ] parokṣāt karaṇajñānād abhinnasya parokṣatā pratyakṣāc ca phalajñānāt pratyakṣatvaṃ hi yujyate [ ] tathaivobhayarūpatve tasyaitaddoṣaduṣṭatā syādvādāśrayaṇaṃ cāstu kathaṃcid avirodhataḥ [ ] pratyakṣe rthaparicchede svārthākārāv abhāsini kim anyat karaṇajñānaṃ niṣphalaṃ kalpyate 'munā [ ] tasyāpi ca parokṣatve pratyakṣo rtho na siddhyati tato jñānāvasāyaḥ syāt kuto 'syāsiddhavedanāt [ ] kathaṃ cātmā svasaṃvedyaḥ saṃvittir nopagamyate yenopayogarūpo yaṃ sarveṣāṃ nāvigānataḥ [ ] kathaṃcid upayogātmā pumān adhyakṣa eva naḥ pratikṣaṇavivartādirūpeṇāsya parokṣatā [ ] svarūpaṃ cetanā puṃsaḥ sadaudāsīnyavartinaḥ pradhānasyaiva vijñānaṃ vivarta iti cāpare [ ] teṣām adhyakṣato bādhā jñānasyātmani vedanāt bhrāṃtiś cen nātmanas tena śūnyasyānavadhāraṇāt [ ] audāsīnyādayo dharmāḥ puṃsaḥ saṃsargajā iti yuktaṃ sāṃkhyapaśor vaktuṃ dhyādisaṃsargavādinaḥ [ ] sadātmānavabodhādisvabhāvaś cetanatvataḥ suṣuptāvasthavan nāyaṃ hetur vyāpyātmavādinaḥ [ ] jīvo hy acetanaḥ kāye jīvatvād bāhyadeśavat vaktum evaṃ samartho nyaḥ kiṃ na syāj jaḍajīvavāk [ ] śarīrād bahir apy eṣa cetanātmā naratvataḥ kāyadeśavad ity etatpratītyā vinivāryate [ ] tathā hi bāhyadeśe pi puṃsaḥ saṃvedanaṃ na kim kāyadeśavad eva syād viśeṣasyāpy asaṃbhavāt [ ] kāyād bahirabhivyakter abhāvāt tadavedane puṃso vyaktetarākārabhedād bhedaḥ kathaṃ na te [ ] suṣuptasyāpi vijñānasvabhāvatvaṃ vibhāvyate prabuddhasya sukhaprāptismṛtyādeḥ svapnadarśivat [ ] yathā caitanyasaṃsiddhiḥ suṣuptāv api dehinaḥ prāṇādidarśanāt tadvadbodhādiḥ kiṃ na siddhyati [ ] jāgrataḥ sati caitanye yathā prāṇādivṛttayaḥ tathaiva sati vijñāne dṛṣṭās tā bādhavarjitāḥ [ ] prāṇādayo nivartaṃte yathā caitanyavarjite vīraṇādau tathā jñānaśūnye pīti viniścayaḥ [ ] sukhabuddhyādayo dharmāś cetanārahitā ime bhaṃguratvādito vidyutpradīpādivad ity asat [ ] hetor ātmopabhogenānekāṃtāt paramārthataḥ so py anityo yataḥ siddhaḥ kādācit katvayogataḥ [ ] kādācitkaḥ parāpekṣyasadbhāvād vibhramādivat buddhyadhyavasitārthasya śabdāder upalaṃbhataḥ [ ] parāpekṣyaḥ prasiddho yam ātmano nubhavo ṃjasā parānapekṣitāyāṃ tu puṃdṛṣṭeḥ sarvadarśitā [ ] sarvasya sarvadā puṃsaḥ siddhyupāyas tathā vṛthā tato dṛgbodhayor ātmasvabhāvatvaṃ prasiddhyatu [ ] kathaṃcin naśvaratvasyāvirodhān naryapīkṣaṇāt tathaivārthakriyāsiddher anyathā vastutākṣateḥ [ ] saṃsāravyādhividhvaṃsaḥ kvaci jjīve bhaviṣyati tannidānaparidhvaṃsasiddher jvaravināśavat [ ] tatparidhvaṃsanenātaḥ śreyasā yokṣyamāṇatā puṃsaḥ syādvādināṃ siddhā naikāṃte tadvirodhataḥ [ ] kālādilabdhyupetasya tasya śreyaḥpathe bṛhat pāpāpāyāc ca jijñāsā saṃpravarteta rogivat [ ] tadvān eva yathoktātmā pratipādyo mahātmanām iti yuktaṃ munīṃdrāṇām ādisūtrapravartanam [ ] nanu nirvāṇajijñāsā yuktā pūrvaṃ tadarthinaḥ parijñāte bhyupeye rthe tanmārgo jñātum iṣyate [ ] tan na prāyaḥ parikṣīṇakalmaṣasyāsya dhīmataḥ svātmopalabdhirūpe smin mokṣe saṃpratipattitaḥ [ ] pravādikalpanābhedād vivādo yo pi saṃbhavī sa puṃrūpe tadādhārapadārthe vā na nirvṛtau [ ] ye pi sarvātmanā mukter apahnavakṛto janāḥ teṣāṃ nātrādhikāro sti śreyomārgāvabodhane [ ] parokṣam api nirvāṇam āgamāt saṃpratīyate nirbādhād bhāvisūryādigrahaṇākārabhedavat [ ] śārīramānasāsātapravṛttir vinivartate kvacit tatkāraṇābhāvād ghaṭīyaṃtrapravṛttivat [ ] na kuṃbhakāracakrādibhrāṃtyānaikāṃtasaṃbhavaḥ tatkāraṇasya vegasya bhāve tasyāḥ samudbhavāt [ ] ato numānato py asti mokṣasāmānyasādhanam sārvajñādiviśeṣas tu tatra pūrvaṃ prasādhitaḥ [ ] evaṃ sādhīyasī sādhoḥ prāg evāsann anirvṛteḥ nivāṇopāyajijñāsā tatsūtrasya pravartikā [ ] praṇidhānaviśeṣotthadvaividhyaṃ rūpam ātmanaḥ yathāsthitārthaśraddhānaṃ samyagdarśanam uddiśet [ ] svārthākāraparicchedo niścito bādhavarjitaḥ sadā sarvatra sarvasya samyagjñānam anekadhā [ ] bhavahetuprahāṇāya bahirabhyantarakriyā vinivṛttiḥ paraṃ samyakcāritraṃ jñānino matam [ ] niḥśeṣakarmanirmokṣaḥ svātmalābho 'bhidhīyate mokṣo jīvasya nābhāvo na guṇābhāvamātrakam [ ] svābhipretapradeśāpter upāyo nirupadravaḥ sadbhiḥ praśasyate mārgaḥ kumārgo nyo vagamyate [ ] tatra bhedavivakṣāyāṃ svavivartavivartinoḥ darśanaṃ jñānam ity eṣaḥ śabdaḥ karaṇasādhanaḥ [ ] puṃso vivartamānasya śraddhānajñānakarmaṇā svayaṃ tacchaktibhedasya sāvidhyena pravartanāt [ ] karaṇatvaṃ na bādhyeta vanher dahanakarmaṇā svayaṃ vivartamānasya dāhaśaktiviśeṣavat [ ] nanv evam ātmano jñānaśaktau jñānadhvanir yadi tadārthagrahaṇaṃ naiva karaṇatvaṃ prapadyate [ ] śaktiḥ kārye hi bhāvānāṃ sānnidhyaṃ sahakāriṇaḥ sā bhinnā tadvato tyaṃtaṃ kāryataś ceti kaścana [ ] tasyārthagrahaṇe śaktir ātmanaḥ kathyate katham bhedādarthāṃtarasyeva saṃbaṃdhāt so pi kas tayoḥ [ ] saṃyogo dravyarūpāyāḥ śakter ātmani manyate guṇakarmasvabhāvāyāḥ samavāyaś ca yady asau [ ] tadāpy arthāṃtaratve sya saṃbaṃdhasya kathaṃ nijāt saṃbaṃdhino vadhāryeta tatsaṃbaṃdhasvabhāvatā [ ] saṃbaṃdhāṃtarataḥ sā ced anavasthā mahīyasī gatvā sudūram apy aikyaṃ vācyaṃ saṃbaṃdhatadvatoḥ [ ] tathā sati na sā śaktis tadvato tyaṃtabhedinī saṃbaṃdhābhinnasaṃbaṃdhirūpatvāt tatsvarūpavat [ ] saṃyogo yutasiddhānāṃ padārthānāṃ yadīṣyate samavāyas tadā prāptaḥ saṃyogas tāvake mate [ ] yutasiddhir hi bhāvānāṃ vibhinnāśrayavṛttitā dadhikuṃḍādivat sā ca samānā samavāyiṣu [ ] tadvadvṛttir guṇādīnāṃ svāśrayeṣu ca tadvatām yutasiddhir yadā na syāt tadānyatrāpi sā katham [ ] laukiko deśabhedaś ced yutasiddhiḥ parasparam prāptā rūparasādīnām ekatrāyutasiddhatā [ ] vibhūnāṃ ca samastānāṃ samavāyas tathā na kim kathaṃcid arthatādātmyān nāviṣvagbhavanaṃ param [ ] tad evābādhitajñānam ārūḍhaṃ śaktitadvatoḥ sarvathā bhedam āhaṃti pratidravyam anekadhā [ ] tato rthagrahaṇākārā śaktir jñānam ihātmanaḥ karaṇatvena nirdiṣṭā na viruddhā kathaṃcana [ ] ātmā cārthagrahākārapariṇāmaḥ svayaṃ prabhuḥ jñānam ity abhisaṃdhānakartṛsādhanatā matā [ ] tasyodāsīnarūpatvavivakṣāyāṃ nirucyate bhāvasādhanatā jñānaśabdādīnām abādhitā [ ] tathā cāritraśabdo pi jñeyaḥ karmānusādhanaḥ kārakāṇāṃ vivakṣātaḥ pravṛtter ekavastuni [ ] vivakṣā ca pradhānatvād vāsturūpasya kasyacit tadā tadanyarūpasyāvivakṣā guṇabhāvataḥ [ ] bhāvasya vāsato nāsti vivakṣā cetarāpi vā pradhānetaratāpāyād gaganāṃbhoruhādivat [ ] sarvathaiva sato nena tadabhāvo niveditaḥ ekarūpasya bhāvasya rūpadvayavirodhataḥ [ ] vivakṣā cāvivakṣā ca viśeṣye naṃtadharmiṇi sato viśeṣaṇasyātra nāsataḥ sarvathoditā [ ] svābhipretārthasaṃprāptihetor atra pradhānatā bhāvasya viparītasya niścīyetāpradhānatā [ ] naivātaḥ kalpanāmātravaśato sau pravartitā vastusāmarthyasaṃbhūtanutvād arthadṛṣṭivat [ ] niraṃśasya ca tattvasya sarvathānupapattitaḥ naikasya bādhyate 'nekakārakatvaṃ kathaṃcana [ ] pūrvaṃ darśanaśabdasya prayogo 'bhyārhitatvataḥ alpākṣarād api jñānaśabdād dvaṃdvo tra saṃmataḥ [ ] jñānasamyaktvahetutvād abhyarho darśanasya hi tadabhāve tadudbhūter abhāvād dūrabhavyavat [ ] viśiṣṭajñānataḥ pūrvabhāvāc cāsyāstu pūrvavāk tathaiva jñānaśabdasya cāritrāt prāk pravartanam [ ] pratyekaṃ samyag ity etatpadaṃ parisamāpyate darśanādiṣu niḥśeṣaviparyāsanivṛttaye [ ] tatsamyagdarśanādīni mokṣamārgo viśeṣataḥ sūtrakāramatārūḍho na tu sāmānyataḥ sthitaḥ [ ] kālāder api taddhetusāmānyasyāvirodhataḥ sarvakāryajanau tasya vyāpārād anyathāsthiteḥ [ ] pūrvāvadhāraṇaṃ tena kāryaṃ nānyāvadhāraṇam yathaiva tāni mokṣasya mārgas tadvad dhi saṃvadaḥ [ ] pūrvāvadhāraṇe pyatra tapo mokṣasya kāraṇam na syād iti na maṃtavyaṃ tasya caryātmakatvataḥ [ ] nanu ratnatrayasyaiva mokṣahetutvasūcane kiṃ vārhataḥ kṣaṇād ūrdhvaṃ muktiṃ saṃpādayen na tat [ ] sahakāriviśeṣasyāpekṣaṇīyasya bhāvinaḥ tadaivāsattvato neti sphuṭaṃ kecit pracakṣate [ ] sa tu śaktiviśeṣaḥ syāj jīvasyāghātikarmaṇām nāmādīnāṃ trayāṇāṃ hi nirjarākṛd dhi niścitaḥ [ ] kṣāyikatvān na sāpekṣam arhad ratnatrayaṃ yadi kin na kṣīṇakaṣāyasya dṛkcāritre tathā mate [ ] kevalāpekṣiṇī te hi yathā tadvac ca tattrayam sahakārivyapekṣaṃ syāt kṣāyikatve napekṣitā [ ] na ca tena virudhyeta traividhyaṃ mokṣavartmanaḥ viśiṣṭakālayuktasya tattrayasyaiva śaktitaḥ [ ] tenāyogijinasyāṃtyakṣaṇavarti prakīrtitam ratnatrayam aśeṣāghavighātakaraṇaṃ dhruvam [ ] tato nānyo sti mokṣasya sākṣān mārgo viśeṣataḥ pūrvāvadhāraṇaṃ yena na vyavasthām iyarti naḥ [ ] jñānād evāśarīratvasiddhir ity avadhāraṇam sahakāriviśeṣasyāpekṣayāstv iti kecana [ ] teṣāṃ phalopabhogena prakṣayaḥ karmaṇāṃ mataḥ sahakāriviśeṣo sya nāsau cāritrataḥ pṛthak [ ] bhoktuḥ phalopabhogo hi yathākālaṃ yadīṣyate tadā karmakṣayaḥ kvātaḥ kalpakoṭiśatair api [ ] viśiṣṭopakramād eva mataś cet so pi tattvataḥ samādhir eva saṃbhāvyaś cāritrātmeti no matam [ ] samyagjñānaṃ viśiṣṭaṃ cet samādhiḥ sā viśiṣṭatā tasya karmaphaladhvaṃsaśaktir nāmāṃtaraṃ nanu [ ] mithyābhimānanirmuktir jñānasyeṣṭaṃ hi darśanam jñānatvaṃ cārthavijñāptiś caryātvaṃ karmahaṃtṛtā [ ] śaktitrayātmakād eva samyagjñānād adehatā siddhā ratnatrayād eva teṣāṃ nāmāṃtaroditāt [ ] etena jñānavairāgyān muktiprāptyavadhāraṇam na syādvādavighātāyety uktaṃ boddhavyam aṃjasā [ ] na cātra sarvathaikatvaṃ jñānadarśanayos tathā kathaṃcid bhedasaṃsiddhir lakṣaṇādiviśeṣataḥ [ ] tata eva na cāritraṃ jñānaṃ tādātmyam ṛcchati paryāyārthapradhānatvavivakṣāto muner iha [ ] dravyārthasya pradhānatvavivakṣāyāṃ tu tattvataḥ bhaved ātmaiva saṃsāro mokṣas taddhetur eva ca [ ] tathā ca sūtrakārasya kva tadbhedopadeśanā dravyārthasyāpy aśuddhasyāvāṃtarābhedasaṃśrayāt [ ] kālābhedād abhinnatvaṃ tayor ekāṃtato yadi tadaikakṣaṇavṛttīnām arthānāṃ bhinnatā kutaḥ [ ] deśābhedād abhedaś cet kālākāśādibhinnatā sāmānādhikaraṇyāc cet tata evāstu bhinnatā [ ] sāmānādhikaraṇyasya kathaṃcid bhidayā vinā nīlatotpalatādīnāṃ jātu kvacid adarśanāt [ ] mithyāśraddhānavijñānacaryāvicchittilakṣaṇam kāryaṃ bhinnaṃ dṛgādīnāṃ naikāṃtābhidi saṃbhavi [ ] dṛṅmohavigamajñānāvaraṇadhvaṃsavṛttamuṭ saṃkṣayātmakahetoś ca bhedas tadbhidi siddhyati [ ] teṣāṃ pūrvasya lābhe pi bhājyatvād uttarasya ca naikāṃtenaikatā yuktā harṣāmarṣādibhedavat [ ] tattvaśraddhānalābhe hi viśiṣṭaṃ śrutam āpyate nāvaśyaṃ nāpi tallābhe yathākhyātam amohakam [ ] nanv evam uttarasyāpi lābhe pūrvasya bhājyatā prāptā tato na teṣāṃ syāt saha nirvāṇahetutā [ ] tatropādīyasaṃbhūter ūpādānāstitā gateḥ kaṭādikāryasaṃbhūtes tadupādānasattvavat [ ] upādeyaṃ hi cāritraṃ pūrvajñānasya vīkṣate tadbhāvabhāvitādṛṣṭes tadvajjñānadṛśo matam [ ] nanūpādeyasaṃbhūtir upādānopamardanāt dṛṣṭeti nottarodbhūtau pūrvasyāstitvasaṃgatiḥ [ ] satyaṃ kathaṃcid iṣṭatvāt prāṅāśasyottarodbhave sarvathā tu na tannāśaḥ kāryotpattivirodhataḥ [ ] jñānotpattau hi saddṛṣṭis tadviśiṣṭo pajāyate pūrvāviśiṣṭarūpeṇa naśyatīti suniścitam [ ] cāritrotpattikāle ca pūrvadṛgjñānayoś cyutiḥ caryāviśiṣṭayor bhūtis tatsakṛttrayasaṃbhavaḥ [ ] nanv atra kṣāyikī dṛṣṭir jñānotpattau na naśyati tadaparyaṃtatāhāner ity asiddhāṃtavidvacaḥ [ ] siddhānte kṣāyikatvena tadaparyantatoktitaḥ sarvathā tadavidhvaṃse kauṭasthyasya prasaṅgataḥ [ ] tathotpādavyayadhrauvyayuktaṃ sad iti hīyate pratikṣaṇamato bhāvaḥ kṣāyiko pi trilakṣaṇaḥ [ ] pūrvottarakṣaṇopādhisvabhāvakṣayajanmanoḥ kṣāyikatvenāvasthāne sa yathaiva trilakṣaṇaḥ [ ] tathā hetvantaronmuktayuktarūpeṇa vicyutau jātau ca kṣāyikatvena sthitau kimu na tādṛśaḥ [ ] kāraṇaṃ yadi saddṛṣṭiḥ sadbodhasya tadā na kim tadanantaram utpādaḥ kevalasyeti kecana [ ] tadasattatpratidvaṃdvikarmābhāve tatheṣṭitaḥ kāraṇaṃ hi svakāryasyāpratibaṃdhiprabhāvakam [ ] sadbodhapūrvakatve pi cāritrasya samudbhavaḥ prāg eva kevalān na syād ity etac ca na yuktimat [ ] samucchinnakriyasyāto dhyānasyāvinivartinaḥ sākṣātsaṃsāravicchedasamarthasya prasūtitaḥ [ ] yathaivāpūrṇacāritram apūrṇajñānahetukam tathā tat kin na saṃpūrṇaṃ pūrṇajñānanibaṃdhanam [ ] prāg eva kṣāyikaṃ pūrṇaṃ kṣāyikatvena kevalāt na tv aghātipratidhvaṃsikaraṇopetarūpataḥ [ ] tadrūpāvaraṇaṃ karma navamaṃ na prasajyate cāritramohanīyasya kṣayād eva tadudbhavāt [ ] kṣīṇamohasya kiṃ na syād evaṃ tad iti cen na vai tadā kālaviśeṣasya tādṛśo 'sambhavitvataḥ [ ] tathā kevalabodhasya sahāyasyāpy asaṃbhavāt svasāmagrayā vinā kāryaṃ na hi jātucid īkṣyate [ ] kṣīṇe pi mohanīyākhye karmaṇi prathamakṣaṇe yathā kṣīṇakaṣāyasya śaktir antyakṣaṇe matā [ ] jñānāvṛtyādikarmāṇi haṃtuṃ tadvadayoginaḥ paryaṃtakṣaṇa eva syāc chepakarmakṣaye 'py asau [ ] kālāpekṣitayā vṛttam asamarthaṃ yadīṣyate dvyādisiddhakṣaṇotpāde tadantyaṃ tādṛg ity asat [ ] prācyasiddhakṣaṇotpādāpekṣayā mokṣavartmani vicāraprastuter evaṃ kāryakāraṇatāsthiteḥ [ ] tato mohakṣayopetaḥ pumān udbhūtakevalaḥ viśiṣṭakāraṇaṃ sākṣādaśarīratvahetunā [ ] ratnatritayarūpeṇāyogakevalino ṃtime kṣaṇe vivartate hy etad abādhyaṃ niścitān nayāt [ ] vyavahāranayāśrityā tv etat prāg eva kāraṇam mokṣasyeti vivādena paryāptaṃ tattvavedinām [ ] saṃsārakāraṇatritvāsiddher nirvāṇakāraṇe tritvaṃ naivopapadyetety acodyaṃ nyāyadarśinaḥ [ ] ādyasūtrasya sāmarthyād bhavahetos trayātmanaḥ sūcitasya pramāṇena bādhanānavatārataḥ [ ] maulo hetur bhavasyeṣṭo yeṣāṃ tāvad viparyayaḥ teṣām udbhūtabodhasya ghaṭate na bhavasthitiḥ [ ] saṃsāre tiṣṭhatas tasya yadi kaścid viparyayaḥ saṃbhāvyate tadā kin na doṣādis tannibaṃdhanaḥ [ ] tathā sati kuto jñānī vītadoṣaḥ pumān paraḥ tattvopadeśasaṃtānahetuḥ syād bhavadādiṣu [ ] vitathāgraharāgādiprādurbhāvanaśaktibhṛt maulo viparyayo nāṃtya iti kecit prapedire [ ] teṣāṃ prasiddha evāyaṃ bhavahetus trayātmakaḥ śaktitrayātmatāpāye bhavahetutvahānitaḥ [ ] tato mithyāgrahāvṛttaśaktiyukto viparyayaḥ mithyārthagrahaṇākāro mithyātvādibhidoditaḥ [ ] tathā viparyayajñānāsaṃyamātmā vibudhyatām bhavahetur atattvārthaśraddhāśaktis trayātmakaḥ [ ] mithyādṛgādihetuḥ syāt saṃsāras tadapakṣaye kṣīyamāṇatvato vātavikārādijarogavat [ ] tadvipakṣasya nirvāṇakāraṇasya trayātmatā prasiddhaivam ato yuktā sūtrakāropadeśanā [ ] baṃdhapratyayapāṃcadhyasūtraṃ na ca virudhyate pramādāditrayasyāṃtarbhāvāt sāmānyato 'yame [ ] viśeṣataḥ punas tasyācāritrāṃtaḥpraveśane pramattasaṃyatādīnām aṣṭānāṃ syād asaṃyamaḥ [ ] tathā ca sati siddhāṃtavyāghātaḥ saṃyatatvataḥ mohadvādaśakadhvaṃsāt teṣām ayam ahānitaḥ [ ] nanv evaṃ paṃcadhā baṃdhahetau sati viśeṣataḥ prāpto nirvāṇamārgo pi tāvaddhā tannivartakaḥ [ ] tad etadanukūlaṃ naḥ sāmarthyāt samupāgatam baṃdhapratyayasūtrasya pāṃcadhyaṃ mokṣavartmanaḥ [ ] samyagbodhasya saddṛṣṭāv aṃtarbhāvāt tv adarśane mithyājñānavad evāsya bhede ṣoḍho bhayaṃ matam [ ] tatra mithyādṛśo baṃdhaḥ samyagdṛṣṭyā nivartyate kucāritrād viratyaiva pramādād apramādataḥ [ ] kaṣāyād akaṣāyeṇa yogāc cāyogataḥ kramāt tenāyogaguṇān mukteḥ pūrvaṃ siddhā jinasthitiḥ [ ] sāmagrī yāvatī yasya janikā saṃpratīyate tāvatī nātivartyaiva mokṣasyāpīti kecana [ ] eteṣām apy anekāṃtāśrayaṇe śreyasī matiḥ nānyathā sarvathaikāṃte baṃdhahetvādyayogataḥ [ ] nityatvaikāṃtapakṣe hi pariṇāmanivṛttitaḥ nātmā baṃdhādihetuḥ syāt kṣaṇaprakṣayicittavat [ ] na cātmano guṇo bhinnas tadasaṃbaṃdhataḥ sadā tatsaṃbaṃdhe kadācit tu tasya naikāṃtanityatā [ ] guṇāsaṃbaṃdharūpeṇa nāśād guṇayutātmanā prādurbhāvāc cidāditvasthānāt tryātmatvasiddhitaḥ [ ] yad vinaśyati tadrūpaṃ prādurbhavati tatra yat tad evānityamātmā tu tadbhinno nitya ity api [ ] na yuktaṃ naśvarotpitsurūpādhikaraṇātmanā kādācitkatvatas tasya nityatvaikāṃtahānitaḥ [ ] nānādharmāśrayatvasya gauṇatvād ātmanaḥ sadā sthāsnuteti na sādhīyaḥ satyāsatyātmatābhidaḥ [ ] asatyātmakatāsattve sattve satyātmatātmanaḥ siddhaṃ sadasadātmatvam anyathā vastutākṣatiḥ [ ] kṣaṇakṣaye pi naivāsti kāryakāraṇatāṃjasā kasyacit kvacid atyaṃtāvyāpārād acalātmavat [ ] anvayavyatirekādyo yasya dṛṣṭo nuvartakaḥ sa taddhetur iti nyāyas tadekāṃte na saṃbhavī [ ] tatra hetāv asaty eva kāryotpāde nvayaḥ kutaḥ vyatirekaś ca saṃvṛttyā tau cet kiṃ pāramārthikam [ ] tathā sati na baṃdhādihetusiddhiḥ kathaṃcana satyānekāṃtavādena vinā kvacid iti sthitam [ ] satyam advayam evedaṃ svasaṃvedanam ity asat tadvyavasthāpakābhāvāt puruṣādvaitatattvavat [ ] na ca svataḥ sthitis tasya grāhyagrāhakatekṣaṇāt sarvadā nāpi tadbhrāṃtiḥ satyasaṃvittyasaṃbhavāt [ ] yathaivārāmavibhrāṃtau puruṣādvaitasatyatā tatsatyatve ca taddhāṃtir ity anyonyasamāśrayaḥ [ ] tathā vedyādivibhrāṃtau vedakādvaitasatyatā tatsatyatve ca tadbhrāṃtir ity anyonyasamāśrayaḥ [ ] vivādagocaro vedyādyākāro bhrāṃtabhāsajaḥ atha svapnādiparyāyākāravad yadi vṛttayaḥ [ ] vibhrāṃtyā bhedam āpanno vicchedo vibhramātmakaḥ vicchedatvād yathā svapnaviccheda iti siddhyatu [ ] nityaṃ sarvagataṃ brahma nirākāram anaṃśakam kāladeśādivicchedabhrāṃtatve 'kalayaddvayam [ ] nityādirūpasaṃvitter abhāvāt tadasaṃbhave paramārthātmatāvitter abhāvād etad apy asat [ ] na nityaṃ nāpy anityatvaṃ sarvagatvam asarvagam naikaṃ nānekam athavā svasaṃvedanam eva tat [ ] samastaṃ tadvaco nyasya tan nādvaitaṃ kathaṃcana sveṣṭetaravyavasthānapratikṣepāprasiddhitaḥ [ ] nanv anādir avidyeyaṃ sveṣṭetaravibhāgakṛt satyetareva duḥpārā tāmāśritya parīkṣaṇā [ ] sarvasya tattvanirṇīteḥ pūrvaṃ kiṃ cānyathā sthitiḥ eṣa pralāpa evāsya śūnyopaplavavādivat [ ] kiṃcin nirṇītam āśritya vicāro nyatra vartate sarvavipratipattau hi kvacin nāsti vicāraṇā [ ] tatreṣṭaṃ yasya nirṇītaṃ pramāṇaṃ tasya vastutaḥ tadaṃtareṇa nirṇītes tatrāyogād aniṣṭavat [ ] tatsvasaṃvedanaṃ tāvad yady upeyeta kenacit saṃvādakatvatas tdvadakṣaliṃgādivedanam [ ] pramāṇān niścitād eva sarvatrāstu parīkṣaṇam sveṣṭetaravibhāgāya vidyā vidyopagāminām [ ] yasyāpīṣṭaṃ na nirṇītaṃ kvāpi tasya na saṃśayaḥ tadabhāve na yujyaṃte paraparyanuyuktayaḥ [ ] om iti bruvataḥ siddhaṃ sarvaṃ sarvasya vāṃchitam kvacit paryanuyogasyāsaṃbhavāt tannirākulam [ ] śūnyopaplavavāde pi nānekāṃtād vinā sthitiḥ svayaṃ kvacid aśūnyasya svīkṛter anupaplute [ ] śūnyatāyāṃ hi śūnyatvaṃ jātucin nopagamyate tathopaplavanaṃ tattvopaplave pītaratra tat [ ] grāhyagrāhakataitena bādhyabādhakatāpi vā kāryakāraṇatādir vā nāsty eveti nirākṛtam [ ] grāhyagrāhakaśūnyatvaṃ grāhyaṃ tadgrāhakasya cet grāhyagrāhakabhāvaḥ syād anyathā tadaśūnyatā [ ] bādhyabādhakabhāvo pi bādhyate yadi kenacit bādhyabādhakabhāvo sti no cet kasya nirākṛtiḥ [ ] kāryāpāye na vastutvaṃ saṃvinmātrasya yujyate kāraṇasyātyaye tasya sarvadā sarvathā sthitiḥ [ ] vācyavācakatāpāyo vācyaś cet tadvyavasthitiḥ parāvabodhanopāyaḥ ko nāma syād ihānyathā [ ] saṃvṛttyā svapnavat sarvaṃ siddham ity ativismṛtam niḥśepārthakriyāhetoḥ saṃvṛter vastutāptitaḥ [ ] yad evārthakriyākāri tad eva paramārthasat sāṃvṛtaṃ rūpam anyat tu saṃvinmātram avastu sat [ ] saṃvṛtaṃ cet kva nāmārthakriyākāri ca tanmatam hataṃ siddhaṃ kathaṃ sarvaṃ saṃvṛttyā svapnavat tava [ ] svapnasiddhaṃ hi no siddham asvapnaḥ ko 'paro nyathā saṃtoṣakṛn na vai svapna saṃtoṣaṃ na prakalpate [ ] vastuny api na saṃtoṣo dveṣāt tad iti kasyacit avastuny api rāgāt syād ity asvapno stv abādhitaḥ [ ] bādhyamānaḥ punaḥ svapno nānyathā tadbhidekṣyate svataḥ kvacid abādhyatvaniścayaḥ parato pi vā [ ] kāraṇadvyasamārthyāt saṃbhavann anubhūyate parasparāśrayaṃ tatrānavasthāṃ ca pratikṣipet [ ] tato na niścitānmānād vinā tattvaparīkṣaṇam jñāne yenādvaye śūnye nyatra vā tat pratanyate [ ] pramāṇāsaṃbhavād yatra vastumātram asaṃbhavi mithyaikāṃteṣu kā tatra baṃdhahetvādisaṃkathā [ ] syādvādināmato yuktaṃ yasya yāvat pratīyate kāraṇaṃ tasya tāvat syād iti vaktum asaṃśayam [ ] samyakśabde praśaṃsārthe dṛśāvālocanasthitau na samyagdarśanaṃ labhyam iṣṭam ity āha lakṣaṇam [ ] sūtrakāro 'tra tattvārthaśraddhānam iti darśanam dhātvanekārthavṛttitvād dṛśeḥ śraddhārthatāgateḥ [ ] arthagrahaṇato narthaddhānaṃ vinivāritam kalpitārthavyavacchedo rthasya tattvaviśeṣaṇāt [ ] lakṣaṇasya tato nātivyāptir dṛgmohavarjitam puṃrūpaṃ tad iti dhvastā tasyāvyāptir api sphuṭam [ ] yat tvenāvasthito bhāvas tattvenaivāryamāṇakaḥ tattvārthaḥ sakalo nyas tu mithyārtha iti gamyate [ ] mohārekaviṣaryāsavicchedāt tatra darśanam samyag ity abhidhānāt tu jñānam apy evam īritam [ ] sāmarthyādādisūtre tanniruktyā lakṣitaṃ yataḥ cāritravat tato noktaṃ jñānāder lakṣaṇaṃ pṛthak [ ] yathā pāvakaśabdasyoccāraṇāt saṃpratīyate tadarthalakṣaṇaṃ tadvajjñānacāritraśabdanāt [ ] jñānādilakṣaṇaṃ tasya siddher yatnāṃtaraṃ vṛthā śabdārthāvyabhicāreṇa na pṛthaglakṣaṇaṃ kvacit [ ] icchā śraddhānam ity eke tad ayuktam amohinaḥ śraddhānavirahāśakter jñānacāritrahānitaḥ [ ] nirdeśālpabahutvādiciṃtanasyāvirodhataḥ śraddhāne jīvarūpe smin na doṣaḥ kaścid īkṣyate [ ] sarāge vītarāge ca tasya saṃbhavato ṃjasā praśamāder abhivyaktiḥ śuddhimātrāc ca cetasaḥ [ ] pradhānasya vivarto 'yaṃ śraddhānākhya itītare tad asat puṃsi samyaktvabhāvāsaṃgāt tato pare [ ] pradhānasyaiva samyaktvāc caitanyaṃ samyag iṣyate buddhyadhyavasitārthasya puṃsā saṃcetanād yadi [ ] tadāhaṃkārasamyaktvāt buddheḥ samyaktvam aśrute ahaṃkārāspadārthasya tathāpy adhyavasānataḥ [ ] manaḥsamyaktvataḥ samyagahaṃkāras tathā na kim manaḥsaṃkalpitārtheṣu tatpravṛttiprakalpanāt [ ] tathaiveṃdriyasamyaktvān manaḥ samyagupeyatām iṃdriyālocitārtheṣu manaḥsaṃkalpanodayāt [ ] iṃdriyāṇi ca samyañci bhavaṃtu paratas tava svābhivyaṃjakasamyaktvādibhiḥ samyaktvataḥ kimu [ ] arthasvavyaṃjakādhīnaṃ mukhyaṃ samyaktvam iṣyate iṃdriyādiṣu tadvat syāt puṃsi tatparamārthataḥ [ ] na ca pradhānadharmatvaṃ śraddhānasya cidātmanaḥ caitanyasyaiva saṃsiddhyed anyathā syād viparyayaḥ [ ] na śraddhatte pradhānaṃ vā jaḍatvāt kalaśādivat pratītyāśrayaṇe tvātmā śraddhātās tu nirākulam [ ] na samyagdarśanaṃ nityaṃ nāpi tannityahetukam nāhetukam iti prāha dvidhā tajjanmakāraṇam tena nānāditā tasya sarvadotpattir eva vā nityaṃ tatsatvasaṃbaddhāt prasajyetāviśeṣataḥ [ ] nisargād iti nirdeśo hetāvadhigamād iti tacchabdena parāmṛṣṭaṃ samyagdarśanamātrakam [ ] vinā paropadeśena tattvārthapratibhāsanam nisargo dhigamas tena kṛtaṃ tad iti niścayaḥ [ ] tato nāpratibhāte rthe śraddhānam anuṣajyate nāpi sarvasya tasyeha pratyayo dhigamo bhavet [ ] aṃtardarśanamohasya bhavyasyopaśame sati tatkṣayopaśame vāpi kṣaye vā darśanodbhavaḥ [ ] bahiḥ kāraṇāsākalye py asyotpatter apīkṣaṇāt kadācid anyathā tasyānupapatter iti sphuṭam [ ] pāpāpāyād bhavaty eṣa viparītagrahakṣayaḥ puṃso dharmaviśeṣād vety anye saṃpratipedire [ ] dṛgmohas tu kvacij jātu kasyacin nuḥ praśāmyati pratipakṣyaviśeṣasya saṃpattes timirādivat [ ] kṣayopaśamam āyāti kṣayaṃ vā tata eva saḥ tadvad eveti tattvārthaśraddhānaṃ syāt svahetutaḥ [ ] pratipakṣaviśeṣo pi dṛṅmohasyāsti kaścana jīvavyāmohahetutvād unmattakarasādivat [ ] sa ca dravyaṃ bhavet kṣetraṃ kālo bhāvo pi vāṃginām mohahetusapatnatvād viṣādipratipakṣavat [ ] tatsaṃpatsaṃbhavo yeṣāṃ te pratyāsann amuktayaḥ bhavyās tataḥ pareṣāṃ tu tatsaṃpattir na jātucit [ ] samyagdarśanaśakter hi bhedābhāve pi dehinām saṃbhavetarato bhedas tadvyakteḥ kanakāśmavat [ ] kiṃ tattvaṃ nāma yenāryamāṇas tattvārtha iṣyate ity aśeṣavivādānāṃ nirāsāyāha sūtrakṛt sapta jīvādayas tattvaṃ na prakṛtyādayo 'pare śraddhānaviṣayā jñeyā mumukṣor niyamād iha [ ] tathā cānaṃtaparyāyaṃ dravyam ekaṃ na sūcitam tattvaṃ samāsato nāpi tadanaṃtaṃ prapaṃcataḥ [ ] madhyamoktyāpi taddvyādibhedena bahudhā sthitam nātaḥ saptavidhā tattvād vineyāpekṣitāt param [ ] mokṣas tāvad vineyena śraddhātavyas tadarthinā baṃdhaś ca nānyathā tasya tadarthitvaṃ ghaṭāmaṭet [ ] āsravo pi ca baṃdhasya hetuḥ śraddhīyate na cet kvāhetukasya baṃdhasya kṣayo mokṣaḥ prasiddhyati [ ] baṃdhahetunirodhaś ca saṃvaro nirjarā kṣayaḥ pūrvopāttasya baṃdhasya mokṣahetus tadāśrayaḥ [ ] jīvo 'jīvaś ca baṃdhaś ca dviṣṭhatvāt tatkṣayasya ca śraddheyo nānyadāphalyād iti sūtrakṛtāṃ matam [ ] puṇyapāpapadārthau tu baṃdhāsravavikalpagau śraddhātavyau na bhedena saptabhyo tiprasaṃgataḥ [ ] baṃdho mokṣas tayor hetū jīvājīvau tadāśrayau nanu sūtre ṣaḍ evaite vācyāḥ sārvatvavādinā [ ] satyaṃ kiṃ tv āśrayasyaiva baṃdhahetutvasaṃvide mithyādṛgādibhedasya vaco yuktaṃ parisphuṭam [ ] mokṣasaṃpādike cokte samyak saṃvaranirjare ratnatrayādṛte nyasya mokṣahetutvahānaye [ ] tenānāgatabaṃdhasya hetudhvaṃsād vimucyate saṃcitasya kṣayād veti mithyāvādo nirākṛtaḥ [ ] saṃcitasya svayaṃ nāśād eṣyadbaṃdhasya rodhakaḥ ekaḥ kaścid anuṣṭheya ity eke tadasaṃgatam [ ] nirhetukasya nāśasya sarvathānupapattitaḥ kāryotpādavad anyatra visrasā pariṇāmataḥ [ ] yataś cānāgatāghaughanirodhaḥ kriyate 'munā tata eva kṣayaḥ pūrvapāpaudhasyehetukaḥ [ ] sann apy asau bhavaty eva mokṣahetuḥ sa saṃvaraḥ tayor anyatarasyāpi vaikalye muktyayogataḥ [ ] etena saṃcitāśeṣakarmanāśe vimucyate bhaviṣyatkarmasaṃrodhāpāye pīti nirākṛtam [ ] evaṃ prayojanāpekṣāviśeṣād āsravādayaḥ nirdiśyaṃte munīśena jīvājīvātmakā api [ ] jīvādīnām iha jñeyaṃ lakṣaṇaṃ vakṣyamāṇakam tatpadānāṃ niruktiś ca yathārthānatilaṃghanāt [ ] kramo hetuviśeṣāt syād dvaṃdvavṛttāv iti sthiteḥ jīvaḥ pūrvaṃ vinirdiṣṭas tadarthatvād vacovidheḥ [ ] tadupagrahahetutvād ajīvas tadanaṃtaram tadāśrayatvatas tasmād āsravaḥ parataḥ sthitaḥ [ ] baṃdhaś cāsravakāryatvāt tadanaṃtaram īritaḥ tatpratidhvaṃsahetutvād ajīvas tadanaṃtaram [ ] saṃvare sati saṃbhūter nirjarāyās tataḥ sthitiḥ tasyāṃ mokṣa iti proktas tadanaṃtaram eva saḥ [ ] tasya bhāvo bhavet tattvaṃ sāmānyād ekam eva tat tatsamānāśrayatvena jīvādīnāṃ bahutvavāk [ ] bhāvasya tadvato bhedāt kathaṃcin na virudhyate vyaktīnāṃ ca bahutvasya khyāpanārthatvataḥ sadā [ ] jīvatvaṃ tattvam ityādi pratyekam upavarṇyate tatas tenāryamāṇo 'yaṃ tattvārthaḥ sakalo mataḥ [ ] jīva evātra tattvārtha iti kecit pracakṣate tadayuktam ajīvasyābhāve tatsiddhyayogataḥ [ ] parārthā jīvasiddhir hi teṣāṃ syādvacanātmikā ajīvo vacanaṃ tasya nānyathānyena vedanam [ ] na jīvā bahavaḥ saṃti pratipādyapratipādakāḥ bhrāṃter anyatra māyādidṛṣṭajīvavad ity asat [ ] advayasyāpi jīvasya vibhrāṃtatvānuṣaṃgataḥ eko 'ham iti saṃvitteḥ svapnādau bhramadarśanāt [ ] vyabhicāravinirmukteḥ saṃvinmātrasya sarvadā na bhrāṃtateti cet siddhā nānāsaṃtānasaṃvidaḥ [ ] yathaiva mama saṃvittimātraṃ satyaṃ vyavasthitam svasaṃvedanasaṃvādāt tathānyeṣām asaṃśayam [ ] anye tvatto na saṃtīti svasya nirṇītyabhāvataḥ nānye matto pi saṃtīti vacane sarvaśūnyatā [ ] tasyāpy anyair asaṃvitter viśeṣābhāvato nyathā siddhaṃ tad eva nānātvaṃ puṃsāṃ satyasamāśrayam [ ] ātmānaṃ saṃvidaṃty anye na veti yadi saṃśayaḥ tadā na puruṣādvaitanirṇayo jātu kasyacit [ ] āhur vidhātṛpratyakṣaṃ na niṣeddhṛvipaścitaḥ na nānātvāgamas tena pratyakṣeṇa virudhyate [ ] tenāniṣedhate 'nyasyābhāvābhāvāt kathaṃcana saṃśītigocaratvād vānyasyābhāvāviniścayāt [ ] yathaiva ca mamādhyakṣaṃ vidhātṛ na niṣedhṛ vā pratyakṣatvāt tathānyeṣām anyathaitattathā kutaḥ [ ] vidhātr ahaṃ sadaivānyaniṣeddhṛ na bhavāmy aham svayaṃ pratyakṣam ity evaṃ vetti cen na niṣeddhṛkam [ ] saṃti satyāstato nānā jīvāḥ sādhyakṣasiddhayaḥ pratipādyāḥ pareṣāṃ te kadācit pratipādakāḥ [ ] parārthaṃ nirṇayopāyo vacanaṃ cāsti tattvataḥ tac ca jīvātmakaṃ neti tadvad anyac ca kiṃ na naḥ [ ] bāhyeṃdriyaparicchedyaḥ śabdo nātmā yathaiva hi tathā kāryādir artho pi tadajīvo sti vastutaḥ [ ] yo pi brūte pṛthivyādir ajīvo dhyakṣaniścitaḥ tattvārtha iti tasyāpi prāyaśo dattam uttaram [ ] na kāyādikriyārūpo jīvasyāsty āsravaḥ sadā niḥkriyatvād yathā vyomna ity asat tadasiddhitaḥ [ ] kriyāvān puruṣo sarvagatadravyatvato yathā pṛthivyādiḥ svasaṃvedyaṃ sādhanaṃ siddham eva naḥ [ ] baṃdhaḥ puṃdharmatāṃ dhatte dviṣṭhatvān na pradhānake kevale 'saṃbhavāt tasya dharmo sau nāvadhāryate [ ] saṃvaro jīvadharmaḥ syāt kartṛstho nirjarāpi ca mokṣaś ca karmadharmo pi karmastho baṃdhavanmataḥ [ ] dharmidharmātmakaṃ tattvaṃ saptabhedam itīritam śraddheyaṃ jñeyam ādheyaṃ mumukṣor niyamād iha [ ] na ca tattvāṃtarābhāvas tattvam aṣṭamam āsajet saptatattvāstitārūpo hy eṣo 'nyasyāpratītitaḥ [ ] tattvaṃ sataś ca sadbhāvo 'sato 'sadbhāva ity api vastuny eva dvidhā vṛttir vyavahārasya vakṣyate [ ] yathā hi sati sattvena vedanaṃ siddham aṃjasā tathā sadaṃtare siddham asattvena pravedanam [ ] asadrūpapratītir hi nāvastuviṣayā kvacit bhāvāṃśaviṣayatvāt syāt sitatvādipratītivat [ ] bhāvāṃśo satsadābhāvaviśeṣaṇatayekṣaṇāt sarvathābhāvanirmuktasyādṛṣṭeḥ pāṭalādivat [ ] pramāṇādaya eva syuḥ padārthāḥ ṣoḍaśeti tu bruvāṇānāṃ na sarvasya saṃgraho vyavatiṣṭhate [ ] tatrānadhyavasāyasya viparyāsasya vā gateḥ nāsyāpramāṇarūpasya pramāṇagrahaṇād gatiḥ [ ] saṃśītivatprameyāṃtarbhāve tattvadvayaṃ bhavet saṃśayādeḥ pṛthagbhāve pṛthagbhāvo sya kiṃ tataḥ [ ] pramāṇavidhisāmarthyād apramāṇagatau yadi tatrānadhyavasāyāder aṃtarbhāvo virudhyate [ ] saṃśayasva tadātraiva nāṃtarbhāvaḥ kim iṣyate pramāṇabhāvarūpatvāviśeṣāt tasya sarvathā [ ] pramāṇavṛttihetutvāt saṃśayaś cet pṛthakkṛtaḥ tata eva vidhīyeta jijñāsādis tathā na kim [ ] abhāvasyāvinābhāvasaṃbaṃdhāder asaṃgrahāt pramāṇādipadārthānām upadeśo na doṣajit [ ] dravyādiṣaṭpadārthānām upadeśo pi tādṛśaḥ sarvārthasaṃgrahābhāvād anāptopajñam ity ataḥ [ ] sūtre vadhāraṇābhāvāc cheṣārthasyānirākṛtau tattvenaikena paryāptam upadiṣṭena dhīmatām [ ] nanv evaṃ saptatattvārthavacanenāpy asaṃgrahāt ratnatrayasya tadbādhye py ayuktam itītare [ ] tadasattasya jīvādisvabhāvatvena nirṇayāt tathā puṇyāsravatvena saṃvaratvena vā sthiteḥ [ ] jīvājīvaprabhedānām anaṃtatve pi nānyatā prasiddhyaty āsravādibhya ity avyāptyādyasaṃbhavaḥ [ ] saṃjñākarmānapekṣyaiva nimittāṃtaram iṣṭitaḥ nāmānekavidhaṃ lokavyavahārāya sūtritam [ ] nāmno vaktur abhiprāyo nimittaṃ kathitaṃ samam tasmād anyat tu jātyādinimittāṃtaram iṣyate [ ] jātidvāreṇa śabdo hi yo dravyādiṣu vartate jātihetuḥ sa vijñeyo gauraś ca iti śabdavat [ ] jātāv eva tu yat saṃjñākarma tan nāma manyate tasyām aparajātyādinimittānām abhāvataḥ [ ] guṇe karmaṇi vā nāma saṃjñā karma tatheṣyate guṇakarmāṃtarābhāvāj jāter apy anapekṣaṇāt [ ] guṇaprādhānyato vṛtto dravye guṇanimittakaḥ śuklaḥ pāṭala ityādiśabdavat saṃpratīyate [ ] karmaprādhānyatas tatra karmahetur nibudhyate carati plavate yadvat kaścid ity atiniścitam [ ] dravyāṃtaramukhe tu syāt pravṛtto dravyahetukaḥ śabdas taddvividhas tajjñair nirākulam udāhṛtaḥ [ ] saṃyogidravyaśabdaḥ syāt kuṃḍalītyādiśabdavat samavāyidravyaśabdo viṣāṇītyādir āsthitaḥ [ ] kuṃḍalītyādayaḥ śabdā yadi saṃyogahetavaḥ viṣāṇītyādayaḥ kiṃ na samavāyanibaṃdhanāḥ [ ] tathā sati na śabdānāṃ vācyā jātiguṇakriyāḥ dravyavatsamavāyena svasaṃbaṃdhiṣu vartanāt [ ] yathā jātyādayo dravye samavāyabalāt sthitāḥ śabdānāṃ viṣayas tadvat dravyaṃ tatrāstu kiṃcana [ ] saṃyogabalataś caivaṃ vartamānaṃ tatheṣyatām dravyamātre tu saṃjñānaṃ nāmeti sphuṭam īkṣyate [ ] tena paṃcatayī vṛttiḥ śabdānām upavarṇitā śāstrakārair na bādhyeta nyāyasāmarthyasaṃgatā [ ] jātiḥ sarvasya śabdasya padārtho nitya ity asan vyaktisaṃpratyayābhāvaprasaṃgād dhvanitaḥ sadā [ ] śabdena lakṣitā jātir vyaktīr lakṣayati svakāḥ saṃbaṃdhād ity api vyaktam aśabdārthajñatehitam [ ] tathā hy anumiter artho vyaktir jātiḥ punar dhvaneḥ kvānyathākṣārthatābādhā śabdārthasyāpi sidhyatu [ ] akṣeṇānugataḥ śabdo jātiṃ pratyāpayed iha saṃbaṃdhāt sāpi niḥśeṣā svavyaktīr iti tannayaḥ [ ] yady aspaṣṭāvabhāsitvāc chabdārthaḥ kaścaneṣyate liṃgārtho pi tadā prāptaḥ śabdārtho nānyathā sthitiḥ [ ] yatra śabdāt pratītiḥ syāt so rthaḥ śabdasya cen nanu vyakteḥ śabdārthatā na syād evaṃ liṃgāt pratītitaḥ [ ] śabdapratītayā jātyā na ca vyaktiḥ svarūpataḥ pratyetuṃ śakyate tasyāḥ sāmānyākārato gateḥ [ ] vyaktisāmānyato vyaktipratītāv anavasthiteḥ kva viśeṣe pravṛttiḥ syāt pāraṃparyeṇa śabdataḥ [ ] dravyam eva padārtho stu nityam ity apy asaṃgatam tatrānaṃtyena saṃketakriyāyukter ananvayāt [ ] vāṃchitārthapravṛttyādivyavahārasya hānitaḥ śabdasyākṣādisāmarthyād eva tatra pravṛttitaḥ [ ] vyaktāvekatra śabdena nirṇītāyāṃ kathaṃcana tadviśeṣaṇabhūtāyā jāteḥ saṃpratyayaḥ svataḥ [ ] guḍaśabdād yathā jñāne guḍe mādhuryanirṇayaḥ svataḥ pratīyate loke prokto niṃbe ca tiktatā [ ] pratītayā punar jātyā viśiṣṭāṃ vyaktim īhitām yāṃ yāṃ paśyati tatrāyaṃ pravartetārthasiddhaye [ ] tathā ca sakalaḥ śābdavyavahāraḥ pratiddhyati pratīter bādhaśūnyatvād ity eke saṃpracakṣate [ ] tad apy asaṃgataṃ jātipratīter vṛttisaṃbhave śabdenājanyamānāyāḥ śabdavṛttivirodhataḥ [ ] pāraṃparyeṇa cec chabdāt sā vṛttiḥ karaṇān na kim tato na śabdato vṛttir eṣāṃ syāj jātivādivat [ ] etena taddvayasyaiva padārthatvaṃ nivāritam pakṣe dvayoktadoṣasyāśakteḥ syādvādavidviṣām [ ] lohitākṛtim ācaṣṭe yathokto lohitadhvaniḥ lohitākṛtyadhiṣṭhāne vibhāgāl lohite guṇe [ ] tadāveśāt tathā tatra pratyayasya samudbhavāt dravye ca samavāyena prasūyeta tadāśraye [ ] guṇe samāsṛtatvena samavāyāt tadākṛteḥ saṃyuktasamavete ca dravye nyatropapādayet [ ] lohitapratyayaṃ raktavastradvayavṛte pi ca tathā gaur iti śabde pi kathayaty ākṛtiṃ svataḥ [ ] gotvarūpāt tadāveśāt tadadhiṣṭhāna eva tu tadāśraye ca gopiṃḍe gobuddhiṃ kurute ṃjasā [ ] evaṃ pacati śabdo dhiśrayaṇādikriyāgataiḥ sāmānyaiḥ samam ekārthasamavetaṃ prabodhayet [ ] vyāpakaṃ pacisāmānyam adhiśrityādikarmaṇām yathā bhramaṇasāmānyaṃ bhramatīti dhvanirjane [ ] tathā ḍitthādiśabdāś ca pūrvāparaviśeṣagam yadṛcchatvādisāmānyaṃ tasyaiva pratibodhakāḥ [ ] ity evam ākṛtiṃ śabdasyārthaṃ ye nāma menire tenātiśerate jātivādinaṃ proktanītitaḥ [ ] jātir ākṛtir ity arthabhedābhāvāt kathaṃcana guṇatve tv ākṛter vyaktivāda evāsthito bhavet [ ] yadi gaur ity ayaṃ śabdo vidhatte nyavivartanam vidadhīta tadā gotvaṃ tan nānyāpohagocaraḥ [ ] agonivṛttim apy anyanivṛttimukhato yadi gośabdaḥ kathayen nūnam anavasthā prasajyate [ ] vaktur icchāṃ vidhatte sau bahirarthaṃ na jātucit śabdo nyāpohakṛt sarvaḥ yasya vāṃdhyavijṛṃbhitam [ ] anyāpohe pratīte ca kathamarthe pravartanam śabdāt siddhyej janasyāsya sarvathātiprasaṃgataḥ [ ] ekatvāropamātreṇa yadi dṛśyavikalpayoḥ pravṛttiḥ kasyacid dṛśye vikalpe py astv abhedataḥ [ ] naikatvādhyavasāyo pi dṛśyaṃ spṛśati jātucit vikalpyasyānyathā siddhyed dṛśyasparśitvam aṃjasā [ ] vikalpyadṛśyasāmānyaikatvenādhyavasīyate yadi dṛśyaviśeṣe syāt kathaṃ vṛttistadarthinām [ ] tasya ced dṛśyasāmānyaikatvāropāt kva vartanam saugatasya bhaved arthe navasthāpyanuṣaṃgataḥ [ ] jātivyaktyātmakaṃ vastu tato stu jñānagocaraḥ prasiddhaṃ bahiraṃtaś ca śābdavyavahṛtīkṣaṇāt [ ] tatra syādvādinaḥ prāhuḥ kṛtvāyoddhārakalpanām jāteḥ pradhānabhāvena kāṃścic chabdān prabodhakān [ ] vyakteḥ prakhyāpakāṃś cānyān guṇadravyakriyātmanaḥ lokasaṃvyavahārārtham aparān pāribhāṣikān [ ] tenecchāmātrataṃtraṃ yatsaṃjñākarma tad iṣyate nāmācāryair na jātyādinimittāpannavigraham [ ] vastunaḥ kṛtasaṃjñasya pratiṣṭhā sthāpanā matā sadbhāvetarabhedena dvidhā tattvādhiropataḥ [ ] sādarānugrahākāṃkṣāhetutvāt pratibhidyate nāmnas tasya tathābhāvābhāvād atrāvivādataḥ [ ] nanv anāhitanāmno pi kasyacid darśaneṃjasā punas tatsadṛśe citrakarmādau dṛśyate svataḥ [ ] so 'yam ity avasāyasya prādurbhāvaḥ kathaṃcana sthāpanā sā ca tasyeti kṛtasaṃjñasya sā kutaḥ [ ] naitat san nāma sāmānyasadbhāvāt tatra tattvataḥ kvānyathā so yam ityādivyavahāraḥ pravartatām [ ] siddhaṃ bhāvam apekṣyaiva sthāpanāyāḥ pravṛttitaḥ tadapekṣāṃ vinā nāma bhāvād bhinnaṃ tataḥ sthitam [ ] yat svato bhimukhaṃ vastu bhaviṣyatparyayaṃ prati taddravyaṃ dvividhaṃ jñeyam āgametarabhedataḥ [ ] ātmā tatprabhṛtajñāyī yo nāmānupayuktadhīḥ so trāgamaḥ samāmnātaḥ syād dravyaṃ lakṣaṇānvayāt [ ] no āgamaḥ punas tredhā jñaśarīrādibhedataḥ trikālagocaraṃ jñātuḥ śarīraṃ tatra ca tridhā [ ] bhāvi no āgamadravyam eṣyat paryāyam eva tat tathā tadvyatiriktaṃ ca karmano karmabhedabhṛt [ ] jñānāvṛttyādibhedena karmānekavidhaṃ matam no karma ca śarīratvapariṇāmanirutsukam [ ] pudgaladravyamāhāraprabhṛtyupacayātmakam vijñātavyaṃ prapaṃcena yathāgamam abādhitam [ ] anvayapratyayāt siddhaṃ sarvathā bādhavarjitāt taddravyaṃ bahiraṃtaś ca mukhyaṃ gauṇaṃ tato 'param [ ] sāṃprato vastuparyāyo bhāvo dvedhā sa pūrvavat āgamaḥ prābhṛtajñāyī pumāṃs tatropayuktadhīḥ [ ] no āgamaḥ punar bhāvo vastu tatparyayātmakam dravyād arthāṃtaraṃ bhedapratyayād dhvastabādhanāt [ ] nāmoktaṃ sthāpanā dravyaṃ dravyārthikanayārpaṇāt paryāyārthārpaṇād bhāvas tair nyāsaḥ samyagīritaḥ [ ] teṣāṃ darśanajīvādipadārthānāmaśeṣataḥ iti saṃpratipattavyaṃ tacchabdagrahaṇād iha [ ] nanv anaṃtaḥ padārthānāṃ nikṣepo vācya ity asan nāmādiṣv eva tasyāṃtarbhāvāt saṃkṣeparūpataḥ [ ] dravyaparyāyato vācyo nyāsa ity apy asaṃgatam atisaṃkṣepatas tasyāniṣṭer atrānyathāstu saḥ [ ] nanu nyāsaḥ padārthānāṃ yadi syān nyasyamānatā tadā tebhyo na bhinnaḥ syād abhedād dharmadharmiṇoḥ [ ] bhede nāmāditas tasya paro nyāsaḥ prakalpyatām tathā ca satyavasthānaṃ kva syāt tasyeti kecana [ ] tadayuktam anekāṃtavādinām anupadravāt sarvathaikāṃtavādasya proktanītyā nivāraṇāt [ ] dravyārthikanayāt tāvad abhede nyāsatadvatoḥ nyāso nyāsavadarthānām iti gauṇī vacogatiḥ [ ] paryāyārthanayād bhede tayor mukhyaiva sā matā nyāsasyāpi ca nāmādinyāseṣṭer nānavasthitiḥ [ ] bhedaprabhedarūpeṇānaṃtatvāt sarvavastunaḥ sadbhir vicāryamāṇasya pramāṇān nānyathā gatiḥ [ ] nanu nāmādayaḥ ke nye nyasyamānārtharūpataḥ yair nyāso stu padārthānām iti ke py anuyuṃjate [ ] tebhyo pi bhedarūpeṇa kathaṃcid avasāyataḥ nāmādīnāṃ padārthebhyaḥ prāyaśo dattam uttaram [ ] nāmeṃdrādiḥ pṛthaktāvadbhāveṃdrādeḥ pratīyate sthāpaneṃdrādir apy evaṃ dravyeṃdrādiś ca tattvataḥ [ ] tadbhedaś ca padārthebhyaḥ kathaṃcid dhaṭarūpavat sthāpyasthāpakabhāvāder anyathānupapattitaḥ [ ] ekatrārthe virodhaś cen nāmādīnāṃ sahocyate naikatvāsiddhito rthasya bahiraṃtaś ca sarvathā [ ] nāmāder avibhinnaś ced virodho na virodhakaḥ nāmādyātmavad anyaś cet kaḥ kasyās tu virodhakaḥ [ ] bhinnābhinno virodhaś cet kiṃ na nāmādayas tathā kutaścit tadvataḥ saṃti kathaṃcid bhidabhidbhṛtaḥ [ ] ekasya bhāvato 'kṣīṇakāraṇasya sadudbhave kṣayo virodhakas tasya so rtho yady abhidhīyate [ ] tadā nāmādayo na syuḥ parasparavirodhakāḥ sakṛtsaṃbhavino rtheṣu jīvādiṣu viniścitāḥ [ ] sūtre nāmādinikṣiptatattvārthādhigamasthitaḥ kārtsnyato deśato vāpi sa pramāṇanayair iha [ ] pramāṇaṃ ca nayāś ceti dvaṃdve pūrvanipātanam kṛtaṃ pramāṇaśabdasyābhyarhitatvena bahvacaḥ [ ] pramāṇaṃ sakalādeśi nayādabhyarhitaṃ matam vikalādeśinas tasya vācako pi tathocyate [ ] svārthaniścāyakatvena pramāṇaṃ naya ity asat svārthaikadeśanirṇītilakṣaṇo hi nayaḥ smṛtaḥ [ ] nāyaṃ vastu na cāvastu vastvaṃśaḥ kathyate yataḥ nāsamudraḥ samudro vā samudrāṃśo yathocyate [ ] tanmātrasya samudratve śeṣāṃśasyāsamudratā samudrabahutvaṃ vā syāt tac cet kās tu samudravit [ ] nāṃśebhyo rthāṃtaraṃ kaścit tattvato ṃśīty ayuktikam tasyaikaś ca sthaviṣṭhasya sphuṭaṃ dṛṣṭes tadaṃśavat [ ] kalpanāropito ṃśī cet sa na syāt kalpanāṃtare tasya nārthakriyāśaktir na spaṣṭajñānavedyatā [ ] bhrāṃtir iṃdriyajeyaṃ cet sthaviṣṭākāradarśinī kvābhrāṃtam iṃdriyajñānaṃ pratyakṣam iti siddhyatu [ ] pratyāsanneṣv ayukteṣu paramāṇuṣu cen na te kadācit kasyacid buddhigocarāḥ paramātmavat [ ] svasaṃvedanam evaikaṃ pratyakṣaṃ yadi tattvataḥ siddhir aṃśāṃśirūpasya cetanasya tato na kim [ ] vijñānapracayo py eṣa bhrāṃtaś cet kim avibhramam svasaṃvedanam adhyakṣaṃ jñānāṇor apravedanāt [ ] nānyonubhāvyo buddhyāsti tasyā nānubhavoparaḥ grāhyagrāhakavaidhuryāt svayaṃ sā na prakāśate [ ] yan na prakāśasāmānyaṃ sarvatrānugamātmakam tatprakāśaviśeṣāṇām abhāve kena vedyate [ ] nātra saṃvedanaṃ kiṃcid anaṃśaṃ bahirarthavat pratyakṣaṃ bahiraṃtaś ca sāṃśasyaikasya vedanāt [ ] svāṃśeṣu nāṃśino vṛttau vikalpopāttadūṣaṇam sarvathārthāṃtaratvasyābhāvād aṃśāṃśinor iha [ ] tādātmyapariṇāmasya tayoḥ siddheḥ kathaṃcana pratyakṣato numānāc ca na pratītiviruddhatā [ ] yathāṃśini pravṛttasya jñānasyeṣṭā pramāṇatā tathāṃśeṣv api kiṃ na syād iti mānātmako nayaḥ [ ] tan nāṃśiny api niḥśeṣadharmāṇāṃ guṇatāgatau dravyārthikanayasyaiva vyāpārān mukhyarūpataḥ [ ] dharmidharmasamūhasya prādhānyārpaṇayā vidaḥ pramāṇatvena nirṇīteḥ pramāṇād aparo nayaḥ [ ] nāpramāṇaṃ pramāṇaṃ vā nayo jñānātmako mataḥ syāt pramāṇaikadeśas tu sarvathāpy avirodhataḥ [ ] pramāṇena gṛhītasya vastuno ṃśevigānataḥ saṃpratyayanimittatvāt pramāṇāc cen nayociṃtaḥ [ ] nāśeṣavastunirṇīteḥ pramāṇād eva kasyacit tādṛk sāmarthyaśūnyatvāt sannayasyāpi sarvadā [ ] mater avadhito vāpi manaḥparyayato pi vā jñātasyārthasya nāṃśe sti nayānāṃ vartanaṃ nanu [ ] niḥśeṣadeśakālārthāgocaratvaviniścayāt tasyeti bhāṣitaṃ kaiścid yuktam eva tatheṣṭitaḥ [ ] trikālagocarāśeṣapadārthāṃśeṣu vṛttitaḥ kevalajñānamūlatvam api teṣāṃ na yujyate [ ] parokṣākāratāvṛtteḥ spaṣṭatvāt kevalasya tu śrutamūlā nayāḥ siddhā vakṣyamāṇāḥ pramāṇavat [ ] pramāṇena nayaiś cāpi svārthākāraviniścayaḥ pratyeyo 'dhigamas tajjñais tatphalaṃ syād abhedabhṛt [ ] teneha sūtrakārasya vacanaṃ karaṇaṃ kṛtaḥ sūtre yadghaṭanāṃ yāti tatpramāṇanayair iti [ ] sārūpyasya pramāṇasya svabhāvo dhigamaḥ phalam tadbhedaḥ kalpanāmātrād iti kecit prapedire [ ] tan na yuktaṃ niraṃśāyāḥ saṃvitter dvayarūpatāṃ pratikalpayatāṃ hetuviśeṣāsaṃbhavitvataḥ [ ] vinā hetuviśeṣeṇa nānyavyāvṛttimātrataḥ kalpito rtho rthasaṃsiddhyai sarvathātiprasaṃgataḥ [ ] pratikarmavyavasthānasyānyathānupapattitaḥ sākārasya ca bodhasya pramāṇatvāpavarṇanam [ ] kṣaṇakṣayādirūpasya vyavasthāpakatā na kim tena tasya svarūpatvād viśeṣāṃtarahānitaḥ [ ] pramāṇaṃ yogyatāmātrāt svarūpam adhigacchati yathā tathārtham ity astu pratītyanatilaṃghanāt [ ] svarūpepi ca sārūpyān nādhigatyupavarṇanam yuktaṃ tasya dviniṣṭhatvāt kalpitasyāpy asaṃbhavāt [ ] kalpane vānavasthānāt kutaḥ saṃvittisaṃbhavaḥ svārthena ghaṭayatyenāṃ pramāṇe svāvṛtikṣayāt [ ] nāyaṃ doṣas tato naiva sārūpyasya pramāṇatā nābhinno dhigamas tasmād ekāṃteneti niścayaḥ [ ] bhinna eveti cāyuktaṃ svayam ajñānatāptitaḥ pramāṇasya ghaṭasyaiva paratvāt svārthaniścayāt [ ] cakṣurādi pramāṇaṃ ced acetanam apīṣyate na sādhakatamatvasyābhāvāt tasyācitaḥ sadā [ ] citas tu bhāvane trādeḥ pramāṇatvaṃ na vāryate tatsādhakatamatvasya kathaṃcid upapattitaḥ [ ] hānādivedanaṃ bhinnaṃ phalam iṣṭaṃ pramāṇataḥ tadabhinnaṃ punaḥ svārthājñānavyāvartanaṃ samam [ ] syādvādāśrayaṇe yuktam etad apy anyathā na tu hānādivedanasyāpi pramāṇādibhidekṣaṇāt [ ] yenaivārtho mayā jñātas tenaiva tyajyate dhunā gṛhye to pekṣate ceti tadaikyaṃ kena neṣyate [ ] bhedaikāṃte punar na syāt pramāṇaphalatā gatiḥ saṃtānāṃtaravatsveṣṭe py ekatrātmani saṃvidoḥ [ ] paryāyārthārpaṇād bhedo dravyārthād abhidās tu naḥ pramāṇaphalayoḥ sākṣād asākṣād api tattvataḥ [ ] tatpramāṇān nayāc ca syāt tattvasyādhigamo paraḥ sa svārthaś ca parārthaś ca jñānaśabdātmakāt tataḥ [ ] jñānaṃ matyādibhedena vakṣyamāṇaṃ prapaṃcataḥ śabdas tu saptadhā vṛtto jñeyo vidhiniṣedhagaḥ [ ] tatra praśnavaśāt kaścid vidhau śabdaḥ pravartate syād asty evākhilaṃ yadvatsvarūpādicatuṣṭayāt [ ] syān nāstyeva viparyāsād iti kaścin niṣedhane syād dvaitam eva taddvaitād ity astitvaniṣedhayoḥ [ ] krameṇa yaugapadyād vā syād avaktavyam eva tat syād asty avācyam eveti yathocitanayārpaṇāt [ ] syān nāsty avācyam eveti tata eva nigadyate syād dvayāvācyam eveti saptabhaṃgyavirodhataḥ [ ] vākyevadhāraṇaṃ tāvad aniṣṭārthanivṛttaye kartavyam anyathānuktasamatvāt tasya kutracit [ ] sarvathā tatprayoge pi sattvādiprāptivicchide syātkāraḥ saṃprayujyetānekāṃtadyotakatvataḥ [ ] syāc chābdād apy anekāṃtasāmānyasvāvabodhane śabdāṃtaraprayogo tra viśeṣapratipattaye [ ] so prayukto pi vā tajjñaiḥ sarvatrārthāt pratīyate yathaivakāro yogādivyavacchedaprayojanaḥ [ ] nirdeśādyaiś ca kartavyo dhigamaḥ kāṃścana prati ity āha sūtram ācāryaḥ pratipādyānurodhataḥ [ ] yat kim ity anuyoge rthasvarūpapratipādanam kārsntyato deśato vāpi sa nirdeśo vidāṃ mataḥ [ ] kasya cety anuyoge satyādhipatyanivedanaṃ svāmitvaṃ sādhanaṃ kenety anuyoge tathā vacaḥ [ ] kveti paryanuyoge tu vaco dhikaraṇaṃ viduḥ kiyac ciram iti praśne pratyuttaravacaḥ sthitiḥ [ ] katidhedam iti praśne vacanaṃ tattvavedinām vidhānaṃ kīrtitaṃ śabdaṃ tat tv 'ajñānaṃ ca gamyatām [ ] tair arthādhigamo bhedāt syāt pramāṇanayātmabhiḥ adhigamyasvabhāvair vā vastunaḥ karmasādhanaḥ [ ] bhāvā yena nirūpyaṃte tadrūpaṃ nāsti tattvataḥ tatsvarūpavaco mithyety ayuktaṃ niḥpramāṇakam [ ] yat tad ekam anekaṃ ca rūpaṃ teṣāṃ pratīyate pratyakṣato numānāc cābādhitād āgamād api [ ] niḥśeṣadharmanairātmyaṃ svarūpaṃ vastuno yadi tadā na niḥsvarūpatvam anyathā dharmayuktatā [ ] na kaścit kasyacit svāmī saṃbaṃdhābhāvato ṃjasā pārataṃtryavihīnatvāt siddhasyety apare viduḥ [ ] tathā syādvādasaṃbaṃdho bhāvānāṃ paramārthataḥ svātaṃtryāt kiṃ na deśādiniyamodbhūtir īkṣyate [ ] dravyataḥ kṣetrataḥ kālabhāvābhyāṃ kasyacit svataḥ pratyāsannakṛtaḥ siddhaḥ saṃbaṃdhaḥ kenacit sphuṭaḥ [ ] na kiṃcit kenacid vastu sādhyate san na cāpy asat tato na sādhanaṃ nāmety anye te py asaduktayaḥ [ ] mokṣādisādhanābhyāsābhāvāsaktes tadarthinām tatrāvidyāvilāseṣṭau kva muktiḥ pāramārthikī [ ] saṃvic cet saṃvid evety adoṣaḥ sā yady asādhanā nityā syād anyathā siddhaṃ sādhanaṃ paramārthataḥ [ ] nityasarvagateṣv iṣṭau tasyāḥ saṃvittyasaṃbhavāt kva vyavasthāpanānaṃśakṣaṇikajñānatattvavat [ ] ādhārādheyabhāvasya padārthānām ayogataḥ tattvato vidyate nādhikaraṇaṃ kiṃcid ity asat [ ] sphuṭaṃ dravyaguṇādīnām ādhārādheyatāgateḥ prasiddhibādhitatvena tadabhāvasya sarvathā [ ] nānavasthāprasaṃgo tra vyomnaḥ svāśrayatāsthiteḥ sarvalokāśrayasyāṃtavihīnasya samaṃtataḥ [ ] vyomavatsarvabhāvānāṃ svapratiṣṭhānuṣaṃjanaṃ kartuṃ naikāṃtato yuktaṃ sarvagatvānuṣaṃgavat [ ] asthiratvāt padārthānāṃ sthitir naivāsti tāttvikī kṣaṇādūrdhvam itīcchaṃti kecit tad api durghaṭam [ ] niranvayakṣayaikāṃte saṃtānādyanavasthiteḥ puṇyapāpādyanuṣṭhānābhāvāsakter nirūpaṇāt [ ] yathā caikakṣaṇasthāyī bhāvo hetoḥ samudbhavet tathānekakṣaṇasthāyī kin na loke pratīyate [ ] kṣaṇamātrasthitiḥ siddhaivarjusūtranayād iha dravyārthikanayād eva siddhā kālāṃtarasthitiḥ [ ] viśvam ekaṃ sadākārāviśeṣād ity asaṃbhavi vidhānaṃ vāstavaṃ vastuny evaṃ kecit pralāpinaḥ [ ] sadākārāviśeṣasya nānārthānām apahnave saṃbhavābhāvataḥ siddhe vidhānasyaiva tattvataḥ [ ] tad evaṃ mānataḥ siddhair nirdeśādibhir aṃjasā yuktaṃ jīvādiṣūkteṣu nirūpaṇam asaṃśayam [ ] yathāgamam udāhāryā nirdeṣṭavyādayo budhaiḥ niścayavyavahārābhyāṃ nayābhyāṃ mānato pi vā [ ] sadādibhiḥ prapaṃcena tattvārthādhigamaṃ muniḥ saṃdidarśayiṣuḥ prāha sūtraṃ śiṣyānurodhataḥ [ ] nāstitvaikāṃtavicchittyai tāvat prāk ca prarūpaṇam sāmānyato viśeṣāt tu jīvādyastitvabhidvide [ ] sanmātrāpahnave saṃvitsattvābhāvān na sādhanam sveṣṭasya dūṣaṇaṃ vāsti nāniṣṭasya kathaṃcana [ ] grāhyagrāhakabhāvādiśūnyaṃ saṃvittimātrakam na svataḥ siddhamārekābhāvāpatter aśeṣataḥ [ ] parato grahaṇe tasya grāhyagrāhakatāsthitiḥ paropagamataḥ sā cet svataḥ sāpi na sidhyati [ ] kutaścid grāhakāt siddhaḥ parābhyupagamo yadi grāhyagrāhakabhāvaḥ syāt tattvato nānyathā sthitiḥ [ ] grāhyagrāhakabhāvotaḥ siddhas sveṣṭasya sādhanāt sarvathaivānyathā tasyānupapattir viniścayāt [ ] bādhyabādhakabhāvasyāpy abādhe niṣṭasādhanaṃ svānyopagamataḥ siddhyen nety asāv api tāttvikam [ ] kāryakāraṇabhāvasyābhāve saṃvidakāraṇā satī nityānyathā vyomāraviṃdādivadapramā [ ] sarvathaivāphalatvāc ca tasyāḥ sidhyen na vastutā saphalatve punaḥ siddhā kāryakāraṇatāṃjasā [ ] vācyavācakatāpy evamiṣṭāniṣṭātmanoḥ svayam sādhanād dūṣaṇāc cāpi vāgbhiḥ siddhānyathā na tat [ ] tatsatprarūpaṇaṃ yuktam ādāv eva vipaścitām kvānyathā paradharmāṇāṃ nirūpaṇam anākulam [ ] nirdeśavacanād etadbhinnaṃ dravyādigocarāt sanmātraviṣayīkurvadarthānastitvasādhanam [ ] gatyādimārgaṇāsthānaiḥ prapaṃcena nirūpaṇam mithyādṛṣṭyādivikhyātaguṇasthānātmakātmanaḥ [ ] saṃkhyā saṃkhyāvato bhinnā na kācid iti kecana saṃkhyāsaṃpratyayas teṣāṃ nirālaṃbaḥ prasajyate [ ] vāsanāmātrahetuś cet sā mithyākalpanātmikā vastu sāpekṣikatvena sthaviṣṭhatvādidharmavat [ ] na cāpekṣikatā vyāptā nīrūpatvena gamyate vastu satsv api nīlādirūpeṣv asyāḥ prasidvitaḥ [ ] sā caikatvādisaṃkhyeyaṃ sarveṣv artheṣu vāstavī vidyamānāpi nirṇītiṃ kuryād dhetoḥ kutaścana [ ] pratikṣaṇavināśādi bahiraṃtaryathāsthiteḥ svāvṛttyapāyavaicitryād bodhavaicitryaniṣṭhiteḥ [ ] yatraikatvaṃ kathaṃ tatra dvitvāder api saṃbhavaḥ parasparavirodhāc cet tayor naivaṃ pratītitaḥ [ ] vastuny ekatra dṛṣṭasya parasparavirodhinaḥ vṛttidharmakalāpasya nopālaṃbhāya kalpate [ ] syādvādavidviṣām eva virodhapratipādanāt yathaikatvaṃ padārthasya tathā dvitvādi vāṃchatām [ ] yenaikatvaṃ svarūpeṇa tena dvitvādi kathyate naivānaṃtātmano 'rthasyety astu kveyaṃ viruddhatā [ ] sarvathaivāsatāṃ nāsti virodhaḥ kūrmaromavat satām api yathā dṛṣṭasveṣṭatattvaviśeṣavat [ ] sarvaṃ sarvātmakaṃ siddhyed evam ity atisākulam sarvakāryodbhave sattvasyārthasyedṛkṣaśaktitaḥ [ ] vyaktyātmanānubhāvasya sarvātmatvaṃ na yujyate sāṃkaryapratyayāpatter avyavasthānuṣaṃgataḥ [ ] tato nirbādhanād eva pratyayāt tattvaniṣṭhitau saṃkhyāsaṃpratyayāt satyā tāttvikīti vyavasthitam [ ] sā naiva tattvato yeṣāṃ teṣāṃ dravyam asaṃkhyakam saṃkhyāto tyantabhinnatvād guṇakarmādivan na kim [ ] samavāyavaśād evaṃ vyapadeśo na yujyate tasyaikarūpatābhīṣṭe niyamākāraṇatvataḥ [ ] samavāyo na saṃkhyādi tadvatāṃ ghaṭane prabhuḥ niraṃśatvādyathaivaikaḥ paramāṇuḥ sakṛt tava [ ] yugapan na viśeṣyaṃte tenaiva samavāyinaḥ bhinnadeśādavṛttitvād anyathātiprasaṃgataḥ [ ] na khādibhir anekāṃtas teṣāṃ sāṃśatvaniścayāt niraṃśatve pramābhāvād vyāpitvasya virodhataḥ [ ] viśeṣaṇaviśeṣyatvaṃ saṃbaṃdhaḥ samavāyibhiḥ samavāyasya siddhyeta dvau vaḥ pratiniyāmakaḥ [ ] sann apy ayaṃ tatas tāvan nābhinnaḥ svamatakṣateḥ bhinnaś cet sa svasaṃbaṃdhisaṃbaṃdho nyo sya kalpanāt [ ] so pi tadbhinnarūpaś ced anavasthopavarṇitā tādātmyapariṇāmasya samavāyasya tu sthitiḥ [ ] gaṇanāmātrarūpeyaṃ saṃkhyoktātaḥ kathaṃcana bhinnā vidhānato bhedagaṇanālakṣaṇādiha [ ] nivāsalakṣaṇaṃ kṣetraṃ padārthānāṃ na vāstavam svasvabhāvavyavasthānād ity eke tadapeśalam [ ] rājñaḥ sati kurukṣetre tannivāsasya darśanāt tasminn asati cādṛṣṭe vāstavasyāprabādhanāt [ ] pramāṇagocarasyāsya nāvastutvaṃ svatattvavat nānumāgocarasyāpi vastutvaṃ na vyavasthitam [ ] sāmīpyādiparityāgād vyāpakasya parigrahāt śarīre jīva ity adhikaraṇaṃ kṣetram anyathā [ ] trikālaviṣayārthopaśleṣaṇaṃ sparśanaṃ matam kṣetrād anyatvabhāgvartamānārthaśleṣalakṣaṇāt [ ] dravyato 'nādiparyaṃte siddhe vastuny abādhite sparśanasya pratikṣepas trikālasya na yujyate [ ] sthitim atsu padārtheṣu yo vadhiṃ darśayaty asau kālaḥ pracakṣyate mukhyas tadanyaḥ svasthiteḥ paraḥ [ ] na kriyāmātrakaṃ kālo vyavahāraprayojanaḥ mukhyakālādṛte siddhyed vartanālakṣaṇāt kvacit [ ] paratvam aparatvaṃ ca samadignatayoḥ satoḥ samānaguṇayoḥ siddhaṃ tādṛkkālanibaṃdhanaṃ [ ] parāparādikālasya tattvahetvaṃtarān na hi yato 'navasthitis tatrāpy anyahetuprakalpanāt [ ] svatas tattvatathātve ca sarvārthānāṃ na tad bhavet vyāpyasiddher manīṣādir amūrtatvādidharmavat [ ] yathāpratītibhāvānāṃ svabhāvasya vyavasthitau kāle parāparāditvaṃ svato stv anyatra tatkṛtam [ ] kvānyathā vyavatiṣṭhaṃte dharmādharmanabhāṃsy api gatyādihetutāpatter jīvapudgalayoḥ svataḥ [ ] śarīravāṅmanaḥprāṇāpānādīn api pudgalāḥ prāṇinām upakuryur na svatas teṣāṃ hi dehinaḥ [ ] jīvā vā cetanā na syuḥ kāyāḥ saṃtu svakās tathā niṃbādir madhur astikto guḍādiḥ kālavidviṣām [ ] ekatrārhe hi dṛṣṭasya svabhāvasya kutaścana kalpanā tadvijātīye sveṣṭatattvavidhātinī [ ] tasmāj jīvādibhāvānāṃ svato vṛttimatāṃ sadā kālaḥ sādhāraṇo hetur vartanālakṣaṇaḥ svataḥ [ ] svahetor jāyamānasya kutaścid vinivartate punaḥ prasūtitaḥ pūrvaṃ viraho ṃtaram iṣyate [ ] kāla eva sa ced iṣṭaṃ viśiṣṭatvān na bhedataḥ sūcanaṃ tasya sūtre smin kathaṃcin na virudhyate [ ] atraupaśamikādīnāṃ bhāvānāṃ pratipattaye bhāvo nāmādisūtrokto py uktas tattvānuyuktaye [ ] ete lpe bahavaś caite 'mībhyo 'rthātiviviktaye kathyate lpabahutvaṃ tatsaṃkhyāto bhinnasaṃkhyayā [ ] pratyekaṃ saṃkhyayā pūrvaṃ niścitārthe pi piṃḍataḥ kathyate lpabahutvaṃ yat tat tataḥ kiṃ na bhidyate [ ] iti prapaṃcataḥ sarvabhāvādhigatihetavaḥ sadādayo nuyogāḥ syuste syādvādanayātmakāḥ [ ] sattvena niścitā bhāvā gamyaṃte saṃkhyayā budhaiḥ saṃkhyātaḥ kṣetrato jñeyāḥ sparśanena ca kālataḥ [ ] tathāṃtarāc ca bhāvebhyo jñeyaṃ te lpabahutvataḥ kramād iti tathaiteṣāṃ nirdeśo vyavatiṣṭhate [ ] praśnakramavaśād vāpi vineyānām asaṃśayam nopālaṃbham avāpnoti pratyuttaravacaḥkramaḥ [ ] sāmānyenādhigamyaṃte viśeṣeṇa ca te yathā jīvādayas tathā jñeyā vyāsenānyatra kīrtitāḥ [ ] atha svabhedaniṣṭhasya jñānasyeha prasiddhaye prāha pravādimithyābhiniveśavinivṛttaye [ ] jñānaṃ saṃlakṣitaṃ tāvad ādisūtre niruktitaḥ matyādīny atra tadbhedāl lakṣaṇīyāni tattvataḥ [ ] matyāvaraṇavicchedaviśeṣān manyate yathā mananaṃ manyate yāvat svārthe matir asau matā [ ] śrutāvaraṇaviśleṣaviśeṣāc chravaṇaṃ śrutam śṛṇoti svārtham iti vā śrūyate smeti vāgamaḥ [ ] avadhyāvṛtividhvaṃsaviśeṣād avadhīyate yena svārtho vadhānaṃ vā so vadhir niyataḥ sthitiḥ [ ] yan manaḥparyayāvāraparikṣayaviśeṣataḥ manaḥ paryeti yo pi vā [ ] sa manaḥparyayo jñeyo manonnārthā manogatāḥ pareṣāṃ svamano vāpi tadālaṃbanamātrakam [ ] kṣāyopaśamikajñānāsahāyaṃ kevalaṃ matam yadartham arthino mārgaṃ kevaṃte vā tad iṣyate [ ] matyādīnāṃ niruktyaiva lakṣaṇaṃ sūcitaṃ pṛthak tatprakāśakasūtrāṇām abhāvād uttaratra hi [ ] yathādisūtre jñānasya cāritrasya ca lakṣaṇam nirukter vyabhicāre hi lakṣaṇāṃtarasūcanam [ ] svatattvālpākṣaratvābhyāṃ viṣayālpatvato pi ca mater ādau vaco yuktaṃ śrutāt tasya taduttaram [ ] matisaṃpūrvataḥ sāhacaryāt matyā kathaṃcana pratyakṣatritayasyādāv avadhiḥ pratipādyate [ ] sarvastokaviśuddhitvāt tucchatvāc cāvadhidhvaneḥ tataḥ paraṃ punarvācyaṃ manaḥparyayavedanam [ ] viśuddhataratāyogāt tasya sarvāvadher api aṃte kevalam ākhyātaṃ prakarṣātiśayasthiteḥ [ ] tasya nirvṛttyavasthāyām api sadbhāvaniścayāt [ ] matyādīny eva saṃjñānam iti pūrvāvadhāraṇāt matyajñānādiṣu dhvastasamyagjñānatvam ūhyate [ ] saṃjñānam eva tānīti parasmād avadhāraṇāt teṣām ajñānatāpāstā mithyātvodayasaṃsṛtā [ ] matimātragrahād atra smṛtyāder jñānatā gatiḥ tenākṣamatir evaikā jñānam ity apasāritam [ ] sānumā sopamānā ca sārthāpattyādikety api saṃvādakatvatas tasyāḥ saṃjñānatvāvirodhataḥ [ ] śrutasyājñānatām icchaṃs tadvācaiva nirākṛtaḥ svārthe kṣamativattasya saṃviditvena nirṇayāt [ ] jighraty atīṃdriyajñānam avadhyādivaco balāt pratyākhyātasunirṇītabādhakatvena tadgateḥ [ ] siddhe hi kevalajñāne sarvārtheṣu sphuṭātmani kārtsnyena rūpiṣu jñāneṣv avadhiḥ kena bādhyate [ ] paricittāgateṣv artheṣv evaṃ saṃbhāvyate na kim manaḥparyayavijñānaṃ kasyacit prasphuṭākṛtiḥ [ ] svalpajñānaṃ samārabhya prakṛṣṭajñānam aṃtimam kṛtvā tanmadhyato jñānatāratamyaṃ na hanyate [ ] na matiśrutayor aikyaṃ sāhacaryāt sahasthiteḥ viśeṣābhāvato nāpi tato nānātvasiddhitaḥ [ ] sāhacaryam asiddhaṃ ca sarvadā tatsahasthitiḥ naitayor aviśeṣaś ca paryāyārthanayārpaṇāt [ ] kāryakāraṇabhāvāt syāt tayor ekatvam ity api viruddhaṃ sādhanaṃ tasya kathaṃcid bhedasādhanāt [ ] gocarābhedataś cen na sarvathā tadasiddhitaḥ śrutasyāsarvaparyāyadravyagrāhitvavācy api [ ] kevalajñānavat sarvatattvārthagrāhitāsthiteḥ mates tathātvaśūnyatvād anyathā svamatakṣateḥ [ ] iṃdriyāniṃdriyāyattavṛttitvam api sādhanam na sādhīyo prasiddhatvāc chrutasyākṣānapekṣaṇāt [ ] nāniṃdriyanimittatvād īhanaśrutayor iha tādātmyaṃ bahuveditvāc chrutasyehāvyapekṣayā [ ] avagrahagrahītasya vastuno bhedam īhate vyaktamīhā śrutaṃ tv arthān parokṣān vividhān api [ ] śabdaṃ śrutvā tadarthānām avadhāraṇam iṣyate yaiḥ śrutaṃ tair na labhyeta netrādimatijaṃ śrutam [ ] tasmān matiḥ śrutād bhinnā bhinnalakṣaṇayogataḥ avadhyādivadarthādibhedāc ceti suniścitam [ ] sarvajñānam anadhyakṣaṃ pratyakṣo rthaḥ parisphuṭaḥ iti kecid anātmajñāḥ pramāṇavyāhataṃ viduḥ [ ] pratyakṣam ātmani jñānam aparatrānumānikam pratyātmavedyam āhaṃti tatparokṣatvakalpanām [ ] vijñānasya parokṣatve pratyakṣo rthaḥ svataḥ katham sarvadā sarvathā sarvaḥ sarvasya na tathā bhavet [ ] tataḥ paraṃ ca vijñānaṃ kimartham upakalpyate kādācitkatvasiddhyartham arthajñapter na sā parā [ ] vijñānād ity anadhyakṣāt kuto vijñāyate paraiḥ liṃgāc cet tatparicchittir api liṃgāṃtarād iti [ ] kvāvasthānam anenaiva tatrārthāpattir āhatā avijñātasya sarvasya jñāpakatvavirodhataḥ [ ] jñātāhaṃ bahirarthasya sukhādeś ceti nirṇayāt svasaṃvedyatvataḥ puṃso na doṣa iti cen matam [ ] svasaṃvedyāṃtarād anyadvijñānaṃ kiṃ kariṣyate karaṇena vinā kartuḥ karmaṇi vyāvṛtir na cet [ ] svasaṃvittikriyā na syāt svataḥ puṃso rthavittivat yadi svātmā svasaṃvittāv ātmanaḥ karaṇaṃ matam [ ] svārthavittau tadevāstu tato jñānaṃ sa eva naḥ [ ] tathāstv iti mataṃ dhvastaprāyaṃ na punar asya te svavijñānaṃ tato dhyakṣam ātmavad avatiṣṭhate [ ] pratyakṣaṃ svaphalajñānaṃ karaṇaṃ jñānam anyathā iti prābhākarī dṛṣṭiḥ sveṣṭavyāghātakāriṇī [ ] karmatvena paricchitter abhāvo hy ātmano yathā phalajñānasya tadvac cet kutas tasya samakṣatā [ ] tatkarmatvaparicchittau phalajñānāṃtaraṃ bhavet tatrāpy eva mato na syād avasthānaṃ kvacit sadā [ ] phalatvena phalajñāne pratīte cet samakṣatā karaṇatvena tadjñāne kartṛtvenātmanīṣyatām [ ] tathā ca na parokṣatvam ātmano na parokṣatā karaṇātmani vijñāne phalajñānatvavedinaḥ [ ] jñānaṃ jñānāṃtarād vedyaṃ svātmajñaptivirodhataḥ prameyatvād yathā kuṃbha ity apy aślīlabhāṣitam [ ] jñānāṃtaraṃ yadā jñānād anyasmāt tena vidyate tadānavasthitiprāpter anyathā hy aviniścayāt [ ] arthajñānasya vijñānaṃ nājñātam avabodhakam jñāpakatvād yathā liṃgaṃ liṃgino nānyathā sthitiḥ [ ] pradhānapariṇāmatvāt sarvaṃ jñānam acetanam sukhakṣmādivad ity ekapratīter apalāpinaḥ [ ] cetanātmatayā vitter ātmavat sarvadā dhiyaḥ pradhānapariṇāmatvāsiddheś ceti nirūpaṇāt [ ] tatsvārthavyavasāyātmajñānaṃ cetanam aṃjasā samyag ity adhikārāc ca saṃmatyādikabhedabhṛt [ ] svarūpasaṃkhyayoḥ kecit pramāṇasya vivādinaḥ tat pratyāha samāsena vidadhat tadviniścayam [ ] tad eva jñānam āstheyaṃ pramāṇaṃ neṃdriyādikam pramāṇe eva tad jñānaṃ vaikatryādipramāṇavit [ ] nanu pramīyate yena pramāṇaṃ taditīraṇam pramāṇalakṣaṇasya syādiṃdriyādeḥ pramāṇatā [ ] tatsādhakatamatvasyāviśeṣāt tāvatā sthitiḥ prāmāṇyasyānyathā jñānaṃ pramāṇaṃ sakalaṃ na kim [ ] tatredaṃ ciṃtyate tāvad iṃdriyaṃ kimu bhautikam cetanaṃ vā prameyasya paricchittau pravartate [ ] na tāvad bhautikaṃ tasyācetanatvād ghaṭādivat mṛtadravyeṃdriyasyāpi tatra vṛttiprasaṃgataḥ [ ] pramātrādhiṣṭhitaṃ tac cet tatra varteta nānyathā kiṃ na svāpādyavasthāyāṃ tadadhiṣṭhānasiddhitaḥ [ ] ātmā prayatnavāṃs tasyādhiṣṭhānān nāprayatnakaḥ svāpādāv iti cet ko yaṃ prayatno nāma dehinaḥ [ ] prameye pramitāvābhimukhyaṃ caitad acetanam yady akiṃcitkaraṃ tatra paṭavat kim apekṣate [ ] cetanaṃ caitad evāstu bhāveṃdriyam abādhitam yat sādhakatamaṃ vittau pramāṇaṃ svārthayor iha [ ] etenaivottaraḥ pakṣaḥ ciṃtitaḥ saṃpratīyate tato nācetanaṃ kiṃcit pramāṇam iti saṃsthitam [ ] arthagrahaṇayogyatvam ātmanaś cet anātmakam sannikarṣaḥ pramāṇaṃ naḥ kathaṃcit kena vāryate [ ] tathāpariṇato hy ātmā pramiṇoti svayaṃ svabhuḥ yadā tadāpi yujyeta pramāṇaṃ kartṛsādhanam [ ] pramātā bhinna evātmapramāṇād yasya darśane tasyānyātmā pramātā syāt kin na bhedāviśeṣataḥ [ ] pramāṇaṃ yatra saṃbaṃddhaṃ sa pramāteti cen na kim kāyaḥ saṃbaddhasadbhāvāt tasya tena kathaṃcana [ ] pramāṇaphalasaṃbaṃdho pramātaitena dūṣitaḥ saṃyuktasamavāyasya siddheḥ pramitikāyayoḥ [ ] jñānātmakapramāṇena pramityā cātmanaḥ paraḥ samavāyo na yujyeta tādātmyapariṇāmataḥ [ ] tato nātyaṃtiko bhedaḥ pramātuḥ svapramāṇataḥ svāsaṃnirṇītarūpāyāḥ pramiteś ca phalātmanaḥ [ ] tathā ca yuktimatproktaṃ pramāṇaṃ bhāvasādhanam sato pi śaktibhedasya paryāyārthād anāśrayāt [ ] syāt pramātā pramāṇaṃ syāt pramitiḥ svaprameyavat ekāṃtābhedabhedau tu pramātrādigatau kva naḥ [ ] ekasyānekarūpatve virodho pi na yujyate mecakajñānavatprāyaściṃtitaṃ caitadaṃjasā [ ] saṃyogādi punar yena sannikarṣo 'bhidhīyate tatsādhakatamatvasya bhāvāt tasyāpramāṇatā [ ] satīṃdriyārthayos tāvat saṃyogenopajāyate svārthapramitir ekāṃtavyabhicārasya darśanāt [ ] kṣitidravyeṇa saṃyogo nayanāder yathaiva hi tasya vyomādināpyasti na ca tajjñānakāraṇam [ ] saṃyuktasamavāyaś ca śabdena saha cakṣuṣaḥ śabdajñānam akurvāṇo rūpaciccakṣur eva kim [ ] saṃyuktasamavetārthasamavāyo py abhāvayan śabdatvasya na netreṇa buddhiṃ rūpatvavitkaraḥ [ ] śrotrasyādyena śabdena samavāyaś ca tadvidam akurvan na tv aśabdasya jñānaṃ kuryāt kathaṃ tu vaḥ [ ] tasyaivādim aśabdeṣu śabdatvena samaṃ bhaveta samavetasamavāyaṃ sadvijñānam anādivat [ ] aṃtyaśabdeṣu śabdatve jñānam ekāṃtataḥ katham vidadhīta viśeṣasyābhāve yaugasya darśane [ ] tathāgatasya saṃyuktaviśeṣaṇatayā dṛśā jñānenādhīyamāne pi samavāyādivit kutaḥ [ ] yogyatāṃ kāṃcid āsādya saṃyogādir ayaṃ yadi kṣityādivit tad eva syāt tadā naivāstu saṃmatā [ ] svātmā svāvṛtivicchedaviśeṣasahitaḥ kvacit saṃvidaṃ janayann iṣṭaḥ pramāṇam avigānataḥ [ ] śaktiriṃdriyam ity etad anenaiva nirūpitaṃ yogyatāvyatirekeṇa sarvathā tadasaṃbhavāt [ ] pramāṇaṃ yena sārūpyaṃ kathyate 'dhigatiḥ phalam sannikarṣaḥ kutas tasya na pramāṇatvasaṃmataḥ [ ] sannikarṣe yathā saty apy arthādhigatiśūnyatā sārūpye pi tathā seṣṭā kṣaṇabhaṃgādiṣu svayam [ ] svasaṃvidapramāṇatvaṃ sārūpyeṇa vinā yadi kiṃ nārthavedanasyeṣṭaṃ pāraṃparyasya varjanāt [ ] sārūpyakalpane tatrāpy anavasthoditā na kim pramāṇaṃ jñānam evāstu tato nānyad iti sthitam [ ] mithyājñānaṃ pramāṇaṃ na samyag ity adhikārataḥ yathā yatrāvisaṃvādas tathā tatra pramāṇatā [ ] svārthe matiśrutajñānaṃ pramāṇaṃ deśataḥ sthitaṃ avadhyādi tu kārtsnyena kevalaṃ sarvavastuṣu [ ] anupaplutadṛṣṭīnāṃ caṃdrādiparivedanam tatsaṃkhyādiṣu saṃvādi na pratyāsannatādiṣu [ ] tathā grahoparāgādimātre śrutam avādhitam nāṃgulidvitayādau tanmānabhede 'nyathā sthite [ ] nanūpaplutavijñānaṃ pramāṇaṃ kiṃ na deśataḥ svapnādāv iti nāniṣṭaṃ tathaiva pratibhāsanāt [ ] pramāṇavyavahāras tu bhūyaḥ saṃvādam āśritaḥ gaṃdhadravyādivadbhūyo visaṃvādaṃ tadanyathā [ ] yeṣām ekāṃtato jñānaṃ pramāṇam itarac ca na teṣāṃ viplutavijñānapramāṇetaratā kutaḥ [ ] svarūpe sarvavijñānapramāṇatve matakṣatiḥ bahirvikalpavijñānapramāṇatve pramāṃtaram [ ] na caikatra pramāṇatvāpramāṇatve virodhinī pratyakṣatvaparokṣatve yathaikatrāpi saṃvidi [ ] svasaṃvinmātratodhyakṣā yathā buddhis tathā yadi vedyākāravinirmuktā tadā sarvasya buddhatā [ ] tayā yathā parokṣatvaṃ hṛtsaṃvitter ato pi cet buddhāder api jāyeta jāḍyaṃ mānavivarjitam [ ] yaiva buddheḥ svayaṃ vittir vedyākāravimuktatā saivety adhyakṣataiveṣṭā tasyāṃ kimaparokṣatā [ ] sarveṣām api vijñānaṃ svavedyātmani vedakam nānyavedyātmanīti syād viruddhākāram aṃjasā [ ] svavyāpārasamāsakto nyavyāpāranirutsukaḥ sarvo bhāvaḥ svayaṃ vakti syādvādanyāyaniṣṭhatām [ ] caṃdre caṃdratvavijñānam anyatsaṃkhyāpravedanam pratyāsannatvavic cānyatvekādyākāravin na cet [ ] haṃta mecakavijñānaṃ tathā sarvajñatā kutaḥ prasiddhyed īśvarasyeti nānākāraikavitsthitiḥ [ ] eka eveśvarajñānasyākāraḥ sarvavedakaḥ tādṛśo yadi saṃbhāvyaḥ kiṃ brahmaivaṃ na te matam [ ] taccetanetarākārakaraṃbitavapuḥ svayam bhāvaikam eva sarvasya saṃvittibhavanaṃ param [ ] yady ekasya viruddhyeta nānākārāvabhāsitā tadā nānārthabodho pi naikākāro vatiṣṭhate [ ] nānā jñānāni neśasya kalpanīyāni dhīmatā kramāt sarvajñatāhāner anyathā nanu saṃdhitaḥ [ ] tasmād ekam anekātmaviruddham api tattvataḥ siddhaṃ vijñānam anyac ca vastusāmarthyataḥ svayam [ ] pramāṇam avisaṃvādi jñānām ity upavarṇyate kaiścit tatrāvisaṃvādo yady ākāṃkṣānivartanam [ ] tadā svapnādivijñānaṃ pramāṇam anuṣajyate tataḥ kasyacid artheṣu paritoṣasya bhāvataḥ [ ] arthakriyā sthitiḥ proktā vimuktiḥ sā na tatracet śābdādāv iva tadbhāvo stv abhiprāyanivedanāt [ ] prāmāṇyaṃ vyavahāreṇa śāstraṃ mohanivartanam tato paryanuyojyāś cet tatraite vyavahāriṇaḥ [ ] śāstreṇa kriyatāṃ teṣāṃ kathaṃ mohanivartanam tadaniṣṭau tu śāstrāṇāṃ pratītir vyāhatā na kim [ a] yuktyā yan na ghaṭāmeti dṛṣṭvāpi śraddadhe na tat iti bruvan pramāṇatvaṃ yuktyā śraddhātum arhati [ ] tathāsati pramāṇasya lakṣaṇaṃ nāvatiṣṭhate parihartum ativyāpter aśakyatvāt kathaṃcana [ ] kṣaṇakṣayādibodhe vimuktyabhāvāc ca dūṣyate pratyekṣe pi kim avyāptyā taduktaṃ naiva lakṣaṇam [ ] kṣaṇikeṣu vibhinneṣu paramāṇuṣu sarvataḥ saṃbhavo py avimokṣasya na pratyakṣānumānayoḥ [ ] ajñātārthaprakāśaś cel lakṣaṇaṃ paramārthataḥ gṛhītagrahaṇān na syād anumānasya mānatā [ ] pratyakṣeṇa gṛhīte pi kṣaṇikatvādivastuni samāropavyavacchedāt prāmāṇyaṃ laiṃgikasya cet [ ] smṛtyādivedanasyātaḥ pramāṇatvam apīṣyatām mānadvaividhyavidhvaṃsanibaṃdhanam abādhitam [ ] mukhyaṃ prāmāṇyam adhyakṣe 'numāne vyāvahārikam iti bruvan na bauddhaḥ syāt pramāṇe lakṣaṇadvayam [ ] tatrāpūrvārthavijñānaṃ niścitaṃ bādhavarjitam pramāṇam iti yo py āha so py etena nirākṛtaḥ [ ] gṛhītagrahaṇābhedād anumānādi saṃvidaḥ pratyabhijñānanirṇītanityaśabdādivastuṣu [ ] pratyakṣaṃ pratyabhijñā ced grahītagrahaṇaṃ bhavet tato nyac cet tathāpy evaṃ pramāṇāṃtaratā ca te [ ] pratyakṣeṇāgrahīte rthe pratyabhijñā pravartate pūrvottaravivartaikagrāhāc cen nākṣajatvataḥ [ ] pūrvottaravivartākṣajñānābhyāṃ so pajanyate tanmātram iti cet kve yaṃ tadbhinnaikatvavedinī [ ] vivartābhyām abhedaś ced ekatvasya kathaṃcana tadgrāhiṇyāḥ kathaṃ na syāt pūrvārthatvaṃ smṛter iva [ ] tattvārthavyavasāyātmajñānaṃ mānam itīyatā lakṣaṇena gatārthatvād vyartham anyam anyadviśeṣaṇam [ ] gṛhītam agṛhītaṃ vā svārthaṃ yadi vyavasyati tan na loke na śāstreṣu vijahāti pramāṇatām [ ] bādhavarjitatāpy eṣā nāparā svārthaniścayāt sa ca prabādhyate ceti vyāghātān mugdhabhāṣitam [ ] bādhakodayataḥ pūrvaṃ vartate svārthaniścayaḥ tasyodaye tu bādhyetety etad apy avicāritam [ ] apramāṇād api jñānāt pravṛtter anuṣaṃgataḥ bādhakodbhūtitaḥ pūrvaṃ pramāṇaṃ viphalaṃ tataḥ [ ] bādhakābhāvavijñānāt pramāṇatvasya niścaye pravṛttyaṃge tad eva syāt pratipattuḥ pravartakam [ ] tasyāpi ca pramāṇatvaṃ bādhakābhāvavedanāt parasmād ity avasthānaṃ ka nāmaivaṃ labhemahi [ ] bādhakābhāvabodhasya svārthanirṇītir eva cet bādhakāṃtaraśūnyatvanirṇītiḥ prathame tra sā [ ] saṃpratyayo yathā yatra tathā tatrāstv itīraṇe bādhakābhāvavijñānaparityāgaḥ samāgataḥ [ ] yac cārthavedane bādhābhāvajñānaṃ tad eva naḥ syād arthasādhanaṃ bādhasadbhāvajñānam anyathā [ ] tatra deśāṃtaradīni vāpekṣya yadi jāyate tadā suniścitaṃ bādhābhāvajñānaṃ na cānyathā [ ] aduṣṭakāraṇārabdham ity etac ca viśeṣaṇam pramāṇasya na sāphalyaṃ prayātyavyabhicārataḥ [ ] duṣṭakāraṇajanyasya svārthanirṇītyasaṃbhavāt sarvasya vedanasyotthaṃ tata evānumānataḥ [ ] svārthaniścāyakatvenāduṣṭakāraṇajanyatā tathā ca tattvam ity etatparasparasamāśritam [ ] yadi kāraṇadoṣasyābhāvajñānaṃ ca gamyate jñānasyāduṣṭahetūtthā tadā syād anavasthitiḥ [ ] hetudoṣavihīnatvajñānasyāpi pramāṇatā svahetudoṣaśūnyatvajñānāt tasyāpi sā tataḥ [ ] gatvā sudūram ekasya tadabhāve pi mānatā yadīṣṭā tadvad eva syād ādyajñānasya sā na kim [ ] svataḥ sarvapramāṇānāṃ prāmāṇyam iti kecana yataḥ svato 'satī śaktiḥ kartuṃ nānyena śakyate [ ] teṣāṃ svato pramāṇatvam ajñānānāṃ bhaven na kim tata eva viśeṣasyābhāvāt sarvatra sarvathā [ ] yathārthabodhakatvena pramāṇatvaṃ vyavasthitam arthānyathātvahetūtthadoṣajñānād apohyate [ ] tathā mithyāvabhāsitvād apramāṇatvam āditaḥ arthayāthātmyahetūtthaguṇajñānād apohyate [ ] yady athārthānyathābhāvābhāvajñānaṃ nigadyate arthayāthātmyavijñānam apramāṇatvabādhakam [ ] tathaivāstv arthayāthātmyābhāvajñānaṃ svataḥ satām arthānyathātvavijñānaṃ pramāṇatvāpavādakam [ ] vijñānakāreṇa doṣābhāvaḥ prajñāyate guṇaḥ yathā tathā guṇābhāvo doṣaḥ kiṃ nātra manyate [ ] yathā ca jātamātrasyāduṣṭā netrādayaḥ svataḥ jātyaṃdhādes tathā duṣṭāḥ śiṣṭais te kiṃ na lakṣitāḥ [ ] dhūmādayo yathāgnyādīn vinā na syuḥ svabhāvataḥ dhūmābhāsādayas tadvat tair vinā saṃty abādhitāḥ [ ] yathā śabdāḥ svatas tattvapratyāyanaparās tathā śabdābhāsās tathā mithyāpadārthapratipādakāḥ [ ] duṣṭe vaktari śabdasya doṣas tat saṃpratīyate guṇo guṇavatīti syād vaktradhīnam idaṃ dvayam [ ] yathā vaktṛguṇair doṣaḥ śabdānāṃ vinivartyate tathā guṇo pi taddoṣair iti spṛṣṭam abhīkṣyate [ ] yathā ca vakrabhāvena na syur doṣās tadāśrayāḥ tadvad eva guṇā na syur meghadhvānādivaddhruvam [ ] tataś ca codanābuddhir na pramāṇaṃ na vā pramā āptānāptopadeśotthabuddhes tattvaprasiddhitaḥ [ ] evaṃ samatvasaṃsiddhau pramāṇatvetaratvayoḥ svata eva dvayaṃ siddhaṃ sarvajñāneṣv itītare [ ] tannānabhyāsakāle pi tathā bhāvānuṣaṃgataḥ na ca pratīyate tādṛk paratas tattvanirṇayāt [ ] dvayaṃ parata eveti kecit tad api sākulam svabhyastaviṣaye tasya parāpekṣānabhīkṣaṇāt [ ] tatra pravṛttisāmarthyāt pramāṇatvaṃ pratīyate pramāṇasyārthavattvaṃ cen nānavasthānuṣaṃgataḥ [ ] pramāṇena pratīte rthe yat tad deśopasarpaṇam sā pravṛttiḥ phalasyāptis tasyāḥ sāmarthyam iṣyate [ ] prasūtir vā sajātīyavijñānasya yadā tadā phalaprāptir api jñātā sāmarthyaṃ nānyathā sthitiḥ [ ] tadvijñānasya cānyasmāt pravṛttibalato yadi tadānavasthitis tāvat kenātra pratihanyate [ ] svatas tadbalato jñānaṃ pramāṇaṃ cet tathā na kim prathamaṃ kathyate jñānaṃ pradveṣo nirnibaṃdhanam [ ] etenaiva sajātīyajñānotpattau niveditā anavasthānyatas tasya pramāṇatvavyavasthiteḥ [ ] na ca sāmarthyavijñāne prāmāṇyānavadhāraṇe tannibaṃdhanam ādyasya jñānasyaitat prasiddhyati [ ] jñātaprāmāṇyato mānāt pravṛttau kena vāryate parasparāśrayo doṣo vṛttiprāmāṇyasaṃvidoḥ [ ] avijñātapramāṇatvāt pravṛttiś cedvṛthā bhavet prāmāṇyavedanaṃ vṛtteḥ kṣaure nakṣatrapṛṣṭivat [ ] arthasaṃśayato vṛttir anenaiva nivāritā anarthasaṃśayād vāpi nivṛttir viduṣām iva [ ] paralokaprasiddhyartham anuṣṭhānaṃ pramāṇataḥ siddhaṃ tasya bahukleśavittatyāgātmakatvataḥ [ ] iti bruvan mahāyātrāvivāhādiṣu vartanam saṃdehād abhimanyena jāḍyād eva mahātamāt [ ] tasmāt prekṣāvatāṃ yuktā pramāṇād eva niścitāt sarvapravṛttir anyeṣāṃ saṃśayāder api kvacit [ ] prekṣāvatā punar jñeyā kadācit kasyacit kvacit aprekṣakāritāpy evam anyatrāśeṣavedinaḥ [ ] tatrābhyāsāt pramāṇatvaṃ niścitaḥ svata eva naḥ anabhyāse tu parata ity āhuḥ kecid aṃjasā [ ] tac ca syādvādinām eva svārthaniścayanāt sthitam na tu svaniścayonmuktaniḥśeṣajñānavādinām [ ] svataḥ pramāṇatā yasya tasyaiva parataḥ katham tadaivaikatra naivātaḥ syādvādo sti virodhataḥ [ ] naitatsādhu pramāṇasyānekarūpatvaniścayāt prameyasya ca nirbhāgatattvavādas tu bādhyate [ ] tatra yat parato jñānam anabhyāse pramāṇatām yāti svataḥ svarūpe tat tām iti kvaikarūpatā [ ] svārthayor api yasya syād anabhyāsāt pramāṇatā pratikṣaṇavivartādau tasyāpi parato na kim [ ] syādvādo na viruddho taḥ syāt pramāṇaprameyayoḥ svadravyādivaśād vāpi tasya sarvatra niścayaḥ [ ] nanv asiddhaṃ pramāṇaṃ kiṃ svarūpeṇa nirūpyate śaśaśṛṃgavad ity eke tad apy unmattabhāṣitam [ ] sveṣṭāniṣṭārthayor jñātur vidhānapratiṣedhayoḥ siddhiḥ pramāṇasaṃsiddhyabhāve sti na hi kasyacit [ ] nanu pramāṇasaṃsiddhiḥ pramāṇāṃtarato yadi tadānavasthitir no cet pramāṇānveṣaṇaṃ vṛthā [ ] ādyapramāṇataḥ syāc cet pramāṇāṃtarasādhanam tataś cādyapramāṇasya siddher anyonyasaṃśrayaḥ [ ] prasiddhenāprasiddhasya vidhānam iti nottaram prasiddhasyāvyavasthānāt pramāṇavirahe kvacit [ ] parānurodhamātreṇa prasiddho rtho yadīṣyate pramāṇasādhanas tadvatpramāṇaṃ kiṃ na sādhanam [ ] parābhyupagamaḥ kena siddhyatīty api ca dvayoḥ samaḥ paryanuyogaḥ syāt samādhānaṃ ca nādhikam [ ] tatpramāṇaprameyādivyavahāraḥ pravartate sarvasyāpy avicāreṇa svapnādivad itītare [ ] teṣāṃ saṃvittimātraṃ syād anyad vā tattvam aṃjasā siddhaṃ svato yathā tadvatpramāṇam apare viduḥ [ ] yathā svātaṃtryam abhyastaviṣaye 'sya pratīyate prameyasya tathā neti na pramānveṣaṇaṃ vṛthā [ ] parato pi pramāṇatvenabhyastaviṣaye kvacit nānāvasthānuṣajyeta tata eva vyavasthiteḥ [ ] dṛṣṭādṛṣṭanimittānāṃ vaicitryād iha dehinām jāyate kvacid abhyāso 'nabhyāso vā kathaṃcana [ ] tatprasiddhena mānena svato siddhasya sādhanam prameyasya yathā tadvatpramāṇasyeti dhīdhanāḥ [ ] evaṃ vicārato mānasvarūpe tu vyavasthite tatsaṃkhyānaprasiddhyarthaṃ sūtre dvitvasya sūcanāt [ ] pramāṇam ekam eveti kecit tāvat kudṛṣṭayaḥ pratyakṣamukhyam anyasmād arthanirṇītyasaṃbhavāt [ ] teṣāṃ tatkiṃ svataḥ siddhaṃ pratyakṣāṃtarayo pi vā svasya sarvasya cety etad bhavet paryanuyojanam [ ] svasyaiva cet svataḥ siddhaṃ naṣṭaṃ gurvādikīrtanam tadavyaktapramāṇatvasiddhyabhāvāt kathaṃcana [ ] pratyakṣāṃtarato vāpyasiddhau syād anavasthitiḥ kvacit svato 'nyato veti syādvādāśrayaṇaṃ param [ ] sarvasyāpi svato dhyakṣapramāṇam iti cen matiḥ kenāvagamyatām etadadhyakṣād yogividviṣām [ ] pramāṇāṃtarato jñāne naikamānavyavasthitiḥ apramāṇād gatāv eva pratyakṣaṃ kimu poṣyate [ ] pratyakṣam anumānaṃ ca pramāṇe iti kecana teṣām api kuto vyāptiḥ siddhyen mānāṃtarād vinā [ ] pratyakṣānupalaṃbhābhyāṃ na tāvat tatprasādhanam tayoḥ sannihitārthatvāt trikālāgocaratvataḥ [ ] kāraṇānupalaṃbhāc cet kāryakāraṇatānumā vyāpakānupalaṃbhāc ca vyāpyavyāpakatānumā [ ] tadvyāptisiddhir apy anyānumānād iti na sthitiḥ parasparam api vyāptisiddhāv anyonyam āśrayaḥ [ ] yogipratyakṣato vyāptisiddhir ity api durghaṭam sarvatrānumitijñānābhāvāt sakalayoginaḥ [ ] parārthānumitau tasya vyāpāro pi na yujyate ayoginaḥ svayaṃ vyāptim ajānānaḥ janān prati [ ] yogino pi prati vyarthaḥ svasvārthānumitāv iva samāropaviśeṣasyābhāvāt sarvatra yoginām [ ] etenaiva hatādeśayogipratyakṣato gatiḥ saṃbaṃdhasyāsphuṭaṃ dṛṣṭety anumānaṃ nirarthakam [ ] tasyāviśadarūpatve pratyakṣatvaṃ virudhyate pramāṇāṃtaratāyāṃ tu dve pramāṇe na tiṣṭhataḥ [ ] na cāpramāṇato jñānād yukto vyāptiviniścayaḥ pratyakṣādiprameyasyāpy evaṃ nirṇītasaṃgataḥ [ ] pratyakṣaṃ mānasaṃ yeṣāṃ saṃbaṃdhaṃ liṃgaliṃginoḥ vyāptyā jānāti te py arthe tīṃdriye kimu kurvate [ ] yatrākṣāṇi pravartaṃte mānasaṃ tatra vartate no nyatrākṣādivaidhuryaprasaṃgāt sarvadehinām [ ] saṃbaṃdho tīṃdriyārtheṣu niścīyetānumānataḥ tadvyāptiś cānumānenānyena yāvat pravartate [ ] pratyakṣaniścitavyāptir anumāno navasthitiḥ nivartyate tathānyonyasaṃśrayaśceti kecana [ ] teṣāṃ tanmānasaṃ jñānaṃ spaṣṭaṃ na pratibhāsate aspaṣṭaṃ ca kathaṃ nāma pratyakṣam anumānavat [ ] tarkaś caivaṃ pramāṇaṃ syāt smṛtisaṃjñā ca kiṃ na vaḥ mānasatvāvisaṃvādāviśeṣān nānumān yathā [ ] tarkāder mānase dhyakṣe yadi liṃgānapekṣiṇaḥ syād aṃtarbhavanaṃ siddhis tato dhyakṣānumānayoḥ [ ] tadā mateḥ pramāṇatvaṃ nāmāṃtaravṛtto stu naḥ tadvad evāvisaṃvādāc chrutasyeti pramātrayam [ ] nākṣaliṃgavibhinnāyāḥ sāmagryā vacanātmanaḥ samudbhūtasya bodhasya mānāṃtaratayā sthiteḥ [ ] yatreṃdriyamanodhyakṣaṃ yogipratyakṣam eva vā laiṃgikaṃ vā śrutaṃ tatra vṛtter mānāṃtaraṃ bhavet [ ] pratyakṣād anumānasya mā bhūt tarhi vibhinnatā tadarthe vartamānatvāt sāmagrībhitsamā śrutiḥ [ ] śabdaliṃgākṣasāmagrībhedād yeṣāṃ pramātr ayaṃ teṣām aśabdaliṃgākṣajanmajñānaṃ pramāṃtaram [ ] yogipratyakṣam apy akṣasāmagrījanitaṃ na hi sarvārthāgocaratvasya prasaṃgād asmadādivat [ ] pratyakṣaṃ viśadaṃ jñānaṃ yogītarajaneṣu cet smaraṇāder avaiśadyād apratyakṣatvam āgatam [ ] liṃgaśabdānapekṣatvād anumāgamatā ca na saṃvādān nāpramāṇatvam iti saṃkhyā pratiṣṭhitā [ ] etenaiva catuḥpaṃcaṣaṭpramāṇābhidhāyināṃ sveṣṭasaṃkhyākṣatir jñeyā smṛtyādes tadvibhedataḥ [ ] tadvakṣyamāṇakān sūtradvayasāmarthyataḥ sthitaḥ dvitvasaṃkhyāviśeṣo trākalaṃkair abhyadhāyi yaḥ [ ] pratyakṣaṃ viśadaṃ jñānaṃ tridhā śrutam aviṣṇutam parokṣaṃ pratyabhijñādī pramāṇe iti saṃgrahaḥ [ ] tridhā pratyakṣam ity etatsūtravyāhatam īkṣyate pratyakṣātīṃdriyatvasya niyamād ity apeśalam [ ] atyakṣasya svasaṃvittiḥ pratyakṣasyāvirodhataḥ vaiśadyāṃśasya sadbhāvāt vyavahāraprasiddhitaḥ [ ] pratyakṣam ekam evoktaṃ mukhyaṃ pūrṇetarātmakam akṣam ātmānam āśritya vartamānam atīṃdriyam [ ] parāptahatayākhyātaṃ parokṣaṃ tu matiśrutam śabdārthaśrayaṇād evaṃ na doṣaḥ kaścid īkṣyate [ ] ādye parokṣam ity āha sūtrapāṭhakramād iha jñeyādyatā matir mukhyā śrutasya guṇabhāvataḥ [ ] buddhau tiryagavasthānān mukhyaṃ vādyatvam etayoḥ avadhyāditrayāpekṣaṃ kathaṃcin na virudhyate [ ] parokṣam iti nirdeśo jñānam ity anuvartanāt tato matiśrute jñānaṃ parokṣam iti nirṇayaḥ [ ] dvayor ekena nāyuktā samānāśrayatā yathā godau grāma iti prāyaḥ prayogasyopalakṣaṇāt [ ] pramāṇe iti vā dvitve pratijñāte pramāṇayoḥ pramāṇam iti varteta parokṣam iti saṃgatau [ ] jñānānuvartanāt tatra nājñānasya parokṣatā pramāṇasyānuvṛtter na parokṣasyāpramāṇatā [ ] akṣebhyo hi parāvṛttaṃ parokṣaṃ śrutam iṣyate yathā tathā smṛtiḥ saṃjñā ciṃtā cābhinibodhikam [ ] avagrahādivijñānam akṣād ātmā vidhānataḥ parāvṛttatayāmnātaṃ pratyakṣam api deśataḥ [ ] aspaṣṭaṃ vedanaṃ kecid arthānālaṃbanaṃ viduḥ manorājyādi vijñānaṃ yathaivety eva durghaṭam [ ] spaṣṭasyāpy avabodhasya nirālaṃbanatāptitaḥ yathā caṃdradvayajñānasyeti kvārthasya niṣṭhitaḥ [ ] anālaṃbanatā vyāptir na spaṣṭatvasya te yathā aspaṣṭatvasya tadviddhi laiṃgikasyārthavattvataḥ [ ] tasyānarthāśrayatve rthe syāt pravartakatā kutaḥ saṃbaṃdhāc cen na tasyāpi tathātve nupapattitaḥ [ ] liṃgaliṃgidhiyor evaṃ pāraṃparyeṇa vastuni pratibaṃdhāt tadābhāsaśūnyayor apy avaṃcanam [ ] maṇiprabhāmaṇijñāne pramāṇatvaprasaṃgataḥ pāraṃparyān maṇau tasya pratibaṃdhāviśeṣataḥ [ ] tac cānumānam iṣṭaṃ cen na dṛṣṭāṃtaḥ prasiddhyati pramāṇatvavyavasthāne numānasyārthalabdhitaḥ [ ] maṇipradīpaprabhayor maṇibuddhyābhidhāvataḥ mithyājñānaviśeṣe pi viśeṣo rthakriyāṃ prati [ ] yathā tathā yathārthatve py anumānaṃ tadobhayoḥ nārthakriyānurodhena pramāṇatvaṃ vyavasthitam [ ] dṛṣṭaṃ yad eva tatprāptam ity ekatvāvirodhataḥ pratyakṣaṃ kasyacit tac cen na syād dhāṃtaṃ virodhataḥ [ ] apramāṇatvapakṣe pi tasya dṛṣṭāṃtatā kṣatiḥ pramāṇāṃtaratāyāṃ tu saṃkhyā na vyavatiṣṭhate [ ] tataḥ sālaṃbanaṃ siddham anumānaṃ pramātvataḥ pratyakṣavadviparyāso vānyathā syād durātmanām [ ] arthasyāsaṃbhave bhāvāt pratyakṣe pi pramāṇatām tadavyāptaṃ pramāṇatvam arthavattvena manyatām [ ] prāpyārthāpekṣayeṣṭaṃ cet tathādhyakṣe pi te stu tat tathā vādhyakṣam apy arthānālaṃbanam upasthitam [ ] anumānam avastv eva sāmānyam avalaṃbate prāpayaty artham ity etat sacetānāpya mokṣate [ ] tasmād vastv eva sāmānyaviśeṣātmakam aṃjasā viṣayīkurute dhyakṣaṃ yathā tadvac ca laiṃgikam [ ] smṛtyādiśrutaparyaṃtam aspaṣṭam api tattvataḥ svārthālaṃbanam ity arthaśūnyaṃ tannibham eva naḥ [ ] mipratyakṣam anyad ity āha parokṣād uditāt paraṃ avadhyāditrayaṃ jñānaṃ pramāṇaṃ cānuvṛttitaḥ [ ] jñānagrahaṇasaṃbaṃdhāt kevalāvadhidarśane vyudasyete pramāṇābhisaṃbaṃdhād apramāṇatā [ ] samyag ity adhikārāc ca vibhaṃgajñānavarjanaṃ pratyakṣam iti śabdāc ca parāpekṣān nivartanam [ ] pratyakṣalakṣaṇaṃ prāhuḥ spaṣṭaṃ sākāram aṃjasā dravyaparyāyasāmānyaviśeṣārthātmavedanam [ ] sūtrakārā iti jñeyam ākalaṃkāvabodhane pradhānaguṇabhāvena lakṣaṇasyābhidhānataḥ [ ] lakṣaṇaṃ samam etāvān viśeṣo 'śeṣagocaraṃ akramaṃ karaṇātītam akalaṃkaṃ mahīyasām [ ] etac cāsti sunirṇītāsaṃbhavadbādhakatvataḥ svasaṃvittivad ity ukta vyāsato nyatra gamyatām [ ] pratyakṣaṃ kalpanāpoḍham abhrāṃtam iti kecana teṣām aspaṣṭarūpā syāt pratītiḥ kalpanāthavā [ ] svārthavyavasitir nānyā gatir asti vicārataḥ abhilāpavatī vittis tadyogyā vāpi sā yataḥ [ ] tatrādyakalpanāpoḍhe pratyakṣe siddhasādhanam spaṣṭe tasminn avaiśadyavyavacchedasya sādhanāt [ ] aspaṣṭapratibhāsāyāḥ pratīter anapohane pratyakṣasyānumānāder bhedaḥ kenāvabudhyate [ ] svārthavyavasitis tu syāt kalpanā yadi saṃmatā tadā lakṣaṇam etat syād asaṃbhāvy eva sarvathā [ ] saṃhṛtya sarvataś cittaṃ stimitenāṃtarātmanā sthito pi cakṣuṣā rūpaṃ svaṃ ca spaṣṭaṃ vyavasyati [ ] punar vikalpayan kiṃcid āsīn me svārthaniścayaḥ īdṛg ity eva budhyena prāgiṃdriyagatāv api [ ] tato nyathāsmṛtir na syāt kṣaṇikatvādivat punaḥ abhyāsādiviśeṣas tu nānyaḥ svārthaviniścayāt [ ] tadakalpakam arthasya sāmarthyena samudbhavāt arthakṣaṇavad ity eke na viruddhasyaiva sādhanam [ ] jātyādyātmakabhāvasya sāmarthyena samudbhavāt savikalpakam eva syāt pratyakṣaṃ sphuṭam aṃjasā [ ] yathāvabhāsato kalpāt pratyakṣāt prabhavann api tatpṛṣṭhato vikalpaḥ syāt tathāthākṣāc ca sa sphuṭaḥ [ ] na ca jātyādirūpatvam arthasyāsiddham aṃjasā nirbādhabodhavidhvastasamastāreki tattvataḥ [ ] saṃketasmaraṇopāyā dṛṣṭasaṃkalpanātmikā naiṣā vyavasitiḥ spaṣṭā tato yuktākṣajanmani [ ] svato hi vyavasāyātmapratyakṣaṃ sakalaṃ matam abhidhānādyapekṣāyām anyonyāśrayaṇāt tayoḥ [ ] svābhidhānaviśeṣasya niścayo yady apekṣate svābhilāṣāṃtaraṃ nūnam anavasthā tadā na kim [ ] gatvā sudūram apy evam abhidhānasya niścaye svābhilāpānapekṣasya kimu nārthasya niścayaḥ [ ] abhidhānaviśeṣaś cet svasminn arthe ca niścayam kurvan dṛṣṭaḥ svaśaktyaiva liṃgādyarthe pi tādṛśaḥ [ ] śābdasya niścayo rthasya śabdāpekṣo stv abādhitaḥ liṃgajanmākṣajanmā ca tadapekṣo bhidhīyate [ ] tataḥ pratyakṣam āstheyaṃ mukhyaṃ vā deśato pi vā syān nirvikalpakaṃ siddhaṃ yuktyā syāt savikalpakaṃ [ ] sarvathā nirvikalpatve svārthavyavasitiḥ kutaḥ sarvathā savikalpatve tasya syāc chabdakalpanā [ ] savitarkavicārā hi paṃca vijñānadhātavaḥ nirūpaṇānusmaraṇavikalpenāvikalpakāḥ [ ] ity evaṃ svayam iṣṭatvān naikāṃtenāvikalpakaṃ pratyakṣaṃ yuktam āsthātuṃ parasyāpi virodhataḥ [ ] vidhūtakalpanājālaṃ yogipratyakṣam eva cet sarvathā lakṣaṇāvyāptidoṣaḥ kenāsya vāryate [ ] laukikī kalpanāpoḍhā yato dhyakṣaṃ tad eva cet śāstrīyā sāsti tatreti naikāṃtenāvikalpakam [ ] tadapāye ca buddhasya na syād dharmopadeśanā kuṭyāder yā na sā tasyety etatpūrvaṃ viniścitaṃ [ ] ye pi cātmamano kṣārthasannikarṣodbhavaṃ viduḥ pratyakṣaṃ neśvarādhyakṣaṃ saṃgrahas taiḥ kṛto bhavet [ ] neśvarasyākṣajajñānaṃ sarvārthaviṣayatvataḥ nākṣaiḥ sarvārthasaṃbaṃdhaḥ sahaikasyāsti sarvathā [ ] yogajāj jñāyate yat tu jñānaṃ dharmaviśeṣataḥ na saṃnikarṣajaṃ tasmād iti na vyāpi lakṣaṇaṃ [ ] sautrādivṛttir adhyakṣam ity apy etena ciṃtitaṃ tasyā vicāryamāṇāyā virodhaś ca pramāṇataḥ [ ] puṃsaḥ satsaṃprayoge yad iṃdriyāṇāṃ prajāyate tad eva vedanaṃ yuktaṃ pratyakṣam iti kecana [ ] tatsvārthavyavasāyātmavidhā pratyakṣam aṃjasā jñānaṃ viśadam anyat tu parokṣam iti saṃgrahaḥ [ ] matyādiṣv avabodheṣu smṛtyādīnām asaṃgrahaḥ ity āśaṃkyāha matyādisūtraṃ matyātmanāṃ vide [ ] matir eva smṛtiḥ saṃjñā ciṃtā vābhinibodhakam nārthāṃtaraṃ matijñānāvṛticchedaprasūtitaḥ [ ] iti śabdāt prakārārthād buddhir medhā ca gṛhyate prajñā ca pratibhābhāvaḥ saṃbhavopamitī tathā [ ] kathaṃcid vyapadeśādibhede py etadabhinnatā na virodham adhiṣṭhātum īṣṭe prātītikatvataḥ [ ] buddhir mateḥ prakāraḥ syād arthagrahaṇaśaktikā medhā smṛteḥ tathā śabdasmṛtiśaktir manasvinām [ ] ūhāpohātmikā prajñā ciṃtāyāḥ pratibhopamā sādṛśyopādhike bhāve sādṛśye tadviśeṣaṇe [ ] pravartamānā keṣāṃcid dṛṣṭā sādṛśyasaṃvidaḥ saṃjñāyāḥ saṃbhavādy astu laiṃgikasya tathāgateḥ [ ] pratyekam iti śabdasya tataḥ saṃgatir iṣyate samāptau ceti śabdo yaṃ sūtre smin na virudhyate [ ] smṛteḥ pramāṇatāpāye saṃjñāyā na pramāṇatā tadapramāṇatāyāṃ tu ciṃtā na vyavatiṣṭhate [ ] tadapratiṣṭhitau kvātra mānaṃ nāma pravartate tadapravartane dhyakṣaprāmāṇyaṃ nāvatiṣṭhate [ ] tataḥ pramāṇaśūnyatvāt prameyasyāpi śūnyatā sāpi mānād vinā neti kim apy astīti sākulam [ ] tasmāt pravartakatvena pramāṇatve tra kasyacit smṛtyādīnāṃ pramāṇatvaṃ yuktam uktaṃ ca kaiścana [ ] akṣajñānair anusmṛtya pratyabhijñāya ciṃtayet ābhimukhyena tadbhedān viniścitya pravartate [ ] akṣajñānair viniścitya sarva eva pravartate iti bruvan svacittādau pravartata iti smṛteḥ [ ] gṛhītagrahaṇāt tatra na smṛteś cet pramāṇatā dhārāvāhyakṣavijñānasyaivaṃ labhyeta kena sā [ ] viśiṣṭasyopayogasyābhāve sāpi na cen matā tadabhāve smaraṇe py akṣajñānavanmānatāstu naḥ [ ] smṛtyā svārthaṃ paricchidya pravṛttau na ca bādhyate yena prekṣāvatāṃ tasyāḥ pravṛttir vinivāryate [ ] smṛtimūlābhilāṣāder vyavahāraḥ pravartakaḥ na pramāṇaṃ yathā tadvadakṣadhīmūlikā smṛtiḥ [ ] ity ācakṣaṇiko nāmānumāmaṃsta pṛthakpramā pratyakṣaṃ taddhi tanmūlam iti cārvākatāgatiḥ [ ] svārthaprakāśakatvena pramāṇam anumā yadi smṛtir astu tathā nābhilāṣādis tadabhāvataḥ [ ] samāropavyavacchedas samaḥ smṛtyanumānataḥ svārthe pramāṇatā tena naikatrāpi nivāryate [ ] smṛtir na laiṃgikaṃ liṃgajñānābhāve pi bhāvataḥ saṃbaṃdhasmṛtivan na syād anavasthānam anyathā [ ] parāparānumānānāṃ kalpanasya prasaṃgataḥ vivakṣitānumānasyāpy anumānāṃtarāj janau [ ] nāpramāṇātmano smṛtyā saṃbaṃdhaḥ siddham ṛcchati pramāṇānarthakatvasya prasaṃgāt sarvavastuni [ ] smṛtis tad iti vijñānam arthātīte bhavet katham syād arthavad iti sveṣṭaṃ yāti bauddhasya lakṣyate [ ] pratyakṣam arthavan na syād atīte rthe samudbhavat tasya smṛtivad evaṃ hi tadvad eva ca laiṃgikam [ ] nārthāj janmopapadyeta pratyakṣasya smṛter iva tadvat sa eva tadbhāvād anyathā na kṣaṇakṣayaḥ [ ] arthākāratvato dhyakṣaṃ yadarthasya prabodhakaṃ tata eva smṛtiḥ kiṃ na svārthasya pratibodhakā [ ] aspaṣṭatvena cen nānumāne py evaṃ prasaṃgataḥ prāpyārthenārthavattā ced anumānāyāḥ smṛter na kim [ ] manasā janyamānatvāt saṃskārasahakāriṇā sarvatrārthānapekṣeṇa smṛtir nārthavatī yadi [ ] tadā saṃskāra eva syāt pravṛttis tannibaṃdhanā tatrāsaṃbhavato rthe ced vyaktam īśvaraceṣṭitam [ ] pratyakṣaṃ mānasaṃ jñānaṃ smṛter yasyāḥ prajāyate sā hi pramāṇasāmagrīvartinī syāt pravartikā [ ] pramāṇatvād yathā liṃgiliṃgasaṃbaṃdhasaṃsmṛtiḥ liṃgijñānaphalety āha sāmagrīmānavādinaḥ [ ] tad apy asaṃgataṃ liṃgijñānasyaiva prasaṃgataḥ pratyakṣatvakṣater liṃgatatphalāyāḥ smṛter iva [ ] pratyakṣavatsmṛteḥ sākṣātphale svārthaviniścaye kiṃ sādhakatamatvena prāmāṇyaṃ nopagamyate [ ] pāraṃparyeṇa hānādijñānaṃ ca phalam īkṣyate tasyās tadanusmṛtyaṃtaryāthārthyavṛttito rthinaḥ [ ] pratyabhijñāya ca svārthaṃ vartamāno yato rthabhāk mataṃ tatpratyabhijñānaṃ pramāṇaṃ paramanyathā [ ] tadvidhaikatvasādṛśyagocaratvena niścitaṃ saṃkīrṇavyatikīrṇatvavyatirekeṇa tattvataḥ [ ] tena tu na punar jātamadanāṃkuragocaraṃ sādṛśyapratyabhijñānaṃ pramāṇaṃ naikatātmani [ ] ekatvagocaraṃ na syād ekatve mānam aṃjasā sādṛśye yathā tasmiṃs tādṛśe yam iti grahaḥ [ ] tad ity atītavijñānaṃ dṛśyamānena naikatāṃ vetti nedam iti jñānam atīteneti kecana [ ] tatsiddhasādhanaṃ jñānadvitayaṃ hy etad iṣyate mānadṛṣṭe rthaparyāye dṛśyamāne ca bhedataḥ [ ] dravyeṇa tadbalodbhūtajñānam ekatvasādhanam dṛṣṭekṣyamāṇaparyāyavyāpiny anyat tato matam [ ] kṣayopaśamatas tac ca niyataṃ syāt kutaścana anādiparyayavyāpi dravyasaṃvittito sti naḥ [ ] tayā yāvat svatīteṣu paryāyeṣv asti saṃsmṛtiḥ kena tadvyāpini dravye pratyabhijñāsya vāryate [ ] bālako haṃ ya evāsaṃ sa eva ca kumārakaḥ yuvāno madhyamo vṛddho 'dhunāsmīti pratītitaḥ [ ] smṛtiḥ kin nānubhūteṣu svayaṃ bhedeṣv aśeṣataḥ pratyabhijñānahetuḥ syād iti codyaṃ na yuktimat [ ] tādṛkṣayogyatāhāneḥ tadbhāve tv asti sāṃgināṃ vyabhicārī hi tan nānyo hetuḥ sarvaḥ samīkṣyate [ ] malāvṛtamaṇer vyaktir yathānekavidhekṣyate karmāvṛtātmanas tadvadyogyatā vividhā na kim [ ] nanv astv ekatvasādṛśyapratītir nārthagocarā saṃvādābhāvato vyomakeśapāśapratītivat [ ] tatra yo nāma saṃvādaḥ pramāṇāṃtarasaṃgamaḥ so dhyakṣe pi na saṃbhāvya iti te kva pramāṇatā [ ] pratyakṣaviṣaye tāvan nānumānasya saṃgatiḥ tasya svalakṣaṇe vṛttyabhāvād ālaṃbanātmani [ ] tatrādhyakṣāṃtarasyāpi na vṛttiḥ kṣaṇabhaṃgini tathaiva siddhasaṃvādasyānavasthā tathā na kim [ ] prāpya svalakṣaṇe vṛttir yathādhyakṣānumānayoḥ pratyakṣasya tathā kiṃ na saṃjñayā saṃpratīyate [ ] tayālaṃbitam anyac cet prāptam anyatsvalakṣaṇaṃ pratyakṣeṇānumānena kiṃ tad eva bhavanmate [ ] gṛhītaprāptayor evādhyāropāc cet tad eva tat samānaṃ pratyabhijñāyāṃ sarve paśyaṃtu saddhiyaḥ [ ] pratyabhijñānamānatve pramāṇaṃ nānyathety api tatra yuktānumānasyotthānābhāvaprasaṃgataḥ [ ] tatra liṃge tad evedam iti jñānaṃ nibaṃdhanam laiṃgikasyānumānaṃ ced anavasthā prasajyate [ ] liṃgapratyavamarśeṇa vinā nāsty eva laiṃgikam vibhinnaḥ so numānāc cet pramāṇāṃtaram āgatam [ ] saṃvādo bādhavaidhuryaniścayaś cet sa vidyate sarvatra pratyabhijñāne pratyakṣādāv ivāṃjasā [ ] pratyakṣaṃ bādhakaṃ tāvan na saṃjñānasya jātucit tadbhinnagocaratvena paralokamater iva [ ] yatra pravartate jñānaṃ svayaṃ tatraiva sādhakam bādhakaṃ vā parasya syān nānyatrātiprasaṃgataḥ [ ] adṛśyānupalabdhiś ca bādhikā tasya na pramā dṛśyā dṛṣṭis tu sarvatrāsiddhā tadgocare sadā [ ] yat sat tat sarvaṃ kṣaṇikaṃ sarvathaiva vilakṣaṇaṃ tato 'nyatra pratīghātāt sattvasyārthakriyākṣateḥ [ ] arthakriyākṣatis tatra kramavṛttivirodhataḥ tadvirodhas tato naṃśaḥ syān nāpekṣāvighātataḥ [ ] itīyaṃ vyāpakā dṛṣṭir nityatvaṃ haṃti vastunaḥ sādṛśyaṃ ca tataḥ saṃjñā bādhikety api durghaṭam [ ] kṣaṇapradhvaṃsinaḥ saṃtaḥ sarvathaiva vilakṣaṇāḥ iti vyāpter asiddhatvād viprakṛṣṭārthaśaṃkinām [ ] nityānāṃ viprakṛṣṭānām abhāve bhāvaniścayāt kutaścid vyāptisaṃsiddhir āśrayeta yadā tadā [ ] nedaṃ nairātmakaṃ jīvaccharīram iti sādhayet prāṇādimattvato syaivaṃ vyatirekaprasiddhitaḥ [ ] kṣaṇike pi viruddhyete bhāvenaṃśe kramākramau svārthakriyā ca sattvaṃ ca tato nekāṃtavṛtti tat [ ] nihaṃti sarvathaikāṃtaṃ sādhayet pariṇāminaṃ bhavet tatra na bhāve tatpratyabhijñā kathaṃcana [ ] nityaikāṃte na sā tāvat paurvāparyaviyogataḥ nāśaikāṃte pi caikatvasādṛśyāghaṭanāt tathā [ ] nityānityātmake tv arthe kathaṃcid upalakṣyate jātyaṃtare virudhyeta pratyabhijñā na sarvathā [ ] nīlasaṃvedanasyārthe nīle siddhe pramāṇatā tatra tasyāṃ ca siddhāyāṃ nīlo rthas tena siddhyati [ ] ity anyonyāśritaṃ nāsti yathābhyāsabalāt kvacit svataḥ prāmāṇyasaṃsiddher adhyasvārthasaṃvidaḥ [ ] tadekatvasya saṃsiddhau pratyabhijñā tadāśrayā pramāṇaṃ tatpramāṇatve tayā vastvekatā gatiḥ [ ] ityanyonyāśritir na syāt svataḥ prāmāṇyasiddhitaḥ svabhyāsāt pratyabhijñāyās tato nyatrānumānataḥ [ ] pratyabhijñāṃtarād ādyapratyabhijñārthasādhane yān avasthā samā sāpi pratyakṣārthaprasādhane [ ] pratyakṣāṃtarataḥ siddhā svataḥ sā cen nivartate pratyabhijñāṃtarād etat tathābhūtān nivartatām [ ] sādṛśyapratyabhijñānam etenaiva vicāritam pramāṇaṃ svārthasaṃvādād apramāṇaṃ tato nyathā [ ] bhedābhedavikalpābhyāṃ sādṛśyaṃ yena dūṣyate vaisādṛśyaṃ kutas tasya padārthānāṃ prasidhyatu [ ] samānākāratā spaṣṭā pratyakṣaṃ pratibhāsate vartamāneṣu bhāveṣu yathā bhinnasvabhāvatā [ ] tadavidyābalād iṣṭā kalpanaikatvabhāsinī sādṛśyabhāsinī ceti vāgavidyodayād dhruvam [ ] saṃbaṃdhaṃ vyāptito rthānāṃ viniścitya pravartate yena tarkaḥ sa saṃvādāt pramāṇaṃ tatra gamyate [ ] saṃbaṃdho vastu sannarthakriyākāritvayogataḥ sveṣṭārthatattvavat tatra ciṃtā syād arthabhāsinī [ ] yeyaṃ saṃbaṃdhitārthānāṃ saṃbaṃdhavaśavartinī saiveṣṭārthakriyā tajjñaiḥ saṃbaṃdhasya svadhīr api [ ] viśiṣṭārthān parityajya nānyā saṃbaṃdhitāsti cet tadabhāve kuto rthānāṃ pratitiṣṭhed viśiṣṭatā [ ] svakāraṇavaśād eṣā teṣāṃ cet saiva saṃmatā saṃbaṃdhiteti bhidyeta nāma nārthaḥ kathaṃcana [ ] tattarkasyāvisaṃvādo numā saṃvādanād api visaṃvāde hi tarkasya jātu tan nopapadyate [ ] tarkasaṃvādasaṃdehe niḥśaṃkānumitiḥ kva te tadabhāve na cādhyakṣaṃ tato neṣṭavyavasthitiḥ [ ] tasmāt pramāṇam icchadbhir anumeyaṃ svasaṃbalāt ciṃtā ceti vivādena paryāptaṃ bahunātra naḥ [ ] gṛhītagrahaṇāt tarko 'pramāṇam iti cen na vai tasyāpūrvārthaveditvād upayogaviśeṣataḥ [ ] pratyakṣānupalaṃbhābhyāṃ saṃbaṃdho deśato gataḥ sādhyasādhanayos tarkāt sāmastyeneti ciṃtitam [ ] pramāṃtarāgṛhītārthaprakāśitvaṃ prapaṃcataḥ prāmāṇyaṃ ca gṛhītārthagrāhitve pi kathaṃcana [ ] liṃgajñānād vinā nāsti liṃgijñānam itīṣyati yathā tasya tadāyattavṛttitā na tadarthitā [ ] pratyakṣānupalaṃbhāder vinānudbhūtitas tathā tarkasya tajjñatā jātu na tadgocarataḥ smṛtā [ ] samāropavyavacchedāt svārthe tarkasya mānatā laiṃgikajñānavan naiva virodham anudhāvati [ ] pravṛttaś ca samāropaḥ sādhyasādhanayoḥ kvacit saṃbaṃdhe tarkato mātur vyavacchedyeta kasyacit [ ] saṃvādako prasiddhārthasādhanas tadvyavasthitaḥ samāropachid ūho tra mānaṃ matinibaṃdhanaḥ [ ] nanūhasyāpi saṃbaṃdhe svārthe nādhyakṣato gatiḥ sādhyasādhanasaṃbaṃdhe yathā nāpy anumānataḥ [ ] tasyohāṃtarataḥ siddhau kvānavasthānivāraṇaṃ tatsaṃbaṃdhasya cāsiddhau nohaḥ syād iti kecana [ ] tan na pratyakṣavat tasya yogyatābalataḥ sthiteḥ svārthaprakāśakatvasya kvānyathādhyakṣaniṣṭhitiḥ [ ] grāhyagrāhakabhāvo vā saṃbaṃdho nyo pi kaścana svārthe na gṛhyate kena pratyakṣasyeti ciṃtyatām [ ] sa tac cet tādṛśākārā pratītiḥ svātmaniṣṭhitā nāsau ghaṭo yam ity evam ākārāyāḥ pratītitaḥ [ ] pratyakṣāṃtarataś cen nāpy anavasthānuṣaṃgataḥ tatsaṃbaṃdhasya cānyena pratyakṣeṇa viniścayāt [ ] nānumānena tasyāpi pratyakṣāyattatā sthiteḥ anavasthāprasaṃgasya tadavasthatvatastarām [ ] svasaṃvedanataḥ siddhe svārthasaṃvedanasya cet saṃbaṃdho kṣadhiyaḥ svārthe siddhe kaścid atīṃdriyaḥ [ ] kṣayopaśamasaṃjñeyaṃ yogyatātra samānatā saiva tarkasya saṃbaṃdhajñānasaṃvittitaḥ svataḥ [ ] pramāṇaviṣayasyāyaṃ sādhako na punaḥ svayaṃ pramāṇaṃ tarka ity etat kasyacid vyāhataṃ matam [ ] pramāṇaviṣaye śuddhiḥ kathaṃ nāmāpramāṇataḥ prameyāṃtarato mithyājñānāc caitatprasaṃgataḥ [ ] yathā saṃśayitārtheṣu pramāṇānāṃ pravartanaṃ nirṇayāya tathā loke tarkiteṣv iti cen matam [ ] saṃśayaḥ sādhakaḥ prāptaḥ pramāṇārthasya te tathā nāpramāṇatvatas tarkaḥ pramāṇam anumanyatām [ ] sa cet saṃśayajātīyaḥ saṃśayāt pṛthagāsthitaḥ kathaṃ padārthasaṃkhyānaṃ nānyathāstv iti tv aśnute [ ] tasmāt pramāṇakartavyakāriṇo veditātmanaḥ sattarkasyāpramāṇatvam avitarkya pracakṣyate [ ] samyak tarkaḥ pramāṇaṃ syāt tathānugrāhakatvataḥ pramāṇasya yathādhyakṣam anumānādi cāśnute [ ] anugrāhakatā vyāptā pramāṇatvena lakṣyate pratyakṣādau tathābhāse nāgamānugrahakṣateḥ [ ] yasminn arthaṃ pravṛttaṃ hi pramāṇaṃ kiṃcid āditaḥ tatra pravṛttiranyasya yānugrāhakatātra sā [ ] pūrvanirṇītadārḍhyasya vidhānād abhidhīyate uttareṇa tu tadyuktam apramāṇena jātucit [ ] tatas tarkaḥ pramāṇaṃ naḥ syāt sādhakatamatvataḥ svārthaniścayane sākṣād asākṣāc cānyamānavat [ ] sādhanāt sādhyavijñānam anumānaṃ vidur budhāḥ pradhānaguṇabhāvena vidhānapratiṣedhayoḥ [ ] anyathānupapattyekalakṣaṇaṃ tatra sādhanaṃ sādhyaṃ śakyam abhipretam aprasiddham udāhṛtam [ ] tatsādhyābhimukho bodho niyataḥ sādhane tu yaḥ kṛto niṃdriyayuktenābhinibodhaḥ sa lakṣitaḥ [ ] niścitaṃ pakṣadharmatvaṃ vipakṣe sattvam eva ca sapakṣa eva janmatvaṃ tattrayaṃ hetulakṣaṇam [ ] kecid āhur na tadyuktaṃ hetvābhāse pi saṃbhavāt asādhāraṇatāpāyāl lakṣaṇatvavirodhataḥ [ ] vaktṛtvādāv asārvajñasādhane trayam īkṣyate na hetutvaṃ vinā sādhyābhāvāsaṃbhūṣṇutāṃ yataḥ [ ] sarvajñatvena vaktṛtvaṃ viruddhaṃ na viniścitaṃ tato na tasya hetutvam ity ācakṣaṇakaḥ svayam [ ] tadekalakṣaṇaṃ hetor lakṣayaty eva tattvataḥ sādhyābhāvavirodho hi hetor nānyas tato mataḥ [ ] tadiṣṭau tu trayeṇāpi pakṣadharmādinātra kiṃ tadabhāve pi hetutvasiddheḥ kvacid asaṃśayam [ ] pakṣadharmatvaśūnyo yaṃ hetuḥ syād ekalakṣaṇaḥ udeṣyacchakaṭaṃ vyoma kṛttikodayavattvataḥ [ ] iti prayogataḥ pakṣadharmatām eṣyate yadi tadā dhūmo gnimān eṣa dhūmatvād iti gadyatām [ ] tataḥ svabhāvahetuḥ syāt sarvo liṃgas trivān na te yadi lokānurodhena bhinnāḥ saṃbaṃdhabhedataḥ [ ] viṣayasya ca bhedena kāryādyanupalabdhayaḥ kiṃ na tādātmyatajjanmasaṃbaṃdhābhyāṃ vilakṣaṇāt [ ] anyathānupapannatvād dhetuḥ syāt kṛttikodayaḥ [ ] arvāgbhāgo 'vinābhāvī parabhāgena kasyacit so pi tena tathā siddhaḥ saṃyogī hetur īdṛśaḥ [ ] sāsnādimān ayaṃ gotvād gaur vā sāsnādimattvataḥ ity anyonyāśrayībhāvaḥ samavāyiṣu dṛśyate [ ] caṃdrodayo 'vinābhāvī payonidhivivardhanaiḥ tāni tena vināpy etatsaṃbaṃdhadvitayād iha [ ] saṃyoginā vinā vahniḥ svena dhūmena dṛśyate gavā vinā viṣāṇādiḥ samavāyīti cen matiḥ [ ] kāraṇena vinā svena tasmād avyāpakena ca vṛkṣatvena kṣate kiṃ na cūtatvādir anekaśaḥ [ ] tato yathāvinābhūte saṃyogādir na lakṣyate vyāpako vyabhicāratvāt tādātmyāt tat tathā na kim [ ] deśakālādyapekṣaś ced bhasmāder vahnisādhanaḥ cūtatvādir viśiṣṭātmā vṛkṣatvajñāpako mataḥ [ ] saṃyogādiviśiṣṭas tanniścitaḥ sādhyasādhanaḥ viśiṣṭatā tu sarvasya sānyathānupapannatā [ ] yogyatākhyaś ca saṃbaṃdhaḥ sarvasaṃbaṃdhabhedagaḥ syād ekas tadvaśāl liṃgam ekam evoktalakṣaṇam [ ] viśeṣato pi saṃbaṃdhadvayasyaivāvyavasthiteḥ saṃbaṃdhaṣaṭkavan nāto liṃgeyattā vyavasthiteḥ [ ] tadviśeṣavivakṣāyām api saṃkhyāvatiṣṭhate na liṃgasya parair iṣṭā viśeṣāṇāṃ bahutvataḥ [ ] yathaivāstitvanāstitve bhidyete guṇamukhyataḥ tathobhayaṃ krameṇeṣṭam akrameṇa tv abādhyatā [ ] avaktavyottarā śeṣās trayo bhaṃgāś ca tattvataḥ sapta caivaṃ sthite ca syus tadvaśāḥ saptahetavaḥ [ ] virodhān nobhayātmādir arthaś cen na tathekṣaṇāt anyathaivāvyavasthānāt pratyakṣādivirodhataḥ [ ] nirākṛtaniṣedho hi vidhiḥ sarvātmadoṣabhāk nirvidhiś ca niṣedhaḥ syāt sarvathā svavyathākaraḥ [ ] nānādivāsanodbhūtavikalpapariniṣṭhitaḥ bhāvābhāvobhayādyarthaṃ spaṣṭaṃ jñāne vabhāsanāt [ ] bhāvābhāvātmako nārthaḥ pratyakṣeṇa yadīkṣitaḥ kathaṃ tato vikalpaḥ syād bhāvābhāvāvabodhanaḥ [ ] nīladarśanataḥ pītavikalpo hi na te mataḥ bhrāṃter anyatra tattvasya vyavasthitimad īpsitaḥ [ ] tadvāsanāprabodhāc ced bhāvābhāvavikalpanā nīlādivāsanodbodhāt tadvikalpavad iṣyate [ ] bhāvābhāvekṣaṇaṃ siddhaṃ vāsanodbodhakāraṇaṃ nīlādivāsanodbodhahetutaddṛṣṭivat tataḥ [ ] yatraiva janayed enāṃ tatraivāsya pramāṇatā kvānyathā syād anāśvāsādvikalpasya samudbhave [ ] tasmāt pratītim āśritya hetuṃ gamakam icchatā pakṣadharmatvaśūnyo stu gamakaḥ kṛttikodayaḥ [ ] palvalodakanairmalyaṃ tadāgastyudaye sa ca tatra hetuḥ sunirṇītaḥ pūrvaṃ śaradi sanmataḥ [ ] caṃdrādau jalacaṃdrādi so pi tatra tathāvidhaḥ chāyādipādapādau ca so pi tatra kadācana [ ] parṇako yaṃ svasaddhetur balādāheti dūrage kāryakāraṇabhāvasyābhāve pi sahabhāvitā [ ] pitror brāhmaṇatā putrabrāhmaṇye pakṣadharmakaḥ siddho hetur ato nāyaṃ pakṣadharmatvalakṣaṇaḥ [ ] sādhyaḥ pakṣas tu naḥ siddhas taddharmo hetur ity api tādṛkṣapakṣadharmatvasādhanābhāva eva vai [ ] niḥśeṣaṃ sātmakaṃ jīvaccharīraṃ pariṇāminā puṃsā prāṇādimattvasya tv anyathānupapattitaḥ [ ] sapakṣasattvaśūnyasya hetor asya samarthanāt nūnaṃ niścīyate sadbhir nānvayo hetulakṣaṇam [ ] na cādarśanamātreṇa vyatirekaḥ prasādhyate yena saṃśayahetutvaṃ rāgādau vaktṛtādivat [ ] ātmābhāvo hi bhasmādau tatkāryasyāsamīkṣaṇāt siddhaḥ prāṇādyabhāvaś ca vyatirekaviniścayaḥ [ ] vākkriyākārabhedāder atyaṃtābhāvaniścitaḥ nivṛttir niścitā tajjñaiḥ ciṃtā vyāvṛttisādhanī [ ] sarvakāryāsamarthasya cetanasya nivartanaṃ tataś cet kena sādhyeta kūṭasthasya niṣedhanam [ ] kṣaṇikatvena na vyāptaṃ sattvam evaṃ prasiddhyati saṃdigdhavyatirekāc ca tato siddhiḥ kṣaṇakṣaye [ ] cetanācetanārthānāṃ vibhāgaś ca na siddhyati cittasaṃtānanānātvaṃ nijasaṃtāna eva vā [ ] na vedyavedakākāraviveko taḥ svasaṃvidaḥ sarvakāryeṣv aśaktasya sa tv asaṃbhavabhāṣaṇe [ ] pariṇāminam ātmānam aṃtareṇa kramākramau na syātāṃ tadabhāve ca na prāṇādikriyā kvacit [ ] tatraikāṃtātmanā jīvaccharīraṃ sātmakaṃ bhavet niṣkalasya sahānekadeśadehāstihānitaḥ [ ] anekāṃtātmakaṃ sarvaṃ sattvād ityādi sādhanaṃ samyaganvayaśūnyatve py avinābhāvaśaktitaḥ [ ] nityānityātmakaḥ śabdaḥ śrāvaṇatvāt kathaṃcana śabdatvād vānyathābhāvābhāvād ityādihetavaḥ [ ] hetor anvayavaidhurye vyatireko na cen na vai tena tasya vinaiveṣṭeḥ sarvānityatvasādhane [ ] sādhye saty eva sadbhāvaniścayaḥ sādhanasya yaḥ so nvayaś cet tathaivopapattiḥ sveṣṭā paro 'phalaḥ [ ] tadviruddhe vipakṣe ca tadanyatraiva hetavaḥ asaty aniścitāsattvāḥ sākalyān neṣṭasādhanāḥ [ ] sādhyābhāve vipakṣe tu yo sattvasyaiva niścayaḥ so vinābhāva evāstu heto rūpāt tathāha ca [ ] anyathānupapannatvaṃ yatra tatra trayeṇa kim nānyathānupapannatvaṃ yatra tatra trayeṇa kim [ ] taddhetos triṣu rūpeṣu nirṇayo yena varṇitaḥ asiddhaviparītārthavyabhicārivipakṣataḥ [ ] tena kṛtaṃ tu nirṇītaṃ hetor lakṣaṇam aṃjasā hetvābhāsāvyavacchedi tad vadet katham anyathā [ ] rūpatrayasya sadbhāvāt tatra tadvacanaṃ yadi niścitatvasvarūpasya caturthasya vaco na kim [ ] triṣu rūpeṣu ced rūpaṃ niścitatvaṃ na sādhane nājñātā siddhatā heto rūpaṃ syāt tadviparyayaḥ [ ] pakṣadharmatvarūpaṃ syāj jñātatve hetvabhedinaḥ hetor ajñānateṣṭā cen niścitatvaṃ tathā na kim [ ] hetvābhāse pi tadbhāvāt sādhāraṇatayā na cet dharmāṃtaram ivārūpaṃ hetoḥ sad api saṃmatam [ ] haṃtāsādhāraṇaṃ siddhaṃ sādhanasyaikalakṣaṇaṃ tattvataḥ pāvakasyaiva soṣṇatvaṃ tadvidāṃ matam [ ] etena paṃcarūpatvaṃ hetor dhvastaṃ nibudhyate sattvādiṣv agnijanyatve sādhye dhūmasya kenacit [ ] anvayo lohalekhyatve pārthivatveśanes tathā tatputratvādiṣu śyāmarupatve kvacid īpsate [ ] adṛṣṭimātrasādhyaś ca vyatirekaḥ samīkṣyate vaktṛtvādiṣu buddhādeḥ kiṃcijjñatvasya sādhane [ ] sādhyābhāve tv abhāvasya niścayo yaḥ pramāṇataḥ vyatirekaḥ sa sākalyād avinābhāva eva naḥ [ ] abādhitārthatā ca syān nānyā tasmād asaṃśayā na vā satpratipakṣatvaṃ tadabhāve nabhīkṣaṇāt [ ] yāvac ca sādhanād arthaḥ svayaṃ na pratiniścitaḥ tāvan na bādhanābhāvas tat syāc chakyaviniścayaḥ [ ] tadbādhābhāvanirṇītiḥ siddhā cet sādhanena kim yathaiva hetor veśasya bādhāsadbhāvaniścaye [ ] trirūpahetuniṣṭhānavādinaiva nirākṛte hetoḥ paṃcasvabhāvatve taddhvaṃse yatanena kim [ ] pūrvaṃ prasajyamānatvāt pūrvapakṣas tato paraḥ śeṣaḥ supakṣa eveṣṭas tadyogo yasya dṛśyate [ ] pūrvavaccheṣavat proktaṃ kevalāsv api sādhanam sādhyābhāve bhavat tac ca trirūpān na viśiṣyate [ ] yasya vaidharmyadṛṣṭāṃtādhāraḥ kaścana vidyate tasyaiva vyatireko sti nānyasyeti na yuktimat [ ] tato vaidharmyadṛṣṭāṃteneṣṭo vaśyam ihāśrayaḥ tadabhāve py abhāvasyāvirodhād dhetutadvatoḥ [ ] kevalavyatirekīṣṭam anumānaṃ na pūrvavat tathā sāmānyato dṛṣṭaṃ gamakatvaṃ na tasya vaḥ [ ] tadviruddhe vipakṣasyāsattve vyavasite pi hi tadabhāve tv anirṇīte kuto niḥsaṃśayātmatā [ ] yo viruddho tra sādhyena tasyābhāvaḥ sa eva cet tato nivartamānaś ca hetuḥ syādvādināṃ matam [ ] anvayavyatirekī ca hetur yas tena varṇitaḥ pūrvānumānasūtreṇa so py etena nirākṛtaḥ [ ] kāryāditrayavat tasmād etenāpi trayeṇa kim bhedānāṃ lakṣaṇānāṃ ca vītāditritayena ca [ ] kāraṇāt kāryavijñānaṃ kāryāt kāraṇavedanam akāryakāraṇāc cāpi dṛṣṭāt sāmānyato gatiḥ [ ] tādṛśī tritayeṇāpi niyatena prayojanam kim ekalakṣaṇādhyāsād anyasyāpy anivāraṇāt [ ] yac cābhūtam abhūtasya bhūtaṃ bhūtasya sādhanam tathābhūtam abhūt tasyābhūtaṃ bhūtasya ceṣṭyate [ ] nānyathānupapannatvābhāve tad api saṃgatam tadbhāve tu kim etena niyamenāphalena vaḥ [ ] sarvahetuviśeṣāṇāṃ saṃgraho bhāsate yathā tathā tadbhedaniyame dvibhedo hetur iṣyatām [ ] saṃkṣepād upalaṃbhaś cānupalaṃbhaś ca vastunaḥ pareṣāṃ tatprabhedatvāt tatrāṃtarbhāvasiddhitaḥ [ ] nanūpalabhyamānatvam upalaṃbho yadīṣyate tadā svabhāvahetuḥ sadvyavahāraprasādhane [ ] athopalabhyate yena sa tathā kāryasādhanaḥ samāno nupalaṃbhe pi vicāro yaṃ kathaṃ na te [ ] yathā cānupalaṃbhena niṣedho rthasya sādhyate tathā kāryasvabhāvābhyām iti yuktā na tadbhidā [ ] niṣedhahetur evaika ity ayuktaṃ vidher api siddher anupalaṃbhenānyavyavacchidvidhir yataḥ [ ] yasmād anupalaṃbhotrānupalabhyatvam iṣyate tathopalabhyamānatvam upalaṃbhaḥ svarūpataḥ [ ] bhinnāv etau na tu svārthābhedād iti niyamyate bhāvābhāvātmakaikārthagocaratvāviśeṣataḥ [ ] tat tatraivopalaṃbhaḥ syāt siddhaḥ kāryādibhedataḥ kāryopalabdhir agnyādau dhūmādiḥ suvidhānataḥ [ ] kāraṇasyopalabdhiḥ syād viśiṣṭajaladonnateḥ vṛṣṭau viśiṣṭatā tasyāś ciṃtyā chāyāviśeṣataḥ [ ] kāraṇānupalaṃbhe pi yathā kārye viśiṣṭatā bodhyābhyāsāt tathā kāryānupalaṃbhe pi kāraṇe [ ] samarthaṃ kāraṇaṃ tena nāṃtyakṣaṇagataṃ matam tadbodhe yena vaiyarthyam anumānasya gadyate [ ] na cānukūlatāmātraṃ kāraṇasya viśiṣṭatā yenāsya pratibaṃdhādisaṃbhavād vyabhicāritā [ ] vaikalyapratibaṃdhābhyām anāsādya svabhāvatām viśiṣṭatātra vijñātuṃ śakyā chāyādibhedataḥ [ ] tadvilope khilakhyātavyavahāravilopanam tṛptyādikāryasiddhyartham āhārādipravṛttitaḥ [ ] hetunā yaḥ samagreṇa kāryotpādo numīyate arthāṃtarānapekṣatvāt sa svabhāva itīraṇe [ ] kāryotpādanayogyatve kārye vā śaktakāraṇam svabhāvahetur ity āryairvicārya prathame mataḥ [ ] svakārye bhinnarūpaikasvabhāvaṃ kāraṇaṃ vadet kāryasyāpi svabhāvatvaprasaṃgād aviśeṣataḥ [ ] samagrakāraṇaṃ kāryasvabhāvo na tu tasya tat ko nyo brūyād iti dhvastaprajñānair ātmavādinaḥ [ ] yat svakāryāvinābhāvi kāraṇaṃ kāryam eva tat kāryaṃ tu kāraṇaṃ bhāvīty etadunmattabhāṣitam [ ] parasparāvinābhāvāt kayāścit hetutattvavyavasthaivam anyonyāśrayaṇāj janaiḥ [ ] rātryādidāyakādṛṣṭaviśeṣasyānumāpakam pāṇicakrādi tatkāryaṃ kathaṃ vo bhāvikāraṇam [ ] tatparīkṣakalokānāṃ prasiddham anumanyatām kāraṇaṃ kāryavaddhetur avinābhāvasaṃgatam [ ] kāryakāraṇanirmuktavastudṛṣṭir vivakṣyate tatsvabhāvopalabdhiś ca niścitāḥ [ ] kathaṃcit sādhyatādātmyapariṇāmamitasya yā svabhāvasyopalabdhiḥ syāt sāvinābhāvalakṣaṇā [ ] utpādāditrayākrāṃtaṃ samastaṃ sattvato yathā guṇaparyayavaddravyaṃ dravyatvād iti cocyate [ ] yathārthasya svabhāvopalaṃbhaḥ savyavasāyakaḥ stasyānumānena kiṃ tvayānyat prasādhyate [ ] samāropavyavacchedas tenety api na yuktimat niścite rthe samāropāsaṃbhavād iti kecana [ ] tadasadvastuno nekasvabhāvasya viniścite sattvādāv api sādhyātmaniścayān niyamān nṛṇām [ ] niścitāniścitātmatvaṃ na caikasya virudhyate citratājñānavan nānāsvabhāvaikārthasādhanāt [ ] tata eva na pakṣasya pramāṇena virodhanaṃ nāpi vṛttir vipakṣas te hetor ekāṃtataś cyuteḥ [ ] utpādavyayanirmuktaṃ na vastu kharaśṛṃgavat nāpi dhrauvyaparityaktaṃ tryātmakaṃ svārthatattvataḥ [ ] sahabhāvi guṇātmatvābhāve dravyasya tattvataḥ kramotpitsu svaparyāyābhāvatve ca na kasyacit [ ] nākrameṇa krameṇāpi kāryakāritvasaṃgatiḥ tadabhāve kutas tasya dravyatvaṃ vyomapuṣpavat [ ] evaṃ hetur ayaṃ śaktaḥ sādhyaṃ sādhayituṃ dhruvaṃ sattvavan niyamād eva lakṣaṇasya viniścayāt [ ] sādhyād anyopalabdhis tu dvividhāpy avasīyate viruddhasyāviruddhasya dṛṣṭes tena vikalpanāt [ ] pratiṣedhe viruddhopalabdhir arthasya tad yathā nāsty eva sarvathaikāṃto nekāṃtasyopalaṃbhataḥ [ ] yāvat kaścin niṣedho tra sa sarvo nupalaṃbhavān yat tad eṣa viruddhopalaṃbhos tv anupalaṃbhanam [ ] ity ayuktaṃ tathābhūtaśruter anupalaṃbhanaṃ tanmūlatvāt tathābhāve pratyakṣam anumāstu te [ ] tathaivānupalaṃbhena virodhe sādhite kvacit syāt svabhāvaviruddhopalabdhivṛttis tathaiva vā [ ] liṃge pratyakṣataḥ siddhe sādhyadharmiṇi vā kvacit liṃgijñānaṃ pravarteta nānyathātiprasaṃgataḥ [ ] gauṇaś ced vyapadeśo yaṃ kāraṇasya phales tu naḥ pradhānabhāvatas tasya tatrābhiprāyavartanāt [ ] vyāpakārthaviruddhopalabdhir atra niveditā yathā na sannikarṣādiḥ pramāṇaṃ parasaṃmatam [ ] ajñānatvād ativyāpter jñānatvena miter iha vyāpakavyāpakadviṣṭopalabdhir veyam iṣyate [ ] syāt sādhakatamatvena svārthajñaptau pramāṇatā vyāptā yā ca tadavyāptaṃ jñānātmatvena sādhyate [ ] vyāpakadviṣṭhakāyopalabdhiḥ kāryopalabdhigā śrutiprādhānyataḥ siddhā pāraṃparyād viruddhavat [ ] yathā nātmā vibhuḥ kāye tatsukhādyupalabdhitaḥ vibhutvaṃ sarvabhūtārthasaṃbaṃdhitvena vastutaḥ [ ] vyāptaṃ tena virodhīdaṃ kāyasaṃbaṃdhamātrakaṃ kāya eva sukhādīnāṃ tatkāryāṇāṃ vibodhanam [ ] nanu pradeśavṛttīnāṃ teṣāṃ saṃvādanaṃ kathaṃ śarīramātrasaṃbaṃdham ātmano bhāvayet sadā [ ] yato niḥśeṣamūrtārthasaṃbaṃdhavinivartanāt vibhutvābhāvasiddhiḥ syād iti kecit pracakṣyate [ ] tad ayuktaṃ manīṣāyāḥ sākalyenātmanaḥ sthiteḥ tacchūnyasyātmatāhānes tādātmyasya prasādhanāt [ ] viruddhakāryasaṃsiddhir nāstyekāṃte 'napekṣiṇya ne kāṃte rthakriyādṛṣṭer ity evam avagamyate [ ] kāraṇārthaviruddhānupalabdhir jñāyate yathā nāsti mithyācaritraṃ me samyagvijñān avedanāt [ ] tad dhi mithyācaritrasya kāraṇaṃ vinivartayet mithyājñānanivṛttis tu tasya tadvinivartikā [ ] kāraṇadviṣṭhakāryopalabdhir yāthātmyavākkṛtaḥ tasya tenāvinābhāvāt pāraṃparyeṇa tattvataḥ [ ] kāraṇavyāpakadviṣṭopalabdhir nāsti nirvṛtiḥ sāṃkhyāder jñānamātropagamād iti yathekṣyate [ ] nirvṛteḥ kāraṇaṃ vyāptaṃ dṛṣṭyāditritayātmanā tadviruddhaṃ tu vijñānamātraṃ sāṃkhyādisammatam [ ] kāraṇavyāpakadviṣṭhakāryadṛṣṭis tu tadvacaḥ samyagvivecitaṃ sādhyāvinābhāvi pratīyate [ ] draṣṭā sahacaradviṣṭhopalabdhis tad yathā mayi nāsti matyādyavijñānaṃ tattvaśraddhānasiddhitaḥ [ ] sahacāriniṣedhena mithyāśraddhānam īkṣitam tan nihaṃty eva tadghātitattvaśraddhānam aṃjasā [ ] tadabhāve ca matyādyavijñānaṃ vinivartate matijñānādibhāvena tadāsya pariṇāmataḥ [ ] tathā sahacaradviṣṭhakāryasiddhir niveditā praśamādivinirṇītes tan nāsmāsv iti sādhane [ ] tasmin sahacaravyāpi viruddhasyopalaṃbhanam saddarśanatvanirṇīter iti tajjñair udāhṛtam [ ] tad etatsahacaravyāpi dviṣṭhakāryopalaṃbhanam pramāṇādipratiṣṭhānasiddher iti nibudhyatām [ ] sahacārinimittena viruddhasyopalaṃbhanaṃ tan nāsty asmāsu dṛgmohaḥ pratipakṣopalaṃbhataḥ [ ] ity evaṃ tadviruddhopalabdhibhedāḥ pratītigāḥ yathāyogam udāhāryāḥ svayaṃ tattvaparīkṣakaiḥ [ ] sādhyārthena viruddhasya kāryakāraṇabhedinaḥ upalabdhis tridhāmnātā prāksahottaracāriṇaḥ [ ] tatra pūrvacarasyopalabdhiḥ siddhāṃtavedinām yathodeṣyati nakṣatraṃ śakaṭaṃ kṛttikodayāt [ ] pūrvacāritaniḥśeṣaṃ kāraṇaṃ niyamād api kāryātmalābhahetūnāṃ kāraṇatvaprasiddhitaḥ [ ] na rohiṇyudayas tu syād amuṣmin kṛttikodayāt tadanaṃtarasaṃdhitvābhāvāt kālāṃtarekṣaṇāt [ ] viśiṣṭakālam āsādya kṛttikāḥ kurvate yadi śakaṭaṃ bharaṇiḥ kiṃ na tat karoti tathaiva ca [ ] vyavadhānād ahetutve tasyās tatra kva vāsanā smṛtihetur vibhāvyeta tatta evety avartinam [ ] kāraṇaṃ bharaṇis tatra kṛttikāsahakāriṇī yadi kālāṃtarāpekṣā tathā syād aśvinī na kim [ ] pitāmahaḥ pitā kiṃ na tathaiva prapitāmahaḥ sarvo vānādisaṃtānaḥ sūnoḥ pūrvatvayogataḥ [ ] svarūpalābhahetoś cet pitṛtvaṃ netarasya tu prāk śakaṭasya mā bhūvan kṛttikāhetavas tathā [ ] pūrvapūrvacarādīnām upalabdhiḥ pradarśitā pūrvācāryopalaṃbhena tato nārthāṃtaraṃ matam [ ] sahacāryupalabdhiḥ syāt kāyaścaitanyavān ayam viśiṣṭasparśasaṃsiddher iti kaiścid udāhṛtam [ ] kārya hetur ayaṃ sveṣṭaḥ samānasamayatvataḥ svātaṃtryeṇa vyavasthānād vāmadakṣiṇaśṛṃgavat [ ] ekasāmagryadhīnatvāt tayoḥ syāt sahabhāvitā kvānyathā niyamas tasyās tato nyeṣām itīti cet [ ] naikadravyātmatattvena vinā tasyā virodhataḥ sāmagryekā hi taddravyaṃ rasarūpādiṣu sphuṭam [ ] na ca tasyānumāsādyamānād rasaviśeṣataḥ samānasamayasyaiva rūpāder anumānataḥ [ ] kāryeṇa kāraṇasyānumānaṃ yenedam ucyate kāraṇenāpi rūpādes tato dravyeṇa nānumā [ ] samānakāraṇatvaṃ tu sāmagryekā yadīṣyate payorasāt sarojanmarūpasyānumitir na kim [ ] yathaiva hi payoparūpād rasasahāyakāt tathā sarodbhave pīti syāt samānanimittatā [ ] pratyāsatter abhāvāc cet sādhyasādhanatānayoḥ naṣṭaikadravyatādātmyāt pratyāsattiḥ parā ca sā [ ] nanv arthāṃtarabhūtānām ahetuphalanāśritām sahacāritvam arthānāṃ kuto niyatam īkṣyase [ ] kāryakāraṇabhāvās te kasmād iti samaṃ na kim tathā saṃpratyayāt tulyaṃ samādhānam apīdṛśaṃ [ ] svakāraṇāt tathāgniś cej jāto dhūmasya kārakaḥ caitanyasahakāryas tu sparśo ṃge tadadṛṣṭataḥ [ ] dṛṣṭād dhetor vinā ye rthā niyamāt sahacāriṇaḥ adṛṣṭakaraṇaṃ teṣāṃ kiṃcid ity anumīyate [ ] dravyato 'nādirūpāṇāṃ svabhāvo stu na tādṛśaḥ sādhyasādhanataivaiṣāṃ tatkṛtānyonyam ity asat [ ] ye cārvākparabhāgādyā niyamena parasparāḥ sahabhāvam itās teṣāṃ hetur etena varṇitaḥ [ ] tato tītaikakālānāṃ gatiḥ kiṃkāryaliṃgajā niyamād anyathā dṛṣṭiḥ sahacāryād asiddhitaḥ [ ] tathottaracarasyopalabdhis tajjñair udāhṛtā udagādbharaṇirāgneyadarśanān nabhasīti sā [ ] sarvam uttaracārīha kāryam ity anirākṛteḥ nānā prāṇigaṇādṛṣṭāt sātetaraphalād vinā [ ] pūrvottaracarāṇi syur bhāni kramabhuvaḥ sadā nānyonyaṃ hetutā teṣāṃ kāryābādhā tato matā [ ] sādhyasādhanatā na syād avinābhāvayogataḥ [ ] pakṣadharmātyaye yuktāḥ sahacāryādayo yataḥ satyaṃ ca hetavo nāto hetvābhāsās tathāpare [ ] tridhaiva vāvinābhāvāniyamād dhetur āsthitaḥ kāryādir nānya ity eṣā vyākhyaitena nirākṛtā [ ] niṣedhe nupalabdhiḥ syāt phalahetudvayātmanā hetusādhyāvinābhāvaniyamasya viniścayāt [ ] tatra kāryāprasiddhiḥ syān nāsti cin mṛtavigrahe vākkriyākārabhedānām asiddher iti niścitā [ ] kāraṇānupalabdhis tu nārthitācaraṇaṃ śubham samyagbodhopalaṃbhasyābhāvād iti vibhāvyate [ ] ahetuphalarūpasya vastuno nupalaṃbhanam dvedhā niṣedhya tādātmyetarasyādṛṣṭikalpanāt [ ] tatrābhinnātmanoḥ siddhir dvividhā saṃpratīyate svabhāvānupalabdhiś ca vyāpakādṛṣṭir eva ca [ ] ādyā yathā na me duḥkhaṃ vipādānupalaṃbhataḥ vyāpakānupalabdhis tu vṛkṣādṛṣṭer na śiṃśapā [ ] kāryakāraṇabhinnasyānupalabdhir na budhyatām sahacāriṇa evātra pratiṣedhena vastunā [ ] mayi nāsti matijñānaṃ saddṛṣṭyanupalabdhitaḥ rūpādayo na jīvādau sparśāsiddher itīyatām [ ] kāraṇavyāpakadṛṣṭipramukhāś cāsya dṛṣṭayaḥ tatrāṃtarbhāvam āyāṃti pāraṃparyād anekadhā [ ] prāṇādayo na saṃty eva bhasmādiṣu kadācana jīvatvāsiddhito hetuvyāpakādṛṣṭir īdṛśī [ ] kvacid ātmani saṃsāraprasūtir nāsti kārtsnyataḥ sarvakarmodayābhāvād iti vā samudāhṛtā [ ] taddhetuhetvadṛṣṭiḥ syān mithyātvādyaprasiddhitaḥ tannivṛttau hi taddhetukarmābhāvāt kva saṃsṛtiḥ [ ] tatkāryavyāpakāsiddhir yathā nāsti niranvayaṃ tattvaṃ kramākramābhāvād anvayaikāṃtatattvavat [ ] tatkāryavyāpakasyāpi padārthānupalaṃbhanaṃ pariṇāmaviśeṣasyābhāvād iti vibhāvyatām [ ] kāraṇavyāpakā dṛṣṭiḥ sāṃkhyāder nāsti nirvṛtiḥ saddṛṣṭyāditrayāsiddher iyaṃ punar udāhṛtā [ ] kāraṇavyāpakā vyāptiḥ svabhāvānupalaṃbhanaṃ tatraiva pariṇāmasyāsiddher iti yathocyate [ ] pariṇāmanivṛttau hi tad vyāptaṃ vinivartate saddṛṣṭyāditrayaṃ mārgaṃ vyāpakaṃ pūrvavatparam [ ] sahacāriphalā dṛṣṭir matyajñānādi nāsti me nāstikyādhyavasānāder abhāvād iti darśitā [ ] nāstikyapariṇāmo hi phalaṃ mithyādṛśaḥ sphuṭam sahacāritayā matyajñānādivadvipaścitām [ ] sahacārinimittasyānupalabdhir udāhṛtā dṛṣṭimohodayāsiddher iti vyaktaṃ tathaiva hi [ ] sahabhūvyāpakā dṛṣṭir nāsti vedakadarśanaiḥ sahabhāvi matijñānaṃ tattvaśraddhānahānitaḥ [ ] sahabhūvyāpi hetvādyadṛṣṭayo py avirodhataḥ pratyetavyāḥ prapaṃcena lokaśāstranidarśanaiḥ [ ] upalabdhyanupalabdhibhyām ity evaṃ sarvahetavaḥ saṃgṛhyaṃte na kāryāditritayena kathaṃcana [ ] nāpi pūrvavadādīnāṃ tritayo na niṣedhane sādhye tasyāsamarthatvād dvidhā caiva prayuktitaḥ [ ] pūrvavatkāraṇāt kārye numānam anumanyate śeṣavatkāraṇe kāryād vijñānaṃ niyatasthiteḥ [ ] kāryakāraṇanirmuktād arthāt sādhye tathāvidhe bhavet sāmānyato dṛṣṭam iti vyākhyānasaṃbhave [ ] vidhau tadupalaṃbhaḥ syur niṣedhe nupalabdhayaḥ tataś ca ṣaḍvidho hetuḥ saṃkṣepāt kena vāryate [ ] kevalānvayasaṃyogī vītabhūtādibhedataḥ vinirṇītāvinābhāvahetunām atra saṃgrahāt [ ] anyathānupapattyekalakṣaṇaṃ sādhanaṃ tataḥ sūktaṃ sādhyaṃ vinā sadbhiḥ śakyatvādiviśeṣaṇaṃ [ ] śakyaṃ sādhayituṃ sādhyam ity anena nirākṛtaḥ pratyakṣādipramāṇena pakṣa ity etadāsthitam [ ] tenānuṣṇo gnir ity eṣa pakṣaḥ pratyakṣabādhitaḥ dhūmo nagnija evāyam iti laiṃgikabādhitaḥ [ ] pretyāsukhaprado dharma ity āgamanirākṛtaḥ nṛkapālaṃ śucīti syāl lokarūḍhiprabādhitaḥ [ ] pakṣābhāsaḥ svavāgvādhyaḥ sadā maunavratīti yaḥ sa sarvo pi prayoktavyo naiva tattvaparīkṣakaiḥ [ ] śabdakṣaṇakṣayaikāṃtaḥ sattvād ity atra kecana dṛṣṭāṃtābhāvato śakyaḥ pakṣa ity abhyamaṃsata [ ] teṣāṃ sarvam anekāṃtam iti pakṣo virudhyate tata evobhayoḥ siddho dṛṣṭāṃto na hi kutracit [ ] pramāṇabādhitatvena sādhyābhāsatvabhāṣaṇe sarvas tatheṣṭa eveha sarvathaikāṃtasaṃgaraḥ [ ] tathā sādhyam abhipretam ity anena nivāryate anuktasya svayaṃ sādhyābhāvābhāvaḥ paroditaḥ [ ] yathā hy ukto bhavet pakṣas tathānukto 'pi vāditaḥ prastāvādibalāt siddhaḥ sāmarthyād ukta eva cet [ ] svāgamokto 'pi kiṃ na syād eva pakṣaḥ kathaṃcana tathānukto 'pi cokto vā sādhyaḥ sveṣṭo 'stu tāttvikaḥ [ ] nāniṣṭo 'tiprasaṃgasya parihartum aśaktitaḥ nanu necchati vādīha sādhyaṃ sādhayituṃ svayam [ ] prasiddhasyānyasaṃvittikāraṇāpekṣyavartanāt prativādy api tasyaitannirākṛtiparatvataḥ [ ] satyā nobhayasiddhāntavedinaḥ pakṣapātinaḥ ity ayuktam avaktavyam abhipretaviśeṣaṇam [ ] jijñāsitaviśeṣatvam ivānye saṃpracakṣate tadasadvādineṣṭasya sādhyatvāpratighātitaḥ [ ] svārthānumāsu pakṣasya tanniścayavivekataḥ parārtheṣv anumāneṣu paro bodhayituṃ svayam [ ] kiṃ neṣṭasyeha sādhyatvaṃ viśeṣānabhidhānataḥ iṣṭaḥ sādhayituṃ sādhyaḥ svaparapratipattaye [ ] iti vyākhyānato yuktam abhipretaviśeṣaṇaṃ aprasiddhaṃ tathā sādhyam ity anenābhidhīyate [ ] tasyārekā viparyāsā vyutpattiviṣayātmatā tasya tadvyavacchedatvātsiddhir arthasya tattvataḥ [ ] tato na yujyate vaktuṃ vyasto hetor apāśrayaḥ saṃśayo hy anumānena yathā vicchidyate tathā [ ] avyutpattiviparyāsāv anyathā nirṇayaḥ kathaṃ avyutpannaviparyastau nācāryam upasarpataḥ [ ] kauced eva yathā tadvatsaṃśayātmāpi kaś ca naḥ nāvaśyaṃ nirṇayākāṃkṣā saṃdigdhasyāpy anarthinaḥ [ ] saṃdehamātrakāsthānāt svārthasiddhau pravartanāt yathāpravartamānasya saṃdigdhasya pravartanam [ ] vidhīyate numānena tathā kiṃ na niṣidhyate avyutpannaviparyas tamanaso py apravartanam [ ] parānugrahavṛttīnām upekṣānupapattitaḥ avineyiṣu mādhyasthyaṃ na caivaṃ pratihanyate [ ] rāgadveṣavihīnatvaṃ nirguṇeṣu hi teṣu naḥ svayaṃ mādhyasthyam ālaṃbya guṇadoṣopadeśanā [ ] kāryā tebhyo pi dhīmadbhis tadvineyatvasiddhaye avyutpannaviparyastā pratipādyatvaniścaye [ ] pratipādyaḥ kathaṃ nāma duṣṭojñaḥ svasuto janaiḥ laukikasyāprabodhyatve katham astu parīkṣakaḥ [ ] prabodhyas tasya yatnena kramatas tattvasaṃbhavāt pratipādyas tatas tredhā pakṣas tatpratipattaye [ ] saṃdigdhādiḥ prayoktavyo 'prasiddha iti kīrtanāt suprasiddhaś ca vikṣiptaḥ pakṣo 'kiṃcitkaratvataḥ [ ] tatra pravartamānasya sādhanasya svarūpavat samārope tu pakṣatvaṃ sādhane pi na vāryate [ ] svarupeṇaiva nirdiśyas tathā sati bhavaty asau jijñāsitaviśeṣas tu dharmī yaiḥ pakṣa iṣyate [ ] teṣāṃ saṃti pramāṇāni sveṣṭasādhanataḥ kathaṃ dharmiṇy asiddharūpe pi hetur gamaka iṣyate [ ] anyathānupapannatvaṃ siddhaṃ sadbhir asaṃśayaṃ dharmisaṃtānasādhyāś cet sarve bhāvāḥ kṣaṇakṣayāḥ [ ] iti pakṣo na yujyeta hetos taddharmatāpi ca pratyakṣeṇāprasiddhatvād dharmiṇām iha kārtsnyataḥ [ ] anumānena tatsiddhau dharmisattāprasādhanaṃ paraprasiddhitas teṣāṃ dharmitvaṃ hetudharmavat [ ] dhruvaṃ teṣāṃ svataṃtrasya sādhanasya niṣedhakaṃ prasaṃgasādhanaṃ vecchet tatra dharmigrahaḥ kutaḥ [ ] iti dharmisaṇyasiddhe pi sādhanaṃ matam eva ca vyāpyavyāpakabhāve hi siddhe sādhanasādhyayoḥ [ ] prasaṃgasādhanaṃ proktaṃ tatpradarśanamātrakaṃ atha niḥśeṣaśūnyatvavādinaṃ prati tārkikaiḥ [ ] virodhodbhāvanaṃ sveṣṭe vidhīyeteti saṃmataṃ tadapramāṇakaṃ tāvad akiṃcitkaram īkṣyate [ ] sapramāṇakatā tasya kva pramāṇāprasādhane nanv iṣṭasādhanāt saṃti pramāṇānīti bhāṣaṇe [ ] samaḥ paryanuyogoyaṃ pramāśūnyatvavādinaḥ tadiṣṭasādhanaṃ tāvadapramāṇamasādhanam [ ] svasādhyena pramāṇaṃ tu na prasiddhaṃ dvayor api tadasaṃgatam iṣṭasya saṃvinmātrasya sādhanam [ ] svayaṃ prakāśanaṃ dhvastavyabhicāraṃ hi susthitaṃ svasaṃvedanam adhyakṣaṃ vādino mānam aṃjasā [ ] tato 'nyeṣāṃ pramāṇānām astitvasya vyavasthitiḥ nanv iṣṭasādhanaṃ dharmipramāṇair aparair yutam [ ] tadiṣṭasādhanatvasyetarathānupapattitaḥ evaṃ prayogataḥ siddhiḥ pramāṇānām anākulam [ ] tatsattā naiva sādhyā syāt sarvatreti pare viduḥ yato bhayaṃ tad evaiṣāṃ svayam agre vyavasthitam [ ] hetor ananvayatvasya prasaṃjanam asaṃśayaṃ sattāyāṃ hi prasādhyāyāṃ viśeṣasyaiva sādhanāt [ ] yathānanvayatādoṣas tathātrāpy anidarśanāt hetor ananvayasyāpi gamakatvopavarṇane [ ] sattā sādhyās tu mānānām iti dharmī na saṃgaraḥ dharmidharmasamūho 'tra pakṣa ity apasāritam [ ] eteneti sthitaḥ sādhyaḥ pakṣo vidhvastabādhakaḥ vyāptikāle mataḥ sādhyaḥ pakṣo yeṣāṃ nirākulaḥ [ ] so nyathaiva kathaṃ teṣāṃ lakṣaṇavyavahārayoḥ vyāptiḥ sādhyena nirṇītā hetoḥ sārdhyaṃ prasādhyate [ ] tad evaṃ vyavahāre pīty anavadyaṃ na cānyathā dharmiṇo py aprasiddhasya sādhyatvāpratighātitaḥ [ ] asti dharmiṇi dharmasya ceti nobhayapakṣatā tady atra sādhanādbodho niyamād abhijāyate [ ] sa tasya viṣayaḥ sādhyo nānyaḥ pakṣo stu jātucit [ ] satyaṃ svārthānumānaṃ tu vinā yac chabdayojanāt tanmānāṃtaratāṃ māgād iti vyākhyāyate tathā [ ] siddhaḥ sādhyāvinābhāvo hy arthāpatteḥ prabhāvakaḥ saṃbhavādeś ca yo hetuḥ so pi liṃgān na bhidyate [ ] dṛṣṭāṃtanirapekṣatvaṃ liṃgasyāpi neveditam tan na mānāṃtaraṃ liṃgād arthāpattyādivedanam [ ] matijñānaviśeṣāṇām upalakṣaṇatā sthitaṃ tena sarvaṃ matijñānaṃ siddham ābhinibodhikam [ ] tasya bāhyanimittopadarśanāyedam ucyate tad ityādivacaḥ sūtrakāreṇānyamatacchide [ ] tacchabdena parāmarśo narthāṃtaram iti dhvaneḥ vācyasyaikasya matyādiprakārasyāviśeṣataḥ [ ] nimittaṃ kārakaṃ yasya tattathoktaṃ vibhāgataḥ vākyasyāsya viśeṣād vā pāraṃparyasya cāśritau [ ] vākyabhedāśraye yuktam avadhāraṇam uttaraṃ tadabhede punaḥ pūrvama nyathā vyabhicāritā [ ] dhvastaṃ tatrārthajanyatvam uttarād avadhāraṇāt matyajñānaśrutādīni nirastāni tu pūrvataḥ [ ] svajanyajñānasaṃvedyo rthaḥ prameyatvato nanu yathāniṃdriyam ity eke tadasadvyabhicārataḥ [ ] niḥśeṣavartamānārtho na svajanyena sarvavit saṃvedanena saṃvedyaḥ samānakṣaṇavartinā [ ] svārthajanyam idaṃ jñānaṃ satyajñānatvato nyathā viparyāsādivat tasya satyatvānupapattitaḥ [ ] ity apy aśeṣavidbodhair anaikāṃtikam īritaṃ sādhanaṃ na tato jñānam arthajanyam iti sthitam [ ] ālokenāpi janyatvenālaṃbanatayā bhidaḥ kiṃ tv iṃdriyabalādhānamātratvenānumanyate [ ] tathārthajanyatāpīṣṭā kālākāśāditattvavat sālaṃbanatayā tv artho janakaḥ pratiṣidhyate [ ] tato nākāraṇaṃ vitter viṣayo stīti durghaṭam yaṃ rūpasyāpravedyatvāpatteḥ kāraṇatāṃ vinā [ ] asvasaṃvedyavijñānavādī pūrvaṃ nirākṛtaḥ parokṣajñānavādī cety alaṃ saṃkathayānayā [ ] matijñānasya nirṇītaprakārasyaikaśo vidi bhidām avagrahety ādisūtramāhāviparyayam [ ] akṣārthayogajād vastumātragrahaṇalakṣaṇāt jātaṃ yad vastubhedasya grahaṇaṃ tad avagrahaḥ [ ] tadnṛhītārthasāmānye yadviśeṣasya kāṃkṣaṇam niścayābhimukhaṃ sehā saṃśīter bhinnalakṣaṇā [ ] tasyaiva nirṇayo vāyaḥ smṛtihetuḥ sā dhāraṇā iti pūrvoditaṃ sarvaṃ matijñānaṃ caturvidham [ ] sāmānādhikaraṇyaṃ tu tad evāvagrahādayaḥ tad iti prāksūtratacchabdasaṃbaṃdhād iha yujyate [ ] tatra yad vastumātrasya grahaṇaṃ pāramārthikam dvidhā tredhā kvacij jñānaṃ tad ity ekaṃ na cāparam [ ] tan na sādhvakṣajasyārthabhedajñānasya tattvataḥ [ ] ity ayuktaṃ sadāśeṣaviśeṣavidhurātmanaḥ sattvasyānubhavābhāvād bhedamātrakavastuvat [ ] dṛṣṭer abheda bhedātmavastuny avyabhicārataḥ pāramārthikatā yuktā nānyathā tadasaṃbhavāt [ ] jātyādikalpanonmuktaṃ vastumātraṃ svalakṣaṇam tajjñānam akṣajaṃ nānyad ity apy etena dūṣitam [ ] kiṃcid ity avabhāsy atra vastumātram apoddhṛtaṃ tadgrāhi darśanaṃ jñeyam avagrahanibaṃdhanam [ ] anekāṃtātmake bhāve prasiddhe pi hi bhāvataḥ puṃsaḥ svayogyatāpekṣaṃ grahaṇaṃ kvacid aṃśataḥ [ ] tenārthamātranirbhāsād darśanād bhinnam iṣyate jñānam arthaviśeṣātmābhāsi vittvena tatsamam [ ] kṛto bhedo nayāt sattāmātrajñāt saṃgrahāt param naramātrāc ca netrādidarśanaṃ vakṣyate grataḥ [ ] nanv avagrahavijñānaṃ darśanāj jāyate yadi tasyeṃdriyamanojatvaṃ tadā kiṃ na virudhyate [ ] pāraṃparyeṇa tajjatvāt tasyehādividām iva ko virodhaḥ kramād vākṣamanojanyatvaniścayāt [ ] iṃdriyāniṃdriyābhyāṃ hi yas tv ālocanam ātmanaḥ svayaṃ pratīyate yadvat tathaivāvagrahādayaḥ [ ] varṇasaṃsthādisāmānyaṃ yatra jñāne vabhāsate tan no viśeṣaṇajñānam avagrahaparābhidham [ ] viśeṣaniścayo vā ya ity etad upapadyate jñānenehābhilāṣātmā saṃskārātmā na dhāraṇā [ ] iti kecit prabhāṣaṃte tac ca na vyavatiṣṭhate viśeṣavedanasyeha dṛḍhasyehātvasūcanāt [ ] tato dṛḍhatarāvāyajñānād dṛḍhatam asya ca dhāraṇatvapratijñānāt smṛtihetor viśeṣataḥ [ ] ajñānātmakatāyāṃ tu saṃskārasyeha tasya vā jñānopādānatā na syād rūpāder iva sāsti ca [ ] sukhādinā na cātrāsti vyabhicāraḥ kathaṃcana tasya jñānātmakatvena svasaṃvedanasiddhitaḥ [ ] sarveṣāṃ jīvabhāvānāṃ jīvātmatvārpaṇān nayāt saṃvedanātmatāsiddher nāmasiddhān na saṃbhavaḥ [ ] tata eva pradhānasya dharmā nāvagrahādayaḥ ālocanādināmānaḥ svasaṃvittivirodhataḥ [ ] nanu dūre yathaiteṣāṃ kramaśo rthe pravartanaṃ saṃvedyate tathāsanne kin na saṃviditātmanām [ ] viśeṣaṇaviśeṣyādijñānānāṃ samam īdṛśaṃ vedyaṃ tatra samādhānaṃ yat tad atrāpi yujyate [ ] tathaivālocanādīnāṃ dṛgādīnāṃ ca budhyate saṃbaṃdhasmaraṇādīnām anumānopakāriṇām [ ] atyaṃtābhyāsato hy āśu vṛtter anupalakṣaṇam kramaśo vedanānāṃ syāt sarveṣām avigānataḥ [ ] dravyaparyāyasāmānyaviṣayo vagraho kṣajaḥ tasyāparavikalpenāniṣedhyatvāt sphuṭatvataḥ [ ] saṃvādakatvato mānaṃ svārthavyavasiteḥ phalaṃ sākṣādvyavahitaṃ tu syād īhā hānādidhīr api [ ] nirvikalpakayā dṛṣṭyā gṛhīte rthe svalakṣaṇe tadānyāpohasāmānyagocaro vagrahaḥ sphuṭaḥ [ ] sahabhāvo vikalpo pi nirvikalpakayā dṛśā parikalpanayā vāto niṣedhya iti kecana [ ] tadasatsvārthasaṃvitter avikalpatvadūṣaṇāt sadā sa vyavasāyākṣajñānasyānubhavāt svayam [ ] manasor yugapadvṛttiḥ savikalpāvikalpayoḥ mohād aikyaṃ vyavasyaṃtīty asatpṛthag apīkṣaṇāt [ ] laiṃgikādivikalpasyāspaṣṭātmatvopalaṃbhanāt yuktā nākṣavikalpānām aspaṣṭātmakatoditā [ ] anyathā taimirasyākṣajñānasya bhrāṃtatekṣaṇāt sarvākṣasaṃvido bhrāṃtyā kin nohyaṃte vikalpakaiḥ [ ] sahabhāvo pi godṛṣṭituraṃgam avikalpayoḥ kin naikatvaṃ vyavasyaṃti sveṣṭadṛṣṭivikalpavat [ ] pratyāsattiviśeṣasyābhāvāc cet so tra ko paraḥ tādātmyād ekasāmagryadhīnatvasyāviśeṣataḥ [ ] tādṛśī vāsanā kācid ekatvavyavasāyakṛt sahabhāvāviśeṣe pi kayościd dṛgvikalpayoḥ [ ] sābhīṣṭā yogyatāsmākaṃ kṣayopaśamalakṣaṇā spaṣṭatve kṣavikalpasya hetur nānyasya jātucit [ ] tannirṇayātmakaḥ siddho vagraho vastugocaraḥ spaṣṭābho kṣabalodbhūto 'spaṣṭo vyaṃjanagocaraḥ [ ] nehāniṃdriyajaivākṣavyāpārāpekṣaṇā sphuṭā svākṣavyāpṛtyabhāve syāḥ prabhavābhāvanirṇayāt [ ] nāpīyaṃ mānasaṃ jñānam akṣavitsamanaṃtaraṃ niścayātmakam anyad vā spaṣṭābhaṃ tata eva naḥ [ ] tasya pratyakṣarūpasya pramāṇena prasiddhitaḥ svasaṃvedanato nyasya kalpanaṃ kimu niṣphalam [ ] mānasasmaraṇasyākṣajñānād utpattyasaṃbhavāt vijātīyāt prakalpyeta yadi tat tasya janma te [ ] tadākṣavedanaṃ na syāt samanaṃtarakāraṇam manodhyakṣasya tasyaiva vailakṣaṇyāviśeṣataḥ [ ] pratyakṣatvena vaiśadyavastugocaratātmanā sajātīyaṃ manodhyakṣam akṣajñānena cen matam [ ] smaraṇaṃ saṃvidātmatvasaṃtānaikyena vas tathā kin na siddhyed yatas tasya tatropādānakārakam [ ] anyathā na manodhyakṣaṃ smaraṇena salakṣaṇaṃ asyopādānatāpāyād ity anarthakakalpanam [ ] smaraṇākṣavidor bhinnau saṃtānau ced anarthakam manodhyakṣaṃ vināpy asmāt smaraṇotpattisaṃbhavāt [ ] akṣajñānaṃ hi pūrvasmād akṣajñānānyathodiyāt smṛtiḥ smṛtes tathānādikāryakāraṇatedṛśī [ ] saṃtānaikye tayor akṣajñānāt smṛtisamudbhavaḥ pūrvaṃ tadvāsanā yuktād akṣajñānaṃ ca kevalāt [ ] saha smṛtyakṣavijñāne tataḥ syātāṃ kadācana saugatānām iti vyarthaṃ manodhyakṣaprakalpanaṃ [ ] syādvādināṃ punar jñānāvṛtticchedaviśeṣataḥ samānetaravijñānasaṃtāno na virudhyate [ ] pratyakṣaṃ mānasaṃ svārthaniścayātmakam asti cet spaṣṭābham akṣavijñānaṃ kimarthakyād upeyate [ ] akṣasaṃvedanābhāve tasyotpattau virodhataḥ sarveṣām aṃdhatādīnāṃ kṛtaṃ tatkalpanaṃ yadi [ ] tadākṣāniṃdriyotpādyaṃ svārthaniścayanātmakaṃ rūpādivedanaṃ yuktam ekaṃ khyāpayituṃ satām [ ] kramād avagrahehātmadravyaparyāyagocaraṃ jīvasyāvṛttivicchedaviśeṣakramahetukam [ ] tatsamakṣetaravyaktiśaktyekārthavad ekadā na viruddhaṃ vicitrābhajñānavad vā pratītitaḥ [ ] avagrahagṛhītārthabhedam ākāṃkṣato kṣajaḥ spaṣṭo vāyas tadāvārakṣayopaśamato tra tu [ ] saṃśayo vā viparyāsas tadabhāve kutaścana tenehāto vibhinno sau saṃśītibhrāṃtihetutaḥ [ ] viparītasvabhāvatvāt saṃśayādyanibaṃdhanaṃ avāyaṃ hi prabhāṣaṃte kecid dṛḍhataratvataḥ [ ] akṣajñānatayā tvaikyam īhayāvagraheṇa ca yātyavāyaḥ kramāt puṃsastathātvena vivartanāt [ ] vicchedābhāvataḥ spaṣṭapratibhāsasya dhāraṇā paryaṃtasyopayuktākṣanarasyānubhavāt svayam [ ] avāyasya pramāṇatvaṃ dhāraṇāyāś ca neṣyate samīhayehite svārthe gṛhītagrahaṇād iti [ ] tadānumāpramāṇatvaṃ vyāpriyāt tata eva te ity uktaṃ smaraṇādīnāṃ prāmāṇyapratipādane [ ] keṣāṃ punar ime vagrahādayaḥ karmaṇām iti prāha saṃpratipattyarthaṃ bahv ityādiprabhedataḥ [ ] bahvādyavagrahādīnāṃ parasparam asaṃśayam pratyekam abhisaṃbaṃdhaḥ kāryo na samudāyataḥ [ ] bahoḥ saṃkhyāviśeṣasyāvagraho vipulasya vā kṣayopaśamato nuḥ syād īhāvāyo tha dhāraṇā [ ] itarasyābahor ekadvitvākhyasyālpakasya vā setaragrahaṇād evaṃ pratyetavyam aśeṣataḥ [ ] vyaktijātyāśritatvena tayor bahuvidhasya ca bhedaḥ parasparaṃ tadvaddho dhyastaditarasya ca [ ] kṣiprasyācirakālasyādhruvasya calitātmanaḥ svabhāvaikyaṃ na maṃtavyaṃ tathā taditarasya ca [ ] niḥśeṣapudgalodgatyabhāvād bhavati niḥsṛtaḥ stokapudgalaniṣkrāṃter anuktas tv ābhisaṃhitaḥ [ ] niṣkrāṃto niḥsṛtaḥ kārtsnyād uktaḥ saṃdarśito mataḥ iti tadbhedanirṇīter ayuktaikatvacodanā [ ] tatra pradhānabhāvena bahvādīnāṃ nivedanaṃ prakṛṣṭāvṛttiviśleṣaviśeṣāt nuḥ samudbhavāt [ ] tadviśeṣaṇabhāvena kathaṃ cātrālpayogyatāṃ samāsṛtya samudbhūter itareṣāṃ vidhīyate [ ] bahujñānasamabhyarcyaṃ viśeṣaviṣayatvataḥ sphuṭaṃ bahuvidhajñānāj jātibhedāv abhāsinaḥ [ ] tatkṣiprajñānasāmānyāt tac cāniḥsṛtavedanāt tadanuktagamāt so pi dhruvajñānāt kutaścana [ ] vijānāti na vijñānaṃ bahūn bahuvidhān api padārthān iti keṣāṃcin mataṃ pratyakṣabādhitam [ ] pratyakṣāṇi bahūny eva teṣv ajñānāni cet katham tadbadbodhaikanirbhāsaiḥ śataiś cen nāprabādhanāt [ ] tadbodhabahutāvittir bādhikātreti cen mataṃ sā yady ekena bodhena tadartheṣv anumanyatām [ ] bahubhir vedanair anyajñānavedyais tu sā yadi tadavasthā tadā praśno navasthā na mahīyasī [ ] svato bahvarthanirbhāsijñānānāṃ bahutā gatiḥ nānyonyam anusaṃdhānābhāvāt pratyātmavartinām [ ] tatpṛṣṭhajo vikalpaś ced anusaṃdhānakṛn mataḥ so pi nānekavijñānaviṣayastāvake mate [ ] evaṃ bahutvasaṃkhyāyām ekasyāvedanaṃ nanu saṃkhyeyeṣu bahuṣv ity ayuktaṃ kecit prapedire [ ] bahutvena viśiṣṭeṣu saṃkhyeyeṣu pravartitaḥ bahujñānasya tadbhedaikāṃtābhāvāc ca yuktitaḥ [ ] kathaṃ ca mecakajñānaṃ pratyarthavaśavartini jñāne sarvatra yujyeta pareṣāṃ nagarādiṣu [ ] yathā nīlaṃ tathā citraṃ rūpam ekaṃ paṭādiṣu citrajñānaṃ pravarteta tatrety api virudhyate [ ] citrasaṃvyavahārasyābhāvād ekatra jātucit nānārtheṣv iṃdranīlādīrūpeṣu vyavahāriṇām [ ] ekasyānekarūpasya citratvena vyavasthiteḥ maṇyāder iva nānyasya sarvathātiprasaṃgataḥ [ ] citraṃ rūpam iti jñānam eva na pratihanyate rūpe py anekarūpatvapratītes tadviśeṣataḥ [ ] guṇo nekasvabhāvaḥ syād dravyavan na guṇāśrayaḥ iti rūpaguṇe nekasvabhāve citraśemuṣī [ ] nanv anekasvabhāvatvāt sarvasyārthasya tattvataḥ na citravyavahāraḥ syāj jainānāṃ kvacid ity asat [ ] siddhe jātyaṃtare citre tato poddhṛtya bhāṣate jano hy ekam idaṃ nānā vety arthitvaviśeṣataḥ [ ] yogijñānavad iṣṭaṃ tadbahvādyarthāv abhāsanam jñānam ekaṃ sahasrāṃśuprakāśajñānam eva cet [ ] tadevāvagrahādyākhyaṃ prāpnuvat kimu vāryate na ca smṛtisahāyena kāraṇenopajanyate [ ] bahvādyavagrahādīdaṃ vedanaṃ śabdabodhavat yenāvabhāsanād bhinnaṃ grahaṇaṃ tatra neṣyate [ ] bahau bahuvidhe cārthe setare 'vagrahādikam smaraṇaṃ pratyabhijñānaṃ ciṃtā vābhinibodhanam [ ] dhāraṇāviṣaye tatra na viruddhaṃ pratītitaḥ pravṛtter anyathā jātu tanmūlāyā virodhataḥ [ ] kṣaṇasthāyitayārthasya niḥśeṣasya prasiddhitaḥ kṣiprāvagraha eveti kecit tadaparīkṣitam [ ] sthāsnūtpitsuvināśitvasamākrāṃtasya vastunaḥ samarthayiṣyamāṇasya bahutobahuto grataḥ [ ] kauṭasthāt pūrvabhāvānāṃ parasyābhyupagacchataḥ akṣiprāvagrahaikāṃto py etenaiva nirākṛtaḥ [ ] prāpyakārīṃdriyair yukto nisṛtānuktavastunaḥ nāvagrahādir ity eke prāpyakārīṇi tāni vā [ ] tan nānisṛtabhāvasyānuktasyāpi ca kaiścana sūkṣmair aṃśaiḥ pariprāptasyākṣais tair avabodhanāt [ ] nisṛtoktam athaivaṃ syāt tasyety api na śaṃkyate sarvāprāptima vekṣyaivānisṛtānuktatāsthiteḥ [ ] dhruvasya setarasyātrāvagrahāder na bādhyate nityānityātmake bhāve siddhiḥ syādvādino ṃjasā [ ] nanu bahvādayo dharmāḥ setarāḥ kasya dharmiṇaḥ te 'vagrahādayo yeṣām ity arthasyeti sūtritam [ ] yo vyakto dravyaparyāyātmārthaḥ so trābhisaṃhitaḥ avyaktasyottare sūtre vyaṃjanasyopavarṇanāt [ ] kevalo nārthaparyāyaḥ sūrer iṣṭo virodhataḥ tasya bahvādiparyāyaviśiṣṭatvena saṃvidaḥ [ ] tata eva na niḥśeṣaparyāyebhyaḥ parāṅmukham dravyam artho na cānyonyānapekṣya taddvayaṃ bhavet [ ] evam arthasya dharmāṇāṃ bahvādītarabhedinām avagrahādayaḥ siddhaṃ tanmatijñānam īritam [ ] niyamārtham idaṃ sūtraṃ vyaṃjanetyādi darśitam siddhe hi vidhir ārabhyo niyamāya manīṣibhiḥ [ ] avyaktam atra śabdādijātaṃ vyaṃjanam iṣyate tasyāvagraha eveti niyamo dhyakṣavadgataḥ [ ] īhādayaḥ punas tasya na syuḥ spaṣṭārthagocarāḥ niyameneti sāmarthyād uktam atra pratīyate [ ] nanv arthāvagraho yadvadakṣataḥ spaṣṭagocaraḥ tadvat kiṃ nābhimanyeta vyaṃjanāvagraho py asau [ ] kṣayopaśamabhedasya tādṛśo 'saṃbhavād iha aspaṣṭātmakasāmānyaviṣayatvavyavasthitam [ ] adhyakṣatvaṃ na hi vyāptaṃ spaṣṭatvena viśeṣataḥ daviṣṭhapādapādhyakṣajñānasyāspaṣṭatekṣaṇāt [ ] viśeṣaviṣayatvaṃ ca divā tāmasapakṣiṇāṃ tigmarocir mayūkheṣu bhṛṃgapādāv abhāsanāt [ ] jñānasya spaṣṭatā lokanimittety api dūṣitam etena sthāpitākarī [ ] saivāspaṣṭatvahetuḥ syād vyaṃjanāvagrahasya naḥ gaṃdhādidravyaparyāyagrāhiṇo py akṣajanmanaḥ [ ] netyādy āha niṣedhārtham aniṣṭasya prasaṃginaḥ cakṣurmanonimittasya vyaṃjanāvagrahasya tat [ ] vyaṃjanāvagraho naiva cakṣuṣāniṃdriyeṇa ca aprāpyakāriṇā tena spaṣṭāvagrahahetunā [ ] prāpyakārīṃdriyaś cārthe prāptibhedād dhi kutracit tadyogyatāṃ viśeṣāṃ vā spaṣṭāvagrahakāraṇam [ ] yathā navaśarāv ādau dvitrādyās toyaviṃdavaḥ avyaktāmārdratāṃ kṣiptāḥ kurvaṃti prāpyakāriṇaḥ [ ] paunaḥ punyena vikṣiptā vyaktāṃ tām eva kurvate tatprāptibhedatas tadvadiṃdriyāṇy apy avagraham [ ] aprāptikāriṇī cakṣurmanasī kurutaḥ punaḥ vyaktām arthaparicchittim aprāpter aviśeṣataḥ [ ] yathāyaskāṃtapāṣāṇaḥ śalyākṛṣṭiṃ svaśaktitaḥ karoty aprāptikārīti vyaktim eva śarīrataḥ [ ] cakṣuḥ prāptapar icched akāraṇaṃ rūpavyaktitaḥ sparśanādivad ity eke tan na pakṣasya bādhanāt [ ] bāhyaṃ cakṣur yadā tāvat kṛṣṇatārādi dṛśyatām prāptaṃ pratyakṣato bādhāt tasyārthāprāptivedinaḥ [ ] śaktirūpam adṛśyaṃ ced anumānena bādhanam āgamena sunirṇītāsaṃbhavadbādhakena ca [ ] tatrāprāptiparicchedi cakṣuḥ spaṣṭānavagrahāt anyathā tadasaṃbhūter ghrāṇāder iva sarvathā [ ] cakṣuṣā śaktirūpeṇa tārakāgatam aṃjanaṃ na spṛṣṭam iti taddhetor asiddhatvam ihocyate [ ] śaktiḥ śaktim ato nyatra tiṣṭhatārthena yujyate tatrasthena tu naiveti ko nyo brūyāj jaḍātmanaḥ [ ] pakṣāvyāpakatā hetor manasya prāpyakāriṇi virahād iti maṃtavyaṃ nāsyāpekṣatvayogyataḥ [ ] manaso prāpyakāritvaṃ nāprasiddhaṃ pravādinām kvānyathātītadūrādipadārthagrahaṇaṃ tataḥ [ ] kācādyaṃtaritārthānāṃ grahāc cāprāptakāritā cakṣuṣaḥ prāpyakāritve manasaḥ sparśanādivat [ ] vibhajya sphaṭikādīṃś cet kathaṃcic cakṣuraṃśavaḥ prāpnuvaṃs tūlarāśyādīn naśvarān neti cādbhutam [ ] sāmarthyaṃ pāradīyasya yathā yasyānubhedane nālāṃbūbhānodbhede manāg api samīkṣyate [ ] kācādibhedane śaktis tathā nayanarociṣāṃ saṃbhāvyā tūlarāśyādibhidāyāṃ neti kecana [ ] tadaprātītikaṃ so yaṃ kācādir iti niścayāt vināśavyavahārasya tatrābhāvāc ca kasyacit [ ] samānasanniveśasya tasyotpatter anāśitāṃ jano manyeta nirlūnakeśāder veti cen matam [ ] na kvacit pratyābhijñānam ekatvasya prasādhakaṃ siddhyed iti kṣaṇadhvaṃsi jagadāpātam aṃjasā [ ] ātmādyekatvasiddhiś cet pratyabhijñānato dṛḍhāt dārḍhyāt tatra kuto bādhābhāvāc cet prakṛte sabhaṃ [ ] kācādyaṃtaritānarthān paśyataś ca niraṃtaraṃ tatra bhedasya niṣṭhānān nābhinnasya karagrahaḥ [ ] vināśānaṃtarotpattau punarnāśe punarbhavet kuto niraṃtaraṃ tena chāditārthasya darśanam [ ] sparśanena ca nirbhedaśarīrasya mahoṃginām sāṃtareṇānubhūyaṃte tasya sparśanadarśane [ ] prāptasyāṃtaritārthena vibhinnasya parīkṣaṇāt nārthasya darśanaṃ siddhyed anumā ca tathaiva vā [ ] nanv atyaṃtaparokṣatve satyārthasyānumāgateḥ vijñānasyoparaktatve tena vijñāyate katham [ ] tayā śaśvadadṛśyena vedhasā nirmitaṃ jagat kathaṃ niściyate kāryaviśeṣāc cet parair api [ ] pratyakṣeṇāprabādhena bahirarthasya darśanam jñānasyāṃtaḥ prasiddhaṃ cen nānyathā parikalpyate [ ] kācādyaṃtaritārthe pi samānam idam uttaraṃ kācāder bhinnadeśasya tasyāvādhaṃ viniścayāt [ ] yathā mukhaṃ nirīkṣaṃte darpaṇe pratibiṃbitam svadehe saṃspṛśaṃtīti bādhā siddhātra dhīmatām [ ] tathā na sphaṭikāṃbho nupaṭalāvṛttavastuni svadeśāditayā tasya tadā paścāc ca darśanāt [ ] na cekṣaṃte smadādīnāṃ sphuraṃtaś cakṣuraṃśavaḥ sāṃdhakārani śīthiny āmanyānvabhibhavād api [ ] yady anudbhūtarūpās te śakyaṃte nekṣituṃ janaiḥ tadā pramāṃtaraṃ vācyaṃ tatsadbhāvāvabodhakam [ ] raśmivallocanaṃ sarvaṃ taijasatvāt pradīpavat iti siddhaṃ na netrasya jyotiṣkatvaṃ prasādhayet [ ] taijasaṃ nayanaṃ satsu sannikṛṣṭarasādiṣu rūpasya vyaṃjakatvāc cet pradīpādivad īryate [ ] hetor dinaniśānāthamayūkhair vyarbhicāritā taijasaṃ nihite caṃdrakāṃtaraṃ tatkṣitau bhavāḥ [ ] tejonusūtritā jñeyā gā mūloṣṇavatī prabhā nānyā makaratādīnāṃ pārthivatvaprasiddhitaḥ [ ] rūpābhivyaṃjane cākṣṇāṃ nāśe kvāpekṣaṇaṃ bhavet taijasatvāt pradīpāder iva sarvasya dehinaḥ [ ] yathaikasya pradīpasya suspaṣṭārthaprakāśane maṃdatvād asamarthasya dvitīyāder apekṣaṇam [ ] tathākṣṇor na viruddhyeta sūryālokādyapekṣaṇaṃ svakāryo hi svajātīyaṃ sahakāri pratīkṣyate [ ] tadasallocanasyārthaprakāśitvāviniścayāt kathaṃcid api dīpādinirapekṣasya pradīpavat [ ] aṃdhakārāvabhāso sti vinālokena cen na vai prasiddhasteṃdhakāro sti jñānābhāvāt parorthakṛt [ ] pareṣṭyāstīti cet tasyāḥ siddhaṃ cakṣurataijasaṃ pramāṇatve nyathā nāṃdhakāraḥ siddhyet tatas tava [ ] ataijasāṃjanāpekṣi cakṣū rūpaṃ vyanakti yaṃ nātaḥ samānajātīyasahakāri niyamyate [ ] kim uṣṇasparśavijñānaṃ taijasekṣṇi na jāyate tasyānudbhūtatāyāṃ tu rūpānudbhūtatā kutaḥ [ ] tejodravyaṃ hy anudbhūtasparśam udbhūtarūpabhṛt dṛṣṭaṃ yathā pradīpasya prabhābhāraḥ samaṃtataḥ [ ] tathānudbhūtarūpaṃ tadudbhūtasparśam īkṣitam yathoṣṇodakasaṃyuktaṃ paramudbhūtataddvayam [ ] nānubhūtadvayaṃ tejo dṛṣṭaṃ cakṣur yatas tathā adṛṣṭavaśatas tac cet sarvam akṣaṃ tathā na kim [ ] suvarṇaghaṭavat tatsyādityasiddhaṃ nidarśanaṃ pramāṇabalatas tasya taijasatvāprasiddhitaḥ [ ] noṣṇavīryatvatas tasya taijasatvaṃ prasiddhyati vyabhicārān marīcādidravyeṇa taijasena vaḥ [ ] tato nāsiddhatā hetoḥ siddhasādhyasya budhyate cakṣuṣatvādito dhvānenitatyatvasya yathaiva hi [ ] saṃto pi raśmayo netre manasādhiṣṭhitā yadi vijñānahetavo rtheṣu prāpteṣv eveti manyate [ ] manaso ṇutvataś cakṣurmayūkheṣv anadhiṣṭhiteḥ bhinnadeśeṣu bhūyastvaparamāṇuvadekaśaḥ [ ] mahīyaso mahīdhrasya paricchittir na yujyate krameṇādhiṣṭhitau tasya tadaṃśeṣv eva saṃvidaḥ [ ] niraṃśo vayavī śailo mahīyān api rociṣā nayanena paricchedyo manasādhiṣṭhitena cet [ ] na syān mecakavijñānaṃ nānāvayavagocaram taddeśiṣaviṣayaṃ cāsya manohīnair dṛgaṃśubhiḥ [ ] śailacaṃdramasoś cāpi pratyāsannadaviṣṭhayoḥ saha jñānena yujyate prasiddham api saddhiyām [ ] kālena yāvatā śailaṃ prayāṃti nayanāṃśavaḥ kecic caṃdramasaṃ cānye tāvataiveti yujyate [ ] tayoś ca kramato jñānaṃ yadi syāt te manodvayaṃ nānyathaikasya manasas tadadhiṣṭhityasaṃbhavāt [ ] vikīrṇānekanetrāṃśurāśer aprāpyakāriṇaḥ manasodhiṣṭhitau kāryasyaikadeśe pi tiṣṭhataḥ [ ] sahākṣapaṃcakasyaitat kiṃ nādhiṣṭhāyakaṃ mataṃ yato na kramato bhīṣṭaṃ rūpādijñānapaṃcakam [ ] tathā ca yugapajjñānānutpatter aprasiddhitaḥ sādhye manasi liṃgatvaṃ na syād iti manaḥ kutaḥ [ ] manonadhiṣṭhitāś cakṣūraśmayo yadi kurvate svārthajñānaṃ tad apy etaddūṣaṇaṃ duratikramam [ ] tato kṣiraśmayo bhittvā kācādīn arthabhāsinaḥ teṣām abhāvato bhāve py uktadoṣānuṣaṃgataḥ [ ] kācādyaṃtaritārthānāṃ grahaṇaṃ cakṣuṣaḥ sthitam aprāpyakāritāliṃgaṃ parapakṣasya bādhakam [ ] spṛṣṭaṃ śabdaṃ śṛṇoty akṣam aspṛṣṭaṃ rūpam īkṣyate spṛṣṭaṃ baddhaṃ ca jānāti sparśaṃ gaṃdhaṃ rasaṃ tathā [ ] ity āgamaś ca tasyāsti bādhako bādhavarjitaḥ cakṣuṣo prāpyakāritvasādhanaḥ śuddhadhīmataḥ [ ] manobuddhiprakṛṣṭārthagrāhakatvānuṣaṃjanaṃ netrasyāprāpyakāritve bādhakaṃ yena gīyate [ ] tasya prāptānugaṃdhādigrahaṇasya prasaṃjanam prāṇādeḥ prāpyakāritve bādhakaṃ kena bādhyate [ ] sūkṣme mahita ca prāpter aviśeṣe pi yogyatā gṛhītuṃ cen mahaddravyaṃ dṛśyaṃ tasya na cāparam [ ] tarhy aprāpter abhede pi cakṣuṣaḥ śaktir īdṛśī yathā kiṃcid dhi dūrārtham avidikkaṃ prapaśyati [ ] samaṃ cādṛṣṭavaicitryaṃ jñānavaicitryakāraṇaṃ syādvādināṃ pareṣāṃ cety alaṃ vādena tatra naḥ [ ] pratyakṣeṇānumānena svāgamena ca bādhitaḥ pakṣaḥ prāptiparicchedakāri cakṣur iti sthitaḥ [ ] kālātyayāpadiṣṭaś ca heturbāhyeṃdriyatvataḥ ity aprāptārthakāritve ghrāṇāder iva vāṃchite [ ] etena bhautikatvādi sādhanaṃ tatra vāritaṃ pratyetavyaṃ pramāṇena pakṣabādhasya nirṇayāt [ ] ayaskāṃtādināṃ loham aprāpyākarṣatā svayaṃ anaikāṃtikatā hetor bhautikārthasya bādhyate [ ] kāyāṃtargatalohasya bahirdeśasya vakṣyate nāyaskāṃtādinā prāptis tatkarair voktakarmaṇi [ ] yathā kastūrikādravye viyukte pi paṭāditaḥ tatra saugaṃdhyataḥ prāptis tadgaṃdhāṇubhir iṣyate [ ] ayaskāṃtāṇubhiḥ kaiścit tathā lohe pi seṣyatāṃ vibhakte pi tatas tatrākṛṣṭyāder dṛṣṭitas tadā [ ] ity ayuktam ayaskāṃtam aprāptaṃ prati darśanāt lohākṛṣṭeḥ pariprāptās tadaṃśās tu na jātucit [ ] yathā kastūrikādyarthaṃ gaṃdhādiparamāṇavaḥ svādhiṣṭhānābhimukhyena tā nayaṃti paṭādigāḥ [ ] tathāyaskāṃtapāṣāṇaṃ sūkṣmabhāgāś ca lohagāḥ ity āyātam ito prāptāyaskāṃto lohakarmakṛt [ ] prāptā harītakī śaktā kartuṃ malavirecanaṃ malaṃ na punar ānetuṃ harītakyaṃtaraṃ prati [ ] ākarṣaṇaprayatnena vinānanakṛtānilaḥ padmanālādigo ṃbhāṃsi nākarṣati mukhaṃ prati [ ] sūryāṃśavo nayaṃty aṃbhaḥ prāpya tatsūryamaṃḍalaṃ citrabhānutviṣo nāstam iti svecchopakalpitam [ ] tathaiva kāraṇatvasya manasā vyabhicāritā maṃtreṇa ca bhujaṃgādyuccāṭakādikareṇa vā [ ] śabdātmano hi maṃtrasya prāptir na bhujagādinā manāg āvartamānasya dūrasthena pratīyate [ ] tad evaṃ cakṣuṣaḥ prāpyakāritve nāsti sādhanaṃ manasaś ca tatas tābhyāṃ vyaṃjanāvagrahaḥ kutaḥ [ ] dūre śabdaṃ śṛṇomīti vyavahārasya darśanāt śrotram aprāpyakārīti kecid āhus tad apy asat [ ] dūre jighrāmy ahaṃ gaṃdham iti vyavahṛtīkṣaṇāt ghrāṇasyāprāpyakāritvaprasaktir iṣṭahānitaḥ [ ] gaṃdhādhiṣṭhānabhūtasya dravyaprāptasya kasyacit dūratvena tathā vṛttau vyavahāro tra cen nṛṇām [ ] samaṃ śabde samādhānam iti yat kiṃcanedṛśaṃ codyaṃ mīmāṃsakādīnām aprātītikavādinām [ ] kuṭyādivyavadhāne pi śabdasya śravaṇād yadi śrotrām aprāpyakārīṣṭaṃ tathā ghrāṇaṃ tatheṣyatāṃ [ ] dravyāṃtaritagaṃdhasya ghrātasūkṣmasya tasya cet ghrāṇaprāptasya saṃvittiḥ śrotraprāptasya no dhvaneḥ [ ] yathā gaṃdhāṇavaḥ kecic chaktāḥ kuṭyādibhedane sūkṣmās tathaiva naḥ siddhāḥ pramāṇadhvanipudgalāḥ [ ] tatrārekotkaraḥ sarvo gaṃdhadravye samasthitaḥ samādhiś ceti na vyāsenāsmābhir abhidhīyate [ ] kiṃ nimittaṃ śrutajñānaṃ kiṃ bhedaṃ kiṃ prabhedakam parokṣam iti nirṇetuṃ śrutam ityādi sūtritam [ ] śrute nekārthatāsiddhe jñānam ity anuvartanāt śravaṇaṃ hi śrutajñānaṃ na punaḥ śabdamātrakam [ ] tac copacārato grāhyaṃ śrutaśabdaprayogataḥ śabdabhedaprabhedoktaḥ svayaṃ tatkāraṇatvataḥ [ ] samyag ity adhikārāt tu śrutābhāsanivartanam tasyāprāmāṇyavicchedaḥ pramāṇapadavṛttitaḥ [ ] parokṣāviṣkṛtes tasya pratyakṣatvanirākriyā nāvadhyādinimittatvaṃ matipūrvam iti śruteḥ [ ] pūrvaṃ śabdaprayogasya vyavadhāne pi darśanāt na sākṣānmatipūrvasya śrutasyeṣṭasya bādhanam [ ] na ca kevalapūrvatvāt sarvajñavacanātmanaḥ śrutasya matipūrvatvaniyamo tra virudhyate [ ] jñānātmanas tathābhāvaprokte gaṇabhṛtām api matiprakarṣapūrvatvād arhatproktārthasaṃvidaḥ [ ] matisāmānyanirdeśān na śrotramatipūrvakaṃ śrutaṃ niyamyate 'śeṣamatipūrvasya vīkṣaṇāt [ ] śrutvā śabdaṃ yathā tasmāt tadarthaṃ lakṣayed ayaṃ tathopalabhya rūpādīn arthaṃ tan nāṃtarīyakam [ ] na smṛtyādi matijñānaṃ śrutam evaṃ prasajyate matipūrvatvaniyamāt tasyāsya tu matitvataḥ [ ] śrutajñānāvṛticchedaviśeṣāpekṣaṇasya ca smṛtyādiṣv aṃtaraṃgasyābhāvān na śrutatāsthitiḥ [ ] matipūrvaṃ tato jñeyaṃ śrutam aspaṣṭatarkaṇam na tu sarvamativyāptiprasaṃgād iṣṭabādhanāt [ ] dvibhedam aṃgabāhyatvād aṃgarūpatvataḥ śrutam anekabhedam atraikaṃ kālikotkālikādikam [ ] dvādaśāvastham aṃgātmatadācārādibhedataḥ pratyekaṃ bhedaśabdasya saṃbaṃdhād iti vākyabhit [ ] mukhyā jñānātmakā bhedaprabhedās tasya sūtritāḥ śabdātmakāḥ punar gauṇāḥ śrutasyeti vibhidyate [ ] śabdajñānasya sarve pi matipūrvatvam ādṛtāḥ vādinaḥ śrotravijñānābhāve tasya samudbhavāt [ ] śabdātmakaṃ punar yeṣāṃ śrutam ajñānapūrvakaṃ nityaṃ teṣāṃ pramāṇena virodho bahucoditaḥ [ ] pratyakṣabādhanaṃ tāvad agnim īle purohitaṃ ity evam ādiśabdasya jñānapūrvatvavedanāt [ ] tadvyakteḥ jñānapūrvatvaṃ svayaṃ saṃvedyate na tu śabdasyeti na sādhīyo vyakteḥ śabdātmakatvataḥ [ ] śabdādyarthāṃtaraṃ vyaktiḥ śabdasya katham ucyate saṃbaṃdhāc ceti saṃbaṃdhaḥ svabhāva iti saikatā [ ] śabdavyakterabhinnaikasaṃbaṃdhātmatvato na kim saṃbaṃdhasyāpi tadbhede navasthā kena vāryate [ ] bhinnābhinnātmakatve tu saṃbaṃdhasya tatas tava śabdasya buddhipūrvatvaṃ vyakter iva kathaṃcana [ ] vyaktir varṇasya saṃskāraḥ śrotrasyāthobhayasya vā tadbuddhitāvṛtticchedaḥ sāpy etenaiva dūṣitā [ ] viśeṣādhānam apy asya nābhivyaktir vibhāvyate nityasyātiśayotpattivirodhāt svātmanāśavat [ ] kalaśāder abhivyaktir dīpādeḥ pariṇāminaḥ prasiddheti na sarvatra doṣoyam anuṣajyate [ ] nityasya vyāpino vyaktiḥ sākalyena yadīṣyate kiṃ na sarvatra sarvasya sarvadā tadviniścayaḥ [ ] svādṛṣṭavaśataḥ puṃsāṃ śābdajñānavicitratā vyakte pi kārtsnyataḥ śabde bhāve sarvātmake na kim [ ] deśatas tadabhivyaktau sāṃśatā na virudhyate vyaṃjake yat tu śabdanām abhinne sakalaśrutiḥ [ ] tasya kvacid abhivyaktau vyāpāre deśabhāk svataḥ nānārūpe tu nānātvaṃ kutas tasyāvagamyatām [ ] svābhipretābhilāpasya śruter anyonyasaṃśrayaḥ siddhe vyaṃjakanānātve viśiṣṭavacasaḥ śrutiḥ [ ] prasiddhāyāṃ punas tasyāṃ tatprasiddhir hi te mate yadi pratyakṣasiddheyaṃ viśiṣṭavacasaḥ śrutiḥ [ ] śemuṣīpūrvatāsiddhir vācā kiṃ nānumanyate nanu jñānanimittatvaṃ vācām uccāraṇasya naḥ [ ] siddhaṃ nāpūrvarūpeṇa prādurbhāvaḥ kadācana kartur asmaraṇaṃ tāsāṃ tādṛśīnāṃ viśeṣataḥ [ ] puruṣārthopayogatvabhājām api mahātmanāṃ naivaṃ sarvanṛṇāṃ kartuḥ smṛter apratisiddhitaḥ [ ] tatkāraṇaṃ hi kāṇādāḥ smaraṃti caturānanaṃ jaināḥ kālāsuraṃ bauddhāḥ svāṣṭakāt sakalāḥ sadā [ ] sarve svasaṃpradāyasyāvicchedenāvigānataḥ nānākartṛsmṛter nāsti tāsāṃ kartety asaṃgataṃ [ ] bahukartṛkatāsiddheḥ khaṃḍaśas tādṛganyavat kartur asmaraṇaṃ hetur yājñikānāṃ yadīṣyate [ ] tadā svagṛhamānyā syād vedasyāpauruṣeyatā jagato 'kartṛtāpy evaṃ pareṣām iti cen na vai [ ] kartuḥ smaraṇahetus tatsiddhau taiś ca prayujyate mahattvaṃ tu na vedasya prativādyāgamāt sthitam [ ] yenāśakyakriyatvasya sādhanaṃ tat tava smṛteḥ puruṣārthopayogitvaṃ vivādādhyāsitaṃ kathaṃ [ ] viśeṣaṇatayā hetoḥ prayoktuṃ yujyate satāṃ vedādhyayanavācyatvaṃ vedādhyayanapūrvatām [ ] na vedādhyayane śaktaṃ prājñāpayitum anyavat yathā hiraṇyagarbhaḥ so 'dhyetā vedasya sādhyate [ ] yugādau prathamas tadvadbuddhādiḥ svāgamasya ca sākṣātkṛtyāgamasyārthavaktā kartāgamasya cet [ ] agnir ity agnir ityādir vaktā kartā tu tādṛśaḥ parābhyupagamāt kartā sa ced vede pitāmahaḥ [ ] tata eva na dhātāstu na vā kaścit samatvataḥ nānādhītasya vedasyādhyetāsty adhyāpakād vinā [ ] na so sti brahmaṇo trādāv iti nādhyetṛtā gatiḥ svarge dhītān svayaṃ vedānanusmṛty eha saṃbhavī [ ] brahmādhyetā pareṣāṃ bādhyāpakaś ced yathā yathaṃ sarve pi kavayaḥ saṃtu tathādhyetāra eva ca [ ] ity akṛtrimatā sarvaśāstrāṇāṃ samupāgatā svayaṃ janmāṃtarādhītam adhīyāmahi saṃprati [ ] iti saṃvedanābhāvāt teṣām adhyetṛtā na cet pūrvānubhūtapānādes tadaharjātadārakāḥ [ ] smartāraḥ katham evaṃ syus tathā saṃvedanād vinā smṛtiliṃgaviśeṣāc cet teṣāṃ tatra prasādhyate [ ] kavīnāṃ kiṃ na kāvyeṣu pūrvādhīteṣu sānvayā yadi vyutpattivarṇeṣu padeṣv artheṣv anekadhā [ ] vākyeṣu ceha kurvaṃtaḥ kavayaḥ kāvyam īkṣitāḥ kiṃ na prajāpatir vedān kurvann evaṃ satīkṣitaḥ [ ] kaścit parīkṣakair lokaiḥ sadbhis taddeśakālagaiḥ tathā ca śrūyate sāpi girā sāmāni rugnirāṭ [ ] ṛcaḥ kṛtā iti kveyaṃ vedasyāpauruṣeyatā pratyabhijñāyamānatvaṃ nityaikāṃtaṃ na sādhayet [ ] paurvāparyavihīne rthe tadayogād virodhataḥ pūrvadṛṣṭasya paścād yā dṛśyamānasya caikatām [ ] vetti sā pratyabhijñeti prāyaśo viniveditam dṛṣṭatvadṛśyamānatve rūpe pūrvāpare na cet [ ] bhāvasya pratyabhijñānaṃ syāt tad atrāśv aśṛṃgavat tadā nityātmakaḥ śabdaḥ pratyabhijñānato yathā [ ] devadattādir ity astu viruddho hetur īritaḥ darśanasya parārthatvād ity api paradarśitaḥ [ ] viruddho hetur ity evaṃ śabdaikatvaprasādhane tato 'kṛtakatā siddher abhāvān nayaśaktitaḥ [ ] vedasya prathamo dhyetā karteti matipūrvataḥ padavākyātmakatvāc ca bhāratādivad anyathā [ ] tadayogād virudhyeta saṃgirau ca mahānasaḥ sarveṣāṃ hi viśeṣāṇāṃ kriyā śakyā vacottare [ ] vedavākyeṣu dṛśyānām anyeṣāṃ ceti hetutā yuktānyathā na dhūmāder agnyādiṣu bhaved asau [ ] tataḥ sarvānumānānām ucchedas te duruttaraḥ pramāṇaṃ na punar vedavacaso kṛtrimatvataḥ [ ] sādhyate ced bhaved arthavād asyāpi pramāṇatā aduṣṭahetujanyatvaṃ tadvatprāmāṇyasādhane [ ] hetvābhāsanam ity uktam apūrvārthatvam apyadaḥ bādhavarjitatā hetus tatra cel laiṃgikādivat [ ] kim akṛtrimatā tasya poṣyate kāraṇaṃ vinā puṃso doṣāśrayatvena pauruṣeyasya duṣṭatā [ ] śakyate tajjasaṃvitter ato bādhanaśaṃkanaṃ niḥsaṃśayaṃ punar bādhavarjitatvaṃ prasiddhyati [ ] kartṛhīnavaco vitter ity akṛtrimatārthakṛt pareṣām āgamasyeṣṭaṃ guṇavadvaktṛkatvataḥ [ ] sādhīyasīti yo vakti so pi mīmāṃsakaḥ kathaṃ samatvād akṣaliṃgādeḥ kasyacid duṣṭatā dṛśaḥ [ ] śabdajñānavadāśaṃkāpattes tajjanmasaṃvidaḥ mithyājñānanimittasya yady akṣādes tadā na tāḥ [ ] tādṛśaḥ kiṃ na vākyasya śrutyābhāsatvam iṣyate guṇavadvaktṛkatvaṃ tu parair iṣṭaṃ yad āgame [ ] tatsādhanāṃtaraṃ tasya prāmāṇye kāṃścana prati sunirbādhatvahetor vā samarthanaparaṃ bhavet [ ] tan no ca pauruṣeyatvaṃ bhavatas tatra tādṛśaṃ maṃtrārthavādaniṣṭhasya pauruṣeyasya bādhanāt [ ] vedasyāpi payodādidhvaner naiṣphalyadarśanāt satyaṃ śrutaṃ sunirṇītāsaṃbhavadbādhakatvataḥ [ ] pratyakṣādivad ity etatsamyak prāmāṇyasādhanaṃ kadācit syād apramāṇaṃ śuktau rajatabodhavat [ ] nāpekṣaṃ saṃbhavadbādhaṃ deśakālanarāṃtaraṃ sveṣṭajñānavad ity asya nānaikāṃtikatā sthitiḥ [ ] na ca hetur asiddho yam avyaktārthavacovidaḥ pratyakṣabādhanābhāvād anekāṃte kadācana [ ] anumeye numānena bādhavaidhuryanirṇayāt tṛtīyasthānasaṃkrāṃte tv āgamāvayavena ca [ ] parāgame pramāṇatvaṃ naivaṃ saṃbhāvyate sadā dṛṣṭeṣṭabādhanāt sarvaśūnyatvāgamabodhavat [ ] bhāvādyekāṃtavācānāṃ sthitaṃ dṛṣṭeṣṭabādhanaṃ sāmaṃtabhadrato nyāyād iti nātra prapaṃcitam [ ] kariṣyate ca tadvatsa yathāvasaram agrataḥ yuktyā sarvatra tattvārthe paramāgamagocaram [ ] proktabhedaprabhedaṃ tacchrutam eva hi taddṛḍhaṃ prāmāṇyam ātmasāt kuryād iti naściṃtayātra kim [ ] atra pracakṣate kecic chrutaṃ śabdānuyojanāt tatpūrvaniyamādyuktaṃ nānyatheṣṭavirodhataḥ [ ] śabdānuyojanād eva śrutaṃ hi yadi kathyate tadā śrotramatijñānaṃ na syān nānyamatau bhavam [ ] yady apekṣavacas teṣāṃ śrutaṃ sāṃvyavahārikaṃ sveṣṭasya bādhanaṃ na syād iti saṃpratipadyate [ ] na so sti pratyayo loko yaḥ śabdānugamādṛte ity ekāṃtaṃ nirākartuṃ tathoktaṃ tair iheti vā [ ] jñānam ādyaṃ smṛtiḥ saṃjñā ciṃtā cābhinibodhikaṃ prāgnāmasaṃsṛtaṃ śeṣaṃ śrutaṃ śabdānuyojanāt [ ] vāgrūpatā tato na syād yoktā pratyavamarśinī matijñānaṃ prakāśeta sadā tad dhi tayā vinā [ ] vaikharīṃ madhyamāṃ vācaṃ vinākṣajñānam ātmanaḥ svasaṃvedanam iṣṭaṃ no nyonyāśrayaṇam anyathā [ ] paśyaṃtyā nu vinā naitadvyavasāyātmavedanam yuktaṃ na cātra saṃbhāvyaḥ prokto nyonyasamāśrayaḥ [ ] vyāpinyā sūkṣmayā vācā vyāptaṃ sarvaṃ ca vedanaṃ tayā vinā hi paśyaṃtī vikalpātmā kutaḥ punaḥ [ ] madhyamā tadabhāve kva nirbījā vaikharī ravāt tataḥ sā śāśvatī sarvavedaneṣu prakāśate [ ] iti ye pi samādadhyus te py anālocitoktayaḥ śabdabrahmaṇi nirbhāge tathā vaktum aśaktitaḥ [ ] na hy avasthā ca śrotrasya satyādvaitaprasaṃgataḥ na ca tāsām avidyātvaṃ tattvāsiddhau prasiddhyati [ ] brahmaṇo na vyavasthānam akṣajñānāt kutaścana svapnādāv iva mithyātvāt tasya sākalyataḥ svayam [ ] nānumānāt tato rthānāṃ pratīter durlabhatvataḥ paraprasiddhir apy asya prasiddhā nāpramāṇikā [ ] svataḥ saṃvedanāt siddhiḥ kṣaṇikānaṃśavittivat na parabrahmaṇo nāpi sā yuktā sādhanād vinā [ ] āgamād eva tatsiddhau bhedasiddhis tathā na kim nirbādhād eva cettavyaṃ va pramāṇāṃtarādṛte [ ] tadāgamasya niścetuṃ śakyaṃ jātu parīkṣakaiḥ na cāgamas tato bhinnaḥ samasti paramārthataḥ [ ] tadvivartas tv avidyātmā tasya prajñāpakaḥ kathaṃ na cāviniścite tattve phenabudbudavadbhidā [ ] māyeyaṃ bata duḥpārā vipaścid iti paśyati yenāvidyā vinirṇītā vidyāṃ gamayati dhruvam [ ] bhrāṃter bījāvinābhāvād anumātraivam āgatā tato naiva paraṃ brahmāsty anādinidhanātmakam [ ] vivartetārthabhāvena prakriyā jagato yataḥ [ ] śrotragrāhyātra paryāyarūpā sā vaikharī matā madhyamā ca parais tasyāḥ kṛtaṃ nāmāṃtaraṃ tathā [ ] dravyarūpā punar bhāṣāvargaṇāḥ pudgalāḥ sthitāḥ pratyayān manasā nāpi sarvapratyayagāminī [ ] bhāvavāgvyaktirūpātra vikalpātmanibaṃdhanaṃ dravyavācobhidhā tasyāḥ paśyaṃtīty anirākṛtāḥ [ ] vāgvijñānāvṛtticchedaviśeṣopahitātmanaḥ vaktuḥ śaktiḥ punaḥ sūkṣmā bhāvavāg abhidhīyatām [ ] tayā vinā pravartaṃte na vācaḥ kasyacit kvacit sarvajñasyāpy anaṃtāyā jñānaśaktes tadudbhavaḥ [ ] iti cidrūpasāmānyāt sarvātmavyāpinī nanu viśeṣātmatayety uktā matiḥ prāṅ nāmayojanāt [ ] śabdānuyojanād eva śrutam evaṃ na bādhyate jñānaśabdād vinā tasya śaktirūpād asaṃbhavāt [ ] labdhyakṣarasya vijñānaṃ nityoddhāṭanavigrahaṃ śrutājñāne pi hi proktaṃ tatra sarvajaghanyake [ ] sparśaneṃdriyamātrotthe matyajñānanimittakaṃ tato kṣarādivijñānaṃ śrute sarvatra saṃmatam [ ] nākalaṃkavacobādhā saṃbhavaty atra jātucit tādṛśaḥ saṃpradāyasyāvicchedādyuktyanugrahāt [ ] kṛtābhideśavācyābhiḥ saṃskārasya kvacit punaḥ saṃvitprasiddhasādharmyāt tathā vācakayojitā [ ] prakāśitopamā kaiścit sā śrutān na vibhidyate śabdānuyojanāt tasyāḥ prasiddhāgamavittivat [ ] pramāṇāntaratāyān tu pramāṇaniyamaḥ kutaḥ saṃkhyā saṃvedanādīnāṃ pramāṇāṃtaratāsthitau [ ] pratyakṣaṃ dvyādivijñānam uttarādharyavedinaṃ sthaviṣṭhorudaviṣṭhālpalaghvāsannādivic ca cet [ ] nopadeśam apekṣeta jātu rūpādivittivat paropadeśanirmuktaṃ pratyakṣaṃ hi satāṃ mataṃ [ ] tatsaṃjñāsaṃjñisambandhapratipattir apekṣate paropadeśam adhyakṣaṃ saṃkhyādiviṣayaṃ yadi [ ] tatropamānataḥ saitat pramāṇāntaram astu vaḥ nopamānārthatā tasyās tadvākyena vinodbhavāt [ ] āgamatvaṃ punaḥ siddham upamānaṃ śrutaṃ yathā siṃhāsane sthito rājetyādiśabdotthavedanaṃ [ ] uttarapratipattyākhyā pratibhā ca śrutaṃ matā nābhyāsajā susaṃvittiḥ kūṭadrumādigocarā [ ] so 'yaṃ kūṭa iti prācyaudīcyadṛṣṭe kṣamāṇayoḥ sādṛśye pratyabhijñeyaṃ matir eva hi niścitā [ ] śabdānuyojanāt tv eṣā śrutam astv akṣavittivat saṃbhavābhāvasaṃvittir arthāpattis tathānumā [ ] nānāsaṃsṛṣṭarūpā hi matir eṣā prakīrtitā nātaḥ kaścid virodho 'sti syādvādāmṛtabhogināṃ [ ] iti śruṃta sarvamunīśaviśrutaṃ sahoktam atyātra parokṣam īritaṃ pramāṇam unmūlitadurmatotkaraṃ parīkṣakāś cetasi dhārayantu tam [ ] bhavapratyaya ityādisūtram āhāvadher bahiḥ kāraṇaṃ kathayann ekaṃ svāmibhedavyapekṣayā [ ] nāmāyurudayāpekṣo nuḥ paryāyo bhavaḥ smṛtaḥ sa bahiḥpratyayo yasya sa bhavapratyayo 'vadhiḥ [ ] ye 'grato 'tra pravakṣyante prāṇino devanārakāḥ teṣām evāyam ity arthān nānyeṣāṃ bhavakāraṇaḥ [ ] bhavapratyaya eveti niyamān na guṇodbhavaḥ saṃyamādiguṇābhāvād devanārakadehinām [ ] nāvadhijñānavṛtkarmakṣayopaśamahetutā vyavacchedyā prasajyetāpratiyogitvanirṇayāt [ ] bāhyau hi pratyayāv atrākhyātau bhavaguṇau tayoḥ pratiyogitvam ity ekaniyamād anyavicchide [ ] pratyayasyāntarasyātas tatkṣayopaśamātmanaḥ pratyagbhedo 'vadher yukto bhavābhede 'pi cāṅginām [ ] guṇahetuḥ sa keṣāṃ syāt kiyadbheda itīritum prāha sūtraṃ kṣayetyādi saṃkṣepād iṣṭasaṃvide [ ] kṣayahetur ity ākhyātaḥ kṣayaḥ kṣāyikasaṃyamaḥ saṃyatasya guṇaḥ pūrvaṃ samabhyarhitavigrahaḥ [ ] tathā cāritramohasyopaśamād udbhavann ayam kathyetopaśamo hetor upacāras tv ayaṃ phale [ ] kṣayopaśamato jātaḥ kṣayopaśama ucyate saṃyamāsaṃyamo 'pīti vākyabhedād vivicyate [ ] kṣāyopaśama ity antaraṃgo hetur nigadyate yadi veti pratīty arthaṃ mukhyaśabdāprakīrtanam [ ] teneha prācyavijñāne vakṣyamāṇe ca bhedini kṣayopaśamahetutvāt sūtritaṃ saṃpratīyate [ ] śeṣā manuṣyatiryañco vakṣyamāṇāḥ prapaṃcataḥ te yataḥ pratipattavyā gatināmābhidhāśrayāḥ [ ] syāt teṣām avadhir bāhyaguṇahetur itīraṇāt bhavahetur na me 'stīti sāmarthyād avadhāryate [ ] teṣām eveti nirṇīter devanārakavicchidā kṣayopaśamahetuḥ sann ity ukte nāviśeṣataḥ [ ] ṣaḍvikalpaḥ samastānāṃ bhedānām upasaṃgrahāt paramāgamasiddhānāṃ yuktyā sambhāvitātmanām [ ] viśuddhyanugamāt puṃso 'nugāmī deśato 'vadhiḥ paramāvadhir apy uktaḥ sarvāvadhir apīdṛśaḥ [ ] viśuddhyananvayādeśo 'nanugāmī ca kasyacit tadbhavāpekṣayā prācyaḥ śeṣo 'nyabhavavīkṣayā [ ] varddhamāno 'vadhiḥ kaścid viśuddhe vṛddhitaḥ sa tu deśāvadhir ihāmnātaḥ paramāvadhir eva ca [ ] hīyamāno 'vadhiḥ śuddhe hīyamānatvato mataḥ saddeśāvadhir evātra hāne sadbhāvasiddhitaḥ [ ] avasthito 'vadhiḥ śuddher avasthānān niyamyate sarvo ṅgināṃ virodhasyāthabhāvān nānavasthiteḥ [ ] viśuddher anavasthānāt sambhaved anavasthitaḥ sa deśāvadhir evaiko 'nyatra tat pratighātataḥ [ ] proktaḥ sapratipāto vā'pratipātas tathā'vadheḥ so 'ntarbhāvam amīṣv eva prayātīti na sūtritaḥ [ ] manaḥparyayavijñānabhedakāraṇasiddhaye prāharjv ityādikaṃ sūtraṃ svarūpasya viniścayāt [ ] nirvartitaśarīrādikṛtasyārthasya vedanāt ṛjvī nirvartitā tredhā praguṇā ca prakīrtitā [ ] anirvartitakāyādikṛtārthasya ca vedikā vipulā kuṭilā ṣoḍhā cakrarjutrayagocarā [ ] etayor matiśabdena vṛttir anyapadārthikā kaiścid uktā sa cānyo 'rtho manaḥparyaya ity asan [ ] dvitraprasaṃgatas tatra pravaktuṃ dhīdhano janaḥ na manaḥparyayo yukto manaḥparyaya ity alam [ ] yadātv anyau padārthau stastadviśeṣau balād gatau sāmānyatas tadeko 'yam iti yuktaṃ tathā vacaḥ [ ] sāmānādhikaraṇyaṃ ca na sāmānyaviśeṣayoḥ prabādhyate tadātmatvāt kathaṃcit saṃpratītitaḥ [ ] svapadārthā ca vṛttiḥ syād aviruddhā tathā sati viśiṣṭe hi matijñāne manaḥparyaya iṣyate [ ] parato 'yam apekṣasyātmanaḥ svasya parasya vā manaḥparyaya ity asmin pakṣe bāhyanimittavat [ ] na matijñānatāpattis tasyaivaṃ manasaḥ svayaṃ nirvarttakatvavaidhuryād apekṣāmātratāsthiteḥ [ ] kṣayopaśamam ābibhradātmā mukhyaṃ hi kāraṇaṃ tatpratyakṣasya nirvṛttau parahetuparāṅmukhaḥ [ ] manoliṅgajatāpatter na ca tasyānumānataḥ pratyakṣalakṣaṇasyaiva nirbādhasya vyavasthiteḥ [ ] yadā paramanaḥprāptaḥ padārtho mana ucyate tātsthyāt tācchabdyasaṃsiddher maṃcakrośanavat tadā [ ] tasya paryayaṇaṃ yasmāt tad vā yena parīyate sa manaḥparyayo jñeya ity uktes tatsvarūpavit [ ] manaḥparyayayor uktabhedayoḥ svavacobalāt viśeṣahetusaṃvittau viśuddhītyādisūtritam [ ] ātmaprasattir atroktā viśuddhir nijarūpataḥ pracyutya saṃbhavaś cāsyāpratipātaḥ pratīyate [ ] tābhyāṃ viśeṣamāṇatvaṃ viśeṣaḥ karmasādhanaḥ tacchabdena parāmarśo manaḥparyaya bhedayoḥ [ ] nanūttaratra tadbhedasthitābhyāṃ sa viśiṣyate viśuddhyapratipātābhyāṃ pūrvas tu na kathaṃcana [ ] ity ayuktaṃ viśeṣasya dviṣṭhatvena prasiddhitaḥ viśiṣyate yato yasya viśeṣaḥ so 'tra hīkṣate [ ] kuto 'vadher viśeṣaḥ syān manaḥparyayasaṃvidaḥ ity ākhyātuṃ viśuddhyādisūtram āha yathāgamaṃ [ ] bhūyaḥ sūkṣmārthaparyāyavinmanaḥparyayo 'vadheḥ prabhūtadravyaviṣayād api śuddhyā viśeṣyate [ ] kṣetrato 'vadhir evātaḥ paramakṣetratām itaḥ svāminā tv avadheḥ saḥ syād viśiṣṭaḥ saṃyataprabhuḥ [ ] viṣayeṇa ca niḥśeṣarūparūpyarthagocaraḥ rūpyarthagocarād eva tasmād etac ca vakṣyate [ ] evaṃ matyādibodhānāṃ sabhedānāṃ nirūpaṇam kṛtaṃ na kevalasyātra bhedasyāprastutatvataḥ [ ] vakṣyamāṇatvataś cāsya ghātikṣayajam ātmanaḥ svarūpasya niruktyaiva jñānaṃ sūtre prarūpaṇāt [ ] athādyajñānayor arthavivādavinivṛttaye matītyādi vacaḥ samyak sūtrayan sūtram āha saḥ [ ] matiśrute samākhyāte nibandho niyamaḥ sthitaḥ dravyāṇi vakṣyamāṇāni paryāyāś ca prapaṃcataḥ [ ] pūrvasūtroditaś cātra varttate viṣayadhvaniḥ kevalo 'rthād viśuddhyādisahayogaṃ śrayann api [ ] dravyeṣv iti padenāsya sāmānādhikaraṇyataḥ tadvibhaktyantatāpatter viṣayeṣv iti budhyate [ ] viṣayeṣu nibandho 'stīty ukte nirviṣayena te matiśrute iti jñeyaṃ na vā niyatagocare [ ] paryāyamātrage naite dravyeṣv iti viśeṣaṇāt dravyage eva te 'sarvaparyāye dravyagocare [ ] eteṣv asarvaparyāyeṣv ity ukter iṣṭanirṇayāt tathāniṣṭau tu sarvasya pratītivyāhatīraṇāt [ ] matyādipratyayo naiva bāhyārthālambanaṃ sadā pratyayatvād yathā svapnajñānam ity apare viduḥ [ ] tadasatsarvaśūnyatvāpatter bāhyārthavittivat svānyasaṃtānasaṃvitter abhāvāt tadabhedataḥ [ ] na caivaṃ sambhaved iṣṭam advayaṃ jñānam uttamam tato 'nyasya nirākarttum aśaktes tena sarvathā [ ] svato na tasya saṃvittir asya na syān nirākṛtiḥ kim anyasya svasaṃvittir anyasya syān nirākṛtiḥ [ ] svayaṃ saṃvedyamānasya katham anyair nirākṛtiḥ paraiḥ saṃvedyamānasya bhavatāṃ sā kathaṃ matā [ ] na sādhyasādhanatvādir na ca satyetarasthitiḥ te svasiddhir apīty etattattvaṃ sugatabhāvitam [ ] akṣajñānaṃ bahirvastu veti na smaraṇādikaṃ ity uktaṃ tu pramāṇena bāhyārthasyāsya sādhanāt [ ] śrutenārthaṃ paricchidya varttamāno na bādhyate akṣajenaiva tat tasya bāhyārthālaṃbanā sthitiḥ [ ] anekāntātmakaṃ vastu saṃprakāśayati śrutaṃ sadbodhatvād yathākṣotthabodha ity upapattimat [ ] nayena vyabhicāraś cen na tasya guṇabhāvataḥ svagocarārthadharmāṇy adharmārthaprakāśanāt [ ] śrutasyāvastuveditve parapratyāyanaṃ kutaḥ saṃvṛteś ced vṛthaivaiṣā paramārthasya niściteḥ [ ] sarvaparyāyam uktāni na syur dravyāṇi jātucit sadviyuktāś ca paryāyāḥ śaśaśrṛṃgoccatādivat [ ] nāśeṣaparyayākrāntatanūni ca cakāsati dravyāṇi prakṛtajñāne tathā yogyatvahānitaḥ [ ] jñānasyārthaparicchittau kāraṇaṃ nānyad īkṣyate yogyatāyās tadutpattiḥ sārūpy ādiṣu satsv api [ ] pratyakṣasyāvadheḥ keṣu viṣayeṣu nibandhanam iti nirṇītaye prāha rūpiṣv ityādikaṃ vacaḥ [ ] rūpaṃ pudgalasāmānyaguṇas tenopalakṣyate sparśādir iti tadyogāt rūpiṇīti viniścayaḥ [ ] teṣv eva niyamo 'sarvaparyāyeṣv avadheḥ sphuṭam dravyeṣu viṣayeṣv evam anuvṛttir vidhīyate [ ] svaśaktivaśato 'sarvaparyāyeṣv eva varttanam tasya nānāgatātītānantaparyāyayogiṣu [ ] pudgaleṣu tathākāśādiṣv amūrteṣu jātucit iti yuktaṃ sunirṇītāsambhavadbādhakatvataḥ [ ] kvaḥ manaḥparyayasyārthe nibandha iti darśayat tad ityādy āha satsūtram iṣṭasaṃgrahasiddhaye [ ] paramāvadhinirṇīte viṣaye 'nantabhāgatām nīte sarvāvadher jñeyo bhāgaḥ sūkṣmo 'pi sarvataḥ [ ] etasyānantabhāge syād viṣaye sarvaparyaye vyavastharjumater anyamanaḥsthe praguṇe dhruvam [ ] amuṣyānantabhāgeṣu paramaṃ saukṣmyamāgate syān manaḥparyayasyaivaṃ nibandho viṣaye khile [ ] kṣāyopaśamikaṃ jñānaṃ prakarṣaṃ paramaṃ vrajet sūkṣme prakarṣamāṇatvād arthe tad idam īritam [ ] kṣetradravyeṣu bhūyeṣu yathā ca vividhasthitiḥ spaṣṭā yā paramā tadvadasya svārthe yathodite [ ] yathā cendriyajajñānaṃ viṣayeṣv atiśāyanāt sveṣu prakarṣam āpannaṃ tadvidbhir viniveditam [ ] matipūrvaṃ śrutaṃ yadvadaspaṣṭaṃ sarvavastuṣu sthitaṃ prakṛṣyamāṇatvāt paryaṃtaṃ prāpya tattvataḥ [ ] manaḥparyayavijñānaṃ tathā praspaṣṭabhāsanaṃ vikalādhyakṣaparyantaṃ tathā samyakparīkṣitaṃ [ ] prakṛṣyamāṇatā tv akṣajñānādeḥ saṃpratīyate iti nāsiddhatā hetor na cāsya vyabhicāritā [ ] sādhye saty eva sadbhāvād anyathānupapattitaḥ sveṣṭahetuvad ity astu tataḥ sādhyaviniścayaḥ [ ] dṛṣṭeṣṭabādhanaṃ tasyāpahnave sarvavādināṃ sarvathaikāntavādeṣu tadvāde 'pīti nirṇayaḥ [ ] kevalaṃ sakalajñeyavyāpi spaṣṭaṃ prasādhitam pratyakṣam akramaṃ tasya nibandho viṣayeṣv iha [ ] bodhyo dravyeṣu sarveṣu paryāyeṣu ca tattvataḥ prakṣīṇāvaraṇasyaiva tadāvirbhāvaniścayāt [ ] ātmadravyaṃ jña eveṣṭaḥ sarvajñaḥ paramaḥ pumān kaiścit tadvyatiriktārthābhāvād ity apasāritaṃ [ ] dravyeṣv iti bahutvasya nirdeśāt tatprasiddhitaḥ varttamāne 'stu paryāye jñānī sarvajña ity api [ ] paryāyeṣv iti nirdeśād avayavasya pratītitaḥ sarvathābhedatattvasya yatheti pratipādanāt [ ] tasmād anuṣṭheyagataṃ jñānam asya vicāryatāṃ kīṭasaṃjñāparijñānaṃ tasya nātropayujyate [ ] ity etac ca vyavacchinnaṃ sarvaśabdaprayogataḥ tadekasyāpy avijñāne kvākṣūṇāṃ śiṣyasādhanaṃ [ ] heyopādeyatattvasya sābhyupāyasya vedakaṃ sarvajñatāmitaṃ niṣṭaṃ tajjñānaṃ sarvagocaram [ ] upekṣaṇīyatattvasya heyādibhir asaṃgrahāt na jñānaṃ na punas teṣāṃ na jñāne 'pīti kecana [ ] tadasadvītarāgāṇām upekṣatvena niścayāt sarvārthānāṃ kṛtārthatvāt teṣāṃ kvacid avṛttitaḥ [ ] vineyāpekṣayā heyam upādeyaṃ ca kiṃcana sopāyaṃ yadi te 'py āhus tadopekṣyaṃ na vidyate [ ] niḥśeṣaṃ saṃparaṃ tāvad upeyaṃ sammataṃ satām heyaṃ janmajarāmṛtyukīrṇaṃ saṃsaraṇaṃ sadā [ ] anayoḥ kāraṇaṃ tat syād yad anyat tan na vidyate pāraṃparyeṇa sākṣāc ca vastūpekṣaṃ tataḥ kimu [ ] dveṣo hānam upādānaṃ rāgas taddvayavarjanaṃ khyātopekṣeti heyādyā bhāvās tadviṣayād ime [ ] iti mohābhibhūtānāṃ vyavasthā parikalpyate heyatvādivyavasthānāsambhavāt kutracit tava [ ] hātuṃ yogyaṃ mumukṣūṇāṃ heyatattvaṃ vyavasthitaṃ upādātuṃ punaryogyam upādeyam itīyate [ ] upekṣantu punaḥ sarvam upādeyasya kāraṇam sarvopekṣāsvabhāvatvāc cāritrasya mahātmanaḥ [ ] tattvaśraddhānasaṃjñānagocaratvaṃ yathā dadhat tadbhāvyamānam āmnātam amogham aghaghātibhiḥ [ ] mithyādṛgbodhacāritragocaratvena bhāvitam sarvaṃ heyasya tattvasya saṃsārasyaiva kāraṇaṃ [ ] tadavaśyaṃ parijñeyaṃ tattvārtham anuśāsatā vineyān iti boddhavyaṃ dharmmavatsakalaṃ jagat [ ] dharmād anyatparijñānaṃ viprakṛṣṭam aśeṣataḥ yena tasya kathaṃ nāma dharmajñatvaniṣedhanam [ ] sarvānatīṃdriyān vetti sākṣāddharmamatīndriyam pramāteti vadannyāyam atikrāmati kevalaṃ [ ] jñānaṃ prakarṣamāyāti paramaṃ kvacidātmani tāratamyādhirūḍhatvād ākāśe parimāṇavat [ ] atra yady akṣavijñānaṃ tasya sādhyaṃ prabhāṣyate siddhasādhanam etat syāt parasyāpy evam iṣṭitaḥ [ ] liṅgāgamādivijñānaṃ jñānasāmānyam eva vā tathā sādhyaṃ vadaṃs tena doṣaṃ pariharet katham [ ] akramaṃ karaṇātītaṃ yadi jñānaṃ parisphuṭam dharmīṣyeta tadā pakṣasyāprasiddhaviśeṣyatā [ ] svarūpāsiddhatā hetor āśrayāsiddhatāpi ca tan naitatsādhanaṃ samyag iti kecit pravādinaḥ [ ] atra pracakṣmahe jñānasāmānyaṃ dharmi nāparam sarvārthagocaratvena prakarṣaṃ paramaṃ vrajet [ ] iti sādhyam anicchantaṃ bhūtādiviṣayaṃ paraṃ codanājñānam anyad vā vādinaṃ prati nāstikam [ ] na siddhasādhyataivaṃ syān nāprasiddhaviśeṣyatā pakṣasya nāpi doṣo [ ] tac ca sarvārthavijñānaṃ punaḥ sāvaraṇaṃ mataṃ adṛṣṭatvād yathā cakṣus timirādibhir āvṛtaṃ [ ] jñānasyāvaraṇaṃ yāti prakṣayaṃ paramaṃ kvacit prakṛṣyamāṇahānitvād dhemādau śyāmikādivat [ ] tato 'nāvaraṇaṃ spaṣṭaṃ viprakṛṣṭārthagocaraṃ siddham akramavijñānaṃ sakalaṃkamahīyasām [ ] tataḥ sātiśayā dṛṣṭāḥ prajñāmedhādibhir narāḥ bhūtādyaśeṣavijñānabhājaś cec codanābalāt [ ] kin na kṣīṇāvṛtiḥ sūkṣmānarthān draṣṭuṃ kṣamaḥ sphuṭaṃ maṃdajñānānatikrāman nātiśete parān narān [ ] laṅghanādikadṛṣṭāntaḥ svabhāvān na vilaṃghane nāvirbhāve svabhāvasya pratiṣedhaḥ kutaścana [ ] svābhāvikī gatir na syāt prakṣīṇāśeṣakarmaṇaḥ kṣaṇād ūrddhvaṃ jagaccūḍāmaṇau vyomni mahīyasi [ ] vīryāntarāyavicchedaviśeṣavaśatoparā bahudhā kena vāryeta niyataṃ vyomalaṅghanāt [ ] tataḥ samantataś cakṣurindriyādyanapekṣiṇaḥ niḥśeṣadravyaparyāyaviṣayaṃ kevalaṃ sthitaṃ [ ] ekatrātmani vijñānam ekam evaikadeti ye manyante tān prati prāha yugapaj jñānasambhavam [ ] prācyam ekaṃ matijñānaṃ śrutibhedānapekṣayā pradhānaṃ kevalaṃ vā syād ekatra yugapan nari [ ] dvedhā matiśrute syātāṃ te cāvadhiyute kvacit manaḥparyayajñāne vā trīṇi yena yute tathā [ ] ācaturbhya iti vyāptavādo vacanataḥ punaḥ paṃcaikatra na vidyante jñānāny etāni jātucit [ ] bhājyāni pravibhāgena sthāpyānīti nibuddhyatāṃ ekādīny ekadaikatrānupayogāni nānyathā [ ] kṣāyopaśamikaṃ jñānaṃ sopayogaṃ kramād iti nārthasya vyāhatiḥ kācit kramajñānābhidhāyinaḥ [ ] mopayogau saha syātām ity āryāḥ khyāpayanti ye darśanajñānarūpau tau na tu jñānātmakāv iti [ ] jñānānāṃ sahabhāvāya teṣām etad viruddhyate kramabhāvi ca yaj jñānam iti yuktaṃ tato na tat [ ] śabdasaṃsṛṣṭavijñānāpekṣayā vacanaṃ tathā yasmād uktaṃ tad evāryaiḥ syādvādanayasaṃsthitam [ ] iti vyācakṣate ye tu teṣāṃ matyādivedanaṃ pramāṇaṃ tatra neṣṭaṃ syāt tataḥ sūtrasya bādhanam [ ] caśabdāsaṃgrahāt tasya tadvirodho na cet katham tasya krameṇa janmeti labhyate vacanād vinā [ ] bahvādyavagrahādīnām upadeśāt sahodbhavaḥ jñānānām iti cen naivaṃ sūtrārthānavabodhataḥ [ ] bahuṣv artheṣu tatraiko vagrahādir itīṣyate tathā ca na bahūni syuḥ sahajñānāni jātucit [ ] śaktyarpaṇāt tu tadbhāvaḥ saheti na virudhyate kathaṃcid akramodbhūtiḥ syādvādanyāyavedinām [ ] śaṣkulībhakṣaṇādau tu rasādijñānapaṃcakam sakṛd eva tathā tatra pratīter iti yo vadet [ ] tasya tatsmṛtayaḥ kin na saha syur aviśeṣataḥ tatra tādṛkṣasaṃvitteḥ kadācit kasyacit kvacit [ ] sarvasya sarvadātve tadrasādijñānapaṃcakam sahopajāyate naiva smṛtivattatkramekṣaṇāt [ ] kramajanma kvacid dṛṣṭvā smṛtīnām anumīyate sarvatra kramabhāvitvaṃ yady anyatrāpi tatsamaṃ [ ] paṃcabhir vyavadhānaṃ tu śaṣkulībhakṣaṇādiṣu rasādivedaneṣu syād yathā tadvatsmṛtiṣv api [ ] laghuvṛtter na vicchedaḥ smṛtīnām upalakṣyate yathā tathaiva rūpādijñānānām iti manyatām [ ] asaṃkhyātaiḥ kṣaṇaiḥ padmapatradvitayabhedanam vicchinnaṃ sakṛd ābhāti yeṣāṃ bhrānteḥ kutaścana [ ] paṃcaṣaiḥ samayais teṣāṃ kin na rūpādivedanam vicchinnam api bhātīhāvicchinnam iva vibhramāt [ ] vyavasāyātmakaṃ cakṣurjñānaṃ gavi yadā tadā mataṅgajavikalpo 'pīty anayoḥ sakṛdudbhavaḥ [ ] jñānodayasakṛjjanmaniṣedhe hanti cen na vai tayor api sahaivopayuktayor asti vedanam [ ] yadopayujyate hy ātmā mataṅgajavikalpane tadā locanavijñānaṃ gavi mandopayogahṛt [ ] tathā tatropayuktasya mataṅgajavikalpane pratīyanti svayaṃ sanno bhāvayanto viśeṣataḥ [ ] samopayuktatā tatra kasyacit pratibhāti yā sāśu saṃcaraṇād dhānter gokuñjaravikalpavat [ ] nanv aśvakalpanākāle godṛṣṭeḥ savikalpatām katham evaṃ prasādhyeta kvacit syādvādavedibhiḥ [ ] saṃskārasmṛtihetur yā godṛṣṭiḥ savikalpikā sānyathā kṣaṇabhaṃgādi dṛṣṭivan na tathā bhavet [ ] ity āśrayopayogāyāḥ savikalpatvasādhanaṃ netrālocanamātrasya nāpramāṇātmanaḥ sadā [ ] godarśanopayogena sahabhāvaḥ kathaṃ na tu tadvijñāne 'sya yogasya nārthavyāghātakṛt tadā [ ] ity acodyaṃ dṛśas tatrānupayuktatvasiddhitaḥ puṃso vikalpavijñānaṃ pratyevaṃ praṇidhānataḥ [ ] sopayogaṃ punaś cakṣurdarśanaṃ prathamaṃ tataḥ cakṣurjñānaṃ śrutaṃ tasmāt tatrārthe 'nyatra ca kramāt [ ] prādurbhavat karoty āśu vṛtyā saha janau dhiyaṃ yathā dṛgjñānayor nṛṇām iti siddhāntaniścayaḥ [ ] atha jñānāpi paṃcāni vyākhyātāni prapaṃcataḥ kiṃ samyag eva mithyā vā sarvāṇy api kadācana [ ] kānicid vā tathā puṃsā mithyāśaṃkānivṛttaye sveṣṭapakṣapakṣasiddhyarthaṃ matītyādy āha saṃprati [ ] matyādayaḥ samākhyātāsta evety avadhāraṇāt saṃgṛhyete kadācin na manaḥparyāyakevale [ ] niyamena tayoḥ samyagbhāvanirṇayataḥ sadā mithyātvakāraṇābhāvād viśuddhātmani sambhavāt [ ] dṛṣṭicāritramohasya kṣaye vopaśame 'pi vā manaḥparyayavijñānaṃ bhavanmithyā na yujyate [ ] sarvaghātikṣaye 'tyantaṃ kevalaṃ prabhavat katham mithyā saṃmbhāvyate jātu viśuddhiṃ paramaṃ dadhat [ ] matiśrutāvadhijñānatrayaṃ tu syāt kadācana mithyeti te ca nirdiṣṭā viparyaya ihāṅginām [ ] sa ca sāmānyato mithyājñānam atropavarṇyate saṃśayādivikalpānāṃ trayāṇāṃ saṃgṛhīyate [ ] samuccinoti casteṣāṃ samyaktvaṃ vyāvahārikam mukhyaṃ ca tadanuktau tu teṣāṃ mithyātvam eva hi [ ] te viparyaya eveti sūtre cen nāvadhāryate caśabdam antareṇāpi sadā samyaktvam attvataḥ [ ] mithyājñānaviśeṣaḥ syād āsminpakṣe viparyayam saṃśayājñānabhedasya caśabdena samuccayaḥ [ ] tatra tridhāpi mithyātvaṃ matijñāne pratīyate śrute ca dvividhaṃ bodhyam avadhau saṃśayād vinā [ ] tasyendriyamanohetusamudbhūtiniyāmataḥ indriyānindriyājanyasvabhāvaś cāvadhiḥ smṛtaḥ [ ] mithyātvaṃ triṣu bodheṣu dṛṣṭimohodayād bhaved teṣāṃ sāmānyatas tena sahabhāvāvirodhataḥ [ ] yadā matyādayaḥ puṃsas tadā na syād viparyayaḥ sa yadā te tadā na syur ity etena nirākṛtam [ ] viśeṣāpekṣayā hy eṣāṃ na viparyayarūpatā matyajñānādisaṃjñeṣu teṣu tasyāḥ prasiddhitaḥ [ ] mithyātvodayasadbhāve tadviparyayarūpatā na yuktāgryādisaṃpāte jātyahemno yatheti cet [ ] nāśrayasyānyathābhāvasamyakparidṛḍhe sati pariṇāme tadādheyasyānyathā bhāvadarśanāt [ ] yathā sarajasālāmbūphalasya kaṭu kin na tat kṣiptasya payaso dṛṣṭaḥ kaṭubhāvas tathāvidhaḥ [ ] tathātmano 'pi mithyātvapariṇāme satīṣyate matyādisaṃvidāṃ tādṛṅbhithyātvaṃ kasyacit sadā [ ] na cedaṃ pariṇāmitvam ātmano na prasādhitam sarvasyāpariṇāmitve sattvasyaiva virodhataḥ [ ] yato viparyayo na syāt pariṇāmaḥ kadācana matyādivedanākārapariṇāmanivṛttitaḥ [ ] samānorthaparicchedaḥ sadduṣṭyarthaparicchidā kuto vijñāyate tredhā mithyādṛṣṭer viparyayaḥ [ ] ity atra jñāpakaṃ hetuṃ sadṛṣṭāntaṃ pradarśayat sad ityādy āha saṃkṣepād viśeṣapratipattaye [ ] nātrotpādavyayadhrauvyayuktaṃ sad iti vakṣyati tato 'nyad asad ity etatsāmarthyād avasīyate [ ] aviśeṣas tayoḥ sadbhir aviveko vidhīyate sāṃkaryato hi tadvittis tathā vaiyatikaryyataḥ [ ] pratipattir abhiprāyamātraṃ yad anibandhanaṃ sā yadṛkṣā tayā vittir upalabdhiḥ kathaṃcana [ ] matyādayo 'tra varttante te viparyaya ity api hetor yathoditād atra sādhyate sadasattvayoḥ [ ] svarṇe svarṇam iti jñānam asvarṇe svarṇam ity api svarṇe vāsvarṇam ity evam unmattasya kadācana [ ] viparyayo yathā loke tad yadṛcchopalabdhitaḥ viśeṣābhāvatas tadvanmithyādṛṣṭer ghaṭādiṣu [ ] sahacāryo vinirdiṣṭaḥ sahajaś ca viparyayaḥ prācyas tatra śrutājñānaṃ mithyāsamayasādhitam [ ] matyajñānaṃ vibhaṅgaś ca sahajaḥ saṃpratīyate paropadeśanirmukteḥ śrutājñānaṃ ca kiṃcana [ ] sati svarūpato 'śeṣe śūnyavādo viparyayaḥ grāhyagrāhakabhāvādau saṃvidadvaitavarṇanam [ ] citrādvaitapravādaś ca puṃśabdādvaitavarṇanam bāhyartheṣu ca bhinneṣu vijñānāṃḍaprakalpanaṃ [ ] bahir antaś ca vastūnāṃ sādṛśye vaisadṛśyavāk vaisadṛśye ca sādṛśyaikāntavādāvalambanam [ ] dravye paryāyamātrasya paryāye dravyakalpanā taddvayātmani tadbhedavādo vācyatvavāg api [ ] utpādavyayavādaś ca dhrauvye tadavalambanam janmapradhvaṃsayor evaṃ prativastu prabuddhyatām [ ] pararūpāditośeṣe vastuny asati sarvathā sattvavādaḥ samāmnātaḥ parāhāryo viparyayaḥ [ ] satyasattvaviparyāsād vaiparītyena kīrtitāt pratīyamānakaḥ sarvo 'sati sattvaviparyayaḥ [ ] sati triviprakṛṣṭārthe saṃśayaḥ śrutigocare keṣāṃcid dṛśyamāne 'pi tattvopaplavavādinām [ ] tathānadhyavasāyo 'pi keṣāṃcit sarvavedini tattve sarvatra vāggocarāhāryo 'vagamyatām [ ] bahvādyavagrahādyeṣu catvāriṃśatsu vittiṣu kutaścin matibhedeṣu sahajaḥ syād viparyayaḥ [ ] smṛtāv ananubhūtārthe smṛtisādharmyasādhanaḥ saṃjñāyām ekatājñānaṃ sādṛśyaḥ śrotradarśitaḥ [ ] tathaikatve 'pi sādṛśyavijñānaṃ kasyacid bhavet sa visaṃvādataḥ siddhaś ciṃtāyāṃ liṅgaliṅginoḥ [ ] hetvābhāsabalājñānaṃ liṅgini jñānam ucyate svārthānumāviparyāso bahudhā taddhiyāṃ mataḥ [ ] hetvābhāsas tu sāmānyād ekaḥ sādhyāprasādhanaḥ yathā hetuḥ svasādhyenāvinābhāvī niveditaḥ [ ] trividho 'sāvasiddhādibhedāt kaścid viniścitaḥ svarūpāśrayasaṃdigdhajñātāsiddhaś caturvidhaḥ [ ] tatra svarūpato 'siddho vādinaḥ śūnyasādhane sarvo hetur yathā brahmatattvopaplavasādhane [ ] sattvādiḥ sarvathā sādhye śabdabhaṃguratādike syādvādinaḥ kathaṃcin na sarvathaikāntavādinaḥ [ ] śabdād vinaśvarād dhetusādhye cā'kṛtakādayaḥ hetavo 'siddhatāṃ yānti bauddhādeḥ prativādinaḥ [ ] jainasya sarvathaikāntadhūmavattvādayo 'gniṣu sādhyeṣu hetavo 'siddhā parvatādau tathāgnitaḥ [ ] śabdādau cākṣuṣatvādir ubhayāsiddha iṣyate niḥśeṣo 'pi yathā śūnyabrahmādvaitapravādinoḥ [ ] samarthanavihīnaḥ syād asiddhaḥ prativādinaḥ hetor yasyāśrayo na syāt āśrayāsiddha eva saḥ [ ] svasādhyenāvinābhāvābhāvād agamako mataḥ pratyakṣādeḥ pramāṇādeḥ saṃvāditvādayo yathā [ ] śūnyopaplavaśabdādyadvaitavādāvalambināṃ saṃdehaviṣayaḥ sarvaḥ saṃdigdhāsiddha ucyate [ ] tathāgamapramāṇatve rudroktatvādir āsthitaḥ sann apy ajñāyamāno 'trājñātāsiddho vibhāvyate [ ] saugatāder yathā sarvaḥ sattvādisveṣṭasādhane na nirvikalpakādhyakṣād asti hetor viniścayaḥ [ ] tatpṛṣṭhajād vikalpāc ca vastugocarataḥ kva saḥ anumānāntarād dhetuniścayo cānavasthitiḥ [ ] parāparānumānānāṃ pūrvapūrvatravṛttitaḥ jñānaṃ jñānāntarādhyakṣaṃ vadato nena darśitaḥ [ ] sarvo heturavijñāto 'navasthānāviśeṣataḥ arthāpattiparicchedyaṃ parokṣaṃ jñānam ādṛtāḥ [ ] sarvaṃ ye te 'py anenoktā svājñātāsiddhahetavaḥ pratyakṣaṃ tu phalajñānam ātmānaṃ vā svasaṃvidam [ ] prāṅbhayokaraṇājñānaṃ vyarthaṃ teṣāṃ niveditaṃ pradhānapariṇāmatvād acetanam itīritam [ ] jñānaṃ yais te kathaṃ na syur ajñātāsiddhahetavaḥ pratijñārthaikadeśas tu svarūpāsiddha eva naḥ [ ] śabdo nāsau vināśitvād ityādi sādhyasannibhaḥ yas sādhyaviparītārtho vyabhicārī suniścitaḥ [ ] sa viruddho 'vaboddhavyas tathaiveṣṭavighātakṛt sattvādiḥ kṣaṇikatvādau yathā syādvādavidviṣāṃ [ ] anekāntātmakatvasya niyamāt tena sādhanāt parārthyaṃ cakṣurādīnāṃ saṃhantavyaṃ prasādhayet [ ] parasya pariṇāmitvaṃ tathetīṣṭavighātakṛt anusyūtamanīṣādisāmānyādini sādhayet [ ] teṣāṃ dravyavivarttatvam evam iṣṭavighātakṛt viruddhān na ca bhinno 'sau svayam iṣṭād viparyaye [ ] sāmarthyasyāviśeṣeṇa bhedavādiprasaṃgataḥ vivādādhyāsitaṃ dhīmaddhetukaṃ kṛtakatvataḥ [ ] yathā śakaṭam ityādi viruddho tena darśitaḥ yathā hi buddhimatpūrvaṃ jagad etat prasādhayet [ ] tathā buddhimato hetor anekatvaśarīritām svaśarīrasya karttātmā nāśarīro 'sti sarvathā [ ] kārmaṇena śarīreṇānādisambandhasiddhitaḥ yataḥ sādhye śarīre sve dhīmato vyabhicāratā [ ] jagatkarttuḥ prapadyeta tena hetoḥ kutārkikaḥ bodhyo 'naikāntiko hetuḥ sambhavān nānyathā tathā [ ] saṃśītiṃ vidhivatsarvaḥ sādhāraṇatayā sthitaḥ śabdatvaśrāvaṇatvādi śabdādau pariṇāmini [ ] sādhyahetus tato vṛtteḥ pakṣa eva suniścitaḥ saṃśītyāliṅgitāṅgas tu yaḥ sapakṣavipakṣayoḥ [ ] pakṣe sa vartamānaḥ syād anaikāntikalakṣaṇaḥ tena sādhāraṇo nānyo hetvābhāsas tato 'sti naḥ [ ] tasyānaikāntike samyagghetau vāntargatiḥ sthitiḥ prameyatvādir etena sarvasmin pariṇāmini [ ] sādhye vastuni nirṇīto vyākhyātaḥ pratipadyatāṃ pakṣatritayahānis tu yasyānaikāntiko mataḥ [ ] kevalavyatirekādis tasyānaikāntikaḥ kathaṃ vyaktātmanāṃ hi bhedānāṃ pariṇāmādisādhanam [ ] ekaṃ kāraṇapūrvatve kevalavyatirekinaḥ kāraṇatrayapūrvatvāt kāryeṇānanvayāgateḥ [ ] puruṣair vyabhicārīṣṭaṃ pradhānapuruṣair api vinā sapakṣasattvena gamakaṃ yasya sādhanam [ ] anyathānupapannatvāt tasya sādhāraṇo mataḥ sādhye ca tadabhāve ca varttamāno viniścitaḥ [ ] saṃśītyākrāntadeho vā hetuḥ kārtsnyaikadeśataḥ tatra kārtsnyena nirṇītas tāvatsādhyavipakṣayoḥ [ ] yathā dravyaṃ nabhaḥ sattvād ityādiḥ kaścid īritaḥ viśvavedīśvaraḥ sarvajagatkartṛtvasiddhitaḥ [ ] iti saṃśrayatas tatrāvinābhāvasya saṃśayāt sati hy aśeṣaveditve saṃdigdhā viśvakartṛtā [ ] tadabhāve ca tan nāyaṃ gamako nyāyavedinām nityo rtho nirmūrttatvād iti syād ekadeśataḥ [ ] sthitas tayor vinirdiṣṭaparo 'pīdṛk tadā tu kaḥ yatrārthe sādhayed ekaṃ dharmaṃ hetur vivakṣitam [ ] tatrānyas tadviruddhaṃ ced viruddhyā vyabhicāry asau iti kecit tadaprāptam anekāntasya yuktitaḥ [ ] samyagghetutvanirṇīter nityānityatvahetuvat sarvathaikāntavāde tu hetvābhāso 'yam iṣyate [ ] sarvagatve parasmiṃśca jāteḥ khyāpitahetuvat sa ca sapratipakṣo 'tra kaścid uktaḥ paraiḥ punaḥ [ ] anaikāntika eveti tato nāsya vibhinnatā sveṣṭadharmavihīnatve hetunānyena sādhyate [ ] sādhyābhāve prayuktasya hetor nābhāvaniścayaḥ dharmiṇīti svayaṃ sādhyāsādhyayor vṛttisaṃśrayāt [ ] nānaikāntikatā bādhyā tasya tallakṣaṇānvayāt yaḥ svapakṣasapakṣānyataravādaḥ svanādiṣu [ ] nityatve bhaṃguratve vā proktaḥ prakaraṇe samaḥ so 'py anaikāntikān nānya ity anenaiva kīrtitam [ ] svasādhye sati sambhūtiḥ saṃśayā saviśeṣataḥ kālātyayāpadiṣṭo 'pi sādhyamānena bādhite [ ] yaḥ prayujyeta hetuḥ syāt sa no naikāntiko 'paraḥ sādhyābhāve pravṛtto hi pramāṇaiḥ kutracit svayam [ ] sādhye hetur na nirṇīto vipakṣavinivarttanaḥ vipakṣe bādhake vṛtte samīcīno yathocyate [ ] sādhyake sati kin na syāt tadā hāsas tathaiva saḥ sādhyābhāve pravṛttena kiṃ pramāṇena bādhyate [ ] hetuḥ kiṃ vā tad etenety atra saṃśītisambhavaḥ sādhyasyābhāva evāyaṃ pravṛtta iti niścaye [ ] viruddho hetur udbhāvyo 'tītakālo na cāparaḥ pramāṇabādhanaṃ nāma doṣaḥ pakṣasya vastutaḥ [ ] kva tasya hetubhis trāṇo 'nutpannena tapohataḥ siddhe sādhye pravṛtto 'trākiṃcitkara itīritaḥ [ ] kaiścid dhetur na saṃciṃtyaḥ syādvādanayaśālibhiḥ gṛhītagrahaṇāt tasyāpramāṇatvaṃ yadīṣyate [ ] smṛtyāder apramāṇatvaṃ smṛtyādeś cet kathaṃ tu taiḥ siddhe rthe vartamānasya hetoḥ saṃvāditā na te [ ] prayojanaviśeṣasya sadbhāvān mānatā yadi tadālpajñānavijñānaṃ hetoḥ kiṃ na prayojanam [ ] pramāṇasaṃplavas tv evaṃ svayam iṣṭo virudhyate siddhe kutaścanārthe nyapramāṇasyāphalatvataḥ [ ] mānenaikena siddhe rthe pramāṇāṃtaravartane yān avasthocyate sāpi nākāṃkṣākṣayataḥ sthiteḥ [ ] sarāgapratipattṝṇāṃ svādṛṣṭatvamataḥ kvacit syād ākāṃkṣākṣayaḥ kāladeśādeḥ svanimittataḥ [ ] vītarāgāḥ punaḥ svārthān vedanair aparāparaiḥ parikṣetraṃ pravartaṃte sadopekṣāparāyaṇā [ ] pramāṇasaṃplave caivam adoṣe pratyupasthite gṛhītagrahaṇāt kva syāt kevalasyāpramāṇatā [ ] tataḥ sarvapramāṇānām apūrvārthatvasannaye syād akiṃcitkaro hetvābhāso naivānyathārpaṇāt [ ] tatrāpi kevalajñānaṃ nāpramāṇaṃ prasahyate sādyaparyavasānasya tasyāpūrvārthatā sthiteḥ [ ] prādurbhūtikṣaṇād ūrdhvaṃ pariṇāmitvavicyutiḥ kevalasyaikarūpitvād iti codyaṃ na yuktimat [ ] parāpareṇa kālena saṃbaṃdhāt pariṇāmi ca jñātṛtvenaikam eva hi [ ] evaṃ vyākhyānaniḥśeṣahetvābhāsasamudbhavaṃ jñānaṃ svārthānumābhāsaṃ mithyādṛṣṭer viparyayaḥ [ ] niyogo bhāvanaikāṃtād dhātvartho vidhir eva ca yatrārūḍhādivyartho ṝnyāpoho vā vacaso yadā [ ] kaiścin manyeta tajjñānaṃ śrutābhaṃ vedanaṃ tadā tathā vākyārthanirṇīter vidhātuṃ duḥśakatvataḥ [ ] pratyayārtho niyogaś ca yataḥ śuddhaṃ pratīyate kāryarūpaś ca tenātra śuddhaṃ kāryam asau yataḥ [ ] viśeṣaṇaṃ tu yat tasya kiṃcid anyatpratīyate pratyayārtho na tadyuktaḥ dhātvarthaḥ svargakāmavat [ ] prerakatvaṃ tu yat tasya viśeṣaṇam iheṣyate tasyāpratyayavācyatvāt śuddhe kārye niyogatā [ ] preraṇaiva niyogo tra śuddhā sarvatra gamyate nāprerito yataḥ kaścin niyuktaṃ svaṃ prabudhyate [ ] mamedaṃ kāryam ity evaṃ jñānaṃ pūrvaṃ yadā bhavet svasiddhyai prerakaṃ tat syād anyathā tan na siddhyati [ ] preryate puruṣo naiva kāryeṇeha vinā kvacit tataś cet preraṇā proktā niyogaḥ kāryasaṃgatā [ ] preraṇāviṣayaḥ kāryaṃ na tu tatprerakaṃ svataḥ vyāpāras tu pramāṇasya prameya upacaryate [ ] preraṇā hi vinā kāryaṃ prerikā naiva kasyacit kāryapreraṇayor yogo niyogas tena sammataḥ [ ] parasparāvinābhūtaṃ dvayam etat pratīyate niyogaḥ samudāyo smāt kāryapreraṇayor mataḥ [ ] siddham ekaṃ yato brahmagatam āmnāyataḥ sadā siddhatvena ca tatkāryaṃ prerakaṃ kuta eva tat [ ] kāmī yatraiva yaḥ kaścin niyoge sati tatra saḥ viṣayārūḍham ātmānaṃ manyamānaḥ pravartate [ ] mamedaṃ bhogyam ity evaṃ bhogyarūpaṃ pratīyate mamatvena ca vijñānaṃ bhoktary eva vyavasthitam [ ] svāmitvenābhimāno hi bhoktur yatra bhaved ayaṃ bhogyaṃ tad eva vijñeyaṃ tad evaṃ svaṃ nirucyate [ ] sādhyarūpatayā yena mamedam iti gamyate tatprasādhyena rūpeṇa bhogyaṃ svaṃ vyapadiśyate [ ] siddharūpaṃ hi yad bhogyaṃ na niyogaḥ sa tāvatā sādhyatveneha bhogyasya prerakatvān niyogatā [ ] mamedaṃ kāryam ity evaṃ manyate puruṣaḥ sadā puṃsaḥ kāryaviśiṣṭatvaṃ niyogaḥ syād abādhitaḥ [ ] kāryasya siddhau jātāyāṃ tad yuktaḥ puruṣaḥ sadā bhavet sādhita ity evaṃ pumān vākyārtha ucyate [ ] pramāṇaṃ kiṃ niyogaḥ syāt prameyam athavā punaḥ ubhayena vihīno vā dvayarūpo thavā punaḥ [ ] śabdavyāpārarūpo vā vyāpāraḥ puruṣasya vā dvayavyāpārarūpo vā dvayāvyāpāra eva vā [ ] bhavaṃ pratītya yo jāto guṇaṃ vā prāṇinām iha deśāvadhiḥ sa vijñeyo dṛṣṭimohād viparyayaḥ [ a] satsaṃyamaviśeṣottho na jātu paramāvadhiḥ sarvāvadhir api vyasto manaḥparyayabodhavat [ ] iti pramāṇātmavibodhasaṃvidhau viparyayajñānam anekadhoditam vipakṣavikṣepamukhena nirṇayaḥ subodharūpeṇa vidhātum udyataḥ [ ] nirdeśyādhigamopāyaṃ pramāṇam adhunā nayān nayair adhigametyādi prāha saṃkṣepato khilān [ ] sāmānyādeśatas tāvad eka eva nayaḥ sthitaḥ syādvādapravibhaktārthaviśeṣavyaṃjanātmakaḥ [ ] saṃkṣepād dvau viśeṣeṇa dravyaparyāyagocarau dravyārtho vyavahārāṃtaḥ paryāyārthas tato paraḥ [ ] vistareṇeti saptaite vijñeyā naigamādayaḥ tathātivistareṇaitadbhedāḥ saṃkhyātavigrahāḥ [ ] nayo nayau nayāś ceti vākyabhedena yojitāḥ naigamādaya ity evaṃ sarvasaṃkhyābhisūcanāt [ ] nayānāṃ lakṣaṇaṃ lakṣyaṃ tatsāmānyaviśeṣataḥ nīyate gamyate yena śrutārthāṃśo nayo hi saḥ [ ] tadaṃśau dravyaparyāyalakṣaṇau sādhyapakṣiṇau nīyete tu yakābhyāṃ tau nayāv iti viniścitau [ ] guṇaḥ paryāya evātra sahabhāvī vibhāvitaḥ iti tadgocaro nānyas tṛtīyo sti guṇārthikaḥ [ ] pramāṇagocarārthāṃśā nīyaṃte yair anekadhā te nayā iti vyākhyātā jātā mūlanayadvayāt [ ] dravyaparyāyasāmānyaviśeṣaparibodhikāḥ na mūlaṃ naigamādīnāṃ nayāś catvāra eva tat [ ] sāmānyasya pṛthaktvena dravyād anupapattitaḥ sādṛśyapariṇāmasya tathā vyaṃjanaparyayāt [ ] vaisadṛśyavivartasya viśeṣasya ca paryaye aṃtarbhāvād vibhāvyeta dvau tanmūlaṃ nayāv iti [ ] nāmādayo pi catvāras tanmūlaṃ nety ato gataṃ dravyakṣetrādayaś caiṣāṃ dravyaparyāyagatvataḥ [ ] bhāvānvitā na paṃcaite skaṃdhā vā parikīrtitāḥ rūpādayo ta eveha te pi hi dravyaparyayau [ ] tathā dravyaguṇādīnāṃ ṣoḍhātvaṃ na vyavasthitaṃ ṣaṭ syur mūlanayā yena dravyaparyāyagrāhite [ ] ye pramāṇādayo bhāvā pradhānādaya eva vā te naigamādibhedānām arthā nāparanītayaḥ [ ] tatra saṃkalpamātrasya grāhako naigamo nayaḥ sopādhir ity aśuddhasya dravyārthasyābhidhānataḥ [ ] saṃkalpo nigamas tatra bhavo yaṃ tatprayojanaḥ tathā prasthādisaṃkalpaḥ tadabhiprāya iṣyate [ ] nanv ayaṃ bhāvinīṃ saṃjñāṃ samāśrityopacaryate aprasthādiṣu tadbhāvas taṃḍuleṣv odanādivat [ ] ity asadbahirartheṣu tathānadhyavasānataḥ svavedyamānasaṃkalpe saty evāsya pravṛttitaḥ [ ] yad vā naikaṃ gamo yotra sa satāṃ naigamo mataḥ dharmayor dharmiṇo vāpi vivakṣā dharmadharmiṇoḥ [ ] pramāṇātmaka evāyam ubhayagrāhakatvataḥ ity ayuktaṃ iha jñapteḥ pradhānaguṇabhāvataḥ [ ] prādhānye nobhayātmānam arthaṃ gṛhṇaddvivedanam pramāṇaṃ nānyad ity etatprapaṃcena niveditam [ ] saṃgrahe vyavahāre vā nāṃtarbhāvaḥ samīkṣyate naigamasya tayor ekavastvaṃśapravaṇatvataḥ [ ] narjusūtrādiṣu proktahetavo veti ṣaṇnayāḥ saṃgrahādaya eveha na vācyāḥ praparīkṣakaiḥ [ ] saptaite niyataṃ yuktā naigamasya nayatvataḥ tasya tribhedavyākhyānāt kaiścid uktā nayā nava [ ] tatra paryāyagas tredhā naigamo dravyago dvidhā dravyaparyāyagaḥ proktaś caturbhedo dhruvaṃ dhruvaiḥ [ ] arthaparyāyayos tāvad guṇamukhyasvabhāvataḥ kvacid vastuny abhiprāyaḥ pratipattuḥ prajāyate [ ] yathā pratikṣaṇaṃ dhvaṃsi sukhasaṃviccharīriṇaḥ iti sattārthaparyāyo viśeṣaṇatayā guṇaḥ [ ] saṃvedanārthaparyāyo viśeṣyatvena mukhyatām pratigacchann abhipreto nānyathaivaṃ vacogatiḥ [ ] sarvathā sukhasaṃvittyor nānātve bhimatiḥ punaḥ svāśrayā cārthaparyāyanaigamābho pratītitaḥ [ ] kaścid vyaṃjanaparyāyo viṣayīkurute ṃjasā guṇapradhānabhāvena dharmiṇy ekatra naigamaḥ [ ] saccaitanyaṃ narīty evaṃ sattvasya guṇabhāvataḥ pradhānabhāvataś cāpi caitanyasyābhisiddhitaḥ [ ] tayor atyaṃtabhedoktir anyonyaṃ svāśrayād api jñeyo vyaṃjanaparyāyanaigamābho virodhataḥ [ ] arthavyaṃjanaparyāyau gocarīkurute paraḥ dhārmike sukhajīvitvam ity evam anurodhataḥ [ ] bhinne tu sukhajīvatve yo bhimanyeta sarvathā so rthavyaṃjanaparyāyanaigamābhāsa eva naḥ [ ] śuddhadravyam aśuddhaṃ ca tathābhipraiti yo nayaḥ sa tu naigama eveha saṃgrahavyavahārajaḥ [ ] saddravyaṃ sakalaṃ vastu tathānvayaviniścayāt ity evam avagaṃtavyas tadbhedoktis tu durnayaḥ [ ] yastu paryāyavaddravyaṃ guṇavad veti nirṇayaḥ vyavahāranayāj jātaḥ so 'śuddhadravyanaigamaḥ [ ] tadbhedaikāṃtavādas tu tadābhāso numanyate tathokter bahir aṃtaś ca pratyakṣādivirodhataḥ [ ] śuddhadravyārthaparyāyanaigamo sti paro yathā satsukhaṃ kṣaṇikaṃ śuddhaṃ saṃsāre sminn itīraṇam [ ] sattvaṃ sukhārthaparyāyād bhinnam eveti saṃmatiḥ durnītiḥ syāt sabādhatvād iti nītivido viduḥ [ ] kṣaṇam ekaṃ sukhī jīvo viṣayīti viniścayaḥ vinirdiṣṭo rthaparyāyāśuddhadravyaganaigamaḥ [ ] sukhajīvabhidoktis tu sarvathā mānabādhitā durnītir eva boddhavyā śuddhabodhair asaṃśayāt [ ] gocarīkurute śuddhadravyavyaṃjanaparyayau naigamo nyo yathā saccitsāmānyam iti nirṇayaḥ [ ] vidyate cāparośuddhadravyabyaṃjanaparyayau arthīkaroti yaḥ so tra nāguṇīti nigadyate [ ] bhidābhidābhir atyaṃtaṃ pratīter apalāpataḥ pūrvavannaigamābhāsau pratyetavyau tayor api [ ] navadhā naigamasyaivaṃ khyāteḥ paṃcadaśoditāḥ nayāḥ pratītim ārūḍhāḥ saṃgrahādinayaiḥ saha [ ] ekatvena viśeṣāṇāṃ grahaṇaṃ saṃgraho nayaḥ sajāter avirodhena dṛṣṭeṣṭābhyāṃ kathaṃcana [ ] samekībhāvasamyaktve vartamāno hi gṛhyate niruktyā lakṣaṇaṃ tasya tathā sati vibhāvyate [ ] śuddhadravyam abhipraiti sanmātraṃ saṃgrahaḥ paraḥ sa cāśeṣaviśeṣeṣu sadaudāsīnyabhāg iha [ ] nirākṛtaviśeṣas tu sattādvaitaparāyaṇaḥ tadābhāsaḥ samākhyātaḥ sadbhir dṛṣṭeṣṭabādhanāt [ ] abhinnaṃ vyaktibhedebhyaḥ sarvathā bahudhānakaṃ mahāsāmānyam ity uktiḥ keṣāṃcid durnayas tathā [ ] śabdabrahmeti cānyeṣāṃ puruṣādvaitam ity api saṃvedanād vayaṃ ceti prāyaśo nyatra darśitam [ ] dravyatvaṃ sakaladravyavyāpy abhipraiti cāparaḥ paryāyatvaṃ ca niḥśeṣaparyāyavyāpisaṃgrahaḥ [ ] tathaivāvāṃtarān bhedān saṃgṛhyaikatvato bahuḥ vartate yaṃ nayaḥ samyak pratipakṣānirākṛteḥ [ ] svavyaktyātmam anaikāṃtas tadābhāso py anekadhā pratītibādhito bodhyo niḥśeṣo py anayā diśā [ ] saṃgraheṇa gṛhītānām arthānāṃ vidhipūrvakaḥ yo vahāro vibhāgaḥ syād vyavahāro nayaḥ smṛtaḥ [ ] sa cānekaprakāraḥ syād uttaraḥ parasaṃgrahāt yat sat tad dravyaparyāyāv iti prāgṛjusūtrataḥ [ ] kalpanāropitadravyaparyāyapravibhāgabhāk pramāṇabādhito nyas tu tadābhāso 'vasīyatām [ ] ṛjusūtraṃ kṣaṇadhvaṃsi vastu sat sūtrayed ṛju prādhānyena guṇībhāvād dravyasyānarpaṇāt sataḥ [ ] nirākaroti yad dravyaṃ bahir aṃtaś ca sarvathā sa tadābho 'bhimaṃtavyaḥ pratīter apalāpataḥ [ ] kāryakāraṇatā ceti grāhyagrāhakatāpi vā vācyavācakatā ceti kvārthasādhanadūṣaṇaṃ [ ] lokasaṃvṛttisatyaṃ ca satyaṃ ca paramārthataḥ kvaivaṃ siddhyed yadāśritya buddhānāṃ dharmadeśanā [ ] sāmānādhikaraṇyaṃ kva viśeṣaṇaviśeṣyatā sādhyasādhanabhāvo vā kvādhārādheyatāpi ca [ ] saṃyogo viprayogo vā kriyākāraṇasaṃsthitiḥ sādṛśyaṃ vaisadṛśyaṃ vā svasaṃtānetarasthitiḥ [ ] samudāyaḥ kva ca pretyabhāvādi dravyanihnave baṃdhamokṣavyavasthā vā sarvatheṣṭā'prasiddhitaḥ [ ] kālādibhedato rthasya bhedaṃ yaḥ pratipādayet so tra śabdanayaḥ śabdapradhānatvād udāhṛtaḥ [ ] viśvadṛśvāsya janitā sūnur ity ekam ādṛtāḥ padārthaṃ kālabhede pi vyavahārānurodhataḥ [ ] karoti kriyate puṣyastārakā yoṃbha ity api kārakavyaktisaṃkhyānāṃ bhede pi ca pare janāḥ [ ] ehi manye rathenetyādikasādhanabhidy api saṃtiṣṭhetāvatiṣṭhetetyādyupagrahabhedane [ ] tan na śreyaḥ parīkṣāyām iti śabdaḥ prakāśayet kālādibhedane py arthābhedane tiprasaṃgataḥ [ ] tathā kālādinānātvakalpanaṃ niḥprayojanam siddhaṃ kālādinaikena kāryasyeṣṭasya tattvataḥ [ ] kālādyanyatamasyaiva kalpanaṃ tair vidhīyatāṃ yeṣāṃ kālādibhede pi padārthaikatvaniścayaḥ [ ] śabdaḥ kālādibhir bhinnābhinnārthapratipādakaḥ kālādibhinnaśabdatvāt tādṛksiddhānyaśabdavat [ ] paryāyaśabdabhedena bhinnārthasyādhirohaṇāt nayaḥ samabhirūḍhaḥ syāt pūrvavac cāsya niścayaḥ [ ] iṃdraḥ puraṃdaraḥ śakra ityādyā bhinnagocarāḥ śabdā vibhinnaśabdatvād vājivāraṇaśabdavat [ ] tatkriyāpariṇām orthas tathaiveti viniścayāt evaṃbhūtena nīyeta kriyāṃtaraparāṅmukhaḥ [ ] yo yaṃ kriyārtham ācaṣṭe nāsāv anyatkriyaṃ dhvaniḥ paṭhatītyādiśabdānāṃ pāṭhādyarthatvasaṃjanāt [ ] ito nyonyam apekṣāyāṃ saṃtaḥ śabdād ayo nayāḥ nirapekṣāḥ punas te syus tadābhāsāvirodhataḥ [ ] tatrarjusūtraparyaṃtāś catvāro rthanayā matāḥ trayaḥ śabdanayāḥ śeṣāḥ śabdavācyārthagocarāḥ [ ] pūrvapūrvo nayo bhūmaviṣayaḥ kāraṇātmakaḥ paraḥ paraḥ punaḥ sūkṣmagocaro hetumān iha [ ] sanmātraviṣayatvena saṃgrahasya na yujyate mahāviṣayatābhāvābhāvārthān naigamān nayāt [ ] yathā hi sati saṃkalpas tathaivāsati vedyate tatra pravartamānasya naigamasya mahārthatā [ ] saṃgrahād vyavahāro pi sadviśeṣāvabodhakaḥ na bhūmaviṣayo śeṣasatsamūhopadarśitaḥ [ ] narjusūtraprabhūtārtho vartamānārthagocaraḥ kālatritayavṛttyarthagocarād vyavahārataḥ [ ] kālādibhedato py artham abhinnam upagacchataḥ narjusūtrān mahārtho tra śabdas tadviparītavat [ ] śabdāt paryāyabhedenābhinnam artham abhīpsinaḥ na syāt samabhirūḍho pi mahārthas tadviparyayaḥ [ ] kriyābhede pi cābhinnam artham abhyupagacchataḥ naivaṃbhūtaḥ prabhūtārtho nayaḥ samabhirūḍhataḥ [ ] naigamāprātikūlyena na saṃgrahaḥ pravartate tābhyāṃ vācyam ihābhīṣṭā saptabhaṃgīvibhāgataḥ [ ] naigamavyavahārābhyāṃ viruddhābhyāṃ tathaiva sā sā naigamarjusūtrābhyāṃ tādṛgbhyām avigānataḥ [ ] sā śabdān nigamād anyād yuktāt samabhirūḍhataḥ saivaṃbhūtāc ca sā jñeyā vidhānapratiṣedhagā [ ] saṃgrahādeś ca śeṣeṇa pratipakṣeṇa gamyatām tathaiva vyāpinī saptabhaṃgī nayavidāṃ matā [ ] viśeṣair uttaraiḥ sarvair nayānām uditātmanām parasparaviruddhārthair dvaṃdvavṛtter yathāyatham [ ] pratyeyā pratiparyāyam aviruddhā tathaiva sā pramāṇasaptabhaṃgī ca tāṃ vinā nābhivāggatiḥ [ ] sarve śabdanayās tena parārthapratipādane svārthaprakāśane mātur ime jñānanayāḥ sthitāḥ [ ] vai nīyamānavastvaṃśāḥ kathyaṃte 'rthanayāś ca te traividhyaṃ vyavatiṣṭhaṃte pradhānaguṇabhāvataḥ [ ] yatra pravartate svārthe niyamād uttaro nayaḥ pūrvapūrvo nayas tatra vartamāno na vāryate [ ] sahasraṃ ca śatī yadvat tasyāṃ paṃcaśatī matā pūrvasaṃkhyottaratvābhyāṃ saṃkhyāyām avirodhataḥ [ ] pūrvatra nottarā saṃkhyā yathāyātānuvartyate tathottaranayaḥ pūrvanayārthasakale sadā [ ] nayārtheṣu pramāṇasya vṛttiḥ sakaladeśinaḥ bhaven na tu pramāṇārthe nayānām akhileṣu sā [ ] saṃkṣepeṇa nayās tāvadvyākhyātās tatra sūcitāḥ tadviśeṣāḥ prapaṃcena saṃciṃtyā nayacakrataḥ [ ] tattvārthādhigamabhedaḥ
tattvārthādhigamas tāvat pramāṇanayato mataḥ sarvaḥ svarthaḥ parārtho vā sitaḥ [ ] parārthādhigamas tatrānudbhavadrāgagocaraḥ jigīṣugocaraś ceti dvidhā śuddhadhiyo viduḥ [ ] satyavāgbhir vidhātavyaḥ prathamas tattvavedibhiḥ yathā kathaṃcid ity eṣa caturaṃgo na saṃmataḥ [ ] pravakrājñāpyamānasya prasabhajñānapekṣayā tattvārthādhigamaṃ kartuṃ samartho [ ] viśrutaḥ svayaṃ prabhuḥ tādṛśānyabhasāmītā bhāve pi pratibodhakaḥ [ ] sābhimānajanārabhyaś caturaṃgo niveditaḥ tajjñair anyatamāpāye py arthāparisamāptitaḥ [ ] jigīṣadbhyāṃ vinā tāvan na vivādaḥ pravartate tābhyām eva jayo nyonyaṃ vidhātuṃ na ca śakyate [ ] vādino sparddhayā vṛddhir abhimānaḥ pravṛddhitaḥ siddhe vātrākalaṃkasya mahato nyāyavedinaḥ [ ] svaprajāparipākādiprayojaneti kecana teṣām api vinā mānād dvayor yadi sa saṃmataḥ [ ] tayor anyatamasya syād abhimānaḥ kadācana tannivṛttyartham eveṣṭaṃ sabhyāpekṣaṇam atra cet [ ] rājāpekṣaṇam apy astu tathaiva caturaṃgatā vādasya bhāvinīm iṣṭām apekṣāṃ vijigīṣatām [ ] sabhyair anumataṃ tattvajñānaṃ dṛḍhataraṃ bhavet iti te vītarāgābhyām apekṣā tata eva cet [ ] tac cen maheśvarasyāpi svaśiṣyapratipādane sabhyāpekṣaṇam apy astu vyākhyāne ca bhavādṛśāṃ [ ] svayaṃ maheśvaraḥ sabhyo madhyasthas tattvavittvataḥ pravaktā ca vineyānāṃ tattvakhyāpanato yadi [ ] tadānyo pi pravaktaivaṃ bhaved iti vṛthā tava prāśnikāpekṣaṇaṃ vā [ ] yathā caikaḥ pravaktā ca madhyasthobhyupagamyate tathā sabhāpatiḥ kiṃ na pratipādyaḥ sa eva te [ ] maryād ātikramābhāvahetutvād bodhyaśaktitaḥ prasiddhaprabhavā tādṛgvineyajanavaddhruvam [ ] svayaṃ buddhaḥ pravaktā syāt bodhyasaṃdigdhadhīr iha tayoḥ kathaṃ sahaikatra sadbhāva iti cākulaṃ [ ] prāśnikatvapravaktṛtvasadbhāvasyāpi hānitaḥ svapakṣarāgaudāsīnavirodhasyānivāraṇāt [ ] pūrvaṃ vaktā budhaḥ paścāt sabhyo na vyāhato yadi tadā prabodhako bodhyas tathaiva na virudhyate [ ] vaktṛvākyānuvaktādi svasya syāt pratipādakaḥ tadarthaṃ budhyamānas tu pratipādyo na manyatām [ ] tathaikāṃgo pi vādaḥ syāc caturaṃgo viśeṣataḥ pṛthak sabhyādibhedānām anapekṣāc ca sarvadā [ ] yathā vādyādayo loke dṛśyaṃte te nyabhedinaḥ tathā nyāyavidām iṣṭā vyavahāreṣu te yadi [ ] tadabhāvāt svayaṃ vaktuḥ sabhyā bhinnā bhavaṃtu te sabhāpatiś ca tadbodhyajanavaṃtaś ca neṣyate [ ] jigīṣāvirahāt tasya tattvaṃ bodhayato janān na sabhyādipratīkṣāsti yadi vāde kva sā bhavet [ ] tato vādo jigīṣāyāṃ vādinoḥ saṃpravartate sabhyāpekṣaṇato jalpavitaṃḍāvad iti sphuṭaṃ [ ] tadapekṣā ca tatrāsti jayetaravidhānataḥ tadvad evānyathā tatra sā na syād aviśeṣataḥ [ ] siddho jigīṣato vādaś caturaṃgas tathā sati svābhipretavyavasthānāl lokaprakhyātavādavat [ ] maryādātikramaṃ leke yathā haṃti mahīpatiḥ tathā śāstre py ahaṃkāragras tayor vādinoḥ kvacit [ ] vādinor vādanaṃ vādaḥ samarthe hi sabhāpatau samarthayoḥ samartheṣu prāśnikeṣu pravartate [ ] sāmarthyaṃ punar īśasya śaktitrayam udāhṛtam yena svamaṃḍalasyājñā vidheyatvaṃ prasiddhyati [ ] maṃtraśaktyā prabhus tāvat svalokān samayān api dharmanyāyena saṃrakṣed viplavāt sādhusāt sudhīḥ [ ] prabhusāmarthyato vāpi durlaṃghyātmabalair api svotsāhaśaktito vāpi daṃḍaṃ nītividāṃvaraḥ [ ] rāgadveṣavihīnatvaṃ vādini prativādini nyāye 'nyāye ca tadvattvaṃ sāmarthyaṃ prāśnikeṣv adaḥ [ ] siddhāṃtadvayaveditvaṃ proktārthagrahaṇatvatā pratibhādiguṇatvaṃ ca tattvanirṇayakāritā [ ] jayetaravyavasthāyām anyathānadhikāratā sabhyānām ātmanaḥ patyur yaśo dharmaṃ ca vāṃchataḥ [ ] kumāranaṃdinaś cāhur vādanyāyavicakṣaṇāḥ rājaprāśnikasāmarthyam evaṃbhūtam asaṃśayam [ ] ekataḥ kārayet sabhyān vādinām ekataḥ prabhuḥ paścād abhyarṇakān vīkṣya pramāṇaguṇadoṣayoḥ [ ] laukikārthavicāreṣu na tathā prāśnikā yathā śāstrīyārthavicāreṣu vā tajjñāḥ prāśnikā yathā [ ] satyasādhanasāmarthyasaṃprakāśanapāṭavaḥ vādyajeyo vijetā no sadonmādena kevalam [ ] iti samarthasādhanākhyānaṃ sāmarthyaṃ vādino mataṃ sā tv avaśyaṃ ca sāmarthyād anyathānupapannatā [ ] saddoṣodbhāvanaṃ vāpi sāmarthyaṃ prativādinaḥ dūṣaṇasya ca sāmarthyaṃ pratipakṣavighātitā [ ] sā pakṣāṃtarasiddhir vā sādhanāśaktitāpi vā hetor viruddhatā yadvadabhāsāṃtaratāpi ca [ ] ity ābhimānikaḥ proktas tāttvikaḥ prātibho pi vā samarthāvacanaṃ vādaś caturaṃgo jigīṣatoḥ [ ] dviprakāraṃ jagau jalpaṃ tattvaprātibhagocaram triṣaṣṭer vādināṃ jetā śrīdatto jalpanirṇaye [ ] tatreha tāttvike vāde 'kalaṃkaiḥ kathito jayaḥ svapakṣasiddhir ekasya nigraho nyasya vādinaḥ [ ] svapakṣasiddhiparyaṃtā śāstrīyārthavicāraṇā vastvāśrayatvato yadvallaukikārthe vicāraṇā [ ] jijñāsitaviśeṣo tra dharmī pakṣo na yujyate tasyāsaṃbhavadoṣeṇa bādhitatvāt khapuṣpavat [ ] kvacit sādhyaviśeṣaṃ hi na vādī pratipitsate svayaṃ viniścitārthasya parabodhāya vṛttitaḥ [ ] pravṛttivādī tasyaiva pratikṣepāya vartanāt jijñāsitena sabhyāś ca siddhāṃtadvayavedinaḥ [ ] svārthānumāne vādye ca jijñāsiteti cen mataṃ vāde tasyādhikāraḥ syāt parapratyayanādṛte [ ] jijñāpayitātmeha dharmī pakṣo yadīṣyate lakṣaṇadvayam āyātaṃ pakṣasya graṃthaghātine [ ] tathānuṣṇo gnir ityādiḥ pratyakṣādinirākṛtaḥ svapakṣaṃ syād ativyāpi nedaṃ pakṣasya lakṣaṇaṃ [ ] liṃgāt sādhayituṃ śakyo viśeṣo yasya dharmiṇaḥ sa eva pakṣa iti cet vṛthā dharmaviśeṣavāk [ ] liṃgaṃ yenāvinābhāvi so rthaḥ sādhyo vadhāryate na ca dharmī tathābhūtaḥ sarvatrānanvayātmakaḥ [ ] na dharmī kevalaḥ sādhyo na dharmaḥ siddhyasaṃbhavāt samudāyas tu sādhyeta yadi saṃvyavahāribhiḥ [ ] tadā tatsamudāyasya svāśrayeṇa vinā sadā saṃbhavābhāvataḥ so pi tadviśiṣṭaḥ prasādhyatām [ ] tadviśeṣo pi so nyena svāśrayeṇeti na kvacit sādhyavyavasthitir mūḍhacetasām ātmavidviṣām [ ] vināpi tena liṃgasya bhāvāt tasya na sādhyatā tato napekṣatety etad anukūlaṃ samācaret [ ] dharmiṇāpi vinā bhāvāt kvacil liṃgasya pakṣatā tasya mā bhūt tataḥ siddhaḥ pakṣaḥ sādhanagocaraḥ [ ] sabhyapratyāyanaṃ tasya siddhiḥ syādvādino thavā prativādina ity eṣa nigraho nyatarasya tu [ ] asādhanāṃgavacanam adoṣodbhāvanaṃ dvayoḥ nigrahasthānam anyat tan na yuktam iti kecana [ ] svapakṣaṃ sādhayan tatra tayor eko jayed yadi tūṣṇībhūtaṃ bruvāṇaṃ vā yat kiṃcit tat samaṃjasam [ ] tatsādhanavacaḥ pakṣo mataḥ sādhanavādinaḥ saddūṣaṇābhidhānaṃ tu svapakṣaḥ prativādinaḥ [ ] ity ayuktaṃ dvayor ekaviṣayatvānavasthiteḥ svapakṣapratipakṣatvāsaṃbhavād bhinnapakṣavat [ ] vastuny ekatra vartete tayoḥ sādhanadūṣaṇe tena tadvacasor yuktā svapakṣetaratā yadi [ ] tadā vāstavapakṣaḥ syāt sādhyamānaṃ kathaṃcana dūṣyamāṇaṃ ca niḥśaṃkaṃ tadvādiprativādinoḥ [ ] pakṣasiddhyavinābhāvi sādhanāvacanaṃ tataḥ nigraho vādinaḥ siddhaḥ svapakṣe prativādini [ ] viruddhasādhanodbhāvī prativādītaraṃ jayet tathā svapakṣasaṃsiddher vidhānaṃ tena tattvataḥ [ ] sveṣṭārthasiddhir aṃgasya tryaṃśahetor abhāṣaṇaṃ tasyāsamarthanaṃ cāpi vādino nigraho yathā [ ] paṃcāvayavaliṃgasyābhāṣaṇaṃ na tathaiva kim tasyāsamarthanaṃ cāpi sarvathāpy aviśeṣataḥ [ ] sāmarthyād gamyamānasya nigamasya vaco yathā pakṣadharmopasaṃhāravacanaṃ ca tathā phalam [ ] tasyāsiddhatvavicchittiḥ phalaṃ hetor yathā tathā nigamasya pratijñānādyekārthatvopadarśanam [ ] pratijñāto rthasiddhau syād dhetvādivacanaṃ vṛthā nānyathā sādhanāṃgatvaṃ tasyā iti yathaiva tat [ ] tattvārthaniścaye hetor dṛṣṭāṃto 'narthako na kim [ ] prācye pakṣe kalaṃkoktir dvitīye lokabādhitā dvayor hi pakṣasaṃsiddhyabhāve kasya vinigrahaḥ [ ] atrānye prāhur iṣṭaṃ nas tathā nigrahaṇaṃ dvayoḥ tattvajñānoktisāmarthyaśūnyatvasyāviśeṣataḥ [ ] yathopāttāparijñānaṃ sādhanābhāsavādinaḥ tathā saddūṣaṇājñānaṃ doṣānudbhāvinaḥ samaṃ [ ] jānato pi sabhātīte hanyato vā kutaścana doṣānudbhāvanaṃ yadvatsādhanābhāsavāk tathā [ ] doṣānudbhāvane tu syādvādinā prativādite parasya nigrahas tena nirākaraṇataḥ sphuṭam [ ] anyonyaśaktinirghātāpekṣayā hi jayetaraḥ vyavasthā vādinoḥ siddhāḥ nānyathātiprasaṃgataḥ [ ] ity etaddurvidagdhatve ceṣṭitaṃ prakaṭaṃ na tu vādinaḥ kīrtikāri syād evaṃ mādhyasthahānitaḥ [ ] doṣānudbhāvanākhyānād yathā paranirākṛtiḥ tathaiva vādinaḥ svasya dṛṣṭavān kā tiraskṛtiḥ [ ] doṃṣānudbhāvanād ekaṃ na kurvaṃti sabhāsadaḥ sādhanānuktito nānyam ity aho te 'tisajjanāḥ [ ] pakṣasiddhivihīnatvād ekasyātra parājaye parasyāpi na kiṃ na syāj jayo py anyatarasya tu [ ] tathā caikasya yugapat syātāṃ jayaparājayau pakṣasiddhītarātmatvāt tayoḥ sarvatra lokavat [ ] tadekasya pareṇeha nirākaraṇam eva naḥ parājayo vicāreṣu pakṣāsiddhis tu sā kva nuḥ [ ] parājayapratiṣṭhānam apekṣya pratiyogināṃ loke hi dṛśyate yādṛk siddhaṃ śāstre pi tādṛśam [ ] siddhyabhāvaḥ punardṛṣṭaḥ saty api pratiyogini sādhanābhāvataḥ śūnye saty api ca sa jātucit [ ] tannirākṛtisāmarthyaśūnye vādam akurvati parājayas tatas tasya prāpta ity apare viduḥ [ ] tatredaṃ ciṃtyate tāvat tannirākaraṇaṃ kimu nirmukhīkaraṇaṃ kiṃ vā vāgbhis tattattvadūṣaṇam [ ] nātrādikalpanā yuktā parānugrāhiṇāṃ satāṃ nirmukhīkaraṇāvṛtter bodhisattvādivat kvacit [ ] dvitīyakalpanāyāṃ tu pakṣasiddhiḥ parājayaḥ sarvasya vacanais tattvadūṣaṇe pratiyoginām [ ] siddhyabhāvas tu yoginām asati pratiyogini sādhanābhāvas tatra kathaṃ vāde parājayaḥ [ ] yadaiva vādinoḥ pakṣaḥ pratipakṣaparigrahaḥ rājanvati sadekasya pakṣāsiddhas tathaiva hi [ ] sā tatra vādino samyak sādhanokter vibhāvyate tūṣṇībhāvāc ca nānyatra nānyadety akalaṃkavāk [ ] tūṣṇībhāvo thavā doṣānāśaktiḥ satyasādhane vādinokte parasyeṣṭā pakṣasiddhir na cānyathā [ ] kasyacit tattvasaṃsiddhyapratikṣepo nirākṛtaḥ kīrtiḥ parājayo vaśyamakīrtikṛd iti sthitam [ ] asādhanāṃgavacanam adoṣodbhāvanaṃ dvayoḥ na yuktaṃ nigrahasthānaṃ saṃdhāhānyādivat tataḥ [ ] pratidṛṣṭāṃtadharmasya yānujñā nyāyadarśane svadṛṣṭāṃte matā saiva pratijñāhānir aiśvaraiḥ [ ] sādhyadharmaviruddhena dharmeṇa pratyavasthite anyadṛṣṭāṃtadharmā m evānujānataḥ [ ] pratijñāhānir ity eva bhāṣyākārāgraho na vā prakārāṃtaro py asya syāt saṃbhavāc citravibhramāt [ ] vinaśvarasvabhāvo yaṃ śabda aiṃdriyakatvataḥ yathā ghaṭa iti prokte paraḥ pratyavatiṣṭhate [ ] dṛṣṭam aiṃdriyakaṃ nityaṃ sāmānyaṃ tadvad astu naḥ śabdo pīti svaliṃgasya jñānāt te nāpy asaṃmataṃ [ ] kāmaṃ ghaṭo pi nityo stu sāmānyaṃ yadi śāśvataṃ ity evaṃ bhāṣyamāṇena pratijñotpadyate katham [ ] dṛṣṭāṃtasya parityāgāt svahetoḥ prakṛtakṣateḥ nigamāṃtasya pakṣasya tyāgād iti mataṃ yadi [ ] tadā dṛṣṭāṃtahāniḥ syāt sākṣād iyam anākulā sādhyadharmaparityāgād dṛṣṭāṃte sveṣṭasādhane [ ] pāraṃparyeṇa tu tyāgo hetūpanayayor api udāharaṇahānau hi nānayor asti sādhutā [ ] nigamasya parityāgaḥ pakṣavādo pi vā svayaṃ tathā ca na pratijñātahānir eveti saṃgatam [ ] pakṣatyāgāt pratijñāyās tyāgas tasya tadāsṛteḥ pakṣatyāge pi dṛṣṭāṃtatyāgād iti yadīṣyate [ ] hetvādityāgato pi syāt pratijñātyajanaṃ tadā tataḥ pakṣaparityāgāviśeṣān niyamaḥ kutaḥ [ ] pratijñāhānisūtrasya vyākhyāṃ vārtikakṛt punaḥ karoty evaṃ virodhena nyāyabhāṣyakṛtaḥ sphuṭam [ ] dṛṣṭaś cāṃte sthitaś cāyam iti dṛṣṭāṃta ucyate svadṛṣṭāṃtaḥ svapakṣaḥ syāt pratipakṣaḥ punar mataḥ [ ] pratidṛṣṭāṃta eveti taddharmam anujānataḥ svapakṣe syāt pratijñānam iti nyāyāvirodhataḥ [ ] sāmānyam aiṃdriyaṃ nityaṃ yadi śabdo pi tādṛśaḥ nityo 'stv iti bruvāṇasyānityatvatyāganiścayāt [ ] ity etac ca na yuktaṃ syād udyotakarajādyakṛt pratijñāhānir itthaṃ tu yatas tenāvadhāryate [ ] sā hetvādiparityāgāt pratipakṣaprasādhanā prāyaḥ pratīyate vāde maṃdabodhasya vādinaḥ [ ] kutaścid ākulābhāvād anyato vā nimittataḥ tathā tadvāci sūtrārtho niyamān na vyavasthitaḥ [ ] yas tv āhaiṃdriyakatvasya vyabhicārād vinaśvare śabdasādhyena hetutvaṃ sāmānyeneti so py adhīḥ [ ] siddhasādhanatas teṣāṃ saṃdhāhāneś ca bhedataḥ sādhanaṃ vyabhicāritvāt tadanaṃtarataḥ kutaḥ [ ] sāsty eva hi pratijñānahānir doṣaḥ kutaścana kasyacin nigrahasthānaṃ tanmātrāt tu na yujyate [ ] yeṣāṃ prayogayogyāsti pratijñānam itīraṇe teṣāṃ taddhānir apy astu nigraho vā prasādhane [ ] pareṇa sādhite svārthe nānyatheti hi niścitaṃ svapakṣasiddhir evātra jaya ity abhidhānataḥ [ ] gamyamānā pratijñā na yeṣāṃ teṣāṃ ca tatkṣatiḥ gamyamānaiva doṣaḥ syād iti sarvaṃ samaṃjasam [ ] pratiṣedhe pratijñātārthasya dharmavikalpataḥ yo sau tadarthanirdeśas tatpratijñāṃtaraṃ kila [ ] ghaṭo 'sarvagato yadvat tathā śabdo py asarvagaḥ tadvad evāstu nityo yam iti dharmavikalpanāt [ ] sāmānyenaiṃdriyatvasya sarvagatvopadarśitaṃ vyabhicāre pi pūrvasyāḥ pratijñāyāḥ prasiddhaye [ ] śabdo 'sarvagatas tāvad iti sattvāṃtaraṃ kṛtam tac ca tatsādhanāśaktam iti bhāṣyena nigrahaḥ [ ] nātredaṃ yujyate pūrvapratijñāyāḥ prasādhane prayuktāyāṃ parasyās tadbhāvahānena hetuvat [ ] tadasarvagatatvena prayuktād aiṃdriyatvataḥ śabdānityatvamāhāyam iti hetvaṃtaraṃ bhavet [ ] na pratijñāṃtaraṃ tasya kvacid apy aprayogataḥ prajñāvatāṃ jaḍānāṃ tu nādhikāro vicāraṇe [ ] viruddhādiprayogas tu prājñānām api saṃbhavāt kutaścid viśramāt tatrety āhur anye tad apy asat [ ] pratijñātārthasiddhyarthaṃ pratijñāyāḥ samīkṣaṇāt bhrāṃtaiḥ prayujyamānāyāḥ vicāre siddhahetuvat [ ] prājñeti vibhramād brūyād vāde 'siddhādisādhanam svapakṣasiddhir yena syāt sattvam ity atidurghaṭam [ ] tato nenaiva mārgeṇa pratijñāṃtarasaṃbhavaḥ ity etad eva nirmuktis tad dhi nānānimittakaṃ [ ] pratijñāhānitaś cāsya bhedaḥ katham upeyate pakṣatyāgāviśeṣe pi yogair iti ca vismayaḥ [ ] pratidṛṣṭāṃtadharmasya svadṛṣṭāṃte bhyanujñayā yathā pakṣaparityāgas tathā saṃdhāṃtarād api [ ] svapakṣasiddhaye yadvatsaṃdhāṃtaram udāhṛtaṃ bhrāṃtyā tadvac ca śabdo pi nityo stv iti na kiṃ punaḥ [ ] śabdānityatvasiddhyarthaṃ nityaḥ śabda itīraṇaṃ svasthasya vāhataṃ yadvat tathā sarvagaśabdavāk [ ] pratijñāyā virodho yo hetunā saṃpratīyate sa pratijñāvirodhaḥ syād ity etac ca na yuktimat [ ] pratijñāyāḥ pratijñātve hetunā hi nirākṛte pratijñāhānir eveyaṃ prakārāṃtarato bhavet [ ] dravyaṃ bhinnaṃ guṇāt svasmād iti pakṣe bhibhāṣite rūpādyarthāṃtaratvenānupalabdher itīryate [ ] yena hetur hatas tenāsaṃdehaṃ bhedasaṃgaraḥ tadabhedasya nirṇītes tatra teneti budhyatām [ ] hetor viruddhatā vā syād doṣo yaṃ sarvasaṃmataḥ pratijñādoṣatā tv asya nānyathā vyavatiṣṭhate [ ] pratijñā ca svayaṃ yatra virodham adhigacchati nāstyātmetyādivat tatra pratijñāvidhir eva naḥ [ ] hetuḥ pratijñayā yatra bādhyate hetuduṣṭatā tatra siddhānyathā saṃdhāvirodho tiprasajyate [ ] sarvaṃ pṛthak samudāyaḥ bhāvaśabdaprayogataḥ ity atra siddhayā bhedasaṃdhayā yadi bādhyate [ ] hetus tatra prasiddhena hetunā sāpi bādhyatāṃ pratijñāvat parasyāpi hetusiddher abhedataḥ [ ] bhāvaśabdaḥ samūhaṃ hi yasyaikaṃ vakti vāstavaṃ tasya sarvaṃ pṛthaktattvam iti saṃdhādhihanyate [ ] viruddhasādhanād vāyaṃ viruddho hetur āgataḥ samūhāvāstave hetudoṣo naiko pi pūrvakaḥ [ ] sarvathā bhedino nānārtheṣu śabdaprayogataḥ prakalpitasamūheṣv ity evaṃ hetvarthaniścayāt [ ] tathā sati virodho yaṃ taddhetoḥ saṃdhayā sthitaḥ saṃdhāhānis tu siddhe yaṃ hetunā tatprabādhanāt [ ] dṛṣṭāṃtasya ca yo nāma virodhaḥ saṃdhayoditaḥ sādhanasya ca dṛṣṭāṃtapramukhair mānabodhanam [ ] pratijñādiṣu tasyāpi na pratijñāvirodhatā sūtrārūḍhatayoktasya bhāṃḍālekhyanayoktivat [ ] pratijñānena dṛṣṭāṃtabādhane sati gamyate tatpratijñāvirodhaḥ syād vistattvād iti cen matam [ ] haṃta hetuvirodho pi kiṃ naiṣo bhīṣṭa eva te dṛṣṭāṃtādivirodho pi hetur etena varṇitaḥ [ ] nigrahasthānasaṃkhyānavighātakṛd ayaṃ tataḥ yathoktanigrahasthāneṣv aṃtarbhāvāvirodhataḥ [ ] pratyakṣādipramāṇena pratijñābādhanaṃ punaḥ pratijñāhānir āyātā prakārāṃtarataḥ sphuṭam [ ] nidarśanādibādhā ca nigrahāṃtaram eva te pratijñānaśrutes tatrābhāvāt tadbādhanātyayāt [ ] mokṣādinā svasiddhena yānaikāṃtikacodanā parapakṣaviruddhaṃ syādut taraṃ tad ihety api [ ] na pratijñāvirodhe ṃtarbhāvameti kathaṃcana svayaṃ tu sādhite samyaggotvādau doṣa eva saḥ [ ] nirākṛtau pareṇāsyānaikāṃtikasamānatā hetor eva bhavet tāvat saṃdhādoṣas tu neṣyate [ ] hetāv aiṃdriyakatve tu nijapakṣānapekṣiṇi sa prasiddhasya gotvāder iti tattvavirodhataḥ [ ] syād virodha itīdaṃ ca tadvad eva na bhidyate anaikāṃtikatādoṣāt tadabhāvāviśeṣataḥ [ ] vādītarapratānena gotvena vyabhicāratā hetor yathā caikatarasiddhenāsādhanena kim [ ] pramāṇenāprasiddhau tu tasya saiva tadā bhavat sarveṣām api tenāyaṃ vibhāgo jaḍakalpitaḥ [ ] pratijñāvacanenaiva nigṛhītasya vādinaḥ na pratijñāvirodhasya nigrahatvam itītare [ ] teṣām anekadoṣasya sādhanasyābhibhāṣaṇe pareṇaikasya doṣasya kathanaṃ nigraho yathā [ ] tathānyasyātra tenaiva kathanaṃ tasya nigrahaḥ kiṃ neṣṭo vādinor evaṃ yugapannigrahas tava [ ] sādhanāvayavasyāpi kasyacid vacane sakṛt jayo stu vādino nyasyāvacane ca parājayaḥ [ ] pratipakṣāvinābhāvidoṣasyodbhāvane yadi vādini nyatkṛte nyasya kathaṃ nāsya vinigrahaḥ [ ] tadā sādhyāvinābhāvi sādhanāvayaveraṇe tasyaiva śaktyubhayākāre nyasya vāk ca parājayaḥ [ ] viruddhodbhāvanaṃ hetoḥ pratipakṣaprasādhanaṃ yathā tathā vinābhāvihetūktiḥ svārthasādhanā [ ] sādhanāvayavo nekaḥ prayoktavyo yathāparaḥ tathā doṣo pi kiṃ na syād udbhāvyas tatra tattvataḥ [ ] tasmāt prayujyamānasya gamyamānasya vā svayaṃ saṃgarasya vyavasthānakathāvicchedamātrakṛt [ ] pratijñārthāpanayanaṃ pakṣasya pratiṣedhane na pratijñānasaṃnyāsaḥ pratijñāhānitaḥ pṛthak [ ] eka eva mahān nityo yaṃ śabdaḥ ity anīyata pratijñārthaḥ kilānena pūrvavatpakṣadūṣaṇe [ ] hetor aiṃdriyakatvasya vyabhicārapradarśanāt tathā cāpanayo hāniḥ saṃdhāyā iti nārthabhit [ ] pratijñāhānir evaitaiḥ prakārair yadi kathyate prakārāṃtarato pīyaṃ tadā kiṃ na prakathyate [ ] tannimittaprakārāṇāṃ niyamābhāvataḥ kva nu yathoktā niyatis teṣāṃ nasopajñaṃ vacas tataḥ [ ] pakṣasya pratiṣedhe hi tūṣṇīṃbhāvo dharekṣaṇaṃ vyomekṣaṇaṃ digālokaḥ khātkṛtaṃ capalāyitam [ ] hastāsphālanam ākaṃpaḥ prasvedādy apy anekadhā nigrahāṃtaram asyāstu tatpratijñāṃtarādivat [ ] aviśeṣodite hetau pratiṣiddhe pravādinā viśeṣam icchataḥ proktaṃ hetvaṃtaram apīha yat [ ] tad evam eva saṃbhāvyaṃ nānyatheti na niścayaḥ parasminn api hetau syād ukte hetvaṃtaraṃ yathā [ ] yathā ca prakṛte hetau doṣavaty api darśite parasya vacanaṃ hetor hetvaṃtaram udāhṛtam [ ] tathā nidarśanādau ca dṛṣṭāṃtādyaṃtaraṃ na kim nigrahasthānam āstheyaṃ vyavasthāpyātiniścitam [ ] yadi hetvaṃtareṇaiva nigṛhītasya vādinaḥ dṛṣṭāṃtādyaṃtaraṃ tat syāt kathāyāṃ vinivartanāt [ ] tadānaikāṃtikatvādihetudoṣeṇa nirjite mā bhūd dhetvaṃtaraṃ tasya tata evāviśeṣataḥ [ ] yathā codbhāvite doṣe hetor yad vā viśeṣaṇaṃ brūyāt kaścit tathā dṛṣṭāṃtāder api jigīṣayā [ ] pratisaṃbaṃdhaśūnyānām arthānām abhibhāṣaṇam yat punaḥ prakṛtād arthād arthāṃtarasamāśritam [ ] kvacit kiṃcid api nyasya hetuṃ tacchabdasādhane padādivyākṛtiṃ kuryād yathānekaprakārataḥ [ ] tatrāpi sādhane nukte prokte rthāṃtaravāk katham nigraho dūṣaṇe vāpi lokanād viniyamyate [ ] asamarthe tu tan na syāt kasyacit pakṣasādhane nigrahārthāṃtaraṃ vāde nānyatheti viniścayaḥ [ ] varṇakramasya nirdeśo yathā tadvannirarthakaṃ kathaṃ yathā jabajhabhetyādeḥ pratyāhārasya kutracit [ ] tatsarvathārthaśūnyatvāt kiṃ sādhya upayogataḥ kiṃ vānādivikalpo trāsaṃbhavād eva tādṛśaḥ [ ] varṇakramādiśabdasyāpy arthavattvāt kathaṃcana tadvicāre kvacic ca matkāryeṇārthena yogataḥ [ ] dvitīyakalpanāyāṃ tu sarvam eva nirarthakam nigrahasthānam uktaṃ syāt siddhavan nopayogivat [ ] tasmān nedaṃ pṛthagyuktaṃ kakṣādihitakādivat kathāvicchedamātraṃ tu bhavet pakṣāṃtaroktivat [ ] pariṣatprativādibhyāṃ trir uktamapi vādinā avijñātam avijñātārthaṃ tad uktaṃ jaḍātmabhiḥ [ ] yadā maṃdamatī tāvat pariṣatprativādinau tadā satyagiropete nigrahasthānam āpayet [ ] yadā tu tau mahāprājñau tadā gūḍhābhidhānataḥ drutoccārādito vā syāt tayor anavabodhanam [ ] prāgvikalpe kathaṃ yuktaṃ tasya nigrahaṇaṃ satām yatra vākyaprayoge pi vaktus tadanuṣaṃgataḥ [ ] yatra vākyaṃ svayaṃ vādī vyācaṣṭe nyair aniścitam yathā tathaiva vyācaṣṭaṃ gūḍhopanyāsam ātmanaḥ [ ] adhyākhyāne tu tasyās tu jayābhāvo na nigrahaḥ parasya pakṣasaṃsiddhyabhāvād etāvatā dhruvam [ ] drutoccārāditas tv etāḥ kathaṃcid avagacchataḥ siddhāṃtadvayatattvajñais tato nājñānasaṃbhavaḥ [ ] vaktuḥ pralāpamātre tu tayor anavabodhanam nāvijñātārtham etat syād varṇānuktam avādavat [ ] pratisaṃbaṃdhahīnānāṃ śabdānām abhibhāṣaṇaṃ paurvāparyeṇa yogasya tatrābhāvād apārthakam [ ] dāḍimāni daśetyādiśabdavat parikīrtanam te nirarthakato bhinnaṃ na yuktyā vyavatiṣṭhate [ ] nairarthakyaṃ hi varṇānāṃ yathā tadvatpadātiṣu nābhidyetānyathā vākyaṃ nairarthakyaṃ tato param [ ] saṃdhādyavayavān nyāyād viparyāsena bhāṣaṇam aprāptakālam ākhyātaṃ tac cāyuktaṃ manīṣiṇām [ ] padānāṃ kramaniyamaṃ vinārthāvyavasāyataḥ devadattādivākyeṣu śāstre py evaṃ vinirṇayāt [ ] yathāpaśabdataḥ śabdapratyayād arthaniścayaḥ śabdād eva tathā svādivyutkramān na kramasya vit [ ] tato vākyārthanirṇītiḥ pāraṃparyeṇa jāyate viparyāsāt tu naiveti kecid āhus tad apy asat [ ] vyutkramād arthanirṇītir apaśabdād ivety api vaktuṃ śaktes tathā dṛṣṭeḥ sarvathāpy aviśeṣataḥ [ ] śabdād vyākhyānavaiyarthyam evaṃ cet tattvavādinām nāpaśabdeṣv api prāyo vyākhyānasyopalakṣaṇāt [ ] tathā ca saṃskṛtāc chabdāt satyād dharmas tathānyataḥ syād asatyaṃ yadā dharmaḥ kva niyamaḥ puṇyapāpayoḥ [ ] vṛddhiprasiddhitas tv eṣa vyavahāraḥ pravartate saṃskṛtair iti sarvāpi śabdair bhāṣāsvanair iva [ ] tato rthāniścayo yena padena kramaśaḥ sthitaḥ tadvyatikramaṇād doṣo nairarthakyaṃ na cāparam [ ] hīnam anyatamenāpi vākyaṃ svāvayavena yat tannyūnam ity asatsvārthe pratītes tādṛśād api [ ] yathācāryāpratītiḥ syāt tannirarthakam eva te nigrahāṃtaratoktis tu tatra śraddhānusāriṇām [ ] hetūdāharaṇābhyāṃ yad vākyaṃ syād adhikaṃ paraiḥ proktaṃ tadadhikaṃ nāma tac ca nyūnena varṇitam [ ] tattvāparyavasānāyāṃ kathāyāṃ tattvanirṇayaḥ yadā syād ādhikād eva tadā kā nāma duṣṭatā [ ] svārthike ke dhike sarvaṃ nāsti vākyābhibhāṣaṇe tatprasaṃgāt tato rthasyāniścayāt tannirarthakam [ ] punarvacanam arthasya śabdasya ca niveditam punarutkaṃ vicāre nyatrānuvādāt parīkṣakaiḥ [ ] tatrāyam eva manyaṃte punaruktaṃ vacorthataḥ śabdasāmye pi bhedasyāsaṃbhavād ity udāhṛtam [ ] guṇasamuditaṃ doṣāpetaṃ praṇiṃdati nidati dhanavati parikrītaṃ yaṃtraṃ pranṛtyati nṛtyati [ ] satyapratyāyanaṃ yāvat tāvad vācyam ato budhaiḥ sveṣṭārthavācibhiḥ śabdais taiś cānyair vā nirākulam [ ] tadapratyāyi śabdasya vacanaṃ tu nirarthakam sakṛduktaṃ punar veti tāttvikaḥ saṃpracakṣate [ ] sakṛdvāde punar vādo nuvādo rthaviśeṣataḥ punaruktaṃ yathā neṣṭaṃ kvacit tadvad ihāpi tat [ ] arthād āpadyamānasya yac chabdena punarvacaḥ punaruktaṃ bhataṃ yasya tasya sveṣṭoktibādhanam [ ] nirvādinoditasyāpi vijñātasyāpi saṃsadā apratyuccāraṇaṃ prāha parasyānanubhāṣaṇam [ ] yan nāṃtarīyakā siddhiḥ sādhyasya tadabhāṣaṇaṃ parasya kathyate kaiścit sarvathānanubhāṣaṇaṃ [ ] prāgupanyasya niḥśeṣaṃ paropanyastam aṃjasā pratyekaṃ dūṣaṇāvācye punar uccāryate yadi [ ] tad eva syāt tadā tasya punaruktam asaṃśayam noccāryate yadā tv etat tadā doṣaḥ kva gadyate [ ] tasmād yad dūṣyate yat tatkarmatvādi paroditam tad uccāraṇam eveṣṭam anyoccāro nirarthakaḥ [ ] uktaṃ dūṣayatāvaśyaṃ darśanīyo tra gocaraḥ anyathā dūṣaṇāvṛtteḥ sarvoccāras tu nety api [ ] kasyacid vacanaṃ neṣṭanigrahasthānasādhanaṃ tasyāpratibhayaivoktair uttarāpratipattitaḥ [ ] pratyuccārāsamarthatvaṃ kathyate 'nanubhāṣaṇaṃ tasminn uccārite py anyapakṣavikṣiptyavedanam [ ] khyāpyate pratibhānyasyety etayor naikatāsthitiḥ sākṣāt saṃlakṣyate lokaiḥ kīrter anyatra durgateḥ [ ] ajñānaṃ ca kilājñānaṃ vijñātasyāpi saṃsadā parasya nigrahasthānaṃ tatsamānaṃ pratīyate [ ] sarveṣu hi pratijñānahānyādiṣu na vādinoḥ ajñānād aparaṃ kiṃcin nigrahasthānam āṃjasam [ ] teṣām etatprabhedatve bahunigrahaṇaṃ na kim arthājñānādibhedānāṃ bahu vātrāvadhāraṇāt [ ] uttarāpratipattir yā parair apratibhāsatā sāpy etena prativyūḍhā bhedenājñānataḥ sphuṭam [ ] yaḥ punar nigrahaprāpte py anigraha upeyate kasyacit paryanuyojyopekṣaṇaṃ tad api kṛtam [ ] svayaṃ pratibhayā hi cet tadaṃtarbhāvanirṇayaḥ sabhyair udbhāvanīyatvāt tasya bhedo mahānaho [ ] vāde py udbhāvayan naitan na hi kenāpi dhāryate svaṃ kaupīnaṃ na kopīha vivṛṇotīti cākulam [ ] uttarāpratipattir hi parasyodbhāvayansvayaṃ sādhanasya sadoṣatvam āvirbhāvayati dhruvam [ ] saṃbhavaty uttaraṃ yatra tatra tasyānudīraṇam yuktaṃ nigrahaṇaṃ nānyatheti nānyavidāṃ matam [ ] nirdeṣasādhanoktau tu tūṣṇīṃbhāvād vinigrahaḥ pralāpamātrato veti pakṣasiddheḥ sa āgataḥ [ ] svapakṣe doṣam upayan parapakṣe prasaṃjayan matānujñām avāpnoti nigṛhītiṃ na yuktitaḥ [ ] dvayor evaṃ sadoṣatvaṃ tāttvikaiḥ sthāpyate yataḥ pakṣasiddhinirodhasya samānatvena nirṇayāt [ ] anaikāṃtikataivaivaṃ samudbhāvyeti kecana hetor avacane tac ca nopapattimad īkṣyate [ ] tathottarāpratītiḥ syād ity apy āgrahamātrakaṃ sarvasyājñānamātratvāpatter doṣasya vādinoḥ [ ] saṃkṣepato nyathā kvāyaṃ niyamaḥ sarvavādinām hetvābhāsottarāvittī kīrteḥ syātāṃ yataḥ sthiteḥ [ ] nanu cājñānamātre pi nigraheti prasajyate sarvajñānasya sarveṣāṃ sādṛśyānām asaṃbhavāt [ ] satyam etadabhipretavastusiddhaprayoginoḥ jñānasya yadi nābhāvo doṣo nyasyārthasādhane [ ] satsv apakṣaprasiddhaiva nigrāhyo nya iti sthitam samāsato navadyatvād anyathā tadayogataḥ [ ] taskaratvaṃ naratvāder iti hetur yadocyate tadānaikāṃtikatvoktitvam apīti na vāryate [ ] vācoyuktiprakārāṇāṃ loke vaicitryadarśanāt nopālaṃbhas tathoktau syād vipakṣe hetudarśanam [ ] doṣahetum abhigamya svapakṣe parapakṣatām doṣam udbhāvya paścāttve svapakṣaṃ sādhayej jayī [ ] yadā tv anigrahasthāne nigrahasthānam ucyate tadā niranuyojyānuyogākhyo nigraho mataḥ [ ] so py apratibhayoktaḥ syād evam uttaravikṛteḥ tatprakārapṛthagbhāve kim etaiḥ svalpabhāṣitaiḥ [ ] sabhāṃ prāptasya tasya syātkāryavyāsaṃgataḥ kathā vicchedas tasya nirdiṣṭo vikṣepo nāma nigrahaḥ [ ] so pi nāpratibhāto sti bhinnaḥ kaścana pūrvavat tad evaṃ bhedataḥ sūtraṃ nākṣapādasya kīrtikṛt [ ] svayaṃ niyatasiddhāṃto niyamena vinā yadā kathāṃ prasaṃjayet tasyāpasiddhāṃtas tathoditaḥ [ ] so py ayuktaḥ svapakṣasyāsādhane nena tattvataḥ asādhanāṃgavacanād doṣodbhāvanamātravat [ ] tatrābhyupetya śabdādīn nityān eva punaḥ svayam tān anityān bruvāṇasya pūrvasiddhāṃtabādhanam [ ] tathaiva śūnyam āsthāya tasya saṃvidamātrataḥ pūrvasyottarato bādhā siddhāṃtasyānyathā kva tat [ ] pradhānaṃ caivam āsṛtya tadvikāraprarūpaṇam tādṛg evānyathā hetus tatra na syāt samanvayaḥ [ ] brahmādyādvaitam apy evam upetyāgamavarṇanaṃ kurvannāmnāyanirdiṣṭaṃ bādhyo nyo py anayā diśā [ ] svayaṃ pravartamānāc ca sarvathaikāṃtavādinaḥ anekāṃtāvinābhūtavyahāreṣu tādṛśāḥ [ ] hetvābhāsāś ca yogoktāḥ paṃca pūrvam udāhṛtāḥ saptadhānyauḥ samākhyātāṃ nigrahādhikatāṃ gataiḥ [ ] hetvābhāsatrayaṃ te pi samarthaṃ nātivartituṃ anyathānupapannatvavaikalyaṃ tac ca naikakam [ ] yathaikalakṣaṇo hetuḥ samarthaḥ sādhyasādhane tathā tadvikalāśakto hetvābhāso numanyatām [ ] yo hy asiddhatayā sādhyaṃ vyabhicāritayāpi vā viruddhatvena vā hetuḥ sādhayen na sa tannibhaḥ [ ] yo rthāropopapattyā syād vidhāto vacanasya tat chalaṃ sāmānyataḥ śakyaṃ nodāhartuṃ kathaṃcana [ ] vibhāgenoditasyāsyodāhṛtiḥ sa tridhā mataḥ vāksāmānyopacāreṣu chalānām upavarṇanāt [ ] tatrāviśeṣadiṣṭe rthe vaktur ākūtato nyathā kalpanārthāṃtarasyeṣṭaṃ vākchalaṃ chalavādibhiḥ [ ] ādyau vai devadatto yaṃ vartate navakaṃbalaḥ ity ukte pratyavasthānaṃ kuto sya nava kaṃbalāḥ [ ] yasmād dārḍhyatvasaṃsiddhir bhaved iti yadā paraḥ pratibrūyāt tadā vāci chalaṃ tenopapāditam [ ] navakaṃbalaśabde hi vṛttyā prokte viśeṣataḥ navo 'sya kaṃbalo jīrṇo naivety ākūtam āṃjasam [ ] vaktuḥ saṃbhāvyate tasmād anyasyārthasya kalpanā navāsya kaṃbalā nāṣṭāv ity asyāsaṃbhavātmanaḥ [ ] pratyavasthātur anyāyavāditām ānayed bhuvaṃ saṃtastattvaparīkṣāyāṃ kathaṃ syuś chalavādinaḥ [ ] etenāpi nigṛhyeta jigīṣur yadi dhīdhanaiḥ yatra vākyaṃ tadanyārthaṃ vyācakṣāṇo nigṛhyatām [ ] tatra svayam abhipretam arthaṃ sthāpayituṃ na yaiḥ yo 'sāmarthyo 'paraiḥ śaktaiḥ svābhipretārthasādhane [ ] yo rthasaṃbhavann arthaḥ pramāṇair upapadyate vākye sa eva yukto stu nāparo tiprasaṃgataḥ [ ] yatra pakṣe vivādena pravṛttir vādinor abhūt tatsiddhyaivāsya dhikkāro nyasya patre sthitena cet [ ] kvaivaṃ parājayaḥ siddhe chalamātreṇa te mate saṃdhāhānyādidoṣaiś ca dātrādātroḥ sapatrakam [ ] yatra saṃbhavato rthasya na sāmānyasya yogataḥ asadbhūtapadārthasya kalpanā kriyate balāt [ ] tatsāmānyachalaṃ prāhuḥ sāmānyavinibaṃdhanaṃ vidyācaraṇasaṃpattir brāhmaṇe saṃbhaved iti [ ] kenāpy ukte yathaivaṃ sā vrātye pi brāhmaṇena kim brāhmaṇatvasya sadbhāvād bhaved ity api bhāṣaṇam [ ] tad etan na chalaṃ yuktaṃ sapakṣetaradarśanāt talliṃgasyānyathā tasya vyabhicāro khilo stu tat [ ] kvacid eti tathātyeti vidyācaraṇasaṃpadaṃ brāhmaṇatvam iti khyātam iti sāmānyam atra cet [ ] tathaivāsparśavattvādi śabdaṃ nityatvasādhane kiṃ na syād iti sāmānyaṃ sarvathāpy aviśeṣaḥ [ ] tan na tasyeti nityatvam asyeti ca sukhādivat tenānaikāṃtikaṃ yuktaṃ sapakṣetaravṛttitaḥ [ ] vidyācaraṇasaṃpattir viṣayasya praśaṃsanaṃ brāhmaṇasya yathā śāligocarakṣetravarṇanam [ ] yasyeṣṭaṃ prakṛte vākye tasya brāhmaṇadharmiṇi praśastatve svayaṃ sādhye brāhmaṇatvena hetunā [ ] kenānaikāṃtiko hetur udbhāvyo na prasahyate kṣetre kṣetratvavacchāliyogyatvasya prasādhane [ ] dharmādhyāropanirdeśe satyārthapratiṣedhanam upacārachalaṃ maṃcāḥ krośaṃtītyādigocaram [ ] maṃcāḥ krośaṃti gāyaṃtītyādiśabdaprayojanam āropya sthānināṃ dharmaṃ sthāneṣu kriyate janaiḥ [ ] gauṇaṃ śabdārtham āsṛtya sāmānyādiṣu sattvavat tatra mukhyābhidhānārthe pratiṣedhaś chalaṃ sthitam [ ] na cedaṃ vākchalaṃ yuktaṃ kiṃcit sādharmyamātrataḥ svarūpabhedasaṃsiddher anyathātiprasaṃgataḥ [ ] kalpanārthāṃtarasyoktā vākchalasya hi lakṣaṇaṃ sadbhūtārthaniṣedhastūpacārachalalakṣaṇam [ ] tad etasmin prayukte syān nigraho yadi kasyacit tadā yogo nigṛhyeta pratiṣedhāt pramādikam [ ] mukhyarūpatayā śūnyavādinaṃ prati sarvathā tena saṃvyavahāreṇa pramāder upavarṇanāt [ ] sarvathā śūnyatā vāde pramāṇāder virudhyate tato nāyaṃ satāṃ yukta ity aśūnyatvasādhanāt [ ] yogena nigrahaḥ prāpyaḥ svopacāracchale pi cet siddhaḥ svapakṣasiddhyaiva parasyāyam asaṃśayam [ ] svasādhyād avinābhāvalakṣaṇe sādhane sthite jananaṃ yat prasaṃgasya sā jātiḥ kaiścid īritā [ ] prasaṃgaḥ pratyavasthānaṃ sādharmyeṇetareṇa vā vaidharmyokte 'nyathokte ca sādhane syād yathākramam [ ] udāharaṇasādharmyāt sādhyasyārthasya sādhanaṃ hetus tasmin prayukte nyo yadā pratyavatiṣṭhate [ ] udāharaṇavaidharmyāt tatra vyāptim akhaṃḍayat tadāsau jātivādī syād dūṣaṇābhāsavāk tataḥ [ ] yathodāhṛtivaidharmyāt sādhyasyārthasya sādhanaṃ hetus tasmin prayukte pi parasya pratyavasthitiḥ [ ] sādharmyeṇeha dṛṣṭāṃte dūṣaṇābhāsavādinaḥ jāyamānā bhavej jātir ity anvarthe pravakṣyate [ ] sarvasattvavidharmatvapratyavasthāvikalpataḥ kalpyaṃ jātibahutvaṃ syād vyāsato 'naṃtaśaḥ satām [ ] yathā viparyayajñānājñānanigrahabhedataḥ bahutvaṃ nigrahasthānasyoktaṃ pūrvaṃ suvistaram [ ] tatra hy apratibhājñānānanubhāṣaṇaparyanu yojyopekṣaṇavikṣepā labhaṃte pratipattitām [ ] śeṣā vipratipattitvaṃ prāpnuvaṃti samāsataḥ tadvibhinnasvabhāvasya nigrahasthānam īkṣaṇāt [ ] prayukte sthāpanāhetau jātayaḥ pratiṣedhikāḥ caturviṃśatir atroktās tāḥ sādharmyasamādayaḥ [ ] yatrāviśiṣyamāṇena hetunā pratyavasthitiḥ sādharmyeṇa samā jātiḥ sā sādharmyasamā matā [ ] nirvaktavyās tathā śeṣās tā vaidharmyasamādayaḥ lakṣaṇaṃ punar etāsāṃ yathoktam abhibhāṣyate [ ] sādharmyeṇopasaṃhāre taddharmarūpa viparyayāt yas tatra dūṣaṇabhāsaḥ sa sādharmyasamo mataḥ [ ] yathā kriyābhṛdātmāyaṃ kriyāhetuguṇāśrayāt ya īdṛśaḥ sa īdṛkṣo yathā loṣṭhas tathā ca saḥ [ ] tasmāt kriyābhṛd ity evam upasaṃhārabhāṣaṇe kaścid āhākriyo jīvo vibhudravyatvato yathā [ ] vyoma tathā na vijñāto viśeṣasya prasādhakaḥ hetuḥ pakṣadvayo py asti tato yaṃ doṣasannibhaḥ [ ] sādhyasādhanayor vyāpter vicchedasyāsamarthanāt tatsamarthanataṃtrasya dveṣatvenopavarṇanāt [ ] tatraiva pratyavasthānaṃ vaidharmyeṇopadarśyate yaḥ kriyāvān sa dṛṣṭo tra kriyāhetuguṇāśrayaḥ [ ] yathā loṣṭho na vātmaivaṃ tasmān niṣkriya eva saḥ pūrvavaddūṣaṇābhāso vaidharmyasama īkṣyatām [ ] vaidharmyeṇopasaṃhāre sādhyadharmaviparyayāt vaidharmyeṇetareṇāpi pratyavasthānam iṣyate [ ] yā vaidharmyasamā jātir idaṃ tasyā nidarśanam naro niṣkriya evāyaṃ vibhutvāt sakriyaḥ punaḥ [ ] vibhutvarahitaṃ dṛṣṭaṃ loṣṭhādi na tathā naraḥ tasmān niṣkriya ity ukte pratyavasthā vidhīyate [ ] vaidharmyeṇaiva sā tāvat kaiścin nigrahabhīrubhiḥ karmabaṃdhakriyāhetur guṇādīnāṃ samīkṣitaṃ [ ] naivamātmā tato nāyaṃ niṣkriyaḥ saṃpratīyate sādharmyeṇāpi tatraivaṃ pratyavasthānam ucyate [ ] kriyāvān eva loṣṭhādiḥ kriyāhetuguṇāśrayaḥ tṛṣṇātādṛktvajīvo pi tasmāt sakriya eva saḥ [ ] iti sādharmyavaidharmyasamayo dūṣaṇodbhavāt sadharmatvavidharmatvamātrāt sādhyāprasiddhitaḥ [ ] sādhyadṛṣṭāṃtayor dharmavikalpād dvayasādhyatā sadbhāvāc ca matā jātir utkarṣeṇāpakarṣataḥ [ ] varṇyāvarṇyavikalpaiś ca sādhyena ca samāḥ pṛthak tasyāḥ pratīyatām etallakṣaṇaṃ sannidarśanam [ ] dṛṣṭāṃtadharmaṃ sādhyārthe samāsaṃjayataḥ smṛtā tatrotkarṣasamā yadvatkriyāvajjīvasādhane [ ] kriyāhetuguṇāsaṃgī yady ātmā loṣṭhavat tadā tadvad eva bhaved eṣa sparśavān anyathā na saḥ [ ] sādhyadharmiṇi dharmasyābhāvaṃ dṛṣṭāṃtato vadan apakarṣasamāṃ vakti jātiṃ tatraiva sādhane [ ] loṣṭhaḥ kriyāśrayo dṛṣṭo vibhuḥ kāmaṃ tathāstu nā tadviparyayapakṣe vā vācyo hetur viśeṣakṛt [ ] khyāpanīyo mato varṇyaḥ syād avarṇyo viparyayāt tatsamā sādhyadṛṣṭāṃtadharmayor atra sādhane [ ] viparyāsanato jātir vijñeyā tadvilakṣaṇā bhinnalakṣaṇatāyogāt kathaṃcit pūrvajātivat [ ] sādhyadharmavikalpaṃ tu dharmāṃtaravikalpataḥ prasaṃjayata iṣyeta vikalpena samā budhaiḥ [ ] kriyāhetuguṇopetaṃ kiṃcid guru samīkṣyate paraṃ laghu yathā loṣṭho vāyuś ceti kriyāśrayaṃ [ ] kiṃcit tad eva yujyeta yathā loṣṭhādi niṣkriyaṃ kiṃcin na syād yathātmeti viśeṣo vā nivedatām [ ] hetvādikāṃgasāmarthyayogī dharmo vadhāryate sādhyas tam eva dṛṣṭāṃte prasaṃjayati yo naraḥ [ ] tasya sādhyasamā jātir udbhāvyā tattvavittakaiḥ yathā loṣṭhas tathā cātmā yathātmāyaṃ tathā na kim [ ] loṣṭhaḥ syāt sakriyaś cātmā sādhyo loṣṭho 'pi tādṛśaḥ sādhyo stu neti cel loṣṭho yathātmāpi tathā kathaṃ [ ] dūṣaṇābhāsatā tv atra dṛṣṭāṃtādisamarthanā yukte sādhanadharme pi pratiṣedham alabdhitaḥ [ ] sādhyadṛṣṭāṃtayor dharmavikalpād upavarṇitāt vaidharmyaṃ gavi sādṛśye gavayena yathā sthite [ ] sādhyātideśamātreṇa dṛṣṭāṃtasyopapattitaḥ sādhyatvāsaṃbhavāc coktaṃ dṛṣṭāṃtasya na dūṣaṇaṃ [ ] prāptyā yat pratyavasthānaṃ jātiḥ prāptisamaiva sā aprāptyā punar aprāptisamā satsādhaneraṇe [ ] yathāyaṃ sādhayed dhetuḥ sādhyaprāptyān yathāpi vā prāptyā ced yugapadbhāvāt sādhyasādhanadharmayoḥ [ ] prāptayoḥ katham ekasya hetutānyasya sādhyatā yukteti pratyavasthānaṃ prāptyā tāvad udāhṛtam [ ] aprāpya sādhayet sādhyaṃ hetuś cet sarvasādhanaḥ so stu dīpo hi nāprāptapadārthasya prakāśakaḥ [ ] ity aprāptyāvaboddhavyaṃ pratyavasthānidarśanam tāv etau dūṣaṇābhāsau niṣedhasyaivam anvayāt [ ] prāptasyāpi daṃḍādeḥ kuṃbhasādhakatekṣyate tathābhicāram aṃtrasya prāptasyāsātakāritā [ ] vaktavyaṃ sādhanasyāpi sādhanaṃ vādineti tu prasaṃgavacanaṃ jātiḥ prasaṃgasamatāṃ gatā [ ] kriyāhetuguṇopetaḥ kriyāvāṃlloṣṭha iṣyate kuto hetor vinā tena kasyacin na vyavasthitiḥ [ ] evaṃ hi pratyavasthānaṃ na yuktaṃ nyāyavādināṃ vādinor yatra vā sāmyaṃ tasya dṛṣṭāṃtatāsthitiḥ [ ] yathā rūpaṃ didṛkṣūṇāṃ dīpādīnāṃ pratīyate svayaṃ prakāśamānaṃ tu dīpaṃ dīpāṃtarāgrahāt [ ] tathā sādhyaprasiddhyarthaṃ dṛṣṭāṃtagrahaṇaṃ mataṃ prajñātātmani dṛṣṭāṃte tv aphalaṃ sādhanāṃtaram [ ] pratidṛṣṭāṃtarūpeṇa pratyavasthānam iṣyate pratidṛṣṭāṃtatulyeti jātis tatraiva sādhanā [ ] kriyāhetuguṇopetaṃ dṛṣṭam ākāśam akriyaṃ kriyāhetur guṇo vyomni saṃyogo vāyunā sa ca [ ] saṃskārāpekṣaṇo yadvatsaṃyogas tena pādape sa cāyaṃ dūṣaṇābhāsasādhanāpratibaṃdhakaḥ [ ] sādhakaḥ pratidṛṣṭāṃto dṛṣṭāṃto pi hi hetunā tena tadvacanābhāvāt sadṛṣṭāṃto stu hetukaḥ [ ] kāraṇābhāvataḥ pūrvam utpatteḥ pratyavasthitiḥ yānutpattyā parasyoktā sānutpattisamā bhavet [ ] śabdo vinaśvarāt saivam upapanno bhavatv ataḥ kadaṃbādivad ity ukte sādhane prāha kaścana [ ] prāgutpatter anutpanne śabde nityatvakāraṇaṃ prayatnānaṃtarotthatvaṃ nāstīty eṣo 'vinaśvaraḥ [ ] śāśvatasya ca śabdasya notpattiḥ syāt prayatnataḥ pratyavasthety anutpattyā jātir nyāyātilaṃghanāt [ ] utpannasyaiva śabdasya tathābhāvaprasiddhitaḥ prāgutpatter na śabdo stīty upālaṃbhaḥ kimāśrayaḥ [ ] sata eva tu śabdasya prayatnānaṃtarotthatā kāraṇaṃ naśvaratve sti tanniṣedhas tataḥ katham [ ] sāmānye ghaṭayos tulya aiṃdriyatve vyavasthite nityānityatvasādharmyāt saṃśayena samā matā [ ] tatraiva sādhane prokte saṃśayena svayaṃ paraḥ pratyavasthānam ādhatte paśyan sadbhūtadūṣaṇam [ ] prayatnānaṃtarotthe pi śabde sādharmyam aiṃdriye sāmānyenāsti nityena ghaṭena ca vināśinā [ ] tādṛśeneti saṃdeho nityānityatvadharmayoḥ sa cāyukto viśeṣeṇa śabdānityatvasiddhitaḥ [ ] yathā puṃsi vinirṇīte śiraḥsaṃyamanādinā puruṣasthāṇusādharmyād dharmatvān nāsti saṃśayaḥ [ ] tathā prayatnajatvenānitye śabde viniścite ghaṭasāmānyasādharmyād aiṃdriyatvān na saṃśayaḥ [ ] saṃdehety aṃtasaṃdehaḥ sādharmyasyāvināśataḥ puṃsitvādigatasyeti nirṇayaḥ kvāspadaṃ vrajet [ ] athānityena nityena sādharmyād ubhayena yā prakriyāyāḥ prasiddhiḥ syāt tataḥ prakaraṇe samā [ ] tatrānityena sādharmyān niḥprayatnodbhavatvataḥ śabdasyānityatāṃ kaścit sādhayed aparaḥ punaḥ [ ] tasya nityena gotvādisāmānyena hi nityatā tataḥ pakṣe vipakṣe ca samānā prakriyā sthitā [ ] prakriyāṃtanivṛttyā ca pratyavasthānam īdṛśaṃ vipakṣe prakriyāsiddhau na yuktaṃ tadvirodhataḥ [ ] pratipakṣopapattau hi pratiṣedho na yujyate pratiṣedhopapattau ca pratipakṣakṛtir dhruvam [ ] tattvāvadhāraṇe caitatsiddhaṃ prakaraṇaṃ bhavet tadabhāvena tatsiddhir yeneyaṃ pratyavasthitiḥ [ ] traikālyānupapattes tu hetoḥ sādhyārthasādhane syād ahetusamā jātiḥ prayukte sādhane kvacit [ ] pūrvaṃ vā sādhanaṃ sādhyād uttaraṃ vā sahāpi vā pūrvaṃ tāvad asaty arthe kasya sādhanam iṣyate [ ] paścāc cet kiṃ na tatsādhyaṃ sādhane 'sati kathyatāṃ yugapadvāci citsādhyasādhanatvaṃ na yujyate [ ] svataṃtrayos tathābhāvāsiddher vindhyahimādrivat tathā cāhetunā hetur na kathaṃcid viśiṣyate [ ] ity ahetusamatvena pratyavasthāpya yuktitā hetoḥ pratyakṣataḥ siddheḥ kārakasya ghaṭādiṣu [ ] kāryeṣu kuṃbhakārasya tannivṛttes tato grahāt jñāpakasya ca dhūmāder agryādau jñaptikāriṇaḥ [ ] svajñeye parasaṃtāne vāgāder api niścayāt traikālyānupapatteś ca pratiṣedhe kvacit tathā [ ] prayatnānaṃtarotthatvād dhetoḥ pakṣe prasādhite pratipakṣaprasiddhyartham arthāpattyā vidhīyate [ ] yā pratyavasthitiḥ sātra matā jātividāṃvaraiḥ arthāpattiḥ samaivoktā sādhanāprativedinī [ ] yadi prayatnajatvena śabdasyānityatābhavat tadārthāpattito nityasādharmyād astu nityatā [ ] yathaivāsparśanatvāder nitye dṛṣṭā tathā dhvanau ity atra vidyamānatvāt samādhānasya tattvataḥ [ ] śabdo nāstīti pakṣe hetor asaṃśayam eṣa nāstīti pakṣasya hānir arthāt pratīyate [ ] yayā ca pratyavasthānam arthāpattyā vidhīyate nānaikāṃtikatā dṛṣṭā samatvād ubhayor api [ ] grā dyanasya pātaḥ syād ity ukter thān na siddhyati dravyātmanāmasaṃpātābhāvo 'rthāpattito yathā [ ] tasyāḥ sādhyāvinābhāvaśūnyatvaṃ tadvad eva hi śabdānityatvasaṃsiddhau nārthānityatvasādhanaṃ [ ] kvacid ekasya dharmasya ghaṭanād urarīkṛte aviśeṣo tra sadbhāvāghaṭanāt sarvavastunaḥ [ ] aviśeṣaḥ prasaṃgaḥ syād aviśeṣasamā sphuṭaṃ jātir evaṃvidhaṃ nyāyaprāptadoṣāsamīkṣaṇāt [ ] prayatnānaṃtarīyatvadharmasyaikasya saṃbhavāt aviśeṣe hy anityatve siddhe pi ghaṭaśabdayoḥ [ ] na sarvasyāviśeṣaḥ syāt sattvadharmopapattitaḥ dharmāṃtarasya sadbhāvanimittasya nirīkṣaṇāt [ ] prayatnānaṃtarīyatve nimittasya ca darśanāt na samo yam upanyāsaḥ pratibhātīti mucyatām [ ] sarvārtheṣv aviśeṣasya prasaṃgāt pratyavasthitiḥ [ ] kāraṇaṃ yady anityatve prayatnotthatvam ity ayaṃ śabdo 'nityas tadā tasya nityatve 'sparśanāsti tat [ ] tato nityo py asāv astu na nityaḥ katham anyathā [ ] śabdānityatvasiddhiś copapatter avigānataḥ vyāghātas tu dvayos tulyaḥ sapakṣapratipakṣayoḥ [ ] sādhanād iti naivāsau tayor ekasya sādhakaḥ evaṃ hy eṣa na yukto tra pratiṣedhaḥ kathaṃ mayi [ ] sādhyadharmanimittasyābhāve py uktasya yat punaḥ sādhyadharmopalabdhyā syāt pratyavasthānamātrakam [ ] sopalabdhisamā jātir yathā śvāsādibhaṃgaje śabde sty anityatā yatnajatvābhāve py asāv iti [ ] kāraṇāṃtarato py atra sādhyadharmasya siddhitaḥ na yuktaḥ pratiṣedho 'yaṃ kāraṇāniyamoktitaḥ [ ] niṣedhyānupalabdheś cānupalabdheḥ prasādhane abhāvasya viparyāsād upapattiḥ prakīrtitā [ ] prastutārthavighātāyānupalabdhisamānaghaiḥ [ ] kaścid āvaraṇādīnām adṛṣṭer apy adṛṣṭitaḥ śivaṃ mā bhūt tataḥ śabde satye vā śravaṇāt tadā [ ] vṛtyā svabhāvasaṃsiddher abhāvād iti jalpati [ ] naivopalabdhyabhāvenābhāvo yasmāt prasiddhyati viparītopapattiś ca nāspadaṃ pratipadyate [ ] śabdasyāvaraṇādīni prāguccāraṇato na vai sarvatropalabhe haṃta ity ābālam anākulam [ ] tataś cāvaraṇādīnām adṛṣṭer apy adṛṣṭitaḥ siddhyaty abhāva ity eṣa nopālaṃbhaḥ pramānvitaḥ [ ] kṛtakatvādinā sāmyaṃ ghaṭena yadi sādhayet śabdasyānityatāṃ sarvaṃ vastu nityaṃ tadā na kim [ ] anityena ghaṭenāsya sādharmyaṃ gamayet svayaṃ sattvena sāmyamātrasya viśeṣāprativedanāt [ ] ity anityena yā nāma pratyavasthā vidhīyate sātrānityasamā jātir vijñeyā nyāyabādhanāt [ ] niṣedhasya tathoktasyāsiddhiprāpteḥ samatvataḥ pakṣeṇāsiddhim āptenety aśeṣam asamaṃjasaṃ [ ] pakṣasya hi niṣedhasya pratipakṣo bhilapyate niṣedho dhīdhanair atra tasyaiva vinivartakaḥ [ ] pratijñānādiyogas tu tayoḥ sādharmyam iṣyate sarvatrāsaṃbhavāt tena vinā pakṣavipakṣayoḥ [ ] tato siddhir yathā pakṣe vipakṣe pi tathāstu sā no ced anityatā śabde ghaṭavan nākhilārthagā [ ] dṛṣṭāṃte pi ca yo dharmaḥ sādhyasādhanabhāvataḥ prajñāyate sa evātra hetur ukto rthasādhanaḥ [ ] tasya kenacid arthena samānatvāt sadharmatā kenacit tu viśeṣāt syād vaidharmyam iti niścayaḥ [ ] hetur viśiṣṭasādharmyaṃ na tu sādharmyamātrakaṃ sādhyasādhanasāmarthyabhāgayaṃ na ca sarvagaḥ [ ] sattvena ca sadharmatvāt sarvasyānityateraṇe doṣaḥ pūrvodito vācyaḥ sāviśeṣaḥ samāśrayaḥ [ ] anityaḥ śabda ity ukte nityatvapratyavasthitiḥ jātir nityasamā vaktur ajñānāt saṃpravartate [ ] śabdāśrayam anityatvaṃ nityaṃ vānityam eva vā nitye śabdo pi nityaṃ syāt tadādhāro 'nyathā kva tat [ ] tatrānitye py ayaṃ doṣaḥ syād anityatvavicyutau nityaṃ śabdasya sadbhāvād ity etad dhi na saṃgatam [ ] anityatvapratijñāne tanniṣedhavirodhataḥ svayaṃ tadapratijñāne py eṣa tasya nirāśrayaḥ [ ] sarvadā kim anityatvam iti praśno py asaṃbhavī prādurbhūtasya bhāvasya nirodhiś ca tad iṣyate [ ] nāśrayāśrayibhāvo pi vyāghātād anayoḥ sadā nityānityatvayor ekavastunīṣṭau virodhataḥ [ ] tato nānityatā śabde nityatvapratyavasthitiḥ paraiḥ śakyā nirākartuṃ vācālair jayalolupaiḥ [ ] prayatnānekakāryatvāj jātiḥ kāryasamoditā triprayatnodbhavatvena śabdānityatvasādhane [ ] prayatnānaṃtaraṃ tāvad ātmalābhaḥ samīkṣitaḥ kuṃbhādīnāṃ tathāvyaktir vyavadhāne py apohanāt [ ] tadbuddhilakṣaṇāt pūrvaṃ satām evety anityatā prayatnānaṃtaraṃ bhāvān na śabdasyāviśeṣataḥ [ ] tatrottaram idaṃ śabdaḥ prayatnānaṃtarodbhavaḥ prāgadṛṣṭinimittasyābhāve py anupalabdhitaḥ [ ] satyābhāvād abhūtvāsya bhāvo janmaiva gamyate nābhivyaktiḥ sataḥ pūrvaṃ vyavadhānāvyapohanāt [ ] anaikāṃtikatā hetor evaṃ ced upapadyate pratiṣedhe pi sā tulyā tato 'sādhaka eva saḥ [ ] vidhāv iva niṣedhe pi samā hi vyabhicāritā viśeṣasyoktitaś cāyaṃ hetor doṣo nivāritaḥ [ ] evaṃ bhedena nirdiṣṭā jñātayo diṣṭa ye caturviṃśatir anyānaṃtā bodhyās tathā budhaiḥ [ ] naitābhirnigraho vāde satyasādhanavādinaḥ sādhanābhaṃ bruvāṇas tu tata eva nigṛhyate [ ] nigrahāya prakalpyaṃte tv etā jalpavitaṃḍayoḥ jigīṣayā pravṛttānām iti yaugāḥ pracakṣate [ ] tatredaṃ durghaṭaṃ tāvajjāteḥ sāmānyalakṣaṇaṃ sādharmyeṇetareṇāpi pratyavasthānam īritam [ ] sādhanābhaprayoge pi tajjātitvaprasaṃgataḥ dūṣaṇābhāsarūpasya jātitvena prakīrtane [ ] astu mithyottaraṃ jātir akalaṃkoktalakṣaṇā [ ] bhinnācāratayā tābhyāṃ doṣābhyāṃ saṃśayena ca apratītyā tayā bhāvenānyathā vā yathecchayā [ ] vastutas tādṛśair doṣaiḥ sādhanāpratighātataḥ siddhaṃ mithyottaratvaṃ no niravadyaṃ hi lakṣaṇam [ ] paroktaṃ punar avyāptiprokteṣv eteṣv asaṃbhavāt tato na nigrahasthānaṃ yuktam etad iti sthitam [ ] tathā ca tāttviko vādaḥ sveṣṭasiddhyavasānabhāk pakṣe patatvayuktyaiva niyamānupapattitaḥ [ ] yas tūktaḥ prātibho vādaḥ saṃprātibhaparīkṣaṇaḥ nigrahas tatra vijñeyaḥ svapratijñāvyatikramaḥ [ ] yathā padyaṃ mayā vācyam āgrastutaviniścayāt sālaṃkāraṃ tathā gadyam askhaladrūpam ity api [ ] paṃcāvayavavākyaṃ vā trirūpaṃ vānyathāpi vā nirdoṣam iti vā saṃdhāsthalabhedaṃ tam ūhyate [ ] tathā saṃgarahānyādinigrahasthānato py asau chaloktyā jātivācyatvāt tathā saṃdhāvyatikramāt [ ] yathā dyūtaviśeṣādau svapratijñākṣater jayaḥ loke tathaiva śāstreṣu vāde prātibhagocare [ ] dviprakāraṃ tato jalpāt tattvaprātibhagocarāt nānyabhedapratiṣṭhānaṃ prakriyāmātraghoṣaṇāt [ ] so 'yaṃ jigīṣubodhāya vādanyāyaḥ satāṃ mataṃ prakartavyo bruvāṇena nayavākyair yathoditaiḥ [ ] samuddiṣṭo mārgas trivapur abhavatvasya niyamād vinirdiṣṭā dṛṣṭir nikhilavidhinā jñānam amalam pramāṇaṃ saṃkṣepād vividhanayasaṃpac ca muninā sugṛhyādye 'dhyāye 'dhigamanapathaḥ svānyaviṣayaḥ [ ] prathamo 'dhyāyaḥ samāptaḥ atha dvitīyo 'dhyāyaḥ samyagdṛggocaro jīvas tasyaupaśamikādayaḥ svaṃ tattvaṃ paṃca bhāvāḥ syuḥ saptasūtryā nirūpitāḥ [ ] anudbhūtasvasāmarthyaṃ vṛttitopaśamo mataḥ karmaṇāṃ puṃsi toyādāv adhaḥprāpitapaṅkavat [ ] teṣām ātyaṃtikī hāniḥ kṣayas tadubhayātmakaḥ kṣayopaśama udgītaḥ kṣīṇākṣīṇabalatvataḥ [ ] udayaḥ phalakāritvaṃ dravyādipratyayadvayāt dravyātmalābhahetuḥ syāt pariṇāmo napekṣiṇaḥ [ ] etatprayojanā bhāvāḥ sarvaupaśamikādayaḥ ity aupaśamikādīnāṃ śabdānām upavarṇitā [ ] niruktir arthasāmarthyād jñātum avyabhicāriṇī tato nyatrāpravṛttatvāt jñānacāritraśabdavat [ ] prāgaupaśamikasyoktir bhavyasyānādisaṃsṛtau vartamānasya samyaktvagrahaṇe tasya saṃbhavāt [ ] stokatvāt sarvabhāvebhyaḥ stokakālatvato pi vā śeṣebhyaḥ kṣāyikādibhyaḥ kathaṃcit tad virudhyate [ ] tatas tu kṣāyikasyoktir asaṃkhyeyaguṇatvataḥ bhavyajīvasvabhāvatvakhyāpanārthatvato pi ca [ ] kṣāyopaśamikasyāto yā saṃkhyeyaguṇatvataḥ yuktāsti taddvayātmatvād bhavyetarasamatvataḥ [ ] uktir audayikasyātas tena jīvāv abodhataḥ pāriṇāmikabhāvasya tato ṃte sarvanṛsthiteḥ [ ] na caiṣāṃ dvandvanirdeśaḥ sarveṣāṃ sūriṇā kṛtaḥ kṣāyopaśamikasyaiva miśrasya pratipattaye [ ] nānarthakaś caśabdau tau madhye sūtrasya lakṣyate nāpy aṃte dvyādisaṃyogajanmabhāvopasaṃgrahāt [ ] kṣāyopaśamikaṃ cāṃte noktaṃ madhye tra yujyate graṃthasya gauravābhāvād anyathā tatprasaṃgataḥ [ ] niravadyamataḥ sūtraṃ bhāvapaṃcakalakṣaṇam prakhyāpayati niḥśeṣadurārekāvivekataḥ [ ] dvyādīnāṃ bhedaśabdena vṛttir anyapadārthikā dvaṃdvabhājāṃ bhaved atra svābhipretārthasiddhitaḥ [ ] pratyekaṃ bhedaśabdasya samāptir bhujivanmatā yathākramam iti khyāte py akramasya nirākriyā [ ] puṃsi samyaktvacāritramohasyopaśamaḥ kvacit śāṃtaprasattisaṃsiddher yathā paṃkasya vāriṇi [ ] yau yat kāluṣyahetuḥ syāt sa kutaścit praśāmyati tatra toye yathā paṃkaḥ katakādinimittataḥ [ ] na cābhavyādikāluṣyahetunā vyabhicāritā kutaścit kāraṇāt tasya praśamaḥ sādhyate yataḥ [ ] na ca tatpraśame kiṃcid abhavyasyāsti kāraṇaṃ tadbhāve tasya bhavyatvaprasaṃgād avipakṣatā [ ] svayaṃ saṃvidyamānā vā samyaktvādiprasannatā siddhātra sādhayaty eva tanmohasyopaśāṃtatām [ ] ātyaṃtikaḥ kṣayo jñānadarśanāvaraṇasya ca sāṃtarāyaprapaṃcasyānaṃtaśuddhiprasiddhitaḥ [ ] śuddhiḥ prakarṣam āyāti paramaṃ kvacid ātmani prakṛṣyamāṇavṛddhitvāt kanakādiviśuddhivat [ ] śuddhir jñānādikasyātra jīvasyāsty atiśāyinī bhavyasya bādhakābhāvād ity asiddhātra sādhanā [ ] nānaikāṃtikam apy etat tad astu dvyā vibhāvyate tasyā api kvacit siddheḥ prakarṣasya parasya ca [ ] prāksādhitātra sarvajñajñānavṛddhiḥ pramāṇataḥ darśanasya viśuddhir vā tata evāvinābhuvaḥ [ ] kṣīṇākṣīṇātmanāṃ ghātikarmaṇām avasīyate śuddhāśuddhātmatāsiddhir anyathānupapattitaḥ [ ] tato matyādivijñānacatuṣṭayam iha smṛtaṃ śuddhāśuddhātmakaṃ liṃgaṃ tadāvaraṇakarmaṇām [ ] kṣayopaśamasadbhāve matyajñānādi ca trayaṃ darśanatritayaṃ cāpi nijāvaraṇakarmaṇāṃ [ ] labdhayaḥ paṃca tādṛśyaḥ svāṃtarāyasya karmaṇaḥ samyaktvaṃ dṛṣṭimohasya vṛttaṃ vṛttam uhas tathā [ ] saṃyamāsaṃyamo pīti ghātikṣīṇopaśāṃtatā siddhā tadbhavabhāvānāṃ tathā bhāvaṃ prasādhayet [ ] anyathābhāvahetūnāṃ keṣāṃcid udayaḥ sthitaḥ kāluṣyavittitas tadvadgatināmādayas tu te [ ] gatināmodayād eva gatir audayikī matā tadviśeṣodayāt saiva caturdhā tu viśiṣyate [ ] tayopalakṣitāghātikarmodayanibaṃdhanaṃ sukhādyaudayikaṃ sarvam etenaivopavarṇitam [ ] tathā krodhādibhedasya kaṣāyasyodayān nṛṇām caturbhedaḥ kaṣāyaḥ syād anyathābhāvasādhanaḥ [ ] liṃgaṃ vedodayāt tredhā hāsyādyudayato pi ca hāsyādis tena jīvasya muninā prativarṇitaḥ [ ] dṛṣṭimohodayāt puṃso mithyādarśanam iṣyate dṛgāvaraṇasāmānyodayāc cādarśanaṃ tathā [ ] sāsādanaṃ ca samyaktvaṃ yadānaṃtānubaṃdhinaḥ kaṣāyasyodayāj jātaṃ tad apy etena varṇitam [ ] samyagmithyātvam ekeṣāṃ tatkarmodayajanmakaṃ matam audayikaṃ kaiścit kṣāyopaśamikaṃ smṛtam [ ] jñānāvaraṇasāmānyasyodayād upavarṇitaṃ jīvasyājñānasāmānyam anyathānupapattitaḥ [ ] vṛttimohodayāt puṃso 'saṃyatatvaṃ pracakṣyate karmamātrodayād evāsiddhatvaṃ praṇigamyate [ ] kaṣāyodayato yogapravṛttir upadarśitā leśyā jīvasya kṛṣṇādiḥ paḍbhedā bhāvato nadhaiḥ [ ] anādipariṇāmo sti tatropādhiparāṅmukhaḥ sopādhipariṇāmānām anyathātattvahānitaḥ [ ] etatsamudbhavā bhāvā dvyādibhedā yathākramam jīvasyaivopapadyaṃte citsvabhāvasamanvayāt [ ] kṣāyikā nava bhāvāḥ syuḥ puruṣasyaiva tattvataḥ kṣāyikatvād yathā tasya siddhatvam iti niścayaḥ [ ] kṛtsnakarmakṣayāt tāvat siddhatvaṃ kṣāyikaṃ mataṃ sarveṣām ātmarūpaṃ cety aprasiddhaṃ na sādhanam [ ] dvāv aupaśamikau bhāvau jīvasya bhavato dhruvaṃ mokṣahetutvataḥ karmakṣayajanmadṛgādivat [ ] kṣāyopaśamikā dṛṣṭijñānacāritralakṣaṇāḥ bhāvāḥ puṃso 'ta eva syur anyathānupapattitaḥ [ ] pradhānādyātmakā hy eṣā samyagdṛṣṭyādibhāvanā na puṃso mokṣahetuḥ syāt sarvathātiprasaṃgataḥ [ ] kṣāyopaśamikāḥ śeṣā bhāvāḥ puṃvanmatā bhṛtaḥ kṣāyopaśamikatvāt syuḥ samyagdṛgbodhavṛttavat [ ] jīvasyaudayikāḥ sarve bhāvā gatyādayaḥ smṛtāḥ jīve saty eva sadbhāvād asaty anupapattitaḥ [ ] karmodaye ca tasyaiva tathā pariṇamatvataḥ teṣāṃ tatpariṇāmatvaṃ kathaṃcin na virudhyate [ ] bhavyābhavyatvayor jīvasvabhāvatvaṃ vibhāvyate pāriṇāmikatāyogāc cetanatvavivartavat [ ] cetanatvasvabhāvatvam ātmano 'siddham ity asat svopayogasvabhāvatvasiddheḥ prāgabhidhānataḥ [ ] nanv aupaśamikādīnāṃ tyāgaś cen nirvṛtātmanaḥ niḥsvabhāvatvam āsaktaṃ nairātmyaṃ sarvathā tataḥ [ ] tadatyāge tu mokṣasyābhāvaḥ syād ātmanaḥ sadā tato na tatsvabhāvatvaṃ jīvasyety apare viduḥ [ ] tadasaṃgatam ādeśavacanād eva dehinaḥ teṣāṃ tadrūpatābhīṣṭer atyāgāc ca kathaṃcana [ ] citsvabhāvatayā tāvan naiṣāṃ tyāgaḥ kathaṃcana kṣāyopaśamikatvopaśamikatvena tatkṣaye [ ] teṣām audayikatvena naiva syān niḥsvabhāvatā mokṣābhāvo 'pi cāpuṃsaḥ kṣāyikādyavināśataḥ [ ] na caupaśamikādīnāṃ nāśāj jīvāsvabhāvatā pratikṣaṇavivartānāṃ tatsvabhāvatvahānitaḥ [ ] kūṭasthātmakatāpatteḥ sarvathārthakriyākṣateḥ vastutvahānito jīvatattvābhāvaprasaṃgataḥ [ ] tathā ca nāśino bhāvāḥ svabhāvā nātmanas tathā anātmano 'pi te na syur iti tadvastutā kutaḥ [ ] evaṃ niḥśeṣatattvānām abhāvaḥ kena vāryate nāstibhāvasvabhāvatvābhāvaḥ sādhanavādinām [ ] tataḥ syādvādināṃ siddhaḥ śāśvato 'śāśvato 'pi ca svabhāvaḥ sarvavastūnām iti nustatsvabhāvatā [ ] tatra kṣayodbhavo bhāvaḥ kṣayopaśamajaś ca yaḥ tadvyaktivyāpi sāmānyam upayogo sya lakṣaṇaṃ [ ] sa dvividho ṣṭacaturbhedaḥ ity ukteḥ sūriṇā svayam śeṣabhāvatrayātmatvasyaitallakṣyatvasiddhitaḥ [ ] evaṃ sūtradvayenoktaṃ lakṣaṇaṃ lakṣayen naraṃ kāyād bhedena saṃśleṣam āpannād api tattvataḥ [ ] lakṣyāḥ saṃsāriṇo jīvā muktāś ca bahavo nyathā tadekatvapravādaḥ syāt sa ca dṛṣṭeṣṭabādhitaḥ [ ] samanaskāmanaskās te matāḥ saṃsāriṇo dvidhā tadvedanasya kāryasya siddher iṣṭaviśeṣataḥ [ ] trasās te sthāvarāś cāpi tadanyataranihnave jīvatattvaprabhedānāṃ vyavasthānāprasiddhitaḥ [ ] jīvāḥ pṛthvīmukhās tatra sthāvarāḥ paramāgamāt sunirbādhāt praboddhavyā yuktyā ekeṃdriyā hi te [ ] trasāḥ punaḥ samākhyātāḥ prasiddhā dvīṃdriyādayaḥ ity evaṃ paṃcabhiḥ sūtraiḥ sarvasaṃsārisaṃgraha [ ] paṃceṃdriyāṇi jīvasya manaso niṃdriyatvataḥ buddhyahaṃkārayor ātmarūpayos tatphalatvataḥ [ ] vāgādīnām ato bhedāsiddher dhīsādhanatvataḥ sparśādijñānakāryāṇām evaṃvidhavinirṇayāt [ ] dvividhāny eva nirvṛttisvabhāvāny anuminvate siddhopakaraṇātmāni taccyutau tadvidacyuteḥ [ ] bhāveṃdriyāṇi labdhyātmopayogātmāni jānate svārthasaṃvidi yogyatvād vyāpṛtatvāc ca saṃvidaḥ [ ] sparśanādīni tāny āhuḥ kartuḥ sāṃnidhyavṛttitaḥ kriyāyāṃ karaṇānīha karmavaicitryatas tathā [ ] itīṃdriyāṇi bhedena vyākhyātāni matāṃtaraṃ vyavacicchitsubhiḥ paṃcasūtryā yuktyāgamānvitaiḥ [ ] sparśādayas tadarthāḥ syur dravyaparyāyatārhataḥ dravyaikāṃte kriyāyāḥ syāt sarvathā kūrmaromavat [ ] tathaiva paryayaikāṃte bhedaikāṃte 'nayor api anekāṃtātmanā teṣāṃ nirbādham upalabdhitaḥ [ ] sāmarthyād gamyamānasyāniṃdriyasyeha sūtritaḥ śrutam arthaḥ śrutajñānagamyaṃ vastu tad ucyate [ ] manomātranimittatvāt śrutajñānasya kārtsnyataḥ sparśanādīṃdriyajñeyas tadartho hi niyamyate [ ] iti sūtradvayenākṣamanorthānāṃ prarūpaṇaṃ kṛtaṃ tajjanmavijñānanirālaṃbanatāchide [ ] vanaspatyaṃtajīvānām ekaṃ sparśanam iṃdriyaṃ tajjajñānanimittāyāḥ pravṛtter upalaṃbhanāt [ ] tathā kṛmiprakārāṇāṃ rasanenādhikaṃ mataṃ vṛddhe pipīlikādīnāṃ te ghrāṇena nirūpyate [ ] cakṣuṣā tāni vṛddhāni bhramarādiśarīriṇāṃ śrotreṇānu manuṣyādijīvānāṃ tāni niścayāt [ ] tattaddhetukavijñānamūlānām upalabdhitaḥ viṣayeṣu pravṛttīnāṃ svasminn iva vipaścitām [ ] saṃjñināṃ samanaskatvaṃ saṃjñāyāḥ pratipattitaḥ sā hi śikṣākriyālāpagrahaṇaṃ munibhir matā [ ] nānādibhavasaṃbhūtaviṣayānubhavodbhavā sāmānyadhāraṇāhārasaṃjñādīnāmadhīr api [ ] kṣayopaśamabhedena yukto jīvo numanyate sadbhir bhāvamanas tāvat kaiścit saṃjñāviśeṣataḥ [ ] tatsaddravyamanoyuktam ātmanaḥ karaṇatvataḥ svārthopalaṃbhane bhāvasparśanādivad atra naḥ [ ] ātmapudgalaparyāyavyatiriktaṃ mano na tu dravyam asti parair uktaṃ pramāṇābhāvatas tathā [ ] iti sūtratrayeṇākṣamanasāṃ svāminiścayaḥ saṃjñyasaṃjñivibhāgaś ca sāmarthyād vihito ṃjasā [ ] iti svatattvādi viśeṣarūpato niveditaṃ tu vyavahārato nayāt tad eva sāmānyam avāṃtaroditāt svasaṃgrahāt taddvitayapramāṇataḥ [ ] gatau tu vigrahārthāyāṃ karmayogo mato nyathā tena saṃbaṃdhavaidhuryād vyomavannirvṛtātmavat [ ] gatimattvaṃ punas tasya kriyāhetuguṇatvataḥ loṣṭhavaddhetudharmo sti tatra kāryakriyekṣaṇāt [ ] sarvagatvād gatiḥ puṃsaḥ svavan nāstīti ye viduḥ teṣāṃ hetur asiddho sya kāyamātratvavedanāt [ ] vibhuḥ pumān amūrtatve sati nityatvataḥ svavat ityādi hetavo py evaṃ pratyakṣahatagocarāḥ [ ] hetur īśvarabodhena vyabhicārī ca kīrtitaḥ tasyāmūrtatvanityatvasiddher avibhutā matā [ ] anityo bhavabodhaś cen na syāt tasya pramāṇatā gṛhītagrahaṇān no cet smṛtyādeḥ śāstrabādhitā [ ] siddhā gatir anuśreṇi dehinaḥ paramāgamāt lokāṃtaraṃ pratijñeyaṃ pudgalasya ca nānyathā [ ] poḍhā prakramayukto yam ātmeti vacanaṃ pumān saṃpradāyāt sunirṇītāsaṃbhavadbādhakatvataḥ [ ] gatir muktasya jīvasyāvigrahā vakratāṃ prati nimittābhāvatas tasya svabhāvenordhvagatvataḥ [ ] saṃsāriṇaḥ punar vakrībhāvayuktā ca sā matā caturbhyaḥ samayebhyaḥ prāk paratas tadasaṃbhavāt [ ] niṣkuṭakṣetrasaṃsiddhes trivakragatisaṃbhavaḥ ekadvivakrayā gatyā kvacid utpattyayogataḥ [ ] yeṣāṃ ca caturasraḥ syāl loko vṛtto pi vā mataḥ niṣkuṭatvavinirmuktas teṣāṃ sā na trivakratā [ ] avigrahā gatis tatra proktaikasamayākhilā prāptiḥ samayamātreṇa lokāgrasya tanor api [ ] ekaṃ samayam ātmā dvau trīn vā nāhārayaty ayaṃ śarīratrayaparyāptiprāyogyān pudgalān idam [ ] caturthe samaye vaśyam āhārasya prasiddhitaḥ ṛjvām iva gatau prācye puṃsaḥ saṃsāracāriṇaḥ [ ] dvitīye pāṇimuktāyāṃ lāṃgalikā tṛtīyake yathā tadvattrivakrāyāṃ caturthe vigrahaḥ grahaḥ [ ] kṣaṇikaṃ niṣkriyaṃ cittaṃ svaśarīrapradeśataḥ bhinnaṃ cittāṃtaraṃ naiva prārabheta savigrahaṃ [ ] sarvakāraṇaśūnye hi deśe kāryasya janmani kāle vā na kvacij jñātum asya janma na siddhyati [ ] kūṭastho pi pumān naiva jahāti prācyavigrahaṃ na gṛhṇāty uttaraṃ kāyam anityatvaprasaṃgataḥ [ ] pariṇāmī yathā kālo gatimānāharatyataḥ svopāttakarmasṛṣṭeṣṭadeśādīn pudgalāntaraṃ [ ] iti vigrahasaṃprāptyai gatir jīvasya yujyate ṣaḍbhiḥ sūtraiḥ sunirṇītā nirbādhaṃ jainadarśane [ ] saṃmūrchanādayo janma puṃso bhedena saṃgrahāt sato pi janmabhedasya parasyāṃtargater iha [ ] tasyāpi yonayaḥ saṃti sacittādyā yathoditāḥ svāvāreṇa vinā janma kriyāyā jātvanīkṣaṇāt [ ] tadvaicitryaṃ punaḥ karmavaicitryāt tad vihanyate kāryavaicitryasiddhes tu karmavaicitryanirṇayaḥ [ ] yukto jarāyujādīnām eva garbho vadhāraṇāt devanārakaśeṣāṇāṃ garbhābhāvavibhāvanāt [ ] syād devanārakāṇām upapādo niyatas tathā tasyābhāvāt tato nyeṣāṃ teṣāṃ janmāṃtaracyuteḥ [ ] nirdiṣṭebhyas tu śeṣāṇāṃ yuktaṃ saṃmūrchanaṃ sadā garbhopapādayos tatra pratītyanupapattitaḥ [ ] tathā saṃsvedajādīnām api saṃmūrchanaṃ mataṃ janmeti nāparo janmaprakāro sūtrito sti naḥ [ ] ity evaṃ paṃcabhiḥ sūtraiḥ sūtritaṃ janma janmināṃ bhedaprabhedataś ciṃtyaṃ yuktyāgamasamāśrayaṃ [ ] svayonau janma jīvasya śarīrotpattir iṣyate tenātraudārikādīni śarīrāṇi pracakṣate [ ] siddham audārikaṃ tiryaṅmānuṣāṇām anekadhā śarīraṃ tatra tannāmakarmavaicitryato bṛhat [ ] saṃbhāvyāni tato nyāni bādhakābhāvanirṇayāt paramāgamasiddhāni yuktito pi ca kārmaṇaṃ [ ] kṣetrāvagāhanāpekṣāṃ kṛtvā sūkṣmaṃ paraṃ paraṃ taijasāt prāgasaṃkhyeyaguṇaṃ jñeyaṃ pradeśataḥ [ ] tathānaṃtaguṇe jñeye pare taijasakārmaṇe [ ] tasya kārpāsapiṃḍenānekāṃtāt triṣv ilātmanāṃ pradeśabahutātāratamyavatsthaulyabaṃdhane [ ] karmaiva kārmaṇaṃ tatra śarīraṃ nṛguṇatvataḥ ity asaddravyarūpeṇa tasya paudgalikatvataḥ [ ] karma pudgalaparyāyo jīvasya pratipadyate pārataṃtryanimittatvāt kārāgārādibaṃdhavat [ ] svapnopabhogasiddhyarthaṃ kāyaṃ svapnāṃtikaṃ tu ye prāhus teṣāṃ nivāryaṃte bhogyāḥ svapnāṃtikāḥ katham [ ] bhogyavāsanayā bhogyābhāsaṃ cet svapnavedināṃ śarīravāsanāmātrāc charīrābhāsanaṃ na kim [ ] svābhāvikaṃ punar gātraṃ śuddhaṃ jñānaṃ vadaṃti ye kutas teṣāṃ vibhāgaḥ syāt taccharīraśarīriṇoḥ [ ] kārmaṇāṃtargataṃ yuktaṃ śarīraṃ cātivāhikam nairmāṇikaṃ tu yat teṣāṃ tan no vaikriyikaṃ mataṃ [ ] pārthivādiśarīrāṇi ye to bhinnāni menire pratīter apalāpena manyatāṃ te khavārijam [ ] sarvasyānādisaṃbaṃdhe cokte taijasakārmaṇe śarīrāṃtarasaṃbaṃdhasyānyathānupapattitaḥ [ ] tadādīni śarīrāṇi bhājyāny ekatra dehini sakṛt saṃty ācaturbhyo na paṃcānāṃ tatra saṃbhavaḥ [ ] aṃtyaṃ nirupabhogatvāc cheṣebhyo bhidyate vapuḥ śabdādyanubhavo hy asmād upabhogo na jāyate [ ] ādyaṃ tu sopabhogābhyāṃ parābhyāṃ bhinnam ucyate garbhasaṃmūrchanād dhetor jāyamānatvato bhidā [ ] aupapādikatāsiddher bhinnam audārikād idaṃ tāvad vaikriyikaṃ devanārakāṇām udīritam [ ] kiṃcid audārikatve pi labdhipratyayatā gateḥ tataḥ pṛthak kathaṃcit syād etatkarmasamudbhavaṃ [ ] tathā taijasam apy atra labdhipratyayam īyatāṃ sādhāraṇaṃ tu sarveṣāṃ dehināṃ kāryabhedataḥ [ ] āhārakaṃ śarīraṃ tu śubhaṃ kāryakṛtatvataḥ viśuddhikāraṇatvāc ca viśuddhaṃ bhinnam anyataḥ [ ] avyāghātisvarūpatvāt pramattādhipatitvataḥ phalahetusvarūpādhipatibhedena niścitam [ ] caturdaśabhir ity evaṃ sūtrair uktaṃ prapaṃcataḥ śarīraṃ tīrthikopetaśarīravinivṛttaye [ ] nārakā dehinas tatra proktāḥ saṃmūrchinaś ca ye napuṃsakāni te nityaṃ na devā jātucit tathā [ ] strīpuṃsasukhasaṃprāptihetuhīnatvataḥ purā napuṃsakatvaduḥkhāptihetvabhāvād yathākramaṃ [ ] trivedāḥ prāṇinaḥ śepās tebhyas tādṛk suhetutaḥ iti sūtratrayeṇoktaṃ liṃgabhedena dehinām [ ] atraupapādikādīnāṃ nāpavartyaṃ kadācana somāttamāyurīdṛkṣādṛṣṭasāmarthyasaṃgateḥ [ ] sāmarthyatas tato nyeṣām apavartyaṃ viṣādibhiḥ siddhaṃ cikitsitādīnām anyathā niṣphalatvataḥ [ ] tadanyataradṛṣṭatvāc charīritvādihetubhiḥ sarveṣām apavartyaṃ tannāpavartyam itīrayan [ ] prabādhyate pramāṇena sveṣṭabhedāprasiddhitaḥ sarvajñādivirodhāc ca mānameyāvyavasthiteḥ [ ] iha sati bahiraṃge kāraṇe ke 'pi mṛtyor na mṛtim anubhavaṃti svāyuṣo hānyabhāve jvalitahutabhugaṃtaḥpātināṃ paṃcatāpi pratiniyatatanur no jīvitasyāpi dṛṣṭeḥ [ ]
oṃ tṛtīyo 'dhyāyaḥ [ ] ghanāṃbupavanākāśapratiṣṭhāḥ saptabhūmayaḥ ratnaprabhādayo 'dhodhaḥ saṃbhāvyā bādhakacyuteḥ [ ] svātmapratiṣṭham ākāśaṃ vibhudravyatvato nyathā ghaṭāder iva naivopapadyeta vibhutāsya sā [ ] tanuvātaḥ punar vyomapratiṣṭhaḥ pratipadyate tanuvātaviśeṣatvān meghadhāraṇavāyuvat [ ] taddhṛtaś cāṃbuvātaḥ syād dhanātmārthasya dhārakaḥ aṃbuvātatvato vārddher vīcīvāyuviśeṣavat [ ] ghanānilaṃ pratiṣṭhānahetuḥ kūrmaḥ sa eṣa naḥ na kūrmādir anādhāro dṛṣṭakūrmādivat sadā [ ] tannivāsajanādṛṣṭaviśeṣe vasato yadi kūrmādir āśrayaḥ kiṃ na vāyudṛṣṭāṃtasārataḥ [ ] nordhvādhobhramaṇaṃ bhūmer ghaṭate golakātmanaḥ sadā tathaiva tadbhrāṃtihetor anupapattitaḥ [ ] dṛśyamānasamudrādijalasthitivirodhataḥ gole bhrāmyati pāṣāṇagolavat kva viśeṣavāk [ ] gurvarthasyābhimukhyena bhūmeḥ sarvasya pātataḥ tatsthitiś cet pratīyeta nādhastāt pātadṛṣṭitaḥ [ ] bhūbhramāgamasatyatve 'bhūbhramāgamasatyatā kiṃ na syāt sarvathā jyotirjñānasiddher abhedataḥ [ ] dvayoḥ satyatvam iṣṭaṃ cet kvāviruddhārthatā tayoḥ pravaktror āptatā naivaṃ sugateśvarayor iva [ ] sarvadādhaḥ patanty etāḥ bhūmayo maruto 'sthiteḥ īraṇātmatvato dṛṣṭaprabhaṃjanavad ity asat [ ] maruto dhārakasyāpi darśanāt toyadādiṣu sarvadā dhārakatvasyānāditvāt tatra na kṣatiḥ [ ] nāparyaṃtā dharādho pi siddhā saṃsthānabhedataḥ dharavatsvam aparyaṃtaṃ siddhaṃ saṃsthānavan na hi [ ] nādho dho gativaicitryaṃ viruddhaṃ prāṇinām iha tādṛk pāpasya vaicitryāt tannimittasya tattvataḥ [ ] tataḥ sapteti saṃkhyānaṃ bhūmīnāṃ na viruddhyate saṃkhyāṃtaraṃ ca saṃkṣepavistarādivaśān mataṃ [ ] triṃśallakṣādisaṃkhyā ca narakāṇāṃ susūtritā ratnaprabhādiṣūktāsu prāṇyadṛṣṭaviśeṣataḥ [ ] iti sūtradvayenādholokāvāsaviniścayaḥ śreyān sarvavidāyātasyāmnāyasyāvilopataḥ [ ] tiryaṃco 'śubhaleśyādyās tebhyo pyatiśayena ye prāṇino 'śubhaleśyādyāḥ kecit te tatra nārakāḥ [ ] saṃkleśatāratamyenāśubhatātāratamyatā siddhyed aśubhaleśyāditāratamyam aśeṣataḥ [ ] tathā tair nārakair duḥkhaṃ parasparam udīryate raudradhyānāt samudbhūteḥ kudher meṣādibhir yathā [ ] nimittahetavas tv ete 'nyonyaṃ duḥkhasamudbhave bahiraṃgās tathābhūte sati svakṛtakarmaṇi [ ] saṃkliṣṭair asurair duḥkhaṃ nārakāṇām udīryate meṣādīnāṃ yathā tādṛkrūpais tisṛṣu bhūmiṣu [ ] parāsu gamanābhāvāt teṣāṃ tadvāsidehināṃ duḥkhotpattau nimittatvam asurāṇāṃ na vidyate [ ] evaṃ sūtratrayonnītasvabhāvā nārakāṃginaḥ svakarmavaśataḥ saṃti pramāṇanayagocarāḥ [ ] narakeṣūditaikādisāgaropamasammitaḥ sthitir asty atra sattvānāṃ sadbhāvāt tādṛgāyuṣaḥ [ ] saṃkṣepādiparā tv agre vakṣyamāṇā tu madhyamā sāmarthyād bahudhā proktā nirṇetavyā yathākramaṃ [ ] saptādho bhūmayo yasmān madhyaloko balād gataḥ tan na dvīpasamudrāḥ syuḥ sūtradvitayavarṇitā [ ] tanmadhye merunābhiḥ syāj jaṃbūdvīpo yathoditaḥ sūtreṇaikena niḥśeṣakumatānāṃ vyapohanāt [ ] kṣetrāṇi bharatādīni sapta tatrāpareṇa tu sūtreṇoktāni tatsaṃkhyāṃ haṃtuṃ tīrthakakalpitām [ ] pūrvāparāyatās tatra parvatās tadvibhājinaḥ ṣaṭpradhānāḥ pareṇaite proktā himavadādayaḥ [ ] padmādayo hradās teṣām upari pratipāditāḥ sūtreṇaikena vijñeyā yathāgamam asaṃśayam [ ] saṃkhyayāyām aviṣkaṃbhāvagāhagatayā hradaḥ sūtradvayena nirdiṣṭaḥ prathamaḥ sarvavedibhiḥ [ ] tanmadhye yojanaṃ proktaṃ puṣkaraṃ dviguṇās tataḥ hradāś ca puṣkarāṇīti sūtradvitayato ṃjasā [ ] devyaḥ śrīmukhāḥ khyātāḥ sūtreṇaikena sūcanāt ṣaḍ eva tannivāsinyastā sasāmānikādayaḥ [ ] atha gaṃgādayaḥ proktāḥ saritaḥ kṣetramadhyagāḥ pūrvāparasamudrāṃtaḥpraveśinyo yathāgamaṃ [ ] varṣavarṣadharābādhyaviṣkaṃbhakathanaṃ kṛtaṃ sūtratrayeṇa bhūmīnāṃ sthitibhedodayena tu [ ] tatkṣetravāsināṃ nṝṇāṃ sāyuṣaḥ sthitir īritā sūtratrayeṇa viṣkaṃbho bharatasyaikasūtrataḥ [ ] jaṃbūdvīpagavarṣādiviṣkaṃbhādir aśeṣataḥ sadā dvirdhātakīkhaṃḍe puṣkarārdhe ca bhīyate [ ] prāṅmānuṣottarādyasmān manuṣyāḥ parataś ca na āryāmlecchāś ca te jñeyās tādṛkkarmabalodbhavāḥ [ ] prāptarddhītarabhedena tatrāryā dvividhāḥ smṛtāḥ sadguṇair aryamāṇatvād guṇavadbhiś ca mānavaiḥ [ ] tatra prāptarddhayaḥ saptavidhardhim adhisaṃsṛtāḥ buddhyādisaptadhā nānā viśeṣās tadviśeṣataḥ [ ] saṃbhāvyaṃte ca te hetuviśeṣavaśavartinaḥ kecit prakṛṣyamāṇātmaviśeṣatvāt pramāṇavat [ ] asaṃprāptardhayaḥ kṣetrādyāryā bahuvidhāḥ sthitāḥ kṣetrādyapekṣayā teṣāṃ tathā nirṇītiyogataḥ [ ] tathā taddvīpajā mlecchāḥ pare syuḥ karmabhūmijāḥ ādyāḥ ṣaṇṇavatiḥ khyātā vārdhidvayataṭadvayoḥ [ ] bhogabhūmyāyurutsedhavṛttayor bhogabhūmibhiḥ samapraṇidhayaḥ karmabhūmivatkarmabhūmibhiḥ [ ] karmabhūmibhavā mlecchāḥ prasiddhā yavanādayaḥ syuḥ pare ca tadācārapālanād bahudhā janāḥ [ ] saṃpradāyāvyavacchedād āryamlecchavyavasthitiḥ saṃtānena viniśceyā tadvidbhir vyavahāribhiḥ [ ] svayaṃ saṃvedyamānā ca guṇadoṣanibaṃdhanā kathaṃcid anumeyā ca tatkāryasya viniścayāt [ ] nityasarvagatāmūrtasvabhāvā sarvathā tu yā jātir brāhmaṇyacāṃḍālyaprabhṛtiḥ kaiścid īryate [ ] sā na siddhā pramāṇena bādhyamānā kadācana [ ] siddhaṃ sādṛśyasāmānyaṃ samānā iti tadgrahāt kutaścit sadṛśeṣv eva manuṣyeṣu gavādivat [ ] sārdhadvidvīpaviṣkaṃbhaprabhṛti pratipāditaṃ samanuṣyaṃ catuṣṭyā ca sūtrāṇām iti gamyate [ ] bharatādyā videhāṃtāḥ prakhyātāḥ karmabhūmayaḥ devottarakurūṃs tyaktvā tāḥ śeṣā bhogabhūmayaḥ [ ] sāmarthyād avasīyaṃte sūtre sminn āgatā api samudradvitayaṃ yadvat pūrvasūtroktaśaktitaḥ [ ] parāvare vinirdiṣṭe manuṣyāṇām iha sthitī tripalyopamasaṃkhyāṃtarmuhūrtagaṇane balāt [ ] madhyamā sthitir eteṣāṃ vividhā viniveditā svopāttāyur viśeṣāṇāṃ bhāvāt sūtre tra tādṛśāṃ [ ] te tiryagyonijānāṃ ca saṃkṣepārtham ihodite sthitī prakaraṇābhāve py eṣāṃ sūtreṇa sūribhiḥ [ ] sārdhadvīpadvaye kṣetravibhāgādinirūpaṇaṃ adhyāye sminn asaṃkhyeyeṣv api dvīpeṣu yat kṛtaṃ [ ] manuṣyalokasaṃkhyā yā jijñāsaviṣayā muneḥ tena nirṇīyate sadbhir anyatra tadabhāvataḥ [ ] na ca dvīpasamudrādiviśeṣāṇāṃ prarūpaṇaṃ niḥprayojanam āśaṃkyaṃ manuṣyādhāraniścayāt [ ] nānākṣetravipākīni karmāṇy utpattihetavaḥ saṃty eva tadviśeṣeṣu pudgalādivipākavat [ ] tadaprarūpaṇe jīvatattvaṃ na syāt prarūpitaṃ viśeṣeṇeti tajjñānaśraddhāne na prasiddhyataḥ [ ] tannibaṃdhanam akṣuṇṇaṃ cāritraṃ ca tathā kva nu muktimārgopadeśo no śeṣatattvaviśeṣavāk [ ] nanu dvīpādayo dhīmaddhetukāḥ saṃtu sūtritāḥ sanniveśaviśeṣatvasiddher ghaṭavad ity asat [ ] hetor īśvaradehenānekāṃtād iti kecana tatrāpare tu manyaṃte nirdeheśvaravādinaḥ [ ] nimittakāraṇaṃ teṣāṃ neśvaras tatra siddhyati nirdehatvād yathā muktaḥ puruṣaḥ sammataḥ svayaṃ [ ] nityajñānatvato hetur īśvaro jagatām iti na yuktam anvayāsattvād vyatirekāprasiddhitaḥ [ ] bodho na vedhaso nityo bodhatvād anyabodhavat iti hetor asiddhatvān na vedhāḥ kāraṇaṃ bhuvaḥ [ ] kālāder aśarīrasya kāryotpattinimittatā siddheti vyabhicāritvaṃ nirdehatvasya cen mataṃ [ ] na tasya puruṣatvena viśiṣṭasya prayogataḥ kālāder aśarīratveśvaratvāvyabhicārataḥ [ ] jagatāṃ neśvaro hetur ajñatvād anyajaṃtuvat na jñosāvaśarīratvān muktavat so nyathā sa vit [ ] sadehabuddhimaddhetur dṛṣṭāṃto pi ghaṭaḥ kathaṃ nirdehabuddhimaddhetau sādhye jagati yujyate [ ] dhīmaddhetutvasāmānyaṃ sādhyaṃ cen nirviśeṣakaṃ nānādhīmannimittatvasiddheḥ syāt siddhasādhanaṃ [ ] nānātvapariṇāmākhyabhāvakarmanimittakaṃ siddhaṃ hīdaṃ jagat tasya tadbhogyatvaprasiddhitaḥ [ ] saśarīrakulālādiḥ kurvan dṛṣṭo ghaṭādikaṃ svayam ātmā punar deham aśarīro pi viśrutaḥ [ ] sadehetarasāmānyasvabhāvo jagadīśvaraḥ karotīti nu sādhyeta yadā doṣas tadā kva saḥ [ ] ity eke tadasaṃbaṃdhaṃ svaśarīrāṇi kurvatā śarīrāṃtarasaṃbaṃdhātmanāṃ syān nānyathā kriyā [ ] parāparaśarīrāṇāṃ kalpanān nānavasthitiḥ te samānādisaṃbaṃdhāt kāryakāraṇabhāvataḥ [ ] sā yady adṛṣṭasadbhāvān matā tasya tu siddhyatu pūrvaṃ karmaśarīreṇa saṃbaṃdhaḥ paravigrahāt [ ] śarīram ātmano 'dṛṣṭaṃ pudgalātmakam īritaṃ sarvathātmaguṇatve sya pārataṃtryānimittatā [ ] kṣityādimūrtayaḥ saṃti maheśasya tadudbhave sa eva hetur ityādi vyabhicāro na ced bhavet [ ] tathānye pi kimātmānaḥ svamūrtyutpattihetavaḥ svayaṃ na syur itīśasya kva siddhyet sarvahetutā [ ] kurvan kṣityādimūrtīṃś ca svamūrtiṃ tatprayogataḥ mūrtyaṃtarāṇi kurvīta yadi vānādibhir yataḥ [ ] gatvā sudūram apy evaṃ yadi mūrtī na kāścana kuryāt tābhis tadā hetor anaikāṃtikatā na kiṃ [ ] anādimūrtibhis tasya saṃbaṃdha iti cen mataṃ kiṃkṛtānāditā tāsāṃ sanniveśaviśiṣṭatā [ ] na vā tābhir maheśena kṛtābhir vyabhicāratā sādhanasya kṛtābhir vā tena tām anavasthitiṃ [ ] kevalaṃ mukham astīti yat kiṃcid abhidhīyate mithyottarāṇām ānaṃtyāt prekṣāvattā nu tatra kā [ ] buddhimaddhetukaṃ yādṛgdṛṣṭaṃ dravyagrahādiṣu saṃniveśaviśiṣṭatvaṃ tādṛgjagati nekṣyate [ ] iti hetor asiddhatvaṃ kaiścid uktaṃ na yujyate tathā sarveṣṭahetūnām asiddhatvaprasaṃgataḥ [ ] kṛtadhījanakaṃ tad dhi nākriyādarśino yathā kvacit tathā na dhūmādir agnyādijñānakāraṇaṃ [ ] vahnyādibuddhikāritvaṃ svayaṃ siddhasya siddhatā dhūmādeḥ sādhanasyaitatsiddhau vanhyādidhīr iti [ ] yathānyonyāśrayas tadvatprakṛte pi hi sādhane kṛtadhījanakatve sya siddhatāyāṃ kṛtatvadhīḥ [ ] tato naikāṃtiko hetur eṣa vācyaḥ parīkṣakaiḥ kāryatvārthakriyākṛtvapramukhonena varṇitaḥ [ ] sthāvarādibhir apy asya vyabhicāro nuvarṇyate kaiścit pakṣīkṛtais teṣām adhīmaddhetutāsthitaiḥ [ ] dṛṣṭakṣityādihetūnām anvayavyatirekataḥ dṛśyate sthāvarādīnāṃ sarvagatvena vedhasaḥ [ ] na deśe vyatireko sti kṣitāvasya sadā sthiteḥ sarvagasyānvayas tv eko na tajjanyaṃ tv asādhanaḥ [ ] naśvaratvād adṛṣṭasyāsarvagatvāc ca siddhyati vyatirekas tatra tasya sthāvarādinimittatā [ ] kālādiparyayasyāpi nityatvādyaprasiddhitaḥ sarvathā kāryaniṣpattau hetutvaṃ na virudhyate [ ] maheśvarasisṛkṣāyā jagajjanmeti kecana tasyāḥ śāśvatatāpāyād avibhutvād adṛṣṭavat [ ] tadayuktaṃ maheśasya sisṛkṣāṃtarato vinā sisṛkṣotpādane hetos tathaiva vyabhicārataḥ [ ] sisṛkṣāṃtaratas tasyāḥ prasūtāv anavasthiteḥ sthāvarādisamudbhūtir na syāt kalpaśatair api [ ] tadbhoktṛprāṇyadṛṣṭasya sāmarthyāt sā bhavasya cet prasūtiḥ sthāvarādīnāṃ tasmād anvayanān na kiṃ [ ] svātaṃtryeṇa tadudbhūtau sarvadoparam acyuteḥ sarvatra sarvakāryāṇāṃ janma kena nivāryate [ ] vyākhyātātreśvareṇaiva nityā sādhyātirekiṇī kvacid vyavasthitānyatra na syād anvayabhāg api [ ] evamīśasya hetutvābhāvasiddhiṃ pracakṣate vyāpakānupalaṃbhena sthāvarādisamudbhave [ ] pakṣasyaivānumānena bādhodbhāvyeti cāpare pakṣīkṛtair ayuktatvād vyabhicārasya sādhane [ ] sarvathā yadi kāryatvaṃ hetuḥ syādvādināṃ tayā na siddho dravyarūpeṇa sarvasyākāryatā sthiteḥ [ ] kathaṃcit tu viruddhaḥ syād dhīmattve tu jagatsvayaṃ kathaṃcit sādhayann iṣṭaviparītaṃ viśeṣataḥ [ ] nākrośaṃtaḥ palāyaṃte viruddhā hetavaḥ svataḥ sarvage buddhimaddhetau sādhye nyair jagatām iha [ ] dravyaṃ guṇaḥ kriyānaṃtaviśeṣo śāśvato nanu vivādādhyāsito dhīmān hetuḥ sādhyasthito yadā [ ] kāryatvaṃ na tathā sveṣṭaviparītaṃ prasādhayet nāpy asiddhaṃ bhavet tatra sarvathāpi vivakṣitaṃ [ ] ity eke tadasaṃprāptaṃ bhedaikāṃtāprasiddhitaḥ kāryakāraṇayor aikyapratipatteḥ kathaṃcana [ ] naikāṃtabhedabhṛtsiddho nityād api guṇād guṇī dravyasyānādiparyaṃtapariṇāmāt tathā sthiteḥ [ ] vivādādhyāsitātmāni karaṇādīni kenacit kartrādhiṣṭhitavṛttīni karaṇāditvato yathā [ ] vāsyādīni ca tatkartṛsāmānye siddhasādhanaṃ sādhye kartṛviśeṣe tu sādhyaśūnyaṃ nidarśanam [ ] tatsāmānyaviśeṣasya sādhyatvāc ced adūṣaṇaṃ so pi siddhākhilavyaktivyāpī kaścit prasiddhyati [ ] deśakālaviśeṣāvacchinnāgnivyaktiniṣṭhitaṃ sādhyate hy agnisāmānyaṃ dhūmān nāsiddhabhedagaṃ [ ] siddhe kartari niḥśeṣakārakāṇāṃ prayoktari hetuḥsāmarthyataḥ siddhaḥ sa ced iṣṭo maheśvaraḥ [ ] naivaṃ prayoktur ekasya kārakāṇām asiddhitaḥ nānā prayoktṛkatvasya kvacid dṛṣṭer asaṃśayaṃ [ ] iti kriyānumānānāṃ mālā naivāmalā bhuvaṃ kartary ekatra saṃsādhye numityā pakṣabādhanāt [ ] viśvataś cakṣur ityāder āgamād api neśvaraḥ siddhyet tasyānumānenānugrahābhāvatas tataḥ [ ] loko 'kṛtrima ity etadvacanaṃ satyatāṃ gataṃ bādhakasya pramāṇasya sarvathā vinivāraṇāt [ ] viśiṣṭasanniveśaṃ ca dhīmatā na kṛtaṃ jagat dṛṣṭakṛtrim akūṭādivilakṣaṇatayekṣaṇāt [ ] samudrākarasaṃbhūtamaṇim uktāphalādivat iti hetuvacaḥ śakter api loko 'kṛtaḥsthitaḥ [ ] nānyathānupapannatvam asyāsiddhaṃ kathaṃcana kṛtrimārthavibhinnasyākṛtrimatvaprasiddhitaḥ [ ] nāsiddhir maṇimuktādau kṛtrimetarato kṛte kṛtrimatvaṃ na saṃbhāvyaṃ jagatskaṃdhasya tādṛśaḥ [ ] iti kathitaviśeṣo madhyalokasya samyak sakalanayamayena jyotiṣā sanniveśaḥ pravacanabhavasūtrair janyamānena sadbhiḥ katham api parivedyo bhāvayadbhiḥ prapaṃcāt [ ]
atha caturtho 'dhyāyaḥ [ ] devāś caturṇikāyā ity etat sūtraṃ yad abravīt nārakāṇām ivādhāram anuktaṃ devasaṃvide [ ] sūtrakāras tad eteṣāṃ lokatrayanivāsināṃ sāmarthyād ūrdhvalokasya saṃsthānaṃ vaktum aihata [ ] triṣv ādyeṣu nikāyeṣu devāḥ sūtreṇa sūcitāḥ saṃti pītāṃtaleśyās te nānyathā bādhitatvataḥ [ ] caturṣv api nikāyeṣu te daśādivikalpakāḥ kalpopapannaparyaṃtā iti sūtre niyāmataḥ [ ] iṃdrādayo daśaiteṣām ekaśaḥ pratisūtritāḥ puṇyakarmaviśeṣāṇāṃ taddhetūnāṃ tathā sthiteḥ [ ] tatrāpi vyaṃtarā varjyā jyotiṣkāś copavarṇitāḥ trāyastriṃśais tathā lokapālais taddhetvasaṃbhavāt [ ] dvīṃdrāḥ nikāyayor devāḥ pūrvayor iti niścayāt tatraikasya prabhor bhāvo neti te stokapuṇyakāḥ [ ] devāḥ kāyapravīcārā ā aiśānāditīraṇāt caturṣv api nikāyeṣu sukhabhedasya sūcanaṃ [ ] te sparśādipravīcārāḥ śeṣās tebhyo yathāgamaṃ jñeyāḥ kāmodayāḥ pāpatāratamyaviśeṣataḥ [ ] tebhyas tu pare kāmavedanāyāḥ parikṣayāt sukhaprakarṣasaṃprāpteḥ pravīcāreṇa varjitāḥ [ ] saṃbhāvyaṃte ca te sarve tāratamyasya darśanāt narāṇām iha keṣāṃcit kāmāpāpasya tādṛśaḥ [ ] ity evaṃ navabhiḥ sūtraiḥ nikāyādyaṃtarasya yā kalpanā saṃśayaś cātra keṣāṃcit tannirākṛtiḥ [ ] daśāsurādayas tatra proktā bhavanavāsinaḥ adholokagateṣv eṣāṃ bhavaneṣu nivāsataḥ [ ] aṣṭabhedā vinirdiṣṭā vyaṃtarāḥ kinnarādayaḥ vividhānyaṃtarāṇy eṣām adhomadhyamalokayoḥ [ ] jyotiṣkāḥ paṃcadhā dṛṣṭāḥ sūryādyā jyotir āśritāḥ nāmakarmavaśāt tādṛk saṃjñā sāmānyabhedataḥ [ ] sāmānyato 'numeyāś ca chadmasthānāṃ viśeṣataḥ paramāgamasaṃgamyā iti nādṛṣṭakalpanā [ ] niruktyā vāsabhedasya pūrvavadgatyabhāvataḥ te nṛloka iti proktam āvāsapratipattaye [ ] asmāt samāddharābhāgād ūrdhvaṃ teṣāṃ prakāśitāḥ āvāsāḥ kramaśaḥ sarvajyotiṣāṃ viśvavedibhiḥ [ ] yojanānāṃ śatāny aṣṭau hīnāni daśayojanaiḥ utpatya tārakās tāvac caraṃty adha iti śrutiḥ [ ] tataḥ sūryā daśotpatya yojanāni mahāprabhāḥ tataś caṃdramasośītiṃ bhāni trīṇi tatas trayaḥ [ ] trīṇi trīṇi budhāḥ śukrā guravaś copari kramāt catvāro ṃgārakās tadvac catvāri ca śanaiś carāḥ [ ] caraṃti tādṛśādṛṣṭaviśeṣavaśavartinaḥ svabhāvād vā tathānādinidhanād dravyarūpataḥ [ ] eṣa eva nabho bhāgo jyotiḥsaṃghātagocaraḥ bahalaḥ sadaśakaṃ sarvo yojanānāṃ śataṃ smṛtaḥ [ ] sa ghanodadhiparyaṃto nṛloke 'nyatra vā sthitaḥ siddhas tiryagasaṃkhyātadvīpāṃbhodhipramāṇakaḥ [ ] sarvābhyaṃtaracārīṣṭaḥ tatrābhijidatho bahiḥ sarvebhyo gaditaṃ mūlaṃ bharaṇyo dhas tathoditāḥ [ ] sarveṣām upari svātir iti saṃkṣepataḥ kṛtā vyavasthā jyotiṣāṃ ciṃtyā pramāṇanayavedibhiḥ [ ] merupradakṣiṇā nityagatayas tv iti nivedanāt naivāpradakṣiṇā teṣāṃ kādācit kīṣyate na ca [ ] gatyabhāvo pi cāniṣṭaṃ yathā bhūbhramavādinaḥ bhuvo bhramaṇanirṇītivirahasyopapattitaḥ [ ] ūrdhvādhobhramaṇaṃ sarvajyotiṣāṃ dhruvatārakāḥ muktvā bhūgolakād evaṃ prāhur bhūbhramavādinaḥ [ ] tad apy apāstam ācāryair nṛloka iti sūcanāt tatraiva bhramaṇaṃ yasmān nordhvādhobhramaṇe sati [ ] samarātraṃdivāvṛddhir hānir doṣāc ca yujyate chāyāgrahoparāgādir yathā jyotirgatis tathā [ ] khakhaṃḍabhedataḥ siddhā bāhyābhyaṃtaram adhyataḥ tathābhiyogyadevānāṃ gatibhedāt svabhāvataḥ [ ] jyotiḥ śāstramato yuktaṃ naitatsyādvādavidviṣāṃ saṃvādakam anekāṃte sati tasya pratiṣṭhite [ ] ye jyotiṣkāḥ smṛtā devās tatkṛto vyavahārataḥ kṛtaḥ kālavibhāgo yaṃ samayādir na mukhyataḥ [ ] tadvibhāgāt tathā mukhyo nāvibhāgaḥ prasiddhyati vibhāgarahite hetau vibhāgo na phale kvacit [ ] bahirmanuṣyalokāṃte vasthitā iti sūtrataḥ tatrāsan nāvyavacchedaḥ prādakṣiṇyamati kṣatiḥ [ ] evaṃ sūtracatuṣṭayāj jyotiṣāmaraciṃtanaṃ nivāsādiviśeṣeṇa yuktaṃ bādhavivarjanāt [ ] vaimānikā vimāneṣu nivāsād upavarṇitāḥ dvidhā kalpopapannāś ca kalpātītāś ca te matāḥ [ ] uparyupari taddhāma nādhastiryak ca tatsthitiḥ yathā bhavanavāsyādidevānām iti nirṇayaḥ [ ] saudharmaiśānayor devā jyotiṣāmupari sthitāḥ noparyuparibhāvasya tenāvyāpakatā bhavet [ ] saudharmetyādisūtre ca dvaṃdvavṛttir vibhāvyate saudharmādivimānānām uparyupari nānyathā [ ] ānataprāṇatadvaṃdvamāraṇācyutayor iti sūcanād aṃtaśaḥ sā ca kalpeṣv evaikaśas tataḥ [ ] graiveyakeṣu navasu navasvanudiśeṣv iyaṃ tato nuttarasaṃjñānāṃ paṃcānāṃ seṣyate rthataḥ [ ] saptabhis te tathā jñeyāḥ sthityādibhir asaṃśayaṃ teṣām iha manuṣyādau tāratamyasya darśanāt [ ] uparyupari te hīnā gatyādibhir asaṃbhavāt tatkāraṇaprakarṣasya pariṇāmaviśeṣataḥ [ ] sthityādibhis tathādhikyasyānyathānupapattitaḥ noparyuparibhāvasya teṣāṃ saṃketisaṃgatiḥ [ ] leśyāḥ pītādayas teṣāṃ sūtravākyaprabhedataḥ pratyetavyāḥ prapaṃcena yathāgamam asaṃśayaṃ [ ] leśyā nirdeśataḥ sādhyā kṛṣṇetyādisvarūpataḥ varṇato bhramarādīnāṃ chāyāṃ bibhrati bāhyataḥ [ ] anaṃtabhedamāsāṃ syād varṇāṃtaram api sphuṭaṃ ekadvitrikasaṃkhyādikṛṣṇādiguṇayogataḥ [ ] tathāṃtaḥpariṇāmena sādhyajīvasya tattvataḥ sa cāsaṃkhyātalokātmapradeśaparimāṇakaḥ [ ] tatkaṣāyodayasthāneṣv iyatsūtkṛṣṭam adhyama jaghanyātmakarūpeṣu kleśahānyā nivartanāt [ ] kṛṣṇādayo 'śubhās tisro vivartaṃte śarīriṇaḥ jaghanyamadhyamotkṛṣṭeṣv aṃśāṃśeṣu vivṛddhitaḥ [ ] viśuddher uttarās tisraḥ śubhā evaṃ viparyayāt viśuddhihānyā saṃkleśavṛddhyā caiva śubhetarāḥ [ ] ekaikā cāpy asaṃkhyeyalokātmā vyavasāyabhṛt leśyāviśeṣato jñeyāḥ kaṣāyodayabhedataḥ [ ] tathā saṃkramataḥ sādhyā leśyāḥ kleśaviśuddhijāt kliśyamānasya kṛṣṇāyāṃ na leśyāṃtarasaṃkramaḥ [ ] tasyām eva tu ṣaṭsthānapatitena vivardhate hīyate ca pumān eṣa saṃkrameṇa nijakramāt [ ] kṛṣṇā prāthamikakleśasthānād dhi parivardhate saṃkhyeyād apy asaṃkhyeyabhāgataḥ svanimittataḥ [ ] saṃkhyeyādiguṇād vāpi nānyatheti viniścayaḥ leśyāṃtarasya kṛṣṇāto 'śubhasyānyasya bādhanāt [ ] tatkṛṣṇaleśyataḥ sthānāddhīyamāno vihīyate kṛṣṇāyām eva nānyasyāṃ leśyāyāṃ hetvabhāvataḥ [ ] sādyanaṃtādibhāgād vā saṃkhyātādiguṇāt tathā hīyate nānyathā sthānaṣaṭkasaṃkramato subhṛt [ ] yadānaṃtaguṇā hāniḥ kṛṣṇāyāḥ saṃkramas tadā nīlāyā uttamasthāne talleśyāṃtarasaṃkramaḥ [ ] evaṃ viśuddhivṛddhau syāc chuklaleśyasya saṃkramaḥ śuklāyām eva nānyatra leśyā evāvasānataḥ [ ] tathā viśuddhihānyāṃ syāt talleśyāṃtarasaṃkramaḥ anaṃtaguṇahānyaiva nānyahānyā kadācana [ ] madhye leśyācatuṣkasya śuddhisaṃkleśayor nṛṇāṃ hānau vṛddhau ca vijñeyas teṣāṃ svaparasaṃkramaḥ [ ] tathaiva karmato leśyāḥ sādhyāḥ ṣaḍ api bhedataḥ phalalakṣaṇadṛṣṭāṃtasāmarthyāt tattvavedibhiḥ [ ] ādyā tu skaṃdhabhedecchā viṭapacchedaśemupī parā ca śākhāchedīcchād anuśākhachidaiṣaṇā [ ] piṃḍikāchedanecchā na svayaṃ patitamātraka phalāditsā ca kṛṣṇādileśyānāṃ bhakṣaṇecchayā [ ] tathā lakṣaṇato leśyāḥ sādhyāḥ siddhāḥ pramāṇataḥ parān anubhayādiḥ syāt kṛṣṇāyās tatra lakṣaṇaḥ [ ] alasyādis tu nīlāyā mātsaryādiḥ punaḥ sphuṭaṃ kāpotyā dṛḍhamaitryādiḥ pītāyāḥ satyavāditā [ ] prabhṛti padmaleśyāyāḥ śuklāyāḥ praśamādikaṃ gatyā leśyās tathā jñeyāḥ prāṇināṃ bahubhedayā [ ] pratyaṃśakaṃ samākhyātāḥ ṣaṅviṃśatir ihāṃśakāḥ tatrāṣṭau madhyamās tāvad āyuṣo baṃdhahetavaḥ [ ] ārṣopadeśataḥ siddhāḥ śeṣās tu gatihetavaḥ puṇyapāpaviśeṣāṇām upacāratayā hi te [ ] bhavāyurgatibhedānāṃ kāraṇaṃ nāmabhedavat śuklotkṛṣṭāṃśakād ātmā bhavet sarvārthasiddhigaḥ [ ] kṛṣṇotkṛṣṭāṃśakāt tu syād apratiṣṭhānagāmy asau śeṣāṃśakavaśān nānāgatibhāg avagamyatām [ ] yathāgamaṃ prapaṃcena vidyānaṃdamahodayā svāmitvena tathā sādhyā leśyā sādhanato pi ca [ ] saṃkhyātaḥ kṣetrataś cāpi sparśanāt kālato ṃtarāt bhāvāc cālpabahutvāc ca pūrvasūtroktanītitaḥ [ ] kalpāḥ prāg eva te bodhyā graiveyakavimānataḥ tadādayas tu sāmarthyāt kalpātītāḥ pratītitaḥ [ ] tatra laukāṃtikā devā brahmalokālayā iti sūcanāt kalpavāsitvaṃ teṣāṃ niyatam ucyate [ ] te nvarthasaṃjñatāṃ prāptā bhedāḥ sārasvatādayaḥ tenaikacaramās tadvacchakrādyāś copalakṣitāḥ [ ] tathā dvicaramāḥ proktā vijayādiṣu yato 'marāḥ tato nyatra niyāmo sti na manuṣyabhaveṣv iha [ ] ity ekādaśabhiḥ sūtrair vaimānikanirūpaṇaṃ yuktyāgamavaśādāttaṃ tannikāyacatuṣṭayam [ ] sarvalokāśrayāḥ siddhās tiryaṃco py arthato ṃginaḥ saṃtaupapādike bhyaste manuṣyebhyo pi cāpare [ ] iti saṃkṣepatastiryagyonijānāṃ viniścayaḥ kṛto tra sūtrakāreṇa lakṣaṇāvāsabhedataḥ [ ] sthitir ity ādisūtreṇa yoktā bhavanavāsināṃ viśeṣeṇa sthitir yā ca tadanaṃtarakīrtitā [ ] sūtraiś caturbhir abhyāsādyathāgamaviśeṣataḥ parā vaimānikānāṃ ca sottaratrāvaroktitaḥ [ ] palyopamam atiriktam avarāsthitim abravīt saudharmaiśānayoḥ sahe sūtre rthāt saṃpratīyate [ ] sānatkumāramāheṃdraprabhṛtīnām anaṃtare yathā tathā dvitīyādipṛthivīṣu niveditā [ ] daśavarṣasahastrāṇi prathamāyām udīritā bhavaneṣu ca sā proktā vyaṃtarāṇāṃ ca tāvatī [ ] pareṣām adhikaṃ jñeyaṃ palyopamam avasthitiḥ jyotiṣkāṇāṃ ca tadvattadaṣṭabhāgo 'paroditā [ ] sāmarthyān madhyamā bodhyā sarveṣāṃ sthitir āyuṣaḥ prāṇināṃ sā ca saṃbhāvyā karmavaicitryasiddhitaḥ [ ] nanu yadvadghaṭādīnāṃ vicitrā sthitir iṣyate karmānapekṣiṇāṃ tadvaddehinām iti ye viduḥ [ ] te 'nabhijñā ghaṭādīnām api tadbhoktṛkarmabhiḥ sthiter niṣpādanādṛṣṭakāraṇavyabhicārataḥ [ ] sūkṣmo bhūtaviśeṣaś ced vyābhicāreṇa varjitaḥ taddhetur vividhaṃ karma tan na siddhaṃ tathākhyayā [ ] tataḥ saṃsāriṇo jīvāḥ svatattvādibhir īritāḥ nānaikātmatayā saṃto nānyathārthakriyākṣateḥ [ ] janmāstitvaṃ nivṛttiṃ ca kramād vṛddhim apakṣayaṃ vināśaṃ ca prapadyaṃte vikāraṃ ṣaṅvidhaṃ hi te [ ] bibhrate stitvam evaite śaśvadekātmakatvataḥ nānyaṃ vikāram ity eke tan na janmādidṛṣṭitaḥ [ ] janmādayaḥ pradhānasya vikārāḥ pariṇāminaḥ tatsaṃsargāt pratīyaṃte bhrāṃte puṃsīti cen na vai [ ] teṣāṃ bhāvavikāratvād ātmany apy avirodhataḥ janmādirahitasyāsyāpratīte bhrāṃtyasiddhitaḥ [ ] vikārī puruṣaḥ sattvād bahudhānakavat tava sarvathārthakriyāhāner anyathā sattvahānitaḥ [ ] jāyaṃte te vinaśyaṃti saṃti ca kṣaṇamātrakaṃ pumāṃso na vivartaṃte vṛddhyapakṣayagāś ca na [ ] iti kecit pradhvastās te py etenaivāvigānataḥ vivartādyātmatāpāye sattvasyānupapattitaḥ [ ] tataḥ svatattvādiviśeṣaciṃtanaṃ ghaṭeta jīvasya nayapramāṇataḥ kramādyanekāṃtatayā vyavasthiter ihoditanyāyabalena tattvataḥ [ ]
oṃ atha pañcamo 'dhyāyaḥ [ ] athājīvavibhāgādivivādavinivṛttaye ajīvetyādisūtrasya pravṛttir upapadyate [ ] ajīvanād ajīvāḥ syur iti sāmānyalakṣaṇaṃ kāyāḥ pradeśabāhulyād iti kālād viśiṣṭatā [ ] dharmādiśabdato bodhyo vibhāgo bhedalakṣaṇaḥ tena naikaṃ pradhānādirūpatā nāpy anaṃśatā [ ] niḥśeṣāṇām ajīvānām iti siddhaṃ pratītitaḥ vipakṣe bādhasadbhāvād dṛṣṭeneṣṭena ca svayam [ ] tadguṇādisvabhāvatvaṃ dravyāṇītīha sūtrataḥ dravyalakṣaṇasadbhāvāt pratyākhyātam aveyate [ ] dharmādharmau matau dravye guṇitvāt pudgalādivat tathākāśamato naiṣāṃ guṇābhāvasvabhāvatā [ ] na hetor āśrayāsiddhis teṣām agre prasādhanāt nāpi svarūpato siddhir mahattvādiguṇasthiteḥ [ ] kalpitāś cittasaṃtānā jīvā iti nirasyate jīvāś cetīha sūtreṇa dravyāṇīty anuvṛttitaḥ [ ] kṣmādibhūtacatuṣkāc ca dravyāṃtaratayā gatiḥ nanu dehaguṇatvādir iti dehāt pare narāḥ [ ] dravyārthikanayāt tāni nityāny evānvitatvataḥ avasthitāni sāṃkaryasyānyonyaṃ śaśvadasthiteḥ [ ] tato dravyāṃtarasyāpi dravyaṣaṭkād abhāvataḥ tatparyāyānavasthānān nityatve punararthataḥ [ ] arūpāṇīti sāmānyād āha na tv apavādataḥ rūpitvavacanād agre pudgalānāṃ viśeṣataḥ [ ] arūpitvāpavādo 'yaṃ rūpiṇaḥ pudgalā iti rūpaṃ mūrtir iha jñeyā na svabhāve khilārthabhāk [ ] rūpādipariṇāmasya mūrtitvenābhidhānataḥ sparśādimattvam eteṣām upalakṣyeta tattvataḥ [ ] ekasaṃkhyāviśiṣṭānīty ekadravyāṇi sūcayan anekadravyatāṃ haṃti dharmādīnām asaṃśayam [ ] ā ākāśād iti khyātiḥ pudgalānāṃ nṛṇām api kālāṇūnām anekatvaviśiṣṭadravyatāṃ viduḥ [ ] ekadravyam ayaṃ dharmaḥ syād adharmaś ca tattvataḥ mahattve satyamūrtatvāt khavattatsiddhivādinām [ ] nānādravyam asau nānāpradeśatvād dharādivat ity ayuktam anekāṃtād ākāśenaikatā hṛtā [ ] tasya nānāpradeśatvasādhanād agrato nayāt niraṃśasya sa tatsarvamūrtadravyair asaṃgataḥ [ ] niṣkriyāṇi ca tānīti parispaṃdavimuktitaḥ sūtritaṃ trijagadvyāpirūpāṇāṃ spaṃdahānitaḥ [ ] sāmarthyāt sakriyau jīvapudgalāv iti niścayaḥ jīvasya niṣkriyatve hi na kriyāhetutā tanau [ ] prayatnādiguṇas tadvān na hetur iti cen na vai guṇo sti tadvato bhinnaḥ sarvatheti niveditam [ ] kriyāhetuguṇatvād vā loṣṭhavatsakriyaḥ pumān dharmadravyeṇa ced asya vyabhicāraḥ paraśrutau [ ] na tasya preraṇāhetuguṇayogitvahānitaḥ nimittamātrahetutvāt svayaṃ gativivartinām [ ] kālo 'sarvagatatvena kriyāvan nānuṣajyate sarvadā jagadekaikadeśasthatvāt pṛthak pṛthak [ ] nanv evaṃ na kriyatve pi dharmādīnāṃ vyavasthiteḥ na syuḥ svayam abhipretā janmasthānavyayakriyāḥ [ ] tathotpādavyayadhrauvyayuktaṃ sad iti lakṣaṇaṃ tatra na syāt tato naiṣāṃ dravyatvaṃ vastutāpi ca [ ] ity apāstaṃ parispaṃdakriyāyāḥ pratiṣedhanāt utpādādikriyāsiddher anyathā sattvahānitaḥ [ ] parispaṃdakriyāmūlā nacotpādādayaḥ kriyāḥ sarvatra guṇabhedānām utpādādivirodhataḥ [ ] svaparapratyayau janmavyayau yadi guṇādiṣu sthitiś ca kiṃ na dharmādidravyeṣv evam upeyate [ ] gatisthityavagāhānāṃ paratra na nibaṃdhanaṃ dharmādīni kriyāśūnyasvabhāvatvāt khapuṣpavat [ ] kriyāvattvaprasaṃgo vā teṣāṃ vāyudharāṃbuvat ity acodyaṃ balādhānamātratvād gamanādiṣu [ ] dharmādīnāṃ svaśaktyaiva gatyādipariṇāmināṃ yatheṃdriyaṃ balādhānamātraṃ viṣayasaṃnidhau [ ] puṃsaḥ svayaṃ samarthasya tatra siddher na cānyathā tatraiva dravyasāmarthyān niṣkriyāṇām api svayaṃ [ ] dharmādīnāṃ paratrāstu kriyākāraṇam āptatā nacaivam ātmanaḥ kāyakriyāhetutvam āpatet [ ] sarvathā niṣkriyasyāpi svayaṃ mānavirodhataḥ ātmā hi prerako hetur iṣṭaḥ kāyādikarmaṇi [ ] tṛṇādikarmaṇīvāstu pavanādiś ca sakriyaḥ vīryāṃtarāyavijñānāvaraṇacchedabhedataḥ [ ] sakriyasyaiva jīvasya tato ṃge karmahetutā haste karmātmasaṃyogaprapannābhyām upeyate [ ] yais te pi ca pratikṣiptās tayos tacchaktyayogataḥ niṣkriyo hi yathātmaiṣāṃ kriyāvadvaisadṛśyataḥ [ ] kālādivattathaivātmasaṃyogaḥ saprayatnakaḥ guṇaḥ syāt tasya tadvac ca niṣkriyatvādideśataḥ [ ] guṇāḥ karmāṇi caitena vyākhyātānīti sūcanāt na tāvad ātmasaṃyogaḥ kevalaḥ karmakāraṇaṃ [ ] niḥprayatnasya hastādau kriyāhetutvahānitaḥ naikasya tatprayatnasya kriyāhetutvam īkṣyate [ ] śarīrāyogino nyasya tataḥ karmaprasaṃgataḥ sahitāv ātmasaṃyogaprapannau kurutaḥ kriyāḥ [ ] hastādāv ity asaṃbhāvyamanayoḥ sahadṛṣṭivat adṛṣṭāpekṣiṇau tau ced akurvāṇau kriyāṃ nari [ ] hastādau kurutaḥ karma naivaṃ kvacid adṛṣṭataḥ uṣṇāpekṣo yathā vanhisaṃyogaḥ kalaśādiṣu [ ] rūpādīn pākajān vartate vahnau svāśraye tathā nṛsaṃyogādir anyatra kriyām ārabhate na tu [ ] svādhāre nari tasyetthaṃ sāmarthyād iti cen na vai vaiṣamyād asmadiṣṭasya siddheḥ sādhyasamatvataḥ [ ] pratītibādhanāc caitadviparītaprasiddhitaḥ sādhye kriyānimittatve dṛṣṭāṃto hy akriyāśrayaḥ [ ] syād eṣa viṣamas tāvad agnisaṃyoga uṣṇabhṛt yathā ca svāśraye kurvan vikāraṃ kalaśādiṣu [ ] karoti vanhisaṃyogaḥ puṃso yogas tathā tanau ity asmadiṣṭasaṃsiddhiḥ kriyāpariṇatasya nuḥ [ ] kāye kriyānimittatvasiddheḥ saṃyogini sphuṭaṃ saṃyogārthāṃtaraṃ vanheḥ kuṭādeś ca tadāśritaḥ [ ] samavāyāt tato bhinnapratītyā bādhyate na kiṃ ghaṭādiṣv āmarūpādīn vināśayati sa svayaṃ [ ] pākajān janayaty etat pratipadyeta kaḥ sudhīḥ na caiṣā pākajotpattiprakriyā vyavatiṣṭhate [ ] vanheḥ pākajarupādipariṇāmāḥ kuṭādiṣu svahetubhedataḥ sarvaḥ pariṇāmaḥ pratīyate [ ] pūrvākāraparityāgād uttarākāralabdhitaḥ kuṭe pākajarūpādiparityāgena jāyate [ ] vanheḥ pākajarūpādis tathā dṛṣṭer abādhanāt nauṣṇyāpekṣas tato vanhisaṃyogo tra nidarśanaṃ [ ] nuḥ kriyāhetutāsiddhau viparītaprasiddhitaḥ anuṣṇāśītarūpaś cāprerako nupaghātakaḥ [ ] kuṭeḥ prāptaḥ kathaṃ rūpādyucchedotpādakāraṇaṃ gurutvaṃ niṣkriyaṃ loṣṭhe vartamānaṃ tṛṇādiṣu [ ] kriyāhetur yathā tadvatprayatnādis tathekṣaṇāt ye tv āhus te pi vidhvastāḥ pratyetavyā diśānayā [ ] svāśraye vikriyāhetau tato nyatra hi vikriyā dravyasyaiva kriyāhetupariṇāmāt punaḥ punaḥ [ ] kriyākāritvam anyatra pratītyā naiva bādhyate puruṣas tadguṇo vāpi na kriyākāraṇaṃ tanau [ ] niṣkriyatvād yathā vyomety uktir yātmani bādhakaṃ nānaikāṃtikatā dharmadravyeṇāsya kathaṃcana [ ] tasyāḥ prerakatāsiddheḥ kriyāyā vigrahādiṣu evaṃ sakriyatāsiddhāv ātmano nirvṛtāv api [ ] sakriyatvaṃ prasaktaṃ ced iṣṭam ūrdhvagatitvataḥ yādṛśī saśarīrasya kriyā muktasya tādṛśī [ ] na yuktā tasya muktatvavirodhāt karmasaṃgateḥ kriyānekaprakārā hi pudgalānām ivātmanāṃ [ ] svaparapratyayāyattabhedā na vyatikīryate sānyaiva sadvato yeṣāṃ teṣāṃ taddvayaśūnyatā [ ] kriyākriyāvator bhedenāpratīteḥ kadācana kriyākriyāśrayau bhinnau vibhinnapratyayatvataḥ [ ] sahyaviṃdhyavad ity etadvibhedaikāṃtasādhanaṃ dharmigrāhipramāṇena hetor bādhananirṇayāt [ ] kathaṃcid bhinnayos tena tayor grahaṇataḥ sphuṭaṃ vibhinnapratyayatvaṃ ca sarvathā yadi gadyate [ ] tata eva tadā tasya siddhatvaṃ prativādinaḥ kathaṃcit tu na tatsiddhaṃ vādinām ity asādhanaṃ [ ] viruddhaṃ vā bhaved iṣṭaviparītaprasādhanāt sādhyasādhanavaikalyaṃ dṛṣṭāṃtasyāpi dṛśyatām [ ] sattvenābhinnayor eva pratīteḥ sahyaviṃdhyayoḥ viruddhadharmatādhyāsād ityāder apy ahetutā [ ] proktaitena prapattavyā sarvathāpy aviśeṣataḥ kriyākriyāvato nanyānanyadeśatvataḥ kriyā [ ] tatsvarūpavad ity eke tad apy ajñānaceṣṭitaṃ laukikānany adeśatvaṃ hetuś cedvyabhicāratā [ ] vātātapādibhis tasyānanyadeśair vibhedibhiḥ śāstrīyān anyadeśatvaṃ manyate sādhanaṃ yadi [ ] na siddham anyadeśatvapratīte rūpayos tayoḥ tadvaddeśā kriyā tadvatsvakīyāśrayadeśakaḥ [ ] pratīyate yadānanyadeśatvaṃ katham etayoḥ sarvathānanyadeśatvam asiddhaṃ prativādinaḥ [ ] kathaṃcid vādinas tatsyādviruddhaṃ ceṣṭahānikṛt dharmigrāhipramāṇena bādhā pakṣasya pūrvavat [ ] sādhanasya ca vijñeyā tair evātītakālatā niṣkriyāḥ sarvathā sarve bhāvāḥ syuḥ kṣaṇikatvataḥ [ ] paryāyārthatayā labdhiṃ pratikṣaṇavivartavat ity āhur ye na te svasthāḥ sādhanasyāprasiddhitaḥ [ ] na hi pratyakṣataḥ siddhaṃ kṣaṇikatvaṃ niranvayaṃ sādharmyasya tataḥ siddher bahir aṃtaś ca vastunaḥ [ ] idānīṃtanatā dṛṣṭir na kṣaṇakṣayiṇaḥ kvacit kālāṃtarasthiter eva tathātvapratipattitaḥ [ ] nānumānāc ca tatsiddhaṃ taddhetor anabhīkṣaṇāt sattvādi sattvahetuś cen na tatrāgamakatvataḥ [ ] viruddhāditayā tasya purastād upavarṇanāt prapaṃcena punar neha tadvicāraḥ pratanyate [ ] kathaṃcin niṣkriyatve na sādhye syāt siddhasādhanaṃ tanniścayanayādeśāt prasiddhaṃ sarvavastuṣu [ ] vyavahāranayāt teṣāṃ sakriyatvaprasiddhitaḥ bhūtir yeṣāṃ kriyā saive py ayuktaṃ sānvayatvataḥ [ ] nityatvāt sarvabhāvānāṃ niṣkriyatvaṃ tu sarvathā yair uktaṃ te py anenaiva hetunā dūṣitā hṛtāḥ [ ] sarvathā tanmatadhvaṃsāt pramāṇābhāvataḥ kvacit kathaṃcin nityatāhetur yadi tasya viruddhatā [ ] kathaṃcin niṣkriyatvasya sādhanāt kṣaṇikādivat tataḥ syur niṣkriyāḥ sarve bhāvāḥ syāt sakriyāsaha [ ] virodhādiprasaṃgaś cen na dṛṣṭe tadayogataḥ caitraikajñānavat sveṣṭatattvavad vā pravādinām [ ] sveṣṭaṃ tattvam aniṣṭātmaśūnyaṃ sad iti ye viduḥ sadasadrūpam ekaṃ te nirākuryuḥ kathaṃ punaḥ [ ] niṣkriyetaratābhāve bahiraṃtaḥ kathaṃcana pratīter bādhaśūnyāyāḥ sarvathāpy aviśeṣataḥ [ ] pratideśaṃ jagadvyomavyāptayogyatvasiddhitaḥ dharmādharmaikajīvānām asaṃkhyeyapradeśatā [ ] lokākāśavad eva syāc cāsaṃkhyeyapradeśābhṛt tadādhyeyasya lokasya sāvadhitvaprasādhanāt [ ] anaṃtadeśatāpāyāt prasaṃkhyātum aśaktitaḥ na tatrānaṃtasaṃkhyātapradeśatvavibhāvanā [ ] ekajīvavacaḥśakter nāsaṃkhyeyapradeśatā nānātmanām anaṃtādipradeśatvasya saṃbhavāt [ ] sapradeśā ime sarve mūrtimaddravyasaṃgamāt sakṛdevānyathā tasyāyogād ekāṇuvat tataḥ [ ] jīvasya sarvataddravyasaṃgamo na virudhyate lokapūraṇasaṃsiddheḥ sadā tadyogyatāsthiteḥ [ ] anaṃtās tu pradeśāḥ syur ākāśasya samaṃtataḥ lokatrayād bahiḥ prāṃtābhāvāt tasyānyathāgateḥ [ ] jagataḥ sāvadhes tāvadbhāvo bahiravasthitiḥ saṃtānātmā na yujyeta sarvathārthakriyākṣamaḥ [ ] na guṇaḥ kasyacit tatra dravyasyānabhyupāyataḥ tadāśrayasya karmāder api naivaṃ vibhāvyate [ ] dravyaṃ tu pariśeṣāt syāt tannabho naḥ pratiṣṭitaṃ prasaktapratiṣedhe hi pariśiṣṭavyavasthitiḥ [ ] āgamajñānasaṃvedyam anumānaṃ viniścitaṃ sarvajñair vā paricchedyam apy anaṃtapramāṇabhāk [ ] yad vijñānaparicchedyaṃ tatsāṃtam iti yo bravīt tasya vedo bhavādir vā nānaṃtyaṃ pratipadyate [ ] saṃkhyeyāḥ syur asaṃkhyeyās tathānaṃtāś ca tattvataḥ pradeśāḥ skaṃdhasaṃsiddheḥ pudgalānām anekadhā [ ] nāṇor iti niṣedhasya vacanān nāpradeśatā prasiddhaivaikadeśatvāt tasyāṇutvaṃ na cānyathā [ ] aṣṭapradeśarūpāṇuvādo 'nena nivāritaḥ tatrāpi paramaskaṃdhavidabhāvaprasaṃgataḥ [ ] yathāṇur aṇubhir nānādikkaiḥ saṃbaṃdham ādadhat deśato vayavī tadvatpradeśo nyaiḥ pradeśataḥ [ ] sarvātmanā ca tais tasyāpi saṃbaṃdhe ṇumātrakaḥ piṃḍaḥ syād anyathopāttadoṣābhāvaḥ samo na kim [ ] vidyādajīvakāyānāṃ dravyatvādisvabhāvatāṃ evaṃ prādhānyataḥ proktāṃ samāsāt sunayānvitām [ ] lokākāśe vagāhaḥ syāt sarveṣām avagāhināṃ bāhyato saṃbhavāt tasmāl lokatvasyānuṣaṃgataḥ [ ] lokākāśasya nānyasminn avagāhaḥ kvacin mataḥ ākāśasya vibhutvena svapratiṣṭatvasiddhitaḥ [ ] dharmādharmau matau kṛtsnalokākāśāvagāhinau gacchattiṣṭhatpadārthānāṃ sarveṣām upakārataḥ [ ] tasyaivaikapradeśe sti yathaikasyāvagāhanaṃ paramāṇos tathānekāṇuskaṃdhānāṃ ca saukṣmyataḥ [ ] tathā caikapradeśādis teṣāṃ prativibhidyatāṃ so vagāho yathāyogyaṃ pudgalānām aśeṣataḥ [ ] na jīvānām asaṃkhyeyabhāgādiṣv avagāhanaṃ viruddhaṃ tatpradeśānāṃ saṃhārāt pravisarpataḥ [ ] pradīpavad iti jñeyā vyavahāranayāśrayā ādhārādheyatārthānāṃ niścayāt tadayogataḥ [ ] sakṛtsarvapadārthānāṃ gacchatāṃ gatyupagrahaḥ dharmasya copakāraḥ syāt tiṣṭhatāṃ sthityupagrahaḥ [ ] tathaiva syād adharmasyānumeyāv iti tau tataḥ tādṛkkāryaviśeṣasya kāraṇāvyabhicārataḥ [ ] upakāro vagāhaḥ syāt sarveṣām avagāhināṃ ākāśasya sakṛn nānyasyety etad anumīyate [ ] śarīravargaṇādīnāṃ pudgalānāṃ sa saṃmataḥ śarīrāvayava ity etais teṣām anumitir bhavet [ ] sukhādyupagrahāś copakāro jīvavipākinām sātavedyādikarmātmapudgalānām ito numā [ ] jīvānām upakāraḥ syāt parasparam upagrahaḥ saṃtānāṃtaravadbhājāṃ vyāpārādir ato numā [ ] aṃtanīṃtaikasamayaḥ svasattānubhavo bhidā yaḥ pratidravyaparyāyaṃ vartanā seha kīrtyate [ ] yasmāt karmaṇi bhāve ca ṇyaṃtādvarteḥ striyāṃ yuci vartanety anudātte tācchīlyādau vā yucīṣyate [ ] dharmādīnāṃ hi vastūnām ekasminn avibhāgini samaye vartamānānāṃ svaparyāyaiḥ kathaṃcana [ ] utpādavyayadhrauvyavikalpair bahudhā svayaṃ prayujyamānatānyena vartanā karma bhāvyate [ ] prayojanaṃ tu bhāvaḥ syāt sa cāsau tatprayojakaḥ kāla ity eṣa nirṇīto vartanālakṣaṇo ṃjasā [ ] pratyakṣato 'prasiddhāpi vartanāsmādṛśāṃ tathā vyāvahārikakāryasya darśanād anumīyate [ ] tathā taṃdulavikledalakṣaṇasya prasiddhitaḥ pākasyodanaparyāyanām abhājaḥ pratikṣaṇaṃ [ ] sūkṣmataṃdulapāko stīty anumānaṃ pravartate pākasyaivānyatheṣṭasya sarvathānupapattitaḥ [ ] tathaiva svātmasadbhāvānubhūtau sarvavastunaḥ pratikṣaṇaṃ bahirhetuḥ sādhāraṇa iti dhruvam [ ] prasiddhadravyaparyāyavṛttau bāhyasya darśanāt nimittasyānyathābhāvābhāvān niścīyate budhaiḥ [ ] ādityādigatis tāvan na taddhetur vibhāvyate tasyāpi svātmasattānubhūtau hetuvyapekṣaṇāt [ ] nacaivam anavasthā syāt kālasyānyāvyapekṣaṇāt svavṛttau tatsvabhāvatvāt svayaṃ vṛtteḥ prasiddhitaḥ [ ] tathaiva sarvabhāvānāṃ svayaṃ vṛttir na yujyate dṛṣṭeṣṭabādhanāt sarvādīnām iti viciṃtitaṃ [ ] na dṛśyamānataivātra yujyate vartamānatā vartamānasya kālasyābhāve tasyāḥ svataḥ sthiteḥ [ ] pratyakṣāsaṃbhavāśakter anumānādyayogataḥ sarvapramāṇaninhutyā sarvaśūnyatvaśaktitaḥ [ ] svasaṃvidadvayaṃ tattvam icchataḥ sāṃprataṃ kathaṃ siddhyen na vartamāno sya kālaḥ sūkṣmaḥ svayaṃprabhuḥ [ ] tato na bhāvitā drakṣyamāṇatā nāpy atītatā dṛṣṭatā bhāvyatītasya kālasyānyaprasiddhitaḥ [ ] gataṃ na gamyate tāvad āgataṃ naiva gamyate gatāgatavinirmuktaṃ gamyamānaṃ na gamyate [ ] ity evaṃ vartamānasya kālasyābhāvabhāṣaṇaṃ svavāgviruddham ābhāti tanniṣedhe samatvataḥ [ ] niṣiddhamaniṣiddhaṃ vā taddvayonmuktam eva vā niṣidhyate na hi kvaivaṃ niṣedho vidhir eva vā [ ] kva vābhyupagamaḥ siddhyet pratijñāhānisaṃgataḥ tasya svayaṃ pratijñānād vartamānasya tattvataḥ [ ] tathaiva ca svayaṃ kiṃcit parair abhyupagamyate tathaiva gamyate kiṃ na kriyate vedyate pi ca [ ] saṃvedanādvayaṃ tāvadviditaṃ naiva vedyate na cāviditam ātmāditattvaṃ vā nāpi taddvayaṃ [ ] iti svasaṃvidādīnām abhāvaḥ kena vāryate vartamānasya kālasyāpanhave svātmavidviṣāṃ [ ] na saṃvitsaṃvid eveti svataḥ samavatiṣṭhate brahma brahmaiva vetyādi yathā bhedāprasiddhitaḥ [ ] tatsvasaṃvedanasyāpi saṃtānam anugacchataḥ pareṇa hetunā bhāvyaṃ svayaṃ vṛttyātmanāṃ na saḥ [ ] vartanaivaṃ prasiddhā syāt pariṇāmādivat svayaṃ tataḥ siddhāṃtasūtroktāḥ sarve mī vartanādayaḥ [ ] kālasyopagrahāḥ proktā ye punar vartanādayaḥ syāt ta evopakārotas tasyānumitir iṣyate [ ] manuṣyanāmakarmāyuṣor udayāt pratipadyate kalalādiśarīrāṃgopāṃgaparyāyarūpatām [ ] sa jīvatvamanuṣyatvapramukhair anvayair yathā vyavasthitaḥ svakīyeṣu pariṇāmeṣv aśeṣataḥ [ ] kalalādibhiḥ punaḥ pūrvair bhāvaiḥ kramavivartibhiḥ vyatiriktaiḥ paratrāsau na vyavasthita īkṣyate [ ] tathā vanaspatir jīvaḥ svanāmāyurviśeṣataḥ vanaspatitvajīvatvapramukhair anvayaiḥ sthitaḥ [ ] svaśarīravivarteṣu bījādiṣu paraṃ na tu pūrvapūrveṇa bhāvena tu sthitaḥ kramabhāvinaḥ [ ] yathā manuṣyanāmāyuḥkarmodayaviśeṣataḥ jāto bālo manuṣyātmā stanyādyāhāram āharan [ ] sūryātapādisāpekṣaḥ kāyāgnivalam ādadhan vīryāṃtarāya vicchedaviśeṣavihitodbhavaṃ [ ] vivardhate nijāhārarasādipariṇāmataḥ nirmāṇanāmakarmopaṣṭaṃbhād abhyaṃtarād api [ ] tathā vanaspatir jīvaḥ svāyur nāmodaye sati jīvāśrayo ṃkuro jāto bhaumādirasam āharan [ ] taptāya spiṃḍavatto yaṃ svīkurvann eva vardhate ātmānurūpanirmāṇanāmakarmodayād dhruvam [ ] parispaṃdātmako dravyaparyāyaḥ saṃpratīyate kriyā deśāṃtaraprāptihetur gatyādibhedabhṛt [ ] prayogavisrasotpādād dvedhā saṃkṣepatas tu sā prayogajā punar nānotkṣepaṇādiprabhedataḥ [ ] visrasotpattikā tejo vātāṃbhaḥprabhṛtiṣv iyaṃ sarvāpy adṛṣṭavaicitryāt prāṇināṃ phalabhāgināṃ [ ] kriyā kṣaṇakṣayaikāṃte padārthānāṃ na yujyate bhūtirūpāpi vastutvahāner ekāṃtanityavat [ ] kramākramaprasiddhes tu pariṇāmini vastuni pratītipadam āpannā pramāṇena na bādhyate [ ] lokākāśaprabhedeṣu kṛtsneṣv ekaikavṛttitaḥ pratipradeśam anyonyam abaddhāḥ paramāṇavaḥ [ ] mukhyopacārabhedais te 'vayavaiḥ parivarjitāḥ niraṃśā niṣkriyā yasmād avasthānāt svadeśavat [ ] amūrtās tadvad eveṣṭāḥ sparśādir ahitatvataḥ kālākhyā mukhyato ye stikāyebhyo nye prakāśitāḥ [ ] vyavahārātmakaḥ kālaḥ pariṇāmādilakṣaṇaḥ kālavartanayā labdhakālākhyas tu tato 'paraḥ [ ] kutaścit paricchinno 'nyaparicchedanakāraṇaṃ prasthādivatprapattavyo nyonyāpekṣaprabhedabhṛt [ ] tatas traividhyasiddhiś ca tasya bhūtādibhedataḥ kathaṃcin nāviruddhā syāt vyavahārānurodhataḥ [ ] yathā pratitaru prāptaprāpnuvatprāpsyad ucyate tarupaṃktiṃ kramād aśvaprasṛtyanusaran mataṃ [ ] tathāvasthitakālāṇuś ca jīvādyanusaṃgamāt bhūtaṃ syād vartamānaṃ ca bhaviṣyaccāpy apekṣayā [ ] bhūtādivyavahārotaḥ kālaḥ syād upacārataḥ paramārthātmani mukhyas tu sa syāt sāṃvyavahārike [ ] evaṃ pratikṣaṇādityagatipracayabhedataḥ samayāvalikocchvāsaprāṇastokalavātmakaḥ [ ] nālikādeś ca vikhyāte kālo nekavidhaḥ satāṃ mukhyakālāvinābhūtāṃ kālākhyāṃ pratipadyate [ ] parāparacirakṣiprakramākramadhiyām api hetuḥ sa eva sarvatra vastuto guṇataḥ smṛtaḥ [ ] kriyaiva kāla ity etad anenaivāpasāritaṃ vartanānumitaḥ kālaḥ siddho hi paramārthataḥ [ ] dharmādivargavatkāryaviśeṣavyavasāyataḥ bādhakābhāvataś cāpi sarvathā tatra tattvataḥ [ ] evaṃ sarvānumeyārthā pratipattir na bādhyate sūtrasāmarthyato jātā pratyakṣārthapratītivat [ ] nirastaniḥśeṣavipakṣasādhanair ajīvabhāvā nikhilāḥ prasādhitāḥ prapaṃcato yair iha nītiśālibhir jayaṃti te viśvavipaścitaṃmatāḥ [ ] atha sparśādim aṃtaḥ syuḥ pudgalā iti sūcanāt kṣityādijātibhedānāṃ prakalpananirākṛtiḥ [ ] nābhāvo 'nyatamasyāpi sparśādīnām adṛṣṭitaḥ tasyānumānasiddhatvāt svābhipretārthatattvavat [ ] proktā śabdādibhaṃtas tu pudgalāḥ skaṃdhabhedataḥ tathā pramāṇasadbhāvād anyathātadabhāvataḥ [ ] na śabdaḥ khaguṇo bāhyakaraṇajñānagocaraḥ siddho gaṃdhādivan naiva so mūrtadravyam apy ataḥ [ ] na sphoṭātmāpi tasyaiva svabhāvasyāpratītitaḥ śabdātmanas sadā nānāsvabhāvasyāvabhāsanāt [ ] aṃtaḥprakāśarūpas tu śabde sphoṭo pare dhvaneḥ yathārthagatihetuḥ syāt tathā gaṃdhādito paraḥ [ ] gaṃdharūparasasparśaḥ sphoṭaḥ kiṃ nopagamyate tatrākṣepasamādhānasamatvāt sarvathārthataḥ [ ] baṃdho viśiṣṭasaṃyogo vyomātmādiṣv asaṃbhavī pudgalaskaṃdhaparyāyaḥ saktutoyādibaṃdhavat [ ] tathaivāvāṃtaraṃ saukṣmyaṃ paramāṇuṣv asaṃbhavi sthaulyādivat prapattavyam anyathānupapattitaḥ [ ] aṇavaḥ pudgalāḥ kecit skaṃdhāś ceti nivedanāt aṇvekāṃtaḥ pratikṣiptaḥ skaṃdhaikāṃtaś ca tattvataḥ [ ] utpadyaṃte ṇavaḥ skaṃdhāḥ paryāyatvāviśeṣataḥ bhedāt saṃghātato bhedasaṃghābhyāṃ vāpi kecana [ ] iti sūtre bahutvasya nirdeśād vākyabhidgateḥ niścīyate nyathā dṛṣṭavirodhasyānuṣaṃgataḥ [ ] skaṃdhasyāraṃbhakā yadvadaṇavas tadvad eva hi skaṃdho ṇūnāṃ bhidāraṃbhaniyamasyānabhīkṣaṇāt [ ] bhedād aṇur iti proktaṃ niyamasyopapattaye pūrvasūtrāt tato ṇūnām utpāde vidite pi ca [ ] vibhāgaḥ paramāṇūnāṃ skaṃdhabhedān na vāṇavaḥ nityatvād upajāyaṃte marutpathavad ity asat [ ] saṃyogaḥ paramāṇūnāṃ saṃghātād upajāyate na skaṃdhas tadvad eveti vaktuṃ śakteḥ parair api [ ] vivādādhyāsitaḥ skaṃdho jāyate sūkṣmato nyataḥ skaṃdhatvāt paṭavat proktaṃ yair evaṃ te vadaṃtv idaṃ [ ] vivādagocarāḥ sūkṣmā jāyaṃte skaṃdhabhedataḥ sūkṣmatvād dṛṣṭavastrādikhaṃḍavadbhrāṃtyabhāvataḥ [ ] ghanakarpāsapiṃḍena sūkṣmeṇa vyabhicāritā hetor iti na vaktavyam anyasyāpi samatvataḥ [ ] ślithāvayavakarpāsapiṃḍasaṃghātato yathā ghanāvayavakarpāsapiṃḍaḥ samupajāyate [ ] tathā sthaviṣṭapiṃḍebhyo 'niṣṭo nibiḍapiṃḍakaḥ pratītigocaro stu sa yathāsūtropapāditaḥ [ ] cākṣuṣo vayavī kaścid bhedāt saṃghātato dvayāt utpadyate tato nāsya saṃghātād eva janmanaḥ [ ] saddravyalakṣaṇaṃ śuddham aśuddhaṃ saviśeṣaṇaṃ proktaṃ sāmānyato yasmāt tato dravyaṃ yathoditaṃ [ ] tatrotpādavyayadhrauvyayuktaṃ sad iti sūcanāt guṇasattvaṃ bhaven naiva dravyalakṣaṇam aṃjasā [ ] yathotpādādayaḥ saṃtaḥ parotpādādibhir vinā tathā vastu na cet kenānavasthādi nivāryate [ ] ity asat sarvathā teṣāṃ vastuno sadasiddhitaḥ lakṣyalakṣaṇabhāvaḥ syāt sarvathaikyānabhīṣṭitaḥ [ ] tadbhāvenāvyayaṃ nityaṃ tathā pratyavamarśataḥ taddhrauvyaṃ vastuno rūpaṃ yuktam arthakriyākriyaḥ [ ] sāmarthyāt savyayaṃ rūpam utpādavyayasaṃjñakaṃ sūtresmin sūcitaṃ tasyāpāye vastutvahānitaḥ [ ] nityaṃ rūpaṃ virudhyeta netareṇaikavastuni arpitetyādisūtreṇa prāhaivaṃ nayabhedavat [ ] dravyārthād arpitaṃ rūpaṃ paryāyārthād anarpitaṃ nityaṃ vācyam anityaṃ tu viparyāsāt prasiddhyati [ ] pramāṇārpaṇatas tat syād vastu jātyaṃtaraṃ tataḥ tatra nobhayadoṣādiprasaṃgo nubhavāspade [ ] skaṃdho baṃdhāt sa cāsty eṣāṃ snigdharūkṣatvayogataḥ pudgalānām iti dhvastā sūtre smiṃs tadabhāvatā [ ] snigdhāḥ snigdhais tathā rūkṣā rūkṣaiḥ snigdhāś ca pudgalāḥ baṃdhaṃ yathāsate skaṃdhasiddher bādhakahānitaḥ [ ] naikadeśena kārtsnyena baṃdhasyāghaṭanāt tataḥ kāryakāraṇamādhyasthyakṣaṇavattadvibhāvanāt [ ] pūrvāparavidāṃ baṃdhas tathābhāvāt paro bhavet nānāṇubhāvataḥ sāṃśādaṇor baṃdho 'paro sti kim [ ] niraṃśatvaṃ na cāṇūnāṃ madhyaṃ prāptasya nāvataḥ tathā te saṃvidor madhyaṃ prāptāyāḥ saṃvidaḥ sphuṭam [ ] saṃvidadvaitatattvasyāsiddhau baṃdho na kevalaṃ sa syāt kiṃtu svasaṃtānādyabhāvāt sarvaśūnyatā [ ] tatsaṃvinmātrasaṃsiddhau saṃtānas te prasiddhyati tadvadbaṃdhaḥ sthito rthānāṃ pariṇāmo viśeṣataḥ [ ] na jaghanyaguṇānāṃ syād baṃdha ity upadeśataḥ pudgalānām abaṃdhasya prasiddher api saṃgrahaḥ [ ] ajaghanyaguṇānāṃ tatprasaktāv aviśeṣataḥ guṇasāmye samānānāṃ na baṃdha iti cābravīt [ ] dvyadhikādiguṇānāṃ tu baṃdho stīti nivedayat sarvāpavādanirmuktaviṣayasyāha saṃbhavam [ ] baṃdhedhikau guṇau yasmād anyeṣāṃ pāriṇāmikau dṛṣṭau saktujalādīnāṃ nānyathety atra yuktivāk [ ] guṇaparyayavaddravyam ity āha vyavahārataḥ satparyāyasya dharmāder dravyatvapratipattaye [ ] guṇavaddravyam ity uktaṃ sahānekāṃtasiddhaye tathā paryāyavaddravyaṃ kramānekāṃtavittaye [ ] kālaś ca dravyam ity āha proktalakṣaṇayogataḥ tasyād ravyatvavijñānanivṛttyarthaṃ samāsataḥ [ ] niḥśeṣadravyasaṃyogavibhāgādiguṇāśrayaḥ kālaḥ sāmānyataḥ siddhaḥ sūkṣmatvādyāśrayobhidhā [ ] kramavṛttipadārthānāṃ vṛttikāraṇatādayaḥ paryāyāḥ saṃti kālasya guṇaparyāyavānataḥ [ ] so naṃtasamayaḥ prokto bhāvato vyavahārataḥ dravyato jagadākāśapradeśaparimāṇakaḥ [ ] lokād bahirabhāve syāl lokākāśasya vartanaṃ tasyaikadravyatāsiddher yuktaṃ kālopapāditaṃ [ ] dravyāśrayā iti khyāteḥ sūtre sminn avasīyate guṇāśrayā guṇatvād yā na guṇāḥ paramārthataḥ [ ] nirguṇā iti nirdeśāt kāryadravyasya vāryate guṇabhāvaḥ paradravyāśrayiṇo pīti nirṇayaḥ [ ] tadbhāvaḥ pariṇāmo tra paryāyaḥ prativarṇitaḥ guṇāc ca sahabhuvo bhinnaḥ kramavān dravyalakṣaṇam [ ] paryāya eva ca dvedhā sahakramavivartitaḥ śuddhāśuddhatvabhedena yathādravyaṃ dvidhoditaṃ [ ] tena naiva prasajyeta nayadvaividhyabādhanaṃ saṃkṣepato nyathā tryādinayasaṃkhyā na vāryate [ ]
atha ṣaṣṭho 'dhyāyaḥ [ ] athāsravaṃ vinirdeṣṭukāmaḥ prāgātmano ṃjasā kāyavāṅmanasāṃ karma yogo stīty āha karmaṇām [ ] kāyādivargaṇālaṃbapradeśaspaṃdanaṃ hi yat yuktaṃ kāyādikarmāsya sakriyatvaprasiddhitaḥ [ ] sa āsrava iha proktaḥ karmāgamanakāraṇaṃ puṃso trānupraveśena mithyātvāder aśeṣataḥ [ ] śubhaḥ puṇyasya vijñeyo 'śubhaḥ pāpasya sūtritaḥ saṃkṣepād dviprakāro pi pratyekaṃ sa dvidhāsravaḥ [ ] śubhāśubhaphalānāṃ tu pudgalānāṃ samāgamaḥ viśuddhetarakāyādihetus tattvāt svadṛṣṭavat [ ] dvaividhyāt tatphalaṃ caivam āsravo dvividhaḥ smṛtaḥ kāyādir akhilo yogaḥ so 'saṃkhyeyo viśeṣataḥ [ ] jñānāvaraṇavīryāṃtarāyayoḥ karmaṇor iha kṣayopaśamato 'naṃtabhedayoḥ sparddhakātmanoḥ [ ] prādurbhāvād anaṃtaḥ syād yogo 'naṃtanimittakaḥ anaṃtakarmahetutvād anaṃtātmāsravatvataḥ [ ] asaṃkhyeyo tha saṃkhyātādhyavasāyātmako 'ṅgināṃ saṃkhyātaś ca yathāyogaṃ saṃkṣepād dvividho 'py ayaṃ [ ] sa sāṃparāyikasya syāt sakaṣāyasya dehinaḥ īryāpathasya ca prokto 'kaṣāyasyeha sūtrataḥ [ ] kaṣaṇād ātmanāṃ ghātāt kaṣāyaḥ kugatipradaḥ krodhādiḥ saha tenātmā sakaṣāyaḥ pravartanāt [ ] kaṣāyarahitas tu syād akaṣāyaḥ praśāṃtitaḥ kaṣāyasya kṣayād veti pratipattavyam āgamāt [ ] samaṃtataḥ parābhūtiḥ saṃparāyaḥ parābhavaḥ jīvasya karmabhiḥ proktas tadarthaṃ sāṃparāyikaṃ [ ] karma mithyādṛgādīnām ārdracarmaṇi reṇuvat kaṣāyapicchile jīve sthitim āpnuvad ucyate [ ] īryā yogagatiḥ saivaṃ yathā yasya tad ucyate karmeryāpatham asyāstu śuṣkakuṭyeśmavac ciraṃ [ ] yogamātranimittaṃ tu puṃsyāsravad api sthitiḥ na prayāty anubhāgaṃ vā kaṣāyān sattvataḥ sadā [ ] kaṣāyahetukaṃ puṃsaḥ pārataṃtryaṃ samaṃtataḥ sattvāṃtarānapekṣīha padmam adhyagabhṛṃgavat [ ] kaṣāyavinivṛttau tu pārataṃtryaṃ nivartyate yatheha kasyacic chāṃtakaṣāyāvasthitikṣaṇe [ ] sāṃparāyikam atroktaṃ pūrvaṃ tasyeṃdriyādayaḥ bhedāḥ paṃcādisaṃkhyāḥ syuḥ pariṇāmaviśeṣataḥ [ ] tatra caityaśrutācāryapūjās tavādilakṣaṇā samyaktvavardhanī jñeyā vidbhiḥ samyaktvasatkriyā [ ] kucaityādipratiṣṭhādir yā mithyātvapravardhanī sā mithyātvakriyā bodhyā mithyātvodayasaṃsṛtā [ ] kāyādibhiḥ pareṣāṃ yad gamanādipravartanaṃ sadasatkāryasiddhyarthaṃ sā prayogakriyā matā [ ] na kāyavāṅmanoyogān no nivartayituṃ kṣamāḥ pudgalās tadupādānaṃ svahetudvayato nyathā [ ] saṃyatasya sataḥ puṃso 'saṃyamaṃ prati yad bhavet ābhimukhyaṃ samādānakriyā sā vṛttaghātinī [ ] īryāpathakriyā tatra proktā tatkarmahetukā iti paṃcakriyās tāvacchubhāśubhaphalāḥ smṛtāḥ [ ] krodhāveśāt pradoṣo yaḥ sāṃtaprādoṣikī kriyā tatkāryatvāt sahetutvāt krodhād anyā hy anīdṛśāt [ ] praduṣṭasyodyamo haṃtuṃ gaditā kāyikī kriyā hiṃsopakaraṇādānaṃ tathādhikaraṇakriyā [ ] duḥkhotpādanataṃtratvaṃ syāt kriyā pāritāpikī kriyā sā tāvatā bhinnā prathamā tatphalatvataḥ [ ] kaṣāyāc ceti paṃcaitāḥ prapattavyāḥ kriyāḥ parāḥ [ ] rāgārdrasya pramattasya surūpālokanāśayaḥ syād darśanakriyā sparśe spṛṣṭadhīḥ sparśanakriyā [ ] ete ceṃdriyato bhinne parispaṃdātmike mate jñānātmanaḥ kaṣāyāc ca tatphalatvāt tathāvratāt [ ] apūrvaprāṇighātārthopakaraṇapravartanaṃ kriyā prātyayikī jñeyā hiṃsāhetus tathā parā [ ] stryādisaṃpātideśe ṃtarmalotsargaḥ pramādinaḥ śaktasya yaḥ kriyeṣṭeha sā samaṃtānupātikī [ ] adṛṣṭe yo pramṛṣṭe ca sthāne nyāso yater api kāyādeḥ sā tv anābhogakriyā saitāś ca paṃca tāḥ [ ] paranirvartyakāryasya svayaṃ karaṇam atra yat sā svahastakriyāvadyapradhānā dhīmatāṃ matā [ ] pāpapravṛttāv anyeṣām abhyanujñānam ātmanā syān nisargakriyālasyādakṛtir vā sukarmaṇāṃ [ ] parācaritasāvadyaprakāśanam iha sphuṭaṃ vidāraṇakriyā tv anyā syād anyatra viśuddhitaḥ [ ] āvaśyakādiṣu khyātām arhadājñām upāsituṃ aśaktasyānyathākhyānād ājñāvyāpādikī kriyā [ ] śāṭhyālasya vaśād arhatproktācāravidhau tu yaḥ anādaraḥ sa eva syād anākāṃkṣakriyā vidāṃ [ ] etāḥ paṃca kriyāḥ proktāḥ parās tattvārthavedibhiḥ kaṣāyahetukā bhinnāḥ kaṣāyebhyaḥ kathaṃcana [ ] ched anādikriyāsaktacittatvaṃ svasya yad bhavet pareṇa tatkṛtau harṣaḥ sehāraṃbhakriyā matā [ ] parigrahāvināśārthā syāt pārigrahikī kriyā durvaktṛkavaco jñānādau sā māyādikriyā parā [ ] mithyādikāraṇāviṣṭadṛṣṭīkaraṇam atra yat praśaṃsādibhir uktānyā sā mithyādarśanakriyā [ ] vṛttamohodayāt puṃsām anivṛttiḥ kukarmaṇaḥ apratyākhyā kriyety etāḥ paṃca paṃca kriyāḥ smṛtāḥ [ ] tīvratvādiviśeṣebhyas teṣāṃ pratyekam īritaḥ baṃdhaḥ kaṣāyahetubhyo viśeṣo vyāsataḥ punaḥ [ ] na yuktaḥ sūtritaś citraḥ karmabaṃdhānurūpataḥ tac ca karma nṛṇāṃ tasmād iti hetuphalasthitiḥ [ ] tatrādhikaraṇaṃ jīvājīvā yasya viśeṣataḥ sāṃparāyikabhedānāṃ viśeṣaḥ pratisūtritaḥ [ ] jīvājīvādhikaraṇaṃ proktam ādyaṃ hi bhidyate saṃraṃbhādibhir ākhyātair viśeṣais tribhir ekaśaḥ [ ] yogais tannavadhā bhinnaṃ saptaviṃśatisaṃkhyakaṃ kṛtādibhiḥ punaś caitad bhaved aṣṭottaraṃ śataṃ [ ] kaṣāyair bhidyamānātmacaturbhir iti saṃgrahaḥ kaṣāyasthānabhedānāṃ sarveṣāṃ paramāgame [ ] tato dhikaraṇaṃ proktaṃ paraṃ nirvartanādayaḥ dvyādibhedās tad asya syād ajīvātmakam eva hi [ ] jīvājīvān samāśritya kaṣāyānugrahānvitān āsravā bahudhā bhinnāḥ syur nṛṇām iṃdriyādayaḥ [ ] bādhakābhāvanirṇītes tathā sarvatra sarvadā sarveṣāṃ sveṣṭanāt siddhās tīvratvādiviśiṣṭavat [ ] evaṃ bhūmā karmaṇām āsravo yaṃ sāmānyena khyāpitaḥ sāṃparāyī tatsāmarthyād anyam īryāpathasya prāhurdhvastāśeṣadoṣāśrayasya [ ] viśeṣeṇa punar jñānadṛṣṭyāvaraṇayor matāḥ tatpradoṣādayaḥ puṃsām āsravās te nubhāgagāḥ [ ] yatpradoṣādayo ye te tadāvaraṇapudgalāt naro nayaṃti bībhatsupradoṣādyā yathā karān [ ] duḥkhādīni yathoktāni svaparobhayagāni tu āsrāvayaṃti sarvasyāpy asātaphalapudgalān [ ] tajjātīyātmasaṃkleśaviśeṣatvād yathānale praveśādividhāyīni svasaṃvedyāni kānicit [ ] bhūtavratyanukaṃpādi sātakāraṇapudgalān jīvasya ḍhaukayaty evaṃ viśuddhyaṃgatvato yathā [ ] pathyauṣadhāvabodhādiḥ prasiddhaḥ kasyacid dvayoḥ sadasadvedyakarmāṇi tādṛśān pudgalānayaṃ [ ] kevalyādiṣu yo varṇavādaḥ syād āśaye nṛṇāṃ sa syād darśanamohasya tattvāśraddhānakāriṇaḥ [ ] āsravo yo hi yatra syād yad ācāre yadā sthitau yat praṇetari cāvarṇavādaḥ śraddhānaghāty asau [ ] śrotriyasya yathā madye tadādhārādikeṣu ca pratīto sau tathā tattve tato darśanamohakṛt [ ] tathā cāritramohasya kaṣāyodayato nṛṇāṃ syāt tīvrapariṇāmo yaḥ sa samāgamakāraṇaṃ [ ] yaḥ kaṣāyodayāt tīvraḥ pariṇāmaḥ sa ḍhaukayet cāritravātinaṃ bhāvaṃ kāmodreko yathā yateḥ [ ] kasyacit tādṛśasyāyaṃ vivādāpannavigrahaḥ tasmāt tatheti nirbādham anumānaṃ pravartate [ ] narakasyāyuṣo bhīṣṭaṃ bahvāraṃbhatvam āsravaḥ bhūyaḥ parigrahatvaṃ ca raudradhyānātiśāyi yat [ ] niṃdyaṃ dhāma nṛṇāṃ tāvat pāpādhānanibaṃdhanam siddhaṃ cāṃḍālakādīnāṃ dhenughātavidhāyinām [ ] tatprakarṣāt punaḥ siddhyed dhīnadhāmaprakṛṣṭatā tasya prakarṣaparyaṃtā tatprakarṣavyavasthitiḥ [ ] pāpānuṣṭhā kvacid ghātiparyaṃtatāratamyataḥ pariṇāmādivattatto raudradhyānam apaścimaṃ [ ] tasyāpakarṣato hīnagater apy apakṛṣṭatā siddheti bahudhā bhinnaṃ nārakāyur upeyate [ ] māyā tairyagyonasyety āyuṣaḥ kāraṇaṃ matā ārtadhyānād vinā nātra svābhyupāyavirodhataḥ [ ] apakṛṣṭaṃ hi yat pāpadhyānamārtaṃ tadīritaṃ niṃdyaṃ dhāma tathaivāprakṛṣṭaṃ tairyaggatis tataḥ [ ] prasiddham āyuṣo naikapradhānatvaṃ pramāṇataḥ tairyagyonasya siddhāṃte dṛṣṭeṣṭābhyām abādhitaṃ [ ] mānuṣasyāyuṣo jñeyam alpāraṃbhatvam āsravaḥ miśradhyānānvitam alpaparigrahatayā saha [ ] dharmamātreṇa saṃmiśraṃ mānuṣīṃ kurute gatiṃ sātāsātātmatanmiśraphalasaṃvartikā hi sā [ ] dharmādhikyāt sukhādhikyaṃ pāpādhikyāt punar nṛṇāṃ duḥkhādhikyam iti proktā bahudhā mānuṣī gatiḥ [ ] svabhāvamārdavaṃ ceti hetvaṃtarasamuccayaḥ mānuṣasyāyuṣas tad dhi miśradhyānopapādikaṃ [ ] niḥśīlavratatvaṃ ca sarveṣām āyuṣām iha tatra sarvasya saṃbhūter dhyānasyāsubhṛtāṃ śritau [ ] tasyaikasyāpi daivasyāyuṣaḥ saṃpratipattaye dharmadhyānānvitatvena nānyathātiprasaṃgataḥ [ ] samyaktvaṃ ceti taddhetusamuccayavacobalāt tasyaikasyāpi daivāyuḥkāraṇatvaviniścayaḥ [ ] sarvāpavādakaṃ sūtraṃ kecid vyācakṣate sati samyaktve nyāyuṣāṃ hetor viphalasya prasiddhitaḥ [ ] tatrāpracyutasamyaktvā jāyaṃte devanārakāḥ manuṣyeṣv iti naivedaṃ tadbādhakam itītare [ ] tanniḥśīlavratatvasya na bādhakam idaṃ viduḥ syād aśeṣāyuṣāṃ hetubhāvasiddheḥ kutaścana [ ] pṛthaksūtrasya nirdeśād dhetur vaimānikāyuṣaḥ samyaktvam iti vijñeyaṃ saṃyamāsaṃyamādivat [ ] samyagdṛṣṭer anaṃtānubaṃdhikrodhādyabhāvataḥ jīveṣv ajīvatā śraddhāpāyān mithyātvahānitaḥ [ ] hiṃsāyās tatsvabhāvāyā nivṛtteḥ śuddhivṛttitaḥ prakṛṣṭasyāyuṣo daivasyāsravo na virudhyate [ ] nāmnośubhasya hetuḥ syād yogānāṃ vakratā tathā visaṃvādanam anyasya saṃkleśād ātmabhedataḥ [ ] tatas tadviparītaṃ yat kiṃcit tatkāraṇaṃ viduḥ nāmnaḥ śubhasya śuddhātmaviśeṣatvāvasāyataḥ [ ] jinoddiṣṭeti nairgraṃthyamokṣavartmany aśaṃkanaṃ anākāṃkṣaṇam apy atrāmutra caitatphalāptaye [ ] vicikitsāny adṛṣṭīnāṃ praśaṃsāsaṃstavacyutiḥ mauḍhyādirahitatvaṃ ca viśuddhiḥ sā dṛśo matā [ ] saṃjñānādiṣu tadvatsu vādarotthānapekṣayā kaṣāyavinivṛttir vā vinayair munisaṃmataiḥ [ ] saṃpannatā samākhyātā mumukṣūṇām aśeṣataḥ saddṛṣṭyādiguṇasthānavartināṃ svānurūpataḥ [ ] saccāritravikalpeṣu vrataśīleṣv aśeṣataḥ niravadyānuvṛttir yān aticāraḥ sa teṣu vai [ ] saṃjñānabhāvanāyāṃ tu yā nityam upayuktatā jñānopayoga evāsau tadābhīkṣṇaṃ prasiddhitaḥ [ ] saṃsārād bhīrutābhīkṣṇaṃ saṃvegaḥ saddhiyāṃ mataḥ na tu mithyādṛśāṃ teṣāṃ saṃsārasyāprasiddhitaḥ [ ] śaktitas tyāga udgītaḥ prītyā svasyātisarjanaṃ nātmapīḍākaraṃ nāpi saṃpady anatisarjanaṃ [ ] anigūhitavīryasya samyagmārgāvirodhataḥ kāyakleśaḥ samākhyātaṃ viśuddhaṃ śaktitas tapaḥ [ ] bhāṃḍāgārāgnisaṃśāṃtisamaṃ munigaṇasya yat tapaḥsaṃrakṣaṇaṃ sādhusamādhiḥ sa udīritaḥ [ ] guṇiduḥkhanipāte tu niravadyavidhānataḥ tasyāpaharaṇaṃ proktaṃ vaiyāvṛtyam aniṃditaṃ [ ] arhatsv ācāryavaryeṣu bahuśrutayatiṣv api jaine pravacane cāpi bhaktiḥ pratyupavarṇitā [ ] bhāvaśuddhyā nutā śaśvadanurāgaparair alaṃ viparyāsitacittasyāpy anyathābhāvahānitaḥ [ ] āvaśyakakriyāṇāṃ tu yathākālaṃ pravartanā āvaśyakāparihāṇiḥ ṣaṇṇām api yathāgamaṃ [ ] mārgaprabhāvanā jñānatapor hatpūjanādibhiḥ dharmaprakāśanaṃ śuddhabauddhānāṃ paramārthataḥ [ ] vatsalatvaṃ punar vatse dhenuvatsaṃ prakīrtitaṃ jaine pravacane samyakchraddhānajñānavatsv api [ ] dṛgviśuddhyādayo nāmnas tīrthakṛttvasya hetavaḥ samastā vyastarūpā vā dṛgviśuddhyā samanvitāḥ [ ] sarvātiśāyi tatpuṇyaṃ trailokyādhipatitvakṛt pravṛttyātiśayādīnāṃ nirvartakam apīśituḥ [ ] paraniṃdādayo nīcair gotrasyāsravaṇaṃ mataṃ teṣāṃ tadanurūpatvād anyathānupapattitaḥ [ ] uttarasyāsravaḥ siddhaḥ sāmarthyāt tadviparyayaḥ nīcair vṛttir anutsekas tathaivāmalavigraha [ ] sarvasyāpy aṃtarāyasyāsravaḥ syāt prāṇinām iha vighnasya karaṇāt tasya tathāyogyatvaniścayāt [ ] pravartamānadānādipratiṣedhasya bhāvanā āsrāvikāṃtarāyasya dṛṣṭatadbhāvanā yathā [ ] iti pratyekam ākhyātaḥ karmaṇām āsravaḥ śubhaḥ puṇyānām aśubhaḥ pāparūpāṇāṃ śuddhyaśuddhitaḥ [ ] yādṛśāḥ svapariṇāmaviśeṣā yasya hetuvaśato 'subhṛtaḥ syuḥ tādṛśāny upapataṃti tam agre svānubhāgakarakarmarajāṃsi [ ]
oṃ atha saptamo 'dhyāyaḥ [ ] atha puṇyāsravaḥ proktaḥ prāgvrataṃ viratiś ca tat hiṃsādibhya iti dhvastaṃ guṇebhyo viratirvratam [ ] deśato ṇuvrataṃ ceha sarvatas tu mahadvrataṃ deśasarvaviśuddhātmabhedāt saṃjñānino mataṃ [ ] tatsthairyārthaṃ vidhātavyā bhāvanāḥ paṃca paṃca tu tadasthairye yatīnāṃ hi saṃbhāvyo nottaro guṇaḥ [ ] syātāṃ me vāṅmanoguptī prathamavrataśuddhaye tatheryādānanikṣepasamitī vīkṣyabhojanaḥ [ ] krodhalobhabhayaṃ hāsyaṃ pratyākhyānamṛtodbhavaṃ tattvānukūlam ābhāṣe dvitīyavrataśuddhaye [ ] śūnyaṃ mocitam āvāsam adhitiṣṭhāmi śuddhidaṃ paroparodhaṃ muṃcāmi bhaikṣyaśuddhiṃ karomy ahaṃ [ ] sadharmabhiḥ samaṃ śaśvadavisaṃvādam ādriye asteyātikramadhvaṃsahetutadvratavṛddhaye [ ] strīṇāṃ rāgakathāṃ jahyāṃ manohāryaṃgavīkṣaṇaṃ pūrvaratasmṛtiṃ vṛṣyam iṣṭaṃ rasam asaṃśayam [ ] tathā śarīrasaṃskāraṃ raticeto bhivṛddhikaṃ caturthavratarakṣārthaṃ satataṃ yatamānasaḥ [ ] sarvākṣaviṣayeṣv iṣṭāniṣṭopasthiteṣv iha rāgadveṣau tyajāmy evaṃ paṃcamavrataśuddhaye [ ] pratyekam iti paṃcānāṃ vratānāṃ bhāvanā matāḥ paṃca paṃca sadā saṃtu niḥśreyasaphalapradāḥ [ ] bhāvyaṃ niḥśreyasaṃ bhāvyo bhāvako bhāvanā punaḥ tadupāya iti tryaṃśapūrṇāḥ syādvādināṃ giraḥ [ ] hiṃsanādiṣv ihāpāyadarśanaṃ bhāvanā yathā mayāmutra tathāvadyadarśanaṃ pravidhīyate [ ] bhāvanā dehināṃ tatra kartavyā duḥkham eva vā duḥkhātmakabhavodbhūtihetutvād avrataṃ hi tat [ ] maitryādayo viśuddhyaṃgāḥ sattvādiṣu yathāgamaṃ bhāvanāḥ saṃbhavaṃty aṃtarnaikāṃtāśrayaṇe tu tāḥ [ ] maitrī sattveṣu kartavyā yathā tadvadguṇādhike kliśyamāne 'vineye ca sattvarūpāviśeṣataḥ [ ] kāruṇyaṃ ca samasteṣu saṃsārakleśabhāgiṣu mādhyasthyaṃ vītarāgāṇāṃ na kvacid vinidhīyate [ ] bhavyatvaṃ guṇam ālokya pramodākhiladehiṣu kartavya iti tatrāyaṃ vibhāgo mukhyarūpataḥ [ ] jagatkāyasvabhāvau vā bhāvane bhāvitātmanāṃ saṃvegāya viraktyarthaṃ tattvatas tatprabodhataḥ [ ] bhāvanā kalpanāmātraṃ yeṣām arthānapekṣayā teṣāṃ nārthas tato 'niṣṭakalpanāta ivepsitam [ ] anaṃtānaṃtatattvasya kaścid artheṣu bhāvyate sann eveti yathārthaiva bhāvanā no vyavasthitā [ ] hiṃsātra prāṇināṃ prāṇavyaparopaṇam udīritā pramattayogato nāto muneḥ saṃyatanātmanaḥ [ ] apraśastam asadbodham abhidhānaṃ yad asya tat pramattasyānṛtaṃ nānyasyety āhuḥ saty avādinaḥ [ ] tena svaparasaṃtāpakāraṇaṃ yad vacoṃgināṃ yathādṛṣṭārtham apy atra tad asatyaṃ vibhāvyate [ ] mithyārtham api hiṃsādiniṣedha vacanaṃ mataṃ satyaṃ tatsatsu sādhutvād ahiṃsāvrataśuddhidam [ ] pramattayogato yat syād adattādānam ātmanaḥ steyaṃ tatsūtritaṃ dānādānayogyārthagocaram [ ] tena sāmānyato 'dattam ādadānasya sanmuneḥ sarinnirjharaṇādyaṃbhaḥ śuṣkagomayakhaṃḍakam [ ] bhasmādi vā svayaṃ muktaṃ picchālābūphalādikaṃ prāsuktaṃ na bhavet steyaṃ pramattatvasya hānitaḥ [ ] tathā maithunam abrahma pramattasyaiva tatpunaḥ pramādarahitānāṃ hi jātucittadasaṃbhavaḥ [ ] yasya hiṃsānṛtādīni tasya saṃti parasparaṃ avinābhāvavadbhāvād eṣām iti ca durbudhāḥ [ ] tato hiṃsāvrataṃ yasya yasya sarvavratakṣatiḥ tad eva paṃcadhā bhinnaṃ kāṃścit prati mahāvraṃta [ ] mūrchā parigrahaḥ so pi nāpramattasya yujyate tayā vinā na vastrādigrahaṇaṃ kasyacit tataḥ [ ] niḥśalyo tra vratī jñeyaḥ śalyāni trīṇi tattvataḥ mithyātvādīnī sadbhāve vratāśayaviparyayaḥ [ ] so py agāryanagāraś ca bhāvāgārasya bhāvataḥ abhāvāc ceti pāṃthāder nānagāratvasaṃbhavaḥ [ ] tatra cāṇuvratogārī sāmarthyāt syān mahāvrataḥ anagāra iti jñeyam atra sūtrāṃtarād vinā [ ] digdeśānarthadaṃḍebhyo viratir yā viśuddhikṛt sāmāyikaṃ tridhā śuddhaṃ trikālaṃ yad udāhṛtaṃ [ ] yaḥ proṣadhopavāsaś ca yathāvidhi niveditaḥ parimāṇaṃ ca yat svasyopabhogaparibhogayoḥ [ ] āhārabheṣajāvāsapustavastrādigocaraḥ saṃvibhāgo vrataṃ yat syād yogyāyātithaye svayaṃ [ ] tatsaṃpannaś ca niśceyo 'gārīti dvādaśoditāḥ dīkṣābhedā gṛhasthasya te samyaktvapuraḥsarā [ ] samyakkāyakaṣāyāṇāṃ tvakṣā sallekhanātra tāṃ joṣitā sevitā prītyā sa vratī māraṇāṃtikīṃ [ ] mṛtyukāraṇasaṃpātakālam āsthitya sadvrataṃ rakṣituṃ śakyabhāvena nānyathety apramattagaṃ [ ] pṛthaksūtrasya sāmarthyāc ca sāgārānagārayoḥ sallekhanasya seveti pratipattavyam aṃjasā [ ] nānānivṛttipariṇāmaviśeṣasiddher ekasya nurbahuvidhavratam arthabhedāt yuktaṃ kramākramavivartibhidātmakasya nānyasya jātu nayabādhitavigrahasya [ ] samyagdṛṣṭer atīcārāḥ paṃca śaṃkādayaḥ smṛtāḥ teṣu satsu hi tattvārthaśraddhānaṃ na viśuddhyati [ ] paṃca paṃca vrateṣv evaṃ śīleṣu ca yathākramaṃ vakṣyaṃte taḥ paraṃ śeṣe iti sūtre tidiśyatām [ ] tatrāhiṃsāvratasyātīcārā baṃdhādayaḥ śrutāḥ teṣāṃ krodhādijanmatvāt krodhādes tanmalatvataḥ [ ] tathā mithyopadeśādyā dvitīyasya vratasya te teṣām anṛtamūlatvāt tadvat tena virodhataḥ [ ] proktāḥ stenaprayogādyāḥ paṃcāsteyavratasya te steyahetutvatas teṣaṃ bhāve tanmalinatvataḥ [ ] caturthasya vratasyānyavivāhakaraṇādayaḥ paṃcaite tikramā brahmavidhātakaraṇakṣamāḥ [ ] kṣetravāstvādiṣūpāttapramāṇātikramāḥ svayaṃ paṃca saṃtoṣanirghātahetavo ṃtyavratasya te [ ] ūrdhvatikramaṇādyāḥ syuḥ śīlasyādyasya paṃca te tadviratyupaghātitvāt teṣāṃ tad dhi malatvataḥ [ ] dvitīyasya tu śīlasya te paṃcānayanādayaḥ svadeśavirater bādhā taiḥ saṃkleśavidhānataḥ [ ] kaṃdarpādyās tṛtīyasya śīlasyehopasūtritāḥ teṣām anarthadaṃḍebhyo virater bādhakatvataḥ [ ] yogaduḥpraṇidhānādyāś caturthasya vyatikramāḥ śīlasya tadvighātitvāt teṣāṃ tanmalatāsthiteḥ [ ] apratyavekṣitetyādyās tatroktāḥ paṃcamasya te śīlasyātikramāḥ paṃca tadvighātasya hetavaḥ [ ] tathā taccittasaṃbaṃdhāhārādyāḥ paṃca sūtritāḥ te tra ṣaṣṭhasya śīlasya tadvirodhanahetavaḥ [ ] smṛtāḥ sacittanikṣepapramukhās te vyatikramāḥ saptamasyeha śīlasya tadvighātavidhāyinaḥ [ ] vijñeyā jīvitāśaṃsāpramukhāḥ paṃca tattvataḥ proktasallekhanāyās te viśuddhikṣatihetavaḥ [ ] svaṃ dhanaṃ syāt parityāgo tisargas tasya nu sphuṭaḥ taddānam iti nirdeśo tiprasaṃganivṛttaye [ ] anugrahārtham ity etadviśeṣaṇam udīritaṃ tena svamāṃsadānādi niṣiddhaṃ paramāpakṛt [ ] tadviśeṣaḥ prapaṃcena syād vidhyādiviśeṣataḥ dātuḥ śuddhiviśeṣāya samyagbodhasya viśrutaḥ [ ] vidhyādīnāṃ viśeṣaḥ syāt svakāraṇaviśeṣataḥ tatkāraṇaṃ punar bāhyamāṃtaraṃ cāpy anekadhā [ ] pātraparigrahādibhyo vidhibhyas tāvad āsravaḥ dātuḥ puṇyasya saṃkleśarahitebhyo tiśāyinaḥ [ ] kiṃcit saṃkleśayuktebhyo madhyamasyopavarṇitaḥ bṛhatsaṃkleśayuktebhyaḥ svalpasyeti vibhidyate [ ] nikṛṣṭamadhyamotkṛṣṭaviśuddhibhyo viparyayaḥ tebhyaḥ syād iti saṃkṣepād uktaṃ sūribhiraṃjasā [ ] guṇavṛddhikaraṃ dravyaṃ pātre 'pātre samarpitaṃ doṣavṛddhikaraṃ pāpakāri miśraṃ tu miśrakṛt [ ] dātā guṇānvitaḥ śuddhaḥ paraṃ puṇyam avāpnuyāt doṣānvitas tv aśuddhātmā paraṃ pāpam upaiti saḥ [ ] guṇadoṣānvitaḥ śuddhāśuddhabhāve samaśnute bahudhā madhyamaṃ puṇyaṃ pāpaṃ ceti viniścayaḥ [ ] dattam annaṃ supātrāya svalpam apy urupuṇyakṛt madhyamāya tu pātrāya puṇyaṃ madhyamam ānayet [ ] kaniṣṭhāya punaḥ svalpam apātrāyāphalaṃ viduḥ pāpāpāpaṃ phalaṃ ceti sūrayaḥ saṃpracakṣate [ ] apātrebhyo dattaṃ bhavati saphalaṃ kiṃcid aparaṃ na pātrebhyo vittaṃ pracuram uditaṃ jātucid iha adattaṃ pātrebhyo janayati śubhaṃ bhūri gahanaṃ jano 'yaṃ syādvādaṃ katham iva niruktaṃ prabhavati [ ]
atha aṣṭamo'dhyāyaḥ [ ] atha baṃdhe 'bhidhātavye 'bhidhīyaṃte sya hetavaḥ nirhetukatvakūṭasthākāraṇatvanivṛttaye [ ] syur baṃdhahetavaḥ puṃsaḥ svamithyādarśanādayaḥ tasya tadbhāvabhāvitvād anyathā tadasiddhitaḥ [ ] tadviparyayato mokṣahetavaḥ paṃca sūtritāḥ sāmarthyād atra nāto sti virodhaḥ sarvathā girām [ ] pudgalānāṃ nurādānaṃ vaṃdho dravyātmakaḥ smṛtaḥ yogyānāṃ karmaṇaḥ sveṣṭāniṣṭanirvartanātmanaḥ [ ] pudgalāḥ karmaṇo yogyāḥ kecin mūrtārthayogataḥ pacyamānatvataḥ śālibījādivad itīritaṃ [ ] tān ādatte svayaṃ jīvaḥ sakaṣāyatvataḥ sa tu yo nādatte prasiddho hi kaṣāyarahitaḥ paraḥ [ ] sakaṣāyaḥ sakarmatvajīvaḥ syāt pūrvato nyataḥ kaṣāyebhyaḥ sakarmeti nānyathā bhavabhāgayaṃ [ ] jīvaḥ saṃbaṃdha iti vā sakaṣāyatvato nyathā tasya muktātmavattattvānupapatteḥ prasiddhitaḥ [ ] sakaṣāyatvam adhyakṣāt svasaṃvedanataḥ svayaṃ kopavān aham ity evaṃ rūpāt siddhaṃ hi dehināṃ [ ] pradhānaṃ sakaṣāyaṃ tu syān naivācetanatvataḥ kuṃbhādivat tato nedaṃ saṃbaṃdham iti nirṇayaḥ [ ] karmaṇaḥ sakaṣāyatvaṃ jīvasyeti na śāśvataṃ sahetukasya kauṭasthyavirodhāt kuṭakādivat [ ] tato nu muktyabhāvo nu kutaścit karmaṇaḥ kṣaye sakaṣāyatvavidhvaṃsāvidhvaṃsakṛtasiddhitaḥ [ ] jīvo hi karmaṇo yogyān ādatte pudgalān svayaṃ sakaṣāyas tataḥ pūrvaṃ śuddhasya tadasaṃbhavāt [ ] taddravyakarmabhir baṃdhaḥ pudgalātmabhir ātmanaḥ siddho nātmaguṇair evaṃ kaṣāyair bhāvakarmabhiḥ [ ] anyathā sakaṣāyatvapratyayasya virodhataḥ saṃsāriṇāṃ śarīrādisaṃbaṃdhasyaiva hānitaḥ [ ] tasya baṃdhasya vidhayaḥ prakṛtyādyāḥ susūtritāḥ tathāvidhatvasaṃsiddher baṃdhavyānāṃ kathaṃcana [ ] sthityādiparyayonmuktaiḥ karmayogyair hi pudgalaiḥ prakṛtyāvasthitair baṃdhaḥ prathamo tra vivakṣitaḥ [ ] pratipradeśam etair nu mato baṃdhaḥ pradeśataḥ sthityādiparyayākrāṃtaiḥ sa sthityādiviśeṣitaḥ [ ] karmaprakṛtayas tatra syur jñānāvaraṇādayaḥ tādṛkkāryaviśeṣānumeyāḥ karaṇaśaktivat [ ] te ca paṃcādibhedāḥ syur yathākramam itīraṇāt kāryaprabhedataḥ sādhyāḥ sadbhiḥ prakṛtayoparāḥ [ ] matyādīnāṃ hi paṃcānāṃ jñānānāṃ paṃca veditaṃ karmāvaraṇam anyasya hetor bhāve py abhāvataḥ [ ] caturṇāṃ cakṣurādīnāṃ darśanānāṃ caturvidhaṃ nidrādayaś ca paṃceti nava prakṛtayosya tāḥ [ ] dvedhā tu sadasadvedye sātetarakṛtād ime prakṛtī vedanīyasya nānyathā tadvyavasthitiḥ [ ] darśanetyādisūtreṇa mohanīyasya karmaṇaḥ aṣṭāviṃśatir ākhyātās tāvad vā kāryadarśanāt [ ] nārakādīni catvāri cāyūṃṣi bhavabhedataḥ siddhāni tadabhāve sya prāṇināmavyavasthiteḥ [ ] dvicatvāriṃśadākhyātā gatināmādayas tathā nāmnaḥ prakṛtibhedās te numīyaṃte svakāryataḥ [ ] prādhānyaṃ sarvanāmabhyaḥ śatebhyaḥ śuddhijanmanaḥ bodhyaṃ tīrthakaratvasya bhavāṃte phaladāyinaḥ [ ] uccair nīcaiś ca gotraṃ syād dvibhedaṃ dehinām iha tathā saṃśabdanasyānyahetuhīnasya siddhitaḥ [ ] dānādīnāṃ tu paṃcānām aṃtarāyāḥ prasūtritāḥ paṃca dānādivighnasya tatkāryasya viśeṣataḥ [ ] evaṃ prakṛtibhir baṃdhaḥ karmabhir viniveditaḥ ādyaḥ prakṛtibaṃdho tra jīvasyānekadhā sthitaḥ [ ] yavatām anubhavo stu phalānāṃ dṛṣṭahetughaṭanāc ca janānāṃ tāvatīha gaṇanā prakṛtīs tāḥ karmaṇām anuminotu mahātmā [ ] āditas tisṛṇāṃ karmaprakṛtīnāṃ parā sthitiḥ aṃtarāyasya ca proktā tatphalasya prakarṣataḥ [ ] sāgaropamakoṭīnāṃ koṭyas triṃśat tadanyathā tadabhāve pramāṇasyābhāvāt sā kena bādhyate [ ] saptatir mohanīyasya viṃśatir nāmagotrayoḥ iti sūtradvayaṃ bādhavarjam etena varṇitam [ ] tathāyuṣas trayastriṃśatsāgaropamasaṃkhyayā paramasthitinirṇītir iti sākalyataḥ smṛtā [ ] adhunā vedanīyasya muhūrtā dvādaśa sthitiḥ sāmarthyān madhyamā madhye 'nekadhā saṃpratīyate [ ] sā nāmagotrayor aṣṭau muhūrtā iti vartanāt yām ādayo vyavacchinnāḥ kāmaṃ madhye stu madhyamā [ ] śeṣāṇāṃ karmaṇām aṃtarmuhūrtā ceti kārtsnyataḥ jaghanyam adhyamotkṛṣṭā sthitiryā pratipāditā [ ] tayā viśeṣitair baṃdhaḥ karmabhiḥ svayam āhṛtaiḥ sthitibaṃdho vaboddhavyastatprādhānyavivakṣayā [ ] sthityā kevalayā baṃdhas tadvacchūnyair na yujyate tadvadāśritayā tv asti bhūmibhūdharayor iva [ ] sthitiśūnyāni karmāṇi niranvayavināśataḥ pradīpādivad ity etatsthiteḥ siddhāni dhāryate [ ] vipāko nubhavo jñeyaḥ pudgalādimukhena tu karmaṇāṃ phalaniṣpattau sāmarthyāyogato nyathā [ ] sāmarthyān nāmabhedena jñāyetānvarthanāmatā nurjñānāvaraṇādīnāṃ karmaṇām anyathā smṛteḥ [ ] tathā cānubhavaprāptair ātmanaḥ karmabhir bhavet eṣo nubhavabaṃdho syānyāsravasya viśeṣataḥ [ ] tataś ca nirjarety etatsaṃkṣepārtham ihoditaṃ nirjarāprastuter agre py etadbhedaprasiddhaye [ ] yathākālaṃ vipākena nirjarā karmaṇām iyaṃ vakṣyamāṇā punar jīvasyopakramanibaṃdhanā [ ] prāganuktā samuccāryā caśabdenātra sā punaḥ tapasā nirjarā ceti niyamo na nirucyate [ ] phalaṃ dattvā nivartaṃte dravyakarmāṇi dehinaḥ tenāhṛtatvataḥ svādyādyāhāradravyavatsvayaṃ [ ] bhāvakarmāṇi naśyaṃti tannivṛttyaviśeṣataḥ tatkāryatvād yathāgnyādināśe dhūmādivṛttayaḥ [ ] tataḥ phalopabhoge pi karmaṇāṃ na kṣayo nṛṇāṃ pādapādivad ity etadvaco pāstaṃ kunītikaṃ [ ] pārataṃtryam akurvāṇāḥ puṃso ye karmapudgalāḥ karmatvena viśiṣṭās te saṃto py atrāṃbarādivat [ ] nāmānvarthaṃ padākhyātaṃ pratyayās tasya hetavaḥ pradeśāḥ karmaṇo 'naṃtānaṃtamānaviśeṣitāḥ [ ] skaṃdhātmanā virudhyaṃte na pramāṇena tattvataḥ skaṃdhābhāve kṣavijñānābhāvāt sarvā gṛhāgate [ ] sarveṣv ātmapradeśeṣu na kiyatsucid eva te tatphalasya tathā vitte nīre kṣīrapradeśavat [ ] sūkṣmaśabdena ca yogyasvabhāvagrahaṇāya te pudgalāḥ pratipādyaṃte sthūlānāṃ tadasaṃbhavāt [ ] ekakṣetrāvagāhābhidhānaṃ kṣetrāṃtarasya tat nivṛttyarthaṃ sthitāḥ syāt tu kriyāṃtaranivṛttaye [ ] atyaṃtaniviḍāvasthāvagāho rthāt pratīyate tena te vasthitās tatra gomaye dhūmarāśivat [ ] bhūyaḥ pradeśam ekatra pradeśe dravyam īkṣyate paramāṇau yathā kṣmābhṛt kulaṃ naiveti kecana [ ] teṣām alpapradeśasthair ghanaiḥ karpāsapiṃḍakaiḥ anyaikāṃtikatā hetor bhūyodeśair asaṃśayam [ ] yogaḥ pūrvoditastasya viśeṣāt kāraṇāt tathā sthitās te tra vinā hetor niyatāvasthitikṣateḥ [ ] sarveṣv asarveṣv ete kvacid eva bhaven na tu sarvato vacanād eva pratipattavyam aṃjasā [ ] iti pradeśair yo baṃdhaḥ karmaskaṃdhādibhir mataḥ sa nuḥ pradeśabaṃdhaḥ syād eṣa baṃdho vilakṣaṇaḥ [ ] so yaṃ kāraṇabhedena kāryabhedena cāsthitaḥ svabhāvasya ca bhedena karmabaṃdhaś caturvidhaḥ [ ] baddhaspṛṣṭādibhedenāvasthitādibhidāpi ca dravyādibhedato nāmādiprabhedena vā tathā [ ] vinā prakṛtibaṃdhān na syur jñānāvaraṇādayaḥ kāryabhedāt svayaṃ siddhāḥ sthitibaṃdhād vinā sthirāḥ [ ] na cānubhavabaṃdhena vinānubhavanaṃ nṛṇāṃ pradeśabaṃdhataḥ kṛtsnair naikair na vyāpyavṛttaye [ ] evaṃ kāryaviśeṣebhyo viśeṣo baṃdhaniṣṭhitaḥ pratyeyo nekadhā yukter āgamāc ca tathāvidhāt [ ] puṇyāsravoktisāmarthyāt puṇyabaṃdho 'vagamyate sadvedyādīni catvāri tatpuṇyam iha sūtritaṃ [ ] yasyodayāt sukhaṃ tat syāt sadvedyaṃ dehināṃ tathā śubham āyus tridhā yasya phalaṃ śubhabhavatrayaṃ [ ] saptatriṃśadvikalpaṃ tu śubhaṃ nāma tathā phalaṃ uccair gotraṃ śubhaṃ prāhuḥ śubhasaṃśabdanārthakam [ ] iti kāryānumeyaṃ taddvicatvāriṃśadātmani pāpāsravoktisāmarthyāt pāpabaṃdho vyavasthitaḥ [ ] duḥkhādibhyo 'śubhebhyas tatphalebhyas tv anumīyate hetubhyo dṛśyamānebhyas tajjanmād vyabhicārataḥ [ ] evaṃ saṃkṣepataḥ karmabaṃdho dvedhāvatiṣṭhate puṇyapāpātiriktasya tasyātyaṃtam asaṃbhavāt [ ] puṇyaṃ puṇyānubaṃdhīṣṭaṃ pāpaṃ pāpānubaṃdhi ca kiṃcit pāpānubaṃdhi syāt kiṃcit puṇyānubaṃdhi ca [ ] yathārtho rthānubaṃdhī syān nyāyācaraṇapūrvakaḥ tathānartho pi cāṃbhodhisamuttārādir arthakṛt [ ] anyāyācaraṇāyātas tadvadartho py anarthakṛt anartho pīti nirṇītam udāharaṇam aṃjasā [ ] avasīyati prathamakam uta saṃpadāṃ padaṃ samanubhavaṃti vaṃdyapādāḥ tadanu ca vipadaṃ garīyasīṃ dadhati parām api niṃdyavṛttitāṃ [ ] yad iha tad ihamuttarainaso nijasukṛtasya phalaṃ vadaṃti tajjñāḥ tadaparam api cādimainasaḥ sukṛtaparasya viparyayeṇa vṛtteḥ [ ]
atha navamo 'dhyāyaḥ [ ] athāsravanirodhaḥ syāt saṃvaro 'pūrvakarmaṇāṃ kāraṇasya nirodhe hi baṃdhakāryasya nodayaḥ [ ] āsravaḥ kāraṇaṃ baṃdhe siddhas tadbhāvabhāvataḥ tannirodhe virudhyeta nātmā saṃvṛtarūpabhṛt [ ] saṃvaraḥ pūrvabaṃdhasya nirodha iti bhāṣitaṃ na yuktam āsrave saty apy etadbādhānuṣaṃgataḥ [ ] sa cāsravanirodhaḥ syād guptyādibhir udīritaiḥ tatkāraṇavipakṣatvāt teṣām iti viniścayaḥ [ ] tapasā nirjarā ca syāt saṃvaraś ceti sūtritaṃ saṃcitāpūrvākarmāptivipakṣatvena tasya nu [ ] yogānāṃ nigrahaḥ samyagguptis tredhā tayottamaḥ saṃvaro baṃdhahetūnāṃ pratipakṣasvabhāvayā [ ] ayogaḥ kevalī sarvaṃ saṃvaraṃ pratipadyate dravyato bhāvataś ceti paraṃ śreyaḥ samaśnute [ ] samyakprabhṛtayaḥ paṃceryādyāḥ samitayaḥ smṛtāḥ asaṃyamabhavasyābhirāsravasya nirodhanaṃ [ ] tadvipakṣatvatas tāsām iti deśena saṃvaraḥ samitau vartamānānāṃ saṃyatānāṃ yathāyathaṃ [ ] dṛṣṭakāryānapekṣāṇi kṣamādīny uttamāni tu syād dharmaḥ samitibhyo 'nyaḥkrodhādipratipakṣataḥ [ ] tannimittāsravadhvaṃsī yathāyogaṃ sa deśataḥ saṃvarasya bhaved dhetur asaṃyatadṛgādiṣu [ ] anuprekṣāḥ prakīrtyaṃte nityatvādyanuciṃtanaṃ dvādaśātrānanuprekṣāvipakṣatvān munīśvaraiḥ [ ] anityatvādayo dharmāḥ saṃty ātmādiṣu tāttvikāḥ tathā sādhanasadbhāvāḥ sarveṣāṃ śeṣatattvavat [ ] tato nuciṃtanaṃ teṣāṃ nāsatāṃ kalpitātmanāṃ nāpy anarthakam iṣṭasya saṃvarasya prasiddhitaḥ [ ] mārgācyavanahetutvaṃ parīṣahajayasya sat parīṣahājaye mārgacyavanasya pratītitaḥ [ ] nirjarākāraṇatvaṃ ca tapaḥsiddhiparatvataḥ tadabhāve tapolopān nirjarā kvātiśaktitaḥ [ ] pariṣoḍhavyatāṃ prāptās tasmād ete parīṣahāḥ parīṣahajayotthānām āsravāṇāṃ virodhataḥ [ ] te ca kṣudādayaḥ proktā dvāviṃśatir asaṃśayaṃ pariṣahyatayā teṣāṃ tattvasiddhir viśuddhaye [ ] syuḥ sūkṣmasāṃparāye ca caturdaśa parīṣahāḥ chadmasthavītarāge ca tato nyeṣām asaṃbhavāt [ ] chadmasthavītarāge hi mohābhāvān na tatkṛtāḥ aṣṭau pariṣahāḥ saṃti tathāto nye caturdaśa [ ] te sūkṣmasāṃparāye pi tathā kiṃcitkaratvataḥ sato pi mohanīyasya sūkṣmasyeti pratīyate [ ] vedanīyanimittās te mā bhūvaṃs tata eva cet vyaktirūpā na saṃty eva śaktirūpeṇa tatra te [ ] mohanīyasahāyasya vedanīyasya tatphalaṃ kevalasyāpi tadbhāve tiprasaṃgo hi dustyajaḥ [ ] ekādaśa jine saṃti śaktitas te parīṣahāḥ vyaktito neti sāmarthyād vyākhyānadvayam iṣyate [ ] leśyaikadeśayogasya sadbhāvād upacaryate yathā leśyā jine tadvadvedanīyasya tattvataḥ [ ] ghātihatyupacaryaṃte sattāmātrāt parīṣahāḥ chadmasthavītarāgasya yatheti pariniścitaṃ [ ] na kṣudāder abhivyaktis tatra taddhetubhāvataḥ yogaśūnye jine yadvadanyathātiprasaṃgataḥ [ ] naikaṃ hetuḥ kṣudādīnāṃ vyaktau cedaṃ pratīyate tasya mohodayād vyakter asadvedyodaye pi ca [ ] kṣāmodaratvasaṃpattau mohāpāye na sekṣyate satyāhārābhilāpe pi nāsadvedyodayādṛte [ ] na bhojanopayogasyāsattvenāpy anudīraṇā asātāvedanīyasya na cāhārekṣaṇād vinā [ ] kṣud ity aśeṣasāmagrījanyābhivyajyate kathaṃ tadvaikalye sayogasya pipāsāder ayogataḥ [ ] kṣudādivedanodbhūtau nārhato 'naṃtaśarmatā nirāhārasya cāśaktau sthātuṃ nānaṃtaśaktitā [ ] nityopayuktabodhasya na ca saṃjñāsti bhojane pāne ceti kṣudādīnāṃ nābhivyaktir jinādhipe [ ] bādaraḥ sāṃparāyo sti yeṣāṃ sarve parīṣahāḥ saṃti teṣāṃ nimittasya sākalyād vyaktirūpataḥ [ ] jñānāvaraṇaniṣpādye prajñājñāne parīṣahau prajñāvalepanirvṛtter jñānāvaraṇato nyataḥ [ ] adarśanam ihārthānām aśraddhānaṃ hi tad bhavet sati darśanamohe 'sya na jñānāt prāgadarśanaṃ [ ] aṃtarāyo tra lābhasya tadyogyorthād viśeṣataḥ kāraṇasya viśeṣād dhi viśeṣaḥ kāryagaḥ sthitaḥ [ ] nāgnyādyāḥ sapta cāritramohe sati parīṣahāḥ sāmānyato viśeṣāc ca tadviśeṣeṣu terthataḥ [ ] jñānāvaraṇamohāṃtarāyasaṃbhūtayo matāḥ ity ekādaśa te teṣām abhāve tat kvacit sadā [ ] śeṣāḥ syur vedanīye te samagrasahakāriṇi iti sarvatra vijñeyam asādhāraṇakāraṇaṃ [ ] sakṛdekādayo bhājyāḥ kvacid ekān na viṃśatiḥ viṃśatyāder asaṃbhūter virodhād anyathāpi vā [ ] ity ukter niyamābhāvaḥ siddhas teṣāṃ samudbhave sahakārivihīnatvaproktahetor aśaktitaḥ [ ] sāmāyikādi cāritraṃ sūtritaṃ paṃcadhā tataḥ saṃvaraḥ karmaṇāṃ jñeyo cāritrāpekṣajanmanāṃ [ ] dharmāṃtarbhūtam apy etatsaṃyamagrahaṇād iha punar uktaṃ pradhānatvakhyātaye nirvṛtiṃ prati [ ] ṣoḍhā bāhyaṃ vinirdiṣṭaṃ tapotrānaśanādi yat saṃvaras tena ca jñeyo hy atapohetukarmaṇāṃ [ ] prāyaścittādiṣaḍbhedaṃ tapaḥ saṃvarakāraṇaṃ syād uttaraṃ svasaṃvedyam iti spaṣṭamanogataṃ [ ] proktā navādayo bhedāḥ prāgdhyānāt te yathākramaṃ prāyaścittādibhedānāṃ tapaso bhyaṃtarasya hi [ ] ālocanādayo bhedāḥ prāyaścittasya te nava yathāgamam iha jñeyā niravadyapravṛttaye [ ] jñānādayo tra catvāro vinayāḥ pratipāditāḥ kathaṃcit tadabhedasya siddhaye paramārthataḥ [ ] jñānādibhāvanā samyagjñānādivinayo hi naḥ tasyāṃtaraṃgatā na syād anyathāny eva vedanāt [ ] ācāryaprabhṛtīnāṃ yad daśānāṃ viniveditaṃ vaiyāvṛttyaṃ bhaved etad anvarthapratipattaye [ ] svādhyāyaḥ paṃcadhā prokto vācanādiprabhedataḥ aṃtaraṃgaśrutajñānabhāvanātmatvatas tu saḥ [ ] syād bāhyābhyaṃtaropadhyor vyutsargo dhikṛto dvidhā vratadharmātmako dānaprāyaścittātmako 'paraḥ [ ] kathaṃcit tyāgatāṃ prāpto py eko nirdiśyate nṛṇāṃ śaktibhedavyapekṣāyāṃ phaleṣv eko py anekadhā [ ] bāhyābhyaṃtaratopadhyor anupāttetaratvataḥ jīvena tatra kāyādyor vedyāvedyor nṛṇāṃ matā [ ] uttametyādisūtreṇa dhyānaṃ dhyātābhidhīyate dhyeyaṃ ca dhyānakālaś ca sāmarthyāt tatparikriyā [ ] nābhāvo śeṣacittānāṃ tucchaḥ pramitisaṃgataḥ sthirajñānātmakaś cittānirodho notra saṃgataḥ [ ] draṣṭā hy ātmājñānavāṃs tu na kuṃbhādy asti kasyacit dharmameghasamādhiś cen na draṣṭā jñānavān yataḥ [ ] saṃprajñātas tu yo yogo vṛttisārūpyamātrakaṃ saṃjñānātmaka eveti na vivādo sti tāvatā [ ] anekatrāpradhāne vā viṣaye kalpite pi vā mā bhūc ciṃtānirodho yam ity ekāgre sa saṃsmṛtaḥ [ ] ekāgreṇeti vā nānāmukhatvena nivṛttaye kvacic ciṃtānirodhasyādhyānatvena prabhādivat [ ] proktaṃ saṃhananaṃ yasya bhaved uttamam iṣyate tasya dhyānaṃ paraṃ muktikāraṇaṃ netarasya tat [ ] aṃtarmuhūrtato nordhvasaṃbhavas tasya dehināṃ ā aṃtarmuhūrtād ity uktaṃ kālāṃtaracchide [ ] ārtādīni tad eva syuś catvāri pratibhedataḥ dhyānānyekāgrasāmānyaciṃtāṃtaranirodhataḥ [ ] mokṣahetū pare dhyāne pūrve saṃsārakāraṇe iti sāmarthyataḥ siddhaṃ vimohatvetaratvataḥ [ ] ārtaṃ caturvidhaṃ tatra saṃkleśāṃgatayoditaṃ ārtam ityādisūtreṇa prathamaṃ dveṣahetukam [ ] viparītaṃ manojñasyetyādisūtreṇa niścitaṃ dvitīyam anuyogottham ārtadhyānam asatphalaṃ [ ] asadvedyodayopāttadveṣakāraṇām īritaṃ tṛtīyaṃ vedanāyāś cety uktaṃ sūtreṇa tattvataḥ [ ] nidānaṃ ceti vākyena tīvramohanibaṃdhanaṃ caturthaṃ dhyānam ity ārtaṃ caturvidham udāhṛtaṃ [ ] nīlāṃ leśyāṃ samāsṛtya kāpotīṃ vā samudbhavet tadajñānāt kuto py ātmapariṇāmāt tathāvidhāt [ ] pāpaprayoganiḥśeṣadoṣādhiṣṭhānam ākulaṃ bhogaprasaṃganānātmasaṃkalpāsaṃgakāraṇaṃ [ ] dharmāśayaparityāgi kaṣāyāśayavardhanaṃ vipākakaṭu tiryakṣu samudbhavanibaṃdhanaṃ [ ] tat syād aviratādīnāṃ trayāṇāṃ tannimittataḥ nāpramattādiṣu kṣīṇatannimitteṣu jātucit [ ] hiṃsādibhyo titīvramohodayebhyaḥ prajāyate raudraṃ dhyānaṃ smṛtaiḥ paunaḥpunyaṃ durgatikāraṇaṃ [ ] tat syād aviratasyoccair deśasaṃyamino pi ca yathāyogaṃ nimittānāṃ śeṣaṃ sadbhāvasiddhitaḥ [ ] tataś caturvidhaṃ raudraṃ dhyānaṃ samupajāyate puṃsotikṛṣṇaleśyasyāviratasyaiva tatparaṃ [ ] tathā kāpotaleśyasya viratāviratasya ca pramādānām adhiṣṭhānaṃ viratasya na jātucit [ ] ājñādivicayāyoktaṃ dharmyaṃ dhyānaṃ caturvidhaṃ ārtaraudraparityaktaiḥ kāryaṃ ciṃtāsvabhāvakaṃ [ ] tatrājñā dvividhā hetuvādetaravikalpataḥ sarvajñasya vineyāṃtaḥkaraṇāyattavṛttitaḥ [ ] asanmārgād apāyaḥ syād anapāyaḥ svamārgataḥ sa evopāya ity eṣa tato bhedena noditaḥ [ ] vipāko nubhavaḥ pūrvaṃ kṛtānāṃ karmaṇāṃ svayaṃ jīvādyāśrayabhedena caturtho dhīmatāṃ mataḥ [ ] lokaḥ saṃsthānabhedād vā svabhāvād vā niveditaḥ tadādhāro jano vāpi mānabhedo pi vā kvacit [ ] vicayas tatra mīmāṃsā pramāṇanayataḥ sthitaḥ tasmiṃś ciṃtāprabaṃdho nuściṃtāṃtaranirodhataḥ [ ] yuktaṃ dhyānaṃ tadādhyāyam aikāgryeṇa pravṛttitaḥ dhyātuś ciṃtāprabaṃdhasya dharmyaṃ pāpavyapāyataḥ [ ] sākalyena vinirdiṣṭaṃ tatpramattāpramattayoḥ aṃtaraṃgatapobhedarūpaṃ saṃghatayoḥ sphuṭaṃ [ ] saṃyatāsaṃyatasyaikadeśenāsaṃyatasya tu yogyatāmātrataḥ kaiścid yair durdhyānaṃ pracakṣate [ ] mattvā catvāri śuklāni procyamānāni sūriṇā ādye pūrvavidaḥ śukle dharmyaṃ cety abhidhīyate [ ] śreṇyādhirohiṇaḥ śukle dharmyaṃ pūrvasya tasya hi apūrvakaraṇādīnāṃ śuklāraṃbhakatāsthiteḥ [ ] pare kevalinaḥ śukle saṃyogasyetarasya ca yathāyogaṃ smṛte tajjñaiḥ prakṛṣṭe śuddhibhedataḥ [ ] pṛthaktvetyādisūtreṇānvarthanāmāni tāny api śuklāni kathitāny uktasvāmibhedāni lakṣaṇaiḥ [ ] tatra prācyaṃ triyogasyaikaikayogasya tatparaṃ tṛtīyaṃ kāyayogasyāyogasya ca turīyakaṃ [ ] yogamārgaṇayā teṣāṃ sadbhāvaniyamaḥ smṛtaḥ evaṃ trītyādisūtreṇa vivādavinivṛttaye [ ] ekāśraye pratiprāptaśrutajñānāśrayatvataḥ savitarke śrute tattvāt savīcāre ca saṃkramāt [ ] arthavyaṃjanayogeṣu sāmānyenopavartite pūrve śukle triyogaikayogasaṃyatasaṃśrayāt [ ] avīcāraṃ dvitīyaṃ tatsaṃkrāṃter asamudbhavāt ekayogasya taddhyātur iti prāhāpavādataḥ [ ] savitarkaṃ savīcāraṃ pṛthaktvena tataḥ sthitaṃ prācyaṃ śuklaṃ tu savitarkavīcārabalād iha [ ] tathā'vitarkavīcāre pare śukle nivedite kāyayogādhināthatvād ayogādhipatitvataḥ [ ] vitarkaḥ śrutam aspaṣṭatarkaṇaṃ na punar mateḥ bhedaś ciṃtākhya ity etatsūtrāraṃbhād abhīpsitaṃ [ ] arthavyaṃjanayogeṣu saṃkrāṃtiś cetasas tu yā sa vīcāro na mīmāṃsā carergatyarthaniṣṭhataḥ [ ] evaṃ niruktito rthasyāvyabhicāritvadarśanāt proktaṃ vitarkavīcāralakṣaṇaṃ sutrataḥ svayaṃ [ ] kṛtaguptyādyanuṣṭhāno yatirvīryātiśāyanaḥ arthavyaṃjanayogeṣu saṃkrāṃtau pṛthagudyataḥ [ ] tadopaśamanān mohaprakṛtīḥ kṣapayann api yathā paricayaṃ dhyāyet kvacid vastuni sakriyaḥ [ ] savitarkaṃ savīcāraṃ pṛthaktvevādimaṃ muniḥ dhyānaṃ prakramate dhyātuṃ pūrvadehī nirākulaḥ [ ] sa evāmūlato mohakṣapaṇāgūrṇamānasaḥ prāpyānaṃtaguṇāṃ śuddhiṃ niruṃdhan baṃdhamātmanaḥ [ ] jñānāvṛtisahāyānāṃ prakṛtīnām aśeṣataḥ hāsayankṣapayaṃś cāsāṃ sthitibaṃdhaṃ samaṃtataḥ [ ] śrutajñānopayuktātmā vītavīcāramānasaḥ kṣīṇamoho 'prakaṃpātmā prāptakṣāyikasaṃyamaḥ [ ] dhyātvaikatvavitarkākhyaṃ dhyānaṃ ghātyaghaghasmaraṃ dadhānaḥ paramāṃ śuddhiṃ duravāpyāmato nyataḥ [ ] tato nirdagdhaniḥśeṣaghātikarmeṃdhanaḥ prabhuḥ kevalī sadṛśāghātikarmasthitir aśeṣataḥ [ ] saṃtyajya vāṅmanoyogaṃ kāyayogaṃ ca bādaraṃ sūkṣmaṃ tu taṃ samāśritya maṃdaspaṃdodayas tvaraṃ [ ] dhyānaṃ sūkṣmakriyaṃ naṣṭapratipātaṃ tṛtīyakaṃ dhyāyed yogī yathāyogaṃ kṛtvā karaṇasaṃtatiṃ [ ] tataḥ svayaṃ samucchinnapradeśaspaṃdanaṃ sthiraḥ dhvastaniḥśeṣayogebhyo dhyānaṃ dhyātāṃtasaṃvaraḥ [ ] saṃpūrṇanirjaraś cāṃtye kṣaṇe kṣīṇabhavasthitiḥ mukhyaṃ siddhatvam adhyāste prasiddhāṣṭaguṇodayaṃ [ ] saṃkleśāṃgatayaikatra ciṃtā ciṃtāṃtaracyutā pāpaṃ dhyānaṃ yathā proktaṃ vyavahāranayāśrayāt [ ] viśuddhyaṃgatayā caivaṃ dharmyaṃ śuklaṃ ca kiṃcana samanaskasya tādṛkṣaṃ nāmanaskasya mukhyataḥ [ ] udbhūtakevalasyāsya sakṛtsarvārthavedinaḥ aikāgryabhāvataḥ kecid upacārād vadaṃti tat [ ] ciṃtānirodhasadbhāvo dhyānāt so pi nibaṃdhanaṃ tatra dhyānopacārasya yoge leśyopacāravat [ ] sarvaciṃtānirodhas tu yo mukhyo niścitān nayāt so sti kevalinaḥ sthairyam ekāgraṃ ca paraṃ sadā [ ] mukhyaṃ dhyānam atas tasya sākṣān nirvāṇakāraṇaṃ chadmadṛśyopacārāt syāt tadanyāstitvakāraṇāt [ ] yathaikavastuni sthairyaṃ jñānasyaikāgryam iṣyate tathā viśvapadārtheṣu sakṛt tat kena vāryate [ ] mohānudrekato jñātur yathā vyākṣepasaṃkṣayaḥ mohino sti tathā vītamohasyāsau sadā na kim [ ] yathaikatra pradhānerthe vṛttir vā tasya mohinaḥ tathā kevalinaḥ kiṃ na dravye 'naṃtavivartake [ ] iti niścayato dhyānaṃ pratipedhyaṃ na dhīmatā pradhānaṃ viśvatattvārthavedināṃ prasphuṭātmanāṃ [ ] sayogakevalī dhyānī yadi dharmopadeśanā kathaṃ tataḥ pravartetety eke tatrābhidhīyate [ ] aṃtarmuhūrtakālaṃ vā dhyānasyānekavatsaraṃ naikāgryaṃ kevalidhyānaṃ prasiddhaṃ tattvadeśinām [ ] tata eva ca te siddhāḥ kṛtakṛtyā jinādhipāḥ stūyaṃte siddhasādharmyāt sadehatve pi dhīdhanaiḥ [ ] ayogitvasapnudbhūteḥ pūrvam aṃtarmuhūrtamā tṛtīyaṃ dhyānam ākhyātaṃ vākpravṛttyā vivarjitaṃ [ ] vākkāyavṛttisadbhāve yathā dhyānī na mādṛśaḥ tathārhann iti tasyāstūpacārād dhyānadeśanā [ ] kvacic ciṃtā dhyānaṃ niyataviṣayaṃ puṃsi kathitaṃ kvacit tasyāḥ kārtsnyād vilayanam idaṃ sarvaviṣayaṃ kvacit kiṃcin mukhyaṃ guṇam api vadaṃti pratinayaṃ tataś ciṃtyaṃ sadbhiḥ paramagahanaṃ jinapatimataṃ [ ] samyagdṛṣṭyādayaḥ saṃty asaṃkhyeguṇanirjarāḥ kramād atra tathā śuddher asaṃkhyeyaguṇatvataḥ [ ] pulākādyā matāḥ paṃca nirgraṃthā vyavahārataḥ niścayāc cāpi nairgraṃthyasāmānyasyāvirodhataḥ [ ] vastrādigraṃthasaṃpannās tato nye neti gamyate bāhyagraṃthasya sadbhāve hy aṃtargraṃtho na naśyati [ ] ye vastrādigrahe py āhurnirgraṃthatvaṃ yathoditaṃ mūrcchānudbhūtitas teṣāṃ stryādyādāne pi kiṃ na tat [ ] viṣayagrahaṇaṃ kāryaṃ mūrchā syāt tasya kāraṇaṃ na ca kāraṇavidhvaṃse jātu kāryasya saṃbhavaḥ [ ] viṣayaḥ kāraṇaṃ mūrchā tatkāryam iti yo vadet tasya mūrchodayo 'sattve viṣayasya na siddhyati [ ] tasmān mohodayān mūrchā svārthe tasya grahas tataḥ sa yasyāsti svayaṃ tasya na nairgraṃthyaṃ kadācana [ ]
oṃ atha daśamo 'dhyāyaḥ [ ] tathaupaśamikādīnāṃ bhavyatvasya ca saṃkṣayāt mokṣa ity āha tadbhāve saṃsāritvaprasiddhitaḥ [ ] na tv aupaśamike bhāve kṣāyopaśamike pi ca bhāve traudayike puṃso 'bhāvo stu kṣāyike kathaṃ [ ] siddhiḥ savyapadeśasya cāritrāder abhāvataḥ kṣāyikasya na saty asmin kṛtakṛtyatvanirvṛtiḥ [ ] na cāritrādir asyāsti siddhānāṃ mokṣasaṃkṣayāt siddhā eva tu siddhās te guṇasthānavimuktataḥ [ ] mokṣaḥ kevalasamyaktvajñānadarśanasaṃkṣayāt siddhatvasaṃkṣayān neti tv anyatretyādinābravīt [ ] etaiḥ saha virodhasyābhāvān mokṣasya sarvathā svayaṃ savyapadeśaiś ca vyapadeśas tathāstv ataḥ [ ] siddhatvaṃ kevalādibhyo viśiṣṭaṃ teṣu satsv api karmodayanimittasyāsiddhatvasya kvacid gateḥ [ ] svātmāṃtarbahiraṃgakalmaṣatativyāsaktinirmuktatā jīvasyeti vadaṃti śuddhadhiṣaṇā yuktyāgamānveṣiṇaḥ prāptis tasya tu nirvṛtiḥ paratarā nābhāvamātraṃ na vā viśleṣo guṇato nyathā sthitir api vyāhanyamānatvataḥ [ ] tacchābdād gṛhyate mokṣaḥ sūtresmin nānyasaṃgrahaḥ sāmarthyād iti tasyaivānaṃtaraṃ tadanaṃtaraṃ [ ] gacchatīti vacaḥśakter muktideśe sthiticchidā ūrdhvam ity abhidhānāt tu digaṃtaragaticyutiḥ [ ] pūrvetyādyena vācyena proktaṃ hetucatuṣṭayaṃ sādhyena vyāptam unneyam anyathānupapattitaḥ [ ] āviddhetyādinā dṛṣṭaṃ saddṛṣṭāṃtacatuṣṭayaṃ bahirvyāptir apīṣṭeha sādhanatvaprasiddhaye [ ] ūrdhvaṃ gacchati muktātmā tathā pūrvaprayogataḥ yathāviddhaṃ kulālasya cakram ity atra sādhanaṃ [ ] nāsiddhaṃ moktukāmasya lokāgragamanaṃ prati praṇidhānaviśeṣasya sadbhāvād bhūriśaḥ sphuṭaṃ [ ] na cānaikāṃtikaṃ tatsyād viruddhaṃ vā vipakṣataḥ vyāvṛtteḥ sarvathā neṣṭavidhātakṛd idaṃ tataḥ [ ] asaṃgatvād yathālābūphalaṃ nirgatalepanaṃ baṃdhacchedādyathair aṃḍabījam ity apy ato gataṃ [ ] ūrdhvavrajyāsvabhāvatvād agner jvālā yatheti ca dṛṣṭāṃte pi na sarvatra sādhyasādhanaśūnyatā [ ] ukto dharmāstikāyo tra gatyupagrahakāraṇaṃ tasyābhāvān na lokāgrāt parato gatir ātmanaḥ [ ] evaṃ niḥśeṣamithyābhimāno muktau nivartate yuktyāgamabalāt tasyāḥ svarūpaṃ prati nirṇayāt [ ] siddhāḥ kṣetrādibhir bhedaiḥ sādhyāḥ sūtropapādibhiḥ sāmānyato viśeṣāc ca bhāvābhede pi sannayaiḥ [ ] kṣetraṃ svātmapradeśāḥ syuḥ siddhyatāṃ niścayān nayāt vyavahāranayād vyoma sakalāḥ karmabhūmayaḥ [ ] manuṣyabhūmir apy atra haraṇāpekṣayā matā hṛtvā pareṇa nītānāṃ siddheḥ sūtrānivāraṇāt [ ] teṣām ekakṣaṇaḥ kālaḥ pratyutpannanayātmanaḥ bhūtaprajñāpanād eva syāt sāmānyaviśeṣataḥ [ ] utsarpiṇy avasarpiṇyor jātāḥ siddhyaṃti kecana caturthakāle paryaṃtabhāge kāle tṛtīyake [ ] sarvadā haraṇāpekṣā kṣetrāpekṣā hi kālabhṛt sarvakṣetreṣu tatsiddhau na viruddhā kathaṃcana [ ] siddhiḥ siddhigatau puṃsāṃ syān manuṣyagatāv api avedatvena sā vedatritayād vāsti bhāvataḥ [ ] pulliṃgenaiva tu sākṣāddravyato nyā tathāgamavyāghātādyuktibādhāc ca stryādinirvāṇavādināṃ [ ] sākṣānnirgraṃthaliṃgena pāraṃparyāttato nyataḥ sākṣātsagraṃthaliṃgena siddhau nirgraṃthatā vṛthā [ ] sati tīrthakare siddhir asaty api ca kasyacit bhaved avyapadeśena caritreṇa viniścayāt [ ] tathaivaikacatuḥpaṃcavikalpena prakalpate paropadeśaśūnyatvāt siddhau pratyekabuddhatā [ ] paropadeśataḥ siddho bodhitaḥ pratipāditaḥ jñānenaikena vā siddhir dvābhyāṃ tribhir apīṣyate [ ] caturbhiḥ svāmimukhyasyāpekṣāyāṃ nānyathā punaḥ avagāhanam utkṛṣṭaṃ sapādaśatapaṃcakaṃ [ ] cāpānāmardhasaṃyuktam aratnitrayam apy atha madhyamaṃ bahudhā siddhis triprakāre 'vagāhane [ ] svapradeśe nabho vyāpilakṣaṇe saṃpravartate anaṃtaraṃ jaghanyena dvau kṣaṇau siddhyatāṃ nṛṇāṃ [ ] utkarṣeṇa punas tat syād eteṣāṃ samayāṣṭakaṃ aṃtaraṃ samayo sty eko jaghanyena prakarṣataḥ [ ] ṣaṇmāsāḥ siddhyatāṃ nānā madhyamaṃ prati gamyatāṃ ekasmin samaye siddhyed eko jīvo jaghanyataḥ [ ] aṣṭottaraśataṃ jīvāḥ prakarṣeṇeti viśrutaṃ nālpena bahavaḥ siddhāḥ siddhakṣetravyapekṣayā [ ] vyavahāravyapekṣāyāṃ teṣām alpabahutvavit tatrālpe haraṇāt siddhā janmasiddhasamūhataḥ [ ] janmasiddhāḥ punas tebhyaḥ saṃkhyeyaguṇatābhṛtaḥ karmabhogadharā vārdhidvīpordhvās tirobhuvāḥ [ ] siddhānām ūrdhvasiddhāḥ syuḥ sarvebhyo lpe pare nyathā yuḥ saṃkhyeyaguṇās tebhyo dhas tiryagbhir vṛtāḥ kramāt [ ] samudre sarvataḥ stokā dvīpe saṃkhyeyasaṃguṇāḥ lavaṇode samastebhyaḥ stokāḥ siddhā viśeṣataḥ [ ] kālode sāgare jaṃbūdvīpe ca parinirvṛtāḥ dhātakīkhaṃḍasaddvīpe puṣkaradvīpa eva ca [ ] te saṃkhyeyaguṇāḥ proktāḥ kramaśo bahavo nyathā pratyetavyāḥ samāsena yathāgamam aśeṣataḥ [ ] eka eva tu siddhātmā sarvatheti yake viduḥ teṣāṃ nānātmanāṃ siddhimārgānuṣṭhā vṛthā bhavet [ ] kṣetrādyapekṣayā coktāṃ saṃsāry ekatvam aṃjasā ekātmavādinā caivaṃ tatra vāco 'pramāṇatā [ ] niḥśeṣakumatadhvāṃtavidhvaṃsanapaṭīyasī mokṣanītir ato jainī bhānudīptir ivojjvalā [ ] evaṃ jīvāditattvārthāḥ prapaṃcya samudīritāḥ samyagdarśanavijñānagocarāś caraṇāśrayāḥ [ ] tataḥ sādhīyasī mokṣamārgavyākhyā prapaṃcataḥ sarvatattvārthavidyeyaṃ pramāṇanayaśaktitaḥ [ ] jīyāt sajjanatāśrayaḥ śivasudhādhārāvadhānaprabhur dhvastadhvāṃtatatiḥ samunnatagatis tīvrapratāpānvitaḥ prorjajyotir ivāvagāhanakṛtānaṃtasthitir mānataḥ sanmārgas tritayātmako 'khilamalaprajvālanaprakṣamaḥ [ ] tattvārthaślokavārtikaṃ samāptam