Sarvārthasiddhi

mokṣamārgasya netāraṃ bhetāraṃ karmabhūbhṛtām jñātāraṃ viśvatattvānāṃ vande tadguṇalabdhaye

kaścid bhavyaḥ pratyāsannaniṣṭhaḥ prajñāvān svahitam upalipsur vivivkte paramaramye bhavyasattvaviśrāmāspade kvacid āśramapade munipariṣan madye saṃniṣaṇṇaṃ mūrttam iva mokṣamārgam avāgvisargaṃ vapuṣā nirūpayantaṃ yuktyāgamakuśalaṃ parahitapratipādanaikakāryam āryaniṣevyaṃ nirgranthācāryavaryam upasadya savinayaṃ paripṛcchati sma bhagavan kiṃ nu khalu ātmane hitaṃ syād iti sa āha mokṣa iti sa eva punaḥ pratyāha kiṃ svarūpo 'sau mokṣaḥ kaścāsya prāptyupāya iti ācārya āha niravaśeṣanirākṛtakarmamalakalaṃkasyāśarīrasyātmano 'cintyasvābhāvikajñānādiguṇam avyābādhasukham ātyantikam avasthāntaraṃ mokṣa iti

tasyātyantaparokṣatvāc chadmasthāḥ pravādinas tīrthakaraṃ manyās tasya svarūpam aspṛśantībhir vāgbhir yuktyābhāsanibandhanābhir anyathaiva parikalpayanti caitanyaṃ puruṣasya svarūpam tacca jñeyākāraparicchedaparāṅmukham iti tat sad apy asad eva nirākāratvād iti buddhyādivaiśeṣikaguṇocchedaḥ puruṣasya mokṣaḥ iti tad api parikalpanam asad eva viśeṣalakṣaṇaśūnyasyāvastutvāt pradīpanirvāṇakalpam ātmanirvāṇam iti ca tasya kharaviṣāṇakalpanā tair evāhatya nirūpitā ity evam ādi tasya svarūpam anavadyam uttaratra vakṣyāmaḥ

tatprāptyupāyaṃ praty api te visaṃvadante jñānād eva cāritranirapekṣāt tatprāptiḥ śraddhānamātrād eva vā jñānanirapekṣāc cāritramātrād eva iti ca vyādhyabhibhūtasya tadvinivṛttyupāyabhūtabheṣajaviṣayavyastajñānādisādhanatvābhāvavad vyastaṃ jñānādir mokṣaprātyupāyo na bhavati

kiṃ tarhi tat tritayaṃ samuditam ity āha

samyag ity avyutpannaḥ śabdo vyutpanno vā añcateḥ kvau samañcatīti samyag iti asyārthaḥ praśaṃsā sa pratyekaṃ parisamāpyate samyagdarśanaṃ samyagjñānaṃ samyakcāritram iti eteṣāṃ svarūpaṃ lakṣaṇato vidhānataś ca purastād vistareṇa nirdekṣyāmaḥ uddeśamātraṃ tv idam ucyate padārthānāṃ yāthātmyapratipattiviṣayaśraddhānasaṃgrahārthaṃ darśanasya samyagviśeṣaṇam yena yena prakāreṇa jīvādayaḥ padarthā vyavasthitās tena tenāvagamaḥ samyagjñānam vimohasaṃśayaviparyayanivṛttyarthaṃ samyagviśeṣaṇam saṃsārakāraṇanivṛttiṃ pratyāgūrṇasya jñānavataḥ karmādānanimittakriyoparamaḥ samyakcāritram ajñānapūrvakācaraṇanivṛttyarthaṃ samyagviśeṣaṇam

paśyati dṛśyate 'nena dṛṣṭimātraṃ vā darśanam jānāti jñāyate 'nena jñaptimātraṃ vā jñānam carati caryate 'nena caraṇamātram vā cāritram nanv evaṃ sa eva kartā sa eva karaṇam ity āyātam tac ca viruddham satyaṃ svapariṇāmapariṇāminor bhedavivakṣāyāṃ tathābhidhānāt yathāgnir dahatīndhanaṃ dāhapariṇāmena uktaḥ kartrādisādhanabhāvaḥ paryāyaparyāyiṇor ekatvānekatvaṃ pratyanekāntopapattau svātantryapāratantryavivakṣopapatter ekasminn apy arthe na virudhyate agnau dahanādikriyāyāḥ kartrādisādhanabhāvavat

jñānagrahaṇam ādau nyāyyaṃ darśanasya tatpūrvakatvāt alpāctaratvāc ca naitad yuktaṃ yugapad utpatteḥ yadāsya darśanamohasyopaśamāt kṣayāt kṣayopaśamād vā ātmā samyagdarśanaparyāyeṇāvirbhavati tadaiva tasya matyajñānaśrutājnānanivṛttipūrvakaṃ matijñānaṃ śrutajñānaṃ cāvirbhavati ghanapaṭalavigame savituḥ pratāpaprakāśābhivyaktivat alpāctarād abhyarhitaṃ pūrvaṃ nipatati katham abhyarhitatvam jñānasya samyagvyapadeśahetutvāt cāritrāt pūrvaṃ jñānaṃ prayuktaṃ tatpūrvakatvāc cāritrasya

sarvakarmavipramokṣo mokṣaḥ tatprāptyupāyo mārgaḥ mārga iti caikavacananirdeśaḥ samas tasya mārgabhāvajñāpanārthaḥ tena vyastasya mārgatvanivṛttiḥ kṛtā bhavati ataḥ samyagdarśanaṃ samyagjñānaṃ samyakcāritram ity etat tritayaṃ samuditaṃ mokṣasya sākṣān mārgo veditavyaḥ

tatrādāv uddiṣṭasya samyagdarśanasya lakṣaṇanirdeśārtham idam ucyate

tattvaśabdo bhāvasāmānyavācī katham tad iti sarvanāmapadam sarvanāma ca sāmānye vartate tasya bhāvas tattvam tasya kasya yo 'rtho yathāvasthitas tathā tasya bhavanam ity arthaḥ aryata ity artho niścīyata iti yāvat tattvenārthas tattvārthaḥ athavā bhāvena bhāvavato 'bhidhānam tadavyatirekāt tattvam evārthas tattvārthaḥ tattvārthasya śraddhānaṃ tattvārthaśraddhānaṃ samyagdarśanaṃ pratyetavyam tattvārthaś ca vakṣamāṇo jīvādiḥ

dṛśer ālokārthatvāt śraddhānārthagatir nopapadyate dhātunām anekārthatatvād adoṣaḥ prasiddhārthatyāgaḥ kuta iti cet mokṣamārgaprakaraṇāt tattvārthaśraddhānaṃ hy ātmapariṇāmo mokṣasādhanaṃ yujyate bhavyajīvaviṣayatvāt ālokakas tu cakṣurādinimittaḥ sarvasaṃsārijīvasādhāraṇatvān na mokṣamārgo yuktaḥ

arthaśraddhānām iti cet sarvārthaprasaṃgaḥ tattvaśraddhānam iti cet bhāvamātraprasaṃgaḥ 'sattādravyatvaguṇatvakarmatvādi tattvam' iti kaiścit kalpyata iti tattvam ekatvam iti vā sarvaikyagrahaṇaprasaṃgaḥ 'puruṣa evedaṃ sarvam' ity ādi kaiścit kalpyata iti evaṃ sati dṛṣṭeṣṭavirodhaḥ tasmād avyabhicārārtham ubhayor upādānam tad dvividhaṃ sarāgavītarāgaviṣayabhedāt praśamasaṃvegānukampāstikyādyabhivyaktilakṣaṇaṃ prathamam ātmaviśuddhimātram itarat

athaitat samyagdarśanaṃ jīvādipadārthaviṣayaṃ katham utpadyata ity ata āha

nisargaḥ svabhāva ity arthaḥ adhigamo 'rthāvabodhaḥ tayor hetutvena nirdeśaḥ kasyāḥ kriyāyāḥ kā ca kriyā utpadyata ity adhyāhriyate sopaskāratvāt sūtrāṇām tad etat samyagdarśanaṃ nisargād adhigamād votpadyata iti

atrāha nisargaje samyagdarśane 'rthādhigamaḥ syād vā na vā yady asti tad api adhigamajam eva nārthāntaram atha nāsti katham anavabuddhatattvasyārthaśraddhānām iti naiṣa doṣaḥ ubhayatra samyagdarśane antaraṅgo hetus tulyo darśanamohasyopaśamaḥ kṣayaḥ kṣayopaśamo vā tasmin sati yad bāhyopadeśāvṛte prādur bhavati tan naisargikam yat paropadeśapūrvakaṃ jīvādy adhigamanimittaṃ tad uttaram ity anayor ayaṃ bhedaḥ

tadgrahaṇaṃ kim artham anantaranirdeśārtham anantaraṃ samyagdarśanaṃ tadity anena nirdiśyate itarathā mokṣamārgo 'pi prakṛtas tasyābhisaṃbandhaḥ syāt nanu ca 'anantarasya vidhir vā bhavati pratiṣedho vā' ity anantarasya samyagdarśanasya grahaṇaṃ siddham iti cet na 'pratyāsatteḥ pradhānaṃ balīyaḥ' iti mokṣamārga eva saṃbadyeta tasmāt tadvacanaṃ kriyate

tattvārthaśraddhānaṃ samyagdarśanam ity uktam atha kiṃ tattvam ity ata idam āha

tatra cetanālakṣaṇo jīvaḥ sā ca jñānādibhedād anekadhā bhidyate tadviparyayalakṣaṇo 'jīvaḥ śubhāśubhakarmāgamadvārarūpaṃ āsravaḥ ātmakarmaṇor anyo 'nyapradeśānupraveśātmako bandhaḥ āsravanirodhalakṣaṇaḥ saṃvaraḥ ekadeśakarmasaṃkṣayalakṣaṇā nirjarā kṛtsnakarmaviyogalakṣaṇo mokṣaḥ eṣāṃ prapañca uttaratra vakṣyate sarvasya phalasyātmādhīnatvād ādau jīvagrahaṇam tadupakārāthatvāt tadanantaram ajīvābhidhānam tadubhayaviṣayatvāt tadanantaram āsravagrahaṇam tatpūrvakatvāt tadanantaraṃ bandhābhidhānam saṃvṛtasya bandhābhāvāt tatpratyanīkapratipattyarthaṃ tadanantaraṃ saṃvaravacanam saṃvare sati nirjaropapattes tadantike nirjarāvacanam ante prāpyatvān mokṣasyānte vacanam

iha puṇyapāpagrahaṇaṃ kartavyam 'nava padārthāḥ' iti anyair apy uktatvāt na kartavyam āsrave bandhe cāntarbhāvāt yady evam āsravādigrahaṇam anarthakam jīvājīvayor antarbhāvāt nānarthakam iha mokṣaḥ prakṛtaḥ so 'vaśyaṃ nirdeṣṭavyaḥ sa ca saṃsārapūrvakaḥ saṃsārasya pradhānahetur āsravo bandhaś ca mokṣasya pradhānahetuḥ saṃvaro nirjarā ca ataḥ pradhānahetuhetumatphalanidarśanārthatvāt pṛthagupadeśaḥ kṛtaḥ dṛśyate hi sāmānye 'ntarbhūtasyāpi viśeṣasya pṛthagupādānaṃ prayojanārtham 'kṣatriyā āyātāḥ sūravarmā 'pi' iti

tattvaśabdo bhāvavācīty uktaḥ sa kathaṃ jīvādibhir dravyavacanaiḥ sāmānādhikaraṇyaṃ pratipadyate avyatirekāt tadbhāvādhyāropāc ca sāmānādhikaraṇyaṃ bhavati yathā 'upayoga evātmā' iti yady evaṃ tattalliṅgasaṃkhyānuvṛttiḥ prāpnoti 'viśeṣaṇaviśeṣyasaṃbande saty api śabdaśaktivyapekṣayā upāttaliṅgasaṃkhyāvyatikramo na bhavati ' ayaṃ krama ādisūtre 'pi yojyaḥ

evam eṣām uddiṣṭāṇāṃ samyagdarśanādīnām jīvādīnāṃ ca saṃvyavahāraviśeṣavyabhicāranivṛtttyartham āha

atadguṇe vastuni saṃvyavahārārthaṃ puruṣakārān niyujyamānaṃ saṃjñākarma nāma kāṣṭhapustacitrakarmākṣanikṣepādiṣu so 'yam iti sthāpyamānā sthāpanā guṇair guṇān vā drutaṃ gataṃ guṇair droṣyate guṇān droṣyatīti vā dravyam vartamānatatparyāyopalakṣitaṃ dravyaṃ bhāvaḥ tad yathā nāmajīvaḥ sthāpanājīvo dravyajīvo bhāvajīva iti caturdhā jīvaśabdārtho nyasyate jīvanaguṇam anapekṣya yasya kasyacin nāma kriyamāṇaṃ nāma jīvaḥ akṣanikṣepādiṣu jīva iti vā manuṣyajīva iti va vyavasthāpyamānaḥ sthāpanājīvaḥ dravyajīvo dvividhaḥ āgamadravyajīvo noāgamadravyajīvaś ceti tatra jīvaprābhṛtajñāyī manuṣyajīvaprābhṛtajñāyī vā anupayukta ātmā āgamadravyajīvaḥ noāgamadravyajīvas tredhā vyavatiṣṭhate jñāyakaśarīrabhāvitadvyatiriktabhedāt tatra jñātur yac charīraṃ trikālagocaraṃ taj jñāyakaśarīraṃ sāmānyāpekṣayā noāgamabhāvijīvo nāsti jīvanasāmānyasya sadāpi vidyamānatvāt viśeṣāpekṣayā tv asti gatyantare jīvo vyavasthito manuṣyabhavaprāptiṃ pratyabhimukho manuṣyabhāvijīvaḥ tadvyatiriktaḥ karmanokarmavikalpaḥ bhāvajīvo dvividhaḥ āgamabhāvajīvo noāgamabhāvajīvaś ceti tatra jīvaprābhṛtaviṣayopayogāviṣṭo manuṣyajīvaprābhṛtaviṣayopayogayukto vā ātmā āgamabhāvajīvaḥ jīvanaparyāyeṇa manuṣyajīvatvaparyāyeṇa vā samāviṣṭa ātmā noāgamabhāvajīvaḥ evam itareṣām api padārthānāṃ nāmādinikṣepavidhir niyojyaḥ sa kim arthaḥ aprakṛtanirākaraṇāya prakṛtanirūpaṇāya ca nikṣepavidhinā śabdārthaḥ prastīryate tac chabdagrahaṇaṃ kim artham sarvasaṃgrahārtham asati hi tacchabde samyagdarśanādīnāṃ pradhānānām eva nyāsenābhisaṃbandhaḥ syāt tadviṣayabhāvenopagṛhītānāṃ jīvādīnāṃ apradhānānāṃ na syāt tacchabdagrahaṇe punaḥ kriyamāṇe sati sāmarthyāt pradhānānām apradhānānāṃ ca grahaṇaṃ siddhaṃ bhavati

evaṃ nāmādibhiḥ prastīrṇānām adhikṛtānāṃ tattvādhigamaḥ kutaḥ ity ata idam ucyate

nāmādinikṣepavidhinopakṣiptānāṃ jīvādīnāṃ tattvaṃ pramāṇābhyāṃ nayaīś cādhigamyate pramāṇanayā vakṣyamāṇalakṣaṇavikalpāḥ tatra pramāṇaṃ dvividhaṃ svārthaṃ parārthaṃ ca tatra svārthaṃ pramāṇaṃ śrutavarjjam śrutaṃ punaḥ svārthaṃ bhavati parārthaṃ ca jñānātmakaṃ svārthaṃ vacanātmakaṃ parārtham tadvikalpā nayāḥ atrāha nayaśabdasya alpāctaratvāt pūrvanipātaḥ prāpnoti naiṣa doṣaḥ abhyarhitatvāt pramāṇasya pūrvanipātaḥ abhyarhitatvaṃ ca sarvato balīyaḥ kuto 'bhyarhitatvam nayaprarūpaṇaprabhavayonitvāt evaṃ hy uktaṃ pragṛhya pramāṇataḥ pariṇativiśeṣād arthāvadhāraṇaṃ nayaḥ iti sakalaviṣayatvāc ca pramāṇasya tathā coktaṃ sakalādeśaḥ pramānādhīno vikalādeśo nayādhīnaḥ iti nayo dvividhaḥ dravyārthikaḥ paryāyārthikaś ca paryāyārthikanayena bhāvatattvam adhigantavyam itareṣāṃ trayāṇāṃ dravyārthikanayena sāmānyātmakatvāt dravyam arthaḥ prayojanam asyety asau dravyārthikaḥ paryāyo 'rthaḥ prayojanam asyety asau paryāyārthikaḥ tatsarvaṃ samuditaṃ pramāṇenādhigantavyam

evaṃ pramāṇanayair adhigatānāṃ jīvādīnāṃ punar apy adhigamopāyāntarapradarśanārtham āha

nirdeśaḥ svarūpābhidhānam svāmitvam ādhipatyam sādhanam utpattinimittam adhikaraṇam adhiṣṭhānam stithiḥ kālaparicchedaḥ vidhānaṃ prakāraḥ tatra samyagdarśanaṃ kim iti praśne tattvārthaśraddhānām iti nirdeśo nāmādir vā kasyety ukte sāmānyena jīvasya viśeṣeṇa gatyanuvādena narakagatau sarvāsu pṛthivīṣu nārakāṇām paryāptakānām aupaśamikaṃ kṣāyopaśamikaṃ cāsti prathamāyāṃ pṛthivyāṃ paryāptāparyāptakānāṃ kṣāyikaṃ kṣāyopaśamikaṃ cāsti tiryaggatau tiraścāṃ paryāptakānām aupaśamikam asti kṣāyikaṃ kṣāyopaśamikaṃ ca paryāptāparyāptakānām asti tiraścīnāṃ kṣāyikaṃ nāsti aupaśamikaṃ kṣāyopaśamikaṃ ca paryāptikānām eva nāparyāptikānām manuṣyagatau manuṣyāṇāṃ paryāptāparyāptakānāṃ kṣāyikaṃ kṣāyopaśamikaṃ cāsti aupaśamikaṃ paryāptakānām eva nāparyāptakānām mānuṣīṇāṃ tritayam apy asti paryāptikānām eva nāparyāptikānām devagatau devānāṃ paryāptāparyāptakānāṃ tritayam apy asti aupaśamikam aparyāptakānāṃ katham iti cec cāritramohopaśamena saha mṛtān prati bhavanavāsivyantarajyotiṣkāṇāṃ devānāṃ devīnāṃ ca saudharmaiśānakalpavāsinīnāṃ ca kṣāyikaṃ nāsti teṣāṃ paryāptakānām aupaśamikaṃ kṣāyopaśamikaṃ cāsti

indriyānuvādena pañcendriyāṇāṃ saṃjñināṃ tritayam apy asti netareṣām kāyānuvādena trasakāyikānāṃ tritayam apy asti netareṣām yogānuvādena trayāṇāṃ yogānāṃ tritayam apy asti ayogināṃ kṣāyikam eva vedānuvādena trivedānāṃ tritayam apy asti apagatavedānām aupaṣamikaṃ kṣāyikaṃ cāsti kaṣāyānuvādena catuṣkaṣāyāṇāṃ tritayam apy asti akaṣāyāṇām aupaṣamikaṃ kṣāyikaṃ cāsti jñānānuvādena ābhinibodhikaśrutāvadhikamanaḥparyayajñānināṃ tritayam apy asti kevalajñānināṃ kṣāyikam eva saṃyamānuvādena sāmāyikacchedopasthāpanāsaṃyatānāṃ tritayam apy asti parihāraviśuddhisaṃyatānām aupaśamikaṃ nāsti itarad dvitayam apy asti sūkṣmasāṃparāyayathākhyātasaṃyatānām aupaśamikaṃ kṣāyikaṃ cāsti saṃyatāsaṃyatānām asaṃyatānām ca tritayam apy asti darśanānuvādena cakṣurdarśanācakṣurdarśanāvadhidarśanināṃ tritayam apy asti kevaladarśanināṃ kṣāyikam eva leśyānuvādena ṣaḍleśyānāṃ tritayam apy asti aleśyānāṃ kṣāyikam eva bhavyānuvādena bhavyānāṃ tritayam apy asti nābhavyānām samyaktvānuvādena yatra yat samyagdarśanaṃ tatra tad eva jñeyam saṃjñānuvādena saṃjñināṃ tritayam apy asti nāsaṃjñinām tadubhayavyapadeśarahitānāṃ kṣāyikam eva āhārānuvādena āhārakāṇāṃ tritayam apy asti anāhārakāṇāṃ chadmasthānāṃ tritayam apy asti kevalināṃ samudghātagatānāṃ kṣāyikam eva

sādhanaṃ dvividham abhyantaraṃ bāhyaṃ ca abhyantaraṃ darśanamohasyopaśamaḥ kṣayaḥ kṣayopaśamo vā bāhyaṃ nārakāṇāṃ prakcaturthyāḥ samyagdarśanasya sādhanaṃ keṣāṃcij jātismaraṇaṃ keṣāṃcid dharmaśravaṇaṃ keṣāṃcid vedanābhibhavaḥ caturthīm ārabhya ā saptamyā nārakāṇām jātismaraṇaṃ vedanābhibhavaś ca tiraścāṃ keṣāṃcij jātismaraṇaṃ keṣāṃcid dharmaśravaṇaṃ keṣāṃcij jinabimbadarśanam manuṣyāṇām api tathaiva devānāṃ keṣaṃcij jātismaraṇaṃ keṣāṃcid dharmaśravaṇaṃ keṣāṃcij jinamahimadarśanaṃ keṣāṃcid devardhidarśanam evaṃ prāgānatāt ānataprāṇatāraṇācyutadevānāṃ devardhidarśanaṃ muktvānyat tritayam apy asti navagraiveyakavāsināṃ keṣāṃcij jātismaraṇaṃ keṣaṃcid dharmaśravaṇam anudiśānuttaravimānavāsinām iyaṃ kalpanā na saṃbhavati prāgeva gṛhītasamyaktvānāṃ tatrotpatteḥ

adhikaraṇaṃ dvividham abhyantaraṃ bāhyaṃ ca abhyantaraṃ svasvāmisaṃbandhārha eva ātmā vivakṣātaḥ kārakapravṛtteh bāhyaṃ lokanāḍī sā kiyatī ekarajjuviṣkambhā caturdaśarajjvāyāmā

sthitir aupaśamikasya jaghanyotkṛṣṭā cāntarmauhūrtikī kṣāyikasya saṃsāriṇo jaghanyāntamauhūrtikī utkṛṣṭā trayastriṃśatsāgaropamāṇi sāntarmuhūrtāṣṭavarṣahīnapūrvakoṭidvayādhikāni muktasya sādir aparyavasānā kṣāyopaśamikasya jaghanyāntarmauhūrttikī utkṛṣṭāṣaṭṣaṣṭisāgaropamāṇi

vidhānaṃ sāmānyād ekaṃ samyagdarśanam dvitayaṃ nisargajādhigamajabhedāt tritayaṃ aupaśamikakṣāyikakṣāyopaśamikabhedāt evaṃ saṃkhyeyā vikalpāḥ śabdataḥ asaṃkhyeyā anantāś ca bhavanti śraddhātṛśraddhātavyabhedāt evam ayaṃ nirdeśādividdhir jñānacāritrayor jīvājīvādiṣu cāgamānusāreṇa yojayitavyaḥ

kim etair eva jīvādīnām adhigamo bhavati uta anyo 'py adhigamopāyo 'stīti paridṛṣṭo 'stīty āha

sad ity astitvanirdeśaḥ sa praśaṃsādiṣu vartamāno neha gṛhyate saṃkhyā bhedagaṇanā kṣetraṃ nivāso vartamānakālaviṣayaḥ tad eva sparśanaṃ trikālagocaram kālo dvividhaḥ mukhyo vyāvahārikaś ca tayor uttaratra nirṇayo vakṣhyate antaraṃ virahakālaḥ bhāvaḥ aupaśamikādilakṣaṇaḥ alpabahutvam anyo 'nyāpekṣayā viśeṣapratipattiḥ etaiś ca samyagdarśanādīnāṃ jīvādīnāṃ cādhigamo veditavyaḥ nanu ca nirdeśād eva sadgrahaṇaṃ siddham vidhānagrahaṇāt saṃkhyāgatiḥ adhikaraṇagrahaṇāt kṣetrasparśanāvabodhaḥ sthitigrahaṇāt kālasaṃgrahaḥ bhāvo nāmādiṣu saṃgṛhīta eva punar eṣāṃ kim arthaṃ grahaṇam iti satyasiddham vineyāśayavaśāt tattvadeśanādikalpaḥ kecit saṃkṣeparucayaḥ kecit vistararucayaḥ apare nātisaṃkṣepeṇa nātivistareṇa pratipādyāḥ sarvasattvānugrahārtho hi satāṃ prayāsa iti adhigamābhyupāyabhedoddeśah kṛtaḥ itarathā hi pramāṇanayair adhigamaḥ ity anenaiva siddhatvād itareṣāṃ grahaṇam anarthakaṃ syāt

tatra jīvadravyam adhikṛtya sadādyanuyogadvāranirūpaṇaṃ kriyate jīvāś caturdaśasu guṇasthāneṣu vyavasthitāḥ mithyādṛṣṭiḥ sāsādanasamyagdṛṣṭiḥ samyaṅmithyādṛṣṭiḥ asaṃyatasamyagdṛṣṭiḥ saṃyatāsamyataḥ pramattasaṃyataḥ apramattasaṃyattaḥ apūrvakaraṇasthāne upaśamakaḥ kṣapakaḥ anivṛttibādarasāṃparāyasthāne upaśamakaḥ kṣapakaḥ sūkṣmasāmparāyasthāne upaśamakaḥ kṣapakaḥ upaśāntakaṣāyavītarāgachadmasthaḥ kṣīṇakaṣāyavītarāgachadmasthaḥ sayogakevalī ayogakevalī ceti eteṣām eva jīvasamāsānāṃ nirūpaṇārthaṃ caturdaśa mārgaṇāsthānāni jñeyāni gatīndriyakāyayogavedakaṣāyajñānasaṃyamadarśanaleśyābhavyasamyaktvasaṃjñāhārakā iti

tatra satprarūpaṇā dvividhā sāmānyena viśeṣeṇa ca sāmānyena asti mithyādṛṣṭiḥ sāsādanasamyagdṛṣṭir ity evam ādi viśeṣeṇa gatyanuvādena narakagatau sarvāsu pṛthivīṣu ādyāni catvāri guṇasthānāni santi tiyaggatau tāny eva saṃyatāsaṃyatasthānādhikāni santi manuṣyagatau caturdaśāpi santi devagatau nārakavat indriyānuvādena ekendriyādiṣu caturindriyaparyanteṣu ekam eva mithyādṛṣṭisthānam pañcendriyeṣu caturdaśāpi santi kāyānuvādena pṛthivīkāyādivanaspatikāyānteṣu ekam eva mithyādṛṣṭisthānam trasakāyeṣu caturdaśāpi santi yogānuvādena triṣu yogeṣu trayodaśa guṇasthānāni bhavanti tataḥ paraṃ ayogakevalī vedānuvādena triṣu vedeṣu mithyādṛṣṭyādyanivṛttibādarāntāni santi apagatavedesu anivṛttibādarādyayogakevalyantāni

kaṣāyānuvādena krodhamānamāyāsu mithyādṛṣṭyādīni anivṛttibādarasthānāntāni santi lobhakaṣāye tāny eva sūkṣmasāṃparāyasthānādhikāni akaṣāyaḥ upaśāntakaṣāyaḥ kṣīṇakaṣāyaḥ sayogakevalī ayogakevalī ceti

jñānānuvādena matyājñānaśrutājñānavibhaṅgajñāneṣu mithyādṛṣṭiḥ sāsādanasamyagdṛṣṭiś cāsti ābhinibodhikaśrutāvadhijñāneṣu asaṃyatasamyagdṛṣṭyādīni kṣīṇakaṣāyāntāni santi manaḥparyayajñāne pramattasaṃyatādayaḥ kṣīṇakaṣāyāntāḥ santi kevalajñāne sayogo 'yogaś ca

saṃyamānuvādena saṃyatāḥ pramattādayo 'yogakevalyantāḥ sāmāyikacchedopasthāpanāśuddhisaṃyatāḥ pramattādayo 'nivṛttisthānāntāḥ parihāraviśuddhisaṃyatāḥ pramattāś ca pramattāś ca sūkṣmasāṃparāyaśuddhisaṃyatā ekasminn eva sūkṣmasāṃparāyasthāne yathākhyātavihāraśuddhisaṃyatā upaśāntakaṣāyādayo 'yogakevalyāntāḥ saṃyatāsaṃyatā ekasminn eva saṃyatāsaṃyatasthāne asaṃyatā ādy eṣu caturṣu guṇasthāneṣu

darśanānuvādena cakṣurdarśanācakṣurdarśanayor mithyādṛṣṭyādīni kṣīṇakaṣāyāntāni santi avadhidarśane asaṃyatasamyagdṛṣṭyādīni kṣīṇakaṣāyāntāni santi kevaladarśane sayogakevalī ayogakevalī ca

leśyānuvādena kṛṣṇanīlakapotaleśyāsu mithyādṛṣṭyādīni asaṃyatasamyagdṛṣṭyantāni santi tejaḥpadmaleśyayor mithyādṛṣṭyādīni apramattasthānāntāni śuklaleśyāyāṃ mithyādṛṣṭyādīni sayogakevalyantāni aleśyā ayogakevalinaḥ

bhavyānuvādena bhavyeṣu caturdaśāpi santi abhavyā ādya eva sthāne

samyaktvānuvādena kṣāyikasamyaktve asaṃyatasamyagdṛṣṭyādīni ayogakevalyantāni santi kṣāyopaśamikasamyaktve asaṃyatasamyagdṛṣṭyādīni apramattāntāni aupaśamikasamyaktve asaṃyatasamyagdṛṣṭyādīni upaśāntakaṣāyāntāni sāsādanasamyagdṛṣṭiḥ samyaṅmithyādṛṣṭir mithyādṛṣṭiś ca sve sve sthāne

saṃjñānuvādena saṃjñiṣu dvādaśa guṇasthānāni kṣīṇakaṣāyāntāni asaṃjñiṣu ekam eva mithyādṛṣṭisthānam tadubhayavyapadeśarahitaḥ sayogakevalī ayogakevalī ca

āhārānuvādena āhārakeṣu mithyādṛṣṭyādīni kevalyantāni anāhārakeṣu vigrahagatyāpanneṣu trīṇi guṇasthānāni mithyādṛṣṭiḥ sāsādanasamyagdṛṣṭir asaṃyatasamyagdṛṣṭiś ca samudghātagataḥ sayogakevalī ayogakevalī ca siddhāḥ parameṣṭhinaḥ atītaguṇasthānāḥ uktā satprarūpaṇā

saṃkhyāprarūpaṇocyate sā dvividhā sāmānyena viśeṣeṇa ca sāmānyena tāvad jīvā mithyādṛṣṭayo 'nantānantāḥ sāsādanasamyagdṛṣṭayaḥ samyaṅmithyādṛṣṭayo 'saṃyatasamyagdṛṣṭayaḥ saṃyatāsaṃyatāś ca palyopmāsaṃkhyeyabhāgapramitāḥ pramattasaṃyatāḥ koṭīpṛthaktvasaṃkhyāḥ pṛthaktvam ity āgamasaṃjñā tisṝṇāṃ koṭīnāmam upari navānām adhaḥ apramattasaṃyatāḥ saṃkhyeyāḥ catvāra upaśamakāḥ praveśena eko vā dvau vā trayo vā utkarṣeṇa catuḥpañcāśat svakālena samuditāḥ saṃkhyeyāḥ catvāraḥ kṣapakā ayogakevalinaś ca praveśena eko vā dvau vā trayo vā utkarṣeṇāṣṭottaraśatasaṃkhyāḥ svakālena samuditāḥ saṃkhyeyāḥ sayogakevalinaḥ praveśena eko vā dvau vā trayo vā utkarṣeṇāṣṭottaraśatasaṃkhyāḥ svakālena samuditāḥ śatasahasrapṛthaktvasaṃkhyāḥ

viśeṣeṇa gatyanuvādena narakagatau prathamāyāṃ pṛthivyāṃ nārakā mithyādṛṣṭayo 'saṃkhyeyāḥ śreṇayaḥ pratarāsaṃkhyeyabhāgapramitāḥ dvitīyādiṣv ā saptamyā mithyādṛṣṭayaḥ śreṇyasaṃkhyeyabhāgapramitāḥ sa cāsaṃkhyeyabhāgaḥ asaṃkhyeyā yojanakoṭīkoṭyaḥ sarvāsu pṛthivīṣu sāsādanasamyagdṛṣṭayaḥ samyaṅmithyādṛṣṭayo 'samyatasamyagdṛṣṭayaś ca palyopmāsaṃkyeyabhāgapramitāḥ tiryaggatau tiraścāṃ madhye mithyādṛṣṭayo 'nantānantāḥ sāsādanasamyagdṛṣṭyādayaḥ saṃyatāsamyatāntāḥ palyopamāsaṃkyeyabhāgapramitāḥ manuṣyagatau manuṣyā mithyādṛṣṭayaḥ śreṇyasaṃkhyeyabhāgapramitāḥ sa cāsamkhyeyabhāgaḥ asaṃkhyeyā yojanakoṭīkoṭyaḥ sāsādanasamyagdṛṣṭyādayaḥ saṃyatāsaṃyatāntāḥ saṃkhyeyāḥ pramattādīnāṃ sāmānyoktā saṃkhyā devagatau devā mithyādṛṣṭayo 'samkhyeyāḥ śreṇayaḥ pratarāsaṃkhyeyabhāgapramitāḥ sāsādanasamyagdṛṣṭisamyaṅmithyādṛṣṭyasaṃyatasamyagdṛṣṭayaḥ palyopamāsaṃkhyeyabhāgapramitāḥ

indriyānuvādena ekendriyā mithyādṛṣṭayo 'nantānantāḥ dvīndriyās trīndriyāś caturindriyā asaṃkhyeyāḥ śreṇayaḥ pratarāsaṃkhyeyabhāgamitāḥ pañcendriyeṣu mithyādṛṣṭayo 'saṃkhyeyāḥ śreṇayaḥ pratarāsaṃkhyeyabhāgapramitāḥ sāsādanasamyagdṛṣṭyādayo 'yogakevalyantāḥ sāmānyoktasaṃkhyāḥ

kāyānuvādena pṛthivīkāyikā apkāyikās tejaḥkāyikā vāyukāyikā asaṃkhyeyā lokāḥ vanaspatikāyikāḥ anantānantāḥ trasakāyikasaṃkhyā pañcendriyavat

yogānuvādena manoyogino vāgyoginaś ca mithyādṛṣṭayo 'saṃkhyeyāḥ śreṇayaḥ pratarāsaṃkhyeyabhāgapramitāḥ kāyayogino mithyādṛṣṭayo 'nantānantāḥ trayānām api yogināṃ sāsādanasamyagdṛṣṭyādayaḥ saṃyatāsaṃyatāntāḥ palyopamāsaṃkhyeyabhāgapramitāḥ pramattasaṃyatādayaḥ sayogakevalyantāḥ saṃkhyeyāḥ ayogakevalinaḥ sāmānyoktasaṃkhyāḥ

vedānuvādena strīvedāḥ puṃvedāś ca mithyādṛṣṭayo 'saṃkhyeyāḥ śreṇayaḥ pratarāsaṃkhyeyabhāgapramitāḥ napuṃsakevedā mithyādṛṣṭayo 'nantānantāḥ strīvedā napuṃsakavedāś ca sāsādanasamyagdṛṣṭyādayaḥ saṃyatāsaṃyatāntāḥ sāmānyoktasaṃkhyāḥ pramattasaṃyatādayo 'nivṛttibādarāntāḥ saṃkhyeyāḥ puṃvedāḥ sāsādanasamyagdṛṣṭyādayo nivṛttibādarāntāḥ sāmanyoktasaṃkhyāḥ apagatavedā anivṛttibādarādayo 'yogakevalyantāḥ sāmānyoktasaṃkhyāḥ

kaṣāyānuvādena krodhamānamāyāsu mithyādṛṣṭyādyaḥ saṃyatāsaṃyatāntāḥ sāmānyoktasaṃkhyāḥ pramattasaṃyatādayo 'nivṛttibādarāntāḥ saṃkhyeyāḥ lobhakaṣāyāṇāṃ ukta eva kramaḥ ayaṃ tu viśeṣaḥ sūkṣmasāṃparāyasaṃyatāḥ sāmānyoktasaṃkhyāḥ akaṣāyā upaśāntakaṣāyādayo 'yogakevalyantāḥ sāmānyoktasaṃkhyāḥ

jñānānuvādena matyajñāninaḥ śrutājñāninaś ca mithyādṛṣṭisāsādanasamyagdṛṣṭayaḥ sāmānyoktasaṃkhyāḥ vibhaṅgajñānino mithyādṛṣṭayo 'saṃkyeyāḥ śreṇayaḥ pratarāsaṃkhyeyabhāgapramitāḥ sāsādanasamyagdṛṣṭayaḥ palyopamāsaṃkheyabhāgapramitāḥ matiśrutajñānino 'saṃyatasamyagdṛṣṭyādayaḥ kṣīṇakaṣāyāntāḥ sāmānyoktasaṃkhyāḥ avadhijñānino 'saṃyatasamyagdṛṣṭisaṃyatāsaṃyatāḥ sāmānyoktasaṃkhyāḥ pramattasaṃyatādayaḥ kṣīṇakaṣāyāntāḥ saṃkhyeyāḥ manaḥparyayajñāninaḥ pramattasaṃyatādayaḥ kṣīṇakaṣāyāntāḥ saṃkhyeyāḥ kevalajñāninaḥ sayogā ayogāś ca sāmānyoktasaṃkhyāḥ

saṃyamānuvādena sāmāyikacchedopasthāpanaśuddhisaṃyatāḥ pramattādayo 'nivṛttibādarāntāḥ sāmānyoktasaṃkhyāḥ parihāraviśuddhisaṃyatāḥ pramattāś cāpramattāś ca saṃkhyeyāḥ sūkṣmasāṃparāyaśuddhisaṃyatā yathākhyātavihāraśuddhisaṃyatāḥ saṃyatāsaṃyatā asaṃyatāś ca sāmānyoktasaṃkhyāḥ

darśanānuvādena cakṣurdarśanino mithyādṛṣṭayo 'saṃkheyāḥ śreṇayaḥ pratarāsaṃkheyabhāgapramitāḥ acakṣurdarśanino mithyādṛṣṭayo 'nantānantāḥ ubhaye ca sāsādanasamyagdṛṣṭyādayaḥ kṣīṇakaṣāyāntāḥ sāmānyoktasaṃkhyāḥ avadhidarśanino 'vadhijñānivat kevaladarśaninaḥ kevalajñānivat

leśyānuvādena kṛṣṇalīlakāpotaleśyā mithyādṛṣṭyādayo 'saṃyatasamyagdṛṣṭyantāḥ sāmānyoktasaṃkhyāḥ tejaḥpadmaleśyā mithyādṛṣṭyādayaḥ saṃyatāsaṃyatāntāḥ strīvedavat pramattāpramattasaṃyatāḥ saṃkhyeyāḥ śuklaleśyā mithyādṛṣṭyādayaḥ saṃyatāsaṃyatāntāḥ palyopamāsaṃkhyeyabhāgapramitāḥ pramattāpramattasaṃyatāḥ saṃkyeyāḥ apūrvakaraṇādayaḥ sayogakevalyantā aleśyāś ca sāmānyoktasaṃkhyāḥ

bhavyānuvādena bhavyeṣu mithyādṛṣṭyādayo 'yogakevalyantāḥ sāmānyoktasaṃkhyāḥ abhavyā anantāḥ

samyaktvānuvādena kṣāyikasamyagdṛṣṭiṣu asaṃyatasamyagdṛṣṭayaḥ palyopamāsaṃkheyabhāgapramitāḥ saṃyatāsaṃyatādaya upaśāntakaṣāyāntāḥ saṃkheyāḥ catvāraḥ kṣapakāḥ sayogakevalino 'yogakevalinaś ca sāmānyoktasaṃkhyāḥ kṣāyopaśamikasamyagdṛṣṭiṣv asaṃyatasamyagdṛṣṭyādayo 'pramattāntāḥ sāmānyoktasaṃkhyāḥ aupaśamikasamyagdṛṣṭiṣu asaṃyatasamyagdṛṣṭisaṃyatāsaṃyatāḥ palyopmāsaṃkheyabhāgapramitāḥ pramattāpramattasaṃyatāḥ saṃkheyāḥ catvāra aupaśamikāḥ sāmānyoktasaṃkhyāḥ sāsādanasamyagdṛṣṭayaḥ samyaṅmithyādṛṣṭayo mithyādṛṣṭayaś ca sāmānyoktasaṃkhyāḥ

saṃjñānuvādena saṃjñiṣu mithyādṛṣṭyādayaḥ kṣīṇakaṣāyāntāś cakṣurdarśanivat asaṃjñino mithyādṛṣṭayo 'nantānantāḥ tadubhayavyapadeśarahitāḥ sāmānyoktasaṃkhyāḥ

āhārānuvādena āhārakeṣu mithyādṛṣṭyādayaḥ sayogakevalyantāḥ sāmānyoktasaṃkhyāḥ anāhārakeṣu mithyādṛṣṭisāsādanasamyagdṛṣṭyasaṃyatasamyagdṛṣṭayaḥ sāmānyoktasaṃkhyāḥ sayogakevalinaḥ saṃkhyeyāḥ ayogakevalinaḥ sāmānyoktasaṃkhyāḥ saṃkhyā nirṇītā

kṣetram ucyate tad dvividhaṃ sāmānyena viśeṣeṇa ca sāmānyena tāvad mithyādṛṣṭīnāṃ sarvalokaḥ sāsādanasamyagdṛṣṭyādīnām ayogakevalyantānāṃ lokasyāsaṃkhyeyabhāgaḥ sayogakevalināṃ lokasyāsaṃkyeyabhāgo 'saṃkyeyā bhāgāḥ sarvaloko vā

viśeṣeṇa gatyanuvādena narakagatau sarvāsu pṛthivīṣu nārakāṇāṃ caturṣu guṇasthāneṣu lokasyāsaṃkhyeyabhāgaḥ tiryaggatau tiraścāṃ mithyādṛṣṭyādisaṃyatāsamyatāntānāṃ sāmānyoktaṃ kṣetram manuṣyagatau manuṣyāṇāṃ mithyādṛṣṭyādyayogakevalyantānāṃ lokasyāsaṃkhyeyabhāgaḥ sayogakevalināṃ sāmānyoktaṃ kṣetram devagatau devānāṃ sarveṣāṃ caturṣu guṇasthāneṣu lokasyāsaṃkhyeyabhāgaḥ

indriyānuvādena ekendriyāṇāṃ kṣetraṃ sarvalokaḥ vikalendriyāṇāṃ lokasyāsaṃkhyeyabhāgaḥ pañcendriyāṇāṃ manuṣyavat

kāyānuvādena pṛthivīkāyādivanaspatikāyāntānāṃ sarvalokaḥ trasakāyikānāṃ pañcendriyavat

yogānuvādena vāṅmanasayogināṃ mithyādṛṣṭyādisayogakevalyantānāṃ lokasyāsaṃkheyabhāgaḥ kāyayoginām mithyādṛṣṭyādisayogakevalyantānām ayogakevalināṃ ca sāmānyoktaṃ kṣetram

vedānuvādena strīpuṃvedānāṃ mithyādṛṣṭyādyanivṛttibādarāntānāṃ lokasyāsaṃkhyeyabhāgaḥ napuṃsakavedānāṃ mithyādṛṣṭyādyanivṛttibādarāntānām apagatavedānāṃ ca sāmānyoktaṃ kṣetram

kaṣāyānuvādena krodhamānamāyākaṣāyāṇāṃ lobhakaṣāyāṇāṃ ca mithyādṛṣṭyādyanivṛttibādarāntānāṃ sūkṣmasāṃparāyāṇām akaṣāyāṇāṃ ca sāmānyoktaṃ kṣetram

jñānānuvādena matyajñāniśrutājñānināṃ mithyādṛṣṭisāsādanasamyagdṛṣṭīnāṃ sāmānyoktaṃ kṣetram vibhaṅgajñānināṃ mithyādṛṣṭisāsādanasamyagdṛṣṭīnāṃ lokasyāsaṃkhyeyabhāgaḥ ābhinibodhikaśrutāvadhijñāninām asaṃyatasamyagdṛṣṭyādīnāṃ kṣīṇakaṣāyāntānāṃ manaḥparyayajñānināṃ ca pramattādīnāṃ kṣīṇakaṣāyāntānāṃ kevalajñānināṃ sayogānām ayogānāṃ ca sāmānyoktaṃ kṣetram

saṃyamānuvādena sāmāyikacchedopasthāpanāśuddhisaṃyatānāṃ caturṇāṃ parihāraviśuddhisaṃyatānāṃ pramattāpramattānāṃ sūkṣmasāṃparāyaśuddhisaṃyatānāṃ yathākhyātavihāraśuddhisaṃyatānāṃ caturṇāṃ saṃyatāsaṃyatānām asaṃyatānāṃ ca caturṇāṃ sāmānyoktaṃ kṣetram

darśanānuvādena cakṣurdarśanināṃ mithyādṛṣṭyādikṣīṇakaṣāyāntānāṃ lokasyāsaṃkhyeyabhāgaḥ acakṣurdarśanināṃ mithyādṛṣṭyādikṣīṇakaṣāyāntānāṃ sāmānyoktaṃ kṣetram avadhidarśaninām avadhijñānivat kevaladarśanināṃ kevalajñānivat

leśyānuvādena kṛṣṇanīlakāpotaleśyānāṃ mithyādṛṣṭyādyasaṃyatasamyagdṛṣṭyantānāṃ sāmānyoktaṃ kṣetram tejaḥpadmaleśyānāṃ mithyādṛṣṭyādyapramattāntānāṃ lokasyāsaṃkheyabhāgaḥ śuklaleśyānāṃ mithyādṛṣṭyādikṣīṇakaṣāyāntānāṃ lokasyāsaṃkheyabhāgaḥ sayogakevalinām aleśyānāṃ ca sāmānyoktaṃ kṣetram

bhavyānuvādena bhavyānāṃ caturdaśānāṃ sāmānyoktaṃ kṣetram abhavyānāṃ sarvalokaḥ

samyaktvānuvādena kṣāyikasamyagdṛṣṭīnām asaṃyatasamyagdṛṣṭyādyayogakevalyantānāṃ kṣāyopaśamikasamyagdṛṣṭīnām asaṃyatasamyagdṛṣṭyādyapramattāntānām aupaśamikasamyagdṛṣṭīnām asaṃyatasamyagdṛṣṭyādyupaśāntakaṣāyāntānāṃ sāsādanasamyagdṛṣṭīnāṃ samyaṅmithyādṛṣṭīnāṃ mithyādṛṣṭīnāṃ ca sāmānyoktaṃ kṣetram

saṃjñānuvādena saṃjñināṃ caksurdarśanivat asaṃjñināṃ sarvalokaḥ tadubhayavyapadeśarahitānāṃ sāmānyoktaṃ kṣetram

āhārānuvādena āhārakāṇāṃ mithyādṛṣṭyādikṣīṇakaṣāyāntānāṃ sāmānyoktaṃ kṣetram sayogakevalināṃ lokasyāsaṃkheyabhāgaḥ anāhārakāṇāṃ mithyādṛṣṭisāsādanasamyagdṛṣṭyasaṃyatasamyagdṛṣṭyayogakevalināṃ sāmānyoktaṃ kṣetraṃ sayogakevalināṃ lokasyāsaṃkheyā bhāgāḥ sarvaloko vā kṣetranirṇayaḥ kṛtaḥ

sparśanam ucyate tad dvividhaṃ sāmānyena viśeṣeṇa ca sāmānyena tāvan mithyādṛṣṭibhiḥ sarvalokaḥ spṛṣṭaḥ sāsādanasamyagdṛṣṭibhir lokasyāsaṃkhyeyabhāgaḥ aṣṭau dvādaśa caturdaśabhāgā vā deśonāḥ samyaṅmithyādṛṣṭyasaṃyatasamyagdṛṣṭibhir lokasyāsaṃkhyeyabhāgaḥ aṣṭau caturdaśabhāgā vā deśonāḥ saṃyatāsaṃyatair lokasyāsaṃkhyeyabhāgaḥ ṣaṭ caturdaśabhāgā vā desonāḥ pramattasaṃyatādīnām ayogakevalyantānāṃ kṣetravatsparśanam

viśeṣeṇa gatyanuvādena narakagatau prathamāyāṃ pṛthivyāṃ nārakaiś caturguṇasthānair lokasyāsaṃkhyeyabhāgaḥ spṛṣṭaḥ dvitīyādiṣu prāksaptamyā mithyādṛṣṭisāsādanasamyagdṛṣtibhir lokasyāsaṃkheyabhāgāḥ eko dvau trayaḥ catvāraḥ pañca caturdaśabhāgā vā deśonāḥ samyaṅmithyādṛṣṭyasaṃyatasamyagdṛṣṭibhir lokasyāsaṃkheyabhāgaḥ saptamyāṃ pṛthivyāṃ mithyādṛṣṭibhir lokasyāsaṃkyeyabhāgaḥ ṣaṭ caturdaśabhāgā vā deśonāḥ śeṣais tribhir lokasyāsaṃkhyeyabhāgaḥ tiryaggatau tiraścāṃ mithyādṛṣṭibhiḥ sarvalokaḥ spṛṣtaḥ sāsādanasamyagdṛṣṭibhir lokasyāsaṃkheyabhāgaḥ sapta caturdaśabhāgā vā deśonāḥ samyaṅmithyādṛṣṭibhir lokasyāsaṃkheyabhāgaḥ asaṃyatasamyagdṛṣṭisaṃyatāsaṃyatair lokasyāsaṃkheyabhāgaḥ ṣaṭ caturdaśabhāgā vā deśonāḥ manuṣyagatau manuṣyair mithyādṛṣṭibhir lokasyāsaṃkheyabhāgaḥ sarvaloko vā spṛṣṭaḥ sāsādanasamyagdṛṣtibhir lokasyāsaṃkheyabhāgaḥ sapta caturdaśabhāgā vā desonāḥ samyaṅmithyādṛṣṭyādīnām ayogakevalyantānāṃ kṣetravatsparśanam devagatau devair mithyādṛṣṭisāsādanasamyagdṛṣtibhir lokasyāsaṃkheyabhāgaḥ aṣṭau nava caturdaśabhāgā vā deśonāḥ samyaṅmithyādṛṣṭyasaṃyatasamyagdṛṣṭibhir lokasyāsaṃkheyabhāgaḥ aṣṭau caturdaśabhāgā vā deśonāḥ

indriyānuvādena ekendriyaiḥ sarvalokaḥ spṛṣṭaḥ vikalendriyair lokasyāsaṃkhyeyabhāgaḥ sarvaloko vā pañcendriyeṣu mithyādṛṣṭibhir lokasyāsaṃkheyabhāgaḥ aṣṭau caturdaśabhāgā vā deśonāḥ sarvaloko vā śeṣāṇāṃ sāmānyoktaṃ sparśanam

kāyānuvādena sthāvarakāyikaiḥ sarvalokaḥ spṛṣṭaḥ trasakāyināṃ pañcendriyavat sparśanam

yogānuvādena vāṅmanasayogināṃ mithyādṛṣṭibhir lokasyāsaṃkheyabhāgaḥ aṣṭau caturdaśabhāgā vā deśonāḥ sarvaloko vā sāsādanasamyagdṛṣṭyādīnāṃ kṣīṇakaṣāyāntānāṃ sāmānyoktaṃ sparśanam sayogakevalināṃ lokasyāsaṃkheyabhāgaḥ kāyayogināṃ mithyādṛṣṭyādīnāṃ sayogakevalyantānām ayogakevalināṃ ca sāmānyoktaṃ sparśanam

vedānuvādena strīpuṃvedair mithyādṛṣṭibhir lokasyāsaṃkheyabhāgaḥ spṛṣṭaḥ aṣṭau caturdaśabhāgā vā deśonāḥ sarvaloko vā sāsādanasamyagdṛṣṭibhiḥ lokasyāsaṃkheyabhāgaḥ aṣṭau nava caturdaśabhāgā vā deśonāḥ samyaṅmithyādṛṣṭyādyanivṛttibādarāntānāṃ sāmānyoktaṃ sparśanam napuṃsakavedeṣu mithyādṛṣṭīnāṃ sāsādanasamyagdṛṣṭīnāṃ ca sāmānyoktaṃ sparśanam samyaṅmithyādṛṣṭibhir lokasyāsaṃkheyabhāgaḥ asaṃyatasamyagdṛṣṭisamyatāsaṃyatair lokasyāsaṃkheyabhāgaḥ ṣaṭ caturdaśabhāgā vā deśonāḥ pramattādyanivṛttibādarāntānām apagatavedānāṃ ca sāmānyoktaṃ sparśanam

kaṣāyānuvādena catuṣkaṣāyāṇām akaṣāyāṇāṃ ca sāmānyoktaṃ sparśanam

jñānānuvādena matyajñāniśrutājñāninaṃ mithyādṛṣṭisāsādanasamyagdṛṣṭīnāṃ sāmānyoktaṃ sparśanam vibhaṅgajñānināṃ mithyādṛṣṭīnāṃ lokasyāsaṃkheyabhāgaḥ aṣṭau caturdaśabhāgā vā deśonāḥ sarvaloko vā sāsādanasamyagdṛṣṭīnāṃ sāmānyoktaṃ sparśanam ābhinibodhikaśrutāvadhimanaḥparyayakevalajñānināṃ sāmānyoktaṃ sparśanam

saṃyamānuvādena saṃyatānāṃ sarveṣāṃ saṃyatāsaṃyatānām asaṃyatānāṃ ca sāmānyoktaṃ sparśanam

darśanānuvādena cakṣurdarśanināṃ mithyādṛṣṭyādikṣīṇakaṣāyāntānāṃ pañcendriyavat acakṣurdarśanināṃ mithyādṛṣṭyādikṣīṇakaṣāyāntānām adhikevaladarśanināṃ ca sāmānyoktaṃ sparśanam

leśyānuvādena kṛṣṇanīlakāpotaleśyair mithyādṛṣṭibhiḥ sarvalokaḥ spṛṣṭaḥ sāsādanasamyagdṛṣṭibhir lokasyāsaṃkheyabhāgaḥ pañca catvāro dvau caturdaśabhāgā vā deśonāḥ samyaṅmithyādṛṣṭyasaṃyatasamyagdṛṣṭibhir lokasyāsaṃkheyabhāgaḥ tejoleśyair mithyādṛṣṭisāsādanasamyagdṛṣṭibhir lokasyāsaṃkheyabhāgaḥ aṣṭau nava caturdaśabhāgā vā deśonāḥ samyaṅmithyādṛṣṭyasaṃyatasaṃyagdṛṣṭibhir lokasyāsaṃkheyabhāgaḥ aṣṭau caturdaśabhāgā vā deśonāḥ saṃyatāsaṃyatair lokasyāsaṃkheyabhāgaḥ adhyardha caturdaśa bhāgā vā deśonāḥ pramattāpramattair lokasyāsaṃkheyabhāgaḥ padmaleśyair mithyādṛṣṭyādyasaṃyatasamyagdṛṣṭyantair lokasyāsaṃkheyabhāgaḥ aṣṭau caturdaśabhāgā vā deśonāḥ saṃyatāsaṃyatair lokasyāsaṃkheyabhāgaḥ pañca caturdaśabhāgā vā deśonāḥ pramattāpramattair lokasyāsaṃkhyeyabhāgaḥ śuklaleśyair mithyādṛṣṭyādisaṃyatāsamyatāntair lokasyāsaṃkheyabhāgaḥ ṣaṭ caturdaśabhāgā vā deśonāḥ pramattādisayogakevalyantānām aleśyānāṃ ca sāmānyoktaṃ sparśanam

bhavyānuvādena bhavyānāṃ mithyādṛṣṭyādyayogakevalyantānāṃ sāmānyoktaṃ sparśanam abhavyaiḥ sarvalokaḥ spṛṣṭaḥ

samyaktvānuvādena kṣāyikasamyagdṛṣṭīnām asaṃyatasamyagdṛṣṭyādyayogakevalyantānāṃ sāmānyoktam kiṃtu saṃyatāsaṃyatānāṃ lokasyāsaṃkheyabhāgaḥ kṣāyopaśamikasamyagdṛṣṭīnāṃ sāmānyoktam aupaśamikasamyaktvānām asaṃyatasamyagdṛṣṭīnāṃ sāmānyoktam śeṣāṇāṃ lokasyāsaṃkheyabhāgaḥ sāsādanasamyagdṛṣṭisamyagmithyādṛṣṭimithyādṛṣṭīnāṃ sāmānyoktam

saṃjñānuvādena saṃjñināṃ caksurdarśanivat asaṃjñibhiḥ sarvalokaḥ spṛṣṭaḥ tadubhayavyapadeśarahitānāṃ sāmānyoktam

āhārānuvādena āhārakāṇāṃ mithyādṛṣṭyādikṣīṇakaṣāyāntānāṃ sāmānyoktam sayogakevalināṃ lokasyāsaṃkheyabhāgaḥ anāhārakeṣu mithyādṛṣṭibhiḥ sarvalokaḥ spṛṣṭaḥ sāsādanasamyagdṛṣṭibhir lokasyāsaṃkheyabhāgaḥ ekādaśa caturdaśabhāgā vā deśonāḥ asaṃyatasamyagdṛṣṭibhiḥ lokasyāsaṃkheyabhāgaḥ ṣaṭ caturdaśa bhāgā vā deśonāḥ sayogakevalināṃ lokasyāsaṃkheyabhāgāḥ sarvaloko vā ayogakevalināṃ lokasyāsaṃkheyabhāgaḥ sparśanaṃ vyākhyātam

kālaḥ prastūyate sa dvividhaḥ sāmānyena viśeṣeṇa ca sāmānyena tāvad mithyādṛṣṭer nānājīvāpekṣayā sarvakālaḥ ekajīvāpekṣayā trayo bhaṅgāḥ anādir aparyavasānaḥ anādiḥ saparyavasānaḥ sādiḥ saparyavasānaś ceti tatra sādiḥ saparyavasāno jaghanyenāntarmuhūrttaḥ utkarṣeṇārdhapudgalaparivartto deśonaḥ sāsādanasamyagdṛṣṭer nānājīvāpekṣayā jaghanyenaikaḥ samayaḥ utkarṣeṇa palyopamāsaṃkheyabhāgaḥ ekajīvaṃ prati jaghanyenaikaḥ samayaḥ utkarṣeṇa ṣaḍāvalikāḥ samyaṅmithyādṛṣṭer nānājīvāpekṣayā jaghanyenāntarmuhūrttaḥ utkarṣeṇa palyopamāsaṃkheyabhāgaḥ ekajīvaṃ prati jaghanyaḥ utkṛṣṭaś cāntarmuhūrttaḥ asaṃyatasamyagdrṣṭer nānājīvāpekṣayā sarvaḥ kālaḥ ekajīvaṃ prati jaghanyenāntarmuhūrttaḥ utkarṣeṇa trayastriṃśatsāgaropamāṇi sātirekāṇi saṃyatāsaṃyatasya nānājīvāpekṣayā sarvaḥ kālaḥ ekajīvaṃ prati jaghanyenāntarmuhūrttaḥ utkarṣeṇa pūrvakoṭī deśonā pramattāpramattayor nānājīvāpekṣayā sarvakālaḥ ekajīvaṃ prati jaghanyenaikaḥ samayaḥ utkarṣeṇāntarmuhūrttaḥ caturṇām upaśamakānāṃ nānājīvāpekṣayā ekajīvāpeksayā ca jaghanyenaikaḥ samayaḥ utkarṣeṇāntarmuhūrttaḥ caturṇāṃ kṣapakāṇām ayogakevalināṃ ca nānājīvāpekṣayā ekajīvāpekṣayā ca jaghanyaś cotkṛṣṭaś cāntarmuhūrttaḥ sayogakevalināṃ nānājīvāpekṣayā sarvakālaḥ ekajīvaṃ prati jaghanyenāntarmuhūrtaḥ utkarṣeṇa pūrvakoṭī deśonā

viśeṣeṇa gatyanuvādena narakagatau nārakeṣu saptasu pṛthivīṣu mithyādṛṣṭer nānājīvāpekṣayā sarvakālaḥ ekajīvaṃ prati jaghanyenāntarmuhūrtaḥ utkarṣeṇa yathāsaṃkhyaṃ ekatrisaptadaśasaptadaśadvāviṃśatitrayastriṃśatsāgaropamāṇi sāsādanasamyagdṛṣṭeḥ samyagmithyādṛṣṭeś ca sāmānyoktaḥ kālaḥ asaṃyatasamyagdṛṣṭer nānājīvāpekṣayā sarvakālaḥ ekajīvaṃ prati jaghanyenāntarmuhūrtaḥ utkarṣeṇa ukta evotkṛṣṭo deśonaḥ

tiryaggatau tiraścāṃ mithyādṛṣṭīnāṃ nānājīvāpekṣayā sarvakālaḥ ekajīvaṃ prati jaghanyenāntarmuhūrtaḥ utkarṣeṇānantaḥ kālo 'saṃkhyeyāḥ pudgalaparivartāḥ sāsādanasamyagdṛṣṭisamyagmithyādṛṣṭisaṃyatāsaṃyatānāṃ sāmānyoktaḥ kālaḥ asaṃyatasamyagdṛṣṭer nānājīvāpekṣayā sarvakālaḥ ekajīvaṃ prati jaghanyenāntarmuhūrtaḥ utkarṣeṇa trīṇi palyopamāni

manuṣyagatau manuṣyeṣu mithyādṛṣṭer nānājīvāpekṣayā sarvakālaḥ ekajīvaṃ prati jaghanyenāntarmuhūrtaḥ utkarseṇa trīṇi palyopamāni pūrvakoṭīpṛthaktvair abhyadhikāni sāsādanasamyagdṛṣṭer nānājīvāpekṣayā jaghanyenaikaḥ samayaḥ utkarṣeṇāntarmuhūrtaḥ ekajīvaṃ prati jaghanyenaikaḥ samayaḥ utkarṣeṇa ṣaḍāvalikāḥ samyagmithyādṛṣṭer nānājīvāpekṣayā ekajīvāpekṣayā ca jaghanyaś cotkṛṣṭaś cāntarmuhūrtaḥ asaṃyatasamyagdṛṣṭer nānājīvāpekṣayā sarvakālaḥ ekajīvaṃ prati jaghanyenāntarmuhūrtaḥ utkarṣeṇa trīṇi palyopamāni sātirekāṇi śeṣāṇāṃ sāmānyoktaḥ kālaḥ

devagatau deveṣu mithyādṛṣṭer nānājīvāpekṣayā sarvakālaḥ ekajīvaṃ prati jaghanyenāntarmuhūrtaḥ utkarseṇaikatriṃśatsāgaropamāṇi sāsādanasamyagdṛṣṭeḥ samyagmithyādṛṣṭeś ca sāmānyoktaḥ kālaḥ asaṃyatasamyagdṛṣṭer nānājīvāpekṣayā sarvakālaḥ ekajīvaṃ prati jaghanyenāntarmuhūrtaḥ utkarseṇa trayastriṃśatsāgaropamāni

indriyānuvādena ekendriyāṇāṃ nānājīvāpekṣayā sarvakālaḥ ekajīvaṃ prati jaghanyena kṣudrabhavagrahaṇaṃ utkarṣeṇānantaḥ kālo 'saṃkheyāḥ pudgalaparivartāḥ vikalendriyāṇāṃ nānājīvāpekṣayā sarvaḥ kālaḥ ekajīvaṃ prati jaghanyena kṣudrabhavagrahaṇam utkarṣeṇa saṃkheyāni varṣasahasrāṇi pañcendriyeṣu mithyādṛṣṭer nānājīvāpekṣayā sarvaḥ kālaḥ ekajīvaṃ prati jaghanyenāntarmuhūrtaḥ utkarṣeṇa sāgaropamasahasraṃ pūrvakoṭīpṛthaktvair abhyadhikam śeṣāṇāṃ sāmānyoktaḥ kālaḥ

kāyānuvādena pṛthivyaptejovāyukāyikānāṃ nānājīvāpekṣayā sarvakālaḥ ekajīvaṃ prati jaghanyena kṣudrabhavagrahaṇam utkarṣeṇāsaṃkhyeyā lokāḥ vanaspatikāyikānām ekendriyavat trasakāyikeṣu mithyādṛṣṭer nānājīvāpekṣayā sarvaḥ kālaḥ ekajīvaṃ prati jaghanyenāntarmuhūrtaḥ utkarṣeṇa dve sagaropamasahasre pūrvakoṭīpṛthaktvair abhyadhike śeṣānāṃ pañcendriyavat

yogānuvādena vāṅmanasayogiṣu mithyādṛṣṭyasaṃyatasamyagdṛṣṭisaṃyatāsaṃyatapramattāpramattasayogakevalināṃ nānājīvāpekṣayā sarvakālaḥ ekajīvāpekṣayā jaghanyenaikaḥ samayaḥ utkarṣeṇāntarmuhūrtaḥ sāsādanasamyagdṛṣṭeḥ sāmānyoktaḥ kālaḥ samyaṅmithyādṛṣṭer nānājīvāpekṣayā jaghanyenaikasamayaḥ utkarṣeṇa palyopamāsaṃkhyeyabhāgaḥ ekajīvaṃ prati jaghanyenaikaḥ samayaḥ utkarṣeṇāntarmuhūrtaḥ caturṇām upaśamakānāṃ kṣapakāṇāṃ ca nānājīvāpekṣayā ekajīvāpekṣayā ca jaghanyenaikasamayaḥ utkarṣeṇāntarmuhūrtaḥ kāyayogiṣu mithyādṛṣṭer nānājīvāpekṣayā sarvakālaḥ ekajīvaṃ prati jaghanyenaikasamayaḥ utkarṣeṇānantaḥ kālo 'saṃkhyeyāḥ pudgalaparivartāḥ śeṣaṇāṃ manoyogivat ayogānāṃ sāmānyavat

vedānuvādena strīvedeṣu mithyādṛṣṭer nānājīvāpekṣayā sarvakālaḥ ekajīvaṃ prati jaghanyenāntarmuhūrtaḥ utkarṣeṇa palyopamaśatapṛthaktvam sāsādanasamyagdṛṣṭyādyanivṛttibādarāntānāṃ sāmānyoktaḥ kālaḥ kintu asaṃyatasamyagdṛṣṭer nānājīvāpekṣayā sarvakālaḥ ekajīvaṃ prati jaghanyenāntarmuhūrtaḥ utkarṣeṇa pañcapañcāśatpalyopamāni deśonāni puṃvedeṣu mithyādṛṣṭer nānājīvāpekṣayā sarvaḥ kālaḥ ekajīvaṃ prati jaghanyenāntarmuhūrtaḥ utkarṣeṇa sāgaropamaśatapṛthaktvam sāsādanasamyagdṛṣṭādyanivṛttibādarāntānāṃ sāmānyoktaḥ kālaḥ napuṃsakavedeṣu mithyādṛṣṭer nānājīvāpekṣayā sarvaḥ kālaḥ ekajīvaṃ prati jaghanyenāntarmuhūrtaḥ utkarṣeṇānantaḥ kālo 'saṃkhyeyāḥ pudgalaparivarttāḥ sāsādanasamyagdṛṣṭādyanivṛttibādarāntānāṃ sāmānyavat kiṃtv asaṃyatasamyagdṛṣṭer nānājīvāpekṣayā sarvaḥ kālaḥ ekajīvaṃ prati jaghanyenāntarmuhūrtaḥ utkarṣeṇa trayastriṃśatsāgaropamāṇi deśonāni apagatavedānāṃ sāmānyavat

kaṣāyānuvādena catuṣkaṣāyāṇāṃ mithyādṛṣṭyādyapramattāntānāṃ manoyogivat dvayor upaśamakayor dvayoḥ kṣapakayoḥ kevalalobhasya ca akaṣāyāṇāṃ ca sāmānyotaḥ kālaḥ

jñānānuvādena matyajñāniśrutājñāniṣu mithyādṛṣṭisāsādanasamyagdṛṣṭyoḥ sāmānyavat vibhaṅgajñāniṣu mithyādṛṣṭer nānājīvāpekṣayā sarvaḥ kālaḥ ekajīvaṃ prati jaghanyenāntarmuhūrtaḥ utkarṣeṇa trayastriṃśatsāgaropamāṇi deśonāni sāsādanasamyagdṛṣṭeḥ sāmānyoktaḥ kālaḥ ābhinibodhikaśrutāvadhimanaḥparyayakevalajñānināṃ ca sāmānyoktaḥ

saṃyamānuvādena sāmāyikacchedopasthāpanaparihāraviśuddhisūkṣmasāṃparāyayathākhyātaśuddhisaṃyatānāṃ saṃyatāsaṃyatānām asaṃyatānāṃ ca caturṇāṃ sāmānyoktaḥ kālaḥ

darśanānuvādena cakṣurdarśaniṣu mithyādṛṣṭer nānājīvāpekṣayā sarvaḥ kālaḥ ekajīvaṃ prati jaghanyenāntarmuhūrtaḥ utkarṣeṇa dve sāgaropamasahasre sāsādanasamyagdṛṣṭyādīnāṃ kṣīṇakaṣāyāntānāṃ sāmānyoktaḥ kālaḥ acakṣurdarśaniṣu mithyādṛṣṭyādikṣīṇakaṣāyāntānāṃ sāmānyoktaḥ kālaḥ avadhikevaladarśaninor avadhikevalajñānivat

leśyānuvādena kṛṣṇanīlakāpotaleśyāsu mithyādṛṣṭer nānājīvāpekṣayā sarvaḥ kālaḥ ekajīvaṃ prati jaghanyenāntarmuhūrtaḥ utkarṣeṇa trayastriṃśatsaptadaśasaptasāgaropamāṇi sātirekāṇi sāsādanasamyagdṛṣṭisamyaṅmithyādṛṣṭyoḥ sāmānyoktaḥ kālaḥ asaṃyatasamyagdṛṣṭer nānājīvāpekṣayā sarvaḥ kālaḥ ekajīvaṃ prati jaghanyenāntarmuhūrtaḥ utkarṣeṇa trayastriṃśatsaptadaśasaptasāgaropamāṇi deśonāni tejaḥpadmaleśyayor mithyādṛṣṭyasaṃyatasamyagdṛṣṭyor nānājīvāpekṣayā sarvaḥ kālaḥ ekajīvaṃ prati jaghanyenāntarmuhūrtaḥ utkarṣeṇa dve sāgaropame aṣṭādaśa ca sāgaropamāṇi sātirekāṇi sāsādanasamyagdṛṣṭisamyaṅmithyādṛṣṭyoḥ sāmānyoktaḥ kālaḥ saṃyatāsaṃyatapramattāpramattānāṃ nānājīvāpekṣayā sarvaḥ kālaḥ ekajīvaṃ prati jaghanyenaikaḥ samayaḥ utkarśeṇāntarmuhūrtaḥ śuklaleśyānāṃ mithyādṛṣṭer nānājīvāpekṣayā sarvaḥ kālaḥ ekajīvaṃ prati jaghanyenāntarmuhūrtaḥ utkarṣeṇaikatriṃśatsāgaropamāṇi sātirekāṇi sāsādanasamyagdṛṣṭyādisayogakevalyantānām aleśyānāṃ ca sāmānyoktaḥ kālaḥ kiṃ tu saṃyatāsaṃyatasya nānājīvāpekṣayā sarvaḥ kālaḥ ekajīvaṃ prati jaghanyenaikaḥ samayaḥ utkarṣeṇāntarmuhūrtaḥ

bhavyānuvādena bhavyeṣu mithyādṛṣṭer nānājīvāpekṣayā sarvaḥ kālaḥ ekajīvāpekṣayā dvau bhaṅgau anādiḥ saparyavasānaḥ sādiḥ saparyavasānaś ca tatra sādiḥ saparyavasāno jaghanyenāntarmuhūrtaḥ utkarṣeṇārddhapudgalaparivarto deśonaḥ sāsādanasamyagdṛṣṭyādyayogakevalyantānāṃ sāmānyoktaḥ kālaḥ abhavyānām anādir aparyavasānaḥ

samyaktvānuvādena kṣāyikasamyagdṛṣṭīnām asaṃyatasamyagdṛṣṭādyayogakevalyantānāṃ sāmānyoktaḥ kālaḥ kṣāyopaśamikasamyagdṛṣṭīnāṃ caturṇāṃ sāmānyoktaḥ kālaḥ aupaśamikasamyaktveṣu asaṃyatasamyagdṛṣṭisaṃyatāsaṃyator nānājīvāpekṣayā jaghanyenāntarmuhūrtaḥ utkarṣeṇa palyopamāsaṃkheyabhāgaḥ ekajīvaṃ prati jaghanyaś cotkṛṣṭaś cāntarmuhūrtaḥ pramatāpramattayoś caturṇām upaśamakānāṃ ca nānājīvāpekṣayā ekajīvāpekṣayā ca jaghanyenaikaḥ samayaḥ utkarṣeṇāntarmuhūrtaḥ sāsādanasamyagdṛṣṭisamyaṅmithyādṛṣṭimithyādṛṣṭīnāṃ sāmānyoktaḥ kālaḥ

saṃjñānuvādena saṃjñiṣu mithyādṛṣṭyādyanivṛttibādarāntānāṃ puṃvedavat śeṣāṇām sāmānyoktaḥ asaṃjñināṃ nānājīvāpekṣayā sarvaḥ kālaḥ ekajīvaṃ prati jaghanyena kṣudrabhavagrahaṇam utkarṣenānantaḥ kalo 'saṃkhyeyāḥ pudgalaparivartāḥ tadubhayavyapadeśarahitānāṃ sāmānyoktaḥ

āhārānuvādena āhārakeṣu mithyādṛṣṭer nānājīvāpekṣayā sarvaḥ kālaḥ ekajīvaṃ prati jaghayenāntarmuhūrtaḥ utkarṣeṇāṃgulāsaṃkheyabhāgaḥ asaṃkheyāsaṃkheyā utsarpiṇyavasarpiṇyaḥ śeṣāṇāṃ sāmānyoktaḥ kālaḥ anāhārakeṣu mithyādṛṣṭer nānājīvāpekṣayā sarvaḥ kālaḥ ekajīvaṃ prati jaghanyenaikaḥ samayaḥ utkarṣeṇa trayaḥ samayāḥ sāsādanasamyagdṛṣṭyasaṃyatasamyagdṛṣṭyor nānājīvāpekṣayāḥ jaghanenaikaḥ samayaḥ utkarṣeṇāvalikāyā asaṃkhyeyabhāgaḥ ekajīvaṃ prati jaghanyenaikaḥ samayāḥ utkarṣeṇa dvau samayau sayogakevalino nānājīvāpekṣayā jaghanyena trayaḥ samayāḥ utkarṣeṇa saṃkheyāḥ samayāḥ ekajīvaṃ prati jaghanyaś cotkṛṣṭaś ca trayaḥ samayāḥ ayogakevalināṃ sāmānyokataḥ kālaḥ kālo varṇitaḥ

antaraṃ nirūpyate vivakṣitasya guṇasya guṇāntarasaṃkrame sati punastatprāpteḥ prāṅmadhyam antaram tad dvividhaṃ sāmānyena viśeṣaṇa ca sāmānyena tāvad mithyādṛṣṭer nānājīvāpekṣayā nāsty antaram ekajīvaṃ prati jaghanyenārmuhūrtaḥ utkarṣeṇa dve ṣaṭṣaṣtī deśone sāgaropamāṇām sāsādanasamyagdṛṣṭer antaraṃ nānājīvāpekṣayā jaghanyenaikaḥ samayaḥ utkarṣeṇa palyopamāsaṃkheyabhāgaḥ ekajīvaṃ prati jaghanyena palyopamāsaṃkhyeyabhāgaḥ utkarṣeṇārddhapudgalaparivarto deśonaḥ samyagmithyādṛṣṭer antaraṃ nānājīvāpekṣayā sāsādanavat ekajīvaṃ prati jaghanyenāntarmuhūrtaḥ utkarṣeṇārddhapudgalaparivarto deśonaḥ asaṃyatasamyagdṛṣṭādyapramattāntānāṃ nānājīvāpekṣayā nāsty antaram ekajīvaṃ prati jaghanyenāntarmuhūrtaḥ utkarṣeṇārddhapudgalaparivarto deśonaḥ caturṇām upaśamakānāṃ nānājīvāpekṣayā jaghanyenaikaḥ samayaḥ utkarṣeṇa varṣapṛthaktvam ekajīvaṃ prati jaghanyenāntarmuhūrtaḥ utkarṣeṇārddhapudgalaparivarto deśonāḥ caturṇāṃ kṣapakāṇām ayogakevalināṃ ca nānājīvāpekṣayā jaghanyenaikaḥ samayaḥ utkarṣeṇa ṣaṇmāsāḥ ekajīvaṃ prati nāsty antaram sayogakevalināṃ nānājīvāpekṣayā ekajīvāpekṣayā ca nāsty antaram

viśeṣeṇa gatyanuvādena narakagatau nārakāṇāṃ saptasu pṛthivīṣu mithyādṛṣṭyasaṃyatasamyagdṛṣṭyor nānājīvāpekṣayā nāsty antaraṃ ekajīvaṃ prati jaghanyenāntarmuhūrtaḥ utkarṣeṇa ekatrisaptadaśasaptadaśadvāviṃśatitrayastriṃśatsāgaropamāṇi deśonāni sāsādanasamyagdṛṣṭisamyaṅmithyādṛṣṭyor nānājīvāpekṣayā jaghanyenaikaḥ samayaḥ utkarṣeṇa palyopamāsaṃkhyeyabhāgaḥ ekajīvaṃ prati jaghanyena palyopamāsaṃkhyeyabhāgo 'ntarmuhūrtaś ca utkarṣeṇa ekatrisaptadaśasaptadaśadvāviṃśatitrayastriṃśatsāgaropamāṇi deśonāni

tiryaggatau tiraścāṃ mithyādrster nānājīvāpekeṣayā nasty antaram ekajīvaṃ prati jaghanyenāntarmuhūrtaḥ utkarṣeṇa trīṇi palyopamāni deśonāni sāsādanasamyagdṛṣṭyādīnāṃ caturṇāṃ sāmānyoktam antaram

manuṣyagatau manuṣyāṇāṃ mithyādṛṣṭes tiryagvat sāsādanasamyagdṛṣṭisamyagmithyādṛṣṭyor nānājīvāpekṣayā sāmānyavat ekajīvaṃ prati jaghanyena palyopamāsaṃkhyeyabhāgo 'ntarmuhūrtaś ca utkarṣeṇa trīṇi palyopamāni pūrvakoṭīpṛthaktvair abhyadhikāni asaṃyatasamyagdṛṣṭer nānājīvāpekṣayā nāsty antaram ekajīvāpekṣayā jaghanyenāntarmuhūrtaḥ utkarṣeṇa trīṇi palyopamāni pūrvakoṭīpṛthaktvair abhyadikāni saṃyatāsaṃyatapramattāpramattānāṃ nānājīvāpekṣayā nasty antaram ekajīvaṃ prati jaghanyenāntarmuhūrtaḥ utkarṣeṇa pūrvakoṭīpṛthaktvāni caturṇām upaśamakānāṃ nānājīvāpekṣayā sāmānyavat ekajīvaṃ prati jaghanyenāntarmuhūrtaḥ utkarṣeṇa pūrvakoṭīpṛthaktvāni śeṣāṇāṃ sāmānyavat

devagatau devānāṃ mithyādṛṣṭyasaṃyatasamyagdṛṣṭyor nānājīāpekṣayā nāsty antaram ekajīvaṃ prati jaghanyenāntarmuhūrtaḥ utkarṣeṇa ekatriṃśatsāgaropmāṇi deśonāni sāsādanasamyagdṛṣṭisamyagmithyādṛṣṭyor nānājīvāpekṣayā sāmānyavat ekajīvaṃ prati jaghanyena palyopamāsaṃkheyabhāgo 'ntarmuhūrtaś ca utkarṣeṇaikatriṃśatsāgaropamāṇi deśonāni

indriyānuvādena ekendriyāṇāṃ nānājīvāpekṣayā nāsty antaram ekajīvāpekṣayā jaghanyena kṣudrabhavagrahaṇam utkarṣeṇa dve sāgaropamasahasre pūrvakoṭīpṛthaktvair abhyadhike vikalendriyāṇāṃ nānājīvāpekṣayā nāsty antaram ekajīvaṃ prati jaghanyena kṣudrabhavagrahaṇam utkarṣeṇānantaḥ kālo 'saṃkhyeyāḥ pudgalaparivartāḥ evam indriyaṃ praty antaram uktam guṇaṃ praty ubhayato 'pi nāsty antaram pañcendriyeṣu mithyādṛṣṭeḥ sāmānyavat sāsādanasamyagdṛṣṭisamyaṅmithyādṛṣṭyor nānājīvāpekṣayā sāmānyavat ekajīvaṃ prati jaghanyena palyopamāsaṃkhyeyabhāgo 'ntarmuhūrtaś ca utkarseṇa sāgaropmasahasraṃ pūrvakoṭīpṛthaktvair abhyadhikam asaṃyatasamyagdṛṣṭyādyapramattāntānāṃ nānājīvāpekṣayā nāsty antaram ekajīvaṃ prati jaghanyenāntarmuhūrtaḥ utkarṣeṇa sāgaropamasahasraṃ pūrvakoṭīpṛthaktvair abhyadhikam caturṇām upaśamakānāṃ nānājīvāpekṣayā sāmānyavat ekajīvaṃ prati jaghanyenāntarmuhūrtaḥ utkarṣeṇa sāgaropamasahasraṃ pūrvakoṭīpṛthaktvair abhyadhikam śeṣāṇāṃ sāmānyoktam

kāyānuvādena pṛthivyaptejovāyukāyikānāṃ nānājīvāpekṣayā nāsty antaram ekajīvaṃ prati jaghanyena kṣudrabhavagrahaṇam utkarṣeṇānantaḥ kālo 'saṃkhyeyāḥ pudgalaparivartāḥ vanaspatikāyikānāṃ nānājīvāpekṣayā nāsty antaram ekajīvāpekṣayā jaghanyena kṣudrabhavagrahaṇam utkarṣeṇāsaṃkhyeyā lokāḥ evaṃ kāyaṃ praty antaram uktam guṇaṃ praty ubhayato 'pi nāsty antaram trasakāyikeṣu mithyādṛṣṭeh sāmānyavat sāsādanasamyagdṛṣṭisamyaṅmithyādṛṣṭyor nānājīvāpekṣayā sāmānyavat ekajīvaṃ prati jaghanyena palyopamāsaṃkhyeyabhāgo 'ntarmuhūrtaś ca urkarṣeṇa dve sāgaropamasahasre pūrvakoṭīpṛthaktvair abhyadhike asaṃyatasamyagdṛṣṭyādyapramattāntānāṃ nānājīvāpekṣayā nāsty antaram ekajīvaṃ prati jaghanyenāntarmuhūrtaḥ utkarṣeṇa dve sāgaropamasahasre pūrvakoṭīpṛthaktvair abhyadhike caturṇāṃ upaśamakānāṃ nānājīvāpekṣayā sāmānyavat ekajīvaṃ prati jaghanyenāntarmuhūrtaḥ utkarṣeṇa dve sāgaropamasahasre pūrvakoṭīpṛthaktvair abhyadhike śeṣāṇāṃ pañcendriyavat

yogānuvādena kāyavāṅmanasayogināṃ mithyādṛṣṭyasaṃyatasamyagdṛṣṭisaṃyatāsaṃyatapramattāpramattasayogakevalināṃ nānājīvāpekṣayā ekajīvāpekṣayā ca nāsty antaram sāsādanasamyagdṛṣṭisamyaṅmithyādṛṣṭyor nānājīvāpekṣayā sāmānyavat ekajīvaṃ prati nāsty antaram caturṇām upaśamakānāṃ nānājīvāpekṣayā sāmānyavat ekajīvaṃ prati nāsty antaram caturṇām kṣapakāṇām ayogakevalināṃ ca sāmānyavat

vedānuvādena strīvedeṣu mithyādṛṣṭer nānājīvāpekṣayā nāsty antaram ekajīvaṃ prati jaghanyenāntarmuhūrtaḥ utkarṣeṇa pañcapañcāśatpalyopamāni deśonāni sāsādanasamyagdṛṣṭisamyagmithyādṛṣṭyor nānājīvāpekṣaya sāmānyavat ekajīvaṃ prati jaghanyena palyopamāsaṃkhyeyabhāgo 'ntarmuhūrtaś ca utkarṣeṇa palyopamaśatapṛthaktvam asaṃyatasamyagdṛṣṭyādyapramattāntānāṃ nānājīvāpekṣayā nāsty antaram ekajīvaṃ prati jaghanyenāntarmuhūrtaḥ utkarṣeṇa palyopamaśatapṛthaktvam dvayor upaśamakayor nānājīvāpekṣayā sāmānyavat ekajīvaṃ prati jaghanyenāntarmuhūrtaḥ utkarṣeṇa palyopamaśatapṛthaktvam dvayoḥ kṣapakayor nānājīvāpekṣayā jaghanyenaikaḥ samayaḥ utkarṣeṇa varṣapṛthaktvam ekajīvaṃ prati nāsty antaram

puṃvedeṣu mithyādṛṣṭeḥ sāmānyavat sāsādanasamyagdṛṣṭisamyagmithyādṛṣṭyor nānājīvāpekṣayā sāmānyavat ekajīvaṃ prati jaghanyena palyopmāsaṃkhyeyabhāgo 'ntarmuhūrtaś ca utkarṣeṇa sāgaropamaśatapṛthaktvam asaṃyatasamyagdṛṣṭyādyapramattāntānāṃ nānājīvāpekṣayā nāsty antaram ekajīvaṃ prati jaghanyenāntarmuhūrtaḥ utkarṣeṇa sāgaropamaśatapṛthaktvam dvayor upaśamakayor nānājīvāpekṣayā sāmānyavat ekajīvaṃ prati jaghanyenāntarmuhūrtaḥ utkarṣeṇa sāgaropamaśatapṛthaktvam dvayoḥ kṣapakayor nānājīvāpekṣayā jaghanyenaikaḥ samayaḥ utkarṣeṇa saṃvatsaraḥ sātirekaḥ ekajīvaṃ prati nāsty antaram

napuṃsakavedeṣu mithyādṛṣṭer nānājīvāpekṣayā nāsty antaram ekajīvaṃ prati jaghanyenāntarmuhūrtaḥ utkarṣeṇa trayastriṃśatsāgaropamāṇi deśonāni sāsādanasamyagdṛṣṭyādyanivṛttyupaśamakāntānāṃ sāmānyoktam dvayoḥ kṣapakayoḥ strīvedavat apagatavedeṣu anivṛttibādaropaśamakasūkṣmasāṃparāyopaśamakayor nānājīvāpekṣayā sāmānyoktam ekajīvaṃ prati jaghanyam utkṛṣṭaṃ cāntarmuhūrtaḥ upaśāntakaṣāyasya nānājīvāpekṣayā sāmānyavat ekajīvaṃ prati nāsty antaram śeṣāṇāṃ sāmānyavat

kaṣāyānuvādena krodhamānamāyālobhakaṣāyāṇāṃ mithyādṛṣṭādyanivṛttyupaśamakāntānāṃ manoyogivat dvayoḥ kṣapakayor nānājīvāpekṣayā jaghanyenaikaḥ samayaḥ utkarṣeṇa saṃvatsaraḥ sātirekaḥ kevalalobhasya sūkṣmasāṃparāyopaśamakasya nānājīvāpekṣayā sāmānyavat ekajīvaṃ prati nāsty antaram kṣapakasya tasya sāmānyavat akaṣāyeṣu upaśāntakaṣāyasya nānājīvāpekṣayā sāmānyavat ekajīvaṃ prati nāsty antaram śeṣāṇāṃ trayāṇāṃ sāmānyavat

jñānānuvādena matyajñānaśrutājñānavibhaṅgajñāniṣu mithyādṛṣṭer nānājīvāpekṣayā ekajīvāpekṣayā ca nāsty antaram sāsādanasamyagdṛṣṭer nānājīvāpekṣayā sāmānyavat ekajīvaṃ prati nāsty antaram ābhinibodhikaśrutāvadhijñāniṣu asaṃyatasamyagdṛṣṭer nānājīvāpekṣayā nāsty antaram ekajīvaṃ prati jaghanyenāntarmuhūrtaḥ utkarṣeṇa pūrvakoṭī deśonā saṃyatāsaṃyatasya nānājīvāpekṣayā nāsty antaram ekajīvaṃ prati jaghanyenāntarmuhūrtaḥ utkarṣeṇa ṣaṭṣaṣṭisāgaropamāṇi sātirekāṇi pramattāpramattayor nānājīvāpekṣayā nāsty antaram ekajīvaṃ prati jaghanyenāntarmuhūrtaḥ utkarsena trayastriṃśatsāgaropamāṇi sātirekāṇi caturṇām upaśamakānāṃ nānājīvāpekṣayā sāmānyavat ekajīvaṃ prati jaghanyenāntarmuhūrtaḥ utkarṣeṇa ṣaṭṣaṣṭisāgaropamāṇi sātirekāṇi caturṇāṃ kṣapakāṇāṃ sāmānyavat kiṃ tu avadhijñāniṣu nānājīvāpekṣayā jaghanyenaikaḥ samayaḥ utkarṣeṇa varṣapṛthaktvam ekajīvaṃ prati nāsty antaram manaḥparyayajñāniṣu pramattāpramattasaṃyatayor nānājīvāpekṣayā nāsty antaram ekajīvaṃ prati jaghanyam utkṛṣṭaṃ cāntarmuhūrtaḥ caturṇāṃ upaśamakānāṃ nānājīvāpekṣayā sāmānyavat ekajīvaṃ prati jaghanyenāntarmuhūrtaḥ utkarṣeṇa pūrvakoṭī deśonā caturṇāṃ kṣapakāṇām avadhijñānivat dvayoḥ kevalajñāninoḥ sāmānyavat

saṃyamānuvādena sāmāyikacchedopasthāpanaśuddhisaṃyateṣu pramattāpramattayor nānājīvāpekṣayā nāsty antaram ekajīvaṃ prati jaghanyam utkṛṣṭam cāntarmuhūrtaḥ dvayor upaśamakayor nānājīvāpekṣayā sāmānyavat ekajīvaṃ prati jaghanyenāntarmuhūrtaḥ utkarṣeṇa pūrvakoṭī deśonā dvayoḥ kṣapakayoḥ sāmānyavat parihāraśuddhisaṃyateṣu pramattāpramattayor nānājīvāpekṣayā nāsty antaram ekajīvaṃ prati jaghanyam utkṛṣṭaṃ cāntarmuhūrtaḥ sūkṣmasāmparāyaśuddhisaṃyateṣūpaśamakasya nānājīvāpekṣayā sāmānyavat ekajīvaṃ prati nāsty antaram tasyaiva kṣapakasya sāmānyavat yathākhyāte akaṣāyavat saṃyatāsaṃyatasya nānājīvāpekṣayā ekajīvāpekṣayā ca nāsty antaram asaṃyateṣu mithyādṛṣṭer nānājīvāpekṣayā nāsy antaram ekajīvaṃ prati jaghanyenāntarmuhūrtaḥ utkarṣeṇa trayastriṃśatsāgaropamāṇi deśonāni śeṣāṇāṃ trayāṇām sāmānyavat

darśanānuvādena cakṣurdarśaniṣu mithyādṛṣṭeḥ sāmānyavat sāsādanasamyagdṛṣṭisamyagmithyādṛṣṭyor nānājīvāpekṣayā sāmānyavat ekajīvaṃ prati jaghanyena palyopamāsaṃkheyabhāgo 'ntarmuhūrtaś ca utkarṣeṇa dve sāgaropamasahasre deśone asaṃyatasamyagdṛṣṭyādyapramattāntānāṃ nānājīvāpekṣayā nāsty antaram ekajīvaṃ prati jaghanyenāntarmuhūrtaḥ utakrṣeṇa dve sāgaropamasahasre deśone caturṇām upaśamakānāṃ nānājīvāpekṣayā sāmānyoktam ekajīvaṃ prati jaghanyenāntarmuhūrtaḥ utkarṣeṇa dve sāgaropamasahasre deśone caturṇāṃ kṣapakāṇāṃ sāmānyoktam acakṣurdarśaniṣu mithyādṛṣṭyādikṣīṇakaṣāyāntānāṃ sāmānyoktam antaram avadhidarśanino 'vadhijñānivat kevaladarśaninaḥ kevalajñānivat

leśyānuvādena kṛṣṇalīlakāpotaleśyāsu mithyādṛṣṭyasaṃyatasamyagdṛṣṭyor nānājīvāpekṣayā nāsty antaram ekajīvaṃ prati jaghanyenāntarmuhūrtaḥ utkarṣeṇa trayastriṃśatsaptadaśasaptasāgaropamāṇi deśonāni sāsādanasamyagdṛṣṭisamyagmithyādṛṣṭyor nānājīvāpekṣayā sāmānyavat ekajīvaṃ prati jaghanyena palyopamāsaṃkheyabhāgo 'ntarmuhūrtaś ca utkarṣeṇa trayastriṃśatsaptadaśasaptasāgaropamāṇi deśonāni

tejaḥpadmaleśyayor mithyādṛṣṭyasaṃyatasamyagdṛṣṭyor nānājīvāpekṣayā nāsty antaram ekajīvaṃ prati jaghanyenāntarmuhūrtaḥ utkarṣeṇa dve sāgaropame aṣṭādaśa ca sāgaropamāṇi sātirekāṇi sāsādanasamyagdṛṣṭisamyagmithyādṛṣṭyor nānājīvāpekṣayā sāmānyavat ekajīvaṃ prati jaghanyena palyopamāsaṃkhyeyabhāgo 'ntarmuhūrtaś ca utkarṣeṇa dve sāgaropame aṣṭādaśa ca sāgaropamāṇi sātirekāṇi saṃyatāsaṃyatapramattāpramattasaṃyatānāṃ nānājīvāpekṣayā ekajīvāpekṣayā ca nāsty antaram

śuklaleśyeṣu mithyādṛṣṭyasaṃyatasamyagdṛṣṭyor nānājīvāpekṣayā nāsty antaram ekajīvaṃ prati jaghanyenāntarmuhūrtaḥ utkarṣeṇaikatriṃśatsāgaropamāṇi deṣonāni sāsādanasamyagdṛṣṭisamyaṅmithyādṛṣṭyor nānājīvāpekṣayā sāmānyavat ekajīvaṃ prati jaghanyena palyopamāsaṃkhyeyabhāgo 'ntarmuhūrtaś ca utkarṣeṇaikatriṃśatsāgaropamāṇi deśonāni saṃyatāsaṃyatapramattasaṃyatos tejoleśyāvat apramattasaṃyatsya nānājīvāpekṣayā nāsty antaram ekajīvaṃ prati jaghanyam utkṛṣṭaṃ cāntarmuhūrtaḥ trayāṇām upaśamakānāṃ nānājīvāpekṣayā sāmānyavat ekajīvaṃ prati jaghanyam utkṛṣṭaṃ cāntarmuhūrtaḥ upaśāntakaṣāyasya nānājīvāpekṣayā sāmānyavat ekajīvaṃ prati nāsty antaram caturṇāṃ kṣapakāṇāṃ sayogakevalinām aleśyānāṃ ca sāmānyavat

bhavyānuvādena bhavyeṣu mithyādṛṣṭyādyayogakevalyantānāṃ sāmānyavat abhavyānāṃ nānājīvāpekṣayā ekajīvāpekṣayā ca nāsty antaram

samyaktvānuvādena kṣāyikasamyagdṛṣṭiṣv asamyatasamyagdṛṣṭer nānājīvāpekṣayā nāsty antaram ekajīvaṃ prati jaghanyenāntarmuhūrtaḥ utkarṣeṇa pūrvakoṭī deśonā saṃyatāsaṃyatapramattāpramattasaṃyatānāṃ nānājīvāpekṣayā nāsty antaram ekajīvaṃ prati jaghanyenāntarmuhūrtaḥ utkarṣeṇa trayastriṃśatsāgaropamāṇi sātirekāṇi caturṇām upaśamakānāṃ nānājīvāpekṣayā sāmānyavat ekajīvaṃ prati jaghanyenāntarmuhūrtaḥ utkarṣeṇa trayastriṃśatsāgaropamāṇi sātirekāṇi śeṣāṇāṃ sāmānyavat

kṣāyopaśamikasamyagdṛṣṭiṣv asaṃyatasamyagdṛṣṭer nānājīvāpekṣayā nāsty antaram ekajīvaṃ prati jaghanyenāntarmuhūrtaḥ utkarṣeṇa pūrvakoṭī deśonā saṃyatāsaṃyatasya nānājīvāpekṣayā nāsty antaram ekajīvaṃ prati jaghanyenāntarmuhūrtaḥ utkarṣeṇa ṣaṭṣaṣṭisāgaropamāṇi deśonāni pramattāpramattasaṃyatayor nānājīvāpekṣayā nāsty antaram ekajīvaṃ prati jaghanyenāntarmuhūrtaḥ utkarṣeṇa trayastriṃśatsāgaropamāṇi sātirekāṇi

aupaśamikasamyagdṛṣṭiṣv asaṃyatasamyagdṛṣṭer nānājīvāpekṣayā jaghanyenaikaḥ samayaḥ utkarṣeṇa sapta rātriṃdināni ekajīvaṃ prati jaghanyaṃ utkṛṣṭaṃ cāntarmuhūrtaḥ saṃyatāsaṃyatasya nānājīvāpekṣayā jaghanyenaikaḥ samayaḥ utkarṣeṇa caturdaśa rārtriṃdināni ekajīvaṃ prati jaghanyam utkṛṣṭaṃ cāntarmuhūrtaḥ pramattāpramattasaṃyatayor nānājīvāpekṣayā jaghanyenaikaḥ samayaḥ utkarṣeṇa paṃcadaśa rātriṃdināni ekajīvaṃ prati jaghanyaṃ utkṛṣṭaṃ cāntarmuhūrtaḥ trayāṇam upaśamakānāṃ nānājīvāpekṣayā jaghanyenaikaḥ samayaḥ utkarṣeṇa varṣapṛthaktvam ekajīvaṃ prati jaghanyam utkṛṣṭaṃ cāntarmuhūrtaḥ upaśāntakaṣāyasya nānājīvāpekṣayā sāmānyavat ekajīvaṃ prati nāsty antaram sāsādanasamyagdṛṣṭisamyaṅmithyādṛṣṭyor nānājīvāpekṣayā jaghanyenaikaḥ samayaḥ utkarṣeṇa palyopamāsaṃkheyabhāgaḥ ekajīvaṃ prati nāsty antaram mithyādṛṣṭer nānājīvāpekṣayā ekajīvāpekṣayā ca nāsty antaram

saṃjñānuvādena saṃjñiṣu mithyādṛṣṭeḥ sāmānyavat sāsādanasamyagdṛṣṭisamyaṅmithyādṛṣṭyor nānājīvāpekṣayā sāmānyavat ekajīvaṃ prati jaghanyena palyopamāsaṃkhyeyabhāgo 'ntarmuhūrtaś ca utkarṣeṇa sāgaropamaśatapṛthaktvam asaṃyatasamyagdṛṣṭyādyapramattāntānāṃ nānājīvāpekṣayā nāsty antaram ekajīvaṃ prati jaghanyenāntarmuhūrtaḥ utkarṣeṇa sāgaropamaśatapṛthaktvam caturṇām upaśamakānāṃ nānājīvāpekṣayā sāmānyavat ekajīvaṃ prati jaghanyenāntarmuhūrtaḥ utkarṣeṇa sāgaropamaśatapṛthaktvam caturṇāṃ kṣapakāṇāṃ sāmānyavat asaṃjñināṃ nānājīvāpekṣayaikajīvāpekṣayā ca nāsty antaram tadubhayavyapadeśarahitānāṃ sāmānyavat

āhārānuvādena āhārakeṣu mithyādṛṣṭeḥ sāmānyavat sāsādanasamyagdṛṣtisamyaṅmithyādṛṣṭyor nānājīvāpekṣayā sāmānyavat ekajīvaṃ prati jaghanyena palyopmāsaṃkhyeyabhāgo 'ntarmuhūrtaś ca utkarśeṇāṅgulāsaṃkhyeyabhāgo 'saṃkhyeyāsaṃkhyeyā utsarpiṇyavasarpiṇyaḥ asaṃyatasamyagdṛṣṭyapramattāntānāṃ nānājīvāpekṣayā nāsty antaram ekajīvaṃ prati jaghanyenāntarmuhūrtaḥ utkarśeṇāṅgulāsaṃkhyeyabhāgo 'saṃkhyeyā utsarpiṇyavasarpiṇyaḥ caturṇām upaśamakānāṃ nānājīvāpekṣayā sāmānyavat ekajīvaṃ prati jaghanyenāntarmuhūrtaḥ utkarṣeṇāṅgulāsaṃkhyeyabhāgo 'saṃkhyeyāsaṃkhyeyā utsarpiṇyavsarpiṇyaḥ caturṇāṃ kṣapakāṇāṃ sayogakevalināṃ ca sāmānyavat

anāhārakeṣu mithyādṛṣṭer nānājīvāpekṣayā ekajīvāpekṣayā ca nāsty antaram sāsādanasamyagdṛṣṭer nānājīvāpekṣayā jaghanyenaikaḥ samayaḥ utkarṣeṇa palyopamāsaṃkhyeyabhāgaḥ ekajīvaṃ prati nāsty antaram asaṃyatasamyagdṛṣṭer nānājīvāpekṣayā jaghanyenaikaḥ samayaḥ utkarṣena māsapṛthaktvam ekajīvaṃ prati nāsty antaram sayogakevalinaḥ nānājīvāpekṣayā jaganyenaikaḥ samayaḥ utkarṣeṇa varṣapṛthaktvam ekajīvaṃ prati nāsty antaram ayogakevalinaḥ nānājīvāpekṣayā jaghanyenaikaḥ samayaḥ utkarṣeṇa ṣaṇmāsāḥ ekajīvaṃ prati nāsty antaram antaram avagatam

bhāvo vibhāvyate sa dvividhaḥ sāmānyena viśeṣeṇa ca sāmānyena tavat mithyādṛṣṭir ity audayiko bhāvaḥ sāsādanasamyagdṛṣṭir iti pāriṇāmiko bhāvaḥ samyaṅmithyādṛṣṭir iti kṣāyopaśamiko bhāvaḥ asaṃyatasamyagdṛṣṭir iti aupaśamiko vā kṣāyiko vā kṣāyopaśamiko vā bhāvaḥ asaṃyataḥ punar audayikena bhāvena saṃyatāsaṃyataḥ pramattasaṃyato 'pramattasaṃyata iti kṣāyopaśamiko bhāvaḥ caturṇām upaśamakānām aupaśamiko bhāvaḥ caturṣu kṣapakeṣu sayogāyogakevalinoś ca kṣāyiko bhāvaḥ

viśeṣeṇa gatyanuvādena narakagatau prathamāyāṃ pṛthivyāṃ nārakāṇāṃ mithyādṛṣṭyādyasaṃyatasamyagdṛṣṭyantānāṃ sāmānyavat dvitīyādiṣv ā saptamyā mithyādṛṣṭisāsādanasamyagdṛṣṭisamyaṅmithyādṛṣṭīnāṃ sāmānyavat asaṃyatasamyagdṛṣṭer aupaśamiko vā kṣāyopaśamiko vā bhāvaḥ asaṃyataḥ punar audayikena bhāvena tiryaggatau tiraścāṃ mithyādṛṣṭyādisaṃyatāsaṃyatāntānāṃ sāmānyavat manuṣyagatau manuṣyāṇāṃ mithyādṛṣṭyādyayogakevalyantānāṃ sāmānyavat devagatau devānāṃ mithyādṛṣṭyādyasaṃyatasamyagdṛṣṭyantānāṃ sāmānyavat

indriyānuvādena ekendriyavikalendriyāṇām audayiko bhāvaḥ pañcendriyeṣu mithyādṛṣṭyādyayogakevalyantānāṃ sāmānyavat

kāyānuvādena sthāvarakāyikānām audayiko bhāvaḥ trasakāyikānāṃ sāmānyam eva

yogānuvādena kāyavāṅmanasayogināṃ mithyādṛṣṭyādisayogakevalyantānāṃ ca sāmānyam eva

vedānuvādena strīpunnapuṃsakavedānāṃ avedānāṃ ca sāmānyavat

kaṣāyānuvādena krodhamānamāyālobhakaṣāyāṇām akaṣāyāṇāṃ ca sāmānyavat

jñānānuvādena matyajñāniśrutājñānivibhaṅgajñānināṃ matiśrutāvadhimanaḥparyayakevalajñānināṃ ca sāmānyavat

saṃyamānuvādena sarveṣāṃ saṃyatānāṃ saṃyatāsaṃyatānāṃ ca sāmānyavat

darśanānuvādena cakṣurdarśanācakṣurdarśanāvadhidarśanakevaladarśanināṃ sāmānyavat

leśyānuvādena ṣaḍleśyāleśyānāṃ ca sāmanyavat

bhavyānuvādena bhavyānāṃ mithyādṛṣṭyādyayogakevalyantānāṃ sāmānyavat abhavyānāṃ pāriṇāmiko bhāvaḥ

samyaktvānuvādena kṣāyikasamyagdṛṣṭiṣu asaṃyatasamyagdṛṣṭeḥ kṣāyiko bhāvaḥ kṣāyikaṃ samyaktvam asaṃyatatvam audayikena bhāvena saṃyatāsaṃyatapramattāpramattasaṃyatānāṃ kṣāyopaśamiko bhāvaḥ kṣāyikaṃ samyaktvam caturṇām upaśamakānām aupaśamiko bhāvaḥ kṣāyikaṃ samyaktvam śeṣāṇāṃ sāmānyavat kṣāyopaśamikasamyagdṛṣṭiṣu asaṃyatasamyagdṛṣṭeḥ kṣāyopaśamiko bhāvaḥ kṣāyopaśamikaṃ samyaktvam asaṃyataḥ punar audayikena bhāvena saṃyatāsaṃyatapramattāpramattasaṃyatānāṃ kṣāyopaśamiko bhāvaḥ kṣāyopaśamikaṃ samyaktvam aupaśamikasamyagdṛṣṭiṣu asaṃyatasamyagdṛṣṭer aupaśamiko bhāvaḥ aupaśamikaṃ samyaktvam asaṃyataḥ punar audayikena bhāvena saṃyatāsaṃyatapramattāpramattasaṃyatānāṃ kṣāyopaśamiko bhāvaḥ aupaśamikaṃ samyaktvam caturṇāṃ upaśamakānām aupaśamiko bhāvaḥ aupaśamikaṃ samyaktvam sāsādanasamyagdṛṣṭeḥ pāriṇāmiko bhāvaḥ samyaṅmithyādṛṣṭeḥ kṣāyopaśmiko bhāvaḥ mithyādṛṣṭer audayiko bhāvaḥ

saṃjñānuvādena saṃjñināṃ sāmānyavat asaṃjñinām audayiko bhāvaḥ tadubhayavyapadeśarahitānāṃ sāmānyavat

āhārānuvādena āhārakāṇām anāhārakāṇāṃ ca sāmānyavat bhāvaḥ parisamāptaḥ

alpabahutvam upavarṇyate tad dvividhaṃ sāmānyena viśeṣeṇa ca sāmānyena tāvat sarvataḥ stokāḥ traya upaśamakāḥ svaguṇasthānakāleṣu praveśena tulyasaṃkhyāḥ upaśāntakaṣāyās tāvanta eva trayaḥ kṣapakāḥ saṃkhyeyaguṇāḥ kṣīṇakaṣāyavītarāgacchadmasthās tāvanta eva sayogakevalino 'yogakevalinaś ca praveśena tulyasaṃkhyāḥ sayogakevalinaḥ svakālena samuditāḥ saṃkhyeyaguṇāḥ apramattasaṃyatāḥ saṃkhyeyaguṇāḥ pramattasaṃyatāḥ saṃkhyeyaguṇāḥ saṃyatāsaṃyatā asaṃkhyeyaguṇāḥ sāsādanasamyagdṛṣṭayo 'saṃkhyeyaguṇāḥ samyagmithyādṛṣṭayaḥ saṃkhyeyaguṇāḥ asaṃyatasamyagdṛṣṭayo 'saṃkhyeyaguṇāḥ mithyādṛṣṭayo 'nantaguṇāḥ

viśeṣeṇa gatyanuvādena narakagatau sarvāsu pṛthivīṣu nārakeṣu sarvataḥ stokāḥ sāsādanasamyagdṛṣṭayaḥ samyagmithyādṛṣṭayaḥ saṃkhyeyaguṇāḥ asaṃyatasamyagdṛṣṭayo 'saṃkhyeyaguṇāḥ mithyādṛṣṭayo 'saṃkhyeyaguṇāḥ tiryaggatau tiraścāṃ sarvataḥ stokāḥ saṃyatāsaṃyatāḥ itareṣāṃ sāmānyavat manuṣyagatau manuṣyāṇām upaśamakādipramattasaṃyatāntānāṃ sāmānyavat tataḥ saṃkhyeyaguṇāḥ saṃyatāsaṃyatāḥ sāsādanasamyagdṛṣṭayaḥ saṃkhyeyaguṇāḥ samyagmithyādṛṣṭayaḥ saṃkhyeyaguṇāḥ asaṃyatasamyagdṛṣṭayaḥ saṃkhyeyaguṇāḥ mithyādṛṣṭayo 'saṃkhyeyaguṇāḥ devagatau devānāṃ nārakavat

indriyānuvādena ekendriyavikalendriyeṣu guṇasthānabhedo nāstīty alpabahutvābhāvaḥ pañcendriyāṇāṃ sāmānyavat ayaṃ tu viśeṣaḥ mithyādṛṣṭayo 'saṃkhyeyaguṇāḥ

kāyānuvādena sthāvarakāyeṣu guṇasthānabhedābhāvād alpabhahutvābhāvaḥ traskāyikānāṃ pañcendriyavat

yogānuvādena vāṅmanasayogināṃ pañcendriyavat kāyayogināṃ sāmānyavat vedānuvādena strīpuṃvedānāṃ pañcendriyavat napuṃsakavedānāṃ avedānāṃ ca sāmānyavat

kaṣāyānuvādena krodhamānamāyākaṣāyāṇāṃ puṃvedavat ayaṃ tu viśeṣaḥ mithyādṛṣṭayo 'nantaguṇāḥ lobhakaṣāyāṇāṃ dvayor upaśamakayos tulyā saṃkhyā kṣapakāḥ saṃkhyeyaguṇāḥ sūkṣmasāṃparāyaśuddhyupaśamakasaṃyatā viśeṣādhikāḥ sūkṣmasāṃparāyakṣapakāḥ saṃkhyeyaguṇāḥ śeṣāṇām sāmānyavat

jñānānuvādena matyajñāniśrutājñāniṣu sarvataḥ stokāḥ sāsādanasamyagdṛṣṭayaḥ mithyādṛṣṭayo 'nantaguṇāḥ vibhaṅgajñāniṣu sarvataḥ stokāḥ sāsādanasamyagdṛṣṭayaḥ mithyādṛṣṭayo 'saṃkhyeyaguṇāḥ matiśrutāvadhijñāniṣu sarvataḥ stokāś catvāra upaśamakāś catvāraḥ kṣapakāḥ saṃkhyeyaguṇāḥ apramattasaṃyatāḥ saṃkhyeyaguṇāḥ pramattasaṃyatāḥ saṃkhyeyaguṇāḥ saṃyatāsaṃyatāḥ asaṃkhyeyaguṇāḥ asaṃyatasamyagdṛṣṭayaḥ asaṃkhyeyaguṇāḥ manaḥparyayajñāniṣu sarvataḥ stokāś catvāra upaśamakāḥ catvāraḥ kṣapakāḥ saṃkhyeyaguṇāḥ apramattasaṃyatāḥ saṃkhyeyaguṇāḥ pramattasaṃyatāḥ saṃkhyeyaguṇāḥ kevalajñāniṣu ayogakevalibhyaḥ sayogakevalinaḥ saṃkhyeyaguṇāḥ

saṃyamānuvādena sāmāyikacchedopasthāpanāśuddhisaṃyateṣu dvayor upaśamakayos tulyā saṃkhyā tataḥ saṃkhyeyaguṇau kṣapakau apramattāḥ saṃkhyeyaguṇāḥ pramattāḥ saṃkhyeyaguṇāḥ parihāraśuddhisaṃyateṣu apramattebhyaḥ pramattāḥ saṃkhyeyaguṇāḥ sūkṣmasaṃparāyaśuddhisaṃyateṣu upaśamakebhyaḥ kṣapakāḥ saṃkhyeyaguṇāḥ yathākhyātavihāraśuddhisaṃyateṣu upaśāntakaṣāyebhyaḥ kṣīṇakaṣāyāḥ saṃkhyeyaguṇāḥ ayogakevalinas tāvanta eva sayogakevalinaḥ saṃkhyeyaguṇāḥ saṃyatāsaṃyatānāṃ nāsty alpabahutvam asaṃyateṣu sarvataḥ stokāḥ sāsādanasamyagdṛṣṭayaḥ samyaṅmityādṛṣṭayaḥ saṃkhyeyaguṇāḥ asaṃyatasamyagdṛṣṭayayo 'saṃkhyeyaguṇāḥ mityādṛṣṭayo 'nantaguṇāḥ

darśanānuvādena cakṣurdarśanināṃ manoyogivat acakṣurdarśanināṃ kāyayogivat avadhidarśaninām avadhijñānivat kevaladarśanināṃ kevalajñānivat

leśyānuvādena kṛṣṇalīlakāpotaleśyānāṃ asaṃyatavat tejaḥpadmaleśyānāṃ sarvataḥ stokā apramattāḥ pramattāḥ saṃkhyeyaguṇāḥ evam itareṣāṃ pañcendriyavat śuklaleśyānāṃ sarvaḥ stokā upaśamakāḥ kṣapakāḥ saṃkhyeyaguṇāḥ sayogakevalinaḥ saṃkhyeyaguṇāḥ apramattasaṃyatāḥ saṃkhyeyaguṇāḥ pramattasaṃyatāḥ saṃkhyeyaguṇāḥ saṃyatāsaṃyatā asaṃkhyeyaguṇāḥ sāsādanasamyagdṛṣṭayo 'saṃkhyeyaguṇāḥ samyagmithyādṛṣṭayaḥ saṃkhyeyaguṇāḥ mithyādṛṣṭayo 'saṃkhyeyaguṇāḥ asaṃyatasamyagdṛṣṭayaḥ saṃkhyeyaguṇāḥ

bhavyānuvādena bhavyānāṃ sāmānyavat abhavyānāṃ nāsty alpabahutvam

samyaktvānuvādena kṣhāyikasamyagdṛṣṭiṣu sarvataḥ stokāś catvāra upaśamakāḥ itareṣāṃ pramattāntānāṃ sāmānyavat tataḥ saṃyatāsaṃyatāḥ saṃkhyeyaguṇāḥ asaṃyatasamyagdṛṣṭayo 'saṃkhyeyaguṇāḥ kṣāyopaśamikasamyagdṛṣṭiṣu sarvataḥ stokā apramattā pramattāḥ saṃkhyeyaguṇāḥ saṃyatāsaṃyatāḥ asaṃkhyeyaguṇāḥ asaṃyatasamyagdṛṣṭayo 'saṃkhyeyaguṇāḥ aupaśamikasamyagdṛṣṭīnāṃ sarvataḥ stokāś catvāra upaśamakāḥ apramattāḥ saṃkhyeyaguṇāḥ pramattāḥ saṃkhyeyaguṇāḥ saṃyatāsaṃyatāḥ asaṃkhyeyaguṇāḥ asaṃyatasamyagdṛṣṭayo 'saṃkhyeyaguṇāḥ śeṣāṇāṃ nāsty alpabahutvam

saṃjñānuvādena saṃjñināṃ cakurdarśanivat asaṃjñināṃ nāsty apabahutvam tadubhayavyapadeśarahitānāṃ kevalajñānivat

āhārānuvādena āhārakāṇāṃ kāyayogivat anāhārakāṇāṃ sarvataḥ stokāḥ sayogakevalinaḥ ayogakevalinaḥ saṃkhyeyaguṇāḥ sāsādanasamyagdṛṣṭayo 'saṃkhyeyaguṇāḥ asaṃyatasamyagdṛṣṭayo 'saṃkhyeyaguṇāḥ mithyādṛṣṭyo 'nantaguṇāḥ

evaṃ mithyādṛṣṭyādīnāṃ gatyādiṣu mārgaṇā kṛtā sāmānyena tatra sūkṣmabheda āgamāvirodhenānusartavyaḥ

evaṃ samyagdarśanasyādāv uddiṣṭasya lakṣaṇotpattisvāmiviṣayanyāsādhigamopāyā nirdiṣṭāḥ tatsaṃbandhena ca jīvādīnāṃ saṃjñāparimāṇādi nirdiṣṭam tadantaraṃ samyagjñānaṃ vicārārham ity āha

jñānaśabdaḥ pratyekaṃ parisamāpyate matijñānaṃ śrutajñānaṃ avadhijñānaṃ manaḥparyayajñānaṃ kevalajñānam iti indriyair manasā ca yathā svam artho manyate anayā manute mananamātraṃ vā matiḥ tadāvaraṇakarmakṣayopaśame sati nirūpyamāṇaṃ śrūyate anena tat śṛṇoti śravaṇamātraṃ vā śrutam anayoḥ pratyāsannanirdeśaḥ kṛtaḥ kāryakāraṇabhāvāt tathā ca vakṣyate śrutaṃ matipūrvam iti avāgdhānād avacchinnaviṣayād vā avadhiḥ parakīyamanogato 'rtho mana ity ucyate sāhacaryāt tasya paryayaṇaṃ parigamanaṃ manaḥparyayaḥ matijñānaprasaṅga iti cet na apekṣāmātratvāt kṣayopaśamaśaktimātravijṛmbhitaṃ hi tatkevalaṃ svaparamanobhir vyapadiśyate yathā abhre candramasaṃ paśyeti bāhyenābhyantareṇa ca tapasā yadartham arthino mārgaṃ kevante sevante tatkevalam asahāyam iti vā tadante prāpyate iti ante kriyate tasya pratyāsannatvāt tatsamīpe manaḥparyayagrahaṇam kutaḥ pratyāsattiḥ saṃyamaikādhikaraṇatvāt tasya avadhir viprakṛṣṭaḥ kutaḥ viprakṛṣṭāntaratvāt pratyakṣāt parokṣaṃ pūrvam uktaṃ sugamatvāt śrutaparicitānubhūtā hi matiśrutapaddhatiḥ sarveṇa prānigaṇena prāyaḥ prāpyate yataḥ evam etat pañcavidhaṃ jñānam tadbhedādayaś ca purastād vakṣyante

pramāṇanayair adhigamaḥ ity uktam pramāṇaṃ ca keṣāṃcit jñānam abhimatam keṣaṃcit saṃnikarṣaḥ keṣāṃcid indriyam iti ato 'dhikṛtānāṃ eva matyādīnāṃ pramāṇatvakhyāpanārtham āha

tadvacanaṃ kim artham pramāṇāntaraparikalpanānivṛttyartham saṃnikarṣaḥ pramāṇam indriyaṃ pramāṇam iti kecit kalpayanti tannivṛttyarthaṃ tadity ucyate tadeva matyādi pramāṇaṃ nānyad iti

atha saṃnikarṣe pramāṇe sati indriye vā ko doṣaḥ yadi saṃnikarṣaḥ pramāṇaṃ sūkṣmavyavahitaviprakṛṣṭānām arthānām agrahaṇaprasaṅgaḥ na hi te indriyaiḥ saṃnikṛṣyante ataḥ sarvajñatvābhāvaḥ syāt indriyam api yadi pramāṇaṃ sa eva doṣaḥ alpaviṣayatvāt cakṣurādīnāṃ jñeyasya cāparimāṇatvāt

sarvendriyasaṃnikarṣābhāvaś ca cakṣurmanasoḥ prāpyakāritvābhāvāt aprāpyakāritvaṃ ca uttaratra vakṣyate

yadi jñānaṃ pramāṇaṃ phalābhāvaḥ adhigamo hi phalam iṣṭaṃ na bhāvāntaram sa cet pramāṇaṃ na tasyānyat phalaṃ bhavitum arhati phalavatā ca pramāṇena bhavitavyam saṃnikarṣe indriye vā pramāṇe sati adhigamaḥ phalam arthāntarabhūtaṃ yujyate iti tad ayuktam yadi saṃnikarṣaḥ pramāṇam arthādhigamaḥ phalaṃ tasya dviṣṭhatvāt tatphalenādhigamenāpi dviṣṭhena bhavitavyam iti arthādīnām apy adhigamaḥ prāpnoti ātmanaś cetanatvāt tatraiva samavāya iti cet na jñasvabhāvābhāve sarveṣām acetanatvāt jñasvabhāvābhyupagame vā ātmanaḥ svamatavirodhaḥ syāt

nanu coktaṃ jñāne pramāṇe sati phalābhāva iti naiṣaḥ doṣaḥ arthādhigame prītidarśanāt jñasvabhāvasyātmanaḥ karmamalīmasasya karaṇālambanād arthaniścaye prītir ūpajāyate sā phalam ity ucyate upekṣā ajñānanāśo vā phalam rāgadveṣayor apraṇidhānam upekṣā andhakārakalpājñānanāśo vā phalam ity ucyate

pramiṇoti pramīyate 'nena pramitimātraṃ vā pramāṇam kim anena pramīyate jīvādir arthaḥ yadi jīvāder adhigame pramāṇaṃ pramāṇādhigame ca anyat pramāṇaṃ parikalpayitavyam tathā saty anavasthā nānavasthā pradīpavat yathā ghaṭādīnāṃ prakāśane pradīpo hetuḥ svasvarūpaprakāśane 'pi sa eva na prakāśāntaraṃ mṛgyaṃ tathā pramāṇam apīti avaśyaṃ caitad abhyupagantavyam prameyavat pramāṇasya pramāṇāntaraparikalpanāyāṃ svādhigamābhāvāt smṛtyabhāvaḥ tadabhāvād vyavahāralopaḥ syāt

vakṣyamānabhedāpekṣayā dvivacananirdeśaḥ vakṣyate hi ādye parokṣam pratyakṣam anyad iti sa ca dvivacananirdeśaḥ pramāṇāntarasaṃkhyānivṛttyarthaḥ

uktasya pañcavidhasya jñānasya pramāṇadvayāntaḥpātitve pratipādite pratyakṣānumānādipramāṇadvayakalpanānivṛttyartham āha

ādiśabdaḥ prāthamyavacana ādau bhavam ādyam kathaṃ dvayoḥ prathamatvam mukhyopacārakalpanayā matijñānaṃ tāvan mukhyakalpanayā prathamam śrutam api tasya pratyāsattyā prathamam ity upacaryate dvivacananirdeśasāmarthyād gauṇasyāpi grahaṇam ādyaṃ ca ādyaṃ ca ādye matiśrute ity arthaḥ tadubhayam api parokṣaṃ pramāṇam ity abhisaṃbadhyate kuto 'sya parokṣatvam parāyattatatvāt matijñānaṃ indriyānindriyanimittam iti vakṣyate śrutam anindriyasya iti ca ataḥ parāṇīndriyāṇi manaś ca prakāśopadeśādi ca bāhyanimittaṃ pratītya tadāvaraṇakarmakṣayopaśamāpekṣasyātmano matiśrutam utpadyamānaṃ parokṣam ity ākhyāyate ata upamānāgamādīnām atraivāntarbhāvaḥ

abhihitalakṣaṇāt parokṣād itarasya sarvasya pratyakṣatvapratipādanārtham āha

akṣṇoti vyāpnoti jānātīty akṣa ātmā tam eva prāptakṣayopaśamaṃ prakṣīṇāvaraṇaṃ vā pratiniyataṃ pratyakṣam avadhidarśanaṃ kevaladarśanam api akṣam eva pratiniyatam atas tasyāpi grahaṇaṃ prāpnoti naiṣa doṣaḥ jñānam ity anuvartate tena darśanasya vyudāsah evam api vibhaṅgajñānam akṣam eva pratiniyatam ato 'syāpi grahaṇaṃ prāpnoti samyagity adhikārāt tannivṛttiḥ samyagity anuvartate tena jñānaṃ viśiṣyate tato vibhaṅgajñānasya nivṛttiḥ kṛtā tad dhi mithyādarśanodayād viparītārthaviṣayam iti na samyak

syān matam indriyavyāpārajanitaṃ jñānaṃ pratyakṣaṃ vyatītendriyaviṣayavyāpāraṃ parokṣam ity etad avisaṃvādi lakṣaṇam abhyupagantavyam iti tad ayuktam āptasya pratyakṣajñānābhāvaprasaṅgāt yadi indriyanimittam eva jñānaṃ pratyakṣam iṣyate evaṃ sati āptasya pratyakṣajñānaṃ na syāt na hi tasyendriyapūrvo 'rthādhigamaḥ atha tasyāpi karaṇapūrvakam eva jñānaṃ kalpyate tasyāsarvajñatvaṃ syāt tasya mānasaṃ pratyakṣam iti cet manaḥpraṇidhānapūrvakatvāt jñānasya sarvajñatvābhāva eva āgamatas tatsiddhir iti cet na tasya pratyakṣajñānapūrvakatvāt

yogipratyakṣam anyaj jñānaṃ divyam apy astīti cet na tasya pratyakṣatvaṃ indriyanimittatvābhāvāt akṣam akṣaṃ prati yad vartate tat pratyakṣam ity abhyupagamāt

kiṃ ca sarvajñatvābhāvaḥ pratijñāhānir vā asya yogino yaj jñānaṃ tat pratyarthavaśavarti vā syād anekārthagrāhi vā yadi pratyarthavaśavarti sarvajñatvam asya nāsti yoginaḥ jñeyasyānantyāt athānekārthagrāhi yā pratijñā vijānāti na vijñānam ekam arthadvayaṃ yathā ekam arthaṃ vijānāti na vijñānadvayam tathā sā hīyate

athavā kṣaṇikāḥ sarvasaṃskārāḥ iti pratijñā hīyate anekakṣaṇa vṛttyekavijñānābhyupagamāt anekārthagrahaṇaṃ hi krameṇeti yugapad eveti cet yo 'sya janmakṣaṇaḥ sa ātmalābhārtha eva labhdātmalābhaṃ hi kiṃcit svakāryaṃ prati vyāpriyate pradīpavad iti cet tasyāpy anekakṣaṇaviṣayatāyāṃ satyām eva prakāśyaprakāśanābhyupagamāt vikalpātītatvāt tasya śūnyatāprasaṅgaś ca

abhihitobhayaprakārasya pramāṇasya ādiprakāraviśeṣapratipattyartham āha

ādau uddiṣṭaṃ yaj jñānaṃ tasya paryāyaśabdā ete veditavyāḥ matijñānāvaraṇakṣayopaśamāntaraṃganimittajanitopayogaviṣayatvād eteṣām śrutādiṣv apravṛtteś ca mananaṃ matiḥ smaraṇaṃ smṛtiḥ saṃjñānaṃ saṃjñā cintanaṃ cintā abhinibodhanam abhinibodha iti yathāsaṃbhavaṃ vigrahāntaraṃ vijñayam

saty api prakṛtibhede rūḍhibalalābhāt paryāyaśabdatvam yathā indraḥ śakraḥ purandara iti indanādikriyāhede 'pi śacīpater ekasyaiva saṃjñā samabhirūḍhanayāpekṣayā teṣām arthāntarakalpanāyāṃ matyādiṣv api sa kramo vidyata eva kiṃ tu matijñānāvaraṇakṣayopaśamanimittopayogaṃ nātivartanta iti ayam atrārtho vivakṣitaḥ 'iti' śabdaḥ prakārāthaḥ evaṃ prakārā asya paryāyaśabdā iti abhidheyārtho vā matiḥ smṛtiḥ saṃjñā cintā abhinibodha ity etair yo 'rtho 'bhidhīyate sa eka eva iti

athāsyātmalābhe kiṃ nimittam ity ata āha

indatīti indra ātmā tasya jñasvabhāvasya tadāvaraṇakṣayopaśame sati svayam arthān grahītum asamarthasya yad arthopalabdhiliṃgaṃ tad indrasya liṃgam indriyam ity ucyate athavā līnam arthaṃ gamayatīti liṃgam ātmanaḥ sūkṣmasyāstitvādhigame liṃgam indriyam yathā iha dhūmo 'gneḥ evam idaṃ sparśanādi karaṇaṃ nāsati kartary ātmani bhavitum arhatīti jñātur astitvaṃ gamyate athavā indra iti nāmakarmocyate tena sṛṣtam indriyam iti tatsparśanādi uttaratra vakṣyate

anindriyaṃ manaḥ antaḥkaraṇam ity anarthāntaram kathaṃ punar indriyapratiṣedhena indraliṃge eva manasi anindriyaśabdasya vṛtti īṣadarthasya nañaḥ prayogāt īṣadindriyam anindriyam iti yathā anudarā kanyā iti katham īṣadarthaḥ imānīndriyāṇi pratiniyatadeśaviṣayāṇi kālāntarāvasthāyīni ca na tathā manaḥ indrasya liṃgam api satpratiniyatadeśaviṣayaṃ kālāntarāvasthāyi ca

tadantaḥkaraṇam iti cocyate guṇadoṣavicārasmaraṇādivyāpare indriyānapekṣatvāc cakṣurādivad bahiranupabdheś ca antargataṃ karaṇam antaḥakaraṇam ity ucyate

tad iti kim artham matijñānanirdeśārtham nanu ca tadanantaraṃ 'anantarasya vidhir vā bhavati pratiṣedho vā' iti tasyaiva grahaṇaṃ bhavati ihārtham uttarārthaṃ ca tad ity ucyate yanmatyādiparyāyaśabdavācyaṃ jñānaṃ tadindriyānindriyanimittaṃ tadevāvagrahehāvāyadhāraṇā iti itarathā hi prathamaṃ matyādiśabdavācyaṃ jñānam ity uktvā indriyānindriyanimittaṃ śrutam tadevāvagrahehāvāyadhāraṇā ity aniṣṭam abhisaṃbadhyeta

evaṃ nirjñātotpattinimittam anirṇītabhedam iti tadbhedapratipattyartham āha

viṣayaviṣayisaṃnipātasamanantaram ādyaṃ grahaṇam avagrahaḥ viṣayaviṣayisaṃnipāte sati darśanaṃ bhavati tadanantaram arthagrahaṇam avagrahaḥ yathā cakṣuṣā śuklaṃ rūpam iti grahaṇam avagrahaḥ avagrahagṛhīte 'rthe tadviśeṣākāṅkṣaṇam īhā yathā śuklaṃ rūpaṃ kiṃ valākā patākā veti viśeṣanirjñānād yāthātmyāvagamanam avāyaḥ utpatananipatanapakṣavikṣepādibhir valākaiveyaṃ na patāketi avetasya kālāntare 'vismaraṇakāraṇaṃ dhāraṇā yathā saiveyaṃ balākā pūrvāhṇe yām aham adrākṣam iti eṣām avagrahādīnām upanyāsakrama utpattikramakṛtaḥ

uktānām avagrahādīnāṃ prabhedapratipattyartham āha

avagrahādayaḥ kriyāviśeṣāḥ prakṛtāḥ tadapekṣo 'yaṃ karmanirdeśaḥ bahvādīnāṃ setarāṇām iti bahuśabdasya saṃkhyāvaipulyavācino grahaṇam aviśeṣāt saṃkhyāvācī yathā eko dvau bahava iti vaipulyavācī yathā bahur odano bahuḥ sūpa iti vidhaśabdaḥ prakāravācī kṣipragrahaṇam acirapratipattyartham aniḥsṛtagrahaṇam asakalapudgalodgamārtham anuktam abhiprāyeṇa grahaṇam dhruvaṃ nirantaraṃ yathārthagrahaṇam setaragrahaṇaṃ pratipakṣasaṃgrahārtham

bahūnām avagrahaḥ alpasyāvagrahaḥ bahuvidhasyāvagrahaḥ ekavidhasyāvagraḥ kṣipram avagrahaḥ cireṇāvagrahaḥ aniḥsṛtasyāvagrahaḥ niḥsṛtasyāvagrahaḥ anuktasyāvagrahaḥ uktasyāvagrahaḥ dhruvasyāvagrahaḥ adhruvasyāvagrahaś ceti avagraho dvādaśavikalpaḥ evam īhādayo 'pi ta ete pañcabhir indriyadvārair manasā ca pratyekaṃ pradurbhāvyante tatra bahvavagrhādayaḥ matijñānāvaraṇakṣayopaśamaprakarṣāt prabhavanti netare iti teṣām abhyarhitatvād ādau grahaṇaṃ kriyate

bahubahuvidhayoḥ kaḥ prativiśeṣaḥ yāvatā bahuṣv api bahutvam asti bahuvidheṣv api bahutvam asti ekaprakāranānāprakārakṛto viśeṣaḥ uktaniḥsṛtayoḥ kaḥ prativiśeṣaḥ yāvatā sakalaniḥsaraṇān niḥsṛtam uktam apy evaṃ vidham eva ayam asti viśeṣaḥ anyopadeśapūrvakaṃ grahaṇam uktam svata eva grahaṇaṃ niḥsṛtam

apareṣāṃ kṣipraniḥsṛta iti pāṭhaḥ ta evaṃ varṇayanti śrotrendriyeṇa śabdam avagṛhyamāṇaṃ mayūrasya vā kurarasya veti kaścit pratipadyate aparaḥ svarūpam evāsṛitya iti

dhruvāvagrahasya dhāraṇāyāś ca kaḥ prativiśeṣaḥ ucyate kṣayopaśamaprāptikāle viśuddhapariṇāmasaṃtatyā prāptāt kṣayopaśamāt prathamasamaye yathāvagrahas tathaiva dvitīyādiṣv api samayeṣu nono nābhyadhika iti dhruvāvagraha ity ucyate yadā punarviśuddhapariṇāmasya saṃkleśapariṇāmasya ca miśraṇāt kṣayopaśamo bhavati tata utpadyamāno 'vagrahaḥ kadācit bahūnāṃ kadācid alpasya kadācid bahuvidhasya kadācid ekavidhasya veti nyūnādhikabhāvād adhruvāvagraha ity ucyate dharaṇā punargṛhītārthāvismaraṇakāraṇam iti mahad anayor antaram

yady avagrahādayo bahvādīnāṃ karmaṇām ākṣeptāraḥ bahvādīni punarviśeṣaṇāni kasyety ata āha

cakṣurādiviṣayo 'rthaḥ tasya bahvādiviśeṣaṇaviśiṣṭasya avagrahādayo bhavantīty abhisaṃbandhaḥ kriyate kim artham idam ucyate yāvatā bahvādir artha eva satyam evam kintu pravādiparikalpanānivṛttyarthaṃ 'arthasya' ity ucyate kecit pravādino manyante rūpādayo guṇā eva indriyaiḥ saṃnikṛṣyante tenaiteṣām eva grahaṇam iti tad ayuktam na hi te rūpādayo guṇā amūrtā indriyasaṃnikarṣam āpadyante na tarhi idānīm idaṃ bhavati 'rūpaṃ mayā dṛṣṭaṃ gandho vā ghrāta' iti bhavati ca katham iyarti paryāyāṃs tair vā 'ryata ity artho dravyaṃ tasminn indriyaiḥ saṃnikṛṣṇyamāṇe tadavyatirekād rūpādiṣv api saṃvyavahāro yujyate

kim ime avagrahādayaḥ sarvasyendriyānindriyasya bhavanti uta kaścid viṣayaviśeṣo 'stīty ata āha

vyañjanam avyaktaṃ śabdādijātaṃ tasyāvagraho bhavati nehādayaḥ kim artham idam niyamārtham avagraha eva nehādaya iti sa tarhi evakāraḥ kartavyaḥ na kartavyaḥ 'siddhe vidhir ārabhyamāno niyamārtha' iti antareṇaivakāraṃ niyamārtho bhaviṣyati nanu avagrahagrahaṇam ubhayatra tulyam tatra kiṃ kṛto 'yaṃ viśeṣaḥ arthāvagrahavyañjanāvagrahayor vyaktāvyaktakṛto viśeṣaḥ katham abhinavaśarāvādrīkaraṇavat yathā jalakaṇadvitrāsiktaḥ sarāvo 'bhinavo nādrībhavati sa eva punaḥ punaḥ sicyamānaḥ śanais timyati evaṃ śrotrādiṣv indriyeṣu śabdādipariṇatāḥ pudgalā dvitrādiṣu samayeṣu gṛhyamānā na vyaktībhavanti punaḥ punar avagrahe sati vyaktībhavanti ato vyaktagrahaṇāt prāgvyañjanāvagrahaḥ vyaktagrahaṇam arthāvagrahaḥ tato 'vyaktāvagrahaṇād īhādayo na bhavanti

sarvendriyāṇām aviśeṣeṇa vyañjanāvagrahaprasaṅge yatrāsaṃbhavas tadarthapratiṣedam āha

cakṣuṣā anindriyena ca vyañjanāvagraho na bhavati kutaḥ aprāpyakāritvāt yato 'prāptam artham avidikkaṃ yuktaṃ saṃnikarṣaviṣaye 'vasthitaṃ bāhyaprakāśābhivyaktam upalabhate cakṣuḥ manaś cāprāptam ity anayor vyañjanāvagraho nāsti

cakṣuṣo 'prāpyakāritvaṃ katham adhyavasīyate āgamato yuktitaś ca āgamatas tāvat puṭṭhaṃ suṇodi saddaṃ apuṭṭhaṃ ceva passade rūaṃ gaṃdhaṃ rasaṃ ca phāsaṃ baddhaṃ puṭṭhaṃ viyāṇādi

yuktitaś ca aprāpyakāri cakṣuḥ spṛṣṭānavagrahāt yadi prāpyakāri syāt tvagindriyavat spṛṣṭam añjanaṃ gṛhṇīyāt na tu gṛhṇāty ato manovadaprāpyakārīty avaseyam tataś cakṣurmanasī varjayitvā śeṣāṇām indriyāṇāṃ vyañjanāvagrahaḥ sarveṣām indriyānindriyāṇām arthāvagraha iti siddham

āha nirdiṣṭaṃ matijñānaṃ lakṣaṇato vikalpataś ca tadanantaram uddhiṣṭaṃ yat śrutaṃ tasyedānīṃ lakṣaṇaṃ vikalpaś ca vaktavya ity ata āha

śrutaśabdo 'yaṃ śravaṇam upādāya vyutpādito 'pi rūḍhivaśāt kasmiṃś cij jñānaviśeṣe vartate yathā kuśalavanakarma pratītya vyutpādito 'pi kuśalaśabdo rūḍhivaśāt paryavadāte vartate kaḥ punar asau jñānaviśeṣa iti ata āha 'śrutaṃ matipūrvam' iti śrutasya pramāṇatvaṃ pūrayatīti pūrvaṃ nimittaṃ kāraṇam ity anarthāntaram matir nirdiṣṭā matiḥ pūrvam asya matipūrvaṃ matikāraṇam ity arthaḥ yadi matipūrvaṃ śrutaṃ tadapi matyātmakaṃ prāpnoti 'kāraṇasadṛśaṃ hi loke kāryaṃ dṛṣṭam' iti naitad aikāntikam daṇḍādikāraṇo 'yaṃ ghaṭo na daṇḍādyātmakaḥ api ca sati tasmiṃs tadabhāvāt saty api matijñāne bāhyaśrutajñānanimittasaṃnidhāne 'pi prabalaśrutāvaraṇodayasya śrutābhāvaḥ śrutāvaraṇakṣayopaśamaprakarṣe tu sati śrutjañānam utpadyata iti matijñānaṃ nimttamātraṃ jñeyam

āha śrutam anādinidhanam iṣyate tasya matipūrvakatve tadabhavāḥ ādimato 'ntavattvāt tataś ca puruṣakṛtitvād aprāmāṇyam iti naiṣa doṣaḥ dravyādisāmānyārpaṇāt śrutam anādinidhanam iṣyate na hi kenacit puruṣeṇa kvacit kadācit kathaṃcid utprekṣitam iti teṣām eva viśeṣāpekṣayā ādir antaś ca saṃbhavatīti 'matipūrvam' ity ucyate yathāṅkuro bījapūrvakaḥ sa ca saṃtānāpekṣayā anādinidhana iti na cāpauruṣeyatvaṃ prāmāṇyakāraṇam caurādyupadeśasyāsmaryamāṇakartṛkasya prāmāṇyaprasaṅgāt anityasya ca pratyakṣādeḥ prāmāṇye ko virodhaḥ

āha prathamasamyaktvotpattau yugapaj jñānapariṇāmān matipūrvakatvaṃ śrutasya nopapadyata iti tad ayuktam samyaktvasya tadapekṣatvāt ātmalābhas tu kramavān iti matipūrvakatvavyāghātābhāvaḥ

āha matipūrvaṃ śrutam ity etal lakṣaṇam avyāpi śrutapūrvam api śrutam iṣyate tadyathā śabdapariṇatapudgalaskandhād āhitavarṇapadavākyādibhāvāc cakṣurādiviṣayāc ca ādyaśrutaviṣayabhāvam āpannād avyabhicāriṇaḥ kṛtasaṃgītir jano ghaṭāj jaladhāraṇādi kāryaṃ saṃbandhyantaraṃ pratipadyate dhūmāder vāgnyādidravyaṃ tadā śrutāt śrutapratipattir iti naiṣa doṣaḥ tasyāpi matipūrvakatvam upacārataḥ śrutam api kvacin matir ity upacaryate matipūrvakatvād iti

bhedaśabdaḥ pratyekaṃ parisamāpyate dvibhedam anekabhedaṃ dvādaśabhedam iti dvi bhedaṃ tāvat aṅgabāhyam aṅgapraviṣṭam iti aṅgabāhyam anekavidhaṃ daśavaikālikottarādhyayanādi aṅgapraviṣṭaṃ dvādaśavidham tadyathā ācāraḥ sūtrakṛtaṃ sthānaṃ samavāyaḥ vyākhyāprajñaptiḥ jñātṛdharmakathā upāsakādhyayanaṃ antakṛddaśaṃ anuttaraupapādikadaśaṃ praśnavyākaraṇaṃ vipākasūtraṃ dṛṣṭivāda iti dṛṣṭivādaḥ pañcavidhaḥ parikarma sūtraṃ prathamānuyogaḥ pūrvagataṃ cūlikā ceti tatra pūrvagataṃ caturdaśavidham utpādapūrvam agrāyaṇīyaṃ vīryānupravādam astināstipravādaṃ jñānapravādaṃ satyapravādam ātmapravādaṃ karmapravādaṃ pratyākhyānanāmadheyaṃ vidyānupravādaṃ kalyāṇanāmadheyaṃ prāṇāvāyaṃ kriyāviśālaṃ lokabindusāram iti tadetat śrutaṃ dvibhedam anekabhedaṃ dvādaśabhedam iti

kiṃ kṛto 'yaṃ viśeṣaḥ vaktṛviśeṣakṛtaḥ trayo vaktāraḥ sarvajñas tīrthakara itaro vā śrutakevalī ārātīyaś ceti tatra sarvajñena paramarṣiṇā paramācintyakevalajñānavibhūtiviśeṣeṇa arthata āgama uddiṣṭaḥ tasya pratyakṣadarśitvāt prakṣīṇadoṣatvāc ca prāmāṇyam tasya sākṣāc chiṣyair buddhyatiśayarddhiyuktair gaṇadharaiḥ śrutakevalibhir anusmṛtagrantharacanam aṅgapūrvalakṣaṇam tatpramāṇam tatprāmāṇyāt ārātīyair punar ācāryaiḥ kāladoṣāt saṃkṣiptāyurmatibalaśiṣyānugrahārthaṃ daśavaikālikādyupanibaddham tatpramāṇam arthatas tadevedam iti kṣīrārṇavajalaṃ ghaṭagṛhītam iva

vyākhyātaṃ parokṣam pratyakṣam idānīṃ vaktavyam tad dvedhā deśapratyakṣaṃ sarvapratyakṣaṃ ca deśapratyakṣam avadhimanaḥparyayajñāne sarvapratyakṣaṃ kevalam yady evam idam eva tāvad avidhijñānaṃ triḥprakārasya pratyakṣasyādyaṃ vyākriyatām ity atrocyate dvividho 'vadhir bhavapratyayaḥ kṣayopaśamanimittaś ceti tatra bhavapratyaya ucyate

bhava ity ucyate ko bhavaḥ āyurnāmakarmodayanimitta ātmanaḥ paryāyo bhavaḥ pratyayaḥ kāraṇaṃ nimittam ity anarthāntaram bhavaḥ pratyayo 'sya bhavapratyayo 'vadhir devanārakāṇāṃ veditavyaḥ yady evaṃ tatra kṣayopaśamanimittatvaṃ na prāpnoti naiṣa dośaḥ tadāśrayāt tatsiddheh bhavaṃ pratītya kṣayopaśamaḥ saṃjāyata iti kṛtvā bhavaḥ pradhānakāraṇam ity upadiśyate yathā patatriṇo gamanam ākāśe bhavanimittam na śikṣāguṇaviśeṣaḥ tathā devanārakāṇāṃ vrataniyamādyabhāve 'pi jāyata 'iti bhavapratyayaḥ' ity ucyate itarathā hi bhavaḥ sādhāraṇa iti kṛtvā sarveṣām aviśeṣaḥ syāt iṣyate ca tatrāvadheḥ prakarṣāprakarṣavṛttiḥ 'devanārakāṇām' ity aviśeṣābhidhāne 'pi samyagdṛṣṭīnām eva grahaṇam kutaḥ avadhigrahaṇāt mityādṛṣṭīnāṃ ca vibhaṅga ity ucyate prakarṣāprakarṣavṛttiś ca āgamato vijñeyā

yadi bhavapratyayo 'vadhir devanārakāṇām atha kṣayopaśamahetukaḥ keṣām ity āha

avadhijñānāvaraṇasya deśaghātisparddhakānām udaye sati sarvaghātisparddhakānām udayābhāvaḥ kṣayaḥ teṣām evānudayaprāptānāṃ sadavasthā upaśamaḥ tau nimittam asyeti kṣayopaśamanimittaḥ sa śeṣāṇām veditavyaḥ ke punaḥ śeṣāḥ manuṣyās tiryañcaś ca teṣv api yatra sāmarthyam asti tatraiva veditavyaḥ na hy asaṃjñinām aparyāptakānāṃ ca tatsāmarthyam asti saṃjñināṃ paryāptakānāṃ ca na sarveṣām keṣāṃ tarhi yathoktasamyagdarśanādinimttasaṃnidhāne sati śāntakṣīṇakarmaṇāṃ tasyopalabdhir bhavati sarvasya kṣayopaśamanimittatve kṣayopaśam agrahaṇaṃ niyamārthaṃ kṣayopaśama eva nimittaṃ na bhava iti sa eṣo 'vadhiḥ ṣaḍvikalpaḥ kutaḥ anugāmyananugāmivardhamānahīyamānāvasthitānavasthitabhedāt kaścid avadhir bhāskaraprakāśavad gacchantam anugacchati kaścin nānugacchati tatraivātipatati unmukhapraśnādeśipuruṣavacanavat aparo 'vadhiḥ araṇinirmathanotpannaśuṣkaparṇopacīyamānendhananicayasamiddhapāvakavatsamyagdarśanādiguṇaviśuddhipariṇāmasaṃnidhānād yat parimāṇa utpannas tato varddhate ā asaṃkhyeyalokebhyaḥ aparo 'vadhiḥ paricchinnopādānasaṃtatyagniśikhāvatsamyagdarśanādiguṇahānisaṃkleśapariṇāmavṛddhiyogād yat parimānā utpannas tato hīyate ā aṅgulasyāsaṃkhyeyabhāgāt itaro 'vadhiḥ samyagdarśanādiguṇāvasthānād yat parimāṇa utpannas tat primāṇā evāvasthiṣṭhate na hīyate nāpi vardhate liṅgavat ā bhavakṣayād ā kevalajñānotpatter vā anyo 'vadhiḥ samyagdarśanādiguṇavṛddhihāniyogād yatparimāṇa utpannas tato vardhate yāvad anena vardhitavyaṃ hīyate ca yāvad anena hātavyaṃ vāyuvegapreritajalormivat evaṃ ṣaḍvikalpo 'vadhir bhavati

evaṃ vyākhyātam avadhijñānaṃ tadantaram idānīṃ manaḥparyayajñānaṃ vaktavyam tasya bhedaḥ puraḥsaraṃ lakṣaṇaṃ vyācikhyāsur idam āha

ṛjvī nirvartitā praguṇā ca kasmān nirvartitā vākkāyamanaḥkṛtārthasya paramanogatasya vijñānāt ṛjvī matir yasya so 'yaṃ ṛjumatiḥ anirvartitā kuṭilā ca vipulā kasmād anirvartitā vākkāyamanaḥkṛtārthasya parakīyamanogatasya vijñānāt vipulā matir yasya so 'yaṃ vipulamatiḥ ṛjumatiś ca vipulamatiś ca ṛjuvipulamatī ekasya matiśabdasya gatārthatvād aprayogaḥ athavā ṛjuś ca vipulā ca ṛjuvipule ṛjuvipule matī yayos tau ṛjuvipulamatī iti sa eṣa manaḥparyayo dvividhaḥ ṛjumatir vipulamatir iti

āha ukto bhedaḥ lakṣaṇam idānīṃ vaktavyam ity atrocyate vīryāntarāyamanaḥparyayajñānāvaraṇakṣayopaśamāṅgopāṅganāmalābhāvaṣṭambhād ātmanaḥ parakīyamanaḥsaṃbandena labdhavṛttir upayogo manaḥparyayaḥ matijñānaprasaṅga iti cet uktottaraṃ purastāt apekṣākāraṇaṃ mana iti parakīyamanasi vyavasthito 'rthaḥ anena jñāyate ity etāvad atrāpekṣyate tatra ṛjumatir manaḥparyayaḥ kālato jaghanyena jīvānām ātmanaś ca dvitrāṇi bhavagrahaṇāni utkarṣeṇa saptāṣṭau gatyāgatyādibhiḥ prarūpayati kṣetrato jaghanyena gavyūtipṛthaktvaṃ utkarṣeṇa yojanapṛthaktvasyābhyantaraṃ na bahiḥ dvitīyaḥ kālato jaghanyena saptāṣṭau bhavagrahaṇāni utkarṣeṇāsaṃkhyeyāni gatyāgatyādibhiḥ prarūpayati kṣetrato jaghanyena yojanapṛthaktvaṃ utkarṣeṇa mānuṣottaraśailasyābhyantaraṃ na bahiḥ

uktayor anayoḥ punar api viśeṣapratipattyartham āha

tadāvaraṇakṣayopaśame sati ātmanaḥ prasādo viśuddhiḥ pratipatanaṃ pratipātaḥ na pratipātaḥ apratipātaḥ upaśāntakaṣāyasya cāritramohodrekāt pracyutasaṃyamaśikharasya pratipāto bhavati kṣīṇakaṣāyasya pratipātakāraṇābhāvād apratipātaḥ viśuddhiś ca apratipātaś ca viśuddhyapratipātau tābhyāṃ viśuddhyapratipātābhyām tayor viśeṣas tadviśeṣaḥ tatra viśuddhyā tāvat ṛjumater vipulamatir dravyakṣetrakālabhāvair viśuddhataraḥ katham iha yaḥ kārmaṇadravyānantabhāgo 'ntyaḥ sarvāvadhinā jñātas tasya punar anantabhāgīkṛtasyāntyo bhāga ṛjumater viṣayaḥ tasya ṛjumativiṣayasyānantabhāgīkṛtasyāntyo bhāgo vipulamater viṣayaḥ anantasyānantabhedatvāt dravyakṣetrakālato viśuddhir uktā bhāvato viśuddhiḥ sūkṣmataradravyaviṣayatvād eva veditavyā prakṛṣṭakṣayopaśamaviśuddhiyogāt apratipātenāpi vipulamatir viśiṣṭaḥ svāmināṃ pravardhamānacāritrodayatvāt ṛjumatiḥ punaḥ pratipātī svāmināṃ kaṣāyodrekād dhīyamānacāritrodayatvāt

yady asya manaḥparyayasya pratyātmamayaṃ viśeṣaḥ athānayor avadhimanaḥparyayayoḥ kuto viśeṣaḥ ity ata āha

viśuddhiḥ prasādaḥ kṣetraṃ yatrasthān bhāvān pratipadyate svāmī prayoktā viṣayo jñeyaḥ tatrāvadher manaḥparyayo viśuddhataraḥ kutaḥ sūkṣmaviṣayatvāt kṣetram uktam viṣayo vakṣyate svāmitvaṃ pratyutyate prakṛṣṭacāritraguṇopeteṣu vartate pramattādiṣu kṣīṇakaṣayānteṣu tatra cotpadyamānaḥ pravarddhamānacāritreṣu na hīyamānacāritreṣu pravarddhamānacāritreṣu cotpadyamānaḥ saptavidhānyatamarddhiprāpteṣūpajāyate netareṣu ṛddhiprāpteṣu keṣucin na sarveṣu ity asyāyaṃ svāmiviśeṣo viśiṣṭasaṃyamagrahaṇaṃ vā vākye prakṛtam avadhiḥ punaś cāturgatikeṣv iti svāmibhedād apy anayor viśeṣaḥ

idānīṃ kevalajñānalakṣaṇābhidhānaṃ prāptakālam tadullaṅghya jñānāṃ viṣayanibandhaḥ parīkṣyate kutaḥ tasya 'mohakṣayāj jñānadarśanāvaraṇāntarāyakṣayāc ca kevalam' ity atra vakṣyamānatvāt yady evam ādyayor eva tāvan matiśrutayor viṣayanibandha ucyatām ity ata āha

nibandhanaṃ nibandhaḥ kasya viṣayasya tadviṣayagrahaṇaṃ kartavyam na kartavyam prakṛtaṃ viṣayagrahaṇam kva prakṛtam 'viśuddhikṣetrasvāmiviṣayebhyaḥ' ity atra atas tasyārthavaśād vibhaktipariṇāmo bhavatīti 'viṣayasya' ity abhisaṃbadhyate 'dravyeṣu' iti bahuvacananirdeśaḥ sarveṣāṃ jīvadharmādharmakālākāśapudgalānāṃ saṃgrahārthaḥ tadviśeṣaṇārthaṃ 'asarvaparyāya' grahaṇam tāni dravyāṇi matiśrutayor viṣayabhāvam āpadyamānāni katipayair eva paryāyair viṣayabhāvam āskandanti na sarvaparyāyair anantair apīti atrāha dharmāstikāyādīny atīndriyaṇi teṣu matijñānaṃ na pravartate ataḥ sarvadravyeṣu matijñānaṃ vartata ity ayuktam naiṣa doṣaḥ anindriyākhyaṃ karaṇam asti tadālambano noindriyāvaraṇakṣayopaśamalabdhipūrvaka upayogo 'vagrahādirūpaḥ pragevopajāyate tatas tatpūrvaṃ śrutajñānaṃ tadviṣayeṣu svayogyeṣu vyāpriyate

atha matiśrutayor anantaranirdeśārhasyāvadheḥ ko viṣayanibandha ity ata āha

'viṣayanibandhaḥ' ity anuvartate 'rūpiṣu' ity anena pudgalāḥ pudgaladravyasaṃbandhāś ca jīvāḥ parigṛhyante rūpiṣv evāvadher viṣayanibandho nārūpiṣv iti niyamaḥ kriyate rūpiṣv api bhavan na sarvaparyāyeṣu svayogyeṣv evety avadhāraṇārtham asarvaparyāyeṣv ity abhisaṃbadhyate

atha tadanantaranirdeśabhājo manaḥparyayasya ko viṣayanibandha ity ata āha

yad etad rūpi dravyaṃ sarvāvadhijñānaviṣayatvena samarthitaṃ tasyānantabhāgīkṛtasyaikasmin bhāge manaḥparyayaḥ pravartate

athānte yan nirdiṣṭaṃ kevalajñānaṃ tasya ko viṣayanibandha ity ata āha

dravyāṇi ca paryāyāś ca dravyaparyāyā iti itaretarayogalakṣaṇo dvandvaḥ tadviśeṣaṇaṃ 'sarva' grahaṇaṃ pratyekam abhisaṃbadhyate sarveṣu dravyeṣu sarveṣu paryāyeṣv iti jīvadravyāṇi tāvad anantānantāni tato 'py anantānantāni pudgaladravyāṇi ca aṇuskandhabhedabhinnāni dharmādharmākāśāni trīṇi kālaś cāsaṃkhyeyas teṣāṃ paryāyāś ca trikālabhuvaḥ pratyekam anantānantās teṣu dravyaṃ paryāyajātaṃ vā na kiṃcit kevalajñānasya viṣayabhāvam atikrāntam asti aparimitamāhātmyaṃ hi tad iti jñāpanārthaṃ 'sarvadravyaparyāyeṣu' ity ucyate

āha viṣayanibandho 'vadhṛto matyādīnām idaṃ tu na nirjñātam ekasminn ātmani svanimittasaṃnidhānopajanitavṛttīni jñānāni yaugapadyena kati bhavantīty ucyate

ekaśabdaḥ saṃkhyāvacī ādiśabdo 'vayavavacanaḥ eka ādir yeṣāṃ tāni imāny ekādīni bhājyāni vibhaktavyāni yaugapadyenaikasminn ātmani ā kutaḥ ā caturbhyaḥ tadyathā ekaṃ tāvat kevalajñānaṃ na tena sahānyāni kṣāyopaśamikāni yugapadavatiṣṭhante dve matiśrute trīṇi matiśrutāvadhijñānāni matiśrutamanaḥparyayajñānāni vā catvāri matiśrutāvadhimanaḥparyayajñānāni na pañca santi kevalasyāsahāyatvāt

atha yathoktāni matyādīni jñānavyapadeśam eva labhante utānyathāpīty ata āha

viparyayo mithyety arthaḥ kutaḥ samyagadhikārāt 'ca' śabdah samuccayārthaḥ viparyayaś ca samyak ceti kutaḥ punar eṣāṃ viparyayaḥ mithyādarśanena sahaikārthasamavāyāt sarajaskakaṭukālābugatadugdhavat nanu ca tatrādhāradoṣād dugdasya rasaviparyayo bhavati na ca tathā matyajñānādīnāṃ viṣayagrahaṇe viparyayaḥ tathā hi samyagdṛṣṭir yathā cakṣurādibhī rūpādīn upalabhate tathā mityādṛṣṭir api matyajñānena yathā ca samyagdṛṣṭiḥ śrutena rūpādin jānāti nirūpayati ca tathā mithyādṛṣṭir api śrutājñānena yathā cāvadhijñānena samyagdṛṣṭiḥ rūpiṇo 'rthānavagacchati tathā mithyādṛṣṭir vibhaṅgajñāneneti

atrocyate

sad vidyamānam asad avidyamānam ity arthaḥ tayor aviśeṣeṇa yadṛchhayā upalabder viparyayo bhavati kadācid rūpādi sad apy asad iti pratipadyate asad api sad iti kadācit sat sad eva asad apy asad eveti mithyādarśanodayād adhyavasyati yathā pittodayākulitabuddhir mātaraṃ bhāryeti bhāryām api māteti manyate yadṛcchayā yadāpi mātaraṃ mātaiveti bhāryam api bhāryeveti ca tadāpi na tatsamyagjñānam evaṃ matyādīnām api rūpādiṣu viparyayo veditavyaḥ tathā hi kaścin mityādarśanapariṇāma ātmany avasthito rūpādyupalabdhau satyām api kāraṇaviparyāsaṃ bhedābhedaviparyāsaṃ svarūpaviparyāsaṃ ca janayati

kāraṇaviparyāsas tāvad rūpādīnām ekaṃ kāraṇam amūrtaṃ nityam iti kecit kalpayanti apare pṛthivyādijātibhinnāḥ paramāṇavaś catustridvyeka guṇās tulyajātīyānāṃ kāryāṇām ārambhakā iti anye varṇayanti pṛthivyādīni catvāri bhūtāni bhautikadharmā varṇagandharasasparśāḥ eteṣāṃ samudāyo rūpaparamāṇur aṣṭaka ity ādi itare varṇayanti pṛthivyaptejovāyavaḥ kāṭhinyādidravatvādyuṣṇatvādīraṇatvādiguṇā jātibhinnāḥ paramāṇavaḥ kāryasyārambhakāḥ

bhedābhedaviparyāsaḥ kāraṇāt kāryam arthāntarabhūtam eveti anarthāntarabhūtam eveti ca parikalpanā

svarūpaviparyāso rūpādiyo nirvikalpāḥ santi na santy eva vā tadākārapariṇataṃ vijñānam eva na ca tadālambanaṃ vastu bāhyam iti evam anyān api parikalpanābhedān dṛṣṭeṣṭaviruddhān mithyādarśanodayāt kalpayanti tatra ca śraddhānam utpādayanti tatas tanmatyajñānaṃ śrutājñānam vibhaṅgajñānaṃ ca bhavati samyagdarśanaṃ punas tatvārthādhigame śraddhānam utpādayati tatas tanmatijñānaṃ śrutajñām avadhijñānānaṃ ca bhavati

āha pramāṇaṃ dvi prakāraṃ varṇitam pramāṇaikadeśāś ca nayās tadanantaroddeśabhājo nirdeṣṭavyā ity ata āha

eteṣāṃ sāmānyaviśeṣalakṣaṇaṃ vaktavyam sāmānyalakṣaṇaṃ tāvad vastuny anekāntātmany avirodhena hetvarpaṇāt sādhyaviśeṣasya yathātmyaprāpaṇapravaṇaḥ prayogo nayaḥ sa dvedhā dravyārthikaḥ paryāyārthikaś ceti dravyaṃ sāmānyam utsargaḥ anuvṛttir ity arthaḥ tadviṣayo dravyārthikaḥ paryāyo viśeṣo 'pavādo vyāvṛttir ity arthaḥ tadviṣayaḥ paryāyārthikaḥ tayor bhedā naigamādayaḥ

teṣāṃ viśeṣalakṣaṇam ucyate anabhinirvṛttārthasaṃkalpamātragrāhī naigamaḥ kaṃcit puruṣaṃ parigṛhītaparaśuṃ gacchantam avalokya kaścit pṛcchati kim arthaṃ bhavān gacchatīti sa āha prastham ānetum iti nāsau tadā prasthaparyāyaḥ saṃnihitaḥ tadabhinirvṛttaye saṃkalpamātre prasthavyavhāraḥ tathā edhodakādyāharaṇe vyāpriyamāṇaṃ kaścit pṛcchati kiṃ karoti bhavān iti sa āha odanaṃ pacāmīti na tadaudanaparyāyaḥ saṃnihitaḥ tadarthe vyāpāre sa prayujyate evaṃ prakāro lokasaṃvyavahāraḥ anabhinirvṛttārthasaṃkalpamātraviṣayo naigamasya gocaraḥ

svajātyavirodhenaikadhyam upānīya paryāyān ākrāntabhedān aviśeṣeṇa samastagrahaṇāt saṃgrahaḥ sat dravyaṃ ghaṭa ity ādi sad ity ukte sad iti vāgvijñanānupravṛttiliṅgānumitasattādhārabhūtānām aviśeṣeṇa sarveṣāṃ saṃgrahaḥ dravyam ity ukte 'pi dravati gacchati tāṃs tān paryāyān ity upalakṣitānāṃ jīvājīvatadbhedaprabhedānāṃ saṃgrahaḥ tathā ghaṭa ity ukte 'pi ghaṭabuddhyabhidhānānugamaliṅgānumitasakalārthasaṃgrahaḥ evam prakāro 'nyo 'pi saṃgrahanayasya viṣayaḥ

saṃgrahanayākṣiptānām arthānāṃ vidhipūrvakam avaharaṇaṃ vyavahāraḥ ko vidhiḥ yaḥ saṃgrahagṛhīto 'rthas tadānupūrveṇaiva vyavahāraḥ pravartata ity ayaṃ vidhiḥ tad yathā sarvasaṃgraheṇa yat sattvaṃ gṛhītaṃ tac cānapekṣitaviśeṣaṃ nālaṃ saṃvyavahārāyeti vyavahāranaya āśrīyate yat sat tad dravyaṃ guṇo veti dravyeṇāpi saṃgrahākṣiptena jīvājīvaviśeṣānapekṣeṇa na śakyaḥ saṃvyavahāra iti jīvadravyam ajīvadravyam iti vā vyavahāra āśrīyate jīvājīvāv api ca saṃgrahākṣiptau nālaṃ saṃvyavahārāyeti pratyekaṃ devanārakādir ghaṭādiś ca vyavahāreṇāśrīyate evam ayaṃ nayas tāvad vartate yāvat punar nāsti vibhāgaḥ

ṛjuṃ praguṇaṃ sūtrayati tan trayatīti ṛjusūtraḥ pūrvāparāṃs trikālaviṣayān atiśayya vartamānakālaviṣayān ādatte atītānāgatayor vinaṣṭānutpannatvena vyavahārābhāvāt tac ca vartamānaṃ samayamātram tadviṣayaparyāyamātragrāhyam ṛjusūtraḥ nanu saṃvyavahāralopaprasaṅga iti ced na asya nayasya viṣayamātrapradarśanaṃ kriyate sarvanayasamūhasādhyo hi lokasaṃvyavahāraḥ

liṅgasaṃkhyāsādhanādivyabhicāranivṛttiparaḥ śabdanayaḥ tatra liṅgavyabhicāraḥ puṣyas tārakā nakṣatram iti saṃkhyāvyabhicṝaḥ jalam āpaḥ varṣā ṛtuḥ āmrā vanam varaṇā nagaram iti sādhanavyabhicāraḥ senā parvatam adhivasati puruṣavyabhicāraḥ ehi manye rathena yāsyasi na hi yāsyasi yātas te piteti kālavyabhicāraḥ viśvadṛśvā 'sya putro janitā bhāvi kṛtyam āsīd iti upagrahavyabhicāraḥ saṃtiṣṭhate pratiṣṭhate viramaty uparamatīti evaṃ prakāraṃ vyavahāramanyāyyaṃ manyate anyārthasyānyārthena saṃbandhābhāvāt lokasamayavirodha iti cet virudhyatām tattvam iha mīmāṃsyate na bhaiṣajyam āturecchānuvarti

nānārthaśamabhirohaṇāt samabhirūḍhaḥ yato nānārthān samatīty aikam artham ābhimukhyena rūḍhaḥ samabhirūḍhaḥ gaur ity ayaṃ śabdo vāgādiṣv artheṣu vartamānaḥ paśāv abhirūḍhaḥ athavā arthagatyarthaḥ śabdaprayogaḥ tatraikasyārthasyaikena gatārthatvāt paryāyaśabdaprayogo 'narthakaḥ śabdabhedāś ced asti arthabhedenāpy avaśyaṃ bhavitavyam iti nānārthasamabhirohaṇāt samabhirūḍhaḥ indanād indraḥ śakanāc chakraḥ pūrdāranāt puradara ity evaṃ sarvatra athavā yo yatrābhirūḍhaḥ sa tatra sametyābhimukhenārohaṇāt samabhirūḍhaḥ yathā kva bhavān āste ātmanīti kutaḥ vastv antare vṛttyabhāvāt yady anyasyānyatra vṛttiḥ syāt jñānādīnāṃ rūpādīnāṃ cākaśe vṛttiḥ syāt

yenātmanā bhūtas tenaivādhyavasāyayatīti evaṃbhūtaḥ svābhipretakriyāpariṇatikṣaṇe eva sa śabdo yukto nānyadeti yadaivendati tadaivendro nābhiṣecako na pūjaka iti yadaiva gacchati tadaiva gaur na sthito na śayita iti athavā yenātmanā yena jñānena bhūtaḥ pariṇatas tenaivādhyavasāyayati yathendrāgnijñānapariṇata ātmaivendro 'gniś ceti

uktā naigamādayo nayāḥ uttarottarasūkṣmaviṣayatvād eṣāṃ kramaḥ pūrvapūrvahetukatvāc ca evam ete nayāḥ pūrvapūrvaviruddhamahāviṣayā uttarottarānukūlālpaviṣayā dravyasyānantaśakteḥ pratiśakti vibhidyamānā bahuvikalpā jāyante ta ete guṇapradhānatayā parasparatantrāḥ samyagdarśanahetavaḥ puruṣārthakriyāsādhanasāmarthyāt tantvādaya iva yathopāyaṃ viniveśyamānāḥ paṭādisaṃjñāḥ svatantrāś cāsamarthāḥ

tantvādaya iveti viṣama upanyāsaḥ tantvādayo nirapekṣā api kāṃcid arthamātrāṃ janayanti bhavati hi kaścit pratyekaṃ tantus tvaktrāṇe samarthaḥ ekaś ca balvajo bandhane samarthaḥ ime punar nayā nirapekṣāḥ santo na kāṃcid api samyagdarśanamātrāṃ prādur bhāvayantīti naiṣa doṣaḥ abhihitānavabodhāt abhihitam artham anavabudhya pareṇedam upālabhyate etad uktaṃ nirapekṣeṣu tantvādiṣu paṭādikāryaṃ nāstīti yat tu tenopadarśitaṃ na tat paṭādikāryam kiṃ tarhi kevalaṃ tantvādikāryam tantvādikaryam api tantvādyavayaveṣu nirapekṣeṣu nāsty eva ity asmatpakṣasiddhir eva atha tantvādiṣu paṭādikāryaṃ śaktyapekṣayā astīty ucyate nayeṣv api nirapekṣeṣu buddhyabhidhānarūpeṣu kāraṇavaśāt samyagdarśanahetutvavipariṇatisadbhāvāt śaktyātmanāstitvam iti sāmyam evopanyāsasya

āha samyagdarśanasya viṣayabhāvenopadiṣṭeṣu jīvādiṣv ādāv upanyas tasya jīvasya kiṃ svatattvam ity ucyate

ātmani karmaṇaḥ svaśakteḥ kāraṇavaśād anudbhūtir upaśamaḥ yathā katakādidravyasaṃbandhād ambhasi paṃkasya upaśamaḥ kṣaya ātyantikī nivṛttiḥ yathā tasminn evāmbhasi śucibhājanāntarasaṃkrānte paṃkasyātyantābhāvaḥ ubhayātmako miśraḥ yathā tasminn evāmbhasi katakādidravyasaṃbandhāt paṃkasya kṣīṇākṣīṇavṛttiḥ dravyādinimittavaśāt karmaṇāṃ phalaprāptir udayaḥ dravyātmalābhamātrahetukaḥ pariṇāmaḥ upaśamaḥ prayojanam asyety aupaśamikaḥ evaṃ kṣāyikaḥ kṣāyopaśamikaḥ audayikaḥ pariṇāmikaś ca ta ete pañca bhāvā asādharaṇā jīvasya svatattvam ity ucyante

samyagdarśanasya prakṛtatvāt tasya triṣu vikalpeṣu aupaśamikam ādau labhyata iti tasyādau grahaṇaṃ kriyate tadanantaraṃ kṣāyikagrahaṇam tasya pratiyogitvāt saṃsāry apekṣayā dravyatas tato 'saṃkyeyaguṇatvāc ca tata uttaraṃ miśragrahaṇam tadubhayātmakatvāt tato 'saṃkyeyaguṇatvāc ca teṣāṃ sarveṣām anantaguṇatvād audayikapāriṇāmikagrahaṇam ante kriyate atra dvandanirdeśaḥ kartavyaḥ aupaśamikakṣāyikamiśraudayikapāriṇāmikā iti tathā sati dviḥ 'ca' śabdo na kartavyo bhavati naiva śaṅkyam anyaguṇāpekṣayā iti pratīyate vākye punaḥ sati 'ca' sabdena prakṛtobhayānukarṣaḥ kṛto bhavati tarhi kṣāyopaśamikagrahaṇam eva kartavyam iti cet na gauravāt miśragrahaṇaṃ madhye kriyate ubhayāpekṣārtham bhavyasya aupaśamikakṣāyikau bhāvau miśraḥ punar abhavyasyāpi bhavati audayikapāriṇāmikābhyāṃ saha bhavyasyāpīti bhāvāpekṣayā talliṅgasaṃkhyāprasaṅgaḥ svatattvasyeti cet na upāttaliṃgasaṃkhyatvāt tadbhāvas tattvam svaṃ tattvaṃ svatattvam iti

atrāha tasyaikasyātmano ye bhāvā aupaśamkādayas te kiṃ bhedavanta utābhedā iti attrocyate bhedavantaḥ yady evaṃ bhedā ucyantām ity ata āha

dvyādīnāṃ saṃkhyāśabdānāṃ kṛtadvandvānāṃ bhedaśabdena saha svapadārthe 'nyapadārthe vā vṛttir veditavyā dvau ca nava ca aṣṭādaśa ca ekaviṃśatiś ca trayaś ca dvinavāṣṭādaśaikaviṃśatitrayaḥ te ca te bhedās ca ta eva bhedā yeṣām iti vā vṛttir dvinavāṣṭādaśaikaviṃśatitribhedā ity yadā svapadārthe vṛttis tadā aupaśamikādīnā bhāvānāṃ dvinavāṣṭādaśaikaviṃśatitrrayo bhedā ity abhisaṃbandhaḥ kriyate arthavaśād vibhaktipariṇāma iti yadānyapadārthe vṛttis tadā nirdiṣṭavibhaktyantā evābhisaṃbadhyante aupaśamikādayo bhāvā dvinavāṣṭādaśaikaviṃśatitribhedā iti 'yathākrama' vacanam yathāsaṃkhyapratipattyārtham aupaśamiko dvibhedaḥ kṣāyiko navabhedaḥ miśro 'ṣṭādaśabhedaḥ audayika ekaviṃśatibhedaḥ pāriṇāmikas tribhedaḥ iti

yady evam aupaśamikasya kau dvau bhedāv ity ata āha

vyākhyātalakṣaṇe samyaktvacāritre aupaśamikatvaṃ katham iti cet ucyate cāritramoho dvividaḥ kaṣāyavedanīyo nokaṣāyavedanīyaś ceti tatra kaṣāyavedanīyasya bhedā anantānubandhinaḥ krodhamānamāyālobhāś catvāraḥ darśanamohasya trayo bhedāḥ samyaktvaṃ mithyātvaṃ samyagmithyātvam iti āsāṃ saptānāṃ pakṛtīnāmupaśamād aupaśamikaṃ samyaktvam

anādimithyādṛṣṭer bhavyasya karmodayāpāditakāluṣye sati kutas tadupaśamaḥ kālalabdhyādinimittatvāt tatra kālalabdhis tāvat karmāviṣṭa ātmā bhavyaḥ kāle 'rddhapudgalaparivarttanākhye 'vaśiṣṭe prathamasamyaktvagrahaṇasya yogyo bhavati nādhike iti iyam ekā kālalabdhiḥ aparā karmasthitikā kālalabdhiḥ utkṛṣṭasthitikeṣu karmasu jaghanyasthitikeṣu ca prathamasamyaktvalābho na bhavati kva tarhi bhavati antaḥkoṭīkoṭīsāgaropamasthitikeṣu karmasu bandham āpadhyamāneṣu viśuddhapariṇāmavaśāt satkarmasu ca tataḥ saṃkheyasāgaropamasahasronāyām antaḥkoṭīkoṭīsāgaropamasthitau sthāpiteṣu prathamasamyaktvayogyo bhavati aparā kālalabdhir bhavāpekṣayā bhavyaḥ pañcendriyaḥ saṃjñī paryāptikaḥ sarvaviśuddhaḥ prathamasamyaktvam utpādayati 'ādi' śabdena jātismaraṇādiḥ parigṛhyate

kṛtsnasya mohanīyasyopaśamād aupaśamikaṃ cāritram tatra samyaktvasyādau vacanaṃ tatpūrvakatvāc cāritrasya

yaḥ kṣāyiko bhāvo navavidha uddiṣṭas tasya bhedasvarūpapratipādanārtham āha

'ca' śabdaḥ samyaktvacāritrānukarṣaṇārthaḥ jñānāvaraṇasyātyantakṣāyāt kevalajñānaṃ kṣāyikaṃ tathā kevaladarśanam dānāntarāyasyātyantakṣayād anantaprāṇigaṇānugrahakaraṃ kṣāyikam abhayadānam lābhāntarāyasyāśeṣasya nirāsāt parityaktakavalāhārakriyāṇāṃ kevalināṃ yataḥ śarīrabalādhānahetavo 'nyam anujāsādhāraṇāḥ paramaśubhāḥ sukṣmāḥ anantāḥ pratisamayaṃ pudgalāḥ saṃbandham upayānti sa kṣāyiko lābhaḥ kṛtsnasya bhogāntarāyasya tirobhāvād āvirbhūto 'tiśayavān ananto bhogaḥ kṣāyikaḥ yataḥ kusumavṛṣṭyādayo viśeṣāḥ prādurbhavanti niravaśeṣasyopabhogāntarāyasya pralayāt prādurbhūto 'nanta upabhogaḥ kṣāyikaḥ yataḥ siṃhāsanacāmaracchatrayādayo vibhūtayaḥ vīryāntarāyasya karmaṇo 'tyantakṣayād āvirbhūtam anantavīryaṃ kṣāyikam pūrvoktānāṃ saptānāṃ prakṛtīnām atyantakṣayāt kṣāyikaṃ samyaktvam cāritram api tathā yadi kṣāyikadānādibhāvakṛtam abhayadānādi siddheṣv api tatprasaṅgaḥ naiṣa doṣaḥ śarīranāmatīrthakaranāmakarmodayādyapekṣatvāt teṣāṃ tadabhāve tadaprasaṃgaḥ kathaṃ tarhi teṣāṃ siddheṣu vṛttiḥ paramānandāvyābādharūpeṇaiva teṣāṃ tatra vṛttiḥ kevalajñānarūpeṇānantavīryavṛttivat

ya uktaḥ kṣāyopaśamiko bhāvo 'ṣṭādaśavikalpas tadbhedanirūpaṇārtham āha

catvāraś ca trayaś ca trayaś ca pañca ca catustritripañca te bhedāḥ yāsāṃ tāścatustritripañcabhedāḥ yathākramam ity anuvartate tenābhisaṃbandhāc caturādibhir jñānādīny abhisaṃbadhyante catvāri jñānāni trīṇy ajñānāni trīṇi darśanāni pañca labdhaya iti sarvaghātisparddhakānām udayakṣayāt teṣām eva sadupaśamād deśaghātisparddhakānām udaye kṣāyopaśamiko bhāvo bhavati tatra jñānādīnāṃ vṛttiḥ svāvaraṇāntarāyakṣayopaśamād vyākhyātavyā 'samyaktva' grahaṇena vedakasamyaktvaṃ gṛhyate anantānubandhikaṣāyacatuṣtayasya mithyātvasamyaṅmithyātvayoś codayakṣayāt sadupaśamāc ca samyaktvasya deśaghātisparddhakasyodaye tattvārthaśraddhānaṃ kṣayopaśamikaṃ samyaktvam anantānubandhyapratyākhyānapratyākhyānadvādaśakaṣāyodayakṣayāt sadupaśamāc ca saṃjvalanakaṣāyacatuṣṭayānyatamadeśaghātisparddhakodaye nokaṣāyanavakasya yathāsaṃbhavodaye ca nivṛttipariṇāma ātmanaḥ kṣāyopaśamikaṃ cāritram anantānubandhyapratyākhyānakaṣāyāṣṭakodakṣayāt sadupaśamāc ca pratyākhyānakaṣāyodaye saṃjvalanakaṣāyasya deśaghātisparddhakodaye nokaṣāyanavakasya yathāsaṃbhavodaye ca viratāviratapariṇāmaḥ kṣāyopaśamikaḥ saṃyamāsaṃyama ity ākhyāyate

ya ekaviṃśativikalpa audayiko bhāva uddiṣṭas tasya bhedasaṃjñāsaṃkīrtanārtham idam ucyate

yathākramam ity anuvartate tenābhisaṃbandhād gatiś caturbhedā narakagatis tiryagatir manuṣyagtir devagatir iti tatra narakagatināmakarmodayān nārako bhāvo bhavatīti narakagatir audayikī evam itaratrāpi kaṣāyaś caturbhedaḥ krodho māno māyā lobha iti tatra krodhanirvartanasya karmaṇa udayāt krodhaḥ audayikaḥ evam itaratrāpi liṅgaṃ tribhedaṃ srtīvedaḥ puṃvedo napuṃsakaveda iti strīvedakarmaṇa udayāt strīveda audayikaḥ evam itaratrāpi mithyādarśanam ekabhedam mityādarśanakarmaṇa udayāt tattvārthāśraddhānapariṇāmo mithyādarśanam audayikam jñānāvaraṇakarmaṇa udayāt padārthānavabodho bhavati tadajñānam audayikam cāritramohasya sarvaghātisparddhakasyodayād asaṃyata audayikaḥ karmodayasāmānyāpekṣo 'siddha audayikaḥ leśyā dvividhā dravyaleśyā bhāvaleśyā ceti jīvabhāvādhikārād dravyaleśyā nādhikṛtā bhāvaleśyā kaṣāyodayarañjitā yogapravṛttir iti kṛtvā audayikīty ucyate sā ṣaḍvidhā kṛṣṇaleśyā nīlaleśyā kāpotaleśyā tejoleśyā padmaleśyā śuklaleśyā ceti

nanu ca upaśāntkaṣāye kṣīṇakaṣāye sayogakevalini ca śuklaleśyā 'stīty āgamaḥ tatra kaṣāyānurañjanābhāvād audayikatvaṃ nopapadyate naiṣa doṣaḥ pūrvabhāvaprajñāpananayāpekṣayā yāsau yogapravṛttiḥ kaṣāyānurañjitā saivety upacārād audayikīty ucyate tadabhāvād ayogakevalyaleśya iti niścīyate

yaḥ pāriṇāmiko bhāvas tribheda uktas tadbhedasvarūpapratipādanārtham āha

jīvatvaṃ bhavyatvam abhavyatvam iti trayo bhāvāḥ pāriṇāmikā anyadravyāsādhāraṇā ātmano veditavyāḥ kutaḥ punar eṣāṃ pāriṇāmikatvam karmodayopaśamakṣayakṣayopaśamānapekṣitvāt jīvatvaṃ caitanyam ity arthaḥ samyagdarśanādibhāvena bhaviṣyatīti bhavyaḥ tadviparīto 'bhavyaḥ ta ete trayo bhāvā jīvasya pāriṇāmikā

nanu cāstitvanityatvapradeśavattvādayo 'pi bhāvāḥ pāriṇāmikāḥ santi teṣām iha grahaṇaṃ kartavyam na kartavyam kṛtam eva katham 'ca' śabdena samuccitatvāt yady evaṃ traya iti saṃkhyā virudhyate na virudhyate asādharaṇā jīvasya bhāvāḥ pāriṇāmikās traya eva astitvādayaḥ punar jīvājīvaviṣayatvāt sādhāraṇā iti 'ca' śabdena pṛthaggṛhyante āha aupaśmikādibhāvānupapattir amūrtatvād ātmanaḥ karmabandhāpekṣā hi te bhāvāḥ na cāmūrteḥ karmaṇāṃ bandho yujyata iti tan na anekāntāt nāyam ekāntaḥ amūrtir evātmeti karmabandhaparyāyāpekṣayā tadāveśāt syān mūrtaḥ śuddhasvarūpāpekṣayā syād amūrtaḥ yady evaṃ karmabandhāveśād asyaikatve saty avivekaḥ prāpnoti naiṣa doṣaḥ bandhaṃ pratyekatve saty api lakṣaṇabhedād asya nānātvam avasīyate uktaṃ ca baṃdhaṃ paḍi eyattaṃ lakkhaṇado havai tassa ṇāṇattaṃ tamhā amuttibhāvo ṇeyaṃto hoi jīvassa iti

yady evaṃ tadeva lakṣaṇam ucyatāṃ yena nānātvam avasīyate ity ata āha

ubhayanimittavaśād utpadyamānaś caitanyānuvidhāyī pariṇāma upayogaḥ tena bandhaṃ pratyekatve saty apy ātmā lakṣyate suvarṇarajatayor bandhaṃ pratyekatve saty api varṇādibhedavat

tadbhedapradarśanārtham āha

sa upayogo dvividhaḥ jñānopayogo darśanopayogaś ceti jñānopayogo 'ṣṭabhedaḥ matijñānaṃ śrutajñānaṃ avadhijñānaṃ manaḥparyayajñānaṃ kevalajñānaṃ matyajñānaṃ śrutājñānaṃ vibhaṅgajñānaṃ ceti darśanopayogaś caturvidhaḥ cakṣurdarśanam acakṣurdarśanam avadhidarśanaṃ kevaldarśanaṃ ceti tayo kathaṃ bhedaḥ sākārānakārabhedāt sākāraṃ jñānam anākāraṃ darśanam iti tacchadmastheṣu krameṇa vartate nirāvaraṇeṣu yugapat pūrvakālabhāvino 'pi darśanāj jñānasya prāgupanyāsaḥ abhyarhitatvāt samyagjñānaprakaraṇāt pūrvaṃ pañcavidho jñānopayogo vyākhyātaḥ iha punar upayogagrahaṇād viparyayo 'pi gṛhyate ity aṣṭavidha iti ucyate

yathoktenānenābhihitapariṇāmena sarvātmasādhāraneṇopayogena ye upalakṣitā upayoginas te dvividhāḥ

saṃsaraṇaṃ saṃsāraḥ parivartaṇam ity arthaḥ sa eṣām asti te saṃsāriṇaḥ tatparivartanaṃ pañcavidham dravyaparivartanaṃ kṣetraparivartanaṃ kālaparivartanaṃ bhavaparivartanaṃ bhāvaparivartanaṃ ceti tatra dravyaparivartanaṃ dvividham nokarmadravyaparivartanaṃ karmadravyaparivartanaṃ ceti tatra nokarmadravyaparivartanaṃ nāma trayāṇāṃ śarīrāṇāṃ ṣaṇṇāṃ paryāptīnāṃ ca yogyā ye pudgalā ekena jīvena ekasmin samaye gṛhītāḥ snigdharūkṣavarṇagandhādibhis tīvramandamadhyamabhāvena ca yathāvasthitā dvitīyādiṣu samayeṣu nirjīrṇā agṛhītān anantavārān atītya miśrakāṃś cānantavārān atītya madhye gṛhītāṃś cānantavārān atītya ta eva tenaiva prakāṛeṇa tasyaiva jīvasya norkarmabhāvam āpadyante yāvat tāvat samuditaṃ nokarmadravyaparivartanam karmadravyaparivartanaṃ ucyate ekasmin samaye ekena jīvenāṣṭavidhakarmabhāvena ye gṛhītāḥ pudgalāḥ samayādhikām āvalikām atītya dvitīyādiṣu samayeṣu nirjīrṇāḥ pūrvoktenaiva krameṇa ta eva tenaiva prakāreṇa tasya jīvasya karmabhāvam āpadyante yāvat tāvat karmadravyaparivartanam uktaṃ ca savve vi puggalā khalu kamaso bhuttujjhiyā ya jīveṇa asaiṃ aṇaṃtakhutto puggalapariyaṭṭasaṃsāre

kṣetraparivartanam ucyate sūkṣmanigodajīvo 'paryāptikaḥ sarvajaghanyapradeśaśarīro lokasyāṣṭamadhyapradeśān svaśarīramadhye kṛtvotpannaḥ kṣudrabhavagrahaṇaṃ jīvitvā mṛtaḥ sa eva punas tenaivāvaghāhena dvir utpannas tathā tris tathā catur ity evaṃ yāvad ghanāṃgulasyāsaṃkheyabhāgapramitākāśapradeśās tāvat kṛtvas tatraiva janitvā punar ekaikapradeśādhikabhāvena sarvo loka ātmano jamakṣetrabhāvam upanīto bhavati yāvat tāvat kṣetraparivartanam uktaṃ ca savvam hi loyakhette kamaso taṃ ṇatthi jam ṇa uppaṇṇaṃ ogāhaṇāe bahuso paribhamido khetttasaṃsāre

kālaparivartanam ucyate utsarpiṇyāḥ prathamasamaye jātaḥ kaścij jīvaḥ svāyuṣaḥ parisamāptau mṛtaḥ sa eva punar dvitīyāyā utsarpiṇyā dvitīyasamaye jātaḥ svāyuṣaḥ kṣayān mṛtaḥ sa eva punas tṛtīyāyā utsarpiṇyās tṛtīyasamaye jātaḥ evam anena krameṇotsarpiṇī parisamāptā tathāvasarpiṇī ca evaṃ janmanair antaryam uktam maraṇasyāpi nairantaryaṃ tathaiva grāhyam etāvat kālaparivartanam uktaṃ ca ussappiṇiavasappiṇisamayāvaliyāsu ṇiravasesāsu jādo mudo ya bahuso bhamaṇeṇa du kālasaṃsāre

bhavaparivartanam ucyate narakagatau sarvajaghanyam āyurdaśavarṣasahasrāṇi tenāyuṣā tatrotpannaḥ punaḥ paribhramya tenaivāyuṣā jātaḥ evaṃ daśavarṣasahasrāṇāṃ yāvantaḥ samayās tāvat kṛtvas tatraiva jāto mṛtaḥ punar ekaikasamayādhikabhāvena trayastriṃśatsāgaropamāṇi parisamāpitāni tataḥ pracyutya tiryaggatāv antarmuhūrtāyuḥ samutpannaḥ pūrvoktenaiva krameṇa trīṇi palyopamāni tena parisamāpitāni evaṃ manuṣyagatau ca devagatau ca nārakavat ayaṃ tu viśeṣaḥ ekatriṃśatsāgaropamāṇi parisamāpitāni yāvat tāvad bhavaparivartanam uktaṃ ca ṇirayādijahaṇṇādisu jāva du uvarillayā du gevajjā micchattasaṃsideṇa du bahuso vi bhavaṭṭhidī bhamidā

bhāvaparivartanam ucyate pañcendriyaḥ saṃjñī paryāptako mithyādṛṣṭiḥ kaścij jīvaḥ sa sarvajaghanyāṃ svayogyāṃ jñānāvaraṇaprakṛteḥ sthitim antaḥkoṭīkoṭīsaṃjñikām āpadyate tasya kaṣāyādhyavasāyasthānānyasaṃkhyeyalokapramitāni ṣaṭsthānapatitāni tatsthitiyogyāni bhavanti tatra sarvajaghanyakaṣāyādhyavasāyasthānanimittāny anubhāgādhyavasāyasthānāny asaṃkhyeyalokapramitāni bhavanti evaṃ sarvajaghanyāṃ sthitiṃ sarvajaghanyaṃ ca kaṣāyādhyavasāyasthānaṃ sarvajaghanyam evānubhāgabandhasthānam āskandatas tadyogyaṃ sarvajaghanyaṃ yogasthānaṃ bhavati teṣām eva sthitikaṣāyānubhāgasthānānāṃ dvitīyam asaṃkhyeyabhāgavṛddhiyuktaṃ yogasthānaṃ bhavati evaṃ ca tritīyādiṣu catuḥsthānapatitāni śreṇyasaṃkhyeyabhāgapramitāni yogasthānāni bhavanti tathā tām eva sthitiṃ tad eva kaṣāyādhyavasāyasthānaṃ ca pratipadyamānasya dvitīyam anubhavādhyavasāyasthānaṃ bhavati tasya ca yogasthānāni pūrvavadveditavyāni evaṃ tritīyādiṣv api anubhavādhyavasāyasthāneṣu ā asaṃkhyeyalokaparisamāpteḥ evaṃ tām eva sthitim āpadyamānasya dvitīyaṃ kaṣāyādhyavasāyasthānaṃ bhavati tasyāpy anubhavādhyavasāyasthānāni yogasthānāni ca pūrvavadveditavyāni evaṃ tritīyādiṣv api kaṣāyādhyavasāyasthāneṣu ā asaṃkyeyalokaparisamāpter vṛddhikramo veditavyaḥ uktāyā jaghanyāyāḥ sthiteḥ samayādhikāyāḥ kaṣāyādisthānāni pūrvavat evaṃ samayādhikakrameṇa ā utkṛṣṭasthites triṃśatsāgaropamakoṭīkoṭīparimitāyāḥ kaṣāyādisthānāni veditavyāni anantabhāgavṛddhiḥ asaṃkhyeyabhāgavṛddhiḥ saṃkhyeyabhāgavṛddhiḥ saṃkhyeyaguṇavṛddhiḥ asaṃkhyeyaguṇavṛddhiḥ anantaguṇavṛddhiḥ imāni ṣaṭ vṛddhisthānāni hānir api tathaiva anantabhāgavṛddhyanantaguṇavṛddhirahitāni catvāri sthānāni evaṃ sarveṣāṃ karmaṇāṃ mūlaprakṛtīnām uttaraprakṛtīnāṃ ca parivatanakramo veditavyaḥ tadetat sarvaṃ samuditaṃ bhāvaparivartanam uktam ca savvā payaḍiṭṭhidīo aṇubhāgapadesabaṃdhaṭhāṇāṇi micchattasaṃsideṇa ya bhamidā puṇa bhāvasaṃsāre

uktāt pañcavidhāt saṃsārān nivṛttā ye te muktāḥ saṃsāriṇāṃ pragupādānaṃ tatpūrvakatvān muktavyapadeśasya

ya ete saṃsāriṇas te dvividhāḥ

mano dvitīdham dravyamano bhāvamanaś ceti tatra pudgalavipākikarmodayāpekṣaṃ dravyamanaḥ vīryāntarāyanoindriyāvaraṇakṣayopaśamāpekṣā ātmano viśuddhir bhāvamanaḥ tena manasā saha vartanta iti samanaskāḥ na vidyate mano yeṣāṃ ta ime amanaskāḥ evaṃ manaso bhāvābhāvābhyāṃ samsāriṇo dvividhā vibhajyante samanaskāś cāmanaskāś ca samanaskāmanaskā iti abhyarhitatvāt samanaskaśabdasya pūrvanipātaḥ katham abhyarhitatvam guṇadoṣavicārakatvāt

punar api saṃsāriṇāṃ bhedapratipattyartham āha

'saṃsāri' grahaṇam anarthakam prakṛtatvāt kva prakṛtam 'saṃsāriṇo muktaś ca' iti nānarthakam pūrvāpekṣārtham ye uktāḥ samanaskā amanaskās te saṃsāriṇa iti yadi hi pūrvasya viśeṣaṇaṃ na syāt samanaskāmanaskagrahaṇaṃ saṃsāriṇo muktāś cety anena yathāsaṃkhyam abhisaṃbadhyeta evaṃ ca kṛtvā 'saṃsāri' grahaṇam adau kriyamāṇam upapannaṃ bhavati tatpūrvāpekṣaṃ saduttarārtham api bhavati te saṃsāriṇo dvividhāḥ trasāḥ sthāvarā iti trasanāmakarmodayavaśīkṛtās trasā sthāvaranāmakarmodayavaśavartinaḥ sthāvarāḥ trasyantīti trasāḥ sthānaśīlāḥ sthāvara iti cet na āgamavirodhāt āgame hi kāyānuvādena trasā dvīndriyād ārabhya ā ayogakevalina iti tasmān na calanācalanāpekṣaṃ trasasthāvaratvam karmodayāpekṣam eva trasagrahaṇam ādau kriyate alpāctaratvād abhyarhitatvāc ca sarvopayogasambhavād abhyarhitatvam

ekendriyāṇām atibahuvaktavyābhāvād ullaṅghyānupūrvīṃ sthāvarabhedapratipattyartham āha

sthāvaranāmakarmabhedāḥ pṛthivīkāyādayaḥ santi tadudayanimittā jīveṣu pṛthivyādayaḥ saṃjñā veditavyāḥ prathanādiprakṛtiniṣpannā api rūḍhivaśāt prathanādyanapekṣā vartante eṣāṃ pṛthivyādīnām ārṣe cāturvidhyam uktaṃ pratyekam tatkatham iti cet ucyate pṛthivī pṛthivīkāyaḥ pṛthivīkāyikaḥ pṛthivījīva ity ādi tatra acetanā vaiśrasikapariṇāmanirvṛttā kāṭhinyaguṇātmikā pṛthivī acetanatvād asaty api pṛthivīkāyanāmakarmodaye prathanakriyopalakṣitaiveyam athavā pṛthivīti sāmānyam uttaratraye 'pi sadbhāvāt kāyaḥ śarīram pṛthivīkāyikajīvaparityaktaḥ pṛthivīkāyo mṛtamanuṣyādikāyavat pṛthivīkāyo 'syāstīti pṛthivīkāyikaḥ tatkāyasaṃbandhavaśīkṛta ātmā samavāptapṛthivīkāyanāmakarmodayaḥ kārmaṇakāyayogastho yo na tāvat pṛthivīṃ kāyatvena gṛhṇāti sa pṛthivījīvaḥ evam abādiṣv api yojyam ete mañcavidhāḥ prāṇinaḥ sthāvarāḥ kati punar eṣāṃ prāṇāḥ catvāraḥ sparśanendriyaprāṇāḥ kāyabalaprāṇāḥ ucchvāsaniśvāsaprāṇaḥ āyuḥprānaś ceti

atha trasāḥ ke te ity atrocyate

dve indriye yasya so 'yaṃ dvīndriyaḥ dvīndriṣa ādir yeyāṃ te dvīndriyādayaḥ 'ādi' śabdo vyavasthāvācī kva vyavasthitāḥ āgame katham dvīndriyas trīndriyaś caturindriyaḥ pañcendriyaś ceti tadguṇasaṃvijñānavṛttigrahaṇād dvīndriyasyāpy antarbhāvaḥ kati punar eṣāṃ prāṇāh dvīndriyasya tāvat ṣaṭ prāṇāḥ pūrvoktā eva rasanavākprāṇādhikāḥ trīndriyasya sapta ta eva ghrāṇaprāṇādhikāḥ caturindriyasyāṣṭau ta eva cakṣuḥprāṇādhikāḥ pañcendriyasya tiraśco 'saṃjñino nava ta eva śrotraprāṇādhikāḥ saṃjñino daśa ta eva manobalaprāṇādhikāḥ

'ādi' śabdena nirdiṣṭānām anirjñātasaṃkhyānām iyattāvadhāraṇaṃ karttavyām ity ata āha

'indriya' śabdo vyākhyātārthaḥ 'pañca' grahaṇam avadhāraṇārtham paṃcaiva nādhikasaṃkhyānīti karmendriyāṇāṃ vāgādinām iha grahaṇaṃ kartavyam na kartavyam upayogaprakaraṇāt upayogasādhanānām iha grahaṇaṃ na kriyāsādhanānām anavasthānāc ca kriyāsādhanānām aṅgopāṅganāmakarmanivartitānāṃ sarveṣām api kriyāsādhanatvam astīti na paṃcaiva karmendriyāṇi

teṣām antarbhedapradarśanārtham āha

'vidha' śabdaḥ prakāravācī dvau vidhau yeṣāṃ tāni dvividhāni dviprakārāṇīty arthaḥ kau punas tau dvau prakārau dravyendriyaṃ bhāvendriyam iti

tatra dravyendriyasvarūpapratipattyartham āha

nirvartyate ity nirvṛttiḥ kena nirvartyate karmanā sā dvividhā bāhyābhyantarabhedāt utsedhāṅgulāsaṃkhyeyabhāgapramitānāṃ śuddhānām ātmapradeśānāṃ pratiniyatacakṣurādīndriyasaṃsthānenāvasthitānāṃ vṛttir ābhyantarā nirvṛttiḥ teṣv ātmapradeśeṣv indriyavyapadeśabhākṣu yaḥ pratiniyatasaṃsthāno nāmakarmodayāpāditāvasthāviśeṣaḥ pudgalapracayaḥ sā bāhyā nirvṛttiḥ yena nirvṛtter upakāraḥ kriyate tadupakaraṇam pūrvavat tadapi dvividham tatrābhyantaraṃ kṛṣṇaśuklamaṇḍalaṃ bāhyam akṣipatrapakṣmadvayādi evaṃ śeṣeṣv apīndriyeṣu jñeyam

bhāvendriyam ucyate

lambhanaṃ labdhiḥ kā punar asau jñānāvaraṇakarmakṣayopaśamaviśeṣaḥ yat saṃnidhānād ātmā dravyendriyanirvṛttiṃ prati vyāpriyate tan nimitta ātmanaḥ pariṇāma upayogaḥ tadubhaye bhāvenindriyam indriyaphalam upayogaḥ tasya katham indriyatvam kāraṇadharmasya kārye darśanāt yathā ghaṭākārapariṇataṃ vijñānaṃ ghaṭa iti svārthasya tatra mukhyatvāc ca indrasya liṅgam indriyam iti yaḥ svārthaḥ sa upayoge mukhyaḥ 'upayogalakṣaṇo jīva' iti vacanāt ata upayogasyendriyatvaṃ nyāyyaṃ

uktānām indriyāṇāṃ saṃjñānupūrvīpratipādanārtham āha

loke indriyāṇāṃ pāratantryavivakṣā dṛśyate anenākṣaṇā suṣṭhu paśyāmi anena karṇena suṣṭhu śṛṇomīti tataḥ pāratantryāt sparśanādīnāṃ karaṇatvam vīryāntarāyamatijñānāvaraṇakṣayopaśamāṅgopāṅganāmalābhāvaṣṭambhād ātmanā spṛśyate 'neneti sparśanam rasyate 'neneti rasanam ghrāyate 'neneti ghrāṇam cakṣer anekārthatvād darśanārthavivakṣāyāṃ caṣṭe arthān paśyaty aneneti cakṣuḥ śrūyate 'neneti śrotram svātantryavivakṣā ca dṛśyate idaṃ me akṣi suṣṭhu paśyati ayaṃ me karṇaḥ suṣṭhu śṛṇoti tataḥ sparśanādīnāṃ kartari niṣpattiḥ spṛśatīti sparśanam rasatīti rasanam jighratīti ghrāṇam caṣṭe iti cakṣuḥ śṛṇotīti śrotram eṣāṃ nirdeśakramaḥ ekaikavṛddhikramaprajñāpanārthaḥ

teṣām indriyāṇāṃ viṣayapradarśanārtham āha

dravyaparyāyayoḥ prādhānyavivakṣāyāṃ karmabhāvasādhanatvaṃ sparśādiśabdānāṃ veditavyam dravyaprādhānyavivakṣāyāṃ karmanirdeśaḥ spṛśyata iti sparśaḥ rasyata iti rasaḥ gandhyata iti gandhaḥ varṇyata iti varṇaḥ śabdyata iti śabdaḥ paryāyaprādhānyavivakṣāyāṃ bhāvanirdeśaḥ sparśanaṃ sparśaḥ rasanaṃ rasaḥ gandhanaṃ gandhaḥ varṇanaṃ varṇaḥ śabdanaṃ śabda iti eṣāṃ krama indriyakrameṇaiva vyākhyātaḥ

atrāha yat tāvan mano 'navasthānād indriyaṃ na bhavatīti pratyākhyātaṃ tat kim upayogasyopakāri uta neti tad apy upakāryeva tena vinendriyāṇāṃ viṣayeṣu svaprayojanavṛttyabhāvāt kiñcāsyaiṣāṃ sahakāritvamātram eva prayojanam utānyad apīty ata āha

śrutajñānaviśayo 'rthaḥ śrutam sa viṣayo 'nindriyasya pariprāptaśrutajñānāvaraṇakṣayopaśamasyātmanaḥ śrutārthe 'nindriyālambanajñānapravṛtteḥ athavā śrutajñānaṃ śrutam tadanindriyasyārthaḥ prayojanam iti yāvat svātantryasādhyam idaṃ prayojanam anindriyasya

uktānām indriyānāṃ pratiniyataviṣayāṇāṃ svāmitvanirdeśe kartavye yat prathamaṃ gṛhītaṃ sparśanaṃ tasya tāvat svāmitvāvadhāraṇārtham āha

ekaṃ prathamam ity arthaḥ kiṃ tat sparśanam tat keṣām pṛthivyādīnāṃ vanaspatyantānāṃ veditavyam tasyotpattikāraṇam ucyate vīryāntarāyasparśanendriyāvaraṇakṣayopaśame sati śeṣendriyasarvaghātispardhakodaye ca śarīranāmalābhāvaṣṭambhe ekendriyajātinamodayavaśartitāyāṃ ca satyāṃ sparśanam ekam indriyam āvirbhavati

itareṣām indriyāṇāṃ svāmitvapradarśanārtham āha

'ekaikam' iti vīpsāyāṃ dvitvam ekaikena vṛddhāni ekaikavṛddhāni kṛimim ādiṃ kṛtvā sparśanādhikārāt sparśanam ādiṃ kṛtvā ekaikavṛddhānīty abhisaṃbandhaḥ kriyate 'ādi' śabdaḥ pratyekaṃ parisamāpyate kṛmyādīnāṃ sparśanaṃ rasanādhikam pipīlikādīnāṃ sparśanarasane ghrāṇadhike bhramarādīnāṃ sparśanarasanaghrāṇāni cakṣuradhkāni manuṣyādīnāṃ tāny eva śrotrādhikānīti yathāsaṃkhyenābhisaṃbandho vyākhyātaḥ teṣāṃ niṣpattiḥ sparśnotpatyā vyākhyātā uttarottarasarvaghātispardhakodayena

evam eteṣu saṃsāriṣu dvibhedeṣu indriyabhedāt pañcavidheṣu ye pañcendriyās tadbhedasyānuktasya pratipādanārtham āha

mano vyākhyātam saha tena ye vartante te samanaskāḥ saṃjñina ity ucyante pāriśeṣyād itare saṃsāriṇaḥ prāṇino 'saṃjñina iti siddham nanu ca saṃjñina ity anenaiva gatārthatvāt samanaskā iti viśeṣaṇam anarthakam yato manovyāpāro hitāhitaprāptiparihāraparīkṣā saṃjñāpi saiveti naitad yuktam saṃjñāśabdārthavyabhicārāt saṃjñā nāmety ucyate tadvantaḥ saṃjñina iti sarveṣām atiprasaṅgaḥ saṃjñā jñānam iti cet sarveṣām prāṇiṇāṃ jñānātmakatvād atiprasaṅgaḥ āhārādiviṣayābhilāṣaḥ saṃjñeti cet tulyam tasmāt samanaskā ity ucyate evaṃ ca kṛtvā garbhāṇḍajamūrcchitasuṣuptyādyavasthāsu hitāhitaparīkṣābhāve' pi manaḥsaṃnidhānāt saṃjñitvam upapannaṃ bhavati

yadi hitāhitādiviṣayaparispandaḥ prāṇināṃ manaḥpraṇidhānapūrvakaḥ athābhinavaśarīragrahaṇaṃ pratyāgūrṇasya viśīrṇapūrvamūrter nirmanaskasya yatkarma tatkuta ity ucyate

vigraho dehaḥ vigrahārthā gatir vigrahagatiḥ athavā viruddho graho vigraho vyāghātaḥ karmādāne 'pi nokarmapudgalādānanirodha ity arthaḥ vigraheṇa gatir vigrahagatiḥ sarvaśarīraprarohaṇabījabhūtaṃ kārmaṇaṃ śarīraṃ karmety ucyate yogo vāṅmanasakāyavargaṇānimitta ātmapradeśaparispandaḥ karmaṇā kṛto yogaḥ karmayogo vigrahagatau bhavatīty arthaḥ tena karmādānaṃ deśāntarasaṃkramaś ca bhavati

āha jīvapudgalānāṃ gatim āskandatāṃ deśāntarasaṃkramaḥ kim ākāśapradeśakramavṛtyā bhavati utāviśeṣeṇety ata āha

lokamadhyād ārabhya ūrdhvam adhas tiryak ca ākāśāpradeśānāṃ kramasaṃniviṣṭānāṃ paṅktiḥ śreṇiḥ ity ucyate 'anu' śabdasyānupurvyeṇa vṛttiḥ śreṇer ānupūrvyeṇānuśreṇīti jīvānāṃ pudgalānāṃ ca gatir bhavatīty arthaḥ anadhikṛtānāṃ pudglānāṃ kathaṃ grahaṇam iti cet gatigrahaṇāt yadi jīvānām eva gatir iṣṭā syād gatigrahaṇam anarthakam adhikārāt tatsiddheḥ uttaratra jīvagrahaṇāc ca pudgalasaṃpratyayaḥ nanu candrādīnāṃ jyotiṣkāṇāṃ merupradakṣiṇākāle vidyādharādīnāṃ ca viśreṇigatir api dṛśyate tatra kim ucyate 'anuśreṇi gatiḥ' iti kāladeśaniyamo 'tra veditavyaḥ tatra kālaniyamas tāvaj jīvānāṃ maraṇakāle bhavāntarasaṃkrame muktānāṃ cordhvagamanakāle anuśreṇy eva gatiḥ deśaniyamo 'pi ūrdhvalokād adho gatiḥ adho lokād ūrdhvagatiḥ tiryaglokād adho gatir ūrdhvā vā tatrānuśreṇy eva pudgalānāṃ ca yā lokāntaprāpiṇī sā niyamād anuśreṇy eva itarā gatir bhajanīya

punar api gativiśeṣapratipattyartham āha

vigraho vyāghātaḥ kauṭilyam ity arthaḥ sa yasyāṃ na vidyate 'sāv avigrahā gatiḥ kasya jīvasya kīdṛśasya muktasya kathaṃ gamyate muktasyeti uttarasūtre saṃsārigrahaṇād iha muktasyeti vijñāyate nanu ca 'anuśreṇi gatiḥ' ity anenaiva śreṇyantarasaṃkramābhāvo vyākhyātaḥ nārtho 'nena pūrvasūtre viśreṇi gatir api kvacid astīti jñāpanārtham idaṃ vacanam nanu tatraiva deśakālaniyama uktaḥ na atas tatsiddheḥ

yady asaṅgasyātmano 'pratibandhena gatir ālokāntād avadhṛtakālā pratijñāyate sadehasya punar gatiḥ kiṃ pratibandhinī uta muktātmavad ity ata āha

kālāvadhāraṇārthaṃ 'prāk caturbhyaḥ' ity ucyate 'prāg' ity vacanaṃ maryādārtham caturthāt samayāt prag vigrahavatī gatir bhavati na caturthe iti kuta iti cet sarvotkṛṣṭavigrahanimittaniṣkuṭakṣetre utpitsuḥ prāṇī niṣkuṭakṣetrānupūrvyanuśreṇyabhāvādiṣu gatyabhāve niṣkuṭakṣetraprāpaṇanimittāṃ trivigrahāṃ gatim ārabhate nordhvām tathāvidhopapādakṣetrābhāvāt 'ca' śabdaḥ samuccayārthaḥ vigrahavatī cāvigrahā ceti

vigrahavatyā gateḥ kālo 'vadhṛtaḥ avigrahāyāḥ kiyān kāla ity ucyate

ekaḥ samayo yasyāḥ sā ekasamayā na vidyate vigraho yasyāḥ sā avigrahā gatimatāṃ hi jīvapudgalānām avyāghātenaikasamayikī gatir ālokāntād apīti

anādikarmabandhasaṃtatau mithyādarśanādipratyayavaśāt karmāṇyād adāno vigrahagatāv atyāhārakaḥ prasaktas tato niyamārtham idam ucyate

adhikārāt samayābhisaṃbandhaḥ 'vā' śabdo vikalpārthaḥ vikalpaś ca yathecchātisargaḥ ekaṃ vā dvau vā trīn vā samayān anāhārako bhavitīty arthaḥ trayāṇāṃ śarīrāṇāṃ ṣaṣṇām paryāptīnāṃ yogyapudgalagrahaṇam āhāraḥ tadabhāvād anāhārakaḥ karmādānaṃ hi nirantaraṃ kārmaṇaśarīrasadbhāve upapādakṣetraṃ prati ṛjvyāṃ gatau āhārakaḥ itareṣu triṣu samayeṣu anāhārakaḥ

evaṃ gacchato 'bhinavamūrtyantaranirvṛttiprakārapratipādanārtham āha

triṣu lokeṣūrdhvam adhas tiryak ca dehasya samantato mūrcchanaṃ saṃmūrcchanaṃ avayavaprakalpanam striyā udare śukraśoṇitayor garaṇaṃ miśraṇaṃ garbhaḥ mātrupabhuktāhāragaraṇād vā garbhaḥ upetya padyate 'sminn iti upapādaḥ devanārakotpattisthānaviśeṣasaṃjñā ete trayaḥ saṃsāriṇām jīvānāṃ janmaprakārāḥ śubhāśubhapariṇāmanimittakarmabhedavipākakṛtāḥ

athādhikṛtasya saṃsāraviṣayopabhogopalabdhyadhiṣṭhānapravaṇasya janmano yogivikalpā vaktavyā ity ata āha

ātmanaś caitanyaviśeṣapariṇāmaś cittam saha cittena vartata iti sacittaḥ śīta iti sparśaviśeṣaḥ śuklādivad ubhayavacanatvād tadyuktaṃ dravyam apy āha samyagvṛtaḥ saṃvṛtaḥ saṃvṛta iti durupalakṣyapradeśa ucyate saha itarair vartanta iti setarāḥ sapratipakṣā ity arthaḥ ke punar itare acittoṣṇavivṛtāḥ ubhayātmako miśraḥ sacittācittaḥ śītoṣṇaḥ saṃvṛtavivṛta iti 'ca' śabdaḥ samuccayārthaḥ miśrāś ca yonayo bhavantīti itarathā hi pūvoktānām eva viśeṣaṇaṃ syāt 'ekaśaḥ' iti vīpsārthaḥ tasya grahaṇaṃ kramamiśrapratipattyarthaṃ yathaivaṃ vijñāyeta sacittaś ca acittaś ca śītaś ca uṣṇaś ca saṃvṛtaś ca vivṛtaś ceti maivaṃ vijñāyi sacittaś ca śītaś cety ādi 'tadgrahaṇaṃ' janmaprakārapratinirdeśārtham teṣāṃ saṃmūrcchanādīnāṃ janmanāṃ yonaya iti ta ete nava yonayo veditavyāḥ yonijanmanor aviśeṣa iti cet na ādhārādheyabhedāt tadbhedaḥ ta ete sacittādayo yonaya ādhārāḥ ādheyā janmaprakārāḥ yataḥ sacittādiyonyadhiṣṭhāne ātmā saṃmūrcchanādinā janmanā śarīrāhārendriyādiyogyān pudgalān upādatte devanārakā acittayonayaḥ teṣām hi yonir upapādadeśapudgalapracayo 'cittaḥ garbhajā miśrayonayaḥ teṣāṃ hi mātur udare śukraśoṇitam acittam tadātmanā cittavatā miśraṇān miśrayoniḥ saṃmūrcchanajās trivikalpayonayaḥ kecit sacittayonayaḥ anye acittayonayaḥ apare miśrayonayaḥ sacittayonayaḥ sādhāraṇaśarīrāḥ kutaḥ paraparāśrayatvāt itare acittayonayo miśrayonayaś ca śītoṣṇayonayo devanārakāḥ teṣāṃ hi upapādasthānāni kānicic chītāni kānicid uṣṇānīti uṣṇayonayas taijaskāyikāḥ itare trivikalpayonayaḥ kecic chītayonayaḥ kecid uṣṇayonayaḥ apare miśrayonaya iti devanārakaikendriyāḥ saṃvṛtayonayaḥ vikalendriyā vivṛtayonayaḥ garbhajāḥ miśrayonayaḥ tadbhedāś caturaśītiśatasahasrasaṃkhyā āgamato veditavyāḥ uktaṃ ca ṇiccidaradhādu satta ya taru dasa viyaliṃdiesu chacceva suraṇirayatiriya cauro coddasa maṇue sadasahassā

evam etasmin navayonibhedasaṃkaṭe trividhajanmani sarvaprāṇabhṛtām aniyamena prasakte tadavadhāraṇārtham āha

yaj jālavatprāṇiparivaraṇaṃ vitatamāṃsaśoṇitaṃ taj jarāyuḥ yan nakhatvaksadṛśam upāttakāṭhinyaṃ śukraśoṇitaparivaraṇaṃ parimaṇḍalaṃ tad aṇḍam kiṃcit parivaraṇam antareṇa paripūrṇāvayavo yoninirgatamātra eva parispandādisāmarthyopetaḥ potaḥ jarāyau jātā jarāyujāḥ aṇḍe jātā aṇḍajāḥ jarāyujāś ca aṇḍajāś ca potāś ca jarāyujāṇḍajapotā garbhayonayaḥ

yady amīṣāṃ jarāyujāṇḍajapotānāṃ garbho 'vadhriyate athopapādaḥ keṣāṃ bhavatīty ata āha

devānāṃ nārakāṇām copapādo janma veditavyam

athānyeṣāṃ kiṃ janmety ata āha

garbhajebhya aupapādikebhyaś cānye śeṣāḥ saṃmūrcchanaṃ janmeti ete trayo 'pi yogā niyamārthāḥ ubhayato niyamaś ca draṣṭavyaḥ jarāyujāṇḍajapotānām eva garbhaḥ garbha eva ca jarāyujāṇḍajapotānām devanārakāṇām evopapādaḥ upapāda eva ca devanārakāṇām śeṣāṇām eva saṃmūrcchanam saṃmūrcchanam eva śeṣāṇām iti

teṣāṃ punaḥ saṃsāriṇāṃ trividhajanmanāmāhitabahuvikalpanavayonibhedānāṃ śubhāśubhanāmakarmavipākanirvartitāni bandhaphalānubhavanādhiṣṭhānāni śarīrāṇi kānīty ata āha

viśiṣṭanāmakarmodayāpāditavṛttīni śīryanta iti śarīrāṇi audārikādiprakṛtiviśeṣodayaprāptavṛttīni audārikādīni udāraṃ sthūlam udāre bhavaṃ udāraṃ prayojanam asyeti vā audārikam aṣṭaguṇaiśvaryayogād ekānekāṇumahac charīravidhikaraṇaṃ vikriyā sā prayojanam asyeti vaikriyikam sūkṣmapadārthanirjñānārtham asaṃyamaparijihīrṣayā vā pramattasaṃyatenāhriyate nirvartyate tad ity āhārakam yat tejor nimittaṃ tejasi vā bhavaṃ tat taijasam karmaṇāṃ kāryaṃ kārmaṇam sarveṣāṃ karmanimittattve 'pi rūḍhivaśāt viśiṣṭaviṣaye vṛttir avaseyā

yathaudārikasyendriyair upalabdhis tathetareṣāṃ kasmān na bhavatīty ata āha

'para' śabdasyānekārthavṛttitve 'pi vivakṣāto vyavasthārthagatiḥ pṛthagbhūtānāṃ śarīrāṇāṃ sūkṣmaguṇena vīpsānirdeśaḥ kriyate paramparam iti audārikaṃ sthūlam tataḥ sūkṣmaṃ vaikriyikam tataḥ sūkṣmam āhārakaṃ tataḥ sūkṣmaṃ taijasam taijasāt kārmaṇaṃ sūkṣmam iti

yadi paramparaṃ sūkṣmam pradeśato 'pi nyūnaṃ paramparaṃ hīnam iti viparītapratipattinivṛttyartham āha

pradiśyanta iti pradeśāḥ paramāṇavaḥ saṃkhyām atīto 'saṃkhyeyaḥ asaṃkhyeyo guṇo 'sya tad idam asaṃkhyeyaguṇam kutaḥ pradeśataḥ nāvagāhataḥ paramparam ity anuvṛtter ā kārmaṇāt prasaṅge tannivṛttyartham āha prāktaijasād iti audārikād asaṃkhyeyaguṇapradeśaṃ vaikriyikam vaikriyikād asaṃkhyeyaguṇapradeśam āhārakam iti ko guṇakāraḥ palyopamāsaṃkhyeyabhāgaḥ yady evam paramparaṃ mahāparimāṇaṃ prāpnoti naivam bandhaviśeṣāt parimāṇabhedābhāvas tūlanicayāyaḥpiṇḍavat

athottarayoḥ kiṃ samapradeśatvam utāsti kaścid viśeṣa ity ata āha

pradeśata ity anuvartate tenaivam abhisaṃbandhaḥ kriyate āhārakāt taijasaṃ pradeśato 'nantaguṇam taijasāt kārmaṇaṃ pradeśato 'nantaguṇam iti ko guṇakāraḥ abhavyānām anantaguṇaḥ siddhānām anantabhāgaḥ

tatraitat syāc chalyakavanmūrtimaddravyopacitatvāt saṃsāriṇo jīvasyābhipretagatinirodhaprasaṅga iti tan na kiṃ kāraṇam yasmād ubhe apy ete

mūrtimato mūrtyantareṇa vyāghātaḥ pratīghātaḥ sa nāsty anayor ity apratīghāte sūkṣmapariṇāmāt ayaḥpiṇḍe tejo 'nupraveśavattaijasakārmaṇayor nāsti vajrapaṭalādiṣu vyāghātaḥ nanu ca vaikriyikāhārakayor api nāsti pratīghātaḥ sarvatrāpratīghāto 'tra vivakṣitaḥ yathā taijasakārmaṇāyor ā lokāntāt sarvatra nāsti pratīghātaḥ na tathā vaikriyikāhārakayoḥ

āha kim etāvān eva viśeṣa uta kaścid anyo 'apy astīty āha

'ca' śabdo vikalpārthaḥ anādisaṃbandhe sādisaṃbandhe ceti kāryakāraṇabhāvasaṃtatyā anādisaṃbandhe viśeṣāpekṣayā sādisaṃbandhe ca bījavṛkṣavat yathaudārikavaikriyikāhārakāṇi jīvasya kadācit kāni na tathā taijasakārmaṇe nityasaṃbandhinī hi te ā saṃsārakṣayāt

ta ete taijasakārmaṇe kiṃ kasyacid eva bhavata utāviśeṣeṇety ata āha

'sarva' śabdo niravaśeṣavācī niravaśeṣasya saṃsāriṇo jīvasya te dve api śarīre bhavata ity arhaḥ

aviśeṣābhidhānāt tair audārikādibhiḥ sarvasya saṃsāriṇo yaugapadyena saṃbandhaprasaṃge saṃbhaviśarīrapradarśanārtham idam ucyate

'tad' śabdaḥ prakṛtataijasakārmaṇapratinirdeśārthaḥ te taijasakārmaṇe ādir yeṣāṃ tāni tadādini bhājyāni vikalpyāni ā kutaḥ āṃ caturbhyaḥ yugapad ekasyātmanaḥ kasyācid dve taijasakārmaṇe aparasya trīṇi audārikataijasakārmaṇāni vaikriyikataijasakārmaṇāni vā anyasya catvāri audārikāhārakataijasakārmaṇānīti vibhāgaḥ kriyate

punar api teṣāṃ viśeṣapratipattyartham āha

ante bhavam antyam kiṃ tat kārmaṇam indriyapraṇālikayā śabdādīnām upalabdhir upabhogaḥ tadabhāvān nirupabhogam vigrahagatau satyām api indriyalabdhau dravyendriyanirvṛttyabhāvāc chabdādyupabhogābhāva iti nanu taijasam api nirupabhogam tatra kim ucyate nirupabhogam antyam iti taijasaṃ śarīraṃ yoganimittam api na bhavati tato 'syopabhogavicāre 'nadhikāraḥ

evaṃ tatroktalakṣaṇeṣu janmasu amūni śarīrāṇi prādurbhāvam āpadyamānāni kim aviśeṣeṇa bhavanti uta kaścid asti prativiśeṣa ity ata āha

sūtrakramāpekṣayā ādau bhavam ādyam audārikam ity arthaḥ yad garbhajaṃ yac ca saṃmūrcchanajaṃ tat sarvam audārikaṃ draṣṭavyam

tadantaraṃ yan nirdiṣṭaṃ tat kasmin janmanīty ata āha

upapāde bhavam aupapādikam tatsarvaṃ vaikriyikaṃ veditavyam

yady aupapādikaṃ vaikriyikam anaupapādikasya vaikriyikatvābhāva ity ata āha

'ca' śabdena vaikriyikam abhisaṃbadhyate tapoviśeṣād ṛddhiprāptir labdhiḥ labdhiḥ pratyayaḥ kāraṇam asya labdhipratyayam vaikriyikaṃ labdhipratyayaṃ ca bhavatīty abhisaṃbadhyate

kim etad eva labdhyapekṣam utānyad apy astīty ata āha

'api' śabdena labdhipratyayam abhisaṃbadhyate taijasam api labdhipratyayaṃ bhavatīti

vaikriyikānantaraṃ yad upadiṣṭaṃ tasya svarūpanirdhāraṇārthaṃ svāminirdeśārthaṃ cāha

śubhakāraṇatvāc chubhavyapadeśaḥ śubhakarmaṇa āhārakakāyayogasya kāraṇatvāc chubham ity ucyate annasya prāṇavyapadeśavat viśuddhakāryatvād viśuddhavyapadeśaḥ viśuddhasya puṇyakarmaṇaḥ aśabalasya niravadyasya kāryatvād viśuddham ity ucyate tantūnāṃ kārpāsavyapadeśavat ubhayato vyāghātābhāvād avyāghāti na hy āhārakaśarīreṇānyasya vyāghātaḥ nāpy anyenāhārakasyeti tasya prayojanasamucyārthaḥ 'ca' śabdaḥ kriyate tad yathā kadācil labdhiviśeṣasadbhāvajñāpanārthaṃ kadācit sūkṣmapadārthanirdhāraṇārthaṃ saṃyamaparipālanārthaṃ ca āhārakam iti prāguktasya pratyāmnāyaḥ yadāhārakaśarīraṃ nirvartayitum ārabhate tadā pramatto bhavatīti 'pramattasaṃyatasya' ity ucyate iṣṭato 'vadhāraṇārthaṃ 'eva'kāropādānam yathaivaṃ vijñāyeta pramattasaṃyatasyaivāhārakaṃ nānyasyeti maivaṃ vijñāyi pramattasaṃyatasyāhārakam eveti mā bhūd audārikādinivṛttir iti

evaṃ vibhaktāni śarīrāṇi bibhratāṃ saṃsāriṇāṃ pratigati kiṃ triliṅgasaṃnidhānaṃ uta liṅganiyamaḥ kaścid astīty ata āha

nārakāṇi vakṣyante narakeṣu bhavā nārakāḥ saṃmūrcchanaṃ saṃmūrcchaḥ sa yeṣām asti te saṃmūrcchinaḥ nārakāś ca saṃmūrcchinaś ca nārakasaṃmūrcchinaḥ cāritramohavikalpanokaṣāyabhedasya napuṃsakavedasyāśubhanāmnaś codayān na striyo na pumāṃsa iti napuṃsakāni bhavanti nārakasaṃmūrcchino napuṃsakāny eveti niyamaḥ tatra hi strīpuṃsaviṣayamanojñaśabdagandharūparasasparśasaṃbandhanimittā svalpāpi sukhamātrā nāsti

yady evam avaghriyate arthād āpannam etad uktebhyo 'nye saṃsāriṇas triliṅgā iti yatrātyantaṃ napuṃsakaliṅgasyābhāvas tatpratipādanārtham āha

straiṇaṃ pauṃsnaṃ ca yan niratiśayasukhaṃ śubhagatināmodayāpekṣaṃ tad devā anubhavantīti na teṣu napuṃsakāni santi

athetare kiyal liṅgā ity ata āha

trayo vedā yeṣāṃ te trivedāḥ ke punas te vedāḥ strītvaṃ puṃstvaṃ napuṃsakatvam iti kathaṃ teṣāṃ siddhiḥ vedyata iti vedaḥ liṃgam ity arthaḥ tad dvividhaṃ dravyaliṃgaṃ bhāvaliṃgaṃ ceti dravyaliṃgaṃ yonimehanādi nāmakarmodayanirvartitam nokaṣāyodayāpāditavṛtti bhāvaliṃgam strīvedodayāt styāyastyasyāṃ garbha iti strī puṃvedodayāt sūte janayatyapatyam iti pumān napuṃsakavedodayāt tadubhayaśaktivikalaṃ napuṃsakam rūḍhiśabdāś caite rūḍhiṣu ca kriyā vyutpattyarthaṃ ca yathā gacchatīti gaur iti itarathā hi garbhadhāraṇādikriyāprādhānye bālavṛddhānāṃ tiryaṅmanuṣyāṇāṃ devānāṃ kārmaṇakāyayogasthānāṃ ca tadabhāvāt strītvādivyapadeśo na syāt ta ete trayo vedāḥ śeṣāṇāṃ garbhajānāṃ bhavanti

ya ime janmayoniśarīraliṃgasaṃbandhāhitaviśeṣāḥ prāṇino nirdiśyante devādayo vicitradharmādharmavaśīkṛtāś catasṛṣu gatiṣu śarīrāṇi dhārayantas te kiṃ yathākālam upabhuktāyuṣo mūrtyantarāṇy āskandanti utāyathākālam apīty ata āha

aupapādikā vyākhyātā devanārakā iti caramaśabdo 'ntyavācī uttama utkṛṣṭaḥ carama uttamo deho yeṣāṃ te caramottamadehāḥ parītasaṃsārās tajjanmanirvāṇārhā ity arthaḥ asaṃkhyeyam atītasaṃkhyānam upamāpramāṇena palyādinā gamyam āyur yeṣāṃ ta ime asaṃkhyeyavarṣāyuṣas tiryaṅmanuṣyā uttarakurvādiṣu prasūtāḥ aupapādikāś ca caramottamadehāś ca asaṃkhyeyavarṣāyuṣaś ca aupapādikacaramottamadehāsaṃkhyeyavarṣāyuṣaḥ bāhyasyopaghātanimittasya viṣaśastrādeḥ sati saṃnidhāne hrasvaṃ bhavatīty apavartyam apavartyam āyur yeṣāṃ ta ime apavartyāyuṣaḥ na apavartyāyuṣaḥ anapavartyāyuṣaḥ na hy eṣām aupapādikādīnāṃ bāhyanimittavaśād āyur apavartyate ity ayaṃ niyamaḥ itareṣām aniyamaḥ caramasya dehasyotkṛṣṭatvapradarśanārtham uttamagrahaṇaṃ nārthāntaraviśeṣo 'sti 'caramadehā' iti vā pāṭhaḥ

'bhavapratyayo 'vadhir devanārakāṇām' ity evam ādiṣu nārakāḥ śrutās tataḥ pṛcchati ke te nārakā iti tatpratipādanārthaṃ tadadhikaraṇanirdeśaḥ kriyate

ratnaṃ ca śarkarā ca vālukā ca paṅkaś ca dhūmaś ca tamaś ca mahātamaś ca ratnaśarkarāvālukāpaṅkadhūmatamomahātamāṃsi 'prabhā' śabdaḥ pratyekaṃ parisamāpyate sāhacaryāt tācchabdyam citrādiratnaprabhāsahacaritā bhūmiḥ ratnaprabhā śarkarāprabhāsahacaritā bhūmiḥ śarkarāprabhā vālukāprabhāsahacaritā bhūmir vālukāprabhā paṅkaprabhāsahacaritā bhūmiḥ paṅkaprabhā dhūmaprabhāsahacaritā bhūmir dhūmaprabhā tamaḥprabhāsahacaritā bhūmis tamaḥprabhā mahātamaḥprabhāsahacaritā bhūmir mahātamaḥprabhā iti etāḥ saṃjñā anenopāyena vyutpādyante 'bhūmi' grahaṇam adhikaraṇaviśeṣapratipattyartham yathā svargapaṭalāni bhūmim anāśritya vyavasthitāni na tathā nārakāvāsāḥ kiṃ tarhi bhūmim āśritā iti āsāṃ bhūmīnāmālmbananirjñānārthaṃ ghanāmbuvātādigrahaṇaṃ kriyate ghanāmbu ca vātaś ca ākāśaṃ ca ghanāmbuvātākāśāni tani pratiṣṭhā āśrayo yāsāṃ tā ghanāmbuvātākāśapratiṣṭhāḥ sarvā etā bhūmayo ghanodadhivalayapratiṣṭhāḥ ghanodadhivalayaṃ ghanavātavalayapratiṣṭham ghanavātavalayaṃ tanuvātavalayapratiṣṭham tanuvātavalayam ākāśapratiṣṭham ākāśam ātmapratiṣṭham tasyaivādhārādheyatvāt trīṇy apy etāni valayāni pratyekaṃ viṃśatiyojanasahasrabāhulyāni 'sapta' grhaṇaṃ saṃkhyāntaranivṛttyartham sapta bhūmayo nāṣṭau na nava ceti 'adho 'dhaḥ' vacanaṃ tiryakpracayanivṛttyartham

kiṃ tā bhūmayo nārakāṇāṃ sarvatrāvāsā āhosvit kvacit kvacid iti prannirdhāraṇārtham āha

tāsu ratnaprabhādiṣu bhūmiṣu narakāṇy anena saṃkhyāyante yathākramam ratnaprabhāyāṃ triṃśannarakaśatasahasrāṇi śarkarāprabhāyāṃ pañcaviṃśatir narakaśatasahasrāṇi vālukāprabhāyāṃ pañcadaśa narakaśatasahasrāṇi paṃkaprabhāyāṃ daśa narakaśatasahasrāṇi dhūmaprabhāyāṃ trīṇi narakaśatasahasrāṇi tamaḥprabhāyāṃ pañconam ekaṃ narakaśatasahasraṃ mahātamaḥprabhāyāṃ pañca narakāni ratnaprabhāyāṃ narakaprastārās trayodaśa tato 'dha ā saptamyā dvau dvau narakaprastārau hīnau itaro viśeṣo lokānuyogato veditavyaḥ

atha tāsu bhūmiṣu nārakānāṃ kaḥ prativiśeṣa ity ata āha

leśyādayo vyākhyātārthāḥ aśubhatarā iti prakarṣanirdeśaḥ tiryaggativiṣayāśubhaleśyādyapekṣayā adho 'dhaḥ svagatyapekṣayā ca veditavyaḥ 'nitya' śabda ābhīkṣṇyavacanaḥ nityam aśubhatarā leśyādayo yeṣāṃ te nityāśubhataraleśyāpariṇāmadehavedanāvikriyā nārakāḥ prathamādvitīyayoḥ kāpotī leśyā tṛtīyāyam upariṣṭāt kāpotī adho nīlā caturthyāṃ nīlā pañcamyām upari nīlā adhaḥ kṛṣṇā ṣaṣṭhyāṃ kṛṣṇā saptamyāṃ paramakṛṣṇā svāyuḥpramāṇāvadhṛtā dravyaleśyā uktāḥ bhāvaleśyāsu antarmuhūrtaparivartinyaḥ pariṇāmāḥ sparśarasagandhavarṇaśabdāḥ kṣetraviśeṣanimittavaśād atiduḥkhahetavo 'śubhatarā dehāś ca teṣām aśubhanāmakarmodayād atyantāśubhatarā vikṛtākṛtayo huṇḍasaṃsthānā durdarśanāḥ teṣām utsedhaḥ prathamāyāṃ sapta dhanūṃṣi trayo hastāḥ ṣaḍaṃgulayaḥ adho 'dho dviguṇadviguṇa utsedhaḥ abhyantarāsadvedyodaye sati anādipāriṇāmikaśītoṣṇabāhyanimittajanitā atitīvrā vedanā bhavanti nārakāṇām prathamādvitīyātṛtīyācaturthīṣu uṣṇavedanāny eva narakāṇi pañcamyām upari uṣṇavedene dve narakaśatasahasre adhaḥ śītavedanam ekaṃ śatasahasram ṣaṣṭhīsaptamyoḥ śītavedanāny eva śubhaṃ vikariṣyāma iti aśubhataram eva vikurvanti sukhahetūn utpādayāma iti duḥkhahetūn evotpādayanti ta ete bhāvā adho 'dho 'śutarā veditavyāḥ

kim eteṣāṃ nārakāṇāṃ śītoṣṇajanitam eva duḥkham utānyathāpi bhavatīty ata āha

kathaṃ parasparodīrītaduḥkhatvam nārakāḥ bhavapratyayenāvadhinā mithyādarśanodayād vibhaṅgavyapadeśabhājā ca dūrād eva duḥkhahetūn avagamyotpannaduḥkhāḥ pratyāsattau parasparālokanāc ca prajvalitakopāgnayaḥ pūrvabhavānusmaraṇāc cātitīvrānubaddhavairāś ca śvaśṛgālādivatsvābhighāte pravartamānāḥ svavikriyākṛtāsivāsīparaśubhiṇḍimālaśaktitomarakuntāyodhanādibhir āyudhaiḥ svakaracaraṇadaśanaiś ca chedanabhedanatakṣaṇadaṃśanādibhiḥ parasparasyātitīvraṃ duḥkham utpādayanti

kim etāvān eva duḥkhotpattikāraṇaprakāra utānyo 'pi kaścid astīty ata āha

devagatināmakarmavikalpasyāsuratvasaṃvartanasya karmaṇa udayād asyanti parān ity asurāḥ pūrvajanmani bhāvitenātitīvreṇa saṃkleśapariṇāmena yad upārjitaṃ pāpakarma tasyodayāt satataṃ kliṣṭāḥ saṃkliṣṭāḥ saṃvikliṣṭā asurāḥ saṃvikliṣṭāsurāḥ saṃkliṣṭā iti viśeṣaṇān na sarve asurā nārakāṇāṃ duḥkham utpādayanti kiṃ tarhi ambāvarīṣādaya eva kecaneti avadhipradarśanārthaṃ 'prak caturthyāḥ' iti viśeṣaṇam upari tisṛṣu pṛthvīṣu saṃkliṣṭāsurā bādhāhetavo nātaḥ param iti pradarśanārtham 'ca' śabdaḥ pūrvoktaduḥkhahetusamuccayārthaḥ sutatptāyorasapāyananiṣṭaptāyastambhāliṅganakūṭaśālmalyārohaṇāvataraṇāyoghanābhighātavāsīkṣuratakṣaṇakṣārataptatailāvasecanāyaḥkumbhīpākāmbarīṣabharjanavaitaraṇīmajjanayantraniṣpīḍanādibhir nārakāṇāṃ duḥkham utpādayanti evaṃ chedanabhedanādibhiḥ śakalīkṛtamūrtīnām api teṣāṃ na maraṇam akāle bhavati kutaḥ anapavartyāyuṣkatvāt

yady evaṃ tad eva tāvad ucyatāṃ nārakāṇām āyuḥparimāṇam ity ata āha

yathākramam ity anuvartate teṣu narakeṣu bhūmikrameṇa yathāsaṃkhyam ekādayaḥ sthitayo 'bhisaṃbadhyante ratnaprabhāyām utkṛṣṭā sthitir ekasāgaropamā śarkarāprabhāyāṃ trisāgaropamā vālukāprabhāyāṃ saptasāgaropamā paṃkaḥprabhāyāṃ daśasāgaropamā dhūmaprabhāyāṃ saptadaśasāgaropamā tamaḥprabhāyāṃ dvāviṃśatisāgaropamā mahātamaḥprabhāyāṃ trayāstriṃśatsāgaropamā iti parā utkṛṣṭety arthaḥ 'sattvānām' iti vacanaṃ bhūminivṛttyartham bhūmiṣu sattvānām iyaṃ sthitiḥ na bhūmīnām iti

uktaḥ saptabhūmivistīrṇo 'dholokaḥ idānīṃ tiryagloko vaktavyaḥ kathaṃ punas tiryaglokaḥ yatho 'saṃkhyeyāḥ svayaṃbhūramaṇaparyantās tiryakpracayaviśeṣeṇāvasthitā dvīpasamudrās tatas tiryagloka iti ke punas tiryagvyavasthitā ity ata āha

jambūdvīpādayo dvīpāḥ lavaṇodādayaḥ samudrāḥ yāni loke śubhāni nāmāni tan nāmānas te tad yathā jambūdvīpo dvīpaḥ lavaṇodaḥ samudraḥ dhātakīkhaṇḍo dvīpaḥ kālodaḥ samudraḥ puṣkaravaro dvīpaḥ puṣkaravaraḥ samudraḥ vāruṇīvaro dvīpaḥ vāruṇīvaraḥ samudraḥ kṣīravaro dvīpaḥ kṣīravaraḥ samudraḥ ghṛtavaro dvīpaḥ ghṛtavaraḥ samudraḥ ikṣuvaro dvīpaḥ ikṣuvaraḥ samudraḥ nandīśvaravaro dvīpaḥ nandīśvaravaraḥ samudraḥ aruṇavaro dvīpaḥ aruṇavaraḥ samudraḥ ity evam asaṃkhyeyā dvīpasamudrāḥ svayambhūramaṇaparyantā veditavyāḥ

amīṣāṃ viṣkambhasaṃniveśasaṃsthānaviśeṣapratipattyartham āha

dvir dvir iti vīpsābhyāvṛttivacanaṃ viṣkambhadviguṇatvavyārpttham ādyasya dvīpasya yo viṣkambhaḥ tad dviguṇaviṣkambho lavaṇajaladhiḥ taddviguṇaviṣkambho dvitīyo dvīpaḥ taddviguṇaviṣkambho dvitīyo jaladhir iti dvir dvir viṣkambho yeṣāṃ te dvir dvir viṣkambhāḥ pūrvapūrvaparikṣepivacanaṃ grāmanagarādivadviniveśo mā vijñāyīti valayākṛtivacanaṃ caturasrādisaṃsthānāntaranivṛttyartham

atrāha jambūdvīpasya pradeśasaṃsthānaviṣkambhā vaktavyās tanmūlatvāditaraviṣkambhādivijñānasyety ucyate

teṣāṃ madhye tanmadhye keṣām pūrvoktānāṃ dvīpasamudrāṇām nābhir iva nābhiḥ merur nābhir yasya sa merunābhiḥ vṛtta ādityamaṇḍalopamānaḥ śatānāṃ sahasraṃ śatasahasram yojanānāṃ śatasahasraṃ yojanaśatasahasraṃ yojanaśatasahasraṃ viṣkambho yasya so 'yaṃ yojanaśatasahasraviṣkambhaḥ ko 'sau jambūdvīpaḥ kathaṃ jambūdvīpaḥ jambūvṛkṣopalakṣitatvāt uttarakurūṇāṃ madhye jambūvṛkṣo 'nādinidhanaḥ pṛthivīpariṇāmo 'kṛtrimaḥ saparivāras tadupalakṣito 'yaṃ dvīpaḥ

tatra jambūdvīpe ṣaḍabhiḥ kalaparvatair vibhaktāni sapta kṣetrāṇi kāni tānīty ata āha

bharatādayaḥ saṃjñā anādikālapravṛttā amimittāḥ tatra bharatavarṣaḥ kva saṃniviṣṭaḥ dakṣiṇadigbhāge himavato 'dres trayāṇāṃ samudrāṇāṃ madhye āropitacāpākāro bharatavarsaḥ vijayārddhena gaṅgāsindhubhyāṃ ca vibhaktaḥ sa ṣaṭkhaṇḍaḥ kṣudrahimavantam uttareṇa dakṣiṇena mahāhimavantaṃ pūrvāparasamudrayor madhye haimavatavarṣaḥ niṣadhasya dakṣiṇato mahāhimavata uttarataḥ pūrvāparasamudrayor antarāle harivarṣaḥ niṣadhasyottarān nīlato dakṣiṇataḥ pūrvāparasamudrayor antare videhasya saṃniveśo draṣṭavyaḥ nīlata uttarād rukmiṇo dakṣiṇāt pūrvāparasamudrayor madhye ramyakavarṣaḥ rukmiṇa uttarāc chikhariṇo dakṣiṇāt pūrvāparasamudrayor madhye saṃniveśī hairaṇyavatavarṣaḥ śikhariṇa uttaratas trayāṇāṃ samudrāṇāṃ madhye airāvatavarṣaḥ vijayārddhena raktāraktodābhyāṃ ca vibhaktaḥ sa ṣaṭkhaṇḍaḥ

ṣaṭ kulaparvatā ity uktaṃ ke punas te kathaṃ vā vyavasthitā ity ata āha

tāni kṣetrāṇi vibhajanta ity evaṃ śīlās tadvibhājinaḥ pūrvāparāyatā iti pūrvāparakoṭibhyāṃ lavaṇajaladhisparśina ity arthaḥ himavadādayo 'nādikālapravṛttā animittasaṃjñā varṣavibhāgahetutvād varṣadharaparvatā ity ucyante tatra kva himavān bharatasya haimavatasya ca sīmani vyavasthitaḥ kṣudrahimavān yojanaśatocchrāyaḥ haimavatasya harivarṣasya ca vibhāgakaro mahāhimavān dviyojanaśatocchrāyaḥ videhasya dakṣiṇato harivarṣasyottarato niṣadho nāma parvataś caturyojanaśatocchrāyaḥ uttare trayo 'pi parvatāḥ svavarṣavibhājino vyākhyātāḥ ucchrāyaś ca teṣāṃ catvāri dve ekaṃ ca yojanaśataṃ veditavyam sarveṣāṃ parvatānām ucchrāyasya caturbhāgo 'vagāhaḥ

tesāṃ varṇaviśeṣapratipattyartham āha

ta ete himavadādayaḥ parvatā hemādimayā viditavyā yathākramam hemamayo himavān cīnapaṭṭavarṇaḥ arjunamayo mahāhimavān śuklavarṇaḥ tapanīyamayo niṣadhas taruṇādityavarṇaḥ vaiḍūryamayo nīlo māyuragrīvābhaḥ rajatamayo rukmī śuklaḥ hemamayaḥ śikharo cīnapaṭṭavarṇaḥ

punar api tadviśeṣaṇārtham āha

nānavarṇaprabhādiguṇopetair maṇibhir vicitrāṇi pārśvāṇi yeṣāṃ te maṇivicitrapārśvāḥ aniṣṭasaṃsthānasya nivṛttyartham uparyādivacanaṃ kriyate 'ca' śabdo madhyasamuccayārthaḥ ya eṣāṃ mūle vistāraḥ sa upari madhye ca tulyaḥ

teṣāṃ madhye labdhāspadā hradā ucyante

padmo mahāpadmas tigiñchaḥ kesarī mahāpuṇḍarīkaḥ puṇḍarīka iti teṣāṃ himavadādīnām upari yathākramam ete hradā veditavyāḥ

tatrādyasya saṃsthānaviśeṣapratipattyartham āha

prākpratyag yojanasahasrāyām udagavāk pañcayojanaśatavistāro vajramayatalo vividhamaṇikanakavicitritataṭaḥ padmanāmāhradaḥ

tasyāvagāhapraklṛptyartham idam ucyate

avagāho 'dhaḥ praveśo nimnatā daśayojanāny avagāho 'sya daśayojanāvagāhaḥ

tanmadye kim

yojanapramāṇam yojanam krośāyāmapatratvāt krośadvayaviṣkambhakarṇikatvāc ca yojanāyāmaviṣkambham jalatalāt krośadvayocchrāyanālaṃ yāvad bahulapatrapracayaṃ puṣkaram avagantavyam

itareṣāṃ hradānāṃ puṣkarāṇāṃ cāyāmādinirjñānārtham āha

sa ca tacca te tayor dviguṇā dviguṇās taddviguṇadviguṇā iti dvitvaṃ vyāptijñāpanārtham kena dviguṇāḥ āyāmādinā padmahradasya dviguṇāyāmaviṣkambhāvagāho mahāpadmo hradaḥ tasya dviguṇāyāmaviṣkambhāvagāhas tigiñcho hradaḥ puṣkarāṇi ca kiṃ dviguṇāni dviguṇānīty abhisaṃbadhyate

tannivāsinīnāṃ devīnāṃ saṃjñājīvitaparivārapratipādanārtham āha

teṣu puṣkareṣu karṇikāmadhyadeśaniveśinaḥ śaradvimalapūrṇacandradyutiharāḥ krośāyāmāḥ krośārddhaviṣkambhā deśonakrośotsedāḥ prāsādāḥ teṣu nivasantīty evaṃ śīlās tannivāsinyaḥ devyaḥ śrīhrīdhṛtikīrtibuddhilakṣmīsaṃjñikās teṣu padmādiṣu yathākramaṃ veditavyāḥ 'palyopamasthitayaḥ' ity anenāyuṣaḥ pramānam uktam samāne sthāne bhavāḥ sāmānikāḥ sāmānikāś ca pariṣadaś ca sāmānikapariṣadaḥ saha sāmānikapariṣadbhir vartanta iti sasāmānikapariṣatkāḥ tasya padmasya parivārapadmeṣu prāsādānām upari sāmānikāḥ pariṣadaś ca vasanti

yakābhiḥ saridbhis tāni kṣetrāṇi pravibhaktāni tā ucyate

sarito na vāpyaḥ tāḥ kim antarā uta samīpā iti āha tanmadhyagāḥ teṣāṃ kṣetrāṇām madhyaṃ tanmadhyam tanmadhyaṃ tanmadhyena vā gacchatīti tanmadhyagāḥ ekatra sarvāsāṃ prasaṃganivṛttyarthaṃ digviśeṣapratipattyarthaṃ cāha

dvayor dvayoḥ saritor ekaikaṃ kṣetraṃ viṣaya iti vākyaśeṣābhisaṃbandhād ekatra sarvāsāṃ prasaṃganivṛttiḥ kṛtā 'pūvaḥ pūrvagāḥ' iti vacanaṃ digviśeṣapratipattyartham tatra pūrvā yāḥ saritas tāḥ pūrvagāḥ pūrvajaladhiṃ gacchantīti pūrvagāḥ kim apekṣaṃ pūrvatvam sūtranirdeśāpekṣam yady evaṃ gaṅgāsindhvādayaḥ sapta pūvagā iti prāptam naiṣa doṣaḥ dvayor dvayor ity abhisaṃbandhāt dvayor dvayoḥ pūvāḥ pūrvagā iti veditavyāḥ

itarāsaṃ digvibhāgapratipattyartham āha

dvayor dvayor yā avaśiṣṭās tā aparagāḥ pratyetavyāḥ aparasamudraṃ gacchantīty aparagāḥ tatra padmahradaprabhavā pūrvatoraṇadvāranirgatā gaṅgā aparatoraṇadvāranirgatā sindhuḥ udīcyatoraṇadvāranirgatā rohitāsyā mahāpadmahradaprabhavā avācyatoraṇadvāranirgatā rohit udīcyatoraṇadvāranirgatā harikāntā tigiñchahradaprabhavā dakṣiṇatoraṇadvāranirgatā harit udīcyatoraṇadvāranirgatā sītodā kesarihradaprabhavā avācyatoraṇadvāranirgatā sītā udīcyatoraṇadvāranirgatā narakāntā mahāpuṇḍarīkahradaprabhavā dakṣiṇatoraṇadvāranirgatā nārī udīcyatoraṇadvāranirgatā rūpyakūlā puṇḍarīkahradaprabhavā avācyatoraṇadvāranirgatā suvarṇakūlā pūrvatoraṇadvāranirgatā raktā pratīcyatoraṇadvāranirgatā raktodā

tāsāṃ parivārapratipādanārtham āha

kim arthaṃ 'gaṅgāsindhvādi' grahanaṃ kriyate nadīgrahṇārtham prakṛtās tā abhisaṃbhadyante naivaṃ śaṃkyam 'anantarasya vidhir vā bhavati pratiṣedho vā' iti aparagāṇām eva grahaṇaṃ syāt gaṅgādigrahaṇam evāstīti cet pūrvagāṇām eva grahaṇaṃ syāt ata ubhayīnāṃ grahaṇārthaṃ 'gaṅgāsindhvādi' grahaṇaṃ kriyate 'nadī' grahaṇaṃ dviguṇā dviguṇā ity abhisaṃbandhārtham gaṅgā caturdaśanadīsahasraparivṛtā sindhur api evam uttarā api nadyaḥ pratikṣetraṃ taddviguṇadviguṇā bhavanti ā videhāntāt tata uttarā arddhārddhahīnāḥ

uktānāṃ kṣetrāṇāṃ viṣkambhapratipattyartham āha

ṣaḍadhikā viṃśatiḥ ṣaḍviṃśatiḥ ṣaḍviṃśatir adhikā yeṣu tāni ṣaḍviṃśāni ṣaḍviṃśāni pañcayojanaśatāni vistāro yasya ṣaḍviṃśapañcayojanaśatavistāro bharataḥ kim etāvān eva na ity āha ṣaṭ caikonaviṃśatibhāgā yojanasya vistāro 'syety abhisaṃbadhyate

itareṣāṃ viṣkambhaviśeṣapratipattyartham āha

tato bharatād dviguṇo dviguṇo vistāro yesāṃ ta ime taddviguṇadviguṇavistārāḥ ke te varṣadharavarṣāḥ kiṃ sarve na ity āha videhāntā iti

athottareṣāṃ katham ity ata āha

uttarā airāvatādayo nīlāntā bharatādibhir dakṣiṇais tulyā draṣṭavyāḥ atītasya sarvasyāyaṃ viśeṣo veditavyaḥ tena hradapuṣkarādīnāṃ tulyatā yojyā

attrāha uktesu bharatādiṣu kṣetreṣu manuṣyāṇāṃ kiṃ tulyo 'nubhavādiḥ āho svid asti kaścit prativiśeṣa ity atrocyate

vṛddhiś ca hrāsaś ca vṛddhihrāsau kābhyām ṣaṭsamayābhyām utsarpiṇyavasarpiṇībhyām kayoḥ bharatairāvatayoḥ na tayoḥ kṣetrayor vṛddhihrāsau staḥ asaṃbhavāt tatsthānāṃ manuṣyāṇāṃ vṛddhihrāsāu bhavataḥ athavādhikaraṇanirdeśaḥ bharate airāvate ca manuṣyāṇāṃ vṛddhihrāsāv iti kiṃ kṛtau vṛddhihrāsau anubhavāyuḥpramāṇādikṛtau anubhava upabhogaḥ āyurjīvitaparimāṇam pramāṇaṃ śarīrotsedha ity evam ādibhir vṛddhihrāsau manuṣyāṇāṃ bhavataḥ kiṃ hetukau punas tau kālahetukau sa ca kālo dvividhaḥ utsarpiṇī avasarpiṇī ceti tadbhedāḥ pratyekaṃ ṣaṭ anvarthasaṃjñe caite anubhavādibhir utsarpaṇaśīlā utsarpiṇī tair evāvasarpaṇaṣīlā avasarpiṇī tatrāvasarpiṇī ṣaḍvidhā suṣamasuṣamā suṣamā suṣamaduṣṣamā duṣṣamasuṣamā duṣṣamā atiduṣṣamā ceti utsarpiṇyapi atiduṣṣamādyā suṣamasuṣamāntā ṣaṭvidhaiva bhavati avasarpiṇyāḥ parimāṇaṃ daśasāgaropamakoṭīkoṭyaḥ utsarpiṇyā api tāvatya eva sobhayī kalpa ity ākhyāte tatra suṣamasuṣamā catasraḥ sāgaropamakoṭīkoṭyaḥ tadādau manuṣyā uttarakurumanuṣyatulyāḥ tataḥ krameṇa hānau satyāṃ suṣamā bhavati tisraḥ sāgaropamakoṭīkoṭyaḥ tadādau manuṣyā harivarṣamanuṣyasamāḥ tataḥ krameṇa hānau satyāṃ suṣamaduṣṣamā bhavati dve sāgaropamakoṭīkoṭyau tadādau manuṣyā haimavatakamanuṣyasamāḥ tataḥ krameṇa hānau satyāṃ duṣṣamasuṣamā bhavati ekasāgaropamakoṭīkoṭī dvi catvāriṃśadvarṣasahasronā tadadau manuṣyā videhajanatulyā bhavanti tataḥ krameṇa hānau satyāṃ duṣṣamā bhavati ekoviṃśativarṣasahasrāṇi tataḥ krameṇa hanau satyām atiduṣṣamā bhavati ekaviṃśativarṣasahasrāṇi evam utsarpiṇy api viparītakramā veditavyā

athetarāsu bhūmiṣu kāvasthety ata āha

tābhyāṃ bharatairāvatābhyām aparā bhūmayo 'vasthitā bhavanti na hi tatrotsarpiṇyavasarpiṇyau staḥ

kiṃ tāsu bhūmiṣu manuṣyās tulyāyuṣa āho svit kaścid asti prativiśeṣa ity ata āha

haimavate bhavā haimavatakā ity evaṃ 'vuñi' sati manuṣyasaṃpratyayo bhavati evam uttarayor api haimavatakādayas trayaḥ ekādayas trayaḥ tatra yathāsaṃkhyam abhisaṃbandhaḥ kriyate ekapalyopamasthitayo haimavatakāḥ dvipalyopamasthitayo hārivarṣakāḥ tripalyopamasthitayo daivakuravakā iti tatra pañcasu haimavateṣu suṣamaduṣṣamā sadāvasthitā tatra manuṣyā ekapalyopamāyuṣo dvidhanuḥsahasrocchratāś caturthabhaktāhārā nīlotpalavarṇāḥ pañcasu harivarṣeṣu suṣamā sadāvasthitā tatra manuṣyā dvipalyopamāyuś cāpasahasrotsedhāḥ ṣaṣṭhabhaktāhārāḥ śaṃkhavarṇāḥ pañcasu devakuruṣu suṣamasuṣamā sadāvasthitā tatra manuṣyās tripalyopamāyuṣaḥ ṣaḍdhanuḥsahasrocchrāyā aṣṭamabhaktāhārāḥ kanakavarṇā

athottareṣu kāvasthety ata āha

yathā dakṣiṇā vyākhyāthās tathaivottarā veditavyāḥ hairanyavatakā haimavatakais tulyāḥ rāmyakā hārivarṣakais tulyāḥ daivakuravakair auttarakuruvakāḥ samākhyātāḥ

atha videheṣv avasthiteṣu kā sthitir ity atrocyate

sarveṣu videheṣu saṃkhyeyakālā manuṣyāḥ tatra kālaḥ suṣamaduṣṣamāntopamaḥ sadāvasthitaḥ manuṣyāś ca pañcadhanuḥśatotsedhāḥ nityāhārāḥ utkarṣeṇaikapūrvakoṭīsthitikāḥ jaghanyenāntarmuhūrtāyuṣaḥ tasyāś ca saṃbandhe gāthāṃ paṭhanti puvassa du parimāṇaṃ sadariṃ khalu koḍisadasahassāiṃ chapaṇṇaṃ ca sahassā boddhavvā vāsakoḍīṇaṃ

ukto bharatasya viṣkambhaḥ punaḥ prakārāntareṇa tatpratipattyartham āha

jambūdvīpaviṣkambhasya yojanaśatasahasrasya navatiśatabhāgīkṛtasyaiko bhāgo bharatasya viṣkambhaḥ sa pūrvokta eva uktaṃ jambūdvīpaṃ parivṛtya vedikā sthitā tataḥ paro lavaṇodaḥ samudro dviyojanaśatasahasravalayaviṣkambhaḥ tataḥ paro dhātakīkhaṇḍo dvīpaś caturyojanaśatasahasravalayaviṣkambhaḥ

tatra varṣādīnāṃ saṃkhyādividhipratipattyartham āha

bharatādīnāṃ dravyāṇām ihābhyāvrttir vivakṣitā atra kathaṃ suc adhyāhriyamānakriyābhyāvṛttidyotanārthaḥ suc yathā dvistāvān ayaṃ prāsado mīyata iti evaṃ dvir dhātakīkhaṇḍe bharatādayo mīyante iti tad yathā dvābhyām iṣvākāraparvatābhyāṃ dakṣiṇottarāyatābhyāṃ lavaṇodakālodavedikāspṛṣṭakoṭibhyāṃ vibhakto dhātakīkhaṇḍaḥ pūrvāpara iti tatra pūrvasya aparasya ca madhye dvau mandarau tayor ubhayato bharatādīni kṣetrāṇi himavadādayaś ca varṣadharaparvatāḥ evaṃ dvau bharatau dvau himavantau ity evam ādi saṃkhyānaṃ dviguṇaṃ veditavyam jambūdvīpahimavadādīnāṃ varṣadharāṇāṃ yo viṣkambhas taddviguṇo dhātakīkhaṇḍe himavadādīnāṃ varṣadharāṇām varṣadharāś cakrāravadavasthitāḥ aravivarasaṃsthānāni kṣetrāṇi jambūdvīpe yatra jambūvṛkṣaḥ sthitaḥ tatra dhātakīkhaṇḍe dhātkīvṛkṣaḥ saparivāraḥ tadyogād dhātakīkhaṇḍa iti dvīpasya nāma pratītam tatparikṣepī kālodaḥ samudraḥ ṭaṃkacchinnatīrthaḥ aṣṭayojanaśatasahasravalayavikambhaḥ kālodaparikṣepī puṣkaradvīpaḥ ṣodaśayojanaśatasahasravalayaviṣkambhaḥ

tatra dvīpāmbhonidhiviṣkambhadviguṇapariklṛptivaddhātakīkhaṇḍavarṣādidviguṇavṛddhiprasaṃge viśeṣāvadhāraṇārtham āha

kim dvir ity anuvartate kim apekṣā dvir āvṛttiḥ jambūdīpabharatahimavadādyapekṣayaiva kutaḥ vyākhyānataḥ yathā dhātakīkhaṇḍe himavadādīnāṃ viṣkambhas tathā puṣkarārdhe himavadādīnāṃ viṣkambho dviguṇa iti vyākhyāyate nāmāni tāny eva iṣvākarau mandarau ca pūrvavat yatra jambūvṛkṣas tatra puṣkaraṃ saparivāram tata eva tasya dvipasya nāma rūḍhaṃ puṣkaradvīpa iti atha kathaṃ puṣkarārddhasaṃjñā mānuṣottaraśailena vibhaktārdhatvāt puṣkarārdhasaṃjñā

atrāha kim arthaṃ jambūdvīpahimavadādisaṃkhyā dvir āvṛttā puṣkarārdhe kathyate na punaḥ kṛtsna eva puṣkaradvīpe ity atrocyate

puṣkaradvīpabahumadhyadeśabhāgī valayavṛtto mānuṣottaro nāma śailaḥ tasmāt prāgeva manuṣyā na bahir iti tato na bahiḥ pūrvoktakṣetravibhāgo 'sti nāsmād uttaraṃ kadācid api vidyādharā ṛddhiprāptā api manuṣya gacchanti anyatropapādasamudghātābhyām tato 'syānvarthasaṃjñā evaṃ jambūdvīpādiṣv ardhatṛtīyeṣu dvīpeṣu dvayoś ca samudrayor manuṣyā veditavyāḥ te dvividhāḥ

guṇair guṇavadbhir vā aryanta ity āryāḥ te dvividhā ṛddhiprāptāryā anṛddhiprāptāryāś ceti anṛddhiprāptāryāḥ paṃcavidhāḥ kṣetrāryā jātyāryāḥ karmāryāś cāritrāryā darśanāryāś ceti ṛddhiprāptāryāḥ saptavidhāḥ buddhivikriyātapobalauṣadharasākṣīṇabhedāt mlecchā dvividhāḥ antardvīpajāḥ karmabhūmijāś ceti tatrāntardvīpā lavaṇodadher abhyantare pārśve 'ṣṭāsu dikṣv aṣṭau tadantareṣu cāṣṭau himavacchikhariṇor ubhayoś ca vijayārddhayor anteṣv aṣṭau tatra dikṣu dvīpā vedikāyās tiryak pañcayojanaśatāni praviśya bhavanti vidikṣv antareṣu ca dvīpāḥ pañcāśatpañcayojanaśateṣu gateṣu bhavanti śailānteṣu dvīpāḥ ṣaḍyojanaśateṣu gateṣu bhavanti dikṣu dvīpāḥ śatayojanavistārāḥ vidikṣv antareṣu ca dvīpās tadardhaviṣkambhāḥ śailānteṣu pañcaviṃśatiyojanavistārāḥ tatra pūrvasyāṃ diśy ekorukāḥ aparasyāṃ diśi lāṅgūlinaḥ uttarasyāṃ diśy abhāṣakāḥ dakṣiṇasyāṃ diśi viṣāṇinaḥ śaśakarṇaśaṣkulīkarṇaprāvaraṇakarṇalambakarṇāḥ vidikṣu aśvasiṃhaśvamahiṣavarāhavyāghrakākakapimukhā antareṣu meghamukhavidyunmukhāḥ śikhariṇa ubhayor antayoḥ matsyamukhakālamukhā himavata ubhayor antayoḥ hastimukhādarśamukhā uttaravijayārdhasyobhayor antayoḥ gomukhameṣamukhā dakṣiṇavijayārdhasyobhayor antayoḥ ekorukā mṛdāhārā guhāvāsinaḥ śeṣāḥ puṣpaphalāhārā vṛkṣavāsinaḥ sarve te palyopamāyuṣaḥ te caturviṃśatir api dvīpā jalatalād ekayojanotsedhāḥ lavaṇodadher bāhyapārśve 'py evaṃ caturviṃśatidvīpā vijñātavyāḥ tathā kālode 'pi veditavyāḥ ta ete 'ntardvīpajā mlecchāḥ karmabhūmijāś ca śakayavanaśabarapulindādayaḥ

kāḥ punaḥ karmabhūmaya ity ata āha

bharatā airāvatā videhāś ca paṃca paṃca etāḥ karmabhūmaya iti vyapadiśyante tatra 'videha' grahaṇād devakurūttarakurugrahaṇe prasakte tatpratiṣedhārtham āha 'anyatra devakurūttarakurubhyaḥ' iti 'anyatra' śabdo varjanārthaḥ devakurava uttarakuravo haimavato harivarṣo ramyako hairanyavato 'ntardvīpāś ca bhogabhūmaya iti vyapadiśyante atha kathaṃ karmabhūmitvam śubhāśubhalakṣaṇasya karmaṇo 'dhiṣṭhānatvāt nanu sarvaṃ lokatritayaṃ karmaṇo 'dhiṣṭhānam eva tata evaṃ prakarṣagatir vijñāsyate prakarṣeṇa yatkarmaṇo 'dhiṣṭhānam iti tatrāśubhakarmaṇas tāvat saptamanarakaprāpaṇasya bharatādiṣv evārjanam śubhasya ca sarvārthasiddhyādisthānaviśeṣaprāpaṇasya karmaṇa upārjanaṃ tatraiva kṛṣyādilakṣaṇasya ṣaḍvidhasya karmaṇaḥ pātradānādisahitasya tatraivārambhāt karmabhūmivyapadeśo veditavyaḥ itarāstu daśavidhakalpavṛkṣakaspitabhogānubhavanaviṣayatvād bhogabhūmaya iti vyapadiśyante

uktāsu bhūmiṣu manuṣyāṇāṃ sthitiparicchedārtham āha

trīṇi palyopamāni yasyāḥ sā tripalyopamā antargato muhūrto yasyāḥ sā antarmuhūrtā yathāsaṃkhyenābhisaṃbandhaḥ manuṣyāṇāṃ parā utkṛṣṭā sthitis tripalyopamā aparā jaghanyā antarmuhūrtā madhye anekavikalpāḥ tatra palyaṃ trividham vyavahārapalyam uddhārapalyam addhāpalyam iti anvarthasaṃjñā etāḥ ādyaṃ vyavahārapalyam ity ucyate uttarapalyadvayavyavahārabījatvāt nānena kiṃcit paricchedyam astīti dvitīyam uddhārapalyam tata uddhṛtair lomakacchedair dvīpasamudrāḥ saṃkhyāyanta iti tṛtīyam addhāpalyam addhā kālasthitir ity arthaḥ tatrādyasya pramāṇaṃ kathyate tatparicchedanārthatvāt tad yathā pramāṇāṅgulaparimitayojanaviṣkambhāyāmāvagāhāni trīṇi palyāni kuśūlā ity arthaḥ ekādisaptāntāhorātrajātāvivālāgrāṇi tāvac chinnāni yāvad dvitīyaṃ kartaricchedaṃ nāvāpnuvanti tādṛśair lomacchedaiḥ paripūrṇaṃ ghanīkṛtaṃ vyavahārapalyam ity ucyate tato varṣaśate varṣaśate gate ekaikalomāpakarṣaṇavidhinā yāvatā kālena tadriktaṃ bhavet tāvān kālo vyavahārapalyopamākhyaḥ tair eva lomacchedaiḥ pratyekam asaṃkhyeyavarṣakoṭīsamayamātracchinnais tatpūrṇam uddhārapalyam tataḥ samaye samaye ekaikasmin romacchede 'pakṛṣyamāṇe yāvatā kālena tadriktaṃ bhavati tāvan kāla uddhārapalyopmākhyaḥ eṣām uddhārapalyānāṃ daśakoṭīkoṭya ekam uddhārasāgaropamam ardhatṛtīyoddhārasāgaropamānāṃ yāvanto romacchedās tāvanto dvīpasamudrāḥ punar uddhārapalyaromacchedair varṣaśatasamayamātracchinnaiḥ pūrṇam addhāpalyam tataḥ samaye samaye ekaikasmin romacchede 'pakṛṣyamāṇe yāvatā kālena tadriktaṃ bhavati tāvān kālo 'ddhāpalyopmākhyaḥ eṣām addhāpalyānāṃ daśakoṭīkoṭya ekam addhāsāgaropamam daśāddhāsāgaropamakoṭīkoṭya ekāvasarpiṇī tāvaty evotsarpiṇī anenāddhāpalyena nārakatairyagyonijānāṃ devamanuṣyāṇāṃ ca karmasthitir bhavasthitir āyuḥsthitiḥ kāyasthitiś ca paricchettavyā uktā ca saṃgrahagāthā vavahāruddhāraddhā pallā tiṇṇeva hoṃti boddhavvā saṃkhā dīvasamuddā kammaṭṭhidi vaṇṇidā tadie

yathaivete utkṛṣṭajaghanye sthitī nṛṇāṃ tataiva

tiraścāṃ yonis tiryagyoniḥ tiryaggatināmakarmodayāpāditaṃ janmety arthaḥ tiryagyonau jātās tiryagyonijāḥ teṣāṃ tiryagyonijānām utkrṣṭā bhavasthitis tripalyopamā jaghanyā antarmuhūrtā madhye 'nekavikalpāḥ

'bhavapratyayo 'vadhir devanārakāṇām' ity evam ādiṣv asakṛd devaśabda uktas tatra na jñāyate ke devāḥ katividhā iti tannirṇayārtham āha

devagatināmakarmodaye saty abhyantare hetau bāhyavibhūtir viśeṣaiḥ dvīpādrisamudrādipradeśeṣu yatheṣṭaṃ dīvyanti krīḍantīti devāḥ ihaikavacananirdeśo yuktaḥ 'devāś caturṇikāyāḥ' iti sa jātyabhidhānāt bahūnāṃ pratipādako bhavati bahutvanirdeśas tadantargatabhedapratipattyarthaḥ indrasāmānikādayo bahavo bhedāḥ santi sthityādikṛtāś ca tatsūcanārthaḥ devagatināmakarmodayasya svakarmaviśeṣāpāditabhedasya sāmarthyān nicīyanta iti nikāyāḥ saṃghatā ity arthaḥ catvāro nikāyā yeṣāṃ te caturṇikāyāḥ ke punas te bhavanavāsino vyantarā jyotiṣkā vaimānikāś ceti

teṣāṃ leśyāvadhāranārtham ucyate

'ādita' ity ucyate ante madhye anyathā vā grahaṇaṃ mā vijñāyīti ādau āditaḥ dvayor ekasya ca nivṛttyarthaṃ 'tri' grahaṇaṃ kriyate atha caturṇṇāṃ nivṛttyarthaṃ kasmān na bhavati 'āditaḥ' iti vacanāt ṣaḍleśyā uktāḥ tatra catasṛṇāṃ leśyānāṃ grahaṇārthaṃ 'pītānta' grahaṇaṃ kriyate pītaṃ teja ity arthaḥ pītā ante yāsāṃ tāḥ pītāntāḥ pītāntā leśyā yeṣām te pītāntaleśyāḥ etad uktaṃ bhavati āditas triṣu nikāyeṣu bhavanavāsivyantarajyotiṣkanāmasu devānāṃ kṛṣṇā nīlā kāpotā pīteti catasro leśyā bhavanti

teṣāṃ nikāyānām antarvikalpapratipādanārtham āha

caturṇṇāṃ devanikāyānāṃ daśādibhiḥ saṃkhyāśabdair yathāsaṃkhyam abhisaṃbandho veditavyaḥ daśavikalpā bhavanavāsinaḥ aṣṭavikalpā vyantarāḥ pañcavikalpā jyotiṣkāḥ dvādaśavikalpā vaimānikā iti sarvavaimānikānāṃ dvādaśavikalpāntaḥpātitve prasakte graiveyakādinivṛttyarthaṃ viśeṣaṇam upādīyate 'kalpopapannaparyantāḥ' iti atha kathaṃ kalpasaṃjñā indrādayaḥ prakārā daśa eteṣu kalpyanta iti kalpāḥ bhavanavāsiṣu tatkalpanāsaṃbhave 'pi rūḍhivaśād vaimānikeṣv eva vartate kalpaśabdaḥ kalpeṣūpapannā kalpopapannāḥ kalpopapannāḥ paryantā yeṣāṃ te kalpopapannaparyantāḥ

punar api tadviśeṣapratipattyartham āha

anyadevāsādhāraṇāṇimādiguṇayogād indantīti indrāḥ ājñaiśvaryavarjitaṃ yatsthānāyurvīryaparivārabhogopabhogādi tatsamānaṃ tasmin samāne bhavāḥ sāmānikā mahattarāḥ pitṛgurūpādhyāyatulyāḥ mantripurohitasthāniyās trāyastriṃśāḥ trayastriṃśad eva trāyastriṃśāḥ vayasyapīṭhamardasadṛśāḥ pariṣadi bhavāḥ pariṣadāḥ ātmarakṣāḥ śirorakṣopamānāḥ arthacarā rakṣakasamāna lokapālāḥ lokaṃ pālayantīti lokapālāḥ padātyādīni sapta anīkāni daṇḍasthānīyāni prakīrṇakāḥ paurajānapadakalpāḥ ābhiyogyā dāsasamānā vāhanādikarmaṇi pravṛttāḥ antevāsisthānīyāḥ kilbiṣikāḥ kilbiṣaṃ pāpaṃ yeṣām astīti kilbiṣikāḥ

ekaikasya nikāyasya ekaśa ete indrādayo daśa vikalpāś caturṣu nikāyeṣūtsargeṇa prasaktās tato 'pavādārtham āha

vyantareṣu jyotiṣkeṣu ca trāyastriṃśāṃl lokapālāṃś ca varjayitvā itare 'ṣtau vikalpā draṣṭavyāḥ

atha teṣu nikāyeṣu kim ekaika indra utānyaḥ pratiniyamaḥ kaścid astīty ata āha

pūrvayor nikāyayor bhavanavāsivyantaranikāyayoḥ kathaṃ dvitīyasya pūrvatvam sāmīpyāt pūrvatvam upacaryoktam 'dvindrāḥ' iti antarnītavīpsārthaḥ dvau dvau indrau yeṣāṃ te dvīndrā iti yathā saptaparṇo 'ṣṭāpada iti tad yathā bhavanavāsiṣu tāvad asurakumārāṇāṃ dvāv indrau camaro vairocanaś ca nāgakumārāṇāṃ dharaṇo bhūtānandaś ca vidyutkumārāṇāṃ harisiṃho harikāntaś ca suparṇakumārāṇāṃ veṇudevo veṇudhārī ca agnikumārāṇāṃ agniśikho 'gnimāṇavaś ca vātakumārāṇāṃ vailambaḥ prabhañjanaś ca stanitakumārāṇāṃ sughoṣo mahāghoṣaś ca udadhikumārāṇāṃ jalakānto jalaprabhaś ca dvīpakumārāṇāṃ pūrṇo vasiṣṭhaś ca dikkumārāṇāṃ amitagatir amitavāhanaś ceti vyantareṣv api kinnarāṇāṃ dvāv īndrau kinnaraḥ kimpuruṣaś ca kimpuruṣāṇāṃ satpuruṣo mahāpuruṣaś ca mahoragāṇāṃ matikāyo mahākāyaś ca gandharvāṇāṃ gītaratir gītayaśaś ca yakṣāṇāṃ pūrṇabhadro maṇibhadraś ca rākṣasānāṃ bhīmo mahābhīmaś ca bhūtānāṃ pratirūpo 'pratirūpaś ca piśācānāṃ kālo mahākālaś ca

athaiṣāṃ devānāṃ sukhaṃ kīdṛśam ity ukte sukhāvabodhanārtham āha

pravīcāro maithunopasevanam kāyena pravīcāro yeṣāṃ te kāyapravīcārāḥ āṅ abhividhyarthaḥ asaṃhitayā nirdeśaḥ asaṃdehārthaḥ ete bhavanavāsyādaya aiśānāntāḥ saṃkliṣṭakarmatvān manuṣyavat strīviṣayasukham anubhavantīty arthaḥ

avadhigrahaṇād itareṣāṃ sukhavibhāge 'nirjñāte tatpratipādanārtham āha

uktāvaśiṣṭagrahaṇārthaṃ 'śeṣa' grahaṇam ke punar uktāvaśiṣṭāḥ kalpavāsinaḥ sparśaś ca rūpaṃ ca śabdaś ca manaś ca sparśarūpaśabdamanāṃsi teṣu pravīcāro yeṣāṃ te sparśarūpaśabdamanaḥpravīcārāḥ kathaṃ abhisaṃbandhaḥ ārṣāvirodhena kutaḥ punaḥ 'pravīcāra' grahaṇam iṣṭasaṃpratyayārtham iti kaḥ punar iṣṭo 'bhisaṃbandhaḥ ārṣāvirodhī sānatkumāramāhendrayor devā devāṅganāṅgasparśamātrād eva parāṃ prītim upalabhante tathā devyo 'pi brahmabrahmottaralāntavakāpiṣṭheṣu devā divyāṅganānāṃ śṛṅgārākāravilāsacaturamanojñaveṣarūpāvalokanamātrād eva paramasukham āpnuvanti śukramahāśukraśatārasahasrāreṣu devā devavanitānāṃ madhurasaṃgītamṛduhasitalalitakathitabhūṣaṇaravaśravaṇamātrād eva parāṃ prītimāskandanti ānataprāṇatāraṇācyutakalpeṣu devā svāṅganāmanaḥsaṃkalpamātrād eva paraṃ sukham āpnuvanti

athottareṣāṃ kiṃ prakāraṃ sukham ity ukte tanniścayārtham āha

'para' grahaṇam itarāśeṣasaṃgrahārtham 'apravīcāra' grahaṇaṃ paramasukhapratipattyartham pravīcāro hi vedanāpratikāraḥ tadbhāve teṣāṃ paramasukham anavarataṃ bhavati

uktā ye ādinikāyadevā daśavikalpā iti teṣāṃ sāmānyaviśeṣasaṃjñāvijñāpanārtham idam ucyate

bhavaneṣu vasantīty evaṃśīlā bhavanavāsinaḥ ādinikāyasyeyaṃ sāmānyasaṃjñā asurādayo viśeṣasaṃjñā viśiṣṭanāmakarmodayāpāditavṛttayaḥ sarveṣāṃ devānām avasthitavayaḥsvabhāvatve 'pi veṣabhūṣāyudhayānavāhanakrīḍanādikumaravad eṣām ābhāsata iti bhavanavāsiṣu kumāravyapadeśo rūḍhaḥ sa pratyekaṃ parisamāpyate asurakumārā ity evam ādi kva teṣāṃ bhavanānīti cet ucyate ratnaprabhāyāḥ paṃkabahulabhāge 'surakumārāṇāṃ bhavanāni kharapṛthivībhāge upary adhaś ca ekaikayojanasahasraṃ varjayitvā śeṣanavānāṃ kumārāṇām āvāsāḥ

dvitīyanikāyasya sāmānyaviśeṣasaṃjñāvadhāraṇārtham āha

vividhadeśāntarāṇi yeṣāṃ nivāsās te 'vyantarāḥ' ity anvarthā sāmānyasaṃjñeyam aṣṭānām api vikalpānām teṣāṃ vyantarāṇām aṣṭau vikalpāḥ kiṃnarādayo veditavyā nāmakarmodayaviśeṣāpāditāḥ kva punas teṣām āvāsa iti cet ucyate asmāj jambūdvīpād asaṃkhyeyān dvīpasamudrān atītya upariṣṭe kharapṛthivībhāge saptānāṃ vyantarāṇām āvāsāḥ rākṣasānāṃ paṅkabahulabhāge

tṛtīyasya nikāyasya sāmānyaviśeṣasaṃjñāsaṃkīrtanārtham āha

jyotis svabhāvatvād eṣāṃ pañcānām api 'jyotiṣkāḥ' iti sāmānyasaṃjñā anvarthā sūryādayas tadviśeṣasaṃjñā nāmakarmodayapratyayāḥ 'sūryācandramasau' iti pṛthaggrahaṇaṃ prādhānyakhyāpanārtham kiṃ kṛtaṃ punaḥ prādhānyam prabhāvādikṛtam kva punas teṣām āvāsāḥ ity attrocyate asmāt samād bhūmibhāgād ūrdhvaṃ saptayojanaśatāni navatyuttarāṇi utpatya sarvajyotiṣām adhobhāgavinyastās tārakāś caranti tato daśayojanāny utpatya sūryaś caranti tato 'śītiyojanāny utpatya candramaso bhramanti tataś catvāri yojanāny utpatya nakṣatrāṇi tataś catvāri yojanāny utpatya budhāḥ tatas trīṇi yojanāny utpatya śukrāḥ tatas trīṇi yojanāny utpatya bṛhaspatayaḥ tatas trīṇi yojanāny utpatyāṃgārakāḥ tatas trīṇi yojanāny utpatya śanaiś carāś caranti sa eṣa jyotir gaṇagocaro nabho 'vakāśo daśādhikayojanaśatabahalas tiryagsaṃkhyātadvīpasamudrapramāṇo ghanodadhiparyantaḥ uktam ca ṇauduttarasattasayā dasasīdī cadugaṃ tiyacaukkaṃ tārāravisasirikkhā buhabhaggavaguruaṃgirārasaṇī

jyotiṣkāṇāṃ gativiśeṣapratipattyartham āha

meroḥ pradakṣiṇā merupradakṣiṇā 'merupradakṣiṇāḥ' iti vacanaṃ gativiśeṣapratipattyarthaṃ viparītā gatir mā vijñāyīti 'nityagatayaḥ' iti viśeṣaṇam anuparatakriyāpratipādanārtham 'nṛloka' grahaṇaṃ viṣayārtham ardhatṛtīyeṣu dvīpeṣu dvayoś ca samudrayor jyotiṣkā nityagatayo nānyatreti jyotiṣkavimānānāṃ gatihetvabhāvāt tadvṛttyabhāva iti cet na asiddhatvāt gatiratābhiyogyadevaprerita gatipariṇāmāt karmavipākasya vaicitryāt teṣāṃ hi gatimukhenaiva karma vipacyata iti ekādaśabhir yojanaśatair ekaviṃśair merum aprāpya jyotiṣkāḥ pradakṣiṇaś caranti

gatimajjyotisaṃbandhena vyavahārakālapratipattyartham āha

'tad' grahaṇaṃ gatimajjyotiḥpratinirdeśārtham na kevalayā gatyā nāpi kevalair jyotirbhiḥ kālaḥ paricchadyate anupalabdher aparivartanāc ca kālo dvividho vyāvahāriko mukhyaś ca vyāvahārikaḥ kālavibhāgas tatkṛtaḥ samayāvalikādiḥ kriyāviśeṣaparicchinno 'nyasyāparicchinnasya paricchedahetuḥ mukhyo 'nyo vakṣamāṇalakṣaṇaḥ

itaratra jyotiṣām avasthānapratipādanārtham āha

'bahiḥ' ity ucyate kuto bahiḥ nṛlokāt katham avagamyate arthavaśād vibhaktipariṇāmo bhavati nanu ca nṛloke 'nityagati' vacanād anyatrāvasthānaṃ jyotiṣkāṇāṃ siddham ato bahir avasthitā iti vacanam anarthakam iti tan na kiṃ kāraṇam nṛlokād anyatra hi jyotiṣām astitvam avasthānāṃ cāsiddham atas tadubhayasiddhyarthaṃ bahir avasthitā ity ucyate viparītagatinivṛttyarthaṃ kādācitkagatinivṛttyarthaṃ ca sūtram ārabdham

turīyasya nikāyasya sāmānyasaṃjñāsaṃkīrtanārtham āha

'vaimānika' grahaṇam adhikārārtham ita uttaraṃ ye vakṣyante teṣāṃ vaimānikasaṃpratyayo yathā syād iti adhikāraḥ kriyate viśeṣeṇātmasthān sukṛtino mānayantīti vimānāni vimāneṣu bhavā vaimānikāḥ tāni vimānāni trividhāni indrakaśreṇīpuṣpaprakīrṇakabhedena tatra indrakavimānāni indravanmadye 'vasthitāni teṣāṃ catasṛṣu dikṣu ākāśapradeśaśreṇivadavasthānāt śreṇivimānāni vidikṣu prakīrṇapuṣpavadavasthānāt puṣpaprakīrṇakāni

teṣāṃ vaimānikānāṃ bhedāvabodhanārtham āha

kalpeṣūpannāḥ kalpopapannāḥ kalpātītāḥ kalpātītāś ceti dvividhā vaimānikāḥ

teṣām avasthānaviśeṣanirjñānārtham āha

kim artham idam ucyate tiryagavasthitipratiṣedhārtham ucyate na jyotiṣkavattiryagavasthitāḥ na vyantaravadasamāvasthitayaḥ 'upary upari' ity ucyante ke te kalpāḥ

yady evaṃ kiyatsu kalpavimāneṣu te devā bhavantīty ata āha

katham eṣāṃ saudharmādiśabdānāṃ kalpābhidhānam cāturārthikenāṇā svabhāvato vā kalpasyābhidhānaṃ bhavati atha katham indrābhidhānam svabhāvataḥ sāhacaryād vā tat katham iti cet ucyate sudharmā nāma sabhā sā 'sminn astīti saudharmaḥ kalpaḥ tad asminn astīti aṇ tatkalpasāhacaryād indro 'pi saudharmaḥ īśāno nāma indraḥ svabhāvataḥ īśānasya nivāsaḥ kalpa aiśānaḥ tasya nivāsaḥ ity aṇ tatsāhacaryād indro 'py aiśānaḥ sanatkumāro nāma indraḥ svabhāvataḥ tasya nivāsaḥ ity aṇ sānatkumāraḥ kalpaḥ tatsāhacaryād indro 'pi sānatkumāraḥ mahendro nāmendraḥ svabhāvataḥ tasya nivāsaḥ kalpo māhendraḥ tatsāhacaryād indro 'pi māhendraḥ evam uttaratrāpi yojyam āgamāpekṣayā vyavasthā bhavatīti 'upary upari' ity anena dvayor dvayor abhisaṃbandho veditavyaḥ prathamo saudharmaiśānakalpau tayor upari sānatkumāramāhendrau tayor upari brahmalokabrahmottarau tayor upari lāntavakāpiṣṭau tayor upari śukramahāśukrau tayor upari śatārasāhasrārau tayor upari ānataprāṇatau tayor upari āraṇācyutau adha upari ca pratyekam indrasaṃbandho veditavyaḥ madhye tu pratidvayam saudharmaiśānasānatkumāramāhendrāṇāṃ caturṇāṃ catvāra indrāḥ brahmalokabrahmottarayor eko brahmā nāma lāntavakāpiṣṭhayor eko lāntavākhyaḥ śukramahāśukrayor ekaḥ śukrasaṃjñaḥ śatārasahasrārayor ekaḥ śatāranāmā ānataprāṇatāraṇācyutānāṃ caturṇṇāṃ catvāraḥ evaṃ kalpavāsināṃ dvādaśa indrā bhavanti jambūdvīpe mahāmandaro yojanasahasrāvagāho navanavatiyojanasahasrocchrāyaḥ tasyādhastād adholokaḥ bāhalyena tatpramāṇas tiryakprasṛtas tiryaglokaḥ tasyopariṣṭād ūrdvalokaḥ merucūlikā catvāriṃśad yojanocchrāyā tasyā upari keśāntaramātre vyavasthitam ṛjuvimānam indrakaṃ saudharmasya sarvam anyal lokānuyogād veditavyam 'navasu graiveyakeṣu' iti navaśabdasya pṛthagvacanaṃ kim artham anyāny api navavimānāni anudiśasaṃjñakāni santīti jñāpanārtham tenānudiśānāṃ grahaṇaṃ veditavyam

eṣām adhikṛtānāṃ vaimānikāṃ parasparato viśeṣapratipattyartham āha

svopāttasyāyuṣa udayāt tasmin bhave śarīreṇa sahāvasthānaṃ sthitiḥ śāpānugrahaśaktiḥ prabhāvaḥ sukham indriyārthānubhavaḥ śarīravasanābharaṇādidīptiḥ dyutiḥ leśyā uktā leśyāyā viśuddhir leśyāviśuddhiḥ indriyāṇām avadheś ca indriyāvadhiviṣayaḥ tebhyas tair vā 'dhikā iti tasiḥ upary upari pratikalpaṃ pratiprastāram ca vaimānikāḥ sthityādibhir adhikā ity arthaḥ

yathā sthityādibhir upary upary adhikā evaṃ gatyādhibhir apīty atiprasaṃge tannivṛttyartham āha

deśād deśāntaraprāptihetur gatiḥ śarīraṃ vaikriyikam uktam lobhakaṣāyodayād viṣayeṣu saṅgaḥ parigrahaḥ mānakaṣāyād utpanno 'haṃkāro 'bhimānaḥ etair gatyādibhir upary upari hīnāḥ deśāntaraviṣayakrīḍāratiprakarṣābhāvād upary upari gatihīnāḥ śarīraṃ saudharmaiśānayor devānāṃ saptāratnipramāṇam sānatkumāramāhendrayoḥ ṣaḍaratnipramāṇam brahmalokabrahmottaralāntavakāpiṣṭheṣu pañcāratnipramāṇam śukramahāśukraśatārasahasrāreṣu caturaratnipramāṇam ānataprāṇatayor arddhacaturthāratnipramāṇam āraṇācyutayos tryaratnipramāṇam adho graiveyakeṣu arddhatṛtīyāratnipramāṇam madhyagraiveyakeṣv aratnidvayapramāṇam uparimagraiveyakeṣu anudiśavimānakeṣu ca adhyarddhāratnipramāṇam anuttareṣv aratnipramāṇam parigrahaś ca vimānaparicchadādir upary upari hīnaḥ abhimānaś copary upari tanukaṣāyatvād dhīnaḥ

purastāt triṣu nikāyeṣu devānāṃ leśyāvidhir uktaḥ idānīṃ vaimānikeṣu leśyāvidhipratipattyartham āha

pītā ca padmā ca śuklā ca tāḥ pītapadmaśuklāḥ pītapadmaśuklā leśyā yeṣāṃ te pītapadmaśuklaleśyāḥ kathaṃ hrasvatvam autarapadikam yathā drutāyāṃ taparakaraṇe madhyamavilambitayor upasaṃkhyānam iti athavā pītaś ca padmaś ca śuklaś ca pītapadmaśuklā varṇavanto 'rthāḥ teṣām iva leśyā yeṣāṃ te pītapadmaśuklaleśyāḥ tatra kasya kā leśyā iti attrocyate saudharmaiśānayoḥ pītaleśyāḥ sānatkumāramāhendrayoḥ pītapadmaleśyāḥ brahmalokabrahmottaralāntavakāpiṣṭheṣu padmaleśyāḥ śukramahāśukraśatārasahasrāreṣu padmaśuklaleśyāḥ ānatādiṣu śuklaleśyāḥ tatrāpy anudiśān uttareṣu paramaśuklaleśyāḥ sūtre 'nabhihitaṃ kathaṃ miśragrahaṇam sāhacaryāl lokavat tad yathā chatriṇo gacchanti iti acchatriṣu chatravyavahāraḥ evam ihāpi miśrayor anyataragrahaṇaṃ bhavati ayam arthaḥ sūtrataḥ kathaṃ gamyate iti cet ucyate evam abhisaṃbandhaḥ kriyate dvayoḥ kalpayugalayoḥ pītaleśyā sānatkumāramāhendrayoḥ padmaleśyāyā avivakṣātaḥ brahmalokādiṣu triṣu kalpayugaleṣu padmaleśyā śukramahāśukrayoḥ śuklaleśyāyā avivakṣātaḥ śeṣeṣu śatārādiṣu śuklaleśyāyā padmaleśyāyā avivakṣātaḥ iti nāsti doṣaḥ

āha kalpopapannā ity uktaṃ tattredaṃ na jñāyate ke kalpā ity attrocyate

idaṃ na jñāyate ita ārabhya kalpā bhavantīti saudharmādigrahaṇam anuvartate tenāyam artho labhyate saudharmādayaḥ prāggraiveyakebhyaḥ kalpā iti pāriśeṣyāditare kalpātītā iti

laukāntikā devā vaimānikāḥ santaḥ kva gṛhyante kalpopapanneṣu katham iti ced ucyate

etya tasmin līyanta iti ālaya āvāsaḥ brahmaloka ālayo yeṣām te brahmalokālayā laukāntikā devā veditavyāḥ yady evaṃ sarveṣāṃ brahmalokālayānāṃ devānāṃ laukāntikatvaṃ prasaktam anvarthasaṃjñāgrahaṇād adoṣaḥ brahmaloko lokaḥ tasyānto lokāntaḥ tasmin bhavā laukāntikā iti na sarveṣāṃ grahaṇam teṣām hi vimānāni brahmalokasyānteṣu sthitāni athavā janmajarāmaraṇākīrṇo lokaḥ saṃsāraḥ tasyānto lokāntaḥ lokānte bhavā laukāntikāḥ te sarve parītasaṃsārāḥ tataś cyutā ekaṃ garbhāvāsaṃ prāpya parinirvāsyantīti

teṣāṃ sāmānyenopadiṣṭānāṃ bhedadarśanārtham āha

kva ime sārasvatādayaḥ aṣṭāsv api pūrvottarādiṣu dikṣu yathākramam ete sārasvatādayo devagaṇā veditavyāḥ tad yathā pūrvottarakoṇe sārasvatavimānam pūrvasyāṃ diśi ādityavimānam pūrvadakṣiṇasyāṃ diśi vahnivimānam dakṣiṇasyāṃ diśi aruṇavimānam dakṣiṇāparakoṇe gardatoyavimānam aparasyāṃ diśi tuṣitavimānam uttarāparasyāṃ diśi avyābādhavimānam uttarsyāṃ diśi ariṣṭavimānam 'ca' śabdasamuccitās teṣām antareṣu dvau devagaṇau tad yathā sārasvatādityāntare agnyābhasūryābhāḥ ādityasya ca vahneś cāntare candrābhasatyābhāḥ vahnyaruṇāntarāle śreyaskarakṣemaṃkarāḥ aruṇagardatoyāntarāle vṛṣabheṣṭakāmacārāḥ gardatoyatuṣitamadhye nirmāṇarajodigantarakṣitāḥ tuṣitāvyābādhamadhye ātmarakṣitasarvarakṣitāḥ avyābādhāriṣṭāntarāle marudvasavaḥ ariṣṭasārasvatāntarāle aśvaviśvāḥ sarve ete svatantrāḥ hīnādhikatvābhāvāt viṣayarativirahād devarṣayaḥ itareṣāṃ devānām arcanīyāḥ caturdaśapūrvadharāḥ tīrthakaraniṣkramaṇapratibodhanaparā veditavyāḥ

āha uktā laukāntikās tataś cyutā ekaṃ garbhavāsam avāpya nirvāsyantīty uktāḥ kim evam anyesv api nirvāṇaprāptikālavibhāgo vidyate ity ata āha

'ādi' śabdaḥ prakārārthe vartate tena vijayavaijantajayantāparājitānudiśavimānānām iṣṭānāṃ grahaṇaṃ siddhaṃ bhavati kaḥ punar atra prakāraḥ ahamindratve sati samyagdṛṣṭyupapādaḥ sarvārthasiddhiprasaṅga iti cet na tesāṃ paramotkṛṣṭatvāt anvarthasaṇjñāta ekacaramatvasiddheh caramatvaṃ dehasya manuṣyabhavāpekṣayā dvau caramau dehau yeṣām te dvicaramāḥ vijayādibhyaś cyutā apratipatitasamyaktvā manuṣyeṣūtpadya saṃyamam ārādya punar vijayādiṣūtpadya tataś cyutāḥ punar manuṣyabhavam avāpya siddyantīti dvicaramadehatvam

āha jivasyāudayikeṣu bhāveṣu tiryagyonigatir audayakīty uktaṃ punaś ca sthitau 'tiryagyonijānāṃ ca' iti tatra na jñāyate ke tiryagyonayaḥ ity atrocyate

aupapādikā uktā devanārakāḥ manuṣyāś ca nirdiṣṭāḥ 'prāṅmānuṣottarān manuṣyāh' iti ebhyo 'nye saṃsāriṇo jīvāḥ śeṣās te tiryagyonayo veditavyāḥ teṣāṃ tiraścāṃ devādīnām iva kṣetravibhāgaḥ punar nirdeṣṭavyaḥ sarvalokavyāpitvāt tesāṃ kṣetravibhāgo noktaḥ

āha sthitir uktā nārakāṇāṃ manuṣyāṇāṃ tiraścāṃ ca devānāṃ noktā tasyāṃ vyaktavyāyām ādāv uddiṣṭānāṃ bhavanavāsināṃ sthitipratipādanārtham āha

asurādīnāṃ sāgaropmādibhir yathākramam atrābhisaṃbandho veditavyaḥ iyaṃ sthitir utkṛṣṭā jaghanyāpy uttaratra vakṣyate tad yathā asurāṇāṃ sāgaropamā sthitiḥ nāgānāṃ tripalyopamāni sthitiḥ suparṇānāṃ arddhatṛtīyāni dvīpānām dve śeṣāṇāṃ ṣaṇṇām adhyarddhapalyopamam

adyadevanikāyasthityabhidhānād anantaraṃ vyantarajyotiṣkasthitivacane kramaprāpte sati tadullaṅghya vaimānikānāṃ sthitir ucyate kutaḥ tayor uttaratra laghunopāyena sthitivacanāt teṣu cādāv uddiṣṭayo kalpayoḥ sthitividhānārtham aha

'sāgaropame' iti dvivacananirdeśād dvitvagatiḥ 'adhike' ity ayam adhikāraḥ ā kutaḥ ā sahasrārāt idaṃ tu kuto jñāyate uttaratra 'tu' śabdagrahaṇāt tena saudharmaiśānayor devānāṃ dve sāgaropame sātireke pratyetvaye

uttarayoḥ sthitiviśeṣapratipattyartham āha

anayoḥ kalpayor devānāṃ saptasāgaropamāṇi sādhikāni utkṛṣṭā sthitiḥ

brahmalokādiṣv acyutāvasāneṣu sthitiviśeṣapratipattyartham āha

'sapta' grahaṇaṃ prakṛtam tasyeha tryādibhir nirdiṣṭair abhisaṃbandho veditavyaḥ sapta tribhir adhikāni sapta saptabhir adhikānīty ādiḥ dvayor dvayor abhisaṃbandho veditavyaḥ 'tu' śabdo viśeṣaṇārthaḥ kiṃ viśinaṣṭi 'adhika' śabdo 'nuvartamānaś caturbhir abhisaṃbadhyate nottarābhyām ity ayam artho viśiṣyate tenāyam artho bhavati brahmalokabrahmottarayor daśasāgaropamāṇi sādhikāni lāntavakāpiṣṭhayoś caturdaśasāgaropamāṇi sādhikāni śukramahāśukrayoḥ ṣoḍaśasāgaropamāṇi sādhikāni śatārasahasrārayor aṣṭādaśasāgaropamāṇi sādhikāni ānataprāṇatayor viṃśatisāgaropamāṇi āraṇācyutayor dvāviṃśatisāgaropamāṇi

tata ūrdhvaṃ sthitiviśeṣapratipattyartham āha

'adhika' grahaṇam anuvartate tenehābhisaṃbandho veditavyaḥ ekaikenādhikānīti 'nava' grahaṇaṃ kim artham pratyekam ekaikam adhikam iti jñāpanārtham itarathā hi graiveyakeṣv ekam evādhikaṃ syāt vijayādiṣv iti 'ādi' śabdasya prakārārthatvād anudiśānām api grahaṇam sarvārthasiddhes tu pṛthaggrahaṇaṃ jaghanyābhāvapratipādanārtham tenāyam arthaḥ adhograiveyakeṣu prathame trayoviṃśatiḥ dvitīye caturviṃśatiḥ tṛtīye pañcaviṃśatiḥ madhyamagraiveyakeṣu prathame ṣaḍviṃśatiḥ dvitīye saptaviṃśatiḥ tṛtīye 'ṣṭāviṃśatiḥ uparimagraiveyakeṣu prathame ekonatriṃśad dvitīye triṃśat tṛtīye ekatriṃśat anudiśavimāneṣu dvātriṃśat vijayādiṣu trayas triṃśat sāgaropamāṇy utkṛṣṭā sthitiḥ sarvārthasiddhau trayas triṃśad eveti

nirdiṣṭotkṛṣṭasthitikeṣu deveṣu jaghanyasthitipratipādanārtham āha

palyopamaṃ vyākhyātam aparā jaghanyā sthitiḥ palyopamaṃ sādhikam keṣām saudharmaiśānīyānām kathaṃ gamyate 'parataḥ parataḥ' ity uttaratra vakṣyamāṇātvāt

tata ūrdhvaṃ jaghanyasthitipratipādanārtham āha

parasmin deśe parataḥ vīpsāyāṃ dvitvam 'pūrva' śabdasyāpi 'adhika' grahaṇam anuvartate tenaivam abhisaṃbandhaḥ kriyate saudharmaiśānayor dve sāgaropame sādhike ukte te sādhike sānatkumāramāhendrayor jaghanyā sthitiḥ sānatkumāramāhendrayoḥ parā sthitiḥ saptasāgaropamāṇi sādhikāni tāni sādhikāni brahmabrahmottarayor jaghanyā sthitir ity ādi

nārakāṇām utkṛṣṭā sthitir uktā jaghanyāṃ sūtre 'nupāttām aprakṛtām api laghunopāyena pratipādayitum icchann āha

'ca' śabdaḥ kim arthaḥ prakṛtasamuccayārthaḥ kiṃ ca prakṛtam 'parataḥ parataḥ pūrvāpūrvā 'nantarā' aparā sthitir iti tenāyam artho labhyate ratnaprabhāyāṃ nārakāṇāṃ parā sthitir ekaṃ sāgaropamam sā śarkarāprabhāyām jaghanyā śarkarāprabhāyām utkṛṣṭā sthitis trīṇi sāgaropamāṇi sā vālukāprabhāyāṃ jaghanyety ādi

evaṃ dvitīyādiṣu jaghanyā sthitir uktā prathamāyāṃ kā jaghanyeti tatpradarśanārtham āha

aparā sthitir ity anuvartate ratnaprabhāyāṃ daśavarṣasahasrāṇi aparā sthitir veditavyā

atha bhavanavāsināṃ kā jaghanyā sthitir ity ata āha

'ca' śabda kim arthaḥ prakṛtasamuccayārthaḥ tena bhavanavāsināṃ aparā sthitir daśavarṣasahasrāṇīty abhisaṃbadhyate

vyantarāṇāṃ tarhi kā jaghanyā sthitir ity ata āha

'ca' śabdaḥ prakṛtasamuccayārthaḥ tena vyantarāṇāṃ aparā sthitir daśavarṣasahasrāṇīty avagamyate

athaiṣāṃ parā sthitiḥ kā ity atrocyate

parā utkṛṣtā sthitir vyantarāṇāṃ palyopamam adhikam

idānīṃ jyotiṣkāṇāṃ parā sthitir vaktavyety ata āha

'ca' śabdaḥ prakṛtasamuccayārthaḥ tenaivam abhisaṃbandhaḥ jyotiṣkāṇāṃ parā sthitiḥ palyopamam adhikam iti

athāparā kiyatīty ata āha

tasya palyopamasyāṣṭabhāgo jyotiṣkāṇāṃ aparā sthitir ity arthaḥ

atha laukāntikānāṃ viśeṣoktānāṃ sthitiviśeṣo noktaḥ sa kiyān ity atrocyate

aviśiṣṭāḥ sarve te śuklaleśyāḥ pañcahastotsedhaśarīrāḥ

idānīṃ samyagdarśanasya viṣayabhāvenopakṣipteṣu jīvādiṣu jīvapadārtho vyākhyātaḥ athājīvapadārtho vicāraprāptasya saṃjñābhedasaṃkīrtanārtham idam ucyate

'kāya' śabdaḥ śarīre vyutpāditaḥ ihopacārād adhyāropyate kuta upacāraḥ yathā śarīraṃ pudgaladravyapracayātmakaṃ tathā dharmādiṣv api pradeśpracāyāpekṣayā kāyā iva kāyā iti ajīvāś ca te kāyāś ca ajīvakāyāḥ viśeṣaṇaṃ viśeṣyeṇeti vṛttiḥ nanu ca nīlotpalādiṣu vyabhicāre sati viśeṣaṇaviśeṣyayogaḥ ihāpi vyabhicārayogo 'sti ajīvaśabdo 'kāye kāle 'pi vartate kāyo 'pi jīve kim arthaḥ kāyaśabdaḥ pradeśabahutvajñāpanārthaḥ dharmādīnāṃ pradeśā bahava iti nanu ca 'asaṃkhyeyāḥ pradeśā dharmādharmaikajīvānām' ity anenaiva pradeśabahutvaṃ jñāpitam satyam idam paraṃ kintv asmin vidhau sati tadavadhāraṇaṃ vijñāyate asaṃkhyeyāḥ pradeśā na saṃkhyeyā nāpy anantā iti kālasya pradeśapracayābhāvajñāpanārthaṃ ca iha 'kāya' grahaṇam kālo vakṣyate tasya pradeśapratiṣedhārthaṃ iha 'kāya' grahaṇam yathā 'ṇoḥ pradeśamatratvād dvitīyādayo 'sya pradeśā na santīty apradeśo 'ṇuḥ tathā kālaparamāṇur apy ekapradeśatvād apradeśa iti teṣāṃ dharmādīnāṃ 'ajīva' iti sāmānyasaṃjñā jīvalakṣanābhāvamukhena pravṛttā 'dharmādharmākāśapudgalāḥ' iti viśeṣasaṃjñāḥ sāmayikyaḥ

atrāha 'sarvadravyaparyāyeṣu kevalasya' ity evam ādiṣu dravyāny uktāni kāni tānīty ucyate

yathā svaṃ paryāyair drūyante dravanti vā tāni iti dravyāṇi dravyatvayogād dravyam iti cet na ubhayāsiddeḥ yathā daṇḍadaṇḍinor yogo bhavati pṛthaksiddhayoḥ na ca tathā dravyadravyatve pṛthaksiddhe staḥ yady apṛthaksiddhayor api yogaḥ syād ākāśakusumasya prakṛtapruṣasya dvitīyaśirasaś ca yogaḥ syād iti atha pṛhtaksiddhir abhupagamyate dravyatvakalpanā nirarthikā guṇasamudāyo dravyam iti cet tatrāpi guṇānāṃ samudāyasya ca bhedābhāve tadvyapadeśo nopapadyate bhedābhyupagame ca pūrvokta eva doṣaḥ nanu guṇān dravanti guṇair vā drūyanta iti vigrahe 'pi sa eva doṣa iti cet na kathaṃcid bhedābhedopapattes tadvyapadeśasiddhiḥ vyatirekeṇānupalabdher abhedaḥ saṃjñālakṣaṇaprayojanādibhedād bheda iti prakṛtā dharmādayo bahavas tatsāmānādhikaraṇyād bahutvanirdeśaḥ syād etat saṃkhyānuvṛttivatpulliṅgānuvṛttir api prāpnoti naiṣa doṣaḥ āviṣṭaliṅgāḥ śabdā na kadācil liṅgaṃ vyabhicaranti ato dharmādayo dravyāṇi bhavantīti

anantaratvāc caturṇām eva dravyavyapadeśaprasaṃge 'dhyāropaṇārtham idam ucyate

'jīva' śabdo vyākhyātārthaḥ bahutvanirdeśo vyākhyātabhedapratipattyarthaḥ 'ca' śabdaḥ dravyasaṃjñānukarṣaṇārthaḥ jīvāś ca dravyāṇīti evam etāni vakṣyamāṇena kālena saha ṣaḍ dravyāṇi bhavanti nanu dravyasya lakṣaṇaṃ vakṣyate 'guṇaparyayavad dravyam' iti tallakṣaṇayogād dharmādīnāṃ dravyavyapadeśo bhavati nārthaḥ parigaṇanena parigaṇanam avadhāraṇārtham tenānyavādiparikalpitānāṃ pṛthivyādīnāṃ nivṛttiḥ kṛtā bhavati katham pṛthivyaptejovāyumanāṃsi pudgaladravye 'ntarbhavanti rūparasagandhasparśavatvāt vāyumanaso rūpādiyogābhava iti cet na vāyus tāvad rūpādimān sparśatvād ghaṭādivat cakṣurādikaraṇagrāhyatvābhāvād rūpādyabhāva iti cet na paramāṇvādiṣv atiprasaṅgaḥ syāt āpo gandhavatyaḥ sparśavatvāt pṛthivīvat tejo 'pi rasagandhavad rūpavattvāt tadvad eva mano 'pi dvividhaṃ dravyamano bhāvamanaś ceti tatra bhāvamano jñānam tasya jīvaguṇatvād ātmany antarbhāvaḥ dravyamanaś ca rūpādiyogāt pudgaladravyavikāraḥ rūpādivan manaḥ jñānopayogakaraṇatvāc cakṣurindriyavat nanu amūrte 'pi śabde jñānopayogakaraṇatvadarśanād vyabhicārī hetur iti cet na tasya paudgalikatvān mūrtimattvopapatteḥ nanu yathā paramāṇūnāṃ rūpādimatkāryadarśanād rūpādimattvaṃ na tathā vāyumanaso rūpādisatkāryaṃ dṛṣyate iti cet na teṣām api tadupapatteḥ sarveṣāṃ paramāṇūnāṃ sarvarūpādimatkāryatvaprāptiyogatvābhyupagamāt na ca kecit pārthivādijātiviśeṣayuktāḥ paramāṇavaḥ santi jātisaṃkareṇārambhadarśanāt diśo 'py ākāśe 'ntarbhāvaḥ ādityodayādyapekṣayā ākāśapradeśapaṅktiṣu ita idam iti vyavahāropapatteḥ

uktānāṃ dravyāṇāṃ viśeṣapratipattyartham āha

nityaṃ dhruvam ity arthaḥ 'ner dhruve tyaḥ' iti niṣpāditatvāt dharmādīni dravyāṇi gatihetutvādiviśeṣalakṣaṇadravyārthādeśād astitvādisāmānyalakṣaṇadravyārthādeśāc ca kadācid api na vyayantīti nityāni vakṣyate hi 'tadbhāvāvyayaṃ nityam' iti iyattā 'vyabhicārād avasthitāni dharmādīni ṣaḍ api dravyāṇi kadācid api ṣaḍ iti iyattvaṃ nātivartante tato 'vasthitānīty ucyante na vidyate rūpam eṣām ity arūpāṇi rūpapratiṣedhe tatsahacāriṇāṃ rasādīnām api pratiṣedaḥ tena arūpāṇy amūrtānīty arthaḥ

yathā sarveṣāṃ dravyāṇāṃ 'nityāvasthitāni' ity etat sādhāraṇaṃ lakṣaṇaṃ prāptaṃ tathā pudgalānām api arūpitvaṃ prāptam atas tadapavādārtham āha

rūpaṃ mūrtir ity arthaḥ kā mūrtiḥ rūpādisaṃsthānapariṇāmo mūrtiḥ rūpam eṣām astīti rūpiṇaḥ mūrtimanta ity arthaḥ athavā rūpam iti guṇaviśeṣavacanaśabdaḥ tadeṣām astīti rūpiṇaḥ rasādyagrahaṇam iti cet na tadavinābhāvāt tadantarbhāvaḥ 'pudgalāḥ' iti bahuvacanaṃ bhedapratipādanārtham bhinnā hi pudgalāḥ skandhaparamāṇubhedāt tadvikalpa upariṣṭād vakṣyate yadi pradhānavad arūpitvam ekatvaṃ ceṣṭaṃ syāt viśvarūpakāryadarśanavirodhaḥ syāt

āha kiṃ pudgalavad dharmādīny api dravyāṇi pratyekaṃ bhinnānīty atrocyate

'āṅ' ayam abhividhyarthaḥ sautrīm ānupūrvīm āsṛtyaitad uktam tena dharmā 'dharmākāśāni gṛhyante 'eka' śabdaḥ saṃkhyāvacanaḥ tena dravyaṃ viśiṣyate ekaṃ dravyaṃ ekadravyam iti yady evaṃ bahuvacanam ayuktam dharmādyapekṣayā bahutvasiddhir bhavati nanu ekasyānekārthapratyāyanaśaktiyogād ekaikam ity astu laghutvād 'dravya' grahaṇam anarthakam tathāpi dravyāpekṣayā ekatvakhyāpanārthaṃ dravyagrahaṇam kṣetrabhāvādyapekṣayā asaṃkhyeyatvānantatvavikalpasyeṣṭatvān na jīvapudgalavad eṣāṃ bahutvam ity etad anena khyāpyate

adhikṛtānām eva ekadravyāṇāṃ viśeṣapratipattyartham idam ucyate

ubhayanimittavaśād utpadyamānaḥ paryāyo dravyasya deśāntaraprāptihetuḥ kriyā tasyā niṣkrāntāni niṣkriyāṇi atra codyate dharmādīni dravyāṇi yadi niṣkriyāṇi tatas teṣām utpādo na bavet kriyāpūrvako hi ghaṭādīnām utpādo dṛṣṭaḥ utpādābhāvāc ca vyayābhāva iti ataḥ sarvadravyāṇām utpādāditritayakalpanāvyāghāta iti tan na kiṃ kāraṇam anyathopapatteḥ kriyānimittotpādābhāve 'py eṣāṃ dharmādīnām anyathotpādaḥ kalpyate tad yathā dvividha utpādaḥ svanimittaḥ parapratyayaś ca svanimittas tāvad anantānām agurulaghuguṇānām āgamaprāmāṇyād abhupagamyamānānāṃ ṣaṭ sthānapatitayā vṛddhyā hānyā ca pravartamānānāṃ svabhāvād eteṣām utpādo vyayaś ca parapratyayo 'pi aśvādigatisthityavagāhanahetutvāt kṣaṇe kṣaṇe teṣāṃ bhedāt taddhetutvam api bhinnam iti parapratyayāpekṣa utpādo vināśaś ca vyavahriyate nanu yadi niṣkriyāṇi dharmādīni jīvapudgalānāṃ gatyādihetutvaṃ nopapadyate jalādīni hi kriyāvanti matsyādīnāṃ gatyādinimittāni dṛṣṭānīti naiṣa doṣaḥ balādhānanimittatvāc cakṣurvat yathā rūpopalabdhau cakṣur nimittam iti na vyākṣiptamanaskasyāpi bhavati adhikṛtānāṃ dharmādharmākāśānāṃ niṣkriyatve 'bhyupagate jīvapudgalānāṃ sakriyatvam arthād āpannam kālasyāpi sakriyatvam iti cet na anadhikārāt ata evāsāv etaiḥ saha nādhikriyate

ajīvakāyā ity atra kāyagrahaṇena pradeśāstitvamātraṃ nirjñātaṃ na tv iyattāvadhāritā pradeśānām atas tannirdhāraṇārtham idam ucyate

saṃkhyām atītā asaṃkhyeyāḥ asaṃkhyeyās trividhaḥ jaghanya utkṛṣṭo 'jaghanyotkṛṣṭaś ceti tatrehājaghanyotkṛṣṭāsaṃkhyeyaḥ parigṛhyate pradiśyanta iti pradeśāḥ vakṣyamāṇalakṣaṇaḥ paramāṇuḥ sa yāvati kṣetre vyavatiṣṭhate sa pradeśa iti vyavahriyate dharmādharmaikajīvās tulyāsamkhyeyapradeśāḥ tatra dharmādharmo niṣkriyau lokākāśaṃ vyāpya sthitau jīvas tāvat pradeśo 'pi san saṃharaṇavisarpaṇasvabhāvatvāt karmanirvartitaṃ śarīram aṇu mahad vā 'dhitiṣṭhaṃs tāvad avagāhya vartate yadā tu lokapūraṇaṃ bhavati tadā mandarasyādhaś citravajrapaṭalamadhye jīvasyāṣṭau madhyapradeśā vyavatiṣṭhante itare pradeśā ūrdhvam adhas tiryak ca kṛtsnaṃ lokākāśaṃ vyaśnuvate

athākāśaya kati pradeśā ity ata āha

avidyamāno 'nto yeṣāṃ te anantāḥ ke pradeśāḥ kasya ākāśasya pūrvavad asyāpi pradeśakalpanā 'vaseyā

uktam amūrtānāṃ pradeśaparimāṇam idānīṃ mūrtānāṃ pudgalānāṃ pradeśaparimāṇaṃ nirjñātavyam ity ata āha

'ca' śabdād anantaś cety anukṛṣyate kasyacit pudgaladravyasya dvyaṇukādeḥ saṃkhyeyāḥ pradeśāḥ kasyacid asaṃkhyeyā anantāś ca anantānantopasaṃkhyānam iti cet na anantasāmānyāt anantapramāṇaṃ trividham uktam parītānantaṃ yuktānantam anantānantaṃ ceti tatsarvam anantasāmānyena gṛhyate syād etat asaṃkhyāt apradeśo lokaḥ anantapradeśasyānantānantapradeśasya ca skandasyādhikaraṇam iti virodhas tato nānantyam iti naiṣa doṣaḥ sūkṣmapariṇāmāvagāhanaśaktiyogāt paramāṇvādayo hi sūkṣmabhāvena pariṇatā ekaikasminn apy ākāśapradeśe 'nantānantā avatiṣṭhante avagāhanaśaktiś caiṣām avyāhatāsti tasmād ekasminn api pradeśe anantānantānām avasthānaṃ na virudhyate

'pudgalānām ity aviśeṣavacanāt paramāṇor api pradeśavattvaprasaṃge tatpratiṣedhārtham āha

aṇoḥ 'pradeśā na santi' śti vākyaśeṣaḥ kuto na santīti cet pradeśamātratvāt yathā ākāśapradeśasyaikasya pradeśabhedābhāvād apradeśatvam evam aṇor api pradeśamātratvāt pradeśabhedābhāvaḥ kiṃ ca tato 'lpaparimāṇābhāvāt na hy aṇor alpīyānanyo 'sti yato 'sya pradeśā bhidyeran

eṣām avadhṛtapradeśānāṃ dharmādīnām ādhārapratipattyartham idam ucyate

uktānāṃ dharmādīnāṃ dravyāṇāṃ lokākāśe 'vagāho na bāhir ity arthaḥ yadi dharmādīnāṃ lokākāśam ādhāraḥ ākāśasya ka ādhāra iti ākāśasya nāsty anya ādhāraḥ svapratiṣṭham ākāśam yady ākāśaṃ svapratiṣtiṣṭham dharmādīny api svapratiṣtiṣṭhāny eva atha dharmādīnāṃ anya ādhāraḥ kalpyate ākāśasyāpy anya ādhāra kalpyaḥ tathā saty anavasthāprasaṅga ity cet naiṣa doṣaḥ nākāśad anyad adhikaparimāṇaṃ dravyam asti yatrākāśaṃ sthitam ity ucyate sarvato 'nantaṃ hi tat dharmādīnāṃ punar adhikaraṇam ākāśam ity ucyate vyavahāranayavaśāt evambhūtanayāpekṣayā tu sarvāṇi dravyāṇi svapratiṣtiṣṭhāny eva tathā coktam kva bhavān āste ātmani iti dharmādīni lokākāśān na bahiḥ santīty etāvad atrādhārādheyakalpanāsādhyaṃ phalam nanu ca loke pūrvottarakālabhāvinām ādhārādheyabhāvo dṛṣto yathā kuṇḍe badarādīnām na tathākāśaṃ pūrvaṃ dharmādīny uttarakālabhāvīni ato vyavahāranayāpekṣayā 'pi ādhārādheyakalpanān upapattir iti naiṣa doṣaḥ yugpadbhāvinām api ādhārādheyabhāvo dṛśyate ghaṭe rūpādayaḥ śarīre hastādaya iti loka ity ucyate ko lokaḥ dharmādharmādīni dravyāṇi yatra lokyante sa loka iti adhikaraṇasādhano ghañ ākāśaṃ dvidhā vibhaktaṃ lokākāśam alokākāśaṃ ceti loka uktaḥ sa yatra tal lokākāśam tato bahiḥ sarvato 'nantam alokākāśam lokālokavibhāgaś ca dharmādharmāstikāyasadbhāvāsadbhāvād vijñeyaḥ asati hi tasmin dharmāstikāye jīvapudgalānāṃ gatiniyamahetvabhāvād vibhāgo na syāt asati cādharmāstikāye sthiter āśrayanimittābhāvāt sthiter abhāvo lokālokavibhagābhāvo vā syāt tasmād ubhayasadbhāvāsadbhāvāl lokālokavibhāgasiddhiḥ

tatrāvadhriyamāṇānām avasthānabhedasaṃbhavād viśeṣapratipattyartham āha

kṛtsnavacanam aśeṣavyāptipradarśanārtham agāre 'sthito ghaṭa iti yathā tathā dharmādharmayor lokākāśe 'vagāho na bhavati kiṃ tarhi kṛtsne tilesu tailavad iti anyonyapradeśapraveśavyāghātābhāvaḥ avagāhanaśaktiyogād veditavyaḥ

ato viparītānāṃ mūrtimatām apradeśasaṃkhyeyāsaṃkhyeyānantapradeśānāṃ pudgalānām avagāhaviśeṣapratipattyartham āha

ekaḥ pradeśa ekapradeśaḥ ekapradeśa ādir yeṣāṃ ta ime ekapradeśādayaḥ teṣu pudgalānām avagāho bhājyo vikalpyaḥ avayavena vigrahaḥ samudāyaḥ samāsārthaḥ iti ekapradeśo 'pi gṛhyate tad yathā ekasminn akāśapradeśe paramāṇor avagāhaḥ dvayor ekatrobhayatra ca baddhayor abaddhayoś ca trayāṇām apy ekatra dvayos triṣu ca baddhānām abaddhānāṃ ca evaṃ saṃkhyeyāsaṃkhyeyānantapradeśānāṃ skandhānām ekasaṃkhyeyāsaṃkhyeyapradeśeṣu lokākāśe 'vasthānaṃ pratyetavyam nanu yuktaṃ tāvad amūrttayor dharmādharmayor ekatrāvirodhenāvarodha iti mūrtimatāṃ pudgalānāṃ katham ity atrocyate avagāhanasvabhāvatvāt sūkṣmapariṇāmāc ca mūrtimatām apy avagāho na virudhyate ekāpavarake anekadīpaprakāśāvasthānavat āgamaprāmāṇyāc ca tathā 'dhyavaseyam tad uktam ogāḍhagāḍhaṇicio puggalakāehi savvado logo suhumehiṃ bādarehiṃ aṇaṃtāṇaṃtehiṃ vivahehiṃ

atha jīvānāṃ katham avagāhanam ity atrocyate

'lokākāśe'ity anuvartate tasyāsaṃkhyeyabhāgīkṛtasyaiko bhāgo 'saṃkhyeyabhāga ity ucyate sa ādir yeṣāṃ te 'saṃkhyeyabhāgādayaḥ teṣu jīvānām avagāho veditavyaḥ tad yathā ekasminn asaṃkhyeyabhāge eko jīvo 'vatiṣṭhate evaṃ dvitricaturādiṣv api asaṃkhyeyabhāgeṣu ā sarvalokād avagāhaḥ pratyetavyaḥ nānājīvānāṃ tu sarvaloka eva yady ekasminn asaṃkhyeyabhāge eko jīvo 'vatiṣṭhate kathaṃ dravyapramāṇenānantānanto jīvarāśiḥ saśarīro 'vatiṣṭhate lokākāśe sūkṣmabādarabhedād avasthānaṃ pratyetavyam bādarās tāvat sapratighātaśarīrāḥ sūkṣmās tu saśarīrā api sūkṣmabhāvād evaikanigodajīvāvagāhye 'pi pradeśe sādhāraṇaśarīrā anantānantā vasanti na te paraspareṇa bādaraiś ca vyāhanyanta iti nāsty avagāhavirodhaḥ

atrāha lokākāśatulyapradeśa ekajīva ity uktam tasya kathaṃ lokasyāsaṃkhyeyabhāgādiṣu vṛttiḥ nanu sarvalokavyāptyaiva bhavitavyam ity atrocyate

amūrtasvabhāvasyātmano 'nādibandhaṃ pratyekatvāt kathaṃcin mūrtatāṃ vibhrataḥ kārmaṇaśarīravaśān mahad aṇu ca śarīram adhitiṣṭhatas tadvaśāt pradeśasaṃharaṇavisarpaṇasvabhāvasya tāvat pramāṇatāyāṃ satyām asaṃkhyeyabhāgādiṣu vṛttir upapadyate pradīpavat yathā nirāvaraṇavyomapradeśe 'navadhṛtaprakāśaparimāṇasya pradīpasya śarāvamaṇikāpavarakādyāvaraṇavaśāt tatparimāṇateti atrāha dharmādīnām anyonyapradeśānupraveśāt saṃkare sati ekatvaṃ prāpnotīti tan na parasparam atyantasaṃśleṣe saty api svabhāvaṃ na jahati uktam ca aṇṇoṇṇaṃ pavisaṃtā diṃtā ogāsamaṇṇamaṇṇassa melaṃtā vi ya ṇiccaṃ sagasabbhāvaṃ ṇa jahaṃti

yady evaṃ dharmādīnāṃ svabhāvabheda ucyatām ity ata āha

deśāntaraprāptihetur gatiḥ tadviparītā sthitiḥ upagṛhyata ity upagrahaḥ gatiś ca sthitiś ca gatisthitī gatisthitī eva upagrahau gatisthityupagrahau dharmādharmayor iti kartṛnirdeśaḥ upakriyata ity upakāraḥ kaḥ punar asau gatyupagrahaḥ sthityupagrahaś ca yady evaṃ dvitvanirdeśaḥ prāpnoti naiṣa doṣaḥ sāmānyena vyutpāditaḥ śabda upāttasaṃkhyaḥ śabdāntarasaṃbandhe saty api na pūrvopāttāṃ saṃkhyāṃ jahāti yathā sādhoḥ kāryaṃ tapaḥśrute iti etad uktaṃ bhavati gatipariṇāmināṃ jīvapudgalānāṃ gatyupagrahe kartavye dharmāstikāyaḥ sādhāraṇāśrayo jalavanmatsyagamane tathā sthitipariṇāmināṃ jīvapudgalānāṃ sthityupagrahe kartavye adharmāstikāyaḥ sādhāraṇāśrayaḥ pṛthivīdhatur ivāśvādisthitāv iti nanu ca 'upagraha' vacanam anarthakam 'upakāraḥ' ity evaṃ siddhatvāt 'gatisthitī dharmādharmayor upakāraḥ' iti naiṣa doṣaḥ yathāsaṃkhyanivṛttyarthaṃ 'upagraha' vacanam dharmādharmayor gatisthityoś ca yathāsaṃkhyaṃ bhavati evaṃ jīvapudgalānāṃ yathāsaṃkhyaṃ prāpnoti dharmasyopakāro jīvānāṃ gatiḥ adharmasyopakāraḥ pudgalānāṃ sthitir iti tannivṛttyartham upagrahavacanaṃ kriyate āha dharmādharmayor ya upakāraḥ sa ākāśasya yuktaḥ sarvagatvād iti cet tad ayuktam tasyānyopakārasadbhāvāt sarveṣāṃ dharmādīnāṃ dravyāṇām avagāhanaṃ tatprayojanam ekasyānekaprayojanakalpanāyāṃ lokālokavibhāgābhāvaḥ bhūmijalādiny eva tatprayojanasamarthāni nārtho dharmādharmābhyām iti cet na sādhāraṇāśraya iti viśiṣyoktatvāt anekakāraṇasādhyatvāc caikasya kāryasya tulyabalatvāt tayor gatisthitipratibandha iti cet na aprerakatvāt anupalabdher na tau staḥ kharaviṣāṇavad iti cet na sarvapravādyavipratipatteḥ sarve hi pravādinaḥ pratyakṣāpratyakṣānarthān abhivāñchanti asmān prati hetor asiddheś ca sarvajñena niratiśayapratyakṣajñānacakṣuṣā dharmādayaḥ sarve upalabhyante tadupadeśāc ca śrutajñānibhir api

atrāha yady atīndriyayor dharmādharmayor upakārasaṃbandhenāstitvam avadhriyate tadanantaram uddiṣṭasya nabhaso 'tīndriyasyādhigame ka upakāra ity ucyate

'upakāraḥ' ity anuvartate jīvapudgalādīnāṃ avagāhinām avakāśadānam avagāha ākāśasyopakāro veditavyaḥ āha jīvapudgalānāṃ kriyāvatām avagāhinām avakāśadānaṃ yuktam dharmāstikāyādayaḥ punar niṣkriyā nityasaṃbandhās teṣāṃ katham avagāha iti cet na upacāratas tatsiddheḥ yathā gamanābhāve 'pi 'sarvagatam ākāśam' ity ucyate sarvatra sadbhāvāt evaṃ dharmādharmāv api avagāha kriyābhāve 'pi sarvatra vyāptidarśanād avagāhināv ity upacaryete āha yady avakāśadānam asya svabhāvo vajrādibhir loṣṭādīnāṃ bhittyādibhir gavādīnāṃ ca vyāghāto na prāpnoti dṛśyate ca vyāghātaḥ tasmād asyāvakāśadānaṃ hīyate iti naiṣa doṣaḥ vajraloṣṭādīnāṃ sthūlānāṃ parasparavyāghāta iti nāsyāvakāśadānasāmarthyaṃ hīyate tatrāvagāhinām eva vyāghātāt vajrādayaḥ punaḥ sthūlatvāt parasparaṃ pratyavakāśadānaṃ kurvantīti nāsāv ākāśadoṣaḥ ye khalu pudgalāḥ sūkṣmās te parasparaṃ pratyavakāśadānaṃ kurvanti yady evaṃ nedam ākāśasyāsādhāraṇaṃ lakṣaṇam itareṣām api tatsadbhāvād iti tan na sarvapadārthānāṃ sādhāraṇāvagāhanahetutvam asyāsādhāraṇaṃ lakṣaṇam iti nāsti doṣaḥ alokākāśe tadbhāvād abhāva iti cet na svabhāvāparityāgāt

ukta ākāśasyopakāraḥ atha tadanantaroddiṣṭānāṃ pudgalānāṃ ka upakāra ity atrocyate

idam ayuktam vartate kim atrāyuktam pudgalānāṃ ka upakāra ity paripraśne pudgalānāṃ lakṣaṇam ucyate śarīrādīni pudgalamayānīti naitad ayuktam pudgalānāṃ lakṣaṇam uttaratra vakṣyate idaṃ tu jīvān prati pudgalānām upakārapratipādanārtham eveti upakāraprakaraṇe ucyate śarīrāṇy uktāni audārikādīni saukṣmyād apratyakṣāṇi tadudayāpāditavṛttīny upacayaśarīrāṇi kānicit pratyakṣāṇi kānicid apratyakṣāṇi eteṣāṃ kāraṇabhūtāni karmāny api śarīragrahaṇena gṛhyante etāni paudgalikānīti kṛtvā jīvānām upakāre pudgalāḥ pravartante syān mataṃ kārmaṇam apaudgalikam anākāratvād ākāravatāṃ hi audārikādīni paudagalikatvaṃ yuktam iti tan na tad api paudagalikam eva tadvipākasya mūrtimatsambandhanimittatvāt dṛśyate hi vrīhyādīnām udakādidravyasaṃbandhaprāpitaparipākānāṃ paudagalikatvaṃ tathā kārmaṇam api guḍakaṇṭakādimūrtimaddravyopanipāte sati vipacyamānatvāt paudagalikaṃ ity avaseyam vāg dvividham dravyavāg bhāvavāg iti tatra bhāvavāk tāvad vīryāntarāyamatiśrutajñānāvaraṇakṣayopaśamāṅgopāṅganāmalābhanimittatvāt paudagalikī tadabhāve tadvṛttyabhāvāt tatsāmarthyopetena kriyāvatātmanā preryamāṇāḥ pudgalā vāktvena vipariṇamanta iti dravyavāg api paudgalikī śrotendriyaviṣayatvāt itarendriyaviṣayā kasmān na bhavati tadgrahaṇāyogyatvāt ghrāṇagrāhye gandhadravye rasādyanupalabdhivat amūrtā vāg iti cet na mūrtimadgrahaṇāvarodhavyāghātābhibhavādidarśanān mūrtimattvasiddheḥ mano dvividhaṃ dravyamano bhāvamanaś ceti bhāvamanas tāval labdhyupayogalakṣaṇaṃ pudgalāvalambanatvāt paudagalikam dravyamanaś ca jñānāvaraṇavīryāntarāyakṣayopaśamāṅgopāṅganāmalābhapratyayā guṇadoṣavicārasmaraṇādipranidhānābhimukhasyātmano 'nugrāhakāḥ pudgalā manas tv ena pariṇatā iti paudagalikam kaścid āha mano dravyāntaraṃ rūpādipariṇāmarahitam aṇumātraṃ tasya paudagalikatvaṃ ayuktam iti tad ayuktam katham ucyate tadindriyeṇātmanā ca saṃbaddhaṃ vā syād asaṃbaddham vā yady asaṃbaddham tannātmana upakārakaṃ bhavitum arhati indriyasya ca sācivyaṃ na karoti atha saṃbaddham ekasmin pradeśe saṃbaddhaṃ sat tad aṇu itareṣu pradeśeṣu upakāraṃ na kuryāt adṛṣṭavaśād asya alātacakravatparibhramaṇam iti cet na tatsāmarthyābhāvāt amūrtasyātmano niṣkriyasyādṛṣṭo guṇaḥ sa niṣkriyaḥ sann anyatra kriyārambhe na samarthaḥ dṛṣṭo hi vāyudravyaviśeṣaḥ kriyāvān sparśavān prāptavanaspatau parispandahetus tadviparītalakṣaṇaś cāyam iti kriyāhetutvābhāvaḥ vīryāntrāyajñānāvaraṇakṣayopaśamāṅgopāṅganāmodayāpekṣiṇātmanā udasyamānaḥ koṣṭhyo vāyur ucchvāsalakṣaṇaḥ prāṇa ity ucyate tenaivātmanā bāhyo vāyur abhyantarīkriyamāṇo niḥsvāsalakṣaṇo 'pāna ity ākhyāyate evaṃ tāv apy ātmānugrāhiṇau jīvitahetutvāt teṣāṃ manaḥprāṇāpānānāṃ mūrtimattvam avaseyam kutaḥ mūrtimadbhiḥ pratighātādidarśanāt pratibhayahetubhir aśanipātādibhir manasaḥ pratighāto dṛśyate surādibhiś cābhibhavaḥ hastatalapaṭādibhir āsyasaṃvaraṇāt prāṇāpānayoḥ pratighāta upalabhyate śleṣmaṇā cābhibhavaḥ na cāmūrtasya mūrtimadbhir abhighātādayaḥ syuḥ ata evātmāstitvasiddhiḥ yathā yantrapratimāceṣṭitaṃ prayoktur astitvaṃ gamayati tathā prāṇāpānādikarmāpi kriyāvantam ātmānaṃ sādhayati

kim etāvān eva pudgalakṛta upakāra āhosvid anyo 'py astīty ata āha

sadasadvedyodaye 'ntaraṅgahetau sati bāhyadravyādiparipākanimittavāśād utpadyamānaḥ prītiparitāparūpaḥ pariṇāmaḥ sukhaduḥkham ity ākhyāyate bhavadhāranakāraṇāyurākhyakarmodayāt bhavasthitim ādadhānasya jīvasya pūrvoktaprāṇāpānakriyāviśeṣāvyucchedo jīvitam ity ucyate taducchedo maraṇam etani sukhādīni jīvasya pudgalakṛta upakāraḥ mūrtimaddhetusaṃnidhāne sati tadutpatteḥ upakārādhikārāt 'upagraha' vacanam anarthakam nānarthakam svopagrahapradarśanārtham idam pudgalānāṃ pudgalakṛta upakāra iti tad yathā kāṃsyādīnāṃ bhasmādibhir jalādīnāṃ katakādibhir ayaḥprabhṛtīnām udakādibhir upakāraḥ kriyate 'ca' śabdaḥ kim arthaḥ samuccayārthaḥ anyo 'pi pudgalakṛta upakāro 'stīti samuccīyate yathā śarīrāṇi evaṃ caksurādinīndriyāṇy apīti

evam ādyam ajīvakṛtam upakāraṃ pradarśya jīvakṛtopakārapradarśanārtham āha

'paraspara' śabdaḥ karmavyatihāre vartate karmavyatihāraś ca kriyāvyatihāraḥ parasparasyopagrahaḥ parasparopagrahaḥ jīvānām upakāraḥ kaḥ punar asau svāmī bhṛtyaḥ ācāryaḥ śiṣyaḥ ity evam ādibhāvena vṛttiḥ parasparopagrahaḥ svāmī tāvad vittatyāgādinā bhṛtyānām upakare vartate bhṛtyāś ca hitapratipādanenāhitapratiṣedhena ca ācārya ubhayalokaphalapradopadeśadarśanena tadupadeśavihitakriyānuṣṭhāpanena ca śiṣyāṇām anugrahe vartate śiṣyā api tadanukūlyavṛttyā ācāryāṇām upakārādhikāre punaḥ 'upagraha' vacanaṃ kim artham pūrvoktasukhādicatuṣṭayapradarśanārthaṃ punaḥ 'upagraha' vacanaṃ kriyate sukhādīny api jīvānāṃ jīvakṛta upakāra iti

āha yady avaśyaṃ satopakāriṇā bhavitavyam saṃś ca kālo 'bhimatas tasya ka upakāra ity atrocyate

vṛtter ṇijatantāt karmaṇi bhāve vā yuṭi strīliṃge vartaneti bhavati vartyate vartanamātraṃ vā vartanā iti dharmādīnāṃ dravyāṇāṃ svaparyāyanivṛttiṃ prati svātmanaiva vartamānānāṃ bāhyopagrahād vinā tadvṛttyabhāvāt tatpravartanopalakṣitaḥ kāla iti kṛtvā vartanā kālasyopakāraḥ ko nij arthaḥ vartate dravyaparyāyas tasya vartayitā kālaḥ yady evaṃ kālasya kriyāvattvaṃ prāpnoti yathā śiṣyo 'dhīte upādhyāyo 'dhyāpayatīti naiṣa doṣaḥ nimittamātre 'pi hetukartṛ vyapadeśo dṛṣṭaḥ yathā kārīṣo 'gnir adhyāpayati evaṃ kālasya hetukartṛtā sa kathaṃ kāla ity avasīyate samayādīnāṃ kriyāviśeṣāṇāṃ samayādibhir nirvartyamānānāṃ ca pākādīnāṃ samayaḥ pāka ity evam ādi svasaṃjñārūḍhisadbhāve 'pi samayaḥ kālaḥ odanapākaḥ kāla iti adhyāropyamāṇaḥ kālavyapadeśas tadvyapadeśanimittasya kālasyāstitvaṃ gamayati kutaḥ gauṇasya mukhyāpekṣatvāt dravyasya paryāyo dharmāntaranivṛttidharmāntaropajananarūpaḥ aparispandātmakaḥ pariṇāmaḥ jīvasya krodhādiḥ pudgalasya varṇādiḥ dharmādharmākāśānām agurulaghuguṇavṛddhihānikṛtaḥ kriyā parispandātmikā sā dvividhā prāyogikavaisrasikabhedāt tatra prāyogikī śakaṭādīnām vaisrasikī meghādīnām paratvāparatve kṣetrakṛte kālakṛte ca staḥ tatra kālopakāraprakaraṇāt kālakṛte gṛhyete ta ete vartanādaya upakārāḥ kālasyāstitvaṃ gamayanti nanu 'vartanā' grahaṇam evāstu tadbhedāḥ pariṇāmādayas teṣāṃ pṛthaggrahaṇam anarthakam nānarthakam kāladvayasūchanārthatvat prapañcasya kālo hi dvividhaḥ paramārthakālo vyavahārakālaś ca paramārthakālo vartanālakṣaṇaḥ pariṇāmādilakṣaṇo vyavahārakālaḥ anyena paricchinnaḥ anyasya paricchedahetuḥ kriyāviśeṣaḥ kāla iti vyavahriyate sa tridhā vyavatiṣṭhate bhūto vartamāno bhaviṣyann iti tatra paramārthakāle kālavyapadeśo mukhyaḥ bhūtādivyapadeśo gauṇaḥ vyavahārakāle bhūtādivyapadeśo mukhyaḥ kālavyapadeśo gauṇaḥ kriyāvaddravyāpekṣatvāt kālakṛtatvāc ca atrāha dharmādharmākāśapudgalajīvakālānām upakārā uktāḥ lakṣaṇaṃ coktam 'upayogo lakṣaṇam' ity evam ādi pudgalānāṃ nu sāmānyalakṣaṇam uktam 'ajīvakāyāḥ' iti viśeṣalakṣaṇaṃ noktam tat kim ity atrocyate

sprśyate sparśanamātraṃ vā sparśaḥ so 'ṣṭavidhaḥ mṛdukaṭhinagurulaghuśītoṣṇasnigdharūkṣabhedāt rasyate rasanamātraṃ vā rasaḥ sa pañcavidhaḥ tiktāmlakaṭukamadhurakaṣāyabhedāt gandhyate gandhanamātraṃ vā gandhaḥ sa dvedhā surabhir asurabhir iti varṇyate varṇanamātraṃ vā varṇaḥ sa pañcavidhaḥ kṛṣṇalīlapītaśuklalohitabhedāt ta ete mūlabhedāḥ pratyekaṃ saṃkheyāsaṃkhyeyānantabhedāś ca bhavanti sparśaś ca rasaś ca gandhaś ca varṇaś ca sparśarasagandhavarṇās ta eteṣāṃ santīti sparśarasagandhavarṇavanta iti nityayoge matunirdeśaḥ yathā kṣīriṇo nyagrodhā iti nanu ca rūpiṇaḥ pudgalā ity atra pudgalānāṃ rūpavattvam uktaṃ tadavinābhāvinaś ca rasādayas tatraiva parigṛhītā iti vyākhyātaṃ tasmāt tenaiva pudgalānāṃ rūpādimattvasiddheḥ sūtram idam anarthakam iti naiṣa doṣaḥ 'nityāvasthitāny arūpāṇi' ity atra dharmādīnāṃ nityatvādinirūpaṇena pudgalānām arūpitvaprasaṃge tadapākaraṇārthaṃ taduktam idaṃ tu teṣām svarūpaviśeṣapratipattyartham ucyate

avaśiṣṭapudgalavikārapratippattyartam idam ucyate

śabdo dvividhaḥ bhāṣālakṣaṇo viparītaś ceti bhāṣālakṣaṇo dvividhaḥ sākṣaro 'nakṣaraś ceti akṣarīkṛtaḥ śāstrābhivyañjakaḥ saṃskṛtaviparītabhedād āryamlecchavyavahārahetuḥ anakṣarātmako dvīndriyādīnām atiśayajñānasvarūpapratipādanahetuḥ sa eṣa sarvaḥ prāyogikaḥ abhāṣātmako dvividhaḥ prāyogiko vaisrasikaś ceti vaisrasiko valāhakādiprabhavaḥ prāyogikaś caturdhā tatavitataghanasauṣirabhedāt tatra carmatanananimittaḥ puṣkarabherīdardurādiprabhavas tataḥ tantrīkṛtavīṇāsughoṣādisamudbhavo vitataḥ tālaghaṇṭālālanādyabhighātajo ghanaḥ vaṃśaśaṃkhādinimittaḥ sauṣiraḥ bandho dvividhaḥvaisrasikaḥ prāyogikaś ca puruṣaprayogānapekṣo vaisrasikaḥ tad yathāsnigdharūkṣatvaguṇanimitto vidyudulkājaladhārāgnīndradhanurādivṣayaḥ puruṣaprayoganimittaḥ prāyogikaḥ ajīvaviṣayo jīvājīvaviṣayaś ceti dvidhā bhinnaḥ tatrājīvaviṣayo jatukāṣṭhādilakṣaṇaḥ jīvājīvaviṣayaḥ karmanokarmabandhaḥ saukṣmyaṃ dvividhaṃ antyam āpekṣikaṃ ca tatrāntyaṃ paramāṇūnāṃ āpekṣikaṃ vilvāmalakabadarādīnām sthaulyam api dvividham antyam āpekṣikaṃ ceti tatrāntyaṃ jagadvyāpini mahāskandhe āpekṣikam badarāmalakavilvatālādiṣu saṃsthānam ākṛtiḥ tad dvividham itthaṃlakṣaṇam anitthaṃlakṣaṇaṃ ceti vṛttatryasracaturasrāyataparimaṇḍalādīnām itthaṃlakṣaṇam ato 'nyan meghādīnāṃ saṃsthānam anekavidham ittham idam iti nirūpaṇābhāvād anitthaṃlakṣaṇam bhedāḥ ṣoḍhā utkaracūrṇakhaṇḍacūrṇikāpratarāṇucaṭanavikalpāt tatrotkaraḥ kāṣṭhādīnāṃ karapatrādibhir utkaraṇam cūrṇo yavagodhūmādīnāṃ saktukaṇikādiḥ khaṇḍo ghaṭādīnāṃ kapālaśarkarādiḥ cūrṇikā māṣamudgādīnām prataro 'bhrapaṭalādīnām aṇucaṭanaṃ san taptāyaḥ piṇḍādiṣu ayoghanādibhir abhihanyamāneṣu sphuliṅganirgamaḥ tamo dṛṣṭipratibandhakāraṇaṃ prakāśavirodhi chāyā prakāśāvaraṇanimittā sā dvedhā varṇādivikārapariṇatā pratibimbhamātrātmikā ceti ātapa ādityādinimitta uṣṇaprakāśalakṣaṇaḥ udyotaś candramaṇikhadyotādiprabhavaḥ prakāśaḥ ta ete śabdādayaḥ pudgaladravyavikārāḥ ta eṣāṃ santīti śabdabandhasaukṣmyasthaulyasaṃsthānabhedatamaśchāyātapodyotavantaḥ pudgalā ity abhisaṃbadyate 'ca' śabdena nodanābhighātādayaḥ pudgalapariṇāmā āgame prasiddhāḥ samuccīyante

uktānāṃ pudgalānāṃ bhedapradarśanārtham āha

pradeśamātrabhāvisparśādiparyāyaprasavasāmarthyenāṇyante śabdyanta ity aṇavaḥ saukṣmyād ātmādaya ātmamadhyā ātmāntāś ca uktaṃ ca attādi attamajjhaṃ attaṃtaṃ ṇeva iṃdiye gejjhaṃ jaṃ davvaṃ avibhāgī taṃ paramāṇuṃ viāṇāhi sthūlabhāvena grahaṇanikṣepaṇādivyāpāraskandhanāt skandhā iti saṃjñāyante rūḍhau kriyā kvacit satī upalakṣaṇatvenāśrīyate iti grahaṇādivyāpārāyogyeṣv api dvyaṇukādiṣu skandhākhyā pravartate anantabhedā api pudgalā aṇujātyā skandhajātyā ca dvaividhyam āpadyamānāḥ sarve gṛhyanta iti tajjātyādhārānantabhedasaṃsūcanārthaṃ bahuvacanaṃ kriyate aṇavaḥ skandā iti bhedābhidhānaṃ pūrvoktasūtradvayabhedasaṃbandhanārtham sparśarasagandhavarṇavanto 'ṇavaḥ skandhāh punaḥ śabdabandhasaukṣmyasthaulyasaṃsthānabhedatamaśchāyātapodyotavantaś ca sparśādimantaś ceti

āha kim eṣāṃ pudgalānām aṇuskandhalakṣaṇaḥ pariṇāmo 'nādir uta ādimān ity ucyate sa khalūtpattimattvād ādimān pratijñāyate yady evaṃ tasmād abhidhīyatāṃ kasmān nimittād utpadyanta iti tatra skandhānāṃ tāvad utpattihetupratipādanārtham ucyate

saṃghātānāṃ dvitayanimittavaśād vidāraṇam bhedaḥ pṛthagbhūtānām ekatvāpattiḥ saṃghātaḥ nanu ca dvitvād dvivacanena bhavitavyam bahuvacananirdeśas tritayasaṃgrahārthaḥ bhedāt saṃghātād bhedasaṃghātābhyām ca utpadyanta iti tad yathā dvayoḥ paramāṇvoḥ saṃghātād dvipradeśaḥ skandha utpadyate dvipradeśasyāṇoś ca trayāṇām vā aṇūnāṃ saṃghātāt tripradeśaḥ dvayor dvipradeśayos tripradeśasyāṇoś ca caturṇāṃ vā aṇūnāṃ saṃghātāc catuḥpradeśaḥ evaṃ saṃkheyāsaṃkhyeyānantānām anantānantānāṃ ca saṃghātāt tāvat pradeśaḥ eṣām eva bhedāt tāvad dvipradeśaparyantāḥ skandhā utpadyante evaṃ bhedasaṃghātābhyām ekasamayikābhyāṃ dvipradeśādayaḥ skandhā utpadyante anyato bhedenānyasya saṃghāteneti evaṃ skandhānām utpattihetur uktaḥ

aṇor utpattihetupradarśanārtham āha

siddhe vidhir ārabhyamāṇo niyamārtho bhavati aṇor utpattir bhedād eva na saṃghātān nāpi bhedasaṃghātābhyām iti

āha saṃghātād eva skandhānām ātmalābhe siddhe bhedasaṃghātagrahaṇam anarthakam iti tadgrahaṇaprayojanapratipādanārtham idam ucyate

anantānantapramāṇusamudayaniṣpādyo 'pi kaścic cākṣuṣaḥ kaścid acākṣuṣaḥ tatra yo 'cākṣuṣaḥ sa kathaṃ cākṣuṣo bhavatīti ced ucyate bhedasaṃghātābhyāṃ cākṣuṣaḥ na bhedād iti kātropapattir iti cet brūmaḥ sūkṣmapariṇāmasya skandhasya bhede saukṣmyāparityāgād acākṣuṣatvam eva saukṣmyapariṇataḥ punar aparaḥ saty api tadbhede 'nyasaṃghātāntarasaṃyogāt saukṣmyapariṇamoparame sthaulyotpattau cākṣuṣo bhavati

āha dharmādīnām dravyāṇāṃ viśeṣalakṣaṇāny uktāni sāmānyalakṣaṇaṃ noktam tadvaktavyam ucyate

yat sat tad dravyam ity arthaḥ

yady evaṃ tad eva tāvad vaktavyaṃ kiṃ sat ity ata āha

cetanasyācetanasya vā dravyasya svāṃ jātim ajahata ubhayanimittavaśād bhāvāntarāvāptir utpādanam utpādaḥ mṛtpiṇḍasya ghaṭaparyāyavat tathā pūrvabhāvavigamanaṃ vyayaḥ yathā ghaṭotpattau piṇḍākṛte anādipāriṇāmikasvabhāvena vyayodayābhāvād dhruvati sthirībhavatīti dhruvaḥ dhruvasya bhāvaḥ karma vā dhrauvyam yathā mṛtpiṇḍaghaṭādyavasthāsu mṛdādyanvayaḥ tair utpādavyayadhrauvyair yuktaṃ utpādavyayadhrauvyayuktaṃ sad iti āha bhede sati yuktaśabdo dṛṣṭaḥ yathā daṇḍena yukto devadatta iti tathā sati teṣāṃ trayāṇāṃ tair yuktasya dravyasya cābhāvaḥ prāpnoti naiṣa doṣaḥ abhede 'pi kathaṃcid bhedanayāpekṣayā yuktaśabdo dṛṣṭaḥ yathā sārayuktaḥ sthambha iti tathā sati teṣām avinābhāvāt sadvyapadeśo yuktaḥ samādhivacano vā yuktaśabdaḥ yuktaḥ samāhitas tadātmaka ity arthaḥ utpādavyayadhrauvyayuktaṃ sat utpādavyayadhrauvyātmakam iti yāvat etad uktaṃ bhavati utpādādīni dravyasya lakṣaṇāni dravyaṃ lakṣyam tatra paryāyārthikanayāpekṣayā parasparato dravyāc cārthāntarabhāvaḥ dravyārthikanayāpekṣayā vyatirekeṇānupalabdher anarthāntarabhāvaḥ iti lakṣyalakṣaṇabhāvasiddhiḥ

āha 'nityāvasthitāny arūpāṇi' ity uktaṃ tatra na jñāyate kiṃ nityam ity ata āha

'tadbhāvaḥ' ity ucyate kas tadbhāvaḥ pratyabhijñānahetutā tad evedam iti smaraṇaṃ pratyabhijñānam tad akasmān na bhavatīti yo 'sya hetuḥ sa tadbhāvaḥ bhavanaṃ bhāvaḥ tasya bhāvas tadbhāvaḥ yenātmanā prāgdṛṣṭaṃ vastu tenaivātmanā punar api bhāvāt tad evedam iti pratyabhijñāyate yady atyantanirodho 'bhinavaprādurbhāvamātram eva vā syāt tataḥ smaraṇānupapattiḥ tadadhīno lokasaṃvyavahāro virudhyate tatas tadabhāvenāvyayaṃ tadbhāvāvyayaṃ nityam iti niścīyate tat tu kathaṃcid veditavyam sarvathā nityatve anyathābhāvābhāvāt saṃsāratadvinivṛttikāraṇaprakriyāvirodhaḥ syāt

nanu idam eva viruddhaṃ tad eva nityaṃ tad evānityam iti yadi nityaṃ vyayodayābhāvād anityatāvyāghātaḥ athānityam eva sthityabhāvān nityatāvyāghāta iti naitad viruddham kutaḥ

anekāntātmakasya vastunaḥ prayojanavaśād yasya kasyacid dharmasya vivakṣayā prāpitaṃ prādhānyam arpitam upanītam iti yāvat tadviparītam anarpitam prayojanābhāvāt sato 'py avivakṣā bhavatīty upasarjanībhūtam anarpitam ity ucyate arpitaṃ cānarpitaṃ cārpitānanarpite tābhyāṃ siddher arpitānanarpitasiddher nāsti virodhaḥ tad yathā ekasya devadattasya pitā putro bhrātā bhāgineya ity evam ādayaḥ saṃbandhā janakatvajanyatvādinimittā na virudhyante arpaṇābhedāt putrāpekṣayā pitā pitrapekṣayā putra ity evam ādiḥ tathā dravyam api sāmānyārpaṇayā nityam viśeṣārpaṇayānityam iti nāsti virodhaḥ tau ca sāmānyaviśeṣau kathaṃcid bhedābhedābhyāṃ vyavahārahetū bhavataḥ

atrāha sato 'nekanayavyavahāratantratvāt upapannā bhedasaṃghātebhyaḥ satāṃ skandhātmanotpattiḥ idaṃ tu saṃdigdham kiṃ saṃghātaḥ saṃyogād eva dvyaṇukādilakṣaṇo bhavati uta kaścid viśeṣo 'vadhriyata iti ucyate 'sati saṃyoge bandhād ekatvapariṇāmātmakāt saṃghāto niṣpadyate yady evam idam ucyatāṃ kuto nu khalu pudgalajātyaparityāge saṃyoge ca sati bhavati keṣāṃcid bandho 'nyeṣāṃ ca neti ucyate yasmāt teṣāṃ pudgalātmāviśeṣe 'py anantaparyāyāṇāṃ parasparavilakṣaṇapariṇāmād āhitasāmartyād bhavanpratītaḥ

bāhyābhyantarakāraṇavaśāt snehaparyāyāvirbhāvāt snihyate smeti snigdhaḥ tathā rūkṣaṇād rūkṣaḥ snigdhaś ca rūkṣaś ca snigdharūkṣau tayor bhāvaḥ snigdharūkṣatvam snigdhatvaṃ cikkaṇaguṇalakṣaṇaḥ paryāyaḥ tadviparītapariṇāmo rūkṣatvam 'snigdharūkṣatvāt' iti hetunirdeśaḥ tatkṛto bandho dvyaṇukādipariṇāmaḥ dvayoḥ snigdharūkṣayor aṇvoḥ parasparaśleṣalakṣaṇe bandhe sati dvyaṇukaskandho bhavati evaṃ saṃkhyeyāsaṃkheyānantapradeśaḥ skandho yojyaḥ tatra snehaguṇa ekadvitricatuḥ saṃkhyeyāsaṃkheyānantavikalpaḥ tathā rūkṣaguṇo 'pi tadguṇāḥ paramāṇavaḥ santi yathā toyājāgomahiṣyuṣṭrīkṣīraghṛteṣu snehaguṇaḥ prakarṣāprakarśeṇa pravartate pāṃśukaṇikāśarkarādiṣu ca rūkṣaguṇo dṛṣṭaḥ tathā paramāṇuṣv api snigdharūkṣaguṇayor vṛttiḥ prakarṣāprakarśeṇānumīyate

snigdharūkṣatvaguṇanimitte bandhe aviśeṣeṇa prasakte aniṣṭaguṇanivṛttyartham āha

jaghanyo nikṛṣṭaḥ guṇo bhāgaḥ jaghanyo guṇo yeṣām te jaghanyaguṇāḥ teṣāṃ jaghanyaguṇānāṃ nāsti bandhaḥ tad yathā ekaguṇasnigdhasyaikaguṇasnigdhena dvyādisaṃkhyeyāsaṃkheyānantaguṇasnigdhena vā nāsti bandhaḥ tasyaivaikaguṇasnigdhasya ekaguṇarūkṣeṇa dvyādisaṃkhyeyāsaṃkheyānantaguṇarūkśeṇa vā nāsti bandhaḥ tathā ekaguṇarūkṣasyāpi yojyam iti

etau jaghanyaguṇasnigdharūkṣau varjayitvā anyeṣāṃ snigdhānāṃ rūkṣāṇāṃ ca paraspareṇa bandho bhavatīty aviśeṣeṇa prasaṃge tatrāpi pratiṣedhaviṣayakhyāpanārtham āha

'sadṛśa' grahaṇaṃ tulyajatīyasaṃpratyayārtham 'guṇasāmya' grahaṇaṃ tulyabhāgasaṃpratyayārtham etad uktaṃ bhavati dviguṇasnigdhānāṃ dviguṇarūkṣaiḥ triguṇasnigdhānāṃ dviguṇarūkṣaiḥ dviguṇasnigdhānāṃ dviguṇasnigdhaiḥ dviguṇarūkṣāṇāṃ dviguṇarūkṣaiś caityevam ādiṣu nāsti bandha iti yady evaṃ 'sadṛśa' grahaṇaṃ kim artham guṇavaiṣamye sadṛśānām api bandhapratipattyarthaṃ 'sadṛśa' grahaṇaṃ kriyate

ato viṣamaguṇānāṃ tulyajātīyānām atulyajātīyānām cāniyamena bandhaprasaktau iṣṭārthasaṃpratyayārtham idam ucyate

dvābhyāṃ guṇābhyām adhiko dvyadhikaḥ kaḥ punar asau caturguṇaḥ 'ādi' śabdaḥ prakārārthaḥ kaḥ punar asau prakāraḥ dvyadhikatā tena pañcaguṇādīnāṃ sampratyayo na bhavati tena dvyadhikādiguṇānāṃ tulyajātīyānām atulyajātīyānām ca bandha ukto bhavati netareṣām tad yathā dviguṇasnigdhasya paramāṇor ekaguṇasnigdhena dviguṇasnigdhena triguṇasnigdhena vā nāsti bandhaḥ caturguṇasnigdhena punar asti bandhaḥ tasyaiva punar dviguṇasnigdhasya pañcaguṇasnigdhena ṣaṭsaptāṣṭasaṃkhyeyānantaguṇasnigdhena vā bandho nāsti evaṃ triguṇasnighdasya pañcaguṇasnigdhena bandho 'sti śeṣaiḥ pūrvottariar na bhavati caturguṇasnigdhasya ṣaḍguṇasnigdhenāsti bandhaḥ śeṣaiḥ pūrvottarair nāsti evaṃ śeṣeṣv api yojyaḥ tathā dviguṇarūkṣasya ekadvitriguṇarūkṣair nāsti bandhaḥ caturguṇarūkṣeṇa tv asti bandhaḥ tasyaiva dviguṇarūkṣasya pañcaguṇarūkṣādibhir uttariar nāsti bandhaḥ evaṃ triguṇarūkṣādīnām api dviguṇādhikair bandho yojyaḥ evaṃ bhinnajātīyeṣv pi yojyaḥ uktaṃ ca ṇiddhassa ṇiddhe ṇa durādhieṇa lukkhassa lukkheṇa durādhieṇa ṇiddhassa lukkheṇa havei baṃdho jahaṇṇavajjo visame same vā 'tu' śabdo viśeṣaṇārthaḥ pratiṣedhaṃ vyāvartayati bandhaṃ ca viśeṣayati

kim artham adhikaguṇaviṣayo bandho vyākhyāto na samaguṇaviṣaya ity ata āha

adhikārād 'guṇa' śabdaḥ saṃbadyate adhikaguṇāv adhikāv iti bhāvāntarāpādanaṃ pāriṇāmikatvaṃ klinnaguḍavat yathā klinno guḍo 'dhikamadhurarasaḥ parītānāṃ reṇvādīnāṃ svaguṇāpādanāt pāriṇāmikaḥ tathānyo 'py adhikaguṇa alpīyasaḥ pāriṇāmika iti kṛtvā dviguṇādisnigdharūkṣasya caturguṇādisnigdharūkṣaḥ pāriṇāmiko bhavati tataḥ pūrvāvasthāpracyavanapūrvakaṃ tārtīyikam avasthāntaraṃ prādurbhavatīty ekatvam upapadyate itarathā hi śuklakṛṣṇatantuvat saṃyoge saty apy apāriṇāmikatvāt sarvaṃ viviktarūpeṇaivāvatiṣṭheta uktena vidhinā bandhe punaḥ sati jñānāvaraṇādīnāṃ karmaṇāṃ triṃśatsāgaropamakoṭikoṭyādisthitir upapanna bhavati

'utpādavyayadhrauvyayuktaṃ sat' iti dravyalakṣaṇam uktaṃ punar apareṇa prakāreṇa dravyalakṣaṇapratipādanārtham āha

guṇāś ca paryayāś ca guṇaparyayāḥ te 'sya santīti guṇaparyayavad dravyam atra mator utpattāv ukta eva samādhiḥ kathaṃcid bhedopapatter iti ke guṇāḥ ke paryāyāḥ anvayino guṇā vyatirekiṇaḥ paryāyāḥ ubhayair upetaṃ dravyam iti uktaṃ ca guṇa idi davvavihāṇaṃ davvavikāro hi pajjavo bhaṇido tehi aṇūṇaṃ davvaṃ ajudapasiddhaṃ have ṇiccaṃ iti etad uktaṃ bhavati dravyaṃ dravyāntarād yena viśiṣyate sa guṇaḥ tena hi tad dravyaṃ vidhīyate asati tasmin dravyasaṃkaraprasṅgaḥ syāt tad yathā jīvaḥ pudgalādibhyo jñānādibhir guṇair viśiṣyate pudgalādayaś ca rūpādibhiḥ tataś cāviśeṣe saṃkaraḥ syāt tataḥ sāmānyāpekṣayā anvayino jñānādayo jīvasya guṇāḥ pudgalādīnāṃ ca rūpādayaḥ teṣāṃ vikārā viśeṣātmanā bhidyamānāḥ paryāyāḥ ghaṭajñānaṃ paṭajñānaṃ krodho māno gandho varṇas tīvro manda ity evam ādayaḥ tebhyo 'nyatvaṃ kathaṃcid āpadyamānaḥ samudāyo dravyavyapadeśabhāk yadi hi sarvathā samudāyo 'narthāntarabhūta eva syāt sarvābhāvaḥ syāt tad yathā parasparavilakṣaṇānāṃ samudāye sati ekānarthāntarabhāvāt samudāyasya sarvābhāvaḥ parasparato 'rthāntarabhūtatvāt yadi idaṃ rūpaṃ tasmād arthāntarabhūtā rasādayaḥ tataḥ samudāyo 'narthāntarabhūtaḥ yaś ca rasādibhyo 'rthantarabhūtād rūpād anarthāntarabhūtaḥ samudāyaḥ sa kathaṃ rasādibhyo 'rthāntarabhūto na bhavet tataś ca rūpamātraṃ samudāyaḥ prasaktaḥ na caikaṃ rūpaṃ samudāyo bhavitum arhati tataḥ samudāyābhāvaḥ samudāyābhāvāc ca tadanarthāntarabhūtānāṃ samudāyinām apy abhāva iti sarvābhāvaḥ evaṃ rasādiṣv api yojyam tasmāt samudāyam icchatā kathaṃcid arthāntarabhāva eṣitavyaḥ

uktānāṃ dravyāṇāṃ lakṣaṇanirdeśāt tadviṣaya eva dravyādhyavasāye prasakte anuktadravyasaṃsūcanārtham āha

kim 'dravyam' iti vyākyaśeṣaḥ kataḥ tallakṣaṇopetatvāt dvividhaṃ lakṣaṇam uktam 'utpādavyayadhrauvyayuktaṃ sat' 'guṇaparyayavad dravyam' iti ca tadubhayaṃ lakṣaṇaṃ kālasya vidyate tad yathā dhrauvyaṃ tāvat kālasya svapratyayaṃ svabhāvavyavasthānāt vyayodayau parapratyayau agurulaghuguṇavṛddhihāny apekṣayā svapratyayau ca tathā guṇā api kālasya sādhāraṇāsādhāraṇarūpāḥ santi tatrāsādhāraṇo vartanāhetutvam sādhāraṇāś cācetanatvāmūrtatvasūkṣmatvāgurulaghutvādayaḥ paryāyaś ca dravyotpādalakṣaṇā yojyāḥ tasmād dviprakāralakṣaṇopetatvād ākāśādivat kālasya dravyatvaṃ siddham tasyāstitvaliṃgaṃ dharmādivad vyākhyātam 'vartanālakṣaṇaḥ kālaḥ' iti nanu kim artham ayaṃ kālaḥ pṛthag ucyate yatraiva dharmādaya uktās tatraivāyam api vaktavyaḥ 'ajīvakāyā dharmādharmākāśakālapudgalāḥ' iti naivaṃ śaṅkhyam tatroddeśe sati kāyatvam asya syāt neṣyate ca mukyopacārapradeśapracayakalpanābhāvāt dharmādīnaṃ tāvan mukyapradeśapracaya uktaḥ 'asaṃkhyeyāḥ pradeśāḥ' ity evam ādinā aṇor apy ekapradeśasya pūrvottarabhāvaprajñāpananayāpekṣayopacārakalpanayā pradeśapracaya uktaḥ kālasya punar dvedhāpi pradeśapracayakalpanā nāstīty akāyatvam api ca tatra pāṭhe 'niṣkriyāṇi ca' ity atra dharmādīnām ākāśāntānāṃ niṣkriyatve pratipādite itareṣāṃ jīvapudgalānāṃ sakriyatvaprāptivat kālasyāpi sakriyatvaṃ syāt athākāśāt prākkāla uddiśyeta tan na 'ā ākāśād ekadravyāṇi' ity ekadravyatvam asya syāt tasmāt pṛthag iha kāloddeśaḥ kriyate anekadravyatve sati kim asya pramāṇam lokākāśasya yāvantaḥ pradeśās tāvantaḥ kālāṇavo niṣkriyāḥ ekaikākāśapradeśe ekaikavṛttyā lokaṃ vyāpya vyavasthitāḥ uktaṃ ca logāgāsapadese ekkekke je ṭṭhiyā hu ekkakkā rayaṇāṇaṃ rāsīviva te kālāṇū muṇeyavvā rūpādiguṇavirahād amūrtāḥ

vartanālakṣaṇasya mukhyasya kālasya pramāṇam uktam pariṇāmādigamyasya vyavahārakālasya kiṃ pramānam ity ata idam ucyate

sāmpratikasyaikasamayikatve 'pi atīta anāgatāś ca samayā anantā iti kṛtvā 'anantasamayaḥ' ity ucyate athavā mukhyasyaiva kālasya pramāṇāvadhāraraṇārtham idam ucyate anantaparyāyavartanāhetutvād eko 'pi kālāṇur ananta ity upacaryate samayaḥ punaḥ paramaniruddhaḥ kālāṃśas tatpracayaviśeṣa āvalikādir avagantavyaḥ

āha guṇaparyayavad dravyam ity uktaṃ tatra ke guṇā ity atrocyate

dravyam āśrayo yeṣāṃ te dravyāśrayāḥ niṣkrāntā guṇebhyo nirguṇāḥ evam ubhayalakṣanopetā guṇā iti 'nirguṇāḥ' iti viśeṣaṇaṃ dvyaṇukādinivṛttyartham tāny api hi kāraṇabhūtaparamāṇudravyāśrayāṇi guṇavanti tu tasmāt 'nirguṇāḥ' iti viśeṣaṇāt tāni nivarttitāni bhavanti nanu paryāyā api ghaṭasaṃsthānādayo dravyāśrayā nirguṇaś ca teṣām api guṇatvaṃ prāpnoti 'dravyāśrayāḥ' iti vacanāt 'nityaṃ dravyam āśritya vartante ye' te guṇā iti viśeṣāt paryāyā nivartitā bhavanti te hi kādācitkā iti

asakṛt 'pariṇāma' śabda uktaḥ tasya ko 'rtha iti praśne uttaram āha

athavā guṇā dravyād arthāntarabhūtā iti keṣāṃcid darśanaṃ tat kiṃ bhavato 'bhimatam na ity āha yady api kathaṃcid vyapadeśādibhedahetvapekṣayā dravyād anye tathāpi tadavyatirekāt tatpariṇāmāc ca nānye yady evaṃ sa ucyatāṃ kaḥ pariṇāma iti tanniścayārtham idam ucyate dharmādīni dravyāṇi yenātmanā bhavanti sa tadbhāvas tattvaṃ pariṇāma iti ākhyāyate sa dvividho 'nādir ādimāṃś ca tatrānadir dharmādīnāṃ gatyupagrahādiḥ sāmānyāpekṣayā sa evādimāṃś ca bhavati viśeṣāpekṣayā iti

āha ajīvapadārtho vyākhyātaḥ idāniṃ tadanantaroddeśabhāgāsravapadārtho vyākhyeya iti tatas tatprasiddhyartham idam ucyate

kāyādayaḥ śabdā vyākhyātārthāḥ karma kriyā ity anarthāntaram kāyavāṅmanasāṃ karma kāyavāṅmanaḥkarma yoga ity ākhyāyate ātmapradeśaparispando yogaḥ sa nimittabhedāt tridhā bhidyate kāyayogo vāgyogo manoyoga iti tad yathā vīryāntarāyakṣayopaśamasadbhāve sati audārikādisaptavidhakāyavargaṇānyatamālambanāpekṣa ātmapradeśaparispandaḥ kāyayogaḥ śarīranāmakarmodayāpāditavāgvargaṇālambane sati vīryāntarāyamatyakṣarādyāvaraṇakṣayopaśamāpāditābhyantaravāglabdhisāṃnidhye vākparināmābhimukhasyātmanaḥ pradeśaparispando vāgyogaḥ abyantaravīryāntarāyanoindriyāvaraṇakṣayopaśamātmakamanolabdhisaṃnidhāne bāhyanimittamanovargaṇālambane ca sati manaḥpariṇāmābhimukhasyātmapradeśaparispando manoyogaḥ kṣaye 'pi trividhavargaṇāpekṣaḥ sayogakevalina ātmapradeśaparispando yogo veditavyaḥ

āha abhyupemaḥ āhitatraividhyakriyo yoga iti prakṛta idānīṃ nirdiśyatām kiṃ lakṣaṇa āsrava ity ucyate yo 'yaṃ yogaśabdābhideyaḥ saṃsāriṇa puruṣasya

yathā sarassalilāvāhidvāraṃ tadāsravakāraṇatvād āsrava ity ākhyāyate tathā yogapraṇālikayā ātmanaḥ karma āsravatīti yoga āsrava iti vyapadeśam arhati

āha karma dvividhaṃ puṇyaṃ pāpaṃ ceti tasya kim aviśeṣeṇa yoga āsravahetur āhosvid asti kaścit prativiśeṣa ity atrocyate

kaḥ śubho yogaḥ ko vā aśubhaḥ prāṇātipātādattādānamaithunādir aśubhaḥ kāyayogaḥ anṛtabhāṣaṇaparuṣāsabhyavacanādir aśubho vāgyogaḥ vadhacintanerṣyāsūyādir aśubho manoyogaḥ tato viparītaḥ śubhaḥ kathaṃ yogasya śubhāśubhatvam śubhapariṇāmanirvṛtto yogaḥ śubhaḥ aśubhapariṇāmanirvṛttaś cāśubhaḥ na punaḥ śubhāśubhakarmakāraṇatvena yady evam ucyate śubhayoga eva na syāt śubhayogasyāpi jñānāvaraṇādibandhahetutvābhyupagamāt punāty ātmānaṃ pūyate 'neneti vā puṇyam tat sadvedyādi pāti rakṣati ātmānaṃ śubhād iti pāpam tad asadvedyādi

āha kim ayam āsravaḥ sarvasaṃsāriṇām samānaphalārambhahetur āhosvit kaścid asti prativiśeṣa ity atrocyate

svāmibhedād āsravabhedaḥ svāminau dvau sakaṣāyo 'kaṣāyaś cati kaṣāyaḥ krodhādiḥ kaṣāya iva kaṣāyaḥ kaḥ upamārthaḥ yathā kaṣāyo naiyagrodhādiḥ śleṣahetus tathā krodhādir apy ātmanaḥ karmaśleṣahetutvāt kaṣāya iva kaṣāya ity ucyate saha kaṣāyeṇa vartata iti sakaṣāyaḥ na vidyate kaṣāyo yasyety akaṣāyaḥ sakaṣāyaś cākaṣāyaś ca sakaṣāyākaṣāyau tayoḥ sakaṣāyākaṣāyayoḥ saṃparāyaḥ saṃsāraḥ tatprayojanaṃ karma sāmparāyikam īraṇam īryā yogo gatir ity arthaḥ taddvārakaṃ karma īryāpatham sāṃparāyikaṃ ca īryāpathaṃ ca sāmparāyikeryāpathe tayoḥ sāmparāyikeryāpathayoḥ yathāsaṃkhyam abhisaṃbandhaḥ sakaṣāyasyātmano mithyādṛṣṭyādeḥ sāṃparāyikasya karmaṇa āsravo bhavati akaṣāyasya upaśāntakaṣāyāder īryāpathasya karmaṇa āsravo bhavati

ādāv uddiṣṭasyāsravasya bhedapratipādanārtham āha

atra indriyādīnāṃ paṃcādibhir yathāsaṃkhyam abhisaṃbandho veditavyaḥ indriyāṇi paṃca catvāraḥ kaṣāyāḥ pañcāvratāni pañcaviṃśatiḥ kriyā iti tatra pañcendriyāṇi sparśanādīny uktāni catvāraḥ kaśāyāḥ krodhādayaḥ pañcāvratāni prāṇavyaparopaṇādīni vakṣyate pañcaviṃśatiḥ kriyā ucyante caityagurupravacanapūjādilakṣaṇā samyaktvavardhanī kriyā samyaktvakriyā anyadevatāstavanādirūpā mithyātvahetukī pravṛttir mithyātvakriyā gamanāgamanādipravartanaṃ kāyādibhiḥ prayogakriyā saṃyatasya sataḥ aviratiṃ pratyābhimukhyaṃ samādānakriyā īryāpathanimitteryāpathakriyā tā etāḥ pañca kriyā krodhāveśāt prādoṣikī kriyā praduṣṭasya sato 'bhyudyamaḥ kāyikī kriyā hiṃsopakaraṇādānādhikaraṇikī kriyā duḥkotpattitantratvāt pāritāpikī kriyā āyurindriyabalocchvāsaniḥśvāsaprāṇānāṃ viyogakaraṇāt prānātipātikī kriyā tā etāḥ pañca kriyāḥ rāgārdrīkṛtatvāt pramādino ramaṇīyarūpālokanābhiprāyo darśanakriyā pramādavaśāt spṛṣṭavyasaṃcetanānubandhaḥ sparśanakriyā apūrvādhikaraṇotpādanāt prātyayikī kriyā srtīpuruṣapaśusampātideśe 'ntarmalotsargakaraṇaṃ samantānupātakriyā apramṛṣṭādṛṣṭabhūmau kāyādinikṣepo 'nābhogakriyā tā etāḥ pañca kriyā yāṃ pareṇa nirvartyāṃ kriyāṃ svayaṃ karoti sā svahastakriyā pāpādānādipravṛttiviśeṣābhyanujñānaṃ nisargakriyā parācaritasāvadyādiprakāśanaṃ vidāraṇakriyā yathoktām ājñām āvaśyakādiṣu cāritramohodayāt kartum aśaknuvato 'nyathāprarūpaṇad ājñāvyāpādikī kriyā śāṭhyālasyābhyāṃ pravacanopadiṣṭavidhikartavyatānādaro 'nākāṅkṣakriyā tā etāḥ pañca kriyā chedanabhedanaviśasanādikriyāparatvam anyena vārambhe kriyamāṇe praharṣaḥ prārambhakriyā parigrahāvināśārthā pārigrāhikī kriyā jñānadarśanādiṣu nikṛtir vañcanaṃ māyākriyā anyaṃ mithyādarśanakriyākaraṇakāraṇāviṣṭaṃ praśaṃsādibhir dṛḍhayati yathā sādhu karoṣīti sā mithyādarśanakriyā saṃyamaghātikarmodayavaśād anivṛttir apratyākhyānakriyā tā etāḥ pañca kriyāḥ samuditāḥ pañcaviṃśatikriyāḥ etānīndriyādīni kāryakāraṇabhedād bhedam āpadyamānāni sāṃparāyikasya karmaṇa āśravadvārāṇi bhavanti

atrāha yogatrayasya sarvātmakāryatvāt sarveṣāṃ saṃsāriṇāṃ sādhāraṇaḥ tato bandhaphalānubhavanaṃ pratyaviśeṣa ity atrocyate naitad evam yasmāt saty api pratyātmasaṃbhave teṣāṃ jīvapariṇāmebhyo 'nantavikalpebhyo viśeṣo 'bhyanujñāyate katham iti ced ucyate

bāhyābhyantarahetūdīraṇavaśād udriktaḥ pariṇāmas tīvraḥ tadviparīto mandaḥ ayaṃ prāṇī mayā hantavya iti jñātvā pravṛttir jñātam ity ucyate madāt pramādād vānavabudhya pravṛttir ajñātam adhikriyante 'sminn arthā ity adhikaraṇaṃ dravyam ity arthaḥ dravyasya svaśaktiviśeṣo vīryam bhāvaśabdaḥ pratyekaṃ parisamāpyate tīvrabhāvo mandabhāva ity ādiḥ etebhyas tasyāsravasya viśeṣo bhavati kāraṇabhedād dhi kāryabheda iti

atrāha adhikaraṇam uktam tatsvarūpam anirjñātam atas taducyatām iti tatra bhedapratipādanadvārenādhikaraṇasvarūpanirjñānārtham āha

uktalakṣaṇā jīvājīvāḥ yady uktalakṣaṇāḥ punarvacanaṃ kiṃ artham adhikaraṇaviśeṣajñāpanārthaṃ punarvacanaṃ jīvājīvā adhikaraṇam ity ayaṃ viśeṣo jñāpayitavya iti kaḥ punar asau hiṃsādyupakaraṇabhāva iti syād etan mūlapadārthayor dvitvāj jīvājīvāv iti dvivacanaṃ nyāyaprāptam iti tan na paryāyāṇām adhikaraṇatvāt yena kenacit paryāyeṇa viśiṣṭaṃ dravyam adhikaraṇam na sāmānyam iti bahuvacanaṃ kṛtam jīvājīvā adhikaraṇaṃ kasya āsravasyeti arthavaśād abhisaṃbandho bhavati

tatra jīvādhikaraṇabhedapratipattyartham āha

prāṇavyaparopaṇādiṣu pramādavataḥ prayatnāveśaḥ saṃrambhaḥ sādhanasamabhyāsīkaraṇaṃ samārambhaḥ prakrama ārambhaḥ 'yoga' śabdo vyākhyātārthaḥ kṛtavacanaṃ svātantryapratipattyārtham kāritābhidhānaṃ paraprayogāpekṣam anumataśabdaḥ prayojakasya mānasapariṇāmapradarśanārthaḥ abhihitalakṣaṇāḥ kaṣāyāḥ krodhādayaḥ viśiṣyate 'rtho 'rthāntarād iti viśeṣaḥ sa pratyekam abhisaṃbadhyate saṃrambhaviśeṣaḥ samārambhaviśeṣa ity ādi ādyaṃ jīvādhikaraṇam etair viśeṣaiḥ 'bhidyate' iti vākyaśeṣaḥ ete catvāraḥ sujantās tryādiśabdā yathākramam abhisaṃbadhyante saṃrambhasamārambhārambhās trayaḥ yogās trayaḥ kṛtakāritānumatās trayaḥ kaṣāyāś catvāra iti eteṣāṃ gaṇanābhyāvṛttiḥ sucā dyotyate ekaśa iti vīpsānirdeśaḥ ekaikaṃ tryādīn bhedān nayed ity arthaḥ yad yathā krodhakṛtakāyasaṃrambhaḥ mānakṛtakāyasaṃrambhaḥ māyākṛtakāyasaṃrambhaḥ lobhakṛtakāyasaṃrambhaḥ krodhakāritakāyasaṃrambhaḥ mānakāritakāyasaṃrambhaḥ māyakāritakāyasaṃrambhaḥ lobhakāritakāyasaṃrambhaḥ krodhānumatakāyasaṃrambhaḥ mānānumatakāyasaṃrambhaḥ māyānumatakāyasaṃrambhaḥ lobhānumatakāysaṃrambhaś ceti dvādaśadhā kāyasaṃrambhaḥ evaṃ vāgyoge manoyoge ca dvādaśadhā saṃrambhaḥ ta ete saṃpiṇḍitāh ṣaṭtriṃśat tathā samārambhā api ṣaṭtriṃśat ārambhā api ṣaṭtriṃśat ete saṃpiṇḍitā jīvādhikaraṇāsravabhedā aṣṭottaraśatasaṃkhyāḥ saṃbhavanti 'ca' śabdo 'nantānubandyapratyākhyānapratyākhyānasaṃjvalanakaśāyabhedakṛtāntarbhedasamuccyārthaḥ

parasyājīvādhikaraṇasya bhedapratipattyartham āha

nirvartyata iti nirvartanā niṣpādanā nikṣipyata iti nikṣepaḥ sthāpanā saṃyujyate iti saṃyogo miśrīkṛtam nisṛjyata iti nisargaḥ pravartanam ete dvyādibhir yathākramam abhisaṃbadhyante nirvartanā dvibhedā nikṣepaś caturbhedaḥ saṃyogo dvibhedaḥ nisargas tribheda iti ta ete bhedā ajīvādhikaraṇasya veditavyāḥ paravacanam anarthakam pūrvasūtre ādyam iti vacanād idam avaśiṣṭārthaṃ bhavatīti nānarthakam anyārthaḥ paraśabdaḥ saṃrambhādibhyo 'nyāni nirvarttanādīni itarathā hi nirvartanādīnām ātmapariṇāmasadbhāvāj jīvādhikaraṇavikalpā eveti vijñāyeta nirvatanādhikaraṇaṃ dvividhaṃ mūlaguṇanirvatanādhikaraṇam uttraraguṇanirvatanādhikaraṇaṃ ceti tatra mūlaguṇanirvatanaṃ pañcavidham śarīravāṅmanaḥprāṇāpānāś ca uttraraguṇanirvartanaṃ kāṣṭhapustacitrakarmādi nikṣepaś caturvidhaḥ apratyavekṣitanikṣepādhikaraṇaṃ duḥpramṛṣṭanikṣepādhikaraṇaṃ sahasānikṣepādhikaraṇam anābhoganikṣepādhikaraṇaṃ ceti nisargas trividhaḥ kāyanisargādhikaraṇaṃ vāgnisargādhikaraṇaṃ manonisargādhikaraṇaṃ ceti

uktaḥ sāmānyena karmāsravabhedaḥ idānīṃ karmaviśeṣāsravabhedo vaktavyaḥ tasmin vaktavye ādyayor jñānadarśanāvaraṇayor āsravabhedapratipattyartham āha

tattvajñanasya mokṣasādhanasya kīrtane kṛte kasyācid anabhivyāharataḥ antaḥpaiśunyapariṇāmaḥ pradoṣaḥ kutaś citkāraṇān nāsti na vedmīty ādi jñānasya vyapalapanaṃ nihnavaḥ kutaścit kāraṇād bhāvitam api vijñanaṃ dānārham api yato na dīyate tan mātsaryam jñānavyavacchedakaraṇam antarāyaḥ kāyena vācā ca paraprakāśyajñānasya varjanam āsādanam praśastajñānadūṣaṇam upaghātaḥ āsādanam eveti cet sato jñānasya vinayapradānādiguṇakīrtanānuṣṭhānam āsādanam upaghātas tu jñānam ajñānam eveti jñānanāśābhiprāyaḥ iti anayor ayaṃ bhedaḥ ''tat' śabdena jñānadarśanayoḥ pratinirderśaḥ kriyate kathaṃ punar aprakṛtayor anirdiṣṭayos tac chabdena parāmarśaḥ kartuṃ śakyaḥ praśnāpekṣayā jñānadarśanāvaraṇayoḥ ka āsrava iti praśne kṛte tadapekṣayā tac chabdo jñānadarśane pratinirdiśati etena jñānadarśanavatsu tatsādhaneṣu ca pradoṣādayo yojyāḥ tannimittatvāt ta ete jñānadarśanāvaraṇayor āsravahetavaḥ ekakāraṇasādhyasya kāryasyānekasya darśanāt tulye 'pi pradoṣādau jñānarśanāvaraṇāsravasiddhiḥ athavā viṣayabhedād āsravabhedaḥ jñānaviṣayāḥ pradoṣādayo jñānāvaraṇasya darśanaviṣayāḥ pradoṣādayo darśanāvaraṇasyeti

yathānayoḥ karmaprakṛtyor āsravabhedās tathā

pīḍālakṣaṇaḥ pariṇāmo duḥkham anugrāhakasaṃbandhavicchede vaiklavyaviśeṣaḥ śokaḥ parivādādinimittād āvilāntaḥkaraṇasya tīvrānuśayas tāpaḥ paritāpajātāśrupātapracuravipralāpādibhir vyaktakrandanam ākrandanam āyurindriyabalaprāṇaviyogakaraṇaṃ vadhaḥ saṃkleśapariṇāmāvalambanaṃ guṇasmaraṇānukīrtanapūrvakaṃ svaparānugrahābhilāṣaviṣayam anukampāpracuraṃ rodanaṃ paridevanam nanu ca śokādīnāṃ duḥkhaviśeṣatvād duḥkhagrahaṇam evāstu satyam evam tathāpi katipayaviśeṣapratipādanena duḥkhajātyanuvidhānaṃ kriyate yathā gaur ity ukte anirjñāte viśeṣe tatpratipādanārthaṃ khaṇḍamuṇḍakṛṣṇaśuklādyupādānaṃ kriyate tathā duḥkhaviṣayāsrvāsaṃkhyeyalokabhedasaṃbhavād duḥkham ity ukte viśeṣānirjñānāt katipayaviśeṣanirdeśena tadviśeṣapratipattiḥ kriyate tāny etāni duḥkhādīni krodhādyāveśād ātmasthāni bhavanti parasthāny ubhayasthāni ca etāni sarvāṇy asadvedyāsravakāraṇāni veditavyāni atra codyate yadi duḥkhādīny ātmaparobhayasthāny asadvedyāsravanimittāni kim artham ārhataiḥ keśaluñcanānaśanātapasthānādīni duḥkhanimittāny āsthīyante pareṣu ca pratipādyante iti naiṣa doṣaḥ antaraṅgakrodhādyāveśapūrvakāṇi duḥkhādīny asadvedyāsravanimittānīti viśeṣyoktatvāt yathā kasyacid bhiṣajaḥ paramakaruṇāśasya niḥśalyasya saṃyatasyopari gaṇḍaṃ pāṭayato duḥkhahetutve saty api na pāpabandho bāhyanimittamātrād eva bhavati evaṃ saṃsāraviṣayamahāduḥkhād udvignasya bhikṣos tannivṛttyupāyaṃ prati samāhitamanaskasya śāstravihite karmaṇi pravartamānasya saṃkleśapariṇāmābhāvād duḥkhanimittatve saty api na pāpabandhaḥ uktaṃ ca

na duḥkhaṃ na sukhaṃ yadvad dhetur dṛṣṭaś cikitsite cikitsāyāṃ tu yuktasya syād duḥkham athavā sukham na duḥkhaṃ na sukhaṃ tadvad dhetur mokṣasya sādhane mokṣopāye tu yuktasya syād duḥkham athavā sukham

uktā asadvedyāsravahetavaḥ sadvedyasya punaḥ ke ity atrocyate

tāsu tāsu gatiṣu karmodayavaśād bhavantīti bhūtāni prāṇina ity arthaḥ vratāny ahiṃsādīni vakṣyante tadvanto vratinaḥ te dvividhāḥ āgāraṃ prati nivṛttautsukyāḥ saṃyatāḥ gṛhiṇaś ca saṃyatāsaṃyatāḥ anugrahārdrīkṛtacetasaḥ parapīḍām ātmasthām iva kurvato 'nukampanam anukampā bhūteṣu vratiṣu cānukampā bhūtavratyanukampā parānugrahabuddhyā svasyātisarjanaṃ dānam saṃsārakāraṇavinivṛttiṃ pratyāgūrṇo 'kṣīṇāśayaḥ sarāga ity ucyate prāṇīnidriyeṣv aśubhapravṛtter viratiḥ saṃyamaḥ sarāgasya saṃyama sarāgo vā saṃyamaḥ sarāgasaṃyamaḥ 'ādi'śabdena saṃyamāsaṃyamākāmanirjarābālatapo 'nurodhaḥ yogaḥ samādhiḥ samyakpraṇidhānam ity arthaḥ bhūtavratyanukampādānasarāgasaṃyamādīnāṃ yogo bhūtavratyanukampādānasarāgasaṃyamādiyogaḥ krodhādinivṛttiḥ kṣāntiḥ lobhaprakārāṇām uparamaḥ śaucam 'iti' śabdaḥ prakārārthaḥ ke te punas te prakārāḥ arhatpūjākaraṇatatparatābālavṛddhatapasvivaiyāvṛttyādayaḥ 'bhūta' grahaṇāt siddhe 'vrati' grahaṇaṃ tadviṣayānukampāprādhānyakhyāpanārtham ta ete sadvedyasyāsravā jñeyāḥ

atha tadantaroddeśabhājo mohasyāsravahetau vaktavye tadbhedasya darśanamohasyāsravahetupratipādanārtham idam ucyate

nirāvaraṇajñānāḥ kevalinaḥ tadupadiṣṭaṃ buddhyatiśayarddhiyuktagaṇadharānusmṛtaṃ grantharacanaṃ śrutaṃ bhavati ratnatrayopetaḥ śramaṇagaṇaḥ saṃghaḥ ahiṃsālakṣaṇas tadāgamadeśito dharmaḥ devāś caturṇikāya uktāḥ guṇavatsu mahatsu asadbhūtadoṣodbhāvanam avarṇavādaḥ eteṣv avarṇavādo darśanamohasyāsravahetuḥ kavalābhyavahārajīvinaḥ kevalina ity evam ādi vacanaṃ kevalinām avarṇavādaḥ māṃsabhakṣaṇādyanavadyābhidhānaṃ śrutāvarṇavādaḥ śūdratvāśucitvādyāvirbhāvanaṃ saṃghāvarṇavādaḥ jinopadiṣṭo dharmo nirguṇas tadupasevino ye te cāsurā bhaviṣyantīty evam ādy abhidhānaṃ dharmāvarṇavādaḥ surāmāṃsopasevādyāghoṣaṇaṃ devāvarṇavādaḥ

dvitīyasya mohasyāsravabhedapratipādanārtham āha

kaṣāyā uktāḥ udayo vipākaḥ kaṣāyāṇām udayāt tīvrapariṇāmaś cāritramohasyāsravo veditavyaḥ tatra svaparakaṣāyotpādanaṃ tapasvijanavṛttadūṣaṇaṃ saṃkliṣṭaliṅgavratadhāraṇādiḥ kaṣāyavedanīyasyāsravaḥ saddharmopahasanadīnātihāsakandarpopahāsabahuvipralāpopahāsaśīlatādir hāsyavedanīyasya vicitrakrīḍanaparatāvrataśīlārucyādiḥ rativedanīyasya parāratiprādurbhāvanarativināśanapāpāśīlasaṃsargādiḥ arativedanīyasya svaśokotpādanaparaśokaplutābhinandanādiḥ śokavedanīyasya svabhayapariṇāmaparabhayotpādanādir bhayavedanīyasya kuśalakriyācārajugupsāparivādaśīlatvādir jugupsāvedanīyasya alīkābhidhāyitātisaṃdhānaparatvapararandhraprekṣitvapravṛddharāgādiḥ strīvedanīyasya stokakrodhānutsukatvasvadārasaṃtoṣādiḥ puṃvedanīyasya pracurakaṣāyāguhyendriyavyaparopaṇaparāṅganāvaskandādir napuṃsakavedanīyasya

nirdiṣṭo mohanīyasyāsravabhedaḥ idānīṃ tadanantaranirdiṣṭasyāyuṣa āsravahetau vaktavye ādyasya niyatakālaparipākasyāyuṣaḥ kāraṇapradarśanārtham idam ucyate

ārambhaḥ prāṇipīḍāhetur vyāpāraḥ mamedaṃ buddhilakṣaṇaḥ parigrahaḥ ārambhāś ca parigrahāś ca ārambhaparigrahāḥ bahava ārambhaparigrahā yasya sa bahvārambhaparigrahaḥ tasya bhāvo bahvārambhaparigrahatvam hiṃsādikrūrakarmājasrapravartanaparasvaharaṇaviṣayātigṛddhikṛṣṇaleśyābhijātaraudradhyānamaraṇakālatādilakṣaṇo nārakasyāyuṣa āsravo bhavati

āha ukto nārakasyāyuṣa āsravaḥ tairyagyonasyedānīṃ vaktavya ity atrocyate

cāritramohakarmaviśeṣasyodayād āvirbhūta ātmanaḥ kuṭilabhāvo māyā nikṛtiḥ tairyagyonasyāyuṣa āsravo veditavyaḥ tatprapañco mithyātvopetadharmadeśanā niḥśīlatātisaṃdhānapriyatā nīlakāpotaleśyārtadhyānamaraṇakālatādiḥ

āha vyākhyātas tairyagyonasyāyuṣa āsravaḥ idānīṃ mānuṣasyāyuṣuḥ ko hetur ity atrocyate

nārakāyur āsravo vyākhyātaḥ tadviparīto mānuṣasyāyuṣa iti saṃkṣepaḥ tadvyāsaḥ vinītasvabhāvaḥ prakṛtibhadratā praguṇavyavahāratā tanukaṣāyatvaṃ maraṇakālāsaṃkleśatādiḥ

kim etāvān eva mānuṣasyāyuṣa āsrava ity atrocyate

mṛdor bhāvo mārdavam svabhāvena mārdavaṃ svabhāvamārdavaṃ upadeśānapekṣam ity arthaḥ etad api mānuṣasyāyuṣa āsravaḥ pṛthagyogakaraṇaṃ kim artham uttarārtham devāyuṣa āsravo 'yam api yathā syāt

kim etad eva dvitīyaṃ mānuṣasyāsravaḥ na ity ucyate

'ca' śabdo 'dhikṛtasamucyayārthaḥ alpārambhaparigrahatvaṃ ca niḥśīlavratatvaṃ ca śīlāni ca vratāni ca śīlavratāni tāni vakṣyate niṣkrāntaḥ śīlavratebhyo niḥśīlavrataḥ tasya bhāvo niḥśīlavratatvam 'sarveṣāṃ' grahaṇaṃ sakalāyurāsravapratipattyartham kiṃ devāyuṣo 'pi bhavati satyam bhavati bhogabhūmijāpekṣayā

atha caturthasyāyuṣaḥ ka āsrava ity atrocyate

sarāgasaṃyamaḥ saṃyamāsaṃyamaś ca vyākhyātau akāmanirjarā akāmaś cārakanirodhabandhanabaddheṣu kṣuttṛṣṇānirodhabrahmacaryabhūśayyāmaladhāraṇaparitāpādiḥ akāmena nirjarā akāmanirjarā bālatapo mithyādarśanopetam anupāyakāyakleśapracuraṃ nikṛtibahulavratadhāraṇam tāny etani daivasyāyuṣa āsravahetavo veditavyāḥ

kim etāvan eva daivasyāyuṣa āsravaḥ nety āha

kim daivasyāyuṣa āsrava ity anuvartate aviśeṣābhidhāne 'pi saudharmādiviśeṣagatiḥ kutaḥ pṛthakkaraṇāt yady evam pūrvasūtre ukta āsravavidhir aviśeṣeṇa prasaktaḥ tena sarāgasaṃyamasaṃyamāsaṃyamāv api bhavanavāsyādyāyuṣa āsravau prāpnutaḥ naiṣa doṣaḥ samyaktvābhāve sati tadvyapadeśābhāvāt tadubhayam apy atrāntarbhavati

āyuṣo 'nantaram uddiṣṭasya nāmna āsravavidhau vaktavye tatrāśubhānāmna āsravapratipattyartham āha

yogas triprakāro vyākhyātaḥ tasya vakratā kauṭilyam visaṃvādanam anyathāpravartanam nanu ca nārthabhedaḥ yogavakrataivānyathāpravartanam satyam evam etat svagatā yogavakratety ucyate paragataṃ visaṃvādanam samyagabhyudayaniḥśreyasārthāsu kriyāsu pravartamānam anyaṃ tadviparītakāyavāṅmanobhir visaṃvādayati maivaṃ kārṣīr evam kurvīti etad ubhayam aśubhanāmakarmāsravakāraṇaṃ veditavyam 'ca' śabdena mithyādarśanapaiśunyāsthiracittatākūṭamānatulākaraṇaparanindātmapraśaṃsādiḥ samuccīyate

atha śubhanāmakarmaṇaḥ ka āsrava ity atra ucyate

kāyavāṅmanasām ṛjutvam avisaṃvādanaṃ ca tadviparītam 'ca' śabdena samuccitasya ca viparītaṃ grāhyam dhārmikadarśanasaṃbhramasadbhāvopanayanasaṃsaraṇabhīrutāpramādavarjanādiḥ tadetac chubhanāmakarmāsravakāraṇaṃ veditavyam

āha kim etāvān eva śubhanāmna āsravavidhir uta kaścid asti prativiśeṣa ity atrocyate yad idaṃ tīrthakaranāmakarmānantānupamaprabhāvam acintyavibhūtiviśeṣakāraṇaṃ trailokyavijayakaraṃ tasyāsravavidhiviśeṣo 'stīti yady evam ucyatām ke tasyāsravaḥ ity ata idam ārabhyate

jinena bhagavatārhatparameṣṭhinopadiṣṭe nirgranthalakṣaṇe mokṣavartmani rucir darśanaviśuddhiḥ prāguktalakṣaṇā tasyā aṣṭāv aṅgāni niśśaṅkitatvaṃ niḥkāṅkṣitā vicikitsāvirahatā amūḍhadṛṣṭitā upabṛṃhaṇaṃ sthitīkaraṇaṃ vātsalyaṃ prabhāvanaṃ ceti samyagjñānādiṣu mokṣamārgeṣu tatsādhaneṣu ca gurvādiṣu svayogyavṛttyā satkāra ādaro vinayas tena saṃpannatā vinayasaṃpannatā ahiṃsādiṣu vrateṣu tatpratipālanārtheṣu ca krodhavarjanādiṣu śīleṣu niravadyā vṛttiḥ śīlavrateṣv anatīcāraḥ jīvādipadārthasvatattvaviṣaye samyagjñāne nityaṃ yuktatā abhīkṣaṇajñānopayogaḥ saṃsāraduḥkhān nityabhīrutā saṃvegaḥ tyāgo dānam tat trividham āhāradānam abhayadānaṃ jñādānaṃ ceti tacchaktito yathāvidhi prayujyamānaṃ tyāga ity ucyate anigūhitavīryasya mārgāvirodhi kāyakleśas tapaḥ yathā bhāṇḍāgāre dahane samutthite tatpraśamanam anuṣṭhīyate bahūpakāratvāt tathānekavrataśīlasamṛddhasya munes tapasaḥ kutaścit pratyūhe samupasthite tatsaṃdhāraṇaṃ samādhiḥ guṇavadduḥkhopanipāte niravadyena vidhinā tadapaharaṇaṃ vaiyāvṛttyam arhadācāryeṣu bahuśruteṣu pravacane ca bhāvaviśuddhiyukto 'nurāgo bhaktiḥ ṣaṇṇām āvaśyakakriyāṇāṃ yathākālaṃ pravartanam āvaśyakāparihāṇiḥ jñānatapodānajinapūjāvidhinā dharmaprakāśanaṃ mārgaprabhāvanā vatse dhenuvatsadharmaṇi snehaḥ pravacanavatsalatvam tāny etāni ṣodaṣakāraṇāni samyagbhāvyamānāni vyastāni ca tīrthakaranāmakarmāsrvakāraṇāni pratyetavyāni

idānīṃ nāmāsravābhidhānānantaraṃ gotrāsrave vaktavye sati nīcairgotrasyāsravavidhānārtham idam āha

tathyasya vātathyasya vā doṣasyodbhāvanaṃ prati icchā nindā guṇodbhāvanābhiprāyaḥ praśaṃsā yathāsaṃkhyam abhisaṃbandhaḥ paranindā ātmapraśaṃseti pratibandhakahetusaṃnidhāne sati anudbhūtavṛttitā anāvirbhāva ucchādanam pratibandhakābhāve prakāśavṛttitā udbhāvanam atrāpi ca yathākramam abhisaṃbandhaḥ sadguṇocchādanam asadguṇodbhāvanam iti tāny etāni nīcairgotrasyāsravakāraṇāni veditavyāni

athoccairgotrasya ka āsravavidhir atrocyate

'tat' ity anena pratyāsatter nīcairgotrasyāsravaḥ pratinirdiśyate anyena prakāreṇa vṛttir viparyayaḥ tasya viparyayas tadviparyayaḥ kaḥ punar asau viparyayaḥ ātmanindā parapraśaṃsā sadguṇodbhāvanam asadguṇocchādanaṃ ca guṇotkṛṣṭeṣu vinayenāvanatir nīcair vṛttiḥ vijñānādibhir utkṛṣṭasyāpi satas tatkṛtamadaviraho 'nahaṃkāratānutsekaḥ tāny etāny uttarasyoccair gotrasyāsravakāraṇāni bhavanti

atha gotrānantaram uddiṣṭasyāntarāyasya ka āsrava ity ucyate

dānādīny uktāni 'dānalābhabhogopahogavīryāṇi ca' ity atra teṣāṃ vihananaṃ vighnaḥ vighnasya karaṇaṃ vighnakaraṇam antarāyasyāsravavidhir veditavyaḥ atra codyate tatpradoṣanihnavādayo jñānadarśanāvaraṇādīnāṃ pratiniyatā āsravahetavo varṇitāḥ kiṃ te pratiniyatajñānāvaraṇādyāsravahetava eva utāviśeṣeṇeti yadi pratiniyatajñānāvaraṇādyāsravahetavaḥ eva āgamavirodhaḥ prasajyate āgame hi sapta karmāṇi āyurvarjyāni pratikṣaṇaṃ yugapad āsravantīty uktam tadvirodhaḥ syāt athāviśeṣeṇa āsravahetavo viśeṣanirdeśo na yukta iti atrocyate yady api tatpradoṣādibhir jñānāvaraṇādīnāṃ sarvāsāṃ karmaprakṛtīnāṃ pradeśabandhaniyamo nāsti tathāpy anubhāganiyamahetutvena tatpradoṣanihnavādayo vibhājyante

āsravapadārtho vyākhyātaḥ tatprārambhakāle evoktaṃ 'śubhaḥ puṇyasya' iti tatsāmānyenoktam tadviśeṣapratipattyarthaṃ kaḥ punaḥ śubha ity ukte idam ucyate

'pramattayogāt prāṇavyaparopaṇaṃ hiṃsā' ity evam ādibhiḥ sūtrair hiṃsādayo nirdekṣyante tebhyo viramaṇaṃ viratir vratam ity ucyate vratam abhisandhikṛto niyamaḥ idaṃ kartavyam idaṃ na kartavyam iti vā nanu ca hiṃsādayaḥ pariṇāmaviśeṣā adhruvāḥ kathaṃ teṣām apādānatvam ucyate buddhyapāye dhruvatvavivakṣopapatteḥ yathā dharmād viramatīty atra ya eṣa manuṣyaḥ saṃbhinnabuddhiḥ sa paśyati duṣkaro dharmaḥ phalaṃ cāsya śraddhāmātragamyam iti sa buddhyā saṃprāpya nivartate evam ihāpi ya eva manuṣyaḥ prekṣāpūrvakārī sa paśyati ya ete hiṃsādayaḥ pariṇāmās te pāpahetavaḥ pāpakarmaṇi pravartamānān janān ihaiva rājāno daṇḍayanti paratra ca duḥkham āpnuvantīti sa buddhyā saprāpya nivartate tato buddhyā dhruvatvavivakṣopapatter apādānanatvaṃ yuktam 'virati' śabdaḥ pratyekaṃ parisamāpyate hiṃsāyā viratiḥ anṛtād viratir ity evam ādi tatra ahiṃsāvratam ādau kriyate pradhānatvāt satyādīni hi tatparipālanārthāni sasyasya vṛtiparikṣepavat sarvasāvadyanivṛttilakṣaṇasāmāyikāpekṣayā ekaṃ vrataṃ tadeva chedopasthāpanāpekṣayā pañcavidham ihocyate nanu ca asya vratasyāsravahetutvam anupapannaṃ saṃvarahetuṣv antarbhāvāt saṃvarahetavo vakṣyante guptisamityādayaḥ tatra daśavidhe dharme saṃyame vā vratānām antarbhāva iti naiṣa doṣaḥ tatra saṃvaro nivṛttilakṣaṇo vakṣyate pravṛttiś cātra dṛśyate hiṃsānṛtādattādānādiparityāge ahiṃsāsatyavacanadattādānādikriyāpratīteḥ guptyādisaṃvaraparikarmatvāc ca vrateṣu hi kṛtaparikarmā sādhuḥ sukhena saṃvaraṃ karotīti tataḥ pṛthaktvenopadeśaḥ kriyate nanu ca ṣaṣṭham aṇuvratam asti rātribhojanaviramaṇaṃ tadihopasaṃkhyātavyam na bhāvanāsv antarbhāvāt ahiṃsāvratabhāvanā hi vakṣyante tatra ālokitapānabhojanabhāvanā kāryeti

tasya pañcatayasya vratasya bhedapratipattyartham āha

deśa ekadeśaḥ sarvaḥ sakalaḥ deśaś ca sarvaś ca deśasarvau tābhyaṃ deśasarvataḥ 'viratiḥ' ity anuvartate aṇu ca mahac cāṇumahatī vratābhisaṃbandhān napuṃsakaliṅganirdeśaḥ yathāsaṃkhyam abhisaṃbadhyate deśato viratir aṇuvrataṃ sarvato viratir mahāvratam iti dvidhā bhidyate pratyekaṃ vratam etāni vratāni bhāvitāni varauṣadhavadyatnavate duḥkhanivṛttinimittāni bhavanti

kim arthaṃ kathaṃ vā bhāvanaṃ teṣām ity atrocyate

teṣāṃ vratānāṃ sthirīkaraṇāyaikaikasya vratasya pañca pañca bhāvanā veditavyāḥ yady evam ādyasyāhiṃsāvratasya bhāvanāḥ kā ity atrocyate

vāgguptīḥ manoguptīḥ īryāsamitiḥ ādānānanikṣepaṇasamitiḥ ālokitapānabhojanam ity etāḥ pañcāhiṃsāvratasya bhāvanāḥ

atha dvitīyasya vratasya kā ity atrocyate

krodhapratyākhyānaṃ lobhapratyākhyānaṃ bhīrutvapratyākhyānaṃ hāsyapratyākhyānam anivīcībhāṣaṇaṃ cety etāḥ pañca bhāvanā satyavratasya jñeyāḥ anuvīcībhāṣaṇaṃ niravadyānubhāṣaṇam ity arthaḥ

idānīṃ tṛtīyasya vratasya kā bhāvanā ity atrāha

śūnyāgāreṣu giriguhātarukoṭarādiṣv āvāsaḥ parakīyeṣu ca vimociteṣv āvāsaḥ pareṣām uparodhākaraṇam ācāraśāstramārgeṇa bhaikṣaśuddhiḥ mamedaṃ tavedam iti sadharmabhir avisaṃvādaḥ ity etāḥ pañcādattādānaviramaṇavratasya bhāvanāḥ

athedānīṃ brahmacaryavratasya bhāvanā vaktavyā ity atrāha

tyāgaśabdaḥ pratyekaṃ parisamāpyate strīrāgakathāśravaṇatyāgaḥ tanmanoharāṅganirīkṣaṇatyāgaḥ pūrvaratānusmaraṇatyāgaḥ vṛṣyeṣṭarasatyāgaḥ svaśarīrasaṃskāratyāgaś ceti caturthavratasya bhāvanāḥ pañca vijñeyāḥ

atha pañcamavratasya bhāvanā kā ity atrocyate

pañcānām indriyāṇāṃ sparśanādīnām iṣṭāniṣṭeṣu viṣayeṣūpanipatiteṣu sparśādīṣu rāgavarjanāni pañca ākiṃcanyasya vratasya bhāvanāḥ pratyetavyāḥ

kiṃcānyadyathāmīṣāṃ vratānāṃ draḍhimārthaṃ bhāvanāḥ pratīyante tadvipaścidbhir iti bhāvanopadeśaḥ tathā tadarthaṃ tadvirodhiṣv apīty āha

abhyudayaniḥśreyasārthānāṃ kriyāṇāṃ vināśakaḥ prayogo 'pāyaḥ avadyaṃ garhyam apāyaś cāvadyaṃ cāpāyāvadye tayor darśanam apāyāvadyadarśanaṃ bhāvayitavyam kva ihāmutra ca keṣu hiṃsādiṣu katham iti ced ucyate hiṃsāyāṃ tāvat hiṃsro hi nityodvejanīyaḥ satatānubaddhavairaś ca iha ca vadhabandhaparikleśādīn pratilabhate pretya cāśubhāṃ gatiṃ garhitaś ca bhavatīti hiṃsāyā vyuparamaḥ śreyān tāthā anṛtavādī aśraddheyo bhavati ihaiva ca jihvācchedādīn pratilabhate mithyābhyākhānaduḥkhitebhyaś ca baddhavairebhyo bahūni vyasanāny avāpnoti pretya cāśubhāṃ gatiṃ garhitaś ca bhavatīti anṛtavacanād uparamaḥ śreyān tathā stenaḥ paradravyāharaṇāsaktaḥ sarvasyodvejanīyo bhavati ihaiva cābhighātavadhabandhahastapādakarṇanāsottarauṣṭhachedanabhedanasarvasvaharaṇādīn pratilabhate pretya cāśubhāṃ gatiṃ garhitaś ca bhavatīti steyād vyuparatiḥ śreyasī tathā abrahmacarī madavibhramodbhrāntacitto vanagaja iva vāsitāvañcito vivaśo vadhabandhanaparikleśān anubhavati mohābhibhūtatvāc ca kāryākāryānabhijño na kiṃcit kuśalam ācarati parāṅganāliṅganasaṅgakṛtaratiś cehaiva vairānubandhano liṃgacchedanavadhabandhasarvasvaharaṇādīn apāyān prāpnoti pretya cāśubhāṃ gatim aśnute garhitaś ca bhavati ato viratir ātmahitā tathā parigrahavān śakunir iva gṛhītamāṃsakhaṇḍo 'nyeṣāṃ tadarthināṃ patattriṇām ihaiva taskarādīnām abhibhavanīyo bhavati tadarjanarakṣaṇaprakṣayakṛtāṃś ca doṣān bahūn avāpnoti na cāsya tṛptir bhavati indhanair ivāgneḥ lobhābhibhūtatvāc ca kāryākāryānapekṣo bhavati pretya cāśubhāṃ gatim āskandate lubhdo 'yam iti garhitaś ca bhavatīti tadviramaṇaṃ śreyaḥ evaṃ hiṃsādiṣv apāyāvadyadarśanaṃ bhāvanīyam

hiṃsādiṣu bhāvanāntarapratipādanārtham āha

hiṃsādayo duḥkham eveti bhāvayitavyāḥ kathaṃ hiṃsādayo duḥkham duḥkhakāraṇatvāt yathā annaṃ vai prāṇāḥ iti kāraṇasya kāranatvād vā yathā dhanaṃ prāṇāḥ iti dhanakāraṇam annapānakāraṇāḥ prāṇā iti tathā hiṃsādayo 'sadvedyakarmakāraṇam asadvedyakarma ca duḥkhakāraṇam iti duḥkhakāraṇe duḥkhakāraṇakāraṇe vā duḥkhopacāraḥ tadete duḥkham eveti bhāvanaṃ parātmasākṣikam avagantavyam nanu ca tatsarvaṃ na duḥkham eva viṣayaratisukhasadbhāvāt na tatsukham vedanāpratīkāratvāt kacchūkaṇḍūyanavat

punar api bhāvanāntaram āha

pareṣāṃ duḥkhānutpattyabhilāṣo maitrī vadanaprasādādibhir abhivyajyamānāntarbhavitarāgaḥ pramodaḥ dīnānugrahabhāvaḥ kāruṇyam rāgadveṣapūrvakapakṣapātābhāvo mādhyasthyam duṣkarmavipākavaśān nānāyoniṣu sīdantīti sattvā jīvāḥ samyagjñānādibhiḥ prakṛṣṭā guṇādhikāḥ asadvedyodayāpāditakleśāḥ kliśyamānāḥ tattvārthaśravaṇagrahaṇābhyām asaṃpāditaguṇā avineyāḥ eteṣu sattvādiṣu yathāsaṃkhyaṃ maitryādīni bhāvayitavyāni sarvasattveṣu maitrī guṇādikeṣu pramodaḥ kliśyamāneṣu kāruṇyam avineyeṣu mādhyasthyam iti evaṃ bhāvayataḥ pūrṇāny ahiṃsādīni vratāni bhavanti

punar api bhāvanāntaram āha

jagatsvabhāvas tāvad anādir anidhano vetrāsanajhallarīmṛdaṃganibhaḥ atra jīvā anādisaṃsāre 'nantakālaṃ nānāyoniṣu duḥkhaṃ bhojaṃ bhojaṃ paryaṭanti na cātra kiṃcin niyatam asti jalabudbudopamaṃ jīvitam vidyunmeghādivikāracapalā bhogasaṃpada iti evam ādi jagatsvabhāvacintanāt saṃsārāt saṃvego bhavati kāyasvabhāvaś ca anityatā duḥkhahetutva niḥsāratā aśucitvam iti evam ādi kāyasvabhāvacintanād viṣayarāganivṛtter vairāgyam upajāyate iti jagatkāyasvabhāvau bhāvayitavyau

atrāha uktaṃ bhavatā hiṃsādinivṛttivratam iti tatra na jānīmaḥ ke hiṃsādayaḥ kriyāviśeṣā ity atrocyate yugapad vaktum aśakyatvāt tallakṣaṇanirdeśasya kramaprasaṃge yāsāv ādau coditā saiva tāvad ucyate

pramādaḥ sakaṣāyatvaṃ tadvānātmapariṇāmaḥ pramattaḥ pramattasya yogaḥ pramattayogaḥ tasmāt pramattayogāt indriyādayo daśaprāṇās teṣāṃ yathāsaṃbhavaṃ vyaparopaṇaṃ viyogakaraṇaṃ hiṃsety abhidhīyate sā prāṇino duḥkhahetutvād adharmahetuḥ 'pramattayogāt' iti viśeṣaṇaṃ kevalaṃ prāṇavyaparopaṇaṃ nādharmāyeti jñāpanārtham uktaṃ ca viyojayati cāśubhir na ca vadhena saṃyujyate iti uktaṃ ca uccālidamhi pāde iriyāsamidassa ṇiggamaṭṭhāṇe āvāde jja kuliṃgo marejja tajjogamāsejja ṇa hi tassa taṇṇimitto baṃdho suhumo vi desido samae mucchāpariggaho tti ya ajjhappapamāṇado bhaṇido nanu ca prāṇavyaparopaṇābhāve 'pi pramattayogamātrād eva hiṃseṣyate uktaṃ ca maradu va jiyadu va jīvo ayadācārassa ṇicchidā hiṃsā payadassa ṇatthi baṃdho hiṃsāmitteṇa samidassa naiṣa doṣaḥ atrāpi prāṇavyaparopaṇam asti bhāvalakṣaṇam tathā coktam svayam evātmanātmānaṃ hinasty ātmā pramādavān pūrvaṃ prāṇyantarāṇāṃ tu paścāt syād vā na vā vadhaḥ

āha abhihitalakṣaṇā hiṃsā tadanantaroddiṣṭam anṛtaṃ kiṃ lakṣaṇam ity atrocyate

sacchandaḥ praśaṃsāvācī sadasadapraśastam iti yāvat asato 'rthasyābhidhānam asadabhidānam anṛtam ṛtaṃ satyaṃ na ṛtam anṛtam kiṃ punar apraśastam prāṇipīḍākaraṃ yat tad apraśastaṃ vidyamānārthaviṣayaṃ vā avidyamānārthaviṣayaṃ vā uktaṃ ca prāgevāhiṃsāvrataparipālanārtham itaradvratam iti tasmād dhiṃsākaraṃ vaco 'nṛtam iti niśceyam

athānṛtānantaram uddiṣṭaṃ yat steyaṃ tasya kiṃ lakṣaṇam ity ata āha

ādānaṃ grahaṇam adattasyādānam adattādānaṃ steyam ity ucyate yady evaṃ karmanokarmagrahaṇam api steyaṃ prāpnoti anyenādattatvāt naiṣa doṣaḥ dānādāne yatra saṃbhavatas tatraiva steyavyavahāraḥ kutaḥ 'adatta' grahaṇasāmarthyāt evam api bhikṣor grāmanagarādiṣu bhramaṇakāle rathyādvārādipraveśād adattādānaṃ prāpnoti naiṣa doṣaḥ sāmānyena muktatvāt tathā hi ayaṃ bhikṣuḥ pihitadvārādiṣu na praviśati amuktatvāt athavā 'pramattayogāt' ity anuvartate pramattayogād adattādānaṃ yat tat steyam ity ucyate na ca rathyādi praviśataḥ pramattayogo 'sti tenaitad uktaṃ bhavati yatra saṃkleśapariṇāmena pravṛttis tatra steyaṃ bhavati bāhyvastuno grahaṇe cāgrahaṇe ca

atha caturtham abrahma kiṃ lakṣaṇam ity atrocyate

strīpuṃsayoś cāritramohodaye sati rāgapariṇāmāviṣṭayoḥ parasparasparśanaṃ prati icchā mithunam mithunasya karma maithunam ity ucyate na sarvaṃ karma kutaḥ loke śāstre ca tathā prasiddeḥ loke tāvad āgopālādiprasiddhaṃ strīpuṃsayoḥ rāgapariṇāmanimittaṃ ceṣṭitaṃ maithunam iti śāstre 'pi aśvavṛṣabhayor maithuneccchāyām ity evam ādiṣu tad eva gṛhyate api ca 'pramattayogāt' ity anuvartate tena strīpuṃsamithunaviṣayaṃ ratisukhārtaṃ ceṣṭitaṃ maithunam iti gṛhyate na sarvam ahiṃsādayo guṇā yasmin paripālyamāne bṛṃhanti vṛddhim upayānti tad brahma na brahma abrahma iti kiṃ tat maithunam tatra hiṃsādayo doṣāḥ puṣyanti yasmān maithunasevanapravaṇaḥ sthāsnūṃś cariṣṇūn prāṇino hinasti mṛṣāvādam ācaṣṭe adattam ādatte acetanam itaraṃ ca parigṛahaṃ gṛhṇāti

atha pañcamasya parigrahasya kiṃ lakṣaṇam ity ata āha

mūrcchety ucyate kā mūrcchā bahyānāṃ gomahiṣamaṇimuktāphalādīnāṃ cetanācetanānām ābyantarāṇāṃ ca rāgādīnām upadhīnām saṃrakṣaṇārjanasaṃskārādilakṣaṇāvyāvṛttir mūrcchā nanu ca loke vātādiprakopaviśeṣasya mūrccheti prasiddhir asti tadgrahaṇaṃ kasmān na bhavati satyam evam etat mūrcchir ayaṃ mohasāmānye vartate sāmānyacodanāś ca viśeṣeṣv avatiṣṭhante ity ukte viśeṣe vyavasthitaḥ parigṛhyate parigrahaprakaraṇāt evam api bāhyasya parigrahatvaṃ na prāpnoti ādhyātmikasya saṃgrahāt satyam evam etat pradhānatvād abhyantara eva saṃgṛhītaḥ asaty api bāhye mamedam iti saṃkalpabān saparigraha eva bhavati atha bāhyaḥ parigraho na bhavaty eva bhavati ca mūrcchākāraṇatvāt yadi mamedam iti saṃkalpaḥ parigrahaḥ saṃjñānādy api parigrahaḥ prāpnoti tad api hi mamedam iti saṃkalpyate rāgādipariṇāmavat naiṣa doṣaḥ 'pramattayogāt' ity anuvartate tato jñānadarśanacāritravato 'pramattasya mohābhāvān na mūrcchāstīti niṣparigarahatvaṃ siddham kiṃ ca teṣāṃ jñanādīnām aheyatvād ātmasvabhāvatvād aparigrahatvam rāgādayaḥ punaḥ karmodayatantrā iti anātmasvabhāvatvād dheyāḥ tatas teṣu saṃkalpaḥ parigraha iti yujyate tanmulāḥ sarve doṣāḥ mamedam iti hi sati saṃkalpe saṃrakṣanādayaḥ saṃjāyante tatra ca hiṃsāvaśyaṃ bhāvinī tadartham anṛtaṃ jalpati cauryaṃ vā ācarati maithune ca karmaṇi prayatate tatprabhavā narakādiṣu duḥkhaprakārāḥ

evam uktena prakāreṇa hiṃsādidoṣadarśino 'hiṃsādiguṇāhitacetasaḥ paramaprayatnasyā hiṃsādīni vratāni yasya santi saḥ

śṛṇāti hinastīti śalyam śarīrānupraveśi kāṇḍādipraharaṇaṃ śalyam iva śalyaṃ yathā tat prāṇino bādhākaraṃ tathā śārīramānasabādhāhetutvāt karmodayavikāraḥ śalyam ity upacaryate tat trividham māyāśalyaṃ nidānaśalyaṃ mithyādarśanaśalyam iti māyā nikṛtir vañcanā nidānaṃ viṣayabhogākāṅkṣā mithyādarśanam atatvaśraddhānam etasmāt trividhāc chalyān niṣkrānto niśśalyo vratī ity ucyate atra codyate śalyābhāvān niḥśalyo vratābhisaṃbandhād vratī na niśśalyatvād vratī bhavitum arhati na hi devadatto daṇḍasaṃbandhāc chatrī bhavatīti attrocyate ubhayaviśeṣaṇaviśiṣṭasyeṣṭatvāt na hiṃsādyuparatimātravratābhisaṃbandhād vratī bhavaty antareṇa śalyābhāvam sati śalyāpagame vratasaṃbandhād vratī vivakṣito yathā bahukṣīraghṛto gomān iti vyapadiśyate bahukṣīraghṛtābhāvāt satīṣv api goṣu na gomāṃs tathā saśalyatvāt satsv api vrateṣu na vratī yas tu niḥśalyaḥ sa vratī

tasya bhedapratipattyartham āha

pratiśrayārthibhiḥ aṃgyate iti agāraṃ veśma tad vānagārī na vidyate agāramasyety anagāraḥ dvividho vratī agārī anagāraś ca nanu cātra viparyayo 'pi prāpnoti śūnyāgāradevakulādyāvāsasya muner agāritvam anivṛttaviṣayatṛṣṇasya kutaścit kāraṇād gṛhaṃ vimucya vane vasato 'nagāratvaṃ ca prāpnotīti naiṣa doṣaḥ bhāvāgārasya vivakṣitatvāt cāritramohodaye saty agārasaṃbandhaṃ pratyanivṛttaḥ pariṇāmo bhāvāgāram ity ucyate sa yasyāsty asāv agārī vane vasann api gṛhe vasann api tadabhāvād anagāra iti ca bhavati nanu cāgāriṇo vratitvaṃ na prāpnoti asakalavratatvāt naiṣa doṣaḥ naigamādinayāpekṣayā agāriṇo 'pi vratitvam upapadyate nagarāvāsavat yathā gṛhe apavarake vā vasann api nagarāvāsa ity ucyeta tathā asakalavrato 'pi naigamasaṃgrahavyavahāranayāpekṣayā vratīti vyapadiśyate

atrāha kiṃ hiṃsādīnām anyatam asmād yaḥ pratinivṛttaḥ sa khalv agārī vratī naivam kiṃ tarhi paṃcatayyā api virater vaikalyena vivakṣita ity ucyate

'aṇu' śabdo 'lpavacanaḥ aṇūni vratāny asya aṇuvrato 'gārīty ucyate katham asya vratānām aṇuvratam sarvasāvadyanivṛttyasaṃbhavāt kutas tarhy asau nivṛttaḥ trasaprāṇivyaparopaṇān nivrattaḥ agārīty ādyam aṇuvratam snehamohādivaśād gṛhavināśe grāmavināśe vā kāraṇam ity abhimatād asatyavacanān nivṛtto gṛhīti dvitīyam aṇuvratam anyapīḍākaraṃ pārthivabhayādivaśād avaśyaṃ parityaktam api yadadattaṃ tataḥ pratinivṛttādaraḥ śrāvaka iti tṛtīyam aṇuvratam upāttāyā anupāttāyāś ca paraṃganāyāḥ saṃgān nivṛttaratir gṛhīti caturtham aṇuvratam dhanadhānyakṣetrādīnām icchāvaśāt kṛtaparicchedo gṛhīti paṃcamam aṇuvratam

āha aparityaktāgārasya kim etāvān eva viśeṣa āhosvid asti kaścid anyo 'pīty ata āha

'virati' śabdaḥ pratyekaṃ parisamāpyate digviratiḥ deśaviratiḥ anarthadaṇḍaviratir iti etāni trīṇi guṇavratāni 'vrata' śabdasya pratyekam abhisaṃbandhāt tathā sāmāyikavrataṃ proṣadhopavāsavrataṃ upabhogaparibhogaparimāṇavrataṃ atithisaṃvibhāgavrataṃ etāni catvāri śikṣāvratāni etair vrataiḥ saṃpanno gṛhī viratāvirata ity ucyate tad yathā dikprācyādiḥ tatra prasiddhair abhijñānair avadhiṃ kṛtvā niyamanaṃ digvirativratam tato bahis trasasthāvaravyaparopaṇanivṛtter mahāvratatvam avaseyam tatra lābhe saty api pariṇāmasya nivṛtter lobhanirāsaś ca kṛto bhavati grāmādīnām avadhṛtaparimāṇaḥ pradeśo deśaḥ tato bahir nivṛttir deśavirativratam pūrvavad bahir mahāvratatvaṃ vyavasthāpyam asaty upakāre pāpādānahetur anarthadaṇḍaḥ tato viratir anarthadaṇḍaviratiḥ anarthadaṇḍaḥ paṃcavidhaḥ apadhyānaṃ pāpopadeśaḥ pramādācaritaṃ hiṃsāpradānaṃ aśubhaśrutir iti tatra pareṣāṃ jayaparājayavadhabandhanāṅgacchedaparasvaharaṇādi kathaṃ syād iti manasā cintanam apadhyānam tiryakkleśavāṇijyaprāṇivadhakārambhādiṣu pāpasaṃyuktaṃ vacanaṃ pāpopadeśaḥ prayojanam antareṇa vṛkṣādichedanabhūmikuṭṭanasalilasecanādyavadhyakarma pramādācaritam viṣayakaṇṭakaśāstrāgnirajjukaśādaṇḍādihiṃsopakaraṇapradānaṃ hiṃsāpradānam hiṃsārāgādipravardhanaduṣṭakathāśravaṇaśikṣaṇavyāpṛtir aśubhaśrutiḥ samekībhāve vartate tadyathā saṃgataṃ ghṛtaṃ saṃgataṃ tailām ity ucyate ekībhūtam iti gamyate ekatvena ayanaṃ gamanaṃ samayaḥ samaya eva sāmāyikaṃ samayaḥ prayojanam asyeti vā vigṛhya sāmāyikam iyati deśe etāvati kāle ity avadhārite sāmāyike sthitasya mahāvratatvaṃ pūrvavad veditavyam kutaḥ aṇusthūlakṛtahiṃsādinivṛtteḥ saṃyamaprasaṃga iti cet na tadghātikarmodayasadbhāvāt mahāvratatvābhāva iti cet tan na upacārād rājakule sarvagatacaitrābhidhānavat proṣadhaśabdaḥ parvaparyāyavācī śabdādigrahaṇaṃ prati nivṛttautsukyāni paṃcānīṇdriyāṇy upetya tasmin vasantīty upavāsaḥ caturvidhāhāraparityāga ity arthaḥ proṣadhe upavāsaḥ proṣadhopavāsaḥ svaśarīrasaṃskārakāraṇasnānagandhamālyābharaṇādivirahitaḥ śucāv avakāśe sādhunivāse caityālaye svaproṣadhopavāsagṛhe vā dharmakathāśravaṇaśrāvaṇacintanavihitāntaḥkaraṇaḥ sann upavasen nirārambhaḥ śrāvakaḥ upabhogo 'śanapānagandhamālyādiḥ paribhoga ācchādanaprāvaraṇālaṃkāraśayanāsanagṛhayānavāhanādiḥ tayoḥ parimāṇam upabhogaparibhogaparimāṇam madhu māṃsaṃ madyaṃ ca sadā parihartavyaṃ trasaghātān nivṛttacetasā ketakyarjunapuṣpādīni śṛṅgaveramūlakādīni bahujantuyonisthānāny anantakāyavyapadeśārhāṇi parihartavyāni bahughātālpaphalatvāt yānavāhanābharaṇādiṣv etāvad eveṣṭam ato 'nyad aniṣṭam ity aniṣṭān nivartanaṃ kartavyaṃ kālaniyamena yāvaj jīvaṃ vā yathā śakti saṃyamam avināśayann atatīty atithiḥ athavā nāsya tithir astīty atithiḥ aniyatakālāgamana ity arthaḥ atithaye saṃvibhāgo 'tithisaṃvibhāgaḥ sa caturvidhaḥ bhikṣopakaraṇauṣadhapratiśrayabhedāt mokṣārtham abhyudyatāyātithaye saṃyamaparāyaṇāya śuddhāya śuddhacetasā niravadyā bhikṣā deyā dharmopakaraṇāni ca samyagdarśanādyupabṛṃhaṇāni dātavyāni auṣadham api yogyam upayojanīyam pratiśrayayaś ca paramadharmaśraddhayā pratipādayitavya iti 'ca' śabdo vakṣyamāṇagṛhasthadharmasamuccayārthaḥ

kaḥ punar asau

svapariṇāmopāttasyāyuṣa indriyāṇāṃ balānāṃ ca kāraṇavaśāt saṃkṣayo maraṇam 'anta' grahaṇaṃ tadbhavamaraṇapratipattyartham maraṇam anto maraṇāntaḥ sa prayojanam asyeti māraṇāntikī samyakkāyakaṣāyalekhanā sallekhanā kāyasya bāhyasyābhyantarāṇāṃ ca kaṣāyāṇāṃ tatkāraṇahāpanakrameṇa samyaglekhanā sallekhanā tām māraṇāntikīṃ sallekhanāṃ joṣihtā sevitā gṛhīty abhisaṃbadhyate nanu ca vispaṣṭārthaṃ sevitety evaṃ vaktavyam na arthaviśeṣopapatteḥ na kevalam iha sevanaṃ parigṛhyate kiṃ tarhi prītyartho 'pi yasmād asatyāṃ prītau balān na salllekhanā kāryate satyāṃ hi prītau svayam eva karoti syān matam ātmavadhaḥ prāpnoti svābhisandhipūrvakāyurādinivṛtteḥ naiṣa doṣaḥ apramattatvāt 'pramattayogāt prāṇavyaparopaṇaṃ hiṃsā' ity uktam na cāsya pramādayogo 'sti kutaḥ rāgādyabhāvāt rāgadveṣamohāviṣṭasya hi viṣaśāstrādyupakaraṇaprayogavaśād ātmānaṃ ghnataḥ svaghāto bhavati na sallekhanāṃ pratipannasya rāgādayaḥ santi tato nātmavadhadoṣaḥ uktaṃ ca rāgādīṇam aṇuppā ahiṃsagattaṃ ti desidaṃ samaye tesiṃ ce uppattī hiṃseti jiṇehi ṇiddiṭṭhā kiṃ ca maraṇasayāniṣṭatvād yathā vaṇijo vividhapaṇyadānādānasaṃcayaparasya svagṛhavināśo 'niṣṭaḥ tadvināśakāraṇe ca kutaścid upasthite yathāśakti pariharati duṣparihāre ca paṇyavināśo yathā na bhavati tathā yatate evaṃ gṛhastho 'pi vrataśīlapaṇyasaṃcaye pravartamānaḥ tadāśrayasya na pātam abhivāṃchati tadupaplavakāraṇe copasthite svaguṇavirodhena pariharati duṣparihāre ca yathā svaguṇavināso na bhavati tathā prayatata iti katham ātmavadho bhavet

atrāha 'niḥśalyo vratī' ity uktaṃ tatra ca tṛtīyaṃ śalyaṃ mithyādarśanam tataḥ samyagdṛṣṭinā vratinā niḥśalyena bhavitavyam ity uktam tatsamyagdarśanaṃ kiṃ sāpavādaṃ nirapavādam iti ucyate kasyacin mohanīyāvasthāviśeṣāt kadācid ime bhavaty apavādāḥ

niḥśaṃkitatvādayo vyākhyātāḥ 'darśanaviśuddhiḥ' ity atra tatpratipakṣabhūtāḥ śaṃkādayo veditavyāḥ atha praśaṃsāsaṃstavayoḥ ko viśeṣaḥ manasā mityādṛṣṭer jñānacāritraguṇodbhāvanaṃ praśaṃsā bhūtābhūtaguṇodbhāvavacanaṃ saṃstava ity ayam anayor bhedaḥ nanu ca samyagdarśanam aṣṭāṅgam uktaṃ tasyāticārair apy aṣṭabhir bhavitavyam naiṣa doṣaḥ vrataśīleṣu paṃca paṃcāticārā ity uttaratra vivakṣuṇācāryeṇa praśaṃsāsaṃstavayor itarān aticārānantarbhāvya paṃcaivāticārā uktāḥ

āha samyagdṛṣṭer aticārā uktāḥ kim evaṃ vrataśīleṣv api bhavantīti om ity uktvā tadaticārasaṃkhyānirdeśārtham āha

vratani ca śīlāni ca vrataśīlāni teṣu vrataśīleṣu śīlagrahaṇam anarthakam vratagrahaṇenaiva siddheḥ nānarthakam viśeṣajñāpanārthaṃ vratparirakṣaṇārthaṃ śīlām iti digviratyādīnīha 'śīla' grahaṇena gṛhyante

agāryadhikārād agāriṇo vrataśīleṣu paṃca paṃcāticārā vakṣyamāṇā yathākramaṃ veditavyāḥ tad yathā ādyasya tāvad ahiṃsāvratasya

abhimatadeśagatinirodhahetur bandhaḥ danḍakaśāvetrādibhir abhighātaḥ prāṇiṇāṃ vadhaḥ na prāṇavyaparopaṇam tataḥ prāgevāsya vinivṛttatvāt karṇanāsikādīnām avayavānām apanayanaṃ chedaḥ nyāyyabhārād atiriktavāhanam atibhārāropaṇam gavādīnāṃ kṣutpipāsābādhākaraṇam annapānanirodhaḥ ete paṃcāhiṃsāṇuvratasyāticārāḥ

abhyudayaniḥśreyasārtheṣu kriyāviśeṣeṣu anyasyānyathā pravartanam atisaṃdhāpanaṃ vā mityopadeśaḥ yat strīpuṃsābhyām ekānte 'nuṣṭhitasya kriyāviśeṣasya prakāśanaṃ tad rahobhyākhyānaṃ veditavyam anyenānuktam ananuṣṭhitaṃ yat kiṃcit paraprayogavaśād evaṃ tenoktam anuṣṭhitam iti vaṃcanānimittaṃ lekhanaṃ kūṭalekhakriyā hiraṇyāder dravyasya nikṣeptur vismṛtasaṃkhyālpasaṃkhyeyam ādadānasyaivam ity anujñāvacanaṃ nyāsāpahāraḥ arthaprakaraṇāṅgavikārabhrūvikṣepādibhiḥ parākūtam upalabhya tadāviṣkaraṇam asūyādinimittaṃ yattatsākāramantrabheda iti kathyate ta ete satyāṇuvratasya paṃcāticārā boddhavyāḥ

muṣṇantaṃ svayam eva vā prayuṅkte 'nyena vā prayojayati prayuktam anumanyate vā yataḥ sa stenaprayogaḥ aprayuktenānumatena ca caureṇānītasya grahaṇaṃ tadāhṛtādānam ucitanyāyād anyena prakāreṇa dānagrahaṇam atikramaḥ viruddhaṃ rājyaṃ viruddharājyam viruddharājye 'tikramaḥ viruddharājyātikramaḥ tatra hy alpamūlyalabhyāni mahārghyāṇi dravyāṇīti prayatnaḥ prasthādi mānam tulādyunmānam etena nyūnenānyasmai deyam adhikenātmano grāhyam ity evam ādi kūṭaprayogo hīnādhikamānonmānam kṛtrimair hiraṇyādibhir vañcanāpūrvako vyavahāraḥ pratirūpakavyavahāraḥ ta ete pañcādattādānāṇuvratasyāticārāḥ

kanyādānaṃ vivāhaḥ parasya vivāhaḥ paravivāḥ paravivāhasya karaṇaṃ paravivāhakaraṇam parapuruṣāneti gacchatīity evaṃ śīlā itvarī kutsitā itvarī kutsāyāṃ ka itvarikā yā ekapuruṣabhartṛkā sā parigṛhītā yā gaṇikātvena puṃścalītvena vā parapuruṣagamanaśīlā asvāmikā sā aparigṛhītā parigṛhītā cāparigṛhītā ca parigṛhītāparigṛhīte itvarike ca te parigṛhītāparigṛhīte ca itvarikāparigṛhītāparigṛhīte tayor gamane itvarikāparigṛhītāparigṛhītāgamane aṃga prajananaṃ yoniś ca tato 'nyatra krīḍā anaṅgakrīḍā kāmasya pravṛddhaḥ pariṇāmaḥ kāmatīvrābhiniveśaḥ ta ete paṃca svadārasaṃtoṣavratasyāticārāḥ

kṣetraṃ sasyādhikaraṇam vāstu agāram hiraṇyaṃ rūpyādivyavahāratantram suvarṇaṃ pratītam dhanaṃ gavādi dhānyaṃ vrīhyādi dāsidāsaṃ bhṛtyastrīpuṃsavargaḥ kupyaṃ kṣaumakārpāsakauśeyacandanādi kṣetraṃ ca vāstu ca kṣetravāstu hiraṇyaṃ ca suvarṇaṃ ca hiraṇyasuvarṇam dhanaṃ ca dhānyaṃ ca dhanadhānyam dāsī ca dāsaś ca dāsīdāsam kṣetravāstu ca hiraṇyasuvarṇaṃ ca dhanadhānyaṃ ca dāsīdāsaṃ ca kupyaṃ ca kṣetravāstuhiraṇyasuvarṇadhanadhānyadāsīdāsakupyāni etāvān eva parigraho mama nānya iti paricchinnāṇupramāṇāt kṣetravāstvādiviṣayād atirekā atilobhavaśāt pramāṇātikramā iti pratyākhyāyante ta ete parigrahaparimāṇavratasyāticārāḥ

uktā vratānām aticārāḥ śīlānām aticārā vakṣyante tad yathā

parimitasya digavadher atilaṃghanam atikramaḥ sa samāsatas trividhhaḥ ūrdhvātikramaḥ adho 'tikramas tiryagatikramaś ceti tatra parvatādyārohaṇād ūrdhvātikramaḥ kūpāvataraṇāder adho 'tikramaḥ bilapraveśādes tiryagatikramaḥ parigṛhītāyā diśo lobhāveśād ādhikyābhisandhiḥ kṣetravṛddhiḥ sa eṣo 'tikramaḥ pramādān mohād vyāsaṃgād vā bhavatīty avaseyaḥ ananusmaraṇaṃ smṛtyantarādhānam ta ete digviramaṇasyāticārāḥ

ātmanā saṃkalpite deśe sthitasya prayojanavaśād yatkiṃcid ānayety ājñāpanam ānayanam evaṃ kurv iti niyogaḥ preṣyaprayogaḥ vyāpārakarān puraṣān pratyabhyutkāsikādikaraṇaṃ śabdānupātaḥ svavigrahadarśanaṃ rūpānupātaḥ loṣṭādinipātaḥ pudgalakṣepaḥ ta ete deśaviramaṇasya pañcāticārāḥ

rāgodrekāt prahāsamiśro 'śiṣṭavākprayogaḥ kandarpaḥ tadevobhayaṃ paratra duṣṭakāyakarmaprayuktaṃ kautkucyam dhārṣṭyaprāyaṃ yatkiṃ vanānarthakaṃ bahupralāpitvaṃ maukharyam asamīkṣya prayojanam ādhikyena karaṇam asamīkṣyādhikaraṇam yāvatā 'rthenopabhogaparibhogau so 'rthas tato 'nyasyādhikyamānarthakyam ta ete pañcānarthadaṇḍavirater aticārāḥ

yogo vyākhyātas trividhaḥ tasya duṣṭaṃ praṇidhānaṃ yogaduṣpraṇidhānam kāyaduṣpraṇidhānaṃ vāgduṣpraṇidhānaṃ manoduṣpraṇidhānam iti anādaro 'nutsāhaḥ anaikāgryaṃ smṛtyanupasthānam ta ete pañca sāmāyikasyātikramāḥ

jantavaḥ santi na santi veti pratyavekṣaṇaṃ cakṣurvyāpāraḥ mṛdunopakaraṇena yat kriyate prayojanaṃ tat pramārjitam tadubhayaṃ pratiṣedhaviśiṣṭam utsargādibhis tribhir abhisaṃbadhyate apratyavekṣitāpramārjitotsarga ity evam ādi tatra apratyavekṣitāpramārjitāyāṃ bhūmau mūtrapurīṣotsargaḥ apratyavekṣitāpramārjitotsargaḥ apratyavekṣitāpramārjitasyārhadācāryapūjopakaraṇasya gaṃdhamālyadhūpāder ātmaparidhānādyarthasya ca vastrāder ādānam apratyavekṣitāpramārjitādānam apratyavekṣitāpramārjitasya prāvaraṇādeḥ saṃstarasyopakramaṇaṃ apratyavekṣitāpramārjitasaṃstaropakramaṇam kṣudabhyarditatvād āvaśyakeṣv anādaro 'nutsāḥ smṛtyanupasthānaṃ vyākhyātam ta ete pañca proṣadhopavāsasyāticārāḥ

saha cittena vartate iti sacittaṃ cetanāvad dravyam tadupaliṣṭaḥ saṃbandhaḥ tadvyatikīrṇaḥ saṃmiśraḥ kathaṃ punar asya sacittādiṣu pravṛttiḥ pramādasaṃmohābhyām dravo vṛṣyo vābhiṣavaḥ asamyakpakvo duṣpakvaḥ etair āhāro viśeṣyate sacittāhāraḥ saṃbandhāhāraḥ saṃmiśrāhāro 'bhiṣavāhāro duṣpakvāhāra iti ta ete pañca bhogopabhogaparisaṃkhyānasyāticāraḥ

sacitte padmapatrādau nikṣepaḥ sacittanikṣepaḥ apidhānam āvaraṇam sacittenaiva saṃbadhyate sacittāpidhānam iti anyadātṛdeyārpaṇaṃ paravyapadeśaḥ prayacchato 'py ādarābhāvo 'nyadātṛguṇāsahanaṃ vā mātsaryam akāle bhojanaṃ kālātikramaḥ ta ete pañcātithisaṃvibhāgaśīlāticārāḥ

āśaṃsanam āśaṃsā ākāṅkṣaṇam ity arthaḥ jīvitaṃ ca maraṇaṃ ca jīvitamaraṇam jīvitamaraṇasyāśaṃse jīvitamaraṇāśaṃse pūrvasuhṛtsahapāṃsukrīḍanādyanusmaraṇaṃ mitrānurāgāḥ anubhūtaprītiviśeṣasmṛtisamanvāhāraḥ sukhānubandhaḥ bhogākāṅkṣayā niyataṃ dīyate cittaṃ tasmiṃs teneti vā nidānam ta ete pañca sallekhanāyā aticārāḥ

atrāha uktaṃ bhavatā tīrthakaratvakāraṇakarmāsravanirdeśe 'śaktitas tyāgatapasī ' iti punaś coktaṃ śīlavidhāne 'atithisaṃvibhāga' iti tasya dānasya lakṣaṇam anirjñātaṃ taducyatām ity ata āha

svaparopakāro 'nugrahaḥ svopakāraḥ puṇyasaṃcayaḥ paropakāraḥ samyagjñānādivṛddhiḥ 'sva' śabdo dhanaparyāyavacanaḥ anugrahārthaṃ svasyātisargas tyāgo dānaṃ veditavyam

atrāha uktaṃ dānaṃ tat kim aviśiṣṭaphalam āhosvid asti kaścit prativiśeṣa ity ata āha

pratigrahādikramo vidhiḥ viśeṣo guṇakṛtaḥ tasya pratyekam abhisambandhaḥ kriyate vidhiviśeṣo dravyaviśeṣo dātṛviseṣaḥ pātraviśeṣa iti tatra vidhiviśeṣaḥ pratigrahādiṣv ādarānādarakṛto bhedaḥ tapaḥsvādhyāyaparivṛddhihetutvādir dravyaviśeṣaḥ anasūyāviṣādādir dātṛviśeṣaḥ mokṣakāraṇaguṇasaṃyogaḥ pātraviśeṣaḥ tataś ca puṇyaphalaviśeṣaḥ kṣityādiviśeṣād bījaphalaviśeṣavat

vyākhyāta āsravapadārthaḥ tadanantaroddeśabhāgbandhapadārtha idānīṃ vyākhyeyaḥ tasmin vyākhyeye sati pūrvaṃ bandhahetūpanyāsaḥ kriyate tatpūrvakatvād bandhasyeti

mithyādarśanādaya uktāḥ kva mithyādarśanaṃ tāvad uktam 'tattvārthaśraddhānaṃ samyagdarśanam' ity atra tatpratipakṣabhūtam āsravavidhāne ca kriyāsu vyākhyātaṃ mithyādarśanakriyeti viratir uktā tatpratipakṣabhūtā aviratir grāhyā ājñāvyāpādanakriyā anākaṅkṣākriyety anayoḥ pramādasyāntarbhāvaḥ sa ca pramādaḥ kuśaleṣv anādaraḥ kaṣāyāḥ krodhādayaḥ anantānubandhyapratyākyānapratyākyānasaṃjvalanavikalpāḥ proktāḥ kva 'indriyakaṣāyā' ity atraiva yogāḥ kāyādivikalpāḥ proktāḥ kva 'kāyavāṅmanaḥkarma yogaḥ' ity atra

mithyādarśanaṃ dvividham naisargikaṃ paropadeśapūrvakaṃ ca tatra paropadeśam antareṇa mithyātvakarmodayavaśād yad āvirbhavati tattvārthāśraddhānalakṣaṇaṃ tan naisargikam paropadeśanimittaṃ caturvidham kriyākriyāvādyajñānikavainayikavikalpāt athavā pañcavidhaṃ mithyādarśanam ekāntamithyādarśanaṃ viparītamithyādarśanaṃ saṃśayamithyādarśanaṃ vainayikamithyādarśanam ajñānikamithyādarśanaṃ ceti tatra idam eva ittham eveti dharmidharmayor abhiniveśa ekāntaḥ puruṣa evedaṃ sarvam iti vā nitya eva vā anitya eveti sagrantho nirgranthaḥ kevali kavalāhārī strī sidhyatīty evam ādiḥ viparyayaḥ samyagdarśanajñānacāritrāṇi kiṃ mokṣamāragaḥ syād vā na vety antarapakṣāparigrahaḥ saṃśayaḥ sarvadevatānāṃ sarvasamayānāṃ ca samadarśanaṃ vainayikam hitāhitaparīkṣāviraho 'jñānikatvam uktaṃ ca āsidisadaṃ kiriyāṇaṃ akkiriyāṇaṃ taha ya hoi culasīdī sattaṭṭhamaṇṇāṇīṇaṃ veṇaiyāṇaṃ tu battisaṃ

aviratir dvādaśavidhāḥ ṣaṭkāyaṣaṭkaraṇaviṣayabhedāt ṣodaśa kaṣāyā nava nokaṣāyās teṣām īṣadbhedo na bheda iti paṃcaviṃśatiḥ kaṣāyāḥ catvāro manoyogaś catvāro vāgyogāḥ pañca kāyayogā iti trayodaśavikalpo yogaḥ āhārakakāyayogāhārakamiśrakāyayogayoḥ pramattasaṃyate saṃbhavāt pañcadaśāpi bhavanti pramādo 'nekavidhaḥ śuddhyaṣṭakottamakṣamādiviṣayabhedāt ta ete pañca bandhahetavaḥ samastā vyastāś ca bhavanti tad yathā mithyādṛṣṭeḥ paṃcāpi samuditā bandhahetavo bhavanti sāsādhanasamyagdṛṣṭisamyaṅmithyādṛṣṭyasaṃyatasamyagdṛṣṭīnām aviratyādayaś catvāraḥ saṃyatāsaṃyatasyāviratir viratimiśrā pramādakaṣāyayogaś ca pramattasaṃyatasya pramādakaṣāyayogāḥ apramattādīnāṃ caturṇāṃ yogakaṣāyau upaśāntakaṣāyakṣīṇakaṣāyasayogakevalinām eka eva yogaḥ ayogakevalino na bandhahetuḥ

uktā bandhahetavaḥ idānīṃ bandho vaktavya ity ata āha

saha kaṣāyeṇa vartata iti sakaṣāyaḥ sakaṣāyasya bhāvaḥ sakaṣātvam tasmāt sakaṣāyatvād iti punar hetunirdeśaḥ jaṭharāgnyāśayānurūpāhāragrahaṇavattīvramandamadhyamakaṣāyāśayānurūpasthityanubhavaviśeṣapratipattyartham amūrtir ahasta ātmā kathaṃ karmādatta iti coditaḥ san 'jīvaḥ' ity āha jīvanāj jīvaḥ prāṇādhāraṇād āyuḥsaṃbandhān nāyurvirahād iti 'karmayogyān' iti laghunirdeśāt siddhe 'karmaṇo yogyān' iti pṛthagvibhaktyuccāraṇaṃ vākyāntarajñāpanārtham kiṃ punas tadvākyāntaram karmaṇo jīvaḥ sakaṣāyo bhavatīty ekaṃ vākyam etad uktaṃ bhavati 'karmaṇaḥ' iti hetunirdeśaḥ karmaṇo hetor jīvaḥ sakaṣāyo bhavati nākarmasya kaṣāyalepo 'sti tato jīvakarmaṇor anādisaṃbandha iti uktaṃ bhavati tenāmūrto jīvo mūrtena karmaṇā kathaṃ badhyate iti codyam apākṛtaṃ bhavati itarathā hi bandhasyādimattve ātyantikīṃ śuddhiṃ dadhataḥ siddhasyeva bandhābhāvaḥ prasajyeta dvitīyaṃ vākyaṃ 'karmaṇo yogyān pudgalān ādatte' iti arthavaśād vibhaktipariṇāma iti pūrvahetusaṃbandham tyaktvā ṣaṣṭhīsaṃbandham upaiti 'karmaṇo yogyān' iti 'pudgala' vacanaṃ karmaṇas tādātmyakhyāpanārtham tenātmaguṇo 'dṛṣṭo nirākṛto bhavati tasya saṃsārahetutvānupapatteḥ 'ādatte' iti hetuhetumadbhāvakhyāpanārtham ato mithyādarśanādyāveśād ārdrīkṛtasyātmanaḥ sarvato yogaviśeṣāt teṣāṃ sūkṣmaikakṣetrāvagāhinām anantānantapradeśānāṃ pudgalānāṃ karmabhāvayogyānām avibhagenopaśleṣo bandha ity ākhyāyate yathā bhājanaviśeṣe prakṣiptānāṃ vividharasabījapuṣpaphalānāṃ madirābhāvena pariṇāmas tathā pudgalānām apy ātmani sthitānāṃ yogakaṣāyavaśāt karmabhāvena pariṇāmo veditavyaḥ 'saḥ' vacanam anyanivṛttyartham sa eṣa bandho nānyo 'stīti tena guṇaguṇibandho nivartito bhavati karmādisādhano 'bandha'śabdo vyākhyeyaḥ

āha kim ayaṃ bandha ekarūpa eva āhosvit prakārā apy asya santīty ata idam ucyate

prakṛtiḥ svabhāvaḥ nimbasya kā prakṛtiḥ tiktatā guḍasya kā prakṛtiḥ madhuratā tathā jñānāvaraṇasya kā prakṛtiḥ arthānavagamaḥ darśanāvaraṇasya kā prakṛtiḥ arthānālokanam vedyasya sadasallakṣaṇasya sukhaduḥkhasaṃvedanam darśanamohasya tattvārthāśraddhānam cāritramohasyāsaṃyamaḥ āyuṣo bhavadhāraṇam nāmno nārakādināmakaraṇam gotrasyoccair nīccaiḥ sthānasaṃśabdanam anantarāyasya dānādivighnakaraṇam tadevaṃ lakṣaṇaṃ kāryaṃ prakriyate prabhavaty asyā iti prakṛtiḥ tatsvabhāvād apracyutiḥ sthitiḥ yathā ajāgomahiṣyādikṣīrāṇāṃ mādhuryasvabhāvād apracyutiḥ sthitiḥ tathā jñānāvaraṇādīnām arthāvagamādisvabhāvād apracyutiḥ sthitiḥ tadrasaviśeṣo 'nubhavaḥ yathā ajāgomahiṣyādikṣīrāṇāṃ tīvramandādibhāvena rasaviśeṣaḥ tathā karmapudgalānāṃ svagatasāmarthyaviśeṣo 'nubhavaḥ iyattāvadhāraṇaṃ pradeśaḥ karmabhāvapariṇatapudgalaskandhānāṃ paramāṇuparicchedenāvadhāraṇaṃ pradeṣaḥ 'vidhi'śabdaḥ prakāravacanaḥ ta ete prakṛtyādayaś catvāras tasya bandhasya prakārāḥ tatra yoganimittau prakṛtipradeśau kaṣāyanimittau sthityanubhavau tatprakarṣāprakarṣabhedād tadbaṃdhavicitrabhāvaḥ tathā coktam jogā payaḍipaesā ṭhidiaṇubhāgā kasāyado kuṇadi apariṇaducchiṇṇesu ya baṃdhaṭṭhidikāraṇaṃ ṇatthi

tatrādyasya prakṛtibandhasya bhedapradarśanārtham āha

ādyaḥ prakṛtibandho jñānāvaraṇādyaṣṭavikalpo veditavyaḥ āvṛṇoty āvriyate 'neneti vā āvaraṇam tat pratyekam abhisaṃbadhyate jñānāvaraṇaṃ darśanāvaraṇam iti vedayati vedyata iti vā vedanīyam mohayati mohyate 'neneti vā mohanīyam ety anena nārakādibhavam ity āyuḥ namayaty ātmānaṃ namyate 'neneti vā nāma uccair nīcaiś ca gūyate śabdyata iti vā gotram dātṛdeyādīnām antaraṃ madhyametīty antarāyaḥ ekenātmapariṇāmenādīyamānāḥ pudgalā jñānāvaraṇādyanekabhedaṃ pratipadyante sakṛdupabhuktānnapariṇāmarasarudhirādivat

āha ukto mūlaprakṛtibandho 'ṣṭavidhaḥ idānīm uttaraprakṛtibandho vaktavya ity ata āha

dvitīyagrahaṇam iha kartavyaḥ dvitīya uttaraprakṛtibandha evaṃ vikalpa iti na kartavyam pāriśeṣyāt siddheḥ ādyo mūlaprakṛtibandho 'ṣṭavikalpa uktaḥ tataḥ pāriśeṣyād ayam uttaraprakṛtivikalpavidhir bhavati 'bheda' śabdaḥ pañcādibhir yathā kramam abhisaṃbandhyate pañcabhedaṃ jñānāvaraṇīyaṃ navabhedaṃ darśanāvaraṇīyaṃ dvibhedaṃ vedanīyaṃ aṣṭāviṃśatibhedaṃ mohanīyaṃ caturbhedam āyuḥ dvicatvāriṃśadbhedaṃ nāma dvibhedaṃ gotraṃ paṃcabhedo 'ntarāya iti

yadi jñānāvaraṇīyaṃ paṃcabhedaṃ tatpratipattir ucyatām ity ata āha

matyādīni jñānāni vyākhyātāni teṣām āvṛter āvaraṇabhedo bhavatīti paṃcottaraprakṛtayo veditavyāḥ atra codyate abhavyasya manaḥparyayajñānaśaktiḥ kevalajñānaśaktiś ca syād vā na vā yadi syāt tasyābhavyatvābhāvaḥ atha nāsti tatrāvaraṇadvayakalpanā vyartheti ucyate ādeśavacanān na doṣaḥ dravyārthādeśān manaḥparyayakevalajñānaśaktisaṃbhavaḥ paryāyārthādeśāt tacchaktyabhāvaḥ yady evaṃ bhavyābhavyavikalpo nopapadyate ubhayatra tacchaktisadbhāvāt na śaktibhāvābhāvāpekṣayā bhavyābhavyavikalpa ity ucyate kutas tarhi vyaktisadbhāvāsadbhāvāpekṣayā samyagdarśanādibhir vyaktir yasya bhaviṣyati sa bhavyaḥ yasya tu na bhaviṣyati so 'bhavya iti kanaketarapāṣāṇavat

āha ukto jñānāvaraṇottaraprakṛtivikalpaḥ idānīṃ darśanāvaraṇasya vaktavya ity ata āha

cakṣuracakṣuravadhikevalānām iti darśanāvaraṇāpekṣayā bhedanirdeśaḥ cakṣurdarśanāvaraṇam acakṣurdarśanāvaraṇam avadhidarśanāvaraṇaṃ kevaladarśanāvaraṇam iti madakhedaklamavinodanārthaḥ svāpo nidrā tasyā upary upari vṛttir nidrānidrā yā kriyātmānaṃ pracalayati sā pracalā śokaśramamadādiprabhavā āsīnasyāpi netragātravikriyāsūcikā saiva punaḥ punar āvartamānā pracalāpracalā svapne yathā vīryaviśeṣāvirbhāvaḥ sā styānagṛddhiḥ styāyater anekārthatvāt svapnārtha iha gṛhyate gṛddher api dīptiḥ styāne svapne gṛddhyati dīpyate yad udayād ātmā raudraṃ bahukarma karoti sā styānagṛddhiḥ iha nidrādibhir darśanāvaraṇaṃ sāmānādhikaraṇyenābhisaṃbadhyate nidrādarśanāvaraṇam nidrānidrādarśanāvaraṇam ity ādi

tṛtīyasyāḥ prakṛter uttaraprakṛtipratipādanārtham āha

yad udayād devādigatiṣu śarīramānasasukhaprāptis tat sadvedyam praśastaṃ vedyaṃ sadvedyam iti yat phalaṃ duḥkham anekavidhaṃ tad asadvedyam apraśastaṃ vedyam asadvedyam iti

caturthyāḥ prakṛter uttaraprakṛtivikalpanidarśanārtham āha

darśanādayaś catvāraḥ tryādayo 'pi tatra yathāsaṃkhyena saṃbandho bhavati darśanamohanīyaṃ tribhedham cāritramohanīyaṃ dvibhedam akaṣāyavedanīyaṃ navavidham kaṣāyavedanīyaṃ ṣoḍaśavidham iti

tatra darśanamohanīyaṃ tribhedham samyaktvaṃ mithyātvaṃ tadubhayam iti tad bandhaṃ pratyekaṃ bhūtvā satkarmāpekṣayā tridhā vyavatiṣṭhate tatra yasyodayāt sarvajñapraṇītamārgaparāṅmukhas tattvārthaśraddhānanirutsuko hitāhitavicārāsamartho mithyādṛṣṭir bhavati tan mithyātvam tad eva samyaktvaṃ śubhapariṇāmaniruddhasvarasaṃ yad audāsīnyenāvasthitam ātmanaḥ śraddhānaṃ na niruṇaddhi tad vedayamānaḥ puruṣaḥ samyagdṛṣṭir ity abhidhīyate tad eva mithyātvaṃ prakṣālanaviśeṣāt kṣīṇākṣīṇamadaśaktikodravavatsāmiśuddhasvarasaṃ tadubhayam ity ākhyāyate samyaṅmithyātvam iti yāvat yasyodayād ātmano 'rdhaśuddhamadakodravaudanopayogāpāditamiśrapariṇāmavadubhayātmako bhavati pariṇāmaḥ

cāritramohanīyaṃ dvidhā akaṣāyakaṣāyabhedāt īṣad arthe nañaḥ prayogād īṣat kaṣāyo 'kaṣāya iti akaṣāyavedanīyaṃ navavidham kutaḥ hāsyādibhedāt yasyodayād dhāsyāvirbhāvas tad dhāsyam yad udayād deśādiṣv autsukyaṃ sā ratiḥ aratis tadviparītā yad vipākāc chocanaṃ sa śokaḥ yad udayād udvegas tad bhayam yad udayād ātmadoṣasaṃvaraṇaṃ paradoṣāviṣkaraṇaṃ sā jugupsā yad udayāt straiṇān bhāvān pratipadyate sa strīvedaḥ yasyodayāt pauṃsnān bhāvānāskandati sa puṃvedaḥ yad udayān nāpuṃsakān bhāvān upavrajati sa napuṃsakavedaḥ

kaṣāyavedanīyaṃ ṣoḍaśavidham kutaḥ anantānubandhyādivikalpāt tad yathā kaṣāyāḥ krodhamānamāyālobhāḥ teṣām catasro 'vasthāḥ anantānubandhino 'pratyākhyānāvaraṇāḥ pratyākhyānāvaraṇāḥ saṃjvalanāś ceti anantasaṃsārakāraṇatvān mithyādarśanam anantam tadanubandhino 'nantānubandhinaḥ krodhamānamāyālobhāḥ yadudayād deśaviratiṃ saṃyamāsaṃyamākhyām alpām api kartuṃ na śaknoti te deśapratyākhyānam āvṛṇvanto 'pratyākhyānāvaraṇāḥ krodhamānamāyālobhāḥ yadudayād viratiṃ kṛtsnāṃ saṃyamākhyāṃ na śaknoti kartuṃ te kṛtsnaṃ pratyākhyānam āvṛṇvantaḥ pratyākhyānāvaraṇāḥ krodhamānamāyālobhāḥ samekībhāve vartate saṃyamena sahāvasthānād ekībhūya jvalanti saṃyamo vā jvalaty eṣu satsv apīti saṃjvalanāḥ krodhamānamāyālobhāḥ ta ete samuditāḥ santaḥ ṣoḍaśa kaṣāyā bhavanti

mohanīyānantaroddeśabhāja āyuṣa uttaraprakṛtinirjñāpanārtham āha

nārakādiṣu bhavasaṃbandhenāyuṣo vyapadeśaḥ kriyate narakeṣu bhavaṃ nārakam āyuḥ tiragyoniṣu bhavaṃ tairyagyonam mānuṣeṣu bhavaṃ mānuṣam deveṣu bhavaṃ daivam iti narakeṣu tīvraśītoṣṇavedaneṣu yannimittaṃ dīrghajīvanaṃ tannārakam evaṃ śeṣv api

āyuś caturvidhaṃ vyākhyātam tadanantaram uddiṣṭaṃ yan nāmakarma tad uttaraprakṛtinirṇayārtham āha

yad udayātmā bhavāntaraṃ gacchati sā gatiḥ sā carturvidhā narakagatis tiryaggatir manuṣyagatir devagatiś ceti yan nimitta ātmano nārako bhāvas tan narakagatināma evaṃ śeṣv api yojyam tāsu narakādigatiṣv avyabhicāriṇā sādṛśyenaikīkṛto 'rthātmā jātiḥ tannimittaṃ jātināma tatpañcavidham ekendriyajātināma dvīndriyajātināma trīndriyajātināma caturindriyajātināma pañcendriyajātināma ceti yad udayād ātmā ekendriya iti śabdyate tad ekendriyajātināma evaṃ śeṣv api yojyam yad udayād ātmanaḥ śarīranirvṛttis tac charīranāma tat pañcavidham audārikaśarīranāma vaikriyikaśarīranāma āhārakaśarīranāma taijasaśarīranāma kārmaṇaśarīranāma ceti teṣāṃ viśeṣo vyākhyātaḥ yad udayād āṅgopāṅgavivekas tad āṅgopāṅganāma tat trividham audārikaśarīrāṅgopāṅganāma vaikriyikaśarīrāṅgopāṅganāma āhārakaśarīrāṅgopāṅganāma ceti yan nimittāt pariniṣpattis tan nirmāṇam tad dvividhaḥ sthānanirmāṇaṃ pramāṇanirmāṇaṃ ceti tajjātināmodayāpekṣaṃ cakṣurādīnāṃ sthānaṃ pramāṇaṃ ca nirvartayati nirmīyate 'neneti nirmāṇam śarīranamakarmodayavaśād upāttānāṃ pudgalānām anyonyapradeśasaṃśleṣaṇaṃ yato bhavati tad bandhananāma yadudayād audārikādiśarīrāṇāṃ vivaravirahitānyo 'nyapradeśānupraveśena ekatvāpādanaṃ bhavati satsaṃghātanāma yad udayād audārikādisarīrākṛtinirvṛttir bhavati tat saṃsthānanāma tat ṣoḍhā vibhajyate samacaturasrasaṃsthānanāma nyagrodhaparimaṇḍalasaṃsthānanāma svātisaṃsthānanāma kubjasaṃsthānanāma vāmanasaṃsthānanāma huṇḍasaṃsthānanāma ceti yasyodayāt asthibandhanaviśeṣo bhavati tatsaṃhanananāma tat ṣaḍvidham vajrarṣabhanārācasaṃhanananāma vajranārācasaṃhanananāma nārācasaṃhanananāma ardhanārācasaṃhanananāma kīlikāsaṃhanananāma asaṃprāptāsṛpāṭikāsaṃhanananāma ceti yasyodayāt sparśaprādurbhāvas tat sparśanāma tad aṣṭavidham karkaśanāma mṛdunāma gurunāma laghunāma snigdhanāma rūkṣanāma śītanāma uṣṇanāma ceti yan nimitto rasavikalpas tad rasanāma tat pañcavidham tiktanāma kaṭukanāma kaṣāyanāma āmlanāma madhuranāma ceti yad udayaprabhavo gandhas tad gandhanāma tad dvividham surabhigandhanāma asurabhigandhanāma ceti yad dhetuko varṇavibhāgas tad varṇanāma tat paṃcavidham kṛṣṇavarṇanāma nīlavarṇanāma raktavarṇanāma hāridravaṛnanāma śuklavarṇanāma ceti pūrvaśarīrākārāvināśo yasyodayād bhavati tad ānupūrvyanāma tac caturvidham narakagatiprāyogyānupūrvyanāma tiryaggatiprāyogyānupūrvyanāma manuṣyagatiprāyogyānupūrvyanāma devagatiprāyogyānupūrvyanāma ceti yasyodayād ayaḥpiṇḍavad gurutvān nādhaḥ patati na cārkatūlavallaghutvād ūrdhvaṃ gacchati tad gurulaghunāma yasyodayāt svayaṃkṛtodbandhanamaruprapatanādinimitta upaghāto bhavati tad upaghātanāma yannimittaḥ paraśastrāder vyāghātas tat paraghātanāma yadudayān nirvṛttam ātapanaṃ tadātapanama tadāditye vartate yan nimittam udyotananaṃ tad udyotanāma tac candrakhadyotādiṣu vartate yaddhetur ucchvāsas tad ucchvāsanāma vihāya ākāśam tatra gatinirvartakaṃ tad vihāyogatināma tad dvividham praśastāpraśastabhedāt śarīranāmakarmodayān nirvartyamānaṃ śarīram ekātmopabhogakāraṇaṃ yato bhavati tat pratyekaśarīranāma bahūnām ātmanām upabhogahetutvena sādhāraṇaṃ śarīraṃ yato bhavati tat sādhāraṇaśarīranāma yadudayād dvīndriyādiṣu janma tat trasanāma yannimitta ekendriyeṣu prādurbhāvas tat sthāvaranāma yadudayād anyaprītiprabhavas tat subhaganāma yadudayād rūpādiguṇopeto 'py aprītikaras tad durbhaganāma yannimittaṃ manojñasvaranirvartanaṃ tat susvaranāma tadviparītaṃ duḥsvaranāma yad udayād ramaṇīyatvaṃ tac chubhanāma tadviparītaṃ aśubhanāma sūkṣmaśarīranirvartakaṃ sūkṣmanāma anyabādhākaraśarīrakāraṇaṃ bādaranāma yadudayād āhārādiparyāptinirvṛttiḥ tat paryāptināma tat ṣaḍvidham āhāraparyāptināma śarīraparyāptināma indriyaparyāptināma prāṇāpanaparyāptināma bhāṣāparyāptināma manaḥparyāptināma ceti ṣaḍvidhaparyāptyabhāvahetur aparyāptināma sthirabhāvasya nirvartakaṃ sthiranāma tadviparītam asthiranāma prabhopetaśarīrakāraṇam ādeyanāma niṣprabhaśarīrakāraṇam anādeyanāma puṇyaguṇakhyāpanakāraṇaṃ yaśaḥkīrtināma tatpratyanīkaphalam ayaśaḥkīrtināma ārhantyakāraṇaṃ tīrthakaratvanāma

ukto nāmakarmaṇa uttaraprakṛtibhedaḥ tadanantaroddeśabhājo gotrasya prakṛtibhedo vyākhyāyate

gotraṃ dvividham uccairgotraṃ nīcairgotram iti yasyodayāl lokapūjiteṣu kuleṣu janma tac uccairgotram yadudayād garhiteṣu kuleṣu janma tan nīcairgotram

aṣṭamyāḥ karmaprakṛter uttaraprakṛtinirdeśārtham āha

antarāyāpekṣayā bhedanirdeśaḥ kriyate dānasyāntarāyo lobhasyāntarāya ity ādi dānādipariṇāmavyāghātahetutvāt tad vyapadeśaḥ yadudayād dātukāmo 'pi na prayacchati labdhukāmo 'pi na labhate bhoktum icchann api na bhuṅkte upabhoktum abhivāñchann api nopabhuṅkte utsahitukāmo 'pi notsahate ta ete pañcāntarāyasya bhedāḥ

vyākhyātāḥ prakṛtibandhavikalpāḥ idānīṃ sthitibandhavikalpo vaktavyaḥ sā sthitir dvividhā utkṛṣṭā jaghanyā ca tatra yāsāṃ karmaprakṛtīṇām utkṛṣṭā sthitiḥ samānā tannirdeśārtham ucyate

madhye 'nte vā tisṛṇām grahaṇaṃ mābhūd iti 'āditaḥ' ity ucyate 'antarāyasya' iti vacanaṃ vyavahitagrahaṇārtham sāgaropamam uktaparimāṇam koṭīṇāṃ koṭyaḥ koṭīkoṭyaḥ para utkṛṣṭety arthaḥ etad uktaṃ bhavati jñānāvaraṇadarśanāvaraṇavedanīyāntarāyāṇām utkṛṣṭā sthitis triṃśatsāgaropamakoṭīkoṭya iti sā kasya bhavati mithyādṛṣṭeḥ saṃjñinaḥ paṃcendriyasya paryaptikasya anyeṣām āgamāt saṃpratyayaḥ kartavyaḥ

mohanīyasyotkṛṣṭasthitipratipattyartham āha

'sāgaropamakoṭīkoṭyaḥ parā sthitiḥ' ity anuvartate iyam api parā sthitir mithyādṛṣṭeḥ saṃjñinaḥ paṃcendriyasya paryāptakasyāvaseyā itareṣāṃ yathāgamam avagamaḥ kartavyaḥ

nāmagotrayor utkṛṣṭasthitipratipattyartham āha

'sāgaropamakoṭīkoṭyaḥ para sthitiḥ' ity anuvartate iyam api utkṛṣṭā sthitir mithyādṛṣṭeḥ saṃjñipaṃcendriyaparyāptakasya itareṣāṃ yathāgamam avaboddhavyā

athāyuṣaḥ kotkṛṣṭā sthitir ity ucyate

punaḥ 'sāgaropama' grahaṇaṃ koṭīkoṭīnivṛttyartham 'parā sthitiḥ' ity anuvartate iyam api pūvoktasyaiva śeṣāṇām āgamato 'vaseyā

uktotkṛṣṭā sthitiḥ idānīṃ jaghanyā sthitir vaktavyā tatra samānajaghanyasthitīḥ paṃca prakṛtīr avasthāpya tisṛṇāṃ jaghanyasthitipratipattyarthaṃ sūtradvayam upanasyate laghvartham

aparā jaghanyā ity arthaḥ vedanīyasya dvādaśa muhūrtāḥ

'muhūrtā' ity anuvartate 'aparā sthitiḥ' iti ca

avasthāpitaprakṛtijaghanyasthitipratipādanārtham āha

śeṣāṇām pañcānāṃ prakṛtīnām antarmuhūrtāparā sthitiḥ jñānadarśanāvaraṇāntarāyāṇāṃ jaghanyā sthitiḥ sūkṣmasāṃparāye mohanīyasya anivṛttibādarasāṃparāye āyuṣaḥ saṃkhyeyavarṣāyuṣṣu tiryakṣu manuṣyeṣu ca

āha ubhayī sthitir abhihitā jñānāvaraṇādīnām athānubhavaḥ kiṃ lakṣaṇa ity ata āha

viśiṣṭo nānāvidho vā pāko vipākaḥ puṛvoktakaṣāyatīvramandādibhāvāsravaviśeṣād viśiṣṭaḥ pāko vipākaḥ athavā dravyakṣetrakālabhavabhāvalakṣaṇanimittabhedajanitavaiśvarūpyo nānāvidhaḥ pāko vipākaḥ asāv anubhava ity ākhyāyate śubhapariṇāmānāṃ prakarṣabhāvāc chubhaprakṛtīnāṃ prakṛṣṭo 'nubhavaḥ aśubhaprakṛtīnāṃ nikṛṣṭaḥ aśubhapariṇāmānāṃ prakarṣabhāvād aśubhaprakṛtīnāṃ prakṛṣṭo 'nubhavaḥ śubhaprakṛtīnāṃ nikṛṣṭaḥ sa evaṃ pratyayavaśād upātto 'nubhavo dvividhā pravartate svamukhena paramukhena ca sarvāsāṃ mūlaprakṛtīnāṃ svamukhenaivānubhavaḥ uttaraprakṛtīnāṃ tulyajātīyānāṃ paramukhenāpi bhavati āyurdarśanacāritramohavarjānām na hi narakāyurmukhena tiryagāyurmanuṣyāyur vā vipacyate nāpi darśanamohaś cāritramohamukhena cāritramoho vā darśanamohamukhena

āha abhyupemaḥ prāgupacitanānāprakārakarmavipāko 'nubhavaḥ idaṃ tu na vijānīmaḥ kim ayam prasaṃkhyāto 'prasaṃkhyātaḥ ity atrocyate prasaṃkhyāto 'nubhūyata iti brūmahe kutaḥ yataḥ

jñānāvaraṇasya phalaṃ jñānābhāvo darśanāvaraṇasyāpi phalaṃ darśanaśaktyuparodha ity evam ādy anvarthasaṃjñānirdeśāt sarvāsāṃ karmaprakṛtīnāṃ savikalpānām anubhavasaṃpratyayo jāyate

āha yadi vipāko 'nubhavaḥ pratijñāyate tatkarmānubhūtaṃ sat kim ābharaṇavadavatiṣṭhate āhosvin niṣpītasāraṃ pracyavate ity atrocyate

pīḍānugrahāv ātmane pradāyābhyavahṛṭaudanādivikāravatpūrvasthitikṣayād avasthānābhāvāt karmaṇo nivṛttir nirjarā sā dviprakārā vipākajā itarā ca tatra caturgatāv anekajātiviśeṣāvaghūrṇite saṃsāramahārṇave ciraṃ paribhramataḥ śubhāśubhasya karmaṇaḥ krameṇa paripākakālaprāptasyānubhavodayāvalisroto 'nupravaviṣṭasyārabdhaphalasya yā nivṛttiḥ sā vipākajā nirjarā yatkarmāprāptavipākakālam aupakramikakriyāviśeṣasāmarthyād anudīrṇaṃ balād udīryodayāvaliṃ praveśya vedyate āmrapanasādipākavat sā avipākajā nirjarā 'ca' śabdo nimittāntarasamuccayārthaḥ 'tapasā nirjarā ca' iti vakṣyate tataś ca bhavati anyataś ceti sūtrārtho yojitaḥ kim artham iha nirjarānirdeśaḥ kriyate saṃvarāt parā nirdeṣṭavyā uddeśavat laghvartham iha vacanam tatra hi pāṭhe 'vipāko 'nubhavaḥ' iti punar anuvādaḥ kartavyaḥ syāt

āha abhihito 'nubhavabandhaḥ idānīṃ pradeśabandho vaktavyaḥ tasmiṃś ca vaktavye sati ime nirdeṣṭavyāḥ kiṃ hetavaḥ kadā kutaḥ kiṃ svabhāvāḥ kasmin kiṃ parimāṇaś ceti tadartham idaṃ krameṇa parigṛhītapraśnāpekṣabhedaṃ sūtraṃ praṇīyate

nāmnaḥ pratyayā nāmapratyayāh 'nāma' iti sarvāḥ karmaprakṛtayo 'bhidhīyante 'sa yathānāma' iti vacanāt anena hetubhāva uktaḥ sarveṣu bhaveṣu sarvataḥ 'dṛśyante anyato 'pi' iti tasi kṛte sarvataḥ anena kālopādānaṃ iti kṛtam ekaikasya hi jīvasyātikrāntā anantā bhavā āgāminaḥ saṃkhyeyā asaṃkhyeyā anantānantā vā bhavantīti yogaviśeṣān nimittāt karmabhāvena pudgalā ādīyanta iti nimittaviśeṣanirdeśaḥ kṛto bhavati 'sūkṣma' ādigrahaṇaṃ karmagrahaṇayogyapudgalasvabhāvānuvartanārtham grahaṇayogyāḥ pudgalāḥ sūkṣmā na sthūlā iti 'ekakṣetrāvagāha' vacanaṃ kṣetrāntaranivṛttyartham 'sthitāḥ' iti vacanaṃ kriyāntaranivṛttyartham sthitā na gacchanta iti 'sarvātmapradeśeṣu' iti vacanam ādhāranirdeśārthaṃ naikapradeśādiṣu karmapradeśā vartante kva tarhi ūrdhvam adhas tiryak ca sarveṣv ātmapradeśeṣu vyāpya sthitā iti 'anantānantapradeśa' vacanaṃ parimāṇāntaravyapohārtham na saṃkhyeyā na cāsaṃkhyeyā nāpy anantā iti te khalu pudgalaskandhā abhavyānantaguṇāḥ siddhānantabhāgapramitapradeśā ghanāṅgulasyāsaṃkhyeyabhāgakṣetrāvagāhina ekadvitricatuḥsaṃkhyeyasamayasthitikāḥ pañcavarṇapañcarasadvigandhacatuḥsparśasvabhāvā aṣṭavidhakarmaprakṛtiyogyā yogavaśād ātmanātmasāt kriyante iti pradeśabandhaḥ samāsato veditavyaḥ

āha bandhapadārthāntaraṃ puṇyapāpopasaṃkhyānaṃ coditaṃ tadbandhe 'ntarbhūtam iti pratyākhyātam tatredaṃ vaktavyaṃ ko 'tra puṇyabandhaḥ kaḥ pāpabandha iti tatra puṇyaprakṛtiparigaṇanārtham idam ārabhyate

śubhaṃ praśastam iti yāvat taduttaraiḥ pratyekam abhisaṃbadhyate śubham āyuḥ śubhaṃ nāma śubhaṃ gotram iti śubhāyus tritayaṃ tiryagāyur manuṣyāyur devāyur iti śubhanāma saptatriṃśad vikalpam tad yathā manuṣyagatir devagatiḥ paṃcendriyajāti paṃca śarīrāṇi trīṇy aṅgopāṅgāni samacaturasrasaṃsthānaṃ vajrarṣabhanārācasaṃhananaṃ praśastavarṇarasagandhasparśā manuṣyadevagatyānupūrvyadvayam agurulaghuparaghātocchvāsātapodyotapraśastavihāyogatayas trasabādaraparyāptipratyekaśarīrasthiraśubhasubhagasusvarādeyayaśaḥkīrtayo nirmāṇaṃ tīrthakaranāma ceti śubham ekam uccairgotraṃ sadvedyam iti etā dvācatvāriṃśatprakṛtayaḥ 'puṇya' saṃjñāḥ

asmat puṇyasaṃjñikarmaprakṛtisamūhād anyat karma 'pāpam' ity ucyate tad dvyaśītividham tad yathā jñānāvaraṇasya prakṛtayaḥ paṃca darśanāvaraṇasya nava mohanīyasya ṣaḍviṃśatiḥ paṃcāntarāyasya narakagatitiryaggatī catasro jātayaḥ paṃca saṃsthānāni paṃca saṃhananānyapraśastavarṇarasagandhasparśā narakagatitiryaggatyānupūrvyadvayam upaghātāpraśastavihāyogatisthāvarasūkṣmāparyāptisādhāraṇaśarīrāsthirāśubhadurbhagaduḥsvarānādeyāyaśaḥkīrtayaś ceti nāmakṛtayaś catustriṃśat asad vedyaṃ narakāyur nīcairgotram iti evaṃ vyākhyātaḥ saprapañco bandhapadārthaḥ avadhimanaḥparyayakevalajñānapratyakṣapramāṇagamyas tadupadiṣṭāgamānumeyaḥ

bandhapadārtho nirdiṣṭaḥ idānīṃ tadantaroddeśabhājaḥ saṃvarasya nirdeśaḥ prāptakāla ity ata idam āha

abhinavakarmādānahetur āsravo vyākhyātaḥ tasya nirodhaḥ saṃvara ity ucyate sa dvividho bhāvasaṃvaro dravyasaṃvaraś ceti tatra saṃsāranimittakriyānivṛttir bhāvasaṃvaraḥ tannirodhe tatpūrvakarmapudgalādānavicchedo dravyasaṃvaraḥ

idaṃ vicāryate kasmin guṇasthāne kasya saṃvara iti atra ucyate mithyādarśanakarmodayavaśīkṛta ātmā mithyādṛṣṭiḥ tatra mithyādarśanaprādhānyena yatkarma āsravati tannirodhāc cheṣe sāsādanasamyagdṛṣṭyādau tatsaṃvaro bhavati kiṃ punas tat mithyātvanapuṃsakavedanarakāyur narakagatyekadvitricaturindriyajātihuṇḍasaṃsthānāsaṃprāptāsṛpāṭikāsaṃhanananarakagatiprāyogyānupūrvyātapasthāvarasūkṣmāparyāptakasādhāraṇaśarīrasaṃjñakaṣoḍaśaprakṛtilakṣaṇam

asaṃyamas trividhaḥ anantānubandhyapratyākhyānapratyākhyānodayavikalpāt tatpratyayasya karmaṇas tadabhāve saṃvaro 'vaseyaḥ tad yathā nidrānidrāpracalāpracalāstyānagṛddhyanantānubandhikrodhamānamāyālobhastrīvedatiryagāyustiryaggaticatuḥsaṃsthānacatuḥsaṃhananatiryaggatiprāyogyānupūrvyodyotāpraśastavihāyogatidurbhagaduḥsvarānādeyanīcairgotrasaṃjñikānāṃ pañcaviṃśatiprakṛtīnām anantānubandhikaṣāyodayakṛtāsaṃyamapradhānāsravāṇām ekendriyādayaḥ sāsādanasamyagdṛṣṭyantā bandhakāḥ tadabhāve tāsām uttaratra saṃvaraḥ apratyākhyānāvaraṇakrodhamānamāyālobhamanuṣyāyurmanuṣyagatyaudārikaśarīratadaṅgopāṅgavajrarṣabhanārācasaṃhananamanuṣyagatiprāyogyānupūrvyanāmnā daśānāṃ prakṛtīnām apratyākhyānakaṣāyodayakṛtāsaṃyamahetukānām ekendriyādayo 'saṃyatasamyagdṛṣṭyantā bandhakāḥ tadabhāvād ūrdhvaṃ tāsāṃ saṃvaraḥ samyaṅmithyātvaguṇenāyur na badhyate pratyākhyānāvaraṇakrodhamānamāyālobhānāṃ catasṛṇāṃ prakṛtīnāṃ pratyākhyānakaṣāyodayakāraṇāsaṃyamāsravāṇām ekendriyaprabhṛtayaḥ saṃyatāsaṃyatāvasānā bandhakāḥ tadabhāvād upariṣṭāt tāsāṃ saṃvaraḥ pramādopanītasya tadabhāve nirodhaḥ pramādenopanītasya karmaṇaḥ pramattasaṃyatād ūrdhvaṃ tadabhāvān nirodhaḥ pratyetavyaḥ kiṃ punas tat asadvedyāratiśokāsthirāśubhāyaśaḥkīrtivikalpam devāyurbandhārambhasya pramāda eva hetur apramādo 'pi tat pratyāsannaḥ tadūrdhvaṃ tasya saṃvaraḥ kaṣāya evāsravo yasya karmaṇo na pramādādiḥ tasya tannirodhe nirāso 'vaseyaḥ sa ca kaṣāyaḥ pramādādivirahitas tīvramadhyamajaghanyabhāvena triṣu guṇasthāneṣu vyavasthitaḥ tatrāpūrvakaraṇasyādau saṃkhyeyabhāge dve karmaprakṛtī nidrāpracale badhyete tata ūrdhvaṃ saṃkhyeyabhāge triṃśat prakṛtayo devagatipañcendriyajātivaikriyikāhārakataijasakārmaṇaśarīrasamacaturasrasaṃsthānavaikriyikāhārakaśarīrāṃgopāṃgavarṇagandharasasparśadevagatiprāyogyānupūrvyāgurulaghūpaghātaparaghātocchvāsapraśastavihāyogatitrasabādaraparyāptapratyekaśarīrasthiraśubhasubhagasusvarādeyanirmāṇatīrthakarākhyā badhyante tasyaiva caramasamaye catasraḥ prakṛtayo hāsyaratibhayajugupsāsaṃjñā bandham upayānti tā etās tīvrakaṣāyāsravās tadabhāvān nirddiṣṭād bhāgād ūrdhvaṃ saṃvriyante anivṛttibādarasāṃparāyasyādisamayād ārabhya saṃkhyeyeṣu bhāgeṣu puṃvedakrodhasaṃjvalanau badhyete tata ūrdhvaṃ śeṣeṣu saṃkhyeyeṣu bhāgeṣu mānasaṃjvalanamāyāsaṃjvalanau bandham upagacchataḥ tasyaiva caramasamaye lobhasaṃjvalano bandham eti tā etāḥ prakṛtayo madhyamakaṣāyāsravās tadabhāve nirdiṣṭasya bhāgasyopariṣṭāt saṃvaram āpnuvanti pañcānāṃ jñānāvaraṇānāṃ caturṇāṃ darśanāvaraṇānāṃ yaśaḥkīrter uccairgotrasya pañcānām antarāyāṇāṃ ca mandakaṣāyāsravāṇāṃ sūkṣmasāṃparāyo bandhakaḥ tadabhāvād uttararatra teṣāṃ saṃvaraḥ kevalenaiva yogena sadvedyasopaśāntakaṣāyakṣīṇakaṣāyasayogānāṃ bandho bhavati tadabhāvād ayogakevalinas tasya saṃvaro bhavati

uktaḥ saṃvaras taddhetupratipādanārtham āha

yataḥ saṃsārakāraṇād ātmano gopanaṃ bhavati sā guptiḥ prāṇipīḍāparihārārthaṃ samyagayanaṃ samitiḥ iṣṭe sthāne dhatte iti dharmaḥ śarīrādīnāṃ svabhāvānucintanam anuprekṣā kṣudādivedanotpattau karmanirjarārthaṃ sahanaṃ pariṣahaḥ pariṣahasya jayaḥ pariṣahajayaḥ cāritraśabda ādisūtre vyākhyātārthaḥ eteṣāṃ guptyādīnāṃ saṃvaraṇakriyāyāḥ sādhakatamatvād karaṇanirdeśaḥ saṃvaro 'dhikṛto 'pi 'sa' iti tacchabdena parāmṛśyate guptyādibhiḥ sākṣāt saṃbandhanārthaḥ kiṃ prayojanam avadhāraṇārtham sa eṣa saṃvaro guptyādibhir eva nānyenopāyeneti tena tīrthābhiṣekadīkṣāśīrṣopahāradevatārādhananādayo nivartitā bhavanti rāgadveṣamohopāttasya karmaṇo 'nyathā nivṛttyabhāvāt

saṃvaranirjarāhetuviśeṣapratipādanārtham āha

tapo dharme 'ntarbhūtam api pṛthagucyate ubhayasādhanatvakhyāpanārthaṃ saṃvaraṃ prati prādhānyapratipādanārthaṃ ca nanu ca tapo 'bhudayāṃgam iṣtaṃ devendrādisthānaprāptihetutvābhyupagamāt tat kathaṃ nirjarāṃgaṃ syād iti naiṣa doṣaḥ ekasyānekakāryadarśanād agnivat yathāgnir eko 'pi vikledanabhasmāṃgārādiprayojana upalabhyate tathā tapo 'bhudayakarmakṣayahetur ity atra ko virodhaḥ

saṃvarahetuṣv ādāv uddiṣṭāyā gupteḥ svarūpapratipattyartham āha

yogo vyākhyātaḥ 'kāyavāṅmanaḥkarma yogaḥ' ity atra tasya svecchāpravṛttinivartanaṃ nigrahaḥ viṣayasukhābhilāṣārthapravṛttiniṣedhārthaṃ samyagviśeṣaṇam tasmāt samyagviśeṣaṇaviśiṣṭāt saṃkleśāprādurbhāvaparātkāyādiyoganirodhe sati tannimittaṃ karma nāsravatīti saṃvaraprasiddhir avagantavyā sā tritayī kāyaguptir vāgguptir manoguptir iti

tatrāśaktasya muner niravadyapravṛttikhyāpanārtham āha

'samyag' ity anuvartate teneryādayo viśeṣyante samyagīryā samyagbhāṣā samyageṣaṇā samyagādānanikṣepau samyagutsarga iti sā etāḥ pañca samitayo viditajīvasthānādividher muneḥ prāṇipīḍāparihārābhyupāyā veditavyāḥ tathā pravartamānsyāsaṃyamapariṇāmanimittakarmāsravāt saṃvaro bhavati

tṛitīyasya saṃvarahetor dharmasya bhedapratipattyartham āha

kim artham idam ucyate ādyaṃ pravṛttinigrahārtham tatrāsamarthānāṃ pravṛttyupāyadarśanārtham dvitīyam idaṃ punar daśāvidhadharmākhyānaṃ samitiṣu pravartamānasya pramādaparihārārthaṃ veditavyam śarīrasthitihetumārgaṇārthaṃ parakulāny upagacchato bhikṣor duṣṭajanākrośaprahasanāvajñātāḍanaśarīravyāpādanādīnāṃ saṃnidhāne kāluṣyānupattiḥ kṣamā jātyādimadāveśād abhimānābhāvo mārdavaṃ mānanirharaṇam yogasyāvarkratā ārjavam prakarśaprāptalobhān nivṛttiḥ śaucam satsu praśasteṣu janeṣu sādhu vacanaṃ satyam ity ucyate nanu caitad bhāṣāsamitāv antarbhavati naiṣa doṣaḥ samitau pravartamāno muniḥ sādhuṣv asādhuṣu ca bhāṣāvyavahāraṃ kurvan hitaṃ mitaṃ ca brūyāt anyathā rāgād anarthadaṇḍadoṣaḥ syād iti vāksamitir ity arthaḥ iha punaḥ saṃtaḥ pravrajitās tadbhaktā vā teṣu sādhu satyaṃ jñānacāritraśikṣaṇādiṣu bahvapi kartavyam ity anujñāyate dharmopabṛṃhaṇārtham samitiṣu vartamānasya prāṇīndriya parihāras saṃyamaḥ karmakṣayārthaṃ tapyata iti tapaḥ taduttrartra vakṣyamāṇaṃ dvādaśavikalpam avaseyam saṃyatasya yogyaṃ jñānādidānaṃ tyāgaḥ upātteṣv api śarīrādiṣu saṃskārāpohāya mamedam ity abhisandhinivṛttir ākiṃcanyam nāsya kiṃcanāstīty akiṃcanaḥ tasya bhāvaḥ karma vā ākiṃcanyam anubhūtāṅganāsmaraṇakathāśravaṇastrīsaṃsaktaśayanāsanādivarjanād brahmacaryaṃ paripūrṇam avatiṣṭhate svatantravṛttinirvṛttyartho vā gurukulavāso brahmacaryam dṛṣṭaprayojanaparivarjanārtham uttamaviśeṣaṇam tāny evaṃ bhāvyamānāni dharmavyapadeśabhāñjisvaguṇapraptipakṣadoṣasadbhāvanāpraṇihitāni saṃvarakāraṇāni bhavanti

āha krodhādyanutpattiḥ kṣamādiviśeṣapratyanīkālambanād ity uktam tatra kasmāt kṣamādīn ayam avalambate nānyathā pravartata ity ucyate yasmāt taptāyaḥpiṇḍavatkṣamādipariṇatenātmahitaiṣiṇā kartavyāḥ

imāni śarīrendriyaviṣayopabhogadravyāṇi samudayarūpāṇi jalabudbudvadanavasthitasvabhāvāni garbhādiṣv avasthāviśeṣeṣu sadupalabhyamānasaṃyogaviparyayāṇi mohād atrājño nityatāṃ manyate na kiṃcit saṃsāre samuditaṃ dhruvam asti ātmano jñānadarśanopayogasvabhāvād anyad iti cintanam anityatānuprekṣā evaṃ hy asya bhavyasya cintayatas teṣv abhiṣv aṅgābhāvād bhuktojjhitagandhamālyādiṣv iva viyogakāle 'pi vinipāto notpadyate

yathā mṛgaśāvasyaikānte balavatā kṣudhitenāmiṣaiṣiṇā vyāghreṇābhibhūtasya na kiṃcic charaṇam asti tathā janmajarāmṛtyuvyādhiprabhṛtivyasanamadhye paribhramato jantoḥ śaraṇaṃ na vidyate paripuṣtam api śarīraṃ bhojanaṃ prati sahāyībhavati na vyasanopanipāte yatnena saṃcitā arthā api na bhavāntaram anugacchanti saṃvibhaktasukhaduḥkhāḥ suhṛdo 'pi na maraṇakāle paritrāyante bāndhavāḥ samuditāś ca rujā parītaṃ na paripālayanti asti cet sucarito dharmo vyasanamahārṇave taraṇopāyayo bhavati mṛtyunā nīyamānasya sahasranayanādayo 'pi na śaraṇam tasmād bhavavyasanasaṃkaṭe dharma eva śaraṇam suhṛdartho 'py anapāyī nānyakiṃcic charaṇam iti bhāvanā aśaraṇānuprekṣā evaṃ hy asyādhyavasyato nityam aśaraṇo 'smīti bhṛśam udvignasya sāṃsārikeṣu bhāveṣu mamatvavigamo bhavati bhagavadarhatsarvajñapraṇīta eva mārge prayatno bhavati

karmavipākavaśād ātmano bhavāntarāvāptiḥ saṃsāraḥ sa purastāt pañcavidhaparivartanarūpeṇa vyākhyātaḥ tasminn anekayonikulakoṭibahuśatasahasrasaṃkaṭe saṃsāre paribhraman jīvaḥ karmayantrapreritaḥ pitā bhūtvā bhrātā putraḥ pautraś ca bhavati mātā bhūtvā bhaginī bhāryā duhitā ca bhavati svāmī bhūtvā dāso bhavati dāso bhūtvā svāmy api bhavati naṭa iva raṅge athavā kiṃ bahunā svayam ātmanaḥ putro bhavatīty evam ādi saṃsārasvabhāvacintanaṃ saṃsārānuprekṣā evaṃ hy asya bhāvayataḥ saṃsāraduḥkhabhayād udvignasya tato nirvedo bhavati nirviṇṇaś ca saṃsāragrahāṇāya prayatate

janmajarāmaraṇāvṛttimahāduḥkhānubhavanaṃ prati eka evāhaṃ na kaścin me svaḥ paro vā vidyate eka eva jāye 'ham eka eva mriye na me kaścit svajanaḥ parajano vā vyādhijarāmaraṇādīni duḥkhāny apaharati bandhumitrāṇi smaśānaṃ nātivartante dharma eva me sahāyaḥ sadā anapāyīti cintanam ekatvānuprekṣā evaṃ hy asya bhāvayataḥ svajaneṣu prītyanubandho na bhavati parajaneṣu ca dveṣānubandho nopajāyate tato niḥsaṅgatām abhyupagato mokṣāyaiva ghaṭate

śarīrād anyatvacintanam anyatvānuprekṣā tad yathā bandhaṃ pratyekatve saty api lakṣaṇabhedād anyo 'ham aindriyakaṃ śarīram atīndriyo 'ham ajñaṃ śarīraṃ jño 'ham anityaṃ śarīraṃ nityo 'ham ādy antavaccharīram anādyananto 'ham bahuni me śarīraśatasahasrāṇy atītāni saṃsāre paribhramataḥ sa evāham anyas tebhya ity evaṃ me kim aṅga punarbāhyebhyaḥ parigrahebhyaḥ ity evaṃ hy asya manaḥ samādadhānasya śarīrādiṣu sprhā notpadyate tatas tattvajñānabhāvanāpūrvake vairāgyaprakarṣe sati ātyantikasya mokṣasukhasyāvāptir bhavati

śarīram idam atyantāśuciyoni śukraśonitāśucisaṃvardhitam avaskaravadaśucibhājanaṃ tvaṅmātrapracchāditam atipūtirasaniṣyandisrotobilam aṅgāravadātmabhāvam āśritam apy āśvevāpādayati snānānulepanadhūpapragharṣavāsamālyādibhir api na śakyam aśucitvam apahartum asya samyagdarśanādi punarbhāvyamānaṃ jīvasyātyantikīṃ śuddhim āvirbhāvayatīti tattvato bhāvanam aśucitavānuprekṣā evam hy asya saṃsmarataḥ śarīranirvedo bhavati nirviṇṇaś ca janmodadhitaraṇāya cittaṃ samādhatte

āsravasaṃvaranirjarāḥ pūrvoktā api ihopanyasyante tadgataguṇadoṣabhāvanārtham tad yathā āsravā ihāmutrāpāyayuktā mahānadīsrotovegatīkṣṇā indriyakaṣāyā vratādayaḥ tatrendriyāṇi tāvat sparśanādīni vanagajavāyasapannagapataṅgahariṇādīn vyavasanārṇavam avagāhayanti tathā kaṣādayo 'pīha vadhabandhāpayaśaḥparikleśādīn janayanti amutra ca nānāgatiṣu bahuvidhaduḥkhaprajvalitāsu paribhramayantīty evam āsravadoṣānucintanam āsravānuprekṣā evaṃ hy asya cintayataḥ kṣamādiṣu śreyas tv abuddhir na pracyavate sarva ete āsravadoṣāḥ kūrmavatsaṃvṛtātmano na bhavanti

yathā mahārṇave nāvo vivarapidhāne 'sati kramāt sratajalābhiplave sati tadāśrayāṇāṃ vināśo 'vaśyaṃbhāvī chidrapidhāne ca nirupadravam abhilaṣitadeśāntaraprāpaṇaṃ tathā karmāgamadvārasaṃvaraṇe sati nāsti śreyaḥpratibandha iti saṃvaraguṇānucintanaṃ saṃvarānuprekṣā evaṃ hy asya cintayataḥ saṃvare nityodyuktatā bhavati tataś ca niḥśreyasapadaprāptir iti

nirjarā vedanāvipāka ity uktam sā dvedhā abuddhipūrvā kuśalamūlā ceti tatra narakādiṣu karmaphalavipākajā abuddhipūrvā sā akuśalānubandhā pariṣahajaye kṛte kuśalamūlā sā śubhānubandhā niranubandhā ceti ity evaṃ nirjarāyā guṇadoṣabhāvanaṃ nirjarānuprekṣā evaṃ hy asyānusmarataḥ karmanirjarāyai pravṛttir bhavati

lokasaṃsthānādividhir vyākhyātaḥ samantād anantasyālokākāśasya bahumadhyadeśabhāvino lokasya saṃsthānādividhir vyākhyātaḥ tatsvabhāvānucintanaṃ lokānuprekṣā evaṃ hy asyādhyavasyatas tattvajñānaviśuddhir bhavati

ekasmin nigotaśarīre jīvāḥ siddhānām anantaguṇāḥ evaṃ sarvaloko nirantaraṃ nicitaḥ sthāvarair atas tatra trasatā vālukāsamudre patitā vajrasikatākaṇikeva durlabhā tatra ca vikalendriyāṇāṃ bhūyiṣṭhatvāt pañcendriyatā guṇeṣu kṛtajñateva kṛcchralabhyā tatra ca tiryaṃkṣu paśumṛgapakṣisarīsṛpādiṣu bahuṣu satsu manuṣyabhāvaś catuṣpathe ratnarāśir iva durāsadaḥ tatpracyave ca punas tadutpattir dagdhatarupudgalatadbhāvopapattivad durlabhā tallābhe ca deśakulendriyasaṃpannīrogatvāny uttarottaratto 'tidurlabhāni sarveṣv api teṣu labdheṣu saddharmapratilambho yadi na syād vyarthaṃ janma vadanam iva dṛṣṭivikalam tam evaṃ kṛcchalabhyaṃ dharmam avāpya viṣayasukhe rañjanaṃ bhasmārthacandanadahanam iva viphalam viraktaviṣayasukhasya tu tapobhāvanādharmaprabhāvanāsukhamaraṇādilakṣaṇaḥ samādhir duravāpaḥ tasmin sati bodhilābhaḥ phalavān bhavatīti cintanaṃ bodhidurlabhānuprekṣā evaṃ hy asya bhāvayato bodhiṃ prāpya pramādo na kadācid api bhavati

ayaṃ jinopadiṣṭo dharmo 'hiṃsālakṣaṇaḥ satyādiṣṭhito vinayamūlaḥ kṣamābalo bhrahmacaryagupta upaśamapradhānī niyatilakṣaṇo niṣparigrahatālambanaḥ asyālābhād anādisaṃsāre jīvāḥ paribhramanti duṣkarmavipākajaṃ duḥkham anubhavantaḥ asya punaḥ pratilambhe vividhābhudayaprāptipūrvikā niḥśreyasopalabdir niyateti cintanaṃ dharmasvākhyātatvānuprekṣā evaṃ hy asya cintayato dharmānurāgāt sadā pratiyatno bhavati

evam anityatvādyanuprekṣāsaṃnidhāne uttamakṣamādidhāraṇān mahān saṃvaro bhavati madhye 'anuprekṣā' vacanam ubhayārtham anuprekṣā hi bhāvayann uttamakṣmādīṃś ca pratipālayati parīṣahāṃś ca jetum utsahate

ke punas te pariṣahāḥ kim arthaṃ vā te sahyanta itīdam āha

saṃvarasya prakṛtatvāt tena mārgo viśiṣyate saṃvaramārga iti tadacyavanārthaṃ nirjarārthaṃ ca pariṣoḍhavyāḥ parīṣahāḥ kṣutpipāsādisahanaṃ kurvantaḥ jinopadiṣṭān mārgād apracyavamānās tanmārgaparikramaṇaparicayena karmāgamadvāraṃ saṃvṛṇvanta aupakramikaṃ karmaphalam anubhavantaḥ krameṇa nirjīrṇakarmāṇo mokṣam āpnuvanti

tatsvarūpasaṃkhyāsaṃpratipattyartham āha

kṣudādayo vedanāviśeṣā dvāviṃśatiḥ eteṣāṃ sahanaṃ mokṣārthinā kartavyam tad yathā bhikṣor niravadyāhāragaveṣiṇas tadalābhe īṣallābhe ca anivṛttavedanasyākāle adeśe ca bhikṣāṃ prati nivṛtteccchasyāvaśyakaparihāṇiṃ manāg apy asahamānasya svādhyāyadhyānabhāvanāparasya bahukṛtvaḥ svakṛtaparakṛtānaśanāvam audaryasya nīrasāhārasya saṃtaptabhrāṣṭrapatitajalabindukatipayavatsahasā pariśuṣkapānasyodīrṇakṣudvedanasyāpi sato bhikṣālābhād alābham adhikaguṇaṃ manyamānasya kṣudbādhāṃ pratyacintanaṃ kṣudvijayaḥ

jalasnānāvagāhanapariṣekaparityāginaḥ patatrivadaniyatāsanāvasathasyātilavaṇasnigdharūkṣaviruddhāhāragraiṣmātapapittajvarānaśanādibhir udīrṇāṃ śarīrendriyonmāthinīṃ pipāsāṃ pratyanādriyamāṇapratīkārasya pipāsānalaśikhāṃ dhṛtinavamṛdghaṭapūritaśītalasugandhisamādhivāriṇā praśamayataḥ pipāsāsahanaṃ praśasyate

parityaktapracchādanasya pakṣivadanavadhāritālayasya vṛkṣamūlapathiśilātalādiṣu himānīpatanaśītalānilasaṃpāte tatpratikāraprāptiṃ prati nivṛttecchasya pūrvānubhūtaśītapratikārahetuvastūnām asmarato jñānabhāvanāgarbhāgāre vasataḥ śītavedanāsahanaṃ parikīrtyate

nivāte nirjale grīṣmaravikiraṇapariśuṣkapatitaparṇavyapetacchāyātaruṇyaṭavyantare yadṛcchayopanipatitasyānaśanādyabhyantarasādhanotpāditadāhasya davāgnidāhaparuṣavātātapajanitagalatāluśoṣasya tatpratīkārahetūn bahūn anubhūtān acintayataḥ prāṇipīḍāparihārāvahitacetasaś cāritrarakṣaṇam uṣṇasahanam ity upavarṇyate

'daṃśamaśaka' grahaṇam upalakṣaṇam yathā kākebhyo rakṣyatāṃ sarpiḥ iti upaghātakopalakṣaṇaṃ kākagrahaṇaṃ tena daṃśamaśakamakṣikāpiśukaputtikāmatkuṇakīṭapipīlikāvṛścikādayo gṛhyante tatkṛtāṃ bādhāmapratīkārāṃ sahamānasya teṣāṃ bādhāṃ tridhāpyakurvāṇasya nirvāṇaprāptimātrasaṃkalpaprāvaraṇasya tadvedanāsahanaṃ daṃśamaśakapariṣahakṣamety ucyate

jātarūpavanniṣkalaṃkajātarūpadhāraṇamaśakyaprārthanīyaṃ yācanarakṣaṇahiṃsanādidoṣavinirmuktaṃ niṣparigrahatvān nirvāṇaprāptiṃ pratyekaṃ sādhanam ananyabādhanaṃ nāgnyaṃ bibhrato manovikriyāviplutivirahāt strīrūpāṇy atyantāśucikuṇaparūpeṇa bhāvayato rātrindivaṃ brahmacaryam akhaṇḍam ātiṣṭhamānasyācelavratadhāraṇam anavadyam avagantavyam

saṃyatasyendriyeṣṭaviṣayasaṃbandhaṃ prati nirutsakasya gītanṛtyavāditrādivirahiteṣu śūnyāgāradevakulatarukoṭaraśilāguhādiṣu svādhāyadhyānabhāvanāratim āskandato dṛṣṭaśrutānubhūtaratismaraṇatatkathāśravaṇakāmaśarapraveśanirvivarahṛdayasya prāṇiṣu sadā sadayasyāratipariṣahajayo 'vaseyaḥ

ekānteṣv ārāmabhavanādipradeśeṣu navayauvanamadavibhramamadirāpānapramattāsu pramadāsu bādhamānāsu kūrmavatsaṃvṛtendriyavikārasya lalitasmitamṛdukathitasavilāsavīkṣaṇaprahasanamadamantharagamanamanmathaśaravyāpāraviphalīkaraṇasya strībādhāpariṣahanam avagantavyam

dīrghakālam uṣitagurukulabrahmacaryasyādhigatabandhamokṣapadārthatattvasya saṃyamāyatanabhaktihetor deśāntarātither guruṇābhyanujñātasya pavanavanniḥsaṃgatām aṅgīkurvato bahuśo 'naśanāvamaudaryavṛttiparisaṃkhyānarasaparityāgādibādhāpariklāntakāyasya deśakālapramāṇāpetam adhvagamanaṃ saṃyamavirodhi pariharato nirākṛtapādāvaraṇasya paruṣaśarkarākaṇṭakādivyadhanajātacaraṇakhedasyāpi sataḥ pūrvocitayānavāhanādigamanam asmarato yathākālam āvaśyakāparihāṇimāskandataś caryāpariṣahasahanam avaseyam

smaśānodyānaśūnyāyatanagiriguhāgahvarādiṣv anabhyastapūrveṣu nivasata ādityaprakāśasvendriyajñānaparīkṣitapradeśe kṛtaniyamakriyasya niṣadyāṃ niyamitakālām āsthitavataḥ siṃhavyāghrādivividhabhīṣaṇadhvaniśravanān nivṛttabhayasya caturvidhopasargasahanād apracyutamokṣamārgasya vīrāsanotkuṭikādyāsanād avicalitavigrahasya tatkṛtabādhān sahanaṃ niṣadyāpariṣahavijaya iti niścīyate

svādhyāyadhyānādhvaśramaparikheditasya mauhūrtikīṃ kharaviṣam apracuraśarkarākapālasaṃkaṭātiśītoṣṇeṣu bhūmipradeśeṣu nidrām anubhavato yathākṛtaikaparśvadaṇḍāyitādiśāyinaḥ prāṇibādhāparihārāya patitadāruvad vyapagatāsuvadaparivartamānasya jñānabhāvanāvahitacetaso 'nuṣṭhitavyantarādivividhopasargād apy acalitavigrahasyāniyamitakālāṃ tatkṛtabādhāṃ kṣamamāṇasya śayyā pariṣahakṣamā kathyate

mithyādarśanodṛiktāmarṣaparuṣāvajñānindāsabhyavacanāni krodhāgniśikhāpravardhanāni niśṛṇvato 'pi tadartheṣv asamāhitacetasaḥ sahasā tatpratīkāraṃ kartum api śaknuvataḥ pāpakarmavipākam abhicintayatas tāny ākarṇya tapaścaraṇabhāvanāparasya kaṣāyaviṣalavamātrasyāpy anavakāśam ātmahṛdayaṃ kurvata ākrośapariṣahasahanam avadhāryate

niśitaviśasanamuśalamudgarādripraharaṇatāḍanādibhir vyāpādyamānaśarīrasya vyāpādakeṣu manāg api manovikāram akurvato mama purākṛtaduṣkarmaphalam idam ime varākāḥ kiṃ kurvanti śarīram idaṃ jalabudbudvadviśaraṇasvabhāvaṃ vyasanakāraṇam etair bābādhyate saṃjñānadarśanacāritrāṇi mama na kenacid upahanyante iti cintayato vāsitakṣaṇacandanānulepanasamadarśino vadhapariṣahakṣamā manyate

bāhyābhyantaratapo 'nuṣṭhānaparasya tadbhāvanāvaśena nissārīkṛtamūrteḥ paṭutapanatāpaniṣpītasārataror iva virahitacchāyasya tvagasthiśirājālamātratanuyantrasya prāṇātyaye saty apy āhārabasatibheṣajādīni dīnābhidhānamukhavaivarṇyāṅgasaṃjñādibhir ayācamānasya bhikṣākāle 'pi vidyududyotavad durupalakṣyamūrter yācanāpariṣahasahanam avasīyate

vāyuvadasaṅgād anekadeśacāriṇo 'bhupagataikakālasaṃbhojanasya vācaṃyamasya tatsamitasya vā sakṛtsvatanudarśanamātratantrasya pāṇipuṭamātrapātrasya bahuṣu divaseṣu bahuṣu ca gṛheṣu bhikṣām anavāpyāpy asaṃkliṣṭacetaso dātṛviśeṣaparīkṣānirutsukasya lābhād apy alābho me paramaṃ tapa iti saṃtuṣṭasyālābhavijayo 'vaseyaḥ

sarvāśucinidhānam idam anityam aparitrāṇam iti śarīre niḥsaṃkalpatvād vigatasaṃskārasya guṇaratnabhāṇḍasaṃcayapravardhanasaṃrakṣaṇasaṃdhāraṇakāraṇatvād abhyupagatasthitividhānasyākṣamrakṣaṇavad vraṇānulepanavad vā bahūpakāram āhāram abhupagacchato viruddhāhārapānasevanavaiṣamyajanitavātādivikārarogasya yugapad anekaśatasaṃkhyavyādhiprakope saty api tadvaśavartitāṃ vijahato jallauṣadhiprāptyādyanekatapoviśeṣarddhiyoge saty api śarīranisspṛhatvāt tatpratikārānapekṣiṇo rogapariṣahasahanam avagantavyam

tṛṇagrahanam upalakṣaṇaṃ kasyācid vyadhanaduḥkhakāraṇasya tena śuṣkatṛṇaparuṣaśarkarākaṇṭakaniśitamṛttikāśūlādivyadhanakṛtapādavedanāprāptau satyāṃ tatrāpraṇihitatacetasaś caryāśayyāniṣadyāsu prāṇipīḍāparihāre nityam apramattacetasas tṛṇādisparśabādhāpariṣahavijayo veditavyaḥ

apkāyikajantupīḍāparihārāyāmaraṇād asnānavratadhāriṇaḥ paṭur avikiraṇapratāpajanitaprasvedāktapavanānītapāṃsunicayasya sidhmakacchūdadrūdīrṇakaṇḍūyāyām utpannāyām api kaṇḍūyanavimardanasaṃghaṭṭanavivarjitamūrtheḥ svagatamalopacayaparagatamalāpacayayor asaṃkalpitamanasaḥ sajjñānacāritravimalasalilaprakṣālanena karmamalapaṃkanirākaraṇāya nityam udyatamater malapīḍāsahanam ākhyāyate

satkāraḥ pūjāpraśaṃsātmakaḥ puraskāro nāma kriyārambhādiṣv agrataḥ karaṇam āmaṃtraṇaṃ vā tatrānādaro mayi kriyate ciroṣitabrahmacaryasya mahātapasvinaḥ svaparasamayanirṇajñasya bahukṛtvaḥ paravādivijayinaḥ praṇāmabhaktisaṃbrahmāsanapradānādīni me na kaścit karoti mithyādṛṣṭaya evātīva bhaktim antaḥ kiṃcid ajānantam api sarvajñasaṃbhāvanayā saṃmānya svasamayaprabhāvanaṃ kurvanti vyantarādayaḥ purā atyugratapasāṃ pratyagrapūjāṃ nirvartayantīti mithyā śrutir yadi na syād idānīṃ kasmān mādṛśāṃ na kurvantīti duṣpraṇidhānavirahitacittasya satkārapuraskārapariṣahavijaya iti vijñāyate

aṅgapūrvaprakīrṇakaviśāradasya śabdanyāyādhyātmanipuṇasya mama purastāditare bhāskaraprabhābhibhūtakhadyotodyotavannitarāṃ nāvabhāsanta iti vijñānamadanirāsaḥ prajñāpariṣahajayaḥ pratyetavyaḥ

ajño 'yaṃ na vetti paśusama ity evam ādy adhikeṣpavacanaṃ sahamānasya paramaduścaratapo 'nuṣṭhāyino nityam apramattacetaso me 'dyāpi jñānātiśayo notpadyata iti anabhisaṃdadhato 'jñānapariṣahajayo 'vagantavyaḥ

paramavairāgyabhāvanāśuddhahṛdayasya viditasakalapadārthatattvasyārhadāyatanasadhudharmapūjakasya cirantanapravrajitasyādyāpi me jñānātiśayo notpadyate mahopavāsādyanuṣṭhāyināṃ prātihāryaviśeṣāḥ prādur abhūvann iti pralāpamātram anarthikeyaṃ pravrajyā viphalaṃ vrataparipālanam ity evam asamādadhānasya darśanaviśuddhiyogād adarśanapariṣahasahanam avasātavyam

evaṃ pariṣahān asaṃkalpopasthitān sahamānasyāsaṃkliṣṭacetaso rāgādipariṇāmāsravanirodhān mahān saṃvaro bhavati

āha kim ime pariṣahāḥ sarve saṃsāramahāṭavīm atikramitum abhyudyatam abhidravanti uta kaścit prativiśeṣa ity atrocyate amī vyākhyātalakṣaṇāḥ kṣudādayaś cāritrāntarāṇi prati bhājyāh niyamena punaranayoḥ pratyetavyāḥ

kṣutpipāsāśītoṣṇadaṃśamaśakacaryāśayyāvadhālābharogatṛṇasparśamalaprajñājñānāni 'caturdaśa' iti vacanād anyeṣāṃ pariṣahāṇām abhāvo veditavyaḥ āha yuktaṃ tāvad vītarāgachadmasthe mohanīyābhāvāt tatkṛtavakṣyamāṇāṣṭapariṣahābhāvāc caturdaśaniyamavacanam sūkṣmasāṃparāye tu mohodayasadbhāvāt 'caturdaśa' iti niyamo nopapadyata iti tad ayuktam sanmātratvāt tatra hi kevalo lobhasaṃjvalanakaṣāyodayaḥ so 'py atisūkṣmaḥ tato vītarāgachadmasthakalpatvāt 'caturdaśa' iti niyamas tatrāpi yujyate nanu mohodayasahāyābhāvān mandodayayatvāc ca kṣudādivedanābhāvāt tatsahanakṛtapariṣahavyapadeśo na yuktim avatarati tan na kiṃ kāraṇam śaktimatrasya vivakṣitatvāt sarvārthasiddhidevasya saptamapṛthivīgamanasāmarthyavyapadeśāvat

āha yadi śarīravaty ātmani pariṣahasaṃnidhānaṃ pratijñāyate atha bhavati utpannakevalajñāne karmacatuṣṭayaphalānubhavanavaśavartini kiyanta upanipatantīty atrocyate tasmin punaḥ

nirastaghātikarmacatuṣṭaye jine vedanīyasadbhāvāt tadāsrayā ekādaśapariṣahāḥ saṃti nanu ca mohanīyodayasahāyābhāvāt kṣudādivedanābhāve pariṣahavyapadeśo na yuktaḥ satyam evam etat vedanābhāve 'pi dravyakarmasadbhāvāpekṣayā pariṣahopacāraḥ kriyate niravaśeṣanirastajñānātiśaye cintānirodhābhāve 'pi tatphalakarma nirharaṇaphalāpekṣayā dhyānopacāravat athavā ekādaśa jine 'na saṃti' iti vākyaśeṣaḥ kalpanīyaḥ sopaskāratvāt sūtrāṇām kalpyo hi vākyaśeṣo vākyaṃ ca vaktary adhīnam ity upagamāt mohodayasahāyīkṛtakṣudādivedanābhāvāt 'na santi' iti vākyaśeṣaḥ

āha yadi sūkṣmasāṃparāyādiṣu vyastāḥ pariṣahāḥ atha samastāḥ tāḥ kveti

sāṃparāyaḥ kaṣāyaḥ bādaraḥ sāṃparāyo yasya sa bādarasāṃparāya iti nedaṃ guṇasthānaviśeṣagrahaṇam kiṃ tarhi arthanirdeśaḥ tena pramattādīnāṃ saṃyatānāṃ grahaṇam teṣu hi akṣīṇakaṣāyadoṣatvāt sarve saṃbhavanti kasmin punaś cāritre sarveṣāṃ saṃbhavaḥ sāmāyikacchedopasthāpanaparihāraviśuddhisaṃyameṣu pratyekaṃ sarveṣāṃ saṃbhavaḥ

āha gṛhītam etat pariṣahāṇāṃ sthānaviśeṣāvadhāraṇaṃ idaṃ tu na vidmaḥ kasyāḥ prakṛteḥ kaḥ kārya ity atrocyate

idam ayuktam vartate kim atrāyuktam jñānāvaraṇe satyajñānapariṣaha upapadyate prajñāpariṣahaḥ punas tadapāye bhavatīti kathaṃ jñānāvaraṇe syāt ity atrocyate kṣāyopaśamikī prajñā anyasmin jñānāvaraṇe sati madaṃ janayati na sakalāvaraṇakṣaye iti jñānāvaraṇe satīty upapadyate

punar aparayo pariṣahayoḥ prakṛtiviśeṣanirdeśārtham āha

yathāsaṃkhyam abhisaṃbandhaḥ darśanamohe adarśanapariṣaho lābhāntarāye alābhapariṣaha iti āha yady ādye mohanīyabhede ekaḥ pariṣahaḥ atha dvitīyasmin kati bhavantīty atrocyate

puṃvedodayādinimittatvān nāgnyādipariṣahāṇāṃ mohodayanimittatvaṃ pratipadyāmahe niṣadyāpariṣahasya katham tatrāpi prāṇipīḍāparihārārthatvāt mohodaye sati prāṇipīḍāpariṇāmaḥ saṃjāyata iti

avaśiṣṭapariṣahaprakṛtiviśeṣapratipādanārtham āha

uktā ekādaśa pariṣāhāḥ tebhyo 'nye śeṣāḥ vedanīye sati 'bhavanti' iti vākyaśeṣaḥ ke punas te kṣutpipāsāśītoṣṇadaṃśamaśakacaryāśayyāvadharogatṛṇasparśamalapariṣahāḥ

āha vyākhyātanimittalakṣaṇavikalpāḥ pratyātmani prādurbhavantaḥ kati yugapad avatiṣṭhanta ity atrocyate

āṅabhividhyarthaḥ tena ekonaviṃśatir api kvacit yugapat saṃbavatīty avagamyate tat katham iti ced ucyate śītoṣṇapariṣahayor ekaḥ śayyāniṣadyācaryāṇāṃ cānyatama eva bhavati ekasminn ātmani kutaḥ virodhāt tattrayāṇām apagame yugapad ekātmanītareṣāṃ saṃbhavād ekonaviṃśativikalpā boddhavyāḥ nanu prajñājñānayor api virodhād yugapad asaṃbhavaḥ śrutajñānāpekṣayā prajñāpariṣahaḥ avadhijñānādyabhāvāpekṣayā ajñānapariṣaha iti nāsti virodhaḥ

āha uktā guptisamitidharmānuprekṣāpariṣahajayāḥ saṃvarahetavaḥ pañca saṃvarahetuś cāritrasaṃjño vaktavya iti tadbhedapradarśanārtham ucyate

atra codyate daśavidhe dharme saṃyama uktaḥ sa eva cāritram iti punar grahaṇam anarthakam iti nānarthahakam dharme 'ntarbhūtam api cāritram ante gṛhyate mokṣaprāpteḥ sakṣātkāraṇam iti jñāpanārtham sāmāyikam uktam kva 'digdeśānarthadaṇḍaviratisāmāyika ' ity atra tad dvividhaṃ niyatakālam aniyatakālaṃ ca svādhyāyādi niyatakālam īryāpathādyaniyatakālam pramādakṛtānarthaprabandhavilope samyakpratikriyā chedopasthāpanā vikalpanivṛttir vā pariharaṇaṃ parihāraḥ prāṇivadhān nivṛttiḥ tena viśiṣṭā śuddhir yasṃims tatparihāraviśuddhicāritram atiśūkṣmakaṣāyatvāt sūkṣmasāṃparāyacāritram mohanīyasya niravaśeṣasyopaśamāt kṣayāc ca ātmasvabhāvāvasthāpekṣālakṣaṇaṃ athākhyātacāritram ity ākhyāyate pūrvacāritrānuṣṭhāyibhir ākhyātaṃ na tatprāptaṃ prāṅmohakṣayopaśamābhyām ity athākhyātam athaśabdasyānantaryārthavṛttitatvān niravaśeṣamohakṣayopaśamānantaram āvirbhavatīty arthaḥ 'yathākhyātam' iti vā yathātmasvabhāvo 'vasthitas tathaivākhyātatvāt 'iti' śabdaḥ parisamāptau draṣṭavyaḥ tato yathākhyātacāritrāt sakalakarmakṣayaparisamāptir bhavtīti jñāpyate sāmāyikādīnām ānupūrvyavacanam uttarottaraguṇaprakarṣakhyāpanārthaṃ kriyate

āha uktaṃ cāritram tadanantaram uddiṣṭaṃ yat 'tapasā nirjarā ca' iti tasyedānīṃ tapaso vidhānaṃ kartavyam ity atrocyate tad dvividhaṃ bāhyam ābhyantaraṃ ca tatpratyekaṃ ṣaḍvidham tatra bāhyabhedapratipattyartham āha

dṛṣṭaphalānapekṣaṃ saṃyamaprasiddhirāgocchedakarmavināśadhyānāgamāvāptyartham anaśanam saṃyamaprajāgaradoṣapraśamasaṃtoṣasvādhyāyādisukhasiddhyartham avamaudaryam bhikṣārthino muner ekāgārādiviṣayaḥ saṃkalpaḥ cintāvarodho vṛttiparisaṃkhyānam āśānivṛttyartham avagantavyam indriyadarpanigrahanidrāvijayasvādhyāyasukhasiddhyādyartho ghṛtādivṛṣyarasaparityāgaś caturthaṃ tapaḥ śūnyāgārādiṣu vivikteṣu jantupīḍāvirahiteṣu saṃyatasya śayyāsanam ābādhātyayabrahmacaryasvādhyāyadhyānādiprasiddhyarthaṃ kartavyam iti paṃcamaṃ tapaḥ ātapasthānaṃ vṛkṣamūlanivāso nirāvaraṇaśayanaṃ bahuvidhapratimāsthānam ity evam ādiḥ kāyakleśaḥ tat ṣaṣṭaṃ tapaḥ tatkim artham dehaduḥkhatitikṣāsukhānabhiṣvaṅgapravacanaprabhāvanādyartham pariṣahasyāsya ca ko viśeṣaḥ yadṛcchayopanipatitaḥ pariṣahaḥ svayaṃkṛtaḥ kāyakleśaḥ bāhyatvam asya kutaḥ bāhyadravyāpekṣatvāt parapratyakṣatvāc ca bāhyatvam

ābyantaratapobhedapradarśanārtham āha

katham asyābhyantaratvam manoniyamanārthatvāt pramādadoṣaparihāraḥ prāyaścittam pūjyeṣv ādaro vinayaḥ kāyaceṣṭayā dravyāntareṇa copāsanaṃ vaiyāvṛttyam jñānabhāvanālasyatyāgaḥ svādhyāyaḥ ātmātmīyasaṃkalpatyāgo vyutsargaḥ cittavikṣepatyāgo dhyānam

tadbhedapratipādanārtham āha

'yathākramam' iti vacanān navabhedaṃ prāyaścittam vinayaś caturvidhaḥ vaiyāvṛttyaṃ daśavidham svādhyāyaḥ pañcavidhaḥ dvibhedo vyutsarga ity abhisaṃbadyate 'prāgdhyānāt' iti vacanaṃ dhyānasya bahuvaktavyatvāt paścād vakṣyata iti

ādyasya bhedasvarūpanirjñānārtham āha

tatra gurave pramādanivedanaṃ daśadoṣavivarjitam ālocanam mithyāduṣkṛtābhidhānād abhivyaktapratikriyaṃ pratikramaṇam saṃsarge sati viśodhanāt tadubhayam saṃsaktānnapānopakaraṇādivibhajanaṃ vivekaḥ kāyotsargādikaraṇaṃ vyutsargaḥ anaśanāvamaudaryādilakṣaṇaṃ tapaḥ divasapakṣamāsādinā pravrajyāhāpanaṃ chedaḥ pakṣamāsādivibhāgena dūrataḥ parivarjanaṃ parihāraḥ punar dīkṣāprāpaṇam upasthāpanā

vinayavikalpapratipattyartham āha

'vinayaḥ' ity adhikāreṇābhisaṃbandhaḥ kriyate jñānavinayo darśanavinayaś cāritravinaya upacāravinayaś ceti sabahumānaṃ mokṣārthaṃ jñānagrahaṇābhyāsasmaraṇādir jñānavinayaḥ śaṃkādidoṣavirahitaṃ tattvārthaśraddhānaṃ darśanavinayaḥ tadvataś cāritre samāhitacittatā cāritravinayaḥ pratyakṣeṣv ācāryādiṣv abhyuthānābhigamanāñjalikaraṇādir upacāravinayaḥ parokṣeṣv api kāyavāṅmano 'bhiraṃjalikriyāguṇasaṃkīrtanānusmaraṇādiḥ

vaiyāvṛttyabhedapratipādanārtham āha

vaiyāvṛttyaṃ daśadhā bhidyate kutaḥ viṣayabhedāt ācāryavaiyāvṛttyam upādhyāyavaiyāvṛttyam ity ādi tatra ācaranti tasmād vratānīty ācāryaḥ mokṣārthaṃ śāstram upetya tasmād adhīyata ity upādhyāyaḥ mahopavāsādyanuṣṭhāyī tapasvī śikṣāśīlaḥ śaikṣaḥ rujādikliṣṭaśarīro glānaḥ gaṇaḥ sthavirasaṃtatiḥ dīkṣakācāryaśiṣyasaṃstyāyaḥ kulam cāturvarṇaśramaṇanivahaḥ saṃghaḥ cirapravrajitaḥ sādhuḥ manojño lokasaṃmataḥ teṣāṃ vyādhipariṣahamithyātvādyupanipāte kāyaceṣṭayā dravyāntareṇa vā tatpratīkāro vaiyāvṛttyaṃ samādhyādhānavicikitsābhāvapravacanavātsalyādyabhivyaktyartham

svādhyāyavikalpavijñānārtham āha

niravadyagranthārthobhayapradānaṃ vācanā saṃśayachedāya niścitabalādhānāya vā parānuyogaḥ pracchanā adhigatārthasya manasābhyāso 'nuprekṣā ghoṣaśuddhaṃ parivartanam āmnāyaḥ dharmakathādyanuṣṭhānaṃ dharmopadeśaḥ sa eṣa pañcavidhaḥ svādhyāyaḥ kim arthaḥ prajñātiśayaḥ praśastādhyavasāyaḥ pramasaṃvegas tapovṛddhir aticāraviśuddhir ity evam ādy arthaḥ

vyutsargabhedanirjñānārtham āha

vyutsarjanaṃ vyutsargas tyāgaḥ sa dvividhaḥ bāhyopadhityāgo 'bhyantaropadhityāgaś ceti anupāttaṃ vastudhanadhānyādi bāhyopadiḥ krodhādir ātmabhāvo 'bhyantaropadhiḥ kāyatyāgaś ca niyatakālo yāvaj jīvaṃ vābhyantaropadhityāga ity ucyate sa kim arthaḥ nissaṅgatvanirbhayatvajīvitāśāvyudāsādyarthaḥ

yad bahuvaktavyaṃ dhyānam iti pṛthagvyavasthāpitaṃ tasyedānīṃ bhedābhidhānaṃ prāptakālam tadullaṅghya tasya prayoktṛsvarūpakālanirddhāraṇārtham ucyate

ādyaṃ tritayaṃ saṃhananam uttamaṃ vajrarṣabhanārācasaṃhananaṃ vajranārācasaṃhananaṃ nārācasaṃhananam iti tat tritayam api dhvānasya sādhanaṃ bhavati mokṣasya tu ādyam eva taduttamaṃ saṃhananaṃ yasya so 'yam uttamasaṃhananaḥ tasyottamasaṃhananasyeti anena prayoktṛnirdeśaḥ kṛtaḥ agraṃ mukham ekam agramasyety ekāgraḥ nānārthāvalambanena cintā parispandavatī tasyā anyāśeṣamukhebyo vyāvartya ekasminn agre niyama ekāgracintānirodha ity ucyate anena dhānyasvarūpam uktaṃ bhavati muhūrta iti kālaparimāṇam antargato muhūrto 'ntarmuhūrtaḥ 'ā antarmuhūrtāt' ity anena kālavidhiḥ kṛtaḥ tataḥ paraṃ durdharatvāt ekagracintāyāḥ cintāyā nirodho yadi dhyānaṃ nirodhaś cābhāvaḥ tena dhyānam asatkharaviṣāṇavatsyāt naiṣa doṣaḥ anyacintānivṛttyapekṣayāsad iti cocyate svaviṣayākārapravṛtteḥ sad iti ca abhāvasya bhāvāntaravād hetvaṅgatvādibhir abhāvasya vastudharmatvasiddheś ca athavā nāyaṃ bhāvasādhanaḥ nirodhanaṃ nirodha iti kiṃ tarhi karmasādhanaḥ 'nirudhyata iti nirodhaḥ' cintā cāsau nirodhaś ca cintānirodha iti etad uktaṃ bhavati jñānam evāparispandāgniśikhāvadavabhāsamānaṃ dhyānam iti

tadbhedapradarśanārtham āha

ṛtaṃ duḥkhaṃ ardanam ārtivā tatra bhavam ārtam rudraḥ krūrāśayas tasya karma tatra bhavaṃ vā raudram dharmo vyākhyātaḥ dharmād anapetaṃ dharmyam śuciguṇayogāc chuklam tadetac caturvidhaṃ dhyānaṃ dvaividhyam aśnute kutaḥ praśastāpraśastabhedāt apraśastam apuṇyāsravakāraṇatvāt karmanirdahanasāmarthyāt praśastam

kiṃ punas tad iti ced ucyate

param uttaram antyam antyaṃ śuklam tatsāmīpyād dharmyam api 'param' ity upacaryate dvivacananirdeśasāmarthyād gaunam api gṛhyate 'pare mokṣahetū' iti vacanāt pūrve ārtaraudre saṃsārahetū ity uktam bhavati kutaḥ tṛtīyasya sādhyasyābhāvāt

tatrārtraṃ caturvidham tatrādivikalpalakṣaṇanirdeśārtham āha

amanojñam apriyaṃ viṣakaṇṭakaśatruśastrādi tadbādhākaraṇatvād 'amanojñam' ity ucyate tasya saṃprayoge sa kathaṃ nāma me na syād iti saṃkalpaś cintāprabandhaḥ smṛtisamanvāhāraḥ prathaman ārtam ity ākhyāyate

dvitīyasya vikalpasya lakṣaṇanirdeśārtham āha

kuto viparitam pūvoktāt tenaitad uktam bhavati manojñasyeṣṭasya svaputradāradhanāder viprayoge tatsaṃprayogāya saṃkalpaś cintāprabandho dvitīyam ārtam avagantavyam

tṛtīyasya vikalpasya lakṣaṇapratipādanārtham āha

'vedanā' śabdaḥ sukhe duḥkhe ca vartamāno 'pi ārtasya prakṛtatvād duḥkhavedanāyāṃ pravartate tasyā vātādivikārajanitavedanāyā upanipāte tasyā apāyaḥ katham nāma me syād iti saṃkalpaś cintāprabandhas tṛtīyam ārtam ucyate

turīyasārtasya lakṣaṇanirdeśārtham āha

bhogākāṅṣāturyasyānāgataviṣayaprāptiṃ prati manaḥpraṇidhānaṃ saṃkalpaś cintāprabandhas turīyam ārtaṃ nidānam ity ucyate

tadetac caturvidham ārtam kiṃ svāmikam iti ced ucyate

aviratā asaṃyatasamyagdṛṣṭyantāḥ deśaviratāḥ saṃyatāsaṃyatāḥ pramattasaṃyatāḥ paṃcadaśapramādopetāḥ kriyānuṣṭhāyinaḥ tatrāviratadeśaviratānāṃ caturvidham apy ārtaṃ bhavati asaṃyamapariṇāmopetatvāt pramattasaṃyatānāṃ tu nidānavarjyam anyad ārtatrayaṃ pramādodayodrekāt kadācit syāt

vyākhyātam ārtaṃ saṃjñādibhiḥ dvitīyasya saṃjñāhetusvāminirddhāraṇārtham āha

hiṃsādīny uktalakṣaṇāni tāni raudradhyānotpatter nimittī bhavantīti hetunirdeśo vijñāyate tena hetunirdeśenānuvartamānaḥ 'smṛtisamanvāhāraḥ' abhisaṃbadhyate hiṃsāyāḥ smṛtisamanvāhāra ity ādi tadraudradhyānam aviratadeśaviratayor veditavyam aviratasya bhavatu raudradhyānaṃ deśaviratasya katham tasyāpi hiṃsādyāveśād vittādisaṃrakṣaṇatantratvāc ca kadācid bhavitum arhati tatpunar nārakādīnām akāraṇaṃ samyagdarśanasāmarthyāt saṃyatasya tu na bhavaty eva tadārambhe saṃyamapracyuteḥ

āha 'pare mokṣahetū' upadiṣṭe tatrādyasya mokṣahetor dhyānasya bhedasvarūpasvāminirdeśaḥ kartavya ity ata āha

vicayanaṃ vicayo viveko vicāraṇety arthaḥ ājñāpāyavipākasaṃsthānānāṃ vicaya ajñāpāyavipākasaṃsthānavicayaḥ 'smṛtisamanvāhāraḥ' ity anuvartate sa pratyekaṃ saṃbadhyate ājñāvicayāya smṛtisamanvāhāraḥ ity ādi tad yathā upadeṣṭur abhāvān mandabuddhitvāt karmodayāt sūkṣmatvāc ca padārthanāṃ hetudṛṣṭāntoparame sati sarvajñapraṇītam āgamaṃ pramāṇī kṛtya ittham evedaṃ nānyathāvādino jināḥ iti gahanapadārthaśraddhānād arthāvadhāraṇam ājñāvicayaḥ athavā svayaṃ viditapadārthatattvasya sataḥ paraṃ prati pipādayiṣoḥ svasiddhāntāvirodhena tattvasamarthanārthaṃ tarkanayapramāṇayojanaparaḥ smṛtisamanvāhāraḥ sarvajñājñāprakāśanārthatvād ājñāvicaya ity ucyate jātyandhavanmityhyādṛṣṭayaḥ sarvajñapraṇītamārgād vimukhā mokṣārtinaḥ samyaṅmārgāparijñānāt sudūram evāpayantīti sanmārgāpāyacintanam apāyavicayaḥ athavā mithyādarśanajñānacāritrebhyaḥ kathaṃ nama ime prāṇino 'peyur iti smṛtisamanvāhāro 'pāyavicayaḥ karmaṇāṃ jñānāvaraṇādīnāṃ dravyakṣetrakālabhavabhāvapratyayaphalānubhavanaṃ prati praṇidhānaṃ vipākavicayaḥ lokasaṃsthānasvabhāvavicayāya smṛtisamanvāhāraḥ saṃsthānavicayaḥ uttamakṣamādilakṣaṇo dharma uktaḥ tasmād anapetaṃ dharmyaṃ dhyānaṃ caturvikalpam avaseyam tadaviratadeśaviratapramattāpramattasaṃyatānāṃ bhavati

trayāṇāṃ dhyānānāṃ nirupaṇaṃ kṛtam idānīṃ śukladhyānaṃ nirūpapayitavyam tadvakṣyamāṇacaturvikalpam tatrādyayoḥ svāminirdeśārtham idam ucyate

vakṣyamāṇeṣu śukladhyānavikalpeṣu ādye śukladhyāne pūrvavido bhavataḥ śrutakevalina ity arthāḥ 'ca' śabdena dharmyam api samuccīyate tatra vyākhyānato viśeṣapratipattiḥ iti śreṇyārohaṇāt prāgdharmyaṃ śreṇyoḥ śukle iti vyākhyāyate

avaśiṣṭe kasya bhavata ity atrocyate

prakṣīṇasakalajñānāvaraṇasya kevalinaḥ sayogasyāyogasya ca pare uttare śukladhyāne bhavataḥ

yathāsaṃkhyaṃ tadvikalpapratipādanārtham idam ucyate

pṛthaktvavitarkam ekatvavitarkaṃ sūkṣmakriyāpratipāti vyuparatakriyānivarti ceti caturvidhaṃ śukladhyānam vakṣyamāṇalakṣaṇam apekṣya sarveṣām anvarthatvam avaseyam

tasyālambanaviśeṣanirdhāraṇārtham āha

'yoga' śabdo vyākhyātārthaḥ 'kāyavāṅmanaḥkarma yogaḥ' iti atra uktaiś caturbhiḥ śukladhyānavikalpais triyogādīnāṃ caturṇāṃ yathāsaṃkhyenābhisaṃbandho veditavyaḥ triyogasya pṛthaktvavitarkam triṣu yogeṣv ekayogasyaikatvavitarkam kāyayogasya sūkṣmakriyāpratipāti ayogasya vyutparatakriyānivartīti

tatrādyayor viśeṣapratipattyartham idam ucyate

eka āśrayo yayos te ekāśraye ubhe 'pi pariprāptaśrutajñānaniṣṭhenārabhyete ity arthaḥ vitarkaś ca vīcāraś ca vitarkavīcārau saha vitarkavīcārābhyāṃ varteta iti savitarkavīcāre pūrve pṛthaktvaikatvavitarke ity arthaḥ

tatra yathāsaṃkhyaprasaṃge 'niṣṭanivṛttyartham idam ucyate

pūrvayor yad dvitīyaṃ tad avīcāraṃ pratyetavyam etad uktaṃ bhavati ādyaṃ savitarkaṃ savīcāraṃ ca bhavati dvitīyaṃ savitarkam avīcāraṃ ceti

atha vitarkavīcārayoḥ kaḥ prativiśeṣa ity atrocyate

viśeṣeṇa tarkaṇam ūhanaṃ vitarkaḥ śrutajñānam ity arthaḥ

atha ko vīcāraḥ

artho dhyeyo dravyaṃ paryāyo vā vyañjanaṃ vacanam yogaḥ kāyavāṅmanaḥkarmalakṣaṇaḥ saṃkrāntiḥ parivartanam dravyaṃ vihāya paryāyam upaiti paryāyaṃ tyaktvā dravyam ity arthasaṃkrāntiḥ ekaṃ śrutavacanam upādāya vacanāntaram ālambate tad api vihāyānyad iti vyañjanasaṃkrāntiḥ kāyayogaṃ tyaktvā yogāntaraṃ gṛhṇāti yogāntaraṃ ca tyaktvā kāyayogam iti yogasaṃkrāntiḥ evaṃ parivartanaṃ vīcāra ity ucyate tad etat sāmānyaviśeṣanirdiṣṭaṃ caturvidhaṃ dharmyaṃ śuklaṃ ca pūvoditaguptyādibahuprakāropāyaṃ saṃsāranivṛttaye munir dhyātum arhati kṛtaparikarmā tatra dravyaparamāṇuṃ bhāvaparamāṇuṃ vā dhyāyan nāhitavitarkasāmarthyaḥ arthavyaṃjane kāyavācasī ca pṛthaktvena saṃkrāmatā manasāparyaptibālotsāhavadavyavasthitenāniśitenāpi śastreṇa cirāt taruṃ chindann iva mohaprakṛtīr upaśamayan kṣapayaṃś ca pṛthaktvavitarkavīcāradhyānabhāgbhavati sa eva punaḥ samūlatūlaṃ mohanīyaṃ nirdidhakṣann anantaguṇaviśuddhiyogaviśeṣam āśritya bahutarāṇāṃ jñānāvaraṇasahāyībhūtānāṃ prakṛtīnāṃ bandhaṃ nirundhan sthiti hrāsakṣayau ca kurvan śrutajñānopayogo nivṛttārthavyaṃjanayogasaṃkrāntiḥ avicalitamanāḥ kṣīṇakaṣāyo vaiḍūryamaṇir iva nirupalepo dhyātvā punar na nivartata ity uktam ekatvavitarkam evam ekatvavitarkaśukladhyānavaiśvānaranirdagdhavātikarmendhanaḥ prajvalitakevalajñānagabhastimaṇḍalo meghapañjaranirodhanirgata iva gharmaraśmir vā bhāsamāno bhagavāṃs tīrthakara itaro vā kevalī lokeśvarāṇām abhigamanīyo 'rcanīyaś cotkarṣeṇāyuṣaḥ pūvakoṭīṃ deśonāṃ viharati sa yadāntarmuhūrtaśeṣāyuṣkas tattulyasthitivedyanāmagotraś ca bhavati tadā sarvaṃ vāṅmanasayogaṃ bādarakāyayogaṃ ca parihāpya sukṣmakāyayogālambanaḥ sukṣmakriyāpratipātidhyānam āskanditum arahatīti yadā punar antarmuhūrtaśeṣāyuṣkas tato 'dhikasthitiśeṣakarmatrayo bhavati sayogī tadātmopayogātiśayasya sāmāyikasahāyasya viśiṣṭakaraṇasya mahāsaṃvarasya laghukarmaparipācanasyāśeṣakarmareṇupariśātanaśaktisvābhāvyād daṇḍakapāṭaprataralokapūraṇāni svātmapradeśavisarpaṇataś caturbhiḥ samayaiḥ kṛtvā punar api tāvadbhir eva samayaiḥ samupahṛtapradeśavisaraṇaḥ samīkṛtasthitiśeṣakarmacatuṣṭayaḥ pūrvaśarīrapramāṇo bhūtvā sūkṣmakāyayogena sūkṣmakriyāpratipāti dhyānaṃ dhyāyati tatas tadantaraṃ samucchinnakriyānivartidhyānam ārabhate samucchinnaprāṇāpānapracārasarvakāyavāṅmanoyogasarvapradeśaparispandakriyāvyāpāratvāt samucchinnakriyānivartīty ucyate tasmin samucchinnakriyānivartini dhyāne sarvabandhāsravanirodhasarvaśeṣakarmaśātanasāmarthyopapatter ayogikevalinaḥ saṃpūrṇayathākhyātacāritrajñānadarśanaṃ sarvasaṃsāraduḥkhajālapariṣvaṅgocchedajananaṃ sākṣān mokṣakāraṇam upajāyate sa punar ayogakevalī bhagavāṃs tadā dhyānātiśayāgninirdagdhasarvamalakalaṃkabandhano nirastakiṭṭadhātupāṣāṇajātyakanakavallabdhātmā parinirvāti tadetad dvividhaṃ tapo 'bhinavakarmāsravanirodhahetutvāt saṃvarakāraṇaṃ prāktanakarmarajovidhūnananimittatvān nirjarāhetur api bhavati

atrāha samyagdṛṣṭayaḥ kiṃ sarve samanirjarā āhosvit kaścid asti prativiśeṣa ity atrocyate

ta ete daśa samyagdṛṣṭyādayaḥ kramaśo 'saṃkhyeyaguṇanirjarāḥ tad yathā bhavyaḥ paṃcedndriyasaṃjñī paryāptakā pūrvoktakālalabdhyādisahāyaḥ pariṇāmaviśuddhyā vardhamānaḥ krameṇāpūrvakaraṇādisopānapaṅktyotplavamāno bahutarakarmanirjaro bhavati sa eva punaḥ prathamasamyaktvaprāptinimittasaṃnidhāne sati samyagdṛṣṭir bhavann asaṃkhyeyaguṇanirjaro bhavati sa eva punaś cāritramohakarmavikalpāpratyākhyānāvaraṇakṣayopaśamanimittapariṇāmaprāptikāle viśuddhiprakarṣayogāt śrāvako bhavan tato 'saṃkhyeyaguṇanirjaro bhavati sa eva punaḥ pratyātyākhyānāvaraṇakṣayopaśamakāraṇapariṇāmaviśuddhiyogād viratavyapadeśabhāk san tato 'saṃkhyeyaguṇanirjaro bhavati sa eva punar anantānubandhikrodhamānamāyālobhānāṃ viyojanaparo bhavati yadā tadā pariṇāmaviśuddhiprakarṣayogāt tato 'saṃkhyeyaguṇanirjaro bhavati sa eva punar darśanamohaprakṛtitrayatṛṇanicayaṃ nirdidhakṣan pariṇāmaviśuddhyatiśayayogād darśanamohakṣapakavyapadeśabhāk pūvoktād asaṃkhyeyaguṇanirjaro bhavati evaṃ saḥ kṣāyikasamyagdṛṣṭir bhūtvā śreṇyārohanābhimukhaś cāritramohopaśamaṃ prati vyāpriyamāṇo viśuddhiprakarṣayogād upaśamakavyapadeśam anubhavan pūrvoktād asaṃkhyeyaguṇanirjaro bhavati sa eva punar aśeṣacāritramohopaśamanimittasaṃnidhāne pariprāprāptopaśāntakaṣāyavyapadeśaḥ pūrvoktād asaṃkhyeyaguṇanirjaro bhavati sa eva punaś cāritramohakṣapaṇaṃ pratyabhimukhaḥ pariṇāmaviśuddhyā varddhamānaḥ kṣapakavyapadeśam anubhavan pūrvoktād asaṃkhyeyaguṇanirjaro bhavati sa yadā niḥśeṣacāritramohakṣapaṇakāraṇapariṇāmābhimukhaḥ kṣīṇakaṣāyavyapadeśam āskandan pūrvoktād asaṃkhyeyaguṇanirjaro bhavati sa eva dvitīyaśukladhyānānalanirdagdhaghātikarmanicayaḥ san jinavyapadeśabhāk pūrvoktād asaṃkhyeyaguṇanirjaro bhavati

āha samyagdarśanasaṃnidhāne 'pi yady asaṃkhyeyaguṇanirjaratavāt parasparato na sāmyam esāṃ kiṃ tarhi śravakavad amī viratādayo guṇabhedān na nirgranthatām arhantīti ucyate naitad evam kutaḥ yasmād guṇabhedād anyo 'nyaviśeṣe 'pi naigamādinayavyāpārāt sarve 'pi hi bhavanti

uttaraguṇabhāvanāpetamanaso vrateṣv api kvacit kadācit paripūrṇatām apariprāpnuvanto 'viśuddhapulākasādṛśyāt pulākā ity ucyante nairgranthyaṃ prati sthitā akhaṇḍitavratāḥ śarīropakaraṇavibhūṣānuvartino 'viviktaparivārā mohaśabalayuktā bakuśāh śabalaparyāyavācī bakuśaśabdaḥ kuśīlā dvividhāḥ pratisevanākuśīlāḥ kaṣāyakuśīlā iti aviviktaparigrahāḥ paripūrṇobhayāḥ kathaṃcid uttaraguṇavirādhinaḥ pratisevanākuśīlāḥ vaśīkṛtānyakaṣāyodayāḥ saṃjvalanamātratantrāḥ kaṣāyakuśīlāḥ udakadaṇḍarājivadanabhivyaktodayakarmāṇaḥ ūrdhvaṃ muhūrtād udbhidyamānakevalajñānadarśanabhājo nirgranthāḥ prakṣīṇaghātikarmāṇaḥ kevalino dvividhāḥ snātakāḥ ta ete paṃcāpi nirgranthāḥ cāritrapariṇāmasya prakarṣāprakarṣabhede saty api naigamasaṃgrahādinayāpekṣayā sarve 'pi te nirgranthā ity ucyante

teṣāṃ pulākādīnāṃ bhūyo 'pi viśeṣapratipattyartham āha

te ete pulākādayaḥ saṃyamādibhir aṣṭabhir anuyogaiḥ sādhyā vyākheyāḥ tad yathā pulākabakuśapratisevanākuśīlā dvayoḥ saṃyamayoḥ sāmāyikacchedopasthāpanayor vartante kaṣāyakuśīlā dvayoḥ saṃyamayoḥ parihāraviśuddhisūkṣamasāmparāyayoḥ pūrvayoś ca nirgranthasnātakā ekasminn eva yathākhyātasaṃyame santi

śrutaṃ pulākabakuśapratisevanākuśīlā utkarṣenābhinnākṣaradaśapūrvadharāḥ kaṣāyakuśīlā nirgranthāś caturdaśapūrvadharāḥ jaghanyena pulākasya śrutam ācāravastu bakuśakuśīlanirgranthānāṃ śrutam aṣṭau pravacanamātaraḥ snātakā apagataśrutāḥ kevalinaḥ

pratisevanā pañcānāṃ mūlaguṇanāṃ rātribhojanavarjanasya ca parābhiyogād balād anyatamaṃ pratisevamānaḥ pulāko bhavati bakuśo dvividhaḥ upakaraṇabakuśaḥ śarīrabakuśaś ceti tatropakaraṇabakuśo bahuviśeṣayuktopakaraṇākāṃkṣī śarīrasaṃskārasevī śarīrabakuśaḥ pratisevanākuśīlo mūlaguṇān avirādhayann uttaraguṇeṣu kāṃcid virādhanāṃ pratisevate kaṣāyakuśīlanirgranthasnātakānāṃ pratisevanā nāsti

tīrtham iti sarve sarveṣāṃ tīrthakarāṇāṃ tīrtheṣu bhavanti

liṅgaṃ dvividhaṃ dravyaliṅgaṃ bhāvaliṅgaṃ ceti bhāvaliṅgaṃ pratītya sarve paṃca nirgranthā liṃgino bhavanti dravyaliṃgaṃ pratītya bhājyāḥ

leśyāḥ pulākasyottarās tisraḥ bakuśapratisevanākuśīlayoḥ ṣaḍ api kaṣāyakuśīlasya catasra uttaraḥ sūkṣmasāmparāyasya nirgranthasnātakayoś ca śuklaiva kevalā ayogā aleśyāḥ

upapādaḥ pulākasyotkṛṣṭa upapāda utkṛṣṭasthitideveṣu sahasrāre bakuśapratisevanākuśīlayor dvāviṃśatisāgaropamasthitiṣu āraṇācyutakalpayoḥ kaṣāyakuśīlanirgranthayos trayastriṃśatsāgaropamasthitiṣu sarvārthasiddhau sarveṣām api jaghanyaḥ saudharmakalpe dvisāgaropamasthitiṣu snātakasya nirvāṇam iti

sthānam asaṃkhyeyāni saṃyamasthānāni kaṣāyanimittāni bhavanti tatra sarvajaghanyāni labdhisthānāni pulākakaṣāyakuśīlayoḥ tau yugapad asaṃkhyeyāni sthānāni gacchataḥ tataḥ pulāko vyucchidyate kaṣāyakuśīlas tato 'saṃkhyeyāni sthānāni gacchaty ekākī tataḥ kaṣāyakuśīlapratisevanākuśīlabakuśā yugapad asaṃkhyeyāni sthānāni gacchanti tato bakuśo vyucchidyate tato 'py asaṃkhyeyāni sthānāni gatvā pratisevanākuśīlo vyucchidyate tato 'py asaṃkhyeyāni sthānāni gatvā kaṣāyakuśīlo vyucchidyate ata ūrdhvam akaṣāyasthānāni nirgranthaḥ pratipadyate so 'py asaṃkhyeyāni sthānāni gattvā vyucchidyate ata ūrdhvam ekaṃ sthānaṃ gatvā snātako nirvāṇaṃ prāpnotīty eteṣāṃ saṃyamalabdhir anantaguṇā bhavati

āha ante nirdiṣṭasya mokṣasyedānīṃ svarūpābhidhānaṃ prāptakālam iti satyam evam mokṣaprāptiḥ kevalajñānāvāptir pūrvaketi kevalajñānotpattikāraṇam ucyate

iha vṛttikaraṇaṃ nyāyyam kutaḥ laghutvāt katham ekasya 'kṣaya' śabdasyākaraṇād vibhaktyantaranirdeśasya cābhāvāt 'ca' śabdasya cāprayogāl laghu sūtraṃ bhavati 'mohajñānadarśanāvaraṇāntarāyakṣayāt kevalam' iti satyam etat kṣayakramapratipādanārtho vākyabhedena nirdeśaḥ kriyate prāgeva mohaṃ kṣayam upanīyāntarmuhūrtaṃ kṣīṇakaṣāyavyapadeśam avāpya tato yugapaj jñānadarśanāvaraṇāntarāyāṇāṃ kṣayam kṛtvā kevalam avāpnoti iti tatkṣayo hetuḥ kevalotpatter iti hetulakṣaṇo vibhaktinirdeśaḥ kṛtaḥ kathaṃ prageva mohaḥ kṣayam upanīyate iti ced ucyate bhavyaḥ samyagdṛṣṭiḥ pariṇāmaviśuddhyā vardhamāno 'saṃyatasamyagdṛṣṭisaṃyatāsaṃyatapramattāpramattaguṇasthāneṣu kasmiṃs cin mohasya sapta prakṛtīḥ kṣayam upanīya kṣāyikasamyagdṛṣṭir bhūtvā kṣapakaśreṇyārohanābhimukho 'dhaḥpravṛttakaraṇam apramattasthāne pratipādyāpūrvakaraṇaprayogeṇāpūrvakaraṇakṣapakaguṇasthānavyapadeśam anubhūya tatrābhinavaśubhābhisandhitanūkṛtapāpaprakṛtisthityanubhāgo vivardhitaśubhakarmānubhavo 'nivṛttikaraṇaprāptyānivṛttibādarasāṃparāyakṣapakaguṇasthānam adhiruhya tatra kaṣāyāṣṭakaṃ naṣṭaṃ kṛtvā napuṃsakavedanāśaṃ samāpādya strīvedam unmūlya nokakaṣāyaṣaṭkaṃ puṃvede prakṣipya kṣapayitvā puṃvedaṃ krodhasaṃjvalane krodhasaṃjvalanaṃ mānasaṃjvalane mānasaṃjvalanaṃ māyāsaṃjvalane māyāsaṃjvalanaṃ ca lobhasaṃjvalane krameṇa bādarakṛṣṭivibhāgena vilayam upanīya lobhasaṃjvalanaṃ tanūkṛtya sūkṣmasāmparāyakṣapakatvam anubhūya niravaśeṣaṃ mohanīyaṃ nirmūlakaṣāyaṃ kaṣitvā kṣīṇakaṣāyatām adhiruhyāvatāritamohanīyabhāra upāntyaprathame samaye nidrāpracale pralayam upanīya pañcānāṃ jñānāvaraṇānāṃ caturṇām darśanāvaraṇānāṃ pañcānām antarāyāṇāṃ cāntam ante samupanīya tadanantraṃ jñānadarśanasvabhāvaṃ kevalaparyāyam apratarkyavibhūtiviśeṣam avāpnoti

āha kasmād dhetor mokṣaḥ kiṃ lakṣaṇaś cety atrocyate

mithyādarśanādihetvābhāvād abhinavakarmābhāvaḥ pūrvoditanirjarāhetusaṃnidhāne cārjitakarmanirāsaḥ tābhyāṃ bandhahetvabhāvanirjarābhyām iti hetulakṣaṇavibhaktinirdeśaḥ tato bhavasthitihetusamīkṛtaśeṣakarmāvasthasya yugapad ātyantikaḥ kṛtsnakarmavipramokṣo mokṣaḥ pratyetavyaḥ karmābhāvo dvividhaḥ yatnasādhyo 'yatnasādhyaś ceti tatra caramadehasya nārakatiryagdevāyuṣām abhāvo na yatnasādhyaḥ asattvāt yatnasādhya ita ūrdhvam ucyate asaṃyatasamyagdṛṣṭyādiṣu caturṣu guṇasthāneṣu kasmiṃś cit saptaprakṛtikṣayaḥ kriyate nidrānidrāpracalāpracalāstyānagṛddhinarakagatitiryaggatyekadvitricaturindriyajātinarakagatitiryaggatiprāyogyānupūrvyātapodyotasthāvarasūkṣmasādhāraṇasaṃjñikānāṃ ṣoḍaśānāṃ karmaprakṛtināmanivṛttibādarasāmparāyasthāne yugapat kṣayaḥ kriyate tataḥ paraṃ tatraiva kaṣāyāṣṭakaṃ naṣṭaṃ kriyate napuṃsakavedaḥ strīvedaś ca krameṇa tatraiva kṣayam upayāti nokaṣāyaṣaṭkaṃ ca sahaikenaiva prahāreṇa vinipātayati tataḥ puṃvedasaṃjvalanakrodhamānamāyāḥ krameṇa tatraivātyantikaṃ dvaṃsam āskandanti lobhasaṃjvalanaḥ sūkṣmasāmparāyānte yātyantam nidrāpracale kṣīṇakaṣāyavītarāgacchadmasthasyopāntyasamaye pralayam upavrajataḥ paṃcānāṃ jñānāvaraṇānāṃ caturṇāṃ darśanāvaraṇānāṃ paṃcānām antarāyāṇāṃ ca tasyaivāntyasamaye prakṣayo bhavati anyataravedanīyadevagatyaudārikavaikriyikāhārakataijasakārmaṇaśarīpaṃcabandhanapaṃcasaṃghātasaṃsthānaṣaṭkaudārikavaikriyikāhārakaśarīrāṅgopāṅgaṣaṭsaṃhananapaṃcapraśastavarṇapaṃcāpraśastavarṇagandhadvayapaṃcapraśastarasapañcāpraśastarasasparśāṣṭakadevagatiprāyogyānupūrvyāgurulaghūpaghātaparaghātochvāsapraśastāpraśastavihāyogatyaparyāptakapratyekaśarīrasthirāsthiraśubhāśubhadurbhagasusvaraduḥsvarānādeyāyaśaḥkīrtinirmāṇanāmanīcair gotrākhyā dvāsaptatiprakṛtayo 'yogakevalina upāntyasamaye vināśam upayānti anyataravedanīyamanuṣyāyurmanuṣyagatipañcendriyajātimanuṣyagatiprāyogyānupūrvītrasabādaraparyāptakasubhagādeyayaśaḥkīrtitīrthakaranāmoccairgotrasaṃjñikānāṃ trayodaśānāṃ prakṛtīnām ayogakevalinaś caramasamaye vyucchedo bhavati

āha kim āsāṃ paudgalikīnām eva dravyakarmaprakṛtīnāṃ nirāsān mokṣo 'vasīyate uta bhāvakarmaṇo 'pīty atrocyate

kim 'mokṣaḥ' ity anuvartate bhavyatvagrahaṇam anyapāriṇāmikanivṛttyartham tena pāriṇāmikeṣu bhavyatvasyaupaśamikādīnāṃ ca bhāvānām abhāvān mokṣo bhavatīty abhyupagamyate

āha yady apavargo bhāvoparateḥ pratijñāyate nanu aupaśamikādibhāvanivṛttivatsarvakṣāyikabhāvanivṛttivyapadeśo muktasya prāpnotīti syād etat evaṃ yadi viśeṣo nocyate asty atra viśeṣa ity apavādavidhānārtham idam ucyate

anyatraśabdāpekṣayā 'kā' nirdeśaḥ kevalasamyaktvajñānadarśanasiddhatvebhyo 'nyatrānyasminn ayaṃ vidhir iti yadi catvāra evāvaśiṣyante anantavīryādīnāṃ nivṛttiḥ prāpnoti naiṣa doṣaḥ jñānadarśanāvinābhāvitvād anantavīryādīnām aviśeṣaḥ anantasāmarthyahīnasyānantāvabodhavṛttyabhāvāj jñānamayatvāc ca sukhasyeti anākaratvān muktānām abhāva ity cen na atītānantaraśarīrākāratvāt

syān mataṃ yadi śarīrānuvidhāyī jīvaḥ tadabhāvāt svābhāvikalokākāśapradeśaparimāṇatvāt tāvad visarpaṇaṃ prāpnotīti naiṣa doṣaḥ kutaḥ kāraṇāhāvāt nāmakarmasaṃbandho hi saṃharaṇavisarpaṇakāraṇam tadabhāvāt punaḥ saṃharaṇavisarpaṇābhāvaḥ

yadi kāraṇābhāvān na saṃharaṇaṃ na visarpaṇaṃ tarhi gamanakāraṇābhāvād ūrdhvagamanam api na prāpnoti adhastiryaggamanābhāvāt tato yatra muktas tatraivāvasthānaṃ prāpnotīty atrocyate

tasyānantaram kasya sarvakarmavipramokṣasya āṅabhividhyarthaḥ ūrdhvaṃ gacchatyā lokāntāt

anupadiṣṭahetukam idam ūrdhvagamanaṃ katham adhyavasātum śakyam ity atrocyate

āha hetvarthaḥ puṣkalo 'pi dṛṣṭāntasamarthanam antareṇābhipretārthasādhanāya nālam ity atrocyate

pūrvasūtre vihitānāṃ hetūnām atroktānāṃ dṛṣṭāntānāṃ ca yathāsaṃkhyam abhisaṃbandho bhavati tad yathā kulālaprayogāpāditahastadaṇḍacakrasaṃyogapūrvakaṃ bhramaṇam uparante 'pi tasmin pūrvaprayogād ā saṃskārakṣayād bhramati evaṃ bhavasthenātmanāpavargaprāptaye bahuśo yatpraṇidhānaṃ tadabhāve 'pi tadāveśapūrvakaṃ muktasya gamanam avasīyate kiṃ ca asaṅgatvāt yathā mṛttikālepajanitagauravam alābudravyaṃ jale 'dhaḥpatitaṃ jalakledaviśliṣṭamṛttikābandhanaṃ laghu sadūrdhvam eva gacchati tathā karmabhārākrāntivaśīkṛta ātmā tadāveśavaśāt saṃsāre aniyamena gacchati tatsaṅgavimuktas tūparyevopayāti kiṃ ca bandhacchedāt yathā bījakośabandhacchedāt eraṇḍabījasya gatir dṛṣṭā tathā manuṣyādibhavaprāpakagatijātināmādisakalakarmabandhacchedān muktasya ūrdhvagatir avasīyate kiṃ ca tathāgatipariṇāmāt yathā tiryakplavanasvabhāvasamīraṇasaṃbandhanirutsukā pradīpaśikhā svabhāvād utpatati tathā muktātmāpi nānagativikārakāraṇakarmanirvāraṇe saty ūrdhvagatisvabhāvād ūrdhvam evārohati

āha yadi mukta ūrdhvagatisvabhāvo lokāntād ūrdhvam api kasmān notpatatīty atrocyate

gatyupagrahakāraṇabhūto dharmāstikāyo nopary astīty aloke gamanābhāvaḥ tadabhāve ca lokālokavibhāgābhāvaḥ prasajyate

āha amī parinivṛttā gatijātyādibhedakāraṇābhāvād atītabhedavyavahārā eveti asti kathaṃcid bhedo 'pi kutaḥ

kṣetrādibhir dvādaśābhir anuyogaiḥ siddhāḥ sadhyā vikalpyā ity arthaḥ pratyutpannabhūtānugrahatantranayadvayavivakṣāvaśāt tad yathā kṣetreṇa tāvat kasmin kṣetre sidhyanti pratyutpannagrāhinayāpekṣayā siddhikṣtre svapradeśe ākāśapradeśe vā siddhir bhavati bhūtagrāhinayāpekṣayā janma prati pañcadaśasu karmabhūmiṣu saṃharaṇaṃ prati mānuṣyakṣetre siddhiḥ kālena kasmin kāle siddhiḥ pratyutpannanayāpekṣayā ekasamaye siddhyan siddho bhavati bhūtaprajñāpananayāpekṣayā janmato 'viśeṣeṇotsarpiṇyavasarpiṇyor jātaḥ sidhyati viśeṣeṇāvarsarpiṇyāṃ suṣamaduḥṣamāyā antye bhāge duḥṣamasuṣamāyāṃ ca jātaḥ sidhyati na tu duḥṣamāyāṃ jāto duḥṣamāyāṃ sidhyati anyadā naiva sidhyati saṃharaṇataḥ sarvasmin kāle utsarpiṇyām avasarpiṇyāṃ ca sidhyati gatyā kasyāṃ gatau siddhiḥ siddhigatau manuṣyagatau vā liṃgena kena siddhiḥ avedatvena tribhyo vā vedebhyaḥ siddhir bhāvito na dravyataḥ dravyataḥ pulliṃgenaiva athavā nirgranthaliṃgena sagranthaliṃgena vā siddhir bhūtapūrvanayāpekṣayā tīrthena tīrthasiddhiḥ dvedhā tīrthakaretaravikalpāt itare dvividhāḥ sati tīrthakare siddhā asati ceti cāritreṇa kena sidhyati avyapadeśenaikacatuḥpañcavikalpacāritreṇa vā siddhiḥ svaśaktiparopadeśanimittajñānabhedāt pratyekabuddhabodhitavikalpaḥ jñānena kena ekena dvitricaturbhiś ca jñānaviśeṣaiḥ siddhiḥ ātmapradeśavyāpitvam avagāhanam tad dvividham utkṛṣṭajaghanyabhedāt tatrotkṛṣṭaṃ paṃcadhanuḥśatāni pañcaviṃśatyuttarāṇi jaghanyam ardhacaturthāratnayo deṣonāḥ madhye vikalpāḥ ekasminn avagāhe sidhyati kim antaram sidhyatāṃ siddhānām anantaraṃ jaghanyena dvau samayau utkarṣeṇāṣṭau antaraṃ jaghanyenaikaḥ samayaḥ utkarṣeṇa ṣaṇmāsāḥ saṃkhyā jaghanyena ekasamaye ekaḥ sidhyati utkarṣeṇāṣṭottaraśatasaṃkhyāḥ kṣetrādibhedabhinnānāṃ parasparataḥ saṃkhyāviśesṣo 'lpabahutvam tad yathā pratyutpannanayāpekṣayā siddhikṣetre sidhyantīti nāsty alpabahutvam bhūtapūrvanayāpekṣayā tu cintyate kṣetrasiddhā dvividhā janmataḥ saṃharaṇataś ca tatrālpe saṃharaṇasiddhāḥ janmasiddhāḥ saṃkhyeyaguṇāḥ kṣetrāṇāṃ vibhāgaḥ karmabhūmir akarmabhūmiḥ samudro dvīpa ūrdhvam adhas tiryag iti tatra stokā ūrdhvalokasiddhāḥ adholokasiddhāḥ saṃkhyeyaguṇāḥ tiryaglokasiddhāḥ saṃkhyeyaguṇāḥ sarvataḥ stokāḥ samudrasiddhāḥ dvīpasiddhāḥ saṃkhyeyaguṇāḥ evaṃ tāvad aviśeṣeṇa sarvataḥ stokā lavaṇodasiddhāḥ kālodasiddhāḥ saṃkhyeyaguṇāḥ jambūdvīpasiddhāḥ saṃkhyeyaguṇāḥ dhātakīkhaṇḍasiddhāḥ saṃkhyeyaguṇāḥ puṣkaradvīpārdhasiddhāḥ saṃkhyeyaguṇā iti evaṃ kālādivibhāge 'pi yathā gamam alpabahutvaṃ veditavyam

svargāpavargasukham āptumanobhir āryair jainendraśāsanavarāmṛtasārabhūtā sarvārthasiddhir iti sadbhir upāttanāmā tattvārthavṛttir aniśaṃ manasā pradhāryā tattvārthavṛttim uditāṃ viditārthatattvāḥ śṛṇvanti ye paripaṭhanti ca dharmabhaktyā haste kṛtaṃ paramasiddhisukhāmṛtaṃ tair martyāmareśvarasukheṣu kim asti vācyam yenedam apratihataṃ sakalārthatattvam udyotitaṃ vimalakevalalocanena bhaktyā tam adbhutaguṇaṃ praṇamāmi vīram ārānnarāmaragaṇārcitapādapīṭham